ദൈവദാസന്‍ പുത്തന്‍പറമ്പില്‍ തൊമ്മച്ചന്‍റെ ചരമവാര്‍ഷികാചരണവും തീര്‍ഥാടന പദയാത്രയും ഇന്ന്
1465637
Friday, November 1, 2024 6:19 AM IST
എടത്വ: കേരള അസീസി ദൈവദാസന്‍ പുത്തന്‍പറമ്പില്‍ തൊമ്മച്ചന്‍റെ 116-ാം ചരമവാര്‍ഷികദിനാചരണവും അദ്ദേഹത്തിന്‍റെ കബറിടത്തിലേക്കുള്ള തീര്‍ഥാടന പദയാത്രയും ഇന്ന് നടക്കും. രാവിലെ ഒന്‍പതിന് പച്ച-ചെക്കിടിക്കാട് ലൂര്‍ദ് മാതാ പള്ളിയില്‍നിന്ന് എടത്വ സെന്‍റ് ജോര്‍ജ് ഫൊറോനാപള്ളിയിലേക്ക് നടക്കുന്ന പദയാത്രയില്‍ നൂറുകണക്കിന് വിശ്വാസികള്‍ പങ്കെടുക്കും.
പദയാത്രയില്‍ വിവിധ റീജണുകളുടെ ടാബ്ലോ പ്രദര്‍ശനവും നടക്കും, ദൈവദാസന്‍റെ കബറിടത്തിങ്കലേക്ക് കേരളത്തിലെ വിവിധ സ്ഥലങ്ങളില്‍നിന്നും ആയിരക്കണക്കിന് ഭക്തരാണ് എത്തിക്കൊണ്ടിരിക്കുന്നത്. ഇന്നലെ തൃശൂര്‍, കോതമംഗലം, ചങ്ങനാശേരി രൂപതകളിലെ വിവിധ ഇടവകകളില്‍ നിന്നുള്ള ഫ്രാന്‍സിസ്‌കന്‍ സഭാംഗങ്ങളും തീര്‍ഥാടകരും പദയാത്രയായി കബറിടത്തിങ്കല്‍ എത്തി. കുര്‍ബാനയ്ക്കും കബറിടത്തില്‍ നടന്ന പ്രാര്‍ഥനകള്‍ക്കും ഫാ. വര്‍ഗീസ് വാഴയില്‍, വൈസ് പോസ്റ്റുലേറ്റര്‍ ഫാ. അനീഷ് കുടിലില്‍ എന്നിവര്‍ മുഖ്യകാര്‍മികത്വം വഹിച്ചു.
ഇന്ന് രാവിലെ 11 ന് നടക്കുന്ന ആഘോഷമായ കുര്‍ബാനയ്ക്ക് ചങ്ങനാശേരി അതിരൂപതാ മുന്‍ മെത്രാപ്പോലീത്താ മാര്‍ ജോസഫ് പെരുന്തോട്ടം മുഖ്യകാര്‍മികത്വം വഹിക്കും. തുടര്‍ന്ന് കബറിടത്തില്‍ ഒപ്പീസ്, നേര്‍ച്ചഭക്ഷണം. ചങ്ങനാശേരി, കോട്ടയം, പാലാ, കാഞ്ഞിരപ്പള്ളി, കോതമംഗലം, ഇരിങ്ങാലക്കുട, തൃശൂര്‍, എറണാകുളം, അങ്കമാലി, ഇടുക്കി, തലശേരി, പാലക്കാട്, കോഴിക്കോട് എന്നീ രൂപതകളില്‍നിന്നുള്ള ഫ്രാന്‍സിസ്‌കന്‍ സഭാംഗങ്ങളും തീര്‍ഥാടകരും ഇന്ന് നടക്കുന്ന ചരമവാര്‍ഷികദിനാചരണത്തിലും തീര്‍ഥാടന പദയാത്രയിലും പങ്കെടുക്കും.
വികാരി ഫാ. ഫിലിപ്പ് വൈക്കത്തുകാരന്‍, അസി. വികാരിമാരായ ഫാ. അനീഷ് കാമിച്ചേരി, ഫാ. ബ്രിന്‍റോ മനയത്ത്, എസ്എഫ്ഒ എടത്വ റീജിയന്‍ മിനിസ്റ്റര്‍ സാബു കരിക്കംപള്ളി, കൈക്കാരന്മാരായ ജയിംസ്‌കുട്ടി കന്നേല്‍ തോട്ടുകടവില്‍, പി.കെ. ഫ്രാന്‍സിസ് കണ്ടത്തിപ്പറമ്പില്‍ പത്തില്‍, ജെയ്‌സപ്പന്‍ മത്തായി കണ്ടത്തില്‍, എസ്എഫ്ഒ എടത്വ ഭ്രാതൃത്വ മിനിസ്റ്റര്‍ വി.റ്റി. ജോസ് വാഴപ്പറമ്പില്‍, അംഗങ്ങളായ ഔസേപ്പ് മത്തായി ഓടേറ്റില്‍, മനോജ് മാത്യു പുത്തന്‍വീട്ടില്‍, ഷാജിമോന്‍ കാഞ്ഞൂപള്ളില്‍, ബാബു കണ്ണന്തറ, അജി വാഴപ്പറമ്പില്‍, സിബിച്ചന്‍ വേളച്ചേരി, കുഞ്ഞുമോന്‍ പേരങ്ങാട് എന്നിവരാണ് നേതൃത്വം നല്‍കുന്നത്.