പ്രതിഷേധ സദസ്

മല്ലപ്പള്ളി: കോൺഗ്രസ്‌ മല്ലപ്പള്ളി ബ്ലോക്ക് കമ്മറ്റിയുടെ നേതൃത്വത്തിൽ നാളെ രാവിലെ 10 ന് കുന്നംകുളത്ത് മൃഗീയ പോലീസ് മർദനത്തിന് ഇരയായ യൂത്ത് കോൺഗ്രസ്‌ നേതാവ് സുജിത്തിന്‌ നീതി ലഭ്യമാക്കൂ പോലീസ് ക്രിമിലുകളെ ജയിലിലടക്കൂ എന്ന മുദ്രാവാക്യമുയർത്തി കീഴ്‌വായ്പൂര് പോലീസ് സ്റ്റേഷനു മുന്പിൽ നടക്കുന്ന ജനകീയ പ്രതിഷേധ സദസ് കെപിസിസി സെക്രട്ടറി അനീഷ്‌ വരിക്കണ്ണാമല ഉദ്ഘാടനം ചെയ്യും.

കോൺഗ്രസ്‌ ബ്ലോക്ക് പ്രസിഡന്‍റ് എബി മേക്കരിങ്ങാട്ട് അധ്യക്ഷത വഹിക്കും.

ADVERTISEMENT

ആറന്മുളയിൽ അഷ്ടമിരോഹിണി വള്ളസദ്യ 14ന്

ആറന്മുള: ആറന്മുള അഷ്ടമിരോഹിണി വള്ളസദ്യ 14ന്. രാവിലെ 10.30ന് മന്ത്രി വി.എൻ. വാസവൻ വള്ളസദ്യയും സമൂഹസദ്യയും ഉദ്ഘാടനം ചെയ്യും. 52 പള്ളിയോടങ്ങളിലായി എത്തുന്ന കരക്കാരെ സ്വീകരിച്ച് 11.30ന് സദ്യയ്ക്കു തുടക്കമാകും. അന്നേദിവസം ക്ഷേത്രത്തിലെത്തുന്ന എല്ലാ ഭക്തജനങ്ങൾക്കും വിഭവ സമൃദ്ധമായ സദ്യ നൽകുന്നതിനാണ് ഒരുക്കങ്ങൾ നടക്കുന്നത്. ഇതിനായി ഇന്ന് രാവിലെ ഒന്പതിനും 9.45നും മധ്യേ ക്ഷേത്രത്തിലെ ഊട്ടുപുരയിലെ അടുപ്പിൽ അഗ്നിപകരും. അമ്പലപ്പുഴ പാൽപ്പായസം ഉൾപ്പെടെ വള്ളസദ്യക്കുള്ള വിഭവങ്ങൾ ചേർത്താണ് സദ്യ ഒരുക്കുന്നത്. 51 പറ അരിയുടെ ചോറാണ് തയാറാക്കുന്നത്. ക്ഷേത്രത്തിന്‍റെ വടക്കും പടിഞ്ഞാറും ഭാഗത്ത് പള്ളിയോടങ്ങൾക്കും തെക്ക് ഭാഗത്ത് മറ്റ് ഭക്തജനങ്ങൾക്കുമാണ് സദ്യ വിളമ്പുന്നത്. ഏതാണ്ട് 500 ഓളം പേരാണ് ഇതുമായി ബന്ധപ്പെട്ട ജോലികളിൽ ഏർപ്പെട്ടിട്ടുള്ളത്. ഇടശേരിമല തിരുവന്പാടി കിഴക്കേമലയിൽ സന്തോഷ് നായർ എന്ന ഭക്തനാണ് 501 പറ അരി സംഭാവനയായി നൽകിയത്. ഭക്തജനങ്ങൾക്ക് സംഭാവന നൽകുന്നതിന് ദേവസ്വം ബോർഡും പള്ളിയോട സേവാ സംഘവും ചേർന്നു തയാറാക്കിയിട്ടുള്ള ടിക്കറ്റുകൾ ലഭ്യമാണ്. 10,000, 5,000, 2,000, 1,000 എന്നീ ക്രമത്തിലുള്ള ടിക്കറ്റുകളാണ് തയാറാക്കിയിട്ടുള്ളത്. ആറന്മുള ദേവസ്വം ഓഫീസിലും ആനക്കൊട്ടിൽ പ്രത്യേക കൗണ്ടറിലും പള്ളിയോട സേവാസംഘം ഓഫീസിലും ടിക്കറ്റുകൾ ലഭ്യമാണ്. സംഭാവന നൽകുന്നവർക്ക് പാഞ്ചജന്യം ഓഡിറ്റോറിയത്തിലാണ് സദ്യ ക്രമീകരിച്ചിട്ടുള്ളത്. കരയിലെ വിശിഷ്ട വ്യക്തികൾക്ക് വിനായക ഓഡിറ്റോറിയത്തിൽ അഷ്ടമിരോഹിണി സദ്യ നൽകും. സദ്യയ്ക്ക് ആവശ്യമായ തൈര് ചേനപ്പാടിയിൽ നിന്ന് പരമ്പരാഗത ശൈലിയിൽ നാളെ രാവിലെ പത്തിന് ആറന്മുള ക്ഷേത്രത്തിൽ ഘോഷയാത്രയായി എത്തിക്കും. അമ്പലപ്പുഴ അരവിന്ദാക്ഷൻനായരുടെ നേതൃത്വത്തിലുള്ള സംഘമാണ് അമ്പലപ്പുഴ പാൽപ്പായസവും ക്ഷേത്രത്തിലെ മറ്റ് അഷ്ടമിരോഹിണി വിഭവങ്ങൾ ചെറുകോൽ ഹരിചന്ദ്രൻ നായരും ഓഡിറ്റോറിയങ്ങളിൽ നടക്കുന്ന സദ്യ ആറന്മുള അനീഷ് ചന്ദ്രനുമാണ് പാകം ചെയ്യുന്നത്. 25 ലക്ഷം രൂപ ചെലവിട്ടാണ് ഇക്കുറി അഷ്ടമിരോഹിണി സദ്യ ഒരുക്കുന്നത്. അഷ്ടമിരോഹിണി നാളിൽ ക്ഷേത്രത്തിൽ പ്രത്യേക വഴിപാടുകളും അലങ്കാരങ്ങളും ഉണ്ടാകും. ഒരു സ്ഥലത്ത് ഇത്രയധികം ആളുകൾ ഒരുമിച്ചിരുന്ന് സദ്യ വിഭവങ്ങൾ ആസ്വദിക്കുന്നത് ലോകത്തിൽ ആറന്മുള മാത്രമാണ്. അഷ്ടമിരോഹിണി വള്ളസദ്യക്ക് ഹൈക്കോടതി നിർദ്ദേശപ്രകാരം രൂപീകരിച്ചിട്ടുള്ള നിർവഹണസമിതിയാണ് മേൽനോട്ടം വഹിക്കുന്നത്. ക്യാപ്റ്റൻ രവീന്ദ്രൻ നായർ ഭക്തജന പ്രതിനിധിയായും ശശികണ്ണങ്കേരിൽ ഉപദേശക സമിതി പ്രതിനിധിയായും ദേവസ്വം പ്രതിനിധികളായി അഡ്മിനിസ്ട്രേറ്റീവ് ഓഫീസർ ആർ. രേവതി, അസിസ്റ്റന്‍റ് കമ്മീഷണർ എസ്. ശ്രീലേഖ, പള്ളിയോടസംഘം സെക്രട്ടറി പ്രസാദ് ആനന്ദഭവൻ, പ്രസിഡന്‍റ് കെ.വി. സാംബദേവൻ എന്നിവർ അംഗങ്ങളാണ്.

ഓണാഘോഷവും കുടുംബ സംഗമവും

തിരുവല്ല: മുത്തൂർ നവജ്യോതി റസിഡന്‍റ്സ് അസോസിയേഷന്‍റെ ഓണാഘോഷ പരിപാടികളുടെ ഉദ്ഘാടനം മാത്യു ടി. തോമസ് എംഎൽഎ നിർവഹിച്ചു. പ്രസിഡന്‍റ് പി.എസ്. സലാഹുദ്ദീന്‍റെ അധ്യക്ഷതയിൽ കൂടിയ യോഗത്തിൽ തുകലശേരി ശ്രീരാമകൃഷ്ണ ആശ്രമം മഠാധിപതി സ്വാമി നിർവിണാനന്ദ ഓണസന്ദേശം നൽകി. കുറ്റപ്പുഴ ജറുസലേം മാർത്തോമ്മാ പള്ളി വികാരി റവ. സുനിൽ ചാക്കോ കുടുംബസംഗമം ഉദ്ഘാടനം ചെയ്തു. ചുമത്ര ജുമാ മസ്ജിദ് ചീഫ് ഇമാം മൗലവി അൽ ഹാഫിസ് നൗഫൽ ഹുസ്നി അവാർഡ് ദാനം നിർവഹിച്ചു. ജീവകാരുണ്യ പദ്ധതിയുടെ ഉദ്ഘാടനം എം.സലിമും കലാ കായികമേളയുടെ ഉദ്ഘാടനം സാബു പാറയിലും നിർവഹിച്ചു. അസോസിയേഷൻ അംഗങ്ങളുടെ മക്കളിൽ ഉന്നത വിജയം കരസ്ഥമാക്കിയവർക്ക് മെറിറ്റ് സർട്ടിഫിക്കറ്റും കാഷ് അവാർഡും നൽകി അനുമോദിച്ചു. സെക്രട്ടറി റെജി മാമ്മൻ, ട്രഷറർ വേണുഗോപാല പണിക്കർ, രാജേഷ് മലയിൽ, പി.ആർ. ബൈജു, ലീലാമ്മ ജോർജ്, കൊച്ചുമോൾ പ്രദീപ് , ശിവകുമാർ കളത്തിൽ എന്നിവർ പ്രസംഗിച്ചു.

അൻപിലെ വയോജനങ്ങൾക്കൊപ്പം ഓണാഘോഷവും സ്നേഹസംഗമവും

തിരുവല്ല: സമന്വയ മത സൗഹൃദ വേദിയുടെ ആഭിമുഖ്യത്തിൽ അനിക്കാട് അൻപ് വയോജന സദനത്തിലെ അന്തേവാസികൾക്കൊപ്പം ഓണാഘോഷവും സ്നേഹ സംഗമവും നടത്തി. സ്നേഹസംഗമം മാത്യു റ്റി. തോമസ് എംഎൽഎ ഉദ്ഘാടനം ചെയ്തു. ആർ. ജയകുമാർ അധ്യക്ഷത വഹിച്ചു. ‌ഡോ.ഗീവർഗീസ് മാർ കൂറിലോസ് മെത്രാപ്പോലീത്ത ആമുഖപ്രസംഗം നടത്തി. അക്കീരമൺ കാളിദാസൻ ഭട്ടതിരി ഓണസന്ദേശം നൽകി. പത്മശ്രീ ഡോ.കുര്യൻ ജോൺ മേളാംപറമ്പിൽ, ഫാ. സിജോ പന്തപ്പള്ളിൽ, വർഗീസ് മാമ്മൻ, എം.സലീം, പി.എം.അനീർ, ഷാജി തിരുവല്ല, മാത്യൂസ് കെ. ജേക്കബ്, റോജർ ജോൺ, ജോസഫ് കുര്യാക്കോസ്, ഷെൽട്ടൺ വി. റാഫേൽ , ശ്യാം കുമാർ, ഡോ.സജി കുര്യൻ, അനിൽകുമാർ എന്നിവർ പ്രസംഗിച്ചു.

ഭിന്നശേഷി കലോത്സവം വർണക്കൂട് 2025

തിരുവല്ല: പെരിങ്ങര ഗ്രാമപഞ്ചായത്ത് ഭിന്നശേഷി കലോത്സവം വർണക്കൂട് 2025 ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് ഏബ്രഹാം തോമസ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് സി.കെ. അനു, ജില്ലാ പഞ്ചായത്ത് അംഗം മായ അനിൽകുമാർ എന്നിവർ മുഖ്യപ്രഭാഷണം നടത്തി. ഗ്രാമപഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻമാരായ ടി.വി. വിഷ്ണു നമ്പൂതിരി, റിക്കു മോനി വർഗീസ്, ജയ ഏബ്രഹാം, ബ്ലോക്ക് പഞ്ചായത്ത് വൈസ് പ്രസിഡന്‍റ് സോമൻ താമരച്ചാൽ, പഞ്ചായത്ത് അംഗങ്ങളായ എം.സി. ഷൈജു, മാത്തൻ ജോസഫ്, എസ്. അനിൽകുമാരി, ശാന്തമ്മ ആർ. നായർ, ശർമിള സുനിൽ, സൂസൻ വർഗിസ് ഐസിഡിഎസ് സൂപ്പർവൈസർ എസ്. റീന, റോയിഏലിയാമ്മ കുര്യൻ എന്നിവർ പ്രസംഗിച്ചു.

കോഴഞ്ചേരി ബസിന് പ്രക്കാനത്ത് സ്വീകരണം നൽകി

പ്രക്കാനം: പതിറ്റാണ്ടുകളായി സർവീസ് നടത്തുന്ന തിരുവനന്തപുരം-കോഴഞ്ചേരി കെഎസ്ആർടിസി സ്റ്റേ ബസിന് ഓണത്തോടനുബന്ധിച്ച് നാട്ടുകാരുടെ വരവേല്പ്. വനിതകൾ ഉൾപ്പെടെ പ്രക്കാനം റസിഡന്‍റ്സ് അസോസിയേഷൻ അംഗങ്ങൾ കാത്തുനിന്നാണ് ബസിനെ സ്വീകരിച്ചത്. സ്നേഹ സമ്മാനങ്ങൾക്കൊപ്പം ജീവനക്കാർക്ക് ഓണസദ്യയും ഒരുക്കി നൽകി. ‌എല്ലാ വർഷവും പ്രക്കാനം റസിഡന്‍റ്സ് അസോസിയേഷൻ ഓണാഘോഷത്തിന്‍റെ ഭാഗമായി സ്വീകരണച്ചടങ്ങുകൾ നടത്തുകയും അന്നേ ദിവസം സ്റ്റേ ബസിലെ ജീവനക്കാർക്ക് ഓണസദ്യ നൽകുകയും ചെയ്യുന്ന പതിവ് നാട്ടുകാർ ഇക്കൊല്ലവും തുടരുകയായിരുന്നു. അസോസിയേഷൻ ഭാരവാഹികളായ തോമസ് ജോൺ, ഓമന ഉഴുവത്ത്, രാജന്‍ കാവുങ്കൽ, പത്മവിലാസം സുനില്‍ എന്നിവർ ക്രമീകരണങ്ങൾക്ക് നേതൃത്വം നൽകി.

അബാൻ റോഡ് അടച്ചു, നഗരം കുരുങ്ങി

മാർഗനിർദേശമില്ലാതെ വഴി അടയ്ക്കൽ പത്തനംതിട്ട: അബാൻ മേൽപാലം നിർമാണത്തിനായി ബസ് സ്റ്റാൻഡിൽനിന്നുള്ള റോഡ് കൂടി അടച്ചതോടെ നഗരത്തിൽ ഗതാഗതക്കുരുക്ക് രൂക്ഷം. നേരത്തേഅബാൻ ജംഗ്ഷൻ - സ്റ്റേഡിയം റോഡ് അടച്ചിരുന്നു. ‌ നഗരത്തിലേക്കുള്ള ബസുകൾ ഉൾപ്പെടെയുള്ളവയുടെ യാത്ര നിയന്ത്രിച്ചാണ് ഇന്നലെ മുതൽ ബസ് സ്റ്റാൻഡ് റോഡിലൂടെയുള്ള യാത്രയും നിർത്തിവയ്പിച്ചത്. ഇതോടെ മുഴുവൻ ബസുകളുടെയും യാത്ര സെൻട്രൽ ജംഗ്ഷനിലൂടെയായി. സെൻട്രൽ ജംഗ്ഷനിലും പോസ്റ്റ് ഓഫീസ് റോഡിലും കുരുക്ക് രൂക്ഷമായി. കുന്പഴയിൽനിന്നുള്ള ബസുകൾ മൈലപ്ര പള്ളിപ്പടി വഴിയും തിരികെയും കടത്തിവിട്ടതോടെ ആ ഭാഗത്തും കുരുക്കായി. സുഗമമായി വാഹനങ്ങൾ കടന്നുപൊയ്ക്കൊണ്ടിരുന്ന മൈലപ്ര പള്ളിപ്പടി റോഡിലും ഗതാഗതക്കുരുക്കുണ്ടായി. റോഡിന്‍റെ പല ഭാഗങ്ങളും തകർന്നു കിടക്കുന്നതും യാത്രയെ ബാധിച്ചിട്ടുണ്ട്. ബസുകൾ ഉൾപ്പെടെ വാഹനങ്ങൾ വഴി തിരിച്ചുവിട്ടതുമായി ബന്ധപ്പെട്ട് കൃത്യമായ മാർഗനിർദേശം ഉണ്ടായിരുന്നില്ല. യോഗം കൂടിയില്ല നഗരത്തിൽ ഗതാഗത നിയന്ത്രണം ഏർപ്പെടുത്തുന്നതിനു മുന്പ് നഗരസഭയും ഗതാഗത ഉപദേശകസമിതിയും ചേർന്നു ചർച്ച ചെയ്യണമെന്നു നേരത്തേ വ്യാപാരികൾ ജില്ലാ കളക്ടർ‌ക്കു നൽകിയ നിവേദനത്തിൽ ആവശ്യപ്പെട്ടിരുന്നു. വേണ്ടതു ചെയ്യുമെന്നു കളക്ടർ ഉറപ്പു നൽകുകയും ചെയ്തതാണ്. എന്നാൽ, ഇന്നലെ നിർദേശം വന്നപ്പോൾ ഉദ്യോഗസ്ഥർ സ്വന്തം നിലയിൽ തീരുമാനം അറിയിക്കുകയായിരുന്നു. ദീർഘദൂര ബസുകളുൾപ്പെടെയുള്ളവ ഇതു കാരണം കുരുക്കിലായി. പിഎം റോഡ് വഴി കടന്നുപോകുന്ന ബസുകൾ കുന്പഴയിൽനിന്നു തിരിഞ്ഞ് പത്തനംതിട്ടയിലെത്തിയാണ് പൊയ്ക്കൊണ്ടിരിക്കുന്നത്. എന്നാൽ, അബാനിലെ തടസം കാരണം ഇവ പള്ളിപ്പടി വഴി പത്തനംതിട്ടയിലെത്താനാണ് നിർദേശം. വീണ്ടും ഇതേ പാതയിലൂടെ പള്ളിപ്പടിയിലെത്തി വേണം യാത്ര തുടരാൻ. അബാൻ ജംഗ്ഷനിലൂടെ പൊയ്ക്കൊണ്ടിരുന്ന മുഴുവൻ ബസുകളും സെൻട്രൽ ജംഗ്ഷൻ വഴി കടത്തിവിട്ടതും അശാസ്ത്രീയമായിട്ടാണ്. തിരുവല്ല ഭാഗത്തേക്കുള്ള കെഎസ്ആർടിസി ബസുകളും ദീർഘദൂര ബസുകളും ഇതുവഴി തന്നെയാണ് പോകുന്നത്. റിംഗ് റോഡിലൂടെ കുറെ ബസുകൾ കടത്തിവിടണമെന്ന നിർദേശം ഉ‍യർന്നിരുന്നു. ഭീഷണിയായി സ്ലാബ് തകർന്ന ഓടകൾ പത്തനംതിട്ട: നഗരത്തിലെ ഓടകള്‍ക്കു മുകളില്‍ സ്ഥാപിച്ചിട്ടുള്ള സ്ലാബുകളുടെ ശോച്യാവസ്ഥ കാല്‍നടക്കാര്‍ക്കും വാഹനങ്ങള്‍ക്കും ഒരേപോലെ ഭീഷണിയായി. പ്രധാന നിരത്തുകളിലെ സ്ലാബുകള്‍ പോലും തകര്‍ച്ചയിലാണ്. ഇന്നലെ രാവിലെ പത്തനംതിട്ട കോളജ് ജംഗ്ഷനില്‍ റോഡരികിലെ സ്ലാബ് തകര്‍ന്ന് ബസ് അപകടത്തില്‍പ്പെട്ടു. അടൂരില്‍നിന്നു പത്തനംതിട്ടയിലേക്കും വന്ന സ്വകാര്യ ബസാണ് സ്ലാബ് തകര്‍ന്ന് ഓടയില്‍ താഴ്ന്നത്. മറ്റൊരു ബസിനു സൈഡ് കൊടുക്കവേ ഓടയുടെ മുകളിലേക്കു കയറ്റി നിര്‍ത്തി യാത്രക്കാരെ ഇറക്കുമ്പോഴാണ് സ്ലാബ് തകര്‍ന്നത്. സദാസമയവും തിരക്ക് അനുഭവപ്പെടുന്ന റോഡാണിത്. ഈ ഭാഗത്തെ ഓടയുടെ സ്ലാബുകള്‍ മുഴുവന്‍ തകര്‍ന്ന നിലയിലാണ്. കോളജ്, സ്‌കൂള്‍ വിദ്യാര്‍ഥികള്‍ ബസ് കാത്തുനില്‍ക്കുന്ന ഭാഗത്തെ ഓടയുടെ സ്ലാബുകള്‍ തകര്‍ന്നു കിടക്കാന്‍ തുടങ്ങിയിട്ടും നാളുകളായി. സ്ലാബിന്‍റെ ശോച്യാവസ്ഥയെ സംബന്ധിച്ച് നിരവധി പരാതികള്‍ ഉയര്‍ന്നിരുന്നു. നഗരത്തില്‍ ആശുപത്രി ജംഗ്ഷന്‍, പഴയ സ്റ്റാന്‍ഡിലേക്കുള്ള വഴി എന്നിവിടങ്ങളിലും സ്ലാബുകള്‍ തകര്‍ച്ചയുടെ വക്കിലാണ്. കെഎസ്ആര്‍ടിസി ക്രോസ് റോഡ്, ജനറല്‍ ആശുപത്രിയിലേക്കുള്ള ഡോക്ടേഴ്‌സ് ലെയ്ന്‍ റോഡ് എന്നിവിടങ്ങളിലും സ്ലാബ് തകര്‍ച്ച കാല്‍നടയാത്രക്കാര്‍ക്കും വാഹനങ്ങള്‍ക്കും ഭീഷണിയാണ്.

അംഗത്വ കാമ്പയിനും കുടിശിക നിവാരണവും 17ന്

പത്തനംതിട്ട: പ്രവാസി കേരളീയ ക്ഷേമ ബോര്‍ഡിന്‍റെ ആഭിമുഖ്യത്തില്‍ പ്രവാസികള്‍ക്കായി അംഗത്വ കാമ്പയിനും അംശദായ കുടിശിക നിവാരണവും സംഘടിപ്പിക്കുന്നു. കോഴഞ്ചേരി മാരാമണ്‍ റിട്രീറ്റ് സെന്‍ററില്‍ 17 ന് രാവിലെ 10 മുതല്‍ കാമ്പയിന്‍ ആരംഭിക്കും. 18 നും 60 നും ഇടയില്‍ പ്രായമുള്ള രണ്ടു വര്‍ഷക്കാലം പ്രവാസജീവിതം നയിച്ച പ്രവാസികള്‍ക്ക് ക്ഷേമനിധിയില്‍ അംഗത്വമെടുക്കുന്നതിനും അംശദായ കുടിശിക പിഴ ഇളവോടുകൂടി അടച്ച് തീര്‍ക്കുന്നതിനുമുള്ള അവസരമുണ്ട്. ഫോണ്‍ : 9495630828, www.pravasikerala.org

അറയാഞ്ഞിലിമണ്‍, കുരുന്പൻമൂഴി പാലങ്ങൾ സമയബന്ധിതമായി തീർക്കും: മന്ത്രി

റാന്നി: പമ്പാനദിയില്‍ ജലനിരപ്പ് ഉയരുമ്പോള്‍ മലയോരമേഖലയായ ഒറ്റപ്പെട്ടുപോകുന്ന അറയാഞ്ഞിലിമൺ പ്രദേശത്തിനു പുതിയ പാലം നിര്‍മാണത്തിലൂടെ പരിഹാരമാകുമെന്ന് മന്ത്രി ഒ. ആർ. കേളു. അറയാഞ്ഞിലിമണ്‍ പാലം നിര്‍മാണോദ്ഘാടനം സര്‍ക്കാര്‍ എല്‍ പി സ്‌കൂളില്‍ നിര്‍വഹിച്ചു പ്രസംഗിക്കുകയായിരുന്നുമന്ത്രി. പദ്ധതി സമയബന്ധിതമായി പൂര്‍ത്തിയാക്കും. റോഡ്, സ്‌കൂൾ, ആശുപത്രി തുടങ്ങി എല്ലാ മേഖലയിലും വ്യക്തമായ ദിശാബോധത്തോടെ ഇടപെട്ട് സര്‍ക്കാര്‍ സംസ്ഥാനത്തെ വികസനപാതയില്‍ അതിവേഗം മുന്നോട്ട് നയിച്ചതായി മന്ത്രി പറഞ്ഞു. പെരുനാട്ടിലെ അറയാഞ്ഞിലിമൺ, കിസുമം ഉന്നതികള്‍ക്ക് അംബേദ്കര്‍ സെറ്റില്‍മെന്‍റ് പദ്ധതിയില്‍ ഉള്‍പ്പെടുത്തി ഒരുകോടി രൂപ വീതം അനുവദിച്ചതായി യോഗത്തിൽ അധ്യക്ഷത വഹിച്ച പ്രമോദ് നാരായൺ എംഎല്‍എ പറഞ്ഞു. ജില്ലാ കളക്ടര്‍ എസ്.പ്രേം കൃഷ്ണന്‍ മുഖ്യാതിഥിയായി. പട്ടികവര്‍ഗ വികസന വകുപ്പ് ഡെപ്യൂട്ടി ഡയറക്ടര്‍ ഷുമിന്‍ എസ് ബാബു റിപ്പോര്‍ട്ട് അവതരിപ്പിച്ചു. ചാത്തൻതറ: വികസനം എല്ലാ ജനങ്ങള്‍ക്കും ഒരേപോലെ ലഭ്യമാകണമെന്ന് മന്ത്രി ഒ. ആർ. കേളു. കുരുമ്പന്‍മൂഴി പാലം നിര്‍മാണോദ്ഘാടനം കുരുമ്പന്‍മൂഴി ഉന്നതിയില്‍ നിര്‍വഹിച്ചു പ്രസംഗിക്കുകയായിരുന്നു മന്ത്രി. മെട്രോ നഗരങ്ങളില്‍ മാത്രമല്ല ഗ്രാമങ്ങളിലും വികസനം എത്തണം. പട്ടികജാതി പട്ടികവർ‍ഗവിഭാഗത്തിന്‍റെ ഉന്നമനത്തിനായി വിദ്യാഭ്യാസ മേഖലയില്‍ നിരവധി പദ്ധതികളാണ് സര്‍ക്കാര്‍ നടപ്പിലാക്കുന്നത്. പ്രമോദ് നാരായൺ എംഎൽഎ അധ്യക്ഷത വഹിച്ചു. ജില്ലാ കളക്ടര്‍ എസ്.പ്രേം കൃഷ്ണന്‍ വിശിഷ്ടാതിഥിയായി. ജില്ലാ പഞ്ചായത്ത് അംഗം ലേഖ സുരേഷ്, റാന്നി ബ്ലോക്ക് പഞ്ചായത്ത് പ്രസിഡന്‍റ് കെ.എസ്.ഗോപി, അംഗം മാത്യു കാനാട്ട്, നാറാണംമൂഴി ഗ്രാമപഞ്ചായത്ത് പ്രസിഡന്‍റ് സോണിയ മനോജ്, ഫോറസ്റ്റ് റേഞ്ച് ഓഫീസര്‍ ബി.ആർ.ജയന്‍, സംസ്ഥാന പട്ടികവര്‍ഗ ഉപദേശക സമിതി അംഗം ജി.രാജപ്പൻ, ഊരു മൂപ്പന്‍ പൊടിയന്‍ കുഞ്ഞുകുഞ്ഞ്, കേരള സ്റ്റീല്‍ ഇന്‍ഡസ്ട്രീസ് ലിമിറ്റഡ് മാനേജര്‍ ഷാല്‍ബി തുടങ്ങിയവർ പ്രസംഗിച്ചു.

മൂഴിയാറിലെ 46 പട്ടികവര്‍ഗ കുടുംബങ്ങളുടെ പുനരധിവാസത്തിന് നാല് ഏക്കര്‍ ഭൂമി ലഭ്യമാക്കും

പത്തനംതിട്ട: മൂഴിയാറിലെ 46 പട്ടികവര്‍ഗ കുടുംബങ്ങള്‍ക്ക് പുനരധിവാസത്തിന് സ്ഥലം ഒരുക്കുമെന്ന് മന്ത്രി ഒ ആര്‍ കേളു. മൂഴിയാറിലെ മലമ്പണ്ടാരം കുടുംബങ്ങളുടെ പുനരധിവാസം സംബന്ധിച്ച് മന്ത്രിയുടെ അധ്യക്ഷതയില്‍ ചേര്‍ന്ന ഉന്നതതല യോഗത്തിലാണ് തീരുമാനം. കെഎസ്ഇബിയുടെ കൈവശമുള്ള വനം വകുപ്പിന്‍റെ നാല് ഏക്കര്‍ ഭൂമി ഇതിനായി വിനിയോഗിക്കും. പട്ടികവര്‍ഗ വകുപ്പും കെഎസ്ഇബിയും വനംവകുപ്പും ഇത് സംബന്ധിച്ച് കരാര്‍ തയാറാക്കും. വര്‍ഷങ്ങളായി വനാന്തരത്തില്‍ താമസിക്കുന്ന പട്ടികവര്‍ഗ കുടുംബങ്ങള്‍ക്ക് ഉപജീവനവും അടിസ്ഥാന സൗകര്യവും വകുപ്പ് ഉറപ്പാക്കുമെന്നും മന്ത്രി പറഞ്ഞു. നിലവില്‍ ശബരിഗിരി പദ്ധതിയോടനുബന്ധിച്ച് കെഎസ്ഇബിയുടെ കൈവശമുള്ള ഭൂമിയില്‍ താമസിക്കുന്നവര്‍ക്ക് വീട്, കുടിവെള്ളം, വൈദ്യുതി തുടങ്ങി അടിസ്ഥാന സൗകര്യങ്ങള്‍ ഒരുക്കും. യോഗത്തിനു മുമ്പ് മന്ത്രി സ്ഥലം സന്ദര്‍ശിച്ചു. വനവകാശനിയമ പ്രകാരം 38 കുടുംബങ്ങള്‍ക്ക് ലഭിച്ച ഒരേക്കര്‍ ഭൂമിയും ഉടന്‍ കൈമാറും. മൂഴിയാര്‍ കെഎസ്ഇബി ഇന്‍സ്‌പെക്ഷന്‍ ബംഗ്ലാവില്‍ ചേര്‍ന്ന യോഗത്തില്‍ കെ.യു. ജനീഷ് കുമാര്‍ എംഎൽഎ, ജില്ലാ കളക്ടര്‍ എസ്. പ്രേംകൃഷ്ണൻ, പട്ടികവര്‍ഗവികസന വകുപ്പ് ഡയറക്ടര്‍ ഡോ. മിഥുന്‍ പ്രേംരാജ്, സീതത്തോട് ഗ്രാമപഞ്ചായത്ത് പ്രസഡന്‍റ് പി. ആര്‍. പ്രമോദ്, ഗ്രാമപഞ്ചായത്ത് അംഗങ്ങള്‍, വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ഡിവൈഎഫ്ഐ നേതാവിന്‍റെ മരണം; സിബിഐ അന്വേഷിക്കണമെന്ന് പഴകുളം മധു

പത്തനംതിട്ട: ഡിവൈഎഫ്ഐ അടൂർ മേഖല സെക്രട്ടറി ആയിരുന്ന എം.ജെ. ജോയൽ മരിച്ചത് പോലീസ് മർദ്ദനം മൂലമാണെന്ന കുടുംബത്തിന്‍റെ പരാതി സംബന്ധിച്ച് സിബിഐ അന്വേഷിക്കണമെന്ന് കെപിസിസി ജനറൽ സെക്രട്ടറി പഴകുളം മധു ആവശ്യപ്പെട്ടു. പാർട്ടി യുവജന സംഘടനയുടെ മേഖലാ സെക്രട്ടറിയെ കൊലപ്പെടുത്തിയതാണെന്ന് കുടുംബം പറയുമ്പോൾ ഒരു അന്വേഷണം പോലും പാർട്ടി ആവശ്യപ്പെടാത്തത് ദുരൂഹമാണ്.പിണറായി വിജയൻ മുഖ്യമന്ത്രിയായിരിക്കുമ്പോൾ ഒരു പാർട്ടി കുടുംബത്തിന് മകന്റെ കസ്റ്റഡി മരണം അന്വേഷിക്കണമെന്ന് ആവശ്യപ്പെട്ട് അലയേണ്ടി വരുന്നത് എന്തുകൊണ്ടാണെന്നു വ്യക്തമല്ല. പാർട്ടി നേതാക്കൾക്ക് ഇതിൽ പങ്കുണ്ടെന്ന കുടുംബത്തിന്‍റെ ആരോപണവും ഗൗരവകരമാണെന്ന് മധു പറഞ്ഞു. മർദ്ദനത്തിന് നേതൃത്വം കൊടുത്ത പോലീസ് ഉദ്യോഗസ്ഥർ എല്ലാവരും ഇന്നും പാർട്ടി സംരക്ഷണത്തിൽ പ്രധാന സ്ഥലങ്ങളിൽ ജോലി ചെയ്യുകയാണെന്നും അദ്ദേഹം ചൂണ്ടിക്കാട്ടി. അന്വേഷണം സിബിഐയ്ക്കു വിട്ടെങ്കിൽ മാത്രമേ സത്യസന്ധമായ അന്വേഷണം സാധ്യമാകുകയുള്ളൂവെന്നും മധു അഭിപ്രായപ്പെട്ടു.

എം.ആർ. അജിത് കുമാറിന്‍റെ ട്രാക്ടർ യാത്ര റിപ്പോർട്ട് ചെയ്ത ഡിവൈഎസ്പിക്ക് സ്ഥലംമാറ്റം

പത്തനംതിട്ട: എഡിജിപി എം.ആർ. അജിത് കുമാറിന്‍റെ ശബരിമലയിലെ ട്രാക്ടർ യാത്ര വിവരം റിപ്പോർട്ട് ചെയ്ത ഉദ്യോഗസ്ഥന് സ്ഥലംമാറ്റം. പത്തനംതിട്ട സ്റ്റേറ്റ് സ്‌പെഷൽ ബ്രാഞ്ച് ഡിവൈഎസ്പി ഡോ. ആർ. ജോസിനെയാണ് ആലുവ റൂറൽ ഡിസിആർബിയിലേക്ക് സ്ഥലംമാറ്റിയത്. വിരമിക്കാൻ എട്ടു മാസം മാത്രം ശേഷിക്കവേയാണ് സ്ഥലംമാറ്റം. നവഗ്രഹ പൂജ കാലത്താണ് എഡിജിപി എം.ആർ. അജിത് കുമാർ പമ്പയിൽ നിന്ന് സന്നിധാനത്തേക്ക് ട്രാക്ടറിൽ യാത്ര ചെയ്തത്. എഡിജിപിയുടെ ട്രാക്ടർ യാത്രയുടെ ദൃശ്യങ്ങൾ സഹിതം മാധ്യമങ്ങളിൽ വാർത്തയായതോടെ സംഭവം ഏറെ വിവാദമായി. പോലീസിന്‍റെ ഉടമസ്ഥതയിലുള്ളതായിരുന്നു ട്രാക്ടർ. ട്രാക്ടറിൽ യാത്ര പാടില്ലെന്ന ഹൈക്കോടതി വിലക്ക് മറികടന്നായിരുന്നു എഡിജിപിയുടെ സഞ്ചാരം.

ഫെഡറൽ കപ്പ്‌ സോഫ്റ്റ് ബോൾ ചാമ്പ്യൻഷിപ്പ്: വനിതാ കേരള ടീമിനെ ഹഷിഷ രഹ്‌ന നയിക്കും

പത്തനംതിട്ട: ഉത്തർപ്രദേശിലെ ഗാസിയാബാദ് എച്ച്എൽഎം കോളജിൽ നടക്കുന്ന 15 മത് ഫെഡറേഷൻ കപ്പ്‌ സോഫ്റ്റ് ബോൾ ചാമ്പ്യൻഷിപ്പിൽ പങ്കെടുക്കുന്ന കേരള വനിതാ ടീമിനെ ഹഷിഷ രഹ്‌ന (വയനാട് ) നയിക്കും. പത്തനംതിട്ട കാതോലിക്കേറ്റ് കോള‌ ഗ്രൗണ്ടിൽ നടന്ന ക്യാമ്പിലെ മികച്ച പ്രകടനത്തിന്‍റെ അടിസ്ഥാനത്തിലാണ് ടീമിനെ തെരഞ്ഞെടുത്തത്. മറ്റ് ടീം അംഗങ്ങൾ: സ്നേഹ ശ്രീധരൻ ( വൈസ് ക്യാപ്റ്റൻ, പത്തനംതിട്ട), ഹരി നന്ദന, ഉമാപതി എസ്, കൃഷ്ണ നന്ദ, ( കോഴിക്കോട്), വിസ്മയ രാജു, ശാലിനി സജി ( കോട്ടയം), എസ്. അശ്വതി, എം. നന്ദന, പി. അക്ഷയ( പാലക്കാട്), ജിബി എബി, ശ്രീരഞ്ജിനി,നിരഞ്ജന പ്രവീൺ), എ.എൻ. ലക്ഷ്മി( പത്തനംതിട്ട), എ.എൻ. അസിൻ (തിരുവനന്തപുരം), അശ്വതി രാജ് ( കൊല്ലം). പി.ബി. കുഞ്ഞുമോൻ (പത്തംതിട്ട) കോച്ചും എം. ഷിഫന (പാലക്കാട്) മാനേജരുമാണ്.

പുനരൈക്യ വാർഷികാഘോഷം; പത്തനംതിട്ട രൂപതയിൽ 14ന് അനുസ്മരണ ശുശ്രൂഷ

പത്തനംതിട്ട: പത്തനംതിട്ട രൂപതയുടെ ആഭിമുഖ്യത്തിൽ 16 മുതൽ 20 വരെ അടൂർ ഓൾ സെയ്ന്‍റ്സ് സ്കൂളിൽ നടക്കുന്ന 95 - ാമത് പുനരൈക്യ വാർഷികാഘോഷങ്ങളുടെ ഭാഗമായി 14ന് പത്തനംതിട്ടയിലെ ദേവാലയങ്ങളിൽ അനുസ്മരണ ശുശ്രൂഷകൾ നടക്കും. പത്തനംതിട്ട രൂപതയിലെ സീതത്തോട്, റാന്നി-പെരുനാട്, കോന്നി, പത്തനംതിട്ട, പന്തളം എന്നീ വൈദികജില്ലകളിലായി 100 പള്ളികളിലും ഇടവക തലത്തിലുള്ള പുനരൈക്യ ആഘോഷങ്ങൾക്ക് തുടക്കം കുറിച്ച് 14 ന് കുർബാനയും തുടർന്ന് അനുസ്‌മരണവും നടത്തും. മാർ ഈവാനിയോസ് മെത്രാപ്പോലീത്തയ്ക്കൊപ്പം ആദ്യം പുനരൈക്യപ്പെട്ട അഞ്ചു പേരിൽ ഒരാളായ ഫാ. ജോൺ കുഴിനാപ്പുറത്തിന്‍റെ മാതൃ ഇടവകയായ ചീക്കനാൽ സെന്‍റ് പീറ്റേഴ്‌സ് മലങ്കര സുറിയാനി കത്തോലിക്കാ പള്ളിയിൽ പത്തനംതിട്ട രൂപതാധ്യക്ഷൻ ഡോ. സാമുവേൽ മാർ ഐറേനിയോസ് മെത്രാപ്പോലീത്ത കുർബാന അർപ്പിച്ച് അനുസ്‌മരണ ശുശ്രൂഷകൾക്ക് നേതൃത്വം നൽകും. പ്രയാണങ്ങൾ 16ന് അടൂരിൽ സംഗമിക്കും പുനരൈക്യ വാർഷികത്തോടും സഭാ സംഗമത്തോടും അനുബന്ധിച്ച് വിവിധ രൂപതകളിൽ നിന്നും വൈദിക ജില്ലകളിൽ നിന്നുമുള്ള പ്രയാണങ്ങൾ 16നു വൈകുന്നേരം 4.30ന് അടൂരിൽ സംഗമിക്കും. തിരുവനന്തപുരം മേജർ അതിരൂപതയുടെ നേതൃത്വത്തിൽ പട്ടം കബറിങ്കൽ നിന്നും ദീപശിഖയും തിരുവല്ല അതിരൂപതയുടെ നേതൃത്വത്തിൽ സെന്‍റ് ജോൺസ് കത്തീഡ്രലിൽ നിന്ന് മാർ തെയോഫിലോസ് മെത്രാപ്പോലീത്തയുടെ ഛായാചിത്രവും മാവേലിക്കര രൂപതയുടെ നേതൃത്വത്തിൽ ധന്യൻ മാർ ഈവാനിയോസ് മെത്രാപ്പോലീത്തയുടെ ജന്മഗൃഹത്തിൽ നിന്നും ഛായാചിത്രവും - പത്തനംതിട്ട രൂപതയിലെ പെരുനാട് മാന്പാറ ദേവാലയത്തിൽ നിന്നും മറ്റു വൈദികജില്ലകളിൽ നിന്നും ബൈബിൾ, വള്ളിക്കുരിശ്, ഛായാചിത്രം, കാതോലിക്കാ പതാക എന്നിവ അടൂർ തിരുഹൃദയ ദേവാലയത്തിൽ സംഗമിക്കും. അവിടെനിന്നും സംയുക്ത പ്രയാണം കണ്ണങ്കോട്, ആനന്ദപ്പള്ളി വഴി സമ്മേളന നഗറിലേക്ക് നീങ്ങും. സമ്മേളന നഗറിൽ കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ പതാക ഉയർത്തും.

ജില്ലാ റോളർ സ്കേറ്റിംഗ് ചാന്പ്യൻഷിപ്പ്

പത്തനംതിട്ട: ജില്ലാ റോളർ സ്കേറ്റിംഗ് അസോസിയേഷന്‍റെ ആഭിമുഖ്യത്തിൽ ജില്ലാ റോളർ സ്കേറ്റിംഗ് ചാമ്പ്യൻഷിപ്പ് ഇന്നും നാളെയും 20, 21 തീയതികളിലുമായി പത്തനംതിട്ടയിൽ നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. ഇന്നും നാളെയും വാഴമുട്ടം നാഷണൽ യുപി സ്കൂ‌ളിൽ റോളർ സ്കേറ്റിംഗ് റിംഗിൽ ആർട്ടിസ്റ്റിക് വിഭാഗത്തിലുള്ള മത്സരങ്ങളും 20, 21 തീയതികളിൽ പത്തനംതിട്ട മഡോണ ഇന്‍റർനാഷണൽ സ്കൂളിൽ സ്കേറ്റിംഗ് റിംഗിലെ സ്പ‌ീഡ് വിഭാഗത്തിലുള്ള റിംഗ് മത്സരങ്ങളും രാവിലെ 6.30 മുതൽ തുടങ്ങും. 21നു രാവിലെ 5.30 ന് പത്തനംതിട്ട റിംഗ് റോഡിൽ റോഡ് റെയ്സ് മത്സരങ്ങളും വൈകുന്നേരം നാലു മുതൽ പത്തനംതിട്ട മഡോണ ഇന്‍റർനാഷണൽ സ്‌കൂൾ റിംഗിൽ റോളർ ഹോക്കി മത്സരങ്ങളും നടക്കും. 21 ന് പത്തനംതിട്ട മഡോണ ഇന്‍റർനാഷണൽ സ്‌കൂളിൽ ജില്ലാതല ഉദ്ഘാനം രാവിലെ 11 ന് ജില്ലാ സ്പോർട്‌സ് കൗൺസിൽ പ്രസിഡന്‍റ് കെ.അനിൽകുമാർ നിർവഹിക്കും. റോളർസ്കേറ്റിംഗ് അസോസിയേഷൻ പ്രസിഡന്‍റ് ആർ. പ്രസന്നകുമാർ അധ്യക്ഷത വഹിക്കും. നാഷണൽ മെഡൽ ലഭിച്ച റോളർ സ്കേറ്റിംഗ് കായികതാരങ്ങൾക്ക് സ്വീകരണം നൽകും. ജില്ലയുടെ വിവിധ ഭാഗങ്ങളിൽ നിന്നായി മുന്നൂറോളം സ്കേറ്റിംഗ് താരങ്ങൾ പങ്കെടുക്കും. ഇതിൽ നിന്നുള്ള വിജയികളാണ് സംസ്ഥാന ചാമ്പ്യൻഷിപ്പിൽ ജില്ലയെ പ്രതിനിധികരിക്കുന്നത്. അസോസിയേഷൻ ജില്ലാ പ്രസിഡന്‍റ് ആർ. പ്രസന്നകുമാർ, മനോജ് പി. ആനന്ദ് , വിഷ്ണു രഘുനാഥ് എന്നിവർ പത്രസമ്മേളനത്തിൽ പങ്കെടുത്തു.

എയ്ഡഡ് സ്കൂൾ നിയമനം: കെസിസി യോഗം ഇന്ന്

തിരുവല്ല: എയ്ഡഡ് സ്കൂളുകളിൽ ഭിന്നശേഷി സംവരണവുമായി ബന്ധപ്പെട്ട വിഷയത്തിൽ നിയമനങ്ങൾ അംഗീകരിക്കാത്തതുമായി ബന്ധപ്പെട്ട വിഷയത്തിൽ തുടർ നടപടികൾ ആലോചിക്കുന്നതിലേക്ക് കേരള കൗൺസിൽ ഓഫ് ചർച്ചസ് അംഗ സഭകളിലെ എയ്ഡഡ് സ്കൂൾ മാനേജർമാരുടെ യോഗം ഇന്ന് രാവിലെ 11ന് തിരുവല്ല മീന്തലക്കരയിലെ കെസിസി ആസ്ഥാനത്ത് പ്രസിഡന്‍റ് അലക്സിയോസ് മാർ യൗസേബിയോസ് മെത്രാപ്പോലീത്തയുടെ അധ്യക്ഷതയിൽ കൂടും. ഭരണഘടന ഉറപ്പ് നൽകുന്ന തുല്യതയ്ക്കുള്ള അടിസ്ഥാന മൗലിക അവകാശങ്ങളുടെ ലംഘനവും നിയമബോധം മറികടന്നുള്ള ഉത്തരവുകളും തീരുമാനങ്ങളും സർക്കാർ ഭാഗത്തു നിന്ന് ഉണ്ടാകുന്നതിലൂടെ നിയമനാംഗീകാരം കാത്തിരിക്കുന്ന അധ്യാപകരെയും അവരുടെ കുടുംബങ്ങളെയും ആത്മഹത്യയിലേക്ക് തള്ളിവിടുകയാണ് ഉത്തരവാദിത്തപ്പെട്ടവർ ചെയ്യുന്നതെന്ന് കെസിസി ജനറൽ സെക്രട്ടറി പ്രകാശ് പി. തോമസ് ചൂണ്ടിക്കാട്ടി. ഇതുമായി ബന്ധപ്പെട്ട നിയമനടപടികൾ ഉൾപ്പെടെയുള്ള വിഷയങ്ങളിൽ ഇന്നത്തെ യോഗത്തിൽ തീരുമാനമുണ്ടാകും.

പത്തനംതിട്ട ജില്ലാ പഞ്ചായത്തില്‍ 13 സംവരണ മണ്ഡലങ്ങള്‍

പത്തനംതിട്ട: ജില്ലാ പഞ്ചായത്തിന്‍റെ 17 മണ്ഡലങ്ങളില്‍ ഒമ്പതെണ്ണം വനിതാ ജനറല്‍ സംവരണവും ഒരു മണ്ഡലം പട്ടികജാതി വനിതയ്ക്കും. പട്ടികജാതി ജനറല്‍ വിഭാഗത്തില്‍ രണ്ട് മണ്ഡലങ്ങളും സംവരണം ചെയ്തപ്പോള്‍ ജനറല്‍ വിഭാഗത്തില്‍ ലഭിക്കുക നാലു സീറ്റുകള്‍ മാത്രം. 2020ലെ തെരഞ്ഞെടുപ്പില്‍ 16 മണ്ഡലങ്ങളുണ്ടായിരുന്നതില്‍ എട്ടെണ്ണം വനിതാ ജനറല്‍ സംവരണവും പട്ടികജാതി ജനറൽ, വനിത എന്നിവര്‍ക്കായി ഓരോ മണ്ഡലവുമാണ് സംവരണം ചെയ്തിരുന്നത്. ത്രിതല പഞ്ചായത്തുകളില്‍ വാര്‍ഡുകളുടെയും മണ്ഡലങ്ങളുടെയും എണ്ണത്തില്‍ വര്‍ധനയുണ്ടായപ്പോള്‍ ആനുപാതികമായ വനിതാ സംവരണ വാര്‍ഡുകളുടെ എണ്ണവും വര്‍ധിച്ചു. 50 ശതമാനം വാര്‍ഡുകള്‍ ജനറല്‍ വിഭാഗത്തില്‍തന്നെ എല്ലായിടത്തും വനിതയ്ക്കും ലഭിക്കും. 15 വാര്‍ഡുകളുള്ള ഗ്രാമപഞ്ചായത്തുകളില്‍ വനിതാ സംവരണം എട്ടെണ്ണമാണ്. ഇതുകൂടാതെയാണ് പട്ടികജാതി വനിതാ സംവരണ സീറ്റുകളും. ബ്ലോക്ക് പഞ്ചാ. 73 വനിത പത്തനംതിട്ട ജില്ലയിലെ എട്ട് ബ്ലോക്ക് പഞ്ചായത്തുകളിലായി 114 മണ്ഡലങ്ങളുള്ളതില്‍ 73 എണ്ണം വനിതാ സംവരണമായിരിക്കും. ബ്ലോക്ക് പഞ്ചായത്തുകളില്‍ പറക്കോട് ഒഴികെയുള്ള സ്ഥലങ്ങളില്‍ ഏഴ് വനിതാ ജനറല്‍ മണ്ഡലങ്ങളുണ്ടാകും. പറക്കോട്ട് എട്ട് വനിതാ സംവരണ മണ്ഡലങ്ങളും ഉണ്ടാകും. പന്തളം, പറക്കോട് ബ്ലോക്കുകളില്‍ പട്ടികജാതി വനിതകള്‍ക്കായി രണ്ട് സംവരണ മണ്ഡലങ്ങളുണ്ടാകും. റാന്നിയില്‍ പട്ടികജാതി വനിതകള്‍ക്കായി മണ്ഡലം സംവരണം ചെയ്തിട്ടില്ല. മറ്റിടങ്ങളില്‍ ഓരോ മണ്ഡലങ്ങളാണ് സംവരണം ചെയ്തിരിക്കുന്നത്. ഗ്രാമപഞ്ചായത്തുകളില്‍ 474 ജില്ലയിലെ 53 ഗ്രാമപഞ്ചായത്തുകളിലായി ആകെയുള്ള 833 വാര്‍ഡുകളില്‍ 473 വനിതാ സംവരണ വാര്‍ഡുകളുണ്ടാകും. ഇതില്‍ 416 എണ്ണം വനിത ജനറല്‍ വിഭാഗത്തിലും 57 എണ്ണം പട്ടികജാതി വനിതകള്‍ക്കും ഒരെണ്ണം പട്ടികവര്‍ഗ വനിതയ്ക്കുമായി സംവരണം ചെയ്തിരിക്കുകയാണ്. പട്ടികജാതി ജനറല്‍ വിഭാഗത്തിനു നല്‍കിയിട്ടുള്ള സംവരണ വാര്‍ഡുകള്‍ക്കു പുറമേയാണ് പട്ടികജാതി വനിതാ സംവരണ വാര്‍ഡുകളുള്ളത്. നറുക്കെടുപ്പ് അടുത്തമാസം ത്രിതല പഞ്ചായത്ത്, നഗരസഭ സംവരണ മണ്ഡലങ്ങളുടെയും വാര്‍ഡുകളുടെയും നറുക്കെടുപ്പ് അടുത്ത മാസം നടക്കും. ഇതിനുള്ള പരിശീലനം 26ന് തുടങ്ങും. ത്രിതല പഞ്ചായത്തുകളില്‍ ജില്ലാ കളക്ടറുടെയും നഗരസഭകളില്‍ തദ്ദേശ വകുപ്പ് ജില്ലാ ജോയിന്‍റ് ഡയറക്ടറുടെയും നേതൃത്വത്തിലാണ് നറുക്കെടുപ്പ് നടപടി. ഗ്രാമപഞ്ചായത്തുകൾ, ആകെ വാര്‍ഡുകള്‍, നിശ്ചയിക്കപ്പെടേണ്ട വനിതാ സംവരണം, പട്ടികജാതി സംവരണം, പട്ടികജാതി വനിതാ സംവരണം, പട്ടികവര്‍ഗ സംവരണം, പട്ടികവര്‍ഗ വനിതാ സംവരണം ക്രമത്തിൽ ആനിക്കാട് 14 7 2 1 0 0 കവിയൂര്‍ 14 7 2 1 0 0 കൊറ്റനാട് 14 7 2 1 0 0 കോട്ടാങ്ങല്‍ 14 7 1 0 0 0 കല്ലൂപ്പാറ 14 7 2 1 0 0 കുന്നന്താനം 16 8 2 1 0 0 മല്ലപ്പള്ളി 15 8 2 1 0 0 കടപ്ര 16 8 2 1 0 0 കുറ്റൂര്‍ 15 8 2 1 0 0 നിരണം 14 7 2 1 0 0 നെടുമ്പ്രം 14 7 1 0 0 0 പെരിങ്ങര 16 8 2 1 0 0 അയിരൂര്‍ 16 8 1 0 0 0 ഇരവിപേരൂര്‍ 18 9 3 2 0 0 കോയിപ്രം 18 9 3 2 0 0 തോട്ടപ്പുഴശേരി 14 7 1 0 0 0 എഴുമറ്റൂര്‍ 15 8 1 0 0 0 പുറമറ്റം 14 7 2 1 0 0 ഓമല്ലൂര്‍ 15 8 2 1 0 0 ചെന്നീര്‍ക്കര 15 8 3 2 0 0 ഇലന്തൂര്‍ 14 7 2 1 0 0 ചെറുകോല്‍ 14 7 1 0 0 0 കോഴഞ്ചേരി 14 7 1 0 0 0 മല്ലപ്പുഴശേരി 14 7 2 1 0 0 നാരങ്ങാനം 14 7 1 0 0 0 റാന്നി പഴവങ്ങാടി 17 9 1 0 0 0 റാന്നി 14 7 1 0 0 0 റാന്നി അങ്ങാടി 14 7 1 0 0 0 പെരുനാട് 16 8 2 1 1 0 വടശേരിക്കര 16 8 2 1 0 0 ചിറ്റാര്‍ 14 7 2 1 1 0 സീതത്തോട് 14 7 1 0 0 0 നാറാണംമൂഴി 14 7 1 0 2 1 വെച്ചൂച്ചിറ 16 8 1 0 0 0 കോന്നി 20 10 3 2 0 0 അരൂവാപ്പുലം 15 8 2 1 0 0 പ്രമാടം 20 10 2 1 0 0 മൈലപ്ര 14 7 2 1 0 0 വള്ളിക്കോട് 16 8 3 2 0 0 തണ്ണിത്തോട് 14 7 1 0 0 0 മലയാലപ്പുഴ 14 7 2 1 0 0 പന്തളം തെക്കേക്കര 15 8 3 2 0 0 തുമ്പമണ്‍ 14 7 3 2 0 0 ഏനാദിമംഗലം 16 8 3 2 0 0 ഏറത്ത് 17 9 3 2 0 0 ഏഴംകുളം 21 11 3 2 0 0 കടമ്പനാട് 18 9 3 2 0 0 കലഞ്ഞൂര്‍ 20 10 3 2 0 0 കൊടുമണ്‍ 19 10 5 3 0 0 പള്ളിക്കല്‍ 24 12 5 3 0 0 ആറന്മുള 19 10 5 3 0 0 മെഴുവേലി 14 7 3 2 0 0 കുളനട 17 9 3 2 0 0 ബ്ലോക്ക് പഞ്ചായത്ത് മല്ലപ്പള്ളി 14 7 2 1 0 0 പുളിക്കീഴ് 14 7 2 1 0 0 കോയിപ്രം 14 7 2 1 0 0 ഇലന്തൂർ 14 7 2 1 0 0 റാന്നി 14 7 1 0 0 0 കോന്നി 14 7 2 1 0 0 പന്തളം 14 7 3 2 0 0 പറക്കോട് 16 8 3 2 0 0

അറയാഞ്ഞിലിമൺ, കുരുന്പൻമൂഴി നിവാസികളുടെ ദുരിതങ്ങൾക്ക് അറുതി; പുതിയ പാലങ്ങളുടെ നിർമാണം ഇന്നു തുടങ്ങും

റാന്നി: അറയാഞ്ഞിലിമൺ, കുരുമ്പൻമൂഴി നിവാസികൾക്ക് ഇതു സ്വപ്നസാഫല്യത്തിന്‍റെ നിമിഷം. പന്പാനദിയുടെ മറുകരകളിൽ വനമേഖലയോടു ചേർന്നു കിടക്കുന്ന രണ്ടു പ്രദേശങ്ങളിലേക്കും പുതിയ ഇരുന്പു പാലങ്ങളാണ് പട്ടികവർഗ വികസന വകുപ്പ് നിർമിക്കുന്നത്. കുരുമ്പന്‍മൂഴി പാലത്തിന് 3.97കോടി രൂപയും അരയാഞ്ഞിലിമണ്‍ പാലത്തി 2.68 കോടിയുമാണ് പട്ടിക വര്‍ഗ ക്ഷേമ വകുപ്പ് ഫണ്ടില്‍നിന്ന് അനുവദിച്ചിട്ടുള്ളത്. റാന്നിയുടെ കിഴക്കൻ മേഖലയിൽ പട്ടികവർഗ വിഭാഗക്കാർ ഉൾപ്പെടെ സാന്പത്തികമായി പിന്നോക്കാവസ്ഥയിലുള്ളവർ ജീവിക്കുന്ന സ്ഥലങ്ങളാണ് ഇരു പ്രദേശങ്ങളും. രണ്ടു പ്രദേശങ്ങളുടെയും മൂന്നു വശവും ശബരിമല വനവും ഒരു ഭാഗം പമ്പാനദിയുമാണ്. പതിറ്റാണ്ടുകൾക്കു മുമ്പ് ജനകീയ പങ്കാളിത്തത്തോടെ പമ്പാ നദിക്കു കുറുകെ നിർമിച്ച ഉയരം കുറഞ്ഞ അരയാഞ്ഞിലിമണ്‍, കുരുമ്പന്‍മൂഴി കോസ് വേകളായിരുന്ന പ്രദേശങ്ങളിലേക്ക് എത്താനുള്ള ഏക മാർഗങ്ങൾ. വെള്ളത്തിൽ മുങ്ങുന്ന കോസ്‌വേ അറയാഞ്ഞിലിമണ്ണിലും കുരുമ്പൻമുഴിയിലും പതിറ്റാണ്ടുകൾക്ക് മുമ്പ് ജനകീയ പങ്കാളിത്തത്തോടെ നിർമിച്ച ഉയരം കുറഞ്ഞ ഇടുങ്ങിയ കോസ്‌വേ പാലം മാത്രമാണ് ഈ പ്രദേശത്തേക്കുള്ള ഏക ഗതാഗത മാർഗം. അറയാഞ്ഞിലിമണ്ണിൽ പഴയ തൂക്കുപാലം വെള്ളപ്പൊക്കത്തിൽ തകർന്നു പോയ ശേഷം ജില്ലാ പഞ്ചായത്ത്‌ നിർമിച്ച നടപ്പാലം ഇക്കഴിഞ്ഞ 2018ലെ മഹാപ്രളയത്തിൽ ഒലിച്ചുപോയിരുന്നു. പ്രളയത്തിനു ശേഷം കോസ്‌വേ പാലങ്ങളും ദുർബലമായി. പ്രളയത്തിൽ വൻ തോതിൽ മണൽ അടിഞ്ഞതു മൂലം മഴ പെയ്താൽ കുരുമ്പൻമുഴിയിലെ കോസ്‌വേ പാലം വെള്ളത്തിൽ മുങ്ങുന്ന സ്ഥിതിയായിരുന്നു. ഇഴഞ്ഞിഴഞ്ഞ് യാത്ര വഴിമുട്ടിയതോടെ നാട്ടുകാർ പിരിവെടുത്ത് അറയാഞ്ഞിലിമണ്ണിൽ നടപ്പാല നിർമിക്കാ നൊരുങ്ങി. ഇതിനിടെ, സർക്കാർതന്നെ പാലം നിർമിക്കാൻ പദ്ധതിയിട്ടു. ഇതോടെ നാട്ടുകാർ പാലം നിർമാണം ഉപേക്ഷിച്ചു. എന്നാൽ, സർക്കാർ പദ്ധതി അനിശ്ചിതമായി നീണ്ടു. വീണ്ടും ജനരോഷ മുയർന്നു. അനുമതി കൾ വേഗത്തിലാക്കി നിർമാണ ത്തിലേക്ക് എത്തുക യായിരുന്നു. സ്റ്റീൽ നിർമിത പാലങ്ങൾ പൂർത്തിയാകുന്നതോടെ പ്രദേശങ്ങൾക്ക് വലിയ ആശ്വാ സമാകും. ഒറ്റപ്പെടൽ ഒഴിവാകും രണ്ടു വര്‍ഷം മുമ്പ് പെരുന്തേനരുവി ഡാം ഭാഗത്തേക്കു വനത്തില്‍ കൂടിയുള്ള ചണ്ണ - കുരുമ്പൻ മൂഴി റോഡ് മുഖ്യമന്ത്രിയുടെ റീ ബിൽഡ് കേരള ഇനിഷ്യേറ്റീവ് പദ്ധതിയിൽ ഉൾപ്പെടുത്തി സഞ്ചാരയോഗ്യമാക്കിയതോടെ അല്പം ചുറ്റിയാലും മറുകരയിലെത്താനാകുമെന്നത് ആശ്വാസമായി. എന്നാല്‍, സന്ധ്യ കഴിഞ്ഞാല്‍ വനത്തില്‍ കൂടിയുള്ള യാത്ര വന്യമൃഗശല്യമുള്ളതിനാല്‍ സുരക്ഷിതമായിരുന്നില്ല. പമ്പാനദിയിൽ ജലനിരപ്പ് ഉയർന്ന് കോസ് വേ മുങ്ങുന്നതോടെ ഫയർഫോഴ്സിനും മറ്റ് രക്ഷാപ്രവർത്തകർക്കും ദിവസങ്ങളോളം ഇവിടെ തങ്ങി രക്ഷാപ്രവർത്തനം നടത്തേണ്ട സ്ഥിതിയായി. 2019ലും 2021ലും ഇത്തരം സാഹചര്യങ്ങൾ ആവർ‌ത്തിക്കപ്പെട്ടു. ആദിവാസി കോളനികൾ അടങ്ങുന്ന ഈ മേഖലകൾ അനുഭവിക്കുന്ന ബുദ്ധിമുട്ട് പ്രമോദ് നാരായൺ എംഎൽഎ പട്ടികവർഗ ക്ഷേമമന്ത്രിയായിരുന്ന കെ. രാധാകൃഷ്ണന്‍റെ ശ്രദ്ധയിൽപെടുത്തിയതോടെ അദ്ദേഹം സ്ഥലം സന്ദർശിച്ചു സ്ഥിതിഗതികൾ പരിശോധിച്ചു. തുടർന്നാണ് പട്ടികവർഗക്ഷേമ വകുപ്പിൽനിന്നു നടപ്പാലങ്ങൾ നിർമിക്കാൻ ഫണ്ട് അനുവദിച്ചത്. സ്റ്റീല്‍ പാലങ്ങള്‍ നിര്‍മിക്കുന്നതോടെപ്രശ്‌നത്തിനു ശാശ്വത പരിഹാരമാകും. ചെറിയ ആംബുലന്‍സുകള്‍ക്ക് സഞ്ചരിക്കാന്‍ കഴിയുന്ന വീതിയിലുള്ള പാലങ്ങളാണ് നിര്‍മിക്കുന്നത്. എട്ടുമാസത്തിനുള്ളില്‍ പൂര്‍ത്തിയാക്കുകയാണ് ലക്ഷ്യം. നിർമാണോദ്ഘാടനം രണ്ട് വേദികളിൽ അരയാഞ്ഞിലിമണ്‍ പാലം നിര്‍മാണോദ്ഘാടനം ഉച്ചകഴിഞ്ഞ് മൂന്നിന് അരയാഞ്ഞിലിമണ്‍ സര്‍ക്കാര്‍ എല്‍പി സ്‌കൂളില്‍ മന്ത്രി ഒ. ആർ. കേളു നിര്‍വഹിക്കും കുരുന്പൻമൂഴി പാലം നിർമാണോദ്ഘാടനം കുരുന്പൻമൂഴി ഉന്നതിയിൽ വൈകുന്നേരം നാലിനു ചേരുന്ന ചടങ്ങിൽ മന്ത്രി കേളു നിർവഹിക്കും. യോഗങ്ങളിൽ പ്രമോദ് നാരായൺ എംഎൽഎ അധ്യക്ഷത വഹിക്കും. പട്ടികവര്‍ഗ വികസന വകുപ്പ് ഡയറക്ടര്‍ മിഥുന്‍ പ്രേംരാജ് റിപ്പോര്‍ട്ട് അവതരിപ്പിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. ജില്ലാ കളക്ടര്‍ എസ്. പ്രേം കൃഷ്ണന്‍ മുഖ്യാതിഥിയാകും. ട്രൈബല്‍ ഡവലപ്മെന്‍റ് ഓഫീസര്‍ എസ്. എ. നജിം, റാന്നി ബ്ലോക്ക് പഞ്ചായത്ത് പ്രസിഡന്‍റ് കെ. എസ്. ഗോപി, ഗ്രാമപഞ്ചായത്ത് പ്രസിഡന്‍റുമാരായ പി. എസ്. മോഹനന്‍, ഇ.വി. വര്‍ക്കി, സോണിയ മനോജ്, ത്രിതല പഞ്ചായത്ത് അംഗങ്ങൾ, വകുപ്പ് ഉദ്യോഗസ്ഥര്‍, രാഷ്‌ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുക്കും.

പോലീസിലെ ക്രിമിനൽവത്കരണത്തിന്‍റെ പ്രത്യാഘാതങ്ങൾ ഗുരുതരം: ആന്‍റോ ആന്‍റണി

പത്തനംതിട്ട: കഴിഞ്ഞ ഒന്പത് വര്‍ഷമായി കേരളാ പോലീസിനെ ക്രിമനല്‍വത്കരിച്ചു എന്നതാണ് പിണറായി ഗവണ്‍മെന്‍റിന്‍റെ നേട്ടമെന്നും അത് ദൂരവ്യാപകമായ പ്രത്യാഘാതങ്ങള്‍ സേനയില്‍ ഉണ്ടാക്കുമെന്നും കെപിസിസി രാഷ്‌ട്രീയകാര്യസമതി അംഗം ആന്‍റോ ആന്‍റണി എംപി. ‌ കുന്നംകുളം പോലീസ് സ്റ്റേഷനില്‍ സുജിത് എന്ന കോണ്‍ഗ്രസ് നേതാവിനെ തല്ലിചതച്ച പോലീസുകാരെയും കേരളാ പോലീസിലെ ക്രിമിനലുകളെയും സർവീസില്‍ നിന്നും പിരിച്ചുവിടണമെന്ന് ആവശ്യപ്പെട്ട് പത്തനംതിട്ട പോലീസ് സ്റ്റേഷനു മുന്നില്‍ നടത്തിയ പ്രധിഷേധ സദസ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജനങ്ങളുടെ ജീവനും സ്വത്തിനും സംരക്ഷണം നല്‍കേണ്ട പോലീസ് അവരുടെ ജീവനു തന്നെ ഭീഷണിയാകുന്ന വിചിത്ര കാഴ്ചയാണ് കേരളത്തില്‍ കാണുന്നതെന്നും ആന്‍റോ ആന്‍റണി പറഞ്ഞു. തെറ്റ് കണ്ടാല്‍ തിരുത്താന്‍ നിര്‍ദ്ദേശം നല്‍കേണ്ട രാഷ്‌ട്രീയ, ഭരണ നേതൃത്വം ഈ കിരാത നടപടികളെ പ്രോത്സാഹിപ്പിക്കുന്നതുവഴി പോലീസ് സേനയിലെ വലിയൊരു വിഭാഗം സാഡിസ്റ്റുകളായ മനോരോഗികളായി മാറിയിരിക്കുന്നു. മനോരോഗ വിദഗ്ധരെക്കൊണ്ട് കേരളാ പോലീസിനെ ചികില്‍സിക്കേണ്ട അവസ്ഥയിലെത്തിച്ചു എന്നതാണ് പിണറായി വിജയന്‍റെ ഭരണ നേട്ടമെന്നും ആന്‍റോ ആന്‍റണി എംപി പറഞ്ഞു. കോണ്‍ഗ്രസ് പത്തനംതിട്ട ടൗണ്‍ മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് റെനീസ് മുഹമ്മദ് അധ്യക്ഷത വഹിച്ചു. കെ. ജയവര്‍മ, ഡിസിസി ഭാരവാഹികളായ എ. സുരേഷ് കുമാർ, കെ. ജാസിംകുട്ടി, സജി കൊട്ടക്കാട്, എം.സി. ഷെറീഫ്, റോഷന്‍ നായർ, റോജിപോള്‍ ദാനിയേല്‍, സിന്ധു അനിൽ, കെ.ജി. അനിത, ബ്ലോക്ക് കോണ്‍ഗ്രസ് പ്രസിഡന്‍റ് ജെറി മാത്യു സാം, മണ്ഡലം പ്രസിഡന്‍റുമാരായ ജി. ജോൺ, നാസര്‍ തോണ്ടമണ്ണില്‍, കെ.പി. മുകുന്ദൻ, യൂത്ത് കോണ്‍ഗ്രസ് ജില്ലാ പ്രസിഡന്‍റ് വിജയ് ഇന്ദുചൂഡൻ, മഹിളാ കോണ്‍ഗ്രസ് ജില്ലാ പ്രസിഡന്‍റ് രജനി പ്രദീപ്, നേതാക്കളായ സജി കെ. സൈമൺ, കെ.ജി. റെജി, നഹാസ് പത്തനംതിട്ട, അബ്ദുള്‍കലാം ആസാദ്, പി.കെ. ഇക്ബാൽ, അജിത് മണ്ണില്‍, അഫ്സല്‍ പത്തനംതിട്ട, അഖില്‍ അഴൂർ, അന്‍സര്‍ മുഹമ്മദ്, സജി അലക്സാണ്ടർ, ദിനേശ് വെട്ടിപ്പുറം, ജോണ്‍സണ്‍ ഇലന്തൂര്‍, സജിനി മോഹൻ, ഏബല്‍ മാത്യു, വിന്‍സന്‍റ് ചിറക്കാല, അബ്ദുള്‍ ഷുക്കൂര്‍ തുടങ്ങിയവർ പ്രസംഗിച്ചു.

മാനസികാരോഗ്യം വീണ്ടെടുക്കാനുള്ള സംവിധാനങ്ങൾ അത്യന്താപേക്ഷിതം: മാർ ബർണബാസ്

റാന്നി: മാനസികാരോഗ്യം വീണ്ടെടുക്കുന്നതിനുള്ള സംവിധാനങ്ങൾ അത്യന്താപേക്ഷിതമായ കാലഘട്ടത്തിലാണ് നാം ജീവിക്കുന്നതെന്ന് മാർത്തോമ്മാ സഭ റാന്നി - നിലയ്ക്കൽ ഭദ്രാസന അധ്യക്ഷൻ ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്ത. റാന്നി - നിലയ്ക്കൽ ഭദ്രാസനത്തിന്‍റെ ചുമതലയിൽ അഞ്ചുകുഴിയിൽ പ്രവർത്തിക്കുന്ന പ്രത്യാശാ ഭവന്‍റെ രജതജൂബിലി ആഘോഷങ്ങളുടെ ഭാഗമായി ആരംഭിക്കുന്ന മാനസിക ആരോഗ്യ കേന്ദ്രത്തിന്‍റെ ശിലാസ്ഥാപനം നിർവഹിച്ചു പ്രസംഗിക്കുകയായിരുന്നു അദ്ദേഹം. ഭദ്രാസന സെക്രട്ടറി റവ. തോമസ് കോശി പനച്ചമൂട്ടിൽ, ട്രഷറർ അനു ഫിലിപ്പ്, പ്രത്യാശാ ഭവൻ ഡയറക്ടർ റവ.വർഗീസ് കെ. മാത്യു, റവ.ജോതിഷ് സാം, പി.ജെ.തോമസ് എന്നിവർ പ്രസംഗിച്ചു. ഡോ.യുയാക്കിം മാർ കൂറിലോസ് സഫ്രഗൻ മെത്രാപ്പോലീത്തായുടെ മനസിൽ രൂപംകൊണ്ട ആശയമാണ് മാനസികാരോഗ്യത്തിൽ നിന്നും മുക്തമായവരുടെ പുനരധിവാസം എന്നത്. 2000 ഓഗസ്റ്റ് 24 ന് മലയാലപ്പുഴയിൽ നവജീവൻ കേന്ദ്രത്തോടു ചേർന്ന് പേരൂർക്കട മാനസികാരോഗ്യ കേന്ദ്രത്തിൽ നിന്നു നൽകിയ പത്ത് രോഗ വിമുക്തരെ സ്വീകരിച്ചു പ്രവർത്തനം ആരംഭിച്ചു. തുടർന്ന് അഞ്ചുകുഴിയിൽ വസ്തു വാങ്ങുകയും 2002 നവംബർ ഒന്നിന് കെട്ടിടം പണികൾ പൂർത്തീകരിച്ച് പ്രവർത്തനങ്ങൾ ആരംഭിക്കുകയും ചെയ്തു. ഡോ.യൂയാക്കിം മാർ കൂറിലോസ്, റവ.ജോർജ് ഏബ്രഹാം, ഏബ്രഹാം മാത്യു പനച്ചമൂട്ടിൽ എന്നിവർ നിർമാണ പ്രവർത്തനങ്ങൾക്കു നേതൃത്വം നൽകി. തുടർന്ന് ഗീവർഗീസ് മാർ അത്താനാസിയോസ് സഫ്രഗൻ മെത്രാപ്പോലീത്ത നേതൃത്വം ഏറ്റെടുത്തു. റവ.ജോൺ മാത്യു, റവ.ഡോ.കെ.ശലോമോൻ, റവ.വി.എസ്. ജോൺ, റവ.പി.എം.വർഗീസ്, ഡോ.കെ.കെ.ജോൺസൺ, കെ.എം. മാത്യു തുടങ്ങിയവർ പ്രാരംഭ കാലങ്ങളിൽ പ്രവർത്തനങ്ങൾക്ക് ചുക്കാൻ പിടിച്ചു. ഫിലിപ്പോസ് മാർ ക്രിസോസ്റ്റം ജന്മശിതി പ്രോജക്റ്റിന്‍റെ ഭാഗമായി ആരംഭിച്ച ഈ സ്ഥാപനം ഹാഫ് വേ ഹോം എന്ന പേരിലാണ് അറിയപ്പെടുന്നത്. മാനസിക രോഗത്തിൽ നിന്നും സൗഖ്യം പ്രാപിച്ചിട്ടും സ്വന്തം ഭവനത്തിൽ എത്താൻ കഴിയാതെ പാതി വഴിയിൽ എത്തപ്പെട്ടവരുടെ പാർപ്പിടം ആയതിനാലാണ് ഹാഫ് വേ ഹോം എന്ന് പേരു നൽകിയത്.

ആറന്മുള വള്ളംകളിക്ക് കേന്ദ്ര, സംസ്ഥാന സർക്കാരുകളുടെ വാഗ്ദാനപ്പെരുമഴ

ആറന്മുള: ആറന്മുള ഉത്തൃട്ടാതി ജലോത്സവ ക്രമീകരണങ്ങൾക്കും പള്ളിയോടങ്ങളുടെ സംരക്ഷണത്തിനുമായി ഇത്തവണ കേന്ദ്ര, സംസ്ഥാന സർക്കാരുകളും തദ്ദേശ സ്ഥാപനങ്ങളും കൈയയച്ച് സഹായിച്ചു. വള്ളംകളിയുടെ നടത്തിപ്പിനടക്കം പ്രഖ്യാപനങ്ങളും വന്നതോടെ പള്ളിയോട സേവാസംഘവും പ്രതീക്ഷയിലാണ്. ആറന്മുള ജലമേളയില്‍ പങ്കെടുക്കുന്ന പള്ളിയോടങ്ങള്‍ക്ക് ജില്ലാ പഞ്ചായത്തില്‍ നിന്ന് 10,000 രൂപ വീതം ധനസഹായം ലഭിച്ചു. പത്തനംതിട്ട ജില്ലയിലുള്ള 40 പള്ളിയോടങ്ങള്‍ക്കാണ് ഇങ്ങനെ ധനസഹായം ലഭിച്ചത്. ആലപ്പുഴ ജില്ലയിലുള്ള 12 പള്ളിയോടങ്ങള്‍ക്ക് കൂടി ധനസഹായം ലഭ്യമാക്കുന്നതിന് നടപടികള്‍ നടന്നുവരുന്നു. കോയിപ്രം, ഇലന്തൂര്‍, പന്തളം എന്നീ ബ്ലോക്ക് പഞ്ചായത്തുകളില്‍ പെടുന്ന പള്ളിയോടങ്ങള്‍ക്ക് 10,000 രൂപ വീതം ധനസഹായവും ലഭിച്ചു. പുലിയൂർ, മാവേലിക്കര, പുളിക്കീഴ്, റാന്നി ബ്ലോക്കുകളില്‍ നിന്നും ചെങ്ങന്നൂര്‍ മുനിസിപ്പാലിറ്റിയില്‍ നിന്നും ധനസഹായം ലഭ്യമാകുന്നതിന് ആവശ്യമായ അപേക്ഷകള്‍ സമര്‍പ്പിച്ചു കഴിഞ്ഞു. ചില ഗ്രാമപഞ്ചായത്തുകള്‍ ഇതിനകം തന്നെ പള്ളിയോടങ്ങള്‍ക്ക് ഗ്രാന്‍റ് അനുവദിച്ചു നല്‍കിയിരുന്നു. കേരള സര്‍ക്കാരിന്‍റെ വിനോദസഞ്ചാര വകുപ്പില്‍ നിന്ന് 52 പള്ളിയോടങ്ങള്‍ക്കും 10,000 രൂപ വീതമാണ് നല്കിയത്. സാംസ്‌കാരിക വകുപ്പ് ഈ വര്‍ഷം അനുവദിച്ച അഞ്ച് ലക്ഷം രൂപ 50 പള്ളിയോടങ്ങള്‍ക്കായി വിതരണം ചെയ്തു. സാംസ്‌കാരിക വകുപ്പില്‍ നിന്നും ഈ വര്‍ഷം പത്തുലക്ഷം രൂപ അനുവദിക്കുന്നതിന് ആവശ്യമായ നിവേദനം മന്ത്രി സജി ചെറിയാന് പള്ളിയോട സേവാസംഘം നൽകിയതായി പ്രസിഡന്‍റ് കെ.വി. സാംബദേവൻ അറിയിച്ചു. വിനോദസഞ്ചാര വകുപ്പില്‍നിന്ന് അഞ്ചുലക്ഷം രൂപ ലഭിച്ചത് പള്ളിയോടങ്ങള്‍ക്ക് മുന്‍കൂര്‍ ഗ്രാന്‍റായി നല്‍കിയിട്ടുണ്ട്. ആറന്മുള ജലമേളനാളില്‍ ആവശ്യമായ ഒരുക്കങ്ങള്‍ ചെയ്യുന്നതിനും മറ്റുമായി ഒരു കോടി രൂപ അനുവദിക്കണമെന്ന് കേന്ദ്രസര്‍ക്കാരിനോട് അപേക്ഷിച്ചിരുന്നു. ഇതിന്‍റെ ഭാഗമായി 15 ലക്ഷം രൂപ അനുവദിച്ചിട്ടുള്ളതായി കേന്ദ്ര ടൂറിസം സഹമന്ത്രി ജലമേളനാളില്‍ പള്ളിയോട സേവാ സംഘം പ്രസിഡന്‍റിനെ അറിയിക്കുകയുണ്ടായി. എന്‍എസ്എസില്‍ നിന്ന് ജലമേളയ്ക്കായി 25,000 രൂപ എല്ലാവര്‍ഷവും നല്‍കുന്നുണ്ട്. ദേവസ്വം ബോര്‍ഡില്‍ നിന്ന് പള്ളിയോടങ്ങള്‍ക്ക് 5,000ല്‍ പരം രൂപ വാര്‍ഷിക ധനസഹായമായി നല്‍കുന്നുണ്ട്. ജില്ലാ പഞ്ചായത്ത് എല്ലാവര്‍ഷവും വഞ്ചിപ്പാട്ട് പഠനകളരി നടത്തുന്നതിന് പണം അനുവദിച്ചിരുന്നു. ഈ വർഷം രണ്ടുലക്ഷം രൂപ ഇതിനായി അനുവദിക്കുമെന്ന് ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അറിയിച്ചു. അടുത്ത ഒരു വര്‍ഷത്തിനുള്ളില്‍ സ്ഥിരം പവലിയന്‍ നിർമിക്കുന്നതിന് മൂന്നു കോടി രൂപ ബജറ്റില്‍ ഉള്‍പ്പെടുത്തിയിട്ടുള്ളതായി മന്ത്രി വീണാ ജോർജ് ജലോത്സവ ഉദ്ഘാടന വേദിയിൽ പ്രഖ്യാപിച്ചു. പള്ളിയോട സേവാ സംഘം പാഞ്ചജന്യം ഓഡിറ്റോറിയം നവീകരിക്കുന്നതിനായി 30 ലക്ഷം രൂപ ആന്‍റോ ആന്‍റണി എംപി അനുവദിക്കുമെന്ന് പ്രതീക്ഷിക്കുന്നു. പള്ളിയോട പുരകള്‍ നവീകരിക്കുന്നതിന് ഒരു കോടി രൂപ സംസ്ഥാന ബജറ്റിൽ ഉള്‍പ്പെടുത്തിയിട്ടുണ്ടെന്ന് പ്രമോദ് നാരായൺ എംഎൽഎ അറിയിച്ചു. ആറന്മുള പൈതൃക ജലമേളയുടെയും അനുബന്ധമായി നടക്കുന്ന ചടങ്ങുകളുടെയും ഭംഗിയായ നടത്തിപ്പിന് വിവിധ തലങ്ങളില്‍ നിന്ന് ലഭിക്കുന്ന പ്രോത്സാഹനങ്ങളും സഹായങ്ങളും സേവാ സംഘത്തിന്‍റെ പ്രവര്‍ത്തനങ്ങള്‍ക്കെന്നും ഊർജം പകരുന്നതായി പ്രസിഡന്‍റ് കെ.വി. സാംബദേവനും സെക്രട്ടറി പ്രസാദ് ആനന്ദഭവനും അഭിപ്രായപ്പെട്ടു.

കേരളം സെൽ ഭരണത്തിലേക്ക് നീങ്ങുന്നു: സതീഷ് കൊച്ചുപറന്പിൽ

പത്തനംതിട്ട: കേരളം സെല് ഭരണത്തിലേക്ക് നീങ്ങുന്നതായി സംശയിക്കേണ്ടിരിക്കുന്നെന്ന് ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. സംസ്ഥാനത്ത് പോലീസ് നടത്തുന്ന അക്രമങ്ങള്‍ക്കെതിരേ ജില്ലയിലെ പോലീസ് സ്റ്റേഷനുകള്‍ക്ക് മുന്‍പില്‍ നടത്തിയ ജനകീയ പ്രതിഷേധ സദസുകളുടെ ജില്ലാതല ഉദ്ഘാടനം കോന്നി പോലീസ് സ്റ്റേഷന് മുന്‍പില്‍ നിര്‍വഹിച്ച് പ്രസംഗിക്കുകയായിരുന്നു അദ്ദേഹം. ഇഎംഎസ് സര്‍ക്കാരിന്‍റെ കാലത്ത് രാഷ്‌ട്രീയ പ്രതിയോഗികളെ പോലീസിനെ ഉപയോഗിച്ച് അടിച്ചമര്‍ത്താന്‍ ശ്രമിച്ചതിനേക്കാള്‍ ക്രൂരമായ സംഭവങ്ങളാണ് പോലീസ് സ്റ്റേഷനുകളില്‍ രാഷ്‌ട്രീയ പ്രതിയോഗികൾക്കും സാധാരണക്കാർക്കുമെതിരേ പോലീസ് ഇപ്പോള്‍ നടത്തുന്നതെന്നും സതീഷ് കൊച്ചുപറമ്പില്‍ പറഞ്ഞു. കോന്നി മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് പ്രവീണ്‍ പ്ലാവിളയുടെ അധ്യക്ഷതയില്‍ ഡിസിസി വൈസ് പ്രസിഡന്‍റ് റോബിന്‍ പീറ്റർ, ജനറല്‍ സെക്രട്ടറി എസ്.വി. പ്രസന്നകുമാർ, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ദീനാമ്മ റോയി, യുഡിഎഫ് നിയോജക മണ്ഡലം ചെയര്‍മാന്‍ എസ്. സന്തോഷ് കുമാർ, നിഖില്‍ ചെറിയാന്‍, ജി.എസ്. സന്തോഷ് കുമാർ, റോജി ഏബ്രഹാം, ഷാജി കുമാർ, റ്റി.എച്ച്. സിറാജുദ്ദീന്‍, അനി സാബു തോമസ്, ബ്രഹാം വാഴയിൽ, മനോഹരന്‍, സൗദാ റഹീം, ജി. ശ്രീകുമാർ, എം.കെ. മനോജ്, ജോയ് തോമസ്, ഷിജു അറപ്പുരയിൽ, സന്തോഷ് കല്ലേലി, മോന്‍സി ദാനിയേൽ, ഉത്തമന്‍, പ്രകാശ് പേരങ്ങാട്ട്, രാജു കണ്ണങ്കര തുടങ്ങിയവര്‍ പ്രസംഗിച്ചു. മലയാലപ്പുഴയിൽ മലയാലപ്പുഴ പോലീസ് സ്റ്റേഷനിലേക്ക് കോൺഗ്രസ് മണ്ഡലം കമ്മിറ്റി നടത്തിയ മാർച്ച് ഡിസിസി ജനറൽ സെക്രട്ടറി സാമുവേൽ കിഴക്കുപുറം ഉദ്ഘാടനം ചെയ്തു. മലയാലപ്പുഴ മണ്ഡലം പ്രസിഡന്‍റ് ദിലീപ് കുമാര്‍ പൊതീപ്പാട് അധ്യക്ഷത വഹിച്ചു. ഡിസിസി ജനറല്‍ സെക്രട്ടറി എം.വി. ഫിലിപ്പ്, നിര്‍വാഹക സമിതി അംഗം ജെയിംസ് കീക്കരിക്കാട്, ബേബി മൈലപ്ര, പ്രമോദ് താന്നിമൂട്ടിൽ, ലിബു മാത്യു, ശശിധരന്‍ നായര്‍ പാറയരുകിൽ, ബിജു സാമുവല്‍, ബിജിലാല്‍ ആലുനില്‍ക്കുന്നതിൽ, ബിന്ദു ജോര്‍ജ്, എല്‍സി ഈശോ, ബിന്ദു ബിനു, എസ്. സുനില്‍കുമാർ, മീരാന്‍ വടക്കുപുറം, ബെന്നി ഈട്ടിമൂട്ടിൽ, സിനിലാല്‍ ആലുനില്‍ക്കുന്നതില്‍, സി.പി. സുധീഷ്, ജോബിന്‍ മൈലപ്ര, രാജു പുലൂർ, ആശ പെരുമ്പ്രാല്‍, സനോജ് മലയാലപ്പുഴ തുടങ്ങിയവർ പ്രസംഗിച്ചു. തിരുവല്ലയിൽ പോലീസിലെ ക്രിമിനൽവത്കരണത്തിനെതിരേ കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ തിരുവല്ല പോലീസ് സ്റ്റേഷനിലേക്കു നടത്തിയ മാർച്ച് കെപിസിസി സെക്രട്ടറി എൻ. ഷൈലാജ് ഉദ്ഘാടനം ചെയ്തു. തിരുവല്ല വെസ്റ്റ് മണ്ഡലം കോൺഗ്രസ് പ്രസിഡന്‍റ് ശ്രീജിത്ത് മുത്തൂർ അധ്യക്ഷത വഹിച്ചു. കോൺഗ്രസ് ബ്ലോക്ക് പ്രസിഡന്‍റ് ഈപ്പൻ കുര്യൻ മുഖ്യപ്രഭാഷണം നടത്തി. ഡിസിസി ജനറൽ സെക്രട്ടറി ഏബ്രഹാം കുന്നുകണ്ടത്തിൽ, മുനിസിപ്പൽ ചെയർപേഴ്സൺ അനുജോർജ്, ഡിസിസി എക്സിക്യൂട്ടീവ് അംഗങ്ങളായ ആർ.ജയകുമാർ, വിശാഖ് വെൺപാല, യുഡിഎഫ്. കൺവീനർ ലാൽ നന്ദാവനം, രാജേഷ് മലയിൽ, ബിനു വി. ഈപ്പൻ, അഭിലാഷ് വെട്ടിക്കാടൻ, ജെസിമോഹൻ, വിനോദ് കോവൂർ , കൊച്ചുമോൾ പ്രദീപ്, മണ്ഡലം പ്രസിഡന്‍റുമാർ തുടങ്ങിയവർ പ്രസംഗിച്ചു. മല്ലപ്പള്ളിയിൽ മൂന്നാം മുറയിൽ മൂന്നാം ഗവൺമെന്‍റ് സൃഷ്ടിക്കാമെന്നത് ഇടതുപക്ഷത്തിന്‍റെ മിഥ്യാധാരണ മാത്രമാണെന്ന് കെപിസിസി സെക്രട്ടറി അനീഷ് വരിക്കണ്ണാമല. കോൺഗ്രസ്‌ മല്ലപ്പള്ളി ബ്ലോക്ക് കമ്മറ്റിയുടെ നേതൃത്വത്തിൽ കീഴ്വായ്പൂര് പോലീസ് സ്റ്റേഷന് മുന്പിൽ നടന്നജനകീയ പ്രതിഷേധ സദസ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കോൺഗ്രസ്‌ ബ്ലോക്ക് പ്രസിഡന്‍റ് എബി മേക്കരിങ്ങാട്ട് അധ്യക്ഷത വഹിച്ചു. ഡിസിസി ജനറൽ സെക്രട്ടറി കോശി പി.സക്കറിയ, യുഡിഎഫ് നിയോജക മണ്ഡലം ചെയർമാൻ ലാലു തോമസ്, സുരേഷ് ബാബു പാലാഴി, കീഴ്‌വായ്പ്പൂര് ശിവരാജൻ, അഖിൽ ഓമനക്കുട്ടൻ, റെജി പണിക്കമുറി, അനിൽ തോമസ്, സുനിൽ നിരവുപുലം, സാം പട്ടേരി, എം.കെ.സുബാഷ് കുമാർ, ചെറിയാൻ മണ്ണഞ്ചേരി, മണിരാജ് പുന്നിലം, ലിൻസൺ പാറോലിക്കൽ, തോമസ് തമ്പി, കെ.ജി.സാബു, ഡോ. ബിജു റ്റി.ജോർജ്, വിനീത് കുമാർ, റെജി ചാക്കോ, റ്റി.ജി.രഘുനാഥപിള്ള, റെജി തേക്കുങ്കൽ തുടങ്ങിയവർ പ്രസംഗിച്ചു. പെരുന്പെട്ടിയിൽ എഴുമറ്റൂർ ബ്ലോക്കിലെ കൊറ്റനാട്, കോട്ടാങ്ങൽ, എഴുമറ്റൂർ, തെള്ളിയൂർ, അയിരൂർ ഈസ്റ്റ്‌, വെസ്റ്റ് മണ്ഡലം കമ്മിറ്റികളുടെ നേതൃത്വത്തിൽ പെരുമ്പെട്ടി പോലീസ് സ്റ്റേഷനു മുൻപിൽ ജനകീയ പ്രതിഷേധ സദസ് നടത്തി. എഴുമറ്റൂർ ബ്ലോക്ക് കോൺഗ്രസ് കമ്മിറ്റിയുടെ പ്രസിഡന്‍റ് പ്രഫ. പി. കെ. മോഹനരാജ് അധ്യക്ഷത വഹിച്ച യോഗം മാലേത്ത് സരളാദേവി എക്സ് എംഎൽഎ ഉദ്ഘാടനം ചെയ്തു. ഡിസിസി ജനറൽ സെക്രട്ടറി സതീഷ് ബാബു മുഖ്യപ്രഭാഷണം നടത്തി. റെജി താഴമൺ, ആശിഷ് പാലയ്ക്കാമണ്ണിൽ, കൊച്ചുമോൻ വടക്കേതിൽ, ബിജു കരോട്ട്, ജി മണലൂർ, സന്തോഷ്‌ കൊച്ചുപറമ്പിൽ, ബിന്ദു സജി, സുഗതകുമാരി, തേജസ്, മിനി സെബാസ്റ്റ്യൻ, അനിൽ പായിക്കര തുടങ്ങിയവർ പ്രസംഗിച്ചു.

വള്ളിക്കോട് മൂർത്തിമുരുപ്പ് കുടിവെള്ള പദ്ധതി ഉദ്ഘാടനം ഇന്ന്

കോന്നി: വള്ളിക്കോട് പഞ്ചായത്തിലെ മൂർത്തിമുരുപ്പ് ഉന്നതിയിൽ പൂർത്തീകരിച്ച കുടിവെള്ള പദ്ധതിയും അംബേദ്കർ ഗ്രാമം പദ്ധതിയും ഇന്ന് വൈകുന്നേരം അഞ്ചിന് മന്ത്രി ഒ. ആർ. കേളു ഉദ്ഘാടനം ചെയ്യും. കെ.യു. ജനീഷ് കുമാർ എംഎൽഎയുടെ ശ്രമഫലമായി വള്ളിക്കോട് പഞ്ചായത്തിൽ സംസ്ഥാന സർക്കാർ പട്ടികജാതി കോർപസ് ഫണ്ട് 1.62 കോടി രൂപ അനുവദിച്ച് നിർമാണം പൂർത്തീകരിച്ച മൂർത്തി മുരുപ്പ് കുടിവെള്ള പദ്ധതിയുടെയും ഒരു കോടി അനുവദിച്ചു നിർമാണം പൂർത്തീകരിച്ച അംബേദ്കർ ഗ്രാമം പദ്ധതിയുടെയും ഉദ്ഘാടനമാണ് മന്ത്രി നിർവഹിക്കുന്നത്. കെ. യു. ജനീഷ് കുമാർ എംഎൽഎ അധ്യക്ഷത വഹിക്കും. വള്ളിക്കോട് പഞ്ചായത്തിലെ എട്ടാം വാർഡിൽ മൂർത്തിമുരുപ്പ് ഉന്നതിയിലെ കുടിവെള്ളക്ഷാമം പരിഹരിക്കുന്നതിനായി വകുപ്പ് മന്ത്രിക്ക് എംഎൽഎ നൽകിയ നിവേദനത്തിന്‍റെ അടിസ്ഥാനത്തിൽ പട്ടികജാതി കോർപസ് ഫണ്ടിൽ നിന്നും 1.68 കോടി രൂപ അനുവദിച്ചാണ് ജല അഥോറിറ്റിയുടെ നേതൃത്വത്തിൽ കുടിവെള്ള പദ്ധതി പൂർത്തീകരിച്ചത്. അച്ചൻകോവിലാറ്റിലെ താഴൂർക്കടവ് ഇൻ ടെക് പമ്പ് ഹൗസിൽ നിന്നു 30 എച്ച്പി മോട്ടോർ സ്ഥാപിച്ച് വെള്ളം ഉയർന്ന പ്രദേശമായ മൂർത്തിമുരുപ്പിലെ ഉന്നതിയിലെ വീടുകളിൽ എത്തിക്കുന്നതാണ് പദ്ധതി .

അഞ്ചു വർഷം; തെരുവിൽ ഇരട്ടി നായ്ക്കൾ

പത്തനംതിട്ട: തെരുവുനായ്ക്കളുടെ എണ്ണത്തിൽ കഴിഞ്ഞ അഞ്ചുവർഷത്തിനുള്ളിൽ വൻ വർധനയുണ്ടായിട്ടുണ്ടെന്ന് കണക്കുകൾ. 2019ലാണ് ഏറ്റവുമൊടുവിൽ തെരുവുനായ്ക്കളുടെ കണക്ക് ജില്ലയിൽ എടുത്തത്. അന്ന് 14,000 നായ്ക്കൾ ജില്ലയിലെ തെരുവുകളിൽ അലയുന്നുണ്ടെന്നായിരുന്നു കണക്ക്. എന്നാൽ കോവിഡിനുശേഷം തെരുവുനായ്ക്കളുടെ എണ്ണത്തിൽ വൻ വർധനയാണ് ഉണ്ടായിരിക്കുന്നതെന്നാണ് വിവരം. വീടുകളിൽ വളർത്തിയിരുന്ന നായ്ക്കളെ അടക്കം വൻതോതിൽ തെരുവുകളിൽ പലരും ഇക്കാലയളവിൽ കൊണ്ടുവിട്ടിരുന്നു. വൻ പെരുകൽ‌ നായ്ക്കളുടെ വന്ധ്യംകരണ പ്രവർത്തനങ്ങളും അഞ്ചു വർഷത്തിലേറെയായി തടസപ്പെട്ടു കിടന്നതിനാൽ എണ്ണം വൻ തോതിൽ പെരുകി. 2019ലെ എണ്ണത്തിന്‍റെ ഇരട്ടിയോളം നിലവിലുണ്ടെന്നാണ് അനൗദ്യോഗിക കണക്ക്. മുന്പ് പ്രധാന ജംഗ്ഷനുകളിലും കടത്തിണ്ണകളിലും മാത്രമുണ്ടായിരുന്ന നായ്ക്കൾ ഇന്നിപ്പോൾ ഗ്രാമീണ റോഡുകളിൽ പോലും കാണാനാകും. വളർത്തു നായ്ക്കളെ തെരുവുകളിൽ ഉപേക്ഷിക്കുന്ന പ്രവണതയും കഴിഞ്ഞ ഏതാനും വർഷങ്ങളായി കൂടി. മുന്തിയ ഇനം നായ്ക്കളെ പോലും പ്രായാധിക്യവും അസുഖങ്ങളും കാരണം തെരുവുകളിലേക്ക് പലരും ഉപേക്ഷിക്കുന്നുണ്ട്. ഇത്തരം നായ്ക്കൾ ഏറെ അപകടകാരികളാണ്. തെരുവോരങ്ങളിൽ തട്ടുകടകളുടെയും മറ്റും പരിസരങ്ങളിലാണ് രാത്രി തന്പടിക്കുന്നത്. പകൽ ഇവ പ്രധാന നിരത്തുകളിൽ അലയും. എബിസി കേന്ദ്രം ഇഴയുന്നു പത്തനംതിട്ട ജില്ലാ പഞ്ചായത്തിന്‍റെ ചുമതലയിൽ പുളിക്കീഴ് കേന്ദ്രീകരിച്ച് എബിസി കേന്ദ്രം നിർമാണം തുടങ്ങിയിട്ടു വർഷങ്ങളായി. ഏറ്റവുമൊടുവിൽ ഈ മാസം കേന്ദ്രം പൂർത്തീകരിക്കുമെന്നായിരുന്നു പ്രഖ്യാപനം. എന്നാൽ, നിർമാണം ഇപ്പോഴും പൂർത്തിയായിട്ടില്ല. എബിസി കേന്ദ്രം ഇല്ലാത്തതിന്‍റെ പേരിലാണ് ജില്ലയിൽ തെരുവുനായ്ക്കളുടെ വന്ധ്യംകരണം നിർത്തിവച്ചത്. മൂന്നു വർഷം മുന്പ് എബിസി പ്രവർത്തനം സജീവമാക്കി തെരുവുനായ്ക്കളെ പിടികൂടാൻ ആളുകൾക്കു പരിശീലനം നൽകിയിരുന്നു. എന്നാൽ, നായ്ക്കളെ വന്ധ്യംകരണം നടത്തി പാർപ്പിക്കാൻ ഇടമില്ലാത്തതിന്‍റെ പേരിൽ പദ്ധതി നിലച്ചു. എല്ലാ പഞ്ചായത്തുകളിലും എബിസി കേന്ദ്രം എന്ന ആശയം മുന്നോട്ടുവച്ചെങ്കിലും വിജയിച്ചില്ല. തുടർന്നാണ് ജില്ലാ പഞ്ചായത്ത് പദ്ധതി ഏറ്റെടുത്ത് പുളിക്കീഴ് കേന്ദ്രീകരിച്ച് എബിസി കേന്ദ്രം സ്ഥാപിക്കാൻ തീരുമനിച്ചത്. പക്ഷേ, സമയത്ത് തീർന്നില്ല. ഇതോടെ എബിസി പദ്ധതി ജില്ലയിൽ പൂർണമായി നിലച്ചു. നായ്ക്കളെ പിടിക്കാൻ പരിശീലനം നൽകി നിയോഗിച്ചവർക്കും പണി ഇല്ലാതെയായി. കുത്തിവയ്പും പാളി തെരുവുനായ്ക്കൾക്കു വന്ധ്യംകരണം നിലച്ചതോടെ പേവിഷ പ്രതിരോധ കുത്തിവയ്പ് പദ്ധതി ആവിഷ്കരിച്ചിരുന്നു. എന്നാൽ, ഇതും പൂർണമായി വിജയിച്ചില്ല. 53 ഗ്രാമപഞ്ചായത്തുകളിൽ 27 പഞ്ചായത്തുകൾ മാത്രമാണ് ഫണ്ട് നീക്കിവച്ചത്. അര ലക്ഷം മുതൽ ഒരു ലക്ഷം രൂപവരെയാണ് പ്രതിരോധ കുത്തിവയ്പിനായി ചെലവ് കണക്കാക്കുന്നത്. തനതു ഫണ്ടിന്‍റെ അഭാവം കാരണമാണ് പല പഞ്ചായത്തുകളും പദ്ധതിയോടു മുഖംതിരിച്ചത്. ഇതോടെ തെരുവുനായ്ക്കളെ നിയന്ത്രിക്കാനുള്ള പദ്ധതി പൂർണമായി പാളി. എല്ലാ ഗ്രാമപഞ്ചായത്തുകളും നഗരസഭകളും ഫണ്ട് നീക്കിവച്ച് പദ്ധതിയുമായ സഹകരിക്കണമെന്നു ജില്ലാ പഞ്ചായത്തും മൃഗസംരക്ഷണ വകുപ്പും ആവശ്യപ്പെട്ടിട്ടുണ്ട്. പദ്ധതി ഉണ്ടെങ്കിൽ തെരുവുനായ്ക്കൾക്ക് കുത്തിവയ്പ് നൽകാനാകുമെന്ന് മൃഗസംരക്ഷണ ഓഫീസർ ഡോ.എ.എസ്. സന്തോഷ് പറഞ്ഞു. നായ്ക്കളുടെ കൂട്ട ആക്രമണം തെരുവുകളിൽ അലയുന്ന നായ്ക്കൾ പൊതുവേ ആക്രമണകാരികളായി മാറിയിട്ടുണ്ട്. പ്രത്യേകിച്ച് തിരക്കേറിയ നഗരങ്ങളിൽ അലയുന്ന നായ്ക്കളാണ് ആളുകളെ ആക്രമിക്കുന്നത്. കഴിഞ്ഞയിടെ അടൂർ, പന്തളം, കുളനട, പത്തനംതിട്ട പ്രദേശങ്ങളിൽ നായ്ക്കൾ ആളുകളെ കൂട്ടമായി ആക്രമിച്ചു. നായ്ക്കൾ പലപ്പോഴും കൂട്ട ആക്രമണമാണ് നടത്തുന്നത്. കാൽനട യാത്രികർ, വിദ്യാർഥികൾ എന്നിവരാണ് നായ്ക്കളുടെ ആക്രമണത്തിനു വിധേയമായത്. ബസ് സ്റ്റാൻഡുകൾ, തെരുവോരങ്ങൾ എന്നിവിടങ്ങളിൽ തന്പടിച്ചിരിക്കുന്ന നായ്ക്കളാണ് പലപ്പോഴും ആക്രമണകാരികളായി മാറുന്നത്.

വിജ്ഞാനകേരളത്തിലൂടെ പത്തനംതിട്ട വഴികാട്ടി: മന്ത്രി എം.ബി. രാജേഷ്

അടൂർ: വിജ്ഞാന കേരളം പദ്ധതിയിലൂടെ പത്തനംതിട്ട ജില്ല സംസ്ഥാനത്തിന് വഴികാട്ടിയതായി മന്ത്രി എം. ബി. രാജേഷ്. ഓണത്തിന് ഒരു ലക്ഷം തൊഴിൽ ജില്ലാതല ലക്ഷ്യ പൂർത്തീകരണ പ്രഖ്യാപനം അടൂർ സെന്‍റ് തോമസ് കത്തീഡ്രൽ ഹാളിൽ നിർവഹിച്ചു പ്രസംഗിക്കുകയായിരുന്നു മന്ത്രി. വിജ്ഞാനകേരളം പരീക്ഷണത്തിന്‍റെ തുടക്കം വിജ്ഞാന പത്തനംതിട്ടയാണ്. ജില്ലയിലെ തദ്ദേശസ്വയംഭരണ സ്ഥാപനങ്ങൾ, കുടുംബശ്രീ, വിജ്ഞാനകേരളം, ജില്ലാ ഭരണകൂടം എന്നിവയുടെ എകോപനത്തിലൂടെ 5286 പേർക്ക് തൊഴിൽ നൽകി. 985 സ്ഥാപനങ്ങളിലായി 8049 തൊഴിലുകൾ കണ്ടെത്തി. പ്രാദേശിക തലത്തിൽ തൊഴിൽ നൽകാനായി വിജ്ഞാന കേരളത്തിലൂടെ മൈക്രോ, മെഗാ തൊഴിൽ മേളകളും സംഘടിപ്പിക്കുന്നു. അയൽക്കൂട്ടാടിസ്ഥാനത്തിൽ തൊഴിൽ കണ്ടെത്തി വിജ്ഞാനകേരളത്തിലൂടെ നൈപുണ്യ പരിശീലനം നൽകുന്നുണ്ടെന്ന് മന്ത്രി ചൂണ്ടിക്കാട്ടി. മാത്യു ടി. തോമസ് എംഎൽഎ അധ്യക്ഷത വഹിച്ചു. തൊഴിൽ നൽകിയ സിഡിഎസുകൾക്കുള്ള സർട്ടിഫിക്കറ്റ് വിതരണം പ്രമോദ് നാരായൺ എംഎൽഎ നിർവഹിച്ചു. സേവനശ്രീ ലോഗോ പ്രകാശനം ജില്ലാ കളക്ടർ എസ്. ഹരികൃഷ്ണൻ നിർവഹിച്ചു. വിജ്ഞാന കേരളം അഡ്വൈസർ ഡോ. ടി. എം. തോമസ് ഐസക് പ്രാദേശിക തൊഴിൽ രേഖ പ്രകാശനവും മുഖ്യപ്രഭാഷണവും നിർവഹിച്ചു. വിവിധ മേഖലകളിൽ മികച്ച വിജയം കൈവരിച്ച സിഡിഎസ്, എഡിഎസ്, അയൽക്കൂട്ടം, ഓക്സിലറി ഗ്രൂപ്പ്, ജി ആർ സി, സംരംഭക ഗ്രൂപ്പ്, വ്യക്തിഗത സംരംഭക ഗ്രൂപ്പ്, ബഡ്സ്, ബി ആർ സി എന്നിവയുടെ അവാർഡ് ദാനവും ചടങ്ങിൽ നടന്നു. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, മെംബർ ജിജി മാത്യു, അടൂർ നഗരസഭ ചെയർപേഴ്സൺ കെ. മഹേഷ് കുമാർ, പന്തളം ബ്ലോക്ക് പഞ്ചായത്ത് അധ്യക്ഷൻ ബി. എസ്. അനീഷ് മോൻ, ഗ്രാമപഞ്ചായത്ത് അധ്യക്ഷരായ പി. എസ്. മോഹനൻ, എസ്. രാജേന്ദ്രപ്രസാദ്, സുശീല കുഞ്ഞമ്മ കുറുപ്പ്, തദ്ദേശ സ്വയംഭരണ വകുപ്പ് സ്പെഷൽ സെക്രട്ടറി ടി. വി. അനുപമ, കുടുംബശ്രീ ജില്ലാ മിഷൻ കോഡിനേറ്റർ എസ്. ആദില, പന്തളം എംഇആർസി ചെയർപേഴ്സൺ രാജി പ്രസാദ്, അടൂർ എൽഐസി ഡെവലപ്മെന്റ് ഓഫീസർ സി. എസ്. ദിവ്യ തുടങ്ങിയവർ പ്രസംഗിച്ചു.

അജികുമാറിന് പള്ളിക്കുള്ളിൽത്തന്നെ ആദരാഞ്ജലിയേകി കോഴഞ്ചേരി പള്ളി

കോഴഞ്ചേരി: കോഴഞ്ചേരി സെന്‍റ് തോമസ് മാർത്തോമ്മാ പള്ളിയിൽ 23 വർഷം സുരക്ഷാ ജീവനക്കാരനായി ജോലി ചെയ്ത അജികുമാറിന് ദേവാലയത്തിനുള്ളിൽ തന്നെ അവസാന യാത്രയയപ്പ് നൽകി. മതങ്ങള്‍ക്കപ്പുറമുള്ള മനുഷ്യസ്‌നേഹത്തിന്‍റെ നേർക്കാഴ്ചയായി കോഴഞ്ചേരി പള്ളി മാറുകയായിരുന്നു. ഇതരമതസ്ഥനായ സെക്യൂരിറ്റി ജീവനക്കാരന്‍റെ മൃതദേഹം സഭാ വിശ്വാസികളുടേതു പോലെ പള്ളിക്കുള്ളില്‍ പൊതുദര്‍ശനത്തിനു വച്ചപ്പോള്‍ അത് മതങ്ങള്‍ക്കപ്പുറമുള്ള മനുഷ്യസ്‌നേഹത്തിന്‍റെ ഉദാത്ത മാതൃകയായി. കോഴഞ്ചേരി മാര്‍ത്തോമ്മാ പള്ളിയില്‍ സെക്യൂരിറ്റി ജോലി ചെയ്തിരുന്ന ഇ.എ. അജികുമാര്‍ (59) കഴിഞ്ഞ ഞായറാഴ്ചയാണ് മരിച്ചത്. മരിക്കുന്ന ദിവസവും രാവിലെ പള്ളിയില്‍ ജോലിക്ക് എത്തിയിരുന്നു. ക്രൈസ്തവന്‍ അല്ലാതിരുന്നിട്ടും അദ്ദേഹത്തിന് ഉചിതമായ യാത്രയയപ്പ് നല്‍കുന്നതിനു വേണ്ടി മൃതദേഹം പള്ളിയുടെ ഉള്ളില്‍ തന്നെ വയ്ക്കാന്‍ ഇടവക അംഗങ്ങളും ഭരണ സമിതിയും ഐകകണ്‌ഠ്യേനെ തീരുമാനിക്കുകയായിരുന്നു. ഇടവകയുടെ ചരിത്രത്തിലെ ആദ്യ സംഭവമാണെങ്കിലും തീരുമാനം മാതൃകാപരവും ശ്ലാഘനീയവുമായി നാട്ടുകാര്‍ വിലയിരുത്തി.

സ്റ്റേഡിയം നിർമാണം ഉടൻ

പത്തനംതിട്ട: ജില്ലാ സ്റ്റേഡിയത്തിന്‍റെ നിര്‍മാണം യുദ്ധകാലാടിസ്ഥാനത്തില്‍ പൂർത്തിയാക്കാൻ മന്ത്രി വീണാ ജോര്‍ജ് നിര്‍മാണക്കമ്പനിക്കു നിര്‍ദേശം നല്‍കി. തൊഴിലാളികളുടെ എണ്ണം വർധിപ്പിച്ച് നിര്‍മാണ പ്രവര്‍ത്തനങ്ങള്‍ വേഗത്തിലാക്കണം. മഴകാരണം മുടങ്ങിയ മണ്ണ് നിരത്തല്‍ വേഗത്തിലാക്കണമെന്നും മന്ത്രി നിർദേശിച്ചു. സമയബന്ധിതമായി മണ്ണ് നിറയ്ക്കുന്നത് പൂര്‍ത്തിയാക്കുമെന്ന് കമ്പനി ഉറപ്പ് നല്‍കി. സിന്തറ്റിക് ട്രാക്കിന്‍റെ നിര്‍മാണ പ്രവൃത്തി ടെന്‍ഡര്‍ ചെയ്തു. സമയബന്ധിതമായി ട്രാക്കിന്‍റെ നിര്‍മാണം പൂര്‍ത്തിയാക്കാനും മന്ത്രി നിര്‍ദേശം നല്‍കി. കഴിഞ്ഞ ദിവസം സ്റ്റേഡിയം സന്ദര്‍ശിച്ചു നിർമാണ പുരോഗതി വിലയിരുത്തിയതിന് അനുബന്ധമായാണ് യോഗം വിളിച്ചുകൂട്ടിയത്. തദ്ദേശ തെരഞ്ഞെടുപ്പ് നിര്‍മാണത്തെ ഒരു തരത്തിലും ബാധിക്കാതിരിക്കാനുള്ള നടപടിക്രമങ്ങള്‍ നേരത്തേ തന്നെ പൂര്‍ത്തിയാക്കാന്‍ മന്ത്രി നിര്‍ദേശം നല്‍കി. പവലിയന്‍ ഒന്നിന്‍റെയും രണ്ടിന്‍റെയും നിര്‍മാണം പുരോഗമിക്കുകയാണ്. പവലിയന് മുകളില്‍ ഗാലറിയുടെ ഇരിപ്പിട തട്ട് എടുത്തിട്ടുണ്ട്. പവലിയനിലെ റിഫ്രഷ്മെന്‍റ് റൂമുകള്‍, ടോയ്‌ലറ്റുകള്‍ എന്നിവയും സമയബന്ധിതമായി പൂര്‍ത്തിയാക്കണം. കിഫ്ബി മുഖേന 47.92 കോടി രൂപ ചെലവഴിച്ചാണ് സ്റ്റേഡിയം നിര്‍മാണം നടത്തുന്നത്. പദ്ധതിയിലെ പ്രധാന നിര്‍മിതികളായ ട്രാക്ക് നിര്‍മാണ ജോലികൾ, നീന്തല്‍ കുള നിര്‍മാണം, മിനി ഇന്‍ഡോര്‍ സ്റ്റേഡിയം പവലിയന്‍ ബ്ലോക്കുകളുടെ നിര്‍മാണങ്ങള്‍ പുരോഗമിക്കുകയാണ്. ഫുട്ബോള്‍ ടര്‍ഫും ഓപ്പണ്‍ സ്റ്റേഡിയത്തില്‍ സജ്ജമാക്കുന്നുണ്ട്. സമീപത്തെ ഇന്‍ഡോര്‍ സ്റ്റേഡിയത്തിന്‍റെ പൈല്‍ ക്യാപ് പകുതിയിലധികം പൂര്‍ത്തിയായി. നീന്തല്‍ക്കുളത്തിന്‍റെ പൈലിംഗ് ക്യാപ് പ്രവൃത്തികള്‍ പൂര്‍ത്തിയായി. നീന്തല്‍ കുളത്തിന് സമീപത്തുള്ള ബാലന്‍സിംഗ് ടാങ്ക് പ്രവൃത്തി നടന്നുകൊണ്ടിരിക്കുന്നു. തോട് സംരക്ഷണ ഭിത്തി നിര്‍മാണം 80 ശതമാനം പൂര്‍ത്തിയായി. ആദ്യഘട്ടം ഡിസംബറോടെ പൂർത്തീകരിക്കുകയാണ് ലക്ഷ്യം.

റവന്യു ജീവനക്കാരന് സസ്പെൻഷൻ

അടൂർ: ട്രാഫിക് എസ്‌ഐക്കു വേണ്ടിയുള്ള കോഴപ്പണം ലോറി ഉടമയുടെ പക്കല്‍ നിന്നും സ്വന്തം അക്കൗണ്ടിലേക്ക് വാങ്ങുകയും അതിനുള്ള കമ്മീഷന്‍ കൈപ്പറ്റുകയും ചെയ്ത റവന്യൂ ജീവനക്കാരനെ സസ്‌പെന്‍ഡ് ചെയ്തു. താലൂക്ക് ഓഫീസിലെ ഓഫീസ് അസിസ്റ്റന്‍റ് എസ്. ആര്‍. വിഷ്ണുവിനെയാണ് സസ്‌പെന്‍ഡ് ചെയ്തത്. തിരുവനന്തപുരം സ്വദേശിയാണ് വിഷ്ണു. പോലീസ് വിജിലന്‍സിന്‍റെ ശിപാര്‍ശ പ്രകാരം റവന്യൂ വകുപ്പ് അണ്ടര്‍ സെക്രട്ടറിയാണ് സസ്പെൻഷൻ ഉത്തരവ് നൽകിയത്. കഴിഞ്ഞ ലോക്സഭാ തെരഞ്ഞെടുപ്പു കാലത്ത് പത്തനംതിട്ട ട്രാഫിക് യൂണിറ്റിലെ സബ് ഇന്‍സ്‌പെക്ടര്‍ ഡി.എസ്.സുമേഷ് ലാലിനു വേണ്ടി മണല്‍ കടത്തുന്ന ലോറി, ടിപ്പര്‍ ഉടമകളില്‍ നിന്നും പണം ഗൂഗിള്‍ പേ വഴി വിഷ്ണു വാങ്ങി എന്നാണ് കണ്ടെത്തൽ. സബ് ഇന്‍സ്‌പെക്ടറുടെ ബന്ധുവാണ് വിഷ്ണു. 59,000 രൂപയാണ് വാങ്ങിയത്. ഇതില്‍ നിന്നും 10,050 രൂപ കമ്മീഷനായി വാങ്ങിയ ശേഷം ബാക്കി തുക സബ് ഇന്‍സ്‌പെക്ടര്‍ക്ക് നല്‍കിയതായിട്ടാണ് വിജിലന്‍സ് കണ്ടെത്തിയിരിക്കുന്നത്.

കോന്നി കരിയാട്ടം: ടൂറിസം, വ്യാപാര മേഖലകളില്‍ പുത്തനുണര്‍വേകിയെന്ന് എംഎല്‍എ

കോന്നി: പത്തുദിവസത്തോളം നീണ്ടുനിന്ന കരിയാട്ടം മേള ഓണക്കാലത്ത് കോന്നിയുടെ ടൂറിസം, വ്യാപാര മേഖലകളില്‍ വലിയ മുന്നേറ്റത്തിന് കാരണമായതായി കെ.യു. ജനീഷ് കുമാര്‍ എംഎല്‍എ. കരിയാട്ടത്തില്‍ പങ്കെടുക്കാന്‍ 10 ദിവസമായി കോന്നിയിലെത്തിയത് ലക്ഷത്തിലധികം ആളുകളാണ്. കേരളത്തിന്‍റെ വിവിധ ജില്ലകളില്‍ നിന്നും ആളുകള്‍ എത്തിയതിനൊപ്പം ധാരാളം വിദേശ മലയാളികളും ഇതര സംസ്ഥാനങ്ങളില്‍ നിന്നുള്ളവരും കരിയാട്ടത്തിന്‍റെ ഭാഗമായി. കോന്നി ഇക്കോ ടൂറിസം കേന്ദ്രങ്ങളില്‍ വലിയ വരുമാന വര്‍ധനയ്ക്ക് ഇതു കാരണമായിട്ടുണ്ട്. കോന്നിക്ക് പുറത്തു നിന്നും ധാരാളം ആളുകള്‍ എത്തിയതോടെ കോന്നിയിലെ വ്യാപാര സ്ഥാപനങ്ങൾ, ഹോട്ടലുകള്‍ തുടങ്ങിയ ഇടങ്ങളിലെല്ലാം രാത്രി വൈകിയും വലിയ തിരക്കാണ് അനുഭവപ്പെട്ടത്. അടവിയില്‍ നടത്തിയ കുട്ടവഞ്ചി തുഴച്ചില്‍ മത്സരം സംസ്ഥാനത്താകെ ശ്രദ്ധ നേടി. ഇതിലൂടെ അടവിയിലേക്ക് കൂടുതല്‍ സഞ്ചാരികള്‍ എത്തിച്ചേരും. സീതത്തോട്ടിലെ കക്കാട്ടാറില്‍ നടന്ന അന്താരാഷ്‌ട്ര കയാക്കിംഗ് മത്സര വിജയത്തോടെ അവിടം കയാക്കിംഗിന്‍റെ സ്ഥിരം വേദിയാക്കി മാറ്റാനാണ് അഡ്വഞ്ചര്‍ ടൂറിസം വിഭാഗം തീരുമാനിച്ചിരിക്കുന്നത്. ആദ്യ മത്സരത്തില്‍ തന്നെ രണ്ട് വിദേശ രാജ്യങ്ങളുടെ പ്രതിനിധികള്‍ പങ്കെടുത്തു. അഡ്വഞ്ചര്‍ ടൂറിസവും സ്‌പോട്‌സും ഇഷ്ടപ്പെടുന്നവര്‍ വരും നാളുകളില്‍ കോന്നിയിലെത്തുമെന്നതില്‍ യാതൊരു സംശയവുമില്ല. ലക്ഷത്തിലധികം ആളുകളെത്തിയിട്ടും അച്ചടക്കത്തോടെയും അപകടരഹിതമായും കരിയാട്ടം നടത്താന്‍ കഴിഞ്ഞു എന്നത് സംഘാടക സമിതിയുടെ ജാഗ്രതയോടെയുള്ള ഇടപെടലിലൂടെയാണെന്നും എംഎല്‍എ പറഞ്ഞു.

ആഗോള അയ്യപ്പസംഗമം: ദേവസ്വം ബോർഡ് പ്രസിഡന്‍റ് പന്തളം കൊട്ടാരത്തിൽ

പന്തളം: ആഗോള അയ്യപ്പസംഗമത്തിലേക്ക് പന്തളം കൊട്ടാരത്തെ നേരിട്ടെത്തി ക്ഷണിച്ച് ദേവസ്വം ബോർഡ് പ്രസിഡന്റ് പി.എസ്. പ്രശാന്ത്. ദേവസ്വം ബോർഡംഗങ്ങളായ എ. അജികുമാർ. പി.ഡി. സന്തോഷ് കുമാർ തുടങ്ങിയവർക്കൊപ്പം ഇന്നലെ രാവിലെ 7.30ന് കൊട്ടാരത്തിലെത്തിയ അദ്ദേഹം ഒരുമണിക്കൂറോളം പന്തളം കൊട്ടാരം നിർവാഹകസംഘം അംഗങ്ങളുമായി കൂടിക്കാഴ്ച നടത്തി. നാമജപഘോഷയാത്രയുമായി ബന്ധപ്പെട്ട കേസുകൾ പിൻവലിക്കണമെന്ന് കൊട്ടാരം പ്രതിനിധികൾ ആവശ്യപ്പെട്ടു. അത് ബന്ധപ്പെട്ടവരുടെ ശ്രദ്ധയിൽ പെടുത്തുമെന്ന് ദേവസ്വം ബോർഡ് പ്രസിഡന്‍റ് പറഞ്ഞു. ആഗോള അയ്യപ്പസംഗമത്തിൽ പങ്കെടുക്കുന്ന കാര്യത്തിൽ അന്തിമ തീരുമാനം പിന്നീട് സ്വീകരിക്കുമെന്നായിരുന്നു പന്തളം കൊട്ടാരം നിർവാഹകസംഘം സെക്രട്ടറി എം.ആർ. സുരേഷ് വർമയുടെ പ്രതികരണം. അറിയിച്ചു. വലിയതമ്പുരാന്‍റെ നിർദേശമനുസരിച്ചായിരിക്കും തീരുമാനം. അയ്യപ്പസംഗമത്തിലേക്ക് ദേവസ്വം ബോർഡ് പ്രസിഡന്‍റും അംഗങ്ങളുമെത്തി ക്ഷണിച്ചിട്ടുണ്ട്. അടുത്ത ആഴ്ച തീരുമാനമറിയിക്കും. ശബരിമല കർമസമിതി നടത്തുന്ന സംഗമത്തിന്റെ കാര്യത്തിലും ഇതുതന്നെയാണ് തീരുമാനമെന്നും അദ്ദേഹം പറഞ്ഞു. കൊട്ടാരം പ്രതിനിധികൾ സംഗമത്തിൽ പങ്കെടുക്കുമെന്നാണ് വിശ്വാസമെന്ന് ദേവസ്വം ബോർഡ് പ്രസിഡന്റ് പി.എസ്. പ്രശാന്തും പ്രതികരിച്ചു. കൊട്ടാരവും ബോർഡും തമ്മിൽ നല്ല ബന്ധമാണ്. അത് ഇനിയും തുടരും. ശബരിമലയുമായി ബന്ധപ്പെട്ട കാര്യങ്ങളിലെല്ലാം കൊട്ടാരം പൂർണമായ പിന്തുണ നൽകുന്നുണ്ട്. മറ്റ് കാര്യങ്ങൾ അവർ ആലോചിച്ച് അറിയിക്കും. ശബരിമലയുടെ അടിസ്ഥാന വികസനമാണ് അയ്യപ്പ സംഗമത്തിന്‍റെ പ്രധാന ലക്ഷ്യമെന്നും അദ്ദേഹം പറഞ്ഞു. സംഗമത്തിൽ രാഷ്‌ട്രീയ വ്യത്യാസമില്ല. വിശ്വാസികൾക്ക് പങ്കെടുക്കാം. ബോർഡിന്‍റെയും സർക്കാരിന്‍റെയും കൊട്ടാരത്തിന്‍റെയും ലക്ഷ്യം ശബരിമല വികസനമാണ്. യുവതി പ്രവേശവുമായി ബന്ധപ്പെട്ട കേസിൽ ദേവസ്വം ബോർഡ് ഒടുവിൽ സമർപ്പിച്ചിട്ടുള്ള സത്യവാങ്മൂലം ആചാരാനുഷ്ഠാനങ്ങൾ സംരക്ഷിക്കപ്പെടണമെന്ന് തന്നെയാണ്. കൃത്യമായ ആചാരങ്ങൾ പാലിച്ചുതന്നെയാണ് ശബരിമലയിലെ പ്രവർത്തനങ്ങൾ. 70 ദിവസം നീളുന്ന തീർഥാടനം ഭംഗിയായി നടത്താൻ സർക്കാറിന്‍റെ പിന്തുണ വേണം. ശബരിമല മാസ്റ്റർ പ്ലാൻ, തിരക്ക് നിയന്ത്രണത്തിനുള്ള ആധുനിക മാർഗങ്ങൾ, തീർഥാടകർക്കുള്ള സൗകര്യമൊരുക്കൽ എന്നിവയാണ് സംഗമത്തിലെ പ്രധാന ചർച്ചകൾ. ദേവസ്വം ബോർഡിന് ഇക്കാര്യത്തിൽ ഒരു രാഷ്‌ട്രീയലക്ഷ്യവുമില്ല. ഭക്തർക്ക് പരമാവധി സൗകര്യമൊരുക്കുക മാത്രമാണ് ല്ഷ്യം. സംഗമത്തിന്റെ നടത്തിപ്പിനായി സ്‌പോൺസർഷിപ്പ് വഴിയോ സിഎസ്ആർ ഫണ്ടുവഴിയോ പണം സ്വരൂപിക്കുമെന്നും പ്രസിഡന്‍റ് പറഞ്ഞു.

ശബരിമല സംരക്ഷണ സംഗമം: സംഘാടക സമിതി രൂപീകരിച്ചു

പന്തളം: ശബരിമല കര്‍മസമിതിയുടെ നേതൃത്വത്തില്‍ 22ന് പന്തളത്ത് നടക്കുന്ന ശബരിമല സംരക്ഷണ സംഗമത്തിന്റെ വിജയത്തിനായി 101 അംഗ സംഘാടക സമിതി രൂപീകരിച്ചു. പന്തളം പാലസ് വെല്‍ഫെയര്‍ ഹാളില്‍ ചേര്‍ന്ന യോഗത്തില്‍ സംന്യാസിമാർ, വിവിധ ഹൈന്ദവ സംഘടനകൾ, ശബരിമലയുമായി ആചാരപരമായി ബന്ധപ്പെട്ട വിവിധ പ്രസ്ഥാനങ്ങളുടെ സംസ്ഥാന നേതാക്കൾ, പത്തനംതിട്ട, കോട്ടയം, ആലപ്പുഴ, കൊല്ലം ജില്ലകളിലെ കര്‍മസമിതിയുടെ പ്രധാന പ്രവര്‍ത്തകര്‍ തുടങ്ങിയവര്‍ പങ്കെടുത്തു. സംഘാടക സമിതി പ്രസിഡന്‍റായി പന്തളം കൊട്ടാരം അംഗവും ശബരിമല കര്‍മ സമിതി സംസ്ഥാന അധ്യക്ഷനുമായ പി.എന്‍.നാരായണ വര്‍മ്മ തെരഞ്ഞെടുക്കപ്പെട്ടു. വത്സന്‍ തില്ലങ്കേരി-വര്‍ക്കിംഗ് പ്രസിഡന്‍റ്, വി.ആര്‍.രാജശേഖരന്‍-വൈസ് പ്രസിഡന്‍റ്, കെ.പി.ഹരിദാസ്, അഡ്വ.അനില്‍ വിളയിൽ, എസ്.ജെ.ആര്‍.കുമാര്‍-ജനറല്‍ കണ്‍വീനര്‍മാര്‍, കെ.സി.നരേന്ദ്രന്‍, അഡ്വ.ജയന്‍ ചെറുവള്ളിൽ, വി.കെ.ചന്ദ്രന്‍-ജോയിന്‍റ് കണ്‍വീനര്‍മാര്‍ എന്നിവരാണ് മറ്റു ഭാരവാഹികൾ.

അബാൻ മേൽപാലം നിർമാണം; ബസ് സ്റ്റാൻഡ് റോഡും അടച്ചു

പത്തനംതിട്ട: അബാന്‍ മേല്‍പാല നിര്‍മാണവുമായി ബന്ധപ്പെട്ട പ്രവൃത്തികള്‍ ക്രമീകരിക്കുന്നതിനായി ടൗണ്‍ റിംഗ് റോഡില്‍ പ്രൈവറ്റ് ബസ് സ്റ്റാന്‍ഡ് മുഖ്യ കവാടം മുതല്‍ അബാന്‍ ജംഗ്ഷന്‍ വരെയുളള ഭാഗത്തെ വാഹന ഗതാഗതം താത്കാലികമായി നിരോധിച്ചു. അബാന്‍ ജംഗ്ഷനില്‍ നിന്ന് വരുന്ന വാഹനങ്ങള്‍ മിനി സിവില്‍ സ്‌റ്റേഷന്‍ ജംഗ്ഷന്‍ വഴി കെഎസ്ആര്‍ടിസി ജംഗ്ഷനിലൂടെ പോകണം. ബസ് സ്റ്റാൻഡ് ഭാഗത്തുനിന്നും വാഹനങ്ങള്‍ കെഎസ്ആര്‍ടിസി ജംഗ്ഷന്‍ മിനി സിവില്‍ സ്‌റ്റേഷന്‍ വഴി തിരിഞ്ഞു പോകണം. സ്വകാര്യബസുകളും കെഎസ്ആര്‍ടിസി ജംഗ്ഷന്‍ വഴി പോകണം. കുന്പഴ ഭാഗത്തു നിന്നും സ്വകാര്യ ബസ് സ്റ്റാൻഡിലേക്ക് വരുന്ന ബസുകള്‍ കുമ്പഴ, മൈലപ്ര, എസ് പി ഓഫീസ് ജംഗ്ഷന്‍, കെഎസ്ആര്‍ടിസി വഴി പ്രൈവറ്റ് ബസ് സ്റ്റാന്‍ഡിലേക്ക് പ്രവേശിക്കണമെന്നും നിർദേശമുണ്ട്.

ഫിസിയോതെറാപ്പി ദിനം ആചരിച്ചു

തിരുവല്ല: പുഷ്പഗിരി മെഡിക്കൽ കോളജ് ഡിപ്പാർട്ട്മെന്‍റ് ഓഫ് ഫിസിയോതെറാപ്പിയുടെ നേതൃത്വത്തിൽ ലോക ഫിസിയോതെറാപ്പി ദിനാചരണം മന്ത്രി സജി ചെറിയാൻ ഉദ്ഘാടനം ചെയ്തു. പുഷ്പഗിരി ആശുപത്രി ഡയറക്ടർ ഫാ. മാത്യു പുത്തൻപുരയ്ക്കൽ അധ്യക്ഷത വഹിച്ചു. ഡോ. ശ്രീജിത് നന്പൂതിരി മുഖ്യാതിഥിയായിരുന്നു. പുഷ്പഗിരി ന്യൂറോളജി വിഭാഗം മേധാവി ഡോ. റെജി തോമസ്, ഫിസിയോ തെറാപ്പി വിഭാഗം മേധാവി ഡോ.ഷിബു ജോർജ്, ഡോ. ക്രിസ്റ്റീന തോമസ് എന്നിവർ പ്രസംഗിച്ചു.

സംഭരണി തുറന്ന് ജലലഭ്യത ഉറപ്പാക്കി

ആറന്മുള: ഉത്തൃട്ടാതി ജലോത്സവത്തിനായി കാരിക്കയം സംഭരണി തുറന്ന് ജലലഭ്യത ഉറപ്പാക്കി. തിങ്കളാഴ്ച ആറന്മുള നെട്ടായത്തിലെ ജലനിരപ്പ് മൂന്നു മീറ്ററിൽ താഴെയാണെന്നു കണ്ടതോടെയാണ് സംഭരണി തുറക്കാൻ തീരുമാനിച്ചത്. ഇന്നലെ രാവിലെ സംഭരണി തുറന്ന് നെട്ടായത്തിലെ ജലനിരപ്പ് അഞ്ച് മീറ്ററിലേക്ക് ഉയർത്തി. ഇതോടെ ജലഘോഷയാത്രയിലും മത്സരവള്ളംകളിയിലും പങ്കെടുത്ത പള്ളിയോടങ്ങൾക്ക് സുഗമമായ യാത്ര സാധ്യമായി. കഴിഞ്ഞയാഴ്ച വരെ മഴയുണ്ടായിരുന്നെങ്കിലും പന്പാനദിയിലെ ജലനിരപ്പ് വളരെവേഗം താഴ്ന്നത് ആശങ്ക ഉളവാക്കിയിരുന്നു.

സാംസ്കാരിക സായാഹ്നം

തിരുവല്ല: കൈരളി ആർട്സ് ക്ലബ് ഫ്ലോറിഡയുടെ സാംസ്കാരിക സായാഹ്നവും ഓണാഘോഷവും ഡോ. ഏബ്രഹാം മാർ പൗലോസ് എപ്പിസ്കോപ്പ തിരുവല്ല വൈഎംസിഎയിൽ ഉദ്ഘാടനം ചെയ്തു. ഫൊക്കാന മുൻ ജനറൽ സെക്രട്ടറി ഡോ. മാമ്മൻ സി. ജേക്കബ് എഴുതിയ ജനകീയനായ ജനനായകൻ എന്ന പുസ്തകം ഡോ. ഗീവർഗീസ് മാർ കൂറിലോസ് മെത്രാപ്പോലീത്ത മറിയാമ്മ ഉമ്മന് നൽകി പ്രകാശനം ചെയ്തു. മാത്യു ടി. തോമസ് എംഎൽഎ , ഷിബു മണലെ , സഖറിയാസ് കരുവേലി, സി.പി. മോനായി , അനിൽ പെണ്ണുക്കര എന്നിവർ പ്രസംഗിച്ചു. വൈഎംസിഎ പ്രസിഡന്‍റ് പ്രഫ. ഇ. വി. തോമസ് അധ്യക്ഷത വഹിച്ചു. വൈഎംസിഎ സെക്രട്ടറി ജോയി ജോൺ സ്വാഗതവും ഇ. എ. ഏലിയാസ് നന്ദിയും പറഞ്ഞു.

പുരസ്കാര ജേതാക്കളെ അനുമോദിച്ചു

ചന്ദനപ്പള്ളി: പടിപ്പുര കോ ഓപ്പറേറ്റീവ് സൊസൈറ്റിയുടെയും ചന്ദനപ്പള്ളി ടീച്ചേഴ്സ് ഗിൽഡിന്‍റെയും ആഭിമുഖ്യത്തിൽ ഹയർസെക്കൻഡറി, ബിരുദ ബിരുദാനന്തര കോഴ്സുകൾക്ക് ഉന്നത വിജയം കരസ്ഥമാക്കിയ വിദ്യാർഥികളെ അവാർഡുകൾ നൽകി അനുമോദിച്ചു. നിരവധി അവാർഡുകൾ കരസ്ഥമാക്കിയ അധ്യാപകരായ ജോസ്‌ ചന്ദനപ്പള്ളിയെയും പ്രീത് ചന്ദനപ്പള്ളിയെയും ആദരിച്ചു. പ്രസിഡന്‍റ് ഡോ. ജോർജ് വർഗീസ് കൊപ്പാറ അധ്യക്ഷത വഹിച്ച യോഗം മുൻ എംഎൽഎ ജോസഫ് എം. പുതുശേരി ഉദ്ഘാടനം ചെയ്തു. ഡോ മാത്യു പി. ജോസഫ് മുഖ്യ പ്രഭാഷണം നടത്തി. ഫാ. കുര്യൻ വർഗീസ് കോർ എപ്പിസ്‌കോപ്പ, ഫാ. ജേക്കബ്‌ ഡാനിയൽ, ജസ്റ്റസ് നാടാവള്ളിൽ, റോയി സാമുവേൽ, ജേക്കബ്‌ ജോർജ് കുറ്റിയിൽ, അലക്സ് കൊപ്പാറ, സൂസൻ ജോൺസൺ, കോട്ടൂർ മധു സൂദനൻ പിള്ള, റോയി വര്ഗീസ്, എബി ഡേവിഡ് എന്നിവർ പ്രസംഗിച്ചു.

സഹ.മേഖല കേരളത്തിന്‍റെ അവിഭാജ്യ ഘടകം: മന്ത്രി വീണാ ജോർജ്

പത്തനംതിട്ട : കേരളത്തിലെ വിദ്യാഭ്യാസ - ആരോഗ്യ മേഖലയിലെ ഉന്നമനത്തിൽ സഹകരണ മേഖലയുടെ പങ്ക് ഒഴിച്ചുകൂടാനാകാത്തതെന്ന് മന്ത്രി വീണാ ജോർജ്. സഹകരണസംഘം ജീവനക്കാരുടെ മക്കൾക്കുള്ള 2024 - 25 അധ്യയന വർഷത്തെ വിദ്യാഭ്യാസ മികവിനുള്ള പത്തനംതിട്ട, ആലപ്പുഴ ജില്ലകളിലെ കാഷ് അവാർഡ് വിതരണവും വിദ്യാഭ്യാസ സ്കോളർഷിപ്പ് വിതരണവും ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. കുടിശിക ഒഴിവാക്കിയുള്ള മെമ്പർഷിപ്പ് കാന്പെയിനും ചടങ്ങിൽ തുടക്കമായി. കേരള സ്റ്റേറ്റ് കോ-ഓപ്പറേറ്റീവ് എംപ്ലോയിസ് വെൽഫെയർ ബോർഡ് വൈസ് ചെയർമാൻ ആർ. സനൽകുമാർ അധ്യക്ഷത വഹിച്ചു. പത്തനംതിട്ട നഗരസഭ ചെയർമാൻ ടി. സക്കീർ ഹുസൈൻ, കേരള ബാങ്ക് ഡയറക്ടർ എസ്. നിർമല ദേവി, സഹകരണസംഘം ജോയിന്‍റ് രജിസ്ട്രാർ ജനറൽ എസ്. ബിന്ദു, പത്തനംതിട്ട കാർഷിക ഗ്രാമ വികസന ബാങ്ക് ചെയർമാൻ കെ. അനിൽകുമാർ, സർവീസ് സഹകരണ ബാങ്ക് പ്രസിഡന്‍റ് സുരേഷ് കുമാർ, കേരള ഓപ്പറേറ്റീവ് എംപ്ലോയീസ് യൂണിയൻ (സിഐടിയു) ജില്ലാ സെക്രട്ടറി ജി. ബിജു, കേരള ഓപ്പറേറ്റീവ് എംപ്ലോയീസ് ഫ്രണ്ട് സംസ്ഥാന സെക്രട്ടറി ആക്കിനാട്ട് രാജീവ്, കേരള ഓപ്പറേറ്റീവ് എംപ്ലോയീസ് കൗൺസിൽ (എഐടിയുസി) സംസ്ഥാന സെക്രട്ടറി ബോബി മാത്തുണ്ണി, കേരള ഓപ്പറേറ്റീവ് എംപ്ലോയീസ് കോൺഗ്രസ് ജനറൽ സെക്രട്ടറി ആമ്പക്കാട്ട് സുരേഷ് തുടങ്ങിയവർ പ്രസംഗിച്ചു. പത്തനംതിട്ട സർക്കിൾ സഹകരണ യൂണിയൻ ചെയർപേഴ്സൺ പ്രമീള എം.ജി സ്വാഗതവും പാട്രിക് ഫ്രാൻസിസ് നന്ദിയും പറഞ്ഞു.

എസ്ഐ അകാരണമായി മർദിച്ചു; പരാതിയിൽ നടപടിയില്ലെന്ന്

അടൂർ: സാമ്പത്തിക ഇടപാടുമായി ബന്ധപ്പെട്ട വിഷയത്തിൽ എസ്ഐ മർദിക്കുകയും അസഭ്യം പറയുകയും ചെയ്ത സംഭവത്തിൽ മുഖ്യമന്ത്രിക്കടക്കം പരാതി നൽകിയിട്ടും നീതി ലഭിക്കുന്നില്ലെന്ന് റിട്ട.ബാങ്ക് ഉദ്യോഗസ്ഥൻ. അടൂർ പള്ളിക്കൽ തെരെങ്ങമം തോട്ടുവ അനുപമയിൽ വി.ബാബുവാണ് പോലീസിനെതിരേ ആരോപണവുമായി രംഗത്തു വന്നിരിക്കുന്നത്. കേരള സാംബവർ സൊസൈറ്റി സംസ്ഥാന കമ്മിറ്റിയംഗവും അടൂർ താലൂക്ക്ട്രഷറാറുമാണ് ബാബു. മുൻപ് അടൂർ സ്റ്റേഷനിൽ എസ്ഐ ആയിരുന്ന അനൂപ് ചന്ദ്രനെതിരേയാണ് പരാതി. സംഭവവുമായി ബന്ധപ്പെട്ട് ജൂണിൽ എസ്ഐയെ സ്ഥലം മാറ്റിയിരുന്നു. 2025 മെയ് 27നാണ് പരാതിക്കിടയാക്കിയ സംഭവം ഉണ്ടാകുന്നത്. ബാബു കേരള സാംബവർ സൊസൈറ്റിയുടെ പള്ളിക്കൽ ശാഖയിലെ ഒരു സ്ത്രീയ്ക്ക് 20,000 രൂപ പലിശയ്ക്ക് എടുത്ത് നൽകിയിരുന്നു. പിന്നീട് ഇതു തിരികെ നൽകാതെ വന്നപ്പോൾ പണം അവശ്യപ്പെട്ടു. ഇതുമായി ബന്ധപ്പെട്ട് തർക്കവുമുണ്ടായി. ഇതോടെ പണം വാങ്ങിയവർ അടൂർ പോലീസിൽ പരാതി നൽകി. ഈ സാമ്പത്തിക തർക്കവുമായി സ്റ്റേഷനിൽ എത്തിയപ്പോൾ എസ്ഐ അസഭ്യം പറയുകയും മർദിക്കുകയും ചെയ്തെന്നാണ് പരാതി. രോഗിയായ തന്നെ മർദിക്കരുതെന്ന് ഭാര്യ നിലവിളിച്ച് പറഞ്ഞെങ്കിലും ആരും കേട്ടില്ലെന്നും ബാബു മുഖ്യമന്ത്രിക്കും ഡിജിപിക്കും നൽകിയ പരാതിയിൽ പറയുന്നു. പരാതി നൽകിയതിനു പിന്നാലെ ജൂൺ ഏഴിന് കേരള സാംബവർ സൊസൈറ്റിയുടെ നേതൃത്വത്തിൽ അടൂർ പോലീസ് സ്റ്റേഷനിലേക്ക് മാർച്ച് നടത്തി. തുടർന്ന് അനൂപ് ചന്ദ്രനെ സ്ഥലം മാറ്റിയെങ്കിലും മറ്റ് നടപടികളെടുത്തില്ലെന്നും പരാതി പിൻവലിക്കണമെന്നാവശ്യപ്പെട്ട് ഉന്നത പോലീസ് ഉദ്യോഗസ്ഥർ സമീപിച്ചതായും ബാബു പറയുന്നു. വി.ബാബുവിന്‍റെ പരാതി ലഭിച്ച ഉടൻ തന്നെ സംഭവത്തിൽ അന്വേഷണം നടത്തി ആരോപണ വിധേയനായ എസ്ഐയെ പത്തനംതിട്ടയിലേക്ക് സ്ഥലം മാറ്റിയിരുന്നതായി പോലീസ് പറയുന്നു. സിസിടിവി ദൃശൃം പരിശോധിച്ചതിൽനിന്നും ബാബുവിനോട് എസ്ഐ കയർത്ത് സംസാരിക്കുന്നതായി കാണുന്നുണ്ട്. എന്നാൽ മർദിക്കുകയോ ജാതീയമായി അക്ഷേപിക്കുകയോ ചെയ്യുന്നത് ദൃശ്യത്തിലോ ശബ്ദരേഖയിലോ ഇല്ല. സിസിടിവി ദൃശ്യം പരാതിക്കാരനെ കാണിച്ച് ബോധ്യപ്പെടുത്തിയതാണെന്നും അടൂരിലെ പോലീസ് ഉദ്യോഗസ്ഥർ ചൂണ്ടിക്കാട്ടി.

ദേഹോപദ്രവക്കേസില്‍ ഒളിവിലായിരുന്നയാൾ അറസ്റ്റില്‍

തിരുവല്ല: ദേഹോപദ്രവക്കേസില്‍ ഒളിവിലായിരുന്നയാൾ അറസ്റ്റിലായി. തിരുവല്ല പടിഞ്ഞാറ്റോതറ കൈച്ചിറ മാളിയേക്കല്‍ പുത്തന്‍വീട്ടില്‍ എം. കെ. മഞ്‌ജേഷ് (35) ആണ് ഹൈക്കോടതിയില്‍ സമര്‍പ്പിച്ച ജാമ്യാപേക്ഷ നിരസിക്കപ്പെട്ടതിനേത്തുടര്‍ന്ന് അറസ്റ്റിലായത്. കഴിഞ്ഞ ജൂലൈ നാലിന് കുറ്റൂര്‍ കാഞ്ഞിരത്താംമോടിയില്‍ വച്ച് കാര്‍ യാത്രികരായ കുടുംബത്തെ ആക്രമിച്ച സംഭവത്തിലെ പ്രതിയായ ഇയാള്‍ ഒളിവിലായിരുന്നു. കേസിലെ ഒരു സാക്ഷിയെ ഭീഷണിപ്പെടുത്തിയതിന് മറ്റൊരു കേസ് കൂടി തിരുവല്ല പോലീസ് മഞ്ജേഷിനെതിരേ രജിസ്റ്റര്‍ ചെയ്തിട്ടുണ്ട്. നാല് പ്രതികള്‍ ഉള്ള കേസില്‍ ഇതോടെ മൂന്നു പേര്‍ അറസ്റ്റിലായി. ഒളിവിലുള്ള ആൾക്കായി എസ്ഐ ഉണ്ണികൃഷ്ണന്‍റെ നേതൃത്വത്തില്‍ അന്വേഷണം നടന്നുവരികയാണ്.

ഫിസിയോതെറാപ്പി ദിനം ആചരിച്ചു

തിരുവല്ല: പുഷ്പഗിരി മെഡിക്കൽ കോളജ് ഡിപ്പാർട്ട്മെന്‍റ് ഓഫ് ഫിസിയോതെറാപ്പിയുടെ നേതൃത്വത്തിൽ ലോക ഫിസിയോതെറാപ്പി ദിനാചരണം മന്ത്രി സജി ചെറിയാൻ ഉദ്ഘാടനം ചെയ്തു. പുഷ്പഗിരി ആശുപത്രി ഡയറക്ടർ ഫാ. മാത്യു പുത്തൻപുരയ്ക്കൽ അധ്യക്ഷത വഹിച്ചു. ഡോ. ശ്രീജിത് നന്പൂതിരി മുഖ്യാതിഥിയായിരുന്നു. പുഷ്പഗിരി ന്യൂറോളജി വിഭാഗം മേധാവി ഡോ. റെജി തോമസ്, ഫിസിയോ തെറാപ്പി വിഭാഗം മേധാവി ഡോ.ഷിബു ജോർജ്, ഡോ. ക്രിസ്റ്റീന തോമസ് എന്നിവർ പ്രസംഗിച്ചു.

മോഹനന്‍റെ കണ്ണുകൾ ഇനി രണ്ടുപേർക്ക് വെളിച്ചമേകും

റാന്നി: കാഴ്ച നേത്രദാന സേനയിലൂടെ റാന്നി ഒഴുവൻപാറ കൈരളിയിൽ മോഹനന്‍റെ (72) കണ്ണുകൾ ഇനി രണ്ടുപേർക്ക് വെളിച്ചമേകും. ഇന്നലെ രാവിലെയാണ് ഹൃദയാഘാതത്തേ തുടർന്ന് മോഹനൻ മരണപ്പെട്ടത്. മരണശേഷം കണ്ണുകൾ ദാനമായി നൽകുന്നതിന് കാഴ്ച നേത്രദാനസേനയിലൂടെ മോഹനൻ നേരത്തേ സമ്മതപത്രം നൽകിയിരുന്നു. ഇതേത്തുടർന്ന് കണ്ണുകൾ ദാനമായി നൽകുവാനുള്ള സന്നദ്ധത ബന്ധുക്കൾ കാഴ്ച നേത്രദാന സേന ജനറൽ സെക്രട്ടറി റോഷൻ റോയി മാത്യുവിനെ അറിയിക്കുകയായിരുന്നു. ഡോ.ലാൽ കൃഷ്ണ, ഡോ.എം.ഡി. സിനി, ഒഫ്താൽമോളജിസ്റ്റുമാരായ ജയലക്ഷ്മി, പ്രീജ പ്രസാദ്, സ്റ്റാഫ് നഴ്സ് സുജ എസ്. തോമസ്, ജീവനക്കാരായ സി.എം. സുധ, കെ.കെ. ശാന്തി, ദിനേശൻ എന്നിവരുടെ നേതൃത്വത്തിലുള്ള മെഡിക്കൽ ടീമാണ് റാന്നിയിലെ സ്വകാര്യ ആശുപത്രിയിൽ എത്തി നടപടികൾ പൂർത്തിയാക്കിയത്. ശേഖരിച്ച നേത്രപടലം ഇന്നലെ തന്നെ തിരുവനന്തപുരം മെഡിക്കൽ കോളജിലെ നേത്രബാങ്കിൽ എത്തിച്ചു. പേരു രജിസ്റ്റർ ചെയ്ത രണ്ട് അന്ധരായ ആളുകൾക്ക് ശസ്ത്രക്രിയയിലൂടെ കാഴ്ച നൽകും. കാഴ്ച നേത്രദാന സേനയിലുടെ ഇതോടെ 30 പേർക്ക് വെളിച്ചം പകർന്നു നൽകാനായി. സംസ്ഥാന ആരോഗ്യ വകുപ്പ്, ജില്ലാ അന്ധതാ നിവാരണ സമിതി എന്നിവയും ചേർന്നാണ് കാഴ്ചയുടെ പ്രവർത്തനം. സംഘടനയിൽ അംഗങ്ങളായ 14 ആളുകൾ നേരത്തേ മരണപ്പെട്ടപ്പോൾ 28 പേർക്ക് കാഴ്ചയേകുവാൻ കഴിഞ്ഞു. പ്രശസത ചലച്ചിത്ര സംവിധായകൻ ബ്ലസി ചെയർമാനായി പ്രവർത്തിക്കുന്ന സംഘടനയാണിത്. സൗജന്യ നേത്ര ചികിത്സാ തിമിര ശസ്ത്രക്രിയ ക്യാമ്പുകൾ, ശബരിമല വനാന്തരങ്ങളിലെ ആദിവാസി കുടുംബങ്ങൾക്ക് ആവശ്യമായ വൈദ്യസഹായം നൽകുന്നതുൾപ്പെടെ ജീവകാരുണ്യ പ്രവർത്തനങ്ങളും കാഴ്ച ഏറ്റെടുത്തിട്ടുണ്ട്. മരിച്ച മോഹനൻ എസ്എൻഡിപി യോഗം റാന്നി യൂണിയൻ മുൻ അഡ്മിനിസ്ട്രേറ്റീവ് കമ്മിറ്റിയംഗമായിരുന്നു. എസ്എൻഡിപി വനിത യൂണിയൻ മുൻ ചെയർപേഴ്സണും കാഴ്ച നേത്ര ദാന സേന വൈസ് ചെയർപേഴ്സണുമായ ഷേർളി മോഹനാണ് ഭാര്യ. മക്കൾ: വിമൽ, അമൽ. മരുമകൾ: ടീന.

ഓണത്തിന് ഒരു ലക്ഷം തൊഴിൽ: ലക്ഷ്യപൂർത്തീകരണ പ്രഖ്യാപനം ഇന്ന്

പത്തനംതിട്ട: വിജ്ഞാനകേരളവും കുടുംബശ്രീയും സംയുക്തമായി സംഘടിപ്പിച്ച ഓണത്തിന് ഒരു ലക്ഷം തൊഴിൽ കാന്പെയിനിൽ സംസ്ഥാനതലത്തിൽ ആദ്യമായി ലക്ഷ്യം പൂർത്തീകരിച്ച് പത്തനംതിട്ട. ജില്ലാതല ലക്ഷ്യപൂർത്തീകരണ പ്രഖ്യാപനവും തൊഴിൽ വികസന സംഗമവും കുടുംബശ്രീ അവാർഡ് വിതരണവും ഇന്ന് അടൂർ സെന്‍റ് തോമസ് കത്തീഡ്രൽ പാരിഷ് ഹാളിൽ നടക്കും. വൈകുന്നേരം നാലിന് നടക്കുന്ന യോഗത്തിൽ മന്ത്രി എം.ബി. രാജേഷ് ഉദ്ഘാടനം നിർവഹിക്കും. ഡെപ്യൂട്ടി സ്പീക്കർ ചിറ്റയം ഗോപകുമാർ അധ്യക്ഷത വഹിക്കും. മന്ത്രി വീണാ ജോർജ്, ജില്ലയിലെ എംഎൽഎമാർ , ജില്ലാ പഞ്ചായത്ത് പ്രസിഡന്‍റ് മറ്റ് തദ്ദേശസ്ഥാപന അധ്യക്ഷൻമാർ എന്നിവർ പരിപാടിയിൽ പങ്കെടുക്കും. കുടുംബശ്രീയുടെ വിവിധ മേഖലകളിൽ മികച്ച പ്രവർത്തനങ്ങൾ കാഴ്‌ചവച്ച വിവിധ സംരംഭങ്ങൾ, അയൽക്കൂട്ടങ്ങൾ, സിഡിഎസുകൾ എന്നിവയ്ക്കുള്ള അവാർഡ് വിതരണവും നടക്കും. രാവിലെ 10.30 മുതൽ 12 .30 വരെ പ്രാദേശിക തൊഴിൽ രംഗം സാധ്യതകൾ-സുസ്ഥിര സ്ഥാപന സംവിധാനം വെല്ലുവിളികൾ എന്ന വിഷയത്തിലും ഉച്ചയ്ക്ക് 2. 30 മുതൽ 4 .30 വരെ പ്രാദേശിക തൊഴിലും തൊഴിൽ നൈപുണ്യ വികസനവും എന്ന വിഷയത്തിലും സെമിനാറുകൾ നടക്കും. ഓണത്തിന് ഒരു ലക്ഷം തൊഴിൽ - കുടുംബശ്രീ - വിജ്ഞാനകേരളം കാന്പെയിന് 5000 തൊഴിൽ കണ്ടെത്തി തൊഴിൽ നൽകാനാണ് പത്തനംതിട്ടയുടെ ടാർജറ്റായി നൽകിയിരുന്നത്. ജില്ലയിലെ തദ്ദേശ സ്ഥാപനങ്ങളും കുടുംബശ്രീയും വിജ്ഞാനകേരളവും ജില്ലാ ആസൂത്രണ സമിതിയും കളക്ടറേറ്റും ഒന്നിച്ച് പ്രവർത്തിച്ചതിലൂടെ 985 സ്ഥാപനങ്ങളിലായി 8049 തൊഴിലുകൾ കണ്ടെത്താനും 5286 പേർക്ക് തൊഴിൽ നൽകാനും കഴിഞ്ഞു. സാമ്പത്തിക വർഷം കുടുംബശ്രീയും വിജഞാന കേരളവും സംയുക്തമായി ജില്ലയുടെ വിവിധ ഭാഗങ്ങളിലായി ചെറുതും വലുതുമായി 40 തൊഴിൽ മേളകളും പ്ലേസ്മെന്‍റ് ഡ്രൈവുകളും സംഘടിപ്പിച്ചിരുന്നു.

സേവന തത്പരരായ യുവത നാടിന് അഭിമാനം: ഡെപ്യൂട്ടി സ്പീക്കർ

കലയപുരം: സേവന തത്പരരായ യുവത നാടിന് അഭിമാനമാണെന്ന് ഡെപ്യൂട്ടി സ്പീക്കർ ചിറ്റയം ഗോപകുമാർ. കലയപുരം ആശ്രയ സങ്കേതത്തിൽ നടന്ന അഖില മലങ്കര യുവജനപ്രസ്ഥാനത്തിന്‍റെ കേന്ദ്രതല യുവജനവാര സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കൊട്ടാരക്കര - പുനലൂർ ഭദ്രാസനാധിപൻ ഡോ. യൂഹാനോൻ മാർ തേവോദോറസ് മെത്രാപ്പോലീത്ത അധ്യക്ഷത വഹിച്ച യോഗത്തിൽ മലങ്കര അസോസിയേഷൻ സെക്രട്ടറി ബിജു ഉമ്മൻ മുഖ്യ സന്ദേശം നൽകി. ചടങ്ങിൽ ആശ്രയ സങ്കേതത്തിന്‍റെ പ്രധാന ചുമതലക്കാരനും ജീവകാരുണ്യ പ്രവർത്തകനുമായ കലയപുരം ജോസിന് ഓർത്തഡോസ് ക്രൈസ്തവ യുവജനപ്രസ്ഥാനത്തിന്‍റെ സ്നേഹാദരവുകൾ സമർപ്പിച്ചു. കേന്ദ്ര വൈസ് പ്രസിഡന്‍റ് ഫാ. ജെയിൻ സി. മാത്യു, കേന്ദ്ര ജനറൽ സെക്രട്ടറി ഫാ. വിജു ഏലിയാസ്, ട്രഷറാർ രെഞ്ചു എം. ജോയ് ഭദ്രാസന സെക്രട്ടറി ഫാ. ജോൺസൺ മുളമൂട്ടിൽ, ഫാ. കെ. കെ. തോമസ്, ഫാ. ആശിഷ് ജയിംസ്, ഫാ. കോശി ജോൺ തുടങ്ങിയവർ പ്രസംഗിച്ചു.

ജില്ലയിൽനിന്ന് പരിഗണനയിൽ ഒൻപത് പച്ചത്തുരുത്തുകൾ

പത്തനംതിട്ട: മികച്ച പച്ചത്തുരുത്തിനുള്ള മുഖ്യമന്ത്രിയുടെ പുരസ്കാര നിർണയത്തിനുള്ള സ്‌ക്രീനിംഗ് ഇന്നാരംഭിക്കുന്പോൾ ജില്ലയിൽനിന്നു പരിഗണനയിലുള്ളത് ഒന്പത് പച്ചത്തുരുത്തുകൾ. തദ്ദേശ സ്ഥാപനതലത്തിൽ തുമ്പമൺ കുടമാങ്കൽ പച്ചത്തുരുത്ത്, കൊടുമൺ മുല്ലോട്ടുഡാം പച്ചത്തുരുത്ത്, ചെന്നീർക്കര ചെന്തിട്ട പച്ചത്തുരുത്ത് എന്നിവയാണ് ജില്ലയിൽ ഒന്ന്, രണ്ട്, മൂന്ന് സ്ഥാനങ്ങളിൽ വന്നത്. വിദ്യാലയങ്ങളിലെ മികച്ച പച്ചത്തുരുത്തുകളായി പിഎം ശ്രീ കേന്ദ്രീയ വിദ്യാലയം ചെന്നീർക്കര, പ്രമാടം ഗ്രാമപഞ്ചായത്തിലെ വി. കോട്ടയം ഗവ. എൽപി സ്കൂൾ, നെടുന്പ്രം പൊടിയാടി ഗവ.എൽപി സ്കൂൾ എന്നിവ ഒന്ന്, രണ്ട്, മൂന്ന് സ്ഥാനങ്ങൾ നേടി. ജില്ലയിലെ കലാലയങ്ങളിലെ പച്ചത്തുരുത്തുകളിൽ അടൂർ ഏഴംകുളം പഞ്ചായത്തിലെ എസ്എൻഐടിക്ക് ഒന്നാം സ്ഥാനം ലഭിച്ചു. ജില്ലയിലെ മികച്ച മുളന്തുരുത്തായി കുറ്റൂർ ഗ്രാമപഞ്ചായത്തിലെ മതിരംപുഴഹരിത പച്ചത്തുരുത്തും മറ്റു സ്ഥാപനങ്ങളുടെ വിഭാഗത്തിൽ മലയാലപ്പുഴ പഞ്ചായത്തിലെ ഗവ. ആയുർവേദാശുപത്രിയിലെ ഔഷധ പച്ചത്തുരുത്തും മികച്ചവയായി തെരഞ്ഞെടുക്കപ്പെട്ടു. സംസ്ഥാനമൊട്ടാകെ 1,272.89 ഏക്കറിലായി നിലവിലുള്ള 4,030 പച്ചത്തുരുത്തുകളില്‍ ജില്ലാ തലത്തില്‍ നടന്ന വിലയിരുത്തലുകളില്‍ മുന്നിലെത്തിയ പച്ചത്തുരുത്തുകള്‍ അടിസ്ഥാനമാക്കി വിദഗ്ധ സമിതിയുടെ മുന്നില്‍ ഇന്നു തിരുവനന്തപുരത്താണ് നടക്കുന്നത്. സംസ്ഥാനതലത്തില്‍ മികച്ചവയായി തെരഞ്ഞെടുക്കപ്പെടുന്നവയ്ക്കും ജില്ലാതല പുരസ്കാര ജേതാക്കള്‍ക്കും 16 ന് തിരുവനന്തപുരത്ത് ടാഗോര്‍ തിയേറ്ററില്‍ നടക്കുന്ന ചടങ്ങില്‍ മുഖ്യമന്ത്രി പിണറായി വിജയൻ പുരസ്കാരങ്ങള്‍ വിതരണം ചെയ്യും.

മോഷണക്കേസിൽ അറസ്റ്റിലായി

പന്തളം: വീട്ടുവളപ്പിൽ നിന്നും സൈക്കിളും പണവും മോഷ്ടിച്ച കേസിൽ ഒരാളെ പന്തളം പോലീസ് പിടികൂടി. കൊല്ലം കരിക്കോട് കുറ്റിച്ചിറ അമരവിള അൻസാർ (43) ആണ് അറസ്റ്റിലായത്. പന്തളം പൂഴിക്കാട് ശാസ്താംവിള തൊപ്പിന്‍റെ പടീറ്റതിൽ വീട്ടിൽ ബഷീർ റാവുത്തറുടെ 15,000 രൂപ വില വരുന്ന ഹീറോ സൈക്കിളും വീടിന്‍റെ സിറ്റൗട്ടിലെ സ്റ്റീൽ കൈവരിയിൽ തൂക്കിയിട്ടിരുന്ന ഷർട്ടിന്റെ പോക്കറ്റിൽ ഉണ്ടായിരുന്ന 3,800 രൂപയും അപഹരിച്ച കേസിലാണ് അറസ്റ്റ്. ഏഴിനു പുലർച്ചെ 12.15നാണ് സംഭവം. പരാതിയേത്തുടർന്ന് എഎസ്ഐ സുരേഷ് കുമാർ മൊഴി രേഖപ്പെടുത്തി, എസ്ഐ പി. മനോജ്കുമാർ കേസ് രജിസ്റ്റർ ചെയ്ത് അന്വേഷണം ആരംഭിച്ചു. പോലീസ് ഇൻസ്പെക്ടർ ടി. ഡി. പ്രജീഷിന്‍റെ നേതൃത്വത്തിലുള്ള അന്വേഷണസംഘം സിസിടിവി ദൃശ്യങ്ങൾ പരിശോധിച്ചും മറ്റും പ്രതിയ്ക്കായി തെരച്ചിൽ നടത്തി വരവേ ഏഴിന് രാത്രി എട്ടിനു പന്തളം പാലത്തടത്തു നിന്നും പ്രതിയെ മോഷ്ടിച്ച സൈക്കിളുമായി കസ്റ്റഡിയിൽ എടുത്ത് അറസ്റ്റ് രേഖപ്പെടുത്തുകയായിരുന്നു.

ആൾ... ആരവം... ആറന്മുള

പന്പയ്ക്കു പുളകച്ചാർത്തായി 51 പള്ളിയോടങ്ങൾ ആറന്മുള: ആറന്മുള നെട്ടായത്തിൽ ജലമേളയിൽ അണിനിരന്നത് 51 പള്ളിയോടങ്ങൾ. പന്പാനദിയുടെ ഇടക്കുളം മുതൽ ചെന്നിത്തല വരെയുള്ള കരകളിലെ പള്ളിയോടങ്ങൾ ജലഘോഷയാത്രയിലും മത്സര വള്ളംകളിയിലും പങ്കെടുത്തു. മുത്തുക്കുടയും കൊടിയും അമരച്ചാർത്തുമായി ആറന്മുള ക്ഷേത്രക്കടവിൽ എത്തിയശേഷം പള്ളിയോടങ്ങൾ ഒന്നൊന്നായി സത്രക്കടവിനു താഴെ ജലഘോഷയാത്രയ്ക്കായും അണിനിരന്നു. 51 പള്ളിയോടങ്ങളാണ് ജലഘോഷയാത്രയില്‍ പങ്കെടുത്തത്. എ ബാച്ചിൽപെട്ട 35 പള്ളിയോടങ്ങളും ബി ബാച്ചിൽപെട്ട 16 പള്ളിയോടങ്ങളും പങ്കെടുത്തു. തിരുവോണത്തോണിക്ക് അകന്പടിയെന്നോണം ബി ബാച്ച് പള്ളിയോടങ്ങൾ സത്രപവിലിയനിൽനിന്നു ചവിട്ടി തിരിച്ച് ജലഘോഷയാത്രയ്ക്കായി നീങ്ങി. എ ബാച്ച് പള്ളിയോടങ്ങൾ 11 ഗ്രൂപ്പുകളായും ബി ബാച്ച് പള്ളിയോടങ്ങൾ അഞ്ച് ഗ്രൂപ്പുകളായും തിരിഞ്ഞാണ് ജലഘോഷയാത്രയിലും മത്സര വള്ളംകളിയിലും പങ്കെടുത്തത്. ഇത്തവണത്തെ ജലോത്സവം സമയക്ലിപ്തത പാലിക്കുന്നതിൽ ഏറെ ശ്രദ്ധിച്ചു. പള്ളിയോടങ്ങൾ എല്ലാംതന്നെ കൃത്യസമയത്തിനു മുന്പായി സത്രക്കടവിൽ അണിനിരന്നിരുന്നു. ഉദ്ഘാടന യോഗം ആരംഭിച്ചതിനു പിന്നാലെ ജലഘോഷയാത്രയും ആരംഭിക്കാനായി. 15 ലക്ഷം രൂപയുടെ കേന്ദ്ര സഹായം ആറന്മുള: ഉത്തൃട്ടാതി ജലോത്സവത്തിന് കേന്ദ്ര ടൂറിസം സഹായമായി 15 ലക്ഷം നൽകുമെന്ന് കേന്ദ്രമന്ത്രി സുരേഷ് ഗോപി അറിയിച്ചതായി പള്ളിയോട സേവാസംഘം പ്രസിഡന്‍റ് കെ.വി. സാംബദേവൻ പറഞ്ഞു. കുറ്റമറ്റ രീതിയിലുള്ള ക്രമീകരണമാണ് ഇക്കുറി വള്ളംകളിക്കുവേണ്ടി ചെയ്തത്. കൃത്യസമയത്തു തന്നെ ജലഘോഷയാത്ര ആരംഭിച്ചു. ഇതിനിടെ ഫൈനൽ മത്സരത്തിൽ പുറമേനിന്നുള്ള തുഴച്ചിൽകാർ പള്ളിയോടങ്ങളിൽ ക‍യറിയെന്നാരോപിച്ച് കോയിപ്രം പള്ളിയോടം സ്റ്റാർട്ടിംഗ് പോയിന്‍റിൽ കുറുകെ ഇട്ടു. പോലീസ് ഇടപെടലിൽ പള്ളിയോടം സ്ഥലത്തു നിന്നു മാറ്റുകയായിരുന്നു. ഉച്ചയ്ക്ക് ഒന്നോടെ ആരംഭിച്ച ജലോത്സവം രാത്രി ഏഴോടെ പൂർത്തീകരിച്ചു. ജലോത്സവം വീക്ഷിക്കാൻ തായ്‌ലാൻഡുകാരും ആറന്മുള: ഉത്തൃട്ടാതി ജലോത്സവം വീക്ഷിക്കാൻ തായ്‌ലാൻഡിൽ നിന്നുള്ള സഞ്ചാരികളും ഇന്നലെ ആറന്മുളയിലെത്തി. കോയിപ്രം സ്വദേശിയും പ്രവാസിയുമായ രഘുവരന്‍റെ അതിഥികളായിട്ടാണ് സംഘം എത്തിയത്. വള്ളംകളിയും വള്ളസദ്യയും ആസ്വദിച്ചാണ് സംഘം മടങ്ങിയത്. സ്ഥിരം പവലിയൻ നിർമിക്കും: മന്ത്രി ആറന്മുള: ഉത്തൃട്ടാതി വള്ളംകളിക്കായി സത്രക്കടവിൽ സ്ഥിരം പവലിയൻ നിർമിക്കുമെന്നു മന്ത്രി വീണാ ജോർജ്. ഉത്തൃട്ടാതി വള്ളംകളിയുടെ ഭാഗമായുള്ള ജലഘോഷയാത്ര സത്രക്കടവിൽ ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. ബജറ്റിൽ പവലിയൻ നിർമാണത്തിനും സംരക്ഷണത്തിനും തുക അനുവദിച്ച് ടെൻഡർ നടപടി പുരോഗമിക്കുന്നു. അടുത്ത വർഷത്തെ ജലമേളയ്ക്കു മുന്പ് നിർമാണം പൂർത്തിയാക്കും. പാമ്പയാറിന്‍റെ മനോഹാരിത സംരക്ഷിച്ചായിരിക്കും നിർമാണം. ആറന്മുളയുടെ ഓണമാണ് ചിങ്ങമാസത്തിലെ ഉത്തൃട്ടാതി. ചരിത്രത്തിലെ ഏറ്റവും പഴക്കമുള്ള വള്ളംകളിലൊന്നായ ആറന്മുളയിലേത് ഭക്തിയുടെയും വിശ്വാസത്തിന്‍റെയും സമർപ്പണത്തിന്‍റെയും അടയാളമാണെന്ന് മന്ത്രി ചൂണ്ടിക്കാട്ടി. പള്ളിയോട സേവാസംഘം പ്രസിഡന്‍റ് കെ.വി. സാംബദേവൻ അധ്യക്ഷത വഹിച്ചു. പ്രമോദ് നാരായൺ എംഎൽഎ വഞ്ചിപ്പാട്ട് കലാകാരന്മാരെ ആദരിച്ചു. സിനിമാതാരം ജയസൂര്യ സുവനീർ പ്രകാശനം ചെയ്തു. വാഴൂർ തീർഥപാദാശ്രമം സ്വാമി പ്രജ്ഞാനന്ദ തീർഥ പാദർ അനുഗ്രഹ പ്രഭാഷണം നടത്തി. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, ജില്ലാ കളക്ടർ എസ്. പ്രേം കൃഷ്ണൻ, ജില്ലാ പോലീസ് മേധാവി ആർ. ആനന്ദ്, മുൻ എംഎൽഎമാരായ രാജു ഏബ്രഹാം, മാലേത്ത് സരളാ ദേവി, എ. പത്മകുമാർ, കെ.സി രാജഗോപാലൻ, വിവരവകാശ കമ്മീഷൻ ചെയർമാൻ വി. ഹരികുമാർ, കേരള മനുഷ്യാവകാശ കമ്മീഷൻ ജുഡീഷൽ മെംബർ കെ. രഞ്ജുനാഥ്, ബ്ലോക്ക് പഞ്ചായത്ത് പ്രസിഡന്‍റുമാരായ ജെ. ഇന്ദിരാദേവി, ബി. എസ്. അനീഷ് മോൻ, സി. കെ. അനു, സൂസൻ ഫിലിപ്പ്, ബാർ അസോസിയേഷൻ പ്രസിഡന്‍റ് കെ. ജയവർമ, ജില്ലാ പഞ്ചായത്തംഗങ്ങളായ ഓമല്ലൂർ ശങ്കരൻ, ആർ. അജയകുമാർ, ഗ്രാമപഞ്ചായത്ത് പ്രസിഡന്‍റുമാർ, പള്ളിയോട സേവാ സംഘം സെക്രട്ടറി പ്രസാദ് ആനന്ദ ഭവൻ തുടങ്ങിയവർ പ്രസംഗിച്ചു. ആർ. ശങ്കർ സുവർണ ട്രോഫി നെല്ലിക്കൽ പള്ളിയോടത്തിന് ആറന്മുള: ഉത്തൃട്ടാതി ജലമേളയിൽ ഇക്കുറി ആർ. ശങ്കർ മെമ്മോറിയൽ സുവർണ ട്രോഫി നേടിയത് നെല്ലിക്കൽ പള്ളിയോടമാണ്. എ ബാച്ചിൽ മികച്ച രീതിയിൽ പാടി തുഴഞ്ഞു പുരസ്കാരം നേടിയ പള്ളിയോടങ്ങൾ മാലക്കരയും തെക്കേ മുറിയുമാണ്. ബി ബാച്ചിൽ പാടി തുഴഞ്ഞതിന് കടപ്ര പള്ളിയോടം സമ്മാനം നേടി. മികച്ച ചമയത്തിനും ആടയാഭരണത്തിനും ആറാട്ടുപുഴ പള്ളിയോടം ഒന്നാമതെത്തി. എ ബാച്ചിൽ മികച്ച ചമയം ആടയാഭരണം എന്നിവയ്ക്ക് കാട്ടൂർ, വെൺപാല ്നിവ ഒന്നും രണ്ടും സ്ഥാനങ്ങൾ നേടി. സംഭരണി തുറന്ന് ജലലഭ്യത ഉറപ്പാക്കി ആറന്മുള: ഉത്തൃട്ടാതി ജലോത്സവത്തിനായി കാരിക്കയം സംഭരണി തുറന്ന് ജലലഭ്യത ഉറപ്പാക്കി. തിങ്കളാഴ്ച ആറന്മുള നെട്ടായത്തിലെ ജലനിരപ്പ് മൂന്നു മീറ്ററിൽ താഴെയാണെന്നു കണ്ടതോടെയാണ് സംഭരണി തുറക്കാൻ തീരുമാനിച്ചത്. ഇന്നലെ രാവിലെ സംഭരണി തുറന്ന് നെട്ടായത്തിലെ ജലനിരപ്പ് അഞ്ച് മീറ്ററിലേക്ക് ഉയർത്തി. ഇതോടെ ജലഘോഷയാത്രയിലും മത്സരവള്ളംകളിയിലും പങ്കെടുത്ത പള്ളിയോടങ്ങൾക്ക് സുഗമമായ യാത്ര സാധ്യമായി. കഴിഞ്ഞയാഴ്ച വരെ മഴയുണ്ടായിരുന്നെങ്കിലും പന്പാനദിയിലെ ജലനിരപ്പ് വളരെവേഗം താഴ്ന്നത് ആശങ്ക ഉളവാക്കിയിരുന്നു. ഒന്നാം സ്ഥാനക്കാരായി പുത്തൻപള്ളിയോടം എ ബാച്ചിൽനിന്ന് ഇത്തവണ മന്നം ട്രോഫി കരസ്ഥമാക്കിയ മേലുകര പള്ളിയോടമാണ്. മേലുകര കരക്കാർ പുതുതായി നിർമിച്ച് നീറ്റിലിറക്കിയ പള്ളിയോടമാണ് ജേതാക്കളായത്. പ്രവീൺ കുമാർ ക്യാപ്റ്റനായ പള്ളിയോടം 35 ലക്ഷം രൂപ ചെലവിലാണ് നിർമിച്ചത്. ആവേശമായി മാറിയ പള്ളിയോടത്തിൽ തുഴയെറിയാൻ ഇക്കുറി പരിശീലനം നേടിയവ കരക്കാരെയാണ് ഉൾക്കൊള്ളിച്ചത്. താളത്തിനൊത്ത് തുഴഞ്ഞ് അടനയന്പുകൾ നിയന്ത്രിച്ച് പ്രാഥമികപാദം മുതൽ മികച്ച പ്രകടനം മേലുകര നടത്തി. എ ബാച്ചിൽ അയിരൂർ, മല്ലപ്പുഴശേരി, ഇടശേരിമല കിഴക്ക് പളളിയോടങ്ങൾ യഥാക്രമം രണ്ടും മൂന്നും നാലും സ്ഥാനങ്ങൾ നേടി. ബി ബാച്ചിൽ ഒന്നാമത്തെതിയ കോറ്റാത്തൂർ മുന്പും മന്നം ട്രോഫി കരസ്ഥമാക്കിയിട്ടുണ്ട്. കോടിയാട്ടുകര, ഇടപ്പാവൂർ, തൈമറവുംകര എന്നിവയ്ക്കാണ് രണ്ടും മൂന്നും നാലും സ്ഥാനങ്ങൾ. എ ബാച്ച്‌ ലൂസേഴ്സ് ഫൈനലിൽ കുറിയന്നൂർ മുന്നിലെത്തി. ഓതറയും കീഴുകരയും രണ്ടും മൂന്നും സ്ഥാനങ്ങൾ നേടി .ബി ബാച്ച്‌ ലൂസേഴ്സ് ഫൈനലിൽ വൻമഴി പള്ളിയോടം പ്രഥമസ്ഥാനത്തെത്തി. കീക്കൊഴൂർ- വയലത്തല രണ്ടാമതും കടപ്ര മൂന്നാമതും തുഴഞ്ഞെത്തി. ബി ബാച്ച് പള്ളിയോടങ്ങളിൽ പ്രാഥമിക പാദത്തിൽ മത്സരിച്ചവയിൽനിന്നു മികച്ച സമയം കണക്കാക്കി ഫൈനലിലേക്കും ലൂസേഴ്സ് ഫൈനലിലേക്കും തെരഞ്ഞെടുക്കുകയായിരുന്നു. എ ബാച്ചിൽ ഓരോ ഗ്രൂപ്പിലും ജേതാക്കളായവരെ ഉൾപ്പെടുത്തി അവസാന റൗണ്ട് മത്സരങ്ങൾ നടത്തി.

പത്രപ്രവര്‍ത്തക യൂണിയന്‍ സംസ്ഥാന സമ്മേളനം: സ്വാഗതസംഘം രൂപീകരിച്ചു

പത്തനംതിട്ട: പത്തനംതിട്ടയിൽ ഒക്ടോബർ അവസാന വാരം നടക്കുന്ന കേരള പത്രപ്രവര്‍ത്തക യൂണിയന്‍ 61-ാം സംസ്ഥാന സമ്മേളനത്തിന്‍റെ സ്വാഗതസംഘം രൂപീകരിച്ചു. വൈ.എം.സി.എയില്‍ ചേര്‍ന്ന യോഗം മന്ത്രി വീണാ ജോര്‍ജ് ഉദ്ഘാടനം ചെയ്തു. കേരള പത്രപ്രവര്‍ത്തക യൂണിയന്‍ സംസ്ഥാന പ്രസിഡന്‍റ് കെ.പി. റെജി അധ്യക്ഷത വഹിച്ചു. നഗരസഭാ ചെയര്‍മാന്‍ അഡ്വ. ടി. സക്കീര്‍ ഹുസൈന്‍ മുഖ്യപ്രഭാഷണം നടത്തി. കെ.യു.ഡബ്ല്യു.ജെ സംസ്ഥാന ജനറൽ സെക്രട്ടറി സുരേഷ് എടപ്പാള്‍ ആമുഖപ്രഭാഷണം നിര്‍വഹിച്ചു. സി.പി.എം ജില്ലാ സെക്രട്ടറി രാജു ഏബ്രഹാം, ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ, ജില്ലാ പഞ്ചായത്തംഗങ്ങളായ ഓമല്ലൂര്‍ ശങ്കരൻ, റോബിന്‍ പീറ്റർ, ഓമല്ലൂര്‍ പഞ്ചായത്ത് പ്രസിഡന്‍റ് ജോണ്‍സണ്‍ വിളവിനാല്‍, നഗരസഭ കൗണ്‍സിലര്‍ കെ. ജാസിംകുട്ടി, സ്‌പോര്‍ട്‌സ് കൗണ്‍സില്‍ ജില്ലാ പ്രസിഡന്‍റ് കെ. അനില്‍കുമാര്‍, ജില്ലാ ബാര്‍ അസോസിയേഷന്‍ പ്രസിഡന്‍റ് കെ. ജയവര്‍മ, വിവിധ രാഷ്‌ട്രീയ കക്ഷികളുടെയും ട്രേഡ് യൂണിയനുകളുടെയും നേതാക്കളായ ജോസഫ് എം. പുതുശേരി, കെ.കെ. റോയിസണ്‍, എസ്. ഹരിദാസ്, ജ്യോതിഷ്‌കുമാര്‍ മലയാലപ്പുഴ, ടി.എം. ഹമീദ്, തോമസ് ജോസഫ്, ബി. ഹരിദാസ്, പി.കെ. ജേക്കബ്, രാജു നെടുവംപുറം, വിക്ടര്‍ ടി. തോമസ്, ദീപു ഉമ്മൻ, വ്യാപാരി വ്യവസായി ഏകോപന സമിതി വൈസ് പ്രസിഡന്‍റ് ഹാജി അഷ്‌റഫ് അലങ്കാര്‍, മുതിര്‍ന്ന മാധ്യമപ്രവര്‍ത്തകന്‍ സാം ചെമ്പകത്തില്‍, കെ.യു.ഡബ്ല്യു.ജെ ജില്ലാ പ്രസിഡന്‍റ് ബിജു കുര്യന്‍, സെക്രട്ടറി ജി. വിശാഖന്‍ എന്നിവര്‍ പ്രസംഗിച്ചു. ടി. സക്കീര്‍ ഹുസൈന്‍ ചെയര്‍മാനും കെ.പി റെജി വര്‍ക്കിങ് ചെയര്‍മാനും സുരേഷ് എടപ്പാള്‍ വൈസ് ചെയര്‍മാനും ബോബി ഏബ്രഹാം ജനറൽ കണ്‍വീനറും ബിജുകുര്യന്‍, ജി. വിശാഖന്‍ എന്നിവര്‍ കണ്‍വീനര്‍മാരുമായി 101 അംഗ സ്വാഗതസംഘം രൂപീകരിച്ചു.

സാമൂഹിക സേവനത്തിലൂടെ ശ്രദ്ധേയയായ ഷൈനി ടീച്ചർക്ക് സംസ്ഥാന പുരസ്കാരം

പത്തനംതിട്ട: 2024-25 ലെ സംസ്ഥാനത്തെ മികച്ച അധ്യാപികയായി പൊതുവിദ്യാഭ്യാസ വകുപ്പ് പുരസ്കാരത്തിന് വടശേരിക്കര ടിടിടിഎംവിഎച്ച്എസ്എസിലെ ഷൈനി ജോസഫ് അർഹയായി. ജില്ലാ, സംസ്ഥാനതല സമിതിയുടെയും പാഠ്യ, പാഠ്യേതര രംഗങ്ങളിലെ പ്രവർത്തന മികവ് പരിഗണിച്ചും മാതൃക ക്ലാസ് അവതരണത്തിന്‍റെയും അഭിമുഖം എന്നിവയിലെ പ്രകടനം വിലയിരുത്തിയാണ് സംസ്ഥാന അവാർഡ് ജേതാക്കളെ തെരഞ്ഞെടുക്കുന്നത്. അർപ്പണബോധത്തോടെ അധ്യാപനത്തെ സമീപിക്കുകയും കുട്ടികളുടെ സർവോമുഖമായ വികസത്തിന് അവസരം ഒരുക്കുകയും അധ്യാപനത്തിന്‍റെ നൂതന സാങ്കേതങ്ങളെ പ്രയോഗവത്കരിച്ചു ഗുണമേന്മ വർധിപ്പിക്കുകയും സാമൂഹിക പങ്കാളിത്തം വിദ്യാലയത്തിൽ ഉറപ്പ് വരുത്തുകയും സ്കൂളിലെ ഭൗതിക സാഹചര്യങ്ങളുടെ മെച്ചപ്പെടുത്തലും കുട്ടികൾക്കുള്ള ഭവന നിർമാണ പുനർ നിർമാണ പ്രവർത്തനങ്ങളെ വിലയിരുത്തിയുമാണ് ഷൈനി ജോസഫിനെ തേടി പുരസ്കാരം എത്തിയത്. 2023 -24 ലെ സംസ്ഥാനത്തെ മികച്ച എൻഎസ്എസ് യൂണിറ്റിനുള്ള അവാർഡ് സ്കൂളിനും സംസ്ഥാനത്തെ മികച്ച എൻഎസ്എസ് പ്രോഗ്രാം ഓഫീസർക്കുള്ള അവാർഡും ടീച്ചറിന്‍റെ പ്രവർത്തനത്തിലൂടെ നേടിയെടുക്കാൻ സാധിച്ചു. അതോടൊപ്പം 2022-23 വർഷത്തെ ജില്ലാതലത്തിൽ മികച്ച എൻഎസ്എസ് യൂണിറ്റിനുള്ള അവാർഡും കൂട്ടായ പ്രവർത്തനത്തിലൂടെ നേടിയെടുത്തു. സെൻട്രൽ ബാങ്ക് റിട്ട. മാനേജർ ചേന്നാട്ട് ഇമ്മാനുവേൽ മാത്യുവാണ് ഷൈനി ജോസഫിന്‍റെ ഭർത്താവ്. മൂത്തമകൻ അലൻ ഷൈൻ മാനുവൽ എംടെക് പൂർത്തിയാക്കി ടെക്നോപാർക്കിൽ പ്രവർത്തിക്കുന്നു. രണ്ടാമത്തെ മകൻ ബ്രയിൻ ഷൈൻ മാനുവൽ പാലാ സെന്‍റ് തോമസ് കോളജിൽ എംഎസ് സി ഫിസിക്സ് രണ്ടാം വിദ്യാർഥിയാണ്.

സഫ്രഗൻ മെത്രാപ്പോലീത്തയുടെ ജന്മദിന സമ്മാനം: ഗോത്രവർഗ സമൂഹത്തിന് വീടുകൾ നിർമിക്കും

റാന്നി: മാർത്തോമ്മാ സഭ റാന്നി നിലയ്ക്കൽ ഭദ്രാസനം ഗോത്രവർഗ സമൂഹത്തിന് ഭവനങ്ങൾ നിർമിച്ചു നൽകും. ഭദ്രാസന അധ്യക്ഷൻ ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്തായ്ക്ക് എഴുപത്തിയഞ്ച് വയസ് തികയുന്നതിന്‍റെ ഭാഗമായി നടപ്പാക്കുന്ന കനവ് പാർപ്പിട പദ്ധതിയിലൂടെയാണ് ഈ വീടുകൾ നിർമിക്കുന്നത്. ളാഹ ഡിവിഷനിൽ മഞ്ഞത്തോട് ട്രൈബൽ കോളനിയിലാണ് അഞ്ച് വീടുകളും വിദ്യാർഥികൾക്കായി പഠനം കേന്ദ്രവും നിർമിക്കുന്നത്. ഭവനനിർമാണ പദ്ധതിയുടെ ശിലാസ്ഥാപനം ഡോ.ജോസഫ് മാർ ബർണബാസ് സഫ്രഗൻ മെത്രാപ്പോലീത്ത നിർവഹിച്ചു. ഭദ്രാസന സെക്രട്ടറി റവ.തോമസ് കോശി പനച്ചമൂട്ടിൽ, ട്രഷറർ അനു ഫിലിപ്പ്, പഞ്ചായത്ത് മെംബർ മഞ്ജു പ്രമോദ്, ഡെപ്യൂട്ടി റേഞ്ച് ഓഫീസർ കെ.മുകേഷ്, രാജു മൂപ്പൻ, റിബു തോമസ്, ഏബ്രഹാം മാത്യു പനച്ചമൂട്ടിൽ, കോശി തര്യൻ, മനോജ് ജോർജ്, റവ.അജി വർഗീസ്, റവ.അരുൺ തോമസ് , അലക്സാണ്ടർ വർഗീസ്, അനോ ഡേവിഡ് തോമസ് എന്നിവർ പ്രസംഗിച്ചു. റവ സി.കെ. കൊച്ചുമോൻ, റവ.റിജോ മാത്യു ജോയി, ജെറി വർഗീസ് എന്നിവരുടെ നേതൃത്വത്തിൽ വസ്ത്ര വിതരണവും നടന്നു. കനവ് പാർപ്പിട പദ്ധതിയുടെ ഭാഗമായി സഭയിൽ സാമ്പത്തിക പിന്നോക്കാവസ്ഥയിൽ കഴിയുന്ന അമ്പത് പേർക്ക് ഭവനങ്ങളുടെ അറ്റകുറ്റപ്പണികൾ നടത്താൻ സഹായം നൽകുന്നതാണന്ന് ഭദ്രാസന സെക്രട്ടറി റവ തോമസ് കോശി പനച്ചമൂട്ടിലും ട്രഷറർ അനു ഫിലിപ്പും അറിയിച്ചു. ജന്മദിന ആഘോഷങ്ങളുടെ ഭാഗമായി ഇന്നലെ പഴവങ്ങാടിക്കര ഇമ്മാനുവൽ മാർത്തോമ്മാ പള്ളിയിൽ വിശുദ്ധ കുർബാന നടന്നു. ഡോ.മാത്യൂസ് മാർ മക്കാറിയോസ്, ഡോ.ജോസഫ് മാർ ഇവാനിയോസ്, സഖറിയാസ് മാർ അപ്രേം, മാത്യൂസ് മാർ സെറാഫിം തുടങ്ങിയവർ പങ്കെടുത്തു.

പത്തനംതിട്ട ജില്ലാ സ്റ്റേഡിയം ആദ്യഘട്ടം നവംബറിനുള്ളിൽ: മന്ത്രി വീണാ ജോര്‍ജ്

പത്തനംതിട്ട: ജില്ലാ സ്റ്റേഡിയം നവംബറിനുള്ളില്‍ പൂര്‍ത്തീകരിക്കാന്‍ മന്ത്രി വീണാ ജോര്‍ജ് നിര്‍മാണ ചുമതലയുള്ള കമ്പനിക്ക് നിര്‍ദേശം നല്‍കി. പവലിയന്‍ ഒന്ന്, പവലിയന്‍ രണ്ട് എന്നിവയുടെ നിര്‍മാണം പുരോഗമിക്കുന്നു. പവലിയന് മുകളില്‍ ഗാലറിയുടെ ഇരിപ്പിടതട്ട് എടുത്തിട്ടുണ്ട്. സിന്തറ്റിക് ട്രാക്ക് സ്റ്റേഡിയം ജില്ലയെ സംബന്ധിച്ച് സ്വപ്ന സാക്ഷാത്കാരമാണെന്നും മന്ത്രി പറഞ്ഞു. സ്റ്റേഡിയം സന്ദര്‍ശിച്ച് നിര്‍മാണ പുരോഗതി വിലയിരുത്തുകയായിരുന്നു മന്ത്രി. കിഫ്ബി വഴി 47.92 കോടി രൂപ ചെലവഴിച്ചാണ് നിര്‍മാണം നടത്തുന്നത്. പദ്ധതിയിലെ പ്രധാന നിര്‍മിതികളായ ട്രാക്ക്, നീന്തല്‍ക്കുളം, മിനി ഇന്‍ഡോര്‍ സ്റ്റേഡിയം പവലിയന്‍ ബ്ലോക്ക് എന്നിവ പുരോഗമിക്കുന്നു. സ്റ്റേഡിയത്തിനുള്ളില്‍ പുല്ല് പിടിപ്പിക്കാന്‍ മണ്ണ് നിറയ്ക്കുന്നതും ട്രാക്കിനുള്ളില്‍ വരുന്ന ഡ്രെയ്‌നേജിന്റെ നിര്‍മാണവും പൂര്‍ത്തിയായി വരികയാണ്. ഫുട്‌ബോള്‍ ടര്‍ഫും ഓപ്പണ്‍ സ്റ്റേഡിയത്തില്‍ സജ്ജമാക്കും. സമീപത്തെ ഇന്‍ഡോര്‍ സ്റ്റേഡിയത്തിന്‍റെ പൈല്‍ ക്യാപ് പകുതിയിലധികം പൂര്‍ത്തിയായി. നീന്തല്‍ക്കുളത്തിന്‍റെ പൈലിംഗ് ക്യാപ് പ്രവൃത്തികള്‍ പൂര്‍ത്തിയായി. നീന്തല്‍ കുളത്തിന്‍റെ സമീപത്തെ ബാലന്‍സിംഗ് ടാങ്ക് പ്രവൃത്തി പുരോഗമിക്കുന്നു. തോട് സംരക്ഷണ ഭിത്തി നിര്‍മാണം 80 ശതമാനം പൂര്‍ത്തിയായി. ആദ്യഘട്ട ജോലികൾ നവംബറിനുള്ളിൽ പൂർത്തീകരിക്കാനാണ് മന്ത്രി നിർദേശം നൽകിയിരിക്കുന്നത്. ഊരാളുങ്കൽ ലേബർ സൊസൈറ്റിക്കാണ് കരാർ. സ്റ്റേഡിയം സന്ദർശിച്ച മന്ത്രിക്കൊപ്പം ജില്ലാ സ്പോർട്സ് കൗൺസിൽ പ്രസിഡന്‍റ് കെ. അനിൽ കുമാറും കൗൺസിലർ അനില അനിൽ കുമാറും മന്ത്രിക്കൊപ്പം ഉണ്ടായിരുന്നു.

നബിദിന മാനവിക സദസ്

തിരുവല്ല: മുസ്‌ലിം ജമാഅത്തിന്‍റെ ആഭിമുഖ്യത്തിൽ നബിദിന സമ്മേളനത്തിന്‍റെ ഭാഗമായി മത സൗഹാർദ സന്ദേശമരുളി മാനവിക സദസ് നടത്തി. ജമാഅത്ത് ചീഫ് ഇമാം അൽ ഹാഫിസ് മുഹമ്മദ് റിഫാൻ റഹ്മാനി സമ്മേളനം ഉദ്ഘാടനം ചെയ്തു. ഡോ. ഗീവറുഗീസ് മാർ കൂറിലോസ് മെത്രാപ്പോലീത്ത മുഖ്യ പ്രഭാഷണം നടത്തി. സ്വാമി പ്രണവ് സ്വരൂപാനന്ദ, ബിഷപ് തോമസ് സാമുവൽ എന്നിവർ അനുഗ്രഹ പ്രഭാഷണങ്ങൾ നടത്തി. മികച്ച യുവകർഷക ജേതാവിനെ ചടങ്ങിൽ ആദരിച്ചു. മദ്രസ ഫെസ്റ്റ് വിജയികളെയും, എസ്എസ്എൽസി, പ്ലസ്ടു പരീക്ഷയിലെ ഉന്നത വിജയികളെയും അനുമോദിച്ചു. പ്രസിഡന്‍റ് ഹാജി മുഹമ്മദ് സാദിഖ് മന്നാനി അധ്യക്ഷത വഹിച്ചു. ഇമാം മൻസൂർ മൗലവി അൽ ഖാസിമി, അൽ ഹാഫിസ് അൽ അമീൻ മന്നാനി, ഫിറോസ് ഖാൻ, എം.സലീം, സാലഹ് സലാം, സാജു കബീർ, കെ.എച്ച്. അബ്ദുൾ സലാം, ബിൻഷ കെ.ബിന്യാമിൻ, പി.എസ്.നിസാമുദീൻ, വി.കെ. അൻഷാദ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]