ADVERTISEMENT

ADVERTISEMENT

സ്കൂൾ വാർഷികവും യാത്രയയപ്പും നടത്തി

കരുവാരകുണ്ട്: കൊയ്ത്തക്കുണ്ട് ഗവണ്‍മെന്‍റ് എൽപി സ്കൂൾ വാർഷികവും യാത്രയയപ്പ് സംഗമവും നടത്തി. എ.പി. അനിൽകുമാർ എംഎൽഎ ഉദ്ഘാടനം ചെയ്തു. പിടിഎ പ്രസിഡന്‍റ് റഷീദ് പാതിക്കാടൻ അധ്യക്ഷത വഹിച്ചു.

ഗ്രാമപഞ്ചായത്ത് വൈസ് പ്രസിഡന്‍റ് മഠത്തിൽ ലത്തീഫ്, രാജൻ കരുവാരകുണ്ട്, കെ. ഷിഹാബ്, കെ. മുഹമ്മദ്, എം. കൃഷ്ണൻകുട്ടി, കെ. റിൻഷിദ, ബി.എൽ. ബിന്ദു, പി.രഘു എന്നിവർ പ്രസംഗിച്ചു.

വിരമിക്കുന്ന പ്രധാനാധ്യാപിക ബി.എസ്. സുജാതക്ക് എംഎൽഎ ഉപഹാരം നൽകി. വിദ്യാർഥികളുടെ കലാവിരുന്നും അരങ്ങേറി.

ADVERTISEMENT

വിൽപ്പനയുടെ പേരിൽ കബളിപ്പിച്ചെന്ന് പരാതി; കടയ്ക്ക് പിഴ ചുമത്തി

മലപ്പുറം: "ഹാപ്പി ഹവർ ഓഫർ’ വിൽപ്പനയിലൂടെ ഉപഭോക്താക്കളെ കബളിപ്പിച്ചുവെന്ന പരാതിയിൽ മഞ്ചേരിയിൽ പുതുതായി പ്രവർത്തനം ആരംഭിച്ച കടയ്ക്ക് ജില്ലാ ഉപഭോകൃത കമ്മീഷൻ 10,000 രൂപ പിഴ ചുമത്തി. 2024 ഒക്ടോബർ ഒന്നിന് കടയിൽ നിന്ന് സാധനങ്ങൾ വാങ്ങിക്കുന്ന സമയത്താണ് ഉപഭോക്താവിനെ രണ്ടാം തിയതി മുതൽ ഓഫർ വിലയിൽ സാധനങ്ങൾ ലഭിക്കുമെന്ന് അറിയിച്ചത്. സാധനങ്ങളുടെ എംആർപിയും വിൽപ്പന വിലയും ഓഫർ വിലയും കാണിക്കുന്ന ബ്രോഷറും പരാതിക്കാരന് നൽകിയിരുന്നു. ഇത് പ്രകാരം സാധനങ്ങൾ വാങ്ങി ബില്ലെഴുതുന്പോൾ പച്ചക്കറിക്ക് മാത്രമാണ് ഓഫർ വിലയെന്നും മറ്റുള്ളവയുടെ ഓഫർ വില അതത് സമയം പ്രഖ്യാപിക്കുന്പോൾ മാത്രമേ ഉണ്ടാവുകയുള്ളൂവെന്നും അറിയിച്ചു. എന്നാൽ നോട്ടീസിലോ കടയിലോ ഇതുസംബന്ധിച്ച് വിവരങ്ങൾ ഒന്നുമില്ലെന്ന് ചൂണ്ടിക്കാണിച്ചായിരുന്നു മഞ്ചേരി കരിക്കാട് സ്വദേശി ബാലകൃഷ്ണൻ കമ്മീഷനിൽ പരാതി നൽകിയത്. പരാതിക്കാരനുണ്ടായ ബുദ്ധിമുട്ടുകൾ പരിഗണിച്ച് 10,000 രൂപ നഷ്ടപരിഹാരമായി നൽകണമെന്ന് മോഹൻദാസ് പ്രസിഡന്‍റും പ്രീതി ശിവരാമൻ, സി.വി. മുഹമ്മദ് ഇസ്മായിൽ എന്നിവർ അംഗങ്ങളുമായ ഉപഭോക്തൃത കമ്മീഷൻ നിർദേശിച്ചു.

രോഗികൾക്ക് ദാഹമകറ്റാൻ തണ്ണീർ പന്തൽ

മഞ്ചേരി: കടുത്ത വേനലിൽ രോഗികൾക്ക് ദാഹമകറ്റാൻ തണ്ണീർ പന്തലൊരുക്കി. മഞ്ചേരി ഗവണ്‍മെന്‍റ് മെഡിക്കൽ കോളജ് ആശുപത്രിയിത്തെുന്ന രോഗികൾക്ക് വേണ്ടി കെഎസ്ടിഎ ഉപജില്ലാ കമ്മിറ്റിയാണ് തണ്ണീർ പന്തൽ സജ്ജമാക്കിയത്. ജില്ലാ വൈസ് പ്രസിഡന്‍റ് ടി. രത്നാകരൻ ആശുപത്രി സൂപ്രണ്ട് പ്രഭുദാസിന് ദാഹജലം നൽകിയാണ് ഉദ്ഘാടനം നിർവഹിച്ചത്. ലേ ഓഫീസർ മുജീബ്, സരിത തറമ്മൽപറന്പ്, ഇ. ജ്യോതി, ഇ.ഇ. സ്വപ്ന, ടി. റെജി, കെ. ബിന്ദു, മണികണ്ഠൻ എന്നിവർ പ്രസംഗിച്ചു.

സുരക്ഷിത പ്രസവം : നേട്ടം കൈവരിച്ച ആരോഗ്യപ്രവർത്തകരെ അനുമോദിച്ചു

മലപ്പുറം: ഗാർഹിക പ്രസവങ്ങൾ ഇല്ലായ്മ ചെയ്യുന്നതിൽ മികച്ച ഫീൽഡ് തല പ്രവർത്തനങ്ങൾ കാഴ്ചവച്ച ആരോഗ്യപ്രവർത്തകരെ ആരോഗ്യവകുപ്പ് അനുമോദിച്ചു. മലപ്പുറം ഡിടിപിസി ഹാളിൽ നടന്ന ചടങ്ങ് പി. ഉബൈദുളള എംഎൽഎ ഉദ്ഘാടനം ചെയ്തു. ആദ്യപ്രസവങ്ങൾ വീടുകളിലായിരുന്ന സ്ത്രീകളെ ശാസ്ത്രീയമായ സമീപനങ്ങളിലൂടെ വീട്ടിൽവച്ചുള്ള പ്രസവത്തിന്‍റെ സങ്കീർണതകളും ആശുപത്രി പ്രസവങ്ങളുടെ ആരോഗ്യനേട്ടങ്ങളും ബോധ്യപ്പെടുത്തി തുടർപ്രസവങ്ങൾ ആശുപത്രിയിൽ നടത്തുന്നതിൽ വിജയം കൈവരിച്ചതിനാണ് ഈ അംഗീകാരം. മലപ്പുറം ജില്ലയിൽ നൂറ് ശതമാനം ആശുപത്രി പ്രസവം നേടുന്നതിന് തുടക്കം കുറിച്ച കാന്പയിനിലാണ് ഇവരെ ആദരിച്ചത്. ജൂണിയർ പബ്ലിക് ഹെൽത്ത് നഴ്സുമാരായ ശ്രീകുമാരി തൃക്കലങ്ങോട്, ടി.ഡി. ഡീതു തിരുനാവായ, ലിജിതാസ് കരുവാരകുണ്ട്, കെ.പി. ഷീജ ഓമാനൂർ, ആതിര കാവനൂർ, കല പാണക്കാട്, രഞ്ജുഷ പാണക്കാട്, രേഷ്മ മന്പാട്, അജ്മി തേവർ കടപ്പുറം, സാജിത തുവൂർ, ബേബി ആനക്കയം, ഷൈനി കോട്ടക്കൽ, കണ്ണമംഗലം ഉഷ, ലിജി മന്പാട്, എസ്.ആർ. ആര്യതന്പി തൂവൂർ, എംഎൽഎസ്പിമാരായ സുനു മന്പാട്, റുബയ്യ കരുവാരകുണ്ട്, ആശാപ്രവർത്തകരായ ഇന്ദിര മന്പാട്, ശാന്ത കണ്ണമംഗലം, ജൂണിയർ ഹെൽത്ത് ഇൻസ്പെക്ടർ ഷിജി കരുവാരകുണ്ട് എന്നിവരാണ് അംഗീകാരം നേടിയത്. ജില്ലാ മെഡിക്കൽ ഓഫീസർ ഡോ. ആർ. രേണുക, ആരോഗ്യ കേരളം പ്രോഗ്രാം മാനേജർ ഡോ. അനൂപ്, ജില്ലാ ആർസിഎച്ച് ഓഫീസർ ഡോ. പമീലി എന്നിവർ പരിപാടിയിൽ പങ്കെടുത്തു.

എടക്കരയിൽ ബോട്ടിൽ ബൂത്തുകൾ സ്ഥാപിച്ചു

എടക്കര: ശുചിത്വ പ്രവർത്തനങ്ങളുടെ ഭാഗമായി എടക്കര പഞ്ചായത്തിന്‍റെ പൊതുയിടങ്ങളിൽ ബോട്ടിൽ ബൂത്തുകൾ സ്ഥാപിച്ചു. ഉപയോഗ ശേഷമുള്ള പ്ലാസ്റ്റിക് വസ്തുക്കളും പ്ലാസ്റ്റിക് മാലിന്യങ്ങളും ബോട്ടിൽ ബൂത്തിൽ നിക്ഷേപിക്കാം. പാലേമാട് അങ്ങാടിയിൽ നടന്ന ചടങ്ങ് ഗ്രാമപഞ്ചായത്ത് പ്രസിഡന്‍റ് ഒ.ടി. ജയിംസ് ഉദ്ഘാടനം ചെയ്തു. സെക്രട്ടറി പി.ജെ. ബിജു അധ്യക്ഷത വഹിച്ചു. വൈസ് പ്രസിഡന്‍റ് കെ. ആയിശക്കുട്ടി, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ സിന്ധു പ്രകാശ്, ഫസിൻ മുജീബ്, അംഗങ്ങളായ പി. മോഹനൻ, എം.കെ. ധനഞ്ജയൻ, വ്യാപാരി പ്രതിനിധി രാധാകൃഷ്ണൻ, മറ്റു ജനപ്രതിനിധികൾ, പഞ്ചായത്ത് ജീവനക്കാർ, ഹരിത കർമ സേനാംഗങ്ങൾ എന്നിവർ പങ്കെടുത്തു.

മദ്യമൊഴുക്ക് തടയണം: മദ്യനിരോധന സമിതി

നിലന്പൂർ: ഉപതെരഞ്ഞെടുപ്പിൽ മദ്യമൊഴുക്ക് തടയാൻ ശക്തമായ നടപടി വേണമെന്ന് കേരള മദ്യ നിരോധന സമിതി നിലന്പൂർ താലൂക്ക് പ്രവർത്തക കണ്‍വൻഷൻ ആവശ്യപ്പെട്ടു. ഉപതെരഞ്ഞെടുപ്പ് വേളയിൽ മദ്യവ്യാപനം ഒഴിവാക്കാൻ മുന്നണികൾ തയാറാകണമെന്നും യോഗം അഭിപ്രായപ്പെട്ടു. സർക്കാരിന്‍റെ മയക്കുമരുന്നിനെതിരേയുള്ള നടപടി ഫലപ്രദമാകാൻ മദ്യവ്യാപനവും തടയണമെന്ന് കണ്‍വൻഷൻ അഭിപ്രായപ്പെട്ടു. ചന്തക്കുന്ന് മദ്രസയിൽ നടത്തിയ കണ്‍വൻഷൻ സംസ്ഥാന വൈസ് പ്രസിഡന്‍റ് ഫാ. മാത്യൂസ് വട്ടിയാനിക്കൽ ഉദ്ഘാടനം ചെയ്തു. മദ്യ, മയക്കുമരുന്ന് വ്യാപനത്തിനെതിരേ സർക്കാർ നടപടി പ്രഹസനമാണെന്നും മദ്യാസക്തി കുറയ്ക്കാനുള്ള "വിമുക്തി’ പദ്ധതി നടപ്പാക്കുന്നത് തന്നെ മദ്യ വിൽപ്പനയിൽ നിന്നുള്ള വരുമാനത്തിന്‍റെ അഞ്ച് ശതമാനം ഉപയോഗിച്ചാണെന്നും അദ്ദേഹം പറഞ്ഞു. കേരള മദ്യ നിരോധന സമിതി നിലന്പൂർ താലൂക്ക് പ്രസിഡന്‍റ് മദാരി അഹ്മദ്കുട്ടി അധ്യക്ഷത വഹിച്ചു. മുക്കട്ട വലിയ ജുമാ മസ്ജിദ് ഖാസി ബഷീർ ഫൈസി മുഖ്യപ്രഭാഷണം നടത്തി. മദ്യ നിരോധന സമിതി ജില്ലാ പ്രസിഡന്‍റ് എൻ.എം. ബഷീർ, നിലന്പൂർ താലൂക്ക് സെക്രട്ടറി അസ്‌ലം തുവൂർ, താലൂക്ക് കോ ഓർഡിനേറ്റർ റഷീദ് കരുവാരകുണ്ട്, മസ്ജിദുൽ ഫലാഹ് ഇമാം കെ. വീരാൻകുട്ടി, എംആർസി മുനിസിപ്പൽ പ്രസിഡന്‍റ് മദാരി ഷൗക്കത്ത്, സമിതി താലൂക്ക് വൈസ് പ്രസിഡന്‍റ് പട്ടിക്കാടൻ ഷാനവാസ് തുടങ്ങിയവർ പ്രസംഗിച്ചു.

ചുങ്കത്തറ പഞ്ചായത്ത് പുരസ്കാരം ഏറ്റുവാങ്ങി

ചുങ്കത്തറ: മാലിന്യമുക്ത നവകേരളം പുരസ്കാര നേട്ടവുമായി ചുങ്കത്തറ ഗ്രാമപഞ്ചായത്ത്. മാലിന്യശേഖരണത്തിൽ ചുങ്കത്തറ ഗ്രാമപഞ്ചായത്തിലെ ഹരിത കർമസേനയുടെ കാര്യക്ഷമമായ പ്രവർത്തനമാണ് പുരസ്കാര നേട്ടത്തിലെത്തിച്ചത്. വരുമാന വർധനവിലും കൃത്യമായ ട്രാൻസ്പോർട്ടേഷൻ പ്ലാനിംഗിലുമാണ് ചുങ്കത്തറ ഹരിത കർമസേന ഒന്നാമതെത്തിയത്. 20 വാർഡുകളിലായി 40 ഹരിത കർമസേന അംഗങ്ങളാണ് ചുങ്കത്തറയിൽ ജോലി ചെയ്യുന്നത്. മാസത്തിൽ പഞ്ചായത്തിലെ മുഴുവൻ വീടുകളിലും ആഴ്ചയിൽ ഒരുതവണ വ്യാപാര സ്ഥാപനങ്ങളിലും നേരിട്ടെത്തി പാഴ് വസ്തുക്കൾ ശേഖരിക്കുകയും യഥാസമയം ഇവ തരം തിരിച്ച് കയറ്റി അയയ്ക്കുകയും ചെയ്യുന്നു. 600 മുതൽ 700 രൂപ വരെ ഇവർ ദിവസക്കൂലിയായി നേടുന്നുണ്ട്. ചുങ്കത്തറ ഹരിത കർമസേനയ്ക്കുള്ള പുരസ്കാരം മലപ്പുറത്തു നടന്ന ചടങ്ങിൽ പി. ഉബൈദുള്ള എംഎൽഎയിൽ നിന്ന് ചുങ്കത്തറ ഗ്രാമപഞ്ചായത്ത് പ്രസിഡന്‍റ് വത്സമ്മ സെബാസ്റ്റ്യനും ഹരിത കർമസേനാംഗങ്ങളും ചേർന്ന് ഏറ്റുവാങ്ങി.

അങ്കണവാടികൾക്ക് ഉപകരണങ്ങൾ നൽകി

ചെമ്മലശേരി: പുലാമന്തോൾ ഗ്രാമപഞ്ചായത്ത് 2024-25 വാർഷിക പദ്ധതിയിൽ ഉൾപ്പെടുത്തി അങ്കണവാടികൾക്ക് വിവിധ ഉപകരണങ്ങൾ വിതരണം ചെയ്തു. വിതരണോദ്ഘാടനം ഗ്രാമപഞ്ചായത്ത് പ്രസിഡന്‍റ് പി. സൗമ്യ നിർവഹിച്ചു. 10 ലക്ഷം രൂപ വകയിരുത്തിയാണ് പദ്ധതി നടപ്പാക്കിയത്. 34 അങ്കണവാടികൾക്കും ശിശുവിഹാറിനും ഫ്രിഡ്ജ്, മിക്സി, കുക്കർ, പാത്രങ്ങൾ, ഊഞ്ഞാൽ തുടങ്ങിയ ഉപകരണങ്ങളാണ് വിതരണം ചെയ്തത്. വികസന സ്റ്റാൻഡിംഗ് കമ്മിറ്റി ചെയർപേഴ്സണ്‍ ടി. സാവിത്രി അധ്യക്ഷത വഹിച്ചു. ഗ്രാമപഞ്ചായത്ത് ഭരണസമിതി അംഗം വി.പി. മുഹമ്മദ് ഹനീഫ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ കെ. മുഹമ്മദ് മുസ്തഫ, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ എം.ടി. നസീറ, ഗ്രാമപഞ്ചായത്ത് ഭരണസമിതി അംഗങ്ങളായ ഷിനോസ് ജോസഫ്, കെ.ടി. അഷ്കർ, എൻ.പി. റാബിയ, ടി. സിനിജ, ഐസിഡിഎസ് സൂപ്പർവൈസർ ഷക്കീല, അങ്കണവാടി ജീവനക്കാർ, രക്ഷിതാക്കൾ, പൊതുപ്രവർത്തകർ തുടങ്ങിയവർ പങ്കെടുത്തു. പെരിന്തൽമണ്ണ: പെരിന്തൽമണ്ണ സർവീസ് സഹകരണ ബാങ്ക് സൗജന്യമായി കുന്നപ്പള്ളി അങ്കണവാടിയിലേക്ക് മിക്സിയും വെയിംഗ് മെഷീനും നൽകി. അങ്കണവാടിയിൽ നടന്ന ചടങ്ങിൽ ബാങ്ക് പ്രസിഡന്‍റ് പച്ചീരി ഫാറൂഖ് അങ്കണവാടി വർക്കർ എൻ. ജയശ്രീക്ക് ഉപകരണങ്ങൾ നൽകി ഉദ്ഘാടനം ചെയ്തു. ചടങ്ങിൽ ബാങ്ക് വൈസ് പ്രസിഡന്‍റ് എ. ആർ. ചന്ദ്രൻ, സെക്രട്ടറി ഇൻചാർജ് നാസർ കാരാടൻ, തെക്കത്ത് ഉസ്മാൻ, ഹംസ കരിന്പനക്കൽ, തങ്കത്തിൽ കോയണ്ണി, കെ. എം. കെ. മുഹമ്മദാലി, ശശി എന്നിവർ പ്രസംഗിച്ചു.

ആരോഗ്യദിനത്തിൽ റാലിയും ബോധവത്കരണവും

പെരിന്തൽമണ്ണ: ലോകാരോഗ്യദിനത്തിൽ പെരിന്തൽമണ്ണ തേക്കിൻകോട് ജനകീയ ആരോഗ്യകേന്ദ്രത്തിന്‍റെയും എംഇഎസ് പോളിക്ലിനിക്കിന്‍റെയും പ്രാദേശിക ക്ലബുകളുടെയും സംയുക്ത ആഭിമുഖ്യത്തിൽ സന്ദേശ റാലിയും ബോധവത്കരണവും സംഘടിപ്പിച്ചു. ഇതിന്‍റെ ഭാഗമായി കുട്ടികളുടെ സൈക്കിൾ റാലിയും പോസ്റ്റർ രചനാ മത്സരവും നടത്തി. കൗണ്‍സിലർ ഹനീഫ് ഉദ്ഘാടനം ചെയ്തു. വാർഡ് കൗണ്‍സിലർ എം.കെ. സരോജ അധ്യക്ഷത വഹിച്ചു. കോഴിക്കോട് ഡെപ്യൂട്ടി മുൻ ഡിഎംഒയും എംഇഎസ് പോളിക്ലിനിക് കമ്മ്യൂണിറ്റി മെഡിസിൻ വിഭാഗം ഡോക്ടറുമായ സെബാസ്റ്റ്യൻ ബോധവത്കരണ ക്ലാസെടുത്തു. പോസ്റ്റർ രചനാ മത്സര വിജയിയായ ആരുഷിന് ഉപഹാരവും നൽകി. ജെപിഎച്ച്എൻ കെ.വി. യദു, കൗണ്‍സിലർമാരായ സുനിൽ, ജാഫർ, ഹെൽത്ത് ഇൻസ്പെക്ടർ സിദ്ദീഖ്, അനന്ദു, തസ്‌ലിന, ആശാ പ്രവർത്തകർ, അങ്കണവാടി പ്രവർത്തകർ, കുടുംബശ്രീ പ്രവർത്തകർ എന്നിവർ പ്രസംഗിച്ചു. എടക്കര: എടക്കര ഗ്രാമപഞ്ചായത്ത് കുടുംബാരോഗ്യ കേന്ദ്രത്തിന്‍റെ ആഭിമുഖ്യത്തിൽ ലോകാരോഗ്യ ദിനാചരണത്തിന്‍റെ ഭാഗമായി സന്ദേശ റാലി നടത്തി. ഗ്രാമപഞ്ചായത്ത് പ്രസിഡന്‍റ് ഒ.ടി. ജയിംസ് ഉദ്ഘാടനം ചെയ്തു. കുടുംബാരോഗ്യം മെഡിക്കൽ ഓഫീസർ ഡോ. കെ.എം. അമീൻ ഫൈസൽ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് കെ. ആയിശക്കുട്ടി, ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ സിന്ധു പ്രകാശ്, പഞ്ചായത്തംഗങ്ങളായ പി. മോഹനൻ, ലിസി സുലൈഖ, ഫസിൻ മുജീബ്, ഹെൽത്ത് ഇൻസ്പെക്ടർ ഇൻ ചാർജ് ജോജു വർഗീസ്, ആബിദ് പാറപ്പുറം എന്നിവർ പ്രസംഗിച്ചു. വിവേകാനന്ദ പഠനകേന്ദ്രത്തിലെ ഹെൽത്ത് വിഭാഗം വിദ്യാർഥികൾ, ആരോഗ്യ പ്രവർത്തകർ, ആശാ പ്രവർത്തകർ, എച്ച്എംസി അംഗങ്ങൾ എന്നിവർ റാലിയിൽ പങ്കെടുത്തു.

ഡിസാറ്റ് കോളജ് പുതിയ കെട്ടിടത്തിന്‍റെ ഉദ്ഘാടനം ഇന്ന്

നിലന്പൂർ: വിൻസെൻഷ്യൻ ഫാദേഴ്സിന്‍റെ നേതൃത്വത്തിലുള്ള നിലന്പൂരിലെ ഡിപോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജി (ഡിസാറ്റ്) യുടെ പുതിയ കെട്ടിടം ഇന്ന് വൈകുന്നേരം 4.30ന് മന്ത്രി വി. അബ്ദുറഹിമാൻ ഉദ്ഘാടനം ചെയ്യും. നിലന്പൂർ റെയിൽവേ സ്റ്റേഷന് സമീപമുള്ള ഡിപോൾ നഗറിൽ വച്ചാണ് പരിപാടി. മാനന്തവാടി രൂപതാധ്യക്ഷൻ മാർ ജോസ് പൊരുന്നേടം ആശിർവാദ കർമം നിർവഹിക്കും. പി.വി. അബ്ദുൾ വഹാബ് എംപി, എ.പി. അനിൽകുമാർ എംഎൽഎ, സുപ്പീരിയർ ജനറൽ ഡോ. ഫാ. ജോണ്‍ കണ്ടെത്തിൻകര, പ്രൊവിൻഷ്യൽ സുപ്പീരിയർ ഡോ. ഫാ. പോൾപുതുവ, ഡോ. ഫാ.ജോണ്‍ മംഗലത്ത്, അഡ്വ. ടോം. കെ.തോമസ്, നഗരസഭാ ചെയർമാൻ മാട്ടുമ്മൽ സലീം എന്നിവർ പങ്കെടുക്കുമെന്ന് പ്രിൻസിപ്പൽ ഫാ. ഡെയ്സണ്‍ വെട്ടിയാടൻ, കോഴ്സ് കോ ഓർഡിനേറ്റർ പി.എ. അജീഷ്, പിആർഒ ജിജോ സേവ്യർ, സോഷ്യൽ വർക്ക് കോഓർഡിനേറ്റർ സി. ശില്പ എന്നിവർ അറിയിച്ചു.

അങ്ങാടിപ്പുറം ഏഴാംപൂരം ഇന്ന്

പെരിന്തൽമണ്ണ: പ്രസിദ്ധമായ അങ്ങാടിപ്പുറം ശ്രീതിരുമാന്ധാംകുന്ന് ഭഗവതി ക്ഷേത്രത്തിലെ ഏഴാംപൂരം ഇന്ന്. ഇന്നലെ ശിവന് ശ്രീഭൂതബലി നടന്നു. പൂരത്തിന് ഭഗവതിക്ക് ആകെ 21 ആറാട്ടും ശിവന് എട്ടാംപൂര പകൽപൂരം ഒരു ആറാട്ടുമാണ് നടത്തുന്നത്. അഞ്ചാം പൂരത്തിന് ഭഗവതിക്കും ആറാം പൂരത്തിന് ശിവനും ശ്രീഭൂതബലിയും നടക്കാറുണ്ട്. ഇന്ന് രാവിലെ പന്തീരടിക്കുശേഷം ഭഗവതിക്കും ശിവനും രണ്ട് ആനപ്പുറത്തു വ്യത്യസ്ത തിടന്പേറ്റിയാണ് ആറാട്ടിനായി എഴുന്നള്ളുന്നത്. ഇന്ന് രാവിലെ ഏഴിന് അങ്ങാടിപ്പുറം ശിവദം ടീമിന്‍റെ നൃത്തമഞ്ജരിയോടെ കലാപരിപാടികൾ ആരംഭിക്കും. 9.30ന് കൊട്ടിയിറക്കം. 12.30ന് ഭഗവതിക്ക് ഉത്സവബലി. വൈകുന്നേരം അഞ്ചിന് പത്മശ്രീ പണ്ഡിറ്റ് എം. വെങ്കിടേഷ്കുമാർ ധാർവാടിന്‍റെ ഹിന്ദുസ്ഥാനി കച്ചേരി അരങ്ങേറും. ഏഴാംപൂര ദിവസത്തെ ആകർഷണം രാത്രി 9.30നുള്ള വെടിക്കെട്ട് ആണ്. തുടർന്ന് ആറാട്ടുകടവിൽ തൃപ്പങ്ങോട് പരമേശ്വരൻമാരാരുടെ തായന്പക അരങ്ങേറും. 11നാണ് കൊട്ടിക്കയറ്റം. കിഴക്കേനടയിൽ കന്പം കൊളുത്തുന്നതോടെ പതിവുചടങ്ങുകൾക്ക് പരിസമാപ്തിയാകും.

ലഹരിക്കെതിരേ യൂത്ത് കോണ്‍ഗ്രസ് ബോധവത്കരണ ജാഥ നടത്തി

എടക്കര: വഴിക്കടവ് മണ്ഡലം യൂത്ത് കോണ്‍ഗ്രസ് കമ്മിറ്റി ലഹരിക്കെതിരേ ഫുട്ബോൾ കിക്ക് എന്ന പേരിൽ ബോധവത്കരണ ജാഥ സംഘടിപ്പിച്ചു. നിലന്പൂർ നിയോജക മണ്ഡലം പ്രസിഡന്‍റ് അമീർ പൊറ്റമ്മൽ ഉദ്ഘാടനം ചെയ്തു. വഴിക്കടവ് മണ്ഡലം പ്രസിഡന്‍റ് മാഹിർ മരുത, സെക്രട്ടറിമാരായ ബിജേഷ് ഉണ്ണി, സലിം മരുത ഐ.പി. ഷിബു, റഫീഖ്മോൻ മുണ്ട, ടോം മൊടപൊയ്ക, ജിത്തു നരിവാലമുണ്ട, നബീൽ മാമാങ്കര, സുനീർ മരുത, ഫൈസൽ മാമാങ്കര എന്നിവർ നേതൃത്വം നൽകി. സമാപന സമ്മേളനം സംസ്ഥാന ജനറൽ സെക്രട്ടറി അനീഷ് കരുളായി ഉദ്ഘാടനം ചെയ്തു. നാസർ തോട്ടുങ്ങൽ, ഷിജോ മൂത്തേടം, സി.യു. ഏലിയാസ്, ജൂഡി തോമസ്, പി.വി. മാത്യു, മൂപ്ര കുഞ്ഞുട്ടി, ജയ്മോൾ, അസീസ് പുളിയഞ്ചലി, മാനു കോനാടൻ, ജാഫർ തൊട്ടിയിൽ, പി.കെ. റജീബ് എന്നിവർ വിവിധ കേന്ദ്രങ്ങളിൽ പ്രസംഗിച്ചു.

എട്ടുവയസുകാരന്‍റെ വിരലിൽ മോതിരം കുടുങ്ങി; രക്ഷകനായി ട്രോമാകെയർ വോളണ്ടിയർ

വണ്ടൂർ: വണ്ടൂർ കുറ്റിയിൽ കാരയ്ക്കപറന്പ് സ്വദേശിയായ എട്ടു വയസുകാരന്‍റെ കൈവിരലിൽ മോതിരം കുടുങ്ങി.രക്ഷകനായി ട്രോമാകെയർ വോളണ്ടിയർ സി.ടി. ഷാഹുൽ ഹമീദ്. അരമണിക്കൂറോളം നീണ്ട പ്രയത്നത്തിനൊടുവിലാണ് മോതിരം ഊരിയെടുത്തത്. രലിൽ നീര് വന്നതിനെ തുടർന്ന് കുട്ടിയെ അച്ഛനും അമ്മയും താലൂക്ക് ആശുപത്രിയിലേക്ക് കൊണ്ടുപോകുന്നതിനിടെയാണ് ട്രോമാകെയർ വോളണ്ടിയർ ഷാഹുൽ ഹമീദിനെ കുറിച്ച് അറിഞ്ഞത്. ഇത്തരം കാര്യങ്ങൾക്കായി പ്രത്യേക പരിശീലനം ലഭിച്ച ഷാഹുൽ കുറ്റിയിൽ അങ്ങാടിയിൽ വച്ചാണ് കുട്ടിയുടെ കൈയിൽ കുടുങ്ങിയ മോതിരം ഊരിയെടുത്തത്. വണ്ടൂരിലെ ആംബുലൻസ് ഡ്രൈവർ കൂടിയാണ് ഷാഹുൽ ഹമീദ്.

സ്പോർട്സ് അക്കാഡമിയുടെ സമ്മർ ക്യാന്പിന് തുടക്കം

വണ്ടൂർ: വിദ്യാർഥികൾക്കിടയിൽ ലഹരിയുടെ ഉപയോഗം വർധിച്ച സാഹചര്യത്തിൽ കളിക്കളങ്ങൾ സജീവമാക്കുക എന്ന ലക്ഷ്യത്തോടെയുള്ള വണ്ടൂർ വിഎംസി സ്പോർട്സ് അക്കാഡമിയുടെ നേതൃത്വത്തിലുള്ള സമ്മർക്യാന്പിന് തുടക്കം. വിവിധ കായിക ഇനങ്ങൾക്കാണ് കായിക അധ്യാപകൻ ഡി.ടി. മുജീബിന്‍റെ നേതൃത്വത്തിൽ സൗജന്യ വിദഗ്ദ പരിശീലനം നൽകുന്നത്. വണ്ടൂർ വിഎംസി മൈതാനത്താണ് അവധിക്കാല ആരോഗ്യ കായിക വിദ്യാഭ്യാസ പദ്ധതിക്ക് തുടക്കമായത്. വിവിധ കായിക ഇനങ്ങളിലൂടെ വിദ്യാർഥികളുടെ കായികക്ഷമതയും നൈപുണ്യവും ആരോഗ്യവും വർധിപ്പിക്കുക, മികച്ച കായികതാരങ്ങളെ വാർത്തെടുക്കുക, കളികളിലൂടെ കുട്ടികളുടെ മാനസികവും ശാരീരികവും സാമൂഹികവുമായ വളർച്ച ഉറപ്പുവരുത്തുക എന്നതാണ് ലക്ഷ്യങ്ങൾ. അവധിക്കാല സൗജന്യ പരിശീലനത്തിൽ ആറ് വയസു മുതൽ 17 വയസു വരെ പ്രായമുള്ള ആണ്‍കുട്ടികൾക്കും പെണ്‍കുട്ടികൾക്കും പങ്കെടുക്കാം. ഫുട്ബോൾ, ക്രിക്കറ്റ്, കബഡി, ഖോ- ഖോ, തുടങ്ങി 12 ഇനങ്ങളിലാണ് പരിശീലനം നൽകുന്നത്.

മഞ്ചേരിയിലെ ഗതാഗത പരിഷ്കാരം: 17ന് ട്രയൽ റണ്‍

മഞ്ചേരി: നഗരത്തിൽ റീജിയണൽ ട്രാൻസ്പോർട്ട് അഥോറിറ്റിയുടെ (ആർടിഎ) തീരുമാന പ്രകാരം നടപ്പാക്കാൻ നിർദേശിച്ച ഗതാഗത പരിഷ്കാരത്തിന്‍റെ ട്രയൽ റണ്‍ ഈ മാസം 17 മുതൽ നടത്തും. ട്രാഫിക് റെഗുലേറ്ററി കമ്മിറ്റിയാണ് രണ്ട് ദിവസത്തേക്ക് ട്രയൽ റണ്‍ നടത്താൻ തീരുമാനിച്ചത്. പിന്നീട് പോലീസ്, മോട്ടോർ വാഹന വകുപ്പ്, നഗരസഭ എന്നിവർ ചേർന്ന സംയുക്ത പരിശോധന നടത്തി തുടർനടപടി സ്വീകരിക്കും. മഞ്ചേരിയിലൂടെ കടന്നുപോകുന്ന മുഴുവൻ ബസുകൾ സെൻട്രൽ ജംഗ്ഷനിലൂടെ നഗരത്തിലെത്തുന്ന തരത്തിലാണ് പുതിയ പരിഷ്കാരം. ഇതിന് പുറമെ നഗരത്തിലെ പ്രധാന റോഡുകൾ വണ്‍വേ സംവിധാനം ആരംഭിക്കാനും നിർദേശമുണ്ട്. പരിഷ്കാരത്തിന് മുന്നോടിയായി നഗരത്തിലെ വിവിധയിടങ്ങളിൽ അടയാള ബോർഡുകൾ സ്ഥാപിക്കും. ഇലക്ട്രിക് ഓട്ടോറിക്ഷകൾക്ക് നഗരത്തിൽ സ്റ്റാൻഡ് അനുവദിക്കില്ല. എന്നാൽ നഗരത്തിലൂടെ സർവീസ് നടത്തുന്നതിന് തടസമില്ല. മെഡിക്കൽ കോളജ് പരിസരത്തെ അനധികൃത പാർക്കിംഗ് തടയും. മെഡിക്കൽ കോളജിലെത്തുന്ന രോഗികൾക്ക് പരമാവധി ആശുപത്രിക്ക് അകത്ത് തന്നെ പാർക്കിംഗ് സൗകര്യം ഒരുക്കാൻ ആശുപത്രി അധികൃതരോട് നിർദേശിച്ചു. കച്ചേരിപ്പടി ഇന്ദിരാഗാന്ധി ബസ് ടെർമിനലിൽ വിവിധ വകുപ്പുകൾ പിടിച്ച വാഹനങ്ങൾ നീക്കം ചെയ്യും. സ്കൂൾ, ടൂറിസ്റ്റ് ബസുകൾ സ്റ്റാൻഡിൽ അനധികൃതമായി നിർത്തിയിടുന്നത് ഒഴിവാക്കും. ട്രാഫിക് റെഗുലേറ്ററി കമ്മിറ്റി യോഗത്തിൽ നഗരസഭാ ചെയർപേഴ്സണ്‍ വി.എം. സുബൈദ, തഹസിൽദാർ കെ. മുകുന്ദൻ, മഞ്ചേരി എസ്എച്ച്ഒ ഡോ.എം. നന്ദഗോപൻ, എംവിഐ കെ.ജി. ദിലീപ് കുമാർ, ട്രാഫിക് എസ്ഐ അബൂബക്കർ കോയ, പൊതുമരാമത്ത് നിരത്ത് വിഭാഗം ഓവർസിയർ പി.അനു, മുനിസിപ്പൽ സെക്രട്ടറി പി.സതീഷ് കുമാർ എന്നിവർ സംബന്ധിച്ചു.

നിലന്പൂർ ഉപതെരഞ്ഞെടുപ്പ്; കോണ്‍ഗ്രസിനുള്ളിൽ സ്ഥാനാർഥി ചർച്ച മുറുകുന്നു

നിലന്പൂർ: നിലന്പൂർ ഉപതെരഞ്ഞെടുപ്പിന് ഏതു നിമിഷവും തിയതി പ്രഖ്യാപിക്കാനിരിക്കേ കോണ്‍ഗ്രസിനുള്ളിൽ സ്ഥാനാർഥി നിർണയ ചർച്ച മുറുകുന്നു. കെപിസിസി ജനറൽ സെക്രട്ടറി ആര്യാടൻ ഷൗക്കത്ത്, ഡിസിസി പ്രസിഡന്‍റ് വി.എസ്. ജോയ് എന്നിവരുടെ പേരുകളാണ് പ്രഥമ പട്ടികയിലുള്ളത്. നിലന്പൂർ ഉപതെരഞ്ഞെടുപ്പിൽ ആര്യാടൻ മുഹമ്മദിന്‍റെ തട്ടകം തിരിച്ചു പിടിക്കുക എന്നതിന് മുൻഗണന നൽകി തന്നെയാകും കോണ്‍ഗ്രസ് സ്ഥാനാർഥി പ്രഖ്യാപനമെന്ന കാര്യത്തിൽ സംശയമില്ല. മലയോര മേഖലകളിലുൾപ്പെടെ ആര്യാടൻ മുഹമ്മദിന് ഉണ്ടായിരുന്ന രാഷ്ട്രീയവും വ്യക്തിപരവും സാമുദായികപരവുമായ ബന്ധങ്ങൾ കോണ്‍ഗ്രസിന് പ്രയോജനപ്പെടുത്താൻ കഴിഞ്ഞാൽ യുഡിഎഫിന് നിലന്പൂരിൽ ചരിത്ര വിജയം നേടാനാകുമെന്നും കോണ്‍ഗ്രസ് വിലയിരുത്തുന്നു. നിലന്പൂർ മണ്ഡലത്തെ 11 തവണ പ്രതിനിധികരിക്കുകയും നാല് തവണ മന്ത്രി സ്ഥാനം വഹിക്കുകയും ചെയ്ത ആര്യാടൻ മുഹമ്മദിന് നിലന്പൂരിലെ ജനങ്ങൾക്കിടയിൽ ഉണ്ടായിരുന്ന സ്വാധീനം വളരെ വലുതായിരുന്നു. ആര്യാടൻ മുഹമ്മദ് മുന്നിൽ നിന്ന് നയിക്കാത്ത ആദ്യ തെരഞ്ഞെടുപ്പിനാണ് നിലന്പൂർ ഒരുങ്ങുന്നത്. അതിനാൽ തന്നെ ഈ തെരഞ്ഞെടുപ്പിൽ ഏറ്റവും കൂടുതൽ ചർച്ച ചെയ്യപ്പെടുന്നതും ആര്യാടൻ മുഹമ്മദിന്‍റെ പേര് തന്നെയാകും. മലബാറിലെ ഏറ്റവും പ്രഗൽഭരായ കോണ്‍ഗ്രസ് നേതാക്കളിൽ ഒരാളായിരുന്നു ആര്യാടൻ മുഹമ്മദ്. മലപ്പുറം ജില്ലയിൽ കോണ്‍ഗ്രസിന്‍റെ ഏറ്റവും ശക്തമായ മണ്ഡലമാണ് നിലന്പൂർ. അതിനാൽ കോണ്‍ഗ്രസിന് വിജയം അഭിമാന പ്രശ്നവുമാണ്. ആര്യാടൻ മുഹമ്മദിന്‍റെ തട്ടകത്തിൽ അദ്ദേഹത്തിന്‍റെ മകനും കെപിസിസി ജനറൽ സെക്രട്ടറിയുമായ ആര്യാടൻ ഷൗക്കത്തിന് സീറ്റ് നൽകുന്നത് ഗുണം ചെയ്യുമെന്ന അഭിപ്രായം പാർട്ടിക്കുള്ളിൽ വലിയൊരു വിഭാഗത്തിനുണ്ട്. നിലന്പൂർ പഞ്ചായത്ത് പ്രസിഡന്‍റ്, നഗരസഭാ ചെയർമാൻ എന്നീ കാലയളവിൽ കൊണ്ടുവന്ന പദ്ധതികളിലൂടെ തന്‍റെ നേതൃപാടവം ഷൗക്കത്ത് തെളിയിച്ചിട്ടുണ്ട്. സാംസ്കാരിക സാഹിതി ചെയർമാൻ, നിലന്പൂർ പാട്ടുത്സവ ടൂറിസം ഫെസ്റ്റിവൽ കമ്മിറ്റി ചെയർമാൻ, സിനിമാ തിരക്കഥാകൃത്ത് എന്നീ നിലകളിലെ പ്രവർത്തനങ്ങളും ഇദ്ദേഹത്തിന്‍റെ സ്ഥാനാർഥിത്വത്തിന് ബലം കൂട്ടുന്നതാണ്. 2016-ലെ പരാജയത്തിന് നിലന്പൂർ ഉപതെരഞ്ഞെടുപ്പിലൂടെ മറുപടി നൽകാൻ ഒരവസരം ആര്യാടൻ ഷൗക്കത്തിന് നൽകണമെന്ന അഭിപ്രായവും കോണ്‍ഗ്രസിൽ ഉയർന്നിട്ടുണ്ട്. ഡിസിസി പ്രസിഡന്‍റ് വി.എസ്. ജോയ് ആകട്ടെ കെഎസ്‌യു സംസ്ഥാന പ്രസിഡന്‍റ്, ഡിസിസി പ്രസിഡന്‍റ് എന്നി നിലകളിൽ മികച്ച സംഘാടക പാടവവും കഴിവും തെളിയിച്ച വ്യക്തിയാണ്. യുവത്വത്തിന്‍റെ പരിഗണന കൂടി നൽകി വി.എസ്. ജോയിക്ക് സീറ്റ് നൽകണമെന്ന ആവശ്യവും കോണ്‍ഗ്രസിനുള്ളിൽ ശക്തമാണ്. 2026 നിയമസഭാ തെരഞ്ഞെടുപ്പ് ഏറെ വെല്ലുവിളിയാകും, അതിനാൽ തന്നെ എല്ലാ വശങ്ങളും പരിശോധിച്ചായിരിക്കും കോണ്‍ഗ്രസ് സ്ഥാനാർഥി പ്രഖ്യാപനം നടത്തുക.

തമിഴ്നാട് സ്വദേശി ക്വാർട്ടേഴ്സിൽ മരിച്ച നിലയിൽ

രാമപുരം: തമിഴ്നാട് സ്വദേശി ക്വാർട്ടേഴ്സിൽ മരിച്ച നിലയിൽ. നാറാണത്ത് കരിഞ്ചാപ്പാടി റോഡിലെ മസ്ജിദിനു സമീപത്തെ പള്ളിയാലിൽ ക്വാർട്ടേഴ്സിലാണ് തമിഴ്നാട് തിരുവാരുൽ ജില്ലയിലെ നെങ്കന്നൂർ സ്വദേശിയായ മനോഹര(57)നെ മരിച്ച നിലയിൽ കണ്ടെത്തിയത്. ഇദ്ദേഹം വർഷങ്ങളായി ഈ പ്രദേശത്താണ് ജോലിയെടുത്ത് വരുന്നത്. മൃതദേഹം പെരിന്തൽമണ്ണ ജില്ലാ ആശുപത്രി മോർച്ചറിയിൽ. മങ്കട പോലീസ് മേൽനടപടികൾ സ്വീകരിച്ചു.

നിലന്പൂർ ഉപതെരഞ്ഞെടുപ്പ്: യുഡിഎഫ് സജ്ജമെന്ന് എ.പി. അനിൽകുമാർ എംഎൽഎ

നിലന്പൂർ: നിലന്പൂർ ഉപതെരഞ്ഞെടുപ്പുമായി ബന്ധപ്പെട്ട് കോണ്‍ഗ്രസ് നേതൃത്വതല സംഗമം നടത്തി. കോണ്‍ഗ്രസും യുഡിഎഫും ഉപതെരഞ്ഞെടുപ്പിന് സജ്ജമാണെന്ന് എ.പി.അനിൽകുമാർ എംഎൽഎ. നിലന്പൂരിൽ നിയോജക മണ്ഡലം കോണ്‍ഗ്രസ് നേതൃതല യോഗത്തിൽ സംസാരിക്കുകയായിരുന്നു അദ്ദേഹം. 2016ൽ നഷ്ടപ്പെട്ട മണ്ഡലം തിരിച്ചുപിടിക്കുന്നതിനാണ് മുൻഗണന. സ്ഥാനാർഥി നിർണയം ഒരു വിഷയമല്ല, തെരഞ്ഞെടുപ്പ് പ്രഖ്യാപിച്ചാൽ ഉടൻ തന്നെ സ്ഥാനാർഥിയെ പ്രഖ്യാപിക്കും. കെപിസിസി നൽകുന്ന ലിസ്റ്റ് പരിശോധിച്ച് ഹൈക്കമാൻഡായിരിക്കും സ്ഥാനാർഥിയെ പ്രഖ്യാപിക്കുക. പി.വി. അൻവറുമായുള്ള തെരഞ്ഞെടുപ്പ് കാര്യങ്ങളിൽ പാർട്ടി നേതൃത്വമായിരിക്കും തീരുമാനമെടുക്കുകയെന്നും അദ്ദേഹം പറഞ്ഞു. ഹൈക്കമാൻഡ് പ്രഖ്യാപിക്കുന്ന സ്ഥാനാർഥിക്കായി യുഡിഎഫ് ഒറ്റക്കെട്ടായി രംഗത്തിറങ്ങും. സ്ഥാനാർഥി നിർണയവുമായി ബന്ധപ്പെട്ട് നിലവിൽ ഒരു പ്രശ്നവുമില്ല. ആര് സ്ഥാനാർഥിയായാലും റിക്കാർഡ് ഭൂരിപക്ഷത്തിൽ വിജയിക്കും. എൽഡിഎഫ് ആരെ സ്ഥാനാർഥിയാക്കിയാലും അത് തങ്ങളെ ബാധിക്കുന്ന പ്രശ്നമല്ല. കഴിഞ്ഞ ഒന്പത് വർഷം നിലന്പൂരിനെ വികസനത്തിൽ പിന്നോട്ട് നയിച്ച പിണറായി സർക്കാരിന് എതിരെയായിരിക്കും മുഖ്യമായും തെരഞ്ഞെടുപ്പ് പ്രചാരണം നടത്തുകയെന്നും അനിൽകുമാർ പറഞ്ഞു. കഴിഞ്ഞ എട്ടര വർഷം എംഎൽഎയായിരുന്ന പി.വി. അൻവറിനെ ഒപ്പം നിർത്തി നിലന്പൂരിന്‍റെ വികസന പിന്നാക്കാവസ്ഥ എങ്ങനെ തെരഞ്ഞെടുപ്പ് പ്രചാരണമാക്കുമെന്ന ചോദ്യത്തിന് അനിൽകുമാർ വ്യക്തമായ മറുപടി നൽകിയില്ല. തെരഞ്ഞെടുപ്പിൽ എല്ലാ വിഭാഗങ്ങളുടെയും വോട്ടുകൾ ലഭിക്കുമെന്നും ആരുടെയും വോട്ടുകൾ വേണ്ടെന്ന് പറയില്ലെന്നും അദ്ദേഹം പറഞ്ഞു. നിലന്പൂർ ബ്ലോക്ക് കോണ്‍ഗ്രസ് പ്രസിഡന്‍റ് പാലോളി മെഹബൂബ് അധ്യക്ഷത വഹിച്ചു. സ്ഥാനാർഥി ലിസ്റ്റിൽ ഇടംനേടാൻ സാധ്യതയുള്ള കെപിസിസി ജനറൽ സെക്രട്ടറി ആര്യാടൻ ഷൗക്കത്ത്, ഡിസിസി പ്രസിഡന്‍റ് വി.എസ്.ജോയ് എന്നിവരും നിലന്പൂർ ഉപതെരഞ്ഞെടുപ്പിന്‍റെ ചുമതലയുള്ള കെപിസിസി ജനറൽ സെക്രട്ടറി സോണി സെബാസ്റ്റ്യൻ, കെപിസിസി ജനറൽ സെക്രട്ടറി പി.കെ. സലീം, എടക്കര ബ്ലോക്ക് പ്രസിഡന്‍റ് ബാബു തടത്തിൽ, ജില്ലാ പഞ്ചായത്തംഗം എൻ.എ.കരീം, കെപിസിസി അംഗം വി.എ.കരീം, നിലന്പൂർ ബ്ലോക്ക് പഞ്ചായത്ത് പ്രസിഡന്‍റ് പി. പുഷ്പവല്ലി, എ. ഗോപിനാഥ്, മണ്ഡലം പ്രസിഡന്‍റുമാർ, കോണ്‍ഗ്രസിന്‍റെ ജനപ്രതിനിധികൾ, എടക്കര, നിലന്പൂർ ബ്ലോക്ക് കോണ്‍ഗ്രസ് ഭാരവാഹികൾ, മഹിളാ കോണ്‍ഗ്രസ് ഭാരവാഹികൾ ഉൾപ്പെടെ യോഗത്തിൽ പങ്കെടുത്തു.

വീടുകളിലെ പ്രസവം തടയാൻ ശക്തമായ ബോധവത്കരണം ആവശ്യം: പി. ഉബൈദുള്ള എംഎൽഎ

മലപ്പുറം: ജില്ലയിൽ വീടുകളിലെ പ്രസവവും അതേ തുടർന്നുള്ള മരണവും റിപ്പോർട്ട് ചെയ്യപ്പെടുന്ന സാഹചര്യത്തിൽ ശക്തമായ ബോധവത്കരണം അനിവാര്യമാണെന്ന് പി. ഉബൈദുള്ള എംഎൽഎ പറഞ്ഞു. ആരോഗ്യവകുപ്പ് സംഘടിപ്പിച്ച ജില്ലാതല ആരോഗ്യദിനാചരണവും "കുഞ്ഞോമന ജനിക്കേണ്ടത് ഏറ്റവും സുരക്ഷിത കരങ്ങളിൽ, പ്രസവം സുരക്ഷിതമാക്കാൻ ആശുപത്രി തന്നെ തെരഞ്ഞെടുക്കാം’ എന്ന കാന്പയിന്‍റെ ഉദ്ഘാടനവും മലപ്പുറം കോട്ടക്കുന്ന് ഡിഡിപിസി ഹാളിൽ നിർവഹിച്ച് സംസാരിക്കുകയായിരുന്നു അദ്ദേഹം. വീടുകളിലെ പ്രസവം തടയാനും ബോധവത്കരണ പരിപാടികൾ നാം സ്വീകരിക്കണം. ശരിയായ ചികിത്സ, നല്ല പെരുമാറ്റം, അടിസ്ഥാന സൗകര്യങ്ങൾ എന്നിവ സർക്കാർ ആശുപത്രികളിൽ ഉറപ്പുവരുത്താൻ നമുക്ക് കഴിയണമെന്നും അദ്ദേഹം പറഞ്ഞു. "ആരോഗ്യകരമായ തുടക്കം പ്രതീക്ഷാനിർഭരമായ ഭാവി’ എന്നതാണ് ഈ വർഷത്തെ ആരോഗ്യ ദിനാചരണത്തിന്‍റെ മുദ്രാവാക്യം. സംസ്ഥാനത്ത് ഏറ്റവും കൂടുതൽ വീട്ടിലെ പ്രസവം റിപ്പോർട്ട് ചെയ്യുന്ന മലപ്പുറം ജില്ലയിൽ ആശുപത്രിയിലെ പ്രസവം പ്രോത്സാഹിപ്പിക്കുന്നതിനുള്ള ബോധവത്കരണ പ്രവർത്തനങ്ങളും ബോധവത്കരണ നാടകങ്ങളും സെമിനാറുകളും സാമൂഹിക സാംസ്കാരിക നേതാക്കളെ ഉൾപ്പെടുത്തിക്കൊണ്ടുള്ള ചർച്ചകളും കാന്പയിന്‍റെ ഭാഗമായി നടക്കും. ദിനാചരണത്തിന് തുടക്കം കുറിച്ച് ജില്ലാ ഭരണകൂടവും ആരോഗ്യവകുപ്പും സംയുക്തമായി ജില്ലാ കളക്ടറുടെ വസതിയിൽ നിന്ന് സിവിൽ സ്റ്റേഷൻ വരെ ആരോഗ്യ സന്ദേശറാലി സംഘടിപ്പിച്ചു. ജില്ലാ കളക്ടർ വി.ആർ. വിനോദ് റാലി ഫ്ളാഗ് ഓഫ് ചെയ്തു. റാലിയിൽ സിവിൽ സ്റ്റേഷനിലെ ജീവനക്കാർ പങ്കെടുത്തു. ചടങ്ങിൽ ജില്ലാ മെഡിക്കൽ ഓഫീസർ ഡോക്ടർ ആർ. രേണുക അധ്യക്ഷത വഹിച്ചു. പ്രമുഖർ സംബന്ധിച്ചു.

നിയമപരമായ നടപടികൾ തേടണം: എം.കെ. റഫീഖ

മലപ്പുറം: വീടുകളിൽ പ്രസവം നടക്കുന്നുവെന്ന വാർത്തകൾ ഞെട്ടിക്കുന്നതാണെന്ന് ജില്ലാപഞ്ചായത്ത് പ്രസിഡന്‍റ് എം.കെ. റഫീഖ. വീടുകളിലെ പ്രസവം സംബന്ധിച്ച് വിവിധ മേഖലകളിൽ പ്രവർത്തിക്കുന്നവരെ ഉൾപ്പെടുത്തി ആരോഗ്യവകുപ്പ് വിളിച്ചുചേർത്ത യോഗത്തിൽ സംസാരിക്കുകയായിരുന്നു അവർ. ജില്ലയിൽ ഇത്തരത്തിലുള്ള സംഭവം ആവർത്തിക്കാതിരിക്കാൻ ആരോഗ്യവകുപ്പ് ജാഗ്രതയോടെ മുന്നോട്ട് പോകണം. സാധ്യമാകുമെങ്കിൽ നിയമപരമായ നടപടികൾ തേടണം. ഇതിനെതിരേ വാർഡ് തലത്തിൽ ശക്തമായ ബോധവത്കരണം ആവശ്യമാണെന്നും വീട്ടിൽ നടക്കുന്ന പ്രസവത്തിന്‍റെ അപകടം സംബന്ധിച്ച് വീഡിയോകൾ തയാറാക്കി സാമൂഹ്യമാധ്യമങ്ങൾ വഴി പ്രചാരണം നൽകണമെന്നും ജില്ലാപഞ്ചായത്ത് പ്രസിഡന്‍റ് പറഞ്ഞു. മലപ്പുറം കോട്ടക്കുന്ന് ഡിടിപിസി ഹാളിൽ നടന്ന യോഗത്തിൽ ജില്ലാമെഡിക്കൽ ഓഫീസർ ഡോ.ആർ. രേണുക അധ്യക്ഷത വഹിച്ചു. ജില്ലാ ആർസിഎച്ച് ഓഫീസർ ഡോ. പമീലി വീടുകളിൽ നടക്കുന്ന പ്രസവം സംബന്ധിച്ച വിശദാംശങ്ങൾ യോഗത്തിൽ അവതരിപ്പിച്ചു. മഞ്ചേരി ഗവണ്‍മെന്‍റ് മെഡിക്കൽ കോളജ് പ്രിൻസിപ്പൽ ഡോ. കെ.കെ. അനിൽ രാജ്, മെഡിക്കൽ കോളജ് സൂപ്രണ്ട് ഡോ. ആർ. പ്രഭുദാസ്, പീഡിയാട്രിക് വിഭാഗം തലവൻ ഡോ. സി.പി. അഷ്റഫ്, എംഇഎസ് മെഡിക്കൽ കോളജ് ഗൈനക്കോളജി വിഭാഗം പ്രഫസർ ഡോ. മുംതാസ്, എൻഎച്ച്എം പ്രോഗ്രാം ഓഫീസർ ഡോ. അനൂപ്, വനിതാ-ശിശു വികസന ഓഫീസർ കെ.വി. ആശാമോൾ, കാലിക്കട്ട് സർവകലാശാലയിലെ സോഷ്യോളജി വിഭാഗം തലവൻ ഡോ. ആർ. പ്രസാദ് തുടങ്ങിയവർ പങ്കെടുത്തു.

മൂകയും ബധിരയുമായ സ്ത്രീയെ കബളിപ്പിച്ചു ; ഉദ്യോഗസ്ഥരുടെ വീഴ്ച അന്വേഷിക്കാൻ നിർദേശം

മലപ്പുറം: പൊന്നാനി നഗരസഭയുടെ പഞ്ചവത്സര പദ്ധതിയുടെ ഭാഗമായി വീടു നിർമിക്കാൻ സ്ഥലം വാങ്ങിയ ബധിരയും മൂകയുമായ നിർധന സ്ത്രീയെ, ഡാറ്റാ ബാങ്കിൽ ഉൾപ്പെട്ട സ്ഥലം നൽകി കബളിപ്പിച്ചെന്ന പരാതിയിൽ പൊന്നാനി മുനിസിപ്പൽ സെക്രട്ടറിയുടെയും പട്ടികജാതി വികസന ഓഫീസറുടെയും വീഴ്ച അന്വേഷിക്കണമെന്ന് മനുഷ്യാവകാശ കമ്മീഷൻ ജുഡീഷൽ അംഗം കെ. ബൈജുനാഥ്. തദ്ദേശ വകുപ്പ് സെക്രട്ടറിക്കാണ് നിർദേശം നൽകിയത്. നെയ്തല്ലൂർ സ്വദേശിനി അംബികയുടെ ദുരവസ്ഥയെക്കുറിച്ച് അന്വേഷിക്കാനാണ് നിർദേശം. വീട് നിർമിക്കുന്നതിനായി പരാതിക്കാരി സ്വയം വസ്തു വാങ്ങിയപ്പോൾ ആവശ്യമായ ഉപദേശങ്ങൾ നൽകാൻ പട്ടികജാതി വികസന ഓഫീസർക്ക് നിയമാനുസൃതവും ധാർമികവുമായ ഉത്തരവാദിത്വമുണ്ടായിരുന്നതായി കമ്മീഷൻ ചൂണ്ടിക്കാണിച്ചു. പരാതിയെക്കുറിച്ച് മനുഷ്യാവകാശ കമ്മീഷനിലെ മുഖ്യ അന്വേഷണ ഉദ്യോഗസ്ഥൻ അന്വേഷണം നടത്തിയിരുന്നു. ഭൂമി തരംമാറ്റുന്നതിന് പരാതിക്കാരി സമർപ്പിച്ച അപേക്ഷ ഒരു പ്രത്യേക കേസായി പരിഗണിച്ച് അനുകൂല നടപടി സ്വീകരിക്കാൻ കഴിയുമോയെന്ന് റവന്യൂ സെക്രട്ടറി പരിശോധിക്കണമെന്ന് കെ. ബൈജുനാഥ് ആവശ്യപ്പെട്ടു.സർക്കാർ പദ്ധതികളുടെ മാർഗരേഖകളിലെ പോരായ്മയും നിർവഹണ ഉദ്യോഗസ്ഥരുടെ അലംഭാവവും അർഹരായവർക്ക് ആനുകൂല്യം ലഭിക്കുന്നതിൽ തടസം നിൽക്കുന്നതായി കമ്മീഷൻ ചൂണ്ടിക്കാണിച്ചു. മാർഗരേഖയിലെ നിബന്ധനകൾ പറഞ്ഞ് ഉദ്യോഗസ്ഥർ ഒഴിയാറുണ്ടെന്നും കമ്മീഷൻ നിരീക്ഷിച്ചു. ഉത്തരവിന്‍റെ അടിസ്ഥാനത്തിൽ സ്വീകരിച്ച നടപടികൾ റവന്യൂ, തദ്ദേശസ്വയംഭരണ സെക്രട്ടറിമാർ രണ്ട് മാസത്തിനുള്ളിൽ കമ്മീഷനെ അറിയിക്കണം. അംബികക്ക് വേണ്ടി പി.കെ. അബ്ദുൾ റഹീം സമർപ്പിച്ച പരാതിയിലാണ് നടപടി.

ചെസ് ടൂർണമെന്‍റ്: ഐസം അബ്ദുൾ ജലീലും തുഹിൻ റോസും ജേതാക്കൾ

മഞ്ചേരി: പതിനൊന്ന് വയസിന് താഴെയുള്ളവരുടെ ജില്ലാ ചെസ് ചാന്പ്യൻഷിപ്പിൽ ഓപ്പണ്‍ വിഭാഗത്തിൽ ഐസം അബ്ദുൾ ജലീലും പെണ്‍കുട്ടികളുടെ വിഭാഗത്തിൽ തുഹിൻ റോസും ജേതാക്കളായി. ഓപ്പണ്‍ വിഭാഗത്തിൽ പി.മുഹമ്മദ് റൈഹാൻ, കെ.എ.നീരവ് എന്നിവർ രണ്ടും മൂന്നും സ്ഥാനങ്ങൾ നേടി. പെണ്‍കുട്ടികളുടെ വിഭാഗത്തിൽ നഷ നൗഷാദ്, അദ്വിതി ആശിഷ് എന്നിവർ രണ്ടും മൂന്നും സ്ഥാനങ്ങൾ നേടി. ഇരുവിഭാഗത്തിലും ആദ്യ രണ്ട് സ്ഥാനക്കാർ സംസ്ഥാന ചാന്പ്യൻഷിപ്പിലേക്ക് യോഗ്യത നേടി. കേരളാ സ്പോർട്സ് കൗണ്‍സിൽ സംസ്ഥാന ചെസ് ടെക്നിക്കൽ കമ്മിറ്റി, മഞ്ചേരി പബ്ലിക് ലൈബ്രറിയും ചേർന്ന് മഞ്ചേരി പബ്ലിക് ലൈബ്രറി ഹാളിലാണ് മത്സരം സംഘടിപ്പിച്ചത്. മഞ്ചേരി പബ്ലിക് ലൈബ്രറി പ്രസിഡന്‍റ് ഫാറൂഖ് മത്സരങ്ങൾ ഉദ്ഘാടനം ചെയ്തു. മുൻ ഡിവൈഎസ്പി ശങ്കരനാരായണൻ സമ്മാനദാനം നിർവഹിച്ചു. ഇ. ശിഹാബുദീൻ, ഡോ. ആശിഷ് നായർ, അഡ്വ. വി.വി. തോമസ്, പി.ബിജു, കെ.സി. ചന്ദ്രൻ, എം. കൃഷ്ണൻ, സക്കീർ ഹുസൈൻ മഞ്ചേരി, കെ.പി.മുഹമ്മദ് മൻസൂർ എന്നിവർ പ്രസംഗിച്ചു.

കിംസ് അൽശിഫയിൽ ബോധവത്കരണ ശില്പശാല നടത്തി

പെരിന്തൽമണ്ണ: ലോകാരോഗ്യദിനത്തോടനുബന്ധിച്ച് കിംസ് അൽശിഫയിൽ ബോധവത്കരണ ശില്പശാല സംഘടിപ്പിച്ചു. കിംസ് അൽശിഫ മെഡോറ വിഭാഗത്തിന്‍റെ കീഴിലുള്ള ഗൈനക്കോളജി, നിയോനാറ്റോളജി, പീഡിയാട്രിക്സ് വിഭാഗങ്ങളുടെ സംയുക്താഭിമുഖ്യത്തിലാണ് ശില്പശാല നടത്തിയത്. പെരിന്തൽമണ്ണ താലൂക്കിലെ അങ്കണവാടി ജീവനക്കാർ, ആശാവർക്കർമാർ, കുടുംബശ്രീ യൂണിറ്റിലെ അംഗങ്ങൾ എന്നിവർക്കായി ആശുപത്രിയിലെ ഗൈനക്കോളജി വിഭാഗം മേധാവി ഡോ. നയൻതാര, പീഡിയാട്രിക്സ് വിഭാഗം മേധാവി ഡോ. അബ്ദുറഹിമാൻ, ഗൈനക്കോളജിസ്റ്റ് ഡോ. ആമിന നൗഷാദ്, ഡോ. ആയിഷ നസ്ന, ഡോ. എം. സഹീർ , ഡോ. റസ്മിയത്ത് മുസ്തഫ, പീഡിയാട്രിക്സ് ഡോക്ടർമാരായ വിഷ്ണു, ആദിൽ, കെ.എം. അകില എന്നിവർ ക്ലാസുകളെടുത്തു. പരിപാടികളുടെ ഉദ്ഘാടനം കിംസ് അൽശിഫ വൈസ് ചെയർമാൻ ഡോ. പി. ഉണ്ണീന്‍റെ അധ്യക്ഷതയിൽ ജില്ലാ മെഡിക്കൽ ഓഫീസർ ഡോ. ആർ. രേണുക നിർവഹിച്ചു. ചീഫ് ഓപറേറ്റിംഗ് ഓഫീസർ കെ.സി. പ്രിയൻ, മെഡിക്കൽ സൂപ്രണ്ട് ഡോ. മുഹമ്മദ് യഹിയ്യ, കണ്‍സൾട്ടന്‍റ് നിയോനാറ്റോളജിസ്റ്റ് ഡോ. മൊയ്തീൻ ബാബു എന്നിവർ പ്രസംഗിച്ചു.

കെട്ടിട പരിസരത്ത് കഞ്ചാവ് ചെടി കണ്ടെത്തി

ചുങ്കത്തറ: ചുങ്കത്തറയിൽ നിർമാണത്തിലിരിക്കുന്ന കെട്ടിടത്തിന്‍റെ പരിസരത്ത് എക്സൈസ് അധികൃതർ കഞ്ചാവ് ചെടി കണ്ടെത്തി. സ്ട്രൈക്കിംഗ് ഫോഴ്സിന്‍റെ ഭാഗമായി ഇന്നലെ രാത്രി എക്സൈസ് സംഘം നടത്തിയ പരിശോധനയിലാണ് കഞ്ചാവ് ചെടി കണ്ടെത്തിയത്. 70 സെന്‍റീമീറ്റർ ഉയരമുള്ള കഞ്ചാവ് ചെടിക്ക് പതിനേഴ് ശിഖരങ്ങളുണ്ട്. നിലന്പൂർ എക്സൈസ് റേഞ്ച് ഇൻസ്പെക്ടർ ടി.എച്ച്. ഷെഫീഖ്, പ്രിവന്‍റീവ് ഓഫീസർ കെ.എ. അനീഷ്, സിവിൽ എക്സൈസ് ഓഫീസർമാരായ എബിൻ സണ്ണി, എം. രാജേഷ്, വനിതാ സിവിൽ എക്സൈസ് ഓഫീസർ ഇ.എം. സജിനി, അസിസ്റ്റന്‍റ് എക്സൈസ് ഇൻസ്പെക്ടർ ഡ്രൈവർ കെ. രാജീവ് എന്നിവരടങ്ങിയ സംഘം നടത്തിയ പരിശോധനയിലാണ് കഞ്ചാവ് ചെടി കണ്ടെത്തിയത്. എക്സൈസ് കേസ് രജിസ്റ്റർ ചെയ്തു.

സഹവാസ ക്യാന്പും യാത്രയയപ്പും

മേലാറ്റൂർ: നാലാംതരം വരെ പഠനം പൂർത്തിയാക്കിയ ചോലക്കുളം ടി.എം. ജേക്കബ് മെമ്മോറിയൽ എൽപി സ്കൂളിലെ കുട്ടികൾക്കായി നടത്തിയ ദ്വിദിന സഹവാസ ക്യാന്പിന് സമാപനമായി. വിനോദയാത്ര, കലാ-കായിക മത്സരങ്ങൾ, ക്യാന്പ് ഫയർ, രക്ഷിതാക്കൾക്ക് ലഹരി വിരുദ്ധ ബോധവത്കരണ ക്ലാസ് എന്നിവയും നടന്നു. സർവീസിൽ നിന്ന് വിരമിക്കുന്ന എഇഒ സക്കീർ ഹുസൈനെ പൊന്നാടയണിയിച്ച് ആദരിച്ചു. കുട്ടികൾക്കുള്ള യാത്രയയപ്പ് ചടങ്ങിനോടനുബന്ധിച്ച് "ഓർമ വൃക്ഷം’ എന്ന പേരിൽ ബഡ് ചെയ്ത പ്ലാവിൻ തൈകൾ വിതരണം ചെയ്തു. എഇഒ സക്കീർ ഹുസൈൻ പരിപാടി ഉദ്ഘാടനം ചെയ്തു. സ്കൂൾ മാനേജർ മാത്യുസെബാസ്റ്റ്യൻ അധ്യക്ഷത വഹിച്ചു. ഹെഡ്മിസ്ട്രസ് കെ. വനജ, പിടിഎ പ്രസിഡന്‍റ് കെ.കെ. നജ്മുദ്ദീൻ, എംടിഎ പ്രസിഡന്‍റ് സി. ജസീല എന്നിവർ പ്രസംഗിച്ചു. സ്കൂൾ ലീഡർ കെ. അയാന യാസീൻ, അധ്യാപകരായ കെ.ആർ. അഖിൽ, വി.ശ്രീജ, എ. ശിശിര, എൻ.സുകന്യ എന്നിവർ നേതൃത്വം നൽകി.

ആരോഗ്യ സന്ദേശ റാലി നടത്തി

ചുങ്കത്തറ: ലോകാരോഗ്യ ദിനത്തോടനുബന്ധിച്ച് "നടക്കാം ആരോഗ്യത്തിലേക്ക്' എന്ന സന്ദേശവുമായി നിലന്പൂർ ബ്ലോക്ക് കുടുംബാരോഗ്യകേന്ദ്രത്തിന്‍റെ നേതൃത്വത്തിൽ ചുങ്കത്തറയിൽ സന്ദേശ റാലി നടത്തി. ബ്ലോക്ക് പഞ്ചായത്ത് പ്രസിഡന്‍റ് പി. പുഷ്പവല്ലി ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് വൽസമ്മ സെബാസ്റ്റ്യൻ അധ്യക്ഷത വഹിച്ചു. ബ്ലോക്ക് സ്ഥിരംസമിതി ചെയർപേഴ്സണ്‍ സൂസമ്മ മത്തായി, ബ്ലോക്ക് മെന്പർ സി.കെ. സുരേഷ്, മെഡിക്കൽ ഓഫീസർ ഡോ. ബഹാവുദ്ദീൻ, നഴ്സിംഗ് ഓഫീസർ ലിസി, ഹെൽത്ത് ഇൻസ്പെക്ടർമാരായ ജോസഫ് ഫ്രാൻസിസ്, അജു, നഴ്സുമാരായ സുനന്ദ, ശ്രീജയ എന്നിവർ പ്രസംഗിച്ചു.

സിനിമയെ സിനിമയായി കാണാനാകണമെന്ന്

മലപ്പുറം: സിനിമയെ സിനിമയായി കാണാനുള്ള സമചിത്തതയും സഹിഷ്ണുതയും ഭരണാധികാരികൾക്കുണ്ടാകണമെന്ന് മലപ്പുറം രശ്മി ഫിലിം സൊസൈറ്റി നിർവാഹക സമിതി യോഗം കേന്ദ്രസർക്കാരിനെ ഓർമിപ്പിച്ചു. "എംപുരാൻ’ എന്ന ചലച്ചിത്രത്തിന്‍റെ ശില്പികൾക്കെതിരേ സ്വീകരിച്ചിരിക്കുന്ന പ്രതികാര നടപടികൾ ഉടൻ അവസാനിപ്പിച്ച് ജനങ്ങളോടു മാപ്പ് പറയാൻ കേന്ദ്രഭരണകൂടം തയാറാകണമെന്നും യോഗം അഭിപ്രായപ്പെട്ടു. ഭീഷണികൾക്കു വഴങ്ങാത്ത കലാകാര സമൂഹമാണ് ഫാസിസത്തെ ചെറുക്കാൻ മുന്നിൽ നിൽക്കേണ്ടത്. ഇതിനായി സിനിമയുൾപ്പെടെയുളള ആവിഷ്കാരങ്ങളെ പ്രയോജനപ്പെടുത്താൻ സാധിക്കണം. എംപുരാന് എഡിറ്റു ചെയ്യപ്പെടാത്ത തുടർച്ചകളുണ്ടാകണം. പ്രസിഡന്‍റ് മണന്പൂർ രാജൻബാബു അധ്യക്ഷത വഹിച്ചു. സെക്രട്ടറി അനിൽ കെ. കുറുപ്പൻ, അഡ്വ. വി.എം. സുരേഷ്കുമാർ, ഹനീഫ് രാജാജി, എൻ .വി. മുഹമ്മദാലി, നൗഷാദ് മാന്പ്ര, ഉസ്മാൻ ഇരുന്പുഴി, കെ. ശശികുമാർ എന്നിവർ പ്രസംഗിച്ചു.

"എഡ്യൂസിയർ -2025' ഉദ്ഘാടനം ചെയ്തു

പെരിന്തൽമണ്ണ: അലിഗഡ് മുസ്‌ലിം യൂണിവേഴ്സിറ്റി മലപ്പുറം സെന്‍ററിലെ (എഎംയു) വിദ്യാഭ്യാസ വകുപ്പ്, വാർഷിക അക്കാഡമിക് പരിപാടിയായ എഡ്യൂസിയർ-2025 സംഘടിപ്പിച്ചു. എഎംയു സെന്‍റർ ഡയറക്ടർ ഡോ. കെ.പി. ഫൈസൽ ഉദ്ഘാടനം ചെയ്തു. അധ്യാപകർ, വിദ്യാർഥികൾ, വിശിഷ്ടാതിഥികൾ പങ്കെടുത്തു. വിദ്യാഭ്യാസ വകുപ്പിലെ കോഴ്സ് കോഓർഡിനേറ്റർ ഡോ. പി.പി. അബ്ദുൾ ബാസിത് അധ്യക്ഷത വഹിച്ചു. ഷാമിൽ മുഹമ്മദ് ഇഖ്ബാലിന്‍റെ ഖുറാൻ പാരായണത്തോടെയാണ് സെഷൻ ആരംഭിച്ചത്. തുടർന്ന് എഡ്യൂസിയർ- 2025 കണ്‍വീനർ ഡോ. പി.എസ്. സബീന, ഡോ. മുഹമ്മദ് അഹ്സം ഖാൻ, ഡോ. ഷാനവാസ് അഹമ്മദ് മാലിക്, ഡോ. വി.കെ. ഹംസ, വിദ്യാർഥി കണ്‍വീനർ ഷാമിൽ മുഹമ്മദ് ഇഖ്ബാൽ എന്നിവർ പ്രസംഗിച്ചു.

ഇലക്ട്രിക് വീൽചെയർ വിതരണം ചെയ്തു

പെരിന്തൽമണ്ണ: പെരിന്തൽമണ്ണ നഗരസഭയിൽ ഇലക്ട്രിക് വീൽചെയറുകൾ വിതരണം ചെയ്തു. ഓഫീസ് പരിസരത്ത് നടന്ന പരിപാടി ചെയർമാൻ പി. ഷാജി ഉദ്ഘാടനം ചെയ്തു. മൂന്ന് പേർക്കാണ് 4.5 ലക്ഷം രൂപ ചെലവഴിച്ച് ഇലക്ട്രിക് വീൽചെയർ നൽകിയത്. വൈസ് ചെയർപേഴ്സണ്‍ എ. നസീറ, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ അന്പിളി മനോജ്, മുണ്ടുമ്മൽ മുഹമ്മദ് ഹനീഫ, കൗണ്‍സിലർമാർ, നഗരസഭാ സെക്രട്ടറി ജി. മിത്രൻ, ഐസിഡിഎസ് സൂപ്പർവൈസർ സൈനബ എന്നിവർ പങ്കെടുത്തു.

കുറ്റിപ്പുറം സെന്‍റ് ജോസഫ് പള്ളിയുടെ പുനർ കൂദാശ കർമം നടത്തി

കുറ്റിപ്പുറം: കുറ്റിപ്പുറം സെന്‍റ് ജോസഫ് പള്ളിയുടെ പുനർ കൂദാശ കർമവും പരിശുദ്ധ കന്യകാമറിയത്തിന്‍റെ ഗ്രോട്ടോയും പുനർനിർമിച്ച ശേഷമുള്ള വെഞ്ചരിപ്പും താമരശേരി ബിഷപ് മാർ റെമീജിയോസ് ഇഞ്ചനാനിയിൽ നിർവഹിച്ചു. കുറ്റിപ്പുറത്ത് ദേശീയപാതയുടെ സമീപത്ത് 1988ലാണ് ദേവാലയം ആദ്യമായി നിർമിച്ചത്. പിന്നീട് 2005ൽ പുതിയ ദേവാലയവും ഗ്രോട്ടോയും പണിയുകയായിരുന്നു. തുടർന്ന്ദേശീയപാത വികസനവുമായി ബന്ധപ്പെട്ട് പള്ളിയുടെ മുൻവശത്തുള്ള സ്ഥലവും ഗ്രോട്ടോയും പള്ളികെട്ടിടത്തിന്‍റെ മുൻഭാഗവും സർക്കാർ ഏറ്റെടുത്തു. ഈ സാഹചര്യത്തിൽ ദേവാലയവും ഗ്രോട്ടോയും പുനർനിർമിക്കാൻ തീരുമാനിക്കുകയായിരുന്നു. ഇടവക വികാരി ഫാ. ബോബി പൂവത്തിങ്കലിന്‍റെ നേതൃത്വത്തിലാണ് നിർമാണ പ്രവൃത്തി പൂർത്തീകരിച്ചത്. കൂദാശ ചടങ്ങിൽ സമീപ ദേവാലയത്തിലെ വൈദികരും സന്യസ്തരും ഇടവക വിശ്വാസികളും പങ്കെടുത്തു.

കെഎംസിസി അംഗങ്ങൾ യോഗം നടത്തി

പെരിന്തൽമണ്ണ: കെഎംസിസിയുടെ പ്രവർത്തനങ്ങൾ പെരിന്തൽമണ്ണ മണ്ഡലത്തിൽ കൂടുതൽ സജീവമാക്കുന്നതിന്‍റെ ഭാഗമായി വിവിധ ജിസിസി രാജ്യങ്ങളിലെ കെഎംസിസി അംഗങ്ങളുടെ ഈദ് മീറ്റ് അപ്പ് സംഘടിപ്പിച്ചു. മുസ്‌ലിം ലീഗ് ജില്ലാ ജനറൽ സെക്രട്ടറി പി. അബ്ദുൾ ഹമീദ് എംഎൽഎ ഉദ്ഘാടനം ചെയ്തു. ദുബായ് കെഎംസിസി മണ്ഡലം സെക്രട്ടറി റിയാസ് ചെറുകര അധ്യക്ഷത വഹിച്ചു. നജീബ് കാന്തപുരം എംഎൽഎ മുഖ്യപ്രഭാഷണം നടത്തി. മുസ്‌ലിം ലീഗ് മണ്ഡലം പ്രസിഡന്‍റ് എ.കെ. നാസർ, ജനറൽ സെക്രട്ടറി എസ്.അബ്ദുൾ സലാം, ബ്ലോക്ക് പഞ്ചായത്ത് പ്രസിഡന്‍റ് എ.കെ. മുസ്തഫ, നജ്മ തബ്ഷീറ, താമരത്ത് ഉസ്മാൻ, ദുബായ് കെഎംസിസി ജില്ലാ വൈസ് പ്രസിഡന്‍റ് സക്കീർ പാലത്തിങ്ങൽ, ഖത്തർ കെഎംസിസി സ്റ്റേറ്റ് പ്രസിഡന്‍റ് സലീം നാലകത്ത്, സൗദി കെഎംസിസി ലീഡർ ഷൗക്കത്തലി പിലാക്കൽ, റഷീദ് കീഴിശേരി, ഖത്തർ കെഎംസിസി മണ്ഡലം സെക്രട്ടറി ഫാസിൽ നെച്ചിയിൽ, സലീം താമരത്ത് തുടങ്ങിയവർ പ്രസംഗിച്ചു. തദ്ദേശ, നിയമസഭാ തെരഞ്ഞെടുപ്പുകളിൽ കെഎംസിസിയുടെ പ്രവർത്തനം കൂടുതൽ സജീവമാക്കാനും ലഹരിക്കും മയക്കുമരുന്നിനും എതിരേ പ്രചാരണം നടത്താനും യോഗം തീരുമാനിച്ചു.

കോണ്‍ഗ്രസ് ഭാരവാഹികൾ ചുമതലയേറ്റു

മക്കരപ്പറന്പ്: മങ്കട ബ്ലോക്ക് കോണ്‍ഗ്രസ് പ്രസിഡന്‍റ് ഉൾപ്പെടെ 35 അംഗ ഭാരവാഹികൾ ചുമതലയേറ്റു. മക്കരപ്പറന്പ് കണ്‍വൻഷൻ സെന്‍ററിൽ നടന്ന ചടങ്ങ് കെപിസിസി ജനറൽ സെക്രട്ടറി ആര്യാടൻ ഷൗക്കത്ത് ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് പ്രസിഡന്‍റ് പി. രാജീവ് അധ്യക്ഷത വഹിച്ചു. ഡിസിസി ജനറൽ സെക്രട്ടറി ടി.കെ. ശശീന്ദ്രൻ, എം. മൊയ്തു, ഷാഹിദ് ആനക്കയം, മൻസൂർ പള്ളിപ്പുറം, പി.പി. അയമു, ഇ.പി. സൈനുദീൻ, ശിവദാസ് പിലാപ്പറന്പിൽ, സി. റഷീദ്, ഷഫീഖ്, ബഷീർ മങ്കട തുടങ്ങിയവർ പ്രസംഗിച്ചു.

മലയോര ഹൈവേ: രണ്ട് റീച്ചുകളിലേക്കായി എത്തിയത് 11 ടെൻഡറുകൾ

നിലന്പൂർ: നായാടംപൊയിൽ മലയോര ഹൈവേ ടെൻഡറിൽ പങ്കെടുത്തത് 11 പേർ. മൈലാടി മുതൽ മൂലേപ്പാടം വരെയുള്ള ആദ്യറീച്ചിന് അഞ്ച് ടെൻഡറുകളും മൂലേപ്പാടം മുതൽ നായാടംപൊയിൽ വരെയുള്ള രണ്ടാം റീച്ചിന് ആറ് ടെൻഡറുകളുമാണ് ലഭിച്ചത്. ടെൻഡറുകളുടെ പരിശോധ നടത്തി. സാധുവായ ടെൻഡറുകളിൽ കുറഞ്ഞ നിരക്കിലുള്ള ടെൻഡർ ചെയ്ത കരാറുകാർക്ക് ആയിരിക്കും നിർമാണ ചുമതല ലഭിക്കുക. മൈലാടി മുതൽ മൂലേപ്പാടം വരെയുള്ള ഒന്പത് കിലോമീറ്ററിന് 46 കോടിയും മൂലേപ്പാടം മുതൽ നായാടംപൊയിൽ വരെയുള്ള രണ്ടാം റീച്ചിന് 74 കോടി രൂപയുമാണ് കിഫ്ബി ഫണ്ടിൽ അനുവദിച്ചിട്ടുള്ളത്. കേരള റോഡ് ഫണ്ട് ബോർഡിനാണ് ചുമതല. നിലന്പൂരിൽ നിന്ന് കോഴിക്കോട്ടേക്കുള്ള എളുപ്പ റോഡാണിത്. നൂറുക്കണക്കിന് മലയോര കർഷകർക്കും 40 ലേറെ ആദിവാസി നഗറുകൾക്കും റോഡ് പ്രയോജനപ്പെടും.

എം.ടി. മമ്മി ഹാജി സ്മാരക റോഡ് നവീകരിച്ചു

പട്ടിക്കാട്: കീഴാറ്റൂർ പഞ്ചായത്ത് 13-ാം വാർഡ് മുള്ള്യാകുർശിയിൽ നവീകരിച്ച എം.ടി. മമ്മി ഹാജി സ്മാരക റോഡ് കിഴാറ്റൂർ പഞ്ചായത്ത് പ്രസിഡന്‍റ് ജമീല ചാലിയത്തൊടി ഉദ്ഘാടനം ചെയ്തു. 2024-25 വാർഷിക പദ്ധതിയിൽ ഉൾപ്പെടുത്തി 20 ലക്ഷം രൂപ ചെലവഴിച്ചാണ് റോഡ് നവീകരിച്ചത്. പഞ്ചായത്ത് വൈസ് പ്രസിഡന്‍റ് എൻ. മുഹമ്മദ് അധ്യക്ഷത വഹിച്ചു. വാർഡ് മെംബർ സലാം, കെ.കെ. യൂസുഫ്, വളാംപുഴക്കൽ ഉണ്ണി, എം.ടി. യൂസുഫ്, പരി കോക്കാട്ടിൽ, പാറയിൽ യൂസുഫ്, എം.കെ. മുഹമ്മദാലി എന്ന കുട്ടി, എം.കെ. സിദ്ദീഖ്, കെ.പി.റസിയ, റുഖിയ്യ, കെ.വി.സനൂന്പ്, കെ.മുസ്തഫ, എം.ടി. അബ്ദുൾ ഹമീദ് എന്നിവർ പ്രസംഗിച്ചു.

ഡോക്ടർക്കെതിരേ നഗരസഭാ കൗണ്‍സിലർ പരാതി നൽകി

മഞ്ചേരി: മതിയായ ചികിത്സ ലഭിച്ചില്ലെന്നും അപമര്യാദയായി പെരുമാറിയെന്നും കാണിച്ച് മഞ്ചേരി മുനിസിപ്പൽ കൗണ്‍സിലർ മഞ്ചേരി മെഡിക്കൽ കോളജ് ആശുപത്രിയിലെ ഡ്യൂട്ടി ഡോക്ടർമാർക്കെതിരെ ഹോസ്പിറ്റൽ സൂപ്രണ്ടിന് പരാതി നൽകി. മഞ്ചേരി നഗരസഭ 22-ാം വാർഡ് കൗണ്‍സിലർ എം.പി. സിദ്ദിഖ് ആണ് പരാതി നൽകിയത്. ഇക്കഴിഞ്ഞ ചെറിയപെരുന്നാൾ ദിവസം സിദ്ദീഖിന്‍റെ പത്താംക്ലാസുകാരിയായ മകൾക്ക് മിക്സിയുടെ ബ്ലേഡിൽ തട്ടി മുറിവേറ്റു. ഉടൻ മഞ്ചേരി മെഡിക്കൽ കോളജ് ആശുപത്രിയിൽ എത്തിച്ചെങ്കിലും ഡ്യൂട്ടി ഡോക്ടർ മുറിവു പരിശോധിക്കാനോ പ്രാഥമിക ചികിത്സ നൽകാനോ തയാറായില്ലെന്നും കോഴിക്കോട് മെഡിക്കൽ കോളജിലേക്ക് കൊണ്ടുപോകാൻ നിർദേശിക്കുകയുമായിരുന്നുവെന്ന് പരാതിയിൽ പറയുന്നു. മുറിവ് പരിശോധിക്കണമെന്ന് ആവശ്യപ്പെട്ടപ്പോൾ ഒപി ടിക്കറ്റും വാങ്ങി പോയ ഡോക്ടർ ഒരു മണിക്കൂർ കഴിഞ്ഞാണ് തിരിച്ചു വന്നത്. പിന്നീട് വലതു കൈയിലെ വിരലുകളിലുണ്ടായ മുറിവ് തുന്നി വിടുകയായിരുന്നു. ഡ്യൂട്ടിയിലുണ്ടായിരുന്ന മറ്റൊരു വനിതാ ഡോക്ടർ ഭാര്യയോട് കയർത്തു സംസാരിച്ചതായും സിദ്ദീഖ് പരാതിയിൽ പറയുന്നു. സംഭവത്തിൽ അന്വേഷണം നടത്തി നടപടി സ്വീകരിക്കുമെന്ന് സൂപ്രണ്ട് പറഞ്ഞു.

മൈക്രോ ഫിനാൻസ് വായ്പ വിതരണം ചെയ്തു

മഞ്ചേരി: സംസ്ഥാന പിന്നാക്ക വിഭാഗ വികസന കോർപറേഷൻ മഞ്ചേരി നഗരസഭ കുടുംബശ്രീ സിഡിഎസുകളിലെ 74 അയൽക്കൂട്ടങ്ങളിലെ 657 അംഗങ്ങൾക്ക് അനുവദിച്ച 59050000 രൂപയുടെ വിതരണോദ്ഘാടനം അഡ്വ. യു.എ. ലത്തീഫ് എംഎൽഎ നിർവഹിച്ചു. നഗരസഭ ചെയർപേഴ്സണ്‍ വി.എം. സുബൈദ അധ്യക്ഷത വഹിച്ചു. സിഡിഎസ് ചെയർപേഴ്സണ്‍ ഷാഹിന, വൈസ് ചെയർമാൻ വി.പി. ഫിറോസ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ എൽസി, വാർഡ് കൗണ്‍സിലർ ഫാത്തിമ സുഹ്റ, സിഡിഎസ് ചെയർപേഴ്സണ്‍ സറഫുന്നീസ എന്നിവർ പ്രസംഗിച്ചു. പിന്നാക്ക വിഭാഗ വികസന കോർപ്പറേഷൻ മാനേജർ ഹനീഫ പദ്ധതി വിശദീകരണം നടത്തി. മെംബർ സെക്രട്ടറി റെജി തോമസ് റിപ്പോർട്ട് അവതരിപ്പിച്ചു. സിഡിഎസ് ഉപസമിതി കണ്‍വീനർമാർ, സിഡിഎസ് അംഗങ്ങൾ, അക്കൗണ്ടന്‍റ്മാർ തുടങ്ങിയവർ സംബന്ധിച്ചു.

ഷിബിൽ ഷെരീഫ് കേരളാ ടീമിലേക്ക്

തുവൂർ: ഫുട്ബോളിൽ കേരളത്തിന് വേണ്ടി ബൂട്ടണിയാൻ തുവൂർ നീലാഞ്ചേരിയിലെ ഷിബിൽ ഷെരീഫ്. അണ്ടർ 19 കേരള ടീമിലാണ് ഷിബിൽ ബൂട്ടണിയുക. മുക്കം മണാശേരി എംകെഎച്ച്എംഎംഒ ഹയർ സെക്കൻഡറി സ്കൂളിൽ പ്ലസ് വണ്‍ വിദ്യാർഥിയായ ഷിബിൽ കോഴിക്കോട് ജില്ലയ്ക്കു വേണ്ടി സംസ്ഥാന സ്കൂൾ കായികമേളയിൽ കളിച്ചിരുന്നു. അന്നത്തെ ഷിബിലിന്‍റെ പ്രകടനം കേരള ടീമിലേക്കുള്ള വാതിൽ തുറന്നു. കൂടാതെ കൊൽക്കത്തയിലെ ക്ലബും ഷിബിലിനെ ടീമിലേക്ക് തെരഞ്ഞെടുക്കുകയും വിദേശത്ത് കളിക്കാൻ അവസരം വാഗ്ദാനം ചെയ്യുകയും ചെയ്തിരുന്നു. വിദേശത്തേക്ക് പറക്കാനുള്ള ഒരുക്കത്തിനിടെ മെഡിക്കൽ പരിശോധനയിൽ മഞ്ഞപ്പിത്തം സ്ഥിരീകരിക്കുകയായിരുന്നു. പനി വകവയ്ക്കാതെയായിരുന്നു അന്ന് ഷിബിൽ മൈതാനിയിൽ മികച്ച പ്രകടനം നടത്തിയത്. മഞ്ഞപ്പിത്തത്തിനുള്ള ചികിത്സയിൽ കർശന വിശ്രമം ഡോക്ടർ നിർദേശിച്ചതോടെ ഷിബിലിന്‍റെ സ്വപ്നത്തിന് മങ്ങലേറ്റു. എന്നാൽ ഷിബിലിന്‍റെ പ്രകടത്തിൽ ആത്മവിശ്വാസമുള്ള കോച്ച് വിശ്രമ ദിവസം കഴിഞ്ഞയുടനെ ഷിബിലിനെ ടീമിലേക്ക് വിളിക്കുകയായിരുന്നു. സംസ്ഥാനത്തിന്‍റെ വിവിധയിടങ്ങളിൽ ധാരാളം ടൂർണമെന്‍റുകളിൽ ഷിബിൽ ബൂട്ടണിയുകയും മികച്ച പ്രകടനം കാഴ്ചവയ്ക്കുകയും ചെയ്തിരുന്നു. കൈവിട്ടുപോയെന്ന് കരുതിയ ഭാഗ്യം തിരികെ കിട്ടിയ ആഹ്ലാദത്തിലാണ് ഷിബിൽ. പ്രവാസിയായ മന്പാടൻ ഷെരീഫിന്‍റെയും സാജിതയും മകനാണ് ഷിബിൽ.

ഡയാലിസിസ് യൂണിറ്റിനായി മെഗാഷോ 20ന്

കരുവാരകുണ്ട്: പാലിയേറ്റീവ് കെയർ സൊസൈറ്റി തുടങ്ങുന്ന പാലിയം ഡയാലിസിസ് യൂണിറ്റിന് ധനം ശേഖരിക്കാൻ ജനകീയ കൂട്ടായ്മയോടെ കേരള ദീപ്തി ക്ലബ് മെഗാഷോ നടത്തുന്നു. 20 ന് ചീനിപ്പാടത്ത് നടക്കുന്ന ഷോയുടെ ടിക്കറ്റ് വിതരണം തുടങ്ങി. പാലിയേറ്റീവ് കെയർ പ്രസിഡന്‍റ് പി.എസ്.മുഹമ്മദ് സാദിഖിൽ നിന്ന് ടിക്കറ്റ് സ്വീകരിച്ച് ഗ്രാമപഞ്ചായത്ത് വൈസ് പ്രസിഡന്‍റ് മഠത്തിൽ ലത്തീഫ് ഉദ്ഘാടനം ചെയ്തു. വ്യാപാരി വ്യവസായി ഏകോപന സമിതി പ്രസിഡന്‍റ് ഹംസ സുബ്ഹാൻ, ജോയ് വയലിൽ, അഷ്റഫ് ദോസ്ത്, പി.കുഞ്ഞു, കെ.കെ. അഷ്റഫ് എന്നിവർ സംബന്ധിച്ചു.

ജില്ലയിൽ കോട്ടെരുമകളുടെ ശല്യമേറുന്നു

മഞ്ചേരി: ജില്ലയിലെ വിവിധ മേഖലകളിൽ കോട്ടെരുമ പ്രാണികൾ സംഘടിതമായ ആക്രമണം നടത്തുന്നു. വണ്ടൂർ, നിലന്പൂർ, പൂക്കോട്ടുംപാടം, കാളികാവ്, എളങ്കൂർ, കരുവാരക്കുണ്ട്, കുട്ടശേരി തുടങ്ങിയ സ്ഥലങ്ങളിൽ നിരവധി കുടുംബങ്ങളാണ് കോട്ടെരുമ ശല്യം കാരണം ദുരിതത്തിലാകുന്നത്. മുപ്ലിവണ്ട്, കരിഞ്ചെള്ള്, കട്ടുറുമ എന്നീ പേരുകളിൽ അറിയപ്പെടുന്ന പ്രാണിയാണ് ആളുകളെ ദുരിതത്തിലാക്കുന്നത്. റബർ മരങ്ങൾ, തേയില തുടങ്ങിയുള്ള തോട്ടങ്ങളിലാണ് ഇവയെ കൂടുതലായി കണ്ടുവരുന്നത്. ചൂട് വർധിക്കുകയും വേനൽ മഴ ലഭിക്കുകയും ചെയ്യുന്നതോടെ ഇവ വ്യാപകമാകുന്നു. പഴുത്ത് വീഴുന്ന റബറിന്‍റെ ഇലകൾ ഭക്ഷിക്കാനായാണ് ഇവയെത്തുന്നത്. വൈകുന്നേരം വീടുകളിലും സ്ഥാപനങ്ങളിലും വൈദ്യുത വിളക്കുകൾ തെളിയുന്നതോടെ ഇവ കൂട്ടമായി എത്തുന്നു. ഭക്ഷണം കഴിക്കാനും വീടുകളിൽ വിളക്ക് തെളിയിക്കാനും കത്തിക്കാനും കഴിയാത്ത അവസ്ഥയാണ്. സ്വൈരമായി കിടന്നുറങ്ങാനും കഴിയുന്നില്ല. കുട്ടികളുടെയും മുതിർന്നവരുടെയും മൂക്കിലും ചെവിയിലും കയറുകയും ഇവ വിസർജിക്കുന്ന ദ്രാവകം ശരീരത്തിലായാൽ ചൊറിച്ചിൽ അനുഭവപ്പെടുകയും ചെയ്യുന്നു. ഇത്തരം പ്രാണികളെ അകറ്റാൻ ചില പൊടി കൈകളൊക്കെ പറയാറുണ്ടെങ്കിലും പലപ്പോഴും അതൊന്നും ഫലപ്രദമാകാറില്ല. മണ്ണെണ്ണ, സോപ്പുപൊടി എന്നിവ കലർത്തി പ്രയോഗിക്കുക, ഹിറ്റ് ചോക്ക് കൊണ്ട് വരക്കുക, വേപ്പെണ്ണ പുരട്ടുക തുടങ്ങിയ ഒറ്റമൂലികളൊക്കെ ചെയ്തു നോക്കിയാലും പൂർണമായും അവയെ നിയന്ത്രിക്കാനാകില്ലെങ്കിലും നേരിയ ആശ്വാസം ലഭിക്കും. അൽപം വീതിയും നീളവുമുള്ള വെള്ള നിറത്തിലുള്ള തുണി വീട്ടിൽ നിന്ന് അൽപം അകലെ പ്രകാശിക്കുന്ന ബൾബിന് സമീപത്തായി കെട്ടിവയ്ക്കുന്നതും മറ്റൊരു പൊടിക്കൈ ആണ്. ലൈറ്റിടാതിരിക്കുക, വീട്ടിനകത്തേക്കുള്ള ദ്വാരങ്ങൾ കൊതുകുവലയും മറ്റും ഉപയോഗിച്ച് ഭദ്രമായി അടക്കുക തുടങ്ങിയ കാര്യങ്ങളും പരീക്ഷിച്ചു നോക്കാറുണ്ട്.

തേഞ്ഞിപ്പലത്തെ മാലിന്യ സംഭരണ കേന്ദ്രത്തിൽ തീപിടിത്തം

തേഞ്ഞിപ്പലം: കാരിമഠത്തിൽ പ്രദേശത്തെ അജൈവ മാലിന്യ സംഭരണ കേന്ദ്രത്തിൽ വീണ്ടും തീപിടിത്തം. കെട്ടിടത്തിനകത്ത് സൂക്ഷിച്ച തുണിക്കുന്പാരത്തിന് തീപിടിച്ചത്. കോഴിക്കോട് മീഞ്ചന്തയിൽ നിന്നെത്തിയ രണ്ട് യൂണിറ്റ് ഫയർഫോഴ്സ് രണ്ട് മണിക്കൂറോളം പരിശ്രമിച്ചാണ് തീയണച്ചത്. ഇന്നലെ രാവിലെ 6.30 ഓടെയാണ് തീ പൂർണമായും അണച്ചത്. തേഞ്ഞിപ്പലം പഞ്ചായത്ത് പ്രസിഡന്‍റ് ടി. വിജിത്ത്, സ്ഥിരം സമിതി അധ്യക്ഷരായ പിയൂഷ് അണ്ടിശേരി, എം. സുലൈമാൻ, പഞ്ചായത്തംഗം പി.വി. ജാഫർ സിദീഖ് തുടങ്ങിയവരും തേഞ്ഞിപ്പലം പോലീസ് ഉദ്യോഗസ്ഥരും പുലർച്ചെ തന്നെ പ്രദേശത്ത് എത്തിയിരുന്നു. മാസങ്ങൾക്ക് മുന്പ് സമാന സാഹചര്യത്തിൽ ഇവിടെ ടണ്‍ കണക്കിന് പ്ലാസ്റ്റിക് മാലിന്യം കത്തി നശിച്ചിരുന്നു. സംഭവത്തെ തുടർന്ന് തേഞ്ഞിപ്പലം പഞ്ചായത്ത് അധികൃതർ പോലീസിൽ പരാതി നൽകി.

പാലൂർ സ്കൂൾ ശതാബ്ദി: സമാപന പരിപാടികൾക്ക് തുടക്കമായി

പുലാമന്തോൾ: പാലൂർ എഎൽപി സ്കൂളിന്‍റെ ഒരു വർഷം നീണ്ടുനിന്ന ശതാബ്ദി ആഘോഷങ്ങളുടെ സമാപന പരിപാടികൾക്ക് തുടക്കമായി. രണ്ടു ദിവസം നീണ്ടുനിൽക്കുന്ന സമാപന പരിപാടികൾ മുൻ വിദ്യാഭ്യാസ വകുപ്പ് മന്ത്രി സി. രവീന്ദ്രനാഥ് ഉദ്ഘാടനം ചെയ്തു. സംഘാടക സമിതി വൈസ് ചെയർമാൻ വേണു പാലൂർ അധ്യക്ഷത വഹിച്ചു. പുലാമന്തോൾ ഗ്രാമപഞ്ചായത്ത് പ്രസിഡന്‍റ് പി. സൗമ്യ, റിട്ടയേർഡ് ഹെഡ്മിസ്ട്രസുമാരായ പി. തങ്കമാളു, ടി. കമലം, പി. ജമീലബീവി, പിടിഎ പ്രസിഡന്‍റ്് കെ. സുധാകരൻ, എംപിടിഎ പ്രസിഡന്‍റ് ആർ. രാജലക്ഷ്മി, പി.രാജഗോപാൽ, സുരേഷ് തെക്കീട്ടിൽ, എൻ. മണിലാൽ, ഇക്ബാൽ പി.രായിൽ, കെ.രുഗ്മിണി, സി.രവി, പി.കെ. ഖാലിദ്, എം.കെ. അഷറഫ്, സി.മനോജ്, എം.കെ. അച്യുതാനന്ദൻ, ആർ. പ്രസൂണ്‍ റാം എന്നിവർ പ്രസംഗിച്ചു. പൂർവ വിദ്യാർഥികൾ തയാറാക്കുന്ന കളിമുറ്റത്തിന്‍റെ പ്രഖ്യാപനം സേതു പാലൂർ നിർവഹിച്ചു. നൂറു വനിതകൾ അണിനിരന്ന മെഗാ തിരുവാതിരയോടെ കലാപരിപാടികൾക്ക് തുടക്കമായത്. തുടർന്ന് അങ്കണവാടി കുട്ടികളുടെയും പൂർവവിദ്യാർഥികളുടെയും കലാപരിപാടികളും അരങ്ങേറി. ഇന്ന് നടക്കുന്ന സമാപന സമ്മേളനം മന്ത്രി വി.അബ്ദുറഹ്മാൻ ഉദ്ഘാടനം ചെയ്യും. നജീബ് കാന്തപുരം എംഎൽഎ അധ്യക്ഷത വഹിക്കും.

മഞ്ചേരി മെഡിക്കൽ കോളജിന്‍റെ ദുരവസ്ഥ: കളക്ടർക്ക് നിവേദനം നൽകി

മഞ്ചേരി: പ്രതിദിനം ആയിരക്കണക്കിന് രോഗികൾ ചികിത്സക്കായി എത്തുന്ന മഞ്ചേരി മെഡിക്കൽ കോളജ് ആശുപത്രി രോഗികൾക്ക് മതിയായ ചികിത്സ ലഭ്യമാകുന്നില്ലെന്ന് ചൂണ്ടിക്കാട്ടി താലൂക്ക് വികസന സമിതിയംഗം സി.ടി. രാജു കളക്ടർക്ക് നിവേദനം നൽകി. എമർജൻസി ഓപ്പറേഷൻ തിയേറ്റർ, പോസ്റ്റ് ഓപ്പറേഷൻ കാഷ്വാലിറ്റി ഐസിയു, കാർഡിയോളജി ഐസിയു, എല്ലാ വിഭാഗത്തിനും സൂപ്പർ സ്പെഷാലിറ്റി ഡിപ്പാർട്ട്മെന്‍റ്, പ്രധാന റോഡ് വീതി കൂട്ടൽ എന്നിവ അടിയന്തരമായി ചെയ്യേണ്ടതിന്‍റെ ആവശ്യകത നിവേദനത്തിൽ ചൂണ്ടിക്കാട്ടി. മലപ്പുറം റോഡിൽ നിന്ന് മെഡിക്കൽ കോളജിലേക്കുള്ള റോഡ് എട്ടു മീറ്റർ വീതിയുണ്ടെങ്കിലും മെയിൻ റോഡിൽ നിന്ന് കയറി വരുന്ന ഭാഗത്ത് ആറു മീറ്റർ മാത്രമാണുള്ളത്. ഇതിന് പരിഹാരമായി ആശുപത്രി ചുറ്റുമതിൽ പൊളിക്കുകയോ തൊട്ടടുത്തുള്ള പുറന്പോക്ക് ഭൂമി ഉപയോഗപ്പെടുത്തുകയോ ചെയ്യണം. രോഗികളുമായി എത്തുന്ന ആംബുലൻസുകളും മറ്റും ഈ ഭാഗങ്ങളിൽ ഗതാഗത തടസം നേരിടുന്നത് നിത്യസംഭവമാണ്. പ്രദേശത്ത് പോലീസ് നിർദേശം വകവയ്ക്കാതെ പാർക്ക് ചെയ്യുന്ന ഇരുചക്ര വാഹനങ്ങളും നിരവധിയാണെന്നും ജില്ലാ കളക്ടറും മെഡിക്കൽ കോളജ് ആശുപത്രി വികസന സമിതി ചെയർമാനുമായ വി.ആർ. വിനോദിന് നൽകിയ നിവേദനത്തിൽ ചൂണ്ടിക്കാട്ടുന്നു.

അജ്ഞാതജീവി കോഴികളെ കൊന്നു

പെരിന്തൽമണ്ണ: അജ്ഞാതജീവി വളർത്തുകോഴികളെ കൊന്നു. അങ്ങാടിപ്പുറം പുത്തനങ്ങാടി മൈലാഞ്ചി വളവിൽ കുന്നത്ത് ഹാരിസ് ബാബുവിന്‍റെ പതിനഞ്ചിലേറെ കോഴികളെയാണ് കൊന്നത്. 7000 രൂപയുടെ നഷ്ടം സംഭവിച്ചു. ഞായറാഴ്ച പുലർച്ചെ രണ്ടിന് ശേഷമാണ് സംഭവം. മെരുവാണ് കോഴികളെ കൊന്നതെന്ന് നാട്ടുകാർ പറയുന്നു.

മാലാപറന്പ് അങ്കണവാടിക്ക് കുടിവെള്ളമായി

മാലാപറന്പ്: വർഷങ്ങളുടെ കാത്തിരിപ്പിന് ശേഷം മാലാപറന്പ് അങ്കണവാടിക്ക് കുടിവെള്ളം ലഭ്യമായി. കാലങ്ങളായി മാലാപറന്പ് സെന്‍റ് ജോസഫ് പള്ളിയിൽ നിന്നായിരുന്നു അങ്കണവാടിക്ക് ആവശ്യമായ കുടിവെള്ളം നൽകിയിരുന്നത്. റോഡ് കട്ടിംഗിന് ആവശ്യമായ തുക പഞ്ചായത്ത് നൽകിയതോടെയാണ് വാട്ടർ അഥോറിറ്റിയുടെ കണക്ഷൻ അങ്കണവാടിയിലേക്ക് ലഭ്യമാക്കിയത്. കുടിവെള്ള കണക്ഷന്‍റെ ഉദ്ഘാടനം പുലാമന്തോൾ ഗ്രാമപഞ്ചായത്ത് പ്രസിഡന്‍റ് പി. സൗമ്യ നിർവഹിച്ചു. വാർഡ് മെംബർ ഷിനോസ് ജോസഫ് അധ്യക്ഷത വഹിച്ചു. ഗ്രാമപഞ്ചായത്ത് മുൻ പ്രസിഡന്‍റും ഭരണസമിതി അംഗവുമായ വി.പി. മുഹമ്മദ് ഹനീഫ, എ.ആർ. വേലു, രക്ഷകർത്താക്കൾ, അങ്കണവാടി ജീവനക്കാർ എന്നിവർ പങ്കെടുത്തു.

തുവൂരിൽ സെവൻസ് ഫുട്ബോളിന് തുടക്കം

കരുവാരകുണ്ട്: തുവൂർ ജഐസ്‌സി ക്ലബിന്‍റെ അഖിലേന്ത്യാ സെവൻസ് ഫുട്ബോൾ ടൂർണമെന്‍റിന് തുടക്കമായി. സന്തോഷ് ഫ്ളഡ്ലിറ്റ് സ്റ്റേഡിയത്തിൽ ആരംഭിച്ച ടൂർണമെന്‍റ് കരുവാരക്കുണ്ട് പോലീസ് സ്റ്റേഷൻ ഹൗസ് ഓഫീസർ കെ.ടി. ശ്രീനിവാസൻ ഉദ്ഘാടനം ചെയ്തു. ജീവകാരുണ്യ പ്രവർത്തനങ്ങൾക്ക് തുക കണ്ടെത്തുക എന്ന ലക്ഷ്യത്തോടെയാണ് ജഐസ്‌സി ക്ലബ് ടൂർണമെന്‍റ് സംഘടിപ്പിക്കുന്നത്. ടൂർണമെന്‍റ് കമ്മിറ്റി ചെയർമാൻ കെ.സി. നിയാസ് അധ്യക്ഷത വഹിച്ചു. ഗ്രാമപഞ്ചായത്ത് വൈസ് പ്രസിഡന്‍റ് കെ.കെ. സുരേന്ദ്രൻ, ബ്ലോക്ക് സ്ഥിരം സമിതി അധ്യക്ഷൻ എം. ലത്തീഫ്, ഗ്രാമപഞ്ചായത്ത് സ്ഥിരം സമിതി അധ്യക്ഷൻ ടി.എ. ജലീൽ, എസ്എഫ്എ ജനറൽ സെക്രട്ടറി സലാഹുദീൻ മന്പാട്, ട്രഷറർ യൂസഫ് കാളികാവ്, ടൂർണമെന്‍റ് കമ്മിറ്റി കണ്‍വീനർ കെ.ബി.നിസാർ, രക്ഷാധികാരികളായ കളത്തിൽ കുഞ്ഞാപ്പു ഹാജി, പി. സലാഹുദീൻ, കൊപ്പത്ത് ഷെരീഫ്, കടന്പോടൻ മൊയ്തീൻകുട്ടി, ഭാരവാഹികളായ കളത്തിൽ മുജീബ്, എ.വി. സലാം, അജ്മൽ കുക്കു, കെവിവിഇഎസ് പ്രതിനിധി വർണം സുകുമാരൻ തുടങ്ങിയവർ പങ്കെടുത്തു. ആദ്യമത്സരത്തിൻ ലക്കി സോക്കർ കൊട്ടപ്പുറം മൂന്നിനെതിരെ നാല് ഗോളുകൾക്ക് റോയൽ ട്രാവൽസ് കോഴിക്കോടിനെ പരാജയപ്പെടുത്തി.

കോട്ടക്കലിൽ കഫേ കുടുംബശ്രീ റസ്റ്ററന്‍റ് തുറന്നു

മലപ്പുറം: കുടുംബശ്രീ ആരംഭിക്കുന്ന മലപ്പുറം ജില്ലയിലെ ആദ്യ പ്രീമിയം കഫേ റസ്റ്ററന്‍റ് ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ ഉദ്ഘാടനം ചെയ്തു. കോട്ടക്കൽ നഗരസഭ ചെയർപേഴ്സണ്‍ ഡോ. കെ. ഹനീഷ അധ്യക്ഷത വഹിച്ചു. കോട്ടക്കൽ ബസ് സ്റ്റാൻഡിന്‍റെ പിറകുവശത്താണ് ’ കഫേ കുടുംബശ്രീ’ തുടങ്ങിയിട്ടുള്ളത്. കാന്‍റീൻ, കാറ്ററിംഗ് മേഖലയിൽ പ്രവർത്തിക്കുന്ന കുടുംബശ്രീ സംരംഭകർക്ക് സുസ്ഥിര വരുമാന ലഭ്യത ഉറപ്പാക്കുക, തൊഴിൽനിലവാരം ഉയർത്തുക എന്നിവയാണ് പ്രീമിയം കഫേയുടെ പ്രധാന ലക്ഷ്യങ്ങൾ. കുടുംബശ്രീ ജില്ലാ മിഷൻ ക്ഷണിച്ച താൽപര്യപത്രത്തിൽ നിന്ന് തെരഞ്ഞെടുക്കപ്പെട്ട മലപ്പുറം സ്വദേശിനി ഷരീഫയാണ് സംരംഭക. പാഴ്സൽ സർവീസ്, ടേക്ക് എവേ കൗണ്ടറുകൾ, കാത്തിരിപ്പ് കേന്ദ്രം, കാറ്ററിംഗ്, ഓണ്‍ലൈൻ സേവനങ്ങൾ, മാലിന്യ സംസ്കരണ ഉപാധികൾ, പാർക്കിംഗ് സൗകര്യം, ശുചിമുറികൾ, നാപ്കിൻ മെഷീൻ തുടങ്ങിയ വിപുലമായ സൗകര്യങ്ങൾ ഉൾക്കൊള്ളിച്ച് ആരംഭിച്ച ഈ പുത്തൻസംരംഭത്തിൽ കേരളീയ വിഭവങ്ങളും അറബിക്, ചൈനീസ് വിഭവങ്ങളും ഒപ്പം മലപ്പുറത്തിന്‍റെ തന്നെ രുചിക്കൂട്ടുകളും ലഭിക്കും. പരിപാടിയിൽ വേങ്ങര ബ്ലോക്ക് പഞ്ചായത്ത് പ്രസിഡന്‍റ് ബെൻസീറ മുഖ്യാതിഥിയായിരുന്നു. കോട്ടക്കൽ നഗരസഭ സ്ഥിരം സമിതി അധ്യക്ഷ പാറോളി റംല, മലപ്പുറം നഗരസഭ സ്ഥിരം സമിതി അധ്യക്ഷ മറിയുമ്മ ഷരീഫ്, കൗണ്‍സിലർ കളപ്പാടൻ സജീർ, കുടുംബശ്രീ ജില്ലാ മിഷൻ കോ ഓർഡിനേറ്റർ ബി. സുരേഷ് കുമാർ, അസിസ്റ്റന്‍റ് കോ ഓർഡിനേറ്റർ എം.പി. മുഹമ്മദ് അസ്ലം, കുടുംബശ്രീ പ്രോഗ്രാം മാനേജർ പി. റെനീഷ്, സിഡിഎസ് ചെയർപേഴ്സണ്‍മാരായ ടി.ടി. ജുമൈല, എം.കെ. റസിയ എന്നിവർ പ്രസംഗിച്ചു.

ജീവനക്കാരെ നിയമിച്ചില്ല: അങ്ങാടിപ്പുറം പഞ്ചായത്തിന് നഷ്ടമായത് നാല് കോടി

അങ്ങാടിപ്പുറം: എൻജിനിയറിംഗ് വിഭാഗത്തിലെ ഒഴിവുകൾ നികത്താത്തതിനാൽ അങ്ങാടിപ്പുറം ഗ്രാമപഞ്ചായത്തിന് നാല് കോടിയോളം രൂപ സർക്കാർ നഷ്ടപ്പെടുത്തിയെന്ന് പ്രസിഡന്‍റ് കെ.പി. സഈദ ആരോപിച്ചു. എസ്റ്റിമേറ്റ് തയാറാക്കി ടെൻഡർ വിളിച്ച് നടത്തേണ്ടിയിരുന്ന നിർമാണ പ്രവൃത്തികളിൽ മിക്കവയും നടത്താൻ കഴിയാത്ത സ്ഥിതിയായി. റോഡ് റിപ്പയറിംഗിനും റീടാറിംഗിനുമായി മാത്രം 217 പദ്ധതികൾ ഉണ്ടായിരുന്നതിൽ 166 പദ്ധതികൾ മാത്രമാണ് പൂർത്തിയാക്കാൻ കഴിഞ്ഞതെന്ന് വൈസ് പ്രസിഡന്‍റ് ഷബീർ കറുമുക്കിൽ ചൂണ്ടിക്കാട്ടി. ഇവയാകട്ടെ മുൻ വർഷത്തെ (2023-24) സ്പിൽഓവറും ആയിരുന്നു. റോഡ് പുനരുദ്ധാരണം ഒഴികെ മറ്റു വിവിധ പ്രവൃത്തികളുടെ പ്രൊജക്ടുകൾ 20 എണ്ണം ഉണ്ടായിരുന്നു. ഇവക്കെല്ലാം എസ്റ്റിമേറ്റ് തയാറാക്കുവാനോ സാങ്കേതികാനുമതിക്ക് അയക്കുവാനോ ടെൻഡർ ക്ഷണിക്കുവാനോ ഉദ്യോഗസ്ഥൻമാർ ഇല്ലാതെ മാസങ്ങളോളം ഈ വിഭാഗം ശൂന്യമായിരുന്നുവെന്ന് ഇരുവരും പറയുന്നു. ഓവർസിയർമാർ മാസങ്ങളോളം അഡീഷണൽ ചാർജിൽ രണ്ടുദിവസം അതിഥികളെ പോലെ വന്നു പോവുകയായിരുന്നു. 2023 ജൂലൈയിൽ പഞ്ചായത്തിലെ സെക്കൻഡ് ഗ്രേഡ് ഓവർസിയറെയും തേർഡ് ഗ്രേഡ് ഓവർസിയറെയും സ്ഥലം മാറ്റിയതിനുശേഷം ഏഴ് മാസം കഴിഞ്ഞാണ് മറ്റൊരാൾ വന്നത്. 2024 സെപ്തംബറിൽ അദ്ദേഹവും പോയി. പിന്നീട് ഇതുവരെയും ഓവർസിയർമാരെ നിയമിച്ചിട്ടില്ല. എസ്റ്റിമേറ്റുകൾ തയാറാക്കേണ്ടത് ഓവർസിയർമാരാണ്. വീട് റിപ്പയറിംഗ് പൂർത്തിയാക്കിയാൽ അവ പരിശോധിച്ച് അളവുകൾ രേഖപ്പെടുത്തി ചെലവ് നിർണയിക്കേണ്ടതും ഓവർസിയർമാരാണ്. ഇതു കാരണം റോഡ് പുനരുദ്ധാരണ പ്രവൃത്തികൾക്ക് വകയിരുത്തിയിരുന്ന 6.74 കോടി രൂപയിൽ 3.80 രൂപ മാത്രമാണ് ചെലവായത്. 2.94 കോടി രൂപ സർക്കാർ നഷ്ടപ്പെടുത്തി. മറ്റ് നിർമാണ പ്രവൃത്തികളിലെല്ലാം കൂടിയാണ് നാല് കോടിയോളം രൂപ നഷ്ടമായതെന്ന് പ്രസിഡന്‍റും വൈസ് പ്രസിഡന്‍റും വ്യക്തമാക്കി.

ബൈക്ക് അപകടത്തിൽ യുവാവ് മരിച്ചു

ചങ്ങരംകുളം: കോക്കൂർ സ്വദേശിയായ യുവാവ് തൃശൂരിൽ ബൈക്ക് അപകടത്തിൽ മരിച്ചു. കോക്കൂർ ക്ഷേത്രത്തിന് സമീപത്ത് താമസിക്കുന്ന കൈതവളപ്പിൽ അസീസിന്‍റെ മകൻ ബിലാൽ (21) ആണ് മരിച്ചത്. ഞായറാഴ്ച പുലർച്ചെയാണ് ബിലാൽ സുഹൃത്തുക്കൾക്കൊപ്പം വാൾപ്പാറയിലേക്ക് പുറപ്പെട്ടത്. പുലർച്ചെ അഞ്ച് മണിയോടെ തൃശൂർ മെഡിക്കൽ കോളജ് റോഡിൽ വച്ച് ബിലാൽ സഞ്ചരിച്ച ബൈക്ക് ലോറിയിലിടിച്ചാണ് അപകടം. ഗുരുതര പരിക്കേറ്റ ബിലാലിനെ തൃശൂർ മെഡിക്കൽ കോളജ് ആശുപത്രിയിൽ എത്തിച്ചെങ്കിലും വൈകുന്നേരം മൂന്നരയോടെ മരിച്ചു. ബിലാൽ ചങ്ങരംകുളത്ത് കിരണ്‍ സ്റ്റുഡിയോയിൽ ജീവനക്കാരനാണ്. മോർച്ചറിയിൽ സൂക്ഷിച്ച മൃതദേഹം ഇന്ന് പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുനൽകും.

കണ്ടെയ്നർ ലോറിയും ഓട്ടോയും കൂട്ടിയിടിച്ച് യുവാവ് മരിച്ചു

താനൂർ: പരപ്പനങ്ങാടി റോഡിൽ താനൂർ സ്കൂൾപടിയിൽ കണ്ടെയ്നർ ലോറിയും ഓട്ടോയും കൂട്ടിയിടിച്ച് പരിക്കേറ്റ യുവാവ് മരിച്ചു. മറ്റൊരാൾക്ക് പരിക്കേറ്റു. ഓട്ടോയിൽ സഞ്ചരിച്ചിരുന്ന തിരൂർ ഏഴൂർ സ്വദേശി പറൂർപടി വിജേഷ് എന്ന കുട്ടുവാണ് (30) മരിച്ചത്. കൂടെയുണ്ടായിരുന്ന ഏഴൂർ സ്വദേശി സുബിനെ ഗുരുതര പരിക്കുകളോടെ ആദ്യം പരപ്പനങ്ങാടിയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും പിന്നീട് കോട്ടക്കലിലെ സ്വകാര്യ ആശുപത്രിയിലേക്ക് മാറ്റി. താനൂരിൽ നിന്ന് ഫയർഫോഴ്സ് എത്തിയാണ് ഓട്ടോയിൽ കുടുങ്ങിക്കിടന്ന രണ്ടുപേരെയും പുറത്തെടുത്തത്. ശനിയാഴ്ച രാത്രിയായിരുന്നു അപകടം. പിതാവ്: പരേതനായ പറൂർപടി ശ്രീകുമാർ, മാതാവ്: ബേബി. സഹോദരങ്ങൾ: വിനീഷ്, വിനീത.

സൈബർ സുരക്ഷാ ക്ലാസ് സംഘടിപ്പിച്ചു

എടപ്പറ്റ: എടപ്പറ്റ ഗ്രാമപഞ്ചായത്തും കാനറാ ബാങ്ക് എടപ്പറ്റയും സംയുക്തമായി സൈബർ സുരക്ഷാ ക്ലാസ് സംഘടിപ്പിച്ചു. ഗ്രാമപഞ്ചായത്ത് പ്രസിഡന്‍റ് കബീർ ഉദ്ഘാടനം ചെയ്തു. വൈസ്പ്രഡിഡന്‍റ് സഫിയ വലിയട്ടിൽ അധ്യക്ഷത വഹിച്ചു. ബാങ്ക് മാനേജർ സുതാര്യൻ, പഞ്ചായത്ത് മെന്പർ നാസർ, സജി. പി. തോമസ് എന്നിവർ പ്രസംഗിച്ചു. മലപ്പുറം സൈബർ സെൽ വിഭാഗം സിപിഒ വൈശാഖ് ക്ലാസ് നയിച്ചു.

സ്വർണാഭരണം വീണുകിട്ടി

എടക്കര: എടക്കര ഗ്രാമപഞ്ചായത്ത് ഹരിതകർമസേന ഫെബ്രുവരി, മാർച്ച് മാസങ്ങളിൽ വീടുകളിൽ നിന്ന് ശേഖരിച്ച അജൈവമാലിന്യങ്ങൾ വേർതിരിക്കുന്നതിനിടയിൽ ഒരു സ്വർണാഭരണം കണ്ടുകിട്ടിയിട്ടുണ്ട്. ഹരിത കർമ സേനാംഗങ്ങൾക്ക് ലഭിച്ച സ്വർണാഭരണം സേനാംഗങ്ങൾ പഞ്ചായത്ത് സെക്രട്ടറിയെ ഏൽപ്പിച്ചു. ഉടമസ്ഥർ തെളിവ് സഹിതം ഗ്രാമപഞ്ചായത്ത് ഓഫീസിൽ ബന്ധപ്പെടണമന്ന് പഞ്ചായത്ത് സെക്രട്ടറി അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]