ADVERTISEMENT

ADVERTISEMENT

വിദ്യാർഥികളെ എൻഎസ്എസ് അനുമോദിച്ചു

പട്ടിക്കാട്: വിദ്യാഭ്യാസ വകുപ്പിന്‍റെ യുഎസ്എസ് സ്കോളർഷിപ്പ് പരീക്ഷക്കായി വിദ്യാർഥികളെ മാതൃകപരമായി തയാറാക്കിയ മുള്ള്യാകുർശി പിടിഎം എയുപി സ്കൂളിലെ അധ്യാപകരെയും വിദ്യാർഥികളെയും നാഷണൽ സർവീസ് സൊസൈറ്റി കൗണ്‍സിലിംഗ് ആൻഡ് കരിയർ ഗൈഡൻസ് സെന്‍റർ, എം.ടി. മമ്മി ഹാജി വായനശാലയുടെ സഹകരണത്തോടെ അനുമോദിച്ചു.

മുള്ള്യാകുർശി സ്കൂളിൽ നടത്തിയ കൗമാര വിദ്യാഭ്യാസ പരിപാടിയുടെ ഭാഗമായി നടന്ന പരിപാടിയിലാണ് സ്കോളർഷിപ്പ് ക്ലാസുകൾക്ക് നേതൃത്വം നൽകിയ അധ്യാപകർക്കും 72 വിദ്യാർഥികൾക്കും അനുമോദന സാക്ഷ്യ പത്രം നൽകിയത്. ഗവണ്‍മെന്‍റ് ഡെപ്യൂട്ടി സെക്രട്ടറി സി.കെ. ഫൈസൽ പരിപാടി ഉദ്ഘാടനം ചെയ്തു.

ഹെഡ്മാസ്റ്റർ വി.പി. ശരീഫ് അധ്യക്ഷത വഹിച്ചു. എൻഎസ്എസ് സിസിജിസി പ്രോജക്ട് ഡയറക്ടർ കെ.എം. ഫിറോസ്ഖാൻ, മുൻ ഹെഡ്മാസ്റ്റർ അസ്ലം ചെറുവാടി, സീനിയർ അസിസ്റ്റന്‍റ് ജമാൽ ആന്തൂരത്തൊടി, എസ്ആർജി കണ്‍വീനർ മുജീബ്, അധ്യാപകരായ ഹൈദരലി, ജലീൽ, മാനേജ്മെന്‍റ് പ്രധിനിധി കെ.വി. ഷൗക്കത്ത് അലി, എം. മുസ്തഫ എന്നിവർ പ്രസംഗിച്ചു.

ADVERTISEMENT

വേട്ടേക്കോടിനെ വീണ്ടെടുക്കാൻ ഖര മാലിന്യം നീക്കുന്ന പ്രവൃത്തിക്ക് തുടക്കം

മഞ്ചേരി: മഞ്ചേരി നഗരസഭയുടെ ഉടമസ്ഥതയിൽ വേട്ടേക്കോടുള്ള ട്രഞ്ചിംഗ് ഗ്രൗണ്ടിലെ ഖര മാലിന്യം നീക്കം ചെയ്യുന്ന പ്രവൃത്തിക്ക് തുടക്കം. അഡ്വ. യു.എ ലത്തീഫ് എംഎൽഎ ഉദ്ഘാടനം ചെയ്തു. ബയോ മൈനിംഗ് പ്രവൃത്തിയുടെ സ്വിച്ച് ഓണ്‍ കർമം ജില്ലാ കളക്ടർ വി.ആർ. വിനോദ് നിർവഹിച്ചു. കേരള ഖരമാലിന്യ പരിപാലന പദ്ധതിയുമായി സഹകരിച്ചാണ് പ്രവൃത്തി നടത്തുന്നത്. നാഗ്പൂർ ആസ്ഥാനമായി പ്രവർത്തിക്കുന്ന എസ്എംഎസ് കന്പനിയാണ് കരാർ എടുത്തിരിക്കുന്നത്. 1.10 ഏക്കർ ഭൂമിയിൽ നിന്ന് 20902 മെട്രിക് മാലിന്യമാണ് നീക്കം ചെയ്യുന്നത്. രണ്ട് ഷിഫ്റ്റുകളിലായി 24 മണിക്കൂറും യന്ത്രങ്ങൾ ഉപയോഗിച്ചാണ് പ്രവൃത്തി നടക്കുക. ഒരു മാസത്തിനുള്ളിൽ വേട്ടേക്കാട് നിന്ന് മാലിന്യം പൂർണമായും നീക്കം ചെയ്യും. 2.75 കോടിയാണ് ഇതിന് ചെലവ് വരുന്നത്. മാലിന്യം തരംതിരിക്കുന്നതിനാവശ്യമായ ആധുനിക യന്ത്രം കഴിഞ്ഞ ദിവസം വേട്ടേക്കോട് എത്തിച്ചിരുന്നു. ആധുനിക യന്ത്രങ്ങൾ ഉപയോഗിച്ച് മാലിന്യങ്ങൾ ബയോ മൈനിംഗും ബയോ റെമഡിയേഷനും നടത്തി നിലവിലുള്ള ട്രഞ്ചിംഗ് ഗ്രൗണ്ടിന്‍റെ ഭൂമി പഴയ രൂപത്തിലേക്ക് തിരിച്ചെത്തിക്കുകയാണ് ലക്ഷ്യം. കുമിഞ്ഞു കൂടിയ മാലിന്യങ്ങൾ കോരിയെടുത്ത് വേർതിരിച്ച് ഖരമാലിന്യങ്ങൾ സിമന്‍റ് കന്പനിയിലേക്ക് കയറ്റി അയയ്ക്കും. ചടങ്ങിൽ മുനിസിപ്പൽ ചെയർപേഴ്സണ്‍ വി.എം. സുബൈദ അധ്യക്ഷത വഹിച്ചു. വൈസ് ചെയർമാൻ വി.പി. ഫിറോസ്, സ്ഥിരംസമിതി അധ്യക്ഷരായ റഹീം പുതുക്കൊള്ളി, യാഷിക് മേച്ചേരി, എൻ.കെ. ഖൈറുന്നീസ, എൽസി ടീച്ചർ, വാർഡ് കൗണ്‍സിലർ ബേബി കുമാരി, മുനിസിപ്പൽ സെക്രട്ടറി പി. സതീഷ് കുമാർ, ബയോ മൈനിംഗ് പദ്ധതി നിർവഹണത്തിനുള്ള ജില്ലാ മോണിറ്ററിംഗ് ചെയർമാനും എൽഎസ്ജിഡി എക്സിക്യൂട്ടീവ് എൻജിനിയറുമായി സി.ആർ. മുരളീകൃഷ്ണൻ, നഗരസഭാ മുൻ ചെയർമാൻ വല്ലാഞ്ചിറ മുഹമ്മദലി, മഞ്ചേരി അഗ്നിരക്ഷാ നിലയം മേധാവി പി.വി. സുനിൽകുമാർ, ജെ.എ. നുജൂം, റഷീദ് പറന്പൻ, എ.എം. സൈതലവി, കെ. ഉബൈദ്, ആർ.ജെ. രാഗി, ഡോ. സി. ലതിക, എൽ. ദേവിക, ഇ. വിനോദ് കുമാർ, എ. ശ്രീധരൻ, ബീനാസണ്ണി, പി. വിജീഷ്, പ്രസാദ് ഗോപാൽ, പി.പി. സറഫുന്നീസ, സഹദ് മിർസ തുടങ്ങിയവർ പ്രസംഗിച്ചു. മുഖം മിനുക്കാൻ പാർക്ക് വരുന്നു മഞ്ചേരി: വേട്ടേക്കോടിന്‍റെ മുഖച്ഛായ മാറ്റാൻ പാർക്ക് വരുന്നു. മാലിന്യം പൂർണമായി നീക്കം ചെയ്ത ശേഷമാണ് 1.5 ഏക്കർ സ്ഥലത്ത് മഞ്ചേരി നഗരസഭയുടെ നേതൃത്വത്തിൽ പാർക്ക് ഒരുക്കുന്നത്. വർഷങ്ങളായി മാലിന്യം കൊണ്ട് പൊറുതിമുട്ടിയിരിക്കുകയായിരുന്നു പ്രദേശവാസികൾ. കിണറുകളിലെ വെള്ളം പോലും ഉപയോഗിക്കാൻ കഴിയാത്ത അവസ്ഥയായിരുന്നു. വർഷങ്ങളുടെ കാത്തിരിപ്പിന് ശേഷം മാലിന്യ പ്രശ്നത്തിന് ശാശ്വതമായ പരിഹാരമാകുന്നതിന്‍റെ ആശ്വാസത്തിലാണ് വേട്ടേക്കോട് നിവാസികൾ. ഖര മാലിന്യം നീക്കം ചെയ്യുന്പോൾ ഒരു തരത്തിലുള്ള ആശങ്ക വേണ്ടെന്നും എല്ലാവിധ മുൻ കരുതലും സ്വീകരിച്ചിട്ടുണ്ടെന്നും മഞ്ചേരി മുനിസിപ്പൽ ചെയർപേഴ്സണ്‍ വി.എം. സുബൈദ പറഞ്ഞു. ശാസ്ത്രീയമായ രീതിയിലാണ് മാലിന്യം നീക്കം ചെയ്യുന്നത്. വേനൽക്കാലം ആയതിനാൽ തീപിടിത്തം ഒഴിവാക്കാനുള്ള മുൻകരുതലുകളും സ്വീകരിച്ചിട്ടുണ്ട്. പൊടിപടലം തടയുന്നതിനായി ടാങ്കിൽ വെള്ളം എത്തിച്ച് പന്പ് ചെയ്യുന്നുണ്ട്. പ്രവൃത്തി സുതാര്യമാക്കുന്നതിന് പ്രദേശവാസികളെ ഉൾപ്പെടുത്തി വാട്സ്ആപ് ഗ്രൂപ്പിലൂടെ പ്രവൃത്തിയുടെ വിവരങ്ങളും മറ്റും ജനങ്ങളെ അറിയിക്കുന്നുണ്ടെന്നും അവർ പറഞ്ഞു.

വഴിയോര കച്ചവടം ഗതാഗത തടസത്തിനും അപകടങ്ങൾക്കും കാരണമാകുന്നു

എടക്കര: ചുങ്കത്തറ പൂച്ചക്കുത്ത് വളവിലെ വഴിയോര കച്ചവടങ്ങൾ അന്തർസംസ്ഥാന പാതയിൽ ഗതാഗത തടസങ്ങൾക്കും അപകടങ്ങൾക്കും കാരണമാകുന്നു. കെഎൻജി റോഡിൽ പിലാക്കുന്ന് വളവിലും സമീപങ്ങളിലുമാണ് കാലങ്ങളായി ഗുഡ്സ് ഓട്ടോകളിൽ പഴം, പച്ചക്കറി വിൽപ്പനയ്ക്കെത്തുന്ന വഴിയോര കച്ചവടക്കാർ ഗതാഗതക്കുരുക്കിന് കാരണമാകുന്നത്. അപകടങ്ങൾ നിത്യസംഭവമായതിനെത്തുടർന്ന് വാഹനങ്ങളുടെ വേഗത കുറയ്ക്കാൻ അന്തർസംസ്ഥാന പാതയിൽ പിലാക്കുന്നിൽ നാല് ഹന്പുകൾ പൊതുമരാമത്ത് റോഡ് വിഭാഗം സ്ഥാപിച്ചിട്ടുണ്ട്. റോഡിനിരുവശവും വാഹനവും പാർക്കിംഗും വഴിയോര കച്ചവടവും അനുവദിക്കില്ലെന്ന പൊതുമരാമത്ത് വകുപ്പിന്‍റെ മുന്നറിയിപ്പ് ബോർഡ് സ്ഥാപിച്ചതിന് മുന്നിലാണ് അനധികൃത കച്ചവടങ്ങളും മറ്റും നടക്കുന്നത്. വാഹനങ്ങൾ വേഗത കുറച്ച് പോകുന്ന ഈ ഭാഗത്ത് വിവിധ തരം പഴം-പച്ചക്കറികൾ എന്നിവ വിൽപ്പന നടത്തുന്ന സംഘങ്ങൾ സജീവമാണ്. വാഹനയാത്രക്കാർ പഴം, പച്ചക്കറികൾ വാങ്ങാൻ റോഡിൽ വാഹനം നിർത്തുന്നതോടെ ഗതാഗതം താറുമാറാകും. നൂറുക്കണക്കിന് വാഹനങ്ങളാണ് ഓരോ മണിക്കൂറിലും ഇതുവഴി കടന്നുപേകുന്നത്. ‌ ചിലപ്പോൾ മണിക്കൂറുകൾ നീണ്ട ഗതാഗത തടസം ഇവിടെ അനുഭവപ്പെടാറുണ്ട്. പഴം, പച്ചക്കറി വിൽപ്പനക്കാർക്ക് പുറമെ നിലന്പൂർ മേഖലയിലെ ചാരിറ്റി പ്രവർത്തകരും ചികിത്സാ സഹായ ഫണ്ടുകൾ ശേഖരിക്കുന്നവരും ഈ ഭാഗത്താണ് പിരിവിനിറങ്ങുന്നത്. ഇതോടെ കെഎൻജി റോഡ് വാഹനങ്ങൾകൊണ്ട് നിറയുകയും യാത്രക്കാർ വലയുകയും ചെയ്യും. കഴിഞ്ഞ ദിവസങ്ങളിൽ വൻ ഗതാഗതക്കുരുക്കാണ് ഇവിടെ ഉണ്ടായത്. തെരുവോര കച്ചവടക്കാരെ നിയന്ത്രിക്കാനോ ഗതാഗത തടസം നീക്കാനോ പോലീസിന്‍റെ ഭാഗത്ത് നിന്ന് നടപടി ഉണ്ടാകുന്നില്ലെന്ന് വ്യാപക ആക്ഷേപമുണ്ട്.

മാർപാപ്പയുടെ നിര്യാണത്തിൽ അനുശോചന പ്രവാഹം

മലപ്പുറം: കത്തോലിക്ക സഭയുടെ പരമാധ്യക്ഷൻ ഫ്രാൻസിസ് മാർപാപ്പയുടെ വേർപ്പാടിൽ അനുശോചന പ്രവാഹം. ലോകമാകെ ആദരിക്കുന്ന വിശിഷ്ട വ്യക്തിത്വത്തിന് ഉടമയും ലോകത്ത് ശാന്തിയും സമാധാനവും പുലരുവാൻ കഠിനമായി പരിശ്രമിച്ച വിശിഷ്ടവ്യക്തിയുമായിരുന്നു ഫ്രാൻസിസ് മാർപാപ്പയെന്ന് കേരള കോണ്‍ഗ്രസ് ജില്ലാ സെക്രട്ടറിയേറ്റ് അനുസ്മരിച്ചു. കഴിഞ്ഞ ദിവസം സന്ദർശിച്ച അമേരിക്കൻ വൈസ് പ്രസിഡന്‍റിനോട് തെല്ലും ഭയമില്ലാതെ ഗാസയിൽ വെടി നിർത്തൽ പ്രഖ്യാപിക്കാൻ നടപടി സ്വീകരിക്കണമെന്ന് ആവശ്യപ്പെട്ടത് യുദ്ധത്തിനെതിരേ തന്‍റെ കർശനമായ നിലപാട് വ്യക്തമാക്കുന്നതായിരുന്നുവെന്ന് അനുസ്മരണ യോഗം ചൂണ്ടിക്കാട്ടി. സെക്രട്ടറിയേറ്റ് യോഗത്തിൽ ജില്ലാ പ്രസിഡന്‍റ് മാത്യു വർഗീസ് അനുശോചന പ്രമേയം അവതരിപ്പിച്ചു. സംസ്ഥാന ഉന്നത അധികാര സമിതി അംഗം ആലിക്കുട്ടി എറക്കോട്ടിൽ, ജില്ലാ ഭാരവാഹികളായ കെ.എം. ഇഗ്നേഷ്യസ്, ടി.ഡി. ജോയ്, കെ.വി. ജോർജ്, സതീഷ് വർഗീസ്, എ.ജെ. ആന്‍റണി, ജോണ്‍കുട്ടി മഞ്ചേരി, സി.വി. വർഗീസ്, തോമസ് ടി. ജോർജ്, ഏബ്രഹാം കുര്യൻ, വിൻസി അനിൽ, സിദ്ധാനന്ദൻ, കെ.നിധിൻ ചാക്കോ, ബാബു വർഗീസ്, സജേഷ് മണ്ണഞ്ചേരി തുടങ്ങിയവർ സംബന്ധിച്ചു. ഫ്രാൻസിസ് മാർപാപ്പയുടെ നിര്യാണത്തിൽ കത്തോലിക്ക കോണ്‍ഗ്രസ് മലപ്പുറം മേഖല കമ്മിറ്റി അനുശോചിച്ചു. അവശതയനുഭവിക്കുന്നവരെയും കഷ്ടപ്പെടുന്നവരെയും ചേർത്തുനിർത്തി കാരുണ്യത്തിന്‍റെ വഴിയിൽ സഞ്ചരിച്ച മഹത് വ്യക്തിയായിരുന്നു മാർപാപ്പയെന്ന് അനുശോചന പ്രമേയത്തിൽ അറിയിച്ചു. മേഖലാ പ്രസിഡന്‍റ് എ.ജെ. ആന്‍റണി ആലക്കൽ, ജോണി. ടി. മാത്യു, ജോസഫ് പുല്ലൻകുന്നേൽ, ജോഷി ജോസഫ്, തോമസ് കുരുവിള, ജോസ് ഓലിക്കൽ തുടങ്ങിയവർ പങ്കെടുത്തു. മലപ്പുറം:അവസാനകാലത്ത് പോലും ലോകസമാധാനത്തിനുവേണ്ടി നിരന്തരം പ്രവർത്തിച്ച മഹാനുഭാവനാണ് ഫ്രാൻസിസ് മാർപാപ്പയെന്ന് കോഴിക്കോട് അതിരൂപത ലാറ്റിൻ കത്തോലിക് അസോസിയേഷൻ അനുശോചന യോഗത്തിൽ പറഞ്ഞു. രോഗശയ്യയിൽ നിന്ന് പുറത്തുവന്ന് അദ്ദേഹം നടത്തിയ പ്രസ്താവനകൾ ലോകസമാധാനത്തിന് വേണ്ടിയായിരുന്നു. ആയുധങ്ങൾ നിലത്തുവയ്ക്കാനും അക്രമങ്ങൾ അവസാനിപ്പിക്കാനും ആഹ്വാനം നൽകി. നിരവധി വിപ്ലവകരമായ മാറ്റങ്ങൾക്ക് സാക്ഷ്യം വഹിച്ചാണ് പോപ്പ് ഫ്രാൻസിസ് കാലം ചെയ്തതെന്ന് അനുശോചന യോഗം ചൂണ്ടിക്കാട്ടി. കോഴിക്കോട് അതിരൂപത ലാറ്റിൻ കത്തോലിക് അസോസിയേഷൻ പ്രസിഡന്‍റ് ബിനു എഡ്വേഡ് അധ്യക്ഷത വഹിച്ചു. ജനറൽ സെക്രട്ടറി ജോർജ് കെ.വൈ. മോണ്‍ വിൻസെന്‍റ് അറക്കൽ, ട്രഷറർ ഫ്ളോറ മെൻഡോൻസ, നൈജു അറക്കൽ, എ.ജെ. സണ്ണി, പ്രകാശ് പീറ്റർ, ജസ്റ്റിൻ ആന്‍റണി, ലത മെൻഡോൻസ, തോമസ് ചെമ്മനം, ടി.ടി. ജോണി എന്നിവർ സംസാരിച്ചു.

കാട്ടുപന്നിയിടിച്ച് ബൈക്ക് യാത്രികന് പരിക്ക്

വാണിയന്പലം: കാട്ടുപന്നിയിടിച്ച് ബൈക്ക് യാത്രികന് പരിക്കേറ്റു. തിരുവാലി കോഴിപറന്പ് സ്വദേശി അബുൽ അഹലക്കാണ് പരിക്കേറ്റത്. ഇന്നലെ രാത്രി പത്തുമണിയോടെ എറിയാട് പള്ളിപ്പടിക്ക് സമീപമായിരുന്നു അപകടം. ഷോർട്ട് ഫിലിം നടനും സംവിധായകനുമായ അബുൽ അഹല, മകനെ വാണിയന്പലം റെയിൽവേ സ്റ്റേഷനിൽ നിന്ന് കൊണ്ടുവരികയായിരുന്നു. കാട്ടുപന്നി ബൈക്കിൽ തട്ടിയതോടെ ഇരുവരും റോഡിലേക്ക് തെറിച്ചുവീണു. നാട്ടുകാരാണ് ഇവരെ സമീപത്തെ സ്വകാര്യാശുപത്രിയിൽ എത്തിച്ചത്. അബുൽ അഹലയ്ക്ക് തോളിനാണ് പരിക്കേറ്റത്. പ്രദേശത്ത് കാട്ടുപന്നി ശല്യം രൂക്ഷമാണ്.

റോഡ് സുരക്ഷാ വാഹന ജാഥ തുടങ്ങി

മലപ്പുറം: വർധിച്ചുവരുന്ന വാഹനാപകടങ്ങൾക്കെതിരേ റോഡ് സുരക്ഷാ നിയമപരിപാലനവും ഒപ്പം ലഹരിവ്യാപനം തടയൽ, ശുചിത്വ പരിപാലനം എന്നിവ ലക്ഷ്യമാക്കി ജില്ലാ ഭരണകൂടവും റോഡ് ആക്സിഡന്‍റ് ആക്‌ഷൻ ഫോറവും (റാഫ്) സംയുക്തമായി സംഘടിപ്പിക്കുന്ന വാഹന പ്രചാരണ ജാഥ ആരംഭിച്ചു. 10 ദിവസങ്ങളിലായി നടക്കുന്ന പ്രചാരണ ജാഥ കളക്ടർ വി.ആർ. വിനോദ് ഉദ്ഘാടനം ചെയ്തു. ജില്ലാ പോലീസ് മേധാവി ആർ.വിശ്വനാഥ്, റാഫ് സംസ്ഥാന പ്രസിഡന്‍റ് ഡോ. കെ.എം. അബ്ദുവിന് പതാക കൈമാറി ഫ്ളാഗ് ഓഫ് കർമം നിർവഹിച്ചു. ജില്ലയിലെ പ്രധാന ടൗണുകൾ, ബസ് സ്റ്റാൻഡുകൾ കേന്ദ്രീകരിച്ച് വീഡിയോ വാൾ സംവിധാനത്തോടെയാണ് പ്രചാരണം നടത്തുന്നത്. പോലീസ്, മോട്ടോർ വാഹനം, എക്സൈസ് വകുപ്പുകളുടെ സഹകരണത്തോടെയാണ് പരിപാടി സംഘടിപ്പിക്കുന്നത്. എഡിഎം എൻ.എം. മെഹറലി, ഡെപ്യൂട്ടി സൂപ്രണ്ട് ഓഫ് പോലീസ് വി.ജയചന്ദ്രൻ, അസിസ്റ്റന്‍റ് എക്സൈസ് കമ്മീഷണർ ആർ. മനോജ്, ജില്ലാ വനിതാ ഫോറം പ്രസിഡന്‍റ് ബേബി ഗിരിജ, റാഫ് ജില്ലാ ജനറൽ സെക്രട്ടറി എ.കെ. ജയൻ, കെ.പി.എം. ഷംസീർ ബാബു, കെ.ടി.എ. സമദ് പങ്കെടുത്തു.

ചെമ്മലശേരി ബഡ്സ് സ്കൂളിന് വാഹനമായി

പുലാമന്തോൾ: പുലാമന്തോൾ ഗ്രാമപഞ്ചായത്തിലെ ചെമ്മലശേരിയിൽ പ്രവർത്തിക്കുന്ന ബഡ്സ് സ്കൂൾ ആൻഡ് റീഹാബിലിറ്റേഷൻ സെന്‍ററിന് സ്വന്തം വാഹനമായി. മലപ്പുറം ജില്ലാ മിഷന്‍റെ 12.5 ലക്ഷം രൂപയും ഗ്രാമപഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തി അഞ്ച് ലക്ഷം രൂപയും വകയിരുത്തിയാണ് വാഹനം വാങ്ങിയത്. ചെമ്മലശേരിയിൽ നടന്ന ചടങ്ങിൽ ഗ്രാമപഞ്ചായത്ത് പ്രസിഡന്‍റ് പി. സൗമ്യ വാഹനം ഫ്ളാഗ് ഓഫ് ചെയ്തു. ബഡ്സ് സ്കൂൾ അധികൃതരുടെയും രക്ഷിതാക്കളുടെയും ആവശ്യമായിരുന്നു ബഡ്സ് സ്കൂളിന് സ്വന്തമായി വാഹനം. രക്ഷിതാക്കൾ വിദ്യാർഥികളെ ബഡ്സ് സ്കൂളിലേക്ക് അയച്ചിരുന്നത് സ്വകാര്യവാഹനങ്ങളിലായിരുന്നു. പുതിയ വാഹനം ലഭ്യമായതോടെ വിദ്യാർഥികൾക്ക് സ്കൂളിൽ വരാനും തിരിച്ചുവീട്ടിലെത്താനും സൗകര്യമായി. ചടങ്ങിൽ ഗ്രാമപഞ്ചായത്ത് വൈസ് പ്രസിഡന്‍റ് ചന്ദ്രമോഹനൻ പനങ്ങാട് അധ്യക്ഷത വഹിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ ബി. സുരേഷ്കുമാർ മുഖ്യാതിഥിയായിരുന്നു. ഗ്രാമപഞ്ചായത്ത് ഭരണസമിതി അംഗം ടി. മുഹമ്മദ്കുട്ടി, സിഡിഎസ് ചെയർപേഴ്സണ്‍ വി.പി. ജിഷ, ഗ്രാമപഞ്ചായത്ത് സെക്രട്ടറി ബി. ബിനുരാജ്, പിടിഎ പ്രസിഡന്‍റ് ശശി, ഗ്രാമപഞ്ചായത്ത് ഭരണസമിതി അംഗവും വാർഡ് മെന്പറുമായ വി.പി. മുഹമ്മദ് ഹനീഫ, ബഡ്സ് സ്കൂൾ അധ്യാപിക ദിവ്യ എന്നിവർ പ്രസംഗിച്ചു.

മേലാറ്റൂർ ആരോഗ്യകേന്ദ്രത്തിന് പുതിയ വാഹനം

പെരിന്തൽമണ്ണ: പെരിന്തൽമണ്ണ ബ്ലോക്ക് പഞ്ചായത്തിന്‍റെ കീഴിലെ മേലാറ്റൂർ കമ്മ്യൂണിറ്റി ഹെൽത്ത് സെന്‍ററിന് പുതിയ വാഹനമായി. എം.പി. അബ്ദുസമദ് സമദാനി എംപിയുടെ 2023-24 ആസ്തി വികസന ഫണ്ടിൽനിന്ന് അനുവദിച്ച വാഹനത്തിന്‍റെ താക്കോൽദാനം നജീബ് കാന്തപുരം എംഎൽഎ നിർവഹിച്ചു. സിഎച്ച്സി മെഡിക്കൽ സൂപ്രണ്ട് ഡോ. കെ.എ. മുഹമ്മദലി താക്കോൽ ഏറ്റുവാങ്ങി. ആരോഗ്യ വിദ്യാഭ്യാസ സ്ഥിരംസമിതി ചെയർമാൻ അസീസ് പട്ടിക്കാട് അധ്യക്ഷത വഹിച്ചു. പെരിന്തൽമണ്ണ ജില്ലാ ആശുപത്രി കഴിഞ്ഞാൽ ഏറ്റവും കൂടുതൽ രോഗികൾ ആശ്രയിക്കുന്ന മേലാറ്റൂർ സിഎച്ച്സിയുടെ പ്രവർത്തനങ്ങൾക്ക് വാഹനം വലിയ തോതിൽ പ്രയോജനപ്പെടും. സെക്കൻഡറി പാലിയേറ്റീവ്, കുത്തിവയ്പ് ക്യാന്പുകൾ, ആരോഗ്യ സന്ദേശ കാന്പയിനുകൾ എന്നിവയ്ക്ക് ഏറെ പ്രയോജനകരമാകും വാഹനമെന്ന് ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ അഭിപ്രായപ്പെട്ടു. ബ്ലോക്ക് പഞ്ചായത്ത് വൈസ് പ്രസിഡന്‍റ് വനജ കുന്നംകുലത്ത്, വികസനകാര്യ ചെയർമാൻ അയമു, ക്ഷേമകാര്യ ചെയർമാൻ അഡ്വ. നജ്മ തബ്ഷീറ, മെന്പർമാരായ നാലകത്ത് ഷൗക്കത്ത്, മുഹമ്മദ് നയിം, പ്രബീന ഹബീബ്, വിൻസി, കമലം, ഉമ്മുസൽമ, റജീന, യു.ടി. മുൻഷിർ, സെക്രട്ടറി കെ. പാർവതി എന്നിവർ പ്രസംഗിച്ചു.

നിലന്പൂരിൽ പൊതുസ്വതന്ത്രന്‍റെ സാധ്യത തള്ളാതെ സിപിഎം

നിലന്പൂർ: നിലന്പൂർ ഉപതെരഞ്ഞെടുപ്പിൽ പൊതുസ്വതന്ത്ര സ്ഥാനാർഥിയുടെ സാധ്യത തള്ളാതെ സിപിഎം സംസ്ഥാന സെക്രട്ടറിയേറ്റ് അംഗം എം.സ്വരാജ്. നിലന്പൂരിൽ സിപിഎം യോഗത്തിന് മുന്പ് മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. നിരവധി പൊതുസ്വതന്ത്രരെ നിർത്തി വിജയിപ്പിച്ച പാരന്പര്യമുള്ള പാർട്ടിയാണ് സിപിഎം. ഇ.എം.എസ് മന്ത്രിസഭയിലെ ആഭ്യന്തര മന്ത്രി സ്വതന്ത്രനായി വിജയിച്ചയാളായിരുന്നു. നിലന്പൂരിൽ സിപിഎമ്മിന് സ്ഥാനാർഥിയെ കിട്ടാനില്ലെന്ന യുഡിഎഫ് നേതാക്കളുടെ പ്രതികരണത്തിന്, സ്ഥാനാർഥി നിർണയവുമായി ബന്ധപ്പെട്ട് കോണ്‍ഗ്രസിലുള്ള ഭിന്നത മാധ്യമങ്ങൾ റിപ്പോർട്ട് ചെയ്യുന്ന സാഹചര്യത്തിൽ ജാള്യത മറയ്ക്കാനാണ് അത്തരം പ്രതികരണമെന്നും സ്വരാജ് പറഞ്ഞു. അവരുടെ സ്ഥാനാർഥി നിർണയത്തിൽ അഭിപ്രായം പറയാനില്ല. ഇടതുപക്ഷ മുന്നണിക്ക് അനുകൂല രാഷ്ട്രീയ സാഹചര്യമാണ് നിലവിലുള്ളത്. പി.വി. അൻവറിന്‍റെ ചേരിമാറ്റത്തിന് വോട്ടിംഗിലൂടെ ഇടതുപക്ഷവും ജനങ്ങളും മറുപടി നൽകും. യുഡിഎഫ് സ്ഥാനാർഥി നിർണയത്തിലെ പി.വി. അൻവറിന്‍റെ ഇടപെടൽ ശ്രദ്ധയിൽപ്പെടുത്തിയപ്പോൾ യുഡിഎഫിന്‍റെ നിലവിലെ ദുരവസ്ഥയിൽ സഹതാപം മാത്രമാണ് ഉള്ളതെന്നും സ്വരാജ് പറഞ്ഞു.

വീണുകിട്ടിയ പണമടങ്ങിയ ബാഗ് തിരികെ നൽകി യുവാവ് മാതൃകയായി

എടക്കര: എടിഎം കൗണ്ടറിന് മുന്നിൽ നിന്ന് വീണുകിട്ടിയ പണമടങ്ങിയ ബാഗ് ഉടമക്ക് തിരികെ നൽകി യുവാവ് മാതൃകയായി. ചുങ്കത്തറ മേപ്പുറത്ത് സിനുവാണ് 7000 രൂപയടങ്ങിയ ബാഗ് എടക്കര പോലീസിന്‍റെ സാന്നിധ്യത്തിൽ ഉടമക്ക് തിരികെ നൽകിയത്. ഇന്നലെ രാവിലെയാണ് എടിഎം കൗണ്ടറിന് മുന്നിൽ നിന്ന് സിനുവിന് പണമടങ്ങിയ ബാഗ് കിട്ടിയത്. തുറന്ന് നോക്കിയപ്പോൾ പണവും രേഖകളും ബാഗിൽ കണ്ടെത്തി. ഇതേത്തുടർന്ന് സിനു എടക്കര പോലീസ് സ്റ്റേഷനിലെത്തി ബാഗ് പോലീസിന് ഏൽപ്പിക്കുകയായിരുന്നു. പോലീസുകാർ ഉടമയെ കണ്ടെത്തി സിനുവിന്‍റെ സാന്നിധ്യത്തിൽ ബാഗ് കൈമാറി. സ്വകാര്യ ഇലക്ട്രോണിക്സ് സ്ഥാപനത്തിലെ ജോലിക്കാരന്‍റേതായിരുന്നു നഷ്ടപ്പെട്ട ബാഗും പണവും. എസ്ഐ ജയകൃഷ്ണൻ, ജൂണിയർ എസ്ഐമാരായ വിഷ്ണു, ജിതേഷ് എന്നിവരുടെ സിന്നിധ്യത്തിലാണ് ബാഗ് ഉടമക്ക് കൈമാറിയത്.

തേൾപ്പാറയിൽ ചീട്ടുകളി സംഘത്തെ പിടികൂടി

പൂക്കോട്ടുംപാടം: തേൾപ്പാറ ആർപിഎസിന് സമീപം സ്വകാര്യവ്യക്തിയുടെ റബർ തോട്ടത്തിനടുത്ത് ചീട്ടുകളിക്കുകയായിരുന്ന പത്തംഗ സംഘത്തെ പൂക്കോട്ടുംപാടം പോലീസ് ഇൻസ്പെക്ടർ വി. അമീറലിയുടെ നേതൃത്വത്തിലുള്ള സംഘം പിടികൂടി. കരുവാരകുണ്ട് തെച്ചിയോടൻ ഷറഫുദ്ദീൻ (44), ചെന്പ്രശേരി മന്പാടൻ അബ്ദുൾ ഹമീദ് (40), വണ്ടൂർ കിയക്കാനംതൊടിക സുധീർ (48), പള്ളിക്കുത്ത് പാറക്കണ്ണൻ അഷ്റഫ് ( 54), വണ്ടൂർ പത്തുത്തറ സുബൈർ (54), ചുങ്കത്തറ പയ്യശേരി മുജീബ് റഹ്മാൻ (47), കാപ്പിൽ കപ്പാടൻ സിദീഖ് (58), പാതാർ മച്ചിങ്ങൽ അനിൽകുമാർ (44), കാട്ടിച്ചിറ ചെറുക്കാട്ടിൽ അനീഷ് (44), ചുള്ളിയോട് വലിയ പീടിയേക്കൽ അബ്ദുൾ റസാഖ് എന്നിവരെയാണ് പോലീസ് പിടികൂടിയത്. ഇവരിൽ നിന്ന് ഒന്നര ലക്ഷം രൂപയും പിടിച്ചെടുത്തു. എസ്ഐ ജയിംസ്, സീനിയർ സിവിൽ പോലീസ് ഓഫീസർമാരായ സജീഷ്, സക്കീർ, സാനിർ, സലീൽ ബാബു, സിവിൽ പോലീസ് ഓഫീസർമാരായ നൗഷാദ്, ബിനുകുമാർ, ഉമർ ഫാറൂഖ് എന്നിവരും അന്വേഷണ സംഘത്തിലുണ്ടായിരുന്നു.

വനിതകൾക്ക് സൗജന്യ യോഗ ക്ലാസ്

മഞ്ചേരി: തൃക്കലങ്ങോട് ഗ്രാമപഞ്ചായത്തും 21-ാം വാർഡ് കുടുംബശ്രീയും വനിതകൾക്കായി സൗജന്യ യോഗ ക്ലാസ് ആരംഭിച്ചു. എല്ലാ ദിവസവും തൃക്കലങ്ങോട് 32-ൽ പൊതുജന വായനശാല-ഗ്രന്ഥാലയം കോണ്‍ഫറൻസ് ഹാളിൽ നടത്തുന്ന സൗജന്യ യോഗ ക്ലാസ് വണ്ടൂർ ബ്ലോക്ക് പഞ്ചായത്ത് പ്രസിഡന്‍റ് വി. ഹസ്കർ ആമയൂർ ഉദ്ഘാടനം ചെയ്തു. വാർഡ് മെന്പർ കെ. ജയപ്രകാശ് ബാബു അധ്യക്ഷത വഹിച്ചു. ഡോ. ദീപിക, ഹാർട്ട് ഫുൾനസ് യോഗ മെഡിറ്റേഷൻ ജില്ലാ കോ ഓർഡിനേറ്റർ പി.സി. സജി, ടി.കെ. വനജ, ഗ്രന്ഥാലയം പ്രസിഡന്‍റ് കെ. വിജയൻനായർ, മോഹൻലാൽ കൊട്ടാരം, സി.വി. ലിജിമോൾ, എസ്. ഉണ്ണികൃഷ്ണൻ, ഇ.വി. ബാബുരാജ്, ശ്രീദേവി തച്ചാണി എന്നിവർ പ്രസംഗിച്ചു.

ഗോസമൃദ്ധി ഇൻഷ്വറൻസ് പദ്ധതി; ജില്ലയിൽ 50 ശതമാനം പുരോഗതി

മലപ്പുറം: കന്നുകാലികൾക്കും ക്ഷീരകർഷകർക്കും വേണ്ടി മൃഗസംരക്ഷണ വകുപ്പ് നടപ്പാക്കുന്ന ഗോസമൃദ്ധി ഇൻഷ്വറൻസ് പദ്ധതി ജില്ലയിൽ പുരോഗമിക്കുന്നു. ഇതുവരെ ജില്ലയിൽ 50 ശതമാനം പുരോഗതി കൈവരിച്ചതായി നോഡൽ ഓഫീസർ ഡോ. അഫ്സൽ അറിയിച്ചു. കന്നുകാലികളുടെ മരണം, ഉത്പാദനക്ഷമത നഷ്ടപ്പെടൽ, കർഷകന്‍റെ മരണം എന്നിവ പദ്ധതിയിൽ ഉൾപ്പെടും. പ്രതിദിനം ഏഴ് ലിറ്റർ പാൽ തരുന്ന രണ്ട് മുതൽ 10 വയസുവരെയുള്ള പശു, എരുമ എന്നിവയേയും ഏഴ് മാസം ഗർഭിണിയായവയെയും പദ്ധതിയിൽ ഉൾപ്പെടുത്താം. 65,000 രൂപയ്ക്ക് ഒരു വർഷത്തേക്ക് ഇൻഷ്വർ ചെയ്യുന്നതിന് 1356 രൂപയും മൂന്ന് വർഷത്തേക്ക് 3319 രൂപയുമാണ് കർഷകർ അടയ്ക്കേണ്ട പ്രീമിയം തുക. കർഷകരെ ഒരു വർഷത്തേക്ക് അഞ്ച് ലക്ഷം രൂപയ്ക്ക് ഇൻഷ്വർ ചെയ്യുന്നതിന് 100 രൂപ അധികം അടയ്ക്കണം. പദ്ധതിയിൽ അംഗമാകുന്നതിന് കർഷകർക്ക് തൊട്ടടുത്ത മൃഗാശുപത്രിയുമായി ബന്ധപ്പെടാമെന്ന് ജില്ലാ മൃഗസംരക്ഷണ ഓഫീസർ ഡോ. സഖറിയ സാദിഖ് മധുരക്കറിയൻ അറിയിച്ചു.

വിദ്വേഷ പ്രചാരണത്തിനെതിരേ കർശന നടപടി: കളക്ടർ

മലപ്പുറം: സാമൂഹ്യമാധ്യമങ്ങളിലൂടെ വിദ്വേഷ പ്രചാരണങ്ങൾ നടത്തുന്നവരെ സൂക്ഷ്മമായി നിരീക്ഷിക്കുമെന്നും അത്തരക്കാർക്കെതിരേ ശക്തമായ നടപടി സ്വീകരിക്കുമെന്നും ജില്ലാ കളക്ടർ വി.ആർ. വിനോദ്. ജില്ലാതല മതസൗഹാർദ അവലോകനയോഗത്തിൽ അധ്യക്ഷത വഹിച്ച് സംസാരിക്കുകയായിരുന്നു കളക്ടർ. സാമൂഹ്യമാധ്യമങ്ങളിലൂടെ വിദ്വേഷവും സ്പർധയും അസത്യമായ വിവരങ്ങളും പ്രചരിപ്പിക്കുന്ന പ്രവണത കൂടിവരികയാണ്. മലപ്പുറത്തിന്‍റെ മതേതര പാരന്പര്യത്തെക്കുറിച്ച് ധാരണയില്ലാത്തവരാണ് ഇതിന് പിറകിൽ. ആരാധനാലയങ്ങളിൽ ഉണ്ടാകുന്ന തർക്കങ്ങളോ വിവിധ മതവിഭാഗങ്ങൾ തമ്മിൽ ആരാധനാലയങ്ങളുടെ സ്വത്തുവകകൾ സംബന്ധിച്ച തർക്കങ്ങളോ ഉണ്ടാവുകയാണെങ്കിൽ അതിൽ സാമൂഹ്യവിരുദ്ധർക്ക് ഇടം നൽകാതെ പെട്ടെന്ന് പരിഹാരം കാണാൻ ജാഗ്രത കാണിക്കണമെന്നും കളക്ടർ നിർദേശിച്ചു. ജില്ലാ കളക്ടറുടെ ചേംബറിൽ ചേർന്ന യോഗത്തിൽ ജില്ലാ പോലീസ് മേധാവി ആർ. വിശ്വനാഥ്, തിരൂർ സബ് കളക്ടർ ദിലീപ് കൈനിക്കര, എഡിഎം എൻ.എം. മെഹറലി, വിവിധ താലൂക്കുകളിലെ തഹസിൽദാർമാർ, പോലീസ് ഉദ്യോഗസ്ഥർ തുടങ്ങയവർ പങ്കെടുത്തു.

സഹകരണ ബാങ്കുകളിൽ സമഗ്രമാറ്റത്തിന് മാർഗ നിർദേശങ്ങളുമായി സെക്രട്ടറീസ് സെന്‍റർ

മങ്കട: മലപ്പുറം ജില്ലയിലെ പ്രാഥമിക സഹകരണ ബാങ്കുകളുടെ പ്രവർത്തനത്തിൽ സമഗ്രമാറ്റത്തിന് സഹകരണ ബാങ്ക് സെക്രട്ടറീസ് സെന്‍റർ. സ്ഥാപനത്തിനും അംഗങ്ങൾക്കും ജീവനക്കാർക്കും ഗുണകരമാകുന്ന ഏകീകൃത സംവിധാനങ്ങൾ സഹകരണ വകുപ്പുമായി സഹകരിച്ച് നടപ്പാക്കുന്നതിനാണ് പദ്ധതി തയാറാക്കിയത്. അഴിമതിയില്ലാത്ത സഹകരണ മേഖലയെ ജില്ലയിൽ വളർത്തിയെടുക്കുന്നതിനാണ് സെക്രട്ടറീസ് സെന്‍റർ പുതിയ മാർഗനിർദേശങ്ങൾ മുന്നോട്ടുവച്ചിട്ടുള്ളത്. കഴിഞ്ഞ ദിവസം മലപ്പുറം കേരള ബാങ്ക് ഹാളിൽ ചേർന്ന യോഗത്തിൽ പദ്ധതിക്ക് തത്വത്തിൽ അംഗീകാരം നൽകി. ബാങ്കുകളുടെ പ്രവർത്തന രീതി ഏകീകരിക്കൽ, ക്രമക്കേടുകൾ സംഭവിക്കാതിരിക്കാനുള്ള കരുതൽ തുടങ്ങിയവയാണ് പ്രധാനം. ഇതിനായി സെക്രട്ടറിമാർക്ക് കൗണ്‍സിലിംഗ് നൽകും, ഇന്‍റേണൽ ഓഡിറ്റ് സംവിധാനം കാര്യക്ഷമമാക്കും, ഇന്‍റേണൽ ഓഡിറ്റർമാർക്ക് ആഭ്യന്തര പരിശോധനക്കുള്ള പരിശീലനം ഉറപ്പാക്കും, സഹകരണ സംഘങ്ങൾ പരസ്പര സഹകരണം സാധ്യമാക്കും, ബാങ്കുകളിലെ വിവിധ ഫോറങ്ങൾക്ക് ഏകീകൃത രൂപം ഉണ്ടാക്കും, ചെക്കുകൾ കളക്ട് ചെയ്യൽ, പ്രവർത്തന പരിധി കവിഞ്ഞ് വായ്പ നൽകൽ തുടങ്ങിയ ദൈനംദിന പ്രവർത്തനങ്ങളിലും ഏകീകൃത രൂപമുണ്ടാക്കും. കേരളാ ബാങ്ക് പലിശനിരക്ക് കുറച്ചത് പ്രാഥമിക ബാങ്കുകൾക്ക് വലിയ തിരിച്ചടിയാണ് ഉണ്ടാക്കിയത്. ഇത് മറികടക്കുന്നതിനാണ് പുതിയ വഴി തേടുന്നത്. ബാങ്കുകളിൽ നടപ്പാക്കുന്ന ഏകീകൃത രീതി സംബന്ധിച്ച് പഠിച്ച് റിപ്പോർട്ട് സമർപ്പിക്കുന്നതിന് അഷ്റഫ് അരക്കുപറന്പ് കണ്‍വീനറായി അഞ്ചംഗ സമിതിയെ നിശ്ചയിച്ചു. വിവിധ പദ്ധതികളുടെ പഖ്യാപനവും വിരമിച്ച സെക്രട്ടറിമാർക്കുള്ള യാത്രയയപ്പും സംഘടപ്പിക്കുന്നതിനും സെക്രട്ടറീസ് സെന്‍റർ തീരുമാനിച്ചു. യോഗം സംസ്ഥാന സെക്രട്ടറി എൻ. ഭാഗ്യനാഥ് ഉദ്ഘാടനം ചെയ്തു. അബ്ദുൾ അസീസ് വെട്ടിക്കാട്ടിരി അധ്യക്ഷത വഹിച്ചു. സൈഫുള്ള കറുമുക്കിൽ, ഹമീദ് വേങ്ങര, യൂസുഫ് പള്ളിപ്പുറം, സുബൈദ വെളിമുക്ക്, അഷ്റഫ് അരക്കുപറന്പ് എന്നിവർ പ്രസംഗിച്ചു.

പശുക്കിടാങ്ങളെ മാത്രം ജനിപ്പിക്കാൻ മൃഗസംരക്ഷണ വകുപ്പ്

മലപ്പുറം: മൃഗസംരക്ഷണ വകുപ്പും കേരള ലൈവ്സ്റ്റോക്ക് ഡെവലപ്മെന്‍റ് ബോർഡും സംയുക്തമായി നടപ്പാക്കുന്ന തരം തിരിച്ച ബീജം ഉപയോഗിച്ചിട്ടുള്ള ബീജാധാനം ജില്ലയിൽ ആരംഭിച്ചു. ഈ ബീജം ഉപയോഗിക്കുന്നതുമൂലം 90 ശതമാനവും പശുക്കിടാങ്ങൾ മാത്രം ജനിക്കുമെന്നാണ് കണക്കാക്കുന്നത്. പൊന്നാനി, പുറത്തൂർ, വണ്ടൂർ, ഇരിന്പിളിയം, ആനക്കയം, മേലാറ്റൂർ, നിലന്പൂർ, വഴിക്കടവ്, വട്ടംകുളം, ചാലിയാർ, തുവൂർ, മുതുവല്ലൂർ, പറവണ്ണ, അരിയല്ലൂർ, നന്നന്പ്ര, കരുവാരക്കുണ്ട്, പെരിന്തൽമണ്ണ, മൂന്നിയൂർ, കോട്ടക്കൽ, ഊർങ്ങാട്ടിരി, അമരന്പലം എന്നീ പഞ്ചായത്തുകളിലെ മൃഗാശുപത്രികളിൽ നിലവിൽ തരം തിരിച്ച ബീജം ലഭ്യമാണെന്ന് ജില്ലാ മൃഗസംരക്ഷണ ഓഫീസർ ഡോ. സഖറിയ സാദിഖ് മധുരക്കറിയൻ അറിയിച്ചു.

രോഹിത് എം.ജി. കൃഷ്ണൻ അവാർഡുകൾ ഏറ്റുവാങ്ങി

പെരിന്തൽമണ്ണ: സംസ്ഥാന ചലച്ചിത്ര അവാർഡുകൾ തിരുവനന്തപുരം നിശാഗന്ധി ഓഡിറ്റോറിയത്തിൽ നടന്ന ചടങ്ങിൽ മുഖ്യമന്ത്രി പിണറായി വിജയനിൽ നിന്ന് രോഹിത് എം.ജി. കൃഷ്ണൻ ഏറ്റുവാങ്ങി. മികച്ച തിരക്കഥാകൃത്തിനുള്ള അവാർഡും മികച്ച രണ്ടാമത്തെ സിനിമയ്ക്കുള്ള അവാർഡുമാണ് ഏറ്റുവാങ്ങിയത്. മികച്ച തിരക്കഥക്കുള്ള അവാർഡ് രോഹിത് എം.ജി. കൃഷ്ണൻ സംവിധാനവും തിരക്കഥയുമെഴുതിയ ’ഇരട്ട’ എന്ന സിനിമയ്ക്കാണ്. മികച്ച രണ്ടാമത്തെ സിനിമയ്ക്കുള്ള അവാർഡും ഇരട്ട നേടി. 2017ലാണ് ഇരട്ടയുടെ തിരക്കഥ തയാറാക്കിയത്. 2022-ൽ ചിത്രീകരണം തുടങ്ങി. 2023 ഫെബ്രുവരിയിൽ റിലീസ് ചെയ്തു. പെരിന്തൽമണ്ണ ആലിപ്പറന്പ് സ്വദേശിയായ രോഹിത് എം.ജി. കൃഷ്ണൻ ചെറുപ്പം മുതൽ സിനിമയോട് താൽപര്യമായിരുന്നു. കോളജ് പഠനം മുതൽ ഷോട്ട് ഫിലിമുകൾ എടുത്ത് തുടങ്ങി.

മലപ്പുറത്തിന്‍റെ ഹരിതവർണങ്ങൾ; ഫോട്ടോ പ്രദർശനം തുടങ്ങി

മലപ്പുറം: ലോക ഭൗമ ദിനത്തോടനുബന്ധിച്ച് വനം-വന്യജീവി വകുപ്പ് മലപ്പുറം കോട്ടക്കുന്ന് ആർട്ട് ഗാലറിയിൽ നടത്തുന്ന ഫോട്ടോ പ്രദർശനം ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ ഉദ്ഘാടനം ചെയ്തു. കഴിഞ്ഞ വർഷം വന്യജീവി വാരാഘോഷത്തോടനുബന്ധിച്ച് നടത്തിയ ഫോട്ടോ പ്രദർശനത്തിൽ പങ്കെടുത്തവർക്കുള്ള സർട്ടിഫിക്കറ്റുകളും പ്രസിഡന്‍റ് വിതരണം ചെയ്തു. മലപ്പുറം സോഷ്യൽ ഫോറസ്ട്രി ഡിവിഷൻ ഡെപ്യൂട്ടി കണ്‍സർവേറ്റർ ഓഫ് ഫോറസ്റ്റ്സ് കെ.എ.മുഹമ്മദ് സൈനുൽ അബിദീൻ അധ്യക്ഷത വഹിച്ചു. ഫോട്ടോഗ്രാഫർമാർ, പരിസ്ഥിതി പ്രവർത്തകർ തുടങ്ങിയവർ പങ്കെടുത്തു. ജില്ലയിലെ വന്യജീവി-പരിസ്ഥിതി ഫോട്ടോഗ്രാഫർമാരുടെ ഫോട്ടോകളാണ് മലപ്പുറത്തിന്‍റെ ഹരിതവർണങ്ങൾ എന്ന പ്രദർശനത്തിൽ ഒരുക്കിയിട്ടുള്ളത്. പ്രദർശനം 22ന് ലോക ഭൗമ ദിനത്തിൽ സമാപിക്കും. നമ്മുടെ ശക്തി, നമ്മുടെ ഗ്രഹം എന്നതാണ് ഈ വർഷത്തെ ലോക ഭൗമദിനത്തിന്‍റെ പ്രമേയം.

’ഏലംകുളത്തിന്‍റെ കഥ എന്‍റെയും’ പുസ്തക പ്രകാശനം നാളെ

പെരിന്തൽമണ്ണ: വള്ളുവനാട്ടിലെ അറിയപ്പെടുന്ന കമ്മ്യൂണിസ്റ്റ് ആചാര്യനും ദീർഘകാലം ഏലംകുളം പഞ്ചായത്തിന്‍റെ പ്രസിഡന്‍റ്, ഏലംകുളം സർവീസ് സഹകരണ ബാങ്ക്, പെരിന്തൽമണ്ണ കോ ഓപ്പറേറ്റീവ് അർബൻ ബാങ്ക് എന്നിവയുടെ പ്രസിഡന്‍റായും പ്രവർത്തിച്ച എം.എം. അഷ്ടമൂർത്തിയുടെ ആത്മകഥയായ ന്ധഏലംകുളത്തിന്‍റെ കഥ എന്‍റെയും ന്ധ എന്ന പുസ്തകത്തിന്‍റെ പ്രകാശനം 21ന് നടക്കും. രാവിലെ ഒന്പതിന് ഏലംകുളം ഇഎംഎസ് അക്കാഡമിയിൽ സിപിഐ സംസ്ഥാന സെക്രട്ടറി ബിനോയ് വിശ്വം മുൻ മന്ത്രി പാലോളി മുഹമ്മദ് കുട്ടിക്ക് പുസ്തകം നൽകി പ്രകാശനം നിർവഹിക്കും. നജീബ് കാന്തപുരം എംഎൽഎ കെ.ഇ. ഇസ്മായിൽ, ഇ.എൻ. മോഹൻദാസ്, പി.പി. വാസുദേവൻ. പ്രതാപൻ തായാട്ട്, കെ.പി. രമണൻ തുടങ്ങിയവർ സംസാരിക്കും. സാഹിത്യകാരൻ പി.എസ്. വിജയകുമാർ പുസ്തകം പരിചയപ്പെടുത്തും. തുടർന്ന് നടക്കുന്ന ’ചില്ല സ്നേഹസംഗമം’ സാഹിത്യകാരനും കവിയുമായ ആലങ്കോട് ലീലാകൃഷ്ണൻ ഉദ്ഘാടനം ചെയ്യും. പി.കെ. മേദിനി മുഖ്യാതിഥിയാകും. ഇ.എം. സതീശൻ അധ്യക്ഷത വഹിക്കും. ഏലംകുളം പഞ്ചായത്ത് പ്രസിഡന്‍റ് പി. സുധീർബാബു, വി. ശശികുമാർ, വി.ടി. ബൽറാം, എൻ. സൂപ്പി, വി.ടി. വാസുദേവൻ, മാധവൻ തുടങ്ങിയവർ പങ്കെടുക്കും.

ദുരിതം പേറി പാലിയേറ്റീവ് സെന്‍ററിലേക്കുള്ള യാത്ര

കരുവാരകുണ്ട്: കരുവാരകുണ്ട് പെയിൻ ആൻഡ് പാലിയേറ്റീവ് കെയർ സൊസൈറ്റിയിലേക്കുള്ള റോഡ് ഗതാഗതം ദുസഹമെന്ന് പരാതി. പാലിയേറ്റീവ് കെയറിലേക്ക് കണ്ണത്ത് - കുട്ടത്തി റോഡിൽ നിന്നുള്ള വഴിയാണ് പൊട്ടിപ്പൊളിഞ്ഞും കുഴികൾ രൂപപ്പെട്ടും യാത്രാ ക്ലേശം നേരിടുന്നത്. പാലിയേറ്റീവ് കെയർ സൊസൈറ്റിയുടെ വിവിധ സ്ഥാപനങ്ങൾ പ്രവർത്തിക്കുന്ന കെട്ടിടത്തിലേക്കുള്ള വഴിയാണിത്. ഫിസിയോ തെറാപ്പി യൂണിറ്റ്, രോഗികൾക്ക് സഹായ ഉപകരണങ്ങൾ, രോഗികളുടെ സംഗമത്തിനുള്ള ഓഡിറ്റോറിയം, പെയിൻ ആൻഡ് പാലിയേറ്റീവ് കെയർ സൊസൈറ്റിയുടെ യോഗങ്ങൾ ചേരാനുള്ള ഇടം എന്നിവയെല്ലാം അടങ്ങിയ കെട്ടിടമാണ് ഇവിടെ പ്രവർത്തിക്കുന്നത്. കൂടാതെ അടുത്ത ദിവസം ഉദ്ഘാടനം ചെയ്യുന്ന പാലിയം ഡയാലിസിസ് സെന്‍റർ പ്രവർത്തിക്കുന്നതും കെട്ടിടങ്ങളോട് ചേർന്ന് തന്നെയാണ്. കെട്ടിടവും പരിസരവും പണികൾ പൂർത്തീകരിച്ച് സജ്ജമാക്കിയിട്ടുണ്ട്. അതേസമയം കെട്ടിടത്തിലേക്കുള്ള റോഡ് തകർച്ച നേരിടുകയാണ്. ഗ്രാമപഞ്ചായത്തിലെ വിവിധ പ്രദേശങ്ങളിലെ റോഡുകളും ഇടവഴികളും കോണ്‍ക്രീറ്റ് ചെയ്തു മറ്റും ഗതാഗതയോഗ്യമാക്കിയപ്പോൾ രോഗികളും ഭിന്നശേഷിക്കാരും ആശ്രയിക്കുന്ന പെയിൻ ആൻഡ് പാലിയേറ്റീവ് കെയർ സൊസൈറ്റിയുടെ കെട്ടിടത്തിലേക്കുള്ള റോഡ് പുനർപ്രവൃത്തി നടത്താത്തതിൽ പ്രതിഷേധമുയർന്നിട്ടുണ്ട്. പാലിയം ഡയാലിസിസ് സെന്‍റർ ഉദ്ഘാടനത്തിന് മുന്പെങ്കിലും അടിയന്തരമായി റോഡ് നവീകരിക്കണമെന്ന് നാട്ടുകാർ ആവശ്യപ്പെട്ടു.

പിഎസ്‌സി നിയമനങ്ങൾ ത്വരിതപ്പെടുത്തണം: മഞ്ഞളാംകുഴി അലി എംഎൽഎ

തിരൂർക്കാട്: പിഎസ്‌സി നിയമനങ്ങൾ ത്വരിതപ്പെടുത്തണമെന്നും സെക്രട്ടറിയറ്റിന് മുന്നിൽ സമരം നടത്തുന്നവരുടെ ഉൾപ്പെടെ നിലവിലെ റാങ്ക് ലിസ്റ്റുകളുടെ കാലാവധി ദീർഘിപ്പിച്ച് അർഹരായവർക്ക് അവസരം നൽകണമെന്നും മഞ്ഞളാംകുഴി അലി എംഎൽഎ ആവശ്യപ്പെട്ടു. കേരള അറബിക് ടീച്ചേഴ്സ് ഫെഡറേഷൻ സംസ്ഥാന സമിതി നടത്തുന്ന പിഎസ്‌സി പരീശീലനങ്ങളുടെ സമാപനം തിരൂർക്കാട് നുസ്റത്തുൽ ഇസ്ലാം ഓർഫനേജിൽ നിർവഹിക്കുകയായിരുന്നു അദ്ദേഹം. സംസ്ഥാന പ്രസിഡന്‍റ് എം.ടി. സൈനുൽ ആബിദീൻ അധ്യക്ഷത വഹിച്ചു. സൈഫുന്നിസ മലപ്പുറം ഒന്നും ഫാത്തിമ ഫർസാന കോട്ടക്കൽ രണ്ടും വി. ഹനീന മൂന്നും റാങ്കുകാരായി. സംസ്ഥാന സെക്രട്ടറിമാരായ സി.പി. മുഹമ്മദ്കുട്ടി, സി. മുഹമ്മദ് സജീബ്, എക്സിക്യൂട്ടീവ് അംഗങ്ങളായ ഹുസൈൻ പാറൽ, എം.ടി. റഷീദ് എന്നിവർ പ്രസംഗിച്ചു. ആർപിമാരായ ശിഹാബ് മാളിയേക്കൽ, ഡോ.മുഹമ്മദ് ശരീഫ് ഹുദവി, ഫാത്തിമ മുനവ്വിറ എന്നിവരെ ചടങ്ങിൽ ആദരിച്ചു. സംസ്ഥാന ജനറൽ സെക്രട്ടറി മൻസൂർ മാടന്പാട് സ്വാഗതവും ജില്ലാ ജനറൽ സെക്രട്ടറി എം.പി. ഫസൽ നന്ദിയും പറഞ്ഞു.

മഞ്ചേരിയിലെ ഗതാഗത പരിഷ്കാരം: ട്രയൽ റണ്ണിൽ നഗരസഭയ്ക്ക് പങ്കില്ലെന്ന് ‍

മഞ്ചേരി: ട്രാഫിക് പരിഷ്കരണത്തിന്‍റെ ഭാഗമായി മഞ്ചേരിയിൽ നടത്തിയ രണ്ടു ദിവസത്തെ ട്രയൽ റണ്ണിൽ നഗരസഭക്ക് പങ്കില്ലെന്ന് ചെയർപേഴ്സണ്‍ വി.എം.സുബൈദ പറഞ്ഞു. ആർടിഎ യോഗത്തിൽ എടുത്ത തീരുമാനത്തിന് വിരുദ്ധമായാണ് രണ്ടു ദിവസത്തെ ട്രയൽ റണ്‍ നടത്തിയത്. ഇത് അംഗീകരിക്കാനാകില്ല. അഡ്വ.യു.എ.ലത്തീഫ് എംഎൽഎയുടെ നേതൃത്വത്തിൽ ആർടിഎ യോഗത്തിൽ എടുത്ത തീരുമാനമാണ് നടപ്പാക്കേണ്ടത്. സെൻട്രൽ ജംഗ്ഷനിലെ പഴയ ബസ് സ്റ്റാൻഡ് പുതുക്കി നിർമിക്കുന്നതിന് വേണ്ടി പൊളിച്ചു മാറ്റിയ സാഹചര്യത്തിൽ മഞ്ചേരിയിൽ പുതുക്കിയ ട്രാഫിക് പരിഷ്കാരം കൊണ്ടുവരാനും ഐജിബിടി ബസ് സ്റ്റാൻഡും പാണ്ടിക്കാട് റോഡിലെ ബസ് സ്റ്റാൻഡ് സജീവമായി ഉപയോഗപ്പെടുത്തുന്ന രീതിയിൽ പുതിയ ട്രാഫിക് പരിഷ്കാരം കൊണ്ടുവരാനാണ് നഗരസഭ ആലോചിച്ചിരുന്നത്. മലപ്പുറം, പെരിന്തൽമണ്ണ ഭാഗത്തേക്കുള്ള മുഴുവൻ ബസുകളും ഐജിബിടിയിൽ നിന്ന് തുടങ്ങാനും അവിടെ തന്നെ യാത്ര അവസാനിപ്പിക്കുന്ന തരത്തിലുമായിരുന്നു തീരുമാനിച്ചിരുന്നത്. എന്നാൽ ഇതിന് വിരുദ്ധമായി ബസ് ഓണേഴ്സ് മുന്നോട്ടുവച്ച രീതിയിലും നേരത്തെ ആർടിഎ എടുത്ത തീരുമാനത്തിലും വെള്ളം ചേർത്താണ് രണ്ടു ദിവസത്തെ ട്രയൽ റണ്‍ നടത്തിയത്. ഐജിബിടിയും സീതിഹാജി സ്റ്റാൻഡും സജീവമായി നിലനിർത്തുന്നതിനാണ് നഗരസഭ ശ്രമിക്കുന്നത്. ഇത് അട്ടിമറിക്കുവാൻ ചിലർ ശ്രമിക്കുന്നുണ്ട്. ഇക്കാര്യം പോലീസ്, ജില്ലാ കളക്ടർ എന്നിവരെ അറിയിച്ചിട്ടുണ്ട്. പ്രശ്നം പരിഹരിക്കാമെന്ന് രണ്ടു പേരും അറിയിച്ചിട്ടുണ്ടെന്നും വി.എം.സുബൈദ പറഞ്ഞു.

അനുവദിച്ച പണം തിരിച്ചുപിടിച്ചെന്ന്; അങ്ങാടിപ്പുറം പഞ്ചായത്തിന് നഷ്ടം 14 കോടി

അങ്ങാടിപ്പുറം: സംസ്ഥാന സർക്കാരിന്‍റെ സാന്പത്തിക ഞെരുക്കം തീർക്കാൻ പ്രാദേശിക സർക്കാരുകൾക്ക് അനുവദിച്ച പണം തിരിച്ചുപിടിച്ച് സർക്കാർ വൻ കൊള്ളയാണ് നടത്തുന്നതെന്ന് അങ്ങാടിപ്പുറം പഞ്ചായത്ത് ഭരണസമിതി ഭാരവാഹികൾ ആരോപിച്ചു. അങ്ങാടിപ്പുറം പഞ്ചായത്തിന് നൽകിയ ഫണ്ടിൽ നിന്ന് 14,01,15,981 രൂപയാണ് സർക്കാർ തിരിച്ചുപിടിച്ചത്. തദ്ദേശ സ്ഥാപനങ്ങൾക്ക് ഫണ്ട് അനുവദിക്കുകയും അവ ചെലവഴിക്കാൻ കർശനമായ നിയന്ത്രണങ്ങൾ വരുത്തുകയും ജീവനക്കാരെ നൽകാതെ കഷ്ടപ്പെടുത്തുകയും ഒടുവിൽ ഫണ്ട് ചെലവഴിച്ചില്ലെന്ന കാരണം പറഞ്ഞു തിരിച്ചുപിടിക്കുകയും ചെയ്യുന്ന തന്ത്രമാണ് സർക്കാർ നടത്തുന്നതെന്ന് പ്രസിഡന്‍റ് കെ.പി. സഈദയും വൈസ് പ്രസിഡന്‍റ് ഷബീർ കറുമുക്കിലും പറഞ്ഞു. 2024 ഡിസംബറിൽ നൽകേണ്ട ഫണ്ട് 2025 മാർച്ച് മാസത്തിലാണ് സർക്കാർ നൽകിയത്. മാർച്ച് 31 വരെ ട്രഷറിയിൽ ബില്ലുകൾ സ്വീകരിക്കുന്നതിന് പകരം 26ന് തന്നെ ബില്ലുകൾ സ്വീകരിക്കൽ നിർത്തിവച്ച് മാർച്ച് 31ന് മുന്പ് ഫണ്ട് ചെലവഴിച്ചു തീർക്കണമെന്ന നിബന്ധന വച്ചു. ഈ സാന്പത്തിക വർഷമാണ് പഞ്ചായത്തിലെ 17 ജീവനക്കാരെ കൂട്ടത്തോടെ സ്ഥലം മാറ്റിയത്. മാസങ്ങളോളം ഇവരുടെ കസേരകൾ ഒഴിഞ്ഞുകിടന്നു. എൻജിനീയറിംഗ് വിംഗിലെ ഓവർസിയർമാരുടെ ഒഴിവുകൾ വർഷങ്ങളായി നികത്തിയിട്ടില്ല. ട്രഷറി നിയന്ത്രണം കാരണം സമർപ്പിക്കുന്ന ബില്ലുകൾ മാറ്റി നൽകിയില്ല. ഇപ്രകാരം അനുവദിച്ച ഫണ്ട് ചെലവാക്കാൻ സർക്കാർ തന്നെ തടസങ്ങൾ സൃഷ്ടിക്കുകയും മാർച്ച് 31 കഴിയുന്പോൾ പഞ്ചായത്തിന്‍റെ അക്കൗണ്ടിലുള്ള പണമെല്ലാം തിരിച്ചെടുക്കുകയുമാണ് സർക്കാർ ചെയ്യുന്നതെന്ന് ഭാരവാഹികൾ ചൂണ്ടിക്കാട്ടി.

‘തിയ്യരെ തകർക്കാനുള്ള ശ്രമം തിരിച്ചറിയണം’

എടക്കര: തിയ്യരെ ഈഴവന്‍റെ തൊഴുത്തിൽ കെട്ടാൻ വെള്ളാപ്പള്ളി ശ്രമിക്കരുതെന്ന് തിയ്യ മഹാസഭ സംസ്ഥാന പ്രസിഡന്‍റ് ഗണേഷ് അരമങ്ങാനം. ഉപ്പടയിൽ നടന്ന നിലന്പൂർ മണ്ഡലം തിയ്യ കുടുംബ സംഗമം ഉദ്ഘടനം ചെയ്ത് സംസാരിക്കുകയായിരുന്നു അദ്ദേഹം. തിയ്യരെ തകർക്കാനുള്ള എസ്എൻഡിപിയുടെ ഗൂഢ ശ്രമം തിരിച്ചറിയണമെന്നും എസ്എൻഡിപിയുമായുള്ള ബന്ധം ഉപേക്ഷിക്കണമെന്നും ഈഴവന്‍റെ ഉപജാതിയല്ല തിയ്യരെന്നും അവരെ അവഗണിക്കുന്നത് അവസാനിപ്പിക്കണമെന്നും അദ്ദേഹം ആവശ്യപ്പെട്ടു. നിലന്പൂർ മേഖലാ പ്രസിഡന്‍റ് അനീഷ് പെരിച്ചാത്ര അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ലക്ഷ്മണൻ, സംസ്ഥാന സെക്രട്ടറി പ്രേമാനന്ദൻ നടുത്തൊടി, സംസ്ഥാന മീഡിയ ചെയർമാൻ ചന്ദ്രൻ പുതുകൈ മലപ്പുറം, വൈസ് പ്രസിഡന്‍റ് സൗദാമിനി, ജില്ലാ ജനറൽ സെക്രട്ടറി ജയപ്രകാശ് കോട്ടയിൽ, കാസർഗോഡ് ജില്ലാ പ്രസിഡന്‍റ് വിശ്വംഭര പണിക്കർ, ജില്ലാ ജനറൽ സെക്രട്ടറി കെ.വി. പ്രസാദ്, ജില്ലാ ട്രഷറർ രാഘവൻ തിമിരി, ജില്ലാ വൈസ് പ്രസിഡന്‍റ് വി. രാജൻ, സൂരജ് പെരിച്ചാത്ര, ബാബു മഞ്ഞാംകുഴിയിൽ എന്നിവർ പ്രസംഗിച്ചു. ചടങ്ങിൽ മുതിർന്ന പൗരൻമാരെ ആദരിച്ചു. ചികിത്സ സഹായങ്ങൾ വിതരണം ചെയ്തു.

അനുഭവ പരിചയ പഠന പരിപാടിയിൽ പങ്കെടുത്ത് മൂവർ സംഘം

അങ്ങാടിപ്പുറം: ഗുജറാത്തിലെ വാദ്നഗറിൽ ഒരാഴ്ച നീണ്ടുനിന്ന ദേശീയ അനുഭവ പരിചയ പഠന പരിപാടിയിൽ (പ്രേരണ പ്രോഗ്രാം) പങ്കെടുത്ത് കേരളത്തിൽ നിന്നുള്ള ആദ്യസംഘം തിരിച്ചെത്തി. പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിലെ പത്താംക്ലാസ് വിദ്യാർഥിനി ജിയ മരിയ റോസ്, അധ്യാപിക ശ്രീജ ജോസഫ്, പാണ്ടിക്കാട് ഗവണ്‍മെന്‍റ് ഹയർ സെക്കൻഡറി സ്കൂളിലെ പത്താംക്ലാസ് വിദ്യാർഥി എം. ജിഷ്ണു എന്നിവരാണ് കേരളത്തിൽ നിന്ന് ആദ്യമായി ഈ പരിപാടിയിൽ പങ്കെടുക്കുന്നത്. കേന്ദ്ര വിദ്യാഭ്യാസ മന്ത്രാലയം സംഘടിപ്പിച്ച ഈ സഹവാസ പരിപാടിയുടെ ലക്ഷ്യം പുതിയ പഠനരീതികൾ വിദ്യാർഥികളെയും അധ്യാപകരെയും പരിചയപ്പെടുത്തുക എന്നതായിരുന്നു. രാജ്യത്തിന്‍റെ ഭൂമിശാസ്ത്രം, ചരിത്രം, വാസ്തുവിദ്യ, ഗണിതം, വൈവിധ്യമാർന്ന ഭാഷാ വിഭവങ്ങൾ, കാലാവസ്ഥ, കല, സാഹിത്യം, സംസ്കാരം എന്നിവയെല്ലാം ചർച്ചയായി. ജില്ലാതലത്തിൽ നടത്തിയ എഴുത്തു പരീക്ഷയുടെയും അഭിമുഖത്തിന്‍റെയും അടിസ്ഥാനത്തിലാണ് ദേശീയ പരിപാടിയിൽ പങ്കെടുക്കാൻ ജിയ മരിയ റോസ്, എം. ജിഷ്ണു എന്നിവരെ തെരഞ്ഞെടുത്തത്. ഇതേ ദിവസങ്ങളിൽ അധ്യാപകർക്കായി നടത്തിയ ശില്പശാലയിൽ പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിലെ ഹിന്ദി അധ്യാപിക ശ്രീജ ജോസഫും പങ്കെടുത്തു. രാജ്യത്തിന്‍റെ അഖണ്ഡമായ വൈവിധ്യങ്ങളെ തിരിച്ചറിയാനും വിവിധ സംസ്ഥാനങ്ങളിൽ നിന്ന് എത്തിയവർക്കൊപ്പം അറിവുകൾ പങ്കുവയ്ക്കാനും മൂല്യബോധം അടിസ്ഥാനമാക്കിയ ക്ലാസുകളിൽ പങ്കെടുക്കാനും കഴിഞ്ഞത് ഭാഗ്യമായെന്ന് ജിയ മരിയ റോസ്, എം. ജിഷ്ണു, അധ്യാപിക ശ്രീജ ജോസഫ് എന്നിവർ പറഞ്ഞു.

കൊച്ചിയുടെ നീലാകാശത്ത് പാറിപ്പറന്ന് ചുങ്കത്തറ സ്കൂളിലെ എൻസിസി കേഡറ്റുകൾ

എടക്കര: കൊച്ചിയുടെ നീലാകാശത്ത് പാറിപ്പറന്ന് ചുങ്കത്തറ എംപിഎം ഹയർ സെക്കൻഡറി സ്കൂളിലെ എയർ വിംഗ് എൻസിസി കേഡറ്റുകൾ. പറക്കൽ പരിശീലനത്തിന്‍റെ ഭാഗമായാണ് കേഡറ്റുകളായ കെ. മിൻഹാൽ, എം. നജിൽ, പി. അൻഷിബ്, പി.എ. അനഘ, സേറ സൂസൻ ജോസഫ്, ആർസൂ തുഹ്ഫ, അമൽ സെൻഹ കൊച്ചി നേവൽ ബേസ് ആസ്ഥാനത്ത് എത്തിയതും പറക്കൽ പരിശീലനം നേടിയതും. ഏപ്രിൽ 10 മുതൽ 19 വരെ എറണാകുളം സെന്‍റ് പീറ്റേഴ്സ് എച്ച്എസ്എസ് കോലഞ്ചേരി സ്കൂളിൽ നടന്നു കൊണ്ടിരിക്കുന്ന എൻസിസിയുടെ വാർഷിക ക്യാന്പിൽ പങ്കെടുത്ത 45 കുട്ടികളിൽ നിന്ന് തെരഞ്ഞെടുക്കപ്പെട്ട കേഡറ്റുകൾക്കാണ് ആദ്യഘട്ടം പരിശീലനം ലഭിച്ചത്. എയർവിംഗ് എൻസിസിയുടെ സിലബസിന്‍റെ ഭാഗമായാണ് പരിശീലനമെങ്കിലും ആദ്യമായി ആകാശത്ത് പറക്കാനും കൊച്ചിയുടെ ആകാശക്കാഴ്ചകൾ കാണാനും സാധിച്ചതിന്‍റെ സന്തോഷത്തിലാണ് കേഡറ്റുകൾ. എയർ വിംഗ് പരിശീലനത്തിന് ഉപയോഗിക്കുന്ന മൈക്രോലൈറ്റ് എയർക്രാഫ്റ്റിലാണ് കൊച്ചിയുടെ നീലവാനിൽ കേഡറ്റുകൾ പറന്നത്. ടേക്ക് ഓഫ്, ലാൻഡിംഗ് എന്നിവയ്ക്ക് പുറമേ എയർക്രാഫ്റ്റിന്‍റെ പ്രവർത്തനങ്ങളും ഭാഗങ്ങളും കോക്ക് പിറ്റിനകത്തുള്ള സംവിധാനങ്ങളും കുട്ടികൾക്ക് മനസിലാക്കാൻ കഴിഞ്ഞു. പരിശീലനത്തിന് കേരള എയർ വിംഗ് കമാൻഡിംഗ് ഓഫീസർ വിംഗ് കമാൻഡർ സുമിത്ത് ശേഖർ, സർജന്‍റ് മുഖർജി, സ്കൂൾ എൻസിസി ഓഫീസർ ബ്രൈറ്റ് കെ. തോലത്ത് എന്നിവർ നേതൃത്വം നൽകി.

യാത്രയയപ്പ് നൽകി

എടക്കര: സംസ്ഥാന വനിത ശിശുവികസന വകുപ്പിന് കീഴിലുള്ള ചൈൽഡ് വെൽഫെയർ ഇൻസ്പെക്ടർ തസ്തികയിൽ നിന്ന് വിരമിക്കുന്ന എടക്കര യത്തീംഖാന പൂർവ വിദ്യാർഥി ബഷീർ നീർമുണ്ടക്ക് മുസ്ലിം ഓർഫനേജ് ഓൾഡ് സ്റ്റുഡന്‍റ്സ് അസോസിയേഷൻ യാത്രയയപ്പ് നൽകി. ജില്ലാ പഞ്ചായത്ത് വൈസ് പ്രസിഡന്‍റും എടക്കര യതീംഖാന ജനറൽ സെക്രട്ടറിയുമായ ഇസ്മായിൽ മൂത്തേടം ഉപഹാരം നൽകി. ഇഎംഒഒഎസ്എ പ്രസിഡന്‍റ് പി. മുഹമ്മദ്ബാബു അധ്യക്ഷത വഹിച്ചു. യതീംഖാന വർക്കിംഗ് സെക്രട്ടറി കളത്തിങ്ങൽ മജീദ്, മച്ചിങ്ങൽ കുഞ്ഞു, യാസർ, എരഞ്ഞിയിൽ മുജീബ്, എം.ടി. അബ്ദുറഹിമാൻ, എൻ. ബിയ്യ, മജീദ് മുസ്ലിയാർ, കെ. നൗഫൽ എന്നിവർ പ്രസംഗിച്ചു.

നിലന്പൂരിൽ ഏഴ് റോഡുകളുടെ പ്രവൃത്തി പൂർത്തിയായി

നിലന്പൂർ: നിലന്പൂർ നഗരസഭയിലെ മുതുകാട് ഡിവിഷനിലെ ഏഴ് റോഡുകൾ പ്രവൃത്തി പൂർത്തികരിച്ചു. നഗരസഭാധ്യക്ഷൻ മാട്ടുമ്മൽ സലീം ഉദ്ഘാടനം ചെയ്തു. ആരോഗ്യകാര്യ സ്ഥിരംസമിതി അധ്യക്ഷൻ കക്കാടൻ റഹീം അധ്യക്ഷത വഹിച്ചു. വിവിധ ഉദ്ഘാടന പരിപാടികളിൽ സദാനനന്ദൻ, ജോണ്‍ സുകുമാർ, ലിജിഷ്, റിയാസ് കാവാടൻ, രാമചന്ദ്രൻ, അശോകൻ എന്നിവർ പ്രസംഗിച്ചു. റെയിൽവേ സ്റ്റേഷൻ -ബിക്കുട്ടി കോട്ടേജ് റോഡ്, പട്ടരാക്ക അങ്കണവാടി റോഡ്, പട്ടരാക്ക കറുത്തേടത്ത് റോഡ്, മുതുകാട് ചൂരപ്പെട്ടി-രാമംകുത്ത് റോഡ്, മുതുകാട്-ഏരാൻ റോഡ്, മുതുകാട്-കാങ്കപൊയിൽ റോഡ്, മുതുകാട്-ചൂരകുളം റോഡ് എന്നിവയുടെ ഉദ്ഘാടനങ്ങളാണ് നടന്നത്.

നിലന്പൂർ ഉപതെരഞ്ഞെടുപ്പ് : സ്ഥാനാർഥിയെ തീരുമാനിച്ചിട്ടില്ല: എളമരം കരീം

നിലന്പൂർ: നിലന്പൂർ നിയമസഭ മണ്ഡലത്തിലേക്ക് നടക്കുന്ന ഉപതെരഞ്ഞെടുപ്പിൽ പാർട്ടി സ്ഥാനാർഥി ആരെന്ന് തീരുമാനിച്ചിട്ടില്ലെന്ന് സിപിഎം കേന്ദ്ര കമ്മിറ്റി അംഗം എളമരം കരീം. നിലന്പൂർ അകന്പാടത്ത് മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. തെരഞ്ഞെടുപ്പ് പ്രഖ്യാപനം ഉണ്ടായാൽ ഉടൻ സ്ഥാനാർഥി പ്രഖ്യാപനം ഉണ്ടാകും. നിലന്പൂരിൽ വിജയ സാധ്യതയുള്ള സ്ഥാനാർഥി വരും. ഇടതുപക്ഷ നയങ്ങളുമായി യോജിക്കുന്നവരെ ഒപ്പം നിർത്തുമെന്നും അദ്ദേഹം പറഞ്ഞു. നിലന്പൂർ മണ്ഡലത്തിലെ ഉപതെരഞ്ഞെടുപ്പ് എൽഡിഎഫ് സർക്കാരിന്‍റെ വിലയിരുത്തലാകും. എൽഡിഎഫിന്‍റെ സിറ്റിംഗ് മണ്ഡലമായ നിലന്പൂർ എൽഡിഎഫ് നിലനിർത്തും. മണ്ഡലത്തിൽ നടപ്പാക്കിയ വികസന പ്രവർത്തനങ്ങൾ മുൻനിർത്തി തന്നെയാകും പ്രചാരണം. നിലന്പൂർ മണ്ഡലത്തിൽ നിലവിൽ എൽഡിഎഫിന് തന്നെയാണ് മുൻതൂക്കം. പി.വി. അൻവർ ഒരു ഘടകമേ അല്ല. മുനന്പം വിഷയത്തിൽ മുസ്ലിം ലീഗ് നിയമസഭയിൽ മുനന്പം ജനതയെ കൈയേറ്റക്കാരായാണ് എടുത്തുകാട്ടിയത്. വഖഫ് ഭേദഗതി ബില്ലിലൂടെ പ്രശ്നങ്ങൾ പരിഹരിച്ചുവെന്ന് ബിജെപി മുനന്പം ജനതയോടെ പറഞ്ഞതും കളവാണെന്ന് എളമരം കരീം പറഞ്ഞു. രണ്ടു കൂട്ടരും മുനന്പം ജനതയെ വഞ്ചിക്കുകയാണ്. സർക്കാർ മുനന്പം ജനതക്ക് ഒപ്പമാണ്. കോണ്‍ഗ്രസിന്‍റെ മൃദുഹിന്ദുത്വ നയമാണ് വഖഫ് ഭേദഗതി ബില്ലിൽ നിന്ന് പ്രിയങ്കാഗാന്ധി വിട്ടുനിൽക്കാനും പ്രതിപക്ഷ നേതാവ് രാഹുൽ ഗാസി സംസാരിക്കാതായിരിക്കാനും കാരണം. നെഹ്റു കുടുംബം 200 കോടിയുടെ അഴിമതി ആരോപണത്തിന്‍റെ മുൾമുനയിലാണെന്നും എളമരം കരീം പറഞ്ഞു. നിലന്പൂരിൽ വിജയ സാധ്യതയുള്ള സ്ഥാനാർഥി വരും. ഇടതുപക്ഷ നയങ്ങളുമായി യോജിക്കുന്നവരെ ഒപ്പം നിറുത്തുമെന്നും അദ്ദേഹം പറഞ്ഞു.

സംസ്ഥാന ഹജ്ജ് ക്യാന്പ് നാളെ; സ്വലാത്ത് നഗറിൽ രജിസ്റ്റർ ചെയ്തത് പതിനായിരത്തോളം ഹാജിമാർ

മലപ്പുറം: ഹജ്ജ് ഉംറ ഉദ്ദേശിക്കുന്നവർക്ക് അറിവനുഭവങ്ങളുടെ വേദിയൊരുക്കാൻ സജ്ജമായി മലപ്പുറം സ്വലാത്ത് നഗർ മഅ്ദിൻ അക്കാഡമി. 26-ാമത് സംസ്ഥാന ഹജ്ജ് ക്യാന്പിന്‍റെ ഒരുക്കങ്ങൾ പൂർത്തിയായതായും പതിനായിരത്തോളം ഹാജിമാർ രജിസ്റ്റർ ചെയ്തതായും ഭാരവാഹികൾ അറിയിച്ചു. കേരളത്തിലെ വിവിധ ജില്ലകളിൽ നിന്നും ലക്ഷദ്വീപ്, നീലഗിരി, മംഗലാപുരം തുടങ്ങിയ സ്ഥലങ്ങളിൽ നിന്നും എത്തിച്ചേരുന്ന ആയിരക്കണക്കിന് ഹാജിമാരെ ഉൾക്കൊള്ളുന്ന വിധത്തിൽ വിശാലമായ പന്തലാണ് മഅ്ദിൻ പ്രധാന കാന്പസിൽ ഒരുക്കിയിട്ടുള്ളത്. ഗവണ്‍മെന്‍റ്, സ്വകാര്യ ഗ്രൂപ്പുകൾ മുഖേന യാത്രതിരിക്കുന്നവർക്ക് ക്യാന്പിൽ പങ്കെടുക്കാം. രാവിലെ എട്ട് മുതൽ വൈകുന്നേരം അഞ്ച് വരെ നീണ്ടുനിൽക്കുന്ന ഹജ്ജ് ക്യാന്പ് മന്ത്രി വി. അബ്ദുറഹിമാൻ ഉദ്ഘാടനം ചെയ്യും. കേരള ഹജ്ജ് കമ്മിറ്റി ചെയർമാൻ ഡോ. ഹുസൈൻ സഖാഫി ചുള്ളിക്കോട് മുഖ്യാതിഥിയാകും. മഅ്ദിൻ അക്കാഡമി ചെയർമാൻ സയ്യിദ് ഇബ്റാഹീമുൽ ഖലീൽ അൽ ബുഖാരി അധ്യക്ഷത വഹിക്കും. ഹജ്ജ് പണ്ഡിതൻമാരായ കൂറ്റന്പാറ അബ്ദുറഹ്മാൻ ദാരിമി ക്ലാസ് നയിക്കും. ഇബ്റാഹീം ബാഖവി മേൽമുറി, അബൂശാക്കിർ സുലൈമാൻ ഫൈസി കിഴിശേരി എന്നിവർ സംശയനിവാരണത്തിന് നേതൃത്വം നൽകും. ക്യാന്പിനെത്തുന്ന ഹാജിമാർക്ക് സൗജന്യ ഹജ്ജ് കിറ്റ് വിതരണം ചെയ്യും. രജിസ്ട്രേഷനും വിവരങ്ങൾക്കും ഫോൺ: 9072310111, 9072310222.

"സംഗീതമാകട്ടെ ലഹരി’; ലോഗോ പ്രകാശനം ചെയ്തു

മലപ്പുറം: മെഹ്ഫിൽ മാപ്പിളകലാ അക്കാഡമിയുടെ നേതൃത്വത്തിൽ മലപ്പുറം നഗരസഭയുമായും മഹാകവി മോയിൻകുട്ടി വൈദ്യർ അക്കാഡമിയുമായും സഹകരിച്ച് വിദ്യാർഥികളിൽ വർധിച്ചുവരുന്ന ലഹരിക്കെതിരേ "സംഗീതമാകട്ടെ ലഹരി' എന്ന പേരിൽ നടത്തുന്ന ബോധവത്കരണ കാന്പയിനിന്‍റെ ലോഗോ പ്രകാശനം കളക്ടർ വി.ആർ. വിനോദ് നിർവഹിച്ചു. നഗരസഭാ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ പി.കെ.അബ്ദുൾ ഹക്കീം ലോഗോ ഏറ്റുവാങ്ങി. പ്രസ് ക്ലബ് സെക്രട്ടറി വി.പി.നിസാർ, മെഹ്ഫിൽ മാപ്പിളകലാ അക്കാഡമി ഡയറക്ടർ ഹനീഫ് രാജാജി, മെഹ്ഫിൽ ഭാരവാഹികളായ ഹമീദ് മഗ്രിബി, നൗഷാദ് മാന്പ്ര, അൽത്താഫ് കിളിയമണ്ണിൽ എന്നിവർ സംബന്ധിച്ചു.

ദ്വിദിന ക്രിക്കറ്റ്: കണ്ണൂർ ഗ്രൂപ്പ് ജേതാക്കൾ

പെരിന്തൽമണ്ണ: പെരിന്തൽമണ്ണ ക്രിക്കറ്റ് സ്റ്റേഡിയത്തിൽ 16 വയസിന് താഴെയുള്ള ആണ്‍കുട്ടികളുടെ ഉത്തരമേഖല അന്തർജില്ലാ ദ്വിദിന ക്രിക്കറ്റിൽ മലപ്പുറം-വയനാട് മത്സരം സമനിലയിലായി. ഉത്തരമേഖല മത്സരങ്ങൾ ഇതോടെ അവസാനിച്ചു. നാല് മത്സരങ്ങളും വിജയിച്ച കണ്ണൂരാണ് ഗ്രൂപ്പ് ജേതാക്കൾ. നാല് മത്സരങ്ങളിലും സമനില നേടിയ മലപ്പുറം മൂന്നാം സ്ഥാനക്കാരായി.

അക്രമം: രണ്ട് യുവാക്കൾക്കെതിരേ കേസെടുത്തു

എടക്കര: പെതുസ്ഥലത്ത് അക്രമം നടത്തിയതിനും പോലീസിന്‍റെ കൃത്യനിർവഹണം തടസപ്പെടുത്തിയതിനും രണ്ട് യുവാക്കൾക്കെതിരേ എടക്കര പോലീസ് കേസെടുത്തു. കാക്കപ്പരത കൈപ്പഞ്ചേരി സുഹൈർ(26), ഉള്ളരിത്തൊടിക വിനോദ് (26) എന്നിവർക്കെതിരേയാണ് എടക്കര പോലീസ് വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തത്. കഴിഞ്ഞ ദിവസം പാലേമാട് വച്ചാണ് കേസിനാസ്പദമായ സംഭവം നടന്നത്. അമിതവേഗത്തിൽ പാലേമാട് ടൗണിൽ കൂടി ബൈക്ക് ഓടിച്ച പ്രതികൾ കുരുടിത്തോടിന്‍റെ വളവിൽ റോഡിൽക്കൂടിയല്ലാതെ വാഹനം സ്വകാര്യവ്യക്തിയുടെ തോട്ടത്തിലൂടെ ഓടിച്ചുപോവുകയും അപകടത്തിൽപെടുകയുമായിരുന്നു. സമീപത്ത് പട്രോളിംഗ് നടത്തുകയാായിരുന്ന പോലീസ് സ്ഥലത്തെത്തി നടത്തിയ പരിശോധനയിൽ സുഹൈറിന്‍റെ കൈവശം ഒരു പൊതി കാണുകയും പരിശോധിക്കാൻ ശ്രമിക്കുന്നതിനിടെ യുവാക്കൾ പോലീസിനെ അക്രമിക്കുകയുമയിരുന്നു. സുഹൈറിനെതിരേ കഞ്ചാവ്, എംഡിഎംഎ എന്നിവ ഉപയോഗിച്ചതിനും അക്രമം നടത്തിയതിനും കേസുകളുണ്ട്.

മഞ്ചേരിയിലെ ട്രാഫിക് പരിഷ്കരണത്തിനെതിരേ വ്യാപാരികളും ബസുടമകളും രംഗത്ത്

മഞ്ചേരി: മഞ്ചേരിയിൽ ആർടിഎ നടത്തിയ ട്രയൽ റണ്‍ പ്രകാരം ഗതാഗത പരിഷ്കരണം നടത്തുന്നതിനെതിരേ വ്യാപാരികളും ബസുടമകളും രംഗത്ത്. വ്യാപാരി വ്യവസായി ഏകോപന സമിതി നഗരത്തിൽ പ്രതിഷേധ പ്രകടനം നടത്തി. വെറും 100 മീറ്റർ ദൂരത്തേക്ക് എത്താൻ മൂന്നു കിലോമീറ്ററിലധികം ചുറ്റി സഞ്ചരിക്കേണ്ട അവസ്ഥയാണ് പുതിയ പരിഷ്കാരം മൂലമെന്ന് പ്രസിഡന്‍റ് നിവിൽ ഇബ്രാഹിം ചൂണ്ടിക്കാട്ടി. ജനറൽ സെക്രട്ടറി സക്കീർ ചമയം, ട്രഷറർ അൽത്താഫ്, യൂണിറ്റ് വൈസ് പ്രസിഡന്‍റുമാരായ ഹമീദ് കുരിക്കൾ, സഹീർ കോണ്‍മ്മത്ത്, എൻ.ടി.കെ. ബാപ്പു, സെക്രട്ടറിമാരായ അജിത് അജുവ, ഷെരീഫ് ചേലാസ്, ആൽബർട്ട് കണ്ണന്പുഴ, ഷെരീഫ് ചെറി, കമറുദീൻ, സാലിം താജ് എന്നിവർ നേതൃത്വം നൽകി. മഞ്ചേരിയിലെ ഇരു ബസ് സ്റ്റാൻഡുകളിലും നിലവിലുള്ള ഹാൾട്ടിംഗ് പ്ലെയ്സ് മാറ്റിക്കൊണ്ടുള്ള ട്രാഫിക് പരിഷ്കാരം നടപ്പാക്കുന്നപക്ഷം നിയമപരമായി നേരിടുന്നതിനും മുഴുവൻ ബസുകളും സർവീസ് നിർത്തിവച്ചു കൊണ്ടുള്ള സമരം ചെയ്യുന്നതിനും മലപ്പുറം ജില്ലാ ബസ് ഓപറേറ്റേഴ്സ് അസോസിയേഷൻ വർക്കിംഗ് കമ്മിറ്റി യോഗം തീരുമാനിച്ചു. യോഗം സംസ്ഥാന ജനറൽ സെക്രട്ടറി ഹംസ ഏരിക്കുന്നൻ ഉദ്ഘാടനം ചെയ്തു. ജില്ലാ പ്രസിഡന്‍റ് നാണിഹാജി അധ്യക്ഷത വഹിച്ചു. ഭാരവാഹികളായ പക്കീസ കുഞ്ഞിപ്പ, പാസ് മാനു, ഗാലക്സി നസീർ, ഊരാളത്ത് അനിൽകുമാർ, റഫീഖ് കുരിക്കൾ, മഠത്തിൽ സുലൈമാൻ, വെട്ടത്തൂർ മുഹമ്മദലി ഹാജി, കെ.പി. മുഹമ്മദ് കോയ, മിന്നാസ് റഹീം തുടങ്ങിയവർ പ്രസംഗിച്ചു.

പ്രത്യാശയുടെ സന്ദേശവുമായി ഇന്ന് ഈസ്റ്റർ

അങ്ങാടിപ്പുറം: പീഡാനുഭവത്തിനും കുരിശു മരണത്തിനും ശേഷം ക്രിസ്തുവിന്‍റെ പുനരുത്ഥാനത്തിലൂടെ പ്രതീക്ഷയുടെ സന്ദേശം പകർന്ന് ഇന്ന് ഈസ്റ്റർ. പരിയാപുരം ഫാത്തിമ മാതാ ഫൊറോന ദേവാലയത്തിൽ നടന്ന പീഡാനുഭവ തിരുക്കർമങ്ങൾക്ക് ഫൊറോന വികാരി ഫാ.ജോർജ് കളപ്പുരക്കൽ, അസിസ്റ്റന്‍റ് വികാരി ഫാ.സിറിൾ ഇലക്കുടിക്കൽ എന്നിവർ കാർമികത്വം വഹിച്ചു. പുത്തനങ്ങാടി സെന്‍റ് മേരീസ് കോളജ് വൈസ് പ്രിൻസിപ്പൽ ഫാ.ചാക്കോ കൊച്ചുപറന്പിൽ വചനസന്ദേശം നൽകി. പരിയാപുരത്ത് നിന്ന് ചീരട്ടാമല ക്രിസ്തുരാജ ദേവാലയത്തിലേക്ക് നടത്തിയ കുരിശിന്‍റെ വഴിയിൽ നൂറുക്കണക്കിനു വിശ്വാസികൾ പ്രാർഥനാപൂർവം പങ്കാളികളായി. ഫൊറോന വികാരി ഫാ.ജോർജ് കളപ്പുരക്കൽ പീഡാനുഭവ സന്ദേശം നൽകി. ചീരട്ടാമല ക്രിസ്തുരാജ ദേവാലയ വികാരി ഫാ.സിജോ പുളിമൂട്ടിൽ, ഇടവക ട്രസ്റ്റിമാർ, പാരിഷ് കൗണ്‍സിൽ അംഗങ്ങൾ തുടങ്ങിയവർ നേതൃത്വം നൽകി. ദുഃഖശനി ആചരണത്തിന്‍റെ ഭാഗമായി പുത്തൻ തീ-പുത്തൻ വെള്ളം വെഞ്ചരിപ്പ്, ജ്ഞാന സ്നാന വ്രത നവീകരണം, വിശുദ്ധ കുർബാന എന്നിവയുണ്ടായി. ഉയിർപ്പു തിരുനാൾ ആഘോഷങ്ങൾ ഇന്നലെ രാത്രി 10.30ന് തുടങ്ങി. ഇന്നു രാവിലെ ഏഴിനും വിശുദ്ധ കുർബാന നടന്നു. ഉയിർപ്പു തിരുനാൾ ആഘോഷത്തോടെ വിശുദ്ധവാരത്തിനു സമാപനമാകും. മലപ്പുറം: മലപ്പുറം സെന്‍റ് ജോസഫ് ഫൊറോന ദേവാലയത്തിൽ ദുഃഖവെള്ളിയാഴ്ചയിലെ കുരിശിന്‍റെ വഴിക്ക് വികാരി മോണ്‍. വിൻസെന്‍റ് അറയ്ക്കൽ നേതൃത്വം നൽകി. നിലന്പൂർ: ദുഃഖവെള്ളി ശുശ്രൂഷകൾക്ക് ഇടവക വികാരിമാർ നേതൃത്വം നൽകി. ഇടിവണ്ണ സെന്‍റ് തോമസ് ദേവാലയത്തിൽ നിന്ന് പെരുവന്പാടത്തേക്ക് നടന്ന കുരിശിന്‍റെ വഴിയിൽ നൂറുക്കണക്കിന് വിശ്വാസികളാണ് പങ്കെടുത്തത്. ഇടവക വികാരി ഫാ. കുര്യാക്കോസ് കൂന്പക്കിൽ നേതൃത്വം നൽകി. മൂലേപ്പാടം സെന്‍റ് ജോസഫ് ദേവാലയത്തിൽ നിന്ന് എച്ച് ബ്ലോക്കിലേക്ക് നടത്തിയ കുരിശിന്‍റെ വഴിക്ക് ഇടവക വികാരി ഫാ. ഷിൻറ്റോ പുലിക്കുഴിയിൽ നേതൃത്വം നൽകി. നിലന്പൂർ ലിറ്റിൽ ഫ്ളവർ ഫൊറോന ദേവാലയത്തിൽ നടത്തിയ ദുഃഖവെള്ളി ശുശ്രൂഷകൾക്കും കുരിശിന്‍റെ വഴിക്കും നിലന്പൂർ ലിറ്റിൽ ഫ്ളവർ ഫൊറോന വികാരി ഫാ. ജെയ്സണ്‍ കുഴികണ്ടത്തിൽ, അസിസ്റ്റന്‍റ് വികാരി ഫാ. അനൂപ് കോച്ചേരി എന്നിവർ നേതൃത്വം നൽകി. വടപുറം സെന്‍റ് ഫ്രാൻസിസ് അസീസി ദേവാലയത്തിൽ നടന്ന കുരിശിന്‍റെ വഴിക്ക് ഇടവക വികാരി ഫാ. ബിജു നീലത്തറ നേതൃത്വം നൽകി. ഇന്നലെ രാത്രി നടന്ന തിരുപിറവി ശുശ്രൂഷകളിലും വിശ്വാസികൾ പങ്കെടുത്തു. വന്യമൃഗശല്യം രൂക്ഷമായ സാഹചര്യത്തിൽ രാത്രി 10 മണിയോടെ ചടങ്ങുകൾക്ക് സമാപനമായി.വെറ്റിലപ്പാറ സെന്‍റ് അഗസ്റ്റ്യൻ ദേവാലയത്തിൽ നിന്ന് ടൗണ്‍ കുരിശ് പള്ളിയിലേക്ക് നടത്തിയ കുരിശിന്‍റെ വഴിയിൽ നൂറുക്കണക്കിന് വിശ്വാസികൾ പങ്കെടുത്തു. നരിവാലമുണ്ട സെന്‍റ് ജോസഫ് ദേവാലയത്തിൽ കുരിശിന്‍റെ വഴി നടത്തി. വികാരി ഫാ. സുനിൽ മഠത്തിൽ നേതൃത്വം നൽകി. കരുവാരകുണ്ട്: കരുവാരകുണ്ട് സെന്‍റ് ജോർജ് മലങ്കര സുറിയാനി കത്തോലിക്ക പള്ളിയിൽ ദുഃഖ വെള്ളിയാഴ്ചയോടനുബന്ധിച്ച് ക്രിസ്തുവിന്‍റെ പീഡസഹനവും കുരിശു മരണവും അനുസ്മരിച്ച് ഇടവക വിശ്വാസികൾ വികാരി ഫാ. ജോർജ് ആലുമുട്ടിൽ, സി. ജെയിൻ ഫ്രാൻസിസ്, ഇടവക കമ്മിറ്റി അംഗങ്ങളുടെയും ഭക്തസംഘടനകളുടെയും നേതൃത്വത്തിൽ ശുശ്രൂഷകൾ നടത്തി. പ്രാർഥനകളോടൊപ്പം നടന്ന പ്രദക്ഷിണത്തിലും സ്ലീബാ വന്ദനത്തിലും കബറടക്ക ശുശ്രൂഷയിലും നൂറുക്കണക്കിന് വിശ്വാസികൾ പങ്കെടുത്തു. എടക്കര: ക്രിസ്തുവിന്‍റെ കുരിശ് മരണം അനുസ്മരിച്ച് ക്രൈസ്തവ വിശ്വാസികൾ ദുഃഖവെള്ളി ആചരിച്ചു. പള്ളികളിൽ ഇന്നലെ വൈകുന്നേരം മുതൽ ഈസ്റ്ററിന്‍റെ കർമങ്ങൾ തുടങ്ങി. ഉപ്പട മലച്ചി സെന്‍റ് ജോർജ് ഓർത്തഡോക്സ് പള്ളിയിൽ നടന്ന ദുഃഖവെള്ളിയുടെ ചടങ്ങുകൾക്ക് ഫാ. മാത്യൂസ് വട്ടിയാനിക്കൽ നേതൃത്വം നൽകി. മണിമൂളി ക്രിസ്തുരാജ ഫൊറോന ദേവാലയത്തിൽ ദുഃഖവെള്ളിയോടനുബന്ധിച്ച് കുരിശിന്‍റെ വഴി നടത്തി. മണിമൂളി പള്ളിയിൽ നിന്ന് ആരംഭിച്ച് പാലാട് മുന്നൂർ വഴി പള്ളിയിലെത്തി. കുരിശിന്‍റെ വഴിയുടെ ആശീർവാദം വിശ്വാസികൾ ഏറ്റുവാങ്ങി. ഇടവക വികാരി ഫാ. ബെന്നി മുതിരക്കാലായിൽ, അസിസ്റ്റന്‍റ് വികാരി ഫാ. ജെറിൻ പൊയ്കയിൽ എന്നിവർ ശുശ്രൂഷകൾക്ക് നേതൃത്വം നൽകി.

സ്കൂൾ മാനേജർമാരുടെ പ്രസ്താവനയിൽ പ്രതിഷേധിച്ചു

മലപ്പുറം: പ്രൈമറി അധ്യാപക മേഖലയിലെ ഭിന്നശേഷി തൊഴിൽ സംവരണം ഒഴിവാക്കണമെന്ന പ്രൈമറി എയ്ഡഡ് സ്കൂൾ മാനേജേഴ്സ് അസോസിയേഷന്‍റെ പ്രസ്താവനയിൽ ഡിഫറന്‍റിലി ഏബിൾഡ് പേഴ്സണ്‍സ് വെൽഫെയർ ഫെഡറേഷൻ ജില്ലാ കമ്മിറ്റി യോഗം പ്രതിഷേധിച്ചു. പ്രൈമറി അധ്യാപകരായി ഭിന്നശേഷിക്കാർ നിയമിതരായാൽ പഠിതാക്കൾക്ക് ഗുണമേൻമ ലഭിക്കില്ലെന്ന അസോസിയേഷന്‍റെ പ്രസ്താവന ഭിന്നശേഷി സമൂഹത്തെ അവഹേളിക്കുന്നതാണ്. പ്രസ്താവന ഇറക്കിയവർക്കെതിരേ തക്കതായ നടപടി സ്വീകരിക്കണം. പാർലമെന്‍റ് പാസാക്കിയ ആർപിഡി ആക്ട് പ്രകാരമുള്ള ഭിന്നശേഷി അവകാശ നിയമവും സുപ്രീം കോടതി വിധികളും വിവിധ സർക്കാർ ഉത്തരവുകളും നിലനിൽക്കെ അവയെല്ലാം തിരസ്കരിക്കുന്ന ഇക്കൂട്ടരുടെ പ്രസ്താവന തീർത്തും നിരുത്തരവാദപരമാണ്. ഇത് തിരുത്താൻ സ്കൂൾ മാനേജർമാർ തയാറാകണമെന്ന് യോഗം ആവശ്യപ്പെട്ടു. ജില്ലാ പ്രസിഡന്‍റ് കെ. വാസുദേവൻ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ഗിരീഷ് കീർത്തി, ജില്ലാ സെക്രട്ടറി കെ.പി. യാസർ അറഫാത്ത്, എ. പ്രവീണ്‍, പ്രമോദ്, എം. മുഹമ്മദ് ബഷീർ എന്നിവർ പ്രസംഗിച്ചു.

മേൽക്കൂര തകർന്ന സ്കൂളിന്‍റെ അറ്റകുറ്റപ്പണി നടത്തിയില്ല

വാണിയന്പലം: കഴിഞ്ഞ മാസം 17ന് മഴയോടൊപ്പം അനുഭവപ്പെട്ട ശക്തമായ കാറ്റിൽ വണ്ടൂർ വാണിയന്പലം ഹയർ സെക്കൻഡറി സ്കൂൾ കെട്ടിടത്തിന്‍റെ തകർന്ന മേൽക്കൂരയിൽ അറ്റകുറ്റ പ്രവൃത്തികൾ നടത്താതെ അധികൃതർ. ഓടുകൾ തകർന്നു വീണതിനാൽ മഴ പെയ്താൽ വെള്ളം ക്ലാസ് മുറികളിലേക്കാണ് ഒലിച്ചിറങ്ങുന്നത്. തൊട്ടടുത്തായി സമാന രീതിയിൽ തകർന്ന എൽപി സ്കൂൾ കെട്ടിടത്തിന്‍റെ മേൽക്കൂരയാകട്ടെ ദിവങ്ങൾക്കകം പുനർനിർമിച്ചിട്ടുമുണ്ട്. സംഭവ ദിവസം ഒരേ വളപ്പിലുള്ള എൽപി വിഭാഗം കെട്ടിടത്തിന്‍റെയും ഹയർ സെക്കൻഡറി വിഭാഗം കെട്ടിടത്തിന്‍റെയും മേൽക്കൂരകളാണ് കാറ്റിൽ തകർന്നത്. അതിനുശേഷവും മേഖലയിൽ വേനൽ മഴ എത്തിയിരുന്നു. പലയിടത്തായി ഓടുകൾ തകർന്നു വീണതിനാൽ മഴവെള്ളം ക്ലാസ് മുറികളിലേക്കാണ് വരുന്നത്. തൽക്കാലം പ്ലാസ്റ്റിക് ഷീറ്റ് വലിച്ചുകെട്ടി പരിഹരിക്കാവുന്ന പ്രശ്നമായിട്ടും അധികൃതർ തിരിഞ്ഞു നോക്കിയില്ലെന്നാണ് വാണിയന്പലം ടൗണ്‍ കോണ്‍ഗ്രസ് പ്രസിഡന്‍റ് കെ.ടി. ഹാരിസ് ആരോപിക്കുന്നത്. വിദ്യാലയത്തിലേക്കുള്ള പ്രധാന വഴി മഴക്കാലമായാൽ തോടായി മാറും ഇതിനും പരിഹാരം കാണണമെന്നാണ് നാട്ടുകാരുടെ ആവശ്യം.

റോഡ് ഉദ്ഘാടനം ചെയ്തു

താഴെക്കോട്: താഴെക്കോട് പഞ്ചായത്ത് വാർഷിക പദ്ധതിയിൽ ഉൾപ്പെടുത്തി നിർമിച്ച ഇരുപതാം വാർഡിലെ വളാംകുർശി-അന്പലറോഡിന്‍റെ ഉദ്ഘാടനം പഞ്ചായത്ത് പ്രസിഡന്‍റ് കെ.പി. സോഫിയ നിർവഹിച്ചു. വാർഡ് മെന്പർ സമീറ വാക്കയിൽ അധ്യക്ഷത വഹിച്ചു. ആസൂത്രണ സമിതി അംഗം പി.കെ. അഫ്സൽ, കെ. അനിൽ പ്രസാദ്, കെ. സഫീറലി, സി. രാമൻ എന്നിവർ പ്രസംഗിച്ചു. റോഡിന് സ്ഥലം വിട്ടുനൽകിയ പുളികുഴിയൻ അസൈനാർ, തിരിയാലപ്പെറ്റ മൊയ്തീൻ എന്നിവരെ ആദരിച്ചു.

ലഹരി വിരുദ്ധ മഹാറാലി നടത്തി

രാമപുരം: ലഹരി വിരുദ്ധ ജനകീയ കൂട്ടായ്മയുടെ നേതൃത്വത്തിൽ ബഹുജന മഹാറാലി രാമപുരത്ത് നടത്തി. മലപ്പുറം- പെരിന്തൽമണ്ണ ദേശീയപാതയിലെ നാറാണത്ത് നിന്നാരംഭിച്ച റാലി ബോധവത്കരണ പ്രചാരണ സംഗമത്തോടെ രാമപുരം ടൗണിൽ സമാപിച്ചു. വിവിധ മേഖലയിലുള്ളവരും ജനപ്രതിനിധികളും നാട്ടുകാരും റാലിയിൽ അണിനിരന്നു. ജനകീയ കൂട്ടായ്മ ഭാരവാഹികൾ നേതൃത്വം നൽകി.

നിലന്പൂരിൽ തൃണമൂൽ കോണ്‍ഗ്രസിന് ഓഫീസായി

നിലന്പൂർ: പി.വി. അൻവറിന്‍റെ എംഎൽഎ ക്യാന്പ് ഓഫീസ് ഇനി തൃണമൂൽ കോണ്‍ഗ്രസിന്‍റെ ഓഫീസായി പ്രവർത്തിക്കും. നിലന്പൂർ ഉപതെരഞ്ഞെടുപ്പ് പ്രചാരണത്തിൽ തൃണമൂൽ കോണ്‍ഗ്രസ് സജീവമാകുന്നതിന്‍റെ സൂചന നൽകിയാണ് കഴിഞ്ഞ ഒന്പത് വർഷത്തോളമായി പി.വി. അൻവറിന്‍റെ എംഎൽഎ ഓഫീസായി പ്രവർത്തിച്ച കെട്ടിടത്തിൽ ഇന്നലെ മുതൽ പുതിയ ബോർഡ് ഉയർന്നത്. തൃണമൂൽ കോണ്‍ഗ്രസ് അധ്യക്ഷ മമതാ ബാനർജിയുടെ ഫോട്ടോ ഉൾപ്പെടെ ബോർഡിലുണ്ട്. 2016-ൽ ആര്യാടൻ ഷൗക്കത്തിനെ പരാജയപ്പെടുത്തി വിജയിച്ചതോടെയാണ് ആര്യാടൻ മുഹമ്മദിന്‍റെ വീടിന് സമീപം പി.വി. അൻവർ എംഎൽഎ ക്യാന്പ് ഓഫീസ് തുറന്നത്. എന്തായാലും എട്ടര വർഷം ഇടതുനേതാക്കൾ കയറിയിറങ്ങിയ ഓഫീസ് ഇനി തൃണമൂൽ കോണ്‍ഗ്രസ് നേതാക്കളുടെയും പ്രവർത്തകരുടെയും ഓഫീസായി പ്രവർത്തിക്കും. പി.വി. അൻവർ, എംഎൽഎ സ്ഥാനം രാജിവച്ചതോടെ മാസങ്ങളായി ഈ ഓഫീസ് ആളനക്കമില്ലാതെ കിടക്കുകയായിരുന്നു.

‘ക്ഷേത്രങ്ങൾ രാഷ്ട്രീയ മുക്തമാകണം’

അങ്ങാടിപ്പുറം: കേരള ക്ഷേത്ര സംരക്ഷണ സമിതിയുടെ മലപ്പുറം ജില്ലാ സമ്മേളനം അങ്ങാടിപ്പുറം എം.പി. നാരായണ മേനോൻ മെമ്മോറിയൽ ഓഡിറ്റോറിയത്തിൽ നടത്തി. ക്ഷേത്ര സംരക്ഷണ സമിതി ജില്ലാ പ്രസിഡന്‍റ് സി.വി. സുബ്രഹ്മണ്യൻ ധ്വജാരോഹണം നടത്തി. തുടർന്ന് നടന്ന സമ്മേളനം കേരള ക്ഷേത്ര സംരക്ഷണ സമിതി സംസ്ഥാന രക്ഷാധികാരി എൻ.എം. കദംബൻ നന്പൂതിരിപ്പാട് ഉദ്ഘാടനം ചെയ്തു. മാതൃസമിതി ജില്ലാ പ്രസിഡന്‍റ് കെ. കല്യാണിക്കുട്ടിഅമ്മ അധ്യക്ഷത വഹിച്ചു. അഡ്വ. ശങ്കു ടി. ദാസ് മുഖ്യപ്രഭാഷണം നടത്തി. ടി.പി.സുധീഷ്, കെ. സൗമിനി എന്നിവർ പ്രസംഗിച്ചു. സംഘടനാ സമ്മേളനത്തിൽ ജില്ലാ അധ്യക്ഷൻ സി.വി. സുബ്രഹ്മണ്യൻ അധ്യക്ഷത വഹിച്ചു. ജില്ലാ സെക്രട്ടറി ടി.പി. സുധീഷ്, മാതൃസമിതി ജില്ലാ ജോയിന്‍റ് സെക്രട്ടറി എ.പി. ചന്ദ്രിക എന്നിവർ വാർഷിക റിപ്പോർട്ട് അവതരിപ്പിച്ചു. ജില്ലാ ഖജാൻജി ടി. വിശ്വനാഥൻ വരവ് ചെലവ് കണക്കുകൾ അവതരിപ്പിച്ചു. പി. സേതുമാധവൻ ക്ഷേത്രങ്ങളെ രാഷ്ട്രീയമുക്തമാക്കണം എന്ന പ്രമേയം അവതരിപ്പിച്ചു. കെ.ആർ. അനൂപ്, പി. സേതുമാധവൻ എന്നിവർ പ്രസംഗിച്ചു. കേരള ക്ഷേത്ര സംരക്ഷണ സമിതി സംസ്ഥാന ഖജാൻജി രാമസ്വാമി വരണാധികാരിയായി അടുത്ത വർഷത്തേക്കുള്ള ഭാരവാഹികളെ തെരഞ്ഞെടുത്തു.സി.വി. സുബ്രഹ്മണ്യൻ (പ്രസിഡന്‍റ്), ടി.പി. സുധീഷ് (ജില്ലാ സെക്രട്ടറി), ടി. വിശ്വനാഥൻ (ഖജാൻജി), തങ്കം രാമചന്ദ്രൻ (മാതൃസമിതി ജില്ലാ പ്രസിഡന്‍റ്), എ.പി. ചന്ദ്രിക (മാതൃസമിതി ജില്ലാ സെക്രട്ടറി). എൻ. ബേബി (ഖജാൻജി).

"ബസ് ഡ്രൈവറുടെ മരണം അന്വേഷിക്കണം’

മലപ്പുറം: തിരൂർ-മഞ്ചേരി റൂട്ടിലോടുന്ന പിടിബി ബസിലെ ഡ്രൈവർ ഷിജുവിന്‍റെ ദുരൂഹമരണത്തെ സംബന്ധിച്ച് സമഗ്ര അന്വേഷണം നടത്തണമെന്നും കുറ്റക്കാർക്കെതിരേ നടപടിയെടുക്കണമെന്നും ഓൾ കേരള ബസ് ഓപറേറ്റേഴ്സ് ഓർഗനൈസേഷൻ ജില്ലാ കമ്മിറ്റി യോഗം ആവശ്യപ്പെട്ടു. ഓട്ടോറിക്ഷകളുടെ പാരലൽ സർവീസുമായി ബന്ധപ്പെട്ട് കഴിഞ്ഞ ദിവസം ഒതുക്കുങ്ങലിലെ ഓട്ടോ ഡ്രൈവർ മരണപ്പെട്ട കേസിൽ ജാമ്യം ലഭിച്ച് പുറത്തിറങ്ങിയ ഷിജുവിനെ ചിലർ ഫോണിലും നേരിട്ടും ഭീഷണിപ്പെടുത്തിയതായി യോഗം ചൂണ്ടിക്കാട്ടി. യോഗത്തിൽ ജില്ലാ പ്രസിഡന്‍റ് മുസ്തഫ കളത്തുംപടിക്കൽ അധ്യക്ഷത വഹിച്ചു. ജില്ലാ ഭാരവാഹികളായ വാക്കിയത്ത് കോയ, കുഞ്ഞിക്ക കൊണ്ടോട്ടി, വി.പി.ശിവാകരൻ, എം. ദിനേശ് കുമാർ, കെ.എം.എച്ച്. അലി, കെ.കെ. മുഹമ്മദ് തുടങ്ങിയവർ പ്രസംഗിച്ചു.

പോപ്പുലർ ലക്ചർ ബയോടെക്നോളജി പ്രോജക്ട് ജെംസ് കോളജിൽ

മങ്കട: ബയോടെക്നോളജിയുടെ ഗവേഷണ മേഖലയിൽ പ്രവർത്തിക്കുന്ന സ്ഥാപനങ്ങളിൽ നിന്ന് "സാന്പത്തിക സഹായത്തിനായി ബയോടെക്നോളജിയിലെ ജനപ്രിയ പ്രഭാഷണങ്ങൾ' എന്ന പദ്ധതിക്ക് ഇന്ത്യാ ഗവണ്‍മെന്‍റ് ബയോടെക്നോളജി വകുപ്പ് രാമപുരം ജെംസ് കോളജിന് അംഗീകാരം നൽകി. സ്കൂളുകൾ, കോളജുകൾ, സർവകലാശാലകൾ എന്നിവിടങ്ങളിലെ വിദ്യാർഥികൾക്കും പൊതുജനങ്ങൾക്കും ആധുനിക ബയോളജിയുടെ അടിസ്ഥാന ആശയങ്ങൾ, സമീപകാല പുരോഗതികൾ, സാധ്യതകൾ എന്നിവയെക്കുറിച്ച് അവബോധം സൃഷ്ടിക്കുന്നതിനായി വിദഗ്ധരുടെ പ്രഭാഷണങ്ങൾ കോളജിൽ സംഘടിപ്പിക്കും. എല്ലാ പങ്കാളികൾക്കും അവരുടെ അനുഭവങ്ങൾ പങ്കിടുന്നതിനും വ്യവസായത്തിലും അക്കാഡമിയിലുമുള്ള സഹകരണം വളർത്തുന്നതിനും സാങ്കേതികവിദ്യകൾ വിലയിരുത്തുന്നതിനും അവസരം നൽകുക എന്നതാണ് പരിപാടിയുടെ ലക്ഷ്യമെന്ന് കോളജ് അക്കാഡമിക് ഡയറക്ടർ ബി.ജി. ഉണ്ണി അറിയിച്ചു.

പോലീസ് കസ്റ്റഡിയിലുള്ള വാഹനം മോഷ്ടിച്ച് കടത്തിയ രണ്ടുപേർ അറസ്റ്റിൽ

നിലന്പൂർ: എടവണ്ണയിൽ പോലീസിന്‍റെ കസ്റ്റഡിയിലുള്ള വാഹനം മോഷ്ടിച്ച് കടത്തിയ കേസിൽ രണ്ടുപേർ അറസ്റ്റിൽ. കോഴിക്കോട് ബാലുശേരി ഉണ്ണിക്കുളം അനസ്, എടവണ്ണ സ്വദേശി ലുഖ്മാനുൽ ഹക്കീം എന്നിവരെയാണ് പോലീസ് അറസ്റ്റ് ചെയ്തത്. കഴിഞ്ഞ ദിവസം എടവണ്ണ ജമാലങ്ങാടി പരിസരത്ത് നിന്നാണ് എടവണ്ണ പോലീസിന്‍റെ കസ്റ്റഡിയിലുള്ള വാഹനം മോഷ്ടിച്ച് കോഴി മാലിന്യം തള്ളാൻ ഉപയോഗിച്ചത്. കഴിഞ്ഞമാസം 31ന് എടവണ്ണ ജമാലങ്ങാടി പരിസരത്ത് കോഴി മാലിന്യവുമായി എത്തിയ വാഹനം നാട്ടുകാർ തടഞ്ഞ് പ്രതിഷേധിച്ചിരുന്നു. ഈ സംഭവത്തിൽ പോലീസ് കേസ് രജിസ്റ്റർ ചെയ്ത ശേഷം വാഹനം കസ്റ്റഡിയിലെടുക്കുകയായിരുന്നു. എന്നാൽ വാഹനത്തിന്‍റെ കേടുപാടുകൾ കാരണം ഇത് പോലീസ് സ്റ്റേഷൻ പരിസരത്തേക്ക് മാറ്റാൻ സാധിച്ചിരുന്നില്ല. ഇതോടെ കോഴി മാലിന്യം മറ്റൊരു വാഹനത്തിലേക്ക് മാറ്റി ഈ വാഹനം എടവണ്ണ ടൗണിനോട് ചേർന്ന് സ്വകാര്യവ്യക്തിയുടെ സ്ഥലത്ത് സൂക്ഷിച്ചിരിക്കുകയായിരുന്നു. ഇവിടെ നിന്നാണ് കഴിഞ്ഞദിവസം പ്രതികൾ കോഴി മാലിന്യം തള്ളാനായി ഈ വാഹനം മോഷ്ടിച്ചു കടത്തിയത്. എടവണ്ണ പഞ്ചായത്ത് പരിധിയിലെ തൂവക്കാട് മേഖലയിലേക്കാണ് വാഹനം മാലിന്യവുമായി എത്തിയത്. ഇവിടെ നാട്ടുകാർ തടഞ്ഞതോടെയാണ് എടവണ്ണയിൽ നിന്ന് മോഷ്ടിച്ച വാഹനത്തിലാണ് മാലിന്യം കടത്തിയതെന്ന് വ്യക്തമാകുന്നത്. മോഷണ കേസ് ഉൾപ്പെടെയുള്ള രണ്ടു കേസുകളാണ് പ്രതികൾക്കെതിരേ ചുമത്തിയിരുന്നത്. മഞ്ചേരി കോടതിയിൽ ഹാജരാക്കിയ പ്രതികൾക്കെതിരേ മോഷണം, പൊതുജനങ്ങൾ തിങ്ങിപ്പാർക്കുന്ന സ്ഥലത്ത് അവരുടെ ആരോഗ്യത്തിനെ ഹാനികരമായി ബാധിക്കുന്നതിനും ജലസ്രോതസുകൾ മലിനമാകാനിടയാക്കുന്ന വിധത്തിലും കോഴി മാലിന്യം തള്ളിയതിനുമാണ് കേസ്. കൂടുതൽ പ്രതികൾക്കായി എടവണ്ണ എസ്ഐ റിഷാദലി നെച്ചിക്കാടന്‍റെ നേതൃത്വത്തിൽ പോലീസ് സംഘം അന്വേഷണം തുടർന്നുവരികയാണ്.

ചിക്കൻസ്റ്റാൾ തല്ലിതകർത്തതിൽ പ്രതിഷേധിച്ചു

മലപ്പുറം: വേങ്ങര കൂരിയാട് മാർക്കറ്റിൽ പി.പി. ഷാനവാസിന്‍റെ ഉടമസ്ഥതയിലുള്ള പോപ്പുലർ ചിക്കൻസ്റ്റാൾ തല്ലി തകർക്കുകയും കടയുടമയെ മർദിക്കുകയും ചെയ്ത സംഭവത്തിൽ കെട്ടിട ഉടമക്കെതിരേ നടപടി സ്വീകരിക്കണമെന്നാവശ്യപ്പെട്ട് കേരള ചിക്കൻ വ്യാപാരി സമിതി വേങ്ങരയിൽ പ്രതിഷേധ യോഗം നടത്തി. ഇത്തരം അക്രമങ്ങൾ അംഗീകരിക്കില്ലെന്നും ശക്തമായ പ്രതിരോധം തീർക്കുമെന്നും യോഗം മുന്നറിയിപ്പ് നൽകി. ജില്ലാ പ്രസിഡന്‍റ് ആർ.വി. അബ്ദുൾ നാസർ അധ്യക്ഷത വഹിച്ചു. ജില്ലാ സെക്രട്ടറി മുജീബ് കാളിപ്പാടൻ, കേരള വ്യാപാരി വ്യവസായി സമിതി ജില്ലാ കമ്മറ്റി അംഗം പി. നാരായണൻ, ഏരിയാ പ്രസിഡന്‍റ് അബ്ദുൾ ലത്തീഫ്, മുഹമ്മദ് തെയ്യന്പാട്ടിൽ, അമീർ കാടാന്പുഴ, നൗഷാദ് കുന്നപ്പള്ളി എന്നിവർ പ്രസംഗിച്ചു. കട തകർത്ത സംഭവത്തിൽ കെട്ടിട ഉടമക്കെതിരേ നടപടി സ്വീകരിക്കണമെന്ന് കേരള വ്യാപാരി വ്യവസായി സമിതി വേങ്ങര ഏരിയാ കമ്മിറ്റിയും ആവശ്യപ്പെട്ടു.

മലിനജലം കെട്ടിക്കിടക്കുന്നു; ഞെട്ടിക്കുളം രോഗഭീതിയിൽ

പോത്തുകൽ: ഞെട്ടിക്കുളം ടൗണിലെ ഓടകൾ മലിനജലം കെട്ടിക്കിടന്ന് ജനങ്ങൾക്ക് ദുരിതം വിതയ്ക്കുന്നു. കഴിഞ്ഞ ദിവസങ്ങളിൽ പെയ്ത മഴയിലാണ് ഓടകളിൽ വെള്ളം കെട്ടിക്കിടക്കാൻ തുടങ്ങിയത്. ഇതോടെ പ്രദേശമാകെ ദുർഗന്ധം വമിക്കാൻ തുടങ്ങി. വ്യാപാര സ്ഥാപനങ്ങളിൽ നിന്നുള്ള മലിനജലമടക്കം അഴുക്ക് ചാലിൽ കെട്ടിക്കിടക്കുകയാണ്. മലിനജലം ഒഴിവാക്കണമെന്ന് ആവശ്യപ്പെട്ട് നാട്ടുകാർ പോത്തുകൽ കുടുംബരോഗ്യകേന്ദ്രത്തിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ ആരോഗ്യവകുപ്പ് അധികൃതർ ഒരു മാസം മുന്പ് വിവരം ഗ്രാമപഞ്ചായത്ത് അധകൃതരെ രേഖാമൂലം അറിയിച്ചെങ്കിലും നടപടിയുണ്ടായിട്ടില്ല. മലിനജലം കെട്ടിക്കിടന്ന് സാംക്രമിക രോഗങ്ങൾ പടരാനുള്ള സാധ്യത ഏറെയാണെന്ന് നാട്ടുകാർ പറയുന്നു. ഒരു വർഷം മുന്പ് മഞ്ഞപ്പിത്ത ബാധമൂലം ഏതാനും പേർ പോത്തുകല്ലിൽ മരണപ്പെട്ടിരുന്നു. ജലജന്യരോഗങ്ങൾക്ക് സാധ്യത കൂടുതലുള്ളതിനാൽ പ്രശ്നത്തിന് അടിയന്തര പരിഹാരം കാണണമെന്നാണ് നാട്ടുകാരുടെയും വ്യാപാരികളുടെയും ആവശ്യം. അഴുക്ക്ചാലിൽ അടിഞ്ഞ് കൂടിയ മണ്ണും മാലിന്യങ്ങളും നീക്കം ചെയ്താൽ മാത്രമേ വെള്ളം ഒഴുകിപോവുകയുള്ളൂ. മഴക്കാലം ആരംഭിക്കാനിരിക്കെ പഞ്ചായത്ത് അധികൃതരുടെ ഭാഗത്ത് നിന്ന് നടപടിയുണ്ടാകാത്തതിൽ വ്യാപക പ്രതിഷേധമുയരുന്നുണ്ട്.

ജാമ്യത്തിലിറങ്ങിയ ബസ് ഡ്രൈവർ ലോഡ്ജ് മുറിയിൽ തൂങ്ങി മരിച്ച നിലയിൽ

മഞ്ചേരി : മലപ്പുറം കോഡൂരിൽ ഓട്ടോ ഡ്രൈവർ അബ്ദുൾ ലത്തീഫ് മരണപ്പെട്ട കേസിൽ ജാമ്യത്തിലിറങ്ങിയ ബസ് ഡ്രൈവറെ ലോഡ്ജ് മുറിയിൽ തൂങ്ങി മരിച്ച നിലയിൽ കണ്ടെത്തി. ആനക്കയം പുള്ളീലങ്ങാടി കളത്തിങ്ങൽപ്പടി കോന്തേരി രവിയുടെ മകൻ ഷിജു (37) ആണ് മരിച്ചത്. ഇക്കഴിഞ്ഞ മാർച്ച് ഏഴിന് ബസ് ജീവനക്കാരും ഓട്ടോ ഡ്രൈവറും തമ്മിലുണ്ടായ തർക്കത്തിനിടെ ഓട്ടോ ഡ്രൈവർ മരിച്ച സംഭവത്തിൽ പ്രതിയായിരുന്നു പിടിബി ബസ് ഡ്രൈവറായ ഷിജു. സംഭവവുമായി ബന്ധപ്പെട്ട് ഷിജുവിനെയും കണ്ടക്ടർ സുജീഷ് എന്ന മണി, ക്ലീനർ നിഷാദ് എന്നിവരെ പോലീസ് അറസ്റ്റ് ചെയ്തിരുന്നു. 22 ദിവസം റിമാൻഡിൽ കഴിഞ്ഞ ബസ് ജീവനക്കാർ ജാമ്യം നേടി പുറത്തിറങ്ങിയിരുന്നു. ആഴ്ചയിൽ മൂന്നു ദിവസം മലപ്പുറം പോലീസ് സ്റ്റേഷനിലെത്തി ഒപ്പിടണമെന്നായിരുന്നു ജാമ്യവ്യവസ്ഥ. ഇതനുസരിച്ച് ഇന്നലെ ഷൈജു പോലീസ് സ്റ്റേഷനിൽ ഹാജരാകേണ്ടതായിരുന്നു. വെള്ളിയാഴ്ച വൈകീട്ട് നാലിന് മഞ്ചേരി കോർട്ട് റോഡിലെ ലോഡ്ജിൽ മുറിയെടുത്ത ഷിജു അഞ്ചു മണിക്ക് പുറത്തു പോയി തിരികെ വന്നതായി ലോഡ്ജ് ജീവനക്കാർ കണ്ടിരുന്നു. ഇന്നലെ രാവിലെ 11 മണിക്ക് വാതിലിൽ തട്ടി വിളിച്ചെങ്കിലും പ്രതികരണമുണ്ടായില്ല. ഉച്ചക്ക് 12 മണിക്കും പ്രതികരണമില്ലാത്തതിനെ തുടർന്ന് മുറിയിലേക്കുള്ള വൈദ്യുതി വിച്ഛേദിക്കുകയായിരുന്നു. തുടർന്നും അകത്തു നിന്ന് ശബ്ദം കേൾക്കാത്തതിനെ തുടർന്ന് ലോഡ്ജ് ഉടമ പോലീസിൽ അറിയിച്ചു. പോലീസ് എത്തി വാതിൽ ചവിട്ടി തുറന്നപ്പോഴാണ് ഫാനിൽ തൂങ്ങി മരിച്ച നിലയിൽ കണ്ടത്. കോഡൂരിൽ മരണപ്പെട്ട ഓട്ടോ ഡ്രൈവറുടെ സുഹൃത്തുക്കളും ബന്ധുക്കളും ഷിജുവിനെ നിരന്തരം ഭീഷണിപ്പെടുത്തിയിരുന്നതായി സഹപ്രവർത്തകർ പറഞ്ഞു. മഞ്ചേരി പോലീസ് സബ് ഇൻസ്പെക്ടർ എ. ബാലമുരുകൻ ഇൻക്വസ്റ്റ് ചെയ്ത മൃതദേഹം മഞ്ചേരി ഗവണ്‍മെന്‍റ് മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി. മിനിയാണ് മരിച്ച ഷിജുവിന്‍റെ ഭാര്യ. മാതാവ് : സുമതി. മക്കൾ : അഭിമന്യു, ആദിദേവ്, കാശിനാഥ്.

വിവാഹ വാഗ്ദാനം നൽകി പണംതട്ടിയ യുവാവ് അറസ്റ്റിൽ

കരുവാരകുണ്ട്. ഫേസ്ബുക്കിലൂടെ പരിചയപ്പെട്ട് പ്രണയം നടിച്ച് സ്ത്രീയുടെ പണം തട്ടിയ യുവാവിനെ കരുവാരകുണ്ട് പോലീസ് അറസ്റ്റ് ചെയ്തു. മുണ്ടക്കയം കൊച്ചുപറമ്പിൽ അരുൺ കുമാർ (32) ആണ് അറസ്റ്റിലായത്. നാല് വർഷം മുന്പാണ് സ്ത്രീയുമായി യുവാവ് ഫേസ്ബുക്കിലൂടെ പരിചയപ്പെട്ടതെന്ന് പോലീസ് അറിയിച്ചു. വിവാഹ വാഗ്ദാനം നൽകി സ്ത്രീയിൽ നിന്ന് 55000 രൂപയാണ് പ്രതി കൈക്കലാക്കിയത്. തട്ടിപ്പ് മനസിലായ സ്ത്രീ പോലീസിൽ പരാതി നൽകുകയായിരുന്നു. മഞ്ചേരി കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പാരീസ് നഗർ സ്കൂൾറോഡ് ഗതാഗത യോഗ്യമാക്കി

കരുവാരകുണ്ട്: കരുവാരകുണ്ട് ഗ്രാമപഞ്ചായത്ത് പുത്തനഴി വാർഡിലെ പാരിസ് നഗർ സ്കൂൾറോഡ് വാർഡ് മെമ്പർ വി.സി. ഉണ്ണികൃഷ്ണൻ ഉദ്ഘാടനം ചെയ്തു. 2024-25 വാർഷിക പദ്ധതിയിൽ ഉൾപ്പെടുത്തി രണ്ടര ലക്ഷം രൂപ ചെലവഴിച്ചാണ് 55 മീറ്റർ റോഡ് കോൺക്രീറ്റ് ചെയ്ത് പൂർത്തിയാക്കിയത്. ഉദ്ഘാടന ചടങ്ങിൽ എം. മുഹമ്മദ്‌ മാസ്റ്റർ, ദീപ ടീച്ചർ, ഷൈജി എൻ. ജോൺ, ടി. ടി. ഖാദർ , കെ.ടി. ഇസ്മായിൽ, എൻ.ടി. റഷീദ്, എൻ.ടി. മുസ്തഫ, എം. ഹനീഫ, വി.പി. സുരേന്ദ്രൻ തുടങ്ങിയവർ പങ്കെടുത്തു.

ദേശീയ അംഗീകാര നിറവില്‍ കിംസ് അല്‍ശിഫ ഗ്യാസ്ട്രോ എന്‍ററോളജി വിഭാഗം

പെരിന്തൽമണ്ണ: ഉദര രോഗ വിഭാഗത്തില്‍ മികച്ച പരിചരണം, ഗുണമേന്മയുള്ള ചികിത്സ, അത്യാധുനിക സൗകര്യങ്ങള്‍, രോഗി സൗഹൃദ ആശുപത്രി എന്നിവ കണക്കിലെടുത്ത് ദക്ഷിണേന്ത്യയിലെ രണ്ടാമത്തെ മിക ച്ച ഗ്യാസ്ട്രോ എന്‍ററോളോജി വിഭാഗമായി കിംസ് അല്‍ശിഫയെ കഹോ(കൺസോർഷ്യം ഒഫ് അക്രെഡിറ്റഡ് ഹെൽത്ത്കെയർ ഓർഗനൈസേഷൻസ്) തെരഞ്ഞെടുത്തു. ഡല്‍ഹിയില്‍വച്ച് നടന്ന ചടങ്ങില്‍ കിംസ് അൽശിഫ വൈസ് ചെയര്‍മാനും എക്സിക്യൂട്ടീവ് ഡയറക്ടറുമായ ഡോ. പി ഉണ്ണീന്‍, ഉദര-കരള്‍ രോഗ വിഭാഗം മേധാവി ഡോ. സജു സേവിയര്‍, സീനിയര്‍ ക്വാളിറ്റി മാനേജര്‍ സ്വാതി ലക്ഷ്മി എന്നിവര്‍ ചേര്‍ന്ന് അവാര്‍ഡ് ഏറ്റുവാങ്ങി.

ലഹരിക്കെതിരേ ഗോൾ സമ്മാന പരിപാടി സംഘടിപ്പിച്ചു

വണ്ടൂർ: വണ്ടൂരിൽ ലഹരിക്കെതിരേ "ഒരു ഗോൾ സമ്മാന പരിപാടി' സംഘടിപ്പിച്ച് യൂത്ത് കോൺഗ്രസ്. വണ്ടൂർ ടാക്സി സ്റ്റാൻഡിലാണ് വാശിയേറിയ ഗോളടി മത്സരം നടന്നത്. എ.പി. അനിൽകുമാർ എംഎൽഎ ഉദ്ഘാടനം ചെയ്തു. ആദ്യം ഗോളടിക്കുന്ന 13 പേർക്കാണ് സമ്മാനങ്ങൾ. ഒരാൾക്ക് ഒരു അവസരം മാത്രമാണുള്ളത്. യൂത്ത് കോൺഗ്രസ് മണ്ഡലം പ്രസിഡന്‍റ് ഇ. കെ. അഫ്‌ലഹ് അധ്യക്ഷത വഹിച്ചു. കെപിസിസി അംഗം കെ.ടി അജ്മൽ, മണ്ഡലം കോൺഗ്രസ് പ്രസിഡന്‍റ് പി.ടി. ജബീബ് സുക്കീർ, കെഎൻടിയുസി മണ്ഡലം പ്രസിഡന്‍റ് സി.പി. സിറാജ്, യൂത്ത് കോൺഗ്രസ് അസംബ്ലി പ്രസിഡന്‍റ് അറക്കൽ സക്കീർ ഹുസൈൻ, കെഎസ് അസംബ്ലി പ്രസിഡന്‍റ് എം.കെ. അൻസിഫ്, കെഎസ്‌യു മണ്ഡലം പ്രസിഡന്‍റ് പി.ടി. അസീം , ജൈസൽ എടപ്പറ്റ, ടി.പി. ഹാരിസ്, അനൂജ് കാപ്പിൽ തുടങ്ങിയവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]