വെള്ളക്കെട്ടിലായ ഞാറവിള റോഡ്
വിഴിഞ്ഞം : തെന്നൂർകോണം ഞാറവിള - കരയടിവിള റോഡിൽ അടിക്കടി ഉണ്ടാകുന്ന വെള്ളക്കെട്ടിൽ നിന്നും കരകയറാനാകാതെ പ്രദേശവാസികൾ. രണ്ടു ദിവസമായി പെയ്യുന്ന കനത്ത മഴ റോഡിലെ വെള്ളക്കെട്ട് രൂക്ഷമാക്കി.
നവീകരണത്തിന്റെ ഭാഗമായി ഇന്റർലോക്ക് പാകി നിർമിച്ച റോഡാണ് ജനങ്ങളുടെ ദുരിതത്തിന് കാരണമായത്. ഇന്റർലോക്കിട്ട റോഡിൽ വെള്ളം കെട്ടാതിരിക്കാൻ രണ്ട് മഴക്കുഴികൾ സ്ഥാപിച്ചെങ്കിലും വെള്ളക്കെട്ടിന് പരിഹാരമായില്ലെന്ന് നാട്ടുകാർ പറയുന്നു. ഇതിന് പിന്നാലെ പ്രദേശത്ത് ജലവിതരണ പൈപ്പ് സ്ഥാപിക്കാൻ റോഡിൽ കുഴിയെടുത്ത വാട്ടർ അതോറിറ്റി പൈപ്പ് സ്ഥാപിക്കുകയോ വെട്ടി പൊളിച്ച റോഡിലെ കുഴി അടയ്ക്കുകയോ ചെയ്തില്ലെന്ന് പ്രദേശവാസികൾ പറയുന്നു.
ശക്തമായ മഴയിൽ വെള്ളക്കെട്ട് രൂപപ്പെട്ടതോടെ കാൽനട യാത്രയും ദുസഹമായി.ആയിരത്തോളം കുടുംബങ്ങളാണ് അധികൃതരുടെ അനാസ്ഥയും വെള്ളക്കെട്ടും കാരണം ദുരിതമനുഭവിക്കുന്നത്.
Tags : Local News nattuvishesham Trivandrum