ADVERTISEMENT

ADVERTISEMENT

ജില്ലാ ലൈബ്രറി കൗണ്‍സില്‍: ബാബു കെ. ജോര്‍ജ് പ്രസിഡന്‍റ്, ബി. ഹരികൃഷ്ണന്‍ സെക്രട്ടറി

കോട്ടയം: ജില്ലാ ലൈബ്രറി കൗണ്‍സില്‍ പ്രസിഡന്‍റായി പാലാ മേവട സുഭാഷ് ലൈബ്രറിയിലെ ബാബു കെ. ജോര്‍ജിനെയും പനമറ്റം ദേശീയവായനശാലയിലെ ബി. ഹരികൃഷ്ണനെയും തെരഞ്ഞെടുത്തു.

ജില്ലാ വിദ്യാഭ്യാസ ഡെപ്യൂട്ടി ഡയറക്ടറായിരുന്നു റിട്ടേണിംഗ് ഓഫീസര്‍ വൈസ് പ്രസിഡന്‍റായി വൈക്കം പി. കൃഷ്ണപിള്ള സ്മാരക ലൈബ്രറിയിലെ കെ.ആര്‍. ബീനാകുമാരിയെയും ജോയിന്‍റ് സെക്രട്ടറിയായി പള്ളം ടാഗോര്‍ ലൈബ്രറിയിലെ ബി. ശശികുമാറിനെയും തെരഞ്ഞെടുത്തു. യോഗത്തില്‍ എന്‍. ചന്ദ്രബാബു അധ്യക്ഷത വഹിച്ചു.

ADVERTISEMENT

സ്‌കൂള്‍ ബിരിയാണി എത്രനാൾ ഇങ്ങനെ വിളന്പും‍?

കോട്ടയം: സര്‍ക്കാര്‍ ഉത്തരവിട്ട വിഭവസമൃദ്ധമായ ഉച്ചഭക്ഷണത്തിന് ഇന്നലെ തുടക്കമായെങ്കിലും സദ്യ ഒരാഴ്ചപോലും നീളില്ലെന്ന് പ്രധാനാധ്യാപകര്‍. സാമ്പാറും തോരനും കൂട്ടിയുള്ള ഊണ് കൊടുക്കാന്‍ സാധിക്കാത്ത സാഹചര്യത്തില്‍ കിലോയ്ക്ക് 100 രൂപ വിലയുള്ള അരിയുടെ ബിരിയാണിയും ഫ്രൈഡ് റൈസും തേങ്ങാച്ചോറുമൊന്നും മുന്നോട്ടുപോകില്ല. സര്‍ക്കാര്‍ ഒരു കുട്ടിക്ക് പത്തു രൂപ നല്‍കിയാലൊന്നും പുതിയ മെനുവിന്‍റെ പത്തിലൊന്ന് ചെലവ് വരില്ല. ഒരു ചായയ്ക്കുപോലും കടകളില്‍വരെ 12-15 രൂപയാണ്. ദിവസം 600 രൂപ വേതനത്തിന് പാചകം നടത്താന്‍ പറ്റില്ലെന്നാണ് പാചകത്തൊഴിലാളികളുടെ നിലപാട്. കുട്ടികള്‍ 250ല്‍ കൂടുതലാണെങ്കില്‍ ഒരാള്‍ക്ക് തനിയെ പാചകം ചെയ്യാനാകില്ല. ലഭിക്കുന്ന തുച്ഛമായ കൂലിയില്‍നിന്ന് പകുതി നല്‍കി മറ്റൊരു തൊഴിലാളിയേക്കൂടി കൂട്ടിയാണ് പലരും പാചകം നടത്തുന്നത്. ഒരു ദിവസം വെജിറ്റബിള്‍ ഫ്രൈഡ് റൈസ്, ലെമണ്‍ റൈസ്, വെജിറ്റബിള്‍ ബിരിയാണി, ടൊമാറ്റോ റൈസ്, തേങ്ങാ റൈസ് എന്നിവയില്‍ ഒരു ഇനം ഉണ്ടാക്കാനാണ് നിര്‍ദേശം. ഇതിനൊപ്പം പുതിന, ഇഞ്ചി, നെല്ലിക്ക, പച്ചമാങ്ങ എന്നിവയുടെ ചമ്മന്തിയും വേണം. മറ്റുള്ള ദിവസങ്ങളില്‍ റാഗിയോ ചെറുധാന്യങ്ങളോ ഉപയോഗിച്ചുള്ള വിഭവവും വേണം.ഇക്കൊല്ലം മുതല്‍ പ്രീപ്രൈമറി മുതല്‍ അഞ്ചാം ക്ലാസുവരെ ഒരാള്‍ക്ക് 6.78 രൂപയും എട്ടാം ക്ലാസ് വരെ 10.17 രൂപയുമാണ് ലഭിക്കുക. പുതിയ മെനു നടപ്പാക്കാന്‍ തദ്ദേശസ്ഥാപനങ്ങളെയോ സന്നദ്ധസംഘടനകളെയോ സമീപിക്കാനാണ് സര്‍ക്കാര്‍ നിര്‍ദേശം. മുരിങ്ങയില, ചക്കക്കുരു, കപ്പളങ്ങ എന്നിവ നാട്ടില്‍നിന്നോ സ്‌കൂള്‍വളപ്പില്‍നിന്നോ ശേഖരിക്കാന്‍ നിര്‍ദേശമുണ്ട്. സര്‍ക്കാര്‍ ഫണ്ട് ലഭിച്ചാലും ഇല്ലെങ്കിലും വിഭവങ്ങള്‍ വാങ്ങി നല്‍കേണ്ട ഉത്തരവാദിത്വം പ്രഥമാധ്യാപകര്‍ക്കാണ്. തേങ്ങാ, വെളിച്ചെണ്ണ വില വര്‍ധിച്ചതിനാല്‍ ഇവ വാങ്ങുക ഭാരിച്ച ബാധ്യതയാണ്. അണ്‍ ഇക്കണോമിക് സ്‌കൂളുകളില്‍ ഒന്നോ രണ്ടോ അധ്യാപകര്‍ മാത്രമാണ് സ്ഥിരം നിയമനക്കാര്‍. ‌500 കുട്ടികള്‍ വരെയുള്ള സ്‌കൂളുകളില്‍ ഒരു പാചകത്തൊഴിലാളിക്കുള്ള വേതനമാണ് സര്‍ക്കാര്‍ നല്‍കുന്നത്. ചോറും കറിയും തയാറാക്കേണ്ടതും പാലും മുട്ടയും ഒരുക്കേണ്ടതും ഒരാളാണ്. നാലുവര്‍ഷം മുന്‍പ് നിശ്ചയിച്ച 600 രൂപ മുന്‍പൊക്കെ വര്‍ഷവും 50 രൂപ വീതം കൂട്ടുമായിരുന്നു. കുട്ടികളില്‍ പോഷണത്തിന്‍റെ കുറവുമൂലം 39 ശതമാനം വിളര്‍ച്ചയും 38 ശതമാനം അമിതവണ്ണവും കാണുന്നുവെന്ന കണ്ടെത്തലിനെത്തുടര്‍ന്നാണ് പുതിയ മെനു നിര്‍ദേശിച്ചത്. 20 പുതിയ ഇനങ്ങള്‍ ഉള്‍പ്പെടുത്തിയാണ് ഉച്ചഭക്ഷണ മെനു പരിഷ്‌കരിച്ചിരിക്കുന്നത്. സ്‌കൂള്‍ നോട്ടീസ് ബോര്‍ഡിലും ഓഫീസ് മുറിയുടെയും പാചകപ്പുരയുടെയും ചുമരിലും പരിഷ്‌്കരിച്ച മെനു പ്രദര്‍ശിപ്പിക്കണമെന്നും നിര്‍ദേശമുണ്ട്.

ചേർത്തല താലൂക്കാശുപത്രിയിൽ വയോധികന്‍റെ മൂത്രസഞ്ചിയിൽനിന്ന് 6 സെന്‍റിമീറ്റർ വലിപ്പമുള്ള കല്ല് പുറത്തെടുത്തു

ചേർത്തല: ചേർത്തല താലൂക്കാശുപത്രിയിൽ വയോധികന്‍റെ മൂത്രസഞ്ചിയിൽനിന്ന് ആറു സെന്‍റിമീറ്റർ വലിപ്പമുള്ള കല്ല് പുറത്തെടുത്തു. ലക്ഷങ്ങൾ മുടക്കി സ്പെഷലിസ്റ്റ് ആശുപത്രിയിൽ ചെയ്യുന്ന ഓപ്പറേഷൻ പരിമിതമായ ഉപകരണങ്ങൾ ഉപയോഗിച്ച് ചേർത്തല താലൂക്ക് ആശുപത്രിയിൽ ചെയ്തു വിജയിച്ചതിന്‍റെ ആഹ്ലാദത്തിലാണ് ഡോക്ടർമാരും സഹപ്രവർത്തകരും. ആദ്യത്തെ സുപ്രാപ്യൂബിക് സിസ്റ്റോലിത്തോടമി ശസ്ത്രക്രിയയാണ് വിജയകരമായി പൂർത്തിയാക്കിയത്. ചേർത്തല സ്വദേശിയായ 67കാരനെ മൂത്രസഞ്ചിയിലെ വലിയ കല്ല് നീക്കം ചെയ്താണ് പുതിയ ജീവിതത്തിലേക്ക് കൈപിടിച്ച് ഉയർത്തിയത്. അസഹ്യമായ വേദനയോടെ എത്തിയ വയോധികന് സ്കാനിംഗിലൂടെയാണ് സർജൻ ഡോക്ടർ മുഹമ്മദ് മുനീർ കല്ല് കണ്ടുപിടിച്ചത്. തുടർന്ന് സ്പെഷലിസ്റ്റ് ആശുപത്രിയിൽ വൻ തുക ചെലവാക്കി ചെയ്യേണ്ട ഓപ്പറേഷൻ ഒരു പൈസ പോലും മുടക്കാതെ താലൂക്ക് ആശുപത്രിയിൽ ചെയ്തു നൽകി. രോഗിയുടെ ബന്ധുക്കളെ ഓപ്പറേഷന്‍റെ വിവിധ വശങ്ങൾ പറഞ്ഞു മനസിലാക്കിയശേഷം ആശുപത്രി സൂപ്രണ്ട് ഡോ. സുജ അലോഷ്യസിന്‍റെ ഏകോപനത്തിൽ ഡോ. മുഹമ്മദ് മുനീർ, അനസ്തേഷ്യ വിഭാഗം മേധാവി ഡോ. നിർമൽ രാജ്, ഡോ. മിഷ, അശ്വതി, സൂര്യ എന്നിവരടങ്ങുന്ന സംഘം അതീവ സങ്കീർണമായ ഓപ്പറേഷൻ നടത്തുകയായിരുന്നു. ചേർത്തല താലൂക്ക് ആശുപത്രിയിൽ ആദ്യമായാണ് സുപ്രാപ്യൂബിക് സിസ്റ്റോലിത്തോടമി വിജയകരമായി നടത്തി നേട്ടം കൈവരിച്ചത്. മണിക്കൂറുകളോളം നീണ്ട ഓപ്പറേഷനുശേഷം പുറത്തെടുത്ത കല്ലിന് ആറ് സെന്‍റിമീറ്റർ വലിപ്പമുണ്ടായിരുന്നു. സർജറി വിഭാഗം അംഗങ്ങളായ ഡോ. കൃഷ്ണ, ഡോ. അഞ്ജന, ഡോ. മിന്നു, ഡോ. അനഘ എന്നിവരും പങ്കെടുത്തു.

എപ്പിസ്‌കോപ്പല്‍ സൂനഹദോസ് സമാപിച്ചു

കോട്ടയം: മലങ്കര ഓര്‍ത്തഡോക്‌സ് സഭയുടെ ആസ്ഥാനമായ ദേവലോകം കാതോലിക്കേറ്റ് അരമനയില്‍ സമ്മേളിച്ച എപ്പിസ്‌കോപ്പല്‍ സൂനഹദോസ് സമാപിച്ചു. ഫ്രാന്‍സിസ് മാര്‍പാപ്പാ, ഡോ. മാര്‍ അപ്രേം മെത്രാപ്പോലീത്താ, വി.എസ്. അച്യുതാനന്ദന്‍ എന്നിവരുടെ വേര്‍പാടില്‍ എപ്പിസ്‌കോപ്പല്‍ സൂനഹദോസ് അനുശോചനം രേഖപ്പെടുത്തി. കത്തോലിക്കാ സഭയുടെ പുതിയ ഇടയനായി തെരഞ്ഞെടുക്കപ്പെട്ട ലെയോ പതിനാലാമന്‍ മാര്‍പാപ്പയ്ക്ക് സൂനഹദോസ് ആശംസകള്‍ നേര്‍ന്നു. ഡോ. സഖറിയാസ് മാര്‍ അപ്രേം മെത്രാപ്പോലീത്തായെ അദ്ദേഹത്തിന് മുന്‍പുണ്ടായിരുന്ന ചുമതലകളിലേക്കു തിരികെ പ്രവേശിപ്പിക്കും. 1977 മുതല്‍ 2025 വരെയുള്ള എപ്പിസ്‌കോപ്പല്‍ സുന്നഹദോസുകളിലെ പ്രധാന തീരുമാനങ്ങള്‍ കോര്‍ത്തിണക്കി വൈദികര്‍ക്കും വിശ്വാസികള്‍ക്കായി പ്രസിദ്ധീകരിച്ച പുസ്തകത്തിന്‍റെ പ്രകാശനം കുര്യാക്കോസ് മാര്‍ ക്ലീമിസ് വലിയമെത്രാപ്പോലീത്തായ്ക്ക് നല്‍കി കാതോലിക്കാ ബാവാ നിര്‍വഹിച്ചു. എപ്പിസ്‌ക്കോപ്പല്‍ സൂനഹദോസ് സെക്രട്ടറി ഡോ. യൂഹാനോന്‍ മാര്‍ ക്രിസോസ്റ്റമോസ് റിപ്പോര്‍ട്ട് അവതരിപ്പിച്ചു. ഡോ. തോമസ് മാര്‍ അത്താനാസിയോസ്, കുര്യാക്കോസ് മാര്‍ ക്ലീമിസ്, യൂഹാനോന്‍ മാര്‍ മിലിത്തിയോസ്, സഖറിയാ മാര്‍ സേവേറിയോസ് എന്നീ മെത്രാപ്പോലീത്താമാര്‍ ധ്യാനയോഗങ്ങള്‍ക്കു നേതൃത്വം നല്‍കി.

മറുപടി നല്‍കാനാകാതെ പബ്ലിക് ഇന്‍ഫര്‍മേഷന്‍ ഓഫീസര്‍

ചങ്ങനാശേരി: കോട്ടയം മെഡിക്കല്‍ കോളജ് ആശുപത്രിയിലെ വിവിധ വിഭാഗങ്ങളിലുള്ള ഡോക്ടര്‍മാരുടെ എണ്ണം സംബന്ധിച്ച് മെഡിക്കല്‍ കോളജിലെ പബ്ലിക് ഇന്‍ഫര്‍മേഷന്‍ ഓഫീസര്‍ക്ക് മറുപടിയില്ല. ആശുപത്രിയിലെ 23 വിഭാഗങ്ങളില്‍ തസ്തിക പ്രകാരം എത്ര എണ്ണം ഡോക്ടര്‍മാരാണ് വേണ്ടത്, നിലവില്‍ ഓരോ വിഭാഗത്തിലും എത്ര ഡോക്ടര്‍ സേവനം അനുഷ്‌ഠിക്കുന്നു എന്നതായിരുന്നു വിവിധ വകുപ്പ് തിരിച്ചുള്ള ചോദ്യം. ചോദ്യങ്ങള്‍ക്കുള്ള മറുപടി മെഡിക്കല്‍ കോളജില്‍ ലഭ്യമല്ലെന്നും മറുപടി നേരിട്ട് നല്‍കുന്നതിനായി കോളജിലെ തന്നെ സ്റ്റേറ്റ് പബ്ലിക് ഇന്‍ഫര്‍മേഷന്‍ ഓഫീസര്‍ക്കു കൈമാറുന്നു എന്നുമാണ് പബ്ലിക് ഇന്‍ഫര്‍മേഷന്‍ ഓഫീസര്‍ എം.എം. മധു നല്‍കിയ മറുപടി. ഒരേ ഓഫീസിലുള്ള വിവരങ്ങള്‍ നല്‍കാതെയും പരമാവധി കാലതാമസം വരുത്തി മറുപടി താമസിപ്പിക്കാനുമാണ് അധികൃതര്‍ ഇതിലൂടെ ലക്ഷ്യംവയ്ക്കുന്നത്. അപ്പീല്‍ അധികാരി മെഡിക്കല്‍ കോളജ് ആശുപത്രിയിലെ ഡെപ്യൂട്ടി സൂപ്രണ്ട് ജനറല്‍ ആണെന്നും മറുപടിയില്‍ പറയുന്നു. മെഡിക്കല്‍ കോളജിലെ വിവിധ വിഭാഗങ്ങളില്‍ മതിയായ ഡോക്ടര്‍മാരില്ല എന്ന ആക്ഷേപം നിലനില്‍ക്കുന്ന സാഹചര്യത്തിലാണ് വിവരാവകാശ നിയമം പ്രകാരം അപേക്ഷ നല്‍കിയത്. കൃത്യമായ ഉത്തരം കിട്ടിയതിനു ശേഷം ഡോക്ടമാരുടെ ക്ഷാമം ഉണ്ടെങ്കില്‍ അതു സര്‍ക്കാരിന്‍റെ ശ്രദ്ധയില്‍പ്പെടുത്താനുള്ള ശ്രമമാണ് നടത്തിയതെന്ന് ചങ്ങനാശേരി നഗരസഭാ മുന്‍ കൗണ്‍സിലറും വൈഎംസിഎ സംസ്ഥാന വൈസ് ചെയര്‍മാനുമായ കുര്യന്‍ തൂമ്പുങ്കല്‍ പറഞ്ഞു. വ്യക്തമായ ഉത്തരം നല്‍കാതെ ഒഴിഞ്ഞുമാറിയതിനാല്‍ അപ്പീല്‍ അപേക്ഷയുമായി മുന്നോട്ട് പോകുമെന്നും അദ്ദേഹം പറഞ്ഞു.

ഓണത്തിന് ബംഗളൂരു-തിരുവനന്തപുരം സ്‌പെഷല്‍ ട്രെയിന്‍

കോട്ടയം: ബംഗളൂരുവില്‍നിന്ന് തിരുവനന്തപുരത്തേക്ക് കോട്ടയംവഴി 11, 18, 25 സെപ്റ്റംബര്‍ ഒന്ന്, എട്ട്, 15 തീയതികളില്‍ ഉത്സവകാല സ്‌പെഷല്‍ ട്രെയിന്‍ ഓടിക്കും. രാത്രി 7.25ന് ബംഗളൂരുവില്‍നിന്ന് പുറപ്പെട്ട് പിറ്റേന്ന് ഉച്ചകഴിഞ്ഞ 1.15ന് തിരുവനന്തപുരത്ത് എത്തും. കൃഷ്ണരാജപുരം, ബംഗാരപ്പെട്ട്, സേലം, ഈറോഡ്, തിരുപ്പൂര്‍, പൊഡനൂര്‍, പാലക്കാട്, തൃശൂര്‍, ആലുവ, എറണാകുളം ടൗണ്‍, കോട്ടയം, ചങ്ങനാശേരി, തിരുവല്ല, ചെങ്ങന്നൂര്‍, മാവേലിക്കര, കായംകുളം, കൊല്ലം, വര്‍ക്കല എന്നിവിടങ്ങളില്‍ സ്‌റ്റോപ്പുണ്ട്. മടക്ക ട്രെയിന്‍ തിരുവനന്തപുരത്തുനിന്ന് 12, 19, 26 സെപ്റ്റംബര്‍ രണ്ട്, ഒന്‍പത്, 16 തീയതികളില്‍ ഉച്ചകഴിഞ്ഞ് 3.15ന് തിരുവനന്തപുരത്തുനിന്ന് പുറപ്പെട്ട് രാവിലെ 8.30ന് ബംഗളൂരുവിലെത്തും. രണ്ട് എസി ടു ടയര്‍ കോച്ചുകളും 16 എസി ത്രീ ടയര്‍ കോച്ചുകളും രണ്ട് ലഗേജ് കോച്ചുകളുമുണ്ടായിരിക്കും. ഇന്ന് രാവിലെ എട്ടു മുതല്‍ റിസര്‍വ് ചെയ്യാം.

ജെസ്‌ന തിരോധാനം: അന്വേഷണം മുണ്ടക്കയം കേന്ദ്രീകരിച്ച്

കോട്ടയം: ജെസ്‌ന തിരോധാനക്കേസില്‍ സിബിഐ സ്‌പെഷല്‍ ടീമിന്‍റെ രണ്ടാംഘട്ടം അന്വേഷണം ഒരു വര്‍ഷം പിന്നിടുന്നു. തിരുവനന്തപുരം സിജെഎം കോടതിയുടെ നിര്‍ദേശപ്രകാരം നടത്തുന്ന രണ്ടാംഘട്ടം അന്വേഷണം മുണ്ടക്കയം, പുഞ്ചവയല്‍ പ്രദേശങ്ങള്‍ കേന്ദ്രീകരിച്ചാണ് നീങ്ങുന്നത്. സിബിഐയുടെ നാലംഗ ടീം എരുമേലിയില്‍ ക്യാമ്പ് ചെയ്താണു വിവിധ സാധ്യതകളും സാഹചര്യങ്ങളും ആരായുന്നത്. മുക്കൂട്ടുതറ കുന്നത്ത് ജയിംസിന്‍റെ മകളും കാഞ്ഞിരപ്പള്ളി സെന്‍റ് ഡൊമിനിക്‌സ് കോളജ് രണ്ടാം വര്‍ഷം ബികോം വി ദ്യാര്‍ഥിനിയുമായിരുന്ന ജെസ്‌ന മരിയ ജയിംസിനെ കാണാതായിട്ട് ഏഴ് വര്‍ഷം പിന്നിടുന്നു. ലോക്കല്‍ പോലീസും ക്രൈംബ്രാഞ്ചും അന്വേഷിച്ച് തെളിവു ലഭിക്കാതെ വന്നതോടെയാണ് ഹൈക്കോടതി നിര്‍ദേശപ്രകാരം സിബിഐ അന്വേഷണം ഏറ്റെടുത്ത്. ജെസ്‌ന ജീവിച്ചിരിപ്പുണ്ടോ ഇല്ലയോ എന്നത് വ്യക്തമല്ലെന്നാണ് സിബിഐ ആദ്യഘട്ടം അന്വേഷണ റിപ്പോര്‍ട്ട് നല്‍കിയത്. എന്നാല്‍ ഒന്നാംഘട്ടം അന്വേഷണത്തില്‍ ഉള്‍പ്പെടാതെ പോയ ചില സാഹചര്യങ്ങളെയും വ്യക്തികളെയും അന്വേഷണപരിധിയില്‍ പെടുത്തണമെന്നാവശ്യപ്പെട്ട് ജെസ്‌നയുടെ പിതാവ് ജ യിംസ് സിജെഎം കോടതിയെ സമീപിച്ചിരുന്നു. ഇതേ തുടര്‍ന്നാണ് കഴിഞ്ഞവര്‍ഷം വീണ്ടും അന്വേഷണത്തിനുത്തരവിട്ടത്.

ആറന്മുള വള്ളസദ്യകൾക്കു തിരക്കേറി; 458 സദ്യകൾക്ക് ബുക്കിംഗ്

ആറന്മുള: ആറന്മുള വള്ളസദ്യകളുടെ എണ്ണത്തിൽ മുന്‍കാലങ്ങളില്‍ നിന്നും വ്യത്യസ്തമായി വന്‍ വര്‍ധന. 458 സദ്യകളാണ് ഇതേവരെ ബുക്ക് ചെയ്തിരിക്കുന്നത്. വള്ളസദ്യകൾക്കു തുടക്കമിട്ട ജൂലൈയിൽ 55 സദ്യകളാണ് ഉണ്ടായിരുന്നത്. ഓഗസ്റ്റില്‍ 223 സദ്യകൾക്കാണ് ബുക്കിംഗ്. ക്ഷേത്രമതിലകത്തും പുറത്തുമായി 15 ഊട്ടുപുരകളിലായി 15 സദ്യകരാറുകാരാണ് സദ്യ തയാറാക്കുന്നത്. മല്ലപ്പുഴശേരി, ഇടക്കുളം, മാലക്കര, ചെറുകോല്‍ എന്നീ പള്ളിയോടങ്ങള്‍ക്കാണ് ഇന്ന് സദ്യയുള്ളത്. ശനി, ഞായര്‍ ദിവസങ്ങളിലാണ് മറ്റു ദിവസങ്ങളേക്കാള്‍ കൂടുതല്‍ സദ്യകള്‍ ഉള്ളത്. പമ്പാനദിയിലെ ജലനിരപ്പ് കുറഞ്ഞതിനാല്‍ പള്ളിയോടങ്ങള്‍ക്ക് തുഴഞ്ഞെത്താവുന്ന സാഹചര്യമാണ് ഉള്ളത്. പള്ളിയോടങ്ങള്‍ക്ക് സംരക്ഷണം ഒരുക്കി സേവാസംഘത്തിന്‍റെ റെസ്‌ക്യൂ ടീമും പ്രവര്‍ത്തിക്കുന്നു. ഒരു മോട്ടോര്‍ ബോട്ട്, ശിക്കാരി ബോട്ട്, ഫയര്‍ ആൻഡ് സേഫ്റ്റി, സ്‌കൂബാസംഘം എന്നിവ രാവിലെ 10.30 മുതല്‍ ഉച്ചകഴിഞ്ഞ് 3.30 വരെ പമ്പാനദിയിലെ ഇടശേരിമല കടവ് മുതല്‍ ക്ഷേത്രകടവിനു കിഴക്ക് നിക്ഷേപമാലി വരെ പള്ളിയോടങ്ങള്‍ക്ക് സംരക്ഷണം ഉറപ്പാക്കുന്നുണ്ട്. റെസ്‌ക്യൂ കമ്മിറ്റി കണ്‍വീനര്‍ അനൂപ് ഉണ്ണിക്കൃഷ്ണന്‍റെ നേതൃത്വത്തിലുള്ള 11 അംഗസംഘമാണ് നേതൃത്വം നൽകുന്നത്. കെഎസ്ആര്‍ടിസിയുടെ ബജറ്റ് ടൂറിസം പദ്ധതിപ്രകാരം ഇന്ന് എറണാകുളം, കൂത്താട്ടുകുളം, വെള്ളനാട്, മൂവാറ്റുപുഴ, നെടുമങ്ങാട്, ഹരിപ്പാട്, കൊട്ടാരക്കര, വൈക്കം എന്നീ ഡിപ്പോകളില്‍ നിന്നും സർവീസുകളെത്തും. ഈ മാസം കെഎസ്ആര്‍ടിസിയുടെ 150 ട്രിപ്പുകള്‍ ഉണ്ടാകും. തിങ്കളാഴ്ച ഒഴികെയുള്ള ദിവസങ്ങളില്‍ പ്രതിദിനം എട്ട് ബസുകൾവീതം ആറന്മുളയിലേക്ക് ഓപ്പറേറ്റ് ചെയ്യുമെന്ന് കെഎസ്ആര്‍ടിസി ബജറ്റ് ടൂറിസം സെല്‍ കോഓര്‍ഡിനേറ്റര്‍ സന്തോഷ്‌കുമാര്‍ പറഞ്ഞു. സീറ്റ് പരിമിതിമൂലം സ്പെഷൽ പാസ് ഓണ്‍ലൈന്‍ ബുക്കിംഗ് പൂർണമായും നിര്‍ത്തിയിരിക്കുകയാണ്. പെയ്ഡ് സദ്യ ബുക്കിംഗ് ഏറെക്കുറെ പൂർ‌ത്തിയാകുകയും ചെയ്തു. സെപ്റ്റംബർ മാസത്തെ ബുക്കിംഗ് അടുത്തയാഴ്ച ആരംഭിക്കുമെന്ന് പള്ളിയോടസേവാസംഘം പ്രസിഡന്‍റ് കെ.വി. സാംബദേവന്‍ പറഞ്ഞു. ഒക്ടോബർ രണ്ടുവരെയാണ് വള്ളസദ്യക്കാലം. സെപ്റ്റംബർ ഒന്പതിന് ആറന്മുള ഉത്രട്ടാതി ജലോത്സവവും 14ന് അഷ്ടമിരോഹിണി വള്ളസദ്യയും നടക്കും.

ജില്ലയ്ക്ക് അഭിമാനത്തിന്‍റെ പൂക്കാലം

കോട്ടയം: അവാര്‍ഡിനു വേണ്ടി ഇതുവരെ അഭിനയിച്ചിട്ടില്ല. അതുകൊണ്ട് അമിതമായ സന്തോഷം തോന്നുന്നേയില്ലെന്നു മികച്ച സഹനടനായി ദേശീയ അവാര്‍ഡ് നേടിയ നടന്‍ വിജയരാഘവന്‍. പൂക്കാലം എന്ന ചിത്രത്തിലെ ഇട്ടൂപ്പ് എന്ന നൂറു വയസുകാരന്‍റെ കഥാപാത്രമാണ് മികച്ച സഹനടനിലേക്കു താരത്തെ എത്തിച്ചത്. അരനൂറ്റാണ്ട് പിന്നിട്ട അഭിനയ ജീവിതത്തില്‍ ആദ്യമായിട്ടാണ് ദേശീയ പുരസ്‌കാരം തേടിയെത്തുന്നത്. എറണാകുളത്തുനിന്നു വീട്ടിലേക്കുള്ള യാത്രയ്ക്കിടെയാണ് അവാര്‍ഡ് വിവരം താനറിയുന്നതെന്നും നമ്മള്‍ ചെയ്ത കഥാപാത്രം ജനങ്ങള്‍ ഏറ്റെടുക്കുന്നതാണ് ഏറ്റവും വലിയ ആനന്ദമെന്നും അദ്ദേഹം പറഞ്ഞു. ഡബ്ബ് ചെയ്തു തൊണ്ട വീങ്ങി ജില്ലയുടെ അഭിമാനം വാനോളം ഉയര്‍ത്തിയ താരത്തിന്‍റെ നേട്ടവും ജില്ലയ്ക്ക് ഇരട്ടി അഭിമാനം തന്നെയാണ്. ഒളശയിലാണ് നടന്‍ താമസിക്കുന്നത്. സിനിമയുടെ പേരു പോലെ വിജയരാഘവന്‍റെ ഡയനീഷ്യയെന്ന വീട്ടിലും പൂക്കാലമാണ്. സംസ്ഥാന അവാര്‍ഡും ദേശിയ അവാര്‍ഡും ഒരു സിനിമ തന്നെ സമ്മാനിച്ചതും പൂക്കാലത്തെ കൂടുതല്‍ മനോഹരമാക്കുന്നു. അദ്ദേഹത്തിന്‍റെ വാക്കുകളിങ്ങനെ: പൂക്കാലത്തില്‍ നന്നായി അഭിനയിച്ചെന്നു പലരും പറഞ്ഞപ്പോള്‍ സന്തോഷം തോന്നി. ഈ കഥാപാത്രം എന്നിലേക്ക് എത്തിയെന്നതാണ് ഏറ്റവും നല്ല ഓര്‍മ. ഇട്ടൂപ്പിലേക്കു മാറിയത് കഷ്ടപ്പെട്ടാണെന്നു തോന്നിയിട്ടില്ല. അത് ആവേശത്തോടെ ചെയ്തതാണ്. ഒച്ചയടച്ച് ഡബ്ബ് ചെയ്തപ്പോള്‍ തൊണ്ടയ്ക്കു നീരുവന്നിരുന്നു. അതൊക്കെ അഭിനയത്തിന്‍റെ ഭാഗമാണ്. അരിയാഹാരം പൂര്‍ണമായും ഒഴിവാക്കി വണ്ണം കുറച്ചു. കരിയറിനു വേണ്ടി ചെയ്ത നല്ല കാര്യത്തിനു ഫലമുണ്ടായതില്‍ സന്തോഷമുണ്ട്. എന്നാല്‍, അമിത സന്തോഷം ഒരിക്കലും എന്നെ കീഴ്പ്പെടുത്താറില്ലെന്ന് പറഞ്ഞ അദ്ദേഹം സംവിധായകനും കാമറാമാനും മേക്കപ്പ്മാനും ഉള്‍പ്പെടെ പൂക്കാലത്തിനു വേണ്ടി പ്രവര്‍ത്തിച്ച എല്ലാവര്‍ക്കുമുള്ളതാണ് ഈ അവാര്‍ഡെന്നും കൂട്ടിചേര്‍ത്തു. കുടുംബത്തിന്‍റെ ആഴത്തിലുള്ള ബന്ധവും യാത്രയും പ്രമേയമാക്കിയ ചിത്രത്തില്‍ ഇട്ടൂപ്പെന്ന കഥാപാത്രമാണ് വിജയരാഘവന്‍ കൈകാര്യം ചെയ്തത്. നൂറു വയസുകാരനായി സ്‌ക്രീനില്‍ നിറഞ്ഞാടിയ ഇട്ടൂപ്പ് ഇന്നും ഒരു ഓര്‍മപ്പെടുത്തലാണ്. ഇഴയടുപ്പം നഷ്ടമായിക്കൊണ്ടിരിക്കുന്ന ബന്ധങ്ങള്‍ അരങ്ങുവാഴുന്ന ഇന്നിന്‍റെ ലോകത്തു നൂറിന്‍റെ നിറവില്‍ ആഴമായ കുടുംബബന്ധത്തെ വരച്ചുകാട്ടുകയാണ് ഇട്ടൂപ്പും കുടുംബവും. നാടകാചാര്യന്‍ എന്‍.എന്‍. പിള്ളയുടെയും നാടകനടിയായിരുന്ന ചിന്നമ്മയുടെയും മകനാണ്. ഭാര്യ: സുമ. മക്കള്‍: ജിനദേവന്‍, ദേവേവന്‍.

ഒടുവിൽ പുളിച്ചമാക്കല്‍ പാലം അടച്ചു; എന്നു തുറക്കും?

കൊല്ലപ്പള്ളി: പാലം അപകടാവസ്ഥയിലായതിനെത്തുടര്‍ന്ന് കവലവഴിമുക്ക്-മങ്കര റോഡിലെ പുളിച്ചമാക്കല്‍ പാലത്തിലൂടെയുള്ള യാത്ര നിരോധിച്ചു. ഏറെക്കാലമായി മാധ്യമങ്ങളും നാട്ടുകാരും പുളിച്ചമാക്കല്‍ പാലം അപകടാവസ്ഥയിലാണെന്ന് ചൂണ്ടിക്കാട്ടിയിരുന്നു. എന്നാൽ, നടപടിയെടുക്കാതെ അധികൃതർ തീരുമാനം നീട്ടിക്കൊണ്ടു പോവുകയായിരുന്നു. കടുത്ത അപകടഭീഷണിയിലേക്ക് എത്തിയതോടെ ഇപ്പോൾ പാലം അടച്ചു. നാട്ടുകാർക്ക് ഏറെ പ്രയോജനകരമായ പാതയിലെ പാലം ഇനി എന്നു പുനർനിർമിച്ച് തുറന്നുകൊടുക്കുമെന്നതാണ് ഇപ്പോൾ നാട്ടുകാരുടെ ആശങ്ക. പാലം അടയ്ക്കാൻതന്നെ ഏറെക്കാലമെടുത്തു. അപ്പോൾ പണി എത്രനാൾ നീളുമെന്ന് ആർക്കു പറയാനാകുമെന്നു നാട്ടുകാർ ചോദിക്കുന്നു. പാലം അപകടാവസ്ഥയിലാണെന്നും അടിയന്തരമായി പുനർനിർമിക്കണമെന്നും കാണിച്ചു പലതവണ നാട്ടുകാർ നിവേദനം നൽകിയിരുന്നു. വർഷങ്ങൾക്കു മുന്പ് പാലത്തിനു സമീപം റോഡിൽ ഒരു വലിയ കുഴിയാണ് രൂപപ്പെട്ടത്. ഇത് അടച്ചെങ്കിലും കാലവർഷം കനത്തതോടെ ഇതിനു സമീപത്തെ സംരക്ഷണഭിത്തി തകർന്നു. പാലത്തിന്‍റെ അബട്ട്മെന്‍റിനോടു ചേര്‍ന്നുള്ള റിംഗ് വാള്‍ തകര്‍ന്നതോടെയാണ് യാത്രാനിരോധനം ഏര്‍പ്പെടുത്തിയത്. കഴിഞ്ഞ ദിവസമാണ് റിംഗ് വാള്‍ തോട്ടിലേക്കു തകര്‍ന്നുവീണത്. പാലം അടിയന്തരമായി ഗതാഗതയോഗ്യമാക്കാൻ മാണി സി. കാപ്പൻ എംഎൽഎ നിർദേശം നൽകിയിട്ടുണ്ടെങ്കിലും അധികൃതർ എത്രത്തോളം ഇതു പാലിക്കുമെന്നതിൽ നാട്ടുകാർക്ക് ആശങ്കയുണ്ട്.

എട്ടുനോമ്പ്: കുറവിലങ്ങാട് പള്ളിയിൽ ഒരുക്കം തുടങ്ങി

കുറവിലങ്ങാട്: മരിയൻ തീർഥാടന കേന്ദ്രമായ കുറവിലങ്ങാട് മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ പള്ളിയിൽ എട്ടുനോന്പ് ആചരണത്തിന് ഒരുക്കം തുടങ്ങി. 28 മുതൽ സെപ്റ്റംബർ ഒന്നുവരെ ബൈബിൾ കൺവൻഷൻ നടക്കും. ഫാ. സേവ്യർഖാൻ വട്ടായിൽ നേതൃത്വം നൽകും. എട്ടുനോമ്പിലെ ഒരോ ദിവസവും വിവിധ ഇടവകകളും സംഘടനങ്ങളും മുത്തിയമ്മയുടെ സന്നിധിയിലേക്കു തീർഥാടനമായി എത്തുന്നതാണ് ഈ വർഷത്തെ പ്രത്യേകത. രാമപുരം ഫൊറോന, രത്‌നഗിരി സെന്‍റ് തോമസ്, കാളികാവ് സെന്‍റ് സെബാസ്റ്റ്യൻസ് ഇടവകകൾ വിവിധ ദിവസങ്ങളിൽ തീർഥാടനം നടത്തും. കാളികാവ് പള്ളിയിൽനിന്നു പദയാത്രയായി തീർഥാടകർ എത്തും. കത്തോലിക്ക കോൺഗ്രസ്, പിതൃവേദി, മാതൃവേദി, എസ്എംവൈഎം, ഡിസിഎംഎസ്, ജീസസ് യൂത്ത് സംഘടനകളും തീർഥാടനം നടത്തും. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ, ദേവമാതാ കോളജ് വൈസ് പ്രിൻസിപ്പൽ ഫാ. മാത്യു കവളമാക്കിയിൽ എന്നിവർ ഒരുക്കങ്ങൾക്കു നേതൃത്വം നൽകും. കൈക്കാരന്മാരായ റെജി മിറ്റത്താനിക്കൽ, ജോസ് പടവത്ത്, സുനിൽ അഞ്ചുകണ്ടത്തിൽ, വി.സി. ജോയി വള്ളോശേരിൽ, പള്ളിയോഗം സെക്രട്ടറി ബെന്നി കോച്ചേരി, കൂടുംബകൂട്ടായ്മ ജനറൽ ലീഡർ ബോബിച്ചൻ നിധീരി, ഷൈജു പാവുത്തിയേൽ, ജിയോ കരികുളം, ജോസ് സി. മണക്കാട്ട്, സണ്ണി വെട്ടിക്കാട്ടിൽ, ഡോ. നിധീഷ് നിധീരി, ബിജു കുര്യൻ താന്നിക്കതറപ്പിൽ എന്നിവർ വിവിധ കമ്മിറ്റികൾക്ക് നേതൃത്വം നൽകുന്നു.

കന്യാസ്ത്രീകളുടെ അറസ്റ്റില്‍ പ്രതിഷേധം

അരുവിത്തുറ: ഛത്തീസ്ഗഡിൽ കന്യാസ്ത്രീകളെ ജയിലിൽ അടച്ചതിൽ പ്രതിഷേധിച്ച് അരുവിത്തുറ പിതൃവേദി, കർഷക ദളങ്ങൾ, ഇൻഫാം എന്നിവയുടെ നേതൃത്വത്തിൽ പ്രതിഷേധ സംഗമം നടത്തി. ഫൊറോന പള്ളി വികാരി ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിച്ചു. ജോർജ് വടക്കേൽ, ജോജോ പ്ലാത്തോട്ടം, ജോർജുകുട്ടി മുഖാലയിൽ, ഉണ്ണി വരയാത്തുകരോട്ട്, ജെയ്സൻ അരീപ്ലാക്കൽ, ജോസഫ് വടക്കേൽ തുടങ്ങിയവർ പ്രസംഗിച്ചു. പാലാ: ഛത്തീസ്ഗഡില്‍ കന്യാസ്ത്രീകളെ അറസ്റ്റ് ചെയ്തതില്‍ പ്രതിഷേധിച്ചു ഗാഡേലൂപ്പെ പള്ളി വികാരി ഫാ. ജോഷി പുതുപ്പറമ്പിലിന്‍റെ നേതൃത്വത്തില്‍ പന്തം കൊളുത്തി പ്രകടനവും പ്രതിഷേധ യോഗവും നടത്തി. കുരിശുപള്ളിക്കവലയില്‍ നടന്ന പ്രതിഷേധയോഗം നഗരസഭാഗം സാവിയോ കാവുകാട്ട് ഉദ്ഘാടനം ചെയ്തു. ഫാ. ജോഷി പുതുപ്പറമ്പില്‍ അധ്യക്ഷത വഹിച്ചു. ഫാ. തോമസ് തോപ്പില്‍ ഒസിഡി, കെ.സി. ഷെറ്റിന്‍, ടോബിന്‍ കെ. അലക്സ്, ജോസുകുട്ടി പൂവേലില്‍, ജിഷോ ചന്ദ്രന്‍കുന്നേല്‍, ടോമി തകിടിയേല്‍ തുടങ്ങിയവര്‍ പ്രസംഗിച്ചു. കടനാട്: ഛത്തീസ്ഗഡില്‍ അന്യായമായി കന്യാസ്ത്രീകളെ അറസ്റ്റ് ചെയ്ത സംഭവത്തില്‍ സാഹിത്യ വേദി പ്രവര്‍ത്തകര്‍ പ്രതിഷേധിച്ചു. മാത്യു കടനാടന്‍ അധ്യക്ഷത വഹിച്ചു. മാര്‍ട്ടിന്‍ ജോസഫ്, ടി.സി. ജോസഫ്, ജോയി തേക്കുംകാട്ടില്‍, സി.എസ്. സെബാസ്റ്റ്യന്‍ എന്നിവര്‍ പ്രസംഗിച്ചു. പൂഞ്ഞാർ: ഛത്തീസ്ഗഡില്‍ കന്യാസ്ത്രീകളെ കള്ളക്കേസില്‍ കുടുക്കി അറസ്റ്റ് ചെയ്തു ജയിലില്‍ അടച്ച ഭരണകൂട ഭീകരതയ്‌ക്കെതിരേ ആം ആദ്മി പൂഞ്ഞാര്‍ തെക്കേക്കര പഞ്ചായത്ത് കമ്മിറ്റിയുടെ നേതൃത്വത്തില്‍ പൂഞ്ഞാര്‍ തെക്കേക്കര ടൗണില്‍ പ്രതിഷേധ സമ്മേളനം നടത്തി. സംസ്ഥാന വര്‍ക്കിംഗ് പ്രസിഡന്‍റ് ഡോ. സെലിന്‍ ഫിലിപ്പ് പ്രതിഷേധ സമ്മേളനം ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ഷിബി ജേക്കബ് കളപ്പുരക്കപ്പറമ്പില്‍ അധ്യക്ഷത വഹിച്ചു.

ഈരാറ്റുപേട്ട നഗരസഭയില്‍ ഇ-മാലിന്യ ശേഖരണം തുടങ്ങി

ഈരാറ്റുപേട്ട: മാലിന്യമുക്തം നവകേരള കാമ്പയിന്‍റെ ഭാഗമായി ഈരാറ്റുപേട്ട നഗരസഭയില്‍ ഇ-മാലിന്യ ശേഖരണയജ്ഞം തുടങ്ങി. നഗരസഭാധ്യക്ഷ സുഹ്റ അബ്ദുൾ ഖാദര്‍ ഉദ്ഘാടനം നിര്‍വഹിച്ചു. സര്‍ക്കാര്‍ നിശ്ചയിച്ചിട്ടുള്ള വില നല്‍കി ഉപയോഗശൂന്യമായ രീതിയില്‍ വീടുകളിലും സ്ഥാപനങ്ങളിലും സൂക്ഷിച്ചിട്ടുള്ള ഇലക്‌ട്രിക്, ഇലക്‌ട്രോണിക്സ് മാലിന്യങ്ങളാണ് ശേഖരിക്കുന്നത്. ശേഖരിക്കുന്ന മാലിന്യങ്ങള്‍ ക്ലീന്‍ കേരള കമ്പനിക്ക് കൈമാറും. ഇ-മാലിന്യത്തിന്‍റെ ശാസ്ത്രീയനിര്‍മാര്‍ജനം ഉറപ്പാക്കുകയാണ് ലക്ഷ്യം. ടെലിവിഷന്‍, റഫ്രിജറേറ്റര്‍, അലക്കുയന്ത്രം, മൈക്രോവേവ് ഓവന്‍, മിക്സര്‍ ഗ്രൈന്‍ഡര്‍, ഫാന്‍, ലാപ്ടോപ്, സിപിയു, മോണിറ്റര്‍, മൗസ്, കീബോര്‍ഡ്, പ്രിന്‍റര്‍, ഫോട്ടോസ്റ്റാറ്റ് യന്ത്രം, ഇസ്തിരിപ്പെട്ടി, മോട്ടോര്‍, സെല്‍ഫോണ്‍, ടെലിഫോണ്‍, റേഡിയോ, മോഡം, എയര്‍ കണ്ടീഷണര്‍, ബാറ്ററി, ഇന്‍വര്‍ട്ടര്‍, യുപിഎസ്, സ്റ്റബിലൈസര്‍, വാട്ടര്‍ ഹീറ്റര്‍, വാട്ടര്‍ കൂളര്‍, ഇന്‍ഡക്‌ഷന്‍ കുക്കര്‍, എസ്എംപിഎസ്, ഹാര്‍ഡ് ഡിസ്‌ക്, സിഡി ഡ്രൈവ്, പിസിബി ബോര്‍ഡുകള്‍, സ്പീക്കര്‍, ഹെഡ്‌ഫോണുകള്‍, സ്വിച്ച് ബോര്‍ഡുകള്‍, എമര്‍ജന്‍സി ലാമ്പ് തുടങ്ങിയവ ശേഖരിക്കും. നഗരസഭാംഗങ്ങളായ ഷെഫ്ന അമീന്‍, നാസര്‍ വെള്ളൂപറമ്പില്‍, മുഹമ്മദ് ഇല്യാസ്, അനസ് പാറയില്‍, സജീര്‍ ഇസ്മായില്‍, സുഹാന ജിയാസ്, ഹബീബ് കപ്പിത്താന്‍, ക്ലീന്‍ സിറ്റി മാനേജര്‍ ടി. രാജന്‍ എന്നിവര്‍ പങ്കെടുത്തു.

കുടക്കച്ചിറ ഹോമിയോ ഡിസ്‌പെന്‍സറിക്ക് പുതിയ കെട്ടിടം; ആദ്യ ഗഡു ജില്ലാ പഞ്ചായത്ത് വക

കുടക്കച്ചിറ: കരൂര്‍ പഞ്ചായത്തിന്‍റെ കുടക്കച്ചിറയിലുള്ള ഹോമിയോ ഡിസ്പെന്‍സറിക്ക് പുതിയ കെട്ടിടം നിര്‍മിക്കുന്നു. അമ്പതിലധികം വര്‍ഷം പഴക്കമുള്ള കെട്ടിടം കാലപ്പഴക്കം മൂലം ഉപയോഗശൂന്യമായിരുന്നു. രണ്ടു നിലകളായാണ് പുതിയ കെട്ടിടം നിര്‍മിക്കുന്നത്. ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അനുവദിച്ച 10 ലക്ഷം രൂപയും ബ്ലോക്ക്-പഞ്ചായത്ത് വിഹിതമായി 25 ലക്ഷം രൂപയും നാഷണല്‍ ആയുഷ് മിഷന്‍ മുഖേന ലഭിക്കുന്ന 30 ലക്ഷം രൂപയും ഉപയോഗിച്ചാണ് കെട്ടിട നിര്‍മാണം. ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ പത്തു ലക്ഷം രൂപയുടെ ചെക്ക് പഞ്ചായത്ത് പ്രസിഡന്‍റ് അനസ്യ രാമന് കൈമാറി. പഞ്ചായത്ത് വൈസ് പ്രസിഡന്‍റ് സാജു വെട്ടത്തേട്ട്, മെംബര്‍ മോളി ടോമി, മെഡിക്കല്‍ ഓഫീസര്‍ ഡോ. ജിന്‍സി കുര്യാക്കോസ്, എച്ച്എംസി അംഗങ്ങളായ ടോമി തോമസ്, എം.ടി. സജി, കെ.ആര്‍. അശോകന്‍, സജിമോന്‍ തുടങ്ങിയവര്‍ പ്രസംഗിച്ചു.

കന്യാസ്ത്രീകളുടെ അറസ്റ്റിൽ പ്രതിഷേധം

പൊന്‍കുന്നം: ഛത്തീസ്ഗഡില്‍ തടങ്കലിലാക്കിയ സിസ്റ്റേഴ്‌സിന് ഐക്യദാര്‍ഢ്യം പ്രഖ്യാപിച്ച് എസ്എംവൈഎം പൊന്‍കുന്നം ഫൊറോനയുടെ നേതൃത്വത്തില്‍ ടൗണില്‍ പന്തം കൊളുത്തി പ്രതിഷേധ റാലിയും സമ്മേളനവും നടത്തി. പൊന്‍കുന്നം തിരുക്കുടുംബ പള്ളിയിൽനിന്ന് ആരംഭിച്ച റാലി ടൗണ്‍ കുരിശുപള്ളിയില്‍ സമാപിച്ചു. കാഞ്ഞിരപ്പള്ളി രൂപത എസ്എംവൈഎം മുന്‍ പ്രസിഡന്‍റ് ജോമോന്‍ പൊടിപാറ ഉദ്ഘാടനം ചെയ്തു. ഫൊറോന ഡയറക്ടര്‍ ഫാ. നോബി വെള്ളാപ്പള്ളി, പ്രസിഡന്‍റ് സക്കറിയാസ്, ആല്‍ബിന്‍, ആല്‍ബി ജെസ്വിന്‍, അന്ന, സെബിന്‍ എന്നിവര്‍ നേതൃത്വം നല്‍കി. എയ്ഞ്ചല്‍വാലി: ഛത്തീസ്ഗഡില്‍ കന്യാസ്ത്രീകളെ കള്ളക്കേസില്‍ കുടുക്കുകയും അറസ്റ്റ് ചെയ്യുകയും ചെയ്ത സംഭവത്തില്‍ മാതൃവേദി എയ്ഞ്ചല്‍വാലി യൂണിറ്റ് പ്രതിഷേധിച്ചു. ഫാ. തോമസ് തെക്കെമുറി അധ്യക്ഷത വഹിച്ചു.

ഭാരതത്തെ മതേതരത്വത്തിന്‍റെ ശവപ്പറമ്പാക്കാൻ അനുവദിക്കില്ലെന്ന്

വെളിച്ചിയാനി: ഭാരതത്തെ മതേതരത്വത്തിന്‍റെ ശവപ്പറമ്പാക്കാൻ ആരെയും അനുവദിക്കില്ലെന്നും കന്യാസ്ത്രീകൾക്ക് നേരിടേണ്ടിവന്ന പീഡനം ഇന്ത്യൻ മതേതര മനസിനേറ്റ മുറിവാണെന്നും കത്തോലിക്ക കോൺഗ്രസ് കാഞ്ഞിരപ്പള്ളി രൂപത പ്രസിഡന്‍റ് ബേബി കണ്ടത്തിൽ. ഛത്തീസ്ഗഡിൽ രണ്ടു മലയാളി കന്യാസ്ത്രീകളെ അറസ്റ്റു ചെയ്ത് ജയിലിൽ അടച്ച നടപടിയിൽ പ്രതിഷേധിച്ച് വെളിച്ചിയാനി ഫൊറോന കത്തോലിക്ക കോൺഗ്രസ്, എസ്എംവൈഎം, പിതൃവേദി, മാതൃവേദി എന്നിവയുടെ സംയുക്ത ആഭിമുഖ്യത്തിൽ പാറത്തോട്ടിൽ നടത്തിയ പ്രതിഷേധജ്വാല ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഛത്തീസ്ഗഡിൽ നടന്ന സംഭവം ഒറ്റപ്പെട്ട സംഭവമല്ല. സമാനമായ സംഭവങ്ങൾ അടുത്തകാലത്ത് ധാരാളം അരങ്ങേറിക്കൊണ്ടിരിക്കുകയാണ്. ദൈവസ്നേഹത്തെപ്രതി മനുഷ്യർക്കുവേണ്ടി ത്യാഗപൂർവമായ ജീവിതം സമർപ്പിച്ചിരിക്കുന്ന വിവിധ സന്യാസി സമൂഹത്തിൽപ്പെട്ട സന്യസ്തർ, വൈദികർ, അല്മായർ എന്നിവർ ചെയ്യുന്ന ശുശ്രൂഷകളെല്ലാം മതപരിവർത്തനത്തിന്‍റെ ലേബൽ ഒട്ടിച്ച് കുറ്റം വിധിക്കുന്നത് നിർഭാഗ്യകരവും അപലപനീയവുമാണെന്നും അദ്ദേഹം കൂട്ടിച്ചേർത്തു. വെളിച്ചിയാനി ഫൊറോന ഡയറക്ടർ ഫാ. സെബാസ്റ്റ്യൻ പാലമൂട്ടിൽ അധ്യക്ഷത വഹിച്ചു. ജോർജുകുട്ടി ആഗസ്തി മുഖ്യപ്രഭാഷണം നടത്തി. പിതൃവേദി ഫൊറോന വൈസ് പ്രസിഡന്‍റ് സൂരജ് പുത്തൻപുരക്കൽ, മാതൃവേദി പ്രസിഡന്‍റ് ജൂബി ആന്‍റണി, എസ്എംവൈഎം ഫൊറോന പ്രസിഡന്‍റ് ജെമി റോസ് തോമസ്, കത്തോലിക്ക കോൺഗ്രസ്‌ ഫൊറോന സെക്രട്ടറി തോമസ് ചെമ്മരപ്പള്ളിയിൽ, ജോമി വെള്ളമുണ്ടയിൽ, ജോഷി പൂവത്തുങ്കൽ, സാജു പടന്നമാക്കൽ, സെബാസ്റ്റ്യൻ വട്ടക്കുന്നേൽ, സുബിൽ കല്ലൂകുന്നേൽ, വർഗീസ് വാതലൂർ, ചാണ്ടി കപ്പലുമാക്കൽ എന്നിവർ പ്രസംഗിച്ചു. വൈദികരും സന്യസ്തരും അല്മായരുമുൾപ്പെടെ നിരവധിയാളുകൾ പങ്കെടുത്തു.

സംഗീതോപകരണങ്ങള്‍ വിതരണം ചെയ്തു

കാഞ്ഞിരപ്പള്ളി: പട്ടികജാതി യുവതീയുവാക്കള്‍ക്ക് സ്വയംതൊഴില്‍ ലക്ഷ്യമാക്കി കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെ വാര്‍ഷിക പദ്ധതിയില്‍ 15 ലക്ഷം വകയിരുത്തി വാദ്യോപകരണങ്ങള്‍ വിതരണം ചെയ്തു. സെബാസ്റ്റ്യന്‍ കുളത്തുങ്കല്‍ എംഎല്‍എ വിതരണോദ്ഘാടനം നിര്‍വഹിച്ചു.ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് അധ്യക്ഷത വഹിച്ചു. കീബോര്‍ഡ്, ചെണ്ട, തബല ഉള്‍പ്പെടെയുള്ള വാദ്യോപകരണങ്ങളാണു വിതരണം ചെയ്തത്. പട്ടികജാതി വികസന ഓഫീസര്‍ അനീഷ് വി. നായര്‍, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷന്‍ ടി.ജെ. മോഹനന്‍, ബ്ലോക്ക് പഞ്ചായത്ത് അംഗങ്ങളായ സാജന്‍ കുന്നത്ത്, ടി.എസ്. കൃഷ്ണകുമാര്‍, ജോഷി മംഗലം, പി.കെ. പ്രദീപ്, എസ്. സജീഷ് എന്നിവര്‍ പങ്കെടുത്തു.

കാഞ്ഞിരപ്പള്ളി വെറ്ററിനറി പോളിക്ലിനിക്കിൽ മൊബൈല്‍ വെറ്ററിനറി സര്‍ജറി യൂണിറ്റ്

കാഞ്ഞിരപ്പള്ളി: മൃഗസംരക്ഷണ വകുപ്പ് നടപ്പിലാക്കുന്ന മൊബൈല്‍ സര്‍ജറി യൂണിറ്റിന്‍റെ പ്രവര്‍ത്തനോദ്ഘാടനം കാഞ്ഞിരപ്പള്ളി വെറ്ററിനറി പോളിക്ലിനിക്കില്‍ ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് നിര്‍വഹിച്ചു. വളര്‍ത്തുമൃഗങ്ങള്‍ക്ക് വിവിധ ശസ്ത്രക്രിയകള്‍ സര്‍ക്കാര്‍ നിരക്കില്‍ മുന്‍കൂട്ടി നിശ്ചയിച്ചു നടപ്പിലാക്കുന്നതാണ് പദ്ധതി. കാഞ്ഞിരപ്പള്ളി വെറ്ററിനറി പോളിക്ലിനിക്കില്‍ ഈ സേവനത്തിനായി ഇനി മുതല്‍ മുന്‍കൂര്‍ രജിസ്റ്റര്‍ ചെയ്യാം. ബ്ലോക്ക് പഞ്ചായത്ത് അംഗങ്ങളായ ടി.ജി. മോഹനന്‍, സാജന്‍ കുന്നത്ത്, ചീഫ് വെറ്ററിനറി ഓഫീസര്‍ ഡോ. വി. സുജ, സീനിയര്‍ വെറ്ററിനറി സര്‍ജന്‍ ഡോ ബിനു ഗോപിനാഥ്, അസിസ്റ്റന്‍റ് പ്രോജക്‌ട് ഓഫീസര്‍ ഡോ. ഷിജോ ജോസ് എന്നിവര്‍ പ്രസംഗിച്ചു.

അന്ധവിദ്യാര്‍ഥികള്‍ക്കായി നിര്‍മിച്ച സാങ്കേതികവിദ്യ ശ്രദ്ധേയമാകുന്നു

കാഞ്ഞിരപ്പള്ളി: ത്രീഡി പ്രിന്‍റിംഗ് സാങ്കേതികവിദ്യയിലൂടെ പ്രാദേശികമായി നിര്‍മിച്ച ബ്രെയ്‌ലി ബ്ലോക്ക് ബില്‍ഡര്‍ വാളക്കയം സര്‍വോദയ ഗ്രന്ഥശാലയുടെ ആഭിമുഖ്യത്തില്‍ കാളകെട്ടി അസീസി സ്‌കൂള്‍ ഫോര്‍ ദ ബ്ലൈന്‍ഡിലെ വിദ്യാര്‍ഥികള്‍ക്ക് വിതരണം ചെയ്തു. കേരള ഡെവലപ്മെന്‍റ് ആൻഡ് ഇന്നോവേഷന്‍ സ്ട്രാറ്റജിക് കൗണ്‍സിലിന്‍റെ സ്ട്രഡ് പ്രോജക്‌ടിലൂടെ നിര്‍മിച്ച ഉപകരണങ്ങള്‍ അന്ധര്‍ക്ക് കഥകളിലൂടെയും പ്രശ്നപരിഹാരത്തിലൂടെയും ബ്രെയ്‌ലി ബ്ലോക്കുകള്‍ ഉപയോഗിച്ച് ഇംഗ്ലീഷ് വാക്കുകള്‍ രൂപപ്പെടുത്താന്‍ സഹായകമാണ്. സ്‌കൂള്‍ ഹെഡ്മിസ്ട്രസ് സിസ്റ്റര്‍ റിന്‍സി ഉദ്ഘാടനം ചെയ്തു. സര്‍വോദയ ഗ്രന്ഥശാലാ പ്രസിഡന്‍റ് സാബു ഫിലിപ്പ്, സെക്രട്ടറി ലിജോ ജോയി, ലൈബ്രറി ഭാരവാഹികളായ ജോസ് ജോര്‍ജ്, വല്‍സമ്മ സണ്ണി, ലൗലി ആന്‍റണി എന്നിവര്‍ നേതൃത്വം വഹിക്കുന്ന ടീം പത്ത് ഉപകരണങ്ങള്‍ വിദ്യാര്‍ഥികള്‍ക്ക് വിതരണം ചെയ്തു. പതിനഞ്ചോളം വിദ്യാര്‍ഥികളും അവരുടെ മാതാപിതാക്കളും മറ്റ് അംഗങ്ങളും ചേര്‍ന്ന് പുനര്‍ജീവ ടെക്നോളജി സൊല്യൂഷന്‍സിന്‍റെ നേതൃത്വത്തില്‍ ത്രീ ഡി പ്രിന്‍റിംഗ് ഉപയോഗിച്ചാണ് ഈ കിറ്റുകള്‍ അസംബിള്‍ ചെയ്തത്. കെ ഡിസ്‌ക് സോഷ്യല്‍ എന്‍റര്‍പ്രൈസ് ആൻഡ് ഇന്‍ക്ലൂഷന്‍ ഡിവിഷന്‍ എക്സിക്യൂട്ടീവ് ഡയറക്ടര്‍ റോബിന്‍ ടോമി പരിപാടിക്ക് നേതൃത്വം നല്‍കി.

സ്ഥാനാരോഹണം

കാഞ്ഞിരപ്പള്ളി: റോട്ടറി ക്ലബ്ബിന്‍റെ പുതിയ ഭാരവാഹികള്‍ സ്ഥാനമേറ്റു. മുന്‍ പ്രസിഡന്‍റ് ജോഹര്‍ മാത്യുവിന്‍റെ അധ്യക്ഷതയില്‍ ചേര്‍ന്ന സമ്മേളനത്തില്‍ കോട്ടയം പ്രിന്‍സിപ്പല്‍ ആന്‍ഡ് സെഷന്‍സ് ജഡ്ജ് എം. മനോജ് മുഖ്യാതിഥിയായി. റോട്ടറി അസിസ്റ്റന്‍റ് ഗവര്‍ണര്‍ ഡൊമിനിക് നിരപ്പേല്‍, റോട്ടറി ഡിസ്ട്രിക്‌ട് പ്രോജക്‌ട് ചെയര്‍മാന്‍ ജോഷ് ജോസഫ് മണ്ണിപ്പറമ്പില്‍, പ്രഫ. കെ.എസ്. കുര്യന്‍, മുന്‍ സെക്രട്ടറി ശ്യാം വര്‍ക്കി കല്ലൂര്‍ തുടങ്ങിയവര്‍ പ്രസംഗിച്ചു. റോട്ടറി ക്ലബ്ബിന്‍റെ പുതിയ പ്രസിഡന്‍റായി ജ്യോതിഷ് ജോസഫ് പുതിയാപറമ്പില്‍, സെക്രട്ടറിയായി നിക്കോളാസ് ജെ. നീരാക്കല്‍, ട്രഷററായി ജോസഫ് തോമസ് കോടംകണ്ടത്ത് എന്നിവര്‍ സ്ഥാനമേറ്റു.

കത്തീഡ്രൽ ദ്വിശതാബ്ദി: വിളംബരറാലി ഇന്ന്

കാഞ്ഞിരപ്പള്ളി: സെന്‍റ് ഡൊമിനിക്‌സ് കത്തീഡ്രല്‍ ദ്വിശതാബ്ദി ആഘോഷങ്ങളുടെ സമാപനം ഇന്നു മുതല്‍ പത്തുവരെ നടക്കും. ആഘോഷങ്ങള്‍ക്ക് തുടക്കംകുറിച്ച് അക്കരപ്പള്ളിയില്‍നിന്നു കത്തീഡ്രല്‍ പള്ളിയിലേക്ക് ജൂബിലി വിളംബര റാലി ഇന്നു നടത്തും. കത്തോലിക്ക കോണ്‍ഗ്രസ്, പിതൃവേദി, മാതൃവേദി, എസ്എംവൈഎം, വിന്‍സെന്‍റ് ഡി പോള്‍, കൂട്ടായ്മ ലീഡേഴ്‌സ് എന്നിവരുടെ നേതൃത്വത്തില്‍ നടത്തുന്ന വിളംബര റാലി വൈകുന്നേരം 5.45ന് കത്തീഡ്രല്‍ വികാരി ഫാ. കുര്യന്‍ താമരേശരി ഫ്‌ളാഗ് ഓഫ് ചെയ്യും. കാഞ്ഞിരപ്പള്ളി ടൗണ്‍ ചുറ്റി റാലി കത്തീഡ്രല്‍ പള്ളിയില്‍ സമാപിക്കും. തുടര്‍ന്ന് ജൂബിലി പതാക ഉയര്‍ത്തല്‍, തിരിതെളിക്കല്‍, 200 പേർ അണിനിരക്കുന്ന ജൂബിലി ഗാനം, വാദ്യമേളം എന്നിവ ഉണ്ടായിരിക്കും. റാലിയില്‍ 200 വര്‍ഷത്തിന്‍റെ പ്രതീകമായി 200 പേര്‍ കൊടിയേന്തും, ഫ്ളോട്ടുകള്‍, കൂട്ടായ്മാതല പ്രതിനിധികള്‍ എന്നിവര്‍ റാലിയില്‍ അണിനിരക്കും. കത്തീഡ്രല്‍ വികാരി ഫാ. കുര്യന്‍ താമരശേരി, ഫാ. ജോസഫ് ആലപ്പാട്ടുകുന്നേല്‍, ഫാ. തോമസ് മുളങ്ങാശേരി, കൈക്കാരന്മാരായ കെ.സി. ഡൊമിനിക് കരിപ്പാപ്പറമ്പില്‍, ഏബ്രഹാം കെ. അലക്സ് കൊല്ലംകുളം, ടി.സി. ചാക്കോ വാവലുമാക്കല്‍, പി.കെ. കുരുവിള പിണമറുകില്‍, ജനറല്‍ കണ്‍വീനര്‍ സെബാസ്റ്റ്യന്‍ എള്ളുക്കുന്നേല്‍, പ്രോഗ്രാം കണ്‍വീനര്‍ റെജി കൊച്ചുകരിപ്പാപറമ്പില്‍, ജിജി പുത്തേട്ട്, റെജി കൈപ്പന്‍പ്ലാക്കല്‍, മെറീന ടോമി കാവുങ്കല്‍, റാലി കണ്‍വീനര്‍ ഡോണി സാബു തുണ്ടിയില്‍, ബെന്നി അതിരുകുളങ്ങര എന്നിവര്‍ നേതൃത്വം നല്‍കും.

എരുമേലി ഡിവിഷൻ വിഭജനം: പരാതികളുമായി പാർട്ടികൾ

എരുമേലി: ജില്ലാ പഞ്ചായത്തിന്‍റെ കരട് ഡിവിഷൻ വിഭജന നിർദേശങ്ങളിൽ എരുമേലി ഡിവിഷനെ നിർണയിച്ചതിനെതിരേ പ്രാദേശിക രാഷ്‌ട്രീയ നേതാക്കൾ രംഗത്ത്. എരുമേലിയെ സംബന്ധിച്ച് അശാസ്ത്രീയ നിർദേശമാണ് മുന്നോട്ടുവച്ചിരിക്കുന്നതെന്നാണ് അവരുടെ പരാതി. തെരഞ്ഞെടുപ്പ് ഡീ ലിമിറ്റേഷന്‍റെ ഹിയറിംഗിൽ വിവിധ രാഷ്‌ട്രീയകക്ഷികൾ പരാതി ഉന്നയിച്ചു. കഴിഞ്ഞ 31ന് തിരുവനന്തപുരത്ത് തൈക്കാട് റസ്റ്റ്ഹൗസിൽ നടന്ന ഹിയറിംഗിൽ വിവിധ രാഷ്‌ട്രീ‍യകക്ഷികളുടെ നേതാക്കൾ ആക്ഷേപം ഉന്നയിച്ചത്. ആക്ഷേപം പരിശോധിച്ചു നടപടി സ്വീകരിക്കുമെന്ന് കമ്മീഷൻ അറിയിച്ചു. കോൺഗ്രസ്‌ ജില്ലാ ജനറൽ സെക്രട്ടറി പ്രകാശ് പുളിക്കൻ, സിപിഎം ജില്ലാ കമ്മിറ്റി അംഗം കെ. രാജേഷ്, സിപിഐ മണ്ഡലം കമ്മിറ്റി അംഗവും എരുമേലി ചെറുവള്ളി എസ്റ്റേറ്റ് വാർഡ് അംഗവുമായ അനുശ്രീ സാബു എന്നിവർ ഹിയറിംഗിൽ പങ്കെടുത്തു. നിർദേശം ഇങ്ങനെ എരുമേലി ടൗണിനോടു ചേര്‍ന്നുള്ള പ്രദേശങ്ങളെ മറ്റു ഡിവിഷനുകളിലേക്കു മാറ്റിയാണ് കരട് നിർദേശത്തിലുള്ളത്. കാഞ്ഞിരപ്പള്ളി ഡിവിഷനിലേക്കാണ് എരുമേലി ടൗണിനോടു ചേർന്നുള്ള ചില പ്രദേശങ്ങളെ ഉൾപ്പെടുത്തിയിരിക്കുന്നത്. നിർദിഷ്‌ട എരുമേലി വിമാനത്താവളം ഉള്‍പ്പെടുന്ന ഒഴക്കനാട്, ചെറുവള്ളി, ചേനപ്പാടി, പ്രദേശങ്ങളെ എരുമേലി ഡിവിഷനിൽനിന്ന് ഒഴിവാക്കി കാഞ്ഞിരപ്പള്ളി ഡിവിഷനിലാക്കി. എരുമേലി ജില്ലാ ഡിവിഷനിൽ ഉൾപ്പെട്ടിരുന്ന ചേനപ്പാടി ബ്ലോക്ക്‌ പഞ്ചായത്ത്‌ ഡിവിഷനും ജില്ലാ പഞ്ചായത്ത്‌ കാഞ്ഞിരപ്പള്ളി ഡിവിഷനിനിലാണ് കരട് ലിസ്റ്റിൽ ഉൾപ്പെടുത്തിയിട്ടുള്ളത്. ഇതു മാറ്റി എരുമേലി ഡിവിഷനിൽ നിലനിർത്തണമെന്നാണ് നേതാക്കളുടെ ആവശ്യം. മണിമല ബ്ലോക്ക്‌ ഡിവിഷനെ ജില്ലാ പഞ്ചായത്ത്‌ എരുമേലി ഡിവിഷനിൽ ഉൾപ്പെടുത്തിയത് ഒഴിവാക്കണമെന്നും ആവശ്യപ്പെട്ടിട്ടുണ്ട്. "എരുമേലി ഡിവിഷനിൽനിന്ന് വിമാനത്താവളം മാറ്റരുത്' എരുമേലി: നിർദിഷ്‌ട വിമാനത്താവള പദ്ധതി പ്രദേശം ജില്ലാ പഞ്ചായത്ത്‌ എരുമേലി ഡിവിഷനിൽനിന്നു മറ്റൊരു ഡിവിഷനിലേക്കു മാറ്റുന്നത് അശാസ്ത്രീയമാണെന്ന് എരുമേലി ഡെവലപ്മെന്‍റ് കൗണ്‍സില്‍ (ഇഡിസി) ആരോപിച്ചു. എരുമേലിയോടു ചേര്‍ന്നുകിടക്കുന്ന മണങ്ങല്ലൂര്‍, കൊരട്ടി, കണ്ണിമല, വെണ്‍കുറിഞ്ഞി പ്രദേശങ്ങള്‍ എരുമേലി പഞ്ചായത്തിനോടു ചേര്‍ക്കണമെന്നും ടൗണിൽ മേൽപ്പാലം നിർമിക്കരുതെന്നും റിംഗ് റോഡുകൾ വികസിപ്പിക്കണമെന്നും ടൗൺ വാഹനമുക്തമാക്കി പേട്ടതുള്ളലിനായി വിശുദ്ധ പാതയാക്കി മാറ്റണമെന്നും എരുമേലി ഡെവലപ്മെന്‍റ് കൗണ്‍സില്‍ ഭാരവാഹികളായ മേജര്‍ എം.ജി. വർഗീസ്, ബാബു തോമസ്, എം.കെ. രാജന്‍, കെ.പി. മോഹനന്‍, സണ്ണി ഓലിക്കല്‍, കെ.എന്‍. ശ്രീകുമാര്‍ എന്നിവര്‍ ആവശ്യപ്പെട്ടു.

കാർഷിക വിജയഭേരിയുമായി അരുവിത്തുറയിൽ അഗ്രിമാ ഫെസ്റ്റ്

അരുവിത്തുറ: പിഎസ്ഡബ്ല്യുഎസ് അരുവിത്തുറ സോണലിന്‍റെ ആഭിമുഖ്യത്തിൽ അരുവിത്തുറ സെന്‍റ് ജോർജ് ഫൊറോന ദേവാലയണത്തിൽ അഗ്രിമാ ഫെസ്റ്റ് സംഘടിപ്പിച്ചു. ഫെസ്റ്റിന്‍റെ ഉദ്ഘാടനം അരുവിത്തുറ ഫോറോനാപ്പള്ളി വികാരി വെരി റവ. ഫാ. സെബാസ്റ്റ്യൻ വെട്ടുകല്ലേൽ നിർവഹിച്ചു. ഉദ്ഘാടന ചടങ്ങിൽ തലപ്പലം പഞ്ചായത്ത് പ്രസിഡന്‍റ് ആനന്ദ് പുതിയാപ്പറമ്പിൽ, ഈരാറ്റുപേട്ട ബ്ലോക്ക് മെമ്പർ മേഴ്സി മാത്യു, ഈരാറ്റുപേട്ട കൃഷി വകുപ്പ് അസിസ്റ്റന്‍റ് ഡയറക്‌ടർ സുജ മാത്യു, കൃഷി ഓഫീസർ സുഭാഷ്, പിഎസ്ഡബ്ല്യുഎസ് അരുവിത്തുറ സോണൽ കൺവീനർ ജോർജ് വടക്കേൽ, സോണൽ കോഓർഡിനേറ്റർ ജോജോ പ്ലാത്തോട്ടം, പിഎസ്ഡബ്ല്യുഎസ് സിഇഒ സിബി കണിയാം പടി, കോഓർഡിനേറ്റർ ശാന്തമ്മ മേച്ചേരി തുടങ്ങിയവരും സംസാരിച്ചു. വിവിധ ഫല വൃക്ഷ തൈകളുടെയും പച്ചക്കറി ഇനങ്ങളുടെയും വിത്തുകളുടെയും കാർഷിക ഉത്പന്നങ്ങളുടെയും പ്രദർശനവും വിൽപ്പനയുമാണ് ഫെസ്റ്റിവലിൽ നടന്നത്. നിരവധി ആളുകളാണ് ഫെസ്റ്റിവൽ പങ്കെടുത്തത്.

അടഞ്ഞുകിടന്ന വീട്ടിൽ കയറി മോഷണം: പ്രതി അറസ്റ്റിൽ

ചങ്ങനാശേരി: അടഞ്ഞുകിടന്ന വീട്ടിൽ കയറി മോഷണം നടത്തിയ പ്രതി അറസ്റ്റിൽ. മാടപ്പള്ളി ഇലവുമൂട്ടിൽ സഞ്ജു ജോസഫാണ് (41) തൃക്കൊടിത്താനം പോലീസ് പിടികൂടിയത്. പങ്കിപ്പുറത്തുള്ള അടഞ്ഞുകിടക്കുന്ന വീട്ടിൽക്കയറി വീട്ടുപകരണങ്ങൾ മോഷ്ടിക്കുകയായിരുന്നു. വീടിനുള്ളിൽ സൂക്ഷിച്ചിരുന്ന മൂന്ന് ഗ്യാസ് സിലിണ്ടർ, ഒരു ഗ്യാസ് സ്റ്റൗവ്, ഗ്യാസ് റെഗുലേറ്റർ, ഒരു നിലവിളക്ക്, രണ്ട് കിണ്ടികൾ, ഒരു അലുമിനിയം ചെരുവം, കിണറിനുള്ളിൽ ഫിറ്റ് ചെയ്തിരുന്ന 1 എച്ച്പിയുടെ മോട്ടർ ഉൾപ്പെടെയുളള സാധനങ്ങളാണ് മോഷ്ടിച്ചത്. ചങ്ങനാശേരി ഡിവൈഎസ്പിയുടെ നേതൃത്വത്തിൽ തൃക്കൊടിത്താനം എസ്എച്ച്ഒ എം.ജെ. അരുണിന്‍റെ നേതൃത്വത്തിൽ നടത്തിയ അന്വേഷണത്തിലാണ് പ്രതിയെ പിടികൂടിയത്. മദ്യപിക്കുന്നതിന് പണമില്ലാത്തതിനെ തുടർന്നാണ് അടഞ്ഞുകിടക്കുന്ന വീടുകൾ കേന്ദ്രീകരിച്ച് മോഷണം നടത്തുന്നതെന്ന് പ്രതി സമ്മതിച്ചതായി പോലീസ് പറഞ്ഞു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ഉജ്വല യുവത്വം ഭാവി ഭാരതത്തിന്‍റെ സമ്പത്ത്: സിജോയ് വര്‍ഗീസ്

ചങ്ങനാശേരി: യുവാക്കളാണ് നാളത്തെ ഭാരതത്തെ രൂപപ്പെടുത്തേണ്ടതെന്ന് പ്രമുഖ മോട്ടിവേഷണല്‍ സ്പീക്കറും ചലച്ചിത്രതാരവുമായ സിജോയ് വര്‍ഗീസ്. വിദ്യാഭ്യാസത്തോടൊപ്പം തിരിച്ചറിവും മൂല്യങ്ങളും ആര്‍ജിക്കുമ്പോഴാണ് വ്യക്തിത്വം പൂർണമാകുന്നതെന്നും അദ്ദേഹം കൂട്ടിച്ചേര്‍ത്തു. വാഴപ്പള്ളി സെന്‍റ് തെരേസാസ് സ്‌കൂള്‍ ഹയര്‍ സെക്കന്‍ഡറി വിഭാഗത്തിന്‍റെ രജത ജൂബിലി ആഘോഷങ്ങളോടനുബന്ധിച്ചു സംഘടിപ്പിച്ച പേഴ്‌സണാലിറ്റി കോണ്‍ടെസ്റ്റ് ദി ഐക്കണ്‍-2025 ഉദ്ഘാടനം ചെയ്യുകയായിരുന്നു അദ്ദേഹം. ജോബ് മൈക്കിള്‍ എംഎല്‍എ മുഖ്യപ്രഭാഷണം നടത്തി. സ്‌കൂള്‍ മാനേജര്‍ സിസ്റ്റര്‍ ലിന്‍സി വലിയപ്ലാക്കല്‍, പ്രിന്‍സിപ്പല്‍ ഷിജി വര്‍ഗീസ്, സിസ്റ്റര്‍ ടിസ പടിഞ്ഞാറേക്കര, എല്‍സമ്മ ജോബ്, ജിന്‍സ് ചാള്‍സ്, ഷിബു ജോസഫ്, ജൂലി ജോസഫ് എന്നിവര്‍ പ്രസംഗിച്ചു. കേരളത്തിന്‍റെ വിവിധ ഭാഗങ്ങളില്‍നിന്ന് തെരഞ്ഞെടുക്കപ്പെട്ട അമ്പതോളം വിദ്യാര്‍ഥികള്‍ പങ്കെടുത്ത മൂന്നു റൗണ്ടുകളിലായി നടന്ന മത്സരത്തില്‍ ആണ്‍കുട്ടികളുടെ വിഭാഗത്തില്‍ നെവിന്‍ ജോസഫ് (സെന്‍റ് ആന്‍റണീസ് പബ്ലിക് സ്‌കൂള്‍, ആനക്കല്ല്), ആഷേര്‍ ജോസഫ് (സെന്‍റ് ആന്‍സ് എച്ച്എസ്എസ്, കുര്യനാട്), ഫെലിക്‌സ് ജസ്റ്റിന്‍ (സെന്‍റ് ആന്‍റണീസ് പബ്ലിക് സ്‌കൂള്‍, ആനക്കല്ല്) എന്നിവരും പെണ്‍കുട്ടികളുടെ വിഭാഗത്തില്‍ ധന്യ മെറിന്‍ സോജന്‍ (ഗുഡ് ഷെപ്പേ‍ഡ് പബ്ലിക് സ്‌കൂള്‍, തെങ്ങണ), അമൃത സന്തോഷ് (ഇത്തിത്താനം ഹയര്‍ സെക്കന്‍ഡറി സ്‌കൂള്‍, മലകുന്നം), തീര്‍ഥദേവി വി. (കെഇ സ്‌കൂള്‍, മാന്നാനം)എന്നിവരും യഥാക്രമം ഒന്ന്, രണ്ട്, മൂന്ന് സ്ഥാനങ്ങള്‍ നേടി. വിജയികള്‍ക്ക് 50,000 രൂപയുടെ സമ്മാനങ്ങളും ട്രോഫികളും, പങ്കെടുത്ത എല്ലാവര്‍ക്കും പ്രോത്സാഹന സമ്മാനങ്ങളും നല്‍കി.

എസി കനാല്‍ പള്ളാത്തുരുത്തിയിലേക്ക് തുറന്ന് വെള്ളപ്പൊക്കദുരിതം ഒഴിവാക്കണം

ചങ്ങനാശേരി: കുട്ടനാട്, ചങ്ങനാശേരി മേഖലകളില്‍ വെള്ളപ്പൊക്ക സമയത്ത് കരുവാറ്റ ലീഡിംഗ് ചാനലിലും ടിഎസ് കനാലിലും ജലവിതാനം താഴ്ന്നു നില്‍ക്കുമ്പോഴും എസി റോഡിന് തെക്കുഭാഗത്തുള്ള പ്രദേശങ്ങളില്‍ വെള്ളം ഉയര്‍ന്നു നില്‍ക്കുന്നത് പരിശോധിച്ച് എസി കനാല്‍ പള്ളാത്തുരുത്തിയിലേക്ക് ഉടന്‍ തുറക്കുന്നതിന് ആവശ്യമായ നടപടികള്‍ സര്‍ക്കാര്‍ സ്വീകരിക്കണമെന്ന് എസി കനാല്‍ സംരക്ഷണ സമിതി. എസി റോഡ് നിര്‍മാണവുമായി ബന്ധപ്പെട്ട് റോഡ് ക്രമാതീതമായി ഉയര്‍ത്തിയതിനാല്‍ റോഡിന് തെക്കുഭാഗത്തുള്ള പ്രദേശങ്ങള്‍ വെള്ളക്കെട്ടായി മാറുകയാണ്. തീരദേശ റെയില്‍പാതയുടെ കരുവാറ്റയിലുള്ള സ്പാനും വെള്ളമൊഴുക്കിനു തടസമാണ്. എസി റോഡിലെ ഒന്നാംകര പാലത്തിന് എസി കനാലിനു സമാനമായ വീതിയില്ലാത്തതുമൂലം മണിമലയാറ്റിലൂടെ വേമ്പനാട്ടു കായലിലേക്ക് വെള്ളം സുഗമമായി ഒഴുകുന്നില്ല. എസി കനാലില്‍ എക്കലും മാലിന്യവും നിറഞ്ഞു കിടക്കുകയുമാണ്. ഒന്നാംകര കനാല്‍ മുഖം അടിയന്തരമായി ഡ്രഡ്ജ് ചെയ്ത് പുത്തന്‍തോട്ടില്‍നിന്നും മണിമലയാറ്റിലേക്ക് നീരൊഴുക്ക് വര്‍ധിപ്പിച്ചു തലവടി, മുട്ടാര്‍ പ്രദേശത്തെ ജലനിരപ്പ് കുറയ്ക്കുവാന്‍ സത്വരമായ നടപടികള്‍ സ്വീകരിക്കണമെന്നും എസി കനാല്‍ സംരക്ഷണ സമിതി സമ്മേളനം ആവശ്യപ്പെട്ടു. കനാല്‍ സംരക്ഷണ സമിതി ചെയര്‍മാന്‍ നൈനാന്‍ മുളപ്പാമഠം ഉദ്ഘാടനം ചെയ്തു. ജനറല്‍ കണ്‍വീനര്‍ മുട്ടാര്‍ സുരേന്ദ്രന്‍ അധ്യക്ഷത വഹിച്ചു. തെമ്മിക്കുട്ടി വാളംപറമ്പില്‍ വിഷയാവതരണം നടത്തി. അലക്‌സാണ്ടര്‍ പുത്തന്‍പുര, ജോര്‍ജുകുട്ടി കണിച്ചേരി, ലിബിമോള്‍ വര്‍ഗീസ്, അപ്പച്ചന്‍കുട്ടി ആശാംപറമ്പില്‍, ലാലിച്ചന്‍ മുട്ടാര്‍, ജോണപ്പന്‍ ചീരംവേലി എന്നിവര്‍ പ്രസംഗിച്ചു.

ഒരുക്കങ്ങൾ പൂർത്തിയായി : കുടമാളൂർ അല്‍ഫോന്‍സാ തീര്‍ഥാടനം നാളെ

ചങ്ങനാശേരി: ചങ്ങനാശേരി അതിരൂപത ചെറുപുഷ്പ മിഷന്‍ലീഗിന്‍റെ ആഭിമുഖ്യത്തിൽ വിശുദ്ധ അല്‍ഫോന്‍സാമ്മയുടെ ജന്മഗൃഹത്തിലേക്കും കുടമാളൂര്‍ മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടനകേന്ദ്രത്തിലേക്കുമുള്ള 37-ാമത് അല്‍ഫോന്‍സാ തീര്‍ഥാടനം നാളെ നടക്കും. നാളെ രാവിലെ 5.30ന് അതിരമ്പുഴ, വെട്ടിമുകള്‍, ചെറുവാണ്ടൂര്‍, കോട്ടയ്ക്കപ്പുറം എന്നീ സ്ഥലങ്ങളില്‍നിന്ന് അതിരമ്പുഴ മേഖലയുടെ തീര്‍ഥാടനവും രാവിലെ 5.45ന് പാറേല്‍ മരിയന്‍ തീര്‍ഥാടനകേന്ദ്രത്തില്‍നിന്ന് ചങ്ങനാശേരി, തുരുത്തി മേഖലകളുടെ തീര്‍ഥാടനവും ആരംഭിക്കും. കുടമാളൂര്‍ മേഖലയിലെ വിവിധ ശാഖകളില്‍നിന്നുള്ള തീര്‍ഥാടകര്‍ 6.45ന് പനമ്പാലം സെന്‍റ് മൈക്കിള്‍സ് ചാപ്പലില്‍ എത്തും. കോട്ടയം സിഎംഎസ് ഹൈസ്‌കൂള്‍ ഗ്രൗണ്ടില്‍നിന്ന് രാവിലെ 8.45ന് കോട്ടയം, നെടുംകുന്നം, മണിമല, തൃക്കൊടിത്താനം, ചെങ്ങന്നൂര്‍ മേഖലകളുടെ തീര്‍ഥാടനങ്ങളും 10.30ന് കുറുമ്പനാടം മേഖലയുടെ തീര്‍ഥാടനവും ആരംഭിക്കും. 33 കിലോമീറ്റര്‍ കാല്‍നടയായി സഞ്ചരിക്കുന്ന ചങ്ങനാശേരി, തുരുത്തി മേഖലകളുടെ തീര്‍ഥാടനം ഉച്ചകഴിഞ്ഞു രണ്ടിന് അല്‍ഫോന്‍സാ ജന്മഗൃഹത്തില്‍ എത്തിച്ചേരും. ആലപ്പുഴ, എടത്വ, പുളിങ്കുന്ന്, ചമ്പക്കുളം, മുഹമ്മ മേഖലകളിലെ തീര്‍ഥാടകര്‍ വിശുദ്ധ ചാവറയച്ചന്‍റെ കബറിടം സ്ഥിതി ചെയ്യുന്ന മാന്നാനം ആശ്രമദേവാലയത്തില്‍ അന്നേദിവസം രാവിലെ 9.45ന് എത്തിച്ചേര്‍ന്ന് മധ്യസ്ഥപ്രാര്‍ഥനയില്‍ പങ്കെടുക്കും. തുടര്‍ന്ന് തീര്‍ഥാടകര്‍ കുടമാളൂരിലേക്ക് പദയാത്രയായി നീങ്ങും. അമ്പൂരി, തിരുവനന്തപുരം, കൊല്ലം-ആയൂര്‍ മേഖലകളില്‍ നിന്നുള്ള തീര്‍ഥാടകരും വിവിധ സമയങ്ങളില്‍ എത്തിചേരും. തീര്‍ഥാടകര്‍ക്കുള്ള നേര്‍ച്ചഭക്ഷണം കുടമാളൂര്‍ ഫൊറോന പള്ളിയില്‍ രാവില ഒമ്പതു മുതല്‍ വൈകുന്നേരം നാലുവരെയും വിവിധ സ്ഥലങ്ങളില്‍ വാഹന പാര്‍ക്കിംഗും ക്രമീകരിച്ചിട്ടുണ്ട്. വിവിധ ഫൊറോനകളില്‍നിന്നായി മിഷന്‍ലീഗ് പ്രവര്‍ത്തകര്‍ ഉള്‍പ്പെടെ കാല്‍ ലക്ഷത്തിലധികം വിശ്വാസികള്‍ തീര്‍ഥാടനത്തില്‍ പങ്കെടുക്കും.

സ്വിഫ്റ്റ് ജീവനക്കാരുടെ നിസംഗത : കാല്‍ നൂറ്റാണ്ട് പിന്നിട്ട വേളാങ്കണ്ണി ബസ് സര്‍വീസ് പ്രതിസന്ധിയില്‍

ചങ്ങനാശേരി: സ്വിഫ്റ്റ് ജീവനക്കാരുടെ നിസംഗതമൂലം ചങ്ങനാശേരി ഡിപ്പോയില്‍നിന്നു സര്‍വീസ് നടത്തിവരുന്ന വേളാങ്കണ്ണി ബസ് സര്‍വീസ് പ്രതിസന്ധിയില്‍. വിഷയത്തില്‍ ജനപ്രതിനിധികളും ഗതാഗത മന്ത്രിയും ഇടപെട്ടില്ലെങ്കില്‍ ചങ്ങനാശേരിയുടെ ഈ പ്രസ്റ്റീജ് സര്‍വീസ് നിന്നുപോകും. വര്‍ഷങ്ങളോളം കെഎസ്ആര്‍ടിസി നേരിട്ട് ഓപ്പറ്റേറ്റ് ചെയ്തിരുന്ന ബസ് സര്‍വീസ് സ്വിഫ്റ്റ് കോര്‍പറേഷന്‍ ഏറ്റെടുത്തതോടെയാണ് താളം തെറ്റിയത്. ആദ്യം സൂപ്പര്‍ ഫാസ്റ്റായും പിന്നീട് എക്സ്പ്രസായുമാണ് കെഎസ്ആര്‍ടിസി ഈ സര്‍വീസ് നടത്തിയിരുന്നത്. ഒരു ഷെഡ്യൂളിനുവേണ്ടി രണ്ട് ഇന്‍റര്‍ സ്റ്റേറ്റ് ബസുകളാണ് ഓടിയിരുന്നത്. ദിനംപ്രതി ഈ ബസിന് 55,000 മുതല്‍ 60,000 വരെ വരുമാനം ലഭിച്ചിരുന്നു. ഇപ്പോള്‍ ഈ സര്‍വീസിന്‍റെ കളക്‌ഷന്‍ മുപ്പതിനായിരത്തില്‍ താഴെയാണ്. കോട്ടയം, തൃശൂര്‍, പാലക്കാട്, പൊള്ളാച്ചി, പളനി, ദിന്‍ഡിഗല്‍, തൃശ്‌നാപ്പള്ളി, തഞ്ചാവൂര്‍, നാഗപട്ടണം വഴിയാണ് ഈ ബസ് വേളാങ്കണ്ണിക്ക് സര്‍വീസ് നടത്തുന്നത്. ഈ മേഖലകളിലെ തീര്‍ഥാടകര്‍ ഉള്‍പ്പെടെ യാത്രക്കാര്‍ക്ക് ഈ സര്‍വീസ് ഏറെ ഉപകാരപ്രദമാണ്. സ്വിഫ്റ്റ് ഏറ്റെടുത്തതു മുതല്‍ ദുരിതകാലം 2024 മാര്‍ച്ച് മുതലാണ് കെഎസ്ആര്‍ടിസി ഈ സര്‍വീസ് സ്വിഫ്റ്റിനു കൈമാറിയത്. സ്വിഫ്റ്റ് ഏറ്റെടുത്തതു മുതലാണ് ഈ സര്‍വീസ് അനുദിനം പ്രതിസന്ധിയിലേക്കു കൂപ്പുകുത്തിയത്. ഡീലക്സ് സര്‍വീസായി ഓടുന്നതിനാല്‍ ടിക്കറ്റ് ചാര്‍ജും കൂടുതലാണ്. ചാര്‍ജ് വര്‍ധനയോടെ യാത്രക്കാര്‍ ഈ ബസില്‍ കയറാത്ത അവസ്ഥയാണ്. സ്വിഫ്റ്റ് സര്‍വീസ് ആരംഭിച്ചതോടെ നിരവധി അപകടങ്ങളും ഉണ്ടായിട്ടുണ്ട്. ബസിന് വരുമാനം ഉണ്ടാക്കുന്നതില്‍ ജീവനക്കാര്‍ക്ക് യാതൊരു ശ്രദ്ധയുമില്ലെന്ന ആക്ഷേപവും ശക്തമാണ്. എക്‌സ്പ്രസായി നിലനിര്‍ത്തണം; പാലക്കാട്ട് ഡ്രൈവര്‍ ചേഞ്ച് പുനഃസ്ഥാപിക്കണം കെഎസ്ആര്‍ടിസി ഓപ്പറേറ്റ് ചെയ്തിരുന്ന കാലത്ത് പാലക്കാട്ടുനിന്നും ഡ്രൈവര്‍ മാറിക്കയറിയാണ് സര്‍വീസ് തുടര്‍ന്നിരുന്നത്. വേളാങ്കണ്ണി സര്‍വീസിന്‍റെ സുഗമമായ നടത്തിപ്പിന് ഈ സര്‍വീസ് കെഎസ്ആര്‍ടിസി നേരിട്ട് സൂപ്പര്‍ എക്സ്പ്രസായി ഓപ്പറേറ്റ് ചെയ്യണമെന്നും പാലക്കാട്ട് ഡ്രൈവര്‍ ചേഞ്ച് പുനഃസ്ഥാപിക്കണമെന്നുമാണ് കെഎസ്ആര്‍ടിസി ജീവനക്കാരും യാത്രക്കാരും ചൂണ്ടിക്കാട്ടുന്നത്. ഡിപ്പോകളില്‍നിന്നുള്ള റിസര്‍വേഷന്‍ ബുക്കിംഗ് നിര്‍ത്തലാക്കിയത് വേളാങ്കണ്ണി ഉള്‍പ്പെടെ ദീര്‍ഘദൂര ബസുകള്‍ക്ക് വരുമാനം കുറയാന്‍ കാരണമായതായും ചൂണ്ടിക്കാണിക്കപ്പെടുന്നു.

കന്യാസ്ത്രീകളുടെ അറസ്റ്റ്: പ്രതിഷേധം കനക്കുന്നു

കുറുമ്പനാടം ഫൊറോന കൗണ്‍സിൽ കുറുമ്പനാടം: ഭരണഘടനയും ജനാധിപത്യവും വികലമാക്കാന്‍ ഭരണാധികാരികള്‍ ശ്രമിക്കുന്നത് അനീതിയാണെന്ന് അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട്. ഛത്തീസ്ഗഡില്‍ രണ്ട് കന്യാസ്ത്രീകളെ അറസ്റ്റ് ചെയ്ത് ജയിലില്‍ അടച്ചതില്‍ പ്രതിഷേധിച്ച് കുറുമ്പനാടം ഫൊറോന കൗണ്‍സിലിന്‍റെ നേതൃത്വത്തില്‍ തെങ്ങണയില്‍ നടത്തിയ പ്രതിഷേധജ്വാല ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. യോഗത്തില്‍ കുറുമ്പനാടം ഫൊറോന വികാരി റവ.ഡോ. ജോബി കറുകപ്പറമ്പില്‍ അധ്യക്ഷത വഹിച്ചു. കുറുമ്പനാടം ഫൊറോന പള്ളിയില്‍നിന്ന് ആരംഭിച്ച പ്രതിഷേധ റാലി റവ.ഡോ. ജോസ് കൊച്ചുപറമ്പില്‍ ഫ്‌ളാഗ് ഓഫ് ചെയ്തു. അതിരൂപതാ പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി ബിജു സെബാസ്റ്റ്യന്‍ മുഖ്യപ്രഭാഷണം നടത്തി. ഫൊറോന കൗണ്‍സില്‍ സെക്രട്ടറി സോബിച്ചന്‍ കണ്ണമ്പള്ളി പ്രതിഷേധ പ്രമേയം അവതരിപ്പിച്ചു. ഫാ. സെബാസ്റ്റ്യന്‍ കളത്തിപ്പറമ്പില്‍, സിസ്റ്റര്‍ റെജിന്‍ മേരി തുടങ്ങിയവര്‍ പ്രസംഗിച്ചു. അതിരൂപത പ്രവാസി അപ്പൊസ്തലേറ്റ് ചങ്ങനാശേരി: മനുഷ്യക്കടത്തും നിര്‍ബന്ധിത മതപരിവര്‍ത്തനവും എന്ന പേരില്‍ മലയാളി കന്യാസ്ത്രീകളെ അറസ്റ്റ് ചെയ്ത ഛത്തീസ്ഗഡ് സര്‍ക്കാരിന്‍റെ നടപടിയില്‍ ചങ്ങനാശേരി അതിരൂപത പ്രവാസി അപ്പൊസ്തലേറ്റ് പ്രതിഷേധം രേഖപ്പെടുത്തി. ജയിലിലടയ്ക്കപ്പെട്ട കന്യാസ്ത്രീകളുടെ അടിയന്തര മോചനത്തിനായി കേന്ദ്ര, സംസ്ഥാന സര്‍ക്കാരുകളും രാ‌ഷ്‌ട്രീയ പാര്‍ട്ടികളും ഉടന്‍ ഇടപെടണമെന്നും പ്രവാസി അപ്പൊസ്തലേറ്റ് ഡയറക്ടര്‍ ഫാ. ടെജി പുതുവീട്ടില്‍ക്കളം ആവശ്യപ്പെട്ടു. അസിസ്റ്റന്‍റ് ഡയറക്ടര്‍ ഫാ. ജിജോ മാറാട്ടുകളം, അതിരൂപതാ കോ-ഓര്‍ഡിനേറ്റര്‍ ഷെവ. സിബി വാണിയപ്പുരയ്ക്കല്‍, നാഷണല്‍ കോ-ഓര്‍ഡിനേറ്റര്‍ റെജി തോമസ്, ഗള്‍ഫ് കോ-ഓര്‍ഡിനേറ്റര്‍ ബിജു മട്ടാഞ്ചേരി എന്നിവര്‍ പ്രസംഗിച്ചു. കേന്ദ്ര ആഭ്യന്തരമന്ത്രി, സംസ്ഥാന മുഖ്യമന്ത്രി എന്നിവര്‍ക്ക് ഇ-മെയില്‍ സന്ദേശങ്ങള്‍ അയയ്ക്കാന്‍ ഗ്ലോബല്‍ കോ-ഓര്‍ഡിനേറ്റര്‍ ജോ കാവാലത്തെ ചുമതലപ്പെടുത്തി. പാറേല്‍ എകെസിസി ചങ്ങനാശേരി: ഛത്തീസ്ഗഡില്‍ ആതുരസേവനം നടത്തിവന്ന സിസ്റ്റേഴ്‌സിനെതിരേ കള്ളക്കേസ് എടുത്ത് തുറുങ്കിലടച്ച ബജ്‌രംഗ് ദൾ തീവ്രവാദത്തിനെതിരേ എകെസിസി പാറേല്‍ യൂണിറ്റിന്‍റെ നേതൃത്വത്തില്‍ പ്രതിഷേധ യോഗം ചേർന്നു. ഫാ. സിബിന്‍ പാലയ്ക്കല്‍ ഉദ്ഘാടനം ചെയ്തു. പ്രസിഡന്‍റ് പി.സി. കുഞ്ഞപ്പന്‍ അധ്യക്ഷത വഹിച്ചു. സെബാസ്റ്റ്യന്‍ മേടയില്‍, പ്രിന്‍സ് കുട്ടംപേരൂർ, ബാബു വള്ളപ്പുര, പ്രഫ. സെബാസ്റ്റ്യന്‍ വര്‍ഗീസ് എന്നിവര്‍ പ്രസംഗിച്ചു. ആം ആദ്മി പാര്‍ട്ടി ചങ്ങനാശേരി: ഛത്തീസ്ഗഡില്‍ അകാരണമായി തടവിലാക്കപ്പെട്ട കന്യാസത്രീകളെ മോചിപ്പിക്കണമെന്നാവശ്യപ്പെട്ട് ആം ആദ്മി പാര്‍ട്ടി ചങ്ങനാശേരി അരമനപ്പടിയില്‍നിന്ന് ട്രാന്‍സ്പോര്‍ട്ട് ബസ് സ്റ്റാന്‍ഡിലേക്ക് പ്രതിഷേധപ്രകടനവും തുടർന്ന് സമ്മേളനവും നടത്തി. പാര്‍ട്ടി സംസ്ഥാന വക്താവ് ഡോ. സാജു കണ്ണന്തറ ഉദ്ഘാടനം ചെയ്തു. ഡോ. സെലിന്‍ ഫിലിപ്പ്, ജോയി ആനിത്തോട്ടം, പ്രിന്‍സ് മാമ്മൂട്ടില്‍, സേവ്യര്‍ ജോസഫ് എന്നിവര്‍ പ്രസംഗിച്ചു.

വൈക്കം-പനമ്പുകാട് റോഡ് തകർന്നു

വൈക്കം: വൈക്കം നഗരസഭ , ഉദയനാപുരം പഞ്ചായത്ത് എന്നീ തദ്ദേശസ്വയംഭരണ സ്ഥാപനങ്ങളിലൂടെ കടന്നുപോകുന്ന വൈക്കം - പനമ്പുകാട് റോഡ് പൂർണമായി തകർന്ന് ഗതാഗതം ദുരിത പൂർണമായി.റോഡിലെ പനമ്പുകാടുഭാഗത്ത് വേമ്പനാട്ടുകായലിനോടുള്ള കലുങ്ക് പാലം തകർച്ചാഭിഷണിയിലായതോടെ പ്രദേശവാസികൾ ഭീതിയോടെയാണ് ഇതു വഴി കടന്നുപോകുന്നത്. വൈക്കം നഗരത്തിൽ നിന്നു മൂന്നുകിലോമീറ്ററോളം ദൈർഘ്യമുള്ള റോഡിലുടനീളം വൻകുഴികൾ രൂപപ്പെട്ടതോടെ കാൽനട പോലും ഇതുവഴി ദുഷ്കരമായി. വാഹനങ്ങൾക്ക് കേടുപാടുസംഭവിക്കുന്നത് പതിവായതോടെ രോഗികളെ ആശുപത്രിയിൽ കൊണ്ടുപോകുന്നതിന് വാഹനം വരാത്ത സ്ഥിതിയാണ്. സാധാരണക്കാർ തിങ്ങിപ്പാർക്കുന്ന പനമ്പുകാട്ടേക്ക് ഉണ്ടായിരുന്ന സ്വകാര്യ ബസും സർവീസ് നിർത്തിയിട്ട് വർഷങ്ങളായി. മത്സ്യ കക്ക വാരൽ തൊഴിലാളികളും കർഷക തൊഴിലാളികളും പാർക്കുന്ന പ്രദേശം റോഡ് പൂർണമായി തകർന്നതോടെ ഒറ്റപ്പെട്ട സ്ഥലമായിമാറിയെന്ന് നാട്ടുകാർ കുറ്റപ്പെടുത്തുന്നു. നേരേകടവ് - മാക്കേക്കടവ് കായൽ പാലം തീരുമ്പോൾ നഗരത്തിലേക്ക് ഗതാഗത കുരുക്ക് ഒഴിവാക്കി പോകാൻ ഉപകരിക്കുന്ന ബൈപാസ് റോഡായി പനമ്പുകാട് -വൈക്കം റോഡ് മാറും. തുറമുഖ വകുപ്പിനാണ് ഈ റോഡിന്‍റെ നിർമ്മാണച്ചുമതല. ടിവി പുരം പഞ്ചായത്തിൽ കോട്ടച്ചിറ മുതൽ പഴുതുള്ളി വരെ കോടികൾ മുടക്കി ആധുനിക നിലവാരത്തിൽ കോൺക്രീറ്റ് റോഡുനിർമ്മിച്ച തരത്തിൽ വൈക്കം - പനമ്പുകാട് റോഡ് നിർമ്മിക്കണമെന്നാണ് നാട്ടുകാരുടെ ആവശ്യം .

ട്രെയിന്‍ തട്ടി പരിക്കേറ്റു

കടുത്തുരുത്തി: ട്രെയിന്‍ തട്ടി റിട്ട. ഫോറസ്റ്റ് ഓഫീസര്‍ക്ക് ഗുരുതര പരിക്ക്. തിരുവനന്തപുരം കേശവദാസപുരം രാധാഭവനില്‍ നാരായണപിള്ള (75)യ്ക്കാണ് പരിക്കേറ്റത്. ബുധനാഴ്ച ഉച്ചയ്ക്ക് പിറവം റോഡ് റെയില്‍വേ സ്റ്റേഷനില്‍നിന്നു തിരുവനന്തപുരത്തേക്കു പോകുന്ന പരശുറാം എക്‌സ്പ്രസാണ് തട്ടിയത്. ട്രെയിന്‍ വരുന്നത് കണ്ട് ട്രാക്കിലൂടെ പ്ലാറ്റ്‌ഫോമിലേക്ക് കയറാന്‍ ശ്രമിക്കുന്നതിനിടെ തട്ടി വീഴുകയായിരുന്നു. പിറവത്ത് സുഹൃത്തിന്‍റെ വീട്ടില്‍ പോയ ശേഷം തിരുവനന്തപുരത്തേക്ക് പോകാന്‍ പിറവം റോഡ് റെയില്‍വേ സ്റ്റേഷനിൽ എത്തിയപ്പോഴാണ് അപകടം. കൈക്കും വാരിയെല്ലിനും പരിക്കേറ്റ നാരായണപിള്ളയെ വെള്ളൂര്‍ പോലീസ് കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

കെഎസ്ഇബി ഓഫീസ് കുറുപ്പന്തറയില്‍ത്തന്നെ

കുറുപ്പന്തറ: പ്രതിഷേധങ്ങള്‍ക്കൊടുവില്‍ കുറുപ്പന്തറ ബസ് സ്റ്റാന്‍ഡില്‍ മാഞ്ഞൂര്‍ പഞ്ചായത്തുവക ഷോപ്പിംഗ് കോംപ്ലക്‌സില്‍ പ്രവര്‍ത്തിക്കുന്ന കെഎസ്ഇബി ഓഫീസ് കുറുപ്പന്തറയില്‍ത്തന്നെ നിലനിര്‍ത്താന്‍ തീരുമാനം. പഞ്ചായത്ത് കമ്മിറ്റി ഇക്കാര്യത്തിനായി പ്രമേയം‍ പാസാക്കി വൈദ്യുതി വകുപ്പ് മന്ത്രി കെ.എന്‍. കൃഷ്ണന്‍കുട്ടിയെ നേരില്‍കണ്ട് കൈമാറിയിരുന്നു. ഇതേത്തുടര്‍ന്നാണ് നടപടി. ഷോംപ്പിംഗ് കോംപ്ലക്‌സ് പ്രവര്‍ത്തിക്കുന്ന കെട്ടിടത്തിന്‍റെ അറ്റകുറ്റപ്പണികള്‍ക്കായി പഞ്ചായത്ത് അഞ്ചുലക്ഷം രൂപ വകയിരുത്തുകയും ഇതു പാസാക്കുകയും ചെയ്തിട്ടുണ്ട്. ഇതിന്‍റെ ടെന്‍ഡര്‍ നടപടികള്‍ ഉടന്‍ പൂര്‍ത്തിയാക്കി പണികള്‍ നടത്തും. ഇക്കാര്യം മന്ത്രിയെ കണ്ട് പഞ്ചായത്തധികാരികള്‍ ബോധിപ്പിച്ചിട്ടുണ്ട്. താത്കാലികമായി പഞ്ചായത്ത് നിര്‍ദേശിക്കുന്ന കെട്ടിടത്തിലേക്ക് പ്രവര്‍ത്തനം മാറ്റാനും ഷോപ്പിംഗ് കോപ്ലക്‌സിന്‍റെ അറ്റകുറ്റപ്പണികള്‍ പൂര്‍ത്തിയാകുന്ന മുറയ്ക്ക് ഓഫീസ് പ്രവര്‍ത്തനം വീണ്ടും ഇവിടെത്തന്നെ പുനഃരാരംഭിക്കാനുമാണ് മന്ത്രി നിര്‍ദേശം നല്‍കിയിരിക്കുന്നതെന്ന് പഞ്ചായത്ത് വൈസ് പ്രസിഡന്‍റ് ബിജു കൊണ്ടൂകാലാ അറിയിച്ചു. ഇതേത്തുടര്‍ന്ന് ബസ് സ്റ്റാന്‍ഡിനു സമീപത്ത് പ്രവര്‍ത്തിക്കുന്ന എസ്ബിഐയുടെ മുകള്‍നിലയിലോ സമീപത്തെ മറ്റു രണ്ട് കെട്ടിടങ്ങളിൽ ഏതെങ്കിലും ഒരു കെട്ടിത്തിലേക്കോ താത്കാലികമായി ഓഫീസ് പ്രവര്‍ത്തനം മാറ്റും. നിലവിലുള്ള കെട്ടിടം മഴയില്‍ ചോര്‍ന്നൊലിക്കുകയും ഫയലുകള്‍ നശിക്കുകയും ഷോർട്ട് സര്‍ക്യൂട്ട് ഉണ്ടാവുകയും ഉദ്യോഗസ്ഥര്‍ക്ക് ജോലി ചെയ്യുന്നതിന് ബുദ്ധിമുട്ട് ഉണ്ടാവുകയും ചെയ്യുന്ന സാഹചര്യമായിരുന്നു. പലയിടത്തും ഭിത്തിയും മേല്‍ത്തട്ടും പൊട്ടിപ്പൊളിഞ്ഞു വീഴുകയാണ്. ഇതോടെ കെഎസ്ഇബി ഓഫീസിന്‍റെ പ്രവര്‍ത്തനം ഇവിടെനിന്നു മാറ്റാന്‍ നീക്കം നടന്നുവരികയായിരുന്നു. ഇലക്‌ട്രിസിറ്റി ഓഫീസ് ജനങ്ങളുടെ സൗകര്യാര്‍ഥം ബസ് സ്റ്റാന്‍ഡില്‍ത്തന്നെ നിലനിര്‍ത്തണമെന്ന് ആവശ്യപ്പെട്ട് ഗ്രാമ വികസനസമിതിയുടെ നേതൃത്വത്തില്‍ നിവേദനം നല്‍കുകയും കെഎസ്ഇബി ഓഫീസിന് മുമ്പില്‍ ധര്‍ണ നടത്തുകയും ചെയ്തിരുന്നു. പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍, വൈസ് പ്രസിഡന്‍റ് ബിജു കൊണ്ടുകാലാ എന്നിവരുടെ നേതൃത്വത്തില്‍ കെഎസ്ഇബി ഓഫീസ് മാറ്റുന്നതു സംബന്ധിച്ച് എഇയുമായി ചര്‍ച്ച നടത്തുകയും കെട്ടിടത്തിലെ സൗകര്യങ്ങള്‍ വിലയിരുത്തുകയും ചെയ്തു.

കന്യാസ്ത്രീകളുടെ അറസ്റ്റ് : കത്തോലിക്ക കോണ്‍ഗ്രസ് പ്രതിഷേധിച്ചു

കടുത്തുരുത്തി: മതപരിവര്‍ത്തനവും മനുഷ്യക്കടത്തും ആരോപിച്ചു കന്യാസ്ത്രീകളെ അറസ്റ്റ് ചെയ്തു ജയിലില്‍ അടച്ച സംഭവത്തില്‍ കാത്തോലിക്ക കോണ്‍ഗ്രസ് മാന്നാര്‍ യൂണിറ്റ് പ്രതിഷേധിച്ചു. ക്രിസ്ത്യന്‍ മിഷനറിമാര്‍ക്കെതിരേയുള്ള ബജ്‌രംഗ്ദള്‍, സംഘപരിവാര്‍ സംഘടനകള്‍ അക്രമണം അവസാനിപ്പിക്കണമെന്നും അക്രമികള്‍ക്കെതിരെ കര്‍ശന നടപടി സ്വീകരിക്കണമെന്നും യോഗം ആവശ്യപ്പെട്ടു.യൂണിറ്റ് പ്രസിഡന്‍റ് മനോജ് കടവന്‍റെകാലായില്‍ അധ്യക്ഷത വഹിച്ച യോഗം മാന്നാര്‍ പള്ളി വികാരി ഫാ. സിറിയക് കൊച്ചുകൈപ്പെട്ടിയില്‍ ഉദ്ഘാടനം ചെയ്തു. സെക്രട്ടറി സിറിയക് താഴത്തുവീട്ടില്‍, ജെറി പനക്കല്‍, സ്റ്റീഫന്‍ പാറവേലില്‍, ജോര്‍ജ് കൊച്ചുവടകര, ബാബു ചെഞ്ചേരില്‍, ജയിംസ് പുത്തന്‍കാല, സീന ജിന്‍സ് പീടികപറമ്പില്‍, വിപിന്‍ പാറാവേലില്‍, വില്‍സണ്‍ പീറ്റര്‍ തയ്യില്‍, ജോര്‍ജ് പറമ്പില്‍ എന്നിവര്‍ പ്രസംഗിച്ചു. വാലാച്ചിറ: ജനാധിപത്യമര്യാദകള്‍ കാറ്റില്‍ പറത്തി ചത്തീസ്ഗഡില്‍ കന്യാസ്ത്രീകള അറസ്റ്റ് ചെയ്തു ജയിലിലടച്ച ഭരണകൂട ഭീകരതയ്‌ക്കെതിരേ കത്തോലിക്ക കോണ്‍ഗ്രസ് വാലാച്ചിറ യൂണിറ്റ് പ്രതിഷേധിച്ചു. വ്യാജകേസുകള്‍ പിന്‍വലിക്കണമെന്ന് യോഗം ആവശ്യപ്പെട്ടു. ഫാ. ജോസഫ് മേയിക്കല്‍ ഉദ്ഘാടനം ചെയ്തു. യൂണിറ്റ് പ്രസിഡന്‍റ് സാബു സി. കല്ലിരിക്കുംകാലായില്‍, തോമസുകുട്ടി കൊച്ചു പറമ്പില്‍, ജോണ്‍ മുല്ലക്കര, സെബാസ്റ്റ്യന്‍ കാഞ്ഞിരത്തിങ്കല്‍ എന്നിവര്‍ പ്രസംഗിച്ചു.

അതിരമ്പുഴയിൽ പ്രതിഷേധ റാലിയും സമ്മേളനവും ഇന്ന്

അതിരമ്പുഴ: ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്തു തുറുങ്കിലടച്ച സംഭവത്തിൽ അതിരമ്പുഴയിൽ ഇന്ന് പ്രതിഷേധ റാലിയും സമ്മേളനവും നടത്തും. അതിരമ്പുഴ ഫൊറോനായിലെ വിവിധ ഇടവകകളുടെയും വിവിധ സംഘടനകളുടെയും നേതൃത്വത്തിലാണ് റാലിയും സമ്മേളനവും നടത്തുന്നത്. വൈകുന്നേരം 6.15ന് സെന്‍റ് മേരീസ് ഫൊറോനാ പള്ളിയിൽനിന്ന് ചന്തക്കടവിലേക്ക് പ്രതിഷേധറാലി ആരംഭിക്കും. റാലിക്കുശേഷം ടൗൺ കപ്പേളയ്ക്കു സമീപം നടത്തുന്ന സമ്മേളനത്തിൽ കടുത്തുരുത്തി ഫൊറോനാ വികാരി ഫാ. മാത്യു ചന്ദ്രൻകുന്നേൽ പ്രഭാഷണം നടത്തും. അതിരമ്പുഴ ഫൊറോന വികാരി ഫാ. മാത്യു പടിഞ്ഞാറേക്കുറ്റ്, കത്തോലിക്കാ കോൺഗ്രസ് ഫൊറോന പ്രസിഡന്‍റ് ജോയി പാറപ്പുറം എന്നിവർ പ്രസംഗിക്കും.

യുവാവിനെ ആക്രമിച്ചവർ പിടിയില്‍

ചിങ്ങവനം: യുവാവിനെ ആക്രമിച്ച് ബലമായി ഓട്ടോയില്‍ കയറ്റിക്കൊണ്ടുപോയി കൊല്ലുമെന്ന് ഭീഷണിപ്പെടുത്തിയ ‍ കേസില്‍ മൂന്നു യുവാക്കളെ ചിങ്ങവനം പോലീസ് അറസ്റ്റ് ചെയ്തു. പത്തനംതിട്ട നടക്കല്‍ ഭാഗം, മഠത്തിപ്പറമ്പ് വീട്ടില്‍ ലിബിന്‍ ഷാബി(32), പത്തനംതിട്ട, മല്ലപ്പള്ളി കട്ടത്തറ വീട്ടില്‍ ഷെറിന്‍ ദേവസ്യ(29), തൃക്കൊടിത്താനം, മാടപ്പള്ളി, അറുപറ വീട്ടില്‍ ജോസഫ് ജോസഫ്(30) എന്നിവരെയാണ് അറസ്റ്റ് ചെയ്തത്. ബുധനാഴ്ച വൈകുന്നേരം നാലിന് സൂരജ് എന്ന യുവാവിനെ കുറിച്ചി മന്ദിരം കവല ഭാഗത്തുവച്ച് പ്രതികള്‍ ദേഹോപദ്രവം ഏല്പിച്ച് ഓട്ടോറിക്ഷയില്‍ തട്ടിക്കൊണ്ടുപോവുകയും കൊല്ലുമെന്ന് പറഞ്ഞ് ഭീഷണിപ്പെടുത്തുകയും ചെയ്തെന്നാണു കേസ്. സംഭവത്തില്‍ കേസെടുത്ത് അന്വേഷണം നടത്തിയ ചിങ്ങവനം പോലീസ് ചങ്ങനാശേരി പാലാത്ര ഭാഗത്തുവച്ച് സൂരജിനെ കയറ്റിക്കൊണ്ടുപോയ ഓട്ടോറിക്ഷ കണ്ടെത്തുകയും പ്രതികള്‍ മൂന്നു പേരെയും അറസ്റ്റ് ചെയ്യുകയുമായിരുന്നു. എസ്എച്ച്ഒ അനില്‍കുമാര്‍, എഎസ്‌ഐ അഭിലാഷ്, സിപിഒമാരായ പ്രിന്‍സ്, ശ്രീലാല്‍, ഡ്രൈവര്‍ സിജോ എന്നിവരടങ്ങുന്ന പോലീസ് സംഘമാണ് പ്രതികളെ അറസ്റ്റ് ചെയ്തത്.

ശങ്കേഴ്‌സ് ചിത്രരചന, കാര്‍ട്ടൂണ്‍ മത്സരങ്ങള്‍ ഒന്പതിന്

കോട്ടയം: ദര്‍ശന സാംസ്‌കാരിക കേന്ദ്രവും ന്യൂഡല്‍ഹി ചില്‍ഡ്രന്‍സ് ബുക്ക് ട്രസ്റ്റും സംയുക്തമായി സംഘടിപ്പിക്കുന്ന അഖില കേരള ശങ്കേഴ്‌സ് ചിത്രരചന, കാര്‍ട്ടൂണ്‍ മത്സരങ്ങള്‍ കോട്ടയം ദര്‍ശന സാംസ്‌കാരിക കേന്ദ്രത്തില്‍ ഒമ്പതിനു നടത്തും. ഏഴു വിഭാഗങ്ങളിലായിട്ടാണ് മത്സരം. രാവിലെ പത്തിനു നഴ്‌സറി ക്ലാസ് മുതല്‍ നാലാംക്ലാസ് വരെയുള്ള കുട്ടികളുടെ പെയിന്‍റിംഗ് മത്സരവും സ്‌പെഷല്‍ സ്‌കൂള്‍ വിദ്യാര്‍ഥികള്‍ക്കുമുള്ള പ്രത്യേക കളറിംഗ് മത്സരവും കാര്‍ട്ടൂണ്‍ മത്സരവും നടക്കും. ഉച്ചകഴിഞ്ഞു രണ്ടിനു അഞ്ചാം ക്ലാസ് മുതല്‍ പ്ലസ് ടു വരെയുള്ള കുട്ടികളുടെ പെയിന്‍റിംഗ് മത്സരവും മുതിര്‍ന്നവര്‍ക്കുള്ള കാരിക്കേച്ചര്‍ മത്സരങ്ങളും നടക്കും. മുതിര്‍ന്നവര്‍ക്കായുള്ള കാരിക്കേച്ചര്‍ മത്സരത്തിന് പ്രായപരിധിയില്ല. എല്ലാ വിഭാഗങ്ങളിലും ഒന്നാംസ്ഥാനം ലഭിക്കുന്നവര്‍ക്ക് ന്യൂഡല്‍ഹി ബുക്ക് ട്രസ്റ്റ് വക വെള്ളി മെഡലുകളും കാഷ് അവാര്‍ഡുകളും ലഭിക്കും. കൂടാതെ മികച്ച പെയിന്‍റിംഗിനും കാര്‍ട്ടൂണിനും ശങ്കേഴ്സ് അവാര്‍ഡും ദര്‍ശന സാംസ്‌കാരിക കേന്ദ്രവും ഡിസി ബുക്‌സും നല്‍കുന്ന ട്രോഫികളും ഓരോ ഗ്രൂപ്പിലും 25 പ്രോത്സാഹന സമ്മാനങ്ങളും നല്‍കും. ഫോൺ: 9447008255, 9188520400.

ദ്വിദിന അന്താരാഷ്‌ട്ര സെമിനാറിന് ഇന്നുതുടക്കം

കോട്ടയം: കേരള കോളജ് ലൈബ്രേറിയന്‍സ് അസോസിയേഷന്‍ എംജി യൂണിവേഴ്‌സിറ്റി റീജന്‍റെയും ബിസിഎം കോളജിന്‍റെയും സംയുക്താഭിമുഖ്യത്തില്‍ എംജി യൂണിവേഴ്‌സിറ്റി കോളജ് ഡെവലപ്‌മെന്‍റ് കൗണ്‍സിലുമായി സഹകരിച്ച് കോളജില്‍ സംഘടിപ്പിക്കുന്ന ദ്വിദിന അന്താരാഷ്‌ട്ര സെമിനാറിനു ഇന്ന് തുടക്കം. ബിബ്ലിയോസ്ഫിയര്‍ 2025 എന്ന പേരില്‍ സംഘടിപ്പിക്കുന്ന ദ്വിദിന അന്താരാഷ്‌ട്ര സെമിനാര്‍ മന്ത്രി ഡോ.ആര്‍. ബിന്ദു ഉദ്ഘാടനം ചെയ്യും. ബിസിഎം കോളജ് മാനേജര്‍ ഫാ. ഏബ്രഹാം പറമ്പേട്ട് അധ്യക്ഷത വഹിക്കും. എംജി സര്‍വകലാശാല രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍, സര്‍വകലാശാല കോളജ് ഡെവലപ്‌മെന്‍റ് ഡയറക്ടര്‍ ഡോ. പി.ആര്‍. ബിജു, സിന്‍ഡിക്കറ്റ് അംഗങ്ങളായ ഡോ. ജോജി അലക്‌സ്, പ്രഫ.ഡോ.എ.എസ്. സുമേഷ്, കോളേജ് പ്രിന്‍സിപ്പല്‍ ഡോ. കെ.വി. തോമസ്, കോളജ് ലൈബ്രറിയന്‍സ് അസോസിയേഷന്‍ സംസ്ഥാന പ്രസിഡന്‍റ് ഡോ. ബീനാമോള്‍, സംസ്ഥാന സെക്രട്ടറി ഡോ. മുസ്തഫ, സംസ്ഥാന വൈസ് പ്രസിഡന്‍റ് ഡോ. അനറ്റ് സുമന്‍ ജോസ്, സംസ്ഥാന ട്രഷറര്‍ ഡോ. പി.സി. ബിനു തുടങ്ങിയവര്‍ സംബന്ധിക്കും. സ്വീഡന്‍, യുഎസ്എ എന്നീ രാജ്യങ്ങളിലെ യൂണിവേഴ്‌സിറ്റികളിൽനിന്നുള്ള വിദഗ്ധരും കേരളത്തില്‍നിന്നുള്ള ലൈബ്രേറിയന്മാരും വിവിധ വിഷയങ്ങള്‍ അവതരിപ്പിക്കും. സമാപനസമ്മേളനത്തില്‍ വിരമിച്ച ലൈബ്രേറിയന്മാരായ ഡോ. ചെറിയാന്‍ കെ. ജോര്‍ജ്, ബിജിമോള്‍ ജോസഫ്, സിസ്റ്റര്‍ മോണ്‍സിറ്റ എന്നിവരെ ആദരിക്കും.

ലൂര്‍ദിയന്‍ ബാസ്കറ്റ്ബോൾ ഫൈനല്‍ ഇന്ന്

കോട്ടയം: 20-ാമത് ലൂര്‍ദിയന്‍ ബാസ്‌കറ്റ് ബോള്‍ ടൂര്‍ണമെന്‍റിന്‍റെ ഫൈനല്‍ ഇന്ന് വൈകുന്നേരം നാലിന് ആരംഭിക്കും. പെണ്‍കുട്ടികളുടെ വിഭാഗത്തില്‍ ഇന്നലെ നടന്ന ക്വാര്‍ട്ടര്‍ ഫൈനല്‍ മത്സരങ്ങളില്‍ ചങ്ങനാശേരി എസ്എച്ചിനെ പരാജയപ്പെടുത്തി കോട്ടയം മൗണ്ട് കാര്‍മല്‍ (30-11 ), കോഴിക്കോട് സില്‍വര്‍ ഹില്‍സിനെ പരാജയപ്പെടുത്തി കോഴിക്കോട് പ്രൊവിഡന്‍സ് (28-10 ), ആലപ്പുഴ ജ്യോതിനികേതനെ പരാജയപ്പെടുത്തി കൊരട്ടി ലിറ്റില്‍ ഫ്‌ളവര്‍, ആലപ്പുഴ സെന്‍റ് മൈക്കിള്‍സിനെ പരാജയപ്പെടുത്തി കോട്ടയം എസ്എച്ച് മൗണ്ട് എന്നീ ടീമുകള്‍ സെമിഫൈനലില്‍ പ്രവേശിച്ചു. ആണ്‍കുട്ടികളുടെ വിഭാഗത്തില്‍ ഇരിഞ്ഞാലക്കുട ഡോണ്‍ ബോസ്‌കോയെ പരാജയപ്പെടുത്തി കോട്ടയം ലൂര്‍ദ് (61-20), കൊരട്ടി ലിറ്റില്‍ ഫ്ളവറിനെ പരാജയപ്പെടുത്തി വാഴക്കുളം കാര്‍മല്‍ സിഎംഐ (54-23), സെന്‍റ് ആന്‍സ് കുര്യനാടിനെ പരാജയപ്പെടുത്തി കിളിമല എസ്എച്ച് (57-51 ) ടീമുകള്‍ സെമിഫൈനലില്‍ പ്രവേശിച്ചു. ഇന്ന് രാവിലെ സെമിഫൈനല്‍ മത്സരങ്ങള്‍ നടക്കും. തുടര്‍ന്ന് വൈകുന്നേരം നാലിന് പെണ്‍കുട്ടികളുടെ വിഭാഗം ഫൈനലും അഞ്ചിന് ആണ്‍കുട്ടികളുടെ വിഭാഗം ഫൈനല്‍ മത്സരവും നടത്തപ്പെടും. ഫൈനല്‍ മത്സരങ്ങളെത്തുടര്‍ന്ന് വൈകുന്നേരം 6.30ന് നടക്കുന്ന സമാപന സമ്മേളനം കോട്ടയം ജില്ലാ വിജിലന്‍സ് ജഡ്ജ് കെ.വി. രജനീഷ് ഉദ്ഘാടനം ചെയ്യുകയും വിജയികള്‍ക്ക് സമ്മാനങ്ങള്‍ നല്‍കുകയും ചെയ്യും. ലൂര്‍ദ് സ്‌കൂള്‍ മാനേജര്‍ ഫാ. ജേക്കബ് വട്ടയ്ക്കാട്ട് അധ്യക്ഷത വഹിക്കുന്ന യോഗത്തില്‍ പ്രിന്‍സിപ്പല്‍ ഫാ. തോമസ് പാറത്താനം, വൈസ് പ്രിന്‍സിപ്പല്‍ ആന്‍സമ്മ ജോസഫ്, ടൂര്‍ണമെന്‍റ് കണ്‍വീനര്‍ സിജോ സൈമണ്‍ എന്നിവര്‍ പ്രസംഗിക്കും. .....

രാസവളം വിലവര്‍ധന: കർഷകർ മാര്‍ച്ചും ധര്‍ണയും നടത്തി

കോട്ടയം: കര്‍ഷകരുടെമേല്‍ സാമ്പത്തികഭാരം അടിച്ചേല്‍പിച്ച് രാസവളം വില വര്‍ധിപ്പിച്ച കേന്ദ്രസര്‍ക്കാരിന്‍റെ നടപടിക്കെതിരേ കര്‍ഷകരുടെ പ്രതിഷേധം. കേരള കര്‍ഷകസംഘത്തിന്‍റെ നേതൃത്വത്തില്‍ ഏരിയാ കേന്ദ്രങ്ങളിലേക്കും കേന്ദ്രസര്‍ക്കാര്‍ സ്ഥാപനങ്ങളിലേക്കും മാര്‍ച്ചും ധര്‍ണയും നടത്തി. എല്ലാത്തരം കൃഷികളെയും ബാധിക്കുന്ന തരത്തില്‍ വന്‍ വിലവര്‍ധനയാണ് കേന്ദ്രസര്‍ക്കാര്‍ നടപ്പാക്കിയിരിക്കുന്നത്. പൊട്ടാഷ് 50 കിലോ ചാക്കിന് 250 രൂപ വര്‍ധിപ്പിച്ചു. യൂറിയ വളം കിട്ടാനുമില്ല. വളത്തിനുള്ള സബ്സിഡി ഓരോ വര്‍ഷവും കേന്ദ്രസര്‍ക്കാര്‍ വെട്ടിക്കുറയ്ക്കുകയാണ്. കര്‍ഷകരെ ദുരിതത്തിലേക്ക് തള്ളിവിടുന്നതിനെതിരായ ശക്തമായ പ്രതിഷേധമാണ് നടന്നത്. കോട്ടയത്ത് ഹെഡ് പോസ്റ്റ് ഓഫീസിലേക്ക് നടന്ന മാര്‍ച്ച് കര്‍ഷകസംഘം ജില്ലാ പ്രസിഡന്‍റ് ജോസഫ് ഫിലിപ്പ് ഉദ്ഘാടനം ചെയ്തു. കോട്ടയം ഏരിയ സെക്രട്ടറി ടി.എം. രാജന്‍കുട്ടി അധ്യക്ഷത വഹിച്ചു. ജില്ലാ കമ്മിറ്റിയംഗം സുരേഷ് ജേക്കബ്, ഏരിയ എക്സിക്യൂട്ടിവംഗം രാഹുല്‍ പി. ജയകുമാര്‍ എന്നിവര്‍ പ്രസംഗിച്ചു. പാമ്പാടി: രാസവളം വിലവർധന പിൻവലിക്കണമെന്നാവശ്യപ്പെട്ട് കേരള കർഷകസംഘത്തിന്‍റെ നേതൃത്വത്തിൽ പാമ്പാടി പോസ്റ്റ് ഓഫീസിലേക്ക് മാർച്ചും ധർണയും നടത്തി. കർഷക സംഘം സംസ്ഥാന കമ്മറ്റിയംഗം പ്രഫ.ആർ. നരേന്ദ്രനാഥ് ഉദ്ഘാടനം ചെയ്തു. കെ.എസ്. ഗിരീഷ്, ഇ.കെ. കുര്യൻ, കെ.എസ്. പ്രതീഷ്, കെ.ജി. ബാബു, ഷിബു കുര്യൻ തുടങ്ങിയവർ പ്രസംഗിച്ചു.

അല്‍ഫോന്‍സാ തീര്‍ഥാടനം നാളെ

ചങ്ങനാശേരി: ചങ്ങനാശേരി അതിരൂപത ചെറുപുഷ്പ മിഷന്‍ലീഗിന്‍റെ ആഭിമുഖ്യത്തിൽ വിശുദ്ധ അല്‍ഫോന്‍സാമ്മയുടെ ജന്മഗൃഹത്തിലേക്കും കുടമാളൂര്‍ മേജര്‍ ആര്‍ക്കിഎപ്പിസ്‌കോപ്പല്‍ തീര്‍ഥാടന കേന്ദ്രത്തിലേക്കുമുള്ള 37-ാമത് അല്‍ഫോന്‍സാ തീര്‍ഥാടനം നാളെ നടക്കും. നാളെ രാവിലെ 5.30ന് അതിരമ്പുഴ, വെട്ടിമുകള്‍, ചെറുവാണ്ടൂര്‍, കോട്ടയ്ക്കപ്പുറം എന്നീ സ്ഥലങ്ങളില്‍നിന്ന് അതിരമ്പുഴ മേഖലയുടെ തീര്‍ഥാടനവും രാവിലെ 5.45ന് പാറേല്‍ മരിയന്‍ തീര്‍ഥാടനകേന്ദ്രത്തില്‍നിന്ന് ചങ്ങനാശേരി, തുരുത്തി മേഖലകളുടെ തീര്‍ഥാടനവും ആരംഭിക്കും. കുടമാളൂര്‍ മേഖലയിലെ വിവിധ ശാഖകളില്‍നിന്നുള്ള തീര്‍ഥാടകര്‍ 6.45ന് പനമ്പാലം സെന്‍റ് മൈക്കിള്‍സ് ചാപ്പലില്‍ എത്തും. കോട്ടയം സിഎംഎസ് ഹൈസ്‌കൂള്‍ ഗ്രൗണ്ടില്‍നിന്ന് രാവിലെ 8.45ന് കോട്ടയം, നെടുംകുന്നം, മണിമല, തൃക്കൊടിത്താനം, ചെങ്ങന്നൂര്‍ മേഖലകളുടെ തീര്‍ഥാടനങ്ങളും 10.30ന് കുറുമ്പനാടം മേഖലയുടെ തീര്‍ഥാടനവും ആരംഭിക്കും. 33 കിലോമീറ്റര്‍ കാല്‍നടയായി സഞ്ചരിക്കുന്ന ചങ്ങനാശേരി, തുരുത്തി മേഖലകളുടെ തീര്‍ഥാടനം ഉച്ചകഴിഞ്ഞ് രണ്ടിന് അല്‍ഫോന്‍സാ ജന്മഗൃഹത്തില്‍ എത്തിച്ചേരും. ആലപ്പുഴ, എടത്വാ, പുളിങ്കുന്ന്, ചമ്പക്കുളം, മുഹമ്മ മേഖലകളിലെ തീര്‍ഥാടകര്‍ വിശുദ്ധ ചാവറയച്ചന്‍റെ കബറിടം സ്ഥിതി ചെയ്യുന്ന മാന്നാനം ആശ്രമദേവാലയത്തില്‍ അന്നേദിവസം രാവിലെ 9.45ന് എത്തിച്ചേര്‍ന്ന് മധ്യസ്ഥപ്രാര്‍ഥനയില്‍ പങ്കെടുക്കും. തുടര്‍ന്ന് തീര്‍ഥാടകര്‍ കുടമാളൂരിലേക്ക് പദയാത്രയായി നീങ്ങും. അമ്പൂരി, തിരുവനന്തപുരം, കൊല്ലം-ആയൂര്‍ മേഖലകളില്‍ നിന്നുള്ള തീര്‍ഥാടകരും വിവിധ സമയങ്ങളില്‍ എത്തിച്ചേരും. തീര്‍ഥാടകര്‍ക്കുള്ള നേര്‍ച്ചഭക്ഷണം കുടമാളൂര്‍ ഫൊറോന പള്ളിയില്‍ രാവില ഒമ്പതു മുതല്‍ വൈകുന്നേരം നാലുവരെയും വിവിധ സ്ഥലങ്ങളില്‍ വാഹന പാര്‍ക്കിംഗും ക്രമീകരിച്ചിട്ടുണ്ട്. വിവിധ ഫൊറോനകളില്‍നിന്നായി മിഷന്‍ലീഗ് പ്രവര്‍ത്തകര്‍ ഉള്‍പ്പെടെ കാല്‍ലക്ഷത്തിലധികം വിശ്വാസികള്‍ തീര്‍ഥാടനത്തില്‍ പങ്കെടുക്കും.

ടി.ഡി. ചാക്കോ അനുസ്മരണം നാളെ

കോട്ടയം: സാമൂഹ്യ സാംസ്‌കാരിക ട്രേഡ് യൂണിയന്‍ രംഗങ്ങളില്‍ സജീവ സാന്നിധ്യമായിരുന്ന ടി.ഡി. ചാക്കോയുടെ 14-ാം അനുസ്മരണം മുടിയൂര്‍ക്കര ഗവൺമെന്‍റ് എല്‍പി സ്‌കൂള്‍ ഹാളില്‍ നാളെ നടക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്യും. പിടിഎ പ്രസിഡന്‍റ് കെ.സി. അഗസ്റ്റിന്‍ അധ്യക്ഷത വഹിക്കും. റവ.ഡോ. ഫിലിപ് നെല്‍പുരപ്പറമ്പില്‍ അനുഗ്രഹ പ്രഭാഷണം നടത്തും. കൗണ്‍സിലര്‍ സാബു മാത്യു, റ്റി.ഡി. ചാക്കോ സ്മാരക വിദ്യാഭ്യാസ സ്‌കോളര്‍ഷിപ്പുകള്‍ വിതരണം ചെയ്യും. ലേണിംഗ് ഡിസെബിലിറ്റി ട്രെയിനര്‍ ലിസ്യൂ ഫ്‌ളവര്‍ ആന്‍റണി, മാനവികം ഡയറക്ടര്‍ ഡോ. ഷാജി ജോസഫ്, പി.എന്‍. ശ്രീകുമാര്‍, കെ.എസ്. മാത്യു, കെ. സിന്ധു, എന്നിവര്‍ പ്രസംഗിക്കും.

സിദ്ധാര്‍ത്ഥ ശിവ ചലച്ചിത്രമേള ഇന്ന് ആരംഭിക്കും

കോട്ടയം: ദര്‍ശന സാംസ്‌കാരിക കേന്ദ്രത്തിന്‍റെ സിനിമാ വിഭാഗമായ ചിത്രദര്‍ശന ഫിലിം സൊസൈറ്റിയുടെ ആഭിമുഖ്യത്തില്‍ സംഘടിപ്പിക്കുന്ന സിദ്ധാര്‍ത്ഥ ശിവ ചലച്ചിത്രോത്സവത്തിന് ഇന്ന് വൈകുന്നേരം അഞ്ചിന് ദര്‍ശന സാംസ്‌കാരിക കേന്ദ്രം ഓഡിറ്റോറിയത്തില്‍ തുടക്കം. സംവിധായകന്‍ സിദ്ധാര്‍ത്ഥ ശിവ ഫെസ്റ്റിവല്‍ ഉദ്ഘാടനം ചെയ്യും. മൂന്നു ദിവസങ്ങളിലായി ആറ് ചലച്ചിത്രങ്ങളാണ് പ്രദര്‍ശിപ്പിക്കുന്നത്. എന്നിവര്‍ ആണ് ഉദ്ഘാടന ചിത്രം. നാളെ രാവിലെ 10ന് ചതുരം, ഉച്ചകഴിഞ്ഞ് രണ്ടിന് സഹീര്‍, വൈകുന്നേരം അഞ്ചിന് 101 ചോദ്യങ്ങള്‍ എന്നീ ചിത്രങ്ങള്‍ പ്രദര്‍ശിപ്പിക്കും. മൂന്നിന് ഉച്ചകഴിഞ്ഞ് 2.30ന് ഐന്‍, വൈകുന്നേരം 5.30ന് ആണ് എന്നീ ചിത്രങ്ങള്‍ പ്രദര്‍ശിപ്പിക്കും. പ്രവേശനം സൗജന്യമാണ്.

കന്യാസ്ത്രീകളുടെ അറസ്റ്റ് : പ്രതിഷേധം അലയടിക്കുന്നു

ഭാരത സംസ്‌കാരത്തിനേറ്റ മുറിവ്: വിജയപുരം രൂപത വൈദിക സമ്മേളനം കോട്ടയം: ഛത്തീസ്ഗഡില്‍ മിഷനറി പ്രവര്‍ത്തനം നടത്തുന്ന രണ്ടു കന്യാസ്ത്രീകളെ വ്യാജ ആരോപണങ്ങള്‍ ഉന്നയിച്ച് തടവിലാക്കിയതും ജാമ്യം നിഷേധിച്ചതും ഭാരത സംസ്‌കാരത്തിനേറ്റ വലിയ മുറിവാണെന്നു വിജയപുരം രൂപത വൈദിക സമ്മേളനത്തിന്‍റെയും രൂപത പാസ്റ്ററല്‍ കൗണ്‍സിലിന്‍റെയും സംയുക്ത യോഗം പ്രസ്താവിച്ചു. പതിറ്റാണ്ടുകളായി കാരുണ്യപ്രവൃത്തികള്‍ ചെയ്യുന്ന ഈ മിഷനറിമാരെ മതപരിവര്‍ത്തനം നടത്തുന്നവരെന്ന് ആക്ഷേപിക്കുന്നതു തികച്ചും വേദനാജനകമാണ്. എത്രയും വേഗം നീതി നടപ്പാക്കണമെന്നും കന്യാസ്ത്രീകളെ മോചിപ്പിക്കാന്‍ കേന്ദ്ര-സംസ്ഥാന സര്‍ക്കാരുകള്‍ തീരുമാനിക്കണമെന്നും യോഗം ആവശ്യപ്പെട്ടു. അന്യായമായ ഈ സംഭവത്തിലുള്ള വിജയപുരം രൂപതയുടെ പ്രതിഷേധം യോഗം രേഖപ്പെടുത്തി. ബിഷപ് ഡോ. സെബാസ്റ്റ്യന്‍ തെക്കത്തെച്ചേരില്‍ അധ്യക്ഷതയില്‍ വഹിച്ചു. സഹായമെത്രാന്‍ ബിഷപ് ഡോ. ജെസ്റ്റിന്‍ മഠത്തില്‍പ്പറമ്പില്‍, ഫാ. വര്‍ഗീസ് കോട്ടക്കാട്ട്, ഫാ. അജി ചെറുകാക്രാഞ്ചേരില്‍ എന്നിവര്‍ പ്രസംഗിച്ചു. ഹെഡ് പോസ്റ്റ് ഓഫീസ് ഉപരോധിച്ചു കോട്ടയം: ഛത്തീസ്ഗഡില്‍ തടവില്‍ കഴിയുന്ന സിസ്റ്റര്‍മാരുടെ ജാമ്യാപേക്ഷയെ എതിര്‍ത്ത ബിജെപി സര്‍ക്കാരിന്‍റെ നടപടിയില്‍ പ്രതിഷേധിച്ച് കെഎസ്‌സി-എം സംസ്ഥാന കമ്മിറ്റിയുടെ ആഭിമുഖ്യത്തില്‍ കോട്ടയം ഹെഡ് പോസ്റ്റ് ഓഫീസ് ഉപരോധിച്ചു. പോസ്റ്റ് ഓഫീസ് കവാടത്തില്‍ പ്രവര്‍ത്തകരെ പോലീസ് തടഞ്ഞു. ഉപരോധ സമരം കെഎസ്‌സി -എം സംസ്ഥാന പ്രസിഡന്‍റ് ബ്രൈറ്റ് വട്ടനിരപ്പേല്‍ ഉദ്ഘാടനം ചെയ്തു. ജോ തോമസ്, ജേക്കബ് ഷൈന്‍, റോഷന്‍ ചുവപ്പുങ്കല്‍, അമല്‍ ചാമക്കാല, ലിയോ ജോളി, വിനയ് വര്‍ഗീസ്, ഡൈനോ കുളത്തൂര്‍, ബോണി തടത്തില്‍, ലിബിന്‍ ബിജോയ്, സ്റ്റീവ് സ്റ്റീഫന്‍, അമല്‍ മോന്‍സി, ശരണ്‍ സജി എന്നിവര്‍ പ്രസംഗിച്ചു. പോസ്റ്റ് ഓഫീസ് ഉപരോധത്തിനു മുന്പ് കെഎസ്‌സി-എം പ്രവര്‍ത്തകര്‍ നഗരത്തില്‍ പ്രകടനം നടത്തി. കന്യാസ്ത്രീകളുടെ മോചനത്തിൽ പ്രധാനമന്ത്രിയും മന്ത്രിമാരും ഇടപെടണം: കേരള കര്‍ഷക യൂണിയന്‍ കോട്ടയം: ഛത്തീസ്ഗഡില്‍ മലയാളികളായ സിസ്റ്റേഴ്‌സിനെ അവര്‍ നല്‍കിയ വിശദീകരണം പരിഗണിക്കാതെ പോലീസ് അറസ്റ്റ് ചെയ്തു ജയിലിലാക്കിയ സംഭവം ഭരണഘടന അനുവദിച്ചു നല്‍കുന്ന മൗലികാവകാശങ്ങളിലുള്ള കടന്നുകയറ്റവും ന്യൂനപക്ഷാവകാശ ലംഘനവുമാണെന്ന് കേരള കര്‍ഷക യൂണിയന്‍ സംസ്ഥാനകമ്മിറ്റി. കന്യാസ്ത്രീകളെ ആള്‍ക്കൂട്ട വിചാരണയ്ക്ക് വിധേയരാക്കിയത് നിയമ സംവിധാനങ്ങള്‍ പക്ഷപാതപരമായി പെരുമാറുന്നുവെന്നതിന്‍റെ തെളിവാണ്. ബജ്‌രംഗ്ദള്‍പോലുള്ള തീവ്രവാദ സംഘടനകള്‍ രാജ്യത്തിന്‍റെ ഭരണഘടനാ സംരക്ഷകരാകുന്നത് അപകടകരമാണ്. എംപിമാര്‍ ആവശ്യപ്പെട്ടിട്ടും കന്യാസ്ത്രീകളുടെ പേരിലുള്ള കേസുകള്‍ പിന്‍വലിച്ചു ജയിലില്‍നിന്നും പുറത്തിറക്കാനുള്ള സാഹചര്യം രൂപപ്പെടാത്തതിനാല്‍ പ്രധാനമന്ത്രിയും കേന്ദ്ര ആഭ്യന്തര- നിയമ- ന്യൂനപക്ഷ വകുപ്പ് മന്ത്രിമാരും അടിയന്തരമായി ഇടപെടണമെന്ന് കേരള കര്‍ഷക യൂണിയന്‍ സംസ്ഥാന പ്രസിഡന്‍റ് വര്‍ഗീസ് വെട്ടിയാങ്കല്‍, സംസ്ഥാന ജനറല്‍ സെക്രട്ടറി ജോസ് ജയിംസ് നിലപ്പന എന്നിവര്‍ ആവശ്യപ്പെട്ടു.

മിന്നൽ വഴി!

മുണ്ടക്കയം-വാഗമൺ ഈരാറ്റുപേട്ട: നാഷണൽ ഹൈവേ 183ൽ മുണ്ടക്കയത്തുനിന്നു തുടങ്ങി കൂട്ടിക്കൽ- ഏന്തയാർ-ഇളംകാട് വഴി വല്യേന്തയിൽ എത്തിനിൽക്കുന്ന ബിഎംബിസി നിലവാരത്തിലുള്ള സംസ്ഥാനപാത ഏഴു കിലോമീറ്റർ കൂടി പുതിയ റോഡ് നിർമിച്ച് വാഗമണിൽ എത്തിക്കും. പുതിയ മുണ്ടക്കയം - വാഗമൺ റോഡ് യാഥാർഥ്യമാക്കാൻ 17 കോടി രൂപ അനുവദിച്ചു. നിർമാണത്തിന് ടെൻഡർ ക്ഷണിച്ചതായി സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. ഈ റോഡ് യാഥാർഥ്യമാകുന്നതോടെ ടൂറിസ്റ്റ് കേന്ദ്രമായ വാഗമണിലേക്ക് എത്താനുള്ള ഏറ്റവും സൗകര്യപ്രദവും മികച്ചതുമായ പാതയായി മാറും. നാഷണൽ ഹൈവേയിൽനിന്നു നേരിട്ടു വാഗമണിലേക്ക് എത്താൻ കഴിയുന്നതും ഈ റോഡ് വഴിയാകും. എരുമേലി വിമാനത്താവളം യാഥാർഥ്യമാകുന്നതോടെ വിമാനമാർഗം എത്തിച്ചേരുന്ന ടൂറിസ്റ്റുകൾക്ക് എയർപോർട്ടിൽനിന്ന് 35 കിലോമീറ്റർ മാത്രം യാത്ര ചെയ്ത് വാഗമണിൽ എത്താം. മനംകവരും കാഴ്ചകൾ വല്യേന്ത മുതൽ വാഗമൺ വരെയുള്ള വാകച്ചുവട്, കോലാഹലമേട്, തങ്ങൾപ്പാറ എന്നീ പ്രദേശങ്ങൾ ഏറെ പ്രകൃതി രമണീയമായ സ്ഥലങ്ങളാണ്. എന്നാൽ, മതിയായ ഗതാഗത സൗകര്യങ്ങൾ ഇല്ലാത്തതു മൂലം ഈ പ്രദേശത്തേക്കു വിനോദ സഞ്ചാരികൾ കാര്യമായി എത്തിച്ചേർന്നിരുന്നില്ല. പുതിയ റോഡ് വരുന്നതോടെ ടൂറിസം വികസനത്തിനും വഴി തുറക്കും. ഇപ്പോൾ വാഗമണിന് ഉൾക്കൊള്ളാൻ കഴിയാത്ത വിധം വിനോദസഞ്ചാരികളുടെ ബാഹുല്യം പലപ്പോഴും അനുഭവപ്പെടുന്നുണ്ട്. അടിസ്ഥാന സൗകര്യങ്ങൾ കൂടുതൽ ഒരുക്കി വാഗമൺ വലിയ ടൂറിസം കേന്ദ്രമാക്കി മാറ്റാനുള്ള സാധ്യതകളുണ്ടെന്നും എംഎൽഎ അറിയിച്ചു. സുരക്ഷ ഉറപ്പാക്കി മികച്ച നിലവാരത്തിലാണ് റോഡ് ആസൂത്രണം ചെയ്തിട്ടുള്ളത്. ഓഗസ്റ്റ് 11 വരെ ടെൻഡർ സമർപ്പിക്കാം. 14ന് ടെൻഡർ ഓപ്പൺ ചെയ്യും.

മീനച്ചില്‍ നദീതട പദ്ധതി: തുക അനുവദിച്ച് സര്‍ക്കാര്‍

കോട്ടയം: മീനച്ചില്‍ നദീതട പദ്ധതിക്ക് തുടക്കമാകുന്നു. പദ്ധതിയുടെ പുനരുജ്ജീവനത്തിന് പഠനം നടത്താന്‍ തുക അനുവദിക്കുന്നതിന് മന്ത്രിസഭാ യോഗത്തില്‍ തീരുമാനമായതായി മന്ത്രി റോഷി അഗസ്റ്റിന്‍ അറിയിച്ചു. കേന്ദ്രസര്‍ക്കാര്‍ സ്ഥാപനമായ വാപ്കോട്സ് ലിമിറ്റഡിന് കണ്‍സള്‍ട്ടന്‍സി സേവനത്തിന് 2.13 കോടി രൂപയുടെ 25 ശതമാനമായ 54 ലക്ഷം രൂപ മൊബിലൈസേഷന്‍ അഡ്വാന്‍സ് അനുവദിക്കുന്നതിനാണ് മന്ത്രിസഭാ യോഗം അനുമതി നല്‍കിയത്. വിശദ പദ്ധതിരേഖ തയാറാക്കുന്നതിന് വാപ്‌കോസുമായി ജലസേചന വകുപ്പ് ധാരണാപത്രവും ഒപ്പിട്ടിരുന്നു. മൂലമറ്റം നിലയത്തിലെ വൈദ്യുതി ഉത്പാദനത്തിനുശേഷം അധികമുള്ള ജലം മീനച്ചിലാറ്റിലേക്കു തിരിച്ചുവിട്ട് വര്‍ഷം മുഴുവനും സുസ്ഥിരമായ ഒഴുക്ക് നിലനിര്‍ത്തുക എന്നതാണ് പദ്ധതിയുടെ ലക്ഷ്യം. കുടിവെള്ളത്തിനു പുറമേ മീനച്ചില്‍, കോട്ടയം, ചങ്ങനാശേരി താലൂക്കുകളില്‍ കൃഷിക്കായുള്ള ജലസേചനവും പദ്ധതി ലക്ഷ്യമിടുന്നു. മീനച്ചിലാറില്‍ വര്‍ഷം മുഴുവന്‍ ജലസമൃദ്ധമാകുന്നതോടെ കുടിവെള്ള ക്ഷാമം പരിഹരിക്കാനും കഴിയും. താഴ്ന്ന മേഖലയില്‍ വേനല്‍ക്കാലത്ത് ഓരുവെള്ളം കയറുന്നതു തടയാനും പദ്ധതി ഉപകരിക്കും. വെള്ളം വരുന്ന വഴി അറക്കുളം മൂന്നുങ്കവയലില്‍ ചെക്ഡാം പണിത് ഇവിടെനിന്ന് 500 മീറ്റര്‍ കനാല്‍ നിര്‍മിച്ച് അതിലൂടെ എത്തുന്ന വെള്ളം 6.5 കിലോമീറ്റര്‍ ടണല്‍ നിര്‍മിച്ച് അതിലൂടെ മൂന്നിലവ് പഞ്ചായത്തില്‍ എത്തിക്കും. ഇവിടെനിന്ന് 200 മീറ്റര്‍ ചാലുകീറി വെള്ളം കടപുഴയിലേക്ക് എത്തിക്കുന്നതാണ് പദ്ധതി. മുന്‍ മന്ത്രി കെ.എം. മാണി വിഭാവനം ചെയ്ത പദ്ധതിയാണിത്. അന്നു പഠന റിപ്പോര്‍ട്ട് ലഭിക്കുകയും ടണല്‍ അടിക്കാനായി ഭൂമിക്കടിയിലെ പാറ നിര്‍ണയിക്കാനുള്ള റിഫ്രാക്ഷന്‍ സര്‍വേക്ക് ബംഗളൂരു ആസ്ഥാനമായുള്ള ഏജന്‍സിയുമായി ചര്‍ച്ച പൂര്‍ത്തിയാക്കുകയും ചെയ്തിരുന്നു. പിന്നീട് സാങ്കേതിക കാരണങ്ങളാല്‍ പദ്ധതി വൈകുകയായിരുന്നു. എന്താണ് മീനച്ചില്‍ നദീതട പദ്ധതി വേനല്‍ക്കാലത്ത് വറ്റിവരളുന്ന മീനച്ചില്‍ നദി ജലസമൃദ്ധമാക്കുന്നതാണ് മീനച്ചില്‍ നദീതട പദ്ധതി. ‌ഇതു യാഥാര്‍ഥ്യമാകുന്നതോടെ നദിയില്‍നിന്നുള്ള വെള്ളത്തെയും അതില്‍നിന്ന് വെള്ളമെടുക്കുന്ന വിവിധ ജലസേചന, കുടിവെള്ള പദ്ധതികളെയും ആശ്രയിക്കുന്ന കര്‍ഷക സമൂഹത്തിന് വലിയ പിന്തുണയാകും.

അമിതവേഗത്തില്‍ വിദ്യാര്‍ഥി ഓടിച്ച കാര്‍ ഏഴ് വാഹനങ്ങളില്‍ ഇടിച്ചുകയറി അപകടം

കോട്ടയം: അമിതവേഗത്തില്‍ വിദ്യാര്‍ഥി ഓടിച്ച കാര്‍ ഏഴ് വാഹനങ്ങളില്‍ ഇടിച്ചുകയറി അപകടം. കോളജ് വിദ്യാര്‍ഥിയായ ജുബിന്‍ ലാലു ജേക്കബ് ഓടിച്ച വാഹനമാണ് അമിതവേഗത്തില്‍ വാഹനങ്ങളിലേക്ക് ഇടിച്ചുകയറി ഭീകരാന്തരീക്ഷം സൃഷ്ടിച്ചത്. കോട്ടയം സിഎംഎസ് കോളജ് ജംഗ്ഷന്‍ മുതല്‍ പനമ്പാലം വരെയുള്ള സ്ഥലങ്ങളിലെ വാഹനങ്ങളില്‍ ഇടിച്ചാണ് അപകടമുണ്ടായത്. ഇന്നലെ വൈകുന്നേരം 5.45 നാണ് സംഭവം. നാല് കിലോമീറ്ററിനിടയിലാണ് ഏഴ് വാഹനങ്ങളിലേക്ക് കാര്‍ ഇടിച്ചുകയറിയത്. അപകടത്തെത്തുടര്‍ന്ന് നിര്‍ത്താതെ പോയ വാഹനത്തെ പിന്തുടര്‍ന്ന് നാട്ടുകാര്‍ പിടികൂടാന്‍ ശ്രമിക്കുന്നതിനിടെ പനമ്പാലത്ത് മരത്തിലേക്ക് ഇടിച്ചുകയറുകയായിരുന്നു. അപകടത്തില്‍ കാര്‍ പൂര്‍ണമായും തകര്‍ന്നു. റോഡിലുണ്ടായിരുന്ന നിരവധി വാഹനങ്ങളെ ഇടിച്ച ശേഷം കാര്‍ നിര്‍ത്താതെ ഓടിച്ചുപോവുകയായിരുന്നു. ചുങ്കത്തും ചാലുകുന്നിലും കുടയംപടിയിലും കുടമാളൂരിലും വാഹനങ്ങളില്‍ ഇടിച്ചെങ്കിലും ജുബിന്‍ വണ്ടി നിര്‍ത്തിയില്ല. ഇതോടെയാണ് നാട്ടുകാര്‍ പിന്നാലെ കൂടിയത്. തുടര്‍ന്ന് പനമ്പാലത്ത് റോഡരികിലേക്ക് വാഹനം ഇടിച്ചുകയറുകയായിരുന്നു. ഡ്രൈവറെ പുറത്തിറക്കിയപ്പോള്‍ അർധ ബോധാവസ്ഥയിലായിരുന്നെന്നും ഇയാള്‍ മദ്യലഹരിയിലായിരുന്നെന്നും നാട്ടുകാര്‍ പറയുന്നു. കാറില്‍നിന്നു മദ്യകുപ്പി പോലീസ് കണ്ടെടുത്തിട്ടുണ്ടെന്നാണ് ലഭിക്കുന്ന വിവരം. വിവരമറിഞ്ഞ് ഗാന്ധിനഗര്‍, കോട്ടയം വെസ്റ്റ് പോലീസ് സംഘങ്ങള്‍ സ്ഥലത്തെത്തി. പോലീസ് ഇയാളെ കോട്ടയം മെഡിക്കല്‍ കോളജില്‍ പ്രവേശിപ്പിച്ചു.

ജില്ല ജൂണിയര്‍ അത്‌ലറ്റിക് മീറ്റ്; പാലാ അല്‍ഫോന്‍സ അത്‌ലറ്റിക് അക്കാദമി ഓവറോള്‍ ജേതാക്കള്‍

പാലാ: 68-ാമത് ജില്ല അത്ലറ്റിക് ചാമ്പ്യന്‍ഷിപ്പില്‍ പാലാ അല്‍ഫോന്‍സ അത്‌ലറ്റിക് അക്കാദമി 583 പോയിന്‍റുമായി ഓവറോള്‍ കിരീടം നിലനിര്‍ത്തി. 277 പോയിന്‍റുമായി അസംപ്ഷന്‍ കോളജ് ചങ്ങനാശേരി രണ്ടാം സ്ഥാനവും 254 പോയിന്‍റുമായി എസ്എംവിഎച്ച്എസ്എസ് പൂഞ്ഞാര്‍ മൂന്നാം സ്ഥാനവും നേടി. 160 പോയിന്‍റ് നേടിയ കാഞ്ഞിരപ്പള്ളി എസ്ഡി കോളജിനാണ് നാലാം സ്ഥാനം. 34 സ്വര്‍ണവും 32 വെള്ളിയും 22 വെങ്കലവും നേടിയാണ് പാലാ അല്‍ഫോന്‍സ അത്‌ലറ്റിക് അക്കാദമി ഓവറോള്‍ ജേതാക്കളായത്. വനിതകളുടെ 20 വയസില്‍ താഴെയുള്ള വിഭാഗത്തില്‍ അസംപ്ഷന്‍ കോളജ് ചങ്ങനാശേരി 199 പോയിന്‍റുമായി ഒന്നാമതും അല്‍ഫോന്‍സ അത്‌ലറ്റിക് അക്കാഡമി 146 പോയിന്‍റുമായി രണ്ടാമതുമെത്തി. പുരുഷന്മാരുടെ 20 വയസില്‍ താഴെയുള്ള വിഭാഗത്തില്‍ സെന്‍റ് ഡൊമിനിക്‌സ് കോളജ് കാഞ്ഞിരപ്പള്ളി 160 പോയിന്‍റുമായി ഒന്നാമതും 105 പോയിന്‍റുമായി എസ്ബി കോളജ് ചങ്ങനാശേരി രണ്ടാമതുമെത്തി. വനിതകളുടെ 18 വയസില്‍ താഴെയുള്ള വിഭാഗത്തില്‍ അല്‍ഫോന്‍സ അത്‌ലറ്റിക് അക്കാഡമി 113 പോയിന്‍റുമായി ഒന്നാമതും അസംപ്ഷന്‍ കോളജ് ചങ്ങനാശേരി 74 പോയിന്‍റുമായി രണ്ടാം സ്ഥാനവും നേടി. പുരുഷന്മാരുടെ 18 വയസില്‍ താഴെയുള്ള വിഭാഗത്തില്‍ അല്‍ഫോന്‍സ അത്‌ലറ്റിക് അക്കാദമി 110 പോയിന്‍റുമായി ഒന്നാമതും എസ്എംവിഎച്ച്എസ്എസ് പൂഞ്ഞാര്‍ 52 പോയിന്‍റുമായി രണ്ടാം സ്ഥാനവും നേടി. പെണ്‍കുട്ടികളുടെ 16 വയസില്‍ താഴെയുള്ള വിഭാഗത്തില്‍ 82 പോയിന്‍റുമായി എസ്എച്ച് ജിഎച്ച്എസ്എസ് ഭരണങ്ങാനം ഒന്നാമതും അല്‍ഫോന്‍സ അത്‌ലറ്റിക് അക്കാഡമി 64 പോയിന്‍റുമായി രണ്ടാം സ്ഥാനവും നേടി. ആണ്‍കുട്ടികളുടെ 16 വയസില്‍ താഴെയുള്ള വിഭാഗത്തില്‍ 64 പോയിന്‍റുമായി എസ്എം വിഎച്ച്എസ്എസ് പൂഞ്ഞാര്‍ ഒന്നാം സ്ഥാനത്തും 51 പോയിന്‍റുമായി എംഡിഎസ് എച്ച്എസ്എസ് കോട്ടയം രണ്ടാം സ്ഥാനവും നേടി. പെണ്‍കുട്ടികളുടെ 14 വയസില്‍ താഴെയുള്ള വിഭാഗത്തില്‍ എസ്എച്ച് ജിഎച്ച്എസ്എസ് ഭരണങ്ങാനം 62.5 പോയിന്‍റുമായി ഒന്നാമതും അല്‍ഫോന്‍സ അത്റ്റിക് അക്കാഡമി 54 പോയിന്‍റുമായി രണ്ടാമതുമെത്തി. ആണ്‍കുട്ടികളുടെ 14 വയസില്‍ താഴെയുള്ള വിഭാഗത്തില്‍ 56 പോയിന്‍റുമായി അല്‍ഫോന്‍സ അത്‌ലറ്റിക് അക്കാദമി ഒന്നാം സ്ഥാനത്തും കോട്ടയം എന്‍ഐഎസ് അക്കാദമി 45 പോയിന്‍റുമായി രണ്ടാം സ്ഥാനത്തുമെത്തി. സമാപന സമ്മേളനത്തില്‍ ജില്ലാ അത് ലറ്റിക് അസോസിയേഷന്‍ പ്രസിഡന്‍റ് ഫാ. മാത്യു കരീതറ സമ്മാനദാനം നിര്‍വഹിച്ചു. സംസ്ഥാന അത്‌ലറ്റിക് അസോസിയേഷന്‍ പ്രതിനിധി പ്രവീണ‍ തരിയന്‍, ഡോ. ജിമ്മി ജോസഫ്, റോയി സ്‌കാറിയ, ഡോ. സിനി തോമസ്, ഡോ. ബോബന്‍ ഫ്രാന്‍സിസ്, ഡോ. തങ്കച്ചന്‍ മാത്യു എന്നിവര്‍ പ്രസംഗിച്ചു.

പൈക ആശുപത്രി ജംഗ്ഷനില്‍ ബസ് കാത്തിരിപ്പുകേന്ദ്രം നിര്‍മിക്കും

പൈക: ഗവണ്‍മെന്‍റ് ആശുപത്രി ജംഗ്ഷനില്‍ പൊന്‍കുന്നം ഭാഗത്തേക്ക് പോകുവാനുള്ള ബസ് യാത്രികര്‍ക്കുള്ള കാത്തിരിപ്പുകേന്ദ്രത്തിന് തറക്കല്ലിട്ടു. പൈക ആശുപത്രി കെട്ടിടം നിലവില്‍ വന്ന ശേഷം വര്‍ഷങ്ങളായി ഇവിടെ ഒരു ബസ് കാത്തിരിപ്പുകേന്ദ്രം ഇല്ലായിരുന്നു. എലിക്കുളം, കാഞ്ഞിരപ്പള്ളി, ചിറക്കടവ് പഞ്ചായത്തുകളില്‍ നിന്നെത്തുന്ന രോഗികള്‍ക്ക് ഈ ബസ് കാത്തിരിപ്പു കേന്ദ്രം ആശ്വാസമാകും. പൈക ജ്യോതി പബ്ലിക് സ്‌കൂൾ അധികൃതരുടെയും പഞ്ചായത്തംഗം മാത്യൂസ് പെരുമനങ്ങാടന്‍റെയും വര്‍ഷങ്ങളായുള്ള ശ്രമംകൂടിയാണ് ഇവിടെ സഫലമാകുന്നത്. ആശുപത്രിയിലെത്തുന്ന പൊന്‍കുന്നം ഭാഗത്തുള്ള യാത്രക്കാര്‍ക്കും രോഗികള്‍ക്കും ഇരിക്കുവാനോ, മഴയത്തു കയറി നില്ക്കുവാനോ സൗകര്യമുണ്ടായിരുന്നില്ല. പൈക ജോതി പബ്ലിക് സ്‌കൂളാണ് ബസ് കാത്തിരിപ്പു കേന്ദ്രത്തിന്‍റെ നിര്‍മാണം നടത്തുന്നത്. പൈക സെന്‍റ് ജോസഫ്സ് പള്ളി വികാരി ഫാ. മാത്യു വാഴയ്ക്കപാറയില്‍ തറക്കല്ലിടീല്‍ നിര്‍വഹിച്ചു. എലിക്കുളം പഞ്ചായത്തംഗം മാത്യൂസ് പെരുമനങ്ങാട് അധ്യക്ഷത വഹിച്ചു. സ്‌കൂള്‍ പ്രിന്‍സിപ്പല്‍ സിസ്റ്റര്‍ ലിസറ്റ് കണിവേലില്‍, സിസ്റ്റര്‍ അല്‍ഫോന്‍സ മഠത്തിപ്പറമ്പില്‍, സിസ്റ്റര്‍ റെജിന്‍, ലിജോയ്‌സ് ചാക്കോ എന്നിവര്‍ സംബന്ധിച്ചു.

കിഴപറയാര്‍ കുടുംബാരോഗ്യ കേന്ദ്രത്തിന് ഓക്‌സിജന്‍ കോണ്‍സൻട്രേറ്ററുകള്‍ ലഭിച്ചു

പാലാ: മീനച്ചില്‍ പഞ്ചായത്തിലെ കുടുംബാരോഗ്യകേന്ദ്രമായ കിഴപറയാര്‍ കുടുംബാരോഗ്യ കേന്ദ്രത്തിന് ഓക്‌സിജന്‍ കോണ്‍സൻട്രേറ്ററുകള്‍ ലഭിച്ചു. ബ്‌ളോക്ക് മെംബറുടെ 2025 - 2026 പദ്ധതിയില്‍പ്പെടുത്തി പഞ്ചായത്തംഗം ഷിബു പൂവേലിയാണ് അഞ്ച് ഓക്‌സിജന്‍ കോണ്‍സൻട്രേറ്ററുകള്‍ അനുവദിച്ചത്. കുടുംബാരോഗ്യ കേന്ദ്രത്തില്‍ നടന്ന ചടങ്ങില്‍ മാണി സി. കാപ്പന്‍ എംഎല്‍എ കോണ്‍സൻട്രേറ്ററുകള്‍ കൈമാറി. ളാലം ബ്‌ളോക്ക് മെംബര്‍ ഷിബു പൂവേലി അധ്യക്ഷത വഹിച്ചു. മീനച്ചില്‍ പഞ്ചായത്ത് പ്രസിഡന്‍റ് സോജന്‍ തൊടുക, ജില്ലാ പഞ്ചായത്തംഗം രാജേഷ് വാളിപ്ലാക്കല്‍, ഡോ. ജോസ്‌ലി ഡാനിയേല്‍, സാജോ പൂവത്താനി, നളിനി ശ്രീധരന്‍, ടി.ബി. ബിജു, ഷാജി വെള്ളപ്പാട്, ടോമി മാമ്പക്കുളം,മാത്യു വെള്ളാപ്പാട്ട്, വിൻസന്‍റ് കണ്ടത്തിൽ, സണ്ണി വെട്ടം ,ജിനു വാട്ടപ്പളളി, എബിൻ വാട്ടപ്പള്ളി തുടങ്ങിയവര്‍ പ്രസംഗിച്ചു.

റിവര്‍വ്യൂ റോഡും ബൈപാസും: നിയമക്കുരുക്ക് സര്‍ക്കാര്‍ തലങ്ങളില്‍

പാലാ: പാലായുടെ സ്വപ്‌നപദ്ധതിയായ റിവര്‍വ്യൂ റോഡിന്‍റെയും ബൈപാസിന്‍റെയും അവശേഷിക്കുന്ന പണികള്‍ പൂര്‍ത്തിയാക്കുന്നതിനുള്ള നടപടികള്‍ സര്‍ക്കാര്‍തലത്തില്‍ ഇഴയുന്നു. മീനച്ചിലാറിന്‍റെ തീരത്തുകൂടി ജനറലാശുപത്രി ജംഗ്ഷന്‍ മുതല്‍ കൊട്ടാരമറ്റംവരെ തൂണുകളില്‍ പാലമായി തീര്‍ക്കുന്ന റിവര്‍വ്യൂ റോഡിനായി സ്വകാര്യ വ്യക്തിയുടെ കെട്ടിടമുള്ള സ്ഥലം ഏറ്റെടുക്കുന്നതിലുണ്ടായ പാളിച്ചയാണ് നിര്‍മാണം നിലയ്ക്കുവാന്‍ പ്രധാന കാരണം. പൊതുമരാമത്ത് വകുപ്പ് മൂല്യനിര്‍ണയം സംബന്ധിച്ച് രേഖകളുണ്ടായാല്‍ പാലാ ജനറലാശുപത്രിക്ക് മുന്നിലെ രണ്ടര സെന്‍റ് സ്ഥലം ഏറ്റെടുത്ത് കൈമാറാന്‍ തയാറാണന്ന് പാലാ ലാൻഡ് അക്വസിഷന്‍ തഹസില്‍ദാര്‍ ബിനു സെബാസ്റ്റ്യന്‍ പറഞ്ഞു. പൊതുമരാമത്ത് വകുപ്പിന്‍റെ റോഡ് പാലംവിഭാഗം മൂല്യനിര്‍ണയം നടത്തി ജില്ലാ ഓഫീസിന് കൈമാറിയിട്ടുണ്ട്. ഇത് ജില്ലാ കളക്ടര്‍ക്ക് നല്‍കാനുണ്ട്. ജില്ലാ കളക്ടറുടെ അറിയിപ്പ് എത്തിയാലുടന്‍ തുക കൈമാറി സ്ഥലം ഏറ്റെടുക്കുമെന്നും അദേഹം പറഞ്ഞു. പാലാ ബൈപാസ് റോഡിന്‍റെ മൂന്നാംഘട്ടത്തിലെ വളവുള്ള ഭാഗം നിവര്‍ത്തുന്നതിനുള്ള നടപടികളും നിയമ നടപടികളോടൊപ്പം സര്‍ക്കാര്‍ തലത്തിലുള്ള നടപടികളിലും കുരുങ്ങിക്കിടക്കുകയാണ്. അരുണാപുരം ഭാഗത്ത് മരിയന്‍ ജംഗ്ഷനില്‍ ഒരു വീടും സ്ഥലവുമാണ് ഏറ്റെടുക്കാനുള്ളത്. ഇവിടെ സ്ഥലമുടമ ഹൈക്കോടതിയെ സമീപിച്ചതിനെത്തുടര്‍ന്ന് നടപടികള്‍ നിശ്ചലമായിരുന്നു. പിന്നീട് വീണ്ടും ഭരണാനുമതി ലഭിക്കുന്നതിനായി പൊതുമരാമത്ത് വിഭാഗം സ്ഥലം പരിശോധിച്ച് ചീഫ് എന്‍ജിനിയറുടെ ഓഫീസിന് റിപ്പോര്‍ട്ട് നല്‍കിയതായി റോഡ് പാലംവിഭാഗം അധികൃതര്‍ അറിയിച്ചു. ചീഫ് എന്‍ജിനിയര്‍ പുതുക്കിയ ഭരണാനുമതിക്കായി സര്‍ക്കാരിന് അപേക്ഷ നല്‍കിയിട്ടുണ്ട്. പുതുക്കിയ ഭരണാനുമതി ലഭിച്ചാല്‍ തുടര്‍നടപടികള്‍ തുടങ്ങുമെന്നും പൊതുമരാമത്ത് അധികൃതര്‍ അറിയിച്ചു. ഹോട്ടലുടമയുടെ സ്ഥലം ഏറ്റെടുക്കാന്‍ തുടക്കത്തില്‍ വിട്ടുപോയതാണ് പ്രശ്നങ്ങള്‍ക്ക് കാരണമെന്ന് മാണി സി. കാപ്പന്‍ എംഎല്‍എ പറഞ്ഞു. പാലാ ബൈപാസിലെ സ്ഥലമുടമ കോടതിയെ സമീപിച്ചിട്ടുണ്ടങ്കിലും സര്‍ക്കാരിന് മറികടക്കാവുന്നതേയുള്ളൂവെന്നും അദ്ദേഹം പറഞ്ഞു.

കന്യാസ്ത്രീകളുടെ അറസ്റ്റ്: പ്രതിഷേധം തുടരുന്നു

ചേര്‍പ്പുങ്കല്‍: ഛത്തീസ്ഗഡില്‍ കന്യാസ്ത്രീകളെ അന്യായമായി ജയിലിലടച്ച നടപടിയില്‍ ചേര്‍പ്പുങ്കല്‍ ഫൊറോന ഇടവക സമൂഹം പ്രതിഷേധിച്ചു. ഫൊറോനാ പള്ളി അങ്കണത്തില്‍ ചേര്‍ന്ന പ്രതിഷേധ യോഗം വികാരി ഫാ. മാത്യു തെക്കേല്‍ ഉദ്ഘാടനം ചെയ്തു. അസിസ്റ്റന്‍റ് വികാരിമാരായ ഫാ. മാര്‍ട്ടിന്‍ കല്ലറക്കല്‍, ഫാ. അജിത്ത് പരിയാരത്ത്, ഫാ. ജോസഫ് മൂക്കന്‍തോട്ടം, ഫാ. എബി തകിടിയേല്‍, എകെസിസി യൂണിറ്റ് പ്രസിഡന്‍റ് മാര്‍ട്ടിന്‍ ജെ. കോലടി, ജില്ലാ പഞ്ചായത്ത് അംഗം ജോസ്‌മോന്‍ മുണ്ടയ്ക്കല്‍, പള്ളിയോഗം സെക്രട്ടറി ബേബിച്ചന്‍ കൊച്ചുപറമ്പില്‍ തുടങ്ങിയവര്‍ പ്രസംഗിച്ചു. ജയിലുകൾ സുവിശേഷ കേന്ദ്രങ്ങളാകും മേലുകാവുമറ്റം: ജയിലുകള്‍ സുവിശേഷ കേന്ദ്രങ്ങളാകുമെന്ന് മേലുകാവുമറ്റം സെന്‍റ് തോമസ് പള്ളി വികാരി റവ. ഡോ. ജോര്‍ജ് കാരംവേലില്‍. ഛത്തീസ്ഗഡില്‍ അന്യായമായി തടവിലാക്കപ്പെട്ട കന്യാസ്ത്രീകള്‍ക്ക് ഐക്യദാര്‍ഢ്യം പ്രഖ്യാപിച്ചു മേലുകാവുമറ്റം സെന്‍റ് തോമസ് പള്ളിയുടെ നേതൃത്വത്തില്‍ നടന്ന ഐക്യ പ്രഖ്യാപന ജാഗ്രതാ റാലിയില്‍ സന്ദേശം നല്‍കി പ്രസംഗിക്കുകയായിരുന്നു അദ്ദേഹം. ഫാ. ജോസഫ് കണ്ടപറമ്പത്, ജോണ്‍സണ്‍ പാമ്പക്കല്‍, ബെന്നി കൊച്ചുപറമ്പില്‍ എന്നിവര്‍ പ്രസംഗിച്ചു. ധർണ നടത്തി തിടനാട്: ഛത്തീസ്ഗഡില്‍ മലയാളി കന്യാസ്ത്രീകളെ അകാരണമായി അറസ്റ്റ് ചെയ്തതിനെതിരേ തിടനാട് യുഡിഎഫ് മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധ ധര്‍ണ സംഘടിപ്പിച്ചു. കേരള കോണ്‍ഗ്രസ് മണ്ഡലം പ്രസിഡന്‍റ് രമേശ് കുമ്മണ്ണൂര്‍ അധ്യക്ഷത വഹിച്ചു. ഡിസിസി സെക്രട്ടറി പ്രഫ. റോണി കെ. ബേബി ഉദ്ഘാടനം ചെയ്തു. കേരള കോണ്‍ഗ്രസ് ഉന്നതാധികാര സമിതിയംഗം സാബു പ്ലാത്തോട്ടം മുഖ്യപ്രഭാഷണം നടത്തി. യുഡിഎഫ് മണ്ഡലം കണ്‍വീനര്‍ സുരേഷ് കാലായില്‍, കോണ്‍ഗ്രസ് മണ്ഡലം പ്രസിഡന്‍റ് റോയി തുരുത്തിയില്‍, ബിനോ മുളങ്ങാശേരി, വര്‍ക്കിച്ചന്‍ വയമ്പോത്തനാല്‍, ഇമ്മാനുവല്‍ പുളിമൂട്ടില്‍, ജോസ് വടക്കേല്‍, പി.ജെ. ചാക്കോ പൊരിയത്ത്, മോഹനകുമാര്‍ കുമ്മണ്ണൂര്‍, ഓമന ഗോപാലന്‍ തുടങ്ങിയവര്‍ പ്രസംഗിച്ചു. ഏഴാച്ചേരി: കന്യാസ്ത്രീകള്‍ക്ക് നീതി വൈകുന്നതില്‍ എകെസിസി ഏഴാച്ചേരി യൂണിറ്റ് പ്രതിഷേധിച്ചു. വികാരി ഫാ. ലൂക്കോസ് കൊട്ടുകാപ്പള്ളി ഉദ്ഘാടനം ചെയ്തു. പ്രസിഡന്‍റ് ബിനോയി പള്ളത്ത് അധ്യക്ഷത വഹിച്ചു. സെക്രട്ടറി സജി പള്ളിയാരടിയില്‍, അജോ തൂണുങ്കല്‍, ജോമേഷ് നടയ്ക്കല്‍, റോയി പള്ളത്ത്, സോജന്‍ കവളക്കാട്ട്, സതീഷ് ഐക്കര, ബെന്നി ആലുങ്കല്‍, സാബു നെടുമ്പള്ളില്‍, ജയ്സണ്‍ കരിങ്ങോഴയ്ക്കല്‍ എന്നിവര്‍ പ്രസംഗിച്ചു. പാലാ: ഛത്തീസ്ഗഡില്‍ കന്യാസ്ത്രീകളെ നിയമവിരുദ്ധമായി അറസ്റ്റ് ചെയ്തതില്‍ പ്രതിഷേധിച്ച് ഇന്നു വൈകുന്നേരം ആറിന് പാലാ ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തില്‍ കരിശുപള്ളിക്കവലയില്‍ പ്രതിഷേധസമരം നടത്തും. ബ്ലോക്ക് പ്രസിഡന്‍റ് എന്‍. സുരേഷിന്‍റെ അധ്യക്ഷതയില്‍ ചേരുന്ന യോഗം തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്യും. പുഞ്ഞാർ: ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്ത് തുറങ്കിലിലടച്ച ബിജെപി ഗവൺമെന്‍റിന്‍റെ ന്യൂനപക്ഷവിരുദ്ധ സമീപനത്തിൽ പ്രതിഷേധിച്ച് ഐഎൻടിയുസി പൂഞ്ഞാർ റീജണൽ കമ്മിറ്റി പ്രതിഷേധിച്ചു. സംസ്ഥാന കമ്മിറ്റി അംഗം വി.ജെ. ജോസ് യോഗം ഉദ്ഘാടനം ചെയ്തു. റീജണൽ കമ്മിറ്റി പ്രസിഡന്‍റ് നാസർ പനച്ചി അധ്യക്ഷത വഹിച്ചു.

പാലാ ഇന്‍സ്റ്റിറ്റ്യൂട്ട് ഓഫ് ഹോസ്പിറ്റാലിറ്റി മാനേജ്മെന്‍റിന് 35 കോടിയുടെ ഭരണാനുമതി: ജോസ് കെ. മാണി എംപി

പാലാ: സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് ഹോസ്പിറ്റാലിറ്റി മാനേജ്മെന്‍റ് സ്ഥാപിക്കുന്നതിന് 35 കോടിയുടെ പുതിയ ഭരണാനുമതി ലഭ്യമായതായി ജോസ് കെ. മാണി എംപി അറിയിച്ചു. ധനമന്ത്രി കെ.എന്‍. ബാലഗോപാലുമായി നിരവധി തവണ ചര്‍ച്ച നടത്തുകയും മന്ത്രിതന്നെ നേരിട്ട് മുടങ്ങിക്കിടക്കുന്ന നിര്‍മാണ പ്രവര്‍ത്തനങ്ങള്‍ കണ്ടതിന്‍റെയും അടിസ്ഥാനത്തിലാണ് പുതുക്കിയ ഭരണാനുമതി. ധനമന്ത്രി ആവശ്യപ്പെട്ടതനുസരിച്ചു ധനകാര്യ ചീഫ് ടെക്‌നിക്കല്‍ എക്‌സാമിനറുടെ നേതൃത്വത്തില്‍ വിലയിരുത്തുകയും ചെയ്തു. അക്കാഡമിക് ബ്ലോക്കിന്‍റെ പൂര്‍ത്തീകരണത്തിനും പൂര്‍ണമായ പ്രവര്‍ത്തനത്തിനും 2021 -ലെ ഡിഎസ്ആര്‍ അടിസ്ഥാനമാക്കിയാണ് 3,513.47 ലക്ഷം തുകയ്ക്ക് പുതുക്കിയ ഭരണാനുമതി നല്‍കിയത്. നിലവിലെ കരാറുകാരനെ പിരിച്ചുവിട്ട് പുതിയ ടെന്‍ഡര്‍ നടപടികള്‍ ആരംഭിക്കണമെന്നും പുതുക്കിയ ഭരണാനുമതിപ്രകാരം കേന്ദ്ര ഗവണ്‍മെന്‍റിന്‍റെ ബാക്കിയുള്ള വിഹിതം ലഭ്യമാക്കുന്നതിന് ടൂറിസം ഡയറക്ടര്‍ ആവശ്യമായ നടപടി സ്വീകരിക്കണമെന്നും സര്‍ക്കാര്‍ ഉത്തരവിലുണ്ട്. കേന്ദ്ര ഗവണ്‍മെന്‍റിന്‍റെ ബാക്കിയുള്ള വിഹിതം ലഭ്യമാക്കുന്നതിന് സര്‍ക്കാരില്‍ ഇടപെടുമെന്നും എത്രയും പെട്ടെന്ന് സാങ്കേതികാനുമതി ലഭ്യമാക്കുവാന്‍ നിര്‍വഹണ ഏജന്‍സിയായ കെഐഐഡിസിയോട് ആവശ്യപ്പെട്ടിട്ടുണ്ടെന്നും ജോസ് കെ. മാണി എംപി അറിയിച്ചു. മുത്തോലി പുലിയന്നൂരിലെ ഇന്‍ഡ്യന്‍ ഇന്‍സ്റ്റിറ്റൂട്ട് ഓഫ് ഹോട്ടല്‍ മാനേജ്‌മെന്‍റിനായുള്ള 80 ശതമാനം പണികളും പൂര്‍ത്തിയായെങ്കിലും തുടര്‍ന്നുള്ള പണികള്‍ തടസമാവുകയായിരുന്നു. പുതുക്കിയ ഭരണാനുമതി ലഭ്യമാക്കിയതോടെ മുടങ്ങിയ നിര്‍മാണങ്ങള്‍ ഉടന്‍ പുനരാരംഭിക്കുമെന്നും അദ്ദേഹം പറഞ്ഞു.

മെഡിസിറ്റിയില്‍ ഹാര്‍ട്ട് ഫെയിലര്‍ ക്ലിനിക് പ്രവര്‍ത്തനമാരംഭിച്ചു

പാലാ: ഹൃദ്രോഗ സംബന്ധമായ രോഗങ്ങള്‍ നേരിടുന്നവര്‍ക്കായി മാര്‍ സ്ലീവാ മെഡിസിറ്റിയില്‍ കാര്‍ഡിയാക് സയന്‍സസ് വിഭാഗത്തിന്‍റെ നേതൃത്വത്തില്‍ പുതിയ ഹാര്‍ട്ട് ഫെയിലര്‍ ക്ലിനിക് ആരംഭിച്ചു. അനൂപ് ജേക്കബ് എംഎല്‍എ ഉദ്ഘാടനം നിര്‍വഹിച്ചു. ആധുനിക ചികിത്സകള്‍ ഒരു കുടക്കീഴില്‍ ഒരുക്കുന്ന മാര്‍ സ്ലീവാ മെഡിസിറ്റിയുടെ പ്രവര്‍ത്തനങ്ങള്‍ മാതൃകാപരമാണെന്ന് അദ്ദേഹം പറഞ്ഞു. ബിഷപ് മാര്‍ ജോസഫ് കല്ലറങ്ങാട്ട് അധ്യക്ഷത വഹിച്ചു. ആധ്യാത്മികമായ വീക്ഷണത്തോടു കൂടിയാണ് മാര്‍ സ്ലീവാ മെഡിസിറ്റിയുടെ ഓരോ പ്രവര്‍ത്തനങ്ങളുമെന്ന് ബിഷപ് പറഞ്ഞു. ഹാര്‍ട്ട് ഫെയിലര്‍ ക്ലിനിക്കിനെക്കുറിച്ച് കാര്‍ഡിയാക് സയന്‍സസ് വിഭാഗം മേധാവി ഡോ. രാംദാസ് നായിക് വിശദീകരിച്ചു. ആശുപത്രി മാനേജിംഗ് ഡയറക്ടര്‍ മോണ്‍. ഡോ.ജോസഫ് കണിയോടിക്കല്‍, ചീഫ് ഓഫ് മെഡിക്കല്‍ സര്‍വീസസ് എയര്‍ കോമഡോര്‍ ഡോ.പോളിന്‍ ബാബു എന്നിവര്‍ പ്രസംഗിച്ചു. ഹൃദ്രോഗികള്‍ക്കും ഹൃദ്രോഗലക്ഷണങ്ങള്‍ ഉള്ളവര്‍ക്കും ആധുനിക സമഗ്ര ചികിത്സകള്‍ ഉറപ്പാക്കുക എന്നതാണ് ക്ലിനിക്കിന്‍റെ ലക്ഷ്യം. ജന്മനാ ഹൃദ്രോഗബാധിതര്‍, ജീവിതശൈലി രോഗം നേരിടുന്നവര്‍, ഹൃദയത്തിന്‍റെ പമ്പിംഗ് കുറഞ്ഞവര്‍, ഹൃദ്രോഗ ചികിത്സ നടത്തിവരുന്നവര്‍ എന്നിവര്‍ക്കും ക്ലിനിക്കിന്‍റെ സേവനം പ്രയോജനപ്പെടും. ക്ലിനിക്കില്‍ ഉള്‍പ്പെടുന്നവര്‍ക്ക് വ്യക്തിഗത ചികിത്സാപദ്ധതികളും പ്രത്യേക കണ്‍സള്‍ട്ടേഷന്‍ പാക്കേജുകളും ലഭ്യമാകും. ഡോക്ടര്‍മാരുടെ പരിശോധനകളെ തുടര്‍ന്നാണ് ക്ലിനിക്കിലേക്ക് അര്‍ഹരായവരെ കണ്ടെത്തുന്നത്. എല്ലാ ദിവസവും ക്ലിനിക്കിന്‍റെ സേവനം ലഭ്യമാണ്. രോഗികള്‍ക്കായി പ്രത്യേക ഹെല്‍ത്ത് സ്‌ക്രീനിംഗ് കാര്‍ഡും ഉണ്ടാകും. വിദഗ്ധ ചികിത്സ ആവശ്യമുള്ളവര്‍ക്ക് 24 മണിക്കൂറും വിദഗ്ധരെ ബന്ധപ്പെടാനും അവസരമുണ്ട്. ക്ലിനിക്കിന്‍റെ ഭാഗമാകുന്നവര്‍ക്ക് പ്രത്യേക ചികിത്സാനിരക്കുകളും ലാബ് റേഡിയോളജി സേവനങ്ങള്‍ക്ക് പ്രത്യേക പരിഗണനകളും ലഭ്യമാണ്. പേഷ്യന്‍റ് കൗണ്‍സലിംഗ്, ഡയറ്റീഷ്യന്മാരുടെ സേവനം, കുടുംബാംഗങ്ങള്‍ക്കായി പ്രത്യേക കൗണ്‍സലിംഗ് തുടങ്ങിയ സേവനങ്ങളുമുണ്ട്. വിദഗ്ധ ഡോക്ടര്‍മാരുടെ മേല്‍നോട്ടത്തില്‍ 24 മണിക്കൂറും ആന്‍ജിയോപ്ലാസ്റ്റി സൗകര്യവും അത്യാധുനിക കാത്ത് ലാബും മാര്‍ സ്ലീവാ മെഡിസിറ്റിയുടെ പ്രത്യേകതയാണ്.

കോഴായിൽ ഫാം ഫെസ്റ്റ് വരുന്നു; നാടിന് ഉത്സവമാകും

കുറവിലങ്ങാട്: സയൻസ് സിറ്റിയും ജില്ലാ കൃഷിത്തോട്ടവും സംസ്ഥാന സീഡ് ഫാമും സമ്മാനിക്കുന്ന കാർഷിക കരുത്തിൽ കോഴായിൽ ഫാം ഫെസ്റ്റ് വരുന്നു. ഇതാദ്യമായാണ് ജില്ലാ കൃഷിത്തോട്ടവും സംസ്ഥാന സീഡ്ഫാമും ചേർന്ന് കാർഷികോത്സവത്തിന് ആതിഥ്യമരുളുന്നത്. ജില്ലയ്ക്കാകെ കാർഷിക മുന്നേറ്റത്തിനും ആസ്വാദനത്തിനുമുള്ള വഴിതുറക്കുന്നുവെന്നത് ഫാം ഫെസ്റ്റ് വലിയ മുന്നേറ്റമാക്കി മാറ്റും. സെപ്റ്റംബർ 26 മുതൽ നാലു ദിവസത്തേക്കാണ് അറിവും ആവേശവും ആനന്ദവും സമ്മാനിക്കുന്ന ഉത്സവം നടക്കുക. 70 ഏക്കറോളം വരുന്ന ജില്ലാ കൃഷിത്തോട്ടത്തിനും 25 ഏക്കറുള്ള സംസ്ഥാന സീഡ്ഫാമിലും വലിയ അറിവുത്സവമാകും നടക്കുന്നത്. ജില്ലാ കൃഷിത്തോട്ടത്തിലെ പറക്കത്താനം മലയാകും ഫെസ്റ്റിന്‍റെ ആകർഷണ ഇനം. പറക്കത്താനത്തേക്കു കാൽനടയായും വാഹനത്തിലും പോകുന്നതിനുള്ള ക്രമീകരണങ്ങൾ നടത്തും. കശുമാവ് തോട്ടത്തിന്‍റെ പേരിൽ അറിയപ്പെട്ടിരുന്ന പറക്കത്താനം മല ഇപ്പോൾ കാർഷിക സമൃദ്ധിയിലാണ് ശ്രദ്ധയാർജിക്കുന്നത്. വിവിധ വിനോദസൗകര്യങ്ങളും കായിക മത്സരങ്ങളും ഫാം ഫെസ്റ്റിന്‍റെ ഭാഗമാണ്. ഫാം ഫെസ്റ്റിന്‍റെ ഭാഗമായി വിവിധ കമ്മിറ്റികളുടെ രൂപീകരണവും തുടർപ്രവർത്തനങ്ങളും വരുംദിവസങ്ങളിൽ നടക്കും. കൃഷിവകുപ്പും കോട്ടയം ജില്ലാ പഞ്ചായത്തും ചേർന്നാണ് ഫാം ഫെസ്റ്റിനുള്ള ക്രമീകരണങ്ങൾ നടത്തുന്നത്.

കന്യാസ്ത്രീകളെ അറസ്റ്റ് ചെയ്ത സംഭവം: പ്രതിഷേധം തുടരുന്നു

മുണ്ടക്കയം: മലയാളി കന്യാസ്ത്രീകളെ കള്ളക്കേസ് ചുമത്തി അറസ്റ്റ് ചെയ്ത് ജയിലിലടച്ച ഛത്തീസ്ഗഡിലെ ബിജെപി സർക്കാരിന്‍റെ കിരാത നടപടിയിൽ പ്രതിഷേധിച്ച് മുണ്ടക്കയം ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ മുണ്ടക്കയത്ത് പ്രതിഷേധജ്വാല സംഘടിപ്പിച്ചു. ബ്ലോക്ക് പ്രസിഡന്‍റ് ബിനു മറ്റക്കര അധ്യക്ഷത വഹിച്ചു. കെപിസിസി ജനറൽ സെക്രട്ടറി പി.എ. സലിം ഉദ്ഘാടനം ചെയ്തു. പ്രകാശ് പുളിക്കൻ, റോയി കപ്പലുമാക്കൽ, വി.ടി. അയൂബ്ഖാൻ, കെ.എസ്. രാജു, സി.എ. തോമസ്, നാസർ പനച്ചി, വിജയമ്മ ബാബു, കെ.കെ. ജനാർദനൻ, സലിം കണ്ണങ്കര, മാഗി ജോസഫ്, ടി.ജെ. ജോൺസൺ, നൗഷാദ് ഇല്ലിക്കൽ, ടി.വി. ജോസഫ്, ബെന്നി ചേറ്റുകുഴി, ബോബി. കെ മാത്യു എന്നിവർ പ്രസംഗിച്ചു. മുണ്ടക്കയം: ഛത്തീസ്ഗഡില്‍ മനുഷ്യക്കടത്ത് ആരോപിച്ച് മലയാളി കന്യാസ്ത്രീകളെ അറസ്റ്റ് ചെയ്ത സംഭവം പ്രതിഷേധാര്‍ഹമാണെന്നും ഭരണഘടനാ വിരുദ്ധവും മനുഷ്യാവകാശ ലംഘനവുമായ നടപടി പിന്‍വലിക്കണമെന്നും കേരള കോണ്‍ഗ്രസ് മുണ്ടക്കയം മണ്ഡലം കമ്മിറ്റി ആവശ്യപ്പെട്ടു. ഇന്ത്യയില്‍ പലയിടങ്ങളിലായി നടന്നുകൊണ്ടിരിക്കുന്ന ന്യൂനപക്ഷവേട്ടയുടെ ഏറ്റവും ഒടുവിലത്തെ ഉദാഹരണമാണ് ഛത്തീസ്ഗഡില്‍ നടന്നത്. മതവര്‍ഗീയവാദികളുടെ കൈയിലെ മര്‍ദനോപാധിയായി പ്രവര്‍ത്തിക്കുകയാണ് സര്‍ക്കാരും പോലീസുമെന്നും യോഗം കുറ്റപ്പെടുത്തി. മണ്ഡലം പ്രസിഡന്‍റ് ഷാജി അറത്തിലിന്‍റെ അധ്യക്ഷതയില്‍ കൂടിയ യോഗം സംസ്ഥാന സെക്രട്ടറി സോണി തോമസ് ഉദ്ഘാടനം ചെയ്തു. ജിജി നിക്കോളാസ്, എം.വി. വര്‍ക്കി, അജീഷ് വേലനിലം, ജസ്റ്റിന്‍ ഡേവിഡ്, ജോണി ആലപ്പാട്ട്, തോമാച്ചന്‍ തടത്തില്‍, കുഞ്ഞുമോന്‍ അമ്പാട്ട് തുടങ്ങിയവര്‍ പ്രസംഗിച്ചു.

തെരുവുനായ ശല്യം: നടപടി ഉണ്ടാകാത്തതിൽ വെച്ചൂച്ചിറയിൽ പ്രതിഷേധം

റാന്നി: വെച്ചൂച്ചിറയിൽ വർധിച്ചുവരുന്ന തെരുവുനായ ശല്യത്തിൽ നടപടി വൈകുന്നതിൽ പ്രതിഷേധം. ഡിവൈഎഫ്ഐയുടെ നേതൃത്വത്തിൽ ഇന്നലെ പഞ്ചായത്ത് ഓഫീസിലേക്ക് മാർച്ച് നടത്തി. കഴിഞ്ഞദിവസം വിദ്യാർഥികളും വ്യാപാരിയും വഴിയാത്രക്കാരുമടക്കം അഞ്ചു പേർക്കാണ് തെരുവുനായയുടെ കടിയേറ്റത്. മാർക്കറ്റ് കവല ഭാഗങ്ങളിലായി എട്ടോളം തെരുവു നായ്ക്കൾക്കും കടിയേറ്റിട്ടുണ്ട്. കടിച്ച നായയ്ക്ക് പേവിഷബാധയുള്ളതായും സംശയിക്കുന്നു. ബുധനാഴ്ച വൈകുന്നേരം ട്യൂഷനുശേഷം വീട്ടിലേക്കു പോകാൻ സിഎംഎസ് എൽപി സ്കൂളിനു സമീപം നിന്നിരുന്ന വിദ്യാർഥിനിക്കാണ് നായയുടെ കടി ആദ്യം ഏറ്റത്. കൈയ്ക്കു ഗുരുതരമായി പരിക്കേറ്റ കുട്ടിയെ ആശുപത്രിയിൽ പ്രവേശിപ്പിച്ചു. വഴിയാത്രക്കാരനാണ് നായയെ വിരട്ടി ഓടിച്ചത്. പിന്നീട് കവല ഭാഗത്തേക്ക് ഓടിയ നായ വ്യാപാരിയായ വെച്ചൂച്ചിറ മോളോപറമ്പിൽ ജോജി ജോർജ്, കണ്ണംകേരിൽ ആലിയ , നിതീഷ് എന്നിവർ അടക്കം അഞ്ചു പേരെ കടിച്ചു. ഇതിനിടയിൽ ഈ ഭാഗത്ത് എട്ടോളം തെരുവുനായ്ക്കൾക്കും കടിയേറ്റതായിപറയുന്നു . കടിയേറ്റവരെ റാന്നി, കാഞ്ഞിരപ്പള്ളി താലൂക്കാശുപത്രികളിലും രണ്ടു പേരെ പിന്നീട് കോട്ടയം മെഡിക്കൽ കോളജ് ആശുപത്രിയിലും പ്രവേശിപ്പിച്ചു. നായയെ കണ്ടെത്താനാകാത്തതിനാൽ ഇതിനു പേ വിഷബാധ സ്ഥിരീകരിക്കാനുമായിട്ടില്ല.

കാഞ്ഞിരപ്പള്ളി രൂപത മെറിറ്റ് ഡേ ദിനാഘോഷം നാളെ

കാഞ്ഞിരപ്പള്ളി: രൂപത കോർപറേറ്റ് മാനേജ്മെന്‍റ് സ്കൂളുകളുടെ 2024-25 അധ്യയന വർഷത്തെ മെറിറ്റ് ഡേ നാളെ രണ്ടിന് കാഞ്ഞിരപ്പള്ളി സെന്‍റ് മേരീസ് ഗേൾസ് ഹൈസ്കൂൾ ഓഡിറ്റോറിയത്തിൽ നടക്കും. രൂപതാധ്യക്ഷൻ മാർ ജോസ് പുളിക്കൽ ഉദ്ഘാടനം നിർവഹിക്കും. രൂപതാ വികാരി ജനറാൾ ഫാ. ബോബി അലക്സ് മണ്ണംപ്ലാക്കൽ അധ്യക്ഷത വഹിക്കും. കോർപറേറ്റ് മാനേജർ ഫാ. ഡൊമിനിക് അയലൂപ്പറമ്പിൽ, സ്കൂൾ മാനേജർ സിസ്റ്റർ സലോമി സിഎംസി, ഹെഡ്മിസ്ട്രസ് നിസ ജോൺ, അക്കാദമിക് കൗൺസിൽ സെക്രട്ടറി ഡോ. ഡൊമിനിക് സാവിയോ എന്നിവർ പ്രസംഗിക്കും. വിവിധ മേഖലകളിൽ മികവ് പുലർത്തിയ സ്കൂളുകൾക്കുള്ള മാനേജേഴ്സ് ട്രോഫി വിതരണവും ദേശീയ, സംസ്ഥാന തലങ്ങളിൽ നേട്ടം കൈവരിച്ച വിദ്യാർഥികളെയും അധ്യാപകരെയും ആദരിക്കുന്നതുമാണ്.

രണ്ടു നൂറ്റാണ്ടിന്‍റെ പ്രകാശഗോപുരമായി സെന്‍റ് ഡൊമിനിക്സ് കത്തീഡ്രല്‍

കാഞ്ഞിരപ്പള്ളി: കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രല്‍ സ്ഥാപിതമായിട്ട് 200 വര്‍ഷം പൂര്‍ത്തിയാകുന്നു. 1825 ഓഗസ്റ്റ് നാലിന് വിശുദ്ധ ദുമ്മിനിങ്കോസിന്‍റെ (വിശുദ്ധ ഡൊമിനിക്) നാമത്തിലാണ് പുത്തന്‍പള്ളിയെന്ന് അറിയപ്പെടുന്ന പള്ളി സ്ഥാപിച്ചത്. പരിശുദ്ധ കന്യകമറിയത്തിന്‍റെ ഭക്തനും ജപമാലഭക്തി പ്രചരിപ്പിച്ച വിശുദ്ധനുമായ ഡൊമിനിക്കിന്‍റെ നാമധേയത്തില്‍ പള്ളി പണിതത് അക്കരയമ്മയോടുള്ള ബന്ധംമൂലമാണെന്നു കരുതപ്പെടുന്നു. 15-ാം നൂറ്റാണ്ടില്‍ നിലയ്ക്കലില്‍നിന്നു കുടിയേറിപ്പാര്‍ത്തവരാണ് കാഞ്ഞിരപ്പള്ളിയിലെ ക്രൈസ്തവസമൂഹം. ആദ്യകാലഘട്ടത്തില്‍ അരുവിത്തുറ പള്ളിയിലാണ് ആധ്യാത്മിക ആവശ്യങ്ങള്‍ക്കായി പോയിരുന്നത്. പിന്നീട് ചിറ്റാര്‍ പുഴയോരത്ത് 1449-ല്‍ അക്കരപ്പള്ളി സ്ഥാപിച്ചു. പലതവണ പുനരുദ്ധരിച്ച പഴയപള്ളിക്ക് വെള്ളപ്പൊക്കത്തില്‍ 1825-ല്‍ പല നാശനഷ്ടങ്ങളുമുണ്ടായി. ഇതോടെയാണ് വെള്ളം കയറാത്ത ഉയര്‍ന്ന സ്ഥലത്തേക്ക് പള്ളി മാറ്റിസ്ഥാപിച്ചത്. വിപുലീകരണം വിശ്വാസികളുടെ എണ്ണം വര്‍ധിച്ചതോടെ 1878ല്‍ പുത്തന്‍പള്ളി വിപുലീകരിക്കാന്‍ തീരുമാനിച്ചു. 1882 ല്‍ മഴയിലും വെള്ളപ്പൊക്കത്തിലും പള്ളിക്കു കേടുപാടുകളുണ്ടായി മുഖവാരം ഇടിഞ്ഞുവീണു. 1884-ല്‍ താത്കാലിക പള്ളി എന്ന നിലയില്‍ സെമിത്തേരിക്കപ്പേള ഉപയോഗിച്ചു. 1885-ല്‍ പുതിയ പള്ളിയുടെ പണി ആരംഭിച്ച് 1897 വരെ നീണ്ടു. 1945-ല്‍ പള്ളി വീണ്ടും പൊളിച്ച് പുതിയ പള്ളിക്ക് മാര്‍ ജയിംസ് കാളാശേരി മെത്രാന്‍ ശിലാസ്ഥാപനം നടത്തി. പിന്നീട് പല കാരണങ്ങളാല്‍ മുടങ്ങിയ പള്ളിപണി 1977-ല്‍ പൂര്‍ണമായും പൂര്‍ത്തിയാക്കിയത് 32 വര്‍ഷങ്ങള്‍ക്കു ശേഷമാണ്. 1971 മേയ് 23ന് മാർ ആന്‍റണി പടിയറ ശിലാസ്ഥാപനം നടത്തിയ നവീന വൈദികമന്ദിരം 1972 മേയ് 21ന് മാർ ജോസഫ് പവ്വത്തിൽ ഉദ്ഘാടനം ചെയ്തു. രൂപതാ സ്ഥാപനത്തിനുശേഷം പാസ്റ്ററൽ സെന്‍ററും അജപാലന ഓഫീസുകളും മെത്രാൻ മന്ദിരവും ഇവിടെയായിരുന്നു. പിന്നീട് 2016 ഏപ്രിൽ നാലിന് ഫാ. ജോർജ് ആലുങ്കലിന്‍റെ കാലത്ത് പുതിയ വൈദിക മന്ദിരവും 2020 ജൂൺ 19ന് ഫാ. വർഗീസ് പരിന്തിരിക്കലിന്‍റെ കാലത്ത് മദ്ബഹ നവീകരണവും പൂർത്തിയാക്കി. ഭരണസംവിധാനം കാഞ്ഞിരപ്പള്ളി ഇടവക പോര്‍ച്ചുഗീസുകാരുടെ ആഗമനശേഷം വരാപ്പുഴ ലത്തീന്‍ മെത്രാന്‍റെ കീഴിലായിരുന്നു. 1887-ല്‍ കോട്ടയം വികാരിയാത്തിന്‍റെയും പിന്നീട് ചങ്ങനാശേരി വികാരിയാത്തിന്‍റെയും ഭാഗമായി. ചങ്ങനാശേരിക്ക് കീഴിലെ ഏറ്റവും കിഴക്കേയറ്റത്തെ പള്ളിയായിരുന്നു കാഞ്ഞിരപ്പള്ളി. ഇടവകയെ ചങ്ങനാശേരി രൂപതയിലെ ഫൊറോനയായി 1919 സെപ്റ്റംബര്‍ 14 ന് ഉയര്‍ത്തി. അന്ന് ഈ ഫൊറോനയുടെ കീഴിൽ ആനിക്കാട്, ചെങ്ങളം, എലിക്കുളം, ഇളങ്ങുളം, പൊൻകുന്നം, തന്പലക്കാട്, കപ്പാട്, താമരക്കുന്ന്, ചെറുവള്ളി, പഴയ മണില,പുത്തൻ മണിമല, കോട്ടാങ്ങൽ എന്നീ 12 പള്ളികളാണ് ഉണ്ടായിരുന്നത്. കത്തീഡ്രല്‍ ആകുന്നു 1977 ഫെബ്രുവരി 26-ന് പോള്‍ ആറാമന്‍ മാര്‍പാപ്പയുടെ കല്‍പ്പന പ്രകാരം കാഞ്ഞിരപ്പള്ളി രൂപത രൂപീകൃതമായപ്പോള്‍ ഫൊറോനാ ദേവാലയമായിരുന്ന പുത്തന്‍പള്ളി കത്തീഡ്രലായി ഉയര്‍ത്തപ്പെട്ടു. രൂപത രൂപീകൃതമായപ്പോള്‍ 91 പള്ളികള്‍ ഉള്‍പ്പെടുന്ന ആറു ഫൊറോനകളുണ്ടായിരുന്നു. പുതിയ രൂപതയുടെ ആദ്യത്തെ മെത്രാനായി മാര്‍ ജോസഫ് പവ്വത്തില്‍ 1977 മേയ് 12-ന് സ്ഥാനമേറ്റു. ആ വര്‍ഷം തന്നെ ദേവാലയത്തിന്‍റെ 150-ാം വാര്‍ഷികവും നടത്തി. ഇടവക ജനങ്ങള്‍ നിലവില്‍ 1500 കുടുംബങ്ങളിലായി പതിനായിരത്തോളം ഇടവകാംഗങ്ങളുണ്ട്. കത്തീഡ്രല്‍ ഇടവകയുടെ കീഴില്‍ സെന്‍റ് ഡൊമിനിക് കോളജ്, സെന്‍റ് ഡൊമിനിക്‌സ് ലോ കോളജ്, സെന്‍റ് ഡൊമിനിക്സ് ഹയര്‍ സെക്കന്‍ഡറി സ്‌കൂള്‍ എന്നിവ പ്രവര്‍ത്തിക്കുന്നു. രൂപതയുടെയും സന്യാസിനീസമൂഹത്തിന്‍റെയും മേൽനോട്ടത്തില്‍ അഞ്ച് കാരുണ്യഭവനങ്ങളും രണ്ടു സ്‌കൂളുകളും പ്രവര്‍ത്തിക്കുന്നു. 1930 മുതല്‍ കര്‍മലീത്താമഠവും സെന്‍റ് മേരീസ് സ്‌കൂളും പ്രവര്‍ത്തിച്ചുവരുന്നു. എസ്എബിഎസ്, എസ്എച്ച്, മാര്‍ത്താസ് കോണ്‍വെന്‍റുകളും ഇടവകയില്‍ നിലവിലുണ്ട്. ഇടവകയ്ക്ക് കീഴിലുള്ള 110 വര്‍ഷങ്ങളായി നിലനില്‍ക്കുന്ന കൂവപ്പള്ളി കുരിശുമല മധ്യകേരളത്തിലെ ഏറ്റവും പുരാതനമായ തീർഥാടന കേന്ദ്രമാണ്. അഞ്ചിലിപ്പ, പനച്ചേപ്പള്ളി, പുളിമാവ് എന്നിവിടങ്ങളിൽ കുരിശുപള്ളികളുണ്ട്. 2000-ൽ മഹാജൂബിലിഹാൾ എന്ന പേരിൽ ആധുനികഹാളും നിർമിച്ചു. വിളംബര റാലി ഓഗസ്റ്റ് രണ്ടു മുതൽ 10 വരെ നടക്കുന്ന ഇടവക സ്ഥാപനത്തിന്‍റെ ദ്വിശതാബ്ദി ജൂബിലി സമാപന ആഘോഷങ്ങളുടെ ഭാഗമായി നാളെ വൈകുന്നേരം 4.30ന് അക്കരപ്പള്ളിയിൽനിന്നു കത്തീഡ്രലിലേക്കു വിളംബര റാലി നടക്കും. ഫ്ലോട്ടുകളും ബൈക്ക് റാലിയും പരിപാടിക്കു മോടികൂട്ടും. തുടർന്ന് ജൂബിലി പതാക ഉയർത്തൽ, തിരിതെളിക്കൽ, ജൂബിലിഗാനം, വാദ്യമേളം എന്നിവയും നടക്കും.

വിവേചനങ്ങൾക്കതീതമായി മനുഷ്യനെ സമീപിക്കാൻ സാധിക്കുന്നതാണ് ഏറ്റവും വലിയ സന്തോഷം: ഷാഹുൽ ഹമീദ്

അരുവിത്തുറ: ജാതി മത വർഗ വർണ്ണ ലിംഗ വിവേചനങ്ങൾക്കതീതമായി മനുഷ്യനെ സമീപിക്കാൻ കഴിയുന്നതാണ് ഒരു വ്യക്തിയുടെ ഏറ്റവും വലിയ നേട്ടമെന്ന് കോട്ടയം ജില്ലാ പോലീസ് മേധാവി ഷാഹുൽ ഹമീദ്. ഇത്തരത്തിൽ മനുഷ്യനെ സമീപിക്കുന്നത് സന്തോഷകരമാണെന്നും അദ്ദേഹം പറഞ്ഞു. അരുവിത്തുറ സെന്‍റ് ജോർജ് കോളജിൽ ഐക്യുഎസിയുടെ നേതൃത്വത്തിൽ സംഘടിപ്പിച്ച സംവാദ പരിപാടിയിൽ പങ്കെടുത്ത് സംസാരിക്കുകയായിരുന്നു അദ്ദേഹം. സംസ്ഥാനത്തെ ക്രമസമാധാന നില സംബന്ധിച്ചും പോലീസുമായി ബന്ധപ്പെട്ടും വിദ്യാർഥികൾ ഉന്നയിച്ച വിവിധ ചോദ്യങ്ങൾക്ക് ഷാഹുൽ ഹമീദ് മറുപടി നൽകി. കോളജ് ബർസാർ റവ.ഫാ. ബിജു കുന്നയ്ക്കാട്ട് അധ്യക്ഷത വഹിച്ച സമ്മേളനത്തിൽ വൈസ് പ്രിൻസിപ്പൽ ഡോ. ജിലു ആനി ജോൺ, നാക്ക് കോഓർഡിനേറ്റർ ഡോ. മിഥുൻ ജോൺ തുടങ്ങിയവർ സംസാരിച്ചു.

ഛത്തീസ്ഗഡിൽ കന്യാസ്ത്രീകളുടെ അറസ്റ്റ് : അണയാതെ പ്രതിഷേധാഗ്നി

കുറുപ്പന്തറ: ഛത്തീസ്ഗഡില്‍ കന്യാസ്ത്രീകളെ അറസ്റ്റ് ചെയ്തതില്‍ പ്രതിഷേധിച്ചും ഇവരുടെ ജയില്‍മോചനം ആവശ്യപ്പെട്ടും കേരള കോണ്‍ഗ്രസ്-എം മാഞ്ഞൂര്‍ മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധ പ്രകടനവും സമ്മേളനവും പ്രതിഷേധ ജ്വാല തെളിക്കലും നടത്തി. മണ്ഡലം പ്രസിഡന്‍റ് ജോയി കക്കാട്ടില്‍ അധ്യക്ഷത വഹിച്ചു. ഉന്നതാധികാര സമിതിയംഗം സഖറിയാസ് കുതിരവേലില്‍ ഉദ്ഘാടനം ചെയ്തു. സ്റ്റിയറിംഗ് കമ്മിറ്റിയംഗം ബിജു മറ്റപ്പള്ളി പ്രതിഷേധജ്വാല തെളിച്ചു. നേതാക്കളായ കെ.സി. മാത്യു, ബിജു കൊണ്ടൂകാല, സാബു കല്ലട, ജോണ്‍ ഏബ്രഹാം പഞ്ഞിപ്പുറത്തുകുന്നേല്‍ എന്നിവര്‍ പ്രസംഗിച്ചു. കടുത്തുരുത്തി: ഛത്തീസ്ഗഡില്‍ സംഘപരിവാര്‍ സഘടനകള്‍ കന്യാസ്ത്രീകള്‍ക്കെതിരേ എടുപ്പിച്ച വ്യാജ കേസുകള്‍ പിന്‍വലിക്കണമെന്ന് കീഴൂര്‍ മൗണ്ട് കാര്‍മല്‍ പള്ളിയിലെ പിതൃവേദി, എകെസിസി യൂണിറ്റുകള്‍ ആവശ്യപ്പെട്ടു. മതനൂനപക്ഷങ്ങള്‍ക്കെതിരേ നടക്കുന്ന ആസൂത്രിത അതിക്രമങ്ങളാണ് ഛത്തീസ്ഗഡിലെ കന്യാസ്ത്രീകള്‍ക്കെതിരേ നടപ്പാക്കിയത്. ഭരണഘടനാപരമായ അവകാശങ്ങളെയും മതസ്വാതന്ത്ര്യത്തെയും ഹനിക്കുന്ന ഇത്തരം നിക്കങ്ങള്‍ അവസാനിപ്പിക്കണമെന്ന് യോഗം ആവശ്യപ്പെട്ടു. വികാരി ഫാ. ജോസഫ് വയലില്‍ ഉദ്ഘാടനം ചെയ്തു. പിതൃവേദി യൂണിറ്റ് പ്രസിഡന്‍റ് രാജു കുന്നേല്‍ അധ്യക്ഷത വഹിച്ചു. സിബി പതിപ്പറമ്പില്‍, ജോസഫ് പെരുമറ്റം, കുഞ്ഞച്ചന്‍ മേച്ചേരി, ടോമി കടംബംകുഴി, ജോയി ചിറ്റേത്ത്, ഔസേപ്പച്ചന്‍ ചിറ്റേത്ത് എന്നിവര്‍ പ്രസംഗിച്ചു. വൈക്കം: വ്യാജ ആരോപണം ഉന്നയിച്ച് ചത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്ത് ജയിലിൽ അടച്ചതിൽ പ്രതിഷേധിച്ച് വൈക്കം സെന്‍റ് ജോസഫ് ഫൊറോന പള്ളിയുടെ ആഭിമുഖ്യത്തിൽ പ്രതിഷേധ സംഗമവും റാലിയും നടത്തി. ഫൊറോന പള്ളിയുടെ കവാടത്തിനു മുന്നിൽ നടന്ന പ്രതിഷേധ സംഗമം വികാരി റവ.ഡോ.ബർക്കുമൻസ് കൊടയ്ക്കൽ ഉദ്ഘാടനം ചെയ്തു. മെഴുകുതിരി കത്തിച്ച് ജപമാല ചൊല്ലി കന്യാസ്ത്രീകൾക്ക് വൈദീകരും സന്ന്യസ്ഥരും വിശ്വാസികളും ഐകൃദാർഢ്യം പ്രഖ്യാപിച്ചു. സഹവികാരി ഫാ. ജോസഫ് മേച്ചേരി, കൈക്കാരൻമാരായ മോനിച്ചൻ പെരുംഞ്ചേരി, മാത്യുകോടാലിച്ചിറ, വൈസ് ചെയർമാൻ മാത്യു കൂടല്ലിൽ,കൗൺസിൽ സെക്രട്ടറി സോണി പൂതവേലിൽ, പാരീഷ് കൗൺസിൽ അംഗങ്ങൾ തുടങ്ങിയവർ പ്രസംഗിച്ചു.

വടയാർ-തലയോലപ്പറന്പ് റോഡിന് ഏഴു കോടി രൂപ

തലയോലപ്പറമ്പ്: നവകേരള സദസിൽ ഉയർന്നുവന്ന പദ്ധതികളിൽനിന്നു വൈക്കം നിയോജകമണ്ഡലത്തിൽ ഏഴു കോടി രൂപയുടെ നിർമാണ പ്രവൃത്തിക്ക് സർക്കാർ അംഗീകാരം ലഭിച്ചു. വടയാർ പാലത്തിന് പടിഞ്ഞാറു ഭാഗം മുതൽ തലയോലപ്പറമ്പ് പള്ളിക്കവലവരെയുള്ള അഞ്ചര കിലോമീറ്റർ റോഡ് ബിഎം ആൻഡ് ബിസി നിലവാരത്തിലുള്ള പുനർനിർമാണത്തിനും മറ്റ് അനുബന്ധ പ്രവൃത്തികൾക്കുമായാണ് ഏഴുകോടി രൂപ അനുവദിച്ചിരിക്കുന്നത്. നവകേരള സദസിൽ സിപിഎം വടയാർ ലോക്കൽ കമ്മിറ്റിയുടെ നേതൃത്വത്തിൽ വടയാർ മുതൽ തലയോലപ്പറമ്പ് വരെയുള്ള ഭാഗത്തെ താഴ്ന്ന പ്രദേശങ്ങൾ മണ്ണിട്ടുയർത്തി ബിഎം ആൻഡ് ബിസി നിലവാരത്തിൽ നിർമിക്കണമെന്ന് ആവശ്യപ്പെട്ടു നിവേദനം സമർപ്പിച്ചിരുന്നു. ചെറിയ വെള്ളപ്പൊക്കത്തിൽ പോലും വടയാർ പാലത്തിനു പടിഞ്ഞാറ് ഭാഗത്തും ഇളങ്കാവ് ജംഗ്ഷനിലും പൊട്ടൻചിറ പമ്പിനു മുൻവശത്തും തോട് കവിഞ്ഞൊഴുകി ഗതാഗത തടസം ഉണ്ടാകുന്നത് പതിവാണ്. നിലവിൽ അനുവദിച്ചിട്ടുള്ള ഫണ്ട് ഉപയോഗിച്ച് റോഡ് നിർമാണം പൂർത്തിയാകുന്നതോടെ പ്രദേശത്ത് കാലങ്ങളായി നിലനിൽക്കുന്ന പ്രശ്നമാണ് പരിഹരിക്കപ്പെടുന്നത്. തുടർന്നുള്ള സാങ്കേതിക നടപടികൾ കൂടി അടിയന്തരമായി പൂർത്തീകരിച്ച് നിർമാണ പ്രവർത്തനങ്ങൾ ഉടൻ തുടങ്ങാനാകുമെന്ന് പൊതുമരാമത്ത് മന്ത്രി പി. എ. മുഹമ്മദ് റിയാസിന്‍റെ ഓഫീസും സി. കെ.ആശ എംഎൽഎയും അറിയിച്ചു.

ഏതു നിമിഷവും വീഴും : മെഡി.കോളജ് പത്താംവാർഡിൽ സിമന്‍റുപാളി അടർന്നു

ഗാന്ധിനഗർ: മെഡിക്കൽ കോളജ് ആശുപത്രിയിലെ പഴയ 10-ാം വാർഡിൽ സീലിംഗായി ഉപയോഗിച്ചിരുന്ന സിമന്‍റുപാളി അടർന്നുവീഴാറായ നിലയിൽ. അപകടമുണ്ടാകാവുന്ന തരത്തിലാണ് വലിയ ഭാരമുള്ള സിമന്‍റുപാളി അടർന്ന് വീഴാറായി തങ്ങിനിൽക്കുന്നത്. അടുത്തിടെ ആശുപത്രിയിലെ 14-ാം വാർഡിന് സമീപത്തെ ശുചി മുറി ഇടിഞ്ഞുവീണ് തലയോലപ്പറമ്പ് സ്വദേശിയായ വീട്ടമ്മ മരണപ്പെട്ടിരുന്നു. ഈ കെട്ടിടത്തിൽ തന്നെയാണ് 10-ാം വാർഡും പ്രവർത്തിച്ചിരുന്നത്. ഇവിടെയാണ് സിമന്‍റ് പാളി ഏത് നിമിഷവും അടർന്ന് നിലം പൊത്താവുന്ന തരത്തിൽ തങ്ങിയിരിക്കുന്നത്. കെട്ടിടം ഇടിഞ്ഞുവീണതിനെത്തുടർന്ന് 10, 11, 14 തുടങ്ങിയ വിവിധ വിഭാഗങ്ങളും പ്രധാന ശസ്ത്രക്രിയ തിയറ്ററും പുതിയ സർജിക്കൽ ബ്ലോക്കിലേക്ക് മാറ്റിയിരുന്നു. എന്നാൽ ആശുപത്രിയിൽ എത്തുന്ന കാൽനടയാത്രക്കാർക്ക് സിമന്‍റുപാളി ഭീഷണിയായിരിക്കുകയാണ്. അപകട മേഖലയാണ് ഇതുവഴി സഞ്ചരിക്കരുതെന്ന് അധികൃതർ ബോർഡ് സ്ഥാപിച്ചിട്ടുണ്ടെങ്കിലും കാൽനട യാത്രക്കാർ ഇത് ശ്രദ്ധിക്കാറില്ല. ഏതു നിമിഷവും നിലം പൊത്താവുന്ന തരത്തിൽ തങ്ങിയിരിക്കുന്ന ഭാരമുള്ള ഈ സിമന്‍റുപാളി ഇവിടെ നിന്ന് നീക്കം ചെയ്യണമെന്നാണ് രോഗികളും കൂട്ടിരിപ്പുകാരും ആവശ്യപ്പെടുന്നത്.

വാട്ടര്‍ അഥോറിറ്റി കടുത്തുരുത്തി ഡിവിഷന്‍ ഓഫീസിന് മുന്നില്‍ ധര്‍ണ ആരംഭിച്ചു

കടുത്തുരുത്തി: മീറ്റര്‍ റീഡിംഗ് എടുക്കുന്നതില്‍നിന്ന് എസ്റ്റാബ്ലിഷ്മെന്‍റ് മീറ്റര്‍ റീഡര്‍മാരെ മാറ്റി മുനിസിപ്പാലിറ്റി നിര്‍ദേശിക്കുന്ന ആള്‍ക്കാരെ നിയമിക്കുന്നതില്‍ പ്രതിഷേധിച്ചു വാട്ടര്‍ അഥോറിറ്റി കടുത്തുരുത്തി ഡിവിഷന്‍ ഓഫീസിന് മുന്നില്‍ ധര്‍ണാസമരം ആരംഭിച്ചു. യൂണിയന്‍ ജില്ലാ പ്രസിഡന്‍റ് കെ. സുരേഷ്‌കുമാറിന്‍റെ അധ്യക്ഷതയില്‍ നടന്ന പ്രതിഷേധസമരം സംസ്ഥാന വൈസ് പ്രസിഡന്‍റ് വി. അമൃതരാജ് ഉദ്ഘാടനം ചെയ്തു, ജില്ലാ സെക്രട്ടറി ടി.ഡി. ജോസുകുട്ടി, ബിജു വര്‍ഗീസ്, എം.ജി. കൃഷ്ണകുമാര്‍, എം.ജെ. ശ്രീലക്ഷമി എന്നിവര്‍ പ്രസംഗിച്ചു. രണ്ടാം ദിവസത്തെ സമരം സിഐടിയു കടുത്തുരുത്തി ഏരിയാ സെക്രട്ടറി ടി. സി. വിനോദ് ഉദ്ഘാടനം ചെയ്തു. കെ.സുരേഷ്‌കുമാര്‍ അധ്യക്ഷത വഹിച്ചു.

കേന്ദ്രീയവിദ്യാലയം വെള്ളൂരിൽ നിലനിർത്തണം

വെള്ളൂർ: കേന്ദ്രീയ വിദ്യാലയം വെള്ളൂരിൽ നിലനിർത്തുന്നതിന് സർക്കാർ നടപടി സ്വീകരിക്കണമെന്ന ആവശ്യം ശക്തമായി. 2015ൽ കേന്ദ്രീയ വിദ്യാലയം നിർമിക്കാൻ 30 കോടി രൂപ അനുവദിച്ചെങ്കിലും സംസ്ഥാനസർക്കാർ ഉചിതമായ സ്ഥലം ഏറ്റെടുത്ത് നൽകാഞ്ഞതിനാൽ കെട്ടിടം നിർമിക്കാനായില്ല. സർക്കാർ സ്ഥലം ഏറ്റെടുത്ത് നൽകിയില്ലെങ്കിൽ വിദ്യാലയം നിർത്തലാക്കാനുള്ള നടപടി സ്വീകരിച്ചുവരികയാണ് അധികൃതർ. ആപ്പാഞ്ചിറയിൽ അനുവദിച്ച സ്ഥലം തണ്ണീർത്തട നിയമ പ്രകാരം മണ്ണിട്ടു നികത്താൻ സാധ്യമല്ല.2018ൽ ഈ സ്ഥലം നിർമാണപ്രവർത്തനങ്ങൾക്ക് അനുയോജ്യമല്ലെന്ന് കേന്ദ്രസംഘം റിപ്പോർട്ട് ചെയ്തിരുന്നു. നിലവിൽ പ്രവർത്തിച്ചുകൊണ്ടിരിക്കുന്ന പഴയ സിഐഎസ്എഫ് ബാരക്കിനോടു ചേർന്ന് ഉപയോഗശൂന്യമായി കിടക്കുന്ന കെപിപിഎൽ വക സ്ഥലം വിട്ടുനൽകിയാൽ കേന്ദ്രീയ വിദ്യാലയം വെള്ളൂരിൽ നിലനിർത്താൻ സാധിക്കും. സ്വകാര്യ മാനേജ്മെന്‍റ് സ്കൂളായ ഭാവൻസിന് വീണ്ടും സ്ഥലവും കെട്ടിടവും കരാർ പുതുക്കി നൽകിയ സംസ്ഥാന സർക്കാർ കേന്ദ്രീയവിദ്യാലയത്തിന്‍റെ കാര്യത്തിൽ അനുഭാവപൂർവമായ നടപടി സ്വീകരിച്ചില്ലെങ്കിൽ ബഹുജനങ്ങളെ സംഘടിപ്പിച്ച് സമരപരിപാടി ആരംഭിക്കുമെന്ന് കോൺഗ്രസ് ബ്ലോക്ക് കമ്മിറ്റി ഭാരവാഹികൾ പറഞ്ഞു. ബ്ലോക്ക് കോൺഗ്രസ് വൈസ്പ്രസിഡന്‍റ് എം.ആർ. ഷാജിയുടെഅധ്യക്ഷതയിൽ നടന്ന യോഗം ബ്ലോക്ക് കോൺഗ്രസ് പ്രസിഡന്‍റ് എം.കെ. ഷിബു ഉദ്ഘാടനം ചെയ്തു.വെള്ളൂർ പഞ്ചായത്തംഗം കുര്യാക്കോസ് തോട്ടത്തിൽ, മണ്ഡലം പ്രസിഡന്‍റ് വി.സി. ജോഷി, ബ്ലോക്ക് ഭാരവാഹികളായ മുഹമ്മദ് മർസൂക്, ജയേഷ് മാമ്പള്ളിൽ, കെ.പി. ജോസ്, സി.ജി. ബിനു, നിയാസ് കൊടിയനേഴത്ത്, പി.എസ്. ബാബു, വി.ജി. സുധാകരൻ തുടങ്ങിയവർ പ്രസംഗിച്ചു.

ഏഴാം ധനകാര്യ കമ്മീഷനു മുന്നില്‍ നിര്‍ദേശങ്ങളുമായി ജനപ്രതിനിധികള്‍

കോട്ടയം: തദ്ദേശ സ്ഥാപനങ്ങള്‍ക്കുള്ള ഫണ്ട് അനുവദിക്കലും അവയുടെ വിനിയോഗവും സംബന്ധിച്ച് ഏഴാം ധനകാര്യകമ്മീഷനു മുമ്പില്‍ ക്രിയാത്മക നിര്‍ദ്ദേശങ്ങള്‍ സമര്‍പ്പിച്ച് ജില്ലാ ആസൂത്രണ സമിതിയംഗങ്ങളും ജനപ്രതിനിധികളും. തദ്ദേശ സ്ഥാപനങ്ങളുടെ ഫണ്ട് വിനിയോഗം കാര്യക്ഷമമാക്കുന്നതിനും സാമ്പത്തിക ശാക്തീകരണത്തിനുമുള്ള നിര്‍ദേശങ്ങള്‍ സ്വീകരിക്കാനാണ് കമ്മീഷന്‍ ചെയര്‍മാന്‍ ഡോ. കെ.എന്‍. ഹരിലാല്‍ പ്രത്യേക ജില്ലാ ആസൂത്രണസമിതി യോഗത്തില്‍ പങ്കെടുത്തത്. ധനവിന്യാസവും പദ്ധതി രൂപീകരണവും നിര്‍വഹണവുമായി ബന്ധപ്പെട്ടതും ഭരണനിര്‍വഹണവുമായി ബന്ധപ്പെട്ടതുമായ വിവരങ്ങളാണ് തേടിയത്. പരമ്പരാഗത ചെലവുകള്‍ക്കുള്ള ഫണ്ട്(ജനറല്‍ പര്‍പസ് ഫണ്ട്), റോഡ് ഇതര സംരക്ഷണ ഫണ്ട്, റോഡ് സംരക്ഷണ ഫണ്ട്, വികസന ഫണ്ട്, പട്ടികജാതി-പട്ടിക വര്‍ഗ ഉപപദ്ധതി ഫണ്ടുകള്‍ തുടങ്ങിയവയേക്കുറിച്ചുള്ള അഭിപ്രായങ്ങള്‍, എന്തെങ്കിലും മാറ്റം വരുത്തേണ്ടതുണ്ടോ എന്നിങ്ങനെയുള്ള വിവരങ്ങള്‍ കമ്മീഷന്‍ ആരാഞ്ഞു. നഗരവത്കരണവുമായി ബന്ധപ്പെട്ടു നേരിടുന്ന വെല്ലുവിളികള്‍, തനതുവരുമാനം മെച്ചപ്പെടുത്തല്‍, സേവനങ്ങള്‍ മെച്ചപ്പെടുത്തല്‍, തദ്ദേശ സ്വയംഭരണ സര്‍ക്കാരുകളുടെ ഭരണസംവിധാനം മെച്ചപ്പെടുത്തല്‍ തുടങ്ങിയ കാര്യങ്ങളിലും ജനപ്രതിനിധികളും ഉദ്യോഗസ്ഥരും അഭിപ്രായങ്ങള്‍ പങ്കുവച്ചു. ജനറല്‍ പര്‍പസ് ഫണ്ട് നല്‍കുമ്പോള്‍ വരുമാനം കുറവുള്ള പഞ്ചായത്തുകള്‍ക്ക് പ്രത്യേക പരിഗണന നല്‍കണമെന്ന് ആവശ്യമുയര്‍ന്നു. പട്ടികജാതി പട്ടികവര്‍ഗ ഫണ്ടുകള്‍ കൂടുതലായി അനുവദിക്കുക, തോടുകളിലെ എക്കല്‍ നീക്കുന്നതിനുള്ള ചുമതല മൈനര്‍ ഇറിഗേഷന്‍ ഡിപ്പാര്‍ട്ടുമെന്‍റില്‍ നിന്നുമാറ്റി പഞ്ചായത്തുകളെ ഏല്‍പ്പിക്കുക തുടങ്ങിയ ആവശ്യങ്ങളും യോഗത്തില്‍ ഉയര്‍ന്നു. തദ്ദേശസ്ഥാപനങ്ങളിലെ നികുതി പിരിവ് ഊര്‍ജിതമാക്കുന്നതിന് സെമി ജുഡീഷല്‍ അധികാരമുള്ള ഉദ്യോഗസ്ഥനെ ചുമതലപ്പെടുത്തുന്നതിന് ശിപാര്‍ശ ചെയ്യുന്ന കാര്യം കമ്മീഷന്‍റെ പരിഗണനയിലുണ്ടെന്നും ചെയര്‍മാന്‍ ഡോ. കെ.എന്‍. ഹരിലാല്‍ പറഞ്ഞു. ജില്ലാ ആസൂത്രണസമിതി സെക്രട്ടേറിയററ് ഹാളില്‍ നടന്ന യോഗത്തില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ അധ്യക്ഷത വഹിച്ചു.

പറഞ്ഞ സമയത്ത് കാര്‍ നല്‍കിയില്ല; ഒരു ലക്ഷം രൂപ നഷ്ടപരിഹാരം

കോട്ടയം: വിവാഹ സമയത്തുപയോഗിക്കാനായി ബുക്ക് ചെയ്ത കാര്‍ കൃത്യസമയത്തു നല്‍കാതിരുന്നതിനു നഷ്ടപരിഹാരമായി ഹ്യുണ്ടായ് ഇന്ത്യ മോട്ടോഴ്സ് ലിമിറ്റഡ് ഒരുലക്ഷം രൂപ ഉപയോക്താവിനു നല്‍കണമെന്ന് കോട്ടയം ഉപഭോക്തൃ തര്‍ക്കപരിഹാര കമ്മീഷന്‍ ഉത്തരവ്. കോട്ടയം കുടമാളൂര്‍ സ്വദേശിയായ ഋഷികേശ് നല്‍കിയ പരാതിയിലാണ് നടപടി. 2022 ജൂണ്‍ ഒന്നിന് ഷോറൂമില്‍ 10,000 രൂപ അഡ്വാന്‍സ് നല്‍കി കറുപ്പു നിറത്തിലുള്ള വെര്‍ണ ഡീസല്‍ കാര്‍ ബുക്ക് ചെയ്തിരുന്നു. എന്നാല്‍ ഡെലിവറി തീയതിയില്‍ വാഹനം നല്‍കിയില്ല. ഇതുമൂലം പരാതിക്കാരന് വിവാഹാവശ്യത്തിനായി കര്‍ വാടകയ്ക്കെടുക്കേണ്ടിവന്നു. 2023 ആദ്യം കമ്പനി ഈ മോഡല്‍ കാറുകളുടെ വില്‍പന നിര്‍ത്തലാക്കിയെങ്കിലും പരാതിക്കാരനെ അറിയിക്കുകയോ അഡ്വാന്‍സ് തുക തിരിച്ചുനല്‍കുകയോ ചെയ്തില്ല. തുടര്‍ന്ന് ഉപഭോക്തൃ തര്‍ക്ക പരിഹാര കമ്മീഷനെ സമീപിക്കുകയായിരുന്നു. ഡെലിവറി തീയതി താത്കാലികമായി മാത്രമേ നല്‍കിയിട്ടുള്ളൂവെന്നും ബുക്ക് ചെയ്ത വേരിയന്‍റ് നിര്‍ത്തലാക്കിയ കാര്യം പരാതിക്കാരനെ കൃത്യമായി അറിയിച്ചിരുന്നുവെന്നുമുള്ള എതിര്‍കക്ഷികളുടെ വാദം തെളിവുകളില്ലാത്തതിനാല്‍ കമ്മീഷന്‍ അംഗീകരിച്ചില്ല. വാഹനത്തിന്‍റെ നിര്‍മാണം നിര്‍ത്തുന്ന വിവരം ഡീലറെ മുന്‍കൂട്ടി അറിയിക്കുകയും ബുക്കിംഗ് സ്വീകരിക്കരുതെന്നു നിര്‍ദേശിക്കുകയും ചെയ്യേണ്ടിയിരുന്നെന്നും വീഴ്ചകള്‍ക്ക് വാഹന നിര്‍മാതാവായ ഹ്യൂണ്ടായ് ഇന്ത്യ മോട്ടോഴ്സ് ലിമിറ്റഡ് പൂര്‍ണമായും ബാധ്യസ്ഥരാണെന്നും കമ്മീഷന്‍ അഭിപ്രായപ്പെട്ടു. പരാതിക്കാരന്‍റെ സമ്മതമോ മുന്‍കൂര്‍ അറിയിപ്പോ ഇല്ലാതെ ഏകപക്ഷീയമായി ഓര്‍ഡര്‍ റദ്ദാക്കിയത് സേവനം നല്‍കുന്നതിലെ പോരായ്മയും അനുചിത വ്യാപാര നയമാണെന്നും കമ്മീഷന്‍ ചൂണ്ടിക്കാട്ടി. 10,000 രൂപ പണം നല്‍കിയ തീയതി മുതൽ 12 ശതമാനം പലിശ നിരക്കില്‍ തിരികെ നല്‍കണമെന്നും പരാതിക്കാരനുണ്ടായ മാനസിക വേദനയ്ക്കും അസൗകര്യത്തിനും നഷ്ടപരിഹാരമായി ഹ്യൂണ്ടായ് ഇന്ത്യ മോട്ടോഴ്സ് ലിമിറ്റഡ് ഒരുലക്ഷം രൂപ നല്‍കണമെന്നുമാണ് അഡ്വ. വി.എസ്. മനുലാല്‍ പ്രഡിഡന്‍റും അഡ്വ. ആര്‍. ബിന്ദു, കെ.എം. ആന്‍റോ എന്നിവര്‍ അംഗങ്ങളുമായുള്ള ജില്ലാ ഉപഭോക്തൃ തര്‍ക്ക പരിഹാര കമ്മീഷന്‍ ഉത്തരവിട്ടത്.

റിസോർട്ട് ഉടമയോട് പണം ആവശ്യപ്പെട്ട ബിജെപി നേതാവിന് എതിരേ കേസ്

കുമരകം: വേമ്പനാട്ട് കായൽ കൈയേറി നിർമാണം നടത്തിയെന്നാരോപിച്ച് സ്വകാര്യ റിസോർട്ട് ഉടമയോട് പണം ആവശ്യപ്പെട്ടു ഭീഷണിപ്പെടുത്തിയ ബിജെപി നേതാവിനെതിരേ കുമരകം പോലീസ് കേസെടുത്തു. ഏതാനും ആഴ്ചകൾക്കു മുൻപ് കുമരകം ലേക്ക് റിസോർട്ട് കായൽ കൽക്കെട്ട് കൈയേറി നിർമാണപ്രവർത്തനം നടത്തിയെന്ന് ആരോപണം ഉയർന്നിരുന്നു. സംഭവം വിവാദമായപ്പോൾ കുമരകം പഞ്ചായത്ത് സ്റ്റേ നൽകുകയും നിർമാണ പ്രവർത്തനം താത്കാലികമായി നിർത്തിവയ്ക്കുകയും ചെയ്തു. ബിജെപി കുമരകം മണ്ഡലം പ്രസിഡന്‍റ് അഭിലാഷ് ശ്രീനിവാസൻ അഞ്ചു ലക്ഷം രൂപ ആവശ്യപ്പെട്ടു ഭീഷണിപ്പെടുത്തുകയും പണം തന്നില്ലെങ്കിൽ റിസോർട്ട് തല്ലിപ്പൊളിക്കുമെന്നും പറഞ്ഞതായി കാണിച്ചാണ് റിസോർട്ട് അധികാരികൾ പോലീസിൽ പരാതി നൽകിയത്. അഭിലാഷ് ശ്രീനിവാസൻ ആദ്യം നേരിട്ട് റിസോർട്ടിലെത്തി പണം ആവശ്യപ്പെടുകയും വഴങ്ങാതെ വന്നപ്പോൾ ബിജെപി കുമരകം മണ്ഡലം പ്രസിഡന്‍റിന്‍റെ ലെറ്റർ പാഡിൽ ഭീഷണിക്കത്ത് റിസോർട്ടിന് നൽകി എന്നുമാണ് കേസ്.

പ്രതിഷേധക്കൂട്ടായ്മ നടത്തി

അതിരമ്പുഴ: ഛത്തീസ്ഗഡിൽ കന്യാസ്ത്രീമാരെ കള്ളക്കേസിൽ കുരുക്കി ജയിലിലടച്ച നടപടിയിൽ പ്രതിഷേധിച്ച് കേരള കോൺഗ്രസ് -എം അതിരമ്പുഴ മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ കൂട്ടായ്മ നടത്തി. നിയോജക മണ്ഡലം പ്രസിഡന്‍റ് ജോസ് ഇടവഴിക്കൽ ഉദ്ഘാടനം ചെയ്തു. മണ്ഡലം പ്രസിഡന്‍റ് ജോഷി ഇലഞ്ഞിയിൽ അധ്യക്ഷത വഹിച്ചു. എൻ.എ. മാത്യു, ബൈജു മാതിരമ്പുഴ, ജിൻസ് കുര്യൻ, ഷിബു കടുംബശേരി, ജോസ് ഓലപ്പുരക്കൽ, മാത്തച്ചൻ പ്ലാത്തോട്ടം, മണി അമ്മഞ്ചേരി, ജിമ്മി മാണിക്കോത്ത് തുടങ്ങിയവർ പ്രസംഗിച്ചു.

വരുമാനം കുറവുള്ള പഞ്ചായത്തുകൾക്കു പരിഗണന വേണം

കോട്ടയം: തദ്ദേശ സ്ഥാപനങ്ങള്‍ക്കുള്ള ഫണ്ട് അനുവദിക്കലും അവയുടെ വിനിയോഗവും സംബന്ധിച്ച് ഏഴാം ധനകാര്യകമ്മീഷനു മുമ്പില്‍ ക്രിയാത്മക നിര്‍ദ്ദേശങ്ങള്‍ സമര്‍പ്പിച്ച് ജില്ലാ ആസൂത്രണ സമിതിയംഗങ്ങളും ജനപ്രതിനിധികളും. തദ്ദേശ സ്ഥാപനങ്ങളുടെ ഫണ്ട് വിനിയോഗം കാര്യക്ഷമമാക്കുന്നതിനും സാമ്പത്തിക ശാക്തീകരണത്തിനുമുള്ള നിര്‍ദേശങ്ങള്‍ സ്വീകരിക്കാനാണ് കമ്മീഷന്‍ ചെയര്‍മാന്‍ ഡോ. കെ.എന്‍. ഹരിലാല്‍ പ്രത്യേക ജില്ലാ ആസൂത്രണസമിതി യോഗത്തില്‍ പങ്കെടുത്തത്. ജനറല്‍ പര്‍പസ് ഫണ്ട് നല്‍കുമ്പോള്‍ വരുമാനം കുറവുള്ള പഞ്ചായത്തുകള്‍ക്കു പ്രത്യേക പരിഗണന നല്‍കണമെന്ന് ആവശ്യമുയര്‍ന്നു. പട്ടികജാതി പട്ടികവര്‍ഗ ഫണ്ടുകള്‍ കൂടുതലായി അനുവദിക്കുക, തോടുകളിലെ എക്കല്‍ നീക്കാനുള്ള ചുമതല മൈനര്‍ ഇറിഗേഷന്‍ ഡിപ്പാര്‍ട്ടുമെന്‍റില്‍നിന്നു മാറ്റി പഞ്ചായത്തുകളെ ഏല്‍പ്പിക്കുക തുടങ്ങിയ ആവശ്യങ്ങളും യോഗത്തില്‍ ഉയര്‍ന്നു. തദ്ദേശസ്ഥാപനങ്ങളിലെ നികുതി പിരിവ് ഊര്‍ജിതമാക്കുന്നതിനു സെമി ജുഡീഷല്‍ അധികാരമുള്ള ഉദ്യോഗസ്ഥനെ ചുമതലപ്പെടുത്തുന്നതിനു ശിപാര്‍ശ ചെയ്യുന്ന കാര്യം കമ്മീഷന്‍റെ പരിഗണനയിലുണ്ടെന്നും ചെയര്‍മാന്‍ ഡോ. കെ.എന്‍. ഹരിലാല്‍ പറഞ്ഞു.

കന്യാസ്ത്രീകളുടെ അറസ്റ്റ് : ബിജെപിയുടെ മുന്നറിയിപ്പ്: ഡിസിസി പ്രസിഡന്‍റ്

അതിരമ്പുഴ: ഛത്തീസ്ഗഡിലെ കന്യാസ്ത്രീമാരുടെ അറസ്റ്റ് ഇന്ത്യയിലെ എല്ലാ ന്യൂനപക്ഷ വിഭാഗങ്ങൾക്കുമുള്ള ബിജെപിയുടെ മുന്നറിയിപ്പാണെന്ന് ഡിസിസി പ്രസിഡന്‍റ് നാട്ടകം സുരേഷ്. കന്യാസ്ത്രീകളെ അറസ്റ്റ് ചെയ്തതിൽ പ്രതിഷേധിച്ച് കോൺഗ്രസ് അതിരമ്പുഴ മണ്ഡലം കമ്മി റ്റി സംഘടിപ്പിച്ച വായ് മൂടിക്കെട്ടി പ്രതിഷേധം ഉദ്ഘാടനം ചെയ്യുകയായിരുന്നു അദ്ദേഹം.മണ്ഡലം പ്രസിഡന്‍റ് ജൂബി ഐക്കരക്കുഴി അധ്യക്ഷത വഹിച്ചു. കെപിസിസി സെക്രട്ടറി കുഞ്ഞ് ഇല്ലംപള്ളി, ജനറൽ സെക്രട്ടറി എം. മുരളി, പി.വി. മെക്കിൾ തുടങ്ങിയവർ പ്രസംഗിച്ചു.

ലൂര്‍ദിയന്‍ ബാസ്‌കറ്റ്ബോള്‍: ക്വാര്‍ട്ടര്‍ ഫൈനല്‍ ഇന്ന് ആരംഭിക്കും

കോട്ടയം: ലൂര്‍ദിയന്‍ ബാസ്‌കറ്റ്ബോള്‍ ടൂര്‍ണമെന്‍റ് ക്വാര്‍ട്ടര്‍ ഫൈനല്‍ മത്സരങ്ങള്‍ ഇന്ന് ആരംഭിക്കും. ടൂര്‍ണമെന്‍റിന്‍റെ രണ്ടാം ദിവസം ആണ്‍കുട്ടികളുടെ വിഭാഗത്തില്‍ പൂള്‍ എയില്‍നിന്നു കോട്ടയം ലൂര്‍ദ്, കുര്യനാട് സെന്‍റ് ആന്‍സ്, പൂള്‍ ബി യില്‍നിന്നു കിളിമല എസ്എച്ച്, ഇരിഞ്ഞാലക്കുട ഡോണ്‍ ബോസ്‌കോ, കോഴിക്കോട് സില്‍വര്‍ ഹില്‍സ്, പൂള്‍ ഡിയില്‍നിന്നു ചങ്ങനാശേരി എകെഎം, വാഴക്കുളം കാര്‍മല്‍ എന്നീ ടീമുകളും പെണ്‍കുട്ടികളുടെ വിഭാഗത്തില്‍ പൂള്‍ എയില്‍നിന്നു കോട്ടയം എസ്എച്ച് മൗണ്ട്, ചങ്ങനാശേരി എസ്എച്ച്, പൂള്‍ ബി യില്‍നിന്നു കോട്ടയം മൗണ്ട് കാര്‍മല്‍, ആലപ്പുഴ സെന്‍റ് മൈക്കിള്‍സ് പൂള്‍ സിയില്‍നിന്നു കോഴിക്കോട് പ്രൊവിഡന്‍സ്, ആലപ്പുഴ ജ്യോതിനികേതന്‍, പൂള്‍ ഡിയില്‍നിന്നു കൊരട്ടി ലിറ്റില്‍ ഫ്ലവര്‍, കോഴിക്കോട് സില്‍വര്‍ ഹില്‍സ് എന്നീ ടീമുകളും ക്വാര്‍ട്ടറില്‍ പ്രവേശിച്ചു.

തീർഥാടകരെ വരവേൽക്കാൻ കുടമാളൂർ

കുടമാളൂര്‍: ഓഗസ്റ്റ് രണ്ടിന് നടക്കുന്ന ചങ്ങനാശേരി അതിരൂപത ചെറുപുഷ്പം മിഷന്‍ ലീഗ് നേതൃത്വം നല്‍കുന്ന അല്‍ഫോന്‍സ തീര്‍ഥാടകരെ സ്വീകരിക്കാന്‍ കുടമാളൂര്‍ സെന്‍റ് മേരീസ് മേജര്‍ ആര്‍ക്കിഎപ്പിസ്‌കോപ്പല്‍ തീര്‍ഥാന പള്ളിയില്‍ വിപുലമായ ഒരുക്കങ്ങള്‍. 500 അംഗ വോളണ്ടിയര്‍ കമ്മിറ്റി രൂപീകരിച്ചു നടത്തപ്പെടുന്ന ഒരുക്കങ്ങള്‍ വിലയിരുത്താനായി ആര്‍ച്ച്പ്രിസ്റ്റ് റെവ. ഡോ.ജോര്‍ജ് മംഗലത്തിലിന്‍റെ അധ്യക്ഷതയില്‍ യോഗം ചേര്‍ന്നു. ഫാ.അലോഷ്യസ് വല്ലാത്തറ ഫാ. ജസ്റ്റിന്‍ വരവുകാലായില്‍, ഫാ. സുനില്‍ ആന്‍റണി കൈക്കാരന്മാരായ സോണി ജോസഫ്, പി.എം. മാത്യു, പ്ലാസിഡ് വര്‍ഗീസ്, എം.ടി. ആന്‍റണി, ഫ്രാങ്ക്‌ളിന്‍ ജോസഫ് എന്നിവർ പങ്കെടുത്തു.

എല്‍ഡിഎഫ് നാളെ നഗരസഭ ഉപരോധിക്കും

കോട്ടയം: നഗരസഭയുടെ കെടുകാര്യസ്ഥതയ്ക്കും അഴിമതിക്കും വികസനമുരടിപ്പിനുമെതിരേ പ്രതിഷേധവുമായി എല്‍ഡിഎഫ്. നാളെ രാവിലെ ഒമ്പതിന് നഗരസഭാ കവാടത്തില്‍ എല്‍ഡിഎഫ് ഉപരോധസമരം നടത്തും. കെ. അനില്‍കുമാര്‍ ഉദ്ഘാടനം ചെയ്യും. നഗരസഭാ ഭരണവും ദൈനംദിന പ്രവര്‍ത്തനങ്ങളും കെടുകാര്യസ്ഥതയില്‍ കുത്തഴിഞ്ഞു കിടക്കുകയാണെന്ന് എല്‍ഡിഎഫ് നേതൃത്വം ആരോപിച്ചു. പണി കഴിഞ്ഞാലും കോണ്‍ട്രാക്‌ടര്‍മാരുടെ പണം നല്‍കുന്നില്ല. പെന്‍ഷന്‍ നല്‍കുന്നതിലുള്ള കാലതാമസം വരുത്തുക, കടത്തുകാര്‍ക്ക് പണം നല്‍കാതിരിക്കുക, പുതിയതായി നിയമിച്ചവര്‍ക്ക് ശമ്പളം നല്‍കാതിരിക്കുക എന്നിങ്ങനെ നിരവധി ആക്ഷേപങ്ങളാണ് നഗരസഭയ്ക്കെതിരേയുള്ളതെന്നും ഇത് അവസാനിപ്പിക്കണമെന്നാവശ്യപ്പെട്ടാണ് സമരമെന്നും നേതാക്കള്‍ പറഞ്ഞു.

മീനടം യാക്കോബായ പള്ളിയിൽ ഓർമപ്പെരുന്നാൾ

മീനടം: സെന്‍റ് ജോണ്‍സ് യാക്കോബായ സുറിയാനി പള്ളിയില്‍ മര്‍ത്തശ്മൂനി അമ്മയുടെയും സഹോദരന്മാരായ ഏഴ് മക്കളുടെയും ഗുരുനാഥനായ മാര്‍ ഏലിയാസറിന്‍റെയും ഓര്‍മപ്പെരുന്നാള്‍ ഓഗസ്റ്റ് രണ്ട്, മൂന്ന് തീയതികളില്‍ തൃശൂര്‍ ഭദ്രാസനാധിപന്‍ കുര്യാക്കോസ് മാര്‍ ക്ലീമിസ് മെത്രാപ്പോലീത്തായുടെ മുഖ്യകാര്‍മികത്വത്തില്‍ ആചരിക്കും. രണ്ടിനു മര്‍ത്തശ്മൂനി കുരിശുപള്ളിയില്‍ വൈകുന്നേരം ആറിനു സന്ധ്യാനമസ്‌കാരം, ഏഴിന് ഗാനശുശ്രൂഷ-ഫാ. ജോണ്‍സ് കോട്ടയില്‍. 7.20ന് വചനപ്രഘോഷണം-റവ. മാണി കോര്‍എപ്പിസ്‌കോപ്പ കല്ലാപ്പുറം, എട്ടിന് മധ്യസ്ഥപ്രാര്‍ഥന. റവ. തോമസ് ഇട്ടി കോര്‍എപ്പിസ്‌കോപ്പ കുന്നത്തയ്യേട്ട്, ഫാ. ജേക്കബ് ചെറിയാന്‍ മണ്ണൂര്‍, ഫാ. കുര്യന്‍ മാത്യു വടക്കേപ്പറമ്പില്‍, ഫാ. സ്വോബി മാത്യു മൂലയില്‍, ഫാ. നൈനാന്‍ ഫിലിപ്പ് എട്ടുപറയില്‍, ഫാ. തോമസ് കുര്യന്‍ കണ്ടാന്ത്ര, റവ.ഡോ. ബിനോയി തോമസ് വള്ളിക്കാട്ടില്‍ എന്നിവര്‍ കാര്‍മികത്വം വഹിക്കും. 8.30നു പാച്ചോര്‍ നേര്‍ച്ച വിതരണം. മൂന്നിനു മീനടം പള്ളിയില്‍ 7.15നു പ്രഭാതപ്രാര്‍ഥന, 8.15നു വിശുദ്ധ കുര്‍ബാനയ്ക്കും മധ്യസ്ഥപ്രാര്‍ഥനയ്ക്കും കുര്യാക്കോസ് മാര്‍ ക്ലീമിസ് മെത്രാപ്പോലീത്ത മുഖ്യകാര്‍മികത്വം വഹിക്കും. പത്തിന് അനുമോദനസമ്മേളനം, 10.15നു പ്രദക്ഷിണം, വെള്ളയപ്പം നേര്‍ച്ച വിതരണം. ശുശ്രൂഷകള്‍ക്ക് റവ. കുര്യന്‍ കോര്‍എപ്പിസ്‌കോപ്പ മാലിയില്‍, ഫാ. തോമസ് വേങ്കടത്ത് എന്നിവര്‍ നേതൃത്വം നല്‍കും.

ഖാദി ഓണം മേള നാളെ മുതല്‍

കോട്ടയം: കേരള ഖാദി ഗ്രാമവ്യവസായ ബോര്‍ഡിന്‍റെ ഖാദി ഓണം മേള നാളെ മുതല്‍ സെപ്റ്റംബര്‍ നാലുവരെ നടക്കും. മേളയില്‍ ജില്ലയിലെ തനതായ ഉത്പന്നങ്ങള്‍ക്കു പുറമേ രാജ്യത്തിന്‍റെ വിവിധ ഭാഗങ്ങളില്‍നിന്നുള്ള വൈവിധ്യമാര്‍ന്ന ഖാദി തുണിത്തരങ്ങളും ഉണ്ടാകും. റെഡിമെയ്ഡ് ഷര്‍ട്ടുകള്‍, കോട്ടണ്‍ കുര്‍ത്തികള്‍, സില്‍ക്ക് സാരികള്‍, കോട്ടണ്‍ സാരികള്‍, ബെഡ്ഷീറ്റുകള്‍ കൂടാതെ ഗ്രാമ വ്യവസായ ഉത്പന്നങ്ങളായ നാടന്‍ പഞ്ഞിമെത്തകള്‍, തേന്‍, ചക്കിലാട്ടിയ എളെളണ്ണ, സോപ്പ്, സ്റ്റാര്‍ച്ച് തുടങ്ങിയവ മേളകളിലുണ്ടാവും. ഖാദി തുണിത്തരങ്ങള്‍ക്ക് 30 ശതമാനം വരെ സര്‍ക്കാര്‍ റിബേറ്റ്, ഡിസ്‌കൗണ്ടിനു പുറമേ ഓരോ ആയിരം രൂപയുടെ പര്‍ച്ചേസിനും സമ്മാനകൂപ്പണുകളും ലഭിക്കും. സര്‍ക്കാര്‍, അര്‍ധസര്‍ക്കാര്‍, പൊതുമേഖല, സഹകരണ സ്ഥാപനങ്ങളിലെ ജീവനക്കാര്‍ക്ക് 1,00,000 രൂപ വരെ ക്രെഡിറ്റ് സൗകര്യം ലഭ്യമാണ്.

പന്തംകൊളുത്തി പ്രകടനം

കോട്ടയം: കന്യാസ്ത്രീകളെ ഉടന്‍ മോചിപ്പിക്കണമെന്ന് ആവശ്യപ്പ െട്ട് കേരള കോണ്‍ഗ്രസ് -എം കോട്ടയത്ത് പന്തംകൊളുത്തി പ്രകടനവും പ്രതിഷേധ ധര്‍ണയും നടത്തി. ഓഗസ്റ്റ് ഒന്നിന് എല്ലാ പഞ്ചായത്തുകളിലും പന്തംകൊളുത്തി പ്രകടനവും പ്രതിഷേധ യോഗവും നടത്തുമെന്ന് ജില്ലാ പ്രസി ഡന്‍റ് പ്രഫ. ലോപ്പസ് മാത്യു അറിയിച്ചു. വിജി എം. തോമസ്, സഖറിയാസ് കുതിരവേലി, ഔസേപ്പച്ചന്‍ വാളിപ്ലാക്കല്‍, ജോസഫ് ചാമക്കാല, സാജന്‍ തൊടുക, സിറിയക് ചാഴികാടന്‍, മാലേത്ത് പ്രതാപചന്ദ്രന്‍, ജോജി കുറത്തിയാട്ട്, ബ്രൈറ്റ് വട്ടനിരപ്പേല്‍ എന്നിവര്‍ പ്രസംഗിച്ചു.

ഗുണനിലവാരമില്ലാത്ത സോപ്പ് വിറ്റ കമ്പനിക്ക് പിഴ

കോട്ടയം: ഗുണനിലവാരമില്ലാത്ത സോപ്പ് വിറ്റതിന് സെബാമെഡ് സോപ്പ് കമ്പനി നഷ്ടപരിഹാരം നല്‍കണമെന്ന് ഉത്തരവിട്ട് ജില്ലാ ഉപഭോക്തൃ തര്‍ക്കപരിഹാര കമ്മീഷന്‍. സോപ്പിന്‍റെ വിലയായ 540 രൂപയും കമ്പനിയുടെ ഭാഗത്തുനിന്നുണ്ടായ സേവനത്തിലെ പോരായ്മയ്ക്കും അന്യായമായ വ്യാപാര രീതികള്‍ക്കും നഷ്ടപരിഹാരമായി 50,000 രൂപയും നല്‍കാനാണ് അഡ്വ. വി.എസ്. മനുലാല്‍ പ്രസിഡന്‍റായും അഡ്വ. ആര്‍. ബിന്ദു, കെ.എം. ആന്‍റോ എന്നിവര്‍ അംഗങ്ങളുമായുള്ള ഉപഭോക്തൃ തര്‍ക്കപരിഹാര കമ്മീഷന്‍ വിധിച്ചത്. തൃക്കൊടിത്താനം സ്വദേശിയായ ജിന്‍സി വര്‍ഗീസ് തന്‍റെ എട്ടുമാസം പ്രായമുള്ള കുഞ്ഞിനുവേണ്ടി സെബാമെഡ് കമ്പനിയുടെ ഓണ്‍ലൈന്‍ സൈറ്റില്‍ ബുക്ക് ചെയ്ത് 540 രൂപയ്ക്ക് രണ്ട് ക്ലെന്‍സിംഗ് സോപ്പുകള്‍ വാങ്ങി. ആദ്യത്തെ സോപ്പ് ഉപയോഗിക്കാന്‍ തുടങ്ങി ഒരാഴ്ചയ്ക്കുശേഷം വെളുത്ത നിറമുള്ള സോപ്പ് മഞ്ഞയായി മാറിയതിനെത്തുടര്‍ന്ന് രണ്ടാമത്തെ സോപ്പ് ഉപയോഗിക്കാന്‍ തുടങ്ങി. തുടര്‍ന്ന് കുഞ്ഞിന്‍റെ ദേഹത്ത് ചുവന്ന കളറില്‍ ചൂടുകുരു വരുന്നതുപോലെ കണ്ടതിനാല്‍ സോപ്പ് പരിശോധിച്ചപ്പോള്‍ അതില്‍ ജീവനുള്ള പുഴുക്കളെ കണ്ടെത്തി. കമ്പനിയുടെ കസ്റ്റമര്‍ കെയറില്‍ പരാതി നല്‍കിയെങ്കിലും സോപ്പ് മാറ്റി നല്‍കാമെന്നുള്ള കമ്പനിയുടെ മറുപടി തൃപ്തികരമല്ലാത്തതിനാല്‍ ജിന്‍സി ഉപഭോക്ത്യ തര്‍ക്കപരിഹാര കമ്മീഷനെ സമീപിക്കുകയായിരുന്നു. ഉപയോഗിച്ച ശേഷം നനഞ്ഞ അവസ്ഥയില്‍ സൂക്ഷിച്ചതിനാലാണ് സോപ്പില്‍ പുഴുക്കള്‍ പ്രത്യക്ഷപ്പെട്ടതെന്നും ഉത്പന്നത്തിന്‍റെ പുറം പാക്കേജിംഗില്‍ അച്ചടിച്ച നിര്‍ദേശങ്ങള്‍ പാലിക്കുന്നതില്‍ പരാതിക്കാരി പരാജയപ്പെട്ടുവെന്നും കമ്പനി വാദിച്ചെങ്കിലും തിരുവനന്തപുരത്തെ ഡ്രഗ് ടെസ്റ്റിംഗ് ലബോറട്ടിയില്‍ പരിശോധിച്ചതിന്‍റെ റിപ്പോര്‍ട്ട് അനുസരിച്ച് സോപ്പ് നിലവാരമില്ലാത്തതാണെന്ന് കണ്ടെത്തി. നിലവാരവും സ്പെസിഫിക്കേഷനും സുരക്ഷാ മാനദണ്ഡങ്ങളും പാലിക്കാതെ കമ്പനി സോപ്പ് വിറ്റുവെന്നും അതുവഴി അന്യായമായ വ്യാപാരരീതി നടത്തിയെന്നും കമ്മീഷന്‍ വ്യക്തമാക്കി.

മരം വീഴട്ടെ; എന്നിട്ടു മുറിക്കാം

സ്കൂളിനും വില്ലേജ് ഓഫീസിനും ഭീഷണിയായി വൻമരങ്ങൾ ഏറ്റുമാനൂർ: സ്കൂളിനും വില്ലേജ് ഓഫീസിനും വ്യാപാര സ്ഥാപനങ്ങൾക്കും ഭീഷണിയായി നിൽക്കുന്ന വന്മരങ്ങൾ വെട്ടിനീക്കാൻ തയാറാകാതെ അധികൃതർ. ഏറ്റുമാനൂർ വില്ലേജ് ഓഫീസ് വളപ്പിലാണ് അപകട ഭീഷണിയായി വന്മരങ്ങൾ നിൽക്കുന്നത്. ദിവസേന നൂറുകണക്കിനാളുകളാണ് വില്ലേജ് ഓഫീസിൽ എത്തുന്നത്. വില്ലേജ് ഓഫീസ് വളപ്പിനോട് തൊട്ടുചേർന്നാണ് ഗവൺമെന്‍റ് ബോയ്സ് സ്കൂൾ കെട്ടിടം. വില്ലേജ് ഓഫീസിനു സമീപത്തുതന്നെ വ്യാപാര സമുച്ചയവുമുണ്ട്. ശക്തമായ കാറ്റും മഴയും ഉണ്ടാകുമ്പോൾ ഇവിടങ്ങളിൽ എത്തുന്ന ആളുകളും നാട്ടുകാരും ഭയപ്പാടിലാണ്. ഏതു നിമിഷവും നിലംപൊത്താവുന്ന അവസ്ഥയിലാണ് മരങ്ങൾ. മരങ്ങൾ കടപുഴകുകയോ വലിയ ശിഖരങ്ങൾ ഒടിഞ്ഞു വീഴുകയോ ചെയ്യാൻ സാധ്യതയുണ്ട്. നിരവധി തവണ പരാതി പറഞ്ഞിട്ടും മരങ്ങൾ വെട്ടിമാറ്റാൻ അധികൃതർ തയ്യാറാകുന്നില്ല. മുമ്പൊരിക്കൽ ഒരു വലിയ മരം മാത്രം വെട്ടി നീക്കിയിരുന്നു. പാഴ്മരങ്ങളായതുകൊണ്ട് ആവശ്യക്കാരുമില്ല. വെട്ടി നീക്കാൻ വലിയ തുക ചെലവാകുകയും ചെയ്യും. ഇതാണ് നടപടി ഉണ്ടാകാത്തതിന് കാരണം. പരാതിയുമായെത്തിയ വ്യാപാരികളോട് നിങ്ങൾ വെട്ടിനീക്കിക്കൊള്ളാൻ പറഞ്ഞതായും പറയുന്നു. എന്തു തന്നെയായാലും വിദ്യാർഥികൾ ഉൾപ്പെടെയുള്ളവർക്ക് ഭീഷണിയായി നിൽക്കുന്ന മരങ്ങൾ അടിയന്തരമായി വെട്ടി നീക്കാൻ നടപടി ഉണ്ടാകണമെന്ന ആവശ്യം ശക്തമാണ്.

കന്യാസ്ത്രീകളുടെ അറസ്റ്റ്: പ്രതിഷേധം അലയടിക്കുന്നു

കേരളം പാര്‍ലമെന്‍റിനു മുമ്പില്‍ ഒന്നിക്കും: മാര്‍ കല്ലറങ്ങാട്ട് പാലാ: ഛത്തീസ്ഗഡിൽ ജയിലില്‍ കിടക്കുന്ന കന്യാസ്ത്രീകള്‍ ഭാരതത്തിലെ ക്രൈസ്തവരെ കോര്‍ത്തിണക്കുന്ന ചങ്ങലയാണെന്നും ഇവരുടെ ജയില്‍വാസം അനിശ്ചിതമായി നീണ്ടാല്‍ കേരള ജനത ഡല്‍ഹി പാര്‍ലമെന്‍റിനു മുന്നില്‍ ഒന്നിക്കുമെന്നും ബിഷപ് മാർ ജോസഫ് കല്ലറങ്ങാട്ട് . ഛത്തീസ്ഗഡില്‍ ജയിലില്‍ കഴിയുന്നു കന്യാസ്ത്രീകള്‍ക്ക് ഐക്യദാർഢ്യം പ്രഖ്യാപിച്ച് ഇന്നലെ പാലാ രൂപത ഭരണങ്ങാനത്ത് നടത്തിയ പ്രാര്‍ഥനാ യജ്ഞത്തില്‍ സന്ദേശം നല്‍കുകയായിരുന്നു ബിഷപ് മാർ കല്ലറങ്ങാട്ട്. മൗലികാവകാശങ്ങള്‍ കൂടെക്കൂടെ ഓര്‍മിപ്പിക്കേണ്ടി വരുന്നത് ദൗര്‍ഭാഗ്യകരമാണ്. എത്രയോ പ്രാവശ്യം ഭരണഘടന കീറിമുറിക്കപ്പെട്ടു. മതസ്വാതന്ത്ര്യം തടയുന്നത് അപകടകരമാണ്. സഭയ്ക്ക് രാഷ്‌ട്രീയമില്ല. എന്നാല്‍ രാഷ്‌ട്രീയക്കാരെ തങ്ങളുടെ അവകാശങ്ങള്‍ സംബന്ധിച്ച് പഠിപ്പിക്കാന്‍ ഉത്തരവാദിത്വമുണ്ട്. ക്രൈസ്തവര്‍ അംഗബലത്തിൽ ചെറുതാണെങ്കിലും മൂല്യങ്ങളിൽ സ്വാധീനമുള്ളവരാണെന്നും ബിഷപ് ഉദ്ബോധിപ്പിച്ചു. ജയിലില്‍ കഴിയുന്ന കന്യാസ്ത്രീകള്‍ക്ക് ഐക്യദാര്‍ഢ്യം പ്രഖ്യാപിക്കാന്‍ ഭരണങ്ങാനത്ത് പാലാ രൂപതയൊന്നാകെ ഒത്തുചേരുകയായിരുന്നു. തീര്‍ഥാടന കേന്ദ്രവും ഫൊറോന ദേവാലയപരിസരവും തിങ്ങിനിറഞ്ഞ അല്മായരും സന്യസ്തരും ജപമാല കൈകളിലേന്തി പ്രാര്‍ഥനയോടെയാണ് ജയിലില്‍ കഴിയുന്ന കന്യാസ്ത്രീകള്‍ക്കു വേണ്ടി പ്രാര്‍ഥിച്ചും ഐക്യദാര്‍ഢ്യം പ്രഖ്യാപിച്ചും വിശുദ്ധ അല്‍ഫോന്‍സാമ്മയ്ക്ക് അവരെ സമര്‍പ്പിച്ചത്. തീര്‍ഥാടന ദേവാലയത്തില്‍നിന്ന് ആരംഭിച്ച ജപമാല റാലി ഫൊറോന ദേവാലയം ചുറ്റി തിരികെ തീര്‍ഥാടന ദേവാലയത്തിലെത്തി സമാപിച്ചു. ഫൊറോന വികാരി ഫാ. സഖറിയാസ് ആട്ടപ്പാട്ട് സ്വാഗതവും രൂപത മുഖ്യ വികാരി ജനറാള്‍ മോണ്‍. ജോസഫ് തടത്തില്‍ കൃതജ്ഞതയും പറഞ്ഞു. മാര്‍ ജോസഫ് പള്ളിക്കാപറമ്പില്‍, മാര്‍ ജോസഫ് കൊല്ലംപറമ്പില്‍, വികാരി ജനറാള്‍മാരായ മോണ്‍. ജോസഫ് മലേപ്പറമ്പില്‍, മോണ്‍. സെബാസ്റ്റ്യന്‍ വേത്താനത്ത്, മോണ്‍. ജോസഫ് കണിയോടിക്കല്‍, ഫൊറോന വികാരിമാര്‍, ജനപ്രതിനിധികള്‍, വിവിധ അല്മായ സംഘടനാ ഭാരവാഹികള്‍, സന്യസ്തര്‍ തുടങ്ങിയവര്‍ പങ്കെടുത്തു. ആക്രമണം ഭാരതത്തിന്‍റെ ആത്മാവിനേറ്റ മുറിവ്: മാര്‍ മൂലക്കാട്ട് കോട്ടയം: ഛത്തീസ്ഗഡില്‍ കന്യാസ്ത്രീകള്‍ക്കുനേരേയുണ്ടായ ആക്രമണം ആര്‍ഷ ഭാരതത്തിന്‍റെ ആത്മാവിനേറ്റ മുറിവാണെന്നും ഭാരതസ്ത്രീകള്‍ തന്‍ ഭാവശുദ്ധിയെ ഭരണകൂടം ഇരുമ്പഴിക്കുള്ളിലാക്കിയിരിക്കുകയാണെന്നും കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട്. ഛത്തീസ്ഗഡില്‍ കന്യാസ്ത്രീകളെ അറസ്റ്റു ചെയ്തതില്‍ പ്രതിഷേധിച്ചു കോട്ടയം പൗരാവലിയുടെയും വിവിധ സംഘടനകളുടെയും ആഭിമുഖ്യത്തില്‍ കോട്ടയം തിരുനക്കരയില്‍ നടന്ന പ്രതിഷേധ കൂട്ടായ്മ ഉദ്ഘാടനം ചെയ്യുകയായിരുന്നു മാര്‍ മൂലക്കാട്ട്. നന്മയുടെ വെളിച്ചം പകർന്ന് സ്നേഹത്തിന്‍റെയും സാഹോദര്യത്തിന്‍റെയും മഹത്വം ലോകത്തിനു വെളിവാക്കി പ്രവര്‍ത്തിക്കുന്ന ക്രൈസ്തവ സമൂഹത്തെ ഇല്ലാത്ത കാരണങ്ങളുടെ പേരില്‍ ഒതുക്കാനും തളര്‍ത്താനും ശ്രമിച്ചാല്‍ ഭാരതം അതിനു സമ്മതിക്കില്ലെന്നും മാര്‍ മൂലക്കാട്ട് പറഞ്ഞു. തിരുവഞ്ചൂര്‍ രാധാകൃഷ്ണന്‍ എംഎല്‍എ, കോട്ടയം അതിരൂപത വികാരി ജനറാളും രാഷ്ട്രദീപിക ലിമിറ്റഡ് മാനേജിംഗ് ഡയറക്ടറുമായ ഫാ. മൈക്കിള്‍ വെട്ടിക്കാട്ട്, കാരിത്താസ് ആശുപത്രി ഡയറക്ടര്‍ റവ.ഡോ. ബിനു കുന്നത്ത്, സിപിഐ ജില്ലാ സെക്രട്ടറി വി.ബി. ബിനു, സിപിഎം സംസ്ഥാന കമ്മിറ്റിയംഗം കെ. അനില്‍കുമാര്‍, എംജി യൂണിവേഴ്‌സിറ്റി സിന്‍ഡിക്കറ്റംഗം റെജി സഖറിയ, ക്‌നാനായ കത്തോലിക്ക കോണ്‍ഗ്രസ് പ്രസിഡന്‍റ് ബാബു പറമ്പടത്തുമലയില്‍, കേരള കോണ്‍ഗ്രസ് ജില്ലാ പ്രസിഡന്‍റ് ജയ്‌സണ്‍ ജോസഫ്, ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍, കോട്ടയം ലൂർദ് ഫൊറോന വികാരി റവ.ഡോ. ജോർജ് വട്ടക്കാട്ട്, സിസ്റ്റര്‍ സൗമ്യ, ഡോ. കെ.എം. ബെന്നി, സണ്ണി കാഞ്ഞിരം, മാത്യു കൊല്ലമലക്കരോട്ട്, ബേബി മുളവേലിപ്പുറം, ബിനു ചെങ്ങളം തുടങ്ങിയവര്‍ പ്രസംഗിച്ചു. അടിയന്തര നടപടിയുണ്ടാകണം: കോട്ടയം അതിരൂപത കോട്ടയം: ഛത്തീസ്ഗഡില്‍ സിസ്റ്റര്‍ വന്ദന ഫ്രാന്‍സിസിനെയും സിസ്റ്റര്‍ പ്രീതി മേരിയെയും അന്യായമായി ജയിലിലടച്ചത് ഭരണഘടന ഉറപ്പുനല്‍കുന്ന മൗലികാവകാശങ്ങളുടെ നഗ്നമായ ലംഘനമാണെന്ന് കോട്ടയം അതിരൂപത. സ്വതന്ത്രഭാരതത്തില്‍ എല്ലാ പൗരന്മാര്‍ക്കും തുല്യ അവകാശമുണ്ടെന്നിരിക്കെ നിസ്വാര്‍ഥമായി സാമൂഹ്യശുശ്രൂഷ ചെയ്യുന്ന കന്യാസ്ത്രീകള്‍ക്ക് സഭാവസ്ത്രം ധരിച്ച് രാജ്യത്ത് യാത്രചെയ്യാന്‍പോലും കഴിയാത്ത അവസ്ഥ അങ്ങേയറ്റം ഭീതിജനകമാണ്. കേന്ദ്രസര്‍ക്കാരും ഛത്തീസ്ഗഡ് ഭരണാധികാരികളും മൗനംവെടിഞ്ഞ് നീതിയുടെ പക്ഷത്തു നില്‍ക്കണം. സിസ്റ്റര്‍ വന്ദന ഫ്രാന്‍സിസിനും സിസ്റ്റര്‍ പ്രീതി മേരിക്കും അവര്‍ അംഗങ്ങളായ സന്യാസിനീ സമൂഹത്തിനുമൊപ്പമാണ് കോട്ടയം അതിരൂപത. അവര്‍ നേരിടുന്ന അധിക്ഷേപങ്ങളെ അതിരൂപത ഒന്നടങ്കം അപലപിക്കുന്നു. സിസ്റ്റേഴ്സിനെതിരേ ചുമത്തിയിരിക്കുന്ന കള്ളക്കേസുകള്‍ അടിയന്തരമായി പിന്‍വലിക്കണമെന്നും കോട്ടയം അതിരൂപത ആവശ്യപ്പെട്ടു.

മെഡി. കോളജ് അപകടം അന്വേഷണ റിപ്പോര്‍ട്ട് : രക്ഷാപ്രവര്‍ത്തനം വൈകിയില്ലെന്ന് കളക്ടര്‍

കോട്ടയം: മെഡിക്കല്‍ കോളജ് ആശുപത്രിയില്‍ പഴയ കെട്ടിടം തകര്‍ന്നുവീണു വീട്ടമ്മ മരിച്ച സംഭവത്തില്‍ ജില്ലാ കളക്ടര്‍ അന്വേഷണ റിപ്പോര്‍ട്ട് സമര്‍പ്പിച്ചു. അപകടത്തില്‍ രക്ഷാപ്രവര്‍ത്തനം വൈകിയിട്ടില്ലെന്നാണ് കളക്ടര്‍ ജോണ്‍ വി. സാമുവല്‍ ആരോഗ്യവകുപ്പ് അഡീഷണല്‍ ചീഫ് സെക്രട്ടറിക്കു കൈമാറിയ റിപ്പോര്‍ട്ടില്‍ വ്യക്തമാക്കിയിരിക്കുന്നത്. കെട്ടിടത്തിന്‍റെ ബലക്ഷയം സംബന്ധിച്ച് മുന്‍പ് ഔദ്യോഗിക റിപ്പോര്‍ട്ടുകള്‍ ഒന്നുമില്ലായിരുന്നുവെന്നും റിപ്പോര്‍ട്ടില്‍ പറയുന്നു. ജൂലൈ മൂന്നിനു രാവിലെ 11നാണ് പതിനാലാം വാര്‍ഡിലെ ശുചിമുറിയുടെ ഭാഗം തകര്‍ന്നുവീണു തലയോലപ്പറമ്പ് സ്വദേശി ബിന്ദു മരിച്ചത്. വ്യാപക പ്രതിഷേധം ഉയര്‍ന്ന പശ്ചാത്തലത്തില്‍ അന്വേഷിച്ച് റിപ്പോര്‍ട്ട് സമര്‍പ്പിക്കാന്‍ ജില്ലാ കളക്ടര്‍ക്കു സര്‍ക്കാര്‍ നിര്‍ദേശം നല്‍കിയിരുന്നു. അപകടം നടന്ന സ്ഥലത്ത് മണ്ണുമാന്ത്രിയന്ത്രം എത്തിക്കാന്‍ ഇടമില്ലാതിരുന്നതിനാല്‍ വാര്‍ഡിന്‍റെ കവാടം പൊളിച്ച് സൗകര്യം ഒരുക്കേണ്ടിവന്നത് പരിമിതിയായി റിപ്പോര്‍ട്ടിലുണ്ട്. തകര്‍ന്നുവീണ കെട്ടിടത്തിന്‍റെ അവശിഷ്ടങ്ങള്‍ക്കിടയില്‍നിന്ന് രണ്ടര മണിക്കൂറിനുശേഷമാണ് ബിന്ദുവിനെ പുറത്തെടുക്കാന്‍ കഴിഞ്ഞത്. രക്ഷാപ്രവര്‍ത്തനം വൈകിയെന്നും കെട്ടിടത്തിന്‍റെ ബലക്ഷയം സംബന്ധിച്ച് മുന്‍പുതന്നെ റിപ്പോര്‍ട്ടുകള്‍ ലഭിച്ചുവെന്നും ആരോപണം ഉയര്‍ന്നിരുന്നു. അപകടം നടന്ന് 26-ാം ദിവസമാണ് റിപ്പോര്‍ട്ട് സമര്‍പ്പിച്ചത്. അന്വേഷണ റിപ്പോര്‍ട്ടല്ല, മംഗളപത്രം: തിരുവഞ്ചൂര്‍ രാധാകൃഷ്ണന്‍ കോട്ടയം: കോട്ടയം മെഡിക്കല്‍ കോളജ് ആശുപത്രിയില്‍ ജൂലൈ മൂന്നിന് ടോയ്‌ലറ്റ് കെട്ടിടം വീണ് തലയോലപ്പറമ്പ് സ്വദേശിനി ബിന്ദു മരിച്ച സംഭവത്തില്‍ കളക്ടര്‍ ജോണ്‍ വി. സാമുവൽ സമർപ്പിച്ച റിപ്പോര്‍ട്ട് സര്‍ക്കാരിനുള്ള മംഗളപത്രമാണെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ പ്രതികരിച്ചു. റിപ്പോര്‍ട്ട് വസ്തുതകള്‍ മറച്ചുവയ്ക്കുന്നതാണെന്ന് പരക്കെ വിമര്‍ശനം ഉയര്‍ന്നു. കെട്ടിടം ഉപയോഗത്തിലുള്ളതല്ലെന്നും ആരും അപകടത്തില്‍പ്പെട്ടിട്ടില്ലെന്നും സ്ഥലത്തെത്തിയ മന്ത്രിമാരായ വി.എന്‍. വാസവനും വീണാ ജോര്‍ജും പറഞ്ഞത് തെരച്ചില്‍ വൈകാന്‍ കാരണമായതായി റിപ്പോര്‍ട്ടിലില്ല. ബിന്ദുവിനെ കാണാനില്ലെന്ന വാര്‍ത്ത പരന്ന് ഒരു മണിക്കൂറിനു ശേഷമാണ് തെരച്ചില്‍ തുടങ്ങിയത്. കെട്ടിടം ഉപയോഗശൂന്യമായിരുന്നുവെന്ന് പറയുമ്പോഴും നിരവധി രോഗികളും കൂട്ടിരിപ്പുകാരും ഇതേ ടോയ്‌ലറ്റ് ഉപയോഗിച്ചിരുന്നു. പുതിയ കെട്ടിടം പണിതീര്‍ന്നെങ്കിലും അവിടേക്ക് വാര്‍ഡ് മാറ്റാന്‍ കാലതാമസമുണ്ടായതായും തിരുവഞ്ചൂർ പറഞ്ഞു.

ജില്ലാ ജൂണിയര്‍ അത്‌ലറ്റിക് ചാമ്പ്യന്‍ഷിപ്പ്‌: പാലാ അല്‍ഫോന്‍സാ അത്‌ലറ്റിക് അക്കാദമി മുന്നില്‍

പാലാ: ജില്ലാ അത്‌ലറ്റിക് ചാമ്പ്യന്‍ഷിപ്പില്‍ പാലാ അല്‍ഫോന്‍സ അത്‌ലറ്റിക് അക്കാദമി 321 പോയിന്‍റുമായി മുന്നിട്ടു നില്‍ക്കുന്നു. 134 പോയിന്‍റുമായി ചങ്ങനാശേരി അസംപ്ഷന്‍ കോളജ് രണ്ടാം സ്ഥാനത്തും 116 പോയിന്‍റുമായി പൂഞ്ഞാര്‍ എസ്എംവിഎച്ച്എസ്എസ് മൂന്നാം സ്ഥാനത്തും നില്‍ക്കുന്നു. വനിതകളുടെ 20 വയസില്‍ താഴെയുള്ള വിഭാഗത്തില്‍ അല്‍ഫോന്‍സ അത്‌ലറ്റിക് അക്കാഡമി 102 പോയിന്‍റുമായി ഒന്നാമതും 94 പോയിന്‍റുമായി അസംപ്ഷന്‍ കോളജ് രണ്ടാമതും നില്‍ക്കുന്നു. പുരുഷന്മാരുടെ 20 വയസില്‍ താഴെയുള്ള വിഭാഗത്തില്‍ സെന്‍റ് ഡൊമിനിക്‌സ് കോളജ് കാഞ്ഞിരപ്പള്ളി 77 പോയിന്‍റുമായി ഒന്നാമതും 58 പോയിന്‍റുമായി എസ്ബി കോളജ് രണ്ടാമതും നില്‍ക്കുന്നു. വനിതകളുടെ 18 വയസില്‍ താഴെയുള്ള വിഭാഗത്തില്‍ അല്‍ഫോന്‍സാ അത്‌ലറ്റിക് അക്കാഡമി 69 പോയിന്‍റുമായി ഒന്നാമതും അസംപ്ഷന്‍ കോളജ് 39 പോയിന്‍റുമായി രണ്ടാം സ്ഥാനത്തും നില്‍ക്കുന്നു. പുരുഷന്മാരുടെ 18 വയസില്‍ താഴെയുള്ള വിഭാഗത്തില്‍ അല്‍ഫോന്‍സാ അത്‌ലറ്റിക് അക്കാദമി 50 പോയിന്‍റുമായി ഒന്നാമതും ഭവന്‍സ് വിദ്യാലയ 27 പോയിന്‍റുമായി രണ്ടാം സ്ഥാനത്തും നില്‍ക്കുന്നു. പെണ്‍കുട്ടികളുടെ 16 വയസില്‍ താഴെയുള്ള വിഭാഗത്തില്‍ ഭരണങ്ങാനം എസ്എച്ച്ജിഎച്ച്എസ് 57 പോയിന്‍റുമായി ഒന്നാമതും പൂഞ്ഞാര്‍ എസ്എംവിഎച്ച്എസ് 28 പോയിന്‍റുമായി രണ്ടാം സ്ഥാനത്തും നില്‍ക്കുന്നു. ആണ്‍കുട്ടികളുടെ 16 വയസില്‍ താഴെയുള്ള വിഭാഗത്തില്‍ 42 പോയിന്‍റുമായി പൂഞ്ഞാര്‍ എസ്എംവിഎച്ച്എസ് എസ് ഒന്നാം സ്ഥാനത്തും 33 പോയിന്‍റുമായി കോട്ടയം എംഡിഎസ്എച്ച്എസ്എസ് രണ്ടാം സ്ഥാനത്തും നില്‍ക്കുന്നു. പെണ്‍കുട്ടികളുടെ 14 വയസില്‍ താഴെയുള്ള വിഭാഗത്തില്‍ അല്‍ഫോന്‍സാ അത്‌ലറ്റിക് അക്കാഡമി 30 പോയിന്‍റുമായി ഒന്നാമതും ഭരണങ്ങാനം എസ്എച്ച്ജിഎച്ച്എസ് 23 പോയിന്‍റുമായി രണ്ടാമതും നില്‍ക്കുന്നു. ആണ്‍കുട്ടികളുടെ അണ്ടര്‍ 14 വയസില്‍ താഴെയുള്ള വിഭാഗത്തില്‍ 36 പോയിന്‍റുമായി അല്‍ഫോന്‍സാ അത്‌ലറ്റിക് അക്കാദമി ഒന്നാം സ്ഥാനത്തും കുറുമ്പനാടം സെന്‍റ് പീറ്റേഴ്‌സ് 23 പോയിന്‍റുമായി രണ്ടാം സ്ഥാനത്തും നില്‍ക്കുന്നു. മീറ്റ് പാലാ മുനിസിപ്പല്‍ ചെയര്‍മാന്‍ തോമസ് പീറ്റര്‍ ഉദ്ഘാടനം ചെയ്തു.പാലാ മുനിസിപ്പല്‍ വൈസ് ചെയര്‍പേഴ്‌സണ്‍ ബിജി ജോജോ അധ്യക്ഷത വഹിച്ചു. മുനിസിപ്പല്‍ കൗണ്‍സിലര്‍മാരായ സാവിയോ കാവുകാട്ട്, ജോസ് ജെ. ചീരാംകുഴി, ലീന സസി, വി.സി. ജോസഫ്, വി.സി. പ്രിന്‍സ്, ജോസിന്‍ ബിനോ, ജില്ലാ സ്‌പോര്‍ട്സ് കൗണ്‍സില്‍ സെക്രട്ടറി മായാദേവി എന്നിവര്‍ പ്രസംഗിച്ചു. ഒളിമ്പ്യന്‍ മനോജ്‌ലാല്‍ മുഖ്യാതിഥിയായിരുന്നു. ജില്ലാ അത്‌ലറ്റിക് അസോസിയേഷന്‍ സെക്രട്ടറി ഡോ. തങ്കച്ചന്‍ മാത്യു സ്വാഗതവും പ്രവീണ്‍ തരിയന്‍ നന്ദിയും പറഞ്ഞു. ഇന്ന് വൈകുന്നേരം നടക്കുന്ന സമാപന സമ്മേളനത്തില്‍ ജില്ലാ അത്‌ലറ്റിക് അസോസിയേഷന്‍ പ്രസിഡന്‍റ് ഫാ. മാത്യു കരീത്തറ സമ്മാനദാനം നിര്‍വഹിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]