ADVERTISEMENT

ADVERTISEMENT

ഫുട്ബോൾ കോച്ചസ് അസോ. ടൂർണമെന്‍റിന് തുടക്കം

അമ്പലപ്പുഴ: ജില്ലാ ഫുട്ബോൾ കോച്ചസ് അസോസിയേഷൻ സംഘടിപ്പിക്കുന്ന ഫുട്ബോൾ ടൂർണമെന്‍റിന് തുടക്കമായി. വണ്ടാനം ഗവ. ടിഡി മെഡിക്കൽ കോളജ് ഗ്രൗണ്ടിൽ എച്ച്. സലാം എംഎൽഎ ഉദ്ഘാടനം ചെയ്തു. ചത്തിയറ വിഎച്ച്എസ് സ്കൂൾ ഗ്രൗണ്ടിൽ ഇന്നും കലവൂർ ലിമിറ്റ്‌ലെസ് സ്പോട്സ് ഹബ്ബിൽ 19നും ടൂർണമെന്‍റ് നടത്തും.

ടൂർണമെന്‍റിൽനിന്നു തെരഞ്ഞെടുക്കുന്ന കളിക്കാരെ സംസ്ഥാനത്തിനകത്തും പുറത്തുമുള്ള വിവിധ അക്കാദമികളുമായി പരിശീലന മത്സരങ്ങളിലും ദീർഘകാല പരിശീലന പദ്ധതികൾകളിലും അസോസിയേഷൻ പങ്കെടുക്കും. പഞ്ചായത്തംഗം ജയപ്രകാശ്, അസോസിയേഷൻ പ്രസിഡന്‍റ് സി. ശശി, സെക്രട്ടറി ശ്രീരഞ്ചൻ, ആർ. ബിനു, നിക്സൺ, പ്രവീൺ, വിജയൻ ഇരുമ്പനം, സുജിത്ത്, സൂര്യമോൾ എന്നിവർ പങ്കെടുത്തു.

ADVERTISEMENT

കടന്നൽ കുത്തേറ്റ് തെങ്ങിനു മുകളിൽ കുടുങ്ങിയ ആളെ അഗ്നിരക്ഷാസേന രക്ഷിച്ചു

കായംകുളം: കടന്നല്‍ കുത്തേറ്റ് തെങ്ങിനു മുകളില്‍ കുടുങ്ങിയ ആളെ അഗ്‌നിരക്ഷാസേന രക്ഷിച്ചു. കായംകുളം കീരിക്കാട് തെക്ക് ഐക്യ ജംഗ്ഷനു സമീപം വെളുത്തേടത്ത് സന്തോഷ് കുമാറിന്‍റെ പുരയിടത്തിലെ തേങ്ങയിടാന്‍ കയറിയ ഇതരസംസ്ഥാന തൊഴിലാളിയാണ് കടന്നല്‍ കുത്തേറ്റ് തെങ്ങിനു മുകളില്‍ കുടുങ്ങിയത്. വിവരം അറിഞ്ഞെത്തിയ കായംകുളം അഗ്‌നിരക്ഷാസേനയിലെ അസി. സ്റ്റേഷന്‍ ഓഫീസര്‍ സജിത്ത് ലാലിന്‍റെ നേതൃത്വത്തില്‍ എത്തിയ സംഘത്തിലെ ഫയര്‍ ആന്‍ഡ് റെസ്‌ക്യൂ ഓഫീസര്‍ ഷിജു ടി. സാം ലാഡര്‍ ഉപയോഗിച്ച് തെങ്ങില്‍ കയറി തെങ്ങിന്‍റെ പൊത്തിലെ കടന്നല്‍ കൂടിന്‍റെ വാതില്‍ തുണി ഉപയോഗിച്ച് മൂടിക്കെട്ടുകയും വെളിയില്‍ ഉണ്ടായിരുന്ന കടന്നല്‍ കൂട്ടത്തെ ഹിറ്റ് ഉപയോഗിച്ച് തുരത്തുകയും ചെയ്തു. ശേഷം വളരെ സഹസികമായി ചത്തിസ്ഗഡ് സ്വദേശിയായ വിക്കി(21)യെ ലാഡര്‍ ഉപയോഗിച്ചു സുരക്ഷിതമായി താഴെ എത്തിച്ചു. കടന്നലിന്‍റെ കുത്തേറ്റ ഇയാളെ ഉടന്‍തന്നെ കായംകുളം താലൂക്ക് ആശുപത്രിയില്‍ പ്രവേശിപ്പിച്ചു.

നെല്ല് സംഭരിക്കാൻ കാലതാമസം, കർഷകർ പ്രതിഷേധിച്ചു

മാന്നാര്‍: കൃഷിവകുപ്പിനും സിവില്‍ സപ്ലൈസ് വകുപ്പിനും പുല്ലുവിലപോലും കൽപ്പിക്കാതെയാണ് മില്ലുടമകളുടെ നെല്ല് ശേഖരണ ഏജന്‍റുമാര്‍ എത്തുന്നതെന്ന് കര്‍ഷകര്‍. ഈ രണ്ടു വകുപ്പിനെയും നോക്കുകുത്തിയാക്കി കൊണ്ടാണ് ഇത്തരക്കാര്‍ നെല്ല് ശേഖരിക്കാനായി എത്തുന്നത്. മാന്നാര്‍ പഞ്ചായത്തിലെ ഇടപുഞ്ച പടിഞ്ഞാറ് പാടശേഖരത്തില്‍ വിളവെടുപ്പ് കഴിഞ്ഞ് കര്‍ഷകര്‍ അവരുടെ നെല്ല് നല്ല രീതിയില്‍ ഗുണനിലവാരത്തോടുകൂടി തയാറാക്കിയെങ്കിലും ഒരാഴ്ചയ്ക്കുശേഷമാണ് നെല്ല് സംഭരണത്തിനായി എത്തിയത്. രണ്ടു വകുപ്പുകളുടെയും ഉദ്യോഗസ്ഥര്‍ ഇവരുമായി ബന്ധപ്പെട്ടെങ്കിലും അവര്‍ ഒരോ കാരണങ്ങള്‍ പറഞ്ഞ് നീട്ടികൊണ്ടു പോകുകയായിരുന്നു. ഈ ഏജന്‍റുമാര്‍ തീരുമാനിക്കുന്നതുപോലെ മാത്രം നെല്ലെടുപ്പ് നടക്കുന്ന അവസ്ഥയാണ്. ഈപ്രവണത മാറ്റിയില്ലെങ്കില്‍ കര്‍ഷകര്‍ക്ക് വളരെയധികം ബുദ്ധിമുട്ടുകള്‍ തുടര്‍ന്നുള്ള നെല്ല് സംഭരണത്തില്‍ നേരിടേണ്ടി വരും. നെല്ലിന്‍റെ കിഴിവും മറ്റ് കാര്യങ്ങളുമെല്ലാം ഇവര്‍ തന്നെയാണ് തീരുമാനിക്കുന്നത്. പല പ്രതിസന്ധികളെയും മറികടന്ന് കൃഷി നടത്തി വിളവെടുപ്പ് നടത്തിയ ശേഷവും ശേഖരണത്തിനായി വീണ്ടും കാത്തിരിക്കുന്ന രീതി അവസാനിപ്പിക്കണമെന്നാണ് കര്‍ഷകരുടെ ആവശ്യം. ഈ രീതിവരും വര്‍ഷത്തെ നെല്‍കൃഷിയെ തന്നെ ബാധിക്കുമെന്നാണ് കര്‍ഷകര്‍ പറയുന്നത്.

അരങ്ങൊഴിഞ്ഞത് ഷേക്‌സ്പിയർ നാടകങ്ങളുടെ പ്രചാരകൻ

മങ്കൊമ്പ്: വിടപറഞ്ഞത് ഷേക്‌സ്പിയർ നാടകങ്ങളെ കുട്ടികൾക്കു പരിചയപ്പെടുത്തിയ, നാടകത്തെ സ്‌നേഹിച്ച അധ്യാപകൻ. കുട്ടനാടിന്‍റെ ഷേക്‌സ്പിയർ എന്നറിയപ്പെടുന്ന ഊരുക്കരി ജോസഫ് കുഞ്ഞ് സാർ നൊച്ചുവീട്ടിൽ അരങ്ങൊഴിഞ്ഞു. പാഠപുസ്തകങ്ങളുടെ ഏടുകൾക്കപ്പുറം, കലയുടെയും സാഹിത്യത്തിന്‍റെയും ലോകത്തേക്ക് തന്‍റെ ശിഷ്യന്മാരെ നയിച്ച മാതൃകാധ്യാപകനായിരുന്നു അരങ്ങൈാഴിഞ്ഞ ജോസഫ്കുഞ്ഞ് സാർ. ചമ്പക്കുളം സെന്‍റ് മേരീസ് ഹയർ സെക്കൻഡറി സ്‌കൂളിൽ അധ്യാപകനായിരിക്കെയാണ് നാടകപ്രവർത്തനങ്ങളിലേക്കു തിരിഞ്ഞത്. വിശ്വ നാടകകൃത്തായ ഷേക്‌സ്പിയറിന്‍റെ ഏഴു നാടകങ്ങൾ ഒൻപതു വർഷങ്ങൾ തുടർച്ചയായി കുട്ടികളെക്കൊണ്ട് അരങ്ങിൽ അവതരിപ്പിച്ചു. നാടകങ്ങളുടെ അവതരണത്തിനായി അദ്ദേഹം സെന്‍റ് മേരീസ് സ്‌കൂളിൽ സ്ട്രാട്ഫ്രട്ട് സ്റ്റേജ് എന്ന നാടക തിയറ്റർ രൂപീകരിച്ചു. ഊണിലും ഉറക്കത്തിലും ഷേക്‌സ്പിയർ നാടകങ്ങളായിരുന്നു അദ്ദേഹത്തിന്‍റെ മനസിലെന്ന് ഒപ്പം സേവനം ചെയ്ത അധ്യാപകർ സാക്ഷ്യപ്പെടുത്തുന്നു. ചങ്ങനാശേരി അതിരൂപത കോർപറേറ്റ് മാനേജ്‌മെന്‍റ് വിവിധ സ്‌കൂളുകളിൽ ഫിസിക്‌സ് അധ്യാപകനായിരുന്നു. 2023 മാർച്ചിൽ ചമ്പക്കുളം സെന്‍റ് മേരീസ് ഹയർ സെക്കൻഡറി സ്‌കൂളിൽനിന്നാണ് വിരമിച്ചത്. മിത്രക്കരി സെന്‍റ് സേവ്യേഴ്‌സ് സൺഡേ സ്‌കൂൾ ഹെഡ്മാസ്റ്റർ, യുവദീപ്തി ഭാരവാഹി, അധ്യാപക സംഘടന പ്രവർത്തകൻ എന്നീ നിലകളിലും പ്രവർത്തിച്ചിട്ടുണ്ട്. 2022ലെ അഖിലേന്ത്യാ ടീച്ചേഴ്‌സ് ഫെഡറേഷന്‍റെ ഗുരുശ്രേഷ്ഠ അവാർഡിന് അർഹനായിരുന്നു.

ഓണ്‍ലൈന്‍ തട്ടിപ്പ്: രണ്ടുപേർ പിടിയിൽ

ചേര്‍ത്തല: വ്യാപാരിയെ വെര്‍ച്വല്‍ അറസ്റ്റ് ചെയ്ത് 61.40 ലക്ഷം ഓണ്‍ലൈനായി തട്ടിയെടുത്ത കേസില്‍ രണ്ടു പേര്‍കൂടി പിടിയില്‍. നേപ്പാള്‍ സ്വദേശികളെയും ഉത്തര്‍പ്രദേശ് സ്വദേശികളെയുമാണ് പോലീസ് സംഘം അവരുടെ തട്ടകത്തിലെത്തി കീഴടക്കിയത്. പ്രധാന പ്രതികളായ നേപ്പാള്‍ സ്വദേശികളെ ഡല്‍ഹിയില്‍ നിന്നാണ് പിടികൂടിയത്. നേപ്പാള്‍ മൊറാംഗ് ജില്ലക്കാരായ പ്രിന്‍സ്‌ ദേവ് (24), അജിത്ത് ഖഡ്ക (26) എന്നിവരെയാണ് കഴിഞ്ഞദിവസം അരൂര്‍ എസ്‌ഐ ബിനുവിന്‍റെ നേതൃത്വത്തിലുള്ള സംഘം നേപ്പാളിലെത്തി പിടികൂടിയത്. ഇതിനൊപ്പം ഇവരുമായി ബന്ധപെട്ട ഉത്തര്‍പ്രദേശ് സ്വദേശികളായ രണ്ടു പേരെ ചേര്‍ത്തല എസ്ഐ പി. അനില്‍കുമാറിന്‍റെ നേതൃത്വത്തിലുള്ള സംഘവും പിടികൂടിയിട്ടുണ്ട്. പ്രതികളെ ചേര്‍ത്തലയിലെത്തിച്ചു ചോദ്യം ചെയ്തുവരികയാണ്. ഇവരെ അടുത്തദിവസം കോടതിയില്‍ ഹാജരാക്കും. കേസില്‍ നിലവില്‍ 11 പേര്‍ പിടിയിലായിട്ടുണ്ട്. 2024 ജൂണിലാണ് ചേര്‍ത്തലയിലെ വ്യാപാരിയായ പുല്ലൂരിത്തികരി വീട്ടില്‍ റോയ് പി ആന്‍റ ണിയെ കബളിപ്പിച്ച് പണം തട്ടിയത്. ടെലിഫോണ്‍ റെഗുലേറ്ററി അഥോറിട്ടി ഓഫ് ഇന്ത്യ, മുബൈ പോലീസ് എന്നീ പേരുകളിലാണ് തട്ടിപ്പു നടത്തിയത്. ചേര്‍ത്തല പോലീസാണ് അന്വേഷണം നടത്തുത്.

മട്ടുപ്പാവില്‍ ഫലവര്‍ഗത്തോട്ടമൊരുക്കി നെജിമ

ഡൊമിനിക് ജോസഫ് മാന്നാര്‍: വീടിനു മുകളില്‍ മട്ടുപ്പാവില്‍ 50 തരം ഫലവര്‍ഗങ്ങള്‍ നട്ട് നൂറുമേനി വിളവെടുത്ത ഒരു വനിത മാന്നാറില്‍ ഉണ്ട്. വിഷരഹിത പച്ചക്കറി കൃഷിയോടൊപ്പം അമ്പതിലധികം പഴവര്‍ഗങ്ങളും വിളയിച്ചിരിക്കുന്നത് സര്‍ക്കാര്‍ ഉദ്യോഗസ്ഥ കൂടിയായ മാന്നാര്‍ നെടുങ്ങാട്ടുതറയില്‍ സൈനുദ്ദീനിന്‍റെ ഭാര്യ നെജിമയാണ്. ജോലിത്തിരക്കും വീട്ടിലെ ഏകാന്തതയും നല്‍കിയ മാനസിക സമര്‍ദങ്ങളില്‍നിന്നും ഒരു രക്ഷപെടലായിട്ടാണ് മട്ടുപ്പാവില്‍ കൃഷി തുടങ്ങിയത്. തുടക്കത്തില്‍തന്നെ വിജയം കണ്ടതോടെ ജോലിക്ക് ഒപ്പം കൃഷിയും മുന്നോട്ട് കൊണ്ടുപോയി. ആകെയുള്ള അഞ്ചു സെന്‍റ് പുരയിടത്തിൽ ടെറസിന്‍ മുകളില്‍ മുന്തിരി, മാള്‍ട്ട, മുസമ്പി, ഡ്രാഗണ്‍ ഫ്രൂട്ട്, സ്‌ട്രോബെറി, വൈറ്റ് ലോങ്ങന്‍, മില്‍ക്ക് ഫ്രൂട്ട്, അബിയു, ജംബോട്ടിക്കാബ (മരമുന്തിരി), പലതരം പേരകള്‍, സപ്പോട്ടകള്‍, മാവുകള്‍, സീഡ്‌ലസ് ലെമണ്‍, ഇസ്രായേല്‍ ഓറഞ്ച്, നെല്ലി, അനാര്‍, മിറക്കിള്‍ ഫ്രൂട്ട്, പീനട്ട് ബട്ടര്‍, റംബൂട്ടാന്‍, ബേയര്‍ ആപ്പിള്‍ (ഗ്രീന്‍, റെഡ്), ഡാല്‍ഡറി ചാമ്പ, അത്തി, മലയാപ്പിള്‍, ബ്ലാക്ക് ഞാവല്‍, വൈറ്റ് ഞാവല്‍, സീഡ്‌ലസ് അമ്പഴം, മുട്ടപ്പഴം, പ്ലാവ് തുടങ്ങിയ വിദേശ ഇനങ്ങള്‍ ഉള്‍പ്പെടെയുള്ള പഴവര്‍ഗങ്ങളും ബ്രോക്കോളി, കെയില്‍ കോളിഫ്‌ളവര്‍, വിവിധ ഇനം ചീരകള്‍, തക്കാളി, പാവല്‍, പടവലം വഴുതന, മുളക്, കോവല്‍, പുതിന തുടങ്ങി പലവിധം പച്ചക്കറികളും ചെടികള്‍, ഇന്‍ഡോര്‍ പ്ലാന്‍റുള്‍ മുതലായവയും വളര്‍ത്തുന്നുണ്ട്. ചാത്താന്‍തറ പുതുപ്പറമ്പില്‍ വീട്ടില്‍ പി.കെ. നൗഷാദിന്‍റെയും ലൈലയുടെയും മകളായ നെജിമ എന്‍ആര്‍ഇജിഎസ് പത്തനംതിട്ട ജില്ലാ ഓംബുഡ്സ്മാന്‍ ഓഫീസിലെ അക്കൗണ്ടന്‍റ് കം ഐടി അസിസ്റ്റന്‍റ് ആണ്. മൂന്നുവയസുകാരി നെഹ്വ ഏക മകളാണ്. പ്രതിസന്ധികള്‍ നിറഞ്ഞ ജീവിതത്തില്‍ സ്ത്രീകള്‍ക്കു കരുത്തു പകരാന്‍ കൃഷിക്ക് കഴിയുമെന്നാണ് സര്‍ക്കാര്‍ ഉദ്യോഗസ്ഥ സ്വന്തം ജീവിതാനുഭവത്തിലൂടെ തെളിയിക്കുന്നത്. പ്ലാന്‍റുകള്‍ സെറ്റ് ചെയ്യുന്നതിനു തുടക്കം മുതല്‍ യാതൊരു മടിയും കൂടാതെ സാങ്കേതിക പ്രശ്‌നങ്ങള്‍ പരിഹരിക്കുന്നതടക്കമുള്ള കാര്യങ്ങള്‍ക്ക് മാന്നാര്‍ കൃഷിഭവനിലെ കൃഷി ഓഫീസര്‍ പി.സി. ഹരികുമാര്‍ നിര്‍ദേശങ്ങള്‍ നജിമയുടെ മട്ടുപ്പാവ് കൃഷിക്ക് ഏറെ സഹായകരമായി.

വ്യാജമദ്യം പിടികൂടാനെത്തിയ എക്‌സൈസ് സംഘത്തിനുനേരേ ബിജെപി ആക്രമണം

കായംകുളം: വ്യാജമദ്യം പിടികൂടാനെത്തിയ എക്‌സൈസ് സംഘത്തെ ബിജെപി നേതാവിന്‍റെ നേതൃത്വത്തില്‍ ആക്രമിച്ചു. ആക്രമണത്തില്‍ കായംകുളം എക്‌സൈസ് സിവില്‍ ഓഫീസര്‍ നന്ദ ഗോപാലിന് (27) പരിക്കേറ്റു. ഇദ്ദേഹത്തെ ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. സംഭവത്തില്‍ ബിജെപി കായംകുളം മണ്ഡലം സെക്രട്ടറി പത്തിയൂര്‍ വടശേരില്‍ വീട്ടില്‍ ബിനു, ഭാര്യ പത്തിയൂര്‍ പഞ്ചായത്ത് ഏഴാം വാര്‍ഡ് അംഗമായ മോളി വടശേരി, മകള്‍ പ്രവീണ, മരുമകന്‍ എന്നിവര്‍ക്കെതിരെയാണ് കരീലകുളങ്ങര പോലീസ് കേസെടുത്തത്. ശനിയാഴ്ച രാത്രി ഒൻപതോ ടെയായിരുന്നു സംഭവം. ബിനു നടത്തുന്ന ഹോളോ ബ്രിക്സ് കമ്പിനിയോട് ചേര്‍ന്ന കുടുംബ വീട്ടില്‍ വ്യാജമദ്യ വില്പന നടക്കുന്നതായുള്ള നിരന്തര പരാതിയെ ത്തുടര്‍ന്നായിരുന്നു കായംകുളം എക്‌സൈസ് സംഘം സ്ഥലത്ത് പരിശോധനക്ക് എത്തിയത്. എക്‌സൈസ് സിവില്‍ ഓഫീസര്‍മാരായ ബിപിന്‍, നന്ദഗോപാല്‍, രഞ്ജിത്ത് എന്നിവരുടെ നേതൃത്വത്തില്‍ വീട്ടില്‍ പരിശോധന നടത്തി. വ്യാജമദ്യവുമായി നിരവധി വ്യാജമദ്യ കേസില്‍ പ്രതിയായ പത്തിയൂര്‍ കോട്ടൂര്‍ വടക്കതില്‍ ശശി എന്നയാളെ പിടികൂടുകയും ചെയ്തു. ശശിയുടെ ഒപ്പമുണ്ടായിരുന്ന വ്യാജമദ്യ കേസില്‍ പ്രതികളായ മറ്റുള്ളവര്‍ ഓടി രക്ഷപ്പെട്ടു. പ്രതിയെ കൊണ്ടുപോകാനായി ശ്രമിക്കുന്നതിനിടയിലാണ് ബിനുവിന്‍റെ നേതൃത്വത്തില്‍ ത്തില്‍ എക്‌സൈസ് സംഘത്തെ തടയുകയും ആക്രമിക്കുകയും ചെയ്തത്. ആക്രമണത്തില്‍ മര്‍ദനമേറ്റ നന്ദഗോപാല്‍ താഴെ വീഴുകയും ചെയ്തു. സംഭവം അറിഞ്ഞ് എക്‌സൈസൈസ് ഉദ്യോഗസ്ഥരും കരീലകുളങ്ങരസിഐയുടെ നേതൃത്വത്തിലുള്ള പോലീസ് സംഘവും സ്ഥലത്തെത്തി. മര്‍ദനമേറ്റ നന്ദഗോപാലനെ ആശുപത്രിയിലേക്ക് കൊണ്ടുപോകാന്‍ സമ്മതിക്കാതെ ബിനുവും പഞ്ചായത്തംഗമായ മോളിയുടെയും നേതൃത്വത്തില്‍ എക്‌സൈസ് വാഹനം തടഞ്ഞ് വീണ്ടും പോലീസിനെയും എക്‌സൈസ് സംഘത്തെയും ആക്രമിക്കാന്‍ ശ്രമിക്കുകയും അസഭ്യം പറയുകയും ഭീഷണി മുഴക്കുകയും ചെയ്തു. കൂടുതല്‍ പോലീസ് എത്തിയാണ് എക്‌സൈസൈസ് ഉദ്യോഗസ്ഥനെ ആശുപത്രിയില്‍ എത്തിച്ചത്. എക്‌സൈസ് ഉദ്യോഗസ്ഥരുടെ കൃത്യനിര്‍വഹണം തടസപ്പെടുത്തുകയും മര്‍ദിക്കുകയും ചെയ്തതിനാണ് പോലീസ് കേസെടുത്തത്.

മരങ്ങൾ ഭീഷണിയാകുന്നു

കെപി റോഡിൽ ചാഞ്ഞമരങ്ങൾ ചാരുംമൂട്: കായംകുളം-പുനലൂര്‍ കെപി റോഡില്‍ നൂറനാട് ഐടി ബിപി ജംഗ്ഷന്‍ മുതല്‍ പറയംകുളം ജംഗ്ഷന്‍ വരെയുള്ള ഭാഗത്ത് മരങ്ങള്‍ റോഡിലേക്ക് ചാഞ്ഞുനില്‍ക്കുന്നത് യാത്രക്കാരുടെ ജീവന് ഭീഷണിയാണ്. ശക്തമായ കാറ്റ് വീശിയാല്‍ റോഡിലേക്ക് വീഴാവുന്ന തരത്തില്‍ നിരവധി മരങ്ങളാണ് ചരിഞ്ഞുനില്‍ക്കുന്നത്. ഇതില്‍ ചിലത് അടുത്തസമയം വെട്ടിമാറ്റിയിരുന്നു. കൂടാതെ ഉണങ്ങിനില്‍ക്കുന്ന മരങ്ങള്‍ അപകടഭീഷണി ഉയര്‍ത്തുന്നുണ്ട്. ശക്തമായ മഴയും കാറ്റുമുള്ളപ്പോള്‍ മരങ്ങള്‍ കടപുഴകി കെപി റോഡിലേക്ക് വീണ് മണിക്കൂറുകളോളം ഗതാഗതവും വൈദുതി വിതരണവും തടസപ്പെടുന്നത പതിവാണ്. റോഡരുകില്‍ ലെപ്രസി സാനിട്ടോറിയം വക ഭൂമിയിലേക്ക് നിരവധി മരങ്ങള്‍ മുമ്പ് കടപുഴകി വീണിരുന്നു. വനവത്കരണത്തിനായി കെപി റോഡരികില്‍ വര്‍ഷങ്ങള്‍ക്ക് മുമ്പ് നട്ടുപിടിപ്പിച്ച മരങ്ങളുടെ ശിഖരങ്ങളാണ് അപകടഭീഷണി ഉയര്‍ത്തുന്നത്. മഴയും കാറ്റും ഉണ്ടാകുമ്പോള്‍ ഭയത്തോടെയാണ് വാഹനയാത്രക്കാരും കാല്‍നട യാത്രക്കാരും ഇതുവഴി സഞ്ചരിക്കുന്നത്. അതിനാല്‍ റോഡിലേക്ക് ചാഞ്ഞുനില്‍ക്കുന്ന മരങ്ങളുടെ ശിഖരങ്ങള്‍ അടിയന്തരമായി മുറിച്ചുമാറ്റാന്‍ അധികൃതര്‍ നടപടി സ്വീകരിക്കണമെന്നാണ് നാട്ടുകാരുടെ ആവശ്യം. ചെറിയനാട് ഭീഷണിയായി അക്വേഷ്യ മരങ്ങൾ ചെങ്ങന്നൂര്‍: ചെറിയനാട് പഞ്ചായത്തിലെ നാലാം വാര്‍ഡില്‍ നെടുവരംകോട് കനാല്‍ ജംഗ്ഷന്‍ മുതല്‍ പഞ്ചായത്ത് ഓഫീസിനു സമീപം വരെയുള്ള ഏകദേശം 1500 മീറ്റര്‍ ദൂരത്തില്‍ പിഐപി കനാലിന്‍റെ വശങ്ങളില്‍ വളര്‍ന്നു നില്‍ക്കുന്ന അക്വേഷ്യ മരങ്ങളും മറ്റ് പാഴ്മരങ്ങളും നാട്ടുകാര്‍ക്കും യാത്രക്കാര്‍ക്കും ഭീഷണിയായി മാറുന്നു. ഏകദേശം നാല്പതോളം വീട്ടുകാര്‍ മരങ്ങള്‍ വെട്ടിമാറ്റുന്നതിന് അടിയന്തര നടപടി സ്വീകരിക്കണമെന്ന് ആവശ്യപ്പെട്ട് പഞ്ചായത്ത് അധികൃതര്‍ക്ക് പരാതി നല്‍കിയിരുന്നു. പരാതിയുടെ അടിസ്ഥാനത്തില്‍ 2024 സെപ്റ്റംബറില്‍ ഫോറസ്റ്റ് അധികൃതരെയും ഉള്‍പ്പെടുത്തി ഒരു ട്രീ-കമ്മിറ്റി യോഗം ചേരുകയും അപകടകരമായി നില്‍ക്കുന്ന മരങ്ങള്‍ വെട്ടിമാറ്റാന്‍ ഫോറസ്റ്റ് വകുപ്പ് പിഐപിക്ക് അനുമതി നല്‍കുകയും ചെയ്തു. എന്നാല്‍, അനുമതി ലഭിച്ച് ഏഴുമാസത്തോളമായിട്ടും അധികൃതരുടെ ഭാഗത്തുനിന്ന് യാതൊരു നടപടിയും ഉണ്ടായിട്ടില്ലെന്ന് നാട്ടുകാര്‍ ആ രോപിക്കുന്നു. അടുത്തമാസം കാലവര്‍ഷം ആരംഭിക്കാനിരിക്കെയും ജൂണില്‍ സ്‌കൂള്‍ തുറക്കുന്നതോടെ വിദ്യാര്‍ഥികള്‍ ഉള്‍പ്പെടെ നിരവധി യാത്രക്കാര്‍ സഞ്ചരിക്കുന്ന വഴിയില്‍ മരക്കൊമ്പുകള്‍ ഒടിഞ്ഞുവീണ് വൈദ്യുതി ലൈനുകള്‍ പൊട്ടിവീണ് അപകടങ്ങള്‍ സംഭവിക്കാനുള്ള സാധ്യത വര്‍ധിച്ചിരി ക്കുകയാണ്. അപകടകരമായ രീതിയില്‍ നില്‍ക്കു ന്ന മരങ്ങള്‍ വീടുകള്‍ക്കും ഭീഷണിയാണ്. ജനങ്ങളുടെ സുരക്ഷയെ മുന്‍നിര്‍ത്തി എത്രയും പെട്ടെന്ന് അധികൃതര്‍ വിഷയത്തില്‍ ഇടപെട്ട് ആവശ്യമായ നടപടികള്‍ സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു. സമരം നടത്തും നാലാം വാര്‍ഡില്‍ പിഐപി കനാലിന്‍റെ വശങ്ങളില്‍ അപകടകരമായി നിൽക്കുന്ന തണല്‍ മരങ്ങള്‍ ജനങ്ങളുടെ ജീവനും സ്വത്തിനും ഭീക്ഷണിയാണ്. അത് വെട്ടിമാറ്റുന്നതിന് 2024 സെപ്റ്റംബറിലെ ട്രീ കമ്മിറ്റിയുടെ തീരുമാനം പിഐപി അധികൃതര്‍ അടിയന്തരമായി നടപ്പാക്കിയില്ലായെങ്കില്‍ ജനങ്ങളെ സംഘടിപ്പിച്ച് ശക്തമായ സമരം പരിപാടികള്‍ നടത്തും. ഒ.ടി. ജയമോഹന്‍ (വാര്‍ഡ് മെംബര്‍)

ഓശാനത്തിരുനാൾ ആഘോഷിച്ച് വിശ്വാസികൾ...

തങ്കി പള്ളിയിൽ ചേർത്തല: പ്രസിദ്ധ തീർഥാടന കേന്ദ്രമായ തങ്കി സെന്‍റ് മേരീസ് ഫൊറോന പള്ളിയിൽ ഓശാനത്തിരുനാൾ ആചരിച്ചു. ഇന്നലെ പുലര്‍ച്ചെ കുരുത്തോല വെഞ്ചരിപ്പ് നടന്നു. തുടർന്ന് പ്രത്യേകം സജ്ജമാക്കിയ പന്തലിലെ ബലിവേദിയിൽ പ്രദക്ഷിണം എത്തിയപ്പോൾ മന്ത്രി പി. പ്രസാദ് ഓശനസന്ദേശം നൽകി. വികാരി ഫാ. ജോർജ് എടേഴത്ത് ദിവ്യബലിക്ക് മുഖ്യകാർമികത്വം നൽകി. ഫാ. ആന്‍റോ മംഗലശേരി വചനപ്രഘോഷണം നടത്തി. സഹവികാരിമാരായ ഫാ. ലോബോ ലോറൻസ് ചക്രശേരി, ഫാ. സിബി കിടങ്ങേത്ത്, ഫാ. റിൻസൺ കാളിയത്ത് എന്നിവർ സഹകാർമികരായി. മന്ത്രി പി. പ്രസാദ് കുരുത്തോല പ്രദക്ഷിണത്തിലും പങ്കെടുത്തു. 1936ൽ പ്രതിഷ്ഠിച്ച കാർത്താവിന്‍റെ അത്ഭുത പീഡാനുഭവ തിരുസ്വരൂപം വണങ്ങാന്‍ വിവിധ സംസ്ഥാനങ്ങളില്‍നിന്നായി നിരവധി വിശ്വാസികളാണ് വിശുദ്ധവാരനാളുകളിൽ ഇവിടെ എത്തുന്നത്. ഇന്നു രാവിലെ 5.30നും 6.30നും ദിവ്യബലി. 10ന് ഉദ്ദിഷ്ടകാര്യസാധ്യത്തിനായി വചനയിരിപ്പ്. തുടർന്ന് കൊച്ചി രൂപത അപ്പസ്തോലിക് അഡ്മിനിസ്ട്രേറ്റർ ഡോ. ജയിംസ് റാഫേല്‍ ആനാപറമ്പിലിന്‍റെ മുഖ്യകാർമികത്വത്തിൽ ദിവ്യബലി, കല്ലറ ജപം. 12.30 ന് സ്നേഹവിരുന്ന്, 1.30ന് വചന ധ്യാനസംഗീത യാത്ര, പരിശുദ്ധ കുർബാനയുടെ ആശീർവാദം എന്നിവ നടക്കും. പെസഹവ്യാഴം, ദുഃഖവെള്ളി ദിനങ്ങളിലാണ് തീർഥാടകർ ഇവിടെ കൂടുതലായി എത്തുന്നത്. തീര്‍ഥാടകര്‍ക്കാവശ്യമായ സൗകര്യങ്ങൾ ഒരുക്കുന്നതിന് ചേർത്തല തഹസിൽദാരുടെ നേതൃത്വത്തിൽ സർക്കാരിന്‍റെ വിവിധ വകുപ്പുകൾ ഏകോപിപ്പിച്ച് പ്രവർത്തനങ്ങൾ നടത്തിവരുന്നു. കെഎസ്ആർറ്റിസി പ്രത്യേകബസ് സർവീസ് ഏർപ്പെടുത്തിയിട്ടുണ്ട്. രണ്ടായിരത്തിൽ പരം വോളന്‍റിയേഴ്സിൻ്റെ പ്രവർത്തനങ്ങളും നടന്നു വരുന്നു. പള്ളിപ്പുറം പള്ളിയിൽ ചേർത്തല: ചരിത്രപ്രസിദ്ധ മരിയൻ-ചാവറ തീർഥാടന കേന്ദ്രമായ പള്ളിപ്പുറം സെന്‍റ് മേരീസ് ഫൊറോന പള്ളിയിൽ വിശുദ്ധ വാരാചരണ തിരുക്കർമങ്ങൾക്ക് ഓശാന ഞായർ ആചരണത്തോടെ തുടക്കമായി. സെന്‍റ് മേരീസ് പാരീഷ് ഹാളിൽ കുരുത്തോല വെഞ്ചരിപ്പ് വിതരണം, പ്രദക്ഷിണം നടത്തി. ദിവ്യബലിക്ക് വികാരി റവ.ഡോ. പീറ്റർ കണ്ണമ്പുഴ മുഖ്യകാർമികത്വം വഹിച്ചു. അസി. വികാരി ഫാ. അമൽ പെരിയപ്പാടൻ, ഫാ. ജോസഫ് മാക്കോതക്കാട്ട് എന്നിവർ സഹകാർമികരായിരായി. പെസഹാ വ്യാഴാഴ്ച രാവിലെ ഏഴിന് ദിവ്യബലി, കാൽകഴുകൽ ശുശ്രുഷ, തുടർന്ന് ആരാധന. വൈകുന്നേരം പൊതു ആരാധന, അപ്പം മുറിക്കൽ ശുശ്രൂഷ. ദുഃഖവെള്ളി രാവിലെ 6.30 ന് പീഡാനുഭവ തിരുക്കർമങ്ങൾ ആരംഭിക്കും. പീഡാനുഭവ വായന, വിശുദ്ധ കുർബാന സ്വീകരണം, ആഘോഷമായ കുരിശിന്‍റെ വഴി, കുരിശുരൂപ വണക്കം. വൈകുന്നേരം 3.30 ന് നഗരികാണിക്കൽ, പള്ളിപ്പുറത്തിന്‍റെ വിവിധ ഭാഗങ്ങളിൽനിന്നു പരിഹാരപ്രദക്ഷിണമായി പള്ളിപ്പുറം പള്ളിയിലേക്ക് എത്തിച്ചേരുന്നു. തുടർന്ന് പീഡാനുഭവ സന്ദേശം, വിശുദ്ധ കുരിശ് ചുംബനം, കബറടക്ക ശുശ്രൂഷ. ശനിയാഴ്ച രാവിലെ 6.30ന് തിരുക്കർമങ്ങൾ, പുത്തൻവെള്ളം, പുത്തൻ തീ വെഞ്ചരിപ്പ്. രാത്രി 11.30 ന് ഉയിർപ്പിൻ്റെ തിരുക്കർമങ്ങൾ ആരംഭിക്കും. തുടർന്ന് പ്രദക്ഷിണം, പ്രസംഗം, ദിവ്യബലി. 20ന് രാവിലെ 6.30ന് കേളമംഗലം, ഒറ്റപ്പുന്ന കുരിശുപള്ളികളിലും, ഏഴിന് പള്ളിപ്പുറം പള്ളിയിലും ദിവ്യബലി. മുട്ടം പള്ളിയിൽ ചേർത്തല: മുട്ടം സെന്‍റ് മേരീസ് ഫൊറോന പള്ളിയിൽ ഓശാന ഞായർ ആചരണത്തോടെ വിശുദ്ധ വാരാചരണത്തിനു തുടക്കമായി. തെക്കെ കുരിശടിയിൽ കുരുത്തോല വെഞ്ചരിപ്പും വിതരണവും തുടർന്ന് പള്ളിയിലേക്ക് കുരുത്തോല പ്രദക്ഷിണവും നടത്തി. ദിവ്യബലിക്ക് വികാരി റവ.ഡോ. ആന്‍റോ ചേരാംതുരുത്തി, സഹവികാരി ഫാ. ബോണി കട്ടയ്ക്കകത്തൂട്ട് എന്നിവർ കാർമികത്വം വഹിച്ചു. തിങ്കളാഴ്ച മുതൽ 16 വരെ വൈകുന്നേരം 5.30 മുതൽ രാത്രി 8.30 വരെ നടക്കുന്ന നോമ്പുകാല ധ്യാനം ഫാ. വർഗീസ് പാറയിൽ നയിക്കും. പെസഹാ വ്യഴാഴ്ച രാവിലെ 6.30ന് ദിവ്യബലി, കാൽകഴുകൽ ശുശ്രുഷ, ആരാധന, വൈകുന്നേരം പൊതുആരാധന, അപ്പം മുറിക്കൽ ശുശ്രൂഷ. ദുഃഖവെള്ളി രാവിലെ 6.30ന് പീഡാനുഭവ തിരുക്കർമങ്ങൾ തുടങ്ങും. ദിവ്യബലി, കുരിശുരൂപ വന്ദനം, വൈകുന്നേരം നാലിന് കുരിശിന്‍റെ വഴി, ഫാ. ജോഷി വാസുപുറത്തുകാരൻ പീഡാനുഭവ സന്ദേശം നൽകും. തുടർന്ന് വിലാപ യാത്ര, തിരുസ്വരൂപ വണക്കം, കബറടക്ക ശുശ്രൂഷ. 19ന് രാവിലെ 6.30ന് പുത്തൻ വെള്ളം വെഞ്ചരിപ്പ്, ദിവ്യബലി, രാത്രി 10.30ന് ഉയർപ്പ് കുർബാന, പ്രസംഗം, പ്രദക്ഷിണം. പരുമല പള്ളിയിൽ മാന്നാർ: പരുമല സെമിനാരി പള്ളിയിൽ ഓശാന തിരുനാള്‍ ആഘോഷിച്ചു. ശുശ്രൂഷകള്‍ക്ക് മലങ്കര ഓര്‍ത്തഡോക്‌സ് സഭാ തുമ്പമണ്‍ ഭദ്രാസനാധിപന്‍ ഡോ. ഏബ്രഹാം മാര്‍ സെറാഫിം പ്രധാന കാര്‍മികത്വം വഹിച്ചു. പരുമല സെമിനാരി മാനേജര്‍ ഫാ. എല്‍ദോസ് ഏലിയാസ്, അസി. മാനേജര്‍ ഫാ.ജെ. മാത്തുക്കുട്ടി എന്നിവര്‍ സഹകാര്‍മികരായിരുന്നു. പുന്നമൂട് കത്തീഡ്രലിൽ പുന്നമൂട്: സെന്‍റ് മേരീസ് കത്തീഡ്രലിൽ നടന്ന ഓശാന ഞായർ ശുശ്രൂഷയ്ക്കും കുരുത്തോല പ്രദക്ഷിണത്തിനും മാവേലിക്കര ബിഷപ് ജോഷ്വാ മാർ ഇഗ്നാത്തിയോസ് നേതൃത്വം നൽകി. ഇന്നലെ രാവിലെ ഏഴിന് കുരുത്തോല പ്രദക്ഷിണം, ഓശാന ശുശ്രൂഷ, വിശുദ്ധ കുർബാന, ദൽമീനോ ശുശ്രൂഷ എന്നിവ നടന്നു. ഇന്നുമുതൽ 16 വരെ രാവിലെ 6.30ന് കുർബാന, വൈകിട്ട് ആറിന് ധ്യാനം, പെസഹ ദിനത്തിൽ കാൽകഴുകൽ ശുശ്രൂഷ, 18ന് രാവിലെ എട്ടിന് ദുഃഖവെള്ളി ശുശ്രൂഷ, 19ന് രാവിലെ ഏഴിന് വിശുദ്ധ കുർബാന, വൈകിട്ട് ഏഴിന് രാത്രി പ്രാർഥന, ഉയിർപ്പ് ശുശ്രൂഷ എന്നിവ നടക്കും. പുന്നപ്ര മരിയ വിയാനി പള്ളിയിൽ അമ്പലപ്പുഴ: പുന്നപ്ര സെന്‍റ് ജോൺ മരിയ വിയാനി പള്ളിയിൽ ഈസ്റ്റർ വിശുദ്ധവാര ചടങ്ങുകൾക്കു തുടക്കം കുറിച്ചു. ഇന്നലെ രാവിലെ ആറിന് വിയാനി തീരത്തുള്ള സെന്‍റ് ജൂഡ് കുരിശടിയിൽ വികാരി ഫാ. ക്ലീറ്റസ് കാരക്കാട്ട് കുരുത്തോല ബെഞ്ചരിപ്പു നടത്തി. തുടർന്നു നടന്ന ഓശാന പ്രദക്ഷിണത്തിൽ നൂറുകണക്കിനു വിശ്വാസികൾ പങ്കുചേർന്നു. ഇന്ന് രാവിലെ 7.30 മുതൽ നാളെ വൈകിട്ട് 5.30 വരെ ദിവ്യകാരുണ്യ ആരാധനയും കുമ്പസാരവും നടക്കും. പെസഹാ വ്യാഴമായ 17ന് വൈകിട്ട് അഞ്ചിന് തിരുവത്താഴ പൂജയും കാൽകഴുകൽ ചടങ്ങും നടക്കും. ദുഖവെള്ളി ദിനമായ 18ന് വിയാനി പള്ളി അങ്കണത്തിൽ നിന്നാരംഭിക്കുന്ന കുരിശിന്‍റെ വഴിക്ക് ഫാ. രാജേഷ് പൊള്ളയിൽ വചനസന്ദേശം നൽകും. തുടർന്നു നഗരി കാണിക്കൽ. വലിയ ശനിയാഴ്ചയായ 19ന് രാത്രി 9.30 മുതൽ ഈസ്റ്റർ ദിവ്യബലിയും ഉയിർപ്പും നടക്കും. ഇസ്റ്റർ ദിനമായ ഞായറാഴ്ച ഏഴിന് ദിവ്യബലി.

മഞ്ഞപ്പൂക്കളാൽ കമാനമൊരുക്കി വിഷുവിനെ വരവേൽക്കാൻ മജീദ്

അന്പലപ്പുഴ: വീടിനു മുന്നിൽ മഞ്ഞപ്പൂവുകൊണ്ട് കമാനമൊരുക്കി വിഷുവിനെ വരവേൽക്കാനൊരുങ്ങുകയാണ് മജീദ്. മലയാളിക്ക് ഐശ്വര്യത്തിന്‍റെ കണിയൊരുക്കുന്ന വിഷുക്കാലം മഞ്ഞപ്പൂക്കളുടെ വസന്തകാലമാണ്. ഈ വിഷുക്കാലത്ത് വീടിനു മുന്നിൽ മഞ്ഞപ്പൂവു കൊണ്ട് കമാനമൊരുക്കിയിരിക്കുകയാണ് മജീദ്. പുന്നപ്ര കുറവൻതോട് പനച്ചിത്തറ വീട്ടിൽ റിട്ട. കെഎസ്ആർടിസി ജീവനക്കാരനായ അബ്ദുൾ മജീദിന്‍റെ വീടിനു മുന്നിൽ ക്യാറ്റ്സ്ക്ളോ എന്ന മഞ്ഞപ്പൂവുകൊണ്ടു തീർത്ത കമാനം വേറിട്ടുനിൽക്കുകയാണ്. മൂന്നു വർഷം മുമ്പ് നഴ്സറിയിൽനിന്നാണ് ക്യാറ്റ്സ്ക്ളോ എന്ന ചെടി വാങ്ങിയത്. മുൻപ് പല തവണ പൂ പിടിച്ചിട്ടുണ്ടെങ്കിലും ഈ രീതിയിൽ ഇത്രയേറെ പൂവു പിടിക്കുന്നത് ഇതാദ്യം. ഇതിന്‍റെ തണ്ടിൽ പിടിച്ചാൽ മുള്ളുകൊണ്ട് പൂച്ച പിടിക്കുന്നതു പോലെ തോന്നും. അതുകൊണ്ടാണ് ഈ ചെടിക്ക് ക്യാറ്റ്സ്ക്ളോ എന്ന പേരു വന്നത്. വീടിനു മുന്നിൽ ഗേറ്റിനു മുകളിലായി പൂ പടരാനായി കമ്പികൾക്കൊണ്ട് പ്രത്യേകം ഫ്രെയിം നിർമിച്ചിരുന്നു. ആകെയുള്ള 5 സെന്‍റിലാണ് വീട്. ബാക്കി സ്ഥലത്ത് പലതരം വൃക്ഷങ്ങളും പച്ചക്കറികളും മജീദ് നട്ടുപിടിപ്പിച്ചിട്ടുണ്ട്. ഒട്ടുമാവ്, പ്ലാവ്, തെങ്ങ്, വിവിധതരം ചെടികൾ, വിലകൂടിയ ഓർക്കിഡുകൾ, പച്ചമുളക്, ചീര തുടങ്ങി നിരവധി ചെടികൾ ടെറസിലും പലയിടത്തുമായി വച്ചുപിടിപ്പിച്ചിട്ടുണ്ട്. ഭാര്യ സുലേഖയും മജീദിന്‍റെ സഹായത്തിനുണ്ട്.

റോഡ് വീതികൂട്ടൽ വേണ്ടെന്ന വ്യാപാരികളുടെ ആവശ്യം ന്യായമെന്ന് ചെയർപേഴ്സൺ

ചെങ്ങന്നൂർ: കൊല്ലം-തേനി ദേശീയപാത വികസനത്തിന്‍റെ ഭാഗമായി നഗരത്തിലെ റോഡുകളുടെ വീതി കൂട്ടുന്നത് ഉപേക്ഷിക്കണമെന്ന വ്യാപാരികളുടെ ആവശ്യം ന്യായമാണെന്ന് ചെങ്ങന്നൂർ നഗരസഭാ ചെയർപേഴ്സൺ അഡ്വ. ശോഭ വർഗീസ്. വ്യാപാരി വ്യവസായ ഏകോപന സമിതിയും വ്യാപാരി വ്യവസായി സമിതിയും സംയുക്തമായി സംഘടിപ്പിച്ച കൺവൻഷൻ ഉദ്ഘാടനം ചെയ്യുകയായിരുന്നു അവർ. നഗരത്തിലൂടെയുള്ള ദേശീയപാതയ്ക്കു ബദലായി ബൈപാസ് സംവിധാനം അനിവാര്യമാണെന്നും ഇതിനായി ജനങ്ങളും വ്യാപാരികളും രാഷ്ട്രീയക്കാരും ഒറ്റക്കെട്ടായി മുന്നിട്ടിറങ്ങണമെന്നും യോഗം ആവശ്യപ്പെട്ടു. ഏകോപന സമിതി പ്രസിഡന്‍റ് ജേക്കബ് വി. സ്കറിയ അധ്യക്ഷനായി. വ്യാപാരി വ്യവസായി സമിതി സംസ്ഥാന കമ്മിറ്റി അംഗം കെ.പി. മുരുകേശ് മുഖ്യപ്രഭാഷണം നടത്തി. ഏകോപന സമിതി താലൂക്ക് ട്രഷറർ അനസ് പൂവാലംപറമ്പിൽ വിഷയം അവതരിപ്പിച്ചു. ഏകോപന സമിതി ജനറൽ സെക്രട്ടറി രഞ്ജിത്, ഖാദി-വ്യാപാരി വ്യവസായി സമിതി ഏരിയാ സെക്രട്ടറി സതീഷ് നായർ, കേരള കോൺഗ്രസ് സംസ്ഥാന ജനറൽ സെക്രട്ടറി ജൂണി കുതിരവട്ടം, കോടുകുളഞ്ഞി ഹിൽവ്യൂ റെസിഡന്‍റ്സ് അസോസിയേഷൻ സെക്രട്ടറി കോശി മാത്യു എന്നിവർ പ്രസംഗിച്ചു .

ജസ്റ്റിന്‍റെ കുടുംബത്തിന് വീട്

തുറവൂർ: പള്ളിത്തോട് പൊഴിച്ചാലിൽ മത്സ്യബന്ധനത്തിനിടെ മരിച്ച ജസ്റ്റിന്‍റെ കുടുംബത്തിനായി നിർമിച്ച വീടിന്‍റെ താക്കോൽദാനം നാളെ നടക്കും. കഴിഞ്ഞ ജൂലൈ 13ന് പള്ളിത്തോടു പൊഴിച്ചാലിൽ മത്സ്യബന്ധനം നടത്തുന്നതിനിടയിലാണ് അപകടത്തിൽപ്പെട്ട കുത്തിയത്തോടു പഞ്ചായത്ത് ഒന്നാം വാർഡിൽ പള്ളിത്തോടു ചാപ്പക്കടവിൽ മാളിയേക്കൽ ജസ്റ്റിൻ എന്നുവിളിക്കുന്ന സെബാസ്റ്റ്യൻ(45) മരണമടഞ്ഞത്. അപകടവിവരമറിഞ്ഞ് ചാപ്പക്കടവിൽ ജസ്റ്റിന്‍റെ വീട്ടിലെത്തിയ കെ.സി. വേണുഗോപാൽ എംപി സ്വന്തമായി വീടില്ലാതെ കടൽഭിത്തിയോടു ചേർന്ന് ഒരു ചെറിയ ഷെഡിൽ താമസിച്ചിരിന്ന ജസ്റ്റിന്‍റെ ഭാര്യ മിനിയുടെയും വിദ്യാർഥികളായ രണ്ടു മക്കളുടെയും (അലൻ, അലീന) ദുരിതങ്ങൾ നേരിൽക്കണ്ടു മനസിലാക്കുകയും അവർക്ക് സ്വന്തമായൊരു വീടുനിർമിച്ചു നൽകാമെന്നു പറയുകയും ചെയ്തിരിന്നു. തുറവൂർ പഞ്ചായത്ത് പതിനാറാം വാർഡിൽ നിർമിച്ച വീടിന്‍റെ കല്ലിടൽകർമം കഴിഞ്ഞ ഒക്ടോബർ ആറിന് എംപി നിർവഹിച്ചിരുന്നു. ഈ വീടിന്‍റെ താക്കോൽദാനം നാളെ വിഷുദിനത്തിൽ വൈകുന്നേരം 4.30ന് കെ.സി. വേണുഗോപാൽ എംപി നിർവഹിക്കും. കോൺഗ്രസ് യുഡിഎഫ് നേതാക്കൾ പങ്കെടുക്കും.

വിഷുക്കണി ദർശനത്തിന് അമ്പലപ്പുഴ ക്ഷേത്രം ഒരുങ്ങി

അമ്പലപ്പുഴ: വിഷുക്കണി ദർശനത്തിന് അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിൽ ഒരുക്കങ്ങൾ പൂർത്തിയായി. വിഷുദിനത്തിൽ ഭഗവാനെ ദർശിക്കാൻ ആയിരങ്ങളാണ് എത്തുക. ഫലങ്ങളും പൂക്കളുമൊക്കെയാണ് കണിയൊരുക്കുക. ഇന്നു രാത്രി 10ന് അത്താഴപൂജയും ശ്രീബലിയും കഴിഞ്ഞ് വാസുദേവാ എന്നു വിളിച്ച് നടയടയ്ക്കും. തുടർന്ന് മേൽശാന്തിയും ക്ഷേത്രം ജീവനക്കാരും അത്താഴം കഴിച്ച് വീണ്ടും ക്ഷേത്രം തുറക്കും. ഈ സമയം ഭക്തർക്ക് ക്ഷേത്രത്തിൽ പ്രവേശനമുണ്ടാകില്ല. നിർമാല്യം മാറ്റിയ ശേഷം ഭഗവാനെ തങ്കത്തിരുവാഭരണം അണിയിക്കും. ചക്ക, മാങ്ങ, സ്വർണക്കുടം, അഷ്ടമംഗല്യം, വെള്ളരി, കണിക്കൊന്ന, നാണയം എന്നിവ ഉരുളിയിൽ ഒരുക്കിവയ്ക്കും. തുടർന്ന് മേൽശാന്തി തെക്കേ സോപാനത്തിലും കോയ്മ സ്ഥാനി, ശംഖ് വിളിക്കാരൻ എന്നിവർ വടക്കേ സോപാനത്തിലും കിടക്കും. പുലർച്ചെ മൂന്നിന് നടതുറന്ന് നിലവിളക്കുകൾ തെളിക്കും. തുടർന്ന് ഭഗവാനെ കണികാണുന്നതിന് ആദ്യം കോയ്മ സ്ഥാനിയെ മേൽശാന്തി വിളിക്കും. ആറിന് തിരുവാഭരണം അഴിച്ചുമാറ്റും.

യുഡിഎഫ് സായാഹ്ന ധർണ

അമ്പലപ്പുഴ: തദ്ദേശ സ്വയം ഭരണ സ്ഥാപനങ്ങളുടെ പദ്ധതി വിഹിതം വെട്ടിക്കുറച്ച് അധികാര വികേന്ദ്രീകരണത്തിന്‍റെ കടയ്ക്കൽ കത്തിവയ്ക്കാനുള്ള ശ്രമമാണ് പിണറായി നടത്തുന്നതെന്നു കെപിസിസി ജനറൽ സെക്രട്ടറി എം.ജെ. ജോബ്. തദ്ദേശ സ്വയംഭരണ സ്ഥാപനങ്ങളെ നോക്കുകുത്തിയാക്കി പിണറായിയും കൂട്ടരും ജനങ്ങളെ വെല്ലുവിളിക്കുകയാണ്. തൊഴിലാളി സമരത്തിന്‍റെ പേരിൽ ഊറ്റം കൊള്ളുന്ന കമ്യൂണിസ്റ്റുകൾക്ക് ആശാസമരത്തോട് അയിത്തമാണെന്നും ജോബ് പറഞ്ഞു. യുഡി എഫ് അമ്പലപ്പുഴ നിയോജകമണ്ഡലം കമ്മിറ്റി പുന്നപ്രയിൽ നടത്തിയ സായാഹ്ന ധർണ ഉദ്ഘാടനം ചെയ്ത് സംസാരിക്കുകയായിരുന്നു ജോബ്. മുസ്‌ലിം ലീഗ് മണ്ഡലം പ്രസിഡന്‍റ് എ.എം. നൗഫൽ അധ്യക്ഷത വഹിച്ചു. യുഡിഎഫ് നേതാക്കളായ ടി.എ. ഹാമിദ്, എസ്.എ. അബ്ദുൾ സലാം ലബ്ബ, ജോസ്കുട്ടി, തോമസ് ചുള്ളിക്കൻ തുടങ്ങിയവർ പ്രസംഗിച്ചു.

വിഷു വിപണനമേള ആരംഭിച്ചു

ചെങ്ങന്നൂര്‍: നഗരസഭ കുടുംബശ്രീയുടെ നേതൃത്വത്തില്‍ വിഷു വിപണന മേള ആരംഭിച്ചു. നഗരസഭ ഓഫീസിനു മുന്‍വശം ആരംഭിച്ച വിഷു വിപണന മേള നഗരസഭ ചെയര്‍പേഴ്‌സണ്‍ അഡ്വ. ശോഭാ വര്‍ഗീസ് ഉദ്ഘാടനം ചെയ്തു. സിഡിഎസ് ചെയര്‍ പേഴ്‌സണ്‍ എസ്. ശ്രീകല അധ്യക്ഷയായി. വൈസ് ചെയര്‍മാന്‍ കെ.ബി. രാജന്‍ ആദ്യവില്പന നിര്‍വഹിച്ചു. സ്റ്റാൻഡിംഗ് കമ്മിറ്റി ചെയര്‍മാന്‍മാരായ മിനി സജന്‍, ജോ ജോണ്‍ ജോര്‍ജ്, കൗണ്‍സിലര്‍മാരായ പി.ഡി. മോഹനന്‍, രാജന്‍ കണ്ണാട്ട്, ജോസ് ഏബ്രഹാം, നഗര സഭാ സെക്രട്ടറി ടി.വി. പ്രദീപ്കുമാര്‍, ക്ലീന്‍ സിറ്റി മാനേജര്‍ എം. ഹബീബ്, സീനിയര്‍ പബ്ലിക് ഹെല്‍ത്ത് ഇന്‍സ്‌പെക്ടര്‍മാരായ എ. അജയന്‍, സി. നിഷ തുടങ്ങിയവര്‍ പ്രസംഗിച്ചു.

വ്യവസായ സംരംഭം ഉദ്ഘാടനം നാളെ

ചേര്‍ത്തല: മാരാരിക്കുളം തൃഭുനാഥ് വെല്‍ഫയര്‍ ട്രസ്റ്റിന്‍റെ വ്യവസായസംരംഭം നാളെ തുടങ്ങും. നാടിന്‍റെയും നാട്ടുകാരുടെയും ആരോഗ്യപരിപാലനം, ഭക്ഷ്യസുരക്ഷ, സാമ്പത്തിക ഉന്നമനം, കുടുംബഭദ്രത, തൊഴില്‍ ലഭ്യത എന്നിവ ലക്ഷ്യമാക്കി, മാരാരിക്കുളം വടക്ക്-തെക്ക് പഞ്ചായത്തുകളിലെ സന്നദ്ധപ്രവര്‍ത്തകരാണ് സംരംഭം തുടങ്ങുന്നത്. പഞ്ചായത്തുകളിലെ നൂറോളം കുടുംബങ്ങള്‍ കേന്ദ്രീകരിച്ച് കുടില്‍ വ്യവസായമായി ചന്ദനത്തിരി, കര്‍പ്പൂരം, വിളക്കുതിരി, ഡിറ്റര്‍ജന്‍റ് എന്നിവയാണ് നിര്‍മിക്കുന്നത്. വ്യവസായ സംരംഭത്തിന്‍റെ ഒരുക്കങ്ങള്‍ പൂര്‍ത്തിയായതായി ട്രസ്റ്റ് പ്രസിഡന്‍റ് വി.എ. ഹരികുമാര്‍, സെക്രട്ടറി വേണുഗോപാലന്‍ നായര്‍, മറ്റു ഭാരവാഹികളായ സി.ആര്‍. വിജയകുമാര്‍, കെ.സി. ജയപ്രകാശ്, പി.കെ. രാജേന്ദ്രന്‍ നായര്‍ എന്നിവര്‍ പത്രസമ്മേളനത്തില്‍ അറിയിച്ചു. നാളെ വൈകുന്നേരം മൂന്നിന് പുതുക്കുളങ്ങര ക്ഷേത്രത്തിന് കിഴക്കുവശം മറ്റത്തില്‍ തൃഭുനാഥ് മന്ദിരത്തില്‍ ചേരുന്ന സമ്മേളനം കെ.സി. വേണുഗോപാല്‍ എംപി ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി ലോഗോ പ്രകാശനം നിര്‍വഹിക്കും.

ജീവനും സ്വത്തിനും ഭീഷണിയായി പാണ്ടനാട്ടിൽ പമ്പാതീരമിടിയുന്നു

ചെങ്ങന്നൂര്‍: 2018ലെ മഹാപ്രളയത്തിന്‍റെ കെടുതികള്‍ ഒഴിഞ്ഞിട്ടില്ലെന്ന് തെളിയിക്കുന്നതാണ് പാണ്ടനാട്ടെ പമ്പാനദിയുടെ തീരങ്ങളിലെ ഇപ്പോഴത്തെ കാഴ്ച. പ്രളയത്തില്‍ സംഭവിച്ച തീരമിടിച്ചില്‍ ഇപ്പോഴും രൂക്ഷമായി തുടരുകയാണ്. ഇതു പമ്പയുടെ കരകളില്‍ താമസിക്കുന്ന വരുടെ ജീവനും സ്വത്തിനും വലിയ ഭീഷണിയാണ് ഉയര്‍ത്തുന്നത്. പാണ്ടനാട് പഞ്ചായത്തിലെ 13-ാം വാര്‍ഡിലാണ് ഏകദേശം ഒന്നര കിലോമീറ്റര്‍ ദൂരത്തില്‍ തീരം ഇടിയുന്നത്. കൗസ്തുഭത്തില്‍ അരവിന്ദന്‍, തയ്യില്‍ (രാമനിലയം) വീട്ടില്‍ ഗിരിജാകുമാരി, കണ്ണങ്കര ശ്രീവത്സം വീട്ടില്‍ ചന്ദ്രലേഖ എന്നിവരുടെ വീടുകള്‍ക്കാണ് ഈ പ്രതിഭാസം ഏറ്റവും കൂടുതല്‍ ഭീഷണി സൃഷ്ടിക്കുന്നത്. ശ്രീവത്സത്തില്‍ ചന്ദ്രലേഖയുടെ അനുഭവം ഭീതിപ്പെടുത്തുന്നതാണ്. 1999ല്‍ ഭൂമി രജിസ്റ്റര്‍ ചെയ്തപ്പോള്‍ 18 സെന്‍റ് ഉണ്ടായിരുന്ന സ്ഥലം ഇന്ന് 14 സെന്‍റായി ചുരുങ്ങി. പ്രളയത്തിനുശേഷം നാലു സെന്‍റ് ഭൂമി അവര്‍ക്കു നഷ്ടമായി. പ്രളയത്തില്‍ വീടു പൂര്‍ണമായും മുങ്ങിയിരുന്നു. അതിനുശേഷമാണ് വീടിനോടു ചേര്‍ന്നുള്ള പമ്പാനദിയുടെ തീരം ഇടിയാന്‍ തുടങ്ങിയത്. അന്നുമുതല്‍ ചന്ദ്രലേഖ സര്‍ക്കാര്‍ ഓഫീസുകളില്‍ സഹായം അഭ്യര്‍ഥിച്ച് കയറിയിറങ്ങുകയാണ്. 2021ല്‍ പഞ്ചായത്ത് എന്‍ജിനിയറിംഗ് വിഭാഗം നല്‍കിയ റിപ്പോര്‍ട്ടില്‍ കെട്ടിടത്തിന്‍റെ ഫൗണ്ടേഷനില്‍ അടക്കം പൊട്ടലുകളുണ്ടെന്നും മുന്‍വശം സംരക്ഷണഭിത്തി കെട്ടി ബലപ്പെടുത്തണമെന്നും വ്യക്തമാക്കിയിരുന്നു. അല്ലാത്തപക്ഷം ഭാവിയില്‍ മണ്ണിടിച്ചിലുണ്ടായി കെട്ടിടത്തിന്‍റെ നിലനില്‍പ്പിനെത്തന്നെ ബാധിക്കുമെന്നും റിപ്പോര്‍ട്ടില്‍ മുന്നറിയിപ്പു നല്‍കിയിരുന്നു. എന്നാല്‍, ഈ റിപ്പോര്‍ട്ട് വന്നിട്ട് മൂന്നര വര്‍ഷം പിന്നിട്ടിട്ടും യാതൊരു തുടര്‍നടപടിയും ഉണ്ടായിട്ടില്ല. തീരമിടിച്ചില്‍ ഇപ്പോഴും തുടരുകയാണ്. നദിയുടെ മറുകരയായ ഒന്നാം വാര്‍ഡില്‍ സംരക്ഷണ ഭിത്തി കെട്ടി ബലപ്പെടുത്തിയിട്ടുണ്ട്. ഇത് അവിടത്തെ വെള്ളത്തിന്‍റെ തള്ളല്‍ ഈ ഭാഗത്തേക്കു വര്‍ധിപ്പിക്കാന്‍ കാരണമാകുന്നുണ്ട്. ഇതിനു പുറമേ നദിയിലൂടെ ദിവസേനയുള്ള സ്പീഡ് ബോട്ടുകളുടെ സഞ്ചാരം സ്ഥിതി കൂടുതല്‍ രൂക്ഷമാക്കുന്നു. പാണ്ടനാട് കൊട്ടാരത്തില്‍ക്കടവു മുതല്‍ മുണ്ട്രക്കടവു വരെയുള്ള ഒരു കിലോമീറ്റര്‍ ഭാഗത്തെ മറ്റു നാലു വീടുകളുടെ തീരവും ഇതേരീതിയില്‍ ഇടിയുന്നുണ്ട്. വെള്ളം കയറി തിട്ടയിടിഞ്ഞ നദിയിലേക്ക് ഇറങ്ങുന്നതിനാല്‍ വീടുകളുടെ അസ്ഥിവാരത്തിനും ബലക്ഷയം സംഭവിക്കുന്നുണ്ട്. ഭിത്തികളില്‍ പൊട്ടലുകള്‍ വീഴുകയും തറയിരുത്തുകയും ചെയ്തിട്ടുണ്ട്. കൗസ്തുഭത്തില്‍ അരിവിന്ദന്‍റെ അപേക്ഷ പ്രകാരം പമ്പയുടെ തീരം കെട്ടുന്നതിന് ആലപ്പുഴ ജില്ല പഞ്ചായത്ത് മാന്നാര്‍ ഡിവിഷന്‍റെ മെമ്പറുടെ തനതു ഫണ്ടില്‍നിന്ന് 25 ലക്ഷം രൂപ അനുവദിക്കുകകയും ഇതിന്‍റെ ടെണ്ടര്‍ നടപടികള്‍ പൂര്‍ത്തീകരിക്കുക യും ചെയ്തിട്ടുണ്ട്. സമീപകാലം വരെ വിവിധ കരകൃഷികള്‍ നടത്തിയിരുന്ന ഫലഭൂയിഷ്ടമായ മണ്ണാണ് ഇപ്പോള്‍ നദി കവര്‍ന്നെടുക്കുന്നത്. നദിക്കഭിമുഖമായുള്ള വീടുകളും നദീതീരവും തമ്മിലുള്ള അകലം ക്രമേണ കുറഞ്ഞു വരികയാണ്. കാലവര്‍ഷ മെത്തുന്നതോടെ സ്ഥിതി കൂടുതല്‍ ഗുരുതരമാകുമെന്ന ആശങ്കയിലാണ് പാണ്ടനാട്ടിലെ ജനങ്ങള്‍. അടിയന്തരമായി അധികൃതര്‍ വിഷയത്തില്‍ ഇടപെട്ട് കൂടുതല്‍ ഫണ്ട് അനുവദിക്കുകയും, തീരമിടിച്ചില്‍ ഭീഷണി നേരിടുന്ന എല്ലാ കുടുംബങ്ങള്‍ക്കും സംര ക്ഷണം ഉറപ്പാക്കുകയും ചെയ്യണമെന്നാണ് നാട്ടുകാരുടെ ആവശ്യം. കാലവര്‍ഷം അടുത്തുവരുന്ന സാഹചര്യത്തില്‍ അധികൃതരുടെ ഭാഗത്തുനിന്നുള്ള സത്വരനടപടി അനിവാര്യമാണ്.

പള്ളിയിൽ ക്വയർ പ്രാക്ടീസിനിടെ വിദ്യാർഥി കുഴഞ്ഞുവീണു മരിച്ചു

അമ്പലപ്പുഴ: പള്ളിയിൽ ക്വയർ പ്രാക്ടീസ് നടത്തുന്നതിനിടെ വിദ്യാർഥി കുഴഞ്ഞുവീണു മരിച്ചു. തകഴി വിരിപ്പാല തൈപ്പറമ്പിൽ ലിജോ-പ്രിയ ദമ്പതികളുടെ മകനും പച്ച ലൂർദ്മാതാ ഹയർ സെക്കൻഡറി സ്കൂൾ പ്ലസ് വൺ വിദ്യാർഥിയുമായ എഡ്വിൻ ലിജോ(16)യാണ് മരിച്ചത്. ഈസ്റ്റർ ആഘോഷത്തിനായി തകഴി തെന്നടി സെന്‍റ് റീത്താസ് പള്ളിയിൽ നടന്ന ക്വയർ പ്രാക്ടീസിനിടെ ഇന്നലെ വൈകിട്ടാണ് കുഴഞ്ഞു വീണു മരിച്ചത്. അഞ്ചാം ക്ലാസ് വിദ്യാർഥി ആൽബിൻ ലിജോ ഇളയ സഹോദരനാണ്. സംസ്കാരം പിന്നീട് തകഴി- തെന്നടി സെന്‍റ് റീത്താസ് പള്ളിയിൽ.

പനി ബാധിച്ച് ചികിത്സയിലിരുന്ന കുട്ടി മരിച്ചു; ചികിത്സാപ്പിഴവെന്ന്

കായംകുളം: സ്വകാര്യ ആശുപത്രിയിൽ പനി ബാധിച്ച് ചികിത്സയിലിരുന്ന ഒൻപത് വയസുകാരി മരിച്ചു. ചികിത്സാപ്പിഴവാണെന്നാരോപിച്ച് ബന്ധുക്കളും നാട്ടുകാരും പ്രതിഷേധവുമായി രംഗത്തെത്തി. കായംകുളം കണ്ണമ്പിള്ളി അജിത്- ശരണ്യ ദമ്പതികളുടെ മകൾ ആദിലക്ഷ്മി(9)യാണ് മരിച്ചത്. കായംകുളം ഗവൺമെന്‍റ്എൽ പി സ്കൂളിൽ മൂന്നാം ക്ലാസ് വിദ്യാർഥിനിയാണ് ആദിലക്ഷ്മി. നഗരമധ്യത്തിൽ സ്വകാര്യ ബസ് സ്റ്റാൻഡിനടുത്തുള്ള ആശുപത്രിയിലാണ് സംഭവം. കഴിഞ്ഞ 10നാണ് കുട്ടിയെ പനിയെത്തുടർന്ന് ആശുപത്രിയിൽ പ്രവേശിപ്പിച്ചത്. ആശുപത്രിയിലെത്തിക്കുന്ന സമയത്ത് ശരീരവേദനയും വയറുവേദനയും ഉണ്ടായിരുന്നു. പനി മൂർച്ഛിച്ചതോടെ ഇന്നലെ രാവിലെ ഐസിയുവിലേക്കു മാറ്റിയിരുന്നു. തുടർന്നാണ് മരിച്ചത്. കായംകുളം ഡിവൈഎസ്പിയുടെ നേതൃത്വത്തിൽ ഇൻക്വസ്റ്റ് നടപടികൾ പൂർത്തിയാക്കി മൃതദേഹം വണ്ടാനം മെ‍ഡിക്കൽ കോളജിൽ പോസ്റ്റ്മോർട്ടത്തിനായി കൊണ്ടുപോയി. കുട്ടി മരണപ്പെട്ടത് ഹൃദയസ്തംഭനം മൂലമെന്നാണ് ആശുപത്രി അധികൃതർ പറയുന്നത്. ചികിത്സാപ്പിഴവ് ചൂണ്ടിക്കാട്ടി ബന്ധുക്കൾ പോലീസിലും പരാതി നൽകി.

ബൈക്കും കാറും കൂട്ടിമുട്ടി യുവാവിനു പരിക്ക്

ഹരിപ്പാട്: ബൈക്കും കാറും കൂട്ടിയിടിച്ച് ബൈക്ക് യാത്രികനായ യുവാവിന് പരിക്കേറ്റു. മുതുകുളം വടക്ക് സ്വദേശി രാഹുലി(35)നാണ് പരിക്കേറ്റത്. വെള്ളിയാഴ്ച രാത്രി പന്ത്രണ്ടോടെ കായംകുളം-കാർത്തികപ്പളളി റോഡിൽ മുരിങ്ങച്ചിറ ജംഗ്ഷനിലായിരുന്നു അപകടം. പരിക്കേറ്റ രാഹുലിനെ ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

പട്ടാപ്പകൽ വീട് കുത്തിത്തുറന്നു കവര്‍ച്ച: പ്രതികൾ റിമാൻഡിൽ

കായംകുളം: പട്ടാപ്പകല്‍ വീട് കുത്തിത്തുറന്ന് കവര്‍ച്ച നടത്തിയ കേസിൽ അറസ്റ്റിലായ പ്രതികൾ റിമാൻഡിൽ. നൂറനാട് പുതുപ്പള്ളികുന്നം ഖാൻ മൻസിൽ ഷൈജു ഖാൻ (42), അമ്പലപ്പുഴ വളഞ്ഞവഴിപൊക്കത്തിൽ വീട്ടിൽ പൊടിച്ചൻ എന്നു വിളിക്കുന്ന പൊടിമോൻ (27) എന്നിവരെയാണ് മാവേലിക്കര കോടതി റിമാൻഡ് ചെയ്തത്. മാർച്ച് 24ന് താമരക്കുളം വേടരപ്ലാവിൽ സതിയമ്മയുടെ പൂട്ടിയിട്ടിരുന്ന വീട് പട്ടാപ്പകല്‍ കുത്തിത്തുറന്ന് ഒരു പവന്‍ തൂക്കം വരുന്ന സ്വര്‍ണവളയും 52,000 രൂപയും കവര്‍ച്ച ചെയ്തിരുന്നു. ചാരുംമൂട് ജംഗ്ഷനില്‍ മുറുക്കാന്‍കട നടത്തുന്ന സതിയമ്മ രാവിലെ കടയിലേക്കു പോയാല്‍ സന്ധ്യക്കാണ് തിരിച്ചെത്തുന്നത്. കറുത്ത സ്കൂട്ടറില്‍ ഹെല്‍മറ്റ് ധരിച്ചും മുഖം മറച്ചും ഗ്ലൗസ് ധരിച്ചും ഉച്ചയോടെ സതിയമ്മയുടെ വീടിനു സമീപം രണ്ടു പേര്‍ വരുന്നതും പോകുന്നതുമായ ദൃശ്യങ്ങള്‍ പോലീസ് കണ്ടെത്തി. തുടർന്ന് നടത്തിയ അന്വേഷണത്തിലാണ് പ്രതികൾ പിടിയിലായത്. 150ല്‍ അധികം സിസിടിവി കാമറകള്‍ പോലീസ് പരിശോധിച്ചിരുന്നു . ആലപ്പുഴ റെയില്‍വേ പോലീസ് സ്റ്റേഷനിലും പുന്നപ്ര, കരുനാഗപ്പളളി, ഓച്ചിറ എന്നീ പോലീസ് സ്റ്റേഷനുകളിലുമായി 16 മോഷണക്കേസുകളില്‍ രണ്ടാം പ്രതിയായ പൊടിമോൻ ഉള്‍പ്പെട്ടിട്ടുണ്ടെന്ന് പോലീസ് പറഞ്ഞു. മോഷണത്തില്‍ ലഭിച്ച പങ്ക് ഉപയോഗിച്ച് മോഷണം നടത്തിയതിന്‍റെ തൊട്ടടുത്ത ദിവസം കരുനാഗപ്പളളിയിലെ ഷോറൂമില്‍ 26,000 രൂപ ഡൗണ്‍പേയ്മെന്‍റ് നല്‍കി പൊടിമോന്‍ വാങ്ങിയ പുതിയ യമഹ എന്‍‌റൈസര്‍ മോട്ടോര്‍ സൈക്കിളും മോഷണം നടത്താനും തിരികെ പോകാനും ഉപയോഗിച്ച ഹോണ്ട ഡിയോ സ്കൂട്ടറും ഷൈജു ഖാന്‍ സഞ്ചരിച്ചുവന്ന മഹീന്ദ്ര പിക്കപ്പും കസ്റ്റഡിയിലെടുത്തിട്ടുണ്ട്.

കെസിവൈഎം അടുക്കള പൂട്ടി സമരം നടത്തി

തിരുവല്ല : പാചക വാതക-ഇന്ധന വില വർധനയിൽ പ്രതിഷേധിച്ചു കെസിവൈഎം സംസ്ഥാന സമിതിയുടെ നേതൃത്വത്തിൽ അടുക്കള പൂട്ടി സമരം നടത്തി. ആഗോള വിലയ്ക്കനുസരിച്ച് ആഭ്യന്തര വിലയും ക്രമീകരിക്കാൻ എണ്ണക്കമ്പനികൾക്ക് നൽകിയിരിക്കുന്ന അധികാരം എടുത്ത് മാറ്റുക, പാചകവാതക വിലവർധന പിൻവലിക്കുക തുടങ്ങിയ ആവശ്യങ്ങൾ ഉന്നയിച്ചു തിരുവല്ല കച്ചേരിപ്പടിയിൽ നടന്ന സമരം കെസിവൈഎം സംസ്ഥാന പ്രസിഡന്‍റ് എബിൻ കണിവയലിൽ ഉദ്ഘാടനം ചെയ്തു. വൈസ് പ്രസിഡന്‍റ് അനൂപ് ജെ.ആർ. അധ്യക്ഷത വഹിച്ചു. സെക്രട്ടറി വിപിൻ ജോസഫ് വിഷയാവതരണം നടത്തി. സംസ്ഥാന ജനറൽ സെക്രട്ടറി ജോബിൻ ജോസ്, മിജാർക്ക് കേരള പ്രതിനിധി ബിജോ പി. ബാബു, എംസിവൈഎം ഗ്ലോബൽ പ്രസിഡന്‍റ് മോനു ജോസഫ്, ഫാ. ചെറിയാൻ കുരിശുമ്മൂട്ടിൽ, സിറിയക് വി. ജോൺ, സിസ്റ്റർ നോബർട്ട സിറ്റിസി, ജോഷ്ന എലിസബത്ത്, ജീന ജോർജ്, ജോസ്മി മരിയ ജോസഫ് എന്നിവർ പ്രസംഗിച്ചു.

ആർ ബ്ലോക്കിലെ തീപിടിത്തം: സർക്കാർ ഇടപെടണമെന്ന് കൊടിക്കുന്നിൽ

ആലപ്പുഴ: കുട്ടനാട് കൈനകരി പഞ്ചായത്തിലെ ആർ ബ്ലോക്കിൽ കഴിഞ്ഞ മൂന്നു ദിവസമായി കത്തിക്കൊണ്ടിരിക്കുന്ന തീ അണയ്ക്കാൻ സംസ്ഥാന സർക്കാർ യുദ്ധകാലാടിസ്ഥാനത്തിൽ ഇടപെടണമെന്ന് കൊടിക്കുന്നിൽ സുരേഷ് എംപി ആവശ്യപ്പെട്ടു. സാന്ദ്ര കൃഷിഭൂമിയായ ഈ മേഖലയിലെ തീ നിയന്ത്രണ വിധേയമാക്കാൻ കഴിയാത്തത് വലിയ ദുരന്തസാഹചര്യം സൃഷ്ടിക്കുമെന്ന് എംപി പറഞ്ഞു. ആർ ബ്ലോക്ക് ഏകദേശം 1400 ഏക്കറിലധികം വരുന്ന പ്രദേശത്ത് 500 ഏക്കറോളം കൃഷിയുള്ള പ്രദേശമാണ്. ഇവിടെ 24 കുടുംബങ്ങൾ സ്ഥിരതാമസമുണ്ട്. റോഡ് സൗകര്യമില്ലാത്തതിനാൽ വള്ളം ഉപയോഗിച്ചാണ് പ്രദേശത്തേക്ക് എത്തേണ്ടത്. ഈ സവിശേഷതകൾ കണക്കിലെടുത്താൽ അഗ്നിശമന സേനയുടെ നിലവിലുള്ള സംവിധാനം തീ അണയ്ക്കാൻ മതിയാവില്ല. വ്യാവസായിക ശേഷിയുള്ള വലിയ മോട്ടറുകൾ മേഖലയിൽ അടിയന്തരമായി വിന്യസിക്കേണ്ടതും വിവിധ വകുപ്പ് ഏജൻസികൾ തമ്മിൽ ഏകോപനം ഉറപ്പാക്കേണ്ടതുമാണ്. മൂന്നു ദിവസമായി തീ അണയ്ക്കാൻ കഴിയാത്തത് ജില്ലാ ഭരണകൂടത്തിന്‍റെയും സംസ്ഥാന സർക്കാരിന്‍റെയും വീഴ്ചയാണെന്നും എംപി കുറ്റപ്പെടുത്തി. തീ കൂടുതൽ വ്യാപിക്കുന്നതിനു മുമ്പേ അടിയന്തര നടപടി സ്വീകരിക്കണമെന്നും കൊടിക്കുന്നിൽ ആവശ്യപ്പെട്ടു.

അതിക്രമങ്ങള്‍ തടയാന്‍ ഐസിഡിഎസിന്‍റെ പരാതിപ്പെട്ടി

ചെങ്ങന്നൂര്‍: നഗരസഭ ഐസിഡിഎസിന്‍റെ നേതൃ ത്വത്തില്‍ സ്ത്രീകള്‍ക്കും കുട്ടികള്‍ക്കും എതിരേയു ള്ള അതിക്രമങ്ങള്‍ തടയാന്‍ അങ്കണവാടികളില്‍ പരാതിപ്പെട്ടി സ്ഥാപിച്ചു. ജനകീയ ആസൂത്രണ പ ദ്ധതി പ്രകാരമാണ് നഗരസഭ പ്രദേശത്തെ 22 അങ്കണവാടികളില്‍ ഐസിഡിഎസ് പരാതിപ്പെട്ടികള്‍ സ്ഥാപിച്ചത്. പദ്ധതിയുടെ ഉദ്ഘാടനം നഗരസഭ ചെയര്‍പേഴ്‌സണ്‍ അഡ്വ. ശോഭാ വര്‍ഗീസ് ഇടനാട് 89 -ാം നമ്പര്‍ അങ്കണവാടിയില്‍ നിര്‍വഹിച്ചു. നഗരസഭാ ജാഗ്രതാ സമിതിയുടെ പ്രവര്‍ത്തനങ്ങളുടെ ഭാഗമായാണ് പരാതിപ്പെട്ടികള്‍ സ്ഥാപിച്ചിട്ടുള്ളതെന്നും സ്ത്രീകള്‍ക്കും കുട്ടികള്‍ക്കും എതിരേയുള്ള അതിക്രമങ്ങള്‍ പരാതിപ്പെട്ടികളില്‍ എഴുതി നിക്ഷേപിച്ചാല്‍ അന്വേഷണം നടത്തി തുടര്‍ നിയമ നടപടികള്‍ സ്വീകരിക്കുമെന്നും ഐസിഡിഎസ് സൂപ്പര്‍ വൈസര്‍ ആര്‍.പി. ലക്ഷ്മി പറഞ്ഞു.

മന്ത്രി പാലം സന്ദർശിച്ചു

മന്നാർ: ചെന്നിത്തല കീച്ചേരിൽക്കടവ് പാലത്തിന്‍റെ പണിയുടെ പുരോഗതി വിലയിരുത്താൻ മന്ത്രി സജി ചെറിയാൻ സ്ഥലം സന്ദർശിച്ചു. 2022 ജനുവരി മൂന്നിന് തറക്കല്ലിട്ട പാലത്തിന്‍റെ പണി വളരെ നന്നായി മുന്നോട്ടുപോയെങ്കിലും കഴിഞ്ഞ കുറെ നാളുകളായി പാലത്തിന്‍റെ പണി വളരെ മന്ദഗതിയിലാണ്. മൂന്നര വർഷമായി പണി തുടങ്ങിയിട്ട്. ഇത്തരത്തിൽ മുന്നോട്ടുപോയാൽ പാലത്തിന്‍റെ നിർമാണം രണ്ടു കൊല്ലം കഴിഞ്ഞാലും തീരുകയില്ലെന്നാണ് വിലയിരുത്തൽ. ഇതേത്തുടർന്നാണ് മന്ത്രി സ്ഥലം സന്ദർശിച്ച് പാലം കരാറുകാരനെ വിളിച്ച് എത്രയും പെട്ടെന്ന് പാലത്തിന്‍റെ പണി പൂർത്തീകരിക്കണമെന്ന് നിർദേശിച്ചു.

ഫ്ലഡ്‌ലിറ്റ് കൗണ്ടി ക്രിക്കറ്റ് തുടങ്ങി

അമ്പലപ്പുഴ: ഫ്ലഡ്‌ലിറ്റ് കൗണ്ടി ക്രിക്കറ്റിന് തുടക്കമായി. വലിയകുളം ത്രിവേണി ആർട്സ് ആൻഡ് സ്പോർട്സ് ക്ലബ് സംഘടിപ്പിക്കുന്ന മുബാറക് മെമ്മോറിയൽ എവറോളിംഗ് ട്രോഫിക്കു വേണ്ടിയുള്ള ഫ്ലഡ് ലൈറ്റ് കൗണ്ടി ക്രിക്കറ്റിന് തുടക്കമായി. വലിയകുളം മുനിസിപ്പൽ ഗ്രൗണ്ടിൽ മൂന്നു ദിവസങ്ങളിലായി നടത്തുന്ന ടൂർണമെന്‍റ് എച്ച്. സലാം എംഎൽഎ ഉദ്ഘാടനം ചെയ്തു. യുവതലമുറ ലഹരിക്ക് അടിമകളായി മാറാതിരിക്കാൻ ഇത്തരത്തിൽ സംഘടിപ്പിക്കുന്ന കലാകായിക മത്സരങ്ങൾ ഏറെ സഹായകരമാണന്നും ത്രിവേണി ആർട്സ് ആൻഡ് സ്പോർട്സ് ക്ലബ് ഇക്കാര്യത്തിൽ മാതൃകാപരമായ പ്രവർത്തനമാണ് നടത്തുന്നതെന്നും എംഎൽഎ പറഞ്ഞു. ജില്ലാ ഒളിമ്പിക് അസോസിയേഷൻ പ്രസിഡന്‍റും ക്ലബ് രക്ഷാധികാരിയുമായ വി.ജി. വിഷ്ണു അധ്യക്ഷനായി. കൗൺസിലർമാരായ ബി. നസീർ, ക്ലാരമ്മ പീറ്റർ, ബി. അജേഷ്, മുൻ കൗൺസിലർ കെ.ജെ. പ്രവീൺ എന്നിവർ സംസാരിച്ചു. ക്ലബ് പ്രസിഡന്‍റ് വി.കെ.നാസറുദീൻ, സെക്രട്ടറി ഷെരീഫ് കുട്ടി എന്നിവർ സംസാരിച്ചു. 32 ഓളം ടീമുകൾ പങ്കെടുക്കുന്ന ടൂർണമെന്‍റ് ഇന്ന് സമാപിക്കും.

നാല്പതാംവെള്ളി ആചരിച്ചു

അമ്പലപ്പുഴ: പുന്നപ്ര മാർ ഗ്രിഗോറിയോസ് ഇടവക ദേവാലയത്തിൽ നാല്പതാം വെള്ളി ആചരണത്തിന്‍റെ ഭാഗമായി കുരിശിന്‍റെ വഴി നടത്തി. വിശുദ്ധ കുർബാന, കുരിശിന്‍റെ വഴി, നേർച്ചക്കഞ്ഞി വിതരണം എന്നീ കർമങ്ങൾക്ക് ഇടവക വികാരി ഫാ. ചെറിയാൻ കാരിക്കോമ്പിൽ, ഫാ. മാത്യു മുല്ലശേരി എന്നിവർ കാർമികത്വം വഹിച്ചു. ചേർത്തല: ചരിത്രപ്രസിദ്ധ മരിയൻ-ചാവറ തീർഥാടനകേന്ദ്രമായ പള്ളിപ്പുറം സെന്‍റ് മേരീസ് ഫൊറോന പള്ളിയിൽ വിശുദ്ധ വാരാചരണ തിരുക്കർമങ്ങൾക്ക് ഓശാന ഞായർ ആചരണത്തോടെ ഇന്ന് തുടക്കമാകും. രാവിലെ 6.45ന് സെന്‍റ് മേരീസ് പാരീഷ് ഹാളിൽ കുരുത്തോല വെഞ്ചരിപ്പും വിതരണവും. തുടർന്ന് പ്രദക്ഷിണം, ദിവ്യബലി, വികാരി റവ.ഡോ.പീറ്റർ കണ്ണമ്പുഴ മുഖ്യകാർമികത്വം വഹിക്കും. അസി.വികാരി ഫാ. അമൽ പെരിയപ്പാടൻ, ഫാ.ജോസഫ് മാക്കോതക്കാട്ട് എന്നിവർ സഹകാർമികരായിരിക്കും. പെസഹാ വ്യാഴാഴ്ച രാവിലെ ഏഴിന് ദിവ്യബലി, കാൽകഴുകൽ ശുശ്രുഷ, തുടർന്ന് ആരാധന. വൈകുന്നേരം പൊതു ആരാധന, അപ്പംമുറിക്കൽ ശുശ്രൂഷ. ദുഃഖവെള്ളി രാവിലെ 6.30 ന് പീഡാനുഭവ തിരുക്കർമങ്ങൾ ആരംഭിക്കും. പീഡാനുഭവ വായന, വിശുദ്ധ കുർബാന സ്വീകരണം, ആഘോഷമായ കുരിശിന്‍റെ വഴി, കുരിശുരൂപ വണക്കം. വൈകുന്നേരം 3.30 ന് നഗരി കാണിക്കൽ, പള്ളിപ്പുറത്തിന്‍റെ വിവിധ ഭാഗങ്ങളിൽനിന്നു പരിഹാരപ്രദക്ഷിണമായി പള്ളിപ്പുറം പള്ളിയിലേക്ക് എത്തിച്ചേരുന്നു. തുടർന്ന് പീഡാനുഭവ സന്ദേശം, വിശുദ്ധ കുരിശ് ചുംബനം, കബറടക്ക ശുശ്രൂഷ. ശനിയാഴ്ച രാവിലെ 6.30ന് തിരുക്കർമങ്ങൾ, പുത്തൻവെള്ളം, പുത്തൻ തീ വെഞ്ചരിപ്പ്. രാത്രി 11.30 ന് ഉയിർപ്പിന്‍റെ തിരുക്കർമങ്ങൾ ആരംഭിക്കും. തുടർന്ന് പ്രദക്ഷിണം, പ്രസംഗം, ദിവ്യബലി. 20ന് രാവിലെ 6.30ന് കേളമംഗലം, ഒറ്റപ്പുന്ന കുരിശുപള്ളികളിലും, ഏഴിന് പള്ളിപ്പുറം പള്ളിയിലും ദിവ്യബലി. കല്ലൂർക്കാട് ബസിലിക്കയിൽ നാൽപതുമണി ആരാധന മങ്കൊമ്പ്: ചമ്പക്കുളം സെന്‍റ് മേരീസ് ബസിലിക്കയിലെ പള്ളിയിലെ നാൽപതുമണി ആരാധന നാളെ മുതൽ 16 വരെ നടക്കും. 1927ൽ ചങ്ങനാശേരിയുടെ ആദ്യ നാട്ടുമെത്രാനായിരുന്ന മാർ തോമസ് കുര്യാളശേരിയാണ് ഈ ആശയം മുന്നോട്ടുവച്ചത്. എന്നാൽ, 1925ൽ അദ്ദേഹത്തിന്‍റെ മരണം മൂലം ആഗ്രഹം സഫലമായില്ല. എന്നാൽ, ഇതിനെപ്പറ്റി വളരെ വ്യക്തമായ അറിവുണ്ടായിരുന്ന അദ്ദേഹത്തിന്‍റെ പിൻഗാമി മാർ ജയിംസ് കാളാശേരി മെത്രാനാണ് ചമ്പക്കുളത്ത് നാൽപതു മണി ആരാധനയ്ക്ക് അനുമതി നൽകിയത്. ഇക്കൊല്ലത്തെ 98ാമത് നാൽപതു മണി ആരാധന രാവിലെ ഏഴിനുള്ള വിശുദ്ധ കുർബാനയോടെ ആരംഭിച്ചു വൈകുന്നേരം ആറിനു സമാപിക്കും. ചൊവ്വാഴ്ചയും രാവിലെ വി.കുർബാനയോടെ ആരംഭിച്ച് വൈകുന്നേരം സമാപിക്കും. സമാപന ദിവസമായ ബുധനാഴ്ച രാവിലെ ഏഴിന് വി.കുർബാനയോടെ ആരംഭിക്കുന്ന ആരാധന വൈകുന്നേരം അഞ്ചിന് ദർശന സമൂഹത്തിന്‍റെ നേതൃത്വത്തിൽ പൊതു ആരാധന നടത്തി, ആറിന് നടക്കുന്ന വിശുദ്ധ കുർബാനയുടെ ആഘോഷമായ പ്രദക്ഷിണത്തോടെ സമാപിക്കും.

വിശുദ്ധവാര തിരുക്കര്‍മങ്ങള്‍

നെടുമ്പ്രക്കാട് സെന്‍റ് തോമസ് പള്ളിയിൽ ചേര്‍ത്തല: നെടുമ്പ്രക്കാട് സെന്‍റ് തോമസ് പള്ളിയിൽ വിശുദ്ധവാര തിരുക്കര്‍മങ്ങളും വാര്‍ഷിക ധ്യാനവും ഇന്നു മുതല്‍ 20 വരെ നടക്കും. ഇന്നു രാവിലെ ഏഴിന് കുരുത്തോല വെഞ്ചരിപ്പ്, തുടര്‍ന്ന് മഠത്തിലേക്കു പ്രദക്ഷിണം, ദിവ്യബലി-ഫാ. ജോയ് പ്ലാക്കല്‍. നാളെ വൈകുന്നേരം 5.30ന് ദിവ്യബലി, വാര്‍ഷികധ്യാനം-ഫാ. ഫെര്‍ണാണ്ടോ. 17ന് രാവിലെ ഏഴിന് മഠം കപ്പേളയില്‍ ദിവ്യബലി. പള്ളിയിലേക്ക് ദിവ്യകാരുണ്യ പ്രദക്ഷിണം. തുടര്‍ന്ന് കാൽകഴുകല്‍ ശുശ്രൂഷ, ആരാധന. വൈകുന്നേരം ആറിന് പൊതു ആരാധന, അപ്പംമുറിക്കല്‍ ശുശ്രൂഷ. 18ന് രാവിലെ ഏഴിന് പീഡാനുഭവ ചരിത്രവായന, വിശുദ്ധ കുര്‍ബാന സ്വീകരണം. വൈകുന്നേരം മൂന്നിന് വിശുദ്ധ കുരിശിന്‍റെ വഴി. 4.15ന് പീഡാനുഭവ പ്രസംഗം, നഗരികാണിക്കല്‍, തിരുസ്വരൂപ ചുംബനം, നേര്‍ച്ചക്കഞ്ഞി. 19നു രാവിലെ 6.30നു ദിവ്യബലി. തുടര്‍ന്ന് പുത്തന്‍വെള്ളം, പുത്തന്‍തിരി വെഞ്ചരിപ്പ്. രാത്രി 11ന് ഉയിര്‍പ്പ് തിരുക്കര്‍മങ്ങള്‍. തുടര്‍ന്ന് പ്രദക്ഷിണം, ദിവ്യബലി. 20നു രാവിലെ ഏഴിനു ദിവ്യബലി.

വിഷുക്കണിയൊരുക്കാന്‍ ഇതാ ശ്രീകൃഷ്ണവിഗ്രഹങ്ങളും

ദേവരാജന്‍ പൂച്ചാക്കല്‍ പൂച്ചാക്കല്‍: കൊന്നപ്പൂവും കണിവെള്ളരിയും ശ്രീകൃഷ്ണവിഗ്രഹവും ചേര്‍ന്ന വിഷുക്കണി ഉണ്ടെങ്കിലേ മലയാളിയുടെ വിഷുപ്പുലരിയും വിഷു ആഘോഷവും പൂര്‍ണമാകൂ. പുഞ്ചിരിതൂകുന്ന കൃഷ്ണ വിഗ്രഹത്തിലെ പുലര്‍കാല കാഴ്ച സമ്പത്ത്സമൃദ്ധിയുടെ നാളുകള്‍ സമ്മാനിക്കുമെന്നാണ് മലയാളിയുടെ വിശ്വാസം. വിഷു അടുത്തെത്തിയതോടെ ശ്രീകൃഷ്ണവിഗ്രഹ വിപണിയും സജീവമായി. വഴിയോരങ്ങളിലും വില്‍പ്പനശാലകളിലു മെല്ലാം ശ്രീകൃഷ്ണ വിഗ്രഹങ്ങള്‍ വില്‍പ്പന തകൃതിയായി നടക്കുന്നു. വിഷുവിന് കണികാണിക്കാനുള്ള വിഗ്രഹങ്ങള്‍ വില്‍ക്കാന്‍ ഇതര സംസ്ഥാനത്തുനിന്നു ജില്ലയുടെ വിവിധ ഭാഗങ്ങളില്‍ വില്‍പ്പനക്കാര്‍ സ്ഥാനം പിടിച്ചുകഴിഞ്ഞു. വിവിധ നിറങ്ങളില്‍ കൃഷ്ണവിഗ്രഹം ലഭ്യമാണ്. 250 രൂപ മുതല്‍ 1600 രൂപ വിലയുള്ള വിഗ്രങ്ങള്‍ ലഭ്യമാണ്. പ്ലാസ്റ്റര്‍ ഓഫ് പാരീസിലാണ് വിഗ്രഹങ്ങള്‍ കൂടുതലും നിര്‍മിച്ചിരിക്കുന്നത്. പാതയോരങ്ങളിലാണ് വില്പനക്കാര്‍ കൂടുതലുള്ളത്. വില്പന നടക്കുന്നുണ്ടെങ്കിലും കഴിഞ്ഞ വര്‍ഷത്തെ അപേക്ഷിച്ച് വില്പന കുറവാണെന്നും വരുംനാളുകളില്‍ വില്പന കൂടുമെന്ന പ്രതീക്ഷയുണ്ടെന്നും വ്യാപാരികള്‍ പറയുന്നു.

വ്രതശുദ്ധിയുടെ പുണ്യവുമായി തീര്‍ഥാടകര്‍ കരുവള്ളിക്കാട് കുരിശുമലയില്‍

ചുങ്കപ്പാറ: ചങ്ങനാശേരി അതിരൂപതയുടെ കുരിശുമല തീര്‍ഥാടനകേന്ദ്രമായ നിര്‍മലപുരം കരുവള്ളിക്കാട് സെന്‍റ് തോമസ് കുരിശുമലയിലേക്ക് നാല്പതാം വെള്ളിയാഴ്ച ഈശോയുടെ കുരിശുമരണത്തെ ധ്യാനിച്ച് ആയിരങ്ങളെത്തി. ഇന്നലെ വൈകുന്നേരം അതിരൂപതാധ്യക്ഷന്‍ ആര്‍ച്ച് ബിഷപ് മാര്‍ തോമസ് തറയിലിന്‍റെ നേതൃത്വത്തില്‍ ചുങ്കപ്പാറ സെന്‍റ് ജോര്‍ജ് മലങ്കര പള്ളിയില്‍ നിന്നുമാണ് സംയുക്ത കുരിശിന്‍റെ വഴി നടന്നത്. വൈദികരും സന്യസ്തരും അടക്കം ആയിരങ്ങളാണ് മരക്കുരിശുമായി കുരിശിന്‍റെ വഴിയില്‍ പങ്കെടുത്തത്. കുരിശിന്‍റെ വഴിയില്‍ പങ്കെടുക്കുന്നതിനായി അതിരൂപതയിലെ വിവിധ ഫൊറോനകളില്‍നിന്നുള്ള വിശ്വാസികള്‍ എത്തിയിരുന്നു. 14 ഇടങ്ങളിലും പ്രത്യേക പ്രാര്‍ഥനകള്‍ നടത്തി യാത്ര മുമ്പോട്ടു നീങ്ങി. പ്രത്യാശയുടെ 300 ദീപങ്ങള്‍ തെളിച്ചുകൊണ്ടായിരുന്നു മലമുകളില്‍ കുരിശിന്‍റെ വഴിയുടെ സമാപനം. വികാരി ജനറാള്‍ ഫാ. ആന്‍റണി എത്തക്കാട്ട് സന്ദേശം നല്‍കി. തുടര്‍ന്ന് നേര്‍ച്ചവിതരണവും നടന്നു. ചങ്ങനാശേരി അതിരൂപത വികാരി ജനറാൾ ഫാ. സ്കറിയാ കന്യാകോ ണിൽ, മണിമല ഫൊറോന വികാരി ഫാ. മാത്യു താന്നിയത്ത്, നെടുംകുന്നം ഫൊറോന വികാരി ഫാ. വര്‍ഗീസ് കൈതപ്പറമ്പില്‍, ഫാ. മോബന്‍ ചൂരവടി, ഫാ.റ്റോണി മണിയഞ്ചിറ, ഫാ. സേവ്യര്‍ ചെറുനെല്ലാടി, ഫാ. എബി വടക്കുംതല, ഫാ. ജോണ്‍ മുള്ളമ്പാറ, ഫാ. ജേക്കബ് നടുവിലേക്കളം തുടങ്ങിയവരും വിവിധ ദേവാലയങ്ങളിലെ വികാരിമാരും ക്രമീകരണങ്ങള്‍ക്ക് നേതൃത്വം നല്‍കി. ഇന്ന് ഉച്ചകഴിഞ്ഞും തീര്‍ഥാടന സൗകര്യം ഉണ്ടാകും. ഫാ. ജയിംസ് പി. കുന്നത്ത് സമാപന സന്ദേശം നല്‍കും. 14ന് ഉച്ചകഴിഞ്ഞ് മലമുകളിലേക്ക് തീര്‍ഥാടനവും 5.30 ന് മലമുകളില്‍ വിശുദ്ധ കുര്‍ബാനയും ഉണ്ടായിരിക്കും. 15 ന് ഉച്ചകഴിഞ്ഞ് മൂന്നിന് തീര്‍ഥാടനവും അഞ്ചിന് മലമുകളില്‍ മലങ്കര റീത്തില്‍ വിശുദ്ധ കുര്‍ബാനയും ഉണ്ടായിരിക്കും. ഫാ.എബി വടക്കുംതല കാര്‍മികത്വം വഹിക്കും. 16ന് ഉച്ചകഴിഞ്ഞ് 3.30 ന് മാര്‍ ജോസഫ് പെരുന്തോട്ടത്തിന്‍റെ നേതൃത്വത്തില്‍ മലമുകളിലേക്ക് തീര്‍ഥാടനവും സമാപന ആശീര്‍വാദവും ഉണ്ടാകും. 19നു രാവിലെ 7.30 ന് വിശുദ്ധ കുര്‍ബാനയ്ക്ക് ഫാ.ജോണ്‍സണ്‍ കാരാട്ട് കാര്‍മികത്വം വഹിക്കും. 27നു പുതുഞായര്‍ തിരുനാളോടെയാണ് തീര്‍ഥാടനത്തിനു സമാപനം കുറിക്കുന്നത്. അപരന്‍റെ ബലഹീനതയെ താങ്ങാന്‍ കുരിശ് നമുക്ക് കരുത്താകണം: മാര്‍ തോമസ് തറയില്‍ ചുങ്കപ്പാറ: അപരന്‍റെ ബലഹീനതയെ താങ്ങാനുള്ള കരുത്താണ് ഈശോയുടെ കുരിശില്‍നിന്നു നമ്മള്‍ നേടേണ്ടതെന്ന് ആര്‍ച്ച്ബിഷപ് മാര്‍ തോമസ് തറയിൽ. നിര്‍മലപുരം കരുവള്ളിക്കാട് സെന്‍റ് തോമസ് കുരിശുമലയിലേക്ക് നാല്പതാം വെള്ളിയാഴ്ച നടന്ന കുരിശുമല തീര്‍ഥാടനത്തിന് ആരംഭം കുറിച്ച് സന്ദേശം നല്‍കുകയായിരുന്നു അദ്ദേഹം. സഹനത്തിന്‍റെയും ധീരതയുടെയും അടയാളമാണ് കുരിശ്. കുരിശ് എടുത്തു തന്നെ അനുഗമിക്കാനാണ് ക്രിസ്തു നല്കുന്ന ആഹ്വാനം. കുരിശ് എടുക്കുന്നവര്‍ക്ക് അപമാനവും പീഡയും ഏല്‍ക്കേണ്ടിവരും. ഭയപ്പെട്ടു മാറേണ്ടവരല്ല ക്രൈസ്തവർ. 12 ശിഷ്യരിലൂടെ കോടിക്കണക്കിനാളുകളെ നേടാനായെങ്കില്‍ അത്ഭുതങ്ങള്‍ ലോകത്തില്‍ നടത്താന്‍ ശേഷിയുള്ളവരാണ് നാമെന്ന തിരിച്ചറിവുണ്ടാകണമെന്ന് ആര്‍ച്ച് ബിഷപ് ചൂണ്ടിക്കാട്ടി. യാഥാര്‍ഥ്യത്തിനു നിരക്കാത്ത കഥകള്‍ ക്രൈസ്തവ സമൂഹത്തിനെതിരേ പറഞ്ഞു കൊണ്ടിരിക്കും. മറ്റുള്ളവരുടെ മുമ്പില്‍ നമ്മളെ അപകീര്‍ത്തിപ്പെടുത്തുകയാണ് ലക്ഷ്യം. എന്നാല്‍ ഈ ചെറിയ സമൂഹം ചെയ്ത നന്മകള്‍ കാണാതിരിക്കാനാകില്ല. കോടികളുടെ ആസ്തി ഉണ്ടെന്നു പ്രചരിപ്പിക്കുന്നവര്‍ ഒന്നു മനസിലാക്കണം. എവിടെയെല്ലാം ക്രൈസ്തവനു സ്ഥലമുണ്ടോ അവിടെയെല്ലാം പൊതുസമൂഹത്തെ ലക്ഷ്യമാക്കിയുള്ള കാരുണ്യ ഭവനങ്ങളോ വിദ്യാലയങ്ങളോ ആകും പ്രവര്‍ത്തിക്കുന്നതെന്നും ആര്‍ച്ച് ബിഷപ് ചൂണ്ടിക്കാട്ടി.

വിശുദ്ധ വാരാചരണം

പൂങ്കാവ് പള്ളിയിൽ ആലപ്പുഴ: തീര്‍ഥാടനകേന്ദ്രമായ പൂങ്കാവ് പള്ളിയിൽ നാളെ പുലര്‍ച്ചെ വിശുദ്ധബലി അര്‍പ്പിക്കുന്നതോടെ വിശുദ്ധവാര തിരുകര്‍മങ്ങള്‍ക്ക് തുടക്കമാകും. വികാരി ഫാ. സേവ്യര്‍ ചിറമേല്‍ മുഖ്യകാര്‍മികത്വം വഹിക്കും. ദിവ്യബലിമധ്യേ ഫാ.ആന്‍റണി തൈവീട്ടില്‍ വചനസന്ദേശം നല്‍കും. വൈകുന്നരം നാലിന് ചെട്ടികാട് കടപ്പുറത്തുനിന്ന് ആരംഭിക്കുന്ന കുരിശിന്‍റെ വഴി ഇടവക ദേവാലയത്തില്‍ എത്തിച്ചേരുമ്പോള്‍ ഫാ. ലിജേഷ് കാളിപ്പറമ്പില്‍ വചനപ്രഘോഷണം നടത്തും. തിങ്കള്‍, ചൊവ്വ, ബുധന്‍ ദിവസങ്ങളില്‍ രാവിലെയും വൈകിട്ടും പ്രത്യേക ദിവ്യബലിയും കുരിശിന്‍റെ വഴിയും നടക്കും. 17-ന് പെസഹാ വ്യാഴാഴ്ച വൈകുന്നരം ആറിന് തിരുവത്താഴപൂജ ആരംഭിക്കും. വികാരി ഫാ. സേവ്യര്‍ ചിറമേല്‍ തിരുക്കര്‍മങ്ങളില്‍ മുഖ്യകാര്‍മികത്വം വഹിക്കും. ഫാ. സെബാസ്റ്റ്യന്‍ പള്ളിപ്പറമ്പില്‍ വചനന്ദേശം നല്‍കും. തുടര്‍ന്ന് കാൽകഴുകല്‍ ശുശ്രൂഷ, ദിവ്യകാരുണ്യ സ്വീകരണം. പരിശുദ്ധ കൂര്‍ബാന സ്ഥാപനം, പരസ്യാരാധന. രാത്രി എട്ടിന് വിശ്വപ്രസിദ്ധമായ പൂങ്കാവിലെ ദീപക്കാഴ്ച ആരംഭിക്കും. പ്രഥമ ദീപം തെളിക്കുന്ന ചടങ്ങില്‍ പി.പി. ചിത്തരഞ്ജന്‍ എംഎല്‍എ, കെ.സി. വേണുഗോപാല്‍ എംപി തുടങ്ങി രാഷ്ട്രീയ -സാസ്‌കാരിക നേതാക്കന്മാര്‍ പങ്കെടുക്കും. വിശാലമായ പള്ളി അങ്കണത്തില്‍ ആയിരക്കണക്കിന് നിലവിക്കുകള്‍ നിരനിരയായി കത്തിച്ചുവച്ച് പെസഹാ രാത്രി കൂടുതല്‍ പ്രഭാമയവും ചൈതന്യപൂര്‍ണവുമാക്കും. രാത്രി 12ന് ആരംഭിക്കുന്ന കുരിശിന്‍റെ വഴിയില്‍ ഫാ.സെബാസ്റ്റ്യന്‍ പള്ളിപ്പറമ്പില്‍ ധ്യാനപ്രസംഗം നടത്തും. നേര്‍ച്ചക്കഞ്ഞിവയ്പ്പിന്‍റെ ആശീര്‍വാദം കൃപാസനം ഡയറക്ടര്‍ ഫാ. വി.പി. ജോസഫ് വലിയവീട്ടില്‍ നിര്‍വഹിക്കും. ദുഃഖവെള്ളിയാഴ്ച രാവിലെ നാലു മുതല്‍ ഉച്ചയ്ക്ക് ഒന്നു വരെ തുടര്‍ച്ചയായി വിവിധ ഭക്ത സംഘടനകളുടെ നേതൃത്വത്തില്‍ കുരിശിന്‍റെ വഴി, നേര്‍ച്ചക്കഞ്ഞി വിതരണം. ഒന്നു മുതല്‍ രണ്ടു വരെ പൂത്തന്‍പാന, അമ്മാനംവായന. വൈകുന്നരം മൂന്നിന് കര്‍ത്താവിന്‍റെ പീഡാസഹന അനുസ്മരണം. തുടര്‍ന്ന് പൂങ്കാവിലെ പീഡാനുഭവ തിരുസ്വരൂപവും വഹിച്ചുള്ള നഗരികാണിക്കല്‍ ചടങ്ങ് നടക്കും. രാത്രി എട്ടിന് ആരംഭിക്കുന്ന കുരിശിന്‍റെ വഴിയിൽ ഫാ. ജോഷി മയ്യാറ്റില്‍ ധ്യാനപ്രസംഗം നടത്തും. രാത്രി 12ന് കബറടക്കശുശ്രൂഷ. ശനിയാഴ്ച രാത്രി 10.30ന് ആരംഭിക്കുന്ന പെസഹാ പ്രഘോഷണത്തെ ത്തുടര്‍ന്ന് ഉത്ഥാനത്തിന്‍റെ മഹത്വും സന്തോഷവും നിറയുന്ന ഉയിര‍പ്പു കുര്‍ബാന നടക്കും. ദേശീയ തീര്‍ഥാടന ടൂറിസം ശൃംഖലയില്‍ ഉള്‍പ്പെട്ട ആലപ്പുഴ പൂങ്കാവ് പള്ളിയിലെ വിശുദ്ധവാര തിരുക്കര്‍മങ്ങളില്‍ പങ്കുകൊള്ളാന്‍ മുഴുവന്‍ തീര്‍ഥാടകരെയും സ്വാഗതം ചെയ്യുന്നതായി വികാരി ഫാ. സേവ്യര്‍ ചിറമേല്‍ ജനറല്‍ കണ്‍വീനര്‍ ലിയോണ്‍ കുരിശുപറമ്പില്‍, മനോജ് പള്ളിപ്പറമ്പ്, സൂജ അനില്‍, ആന്‍റണി വി.വി., കോച്ചുമോന്‍ പത്തുതയ്യില്‍ വി.സി. ഉറുമീസ് എന്നിവര്‍ പറഞ്ഞു. പഴവങ്ങാടി പള്ളിയിൽ ഓശാനത്തിരുനാൾ ആലപ്പുഴ: പഴവങ്ങാടി മാർ സ്ലീവാ ഫൊറോനാ പള്ളിയിലെ ഓശാന തിരുനാൾ ആചരണം നാളെ രാവിലെ ആറിന് നടക്കും. കുരുത്തോല വെഞ്ചരിപ്പ്, വിശുദ്ധ കുർബാന,പ്രദക്ഷിണം എന്നിവയാണ് പ്രധാന ശുശ്രൂഷകൾ. രാവിലെ ആറിന് പ്രധാന ശുശ്രൂഷകൾക്കു ശേഷം രാവിലെ 9.30നും വിശുദ്ധ കുർബാന ഉണ്ടായിരിക്കും. തിരുക്കർമങ്ങൾക്ക് വികാരി ഫാ. സിറിയക് കോട്ടയിൽ, അസിസ്റ്റന്‍റ് വികാരിമാരായ ഫാ. മണിലാൽ ക്രിസ്, ഫാ. യോഹന്നാൻ കട്ടത്തറ, ഫാ. മൈക്കിൾ വെട്ടുകല്ലേൽ എന്നിവർ നേതൃത്വം നൽകും. തങ്കി ഫൊറോന പള്ളിയില്‍ ചേര്‍ത്തല: തീര്‍ഥാടനകേന്ദ്രമായ തങ്കി സെന്‍റ് മേരീസ് ഫൊറോന പള്ളിയിലെ വിശുദ്ധവാരാചരണം നാളെ തുടങ്ങും. വിശുദ്ധവാരാചരണത്തിന്‍റെ ഒരുക്കങ്ങള്‍ പൂര്‍ത്തിയായതായി ഫൊറോന വികാരി ഫാ. ജോര്‍ജ് എടേഴത്ത്, അസി.വികാരി ഫാ. ലോബോ ലോറന്‍സ് ചക്രശേരി, ജനറല്‍ കണ്‍വീനര്‍ എ.ജെ. സെബാസ്റ്റ്യന്‍, പബ്‌ളിസിറ്റി കണ്‍വീനര്‍ പി.പി. ജോയി പൊന്‍വേലില്‍, കണ്‍വിനര്‍മാരായ ജോസ് സേവ്യര്‍ നാനാട്ട്, ടോമി കളത്തിപ്പറമ്പില്‍ എന്നിവര്‍ പത്രസമ്മേളനത്തില്‍ അറിയിച്ചു. ഓശാനഞായറാഴ്ചയായ നാളെ രാവിലെ ആറിന് കുരുത്തോല വെഞ്ചരിപ്പ്, തുടര്‍ന്ന് കുരുത്തോല പ്രദക്ഷിണം, ദിവ്യബലി, വൈകുന്നേരം അഞ്ചിന് ആത്മാഭിഷേക കണ്‍വന്‍ഷന്‍ സമാപനം. 14ന് രാവിലെ 10ന് ഉദ്ദിഷ്ട കാര്യസാധ്യത്തിനായി കുട്ടികളുടെയും രക്ഷിതാക്കളുടെയും വചനയിരിപ്പ്, തുടര്‍ന്ന് ദിവ്യബലി. കൊച്ചി രൂപത അപ്പസ്‌തോലിക് അഡ്മിനിസ്‌ട്രേറ്റര്‍ ഡോ. ജയിംസ് റാഫേല്‍ ആനാപറമ്പില്‍ മുഖ്യകാര്‍മികത്വം വഹിക്കും. തുടര്‍ന്ന് കല്ലറജപം, ആരാധന, വൈകുന്നേരം 3.30ന് ദിവ്യകാരുണ്യ ആരാധന, പരിശുദ്ധ കുര്‍ബാനയുടെ ആശീര്‍വാദം. 15ന് രാവിലെ പത്തിന് യുവജനങ്ങളുടെ വചനയിരിപ്പ്. 16ന് രാവിലെ 10.30ന് തൈല പരികര്‍മപൂജ. 17ന് രാവിലെ 7.30ന് നേര്‍ച്ചക്കഞ്ഞി തയാറാക്കുന്നതിനുള്ള അരിയിടല്‍ കര്‍മം ദലീമ ജോജോ എംഎല്‍എ നിര്‍വഹിക്കും. വൈകുന്നേരം അഞ്ചിന് തിരുവത്താഴപൂജ, കാല്‍കഴുകല്‍ ശുശ്രൂഷ, വചനപ്രഘോഷണം-ഡോ. ജോഷി മയ്യാറ്റില്‍. ഏഴിന് നടത്തുന്ന സ്‌നേഹദീപക്കാഴ്ചയ്ക്ക് കേന്ദ്ര സഹമന്ത്രി ജോര്‍ജ് കുര്യന്‍ ദീപം തെളിക്കും. തുടര്‍ന്ന് നേര്‍ച്ചക്കഞ്ഞി വെഞ്ചരിപ്പ്, ദിവ്യകാരുണ്യ ആരാധന. രാത്രി 12ന് അദ്ഭുത തിരുസ്വരൂപം പൊതുവണക്കത്തിനായി പൂമുഖ പന്തലില്‍ പ്രതിഷ്ഠിക്കും. കൊച്ചി രൂപത അപ്പസ്‌തോലിക് അഡ്മിനിസ്‌ട്രേറ്റര്‍ ഡോ. ജയിംസ് റാഫേല്‍ ആനാപറമ്പില്‍, കൊച്ചി രൂപത മുന്‍ ബിഷപ് ഡോ. ജോസഫ് കരിയില്‍ എന്നിവര്‍ മുഖ്യകാര്‍മികരാകും. 18ന് പുലര്‍ച്ചെ 12.30മുതല്‍ ധ്യാനാത്മക കുരിശിന്‍റെ വഴി-ഫാ. ഷിനോജ് പുന്നയ്ക്കല്‍, വൈകുന്നേരം മൂന്നിന് പീഡാനുഭവ അനുസ്മരണ ശുശ്രൂഷ, ദൈവവചന പ്രഘോഷണകര്‍മം, കുരിശാരാധന, ദിവ്യകാരുണ്യസ്വീകരണം-ഫാ. ദീപക് ജോസഫ്. അഞ്ചിന് നഗരി കാണിക്കല്‍, രാത്രി 10.30ന് പീഡാനുഭവ നൊവേന, 11ന് സമാപന കുരിശിന്‍റെ വഴി, 12ന് കബറടക്കം. 19ന് രാത്രി 11ന് തീ, തിരി, വെള്ളം വെഞ്ചരിപ്പ്, പെസഹാപ്രഘോഷണം. തുടര്‍ന്ന് ഉയിര്‍പ്പുതിരുനാള്‍ സമൂഹ ദിവ്യബലി വചനപ്രഘോഷണം-ഫാ.മാര്‍ട്ടിന്‍ കബ്രാല്‍, തുടര്‍ന്ന് തിരുനാള്‍ പ്രദക്ഷിണം. 20ന് രാവിലെ ഏഴിനും എട്ടിനും ദിവ്യബലി. പുന്നപ്ര സെന്‍റ് ജോസഫ്‌സ് ഫൊറോന പള്ളിയിൽ ആലപ്പുഴ: പുന്നപ്ര സെന്‍റ് ജോസഫ്‌സ് ഫൊറോന പള്ളിയിൽ പീഡാനുഭവ അനുസ്മരണം. നാളെ രാവിലെ 6.30ന് കുരുത്തോല വെഞ്ചരിപ്പ്, പ്രദക്ഷിണം. പെസഹാ വ്യാഴം വൈകിട്ട് 5ന് തിരുവത്താഴ ദിവ്യബലി, വചനപ്രഘോഷണം - ഫാ. ജോണ്‍സണ്‍ ഫ്രാന്‍സിസ്. പാദക്ഷാളനം, ദിവ്യകാരുണ്യ പ്രദക്ഷിണം, ആരാധന, ദീപക്കാഴ്ച, കാഴ്ചവയ്പ്പ്. ദുഃഖവെള്ളി രാവിലെ 6.00ന് കുരിശിന്‍റെ വഴി, പ്രസംഗം - ഫാ. സെബാസ്റ്റ്യന്‍ ശാസ്താംപറമ്പില്‍, വൈകുന്നേരം നാലിന് പീഡാനുഭവ വായന, വ്യാകുലപ്രസംഗം, കുരിശാരാധന, ദിവ്യകാരുണ്യസ്വീകരണം , നഗരികാണിക്കല്‍, കബറടക്കം, വ്യാകുലപ്രസംഗം - ഫാ. ജോസി ലൂയിസ് കൊച്ചിക്കാരന്‍വീട്ടില്‍. ഉയിര്‍പ്പുതിരുനാള്‍ രാവിലെ 7.00ന് ദിവ്യബലി. നഗരത്തില്‍ സംയുക്ത കുരിശിന്‍റെ വഴി നാളെ ആലപ്പുഴ: നഗരത്തിലെ ലത്തീന്‍, സീറോ മലബാര്‍, മലങ്കര കത്തോലിക്കാ സഭകളിലെ വിവിധ പള്ളികളുടെ നേതൃത്വത്തില്‍ നോമ്പുകാലത്ത് സംഘടിപ്പിക്കുന്ന സംയുക്ത കുരിശിന്‍റെ വഴി ഓശാന ഞായറാഴ്ചയായ നാളെ നടക്കും. വൈകിട്ട് നാലിന് ആലപ്പുഴ രൂപതയുടെ മൗണ്ട് കാര്‍മല്‍ കത്തീഡ്രല്‍ ദേവാലയത്തില്‍നിന്ന് കുരിശിന്‍റെ വഴി ആരംഭിക്കും. ചങ്ങനാശേരി അതിരൂപത മെത്രാപ്പോലീത്ത മാര്‍ തോമസ് തറയില്‍ ആമുഖ സന്ദേശം നല്‍കും. നഗരം ചുറ്റി പഴവങ്ങാടി മാര്‍ സ്ലീവ ഫൊറോന തീര്‍ഥാടന പള്ളിയില്‍ എത്തുമ്പോള്‍ ആലപ്പുഴ ബിഷപ് ഡോ. ജയിംസ് റാഫേല്‍ ആനാപറമ്പില്‍ സമാപന സന്ദേശം നല്‍കും. കത്തീഡല്‍ പള്ളി അങ്കണത്തില്‍നിന്ന് തുടങ്ങി കോണ്‍വന്‍റ് സ്‌ക്വയര്‍, വഴിച്ചേരി, പിച്ചു അയ്യര്‍ ജംഗ്ഷന്‍, മുല്ലയ്ക്കല്‍ എവിജെ ജംഗ്ഷന്‍ വഴിയാണ് കുരിശിന്‍റെ വഴി പഴവങ്ങാടി പള്ളിയിലെത്തുക. ഒരുക്കങ്ങള്‍ പൂര്‍ത്തിയായതായി മൗണ്ട് കാര്‍മല്‍ കത്തീഡ്രല്‍ വികാരി ഫാ. ഫ്രാന്‍സീസ് കൊടിയനാട്, പഴവങ്ങാടി മാര്‍സ്ലീവ ഫൊറോന പള്ളി വികാരി ഫാ. സിറിയക് കോട്ടയില്‍, സെന്‍റ് മേരീസ് മലങ്കര കത്തോലിക്ക പള്ളി വികാരി ഫാ. രഞ്ജിത്ത് മടത്തിറമ്പില്‍ എന്നിവര്‍ അറിയിച്ചു. പരിഹാരപ്രദക്ഷിണ കുരിശിന്‍റെ വഴി എടത്വ: ഫൊറോനാ ജൂബിലി തീര്‍ഥാടനവും പരിഹാരപ്രദക്ഷിണ കുരിശിന്‍റെ വഴിയും എടത്വായില്‍ നടന്നു. പച്ച-ചെക്കിടിക്കാട് ലൂര്‍ദ്മാതാ പള്ളിയില്‍നിന്ന് എടത്വ ഫൊറോനയുടെ ആഭിമുഖൃത്തില്‍ എടത്വ പള്ളിയിലേക്കു നടന്ന കുരിശിന്‍റെ വഴി വികാരി ഫാ. ഫിലിപ്പ് വൈക്കത്തുകാരന്‍ ഉദ്ഘാടനം ചെയ്ത് സന്ദേശം നല്‍കി. എടത്വ പള്ളിയില്‍ എത്തിച്ചേര്‍ന്നപ്പോള്‍ ചങ്ങനാശേരി അതിരൂപത വികാരി ജനറാള്‍ മോണ്‍. ആന്‍റണി എത്തക്കാട് സന്ദേശം നല്‍കി. പച്ച-ചെക്കിടിക്കാട് ലൂര്‍ദ്മാതാ പള്ളി വികാരി ഫാ. ജോസഫ് ചൂളപറമ്പില്‍, ഫാ. ജോസഫ് കട്ടപ്പുറം, ഫാ. ബ്രിന്‍റോ മനയത്ത്, പദയാത്രാ കണ്‍വീനര്‍ സാബു കരിക്കംപള്ളി, വിവിധ പള്ളികളിലെ കൈക്കാരന്‍മാര്‍, പാരീഷ് കമ്മിറ്റി, പദയാത്രാ കമ്മിറ്റി, എസ്എഫ്ഒ, കെഎല്‍എം അംഗങ്ങള്‍ എന്നിവര്‍ നേതൃത്വം നല്‍കി. യുവദീപ്തി, മിഷന്‍ലീഗ്, സണ്‍ഡേസ്‌കൂള്‍ കുട്ടികള്‍ ലഹരിവിരുദ്ധ സന്ദേശ ഫ്ലോട്ടുകള്‍, പ്ലക്കാര്‍ഡുകള്‍ എന്നിവ പദയാത്രയിലുടനീളം പ്രദര്‍ശിപ്പിച്ചു. പീഡാനുഭവ സ്‌മരണയിൽ കുരിശിന്‍റെ വഴി മാവേലിക്കര: ക്രിസ്തുവിന്‍റെ പീഡാനുഭവത്തെയും കുരിശുമരണത്തെയും അനുസ്മരിച്ച്‌ മാവേലിക്കരയിലും സമീപ പ്രദേശത്തുമുള്ള കത്തോലിക്കാ ദേവാലയങ്ങളുടെ ആഭിമുഖ്യത്തിൽ നാൽപതാംവെള്ളി കുരിശിന്‍റെ വഴി പുതിയകാവ് സെന്‍റ് ജോസഫ്‌സ് ദേവാലയത്തിൽനിന്ന് ആരംഭിച്ച് പുന്നമൂട് സെന്‍റ് മേരീസ് കത്തീഡ്രൽ ദേവാലയത്തിൽ സമാപിച്ചു. മാവേലിക്കര ബിഷപ് ഡോ. ജോഷ്വാ മാർ ഇഗ്നാത്തിയോസ് മെത്രാപ്പോലീത്ത, ഭദ്രാസന വികാരി ജനറൽ മോൺ. ഡോ. സ്റ്റീഫൻ കുളത്തുംകരോട്ട്, ഫാ. ജോർജ് വല്ലയിൽ, ഫാ. റോബർട്ട് പാലവിളയിൽ, ഫാ. മാത്യൂസ് ചെങ്കിലാത്ത്, ഫാ. ഗിവർഗീസ് കോശി ചരുവിള എന്നിവർ പങ്കെടുത്തു. മലങ്കര കാത്തലിക് അസോസിയേഷൻ മാവേലിക്കര ഭദ്രാസന സമിതിയുടെയുടെയും കറ്റാനം വൈദിക ജില്ലയുടെയും സംയുക്ത ആഭിമുഖ്യത്തിൽ ചാരുംമൂട്ടിൽ സംഘടിപ്പിച്ച കുരിശിന്റെ വഴി പ്രയാണം കരിമുളയ്ക്കൽ സെന്‍റ് മേരിസ് മലങ്കര കത്തോലിക്കാ ദേവാലയത്തിൽനിന്ന് ആരംഭിച്ച് ചാരുംമൂട് ലത്തീൻ കത്തോലിക്കാ ദേവാലയം വഴി തിരികെ സെന്‍റ് മേരിസ് ദേവാലയത്തിലേക്ക് എത്തിച്ചേർന്നു. മാവേലിക്കര ഭദ്രാസന പ്രൊക്യുറേറ്റർ ഫാ. റോബർട്ട് പാലവിള ഉദ്‌ഘാടനം ചെയ്തു. എംസിഎ മാവേലിക്കര രൂപത വൈദിക ഉപദേഷ്ടാവ് ഫാ. സിൽവസ്റ്റർ തെക്കേടത്ത് , ഫാ. ജോർജ് ചരുവിള, ഫാ. ജേക്കബ് പേരൂർപറമ്പിൽ, ഫാ. ഗീവർഗീസ് ചാക്കപൂട്ടിൽ, ഫാ. ഡാനിയേൽ തെക്കടത്ത്, ഫാ. നെബു, ഫാ. മാത്യു ചെങ്കിലേത്ത്, മാവേലിക്കര രൂപത പ്രസിഡന്‍റ് അഡ്വ. അനിൽ ബാബു, വില്യംസ് മത്തായി , ഡോ. ഷാജി എം. സ്റ്റാൻലി , കോശി പാറത്തുണ്ടിൽ, കുര്യൻ ചാക്കോ, റെജി നല്ലില, ബിനു കെ. സാമുവേൽ, സിജു റോയി, സജി പായ്ക്കാട്ട്, പ്രഫ. ജോൺ ടി. ഏബ്രഹാം തേവരേത്ത്, ജിജി യോഹന്നാൻ എന്നിവർ നേതൃത്വം നൽകി.

വമ്പൻ സ്രാവുകൾ ഹൈബ്രിഡ് കഞ്ചാവ് പ്രതികള്‍

ആലപ്പുഴ: രണ്ടു കോടി രൂപയുടെ ഹൈബ്രിഡ് കഞ്ചാവ് പിടികൂടിയ കേസിലെ പ്രതികള്‍ക്കു രാജ്യാന്തര സ്വര്‍ണക്കടത്തു ബന്ധവും. കഴിഞ്ഞ ദിവസം എക്‌സൈസ് പിടികൂടിയ ചെന്നൈ എന്നൂര്‍ സത്യവാണി മുത്തുനഗര്‍ സ്വദേശി സുല്‍ത്താന്‍ അക്ബര്‍ അലിയില്‍(43)നിന്നാണു സുപ്രധാന വിവരങ്ങള്‍ എക്‌സൈസിനു ലഭിച്ചത്. അക്ബര്‍ അലിയാണു ഹൈബ്രിഡ് കഞ്ചാവ് കടത്തിയതിന്‍റെ മുഖ്യ സൂത്രധാരനെന്നാണു നിഗമനം. ഇയാളുടെ സ്ഥാപനത്തിന്‍റെ മറവിലാണു സ്വര്‍ണവും ഇലക്ട്രോണിക്‌സ് ഉപകരണങ്ങളും രാജ്യത്തേക്കു കടത്തിയിരുന്നത്. മൂന്നു വര്‍ഷത്തോളമായി അക്ബര്‍ അലിയും സംഘവും ഹൈബ്രിഡ് കഞ്ചാവും സ്വര്‍ണവും കടത്തിയിരുന്നെന്ന് എക്‌സൈസ് പറയുന്നു. പരിശോധനകള്‍ ഒഴിവാക്കാന്‍ കുട്ടികള്‍ ഉള്‍പ്പെടെ കുടുംബമായാണ് കഞ്ചാവുമായി യാത്ര ചെയ്തിരുന്നത്. ഓമനപ്പുഴ സ്വകാര്യ റിസോര്‍ട്ടില്‍നിന്ന് ഹൈബ്രിഡ് കഞ്ചാവുമായി തസ്ലിമ സുല്‍ത്താന (ക്രിസ്റ്റീന-43), സഹായി കെ.ഫിറോസ് (26) എന്നിവര്‍ പിടിയിലാകുമ്പോള്‍ തൊട്ടടുത്തു വരെ കാറില്‍ അക്ബറും ഉണ്ടായിരുന്നു. അന്നു കഞ്ചാവ് കടത്തില്‍ ഇയാളുടെ ബന്ധം തിരിച്ചറിയാനായില്ലെങ്കിലും പിന്നീടുള്ള അന്വേഷണത്തില്‍ സൂത്രധാരനെന്നു കണ്ടെത്തി. ഫോറന്‍സിക് പരിശോധന തുടര്‍ന്നാണ് അന്വേഷണസംഘം, ചെന്നൈ എണ്ണൂരിലെ വാടക വീട്ടിലെത്തി അറസ്റ്റ് ചെയ്തത്. അക്ബര്‍ അലി വിദേശത്തു നിന്നെത്തിക്കുന്ന കഞ്ചാവ് ആവശ്യക്കാര്‍ക്ക് എത്തിച്ചുകൊടുക്കുകയാണു തസ്‌ലീമ ചെയ്തിരുന്നതെന്നാണു നിഗമനം. പ്രതികളുടെ രാജ്യാന്തര ബന്ധം സംബന്ധിച്ചു തെളിവു ലഭിച്ചാല്‍ കേന്ദ്ര ഏജന്‍സികള്‍ക്കു വിവരം കൈമാറും. അക്ബര്‍ പലതവണ സിംഗപ്പൂര്‍, മലേഷ്യ, തായ്‌ലന്‍ഡ് തുടങ്ങിയ രാജ്യങ്ങള്‍ സന്ദര്‍ശിച്ചതു ലഹരി, സ്വര്‍ണക്കടത്ത് ഇടപാടുകള്‍ക്കാണെന്നു സംശയിക്കുന്നുണ്ടെന്നും ഈ യാത്രകളെക്കുറിച്ച് അന്വേഷിക്കുമെന്നും ഡെപ്യൂട്ടി എക്‌സൈസ് കമ്മീഷണര്‍ എസ്. വിനോദ് കുമാര്‍, അസിസ്റ്റന്‍റ് എക്‌സൈസ് കമ്മിഷണര്‍ എസ്.അശോക്കുമാര്‍, സ്‌പെഷല്‍ സ്‌ക്വാഡ് സിഐ എം. മഹേഷ് എന്നിവര്‍ പറഞ്ഞു. പ്രതിയെ റിമാന്‍ഡ് ചെയ്തു. ഹൈബ്രിഡ് കഞ്ചാവ് കടത്തു സംഭവത്തില്‍ പങ്കുണ്ടെങ്കില്‍ നടന്‍മാരെയും പ്രതി ചേര്‍ക്കുമെന്ന് എക്‌സൈസ്. പിടിയിലായ മൂന്നു പ്രതികളുടെയും മൊബൈല്‍ ഫോണുകള്‍ ഫോറന്‍സിക് പരിശോധനയ്ക്ക് അയയ്ക്കും. നടന്മാരുടെ മൊഴി ചാറ്റുകളില്‍നിന്നു കൂടുതല്‍ തെളിവുകള്‍ ലഭിക്കുമെന്നാണു പ്രതീക്ഷ. കൂടുതല്‍ വിവരങ്ങള്‍ ശേഖരിച്ച ശേഷം മൂന്നു പ്രതികളെയും കസ്റ്റഡിയില്‍ വാങ്ങി ഒന്നിച്ചിരുത്തി ചോദ്യം ചെയ്യും. തുടര്‍ന്നാകും നടന്മാരുടെ മൊഴി രേഖപ്പെടുത്തുക. പ്രതികളെന്നു ബോധ്യപ്പെട്ടാല്‍ നടന്മാരെ അറസ്റ്റ് ചെയ്യുമെന്നും എക്‌സൈസ് ഡെപ്യൂട്ടി കമ്മീഷണര്‍ എസ്.അശോക് കുമാര്‍ പറഞ്ഞു. കൊടുംകുറ്റവാളികള്‍ താമസിക്കുന്ന സ്ഥലത്തായിരുന്നു സുല്‍ത്താന്‍ അക്ബര്‍ അലിയുടെ വാടകവീട്. വളരെയേറെ ബുദ്ധിമുട്ടിയാണു പ്രതിയിലേക്ക് എത്തിച്ചേരാന്‍ സാധിച്ചതെന്ന് അന്വേഷണസംഘം പറഞ്ഞത്. ആയിരം വീടിന് ഒരു മൂപ്പന്‍ എന്നതാണു പ്രദേശത്തെ സംവിധാനം. പ്രതി താമസിച്ചിരുന്ന പ്രദേശത്തിന്‍റെ മൂപ്പനായ മതിയുടെ സഹായത്തോടെയാണ് അന്വേഷണസംഘം പ്രതിയുടെ ഒളിത്താവളത്തിലെത്തിയത്. വാടകവീടിന്‍റെ ഉടമയെ കണ്ടെത്താനായതാണ് അക്ബര്‍ അലിയുടെ വീട് തിരിച്ചറിയാന്‍ സഹായിച്ചത്. പ്രതിയെ നാട്ടിലെത്തിക്കാന്‍ ട്രാന്‍സിറ്റ് വാറണ്ടിനു വേണ്ടി ചെന്നൈ തിരുവട്ടിയൂര്‍ കോടതിയില്‍ ഹാജരാക്കിയപ്പോള്‍ പോലീസില്ലാതെ പ്രതിയെ പിടിക്കാന്‍ എങ്ങനെ കഴിഞ്ഞു എന്ന ആശ്ചര്യവും കോടതി പ്രകടിപ്പിച്ചെന്നും ഉദ്യോഗസഥര്‍ പറഞ്ഞു.

ഉയരപ്പാത നിര്‍മാണം തകൃതി; പ്രതീക്ഷയോടെ യാത്രക്കാർ

ആലപ്പുഴ: ഉയരപ്പാത നിര്‍മാണവുമായി ബന്ധപ്പെട്ട് പിയര്‍ പ്രൊട്ടക്‌ഷന്‍ ഭിത്തിയുടെ കോണ്‍ക്രീറ്റ് തുടങ്ങി. തുറവൂര്‍, കുത്തിയതോട്, എരമല്ലൂര്‍, ചന്തിരൂര്‍ എന്നിവിടങ്ങളിലാണ് ജോലികള്‍ തുടങ്ങിയത്. 9 മീറ്റര്‍ ഉയരമുള്ള ഒറ്റത്തൂണുകള്‍ക്കു മുകളില്‍ 24 മീറ്റര്‍ വീതിയിലുമുള്ള പാതയാണ് ഒരുങ്ങുന്നത്. തുറവൂര്‍ മുതല്‍ അരൂര്‍ വരെ 354 തൂണുകളാണ് ഉയരപ്പാതയ്ക്കായി നിര്‍മിച്ചിരിക്കുന്നത്. തൂണുകളുടെ നിര്‍മാണം പൂര്‍ത്തിയായി. ഇനി റാംപുകളുടെയും ഉയരപ്പാതയ്ക്കു മുകളില്‍ നിര്‍മിക്കുന്ന ടോള്‍ പ്ലാസയ്ക്കായുള്ള തൂണുകളും നിര്‍മിക്കണം. ഉയരപ്പാതയുടെ തൂണുകള്‍ക്കു മുകളില്‍ കോണ്‍ക്രീറ്റ് ഗര്‍ഡറുകള്‍ സ്ഥാപിച്ച ഭാഗങ്ങളില്‍ കോണ്‍ക്രീറ്റിംഗ് ജോലിയും നടക്കുന്നു. തൂണുകള്‍ക്ക് ചുവട്ടില്‍ ഏഴു മീറ്റര്‍ വീതിയിലും ഏഴു മീറ്റര്‍ നീളത്തിലും ഒന്നര അടി താഴ്ചയില്‍ പാറപ്പൊടിയും 65 എംഎം മെറ്റലും ചേര്‍ത്തിട്ടുള്ള മിശ്രിതം യന്ത്രസഹായത്തോടെ ഉറപ്പിക്കുന്ന ജോലിയും തുടങ്ങി. ഇതിനോടു ചേര്‍ന്ന് തൂണിൻന്‍റെ അടിഭാഗത്തുനിന്നു രണ്ടു മീറ്റര്‍ ഉയരത്തില്‍ 10 സെന്‍റിമീറ്റര്‍ ഘനത്തില്‍ കോണ്‍ക്രീറ്റിംഗ് നടക്കുന്നു. തുറവൂര്‍, കുത്തിയതോട്, ചന്തിരൂര്‍ എന്നിവിടങ്ങളിലായി പത്തോളം തൂണുകളുടെ ജോലി പൂര്‍ണമായി. തൂണുകള്‍ക്കു മുകളില്‍ പാതയ്ക്കായി കോണ്‍ക്രീറ്റിംഗ് പൂര്‍ത്തിയായ ഭാഗങ്ങളിലാണ് ജോലികള്‍ നടക്കുന്നത്. നിര്‍മാണത്തിന്‍റെ സുരക്ഷയ്ക്കായി സ്ഥാപിച്ച ഇരുമ്പ് ബാരിക്കേഡുകളും നീക്കം ചെയ്തു. തൂണിനോടു ചേര്‍ന്ന് മീഡിയനുകളുടെ കോണ്‍ക്രീറ്റിംഗ് ആരംഭിച്ചിട്ടുണ്ട്. 2026 ഫെബ്രുവരി അവസാനത്തോടെ ഉയരപ്പാത നിര്‍മാണം പൂര്‍ത്തിയാക്കണമെന്നാണ് കരാര്‍. ഗതാഗത നിയന്ത്രണം അരൂര്‍: തുറവൂര്‍-അരൂര്‍ ഉയരപ്പാത നിര്‍മാണവുമായി ബന്ധപ്പെട്ട തുറവൂര്‍ ജംഗ്ഷനില്‍ ഗര്‍ഡറുകള്‍ സ്ഥാപിക്കുന്നതിന്‍റെ ഭാഗമായി 11 മുതല്‍ 15 വരെ ഗതാഗത നിയന്ത്രണം ഏര്‍പ്പെടുത്തും. എറണാകുളം ഭാഗത്തേക്ക് പോകുന്ന വാഹനങ്ങള്‍ തുറവൂരില്‍നിന്നു കുമ്പളങ്ങി റോഡ് വഴിയോ, തൈക്കാട്ടുശേരി റോഡ് വഴിയോ പോകണം. അരൂര്‍ മുക്കം, വൈറ്റില എന്നിവിടങ്ങളില്‍നിന്നെത്തുന്ന വാഹനങ്ങള്‍ അരൂര്‍ ക്ഷേത്രം കവലയില്‍നിന്നു അരൂക്കുറ്റി റോഡ് വഴിയും പോകണമെന്ന് അശോക് ബില്‍ക്കോണ്‍ അധികൃതര്‍ അറിയിച്ചു.

എയിംസ് ; സാധ്യതാപട്ടികയില്‍ ആലപ്പുഴയും

ആലപ്പുഴ: എയിംസ് ആലപ്പുഴയില്‍ എത്തുമെന്ന വിവരത്തിൽ ആഹ്ലാദിച്ച് ആലപ്പുഴ. കോഴിക്കോടും പാലക്കാടും മറികടന്ന് ആലപ്പുഴയിൽ എത്തുമോ? കേരളത്തില്‍ കേന്ദ്ര സര്‍ക്കാര്‍ ആരംഭിക്കാനുദ്ദേശിക്കുന്ന എയിംസ് സാധ്യതാ പട്ടികയില്‍ ആലപ്പുഴയും. കോഴിക്കോട്, പാലക്കാട് ജില്ലകള്‍ക്ക് പുറമെയാണ് ആലപ്പുഴയും പരിഗണിക്കുന്നത്. കേന്ദ്രമന്ത്രിസഭയില്‍ കേരളത്തില്‍നിന്നുള്ള മന്ത്രിയാണ് എയിംസ് (ഓള്‍ ഇന്ത്യാ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ്) ആലപ്പുഴയില്‍ സ്ഥാപിക്കുന്നതിനായി ശ്രമിക്കുന്നത്. എയിംസ് സ്ഥാപിക്കുന്നത് ആലപ്പുഴ മേഖലയുടെ വികസനത്തിന് വഴിയൊരുക്കുമെന്നതാണ് പരിഗണിക്കുന്നതിന് ഒരു കാരണം. കൂടാതെ ആലപ്പുഴയില്‍ സ്ഥലവും ലഭ്യമാണ്. ആലപ്പുഴയില്‍ പൂട്ടിക്കിടക്കുന്ന ഗ്ലാസ് ഫാക്ടറിയുടെ ഭൂമിയാണ് എയിംസിനായി കണ്ടുവയ്ക്കുന്നത്. നിയമിച്ചു ഇതു സംബന്ധിച്ച് സംസ്ഥാന സര്‍ക്കാര്‍ പലവട്ടം കേന്ദ്ര സര്‍ക്കാരിനു കത്തു നല്‍കിയിരുന്നു. സ്‌പെഷല്‍ ഓഫിസറെയും നിയമിച്ചു. എന്നാല്‍, നടപടി മുന്നോട്ട് പോയില്ല. പിന്നീട് എയിംസ് പാലക്കാട് ജില്ലയില്‍ പരിഗണിക്കണമെന്ന അഭിപ്രായം ഉയര്‍ന്നു. ബിജെപി നേതൃത്വവും ഈ നിര്‍ദേശത്തെ അനൂകൂലിച്ചിരുന്നു. സ്ഥലം ലഭ്യമാണെന്നതാണ് പാലക്കാടിന്‍റെ അനൂകൂല ഘടകം. ചികിത്സാ സൗകര്യങ്ങളുടെ കുറവു പരിഹരിക്കാനും അതോടൊപ്പം പ്രദേശത്തിന്‍റെ വളര്‍ച്ചയ്ക്കും സഹായിക്കുമെന്ന് അഭിപ്രായവും ഉയര്‍ന്നു. ഇതിനിടെയാണ് ആലപ്പുഴ ജില്ലയും പരിഗണനയില്‍ വരുന്നത്. കേന്ദ്രമന്ത്രിതന്നെ രംഗത്തെത്തിയതോടെ കേന്ദ്ര സര്‍ക്കാര്‍ തീരുമാനം നിര്‍ണായകമായി. എല്ലാ സംസ്ഥാനത്തും എയിംസ് എന്നതാണ് കേന്ദ്ര സര്‍ക്കാര്‍ നിലപാട്. നിര്‍ദേശം ചികിത്സാപരമായും വികസനപരമായും പിന്നാക്കാവസ്ഥ പരിഹരിക്കുന്നതിനുള്ള നിര്‍ദേശം എന്ന നിലയിലാണ് ഇപ്പോള്‍ ആലപ്പുഴ പരിഗണിക്കുന്നത്. ഇതു സംബന്ധിച്ച് കേന്ദ്ര മന്ത്രിയുടെ നേതൃത്വത്തില്‍ കേന്ദ്ര സര്‍ക്കാരുമായും ആരോഗ്യ മേഖലയിലെ വിദഗ്ധരുമായും അഭിപ്രായ രൂപീകരണവും നടത്തിയിരുന്നു. ഇതോടെയാണ് ആലപ്പുഴ എയിംസ് ഭൂപടത്തിലേക്ക് എത്തുന്നത്. ദേശീയ പാതയുമായുള്ള അടുപ്പം, റെയില്‍ സൗകര്യം, നെടുമ്പാശേരി വിമാനത്താവളവുമായുള്ള സാമീപ്യം എന്നിവയും ആലപ്പുഴയുടെ അനുകൂല‌ഘടകങ്ങള്‍. അതേ സമയം വലിയതോതില്‍ അനുബന്ധ വികസന പ്രവര്‍ത്തനങ്ങള്‍ നടത്തേണ്ടി വരുമെന്ന ന്യൂനതയുമുണ്ട്. നിലവില്‍ വണ്ടാനത്താണ് മെഡിക്കല്‍ കോളജ് പ്രവര്‍ത്തിക്കുന്നത്. ആലപ്പുഴ നഗരത്തിന് 13 കിലോമീറ്റര്‍ അകലെയാണ് വണ്ടാനം. എയിംസ് സ്ഥാപിക്കാനുദ്ദേശിക്കുന്ന ഗ്ലാസ് ഫാക്ടറി നഗരത്തിന് സമീപത്താണ്.

കാട്ടുപന്നിശല്യത്തിന് അറുതിയില്ല; കർഷകർക്ക് ഉറക്കമില്ലാ രാത്രികൾ

ചാരുംമൂട്: കാട്ടുപന്നികൾ വ്യാപകമായി കൃഷി നശിപ്പിക്കുന്നത് അറുതിയില്ലാതെ തുടരുകയാണ്. കഴിഞ്ഞ ദിവസം രാത്രി പാലമേൽ, പയ്യനല്ലൂർ, ചുനക്കര ഭാഗങ്ങളിൽ കാട്ടുപന്നികൾ വ്യാപകമായി കൃഷി നശിപ്പിച്ചു. പാലമേൽ പഞ്ചായത്തിൽ പോലീസ് ഫയറിംഗ് ഗ്രൗണ്ടിലെ കാട്ടിൽ താവളമടിച്ച പന്നികൾ കൂട്ടത്തോടെ എത്തിയാണ് കൃഷി നശിപ്പിക്കുന്നത്. കനാലുകൾ വഴിയാണ് ഇവ പഞ്ചായത്തിന്‍റെ വിവിധ ഭാഗങ്ങളിലേക്ക് എത്തുന്നത്. രണ്ടേക്കറോളം സ്ഥലത്തെ കൃഷിയാണ് കഴിഞ്ഞ ദിവസം രാത്രി പാലമേൽ, മറ്റപ്പള്ളി, പയ്യനല്ലൂർ ഭാഗങ്ങളിലായി നശിപ്പിച്ചത്. ചുനക്കരയിലും കാർഷിക വിളകൾ വ്യാപകമായി നശിപ്പിച്ചു. വിളവെടുക്കാൻ പാകമായ കൃഷി സ്ഥലത്ത് കർഷകർ പന്നിയെ പ്രതിരോധിക്കുന്നതിനായി വൈദ്യുതി വിളക്കുകൾ സ്ഥാപിച്ചിരുന്നു. എന്നിട്ടും പ്രയോജനമുണ്ടായില്ല. പച്ചക്കറികളും വിളവെടുക്കാറായ ഏത്തവാഴകളും പന്നി വൻ തോതിൽ നശിപ്പിച്ചു. കൂടാതെ ഇവിടങ്ങളിലെ തെങ്ങിൻ തൈകളും നശിപ്പിച്ചു. കഴിഞ്ഞ ദിവസം വള്ളികുന്നത്ത് പട്ടാപകൽ കാട്ടുപന്നി ആറുപേരെ ആക്രമിക്കുകയും വ്യാപകമായി കൃഷി നശിപ്പിക്കുകയും ചെയ്തിരുന്നു. പന്നിശല്യത്തിനെതിരേ കൃഷി, വനംവകുപ്പ് ഉദ്യോഗസ്ഥർക്ക് നിരന്തരം പരാതി നൽകിയിട്ടും നടപടിയില്ലാത്തതിന്‍റെ പ്രതിഷേധത്തിലാണ് കർഷകർ. കാട്ടുപന്നി ആക്രമണത്തിൽ പരിക്കേൽക്കുന്നവർക്ക് ചികിത്സാസഹായം നൽകുമെന്നു വനംവകുപ്പ് പ്രഖ്യാപിച്ചിരുന്നെങ്കിലും പരിക്കേറ്റ ഒരാൾക്കുപോലും ധനസഹായം ലഭിച്ചിട്ടില്ല. കാട്ടുപന്നി നശിപ്പിക്കുന്ന കാർഷിക വിളകൾക്കു കൃഷിവകുപ്പിൽനിന്നു സഹായം ലഭിക്കുന്നുമില്ല . കാട്ടുപന്നി കൃഷി നശിപ്പിച്ചാൽ വനംവകുപ്പാണ് നഷ്ടപരി ഹാരം നൽകേണ്ടതെന്നാണ് കൃഷി വകുപ്പിൽനിന്നു പറയുന്നതെന്നാണ് കർഷകർ പറയുന്നത്. ഇൻഷ്വർ ചെയ്ത കാർഷികവിളകൾക്ക് മാത്രമാണ് സഹായധനം ലഭിക്കുന്നത്.

തേക്കുപാറ സെന്‍റ് മേരിസ് പള്ളി വെഞ്ചരിപ്പ് ഇന്ന്

തിരുവനന്തപുരം: തേക്കുപാറ സെന്‍റ് മേരിസ് പള്ളിയുടെ വെഞ്ചരിപ്പും മദ്ബഹാ കൂദാശാ തിരുക്കർമ്മങ്ങളും ഇന്നു നടക്കും. ഉച്ചക്ക് 2:30 നു ചങ്ങനാശേരി ആർച്ച്ബിഷപ് മാർ തോമസ് തറയിലിനു തേക്കുപാറ ഇടവകയിൽ കാനോനിക സ്വീകരണം നല്കും. തുടർന്നു മാർ തോമസ് തറയിൽ പള്ളി വെഞ്ചരിപ്പും മദ്ബഹാ കൂദാശാ തിരുക്കർമ്മങ്ങളും നിർവഹിക്കും. സ്നേഹവിരുന്നോടെ ചടങ്ങുകൾ സമാപിക്കും. ഇടവക വികാരി ഫാ.റ്റോണി നമ്പിശേരിക്കളം, കൈക്കാരൻമാരായ വിജയൻ ഊറ്റുകുഴി, സണ്ണി പാറയ്ക്കൽ തുടങ്ങിയവർ നേതൃത്വം നൽകും. തേക്കുപാറയിൽ കുടിയേറിയ വിശ്വാസികൾ അന്പൂരി പള്ളി‌യെയാണ് ആശ്രയിച്ചിരുന്നത്. എന്നാൽ 1961ൽ പരിശുദ്ധ കന്യകാമറിയത്തിന്‍റെ നാമത്തിൽ ഫാ. ജോസഫ് മാലിപറമ്പിൽ പള്ളി ആരംഭിച്ചു. 1965 ൽ തേക്കുപാറ ഒരു കുരിശ് പള്ളിയായി ഉയർത്തപ്പെട്ടു. 71ൽ തേക്കുപാറ സ്വതന്ത്ര ഇടവകയായിമാറി. മുതിയാവിള വല്യച്ചൻ എന്നു വിളിക്കപ്പെടുന്ന ബൽജിയംകാരനായ ഫാ.അദേയദാത്തൂസ് ഒസിഡി, ഫാ. ജോസഫ് മാലിപ്പറമ്പിൽ, ഫാ. ലുഷ്യസ് സിഎംഐ, ദേവാലയം പുനഃ നിർമ്മിച്ച ഫാ.റ്റോണി നമ്പിശേരികളം എന്നീ വൈദികരുടെ പ്രവർത്തനമാണ് ദേവാലയത്തിനു പിന്നിലുള്ളത്.

പെരുമ്പളം ദ്വീപ് നിവാസികളുടെ യാത്രാ സ്വപ്നം പൂവണിയുന്നു

പൂച്ചാക്കൽ: പെരുമ്പളം പാലം പൂർത്തീകരണത്തിലേക്കു കടക്കുന്ന ഘട്ടത്തിൽ ഇവിടെനിന്ന് ആരംഭിക്കാൻ ഉദ്ദേശിക്കുന്ന കെഎസ്ആർടിസി ബസ് സർവീസുകളുമായി ബന്ധപ്പെട്ട് ദ്വീപിൽ ബസ് എത്തിച്ച് ട്രയൽ റൺ നടത്തി. പെരുമ്പളം പാലം ഉദ്ഘാടനത്തോടനുബന്ധിച്ച് ദ്വീപുമായി ബന്ധിപ്പിച്ച് അന്തർ സംസ്ഥാന, ദീർഘദൂര കെഎസ്ആർടിസി ബസ് സർവീസുകൾ തുടങ്ങാൻ നടപടി. ഗതാഗതമന്ത്രിയുടെ നിർദേശപ്രകാരം ദലീമ ജോജോ എംഎൽഎയോടൊപ്പം കെഎസ്ആർടിസി എറണാകുളം സോണൽ ഓഫീസറുടെ നേതൃത്വത്തിൽ ഉന്നത ഉദ്യോഗസ്ഥർ പെരുമ്പളം ദ്വീപ് സന്ദർശിച്ചു. പഞ്ചായത്ത് പ്രസിഡന്‍റ് അഡ്വ.വി.വി. ആശ, ചേർത്തല ഡിപ്പോ അസിസ്റ്റന്‍റ് ട്രാൻസ്പോർട്ട് ഓഫീസർ എ. അജിത്ത്, ജനറൽ കൺട്രോളിംഗ് ഇൻസ്പെക്ടർ ആർ. രഞ്ജിത്ത് എന്നിവരുടെ നേതൃത്വത്തിൽ ആണ് ട്രയൽ റൺ പൂർത്തിയാക്കിയത്. ജങ്കാർ മാർഗമാണ് ദ്വീപിലെക്കു കെഎസ്ആർടിസി ബസ് എത്തിച്ചത്. ജനപ്രതിനിധികൾ അടക്കം നിരവധി പേരാണ് ബസിനെ വരവേറ്റത്. ഇരുകരകളിലെയും അപ്രോച്ച് റോഡിന്‍റെ നിർമാണം പൂർത്തീകരിച്ച് ഏപ്രിൽ ആദ്യവാരം പാലം ഉദ്ഘാടനം ചെയ്യുന്നതിനാണ് നീക്കം.

വേനല്‍ മഴയിൽ നൂറനാട് കരിങ്ങാലി പുഞ്ചയിലെ നെല്‍കൃഷിക്കു നാശം

ചാരുംമൂട്: വേനല്‍മഴയും കാറ്റും നെൽകര്‍ഷകരെ പ്രതിസന്ധിയിലാക്കി. നൂറനാട് പഞ്ചായത്തിലെ കരിങ്ങാലി പുഞ്ചയിലെ നെല്‍ച്ചെടികള്‍ കാറ്റില്‍ നിലംപൊ ത്തി. പുഞ്ചയിലെ പള്ളിമുക്കം, പാറ്റൂര്‍, നൂറുകോടി, ആമ്പടകം, കാര്യോട് പാടശേഖരങ്ങളിലെ മുന്നൂറോളം ഏക്കര്‍ നെല്‍ക്കൃഷിയാണ് നശിച്ചത്. ഏപ്രില്‍ അവസാനം കൊയ്ത്തു തുടങ്ങാനിരുന്നതാണ്. പുഞ്ചയില്‍ വരിനെല്ല് കിളിര്‍ത്തുനിന്നിരുന്നതിനാല്‍ വളരെ ബുദ്ധിമുട്ടിയാണ് കര്‍ഷകര്‍ കൃഷിയിറക്കിയത്. ടില്ലര്‍ കൊണ്ടുവന്ന് നിലമൊരുക്കി വരിനെല്ലിനെ നശിപ്പിച്ചശേഷമാണ് കൃഷി തുടങ്ങാനായത്. അപ്പോഴേക്കും നവംബറില്‍ നടക്കേണ്ട കൃഷിയിറക്ക് ഒരുമാസം വൈകി. കൃഷിയിറക്കി ഒരുമാസം കഴിഞ്ഞപ്പോഴേക്കും വീണ്ടും വരിനെല്ല് കിളിര്‍ത്തു. നെല്ലിനൊപ്പം വന്‍തോതില്‍ വരിനെല്ലുകൂടി കിളിർത്തുവന്നതോടെ വിളവു കിട്ടുമോയെന്ന കാര്യത്തില്‍ കര്‍ഷകര്‍ ആശങ്കയിലായിരുന്നു. അതിനിടെയാണ് ഇപ്പോള്‍ കാറ്റില്‍ വരിനെല്ലടക്കം ഒടിഞ്ഞ് നെല്‍ച്ചെടികളുടെ മുകളിലേക്കു വീണത്. പള്ളിമുക്കം-ഏലിയാസ് നഗര്‍ ബണ്ടിന് ഉയരമില്ലാത്തതിനാല്‍ മഴപെയ്ത് പുഞ്ചയില്‍ വെള്ളം കൂടുമ്പോള്‍ കൃഷിസ്ഥലങ്ങിലേക്കും വെള്ളം കയറും. ബണ്ടിന്‍റെ എല്ലാഭാഗവും അരമീറ്റര്‍ കൂടി പൊക്കണമെന്ന കര്‍ഷകരുടെ ആവശ്യം കൃഷിവകുപ്പ് പരിഗണിച്ചിട്ടില്ല. ഓരോ മഴ പെയ്യുമ്പോഴും കര്‍ഷകരുടെ നെഞ്ചില്‍ തീയാണ്. ബണ്ടിലെ മടവീഴാന്‍ സാധ്യതയുള്ള സ്ഥലങ്ങളില്‍മാത്രം മണ്ണിട്ടുപൊക്കുന്ന ജോലി നടന്നുവരുന്നുണ്ട്. കരിങ്ങാലി പുഞ്ചയില്‍ എല്ലാവര്‍ഷവും പ്രതീക്ഷയോടെ കഷ്ടപ്പെട്ട് കൃഷി നടത്തുന്ന കര്‍ഷകര്‍ക്കു കിട്ടുന്നത് വന്‍നഷ്ടമാണ്. കഴിഞ്ഞവര്‍ഷവും പാടശേഖരത്തിലെ കൊയ്ത്തു കഴിഞ്ഞപ്പോള്‍ പലകര്‍ഷകര്‍ക്കും കിട്ടിയത് പ്രതീക്ഷിച്ചതിന്‍റെ പകുതി നെല്ലു മാത്രം. അന്നും വരിനെല്ല് കൃഷിക്ക് അന്തകനായി. നെല്ലിനോടൊപ്പം വളര്‍ന്നുവരുന്ന വരിനെല്ലിനെ നശിപ്പിക്കാന്‍ മരുന്നില്ല. പുഞ്ചയില്‍ വരിനെല്ല് നിറഞ്ഞതോടെ യഥാര്‍ഥ നെല്ല് കൊയ്‌തെടുക്കാന്‍ ബുദ്ധിമുട്ടായിരുന്നു. വരിനെല്ലിനെ ശാശ്വതമായി നശിപ്പിക്കാന്‍ മാര്‍ഗമില്ലാത്തതുകൊണ്ട് കൂടുതല്‍ പ്രദേശത്തേക്കിത് വ്യാപിച്ചിരിക്കുകയാണ്. കഴിഞ്ഞ സീസണിലെ നെല്‍ക്കൃഷിയെത്തുടര്‍ന്നുണ്ടായ നഷ്ടത്തില്‍നിന്നു കരകയറാനാകാതെ ഇരിക്കുമ്പോഴാണ് വേനല്‍മഴയും കാറ്റും മൂലം ഇപ്രാവശ്യം കൃഷിനാശമുണ്ടായത്. കരിങ്ങാലി പുഞ്ചയിലെ വരിനെല്ലിനെ ശാശ്വതമായി നശിപ്പിക്കാന്‍ ശാസ്ത്രീയമായ നടപടി വേണം. പുഞ്ചയിലെ ള്ളിമുക്കം-ഏലിയാസ് നഗര്‍ ബണ്ടിന്റെ ഉയരം മണ്ണിട്ട് അര മീറ്റര്‍ കൂടി ഉയര്‍ത്തണം. ശക്തമായ മഴ പെയ്യുമ്പോള്‍ പുഞ്ചയില്‍ വെള്ളം കയറും. ഇതു കൃഷിയിറക്കിനെയും കൊയ്ത്തിനെയും ബാധിക്കുന്നു. പുഞ്ചയിലേക്കുള്ള വെള്ളത്തിന്‍റെ ഊറ്റല്‍ കുറയ്ക്കുന്നതിനായി പുഞ്ചയുടെ മുകള്‍ഭാഗത്തു കൂടിയുള്ള കെഐപി കനാലില്‍ സിമന്‍റ് പ്ലാസ്റ്ററിംഗ് ചെയ്യണം. കൃഷി മന്ത്രിക്കു പരാതി കൊടുത്തിട്ടും പ്രയോജനമുണ്ടായിട്ടില്ലെന്ന് പാടശേഖര സമിതി പറഞ്ഞു.

മുഖ്യമന്ത്രിയുടെ സുരക്ഷയുടെ പേരിൽ വ്യാപാരികളെ ദുരിതത്തിലാക്കിയെന്ന്

ആലപ്പുഴ: സംസ്ഥാനത്തിന്‍റെ വിവിധ ഭാഗങ്ങളിൽനിന്നെത്തിയ പ്രതിനിധികളെയും പ്രവർത്തകരെയും സാക്ഷിയാക്കി മുഖ്യമന്ത്രി കെപിഎംഎസ് സംസ്ഥാന സമ്മേളനം ഇന്നലെ വൈകിട്ട് ആലപ്പുഴ ബീച്ചിൽ ഉദ്ഘാടനം ചെയ്തു. അതിനിടെ മുഖ്യമന്ത്രിയുടെ സുരക്ഷയുടെ പേരില്‍ പോലീസ് സാധാരണക്കാരായ വ്യാപാരികളെ ദുരിതത്തിലാക്കിയെന്ന് പരാതി. ആലപ്പുഴ ബീച്ചില്‍ നടന്ന കെപിഎംഎസ് സംസ്ഥാന സമ്മേളനത്തിൽ മുഖ്യമന്ത്രിയെത്തിയപ്പോൾ വലിയ പ്രതീക്ഷയോടെയാണ് വ്യാപാരികള്‍ കണ്ടിരുന്നത്. അതിനായി പണം കടം വാങ്ങി വന്‍തോതില്‍ സാധനങ്ങള്‍ വാങ്ങി ക്കൂട്ടുകയും ചെയ്തിരുന്നു. എന്നാല്‍, മുഖ്യമന്ത്രിയുടെ സുരക്ഷയുടെ പേരില്‍ വ്യാപാരസ്ഥാപനങ്ങള്‍ തുറക്കാന്‍ പാടില്ലെന്ന് പോലീസിന്‍റെ നോട്ടീസ് നൂറുകണക്കിന് വ്യാപാരികളെയാണ് കടക്കെണിയിലാക്കിയതെന്നാണ് ആക്ഷേപം. വ്യാപാരികള്‍ക്കുണ്ടായ ഭീമമായ നഷ്ടം നികത്താന്‍ സര്‍ക്കാര്‍ അടിയന്തര സഹായം നല്‍കണമെന്നും അദ്ദേഹം ആവശ്യപ്പെട്ടു. മുഖ്യമത്രിയുടെ സന്ദർശനത്തിന്‍റെ പേരിൽ അങ്ങനെയൊരു വിലക്ക് ഉണ്ടായിരുന്നില്ലെന്നാണ് പോലീസ് ഭാഷ്യം.

ആംബുലന്‍സുകളുടെ ചാര്‍ജ് തോന്നിയപടി; വലഞ്ഞ് രോഗികള്‍

തുറവൂര്‍: ആംബുലന്‍സുകള്‍ അമിത ചാര്‍ജ് വാങ്ങുന്നതായി ആരോപണം. തുറവൂര്‍, ചേര്‍ത്തല ആശുപത്രികളില്‍നിന്ന് സര്‍വീസ് നടത്തുന്ന ആംബുലന്‍സുകള്‍ക്കെതിരേയാണ് ആരോപണം ഉയര്‍ന്നിരിക്കുന്നത്. മെഡിക്കല്‍ കോളജിലേക്ക് റഫര്‍ ചെയ്യുന്ന രോഗികളാണ് ഇവരുടെ ഇരയാകുന്നത്. രണ്ട് താലൂക്ക് ആശുപത്രിയും കേന്ദ്രീകരിച്ച് നിരവധി ആംബുലന്‍സുകളാണ് സര്‍വീസ് നടത്തുന്നത്. ഇവയില്‍ ചില ആംബുലന്‍സ് ഡ്രൈവര്‍മാരാണ് രോഗികളുടെ ബന്ധുക്കളില്‍നിന്ന് അമിതചാര്‍ജ് ഈടാക്കുന്നത്. തുറവൂര്‍ താലൂക്ക് ആശുപത്രിയില്‍നിന്ന് കോട്ടയം മെഡിക്കല്‍ കോളജിലേക്ക് റഫര്‍ ചെയ്യുന്ന രോഗികളില്‍നിന്ന് ചില ആംബുലന്‍സ് ഡ്രൈവര്‍മാര്‍ 1600 രൂപ വാങ്ങുമ്പോള്‍ ചിലര്‍ 2000 രൂപയും ചിലര്‍ 2500 രൂപയും ചിലര്‍ 2800 രൂപയും ചിലര്‍ 3000 രൂപയും വാങ്ങുന്നതായാണ് പരാതി ഉയര്‍ന്നിരിക്കുന്നത്. ഇതേരീതിയില്‍ തന്നെയാണ് എറണാകുളം ജനറല്‍ ആശുപത്രിയിലേക്കും വണ്ടാനം മെഡിക്കല്‍ കോളജ് ആശുപത്രിയിലേക്കും റഫര്‍ ചെയ്യുന്ന രോഗികളുടെ ബന്ധുക്കളില്‍ നിന്നും വാങ്ങുന്നത്. കൂടാതെ ചില ആംബുലന്‍സ് ഡ്രൈവര്‍മാര്‍ താലൂക്ക് ആശുപത്രിയില്‍നിന്ന് എറണാകുളം ജനറല്‍ ആശുപത്രി, കോട്ടയം മെഡിക്കല്‍ കോളജ്, വണ്ടാനം മെഡിക്കല്‍ കോളജ് എന്നിവിടങ്ങ ളിലേക്ക് റഫര്‍ ചെയ്യുന്ന രോഗികളെ അവിടേക്ക് കൊണ്ടുപോകാതെ രോഗികളുടെ ബന്ധുക്കളെ നിർബന്ധിച്ച് സ്വകാര്യ ആശുപത്രിയിലേക്ക് കൊണ്ടുപോകുന്നതും നിത്യസംഭവമാണെന്നു പരാതിയുണ്ട്. സാധാരണക്കാരായ രോഗികളെ ഇത് വളരെയധികം ബുദ്ധിമുട്ടിപ്പിക്കുന്ന സാഹചര്യമാണ്. എല്ലാ സര്‍ക്കാര്‍ ആശുപത്രിയുടെ മുന്നിലും ആംബുലന്‍സുകളുടെ ചാര്‍ജ് എഴുതി പ്രദര്‍ശിപ്പിച്ചിട്ടുണ്ടെങ്കിലും അത് ബോര്‍ഡില്‍ മാത്രം ഒതുങ്ങുന്ന ഒന്നായി മാറിയിരിക്കുകയാണ്. 108 ആംബുലന്‍സ് സര്‍വീസ് സൗജന്യമാണെങ്കിലും രോഗികളുടെ അത്യാവശ്യത്തിന് 108 ആംബുലന്‍സുകളുടെ സേവനം ലഭ്യമാകാത്ത അവസ്ഥയാണെന്നും ആരോപണമുണ്ട്. ജനങ്ങളുടെ സേവനത്തിനു വേണ്ടിയുള്ള ആംബുലന്‍സുകള്‍ക്ക് സര്‍ക്കാരില്‍നിന്ന് ഫീസ് ഇളവുകള്‍ ലഭിക്കുമ്പോഴും രോഗികളെ പിഴിഞ്ഞ് കാശുണ്ടാക്കുന്ന ബിസിനസ് ആയിട്ടാണ് ചില ആംബുലന്‍സ് ഡ്രൈവര്‍മാര്‍ ഇതിനെ കാണുന്നതെന്നും ആരോപണമുണ്ട്. പ്രൈവറ്റ് ആംബുലന്‍സ് സര്‍വീസ് അമിത ചാര്‍ജ് ഈടാക്കുന്നതിനെതിരേ ശക്തമായ നടപടി സ്വീകരിക്കണമെന്ന ആവശ്യമുയരുന്നു.

ഭാര്യയെ ശ്വാസംമുട്ടിച്ച് കൊലപ്പെടുത്തിയ ഭർത്താവ് അറസ്റ്റിൽ: കുടുംബപ്രശ്നമെന്ന് പോലീസ്

ചേർത്തല: കുടുംബ പ്രശ്നത്തെത്തുടർന്ന് ഭാര്യയെ കൊലപ്പെടുത്തിയ ഭർത്താവ് അറസ്റ്റിൽ. ചേർത്തല കടക്കരപ്പള്ളി കൊട്ടാരം ഹരിതശ്രീയിൽ ഹരിദാസ് പണിക്കരുടെ ഭാര്യ സുമി (58) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഭര്‍ത്താവ് ഹരിദാസ് പണിക്കരെ (62) പട്ടണക്കാട് പോലീസ് കസ്റ്റഡിയിലെടുത്തു. ബുധനാഴ്ച പുലർച്ച 1.15നാണ് സുമി ദുരൂഹസാഹചര്യത്തിൽ മരിച്ചത്. സംഭവത്തിനുശേഷം ഹരിദാസ് അടുത്തവീട്ടിൽ പോയി സുമിക്ക് അനക്കമില്ലെന്നും മരിച്ചുപോയെന്നും പറഞ്ഞു. ഇതറിഞ്ഞ നാട്ടുകാര്‍ എത്തുമ്പോൾ സുമി മൂക്കിൽനിന്നു രക്തം വാർന്നനിലയിൽ സോഫയിൽ ചാരിക്കിടക്കുന്ന നിലയിലാണ് കണ്ടെത്തിയത്. ഉടനെ ആശുപത്രിയിൽകൊണ്ടു പോകണമെന്ന് പറഞ്ഞെങ്കിലും ഹരിദാസ് കൂട്ടാക്കിയില്ല. രാവിലെ സംസ്കാര നടപടികൾ തുടരുന്ന സാഹചര്യത്തിൽ പരിസരവാസികൾ അറിയിച്ചതനുസരിച്ച് പട്ടണക്കാട് പോലീസ് സ്ഥലത്തെത്തി മൃതദേഹം പോസ്റ്റ്മോർട്ടം ചെയ്യണമെന്നാവശ്യപ്പെടുകയായിരുന്നു. ഇൻക്വസ്റ്റ് നടപടികളിൽ സുമിയെ ദേഹോപദ്രവം ഏൽപ്പിച്ചിട്ടുണ്ടെന്നും ശ്വാസം മുട്ടിച്ചാണ് കൊലപ്പെടുത്തിയതെന്നും പ്രാഥമിക അന്വഷണത്തിൽ കണ്ടെത്തി. തുടർന്ന് പോലീസ് സർജന്‍റെ നേതൃത്വത്തിൽ ആലപ്പുഴ വണ്ടാനം മെഡിക്കൽ കോളജിൽ പോസ്റ്റ് മോർട്ടത്തിനുശേഷം രാത്രി വീട്ടുവളപ്പിൽ സംസ്കരിച്ചു. തുടർന്ന് ഹരിദാസിനെ പട്ടണക്കാട് പോലീസ് കസ്റ്റഡിയിലെടുക്കുകയായിരുന്നു. ഇരുവരും തമ്മിലുണ്ടായ വഴക്കിനിടെ സുമിയെ ശ്വാസം മുട്ടിച്ച് കൊലപ്പെടുത്തിയെന്ന് പോലീസിനോട് ഹരിദാസ് സമ്മതിച്ചു. സുമി വർഷങ്ങളായി മാനസിക വിഭ്രാന്തിക്ക് മരുന്നു കഴിക്കുന്നുണ്ടെന്നും എല്ലാ ദിവസവും ഇരുവരും തമ്മില്‍ വഴക്കിടാറുണ്ടെന്നും സഹിക്കെട്ടാണ് കൊലപ്പെടുത്തിയതെന്നും ഹരിദാസ് പോലീസിനോട് പറഞ്ഞു. പെരുമ്പളം സ്വദേശിയായ ഹരിദാസ് മിലിട്ടറിയിലെ സേവനത്തിനുശേഷം അഞ്ചു വർഷത്തോളമായി കടക്കരപ്പള്ളിയിൽ താമസമാക്കിയിട്ട്. വീടിനു സമീപമുള്ള കൊട്ടാരം ശ്രീധർമക്ഷേത്രത്തിലെ കണക്കെഴുത്തുകാരനായി ജോലി ചെയ്യുകയാണ്. ആദ്യഭാര്യയുടെ മരണത്തിനുശേഷമാണ് സുമിയെ വിവാഹം കഴിക്കുന്നത്. ആദ്യഭാര്യയിൽ രണ്ടു മക്കൾ ഉള്ളത് മുംബൈയിലാണ്. സുമിയിൽ മക്കളില്ല. ഇന്നലെ വൈകുന്നേരം പട്ടണക്കാട് പോലീസ് ഇയാളെ സംഭവസ്ഥലത്തെത്തിച്ച് തെളിവെടുപ്പ് നടത്തി. തെളിവെടുപ്പ് പൂര്‍ത്തിയാക്കിയതിനുശേഷം ഇന്നു കോടതിയില്‍ ഹാജരാക്കും.

വെള്ളാപ്പള്ളി നടേശന് ഇന്ന് ആദരം

ചേർത്തല: എസ്എൻഡിപി യോഗം നേതൃത്വത്തിൽ മൂന്നു പതിറ്റാണ്ട് പൂർത്തിയാക്കുന്ന ജനറൽ സെക്രട്ടറി വെള്ളാപ്പള്ളി നടേശന് ആദരവൊരുക്കാൻ ചേർത്തല യൂണിയൻ സംഘടിപ്പിക്കുന്ന മഹാസംഗമം ഇന്ന് ചേർത്തല ശ്രീനാരായണ മെമ്മോറിയൽ ഗവ. ഹയർ സെക്കൻഡറി സ്‌കൂൾ മൈതാനിയിൽ നടക്കും. വൈകുന്നേരം നാലിന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. എസ്എൻ ട്രസ്റ്റ് ബോർഡ് അംഗം പ്രീതി നടേശൻ ദീപപ്രകാശനം നടത്തും. 90 കുട്ടികൾ ചേർന്ന് ദൈവദശകം ആലപിക്കും. ചടങ്ങിൽ വെള്ളാപ്പള്ളി നടേശനെ മുഖ്യമന്ത്രി ആദരിക്കും. മന്ത്രി പി. പ്രസാദ് അധ്യക്ഷത വഹിക്കും. ഒരു വീട്ടിൽ ഒരു വ്യവസായം പദ്ധതി മന്ത്രി പി. രാജീവ് ഉദ്ഘാടനം ചെയ്യും. മന്ത്രി വി.എൻ. വാസവൻ ഗുരുസന്ദേശം നൽകും. മന്ത്രി സജി ചെറിയാൻ മുഖ്യപ്രഭാഷണം നടത്തും. തുഷാർ വെള്ളാപ്പള്ളി സംഘടനാസന്ദേശം നൽകും. സിപിഎം ജില്ലാ സെക്രട്ടറി ആർ. നാസർ, യുഡിഎഫ് ജില്ലാ കൺവീനർ സി.കെ. ഷാജിമോഹൻ, ബിജെപി ജില്ലാ പ്രസിഡന്‍റ് പി.കെ. ബിനോയ്, ബിഡിജെഎസ് സംസ്ഥാന ജനറൽ സെക്രട്ടറി പി.എസ്. ജ്യോതിസ്, കെ.പി. നടരാജൻ, പി.ഡി. ഗഗാറിൻ എന്നിവർ പ്രസംഗിക്കും. ആയിരങ്ങളെ ഉൾക്കൊള്ളാനാകുന്ന കൂറ്റൽ പന്തലിലാണ് സംഗമവേദി നടക്കുന്നത്. കലാസാഹിത്യ–കായിക മത്സരങ്ങൾ, മെഗാതിരുവാതിര, ചരിത്രസെമിനാർ, വിളംബരഘോഷയാത്ര എന്നിവ നടക്കും.

ഡ്രൈ ഡേ ഉപേക്ഷിക്കാനുള്ള സർക്കാർ തീരുമാനം മദ്യലോബിക്കു വേണ്ടി: കൊടിക്കുന്നിൽ സുരേഷ്

മാവേലിക്കര: ഡ്രൈ ഡേ ഉപേക്ഷിക്കാനും കൂടുതൽ ബാറുകൾക്ക് അനുമതി നൽകാനും പുതിയ ബ്രൂവറികൾക്ക് ലൈസൻസ് അനുവദിക്കാനും സംസ്ഥാന സർക്കാർ എടുത്ത നടപടികൾ മദ്യലോബിയെ സഹായിക്കാനാണെന്ന് കെപിസിസി വർക്കിംഗ് പ്രസിഡന്‍റ് കൊടിക്കുന്നിൽ സുരേഷ് എംപി പറഞ്ഞു. മദ്യലോബിയുടെ സമ്മർദത്തിനും സാമ്പത്തിക ഇടപാടുകൾക്കും വഴങ്ങിയുള്ള സർക്കാർ തീരുമാനം പ്രതിഷേധാർഹമാണ്. മദ്യവിരുദ്ധ സമിതികൾ, സാമൂഹിക പ്രവർത്തകർ, സന്നദ്ധ സംഘടനകൾ തുടങ്ങി സമൂഹം ഒന്നടങ്കം ശക്തമായി എതിർത്ത നടപടിയെയാണ് സർക്കാർ മുന്നോട്ടുകൊണ്ടുപോകുന്നത്. നികുതി ലക്ഷ്യം വച്ച് ഇത്തരം തീരുമാനം കൈക്കൊണ്ടതിൽ നിന്നു കൈക്കൂലി ഇടപാടുകൾ പോലും സംശയിക്കപ്പെടുന്നുണ്ടെന്ന് കൊടിക്കുന്നിൽ ആരോപിച്ചു. ഡ്രൈ ഡേ ഉപേക്ഷിക്കേണ്ട യാതൊരു സാഹചര്യവുമില്ല. ഇത് ആഗോള മദ്യകമ്പനികൾക്കും പ്രാദേശിക ബാറുടമകൾക്കും വേണ്ടിയുള്ള സർക്കാർ കൂട്ടുകച്ചവടമാണ്, ഇക്കാര്യത്തിൽ നിയമപരവും ജനാധിപത്യപരവുമായ നിരീക്ഷണവും രാഷ്ട്രീയ പ്രതിഷേധവുമുണ്ടാകുമെന്ന് കൊടിക്കുന്നിൽ സുരേഷ് എംപി പറഞ്ഞു.

നെഹ്റു ട്രോഫി: തീയതിമാറ്റം പരിഗണനയിൽ

ആലപ്പുഴ: നെഹ്‌റുട്രോഫി വള്ളംകളി ഓഗസ്റ്റ് 30ന് നടത്താന്‍ സംഘാടകസമിതിയായ നെഹ്‌റു ട്രോഫി ബോട്ട് റേസ് (എന്‍ടിബിആര്‍) സൊസൈറ്റി എക്‌സിക്യൂട്ടീവ് കമ്മിറ്റിയില്‍ ധാരണ. ജില്ലയിലെ എംപിമാരെയും എംഎല്‍എമാരെയും ടൂറിസം വകുപ്പിനെയും ഇക്കാര്യം അറിയിച്ച് അനുമതി വാങ്ങാന്‍ സൊസൈറ്റി ചെയര്‍മാന്‍ കൂടിയായ കളക്ടര്‍ അലക്‌സ് വര്‍ഗീസിനെ ചുമതലപ്പെടുത്തി. ഈ തീയതിയില്‍ അസൗകര്യമുണ്ടെങ്കില്‍ ഓഗസ്റ്റ് 23നു നടത്താനും ആലോചനയുണ്ട്. 1954ല്‍ ആരംഭിച്ച കാലം മുതല്‍ ഓഗസ്റ്റിലെ രണ്ടാം ശനിയാഴ്ച നടത്തിയിരുന്ന വള്ളംകളിയാണു പുതിയ തീയതിയിലേക്ക് മാറ്റുന്നത്. പ്രളയം കാരണം 2018, 19 വര്‍ഷങ്ങളിലും കോവിഡ് കാരണം 2022ലും ഓഗസ്റ്റ് രണ്ടാം ശനിയാഴ്ച വള്ളംകളി നടന്നിരുന്നില്ല. ചൂരല്‍മല ഉരുള്‍പൊട്ടല്‍ ദുരന്തത്തിന്‍റെ ദുഃഖാചരണം മൂലമാണു കഴിഞ്ഞവര്‍ഷം തീയതി മാറ്റിയത്. ഓഗസ്റ്റില്‍ മഴയും പ്രകൃതിക്ഷോഭങ്ങളും പതിവാണെന്നും അതിനാല്‍ വള്ളംകളി തീയതി മാറ്റണമെന്നും ആവശ്യം ഉയര്‍ന്നിരുന്നു. ഇതാണു പരിഗണിച്ചത്. അതേസമയം, രാജ്യാന്തര ടൂറിസം കലണ്ടറില്‍ ഓഗസ്റ്റ് രണ്ടാം ശനിയാഴ്ചയിലെ നെഹ്‌റു ട്രോഫി വള്ളംകളി ഇടം പിടിച്ചതാണെന്നും മാറ്റരുതെന്നും വാദം ഉയര്‍ന്നു. പുതിയ തീയതി രാജ്യാന്തര തലത്തില്‍ ശ്രദ്ധിക്കപ്പെടുന്ന തരത്തില്‍ ആസൂത്രണം ചെയ്താല്‍ മതിയെന്ന വാദവുമുണ്ടായി. ഓണത്തിനു മുന്‍പാണു വള്ളംകളിയെന്നതിനാല്‍ പരസ്യവരുമാനം കുറയില്ലെന്നും പരമാവധി പരസ്യം, ടിക്കറ്റ് വരുമാനം ഉറപ്പാക്കണമെന്നും നിര്‍ദേശമുയര്‍ന്നു. തര്‍ക്കം ഒഴിവാക്കണം പരാതികള്‍ ഒഴിവാക്കാന്‍ സ്റ്റില്‍ സ്റ്റാര്‍ട്ട് സംവിധാനം മികച്ചതാക്കണം. വിജയികളെ പ്രഖ്യാപിക്കുന്നതിലും തര്‍ക്കങ്ങളില്‍ തീര്‍പ്പു കല്‍പ്പിക്കുന്നതിലും നടപടി സംബന്ധിച്ചു ധാരണയുണ്ടാക്കണം എന്നീ നിര്‍ദേശം ഉയര്‍ന്നു. ബോണസ് വിതരണം വൈകരുത്. വള്ളംകളിക്കു മുന്‍പായി സര്‍ക്കാര്‍ ഗ്രാന്‍റ് ലഭ്യമാക്കിയാല്‍ വള്ളംകളിയുടെ അന്നുതന്നെ ബോണസ് നല്‍കാനാകും. വള്ളംകളി സെപ്റ്റംബര്‍ 27നാണെന്നു പ്രചരിപ്പിച്ചവര്‍ക്കെതിരേ നടപടി വേണമെന്ന നിര്‍ദേശവുമുണ്ടായി.

ജില്ലാ ജനറൽ ആശുപത്രിയിൽ നിയമ സഹായ ക്ലിനിക് പുതിയ കെട്ടിട്ടത്തിൽ തുടങ്ങി

ആലപ്പുഴ: ജനറൽ ആശുപത്രി ആലപ്പുഴയിൽ സൗജന്യ നിയമ സഹായ ക്ലിനിക് പുതിയ കെട്ടിടത്തിലെ താഴത്തെ നിലയിൽ പ്രവർത്തനം തുടങ്ങി. ജില്ലാ ജഡ്ജും കെഎൽഎസ്എ മെം ബർ സെക്രട്ടറിയുമായ ഡോ. സി.എസ്. മോഹിത് ഉദ്ഘാടനം ചെയ്തു. ജനറൽ ആശുപത്രി ഡെപ്യൂട്ടി സൂപ്രണ്ട് ഡോ. കെ. വേണുഗോപാൽ അധ്യക്ഷത വഹിച്ചു. ഡിഎൽഎസ്എ സെക്രട്ടറി പ്രമോദ് മുരളി മുഖ്യാതിഥിയായി. ആർഎംഒ ഡോ. ആശ എം, ലേ സെക്രട്ടറി ടി. സാബു, നഴ് സിംഗ് സൂപ്രണ്ട് ദീപാ റാണി, ഭൂമിക കോ-ഓർഡിനേറ്റർ നാൻസി ജോസഫ് തുടങ്ങിയവർ പ്ര സം ഗിച്ചു. എല്ലാമാസവും ആദ്യത്തെയും അവസാനത്തെയും ബുധനാഴ്ചകളിലാണ് ഓഫീസ് പ്രവർത്തിക്കുക. ഒരു അഭിഭാഷകനും ഒരു പാരാലീഗൽ വോളണ്ടിയറും ഈ ദിവസങ്ങളിൽ ഉണ്ടാകും. സൗജന്യ നിയമ ഉപദേശം, നിയമസഹായം, പരാതികൾ, ഹർജികൾ എന്നിവ തയാറാക്കുന്നതിനും സ്വീകരിക്കുന്നതിനുമുള്ള സഹായം, നിയമബോധവത്കരണപ്രവർത്തനങ്ങൾ, നിയമസേവന സ്ഥാപനങ്ങളുടെ വ്യവസ്ഥകളെക്കുറിച്ചുള്ള വിവരങ്ങൾ, പരാതികൾ, തർക്കങ്ങൾ തുടങ്ങിയവയുടെ സമയബന്ധിതമായ പരിഹാരവും തുടർ നടപടിക്രമങ്ങളും ഇവിടെ നിന്നും ലഭ്യമാകും.

ചാരുംമൂട് ജംഗ്‌ഷനിൽ പൊതുശുചിമുറികളില്ല, ലക്ഷങ്ങൾ പൊടിച്ച ഇ-ടോയ്‌ലറ്റ് പ്രവർത്തനരഹിതം

ചാരുംമൂട്: കായംകുളം -പുനലൂർ കെപി റോഡും കൊല്ലം-തേനി ദേശീയപാതയും സംഗമിക്കുന്ന തിരക്കേറിയ ചാരുംമൂട് ജംഗ്‌ഷനിൽ പൊതുശുചിമുറികൾ ഇല്ലാത്തതിനാൽ യാത്രക്കാർ ദുരിതത്തിൽ. വിവിധ സ്ഥലങ്ങളിൽനിന്നു നൂറുകണക്കിന് യാത്രക്കാരാണ് ദിനംപ്രതി ജംഗ്‌ഷനിൽ വന്നുപോകുന്നത്. ഇതിൽ കൂടുതലും സ്ത്രീകളാണ്. പ്രാഥമിക ആവശ്യം നിറവേറ്റാൻ സംവിധാനം ഏർപ്പെടുത്താത്തതിനാൽ സ്ത്രീകൾ ഉൾപ്പെടെ വലയുകയാണ്. നിലവിൽ പലരും നിർവാഹമില്ലാതെ വരുമ്പോൾ ചാരുംമൂട് ജംഗ്‌ഷനിലുള്ള ഹോട്ടലുകളിലെ ശുചിമുറികളെ ആശ്രയിക്കുകയാണ്. ഇ- ടോയ്‌ലറ്റുണ്ട് പക്ഷേ, ജനങ്ങൾക്ക് പ്രയോജനമില്ലെന്ന് മാത്രം. ലക്ഷങ്ങൾ മുടക്കി നിർമിച്ച ഇത് പ്രവർത്തനരഹിതമായിട്ട് വർഷങ്ങളായി. ഇപ്പോൾ വെറും കാഴ്ചവസ്തുവായി മാറി. ചാരുംമൂട് ജംഗ്ഷന് വടക്ക് ബസ് കാത്തിരിപ്പ് കേന്ദ്രത്തിനു സമീപം സ്ഥാപിച്ച ഇ-ടോയ്‌ലറ്റാണ് വർഷങ്ങളായി ഉപയോഗശൂന്യമായി കിടക്കുന്നത്. ചുനക്കര പഞ്ചായത്തിന്‍റെ 2012-13 ലെ ജനകീയാസൂത്രണ പദ്ധതിയിൽ ഉൾപ്പെടുത്തി അഞ്ചു ലക്ഷം രൂപ ചെലവഴിച്ചാണ് ഇവിടെ ഇ-ടോയ്‌ലറ്റ് സ്ഥാപിച്ചത്. കെൽട്രോണിനായിരുന്നു നിർമാണ ചുമതല. എന്നാൽ, നിർമാണം പൂർത്തിയാക്കി വർഷങ്ങൾ കഴിഞ്ഞിട്ടും ഇത് പൊതുജനങ്ങൾക്ക് ഉപകാരപ്രദമാക്കാനുള്ള നടപടികൾ സ്വീകരിക്കാൻ അധികൃതർ തയാറായില്ല.

കരിമണൽ ഖനനം നടപ്പായാൽ പൊന്തിലെ മത്സ്യബന്ധനം നിൽക്കുമോയെന്ന് ആശങ്ക

അമ്പലപ്പുഴ: കേന്ദ്രസർക്കാരിന്‍റെ കടൽ കരിമണൽ ഖനനം നടപ്പായാൽ ജില്ലയുടെ തീരത്തെ പ്രധാന കുലത്തൊഴിലായ പൊന്തിലെ മത്സ്യബന്ധനം നിർത്തേണ്ടിവരുമോയെന്ന ആശങ്കയിൽ പരമ്പരാഗത മത്സ്യത്തൊഴിലാളികൾ. കരയിൽനിന്ന് ഏറെ ദൂരത്തിലല്ലാതെ തെർമോകോളിൽ നിർമിച്ച പൊന്തിലെ മത്സ്യബന്ധനത്തിന് നിരോധനമേർപ്പെടുത്താനുള്ള നീക്കത്തിനെതിരേ ഇപ്പോൾ തന്നെ വിവിധ സംഘടനകൾ പ്രതിഷേധവുമായി രംഗത്തുവന്നിട്ടുണ്ട്. ഭൂമാഫിയയ്ക്കും സാഹസിക ടൂറിസം കമ്പനികൾക്കും വേണ്ടി കേരളതീരം പരമ്പരാഗത മത്സ്യത്തൊഴിലാളികളിൽനിന്ന് ഒഴിപ്പിച്ചെടുക്കാനുള്ള അധികാരവർഗത്തിന്‍റെ ഗൂഢതന്ത്രമാണെന്നാണ് അവരുടെ വാദം. 1990 കാലഘട്ടത്തിലാണ് തെർമോകോൾ ചെത്തിമിനുക്കി മുറിവള്ളത്തിന്‍റെ ആകൃതിയിൽ കടലിൽ പരീക്ഷണാടിസ്ഥാനത്തിൽ ഇറക്കിത്തുടങ്ങിയത്. മണ്ണെണ്ണയുടെയും പെട്രോളിന്‍റെയും വില കുതിച്ചുയർന്നപ്പോൾ വലുതും ചെറുതുമായ വള്ളങ്ങളിലെ മത്സ്യബന്ധനം പ്രതിസന്ധിയിലായി. കടംകയറിയ വള്ളമുടമകൾ യാനങ്ങൾ കരയിൽ കയറ്റി. ഇതോടെ ഭൂരിഭാഗം തൊഴിലാളികളും സ്വന്തമായി പൊന്തുനിർമിച്ചു നിത്യവ്യത്തിക്കു കടലിലേക്കുപോയിത്തുടങ്ങി. ഇന്ധനച്ചെലവില്ലാതെ മനുഷ്യന്‍റെ അധ്വാനത്തിൽ വലയെറിഞ്ഞു മീനുമായി കരയെത്തിത്തുടങ്ങി. എന്നാൽ, ഇവർക്ക് രജിസ്ട്രേഷനും അംഗീകാരവും വേണ്ടപ്പെട്ട വകുപ്പുകൾ ഇതുവരെ നൽകിയിട്ടില്ല. പൊന്തിൽ തുഴഞ്ഞ് കടലിൽ പോകുന്നത് ഒരാൾ ആണെങ്കിലും കരയെത്തിയാൽ മീൻ വലയിൽനിന്ന് മാറ്റുന്നതിനും വിൽപ്പനയ്ക്കു കൊണ്ടുപോകുന്നതിനുമായി സഹായികളായി അ ഞ്ചുപേർ വേണം. ഇവരുടെ കുടുംബവും ഈ വരുമാനത്തിലാണ് കഴിഞ്ഞുപോകുന്നത്. എന്തായാലും പൊന്തുകൾക്ക് നിരോധനമേർപ്പെടുത്തിയാൽ നൂറുകണക്കിനു കുടുംബങ്ങളുടെ ജീവിതമാണ് വഴിമുട്ടുന്നത്. ഇതിനെതിരേ നിയമ നടപടികളുമായി മുന്നോട്ടുപോകാനാണ് ഈ രംഗത്തു പ്രവർത്തിക്കുന്ന സംഘടനകളുടെ തീരുമാനം.

ഹരിപ്പാട് മണ്ഡലത്തിലെ മുടങ്ങിക്കിടന്ന എട്ടു റോഡുകളുടെ നിർമാണത്തിനു നടപടി

ഹരിപ്പാട്: രമേശ് ചെന്നിത്തല എംഎൽഎയുടെ ആസ്‌തി വികസന ഫണ്ടിൽനിന്ന് രണ്ടുവർഷം മുമ്പ് തുക അനുവദിക്കുകയും പത്തു തവണയിൽ കൂടുതൽ ടെൻഡർ ചെയ്തിട്ടും കരാറുകൾ എടുക്കാത്തതിനെത്തുടർന്ന് മുടങ്ങിക്കിടക്കുകയും ചെയ്ത എട്ടു നിർമാണങ്ങൾ ടെൻഡർ പൂർത്തീകരിച്ച് പണി ആരംഭിക്കാൻ തീരുമാനമായി. എറണാകുളം കേന്ദ്രീകരിച്ചുള്ള ലേബർ കോൺട്രാക്‌ട് സൊസൈറ്റിയുമായി എംഎൽഎ ബന്ധപ്പെട്ടതിനെത്തുടർന്നാണ് തീരുമാനമായത്. ചേപ്പാട് പഞ്ചായത്തിലെ മുറിയാമൂട് മണാലിൽ ജംഗ്ഷൻ, പള്ളിപ്പാട് പഞ്ചായത്തിലെ കളത്തിൽ ജംഗ്ഷൻ-ചെറിയിത്തലേത്ത് സൗത്ത്, മുതുകുളം പാണ്ഡവർകാവ് പുളിയറ റോഡ്, പള്ളിപ്പാട് ലോട്ടസ് ജംഗ്ഷൻ കറുത്തട്ടിൽ പടീറ്റതിൽ ജംഗ്ഷൻ റോഡും സ്ലാബ് വർക്കും കരുവാറ്റ ആശ്രമം-പട്ടേരിപ്പറമ്പിൽ റോഡ്, പള്ളിപ്പാട് വഴുതാനം യുപിഎസ്, കിഴക്ക്‌മുതൽ പടിഞ്ഞാറ് ചിറ വടക്കതിൽ നീണ്ടൂർ ടെമ്പിൾ റോഡ്, ചെറുതന പുത്തൻതുരുത്ത് -കാഞ്ഞിരംതുരുത്ത് റോഡ് എന്നീ റോഡുകളുടെ ടെൻഡർ നടപടികളും പൂർത്തിയായതായും സാങ്കേതിക തടസങ്ങൾ നീക്കി എത്രയും പെട്ടെന്ന് പണി പൂർത്തിയാക്കാൻ എൽഎസ്ജിഡി ഉദ്യോഗസ്ഥർക്ക് നിർദേശം നൽകിയതായും എംഎൽഎ അറിയിച്ചു.

ആർ ബ്ലോക്ക് കായലിൽ അഗ്നിബാധ; വ്യാപക കൃഷിനാശം

മങ്കൊമ്പ്: ഹോളണ്ട് മോഡല്‍ കൃഷിയിറക്കുന്ന കുട്ടനാട്ടിലെ ആര്‍ ബ്ലോക്ക് കായലില്‍ വന്‍ അഗ്‌നിബാധ. മൂന്നുനാലു ദിവസങ്ങളായി തുടരുന്ന തീപിടിത്തത്തില്‍ നാനൂറ് ഏക്കറോളം വരുന്ന കരകൃഷി കത്തിനശിച്ചതായി കര്‍ഷകര്‍ പറഞ്ഞു. അറുനൂറ് ഏക്കറോളം വരുന്ന കായലില്‍ വര്‍ഷം മുഴുവന്‍ വെള്ളം പമ്പുചെയ്ത് കരകൃഷി നടത്തുകയാണ്. വാഴ, തെങ്ങ്, കൊക്കോ, കവുങ്ങ് എന്നിവയാണ് പ്രധാനമായും കൃഷിയിറക്കുന്നത്. ശനിയാഴ്ചയാണ് കായലിന്‍റെ പടിഞ്ഞാറുഭാഗത്ത് തീപിടിത്തം ആരംഭിച്ചത്. മഴ പെയ്തതോടെ തീ അണഞ്ഞിരുന്നു. എന്നാല്‍, പിറ്റേന്ന് തീ വീണ്ടും പടരുകയായിരുന്നു. ഏക്കറുകണക്കിനു സ്ഥലത്തെ വിളവെടുപ്പിനു പാകമായ വാഴകള്‍, കൊക്കോ തുടങ്ങിയവ തീയില്‍ കത്തിനശിച്ചു. കര്‍ഷകത്തൊഴിലാളികളുമായി തീയണയ്ക്കാനുള്ള ശ്രമങ്ങള്‍ നടത്തിയെങ്കിലും ശക്തമായ കാറ്റുള്ളതിനാല്‍ തീ വീണ്ടും പടരുകയായിരുന്നു. ഇന്നലെ രാവിലെ ആലപ്പുഴയില്‍നിന്നു ഫയര്‍ഫോഴ്സ് സംഘമെത്തിയെങ്കിലും ഫലമുണ്ടായില്ല. ഇവിടേക്കു റോഡ് സൗകര്യമില്ലാത്തതും തീയണയ്ക്കുന്നതിനു വലിയ വെല്ലുവിളിയാകുന്നുണ്ട്. പടിഞ്ഞാറെ ബണ്ടില്‍ നാല്പതോളം കുടുംബങ്ങള്‍ താമസിക്കുന്നുണ്ട്. തീപിടിത്തം ഭയന്ന് ഏതാനും കുടുംബങ്ങള്‍ മാര്‍ത്താണ്ഡം കായലിന്‍റെ ചിറയിലെ വീടുകളിലേക്കു മാറി. തീ ഇപ്പോഴും നിയന്ത്രണ വിധേയമായിട്ടില്ലെന്ന് കര്‍ഷകര്‍ പറയുന്നു. ശ്രീലങ്കയില്‍നിന്നടക്കം മറ്റു രാജ്യങ്ങളില്‍നിന്നു കൊണ്ടുവന്ന മേല്‍ത്തരം തെങ്ങിന്‍ തൈകളും ഇവിടെ കൃഷി ചെയ്യുന്നവരുണ്ട്. നേരത്തെ ലാഭകരമായരീതിയില്‍ തെങ്ങ്, എള്ള്, കൊക്കോ, വാനില, വാഴ തുടങ്ങിയ കൃഷികള്‍ നടന്നിരുന്ന സ്ഥലമാണിത്. മോട്ടോറുകളുടെ തകരാറും നിരന്തരമായ വൈദ്യുതി മുടക്കവും മൂലം വെള്ളം വറ്റിക്കാനാകാതെ വ്യാപകമായി കൃഷിനശിച്ചിരുന്നു. പിന്നീട് സര്‍ക്കാര്‍ സഹായത്തോടെ പുതിയ മോട്ടോറുകള്‍ സ്ഥാപിച്ചു വീണ്ടും കൃഷിയിറക്കി വരികയായിരുന്നു. ലക്ഷങ്ങളുടെ നഷ്ടമാണ് തീ പിടിത്തത്തിലൂടെ സംഭവിച്ചിരിക്കുന്നതെന്ന് കര്‍ഷകര്‍ പറയുന്നു. വന്‍കിട കര്‍ഷകര്‍ക്കൊപ്പം ചെറുകര്‍ഷകരും ഇവിടെ കൃഷിയിറക്കിയിട്ടുണ്ട്. സര്‍ക്കാര്‍ ഭാഗത്തുനിന്നും ശക്തമായ നടപടിയുണ്ടാകണമെന്നാണ് കര്‍ഷകരുടെ ആവശ്യം.

തണ്ണീര്‍മുക്കം ബണ്ടിന്‍റെ ഷട്ടറുകള്‍ ഇന്നു തുറക്കും

ആലപ്പുഴ: തണ്ണീര്‍മുക്കം ബണ്ടിന്‍റെ ഷട്ടറുകള്‍ ഇന്നു രാവിലെ 10 മണിക്ക് തുറക്കാന്‍ കൃഷി വകുപ്പ് മന്ത്രി പി. പ്രസാദിന്‍റെ അധ്യക്ഷതയില്‍ കളക്ടറേറ്റില്‍ ചേര്‍ന്ന ഉപദേശക സമിതി യോഗത്തില്‍ തീരുമാനിച്ചു. നെല്‍കര്‍ഷകര്‍ക്കും മത്സ്യത്തൊഴിലാളികള്‍ക്കും ബുദ്ധിമുട്ടില്ലാത്ത തരത്തില്‍ തണ്ണീര്‍മുക്കം ബണ്ടിന്‍റെ ഷട്ടറുകള്‍ ക്രമീകരിക്കാനാണ് സര്‍ക്കാര്‍ ശ്രമിക്കുന്നതെന്ന് മന്ത്രി പറഞ്ഞു. അടുത്ത തവണ മുതല്‍ കാര്‍ഷിക കലണ്ടര്‍ പ്രകാരംതന്നെ കൃഷിയിറക്കി മുന്നോട്ട് പോകാന്‍ ശ്രമിക്കണമെന്നും മന്ത്രി നിര്‍ദേശിച്ചു. ഓണ്‍ലൈനായാണ് മന്ത്രി യോഗത്തില്‍ പങ്കെടുത്തത്. ഇനിയും കൊയ്ത്ത് പൂര്‍ത്തിയാക്കാനുള്ള പാടശേഖരങ്ങളിലെ കൊയ്ത്ത് ഉടന്‍ പൂര്‍ത്തിയാക്കണമെന്നും അല്ലാത്തപക്ഷം ഓരുജലം കയറാത്ത സംവിധാനം ഉറപ്പാക്കണമെന്നും ജില്ലാ കളക്ടര്‍ അലക്‌സ് വര്‍ഗീസ് പറഞ്ഞു. ബണ്ടിന്‍റെ ഷട്ടറുകള്‍ തുറക്കുന്നതിന് ഇറിഗേഷന്‍ മെക്കാനിക്കല്‍ വിഭാഗം എക്സിക്യൂട്ടീവ് എന്‍ജിനിയറെ ജില്ലാ കളക്ടര്‍ ചുമതലപ്പെടുത്തി. ഷട്ടര്‍ തുറക്കുന്ന സാഹചര്യത്തില്‍ മത്സ്യത്തൊഴിലാളികള്‍ ഉള്‍പ്പെടെയുള്ള പൊതുജനങ്ങള്‍ ജാഗ്രത പാലിക്കണമെന്ന് കളക്ടര്‍ നിര്‍ദേശിച്ചു. യോഗത്തില്‍ തോമസ് കെ. തോമസ് എംഎല്‍എ ഓണ്‍ലൈനായി പങ്കെടുത്തു. ആലപ്പുഴ-കോട്ടയം ജില്ലകളിലെ ഉദ്യോഗസ്ഥര്‍, ട്രേഡ് യൂണിയന്‍ പ്രതിനിധികള്‍, പാടശേഖരസമിതി പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

സാമ്പത്തിക ക്രമക്കേട്: സസ്പെൻഷനിലായ ജീവനക്കാരിയെ തിരികെയെടുക്കാൻ നീക്കം

അന്പലപ്പുഴ: ലക്ഷങ്ങൾ സാമ്പത്തിക ക്രമക്കേട് നടത്തി സസ്പെൻഷനിലായ ജീവനക്കാരിയെ തിരികെ പ്രവേശിക്കാൻ രാഷ്ട്രീയ നീക്കം. സിപിഎമ്മിൽ ഭിന്നത. അമ്പലപ്പുഴ സർവീസ് സഹകരണസംഘം 105-ാം നമ്പറിന് കീഴിലുള്ള കൊപ്പാറക്കടവിനു സമീപം പ്രവർത്തിക്കുന്ന എക്കോ ഷോപ്പിലെ ജീവനക്കാരിയായ അർച്ചനാ ആനന്ദിനെയാണ് തിരിച്ചെടുക്കാൻ നീക്കം നടത്തുന്നത്. കഴിഞ്ഞ ഏഴുവർഷമായി ഇവിടെ ജോലി ചെയ്തിരുന്ന ഇവർ 13 ലക്ഷത്തിൽപ്പരം രൂപയുടെ സാമ്പത്തിക ക്രമക്കേടാണ് നടത്തിയത്. സെയിൽസ് ഗേളായി തുടക്കത്തിൽ അഞ്ചു വർഷം താത്കാലികമായി ജോലി ചെയ്ത ഇവരെ പിന്നീട് സിപിഎം സ്വാധീനത്താൽ രണ്ടു വർഷം മുൻപ് സ്ഥിരപ്പെടുത്തി. ഇക്കാലയളവിലാണ് രേഖകളും വൗച്ചറുകളും കണക്കുകളുമില്ലാതെ 13 ലക്ഷത്തിൽപ്പരം രൂപയുടെ സാമ്പത്തിക തട്ടിപ്പ് ഇവർ നടത്തിയത്. എക്കോ ഷോപ്പിൽനിന്നുള്ള വരുമാനം പ്രതിദിനം സഹകരണ സംഘത്തിൽ അടയ്ക്കണമെന്നായിരുന്നു തീരുമാനം. എന്നാൽ, ഈ ജീവനക്കാരി തുകയടച്ചിരുന്നില്ല. അക്കാലയളവിലെ ബോർഡ് ഇത് പരിശോധിക്കുകയും ചെയ്തില്ല. പുതിയ ബോർഡ് നിലവിൽ വന്നതിനുശേഷം സെക്രട്ടറി നടത്തിയ പ്രാഥമിക പരിശോധനയിലാണ് വലിയ സാമ്പത്തിക തട്ടിപ്പ് നടന്നത് പുറത്തറിഞ്ഞത്. സെക്രട്ടറിയുടെ റിപ്പോർട്ടിന്‍റെ അടിസ്ഥാനത്തിൽ ബോർഡ് ഇതിനെക്കുറിച്ച് അന്വേഷിക്കുന്നതിനായി മൂന്നംഗ അച്ചടക്ക സമിതിയെ നിയോഗിച്ചു. ഈ കമ്മിറ്റി നടത്തിയ പരിശോധനയിലാണ് കൂടുതൽ ക്രമക്കേട് കണ്ടെത്തിയത്. തുടർന്ന് അച്ചടക്ക സമിതിയുടെ റിപ്പോർട്ടിന്മേൽ വിരമിച്ച അസി. രജിസ്ട്രാറെ വിദഗ്ധ പരിശോധനയ്ക്കായും നിയോഗിച്ചു. ഒടുവിൽ ജീവനക്കാരി കുറ്റം സമ്മതിക്കുകയും അപഹരിച്ച പണം തിരിച്ചയയ്ക്കാമെന്ന് സമ്മതിക്കുകയും ചെയ്തു. ഇതിന്‍റെ അടിസ്ഥാനത്തിലാണ് ബോർഡ് കൂടി ഇവർക്ക് മെമ്മോ നൽകുകയും അന്വേഷണ വിധേയമായി സസ്പെൻഡ് ചെയ്യുകയും ചെയ്തത്. പിന്നീട് സസ്പെൻഷൻ കാലാവധി നീട്ടുകയും ചെയ്തു. ഇതിനിടയിൽ രണ്ടു തവണയായി 11 ലക്ഷത്തോളം രൂപ ഇവർ തിരിച്ചടച്ചു. അമ്പതിനായിരം രൂപയ്ക്ക് മുകളിൽ സാമ്പത്തിക തട്ടിപ്പ് നടത്തിയാൽ പോലീസിൽ പരാതി നൽകി കേസെടുക്കണമെന്ന സഹകരണ നിയമം ബോർഡ് പാലിച്ചില്ല. സസ്പെൻഷൻ കാലാവധി കഴിയാറായതോടെ ഇവരെ വീണ്ടും ജോലിയിൽ തിരിച്ചെടുക്കാനുള്ള നീക്കമാണ് സിപിഎം നടത്തുന്നത്. ബോർഡിലെ ഭൂരിഭാഗം അംഗങ്ങളും ഇതിൽ വിയോജിപ്പ് പ്രകടിപ്പിച്ചിട്ടുണ്ടെങ്കിലും ബോർഡിലെ മുതിർന്ന സി പിഎം അംഗവും എംഎൽഎയുമാണ് ഇവരെ തിരിച്ചെടുക്കാനായി കടുത്ത നിലപാട് സ്വീകരിക്കുന്നത്. ഇതിനെതിരേ സിപിഎമ്മിലും ബോർഡിലും കനത്ത പ്രതിഷേധമുയർന്നിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]