ചെങ്ങന്നൂർ ഗവ. ഐടിഐ വജ്രജൂബിലിയുടെ നിറവിൽ: അക്കാദമിക് ബ്ലോക്കും ഹോസ്റ്റൽ കെട്ടിടവും തുറക്കും
1463577
Thursday, October 24, 2024 5:03 AM IST
ചെങ്ങന്നൂർ: വ്യാവസായിക പരിശീലനവകുപ്പിനു കീഴിൽ പ്രവർത്തിക്കുന്ന ചെങ്ങന്നൂർ ഗവ. ഐടിഐ വജ്രജൂബിലിയുടെ നിറവിൽ അന്താരാഷ്ട്ര നിലവാരത്തിലേക്ക് ഉയരുന്നു. അത്യാധുനിക രീതിയിൽ കാന്പസിൻ നിർമിച്ച പുതിയ അക്കാദമിക് ബ്ലോക്കും ഹോസ്റ്റൽ കെട്ടിടവും തൊഴിൽ മേളയും മന്ത്രി വി. ശിവൻകുട്ടി ഇന്നു രാവിലെ 11.30ന് ഉദ്ഘാടനം ചെയ്യും. മന്ത്രി സജി ചെറിയാൻ അധ്യക്ഷനാകും.
കെഎഎസ്ഇ ചീഫ് ഓപ്പറേറ്റിംഗ് ഓഫീസർ ടി.വി. വിനോദ് റിപ്പോർട്ട് അവതരിപ്പിക്കും. 1960ൽ ആരംഭിച്ച ഗവ. ഐടിഐ കെട്ടിടങ്ങൾ ജീർണാവസ്ഥയിലായതിനെത്തുടർന്ന് മന്ത്രി സജി ചെറിയാൻ നൽകിയ നിർദേശത്തെത്തുടർന്ന് 20 കോടി രൂപ ചെലവഴിച്ചാണ് പുതിയ കെട്ടിട സമുച്ചയം നിർമിച്ചത്. മൂന്നു നിലകളിലായി 72,345 ചതുരശ്ര അടി വിസ്തീർണത്തിൽ നിർമിച്ച അക്കാദമിക് ബ്ലോക്കിൽ 30 സ്മാർട്ട് ക്ലാസ് മുറികൾ, അഞ്ച് വർക്ഷോപ്പുകൾ,
200 സീറ്റുകൾ ഉള്ള കോൺഫ്രറൻസ് ഹാൾ, ഡ്രോയിംഗ് ഹാൾ, ലൈബ്രറി, സ്റ്റോർ, ശുചിമുറികൾ എന്നിവയടങ്ങുന്നതാണ്. 12,917 ചതുരശ്രയടിയിൽ നാലു നിലകളിലായി നിർമിച്ച ഹോസ്റ്റൽ കെട്ടിടത്തിൽ 68 വിദ്യാർഥികൾക്ക് താമസിക്കാം. വെള്ളിയാഴ്ച നടക്കുന്ന തൊഴിൽമേളയിൽ ടിടികെ പ്രസ്റ്റീജ്, ഒഇഎൻ, ടിവിഎസ് ഉൾപ്പെടെ അന്താരാഷ്ട്ര കമ്പിനികളും ആയിരത്തിലേറെ ഉദ്യോഗാർഥികളും പങ്കെടുക്കും.
പുതിയ കെട്ടിടങ്ങളിൽ ക്ലാസ് മുറികളും ഹോസ്റ്റലും ആരംഭിക്കുന്നതോടെ വിദ്യാർഥികളുടെ പഠന നിലവാരം ഉയർത്താൻ സഹായിക്കുമെന്ന് മന്ത്രി സജി ചെറിയാൻ വാർത്താസമ്മേളനത്തിൽ പറഞ്ഞു.
ഐടിഐ പ്രിൻസിപ്പാൾ സി.എൽ. അനുരാധ, സീനിയർ സൂപ്രണ്ട് കെ.എസ്. സുകേഷ് കുമാർ, പ്ലേസ്മെന്റ് ഓഫീസർ കെ. രതി, ഗ്രൂപ്പ് ഇൻസ്ട്രക്ടർ പി.കെ. മഹേഷ്, സ്റ്റാഫ് സെക്രട്ടറി ബി. ജയകുമാർ, പിടിഎ ട്രഷറർ അഭയ് ഡി. കുറുപ്പ് തുടങ്ങിയവർ വാർത്താ സമ്മേളനത്തിൻ പങ്കെടുത്തു.