തൊടുപുഴ: താലൂക്കിന്റെ ഭരണ സിരാകേന്ദ്രമായ തൊടുപുഴ മിനി സിവിൽ സ്റ്റേഷൻ വളപ്പിൽ സ്ഥിതി ചെയ്യുന്ന ബോട്ടിൽ ബൂത്തും പരിസരവും ക്ലീനായി. ഇവിടെ മാലിന്യം കുമിഞ്ഞു കൂടിയതിന്റെ വാർത്തയും ചിത്രവും ദീപികയിൽ പ്രസിദ്ധീകരിച്ചിരുന്നു.
ഇതേത്തുടർന്നാണ് തഹസിൽദാർ ഇടപെട്ട് മാലിന്യം നീക്കം ചെയ്യിച്ചത്. തഹസിൽദാർ അറിയിച്ചതിനെത്തുടർന്ന് നഗരസഭയിലെ ഹരിത കർമസേനയെത്തി മാലിന്യം ഇവിടെനിന്നു നീക്കം ചെയ്തു. ഉയർന്ന ഉദ്യോഗസ്ഥരുൾപ്പടെ ജോലി ചെയ്യുന്ന സിവിൽ സ്റ്റേഷൻ വളപ്പിൽ മാലിന്യം കുമിഞ്ഞു കിടക്കുന്നത് ഏറെ ആക്ഷേപത്തിനിടയാക്കിയിരുന്നു.