മണിപ്പുരിൽ രണ്ടു ബിഹാറി തൊഴിലാളികൾ വെടിയേറ്റു മരിച്ചു
Monday, December 16, 2024 2:35 AM IST
ഇംഫാല്‍: കലാപഭൂമിയായ മണിപ്പുരില്‍ ബിഹാറില്‍നിന്നുള്ള രണ്ടു തൊഴിലാളികള്‍ വെടിയേറ്റു മരിച്ചു. കക്ചിംഗ്- വാബാഗൈ റോഡിലെ കെയ്‌റാക്കിലെ പഞ്ചായത്ത് ഓഫീസിനു സമീപം ശനിയാഴ്ച അജ്ഞാതസംഘം തൊഴിലാളികൾക്കുനേരേ വെടിവയ്ക്കുകയായിരുന്നു.
മെയ്‌തെയ് വിഭാഗക്കാര്‍ക്ക് ആധിപത്യമുള്ള മേഖലയിലുണ്ടായ ആക്രമണത്തിൽ ബിഹാറിലെ ഗോപാല്‍ഗഞ്ച് സ്വദേശികളായ സുനലാല്‍ കുമാര്‍ (18), ദശരത് കുമാര്‍ (17) എന്നിവരാണ് കൊല്ലപ്പെട്ടത്. നിർമാണതൊഴിലാളികളായ ഇരുവരും ജോലിയ്ക്കുശേഷം വാടകവീട്ടിലേക്ക് മടങ്ങുന്നതിനിടെയാണ് അക്രമികളുടെ മുന്നിൽപ്പെട്ടത്.
സംഭവത്തിൽ അതീവദുഃഖം രേഖപ്പെടുത്തുന്നതായി പറഞ്ഞ ബിഹാർ മുഖ്യമന്ത്രി നിതീഷ് കുമാർ ഇരുവരുടേയും ആശ്രിതർക്കു രണ്ടുലക്ഷംരൂപ വീതം സഹായധനം നല്കുമെന്നും അറിയിച്ചു.