അത്യപൂർവ തിരുവാഭരണങ്ങൾ ചാർത്തി ചെട്ടികുളങ്ങര കാർത്തിക ദർശനം
1538997
Wednesday, April 2, 2025 11:48 PM IST
മാവേലിക്കര: അത്യപൂർവവും പുരാതനവുമായ തിരുവാഭരണങ്ങൾ ചാർത്തിയാണ് ചെട്ടികുളങ്ങര കാർത്തിക ദർശനം നടന്നത്. ദർശനത്തിനായി രാവിലെ മുതൽ ഭക്തർ ചെട്ടികുളങ്ങര സന്നിധിയിലേക്ക് ഒഴുകുകയായിരുന്നു. പകൽ മുഴുവൻ കത്തുന്ന മീനവെയിലും വൈകുന്നേരം വേനൽ മഴയും അവഗണിച്ചാണ് ഭക്തർ ദേവിയുടെ പുണ്യദർശനത്തിനായി കാത്തുനിന്നത്.
തങ്കത്തിരുമുഖം, നാഗപത്തി കിരീടം, ഇളക്കത്താലി, നാഗഫണ മാല, കൂട്ടത്താലി, മുല്ലമൊട്ടുമാല, പിച്ചിമൊട്ടുമാല, പാലയ് ക്കാമാല, കാശുമാല, വളകൾ, നവരത്നങ്ങൾ പതിച്ച വലംപിരി ശംഖ്... തുടങ്ങിയ തിരുവാഭരണങ്ങളാണ് പ്രധാനമായും ഭഗവതിയെ അണിയിച്ചത്. ഇവയ്ക്കൊപ്പം ചെറുതും വലുതുമായ പലവിധ ആഭരണങ്ങളുമുണ്ടായിരുന്നു. മിക്കതും വിലമതിക്കാനാകാത്ത തരത്തിലെ പൗരാണിക മൂല്യമുള്ളവയാണ്.
മാതൃസ്ഥാനീയയായ കൊടുങ്ങല്ലൂർ ഭഗവതിയുടെ സന്നിധിയിൽനിന്ന് ചെട്ടികുളങ്ങര ഭഗവതി മടങ്ങിയെത്തുന്ന മീനത്തിലെ കാർത്തിക നാൾ ചെട്ടികുളങ്ങരയിൽ അതിപ്രധാനമാണ്. രാജഭരണകാലത്ത് നടയ്ക്ക് സമർപ്പിക്കപ്പെട്ടിട്ടുള്ള തിരുവാഭരണങ്ങളണിയിച്ചാണ് ഈ ദിവസം ദേവിയെ ഒരുക്കുന്നത്. ഏറെ പഴക്കമുള്ള ആചാരം ഇടക്കാലത്ത് നിലച്ചുപോയി. ശ്രീദേവി വിലാസം ഹിന്ദുമത കൺവൻഷൻ ട്രസ്റ്റിന്റെ അഭ്യർഥന പ്രകാരമാണ് അടുത്തിടെ ഇതു പുനരാരംഭിച്ചത്.
ഇന്നലെ രാവിലെ ഒൻപതിനു തുടങ്ങിയ കാർത്തിക ദർശനം വൈകിട്ട് ആറര വരെ തുടർന്നു. വൈകിട്ട് നട അടച്ചിട്ടും ഭക്തർ ദേവീ ദർശത്തിനായി കാത്തുനിൽക്കുകയായിരുന്നു.
ഹരിപ്പാട് സ്ട്രോംഗ് റൂമിൽ സൂക്ഷിച്ചിരുന്ന തിരുവാഭരണങ്ങൾ ചെട്ടികുളങ്ങര കിഴക്കേ നടയിലെ എതിരേൽപ്പ് മണ്ഡപത്തിലെത്തിച്ചശേഷം തിരുവാഭരണ പേടകങ്ങൾ 13 കരക്കാരും ശ്രീദേവി വിലാസം ഹിന്ദുമത കൺവൻഷൻ ഭാരവാഹികളും ദേവസ്വം ബോർഡ് പ്രതിനിധികളും ചേർന്ന് പഞ്ചവാദ്യത്തിന്റെ യും ക്ഷേത്ര മേളത്തിന്റെയും അകമ്പടിയോടെ ക്ഷേത്ര സന്നിധിയിലേക്ക് ആനയിച്ചു. തന്ത്രി പ്ലാക്കുടി ഉണ്ണികൃഷ്ണൻ നമ്പൂതിരിയുടെ മുഖ്യാകാർമികത്വത്തിൽ തിരുവാഭരണങ്ങൾ ചാർത്തി.