ADVERTISEMENT

ADVERTISEMENT

പാറശാലയിൽ ഓശാന ഞായര്‍ ആചരിച്ചു

പാറശാല: വിവിധ ക്രൈസ്ത ദേവാലയങ്ങളുടെ ആഭിമുഖ്യത്തില്‍ പാറശാലയില്‍ ഓശാന ഞായര്‍ ആചരിച്ചു. ചെറുവാരക്കോണം അബ്ബ്‌സ് മെമ്മോറിയല്‍ സിഎസ്ഐ ദേവാലയം, പാറശാല എല്‍എംഎസ് ടൗണ്‍ ചര്‍ച്ച്, സെന്‍റ് അന്തോണീസ് ആര്‍സി ചര്‍ച്ച്, അരുവാങ്കോട് സിഎസ്ഐ ചര്‍ച്ച്, നെടുവാന്‍വിള സി എസ്ഐ ദേവാലയം,

കാരാളി ലൂഥറന്‍ ചര്‍ച്ച്, കരുമാനൂര്‍ സിഎസ്ഐ ദേവാലയം, പളുകല്‍ സിഎസ് ഐ ദേവാലയം, പരശുവയ്ക്കല്‍ സിഎസ്ഐ ദേവാലയം എന്നിവിടങ്ങളില്‍ പ്രത്യേക പ്രാര്‍ഥനയും ശ്രുസ്രൂഷയും കുരുത്തോല പ്രദക്ഷിണവും നടന

ADVERTISEMENT

ഗതാഗത നിയന്ത്രണം ഏര്‍പ്പെടുത്തി

തിരുവനന്തപുരം: പേയാട് ഉജ്ജയിനി മഹാകാളി അമ്മന്‍ കോവിലിലെ അമ്മന്‍കൊട മഹോത്സവവുമായി ബന്ധപ്പെട്ട് ചൊവ്വാഴ്ച വൈകുന്നേരം നാലു മുതല്‍ രാത്രി 12 വരെയും ബുധനാഴ്ച ഉച്ചയ്ക്ക് രണ്ടുമുതല്‍ രാത്രി എട്ടുവരെയും കുണ്ടമണ്‍ഭാഗം മുതല്‍ പേയാട് ജംഗ്ഷന്‍ വരെ ഗതാഗത നിയന്ത്രണം ഏര്‍പ്പെടുത്തി. കുംഭകുടം എഴുന്നെള്ളിപ്പിനോടനുബന്ധിച്ച് ഉണ്ടാകുന്ന ഗതാഗത തടസം ഒഴിവാക്കുന്നതിനായി ചൊവ്വാഴ്ച വൈകുന്നേരം നാലു മുതല്‍ തിരുവനന്തപുരം ഭാഗത്തുനിന്ന് കാട്ടാക്കടയ്ക്കു വരുന്ന വാഹനങ്ങള്‍ തിരുമല - മങ്കാട്ടുകടവ് - തച്ചോട്ടുകാവ് വഴി പോകണം. കാട്ടാക്കട ഭാഗത്തുനിന്ന് തിരുവനന്തപുരത്തേക്കുള്ളവ തച്ചോട്ടുകാവ് - തിരുമല വഴി പോകണം. എഴുന്നെള്ളിപ്പുമായി ബന്ധപ്പെട്ട് കുണ്ടമണ്‍ഭാഗം മുതല്‍ പേയാട് ജംഗ്ഷന്‍വരെ റോഡിന്‍റെ വശങ്ങളില്‍ പാര്‍ക്കിംഗ് അനുവദിക്കില്ലെന്നും വിളപ്പില്‍ശാല പോലീസ് അറിയിച്ചു.

റൗണ്ട് ടേബിള്‍ ചര്‍ച്ച സംഘടിപ്പിച്ചു

തിരുവനന്തപുരം: ഇന്ത്യയിലെ മുന്‍നിര ബി 2 ബി പ്രദര്‍ശന സംഘാടകരായ ഇന്‍ഫോര്‍മ മാര്‍ക്കറ്റ്‌സ് ഇന്ത്യ 'ഇന്ത്യയിലെ പുനരുപയോഗ ഊര്‍ജ്ജത്തിന്‍റെ ഭാവി: ഉയര്‍ന്നുവരുന്ന പ്രവണതകളും അവസരങ്ങളും' എന്ന വിഷയത്തില്‍ റൗണ്ട് ടേബിള്‍ ചര്‍ച്ച സംഘടിപ്പിച്ചു. അനേര്‍ട്ട് സിഇഒ എന്‍‌.എന്‍. വേലൂരി, എനര്‍ജി മാനേജ്‌മെന്‍റ് സെന്‍റര്‍ ഡയറക്ടര്‍ ആര്‍. ഹരികുമാര്‍, രജനീഷ് ഖട്ടര്‍ തുടങ്ങിയവർ പ്രസംഗിച്ചു.

ഗവ. മോഡല്‍ എച്ച്എസ്എല്‍ പിഎസിന്‍റെ ചുറ്റുമതില്‍ തകര്‍ന്നു

പേരൂര്‍ക്കട: തൈക്കാട് ഗവ. മോഡല്‍ എച്ച്എസ്എല്‍പിഎസ് ആൻഡ് നഴ്‌സറിയുടെ ചുറ്റുമതില്‍ തകര്‍ന്നു വീണു. തൈക്കാട് ഭാഗത്തേക്ക് പോകുന്ന റോഡിന്‍റെ വശത്തുള്ള മതിലിന്‍റെ ഒരുഭാഗമാണ് കഴിഞ്ഞ ദിവസം തകര്‍ന്നുവീണത്. മൂന്നാള്‍പൊക്കം വരുന്ന കരിങ്കല്‍ക്കെട്ടിന്‍റെ മൂന്നുമീറ്ററോളം ഭാഗത്തെ കെട്ടാണ് ഇടിഞ്ഞു റോഡിലേക്ക് വീണത്. മതിലിന്‍റെ ബാക്കിയുള്ള ഭാഗവും ഏതുനിമിഷവും ഇടിഞ്ഞുവീഴാവുന്ന നിലയിലാണ്.

സമൃദ്ധിയുടെ വിഷു, കണിയൊരുക്കി ക്ഷേത്രങ്ങള്‍

പാപ്പനംകോട് രാജന്‍ നേമം: സമൃദ്ധിയുടെ പൊന്നണിഞ്ഞ് വീണ്ടുമൊരു വിഷുക്കാലം കൂടിയെത്തുമ്പോള്‍ മലയാളിയുടെ ഗൃഹാതുരത നിറഞ്ഞ ഓര്‍മ്മകള്‍ക്ക് വീണ്ടും പൊന്‍തിളക്കം. മണ്ണും മനുഷ്യനും തമ്മിലുള്ള വൈകാരിക ബന്ധം കൂടിയാണ് വിഷു. ഐശ്വര്യത്തിന്‍റെയും ഫല സമൃദ്ധിയുടെയും ഒരു വര്‍ഷം കര്‍ഷകന്‍റെ മനസുകളിലും പുത്തന്‍ പ്രതീക്ഷകളുടെ പുതുവര്‍ഷമായിരിക്കും. മണ്ണിന്‍റെ ഭൂമിയുടെ മാതൃത്വം വീണ്ടെടുക്കുന്നതാണ് ഒരോ വിഷുവും. സമ്പല്‍ സമൃദ്ധിയുടെ നാളുകളെ പ്രാര്‍ത്ഥനപൂര്‍വം കണി കണ്ടുണരുന്ന കേരളീയ സമൂഹത്തിന്‍റെ നേര്‍ക്കാഴ്ചകൂടിയാണ് ഒരോ വിഷുക്കണിയും . വിഷുവിന്‍റെ വരവ് അറിയിച്ച് നാടെങ്ങും കൊന്നപ്പൂക്കള്‍ പൂത്തുതളിര്‍ത്തു. സമൃദ്ധിയുടെ പ്രതീകമായാണ് മലയാളികള്‍ കണിക്കൊന്നയെ ദര്‍ശിക്കുന്നത്. കണിയൊരുക്കാന്‍ നാട്ടുമാവില്‍ നിന്നും മാങ്ങയും കശുമാവും ; ചക്കയും പറിച്ചെടുത്ത കാലം മലയാളിക്ക് അന്യമായിരിക്കുന്നു. ഇവയെല്ലാം വിപണിയില്‍ നിന്നും വാങ്ങേണ്ടക്കാലം. മലയാളിക്ക് വിഷുകണിയൊരുക്കാനും പ്ലാസ്റ്റിക്ക് കണികൊന്നകള്‍ വിപണയില്‍‌. പ്ലാസ്റ്റിക്ക് പച്ച തണ്ടില്‍ ഒരു തരം മഞ്ഞ തുണിയിലാണ് കൃത്രിമ കണിക്കൊന്നകള്‍ തയാറാക്കിയിരിക്കുന്നത്. കണിയും കൈനീട്ടവും, സദ്യയുമാണ് വിഷുവിന്‍റെ പ്രത്യേകത. സൂര്യോദയത്തിന് മുമ്പ് സംക്രമ മുഹൂര്‍ത്തം വന്നാല്‍ ആ ദിവസവും ഉദയ ശേഷം വന്നാല്‍ പിറ്റേ ദിവസവുമാണ് വിഷു ആഘോഷിക്കുക. വിഷു ദിവസം അലങ്കരിച്ച ശ്രീകൃഷ്ണ വിഗ്രഹത്തിനുമുന്നില്‍ കൊന്നപ്പൂക്കളും കാഴ്ചയ്ക്ക് മംഗളകരമായ ദ്രവ്യങ്ങളും സ്വര്‍ണ്ണാഭരണവും നിലവിളക്കും ഫലങ്ങളും വച്ച് കണികാണുന്നു. വിഷുവിന് പുലര്‍ച്ചെ വീട്ടിലെ മുതിര്‍ന്നവര്‍ മറ്റംഗങ്ങളെ കണ്ണ് പൊത്തി ഒരു വര്‍ഷത്തിന്‍റെ നന്മയിലേക്ക് കണിക്കാണിക്കും. പിന്നീട് എല്ലാവര്‍ക്കും കൈനീട്ടം നല്‍കും. വിഷുക്കണി കണ്ടാല്‍ ഒരു വര്‍ഷക്കാലം സര്‍വ ഐശ്വര്യങ്ങളും നിറഞ്ഞതായിരിക്കും എന്നാണ് സങ്കല്‍പ്പം. വിവിധ ശ്രീകൃഷ്ണസ്വാമി ക്ഷേത്രങ്ങളില്‍ വിഷുക്കണി ദര്‍ശനത്തിന് സൗകര്യമൊരുക്കിയിട്ടുണ്ട്. തൃക്കണ്ണാപുരം ശ്രീകൃഷ്ണ സ്വാമി ക്ഷേത്രം, ജഗതി ശ്രീകൃഷ്ണസ്വാമി ക്ഷേത്രം തുടങ്ങിയ ക്ഷേത്രങ്ങളില്‍ വിഷു ആഘോഷങ്ങള്‍ നടക്കും.

ബൈക്ക് കത്തിനശിച്ചു

പേരൂര്‍ക്കട: തീ പിടിത്തത്തെ തുടര്‍ന്ന് ബൈക്ക് പൂര്‍ണ്ണമായും കത്തിനശിച്ചു. വെള്ളായണി കിണറ്റുവിള പുത്തന്‍വീട്ടില്‍ സക്കീറിന്‍റെ റോയല്‍ എന്‍ഫീല്‍ഡ് ബൈക്കാണ് കത്തിയത്. ഇന്നലെ വൈകുന്നേരം മൂന്നോടെ പൂജപ്പുര പരീക്ഷാ ഭവനു സമീപമാണ് സംഭവം. ബൈക്കിന്‍റെ ഇലക്ട്രിക്കല്‍ പാര്‍ട്ടിലുണ്ടായ പ്രശ്‌നമാണ് കത്താന്‍ കാരണമെന്നു ഫയര്‍ഫോഴ്‌സ് അറിയിച്ചു. തിരുവനന്തപുരം ഫയര്‍‌സ്റ്റേഷനില്‍ നിന്ന് സ്റ്റേഷന്‍ ഓഫീസര്‍ കെ.എന്‍ ഷാജിയുടെ നേതൃത്വത്തില്‍ ഒരു യൂണിറ്റ് എത്തിയാണ് തീ കെടുത്തിയത്.

വിഷുവിന് രാജീവ് ആദികേശവിന്‍റെ സംഗീതാര്‍ച്ചന

നെയ്യാറ്റിന്‍കര : നെയ്യാറ്റിന്‍കര ശ്രീകൃഷ്ണസ്വാമി ക്ഷേത്രത്തില്‍ ഇക്കുറിയും വിഷു ദിനത്തില്‍ പതിവു തെറ്റിക്കാതെ പ്രശസ്ത സംഗീതജ്ഞന്‍ രാജീവ് ആദികേശവിന്‍റെ അഖണ്ഡനാമ സംഗീതാര്‍ച്ചന. ഇന്ന് രാവിലെ അഞ്ചിന് ആരംഭിക്കുന്ന സംഗീതാര്‍ച്ചന വൈകുന്നേരം അഞ്ചിനാണ് സമാപിക്കുക. കഴിഞ്ഞ എട്ടു വര്‍ഷമായി വിഷു ദിനത്തില്‍ നെയ്യാറ്റിന്‍കര നവനീത കണ്ണന്‍റെ മുന്നില്‍ രാജീവ് ആദികേശവ് സംഗീതാര്‍ച്ചന നടത്തിവരുന്നു. ആദ്യ തവണ രാവിലെ ആറ് മുതല്‍ വൈകുന്നേരം ആറു വരെയായിരുന്നു സംഗീതാര്‍ച്ചന. തൊട്ടടുത്ത വര്‍ഷം രാവിലെ അഞ്ചു മുതല്‍ വൈകുന്നേരം ആറു വരെയായി. പിന്നീട് തുടര്‍ച്ചയായി 18 മണിക്കൂര്‍ സംഗീതാര്‍ച്ചനയും നടത്തിയ ചരിത്രം ഈ കലാകാരന് സ്വന്തം. ശാസ്ത്രീയ- അര്‍ധ ശാസ്ത്രീയ ഗാനങ്ങളും കീര്‍ത്തനങ്ങളുമെല്ലാം അടങ്ങിയതാണ് സംഗീതാര്‍ച്ചന. മൃദംഗവിദ്വാനായിരുന്ന എന്‍.പി രാമന്‍നായരുടെയും കെ. സരസ്വതിയമ്മയുടെയും മകനായ രാജീവ് ആദികേശവിന്‍റെ പ്രഥമ ഗുരു തിരുവട്ടാര്‍ എന്‍.പി രവീന്ദ്രന്‍നായരാണ്. പിതൃസഹോദരനായ അദ്ദേഹത്തിന്‍റെ ശിക്ഷണത്തോടൊപ്പം തിരുവനന്തപുരം സ്വാതി തിരുനാള്‍ സംഗീത കോളജില്‍ നിന്നും സംഗീതത്തില്‍ വിദ്യാഭ്യാസം പൂര്‍ത്തിയാക്കി. ചൂണ്ടിക്കല്‍ ശ്രീഭദ്രകാളി ക്ഷേത്രത്തിലായിരുന്നു രാജീവ് ആദികേശവിന്‍റെ അരങ്ങേറ്റം.

കേസരി-എസ്.എൽ.ശ്യാം ക്രിക്കറ്റ് ടൂർണമെന്‍റ്: ന്യൂസ് 18 കേരളം ചാന്പ്യന്മാർ

തിരുവനന്തപുരം: കേരള പത്രപ്രവർത്തക യൂണിയൻ ജില്ലാ കമ്മിറ്റി സംഘടിപ്പിച്ച കേസരി - എസ്. എൽ.ശ്യാം ക്രിക്കറ്റ് ടൂർണമെന്‍റ് രണ്ടാം സീസണിൽ ന്യൂസ്18 കേരളം ചാന്പ്യന്മാരായി. ഫൈനലിൽ മാതൃഭൂമി ന്യൂസിനെ ആറ് വിക്കറ്റിനു പരാജയപ്പെടുത്തിയാണ് ന്യൂസ് 18 കേരളയുടെ വിജയം. സമാപന സമ്മേളനം ഉദ്ഘാടനം ചെയ്ത പൊതു വിദ്യാഭ്യാസ മന്ത്രി വി. ശിവൻകുട്ടി പുരസ്കാരങ്ങളും സമ്മാനിച്ചു. എക്സൈസ് കമ്മീഷണർ മഹിപാൽ യാദവ് ഐഎഎസ് മുഖ്യാതിഥിയായിരുന്നു. കേരളാ ക്രിക്കറ്റ് അസോസിയേഷൻ സെക്രട്ടറി വിനോദ് എസ്.കുമാർ, കേരളാ രഞ്ജി താരം ഷോണ്‍ റോജർ, കെസിഎ ഉപദേശക സമിതി ചെയർമാൻ രഞ്ജിത് തോമസ്, കെയുഡബ്ല്യുജെ ജില്ലാ പ്രസിഡന്‍റ് ഷില്ലർ സ്റ്റീഫൻ, സെക്രട്ടറി അനുപമ ജി. നായർ, ടൂർണമെന്‍റ് കമ്മറ്റി ചെയർമാൻ സി.രാജ എന്നിവർ പ്രസംഗിച്ചു. യൂണിയൻ സംസ്ഥാന പ്രസിഡന്‍റ് കെ.പി.റെജി, മുൻ സംസ്ഥാന ജനറൽ സെക്രട്ടറി ആർ. കിരണ്‍ബാബു, എബി ടോണിയോ എന്നിവരും പുരസ്കാരങ്ങൾ സമ്മാനിച്ചു.

ഹൈവേയില്‍ കാര്‍ തലകീഴായി മറിഞ്ഞു

കഴക്കൂട്ടം: എലിവേറ്റഡ് ഹൈവേയില്‍ കാര്‍ തലകീഴായി മറിഞ്ഞു. അപകടത്തില്‍ ആര്‍ക്കും പരുക്കില്ല. കാറിലുണ്ടായിരുന്ന രണ്ട് പേര്‍ അത്ഭുതകരമായാണ് രക്ഷപ്പെട്ടത്. സഹോദരങ്ങളാണ് കാറിൽ ഉണ്ടായിരുന്നത്. ഉച്ചയ്ക്ക് ഒരു മണിയോടെ കോവളത്ത് നിന്ന് വര്‍ക്കലയിലേക്ക് പോവുകയായിരുന്ന കാറാണ് നിയന്ത്രണം നഷ്ടമായി അപകടത്തില്‍പ്പെട്ടത്. കാര്‍ ഭാഗികമായി തകര്‍ന്നു. മുന്നിലുണ്ടായിരുന്ന വാഹനം പെട്ടെന്ന് വേഗത കുറച്ചതോടെ വാഹനത്തിലിടിക്കാതിരിക്കാന്‍ കാര്‍ വെട്ടിക്കുകയായിരുന്നു. ഇതോടെ ഫ്‌ളൈ ഓവറിന്‍റെ ഡിവൈഡറില്‍ തട്ടി കീഴ്‌മേല്‍ മറിഞ്ഞു.

വിഷുകൈനീട്ടത്തിന്‍റെ ഓർമയിൽ ആദിവാസി സമൂഹം, ഇപ്പോൾ കാണിക്ക കാട്ടുദൈവത്തിന്

കോട്ടൂർ: വിഷുകൈനീട്ടത്തിന്‍റെ കാട്ടുതേനും, നെല്ലിക്കയും തിനയും തിനമാവും ചേനയും ചേമ്പും ഒക്കെ അടങ്ങുന്നതാണ് ഇവരുടെ കാണിക്ക. മാസങ്ങളായി വനത്തിൽ അലഞ്ഞ് ശേഖരിക്കുന്ന തേൻ, അഗസ്ത്യവനത്തിന്‍റെ അടിവാരത്തിൽ നിന്നും വെട്ടിയെടുത്ത ചൂരൽ കൊണ്ട് നിർമ്മിച്ച കുട്ട, വട്ടി, മുറം എന്നിവയാണ് മറ്റ് ഒരിനം കാണിക്ക. കരനെല്ലാണ് ഇവരുടെ ഒരിനം. കാട് മാറ്റി വ്യത്തിയാക്കിയ ഭാഗത്ത് വിതയ്ക്കുന്ന നെല്ല് കൊയ്താണ് സ്വാദിഷ്ടമായ കരനെല്ല് ഉണ്ടാക്കുന്നത്. കാട്ടിൽ നിന്നും സംഘടിപ്പിച്ച കിഴങ്ങു വർഗങ്ങളും ഇക്കൂട്ടത്തിലുണ്ട്. കാട്ടിലെ മൃഗങ്ങളുടെ ഇറച്ചിയും ചേർത്താൽ കാണിക്ക റെഡി. ഈ കാണിക്കയുമായി കാട്ടുമൂപ്പന്‍റെ നേത്യത്വത്തിൽ കുട്ടികളും സ്ത്രീകളും അടങ്ങുന്ന സംഘവുമായി വിഷു ദിനത്തിൽ യാത്രയാകും. വിഷു ദിനത്തിൽ രാജാവ് തങ്ങുന്നത് പൊൻമുടിയിലെ കൊട്ടാരത്തിലാണ്. ഇപ്പോൾ പോലീസിന്‍റെ വയർലെസ് സ്റ്റേഷനായി പ്രവർത്തിക്കുന്ന കൊട്ടാരത്തിൽ എത്തി കാണിക്കാർ കാണിക്ക വയ്ക്കും. തിരുവിതാംകൂറിന് മുൻപ് വേണാട് രാജവംശം ഭരിച്ചിരുന്ന കാലത്താണ് രാജാവിന് കാണിക്ക അർപ്പിക്കുന്ന സമ്പ്രദായം തുടങ്ങിയത്. ഇവരെ കാട്ടിലെ അരചൻ( രാജാവ്) ആയിട്ടാണ് നിയമിച്ചിരുന്നത്. എന്നാൽ രാജാധികാരം പോയി ജനാധിപത്യം വന്നപ്പോൾ കാണിക്ക എന്ന സമ്പ്രദായം പതിയെ നിന്നു. എന്നാൽ വിഷു ദിനത്തിൽ പഴയ സ്മരണയിൽ കാട്ടുദൈവത്തിന് കാണിക്ക വച്ച് മടങ്ങും. ഇന്നലെ കാട്ടുദൈവത്തിന് പടുക്ക വച്ച് കാണിക്കാർ മടങ്ങി.

കിണറ്റില്‍ വീണ മൂന്ന് വയസുകാരിയെ സാഹസികമായി രക്ഷപ്പെടുത്തി അയൽവാസി

വെള്ളറട: കിണറ്റില്‍ വീണ മൂന്ന് വയലുകാരിയെ സാഹസികമായി രക്ഷപ്പെടുത്തിയ സമീപവാസിക്ക് അഭിനന്ദന പ്രവാഹം. ചാമവിള മുണ്ടനാട് റിട്ട.ജൂണിയര്‍ ഹെല്‍ത്ത് ഇന്‍സ്‌പെക്ടര്‍ ശ്രീകുമാര്‍ എന്ന നാട്ടുകാരുടെ പ്രീയപ്പെട്ട വേണുവാണ് ബാലികയ്ക്ക് രക്ഷകനായെത്തിയത്. ശനിയാഴ്ച ഉച്ചയ്ക്കായിരുന്നു സംഭവം. ചാമവിള , മുണ്ടനാട് കൊക്കോട് വീട്ടില്‍ അനു -അനി ദമ്പതികളുടെ മകള്‍ ശിവാനിയെയാണ് മുപ്പത് അടിയിലേറെ ആഴമുള്ള കിണറ്റില്‍ നിന്ന് രക്ഷപ്പെടുത്തിയത്. അമ്മയോടൊപ്പം കിണറ്റിനരികിലെത്തിയ കുഞ്ഞ് അപ്രതീക്ഷികമായി കിണറ്റിലേക്ക് വീഴുകയായിരുന്നു. ശബ്ദം കേട്ട് സമീപത്തു പണി ചെയ്തു കൊണ്ടിരുന്ന തൊഴിലുറപ്പ് തൊഴിലാളികള്‍ കിണറിനടുത്തെത്തി നിലവിളിയുമായി നില്‍ക്കുമ്പോഴാണ് സമീപവാസിയായ ശ്രീകുമാര്‍ ഓടിയെത്തി അരക്കു കയര്‍ കെട്ടി കിണറ്റിലേക്കിറങ്ങിയത്. വെള്ളത്തില്‍ മുങ്ങിപ്പൊങ്ങുന്ന ബാലികയെ നിമിഷങ്ങള്‍ക്കുള്ളില്‍ രക്ഷപ്പെടുത്തി പുറത്തെത്തിച്ചു. ബാലിക പൂര്‍ണ ആരോഗ്യവതിയാണ്. കര്‍ഷക സംഘം ഏരിയാ സെക്രട്ടറി വി എസ് ഉദയന്‍റെ നേതൃത്വത്തില്‍ ആദരിച്ചു.

വീടിന് തീ പിടിച്ച് വീട്ട് സാധനങ്ങൾ കത്തി നശിച്ചു

കാട്ടാക്കട: വീടിന് തീ പിടിച്ച് വീട്ട് സാധനങ്ങൾ കത്തി നശിച്ചു. കുരിശടി ജംഗ്ഷന് സമീപം വട്ടകൈത ഷാനി തസ്തക്കീറിന്‍റെ വീടിനാണ് തീ പിടിച്ചത്. അലമാരയിൽ സൂക്ഷിച്ചിരുന്ന സർട്ടിഫിക്കറ്റുകളടക്കം വിലപിടിപ്പുള്ള സാധനങ്ങൾ കത്തി നശിച്ചു. വീട്ടിൽ ആളില്ലായിരുന്നു. ഇന്നലെ രാവിലെ 11 ഓടെയായിരുന്നു സംഭവം. വീട്ടിൽ നിന്നും പുകവരുന്നത് കണ്ട് നാട്ടുകാർ ഫയർഫോഴിസിനെ അറിയിക്കുകയായിരുന്നു. ഉടനെ തീ അണച്ചതിനാൽ കൂടുതൽ അപകടം ഒഴിവായി. ഷോർട്ട് സർക്യൂട്ട് ആകാം കാരണം എന്നാണ് കരുതുന്നത്.

യുവാവിന് സഹോദരന്‍റെ കുത്തേറ്റു

കഴക്കൂട്ടം: കഴക്കൂട്ടത്ത് യുവാവിന് കുത്തേറ്റു. ഉച്ചക്കട സ്വദേശി ഗാംഗുലിക്കാണ് കുത്തേറ്റത്. ഇന്നലെ വൈകുന്നേരം അഞ്ചുമണിയോടെ കൃഷ്ണ തീയേറ്ററിനു സമീപത്ത് വച്ചായിരുന്നു സംഭവം. മൊബൈൽ ഷോപ്പിൽ നിന്നും ഇറങ്ങിവന്ന ഗാംഗുലിയും സഹോദരൻ രാഹുലുമായി വാക്കു തർക്കത്തിൽ ഏർപ്പെടുകയും രാഹുൽ കയ്യിൽ കരുതിയ മൂർച്ചയുള്ള ആയുധം ഉപയോഗിച്ച് ഗാംഗുലിയുടെ മുതുകത്തും ഇടതു കൈയിലും നെഞ്ചത്തും കുത്തുകയായിരുന്നു. നാട്ടുകാർ ഓടി കൂടിയതോടെ രാഹുൽ ഓട്ടോറിക്ഷയുമായി രക്ഷപ്പെട്ടു.തുടർന്ന് കഴക്കൂട്ടം പോലീസ് എത്തി പരിക്കേറ്റ ഗാംഗുലിയെ സ്വകാര്യ ആശുപത്രിയിൽ പ്രവേശിപ്പിച്ചു. ഓട്ടോ ഡ്രൈവർമാരായ സഹോദരങ്ങൾ തമ്മിലുള്ള കുടുംബ പ്രശ്നമാണ് കുത്തിൽ കലാശിച്ചതെന്ന് പോലീസ്. കഴക്കൂട്ടം പൊലീസ് കേസടുത്ത് അന്വേഷണം ആരംഭിച്ചു.

ഫുട്പാത്തിനെ തടസപ്പെടുത്തി കേബിള്‍ കൂമ്പാരം !

പേരൂര്‍ക്കട: തൈക്കാട് ശിശുക്ഷേമസമിതി ഓഫീസിനു സമീപം റോഡിനിരുവശത്തെയും ഫുട്പാത്തില്‍ കേബിള്‍ കൂമ്പാരം. സ്വകാര്യ കമ്പനിയുടെ കേബിളുകളാണ് ഇന്‍റര്‍ലോക്ക് ചെയ്ത നടപ്പാതയില്‍ ഇട്ടിരിക്കുന്നത്. ഇരുവശത്തുമായി ഏകദേശം 50 മീറ്റര്‍ നീളം കേബിള്‍ച്ചുരുകള്‍ അപഹരിച്ച നിലയിലാണ്. ചുറ്റിയനിലയിലുള്ള കേബിളുകള്‍ ഫുട്പാത്തിനെ മുഴുവനും മറച്ചിരിക്കുന്നത് അരയാള്‍ പൊക്കത്തിലാണ്. കുറേനാളായി കാല്‍നടയാത്രികരുടെ സഞ്ചാരം പൂര്‍ണ്ണമായി നിഷേധിച്ചുകൊണ്ടാണ് കേബിളുകള്‍ കൂമ്പാരം കൂട്ടി ഇട്ടിരിക്കുന്നത്. ശിശുക്ഷേമ സമിതിയിലേക്കും സമീപത്തെ സ്വകാര്യ വിദ്യാഭ്യാസ സ്ഥാപനത്തിലേക്കുമായി നിരവധി പേരാണ് എത്തിച്ചേരുന്നത്. ഇവരെല്ലാം റോഡിലിറങ്ങിയാണ് നടക്കുന്നത്. കേബിളുകള്‍ സ്ഥിരമായി കിടന്ന് മഴയും വെയിലുമേറ്റതോടെ ഇതിലുള്ള ലോഹഭാഗം തുരുമ്പിച്ച് വെള്ളംകലര്‍ന്ന് ഫുട്പാത്തില്‍ ഒലിച്ചിറങ്ങിയിട്ടുമുണ്ട്.

രേഖകളില്ല; സ്പയുടെ പ്രവര്‍ത്തനം നിര്‍ത്തിവയ്പ്പിച്ചു

പേരൂര്‍ക്കട: മതിയായ രേഖകളില്ലാതെ പ്രവര്‍ത്തിച്ചുവന്ന സ്പയുടെ പ്രവര്‍ത്തനം പോലീസ് ഇടപെട്ട് നിര്‍ത്തിവയ്പിച്ചു. തമ്പാനൂര്‍ സ്റ്റേഷന്‍ പരിധിയില്‍ എസ്എസ് കോവില്‍ റോഡില്‍ കഴിഞ്ഞ രണ്ടു വര്‍ഷമായി പ്രവര്‍ത്തിച്ചു വരികയായിരുന്ന റോയല്‍ കോസ്‌മോസ് ആൻഡ്് വെല്‍നെസ് സെന്‍ററിന്‍റെ പ്രവര്‍ത്തനമാണ് നിര്‍ത്തിയത്. പരാതിയുടെ അടിസ്ഥാനത്തില്‍ സിഐ വി.എം. ശ്രീകുമാറിനന്‍റെ നേതൃത്വത്തിലായിരുന്നു പരിശോധന നടത്തിയത്. ലൈസന്‍സില്ലാതെയാണ് സ്പ പ്രവര്‍ത്തിച്ചുവന്നതെന്ന് കണ്ടെത്തുകയായിരുന്നു. പരിശോധന പൂര്‍ത്തിയാക്കിയ പോലീസ് നഗരസഭാ സെക്രട്ടറിക്ക് റിപ്പോര്‍ട്ട് നല്‍കിയിട്ടുണ്ട്.

നിർത്തിയിട്ട കാറിനു പിറകിൽ ലോറി ഇടിച്ചു കയറി

നേമം: കരമന-കളിയിക്കാവിള പാതയിൽ വെള്ളായണി ജംഗ്ഷനു സമീപം റോഡിൽ നിർത്തിയിട്ടിരുന്ന കാറിനു പിറകിൽ തമിഴ്നാട്ടിൽ നിന്നുമെത്തിയ ലോറി ഇടിച്ചു കയറി. ഇന്നലെ ഉച്ചയ്ക്ക് രണ്ടരയോടെയായിരുന്നു അപകടം. ലോറി ഓടിച്ചിരുന്ന ഡ്രൈവർ ഉറങ്ങി പോയതാണ് അപകടത്തിന് ഇടയാക്കിയതെന്നാണ് നാട്ടുകാർ പറയുന്നത്. ഇടിയുടെ ആഘാതത്തിൽ നിർത്തിയിട്ടിയിരുന്ന കാർ റോഡിലെ ഇരുമ്പ് കൈവരിയിൽ ഇടിച്ചു നിന്നു. നിർത്തിയിട്ടിരുന്ന കാറിനുള്ളിൽ ഡ്രൈവർ മാത്രമാണ് ഉണ്ടായിരുന്നത്. പരിക്ക് ഗുരുതരമല്ല.

എംഡിഎംഎയുമായി രണ്ടുപേര്‍ പിടിയില്‍

പേരൂര്‍ക്കട: മാരക ലഹരിമരുന്നായ എംഡിഎംഎയുമായി രണ്ടുപേരെ പേരൂര്‍ക്കട പോലീസ് പിടികൂടി. പേരൂര്‍ക്കട അഭയനഗര്‍ മണക്കുളം പണയില്‍ വീട്ടില്‍ കാട്ടാളന്‍ ബിനു എന്നുവിളിക്കുന്ന ബിനില്‍ (21), അഭയനഗര്‍ ഹിന്ദുസ്ഥാന്‍ ലാറ്റക്‌സിനു സമീപം പുതുവല്‍ പുത്തന്‍വീട്ടില്‍ ഉണ്ണി എന്നുവിളിക്കുന്ന സൂര്യ നിരഞ്ജന്‍ (27) എന്നിവരാണ് പിടിയിലായത്. രഹസ്യവിവരത്തെ തുടര്‍ന്നു നടത്തിയ പരിശോധനയില്‍ സൂര്യ നിരഞ്ജന്‍റെ വീട്ടില്‍നിന്നും 2.98 ഗ്രാം എംഡിഎംഎ കണ്ടെത്തിയത്. ഇയാള്‍ അഞ്ചിലേറെ ക്രിമിനല്‍ക്കേസുകളിലെ പ്രതിയാണെന്നു പോലീസ് പറഞ്ഞു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

ആക്ട്‌സിന്‍റെ ആഭിമുഖ്യത്തില്‍ വിശുദ്ധവാര ശുശ്രൂഷകള്‍

തിരുവനന്തപുരം: ക്രൈസ്തവ സഭകളുടെ കൂട്ടായ്മയായ ആക്ട്‌സിന്‍റെ ആഭിമുഖ്യത്തില്‍ വ്യാഴം, വെള്ളി, ഞായര്‍ ദിവസങ്ങളില്‍ പൂജപ്പുര സെന്‍ട്രല്‍ ജയിലില്‍ വിശുദ്ധവാര ശുശ്രൂഷകള്‍ നടത്തും. വ്യാഴം ബിഷപ് ഡോ. ജോഷ്വാ മാര്‍ ഇഗ്‌നാത്തിയോസ് വചന സന്ദേശം നല്‍കും. വെള്ളി ചങ്ങനാശേരി അതിരൂപതാ ആര്‍ച്ച് ബിഷപ് മാര്‍ തോമസ് തറയില്‍ വചനസന്ദേശം നല്‍കും. ഈസ്റ്റര്‍ ദിനത്തിലെ ശുശ്രൂഷകള്‍ക്ക് ആക്ട്‌സ് പ്രസിഡന്‍റ് ബിഷപ് ഡോ. ഉമ്മന്‍ ജോര്‍ജും ബിഷപ് മാത്യൂസ് മോര്‍ സില്‍വാനോസും നേതൃത്വം നല്‍കും. മദ്യത്തിനും മയക്കുമരുന്നിനും അടിമകളായിരിക്കുന്നവരുടെ വിടുതലിനായുള്ള പ്രത്യേക പ്രാര്‍ഥനയാണ് വിശുദ്ധവാരത്തില്‍ ആക്ട്‌സ് നടത്തുന്നതെന്ന് ജനറല്‍ സെക്രട്ടറി ജോര്‍ജ് സെബാസ്റ്റ്യന്‍ അറിയിച്ചു.

മാതൃവേദി-പിതൃവേദി പ്രവര്‍ത്തന വര്‍ഷ ഉദ്ഘാടനം

തിരുവനന്തപുരം: മാതൃവേദി-പിതൃവേദി തിരുവനന്തപുരം ഫൊറോന പ്രവര്‍ത്തന വര്‍ഷ ഉദ്ഘാടന ഇന്നലെ ലൂര്‍ദ് ഓഡിറ്റോറിയത്തില്‍ നടന്നു. ലൂര്‍ദ് ഫൊറോന വികാരി ഫാ.ജോണ്‍ തെക്കേക്കര ഉദ്ഘാടനം നിര്‍വഹിച്ചു. ചടങ്ങിനോടനുബന്ധിച്ച് നിയുക്ത ഫൊറോന ഭാരവാഹികളുടെ സത്യപ്രതിജ്ഞയും നടന്നു. മുന്‍ ഭാരവാഹികളെ ആദരിക്കലും കലാപരിപാടികളും സമ്മാന വിതരണവും ഇതോടൊപ്പം സംഘടിപ്പിച്ചു. ഫാ.ബ്ലസ് കരിങ്ങണാമറ്റം, സി.ജെയിന്‍ മേരി, ടോമി പട്ടശേരി, ബിനുമോള്‍ ബേബി, ജോസഫ് മുരളി ആനന്ദ്, ബ്ലസി മോള്‍, സജി ആന്‍റണി, ജിനോദ് ഏബ്രഹാം, സെലിന്‍ തോമസ്, മത്തായി, ലിന്‍സി ജിനു, താര സജി തുടങ്ങിയവര്‍ പങ്കെടുത്തു. സ്‌നേഹവിരുന്നോടെയാണ് പരിപാടികള്‍ സമാപിച്ചത്.

തേക്കുപാറ സെന്‍റ് മേരിസ് പള്ളി കൂദാശ ചെയ്തു

അന്പൂരി: ചങ്ങനാശേരി അതിരുപതയുടെ തെക്കൻ മേഖലയിലെ ആദ്യ ദേവാലയങ്ങളിൽ ഒന്നായ പുനഃനിർമിക്കപ്പെട്ട തേക്കുപാറ സെന്‍റ് മേരിസ് പള്ളി ചങ്ങനാശേരി ആർച്ച് ബിഷപ് മാർ. തോമസ് തറയിൽ കൂദാശ ചെയ്തു. വികാരി ജനറാൾ മോൺ. ഡോ.ജോൺ തെക്കേക്കര, ഫൊറോനാ വികാരി ഫാ.സോണി കരുവേലിൽ, വികാരി ഫാ. ടോണി നമ്പിശേരികളം എന്നിവർ സഹകാർമ്മികർ ആയിരുന്നു.

ആര്യങ്കാവ് കുരിശുമല കയറ്റം നടത്തി

ആര്യങ്കാവ്: ചങ്ങനാശേരി അതിരൂപത കൊല്ലം ആയുർ ഫൊറോനയുടെ നേതൃത്വത്തിൽ ആര്യങ്കാവ് രാജാത്തോട്ടം കുരിശുമല കയറി. ഓശാനഞായറാഴ്ച ഉച്ചയ്ക്ക് 2.30 ന് ഫൊറോനയിലെ വിശ്വാസികൾ ആര്യങ്കാവ് സെന്‍റ് മേരീസ് പള്ളിയിൽ എത്തിച്ചേർന്ന് രാജാതോട്ടം കുരിശുമലകയറ്റം ആരംഭിച്ചു. തിരികെ അടിവാരത്ത്‌ എത്തിയ തീർത്ഥാടകർക്ക് നേർച്ച കഞ്ഞി നല്കി. ആര്യങ്കാവ് വികാരി റവ. ഫാ. ഫിലിപ്പ് തയ്യിൽ, കൈക്കാരമാർ, യുവദീപ്തി അംഗങ്ങൾ എന്നിവർ നേതൃത്വം നൽകി.

തെക്കന്‍ കുരിശുമലയില്‍ ഓശാന തിരുനാള്‍ ആഘോഷിച്ചു

വെളളറട: പ്രസിദ്ധ തീര്‍ഥാടന കേന്ദ്രമമായ തെക്കന്‍ കുരിശുമല തീര്‍ഥാടന കേന്ദ്രത്തില്‍ ഓശാന ഞായര്‍ തിരുന്നാള്‍ ആചരിച്ചു. തെക്കന്‍ കുരിശുമല തീര്‍ഥാടന കേന്ദ്രത്തിന്‍റെ പ്രവേശന കവാടമായ കൂതാളിയിലെ ക്രിസ്തുരാജ പാദപീഠത്തില്‍ രാവിലെ ഏഴിനു പ്രാരംഭ ചടങ്ങുകള്‍ ആരംഭിച്ചു. ഓശാനാ ഞായര്‍ തിരുന്നാള്‍ ദിവ്യബലിക്ക് തെക്കന്‍ കുരിശുമല വോളന്‍റിയേഴ്‌സ് കമ്മിറ്റി ചെയര്‍മാനും തെക്കന്‍ കുരിശുമല ഇടവക വികാരിയുമായ ഫാ. എസ്അരുണ്‍ കുമാര്‍ മുഖ്യ കാര്‍മികത്വം വഹിച്ചു.

വെള്ളറട ഫോസ്റ്റര്‍ മെമ്മോറിയല്‍ ഇടവകയില്‍ കുരുത്തോല പ്രദക്ഷിണം

വെള്ളറട: വെള്ളറട ഫോസ്റ്റര്‍ മെമ്മോറിയല്‍ ഇടവകയില്‍ ഓശാന തിരുനാള്‍ ആഘോഷിച്ചു. പ്രഭാത ആരാധനയ്ക്ക് ശേഷം കുരുത്തോലയേന്തിയ ഘോഷയാത്രയില്‍ ആയിരത്തിലതികം അധികം പേര്‍ പങ്കെടുത്തു. റവ. ധര്‍മരാജ് ശുശ്രുഷകള്‍ക്ക് നേതൃത്വം നല്‍കി. വിബിഎസ് ഡയറക്ടര്‍ നിഖില്‍ ചാങ്ങ വചന ശുശ്രുഷ നടത്തി. സഹ ശുശ്രുഷകന്‍ ഷിന്‍റോ സ്റ്റാന്‍ലി, ഇടവക സെക്രട്ടറി റ്റി. ഫ്രാന്‍സിസ്, അക്കൗണ്ടന്‍റ് ജസ്റ്റിന്‍ ജയകുമാര്‍, കമ്മിറ്റി അംഗങ്ങളായ ഷിനോജ്, കുമാര്‍, അതുല്‍ ഷൈന്‍, രാഹുല്‍, സുന്ദരരാജ്, ജസ്റ്റിന്‍ വിത്സരാജ്, ധര്‍മരാജ്, ആര്‍‌. സി. ശാന്ത, ജിജി സനല്‍, സണ്‍ഡേ സ്‌കൂള്‍ സെക്രട്ടറി ലീന, യുവജന സംഘടന സെക്രട്ടറി പ്രിയ, സ്ത്രീ ജന സംഘടന സെക്രട്ടറി സുമന. ബാലജ സംഘടന കണ്‍വീനവര്‍ കെ. സി. ജിന്‍സി തുടങ്ങിയവര്‍ പങ്കെടുത്തു.

ഭക്തിനിർഭരമായി ഓശാന ഞായര്‍ ആചരിച്ചു

വിശുദ്ധ വാരത്തിനു തുടക്കമായി തിരുവനന്തപുരം: ഓശാന ഞായര്‍ ആചരണത്തോടെ ദേവാലയങ്ങളില്‍ വിശുദ്ധവാര തിരുക്കര്‍മങ്ങള്‍ക്കു തുടക്കമായി. ഓശാന ഞായറിനോടനുബന്ധിച്ച് ഇന്നലെ നഗരത്തിലെ വിവിധ ദേവാലയങ്ങളില്‍ പ്രത്യേക പ്രാര്‍ഥനാശുശ്രൂഷകളും കുരുത്തോല വിതരണവും നടന്നു. വിവിധ ദേവാലയങ്ങളില്‍ നടന്ന ഓശാനഞായര്‍ ശുശ്രൂഷകളില്‍ വിവിധ മതമേലധ്യക്ഷന്മാരും വൈദികരും കാര്‍മികത്വം വഹിച്ചു. പട്ടം സെന്‍റ് മേരീസ് മേജര്‍ ആര്‍ക്കി എപ്പാര്‍ക്കിയല്‍ കത്തീഡ്രലില്‍ ഓശാനയുടെ തിരുക്കര്‍മങ്ങള്‍ ഇന്നലെ രാവിലെ 6.30ന് ആരംഭിച്ചു. മലങ്കര കത്തോലിക്കാസഭ മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാബാവ മുഖ്യകാര്‍മികനായിരുന്നു. കുരുത്തോല വാഴ്‌വിന്‍റെ ശുശ്രുഷ, പ്രദക്ഷിണം, വിശുദ്ധ കുര്‍ബാന എന്നീ തിരുക്കര്‍മങ്ങളുണ്ടായിരുന്നു. പാളയം സെന്‍റ് ജോസഫ്‌സ് മെട്രോപ്പൊളിറ്റന്‍ കത്തീഡ്രലില്‍ ഇന്നലെ രാവിലെ ഏഴിന് ആരംഭിച്ച പൊന്തിഫിക്കല്‍ ദിവ്യബലിക്കും കുരുത്തോല വെഞ്ചിരിപ്പിനും മറ്റു ഓശാന ശുശ്രൂഷകള്‍ക്കും തിരുവനന്തപുരം ലത്തീന്‍ അതിരൂപത ആര്‍ച്ച് ബിഷപ് ഡോ.തോമസ് ജെ.നെറ്റോ മുഖ്യ കാര്‍മികനായിരുന്നു. രാവിലെ 5.45നും വൈകുന്നേരം അഞ്ചിനും വിശുദ്ധ കുര്‍ബാന ഉണ്ടായിരുന്നു. പിഎംജി ലൂര്‍ദ് ഫൊറോന പള്ളിയില്‍ ഇന്നലെ രാവിലെ ഏഴിന് ആരംഭിച്ച ഓശാന ഞായര്‍ തിരുക്കര്‍മങ്ങള്‍ക്ക് ചങ്ങനാശേരി അതിരൂപത പ്രോട്ടോ സിഞ്ചെള്ളൂസ് ഫാ.ആന്‍റണി ഏത്തക്കാട്ട് മുഖ്യകാര്‍മികനായിരുന്നു. തിരുക്കര്‍മങ്ങളോടനുബന്ധിച്ച് കുരുത്തോല വെഞ്ചിരിപ്പും പളളിയിലേക്ക് പ്രദക്ഷിണവും വിശുദ്ധ കുര്‍ബാനയും ഉണ്ടായിരുന്നു. വെട്ടുകാട് മാദ്രെ ദെ ദേവൂസ് ദേവാലയത്തില്‍ ഓശാന ഞായറിന്‍റെ തിരുക്കര്‍മങ്ങള്‍ ഇന്നലെ രാവിലെ 8.30ന് ആരംഭിച്ചു. റൊസാരിയന്‍ കോണ്‍വന്‍റ് ഗ്രോട്ടോയില്‍ ആരംഭിച്ച കുരുത്തോല വെഞ്ചിരിപ്പിലും പ്രദക്ഷിണത്തിലും ദിവ്യബലിയിലും വിശ്വാസികള്‍ പങ്കുകൊണ്ടു. പാളയം സമാധാന രാജ്ഞി ബസിലിക്കയില്‍ ഇന്നലെ രാവിലെ 6.15ന് പ്രഭാത നമസ്‌കാരത്തോടെ ഓശാനയുടെ ശുശ്രൂഷകള്‍ ആരംഭിച്ചു. പ്രഭാത നമസ്‌കാരം, കുരുത്തോല വാഴ്‌വിന്‍റെ ശുശ്രൂഷ, വിശുദ്ധ കുര്‍ബാന എന്നീ ശുശ്രൂഷകള്‍ക്ക് ബസിലിക്ക റെക്ടര്‍ ഫാ.നെല്‍സണ്‍ വലിയവീട്ടില്‍ മുഖ്യകാര്‍മികത്വം വഹിച്ചു. വഴുതക്കാട് കാര്‍മല്‍ ഹില്‍ ആശ്രമ ദേവാലയത്തില്‍ ഓശാന ഞായറിന്‍റെ തിരുക്കര്‍മങ്ങള്‍ ഇന്നലെ രാവിലെ 6.30ന് ആരംഭിച്ചു. ഒസിഡി മലബാര്‍ പ്രൊവിന്‍സ് പ്രോവിന്‍ഷ്യാള്‍ റവ.ഡോ. പീറ്റര്‍ ചക്യത്ത് ഒസിഡി മുഖ്യ കാര്‍മികത്വം വഹിച്ചു. കുരുത്തോല വെഞ്ചിരിപ്പ്, പ്രദക്ഷിണം, ആഘോഷമായ ദിവ്യബലി എന്നിവയുണ്ടായിരുന്നു. രാവിലെ ഒന്‍പതിനും 11ന് ഇംഗ്ലീഷിലും ഉച്ചകഴിഞ്ഞ് നാലിനും 5.30നും ഏഴിനും വിശുദ്ധ കുര്‍ബാനയുണ്ടായിരുന്നു. മണ്ണന്തല സെന്‍റ് ജോണ്‍ പോള്‍ രണ്ടാമന്‍ മലങ്കര കത്തതലിക്കാ ദേവാലയത്തില്‍ ഇന്നലെ രാവിലെ 6.30ന് ആരംഭിച്ച പ്രഭാത നമസ്‌കാരം, കുരുത്തോല വാഴ്‌വ് ശുശ്രൂഷ, വിശുദ്ധ കുര്‍ബാന എന്നിവയ്ക്ക് ഫാ. ജോണ്‍ കുറ്റിയില്‍ മുഖ്യ കാര്‍മികന്‍ ആയിരുന്നു. ബാര്‍ട്ടന്‍ഹില്‍ വിശുദ്ധ പത്താം പിയൂസ് ക്‌നാനായ കത്തോലിക്ക പള്ളിയില്‍ ഇന്നലെ രാവിലെ 7.30ന് വിശുദ്ധ കുര്‍ബാന, കുരുത്തോല വെഞ്ചരിപ്പ് എന്നീ തിരുക്കര്‍മങ്ങള്‍ ആരംഭിച്ചു. പാളയം സെന്‍റ് ജോര്‍ജ് ഓര്‍ത്തഡോക്‌സ് സിറിയന്‍ കത്തീഡ്രലില്‍ ഓശാനയുടെ തിരുക്കര്‍മങ്ങള്‍ ഇന്നലെ രാവിലെ ആറിന് ആരംഭിച്ചു. ഏഴിന് വിശുദ്ധ കുര്‍ബാനയും വൈകുന്നേരം ആറിന് സന്ധ്യാ നമസ്‌കാരവും ഉണ്ടായിരുന്നു. നെടുമങ്ങാട് വിശുദ്ധ ജെറോം മലങ്കര സുറിയാനി കത്തോലിക്കാ ദേവാലയത്തില്‍ ഇന്നലെ രാവിലെ എട്ടിന് പ്രഭാത പ്രാര്‍ഥനയോടെ ഓശാനയുടെ ശുശ്രൂഷകള്‍ ആരംഭിച്ചു. കുരുത്തോല വാഴ്‌വ്, പ്രദക്ഷിണം, വിശുദ്ധ കുര്‍ബാന എന്നീ തിരുക്കര്‍മങ്ങളുണ്ടായിരുന്നു. വലിയതുറ വിശുദ്ധ ഫ്രാന്‍സിസ് സേവ്യര്‍ ദേവാലയത്തില്‍ ഇന്നലെ രാവിലെ 6.30ന് കുരുത്തോല വെഞ്ചിരിപ്പ്, പ്രദക്ഷിണം തുടര്‍ന്ന് ദിവ്യബലിയും നടന്നു. മുട്ടട ഹോളിക്രോസ് ദേവാലയത്തിലെ ഓശാന ഞായര്‍ തിരുക്കര്‍മങ്ങള്‍ ഇന്നലെ രാവിലെ 6.45ന് ആരംഭിച്ചു. കുരിശടിയില്‍ കുരുത്തോല വെഞ്ചിരിപ്പും കുരുത്തോല പ്രദക്ഷിണവും നടന്നു. ശ്രീകാര്യം എമ്മാവൂസ് ദേവാലയത്തില്‍ ഓശാന ഞായര്‍ തിരുക്കര്‍മങ്ങള്‍ ഇന്നലെ രാവിലെ 6.30ന് ആരംഭിച്ചു. കുരുത്തോല വെഞ്ചിരിപ്പും കുരുത്തോല പ്രദക്ഷിണവും വിശുദ്ധ കുര്‍ബാനയും ഉണ്ടായിരുന്നു. പുന്നന്‍ റോഡിലുള്ള സെന്‍റ് പീറ്റേഴ്‌സ് യാക്കോബായ സുറിയാനി ഓര്‍ത്തഡോക്‌സ് സിംഹാസന കത്തീഡ്രലില്‍ ഇന്നലെ രാവിലെ 6.30ന് പ്രഭാത നമസ്‌കാരം, 7.30ന് ഓശാന ശുശ്രൂഷ, വിശുദ്ധ കുര്‍ബാന എന്നീ തിരുക്കര്‍മങ്ങള്‍ നടന്നു. വട്ടിയൂര്‍ക്കാവ് എസ്എഫ്എസ് ദേവാലയത്തില്‍ ഇന്നലെ രാവിലെ എട്ടിന് ഓശാന ഞായറിന്‍റെ തിരുക്കര്‍മങ്ങള്‍ ആരംഭിച്ചു. നെയ്യാറ്റിന്‍കര അമലോത്ഭവ മാതാ കത്തീഡ്രലില്‍ ബിഷപ് ഡോ.വിന്‍സെന്‍റ് സാമുവല്‍ ഓശാന തിരുകര്‍മങ്ങള്‍ക്കു മുഖ്യ കാര്‍മികത്വം വഹിച്ചു. കുരിശടി ജംക്ഷനില്‍ കുരുത്തോല ആശീര്‍വദിച്ചതിനെ തുടര്‍ന്ന് നടന്ന പ്രദക്ഷിണം ബസ് സ്റ്റാന്‍ഡ് ജംക്ഷനിലൂടെ ആലുംമൂട്ടിലെത്തി തിരികെ കോണ്‍വന്‍റ് റോഡിലൂടെ ദേവാലയത്തില്‍ സമാപിച്ചു. സഹമെത്രാന്‍ ഡോ.സെല്‍വരാജന്‍ പത്തനാവിള സെന്‍റ് ജോസഫ് ദേവാലയത്തില്‍ തിരുകര്‍മ്മങ്ങളില്‍ മുഖ്യ കാര്‍മ്മികനായി. ബാലരാമപുരം വിശുദ്ധ സെബസ്ത്യാനോസ് ദേവാലയത്തില്‍ ഇടവക വികാരി ഫാ.വിക്ടര്‍ എവരിസ്റ്റസും കമുകിന്‍കോട് വിശുദ്ധ അന്തോണീസ് ദേവാലയത്തില്‍ ഇടവക വികാരി ഫാ.പിയോയും കുരുത്തോല പ്രദക്ഷിണത്തിന് നേതൃത്വം നല്‍കും. വ്ളാത്താങ്കര സ്വര്‍ഗാരോപിത മാതാ ദേവാലയത്തില്‍ ഫാ. സി. ജോയിയും തൂങ്ങാംപാറ വിശുദ്ധ കൊച്ചുത്രേസ്യ ദേവാലയത്തില്‍ ഇടവക വികാരി ഫാ.ജോയി മത്യാസും മേലാരിയോട് വിശുദ്ധ മദര്‍ തെരേസാ ദേവാലയത്തില്‍ ഫാ.തോമസ് ഈനോസും തിരുകര്‍മ്മങ്ങള്‍ക്ക് നേതൃത്വം നല്‍കി.

ഓശാന ഞായര്‍ തിരുക്കര്‍മങ്ങള്‍

മുട്ടട ഹോളിക്രോസ് ദേവാലയം: ഓശാന ഞായര്‍ തിരുക്കര്‍മങ്ങള്‍ ഇന്നു രാവിലെ 6.45ന് ആരംഭിക്കും. കുരിശടിയില്‍ കുരുത്തോല വെഞ്ചിരിപ്പും കുരുത്തോല പ്രദക്ഷിണവും ഉണ്ടാകും. തുടര്‍ന്ന് ദിവ്യബലി. രാവിലെ 5.45നും ഒന്‍പതിനും വൈകുന്നേരം അഞ്ചിനും ദിവ്യബലിയുണ്ടാകും. ശ്രീകാര്യം എമ്മാവൂസ് ദേവാലയം: ഓശാന ഞായര്‍ തിരുക്കര്‍മങ്ങള്‍ ഇന്നു രാവിലെ 6.30ന് ആരംഭിക്കും. കുരുത്തോല വെഞ്ചിരിപ്പും കുരുത്തോല പ്രദക്ഷിണവും ഉണ്ടാകും.രാവിലെ 9.30നും വൈകുന്നേരം 5.30നും വിശുദ്ധ കുര്‍ബാനയുണ്ടാകും. പാപ്പാട് കൊടുങ്ങാനൂര്‍ സാല്‍വേഷന്‍ ആര്‍മി ചര്‍ച്ച്: ഇന്നു രാവിലെ 9.30ന് ഓശാന തിരുക്കര്‍മ്മങ്ങള്‍ ആരംഭിക്കും. പുന്നന്‍ റോഡിലുള്ള സെന്‍റ് പീറ്റേഴ്‌സ് യാക്കോബായ സുറിയാനി ഓര്‍ത്തഡോക്‌സ് സിംഹാസന കത്തീഡ്രല്‍: ഇന്നു രാവിലെ 6.30ന് പ്രഭാത നമസ്‌കാരം. 7.30ന് ഓശാന ശുശ്രൂഷ, വിശുദ്ധ കുര്‍ബാന. വൈകുന്നേരം ആറിന് സന്ധ്യാ നമസ്‌കാരം. 6.45ന് വാദെ ദല്‍മീനോ ശുശ്രൂഷ.

തുമ്പോട് മിനി മാസ്റ്റ് ലൈറ്റ് ഉദ്ഘാടനം

കല്ലറ: കല്ലറ ഗ്രാമ പഞ്ചായത്തിലെ തുമ്പോട് മുടിപ്പുര ക്ഷേത്രത്തിൽ പുതിയതായി സ്ഥാപിച്ച മിനി മാസ്റ്റ് ലൈറ്റിന്‍റെ ഉദ്ഘാടനം ഡി.കെ മുരളി എംഎൽഎ നിർവഹിച്ചു. കല്ലറ ഗ്രാമ പഞ്ചായത്ത് പ്രസിഡന്‍റ് ജി.ജെ.ലിസി അധ്യക്ഷത വഹിച്ചു. എംഎൽഎയുടെ പ്രത്യേക വികസന ഫണ്ടിൽ നിന്നാണ് ലൈറ്റ് അനുവദിച്ചത്. ബ്ലോക്ക് വൈസ് പ്രസിഡന്‍റ് എസ്.എം.റാസി, പഞ്ചായത്ത് വൈസ് പ്രസിഡന്‍റ് എസ്.നജിൻഷ, മെമ്പർ രാധാമണി, ജി.ബേബി, ഡി.വിജയകുമാർ, ജി. വിജയൻ, ക്ഷേത്ര ഭാരവാഹികൾ തുടങ്ങിയവർ പങ്കെടുത്തു.

സാല്‍വേഷന്‍ ആര്‍മി തിരുവനന്തപുരം ഡിവിഷന്‍ വിബിഎസ് സംഗമം നടത്തി

തിരുവനന്തപുരം: പാട്ടും ഡാന്‍സും ഗെയിമുകളുമായി സാല്‍വേഷന്‍ ആര്‍മി വേളി ടൂറിസ്റ്റ് വില്ലേജില്‍ തിരുവനന്തപുരം ഡിവിഷന്‍റെ വിബിഎസ് സംഗമം സംഘടിപ്പിച്ചു. "മാനത്തൊരു സ്വര്‍ണ്ണ കൊട്ടാരം'എന്ന വിഷയത്തെ ആസ്പദമാക്കി ചര്‍ച്ചുകളില്‍ കഴിഞ്ഞ 10 ദിവസമായി നടന്ന വിബിഎസിന്‍റെ സംഗമം ഡിവിഷണല്‍ കമാന്‍ഡര്‍ ലെഫ്.കേണല്‍ ജേക്കബ് ജെ. ജോസഫ് ഉദ്ഘാടനം ചെയ്തു. ഡിവിഷണല്‍ യൂത്ത് സെക്രട്ടറി മേജര്‍ യേശുദാസ് ശാമുവേല്‍ അധ്യക്ഷനായിരുന്നു. സംസ്ഥാന യൂത്ത് സെക്രട്ടറി ക്യാപ്റ്റന്‍ അജേഷ് കുമാര്‍ ജോസഫ്, ഡിവിഷണല്‍ സെക്രട്ടറി മേജര്‍ മോത്തോ തോംപ്‌സണ്‍ തുടങ്ങിയവര്‍ പ്രസംഗിച്ചു. ഡിവിഷനിലെ 22 പള്ളികളില്‍ നിന്നുള്ള വിബിഎസ് കൂട്ടുകാരും അധ്യാപകരും സംഗമത്തില്‍ പങ്കെടുത്തു.

കേരള കോണ്‍ഗ്രസ് -എം നിയോജകമണ്ഡലം കമ്മിറ്റി ഓഫീസ് ഉദ്ഘാടനം

വെള്ളറട: കേരള കോണ്‍ഗ്രസ് -എമ്മിന്‍റെ നിയോജകമണ്ഡലം ഓഫീസ് വെള്ളറടയില്‍ പ്രവര്‍ത്തനമാരംഭിച്ചു. ജില്ലാ പ്രസിഡന്‍റ് സഹായദാസ് ഉദ്ഘാടനം നിര്‍വഹിച്ചു. കൂതാളി ഷാജി, സുനു ,ആനപ്പാറ രവി, പാറശാല രാജന്‍, ജസ്റ്റിന്‍ രാജ്, കക്കോട്ടുകുഴി വിജയന്‍, ദിവാകരന്‍ നായര്‍, ഷിജിന്‍കുമാര്‍, തൃപ്പലവൂര്‍ ജയകുമാര്‍, സുവിധാ, സുരേഷ് കുമാര്‍, ജോര്‍ജ് തേക്ക്പാറ, ജോയ് വെള്ളാര്‍, റെക്‌സോണ്‍, സലീം രാജ് തുടങ്ങിയവര്‍ പ്രസംഗിച്ചു.

പോലീസുകാർ വീടുവച്ച് നൽകി

നെടുമങ്ങാട്: വീട് വച്ച് നൽകി പോലീസ് മാതൃകയായി. ആര്യനാട് പഞ്ചായത്തിലെ തേവിയാരുകുന്ന് വാർഡിലെ റോഡരികത്ത് വീട്ടിൽ കെ.ഭവാനിയമ്മ(80)മകൻ രജീഷ് കുമാർ(40)എന്നിവർക്കാണ് പോലീസ് വീട് വച്ച് നൽകിയത്. ഇക്കഴിഞ്ഞ ഫെബ്രുവരി ആറിന് പുതുതായി ചുമതലയേറ്റ റൂറൽ എസ്പി കെ.എസ്.സുദർശനൻ ആര്യനാട് തേവിയാരുകുന്ന് ട്രൈബൽ സെറ്റിൽമെന്‍റിൽ നടത്തിയ അദാലത്തിലാണ് പണിപൂർത്തിയാകാത്ത വീട്ടിൽ ദുരിതാവസ്ഥയിൽ കഴിയുന്ന വൃദ്ധയായ ഭവാനിയുടെ വീട് ശ്രദ്ധയിൽപ്പെട്ടത്. സന്ദർശന വേളയിൽത്തന്നെ റൂറൽ എസ്.പി ഭവാനിയുടെ വീട് പുതുക്കി പണിയാൻ നിർദ്ദേശിക്കുകയായിരുന്നു. എസ്പിയുടെ നിർദ്ദേശപ്രകാരം കാട്ടാക്കട ഡി.വൈ.എസ്.പി എൻ.ഷിബു,ആര്യനാട് എസ്.എച്ച്.ഒ വി.എസ്.അജീഷ് എന്നിവരുടെ നേതൃത്വത്തിൽ വീട് നിർമാണത്തിനുള്ള ശ്രമം തുടങ്ങി. ഏകോപന ചുമതല ആര്യനാട് സ്റ്റേഷനിലെ സിവിൽ പൊലീസ് ഓഫീസർ എം.എസ്.ഷിബുവിനും നൽകി. രണ്ട് മുറികളും അടുക്കളയും ശുചിമുറിയും ഉൾപ്പടെ മനോഹരമായ ചെറിയ വീട് യാഥാർത്ഥ്യമാക്കാൻ സാമൂഹ്യ പ്രവർത്തകനും കരാറുകാരനുമായ പുനലാൽ സ്വദേശി രാജനും കൂടി കൈകോർത്തതോടെ യാണ് വീടെന്ന സ്വപ്നം യാഥാർത്ഥ്യമായത്. തുടർന്ന് താക്കോൽ റേഞ്ച് ഡിഐജി എസ്.അജിതാബീഗം ഭവാനിയ്ക്ക് കൈമാറി. റൂറൽ എസ്.പി കെ.എസ്.സുദർശനൻ അദ്ധ്യക്ഷത വഹിച്ചു. കാട്ടാക്കട ഡിവൈഎസ്പി എൻ.ഷിബു,ആര്യനാട് ഗ്രാമ പഞ്ചായത്ത് പ്രസിഡന്‍റ് വി.വിജുമോഹൻ തുടങ്ങിയവർ സംബന്ധിച്ചു.

വരും എംഎല്‍എ ഫണ്ട് വീണ്ടും; പാപ്പാട് കുളം നവീകരിക്കും

പേരൂര്‍ക്കട: പാപ്പാട് കുളം നവീകരിക്കുമെന്ന് വാര്‍ഡ് കൗണ്‍സിലറുടെ ഉറപ്പ്. വാഴോട്ടുകോണം വാര്‍ഡില്‍ ഉള്‍പ്പെടുന്ന പാപ്പാട് കുളമാണ് രണ്ടുതവണ നവീകരണം നടത്തിയിട്ടും ചുറ്റുവേലി ഇടിഞ്ഞ് കാടുകയറി കിടക്കുന്നത്. 2020-ലും 2022-ലുമാണ് എംഎല്‍എ ഫണ്ടായ 17 ലക്ഷവും 42 ലക്ഷവും വിനിയോഗിച്ച് നവീകരിച്ചത്. കുളത്തിലെ പായലുകള്‍ നീക്കുക, കാടുകയറിക്കിടക്കുന്ന പരിസരം വൃത്തിയാക്കി ഇന്‍റര്‍ലോക്ക് സ്ഥാപിക്കുക, തെരുവുവിളക്കുകള്‍ സ്ഥാപിക്കുക, ചുറ്റുവേലി കെട്ടുക എന്നിവയ്ക്കാണ് ഫണ്ട് അനുവദിച്ചിരുന്നത്. ഏറ്റവുമൊടുവില്‍ നവീകരണം നടത്തിയശേഷം ഒന്നരവര്‍ഷമായി കുളം നാശോന്മുഖമായി കിടക്കുകയാണ്. കുളത്തിനു സമീപം ഒരു അങ്കണവാടി പ്രവര്‍ത്തിക്കുന്നുണ്ട്. കുട്ടികള്‍ ഇഴജന്തുക്കളെ ഭയന്നുവേണം ഇവിടെ കഴിയാന്‍ എന്നതാണ് അവസ്ഥ. കുളത്തിന്‍റെ കരകളില്‍ നിന്ന് മണ്ണിടിഞ്ഞ് കുളത്തിലേക്ക് വീണുകിടക്കുകയാണ്. കരാറുകാര്‍ പണി ശാസ്ത്രീയമായി നടത്താത്തതാണ് വശങ്ങള്‍ കാരണമെന്നാണ് വാര്‍ഡ് കൗണ്‍സിലര്‍ റാണി വിക്രമന്‍ പറയുന്നത്. നഗരസഭയുടെ ഭരണം അവസാനിക്കുന്നതിനു മുമ്പുതന്നെ ആവശ്യമായ ഫണ്ട് വകയിരുത്തി കുളം വൃത്തിയും വെടിപ്പുമുള്ളതാക്കി മാറ്റുമെന്ന് അവര്‍ ഉറപ്പു പറഞ്ഞു. ആവശ്യമായ ഫണ്ട് വകയിരുത്തുമെന്ന് എംഎല്‍എയുടെ ഓഫീസും അറിയിച്ചു.

ദു:ഖവെള്ളിയാഴ്ച്ച പാളയത്ത് സംയുക്ത കുരിശിന്‍റെ വഴി

തിരുവനന്തപുരം : 18ന് ദുഃഖവെള്ളിയാഴ്ച രാവിലെ 6.45 ന് പാളയത്ത് വിശുദ്ധ കുരിശിന്‍റെ വഴി സംഘടിപ്പിക്കും. ലത്തീൻ, സീറോ മലബാർ, മലങ്കര കത്തോലിക്ക, ക്നനായ സഭകളുടെ സംയുക്ത ആഭിമുഖ്യത്തിൽ പാളയം സെന്‍റ് ജോസഫ് കത്തീഡ്രലിൽ നിന്നാരംഭിച്ച്, വിജെടി ഹാൾ, യൂണിവേഴ്സിറ്റി ചുറ്റി പാളയത്ത് സമാപിക്കുന്നു. കർദിനാൾ മാർ ബസേലിയോസ് ക്ലീമിസ് കതോലിക്കാബാവ പ്രാരംഭ സന്ദേശവും ആർച്ച് ബിഷപ് തോമസ് ജെ. നെറ്റോ സമാപന സന്ദേശവും നല്കും. തിരുവനന്തപുരം ലത്തീൻ, തിരുവനന്തപുരം മലങ്കര, ചങ്ങനാശേരി, കോട്ടയം എന്നീ അതിരൂപതകളിലെ നൂറുകണക്കിനു വിശ്വാസികളും സന്യസ്തരും വൈദികരും പങ്കുചേരും. പാളയം കത്തീഡ്രൽ വികാരി മോണ്‍. വിൽഫ്രഡ് എമിലിയാസ്, ചങ്ങനാശേരി അതിരൂപതാ വികാരി ജനറലും ലൂർദ് വികാരിയുമായ മോണ്‍ ജോണ്‍ തെക്കേക്കര, പാളയം സമാധാനരാജ്ഞി ബസിലിക്ക റെക്ടർ ഫാ. നെൽസണ്‍ വലിയവീട്ടിൽ, പത്താംപീയുസ് ക്നാനായ കത്തോലിക്ക പള്ളി വികാരി ഫാ. മിഥുൻ വലിയ പുളിഞ്ചാക്കിൽ, ഷാജൻ മാർട്ടിൻ, ജെറോണ്‍ ഏലിയാസ്, ജെയിംസ് ഒഴുങ്ങാലിൽ, ആന്‍റണി കെ.ജെ.കൈതപ്പറന്പിൽ, സേവ്യർ സെബാസ്റ്റ്യൻ അനുഗ്രഹ്, ജിജി എം.ജോണ്‍, ജേക്കബ് മാത്യു എന്നിവർ ക്രമീകരണങ്ങൾക്ക് നേതൃത്വം നല്കും.

പാലത്തില്‍ കാല്‍നടയാത്രികര്‍ക്ക് ഭീഷണിയായി മെറ്റല്‍ പ്ലേറ്റ് !

പേരൂര്‍ക്കട: വട്ടിയൂര്‍ക്കാവ് മരുതംകുഴി പുതിയ പാലത്തില്‍ ഫുട്പാത്ത് ആരംഭിക്കുന്ന ഭാഗത്ത് യാത്രികര്‍ക്കു ഭീഷണിയായി മെറ്റല്‍ പ്ലേറ്റ്. തറനിരപ്പില്‍ നിന്ന് ഉയര്‍ന്ന് വളഞ്ഞുനില്‍ക്കുന്ന പ്ലേറ്റില്‍ തട്ടിയാല്‍ അപകടം ഉറപ്പാണ്ട്. ഫുട്പാത്തിലേക്ക് കയറുന്നവര്‍ ഇതില്‍തട്ടി റോഡിലേക്ക് വീഴാനുള്ള സാദ്ധ്യത കൂടുതലാണ്. വര്‍ഷങ്ങള്‍ക്കുമുമ്പ് റോഡുവശത്ത് അലങ്കാരലൈറ്റ് ഉറപ്പിക്കുന്നതിന്‍റെ ഭാഗമായി നിര്‍മിച്ചതാണ് മെറ്റല്‍ പ്ലേറ്റ്. ലൈറ്റും ബാക്കി ഭാഗങ്ങളും നശിച്ചുപോയെങ്കിലും ലോഹഭാഗം ഇപ്പോഴും അവശേഷിക്കുന്നു. പാലത്തില്‍ തെരുവുവിളക്കുകള്‍ പ്രകാശിക്കാതെ വരുന്ന വേളകളിലാണ് അപകടസാദ്ധ്യത കൂടുതല്‍.

കെഎസ്ആര്‍ടിസി സർവീസുകള്‍ വെട്ടിക്കുറച്ചു, യുഡിഎഫ് പ്രതിഷേധ ധര്‍ണ നടത്തി

പാലോട് : പെരിങ്ങമ്മല തെന്നൂര്‍ റൂട്ടിലെ കെഎസ്ആര്‍ടിസി ബസ് സര്‍വീസുകള്‍ വെട്ടിക്കുറച്ചതില്‍ പ്രതിഷേധിച്ച് യുഡിഎഫ് പെരിങ്ങമ്മല മണ്ഡലം കമ്മിറ്റി ഡിപ്പോയിലേക്ക് മാര്‍ച്ച് നടത്തി. ഇടിഞ്ഞാര്‍ അഗ്രിഫാം, തെന്നൂര്‍, ഞാറനീലി എന്നിവടങ്ങളിലേക്ക് സർവീസ് നടത്തിയിരുന്ന 20ലധികം സര്‍വീസുകളാണ് നിര്‍ത്തലാക്കിയത്. സ്വകാര്യബസുകളെ സഹായിക്കാനാണ് ഈ നീക്കമെന്ന് സമരക്കാര്‍ പറയുന്നു. പൊതുജനം കഷ്ടപ്പെടുകയാണ്. സര്‍ക്കാര്‍ ഓഫീസുകളിലെത്തേണ്ടവര്‍ക്ക് സമയത്ത് എത്താന്‍ കഴിയുന്നില്ല. ഡിപ്പോ അടച്ചുപൂട്ടുന്നതിനുള്ള ചില സംഘടനകളുടെ ഗൂഡശ്രമമാണ് ഇതിന് പിന്നിലെന്ന് ആരോപണമുണ്ട്. മാര്‍ച്ചും ധര്‍ണയും ഡിസിസി വൈസ് പ്രസിഡന്‍റ് സുധീര്‍ഷ ഉദ്ഘാടനം ചെയ്തു. യു.ഡി.എഫ് പെരിങ്ങമ്മല പഞ്ചായത്ത് കമ്മിറ്റി ചെയര്‍മാൻ സലിം പള്ളിവിള അധ്യക്ഷത വഹിച്ചു. കണ്‍വീനര്‍ കൊച്ചുവിള അന്‍സാരി, ലീഗ് ജില്ല ജനറല്‍ സെക്രട്ടറി നിസാര്‍ മുഹമ്മദ് സുല്‍ഫി, ബ്ലോക്ക് കോണ്‍ഗ്രസ് പ്രസിഡന്‍റ് നന്ദിയോട് ബി.സുശീലന്‍, ഇടവം ഖാലിദ്, ബി. പവിത്രകുമാര്‍, പി.എന്‍‌.അരുണ്‍കുമാര്‍, താന്നിമൂട് ഷംസുദീന്‍, ഇല്യാസ്, ഗീതാപ്രിജി, കൊച്ചുകരിക്കകം നൗഷാദ് എന്നിവര്‍ പ്രസംഗിച്ചു.

കോട്ടുകോണം സിഎസ്ഐ ഡിസ്ട്രിക്ട് ചർച്ച് 129-ാം വാർഷികാഘോഷം

നിലമാമൂട്: കോട്ടുക്കോണം സിഎസ്ഐ ഡിസ്ട്രിക്ട് ചര്‍ച്ചിന്‍റെ 129-ാമത് വാര്‍ഷികവും സഭാദിനാഘോഷങ്ങളുടെ ഉദ്ഘാടനവും ഇന്നു രാവിലെ എട്ടിന് ഡിസ്ട്രിക്ട് ചെയര്‍മാന്‍ റവ. സി. ജപരാജിന്‍റെ അധ്യക്ഷതയില്‍ മോട്ടിവേഷന്‍ സ്പീക്കര്‍ നോബിള്‍ മില്ലര്‍ ഉദ്ഘാടനം ചെയ്യും. 20ന് സഭാദിനാഘോഷയാത്രയോടു കൂടി സമാപിക്കും. ഇന്നു രാവിലെ 7.45ന് ഓശാന പെരുന്നാള്‍ ആരാധനയും സഭാദിന ഘോഷയാത്രയുടെയും തണല്‍ പാലിയേറ്റീവ് കെയര്‍ യൂണിറ്റിന്‍റെയും ഉദ്ഘാടനവും നടക്കും. 10ന് മെഡിക്കല്‍ ക്യാമ്പ്. വൈകുന്നേരം മൂന്നു മുതല്‍ വിബിഎസ് സമാപന സമ്മേളനവും ഘോഷയാത്രയും. തുടര്‍ന്ന് വിവിധ കലാപരിപാടികളും. നാളെ മുതല്‍ 16 വരെ തണല്‍ പാലിയേറ്റീവ് കെയര്‍ യൂണിറ്റിന്‍റെ ആഭിമുഖ്യത്തില്‍ ഭവന സന്ദര്‍ശനവും സഹായവിതരണവും. 17ന് വൈകുന്നേരം ഏഴിനു റവ. ഡോ.സി.ഐ. ഡേവിസ് ജോയി നയിക്കുന്ന കണ്‍വന്‍ഷന്‍. 18ന് രാവിലെ ഏഴിന് ദുഃഖവെള്ളി ആരാധന കണ്‍വന്‍ഷന്‍‌. വൈകുന്നേരം ഏഴിനു ഇവാ: ലീനുവിന്‍റെ അധ്യക്ഷതയില്‍ ക്യാപ്റ്റന്‍ സാജന്‍ ജോണിന്‍റെ നേതൃത്വത്തില്‍ കണ്‍വന്‍ഷന്‍ യോഗം. 19ന് വൈകുന്നേരം ഏഴിന് റവ. ജെ.എല്‍. ബിജോയിയുടെ അധ്യക്ഷതയില്‍ കണ്‍വന്‍ഷന്‍‌. 20ന് രാവിലെ എട്ടിന് 129ാമത് സഭാദിനാഘോഷ സമാപനത്തില്‍ ഡിസ്ട്രിക്ട് റവ. സി. രാജീവ് മുഖ്യസന്ദേശം നല്‍കും. വൈകുന്നേരം 6.30ന് സഭാദിന ഘോഷയാത്ര.

അംബേദ്കറുടെ 134-ാം ജന്മവാര്‍ഷികം; ഇന്ന് പദയാത്ര

തിരുവനന്തപുരം: ഇന്ത്യന്‍ ഭരണഘടനയുടെ എഴുപത്തിഅഞ്ചാം വാര്‍ഷികാഘോഷത്തിന്‍റെ ഭാഗമായും ഭരണഘടനാ ശില്‍പി ഡോ.ബി.ആര്‍. അംബേദ്ക്കറുടെ 134-ാം ജന്മവാര്‍ഷികത്തോടനുബന്ധിച്ചും നെഹ്രു യുവകേന്ദ്രയുടെ നേതൃത്വത്തില്‍ പദയാത്ര സംഘടിപ്പിക്കും. ഇന്നു രാവിലെ എട്ടിന് കവടിയാര്‍ വിവേകാനന്ദ പ്രതിമക്ക് മുന്നില്‍ നിന്നും ആരംഭിക്കുന്ന പദയാത്ര വെള്ളയമ്പലം അയ്യന്‍കാളി പ്രതിമക്ക് മുന്നില്‍ സമാപിക്കും. ഗവര്‍ണര്‍ രാജേന്ദ്ര വിശ്വനാഥ് അര്‍ലേര്‍ക്കര്‍ ഉദ്ഘാടനം ചെയ്യും. മന്ത്രി ജി.ആര്‍. അനില്‍ അധ്യക്ഷത വഹിക്കുന്ന ചടങ്ങില്‍ അഡ്വ. വി.കെ. പ്രശാന്ത് എംഎല്‍എ, മുന്‍ കേന്ദ്ര സഹമന്ത്രി വി. മുരളീധരന്‍, നെഹ്രു യുവകേന്ദ്ര സ്റ്റേറ്റ് ഡയറക്ടര്‍ എം.അനില്‍കുമാര്‍ തുടങ്ങിയവര്‍ പങ്കെടുക്കും.

ഡ്രോണിന്‍റെ സാന്നിധ്യം; പോലീസ് കേസെടുത്തു

പേരൂര്‍ക്കട: ഫോര്‍ട്ട് സ്റ്റേഷന്‍ പരിധിയില്‍ ഡ്രോണിന്‍റഎ സാന്നിധ്യം കണ്ടെത്തിയതുമായി ബന്ധപ്പെട്ട് പോലീസ് കേസെടുത്തു. കഴിഞ്ഞ ദിവസം രാത്രിയാണ് പത്മനാഭസ്വാമിക്ഷേത്രത്തിന്‍റെ കിഴക്കേനട ഭാഗത്ത് ഡ്രോണ്‍ കണ്ടെത്തിയത്. വേഗത്തില്‍ ഡ്രോണ്‍ കുളത്തിനു സമീപത്തുകൂടി കടന്നുപോകുകയായിരുന്നു. 60 അടി ഉയരത്തിലായിരുന്നു ഡ്രോണ്‍ പറന്നതെന്നു ഫോര്‍ട്ട് സിഐ ശിവകുമാര്‍ പറഞ്ഞു. പത്മനാഭസ്വാമിക്ഷേത്ര പരിസരം ഇത്തരം ഉപകരണങ്ങള്‍ ഉപയോഗിക്കുന്നതിന് നിയന്ത്രണമുള്ള സ്ഥലമാണ്. വിവാഹാവശ്യവുമായി ബന്ധപ്പെട്ടോ മറ്റോ ആണ് ഡ്രോണ്‍ ഉപയോഗിച്ചിട്ടുള്ളതെന്നാണ് കരുതുന്നത്. ഡ്രോണിന്‍റെ ഉറവിടം കണ്ടെത്താനുള്ള ശ്രമം പോലീസ് ഊര്‍ജ്ജിതമാക്കിയിട്ടുണ്ട്.

മഹേശ്വരം ശിവപാര്‍വതി ക്ഷേത്രത്തില്‍ വിഷു കണിയും കൈനീട്ടവും

പാറശാല: മഹേശ്വരം ശിവ പാര്‍വതി ക്ഷേത്രത്തില്‍ നാളെ വിഷുക്കണി ആചരിക്കും. ഇന്ന് രാത്രി അത്താഴപൂജയ്ക്കു ശേഷം ക്ഷേത്ര മേല്‍ശാന്തി കുമാര്‍ മഹേശ്വരവും മറ്റു കീഴ്ശാന്തി മാരും ചേര്‍ന്നു ശ്രീകോവിലിനു മുന്നിലുള്ള നമസ്‌കാര മണ്ഡപത്തില്‍ ഓട്ടു ഉരുളിയില്‍ കണിക്കോപ്പ് ഒരുക്കും. നാളെ പുലര്‍ച്ചെ ക്ഷേത്ര മഠാധിപതി സ്വാമി മഹേശ്വരാനന്ദ സരസ്വതിയുടെ സാനിധ്യത്തില്‍ ക്ഷേത്ര നടതുറന്ന് ശ്രീകോവിലില്‍ എത്തി മേല്‍ശാന്തി നാളികേരമുറിയില്‍ നെയ്ത്തിരി തെളിയിച്ചു ഒരുക്കിവച്ചു കണിക്കോപ്പുകള്‍ ഉയര്‍ത്തിപ്പിടിച്ചു ക്ഷേത്ര മഠാധിപതി ശിവപാര്‍വതിമാരെ കണികാണിക്കും. അതോടുകൂടി വിഷു കണി ദര്‍ശനത്തിനു തുടക്കമാകും. തുടര്‍ന്ന് ദര്‍ശനത്തിനെത്തുന്ന ഭക്ത ജനങ്ങള്‍ക്ക് ദീപാരാധനയ്ക്കു ശേഷം പൂജിച്ച നാണയ തുട്ടുകള്‍ വിഷു കൈനീട്ടമായി നല്‍കുമെന്നും ക്ഷേത്ര ട്രസ്റ്റ് കമ്മിറ്റി അറിയിച്ചു.

കരാട്ടേചാമ്പ്യൻഷിപ്പ്: ആറ്റിങ്ങൽ ജേതാക്കൾ

തിരുവനന്തപുരം: ജിമ്മി ജോർജ് ഇൻഡോർ സ്റ്റേഡിയത്തിൽ സംഘടിപ്പിച്ച പ്രഥമ കേരള സംസ്ഥാന തല ഓപ്പൺ കരാട്ടെ ചാമ്പ്യൻഷിപ്പിൽ ആറ്റിങ്ങൽ കരാട്ടെ ടീം ജേതാക്കൾ. എസ്കെഎ തിരുവന്തപുരം രണ്ടാം സ്ഥാനവും ഐഎസ് കെടി കോട്ടയം മൂന്നാം സ്ഥാനവും നേടി. കേരള ഒളിമ്പിക് അസോസിയേഷൻ പ്രസിഡന്‍റ് വി.സുനിൽ കുമാർ, കേരള കരാട്ടെ അസോസിയേഷൻ പ്രസിഡന്‍റ് എസ്. രഘു കുമാർ എന്നിവരുടെ സാന്നിധ്യത്തിൽ നടന്ന സമാപന സമ്മേളനത്തിൽ വിജയികൾക്കുള്ള പുരസ്‌കാരങ്ങൾ . പി. വിഷ്ണു രാജ് ഐഎസ് വിതരണം ചെയ്തു.

സൂപ്പർമാർക്കറ്റിലെ ഷെഡിൽ നിന്ന് 700 കിലോ ലഹരി വസ്തുക്കൾ പിടികൂടി

കൊല്ലം: കടയ്ക്കൽ - കുമ്മിൾ റോഡിലെ പനമ്പള്ളി സൂപ്പർ മാർക്കറ്റിലെ ഷെഡിൽ നിന്ന് 700 കിലോഗ്രാം നിരോധിത ലഹരി വസ്തുക്കൾ പിടികൂടി. ചടയമംഗലം എക്സൈസ് റേഞ്ച് ഇൻസ്പെക്‌ടർ രാജേഷിന്‍റെ നേതൃത്വത്തിലുള്ള സംഘം 11ന് രാത്രി 12ന് നടത്തിയ റെയ്ഡിലാണ് ഇവ പിടികൂടിയത്. ലഹരി വസ്തുക്കൾക്ക് വിപണിയിൽ 10 ലക്ഷം രൂപ വില വരും. കടയ്ക്കൽ മുക്കുന്നം സ്വദേശി സിയാദിന്‍റെ ഉടമസ്ഥതയിലുള്ളതാണ് സൂപ്പർമാർക്കറ്റ്. സിയാദിനെതിരേ മുൻപും സമാന കേസുകൾ ചടയമംഗലം എക്സൈസ് ഓഫീസിൽ രജിസ്റ്റർ ചെയ്തിട്ടുണ്ട്.സിയാദിനെ പിടികൂടാൻ സാധിച്ചില്ല. ഇയാൾ ഒളിവിലാണെന്ന് എക്സൈസ് ഉദ്യോഗസ്ഥർ പറഞ്ഞു. കടയ്ക്കൽ, കുമ്മിൾ മേഖലകളിൽ ചില്ലറ വില്പനക്കായി എത്തിച്ചതാണ് പിടികൂടിയ ലഹരി വസ്തുക്കൾ.കഴിഞ്ഞ ഒരു മാസത്തിനിടയിൽ ആയൂർ, കടയ്ക്കൽ, ഇട്ടിവ മേഖലകളിൽ നിന്നായി ഒരു ടണ്ണിലധികം നിരോധിത ലഹരി വസ്തുക്കളാണ് ചടയമംഗലം എക്സൈസ് സംഘം പിടികൂടിയത്. റെയ്ഡിൽ സിവിൽ എക്സൈസ് ഓഫീസർമാരായ സബീർ, കെ.ജി. ജയേഷ്, ശ്രേയസ് ഉമേഷ് എന്നിവരും പങ്കെടുത്തു.

എസ്‌കവേറ്റര്‍ കുളത്തില്‍ താഴ്ന്നു; ഡ്രൈവര്‍ തലനാരിഴയ്ക്ക് രക്ഷപ്പെട്ടു

പേരൂര്‍ക്കട: പാറക്കുളം വൃത്തിയാക്കാനായി തിരുവല്ലത്തു നിന്നു കൊണ്ടുവന്ന എസ്‌കവേറ്റര്‍ കുളത്തില്‍ താഴ്ന്നു, ഡ്രൈവര്‍ തലനാരിഴയ്ക്കു രക്ഷപ്പെട്ടു. തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സ തേടി. എസ്‌കവേറ്റര്‍ ഫയര്‍ഫോഴ്‌സിന്റെ സ്‌കൂബ ടീം എത്തി ക്രെയിനിന്‍റെ സഹായത്തോടെ ഉയര്‍ത്തിമാറ്റി. പേരൂര്‍ക്കട അടുപ്പുകൂട്ടാന്‍ പാറയ്ക്കു സമീപം ജലനിരപ്പില്‍ നിന്ന് 50 അടി താഴ്ചയുള്ള കുളത്തിലേക്കാണ് എസ്‌കവേറ്റര്‍ താഴ്ന്നുപോയത്. കുളത്തിലേക്കു വീണ ഡ്രൈവര്‍ വെള്ളം കുടിച്ചെങ്കിലും നീന്തി രക്ഷപ്പെടുകയായിരുന്നു. പാറക്കുളത്തിന്‍റെ ഒരു വശം വൃത്തിയാക്കുന്നതിനിടെ വെള്ളിയാഴ്ച വൈകുന്നേരമാണ് എസ്‌കവേറ്റര്‍ കുളത്തിലേക്കു വീണുപോയത്. വിവരം അറിയിച്ചതിനെത്തുടര്‍ന്ന് സ്‌കൂബ ടീം അംഗങ്ങളായ വിദ്യരാജ്, എസ്.പി. സജി, ദിനുമോന്‍, വിജിന്‍ എന്നിവരുടെ നേതൃത്വത്തിലുള്ള സംഘം ശനിയാഴ്ച രാവിലെ 11 മുതല്‍ 4 മണിക്കൂര്‍ പരിശ്രമിച്ചാണ് എസ്‌കവേറ്റര്‍ കുളത്തില്‍ നിന്നു പുറത്തെടുത്തത്.

ശബരി എക്സ്പ്രസിനു പകരം തിരുവനന്തപുരം സെൻട്രലിൽനിന്ന് പുതിയ ട്രെയിൻ വേണമെന്ന്

തിരുവനന്തപുരം: രാവിലെ 6.40 ന് തിരുവനന്തപുരം സെൻട്രൽ സ്റ്റേഷനിൽ നിന്ന് തിരിക്കുന്ന തിരുവനന്തപുരം - സെക്കന്ദരാബാദ് ശബരി എക്സ്പ്രസിന്‍റെ സമയമാറ്റവും സ്റ്റേഷൻ മാറ്റവും പരിഗണിച്ച് രാവിലെ അതേ സമയത്ത് തന്നെ പുതിയ ട്രെയിൻ സർവീസ് ആരംഭിക്കണമെന്ന് റെയിൽവേ പാസഞ്ചേഴ്സ് അസോസിയേഷൻ സംസ്ഥാന പ്രസിഡന്‍റ് പരവൂർ സജീബ് ആവശ്യപ്പെട്ടു. കൊല്ലം ,കായംകുളം തുടങ്ങിയ സ്റ്റേഷനുകളിൽ ഇറങ്ങുന്ന ധാരാളം യാത്രക്കാർ ശബരി എക്പ്രസിലാണ് യാത്ര ചെയ്യുന്നുണ്ട് . കോട്ടയം വരെയുള്ള സ്ഥിരം യാത്രക്കാർക്ക് വലിയ ബുദ്ധിമുട്ടാണ് വരാൻ പോകുന്നത് . തിരുവനന്തപുരം സെൻട്രലിനു പകരം കൊച്ചുവേളിയിൽ (തിരുവനന്തപുരം നോർത്ത് ) നിന്ന് വൈകുന്നേരം 5.30ന് പുറപ്പെടാനും സൂപ്പർ ഫാസ്റ്റ് ട്രെയിനാക്കാനും സെക്കന്ദ്രാബാദിന് പകരം ചേർലപള്ളി വരെയാക്കാനും റെൽയിൽവേ നടപടികൾ ആരംഭിച്ചു കഴിഞ്ഞു. രാവിലെ ശബരി എക്സ്പ്രസിന്‍റെ സമയത്ത് പുതിയ ട്രെയിൻ സർവ്വീസ് ആരംഭിച് സ്ഥിര യാത്രക്കാരുടെ യാത്രാക്ലേശം പരിഹരിക്കണമെന്ന് റെയിൽവേ പാസഞ്ചേഴ്സ് അസോസിയേഷൻ ആവശ്യപ്പെട്ടു.

തൊഴിലാളിവിരുദ്ധ സർക്കാരുകൾ നയം മാറ്റണം: കെ.മുരളീധരൻ

നേമം : കേന്ദ്രം - സംസ്ഥാന സർക്കാരുകൾ തൊഴിലാളി വിരുദ്ധ നടപടികൾ അവസാനിപ്പിക്കണമെന്ന് കെ.മുരളീധരന്‍‌. കേരള ആര്‍ട്ടിസാന്‍സ് ആന്‍ഡ് സ്‌കില്‍ഡ് വര്‍ക്കേഴ്‌സ് ഫെഡറേഷന്‍ ഐഎന്‌ടിയുസി സംസ്ഥാന സമ്മേളനം നേമത്ത് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സമര രംഗത്തുള്ള ആശാവർക്കർമാരെ മാനസികമായി സർക്കാർ പിഡീപ്പിക്കുകയാണെന്ന് കെ.മുരളീധരന്‍ പറഞ്ഞു. ഫെഡറേഷന്‍ സംസ്ഥാന പ്രസിഡന്‍റ് പീതാംബരകുറുപ്പ് അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി പൂവട വിജയന്‍, പനവിള രാജശേഖരന്‍, ജില്ല പ്രസിഡന്‍റ് കല്ലിയൂര്‍ മുരളി, രാധാകൃഷ്ണന്‍ ചാത്തന്നൂര്‍, എന്‍‌.കെ. നകുലന്‍, നേമം രാജന്‍ തുടങ്ങിയവര്‍ പങ്കെടുത്തു.

ചുമട്ടു തൊഴിലാളി യൂണിയൻ ജില്ലാ സമ്മേളനം നാളെ മുതൽ 16 വരെ

തിരുവനന്തപുരം: ഹെഡ്‌ലോഡ് ആൻഡ് ജനറൽ വർക്കേഴ്സ് യൂണിയൻ (സിഐടിയു) ജില്ലാ സമ്മേളനം നാളെ മുതൽ 16 വരെ നെയ്യാറ്റിൻകരയിൽ നടക്കും. നാളെ രാവിലെ എട്ടിന് മെഡിക്കൽ കോളജ് ആശുപത്രിയിൽ രക്തദാന ക്യാന്പോടെ സമ്മേളനത്തിനു തുടക്കമാകുമെന്നു പ്രസിഡന്‍റ് സി. ജയൻബാബുവും ജനറൽ സെക്രട്ടറി എൻ. സുന്ദരംപിള്ളയും പത്രസമ്മേളനത്തിൽ അറിയിച്ചു. രക്തദാന ക്യാന്പ് സിഐടിയു സംസ്ഥാന സെക്രട്ടറി കെ.എസ്. സുനിൽകുമാർ ഉദ്ഘാടനം ചെയ്യും. യന്ത്രവത്കരണം, വൻകിട മാളുകൾ, ഓണ്‍ലൈൻ കച്ചവടം, പ്രത്യേക സാന്പത്തിക മേഖല തുടങ്ങിയവ മൂലം തൊഴിലാളികൾക്കു ജോലി നഷ്ടമാകുകയാണെന്ന് അവർ പറഞ്ഞു. 15നു മാരായമുട്ടം രക്തസാക്ഷി ചെല്ലപ്പൻപിള്ളയുടെ ബലി കുടീരത്തിൽ നിന്ന് കൊടിമരജാഥയും എൻ.പി. ശെൽവന്‍റെ സ്മൃതി മണ്ഡപത്തിൽ നിന്ന് പതാക ജാഥയും സമ്മേളന നഗരിയിൽ എത്തും. 16നു രാവിലെ 10ന് നെയ്യാറ്റിൻകര മൂന്നുകല്ലിൻമൂട് ഡോ.ജി.ആർ. കൾച്ചറൽ സെന്‍ററിൽ നടക്കുന്ന പ്രതിനിധി സമ്മേളനം മന്ത്രി വി. ശിവൻകുട്ടി ഉദ്ഘാടനം ചെയ്യും. പ്രസിഡന്‍റ് സി. ജയൻബാബു അധ്യക്ഷത വഹിക്കും.

പെരുന്പഴുതൂര്‍ ജംഗ്ഷന്‍ വികസനം; രണ്ടു പദ്ധതികളുടെ നിര്‍മാണോദ്ഘാടനം നാളെ

നെയ്യാറ്റിന്‍കര : പെരുന്പഴുതൂര്‍ ജംഗ്ഷന്‍ വികസനവുമായി ബന്ധപ്പെട്ട് രണ്ടു പ്രധാന പദ്ധതികളുടെ നിര്‍മാണോദ്ഘാടനം നാളെ നടക്കും. വൈകുന്നേരം 3.30 ന് അയണിയറത്തലയിലെ നഗരസഭ ഭൂമിയില്‍ ബഡ്സ് സ്കൂളിന്‍റെയും നാലിന് പെരുന്പഴുതൂര്‍ ജംഗ്ഷനില്‍ ഓപ്പണ്‍ എയര്‍ ഓഡിറ്റോറിയത്തിന്‍റെയും നിര്‍മാണോദ്ഘാടനം ചെയര്‍മാന്‍ പി.കെ. രാജമോഹനന്‍ നിര്‍വഹിക്കും. ഗ്രാമപഞ്ചായത്തായിരുന്ന പെരുന്പഴുതൂര്‍ നെയ്യാറ്റിന്‍കര നഗരസഭയോട് കൂട്ടിച്ചേര്‍ക്കപ്പെട്ടതു മുതല്‍ ഉയരുന്ന പ്രധാന ആവശ്യമാണ് പെരുന്പഴുതൂര്‍ ജംഗ്ഷന്‍ വികസനം. ജംഗ്ഷന്‍ വികസനത്തിന്‍റെ ആദ്യപടി എന്ന നിലയിൽ ഓപ്പണ്‍ എയര്‍ ഓഡിറ്റോറിയം, ബഡ്സ് സ്കൂള്‍ എന്നിവയുടെ നിര്‍മാണോദ്ഘാടനം നടത്തുന്നത്. ഭിന്നശേഷിക്കാരായി മാറിയ വ്യക്തികളെ സമൂഹത്തിന്‍റെ മുഖ്യധാരയിൽ കൊണ്ടു വരുന്നതിന് 58 ലക്ഷം രൂപ ചെലവഴിച്ച് പെരുമ്പഴുതൂരിലെ നഗരസഭയുടെ ഭൂമിയിൽ ബഡ്‌സ് സ്‌കൂൾ പണി കഴിപ്പിക്കുന്നതിനുള്ള ടെണ്ടർ നടപടികൾ പൂർത്തീകരിച്ച വിവരം 2025- 2026 നഗരസഭ ബജറ്റില്‍ തന്നെ പരാമര്‍ശിച്ചിരുന്നു. ഓപ്പണ്‍ എയര്‍ ഓഡിറ്റോറിയം നിര്‍മാണത്തിനായി 29 ലക്ഷം രൂപയാണ് ബജറ്റില്‍ ഉള്‍പ്പെടുത്തിയിട്ടുള്ളത്. പെരുമ്പഴുതൂർ മാർക്കറ്റ് വികസനത്തിന്‍റെ ഭാഗമായി മാർക്കറ്റിന്‍റെ മുനനിൽ പൊതുജനങ്ങൾക്കു വേണ്ടി നിർമിക്കുന്ന പാർക്ക് വയോജന സമൂഹത്തിനു കൂടെ ഉപയോഗിക്കുവാൻ കഴിയുന്ന തരത്തിൽ രൂപകല്‌പന ചെയ്‌ത് ദൃശ്യശ്രവണ സംവിധാനത്തോടു കൂടി യാഥാര്‍ഥ്യമാക്കുന്നതിന് 15 ലക്ഷം രൂപയും ബജറ്റിൽ നീക്കി വച്ചിട്ടുണ്ട്.

ഗൃഹനാഥനെ കല്ലുകൊണ്ടിടിച്ച മൂന്നംഗസംഘം പിടിയില്‍

പേരൂര്‍ക്കട: ഗൃഹനാഥനെ കല്ലുകൊണ്ടിടിച്ച് പരിക്കേല്‍പ്പിച്ച മൂന്നംഗസംഘത്തെ പോലീസ് പിടികൂടി. പേരൂര്‍ക്കട ഹാര്‍വ്വിപുരം സ്വദേശികളായ ഉണ്ണിക്കുട്ടന്‍ എന്നുവിളിക്കുന്ന ആദിത്യന്‍ (19), അഖില്‍ (21), ജോബി (19) എന്നിവരാണ് പിടിയിലായത്. വെള്ളിയാഴ്ച വൈകുന്നേരം ആറോടുകൂടി ഹാര്‍വ്വിപുരത്തായിരുന്നു കേസിന്നാസ്പദമായ സംഭവം. പ്രദേശവാസിയായ ജോയി (58) യെയാണ് സംഘം മര്‍ധിച്ചത്.. കാലിനു പൊട്ടലേറ്റ ജോയി പേരൂര്‍ക്കട ഗവ. ആശുപത്രിയില്‍ ചികിത്സയിലാണ്. ആദിത്യന്‍ ക്രിമിനല്‍ക്കേസില്‍ പ്രതിയാണ്. പ്രതികളെ കോടതി റിമാന്‍ഡ് ചെയ്തു.

കുത്തുകേസ്; ഒന്നാംപ്രതി പിടിയില്‍

ഉള്ളൂർ: ഡിവൈഎഫ്ഐ പ്രവര്‍ത്തകനെ കുത്തിപ്പരിക്കേല്‍പ്പിച്ച സംഭവത്തില്‍ ഒളിവിലായിരുന്ന ഒന്നാം പ്രതി പിടിയില്‍‌. കുമാരപുരം ചെന്നിലോട് സ്വദേശി ചന്തു എന്നുവിളിക്കുന്ന അനൂപ് (30) ആണ് പിടിയിലായത്. കോയമ്പത്തൂരിലെ ഗണപതിയില്‍ നിന്നാണ് മെഡിക്കല്‍കോളജ് സിഐ ബി.എം. ഷാഫിയുടെ നേതൃത്വത്തിലുള്ള സംഘം പ്രതിയെപിടികൂടിയത്. പാത്രക്കടയില്‍ തൊഴിലാളിയായി ഒളിവില്‍ താമസിക്കുകയായിരുന്നു പ്രതി. മാര്‍ച്ച് 27ന് രാത്രി 10 ഓടുകൂടി കുമാരപുരം സ്വദേശിയും ഡിവൈഎഫ്ഐ യൂണിറ്റ് സെക്രട്ടറിയുമായ പ്രവീണിനെ (40) യാണ് അനൂപും ബൈജുവും ജിതിനും ഉള്‍പ്പെട്ട സംഘം ചെന്നിലോട് ഭാഗത്തുവച്ച് കുത്തിപ്പരിക്കേല്‍പ്പിച്ചത്. മദ്യപാനം ചോദ്യം ചെയ്തതിലുള്ള വിരോധമാണ് ആക്രമണത്തിന് കാരണമായത്. കൂട്ടുപ്രതികളായ ബൈജു, ജിതിന്‍ എന്നിവര്‍ റിമാന്‍ഡില്‍ക്കഴിഞ്ഞുവരികയാണ്.

മാലിന്യ സംസ്‌കരണം : കേരളം രാജ്യത്തിന് മാതൃകയെന്ന് ഗവര്‍ണര്‍

തിരുവനന്തപുരം: മാലിന്യ സംസ്‌കരണത്തില്‍ കേരളം രാജ്യത്തിനുതന്നെ മാതൃകയാണെന്നും കേരളീയനെന്ന് അറിയപ്പെടുന്നതില്‍ അഭിമാനിക്കുന്നുവെന്നും ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍. വൃത്തി-2025 കോണ്‍ക്ലേവിന്‍റെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിലെ മാലിന്യ സംസ്‌കരണ പ്രവര്‍ത്തനങ്ങളുടെ വിജയത്തിന്‍റെ പ്രധാന കാരണം ജനങ്ങളുടെ പങ്കാളിത്തമാണ്. സര്‍ക്കാരും ജനങ്ങളും ഉദ്യോഗസ്ഥരും ഒരുമിച്ചു നേടിയ വിജയം മുഴുവന്‍ കേരളീയരുടേയും വിജയമാണ്. ഇപ്പോഴത്തെ പ്രവര്‍ത്തനങ്ങളിലൂടെ നേടിയെടുത്ത വൃത്തി സ്ഥിരമായ ഒന്നല്ലെന്നും വൃത്തി ഒരു ശീലമായി മാറണമെന്നും അദ്ദേഹം പറഞ്ഞു. എന്‍റെ മാലിന്യം എന്‍റെ ഉത്തരവാദിത്തമാണെന്ന ബോധമുണ്ടാകണം. ഉറവിട കേന്ദ്രീകൃതമായ വികേന്ദ്രീകൃത മാലിന്യ സംസ്‌കരണ സംവിധാനങ്ങള്‍ വ്യാപകമാക്കണം. അതിലൂടെ വൃത്തിശീലം ജനജീവിതത്തിന്‍റെ ഭാഗമാക്കാനും അടുത്ത തലമുറയ്ക്ക് പകര്‍ന്നു നല്‍കാനും സാധിക്കുമെന്നും അദ്ദേഹം പറഞ്ഞു. മാലിന്യ സംസ്‌കരണ പ്ലാന്‍റുകളുമായി ബന്ധപ്പെട്ട എതിര്‍പ്പുകളില്‍ സമവായമുണ്ടാക്കാനായി എന്നതാണ് വൃത്തി-2025 കോണ്‍ക്ലേവിന്‍റെ ഏറ്റവും വലിയ നേട്ടമെന്നും ഗവര്‍ണര്‍ പറഞ്ഞു. സ്വച്ഛതയും വൃത്തിയുമെന്നത് ഇന്ന് ഇന്ത്യയിലൊട്ടാകെ ഒരു മുഖ്യ അജണ്ടയാണെന്നും ഗവര്‍ണര്‍ ചൂണ്ടിക്കാട്ടി. കേരളം വികേന്ദ്രീകൃതവും ജനകീയവുമായ മാലിന്യസംസ്കരണ മോഡൽ സൃഷ്ടിക്കുകയാണെന്ന് തദ്ദേശ സ്വയംഭരണ മന്ത്രി എം. ബി. രാജേഷ് അഭിപ്രായപ്പെട്ടു . മാലിന്യസംസ്കരണത്തിന്‍റെ ഈ കേരള മോഡൽ ഇതിനകം മറ്റ് സംസ്ഥാനങ്ങളെ സ്വാധീനിക്കുന്നുണ്ട്. തമിഴ്നാട് സംസ്ഥാനം കേരള മാതൃകയിൽ ക്ലീൻ തമിഴ്‌നാട് മിഷൻ ആരംഭിച്ചതായും അദ്ദേഹം പറഞ്ഞു. അടിത്തട്ട് മുതൽ തുടങ്ങി മുകൾതട്ട് വരെ എത്തിയ ഒരു ജനകീയ യത്നത്തിന്‍റെ ഒടുവിലാണ് വൃത്തി 2025 കോൺക്ലേവ് നടന്നത്. കേരളത്തിലെ മാലിന്യ സംസ്‌കരണ പ്രവര്‍ത്തനങ്ങള്‍ സംബന്ധിച്ച വിഷന്‍ ഡോക്യുമെന്‍റ് ഗവര്‍ണര്‍ പ്രകാശനം ചെയ്തു. മാലിന്യ സംസ്‌കരണ പ്രവര്‍ത്തനങ്ങളില്‍ മികച്ച പ്രകടനം കാഴ്ചവച്ച തദ്ദേശ സ്വയംഭരണ സ്ഥാപനങ്ങള്‍ക്കുള്ള അവാര്‍ഡുകള്‍ ഗവര്‍ണര്‍ സമ്മാനിച്ചു. സമാപന സമ്മേളനത്തില്‍ ്പു മന്ത്രി എം.ബി. രാജേഷ് അധ്യക്ഷത വഹിച്ചു. വി.കെ. പ്രശാന്ത് എംഎല്‍എ, ചീഫ് സെക്രട്ടറി ശാരദ മുരളീധരന്‍, തദ്ദേശ സ്വയംഭരണ വകുപ്പ് സ്‌പെഷ്യല്‍ സെക്രട്ടറി അനുപമ ടി.വി. തുടങ്ങിയവര്‍ പങ്കെടുത്തു.

സർവീസ് സ്റ്റേഷൻ തൊഴിലാളി മരിച്ച നിലയിൽ

നെടുമങ്ങാട് : മധ്യവയസ്കനെ പുരയിടത്തിൽ മരിച്ച നിലയിൽ കണ്ടെത്തി. വാളിക്കോട് കൊപ്പം കുന്നത്തു വീട്ടിൽ അശോകൻ(56)നെയാണ് വാളിക്കോട് കിള്ളിയാറിന് കരയിലുള്ള ഒരു പുരയിടത്തിൽ മരിച്ചനിലയിൽ കണ്ടെത്തിയത്. സമീപത്തെ ഒരു സർവീസ് സ്റ്റേഷനിലെ തൊഴിലാളികളാണ് മൃതദേഹം കണ്ടത്. മൃതദേഹത്തിന് രണ്ട് ദിവസത്തിലേറെ പഴക്കമുണ്ട്. സമീപത്തുള്ള പ്ലാവിന്‍റെ ചുവട്ടിലാണ് മൃതദേഹം കിടന്നിരുന്നത്. അവിവാഹിതനാണ് അശോകൻ. നെടുമങ്ങാട് പോലീസ് മേൽ നടപടികൾ സ്വീകരിച്ചു.

ശംഖുമുഖത്ത് യുവാവ് വാഹനാപകടത്തില്‍ മരിച്ചു

വലിയതുറ: ശംഖുമുഖം വിമാനത്താവളത്തിലേക്കുളള റോഡില്‍ യുവാവ് സഞ്ചരിച്ചിരുന്ന ബൈക്ക് മുന്നില്‍ പോകുകയായിരുന്ന കാറിന്‍റെ പുറകില്‍ ഇടിച്ച് ബൈക്ക് യാത്രികനായ യുവാവ് മരിച്ചു. പൂന്തുറ മാണിക്കവിളാകം ബദരിയാ നഗര്‍ സ്വദേശി സയിദ് അലി (45) ആണ് മരിച്ചത്. കഴിഞ്ഞ ദിവസം വൈകുന്നേരം ആറ് മണിയോടുകൂടിയായിരുന്നു അപകടം. അപകടത്തില്‍ ബൈക്കില്‍ നിന്നും റോഡിലേയ്ക്ക് തെറിച്ചു വീണ സയിദ് അലിയുടെ തലയ്ക്ക് ഗുരുതരമായി പരിക്കേറ്റിരുന്നു. നാട്ടുകാരുടെയും വലിയതുറ പോലീസിന്‍റെയും നേതൃത്വത്തില്‍ മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. മൃതദേഹം മെഡിക്കല്‍ കോളജ് ആശുപത്രി മോര്‍ച്ചറിയില്‍. വലിയതുറ പോലീസ് കേസെടുത്തു.

ഒറ്റഞാർ നെൽകൃഷി പരിശീലനം

പാറശാല: രൂപതയുടെ സോഷ്യൽ സർവീസ് പ്രസ്ഥാനമായ ക്ഷേമയുടെ നേതൃത്വത്തിൽ, ഇൻഫാമിന്‍റെ സഹകരണത്തോടെ, ചെങ്കൽ ഗപഞ്ചായത്തിലെ നെറ്റിയൂർ വാർഡിലെ, കാരിയോട് കരിക്കകരി ഏലായിൽ ഒറ്റഞാർ നെൽകൃഷി പരിശീലനം സംഘടിപ്പിച്ചു. നൂതന രീതിയിലുള്ള നെൽകൃഷി രീതികളെ പറ്റി ക്ഷേമ ഡയറക്ടർ ഫാ. ജോർജ് വെട്ടിക്കാട്ടിൽ ക്ലാസ് എടുത്തു. ക്ഷേമ അസിസ്റ്റന്‍റ് ഡയറക്ടർ ഫാ. ജോൺ പുന്നാറ, ഇൻഫാം കാർഷിക ജില്ലാ പ്രസിഡന്‍റ് ധർമരാജ്, സംസ്ഥാന സമിതി അംഗം സനൽ, ക്ഷേമ കോ-ഓർഡിനേറ്റർമാ രായ ജോയ് ഫ്രാൻസ് മുല്ലശേരി, സാലി, ക്ഷേമ യൂണിറ്റ് സെക്രട്ടറിമാർ, നെൽകർഷകർ, കർഷകസമിതി സെക്രട്ടറി മണിയൻ എന്നിവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]