നെടുങ്കണ്ടം: നെടുങ്കണ്ടത്തിന് സമീപം വ്യാപാര സ്ഥാപനത്തില്‍ തീപിടിത്തം. രണ്ട് ലക്ഷത്തിലധികം രൂപയുടെ നാശനഷ്ടം. നെടുങ്കണ്ടം - താന്നിമൂട് റോഡില്‍ പാറയില്‍ അമ്പലത്തിന് സമീപമുള്ള വ്യാപാര സ്ഥാപനത്തിലാണ് ഇന്നലെ പുലര്‍ച്ചെ അഞ്ചോടെ തീപിടിത്തം ഉണ്ടായത്. നെടുങ്കണ്ടം കടമ്പാട്ട് അബ്ദുള്‍ കരീമിന്‍റെ ഉടമസ്ഥതയിലുള്ളതായിരുന്നു വ്യാപാര സ്ഥാപനം.
തീപിടിത്തത്തില്‍ കടയിലുണ്ടായിരുന്ന 14,500 രൂപ, പാസ്‌പോര്‍ട്ട്, വാഹന സംബന്ധമായ രേഖകള്‍, സ്‌കൂള്‍ സര്‍ട്ടിഫിക്കറ്റ്, ഗ്യാസ് ബുക്ക്, ചെക്കുബുക്ക് എന്നിവയും പലചരക്ക് സാധനങ്ങളും, ഒരു ഫ്രിഡ്ജും കത്തിനശിച്ചു. സ്ഥാപനത്തില്‍നിന്നും പുക ഉയരുന്നതുകണ്ട പ്രദേശവാസികള്‍ അബ്ദുള്‍ കരീമിനെ വിളിച്ച് വിവരം അറിയിക്കുകയായിരുന്നു. തുടര്‍ന്ന് സ്ഥലത്തെത്തിയ ഫയര്‍ ഫോഴ്‌സ് ഉദ്യോഗസ്ഥര് തീ കെടുത്തി. ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമായതെന്നാണ് പ്രാഥമിക നിഗമനം.