ADVERTISEMENT

ADVERTISEMENT

പകൽവീട് ഉദ്ഘാടനം ചെയ്തു

നേമം: കല്ലിയൂർ പഞ്ചായത്തിൽ നവീകരിച്ച പകൽവീടിന്‍റെ ഉദ്ഘാടനം പ്രസിഡന്‍റ് എം. സോമശേഖരൻ നായർ നിർവഹിച്ചു. വൈസ് പ്രസിഡന്‍റ് എൽ. ശാന്തിമതി അധ്യക്ഷയായി.

ജില്ലാ പഞ്ചായത്ത്‌ അംഗം ഭഗത് റൂഫസ്, എൽ. മിനി, നേമം ബ്ലോക്ക്‌ പഞ്ചായത്ത്‌ അംഗങ്ങളായ കെ. വസുന്ധരൻ, ആർ. ജയലക്ഷ്മി, പഞ്ചായത്ത്‌ അംഗങ്ങളായ പി. രാജലക്ഷ്മി, എസ്.ജെ. ആതിര, കെ.കെ. ചന്തുകൃഷ്ണ, എസ്. സുമോദ്, സുധർമ, ഐസിഡിഎസ് സൂപ്പർവൈസർ അനീഷ ബാബു തുടങ്ങിയവർ സംസാരിച്ചു.

ADVERTISEMENT

ഉറിയാക്കോട്ടെ എസ് വളവ് ഇനിയും നിവർത്തിയില്ല

പൂവച്ചൽ: ഉറിയാക്കോട്ടെ എസ് വളവ് മാറ്റാനുള്ള നടപടികൾ നീളുന്നതായി പരാതി. കൊടും വളവുകളുള്ള റോഡിൽ അപകടങ്ങൾ പതിവാണ്. മൂന്നുമാസങ്ങൾക്കുമുൻപ് ഇവിടെ നിയന്ത്രണംവിട്ട കാർ സമീപത്തെ പറമ്പിലേക്കു മറിഞ്ഞെങ്കിലും ആളപായമുണ്ടായില്ല. എസ് വളവിനെക്കുറിച്ചുള്ള നാട്ടുകാരുടെ നിരന്തരമായ പരാതിയെത്തുടർന്നു നാലുവർഷം മുൻപ് സ്ഥലത്തെത്തിയ മന്ത്രി മുഹമ്മദ് റിയാസും മറ്റു ജനപ്രതിനിധികളും റോഡും പരിസരവും പരിശോധിച്ചശേഷം ഉടൻ പരിഹാരം കാണുമെന്നു നാട്ടുകാർക്ക് ഉറപ്പു നൽകിയെങ്കിലും നാളിതുവരെ വളവു നിവർന്നില്ല. വാഹനാപകടങ്ങൾ പതിവായതിനെത്തുടർന്നു നാട്ടുകാർ പ്രതിഷേധവുമായി വീണ്ടും രംഗത്തെത്തിയതിനെത്തുടർന്ന് ആഴ്ചകൾക്കുമുൻപ് റോഡ് നിവർത്താനാണെന്നുപറഞ്ഞ് സമീപത്തെ പറമ്പിൽ കല്ലുകൾ സ്ഥാപിച്ചെങ്കിലും തുടർനടപടികളൊന്നും ഉണ്ടായില്ല.വളവ് നിവർത്താനുള്ള നടപടികൾ വേഗത്തിലാക്കണമെന്നു നാട്ടുകാർ ആവശ്യപ്പെട്ടു. റോഡ് നിവർക്കുന്നതിനുവേണ്ടി വസ്തു ഏറ്റെടുക്കൽ, നഷ്ടപരിഹാരം നൽകൽ എന്നിവയെ സംബന്ധിച്ച് നാട്ടുകാർക്ക് അറിയിപ്പൊന്നും നൽകിയിട്ടില്ല. നാട്ടുകാരുടെ പങ്കാളിത്തത്തോടെ അടിയന്തരമായി വളവ് നിവർത്തണമെന്നും അല്ലാത്തപക്ഷം സമരപരിപാടികൾ സംഘടിപ്പിക്കുമെന്നും നാട്ടുകാർ പറയുന്നു. അപകടകെണിയുമായി ഉറിയാക്കോട് ജംഗ്ഷൻ നവീകരിക്കാൻ 2.5 കോടി വകയിരുത്തിയെന്നാണു പറയുന്നത്. എന്നാൽ നടപടികൾ ഒന്നും ആരംഭിച്ചിട്ടില്ല. കാട്ടാക്കട-വെള്ളനാട് റോഡിലെ ഉറിയാക്കോട് ജംഗ്ഷനിൽ റോഡ് തകർന്നത് അപകടകെണിയാണ്. നിരവധി വാഹനങ്ങളാണ് ദിവസവും ഇവിടെ അപകടത്തിൽപെടുന്നത്. മുളയറയിൽനിന്നും ഉറിയാക്കോട് വഴി വെള്ളനാട്ടേക്ക് വരുന്നതിനായി തിരിയുന്ന വാഹനങ്ങളും ഇവിടെ അപകടത്തിൽപെടുന്നുണ്ട്. ഇരുചക്രവാഹനങ്ങളാണ് അപകടത്തിൽപെടുന്നതിൽ അധികവും. കാട്ടാക്കട ഉൾപ്പടെയുള്ള പ്രദേശങ്ങളിൽനിന്ന് നെടുമങ്ങാട്ടേയ്ക്കും വെള്ളനാട്ടേയ്ക്കും പോകുന്ന തിരക്കേറിയ റോഡാണിത്. കൊടുംവളവായ ഇവിടെ ആറു മാസത്തിനിടെ മുപ്പതിലധികം ഇരുചക്രവാഹനങ്ങൾ അപകടത്തിൽപെട്ടിട്ടുണ്ടെന്നു സമീപത്തെ ഓട്ടോസ്റ്റാന്‍റിലെ ഡ്രൈവർമാർ പറഞ്ഞു. മുൻപ് മുളയറ ഉറിയാക്കോട് റോഡിന്‍റെ നവീകരണത്തിനായി ഇറക്കിയ മെറ്റലുകൾ ജംഗ്ഷനിൽ അപകടത്തിന് ഇടയാക്കിയിരുന്നു.

വിതുര ശിവൻകോവിൽ ജംഗ്ഷനിലെ പാലം പുനർനിർമിക്കണമെന്ന് ആവശ്യം

വിതുര: പൊന്മുടിപ്പാതയിലെ വിതുര ശിവന്‍കോവില്‍ ജംഗ്ഷനിലുള്ള പാലം പുനർനിർമിക്കണമെന്ന ആവശ്യം ശക്തമാകുന്നു. നൂറ്റാണ്ടിന്‍റെ പഴക്കമുള്ള പാലം അപകടാവസ്ഥയിലാണെന്നും കൃത്യമായി അറ്റകുറ്റപ്പണി ചെയ്യാത്താണ് പ്രധാന കാരണമെന്നും നാട്ടുകാർ പറയുന്നു. പൊന്മുടിയിലേക്കുള്ള സുഗമ യാത്രയ്ക്കായി ഒരു നൂറ്റാണ്ടിനുമുമ്പു ബ്രിട്ടീഷുകാരാണ് കോട്ടിയത്തറ-തള്ളച്ചിറ തോടിനു കുറുകെ പാലം നിർമിച്ചത്. വലിയ ഒറ്റക്കല്ലുകള്‍ കൊണ്ടു പണിഞ്ഞ പാലത്തിനു മുകളിലൂടെ റോഡു നിര്‍മിക്കുകയായിരുന്നു. അടിഭാഗത്തെ കൽക്കെട്ട് ഇടിഞ്ഞ് കല്ലുകള്‍ ഇളകി മാറിയതും കൈവരികൾ പൊളിഞ്ഞതുമാണു പ്രധാന പ്രശ്നങ്ങൾ. റോഡിലെ വളവും അപകടസാധ്യത കൂട്ടുന്നു. ഇടുങ്ങിയ പാലത്തിലൂടെ വാഹനങ്ങള്‍ പോകുന്നത് ഏറെ ബുദ്ധിമുട്ടിയാണ്. അവധി ദിവസങ്ങളില്‍ പൊന്മുടിയിലേക്കും പേപ്പാറയിലേക്കുമായി നൂറുകണക്കിനു വാഹനങ്ങളാണ് ഇതു വഴി പോകുന്നത്. ബോണക്കാട്, കല്ലാര്‍, ഐസർ, ജെഴ്സിഫാം എന്നിവിടങ്ങളിലേക്കും ആദിവാസി മേഖലകളായ പൊടിയക്കാല, മണലി, ആനപ്പാറ എന്നിവിടങ്ങളിലേക്കു പോകണമെങ്കിലും പാലത്തെ ആശ്രയിക്കണം. പഴകുറ്റി പൊന്മുടിപ്പാത നവീകരണത്തിന്‍റെ ഭാഗമായി പാലം പൊളിച്ചു പണിയുമെന്ന പ്രതീക്ഷയിലാണ് നാട്ടുകാർ.

ശുചീകരണമില്ല; ഇഴജന്തു ഭീഷണിയിൽ കറ്റച്ചക്കോണം സ്കൂൾ ഗ്രൗണ്ട്

പേരൂർക്കട: ശുചീകരണം ഇല്ലാതായതോടെ പാറോട്ടുകോണം കറ്റച്ചക്കോണം സ്കൂളിന്‍റെ വകയായയുള്ള കളിസ്ഥലം കാടുകയറിയ നിലയിൽ. ഏകദേശം 50 സെന്‍റ് വരുന്ന കളിസ്ഥലമാണ് കാടുകയറി കിടക്കുന്നത്. സമീപത്തെ സ്വകാര്യവ്യക്തിയുടെ ഭൂമിയായിരുന്നു പ്രസ്തുത കളിസ്ഥലം. പിന്നീട് സ്കൂളിനായി ഈ ഭൂമി വിട്ടുനൽകുകയായിരുന്നു. എന്നാൽ ഇവരുടെ പിൻതലമുറക്കാരുമായി നിലനിൽക്കുന്ന തർക്കമാണ് ശുചീകരണം നടക്കാത്തതിനുള്ള കാരണം. ഫുട്ബോൾ, ക്രിക്കറ്റ് തുടങ്ങിയ മത്സരങ്ങൾ നടത്താറുള്ള സ്കൂൾ ഗ്രൗണ്ടിൽ പല പ്രമുഖ ഇന്ത്യൻ ഫുട്ബോളർമാരും മാറ്റുരച്ചിട്ടുണ്ട്. ഗ്രൗണ്ടിന്‍റെ ചുറ്റുമതിൽ റോഡിന്‍റെ ഭാഗത്തു വന്നവസാനിക്കുകയാണ്. നാലുപാടും കാടുകയറി കിടക്കുന്നതിനാൽ റോഡിന്‍റെ ഭാഗത്തുനിന്ന് നോക്കിയാൽ ഗ്രൗണ്ട് പൂർണമായും തിരിച്ചറിയാൻ സാധിക്കില്ല. വൈകുന്നേരങ്ങളിൽ സ്കൂൾ കുട്ടികൾ ഈ ഗ്രൗണ്ടിലാണ് വിനോദങ്ങളിൽ ഏർപ്പെടുന്നത്. ചിലപ്പോൾ ഇതു രാത്രി 7 മണി വരെ നീളാറുണ്ട്. അതുകൊണ്ടുതന്നെ ഇഴജന്തുക്കളെ ഭയന്നു വേണം ഗ്രൗണ്ട് ഉപയോഗപ്പെടുത്താൻ. സ്കൂളിനായി ഫണ്ട് അനുവദിക്കപ്പെട്ടു വികസന പ്രവർത്തനങ്ങൾ നടക്കുമ്പോഴും വിനോദോപാധിയായ സ്കൂൾ ഗ്രൗണ്ട് അവഗണിക്കപ്പെടുന്നതായി നാട്ടുകാർ പറയുന്നു. ഗ്രൗണ്ടിന്‍റെ നാലുപാടുമുള്ള കാടുകൾ വെട്ടിത്തെളിച്ചാൽ മാത്രമേ കുട്ടികൾക്കു സുരക്ഷിതമായി വിനോദങ്ങളിൽ ഏർപ്പെടാൻ സാധിക്കൂ. നല്ലൊരു കായിക തലമുറയെ വാർത്തെടുക്കാൻ ഉപയുക്തമായ സ്കൂൾ ഗ്രൗണ്ട് അനാഥമായി കിടക്കുന്നതിൽ പ്രദേശവാസികൾക്ക് അമർഷമുണ്ട്.

ബൈക്ക് പെട്രോള്‍ ഒഴിച്ച് കത്തിച്ച യുവാവ് അറസ്റ്റില്‍

പേരൂര്‍ക്കട: വീടിന്‍റെ കോമ്പൗണ്ടില്‍ നിർത്തിയിട്ടിരുന്ന ബൈക്ക് പെട്രോള്‍ ഒഴിച്ചു കത്തിച്ചയാളെ പേരൂര്‍ക്കട പോലീസ് അറസ്റ്റുചെയ്തു. ഏണിക്കര സ്വദേശി അനില്‍കുമാര്‍ (42) ആണ് അറസ്റ്റിലായത്. ഞായറാഴ്ച രാത്രി 10.30നായിരുന്നു കേസിനാസ്പദമായ സംഭവം. കുടപ്പനക്കുന്ന് ദയാനഗര്‍ പണയില്‍ വീട്ടില്‍ അനീഷിന്‍റെ (40) ബൈക്കാണ് അഗ്നിക്കിരയായത്. അനീഷിന്‍റെ ബന്ധുവാണ് അനില്‍കുമാര്‍. വീട്ടുകാര്‍ തമ്മിലുണ്ടായിരുന്ന തര്‍ക്കവും വ്യക്തിവിരോധവുമാണു വാഹനം കത്തിക്കാന്‍ കാരണമായത്. സംഭവദിവസം ഒരുകുപ്പി പെട്രോളുമായി അനീഷിന്‍റെ വീട്ടിലെത്തിയ അനില്‍കുമാര്‍ ബൈക്കില്‍ ഒഴിച്ചു തീ കത്തിക്കുകയായിരുന്നു. ബൈക്ക് ഏറെക്കുറെ കത്തിപ്പോയി. പേരൂര്‍ക്കട എസ്ഐമാരായ പ്രസാദ്, സുനില്‍, എഎസ്ഐ പ്രസന്നന്‍, ഗ്രേഡ് എസ്‌സിപിഒമാരായ സിബി, മനോജ്, ഹോം ഗാര്‍ഡ് രാജു എന്നിവരാണ് പ്രതിയെ പിടികൂടിയത്. ഇയാളെ കോടതിയില്‍ ഹാജരാക്കി.

പോക്‌സോ കേസില്‍ മധ്യവയസ്‌കനും പീഡനക്കേസില്‍ യുവാവും അറസ്റ്റില്‍

പേരൂര്‍ക്കട: പോക്‌സോ കേസില്‍ മധ്യവയസ്‌കനെയും യുവതിയെ പീഡിപ്പിച്ച കേസില്‍ യുവാവിനെയും തമ്പാനൂര്‍ പോലീസ് അറസ്റ്റുചെയ്തു. പൂന്തുറ പുത്തന്‍കര സ്വദേശി അബ്ദുള്‍ ഷിബു (50), മുട്ടത്തറ മാണിക്യവിളാകം സ്വദേശി എം. അന്‍സാര്‍ (22) എന്നിവരാണ് അറസ്റ്റിലായത്. അബ്ദുള്‍ ഷിബു ഓട്ടോറിക്ഷാ ഡ്രൈവറാണ്. പാറശാല സ്വദേശിനിയായ പെണ്‍കുട്ടിയെ പീഡിപ്പിച്ചതിനാണ് ഇയാള്‍ പിടിയിലായത്. വിവാഹ ബ്രോക്കറാണെന്ന വ്യാജേന പെണ്‍കുട്ടിയുടെ അമ്മയുമായി സൗഹൃദത്തിലായ ഇയാള്‍ ഗള്‍ഫില്‍നിന്നു വിവാഹാലോചനയുണ്ടെന്നു പറഞ്ഞ് പെണ്‍കുട്ടിയുമായും അടുത്തു. കുട്ടിയെ ഇയാള്‍ തമ്പാനൂര്‍ എസ്എസ് കോവില്‍ റോഡിനടുത്തുള്ള ലോഡ്ജിലെത്തിച്ചാണ് പീഡിപ്പിച്ചതെന്നാണു പരാതിയില്‍ പറയുന്നത്. ആലപ്പുഴ സ്വദേശിനിയായ 22 വയസുകാരിയെ പീഡിപ്പിച്ചതിനാണ് അന്‍സാര്‍ പിടിയിലായത്. ആഴ്ചകള്‍ക്കു മുമ്പായിരുന്നു കേസിനാസ്പദമായ സംഭവം. ഇരുവരെയും കോടതിയില്‍ ഹാജരാക്കി റിമാന്‍ഡ് ചെയ്തു.

പ്രധാനമന്ത്രിയുടെ വരവുംകാത്ത് വിഴിഞ്ഞം തുറമുഖം

വിഴിഞ്ഞം: പ്രധാനമന്ത്രി നരേന്ദ്ര മോദിയുടെ വരവിനായി വിഴിഞ്ഞം അന്താരാഷ്ട്ര തുറമുഖം തയാറെടുത്തു. കേരളത്തിന്‍റെയും ഇന്ത്യയുടെയും വികസന സ്വപ്നമായ തുറമുഖത്തെ രാജ്യത്തിനു സമർപ്പിക്കുന്ന ധന്യമുഹൂർത്തത്തിന് ഇനി മൂന്നുനാൾ മാത്രം ബാക്കി നിൽക്കെ ഒരുക്കങ്ങൾ അവസാന ഘട്ടത്തിലേക്കു കടന്നു. ഇന്നലെ രാവിലെ മുതൽ തുറമുഖം എസ്പിജിയുടെ നിയന്ത്രണത്തിലായി . ഇനി മേയ് രണ്ടിനു പ്രധാനമന്ത്രി വന്നു മടങ്ങും വരെ കാര്യങ്ങൾ എസ്പിജി ഉദ്യോഗസ്ഥർ തീരുമാനിക്കും. കേരളത്തിന്‍റെ മുഖച്ഛായ തന്നെ മാറ്റിമറിക്കുന്ന പദ്ധതിയുടെ സമർപ്പണം ഒരുനാടിന്‍റെ ആഘോഷമായി മാറ്റാനാണ് അധികൃതരുടെ തീരുമാനം. ഉദ്ഘാടനത്തിനു സാക്ഷികളാകാൻ നാടിന്‍റെ നാനാ ദിക്കിൽ നിന്നെത്തുന്ന ആയിരങ്ങളെ വരവേൽക്കാനുള്ള വേദി നിർമാണം തുടങ്ങിക്കഴിഞ്ഞു. തുറമുഖ കവാടത്തിനു വലതു ഭാഗത്തായി പതിനായിരം പേരെ പ്രതീക്ഷിച്ചാണ് പടുകൂറ്റൻ വേദിയൊരുക്കുന്നത്. ആകാശമാർഗമെത്തുന്ന പ്രധാനമന്ത്രിയെ വരവേൽക്കാൻ തുറമുഖ ഓഫീസിനും, വേദിക്കും കവാടത്തിനും സമീപവുമായി മൂന്ന് ഹെലിപാടുകളും ഒരുങ്ങുന്നുണ്ട്. പ്രത്യേക സഹാചര്യം കണക്കിലെടുത്ത് തിരുവനന്തപുരവും വിഴിഞ്ഞവും ഇന്നുമുതൽ കനത്ത സുരക്ഷയിലാണ്. ഐജിഎസ്‌വിമാർ ഉൾപ്പെടെ പോലീസിന്‍റെയും, മിലിറ്ററിയുടെയും, എസ്പിജി യുടെയും ഉന്നത ഉദ്യോഗസ്ഥർ, ചീഫ് സെക്രട്ടറി, ജില്ലാ കളക്ടർ, ഫയർ ഫോഴ്സ്, കെഎസ്ഇബി ഉൾപ്പെടെ വിവിധ വകുപ്പുകളുടെ ഉന്നതർ എന്നിവരുമായുള്ള അവലോകന യോഗം ഇന്നലെ രാവിലെ തുറമുഖ ഓഫീസിൽ നടന്നു. വേദിയിലെയും കപ്പലുകൾ അടുക്കുന്ന വാർഫ്,പുലിമുട്ട് എന്നിവിടങ്ങളിലെയും സുരക്ഷ അധികൃതർ വിലയിരുത്തി. കരയിലെ സുരക്ഷക്കൊപ്പം കടലിലും സേനകളുടെ വൻ പടയുണ്ടാകും. കോസ്റ്റ് ഗാർഡിന്‍റെ സി. 441, സി.427, അതിവേഗ കപ്പൽ അനഘ്, നേവിയുടെ കപ്പലുകൾ, തീരദേശ പോലീസിന്‍റെയും, മറൈൻ എൻഫോഴ്സ്മെന്‍റിന്‍റെയും പട്രോൾ ബോട്ടുകളും കടലിൽ നിലയുറപ്പിച്ചു നിരീക്ഷണം ആരംഭിച്ചു. കൂടാതെ തുറമുഖ കമ്പനിയുടെ പ്രത്യേക പരിശീലനം നേടിയ പത്ത് റാപ്പിഡ് ആക്ഷൻ അംഗങ്ങളെയും സുരക്ഷക്കായി നിയോഗിക്കും. പരിപാടിയിൽ പങ്കെടുക്കാനെത്തുന്നവരെ കർശനമായി നിരീക്കാനുള്ള സംവിധാനവും ഉണ്ടാകും. ഉന്നതരുടെ നിർദേശങ്ങൾക്കും നിയന്ത്രണങ്ങൾക്കും നടുവിലാകും വിഴിഞ്ഞം തുറമുഖത്തിന്‍റെ ഇനിയുള്ള ദിവസങ്ങൾ. എസ്. രാജേന്ദ്രകുമാർ

കഴക്കൂട്ടം സൈനിക സ്കൂളിൽ 1983 ബാച്ചിലെ പൂർവവിദ്യാർഥികൾ സന്ദർശനം നടത്തി

തിരുവനന്തപുരം: 1983 ബാച്ചിലെ ഓൾഡ് ബോയ്സ് അസോസിയേഷൻ പൂർവ വിദ്യാർഥികൾ അവരുടെ മാതൃസ്ഥാപനമായ കഴക്കൂട്ടം സൈനിക് സ്കൂളിൽ സന്ദർശനം നടത്തി. സ്കൂളിന്‍റെ പാരന്പര്യത്തെ ആദരിച്ചും വീരമൃത്യു വരിച്ചവരെ അഭിവാദ്യം ചെയ് തും സ്മൃതിസ്തൂപത്തിൽ പുഷ്പാർച്ചന നടത്തിയുമാണ് ദിനാചരണ നടപടികൾ ആരംഭിച്ചത്. തുടർന്ന് ക്ലാസ് മുറികളിലൂടെയും ലബോറട്ടറികളിലൂടെയും അവരുടെ രൂപീകരണ വർഷങ്ങളുടെ പ്രിയപ്പെട്ട ഓർമകൾ ഉണർത്തുന്ന സന്ദർശനമായി. ദക്ഷിണ വ്യോമസേനാ മേധാവിയും കഴക്കൂട്ടം സൈനിക സ് കൂളിലെ പൂർവ വിദ്യാർഥിയുമായ എയർ മാർഷൽ ബാലകൃഷ്ണൻ മണികണ്ഠൻ, സ്കൂൾ കാന്പസിന്‍റെ ഗംഭീരമായ പെയിന്‍റിംഗ് അനാച്ഛാദനം ചെയ്തത് ചടങ്ങിൽ ശ്രദ്ധേയമായി. എയർ മാർഷലിന്‍റെ പ്രിയപ്പെട്ട സ്ഥാപനത്തിന് ആദരവ് അർപ്പിക്കുന്ന ഈ കലാസൃഷ്ടി പൂർവ വിദ്യാർഥിയും സ്കൂളും തമ്മിൽ നിലനിൽക്കുന്ന ബന്ധത്തിന്‍റെ കാലാതീതമായ ഓർമപ്പെടുത്തലായി നിലകൊള്ളും. 2023 മേയ് മുതൽ ലോക്കൽ ബോർഡ് ഓഫ് അഡ്മിനിസ്ട്രേഷന്‍റെ ചെയർമാനായി സേവനമനുഷ്ഠിക്കുന്ന എയർ മാർഷൽ ബാലകൃഷ്ണൻ മണികണ്ഠന്‍റെ ദീർഘവീക്ഷണമുള്ള നേതൃത്വത്തിൽ, സ് കൂൾ വിവിധ മേഖലകളിൽ ശ്രദ്ധേയമായ പരിവർത്തനത്തിന് സാക്ഷ്യം വഹിച്ചു.

ലഹരിവിരുദ്ധ ബോധവത്കരണവും സന്ദേശയാത്രയും സംഘടിപ്പിച്ചു

നെടുമങ്ങാട്: പുതുക്കുളങ്ങര ചാരുംമൂട് തേപ്പിൽമേലെ റസിഡൻസ് അസോസിയേഷന്‍റെ ആഭിമുഖ്യത്തിൽ ലഹരിവിരുദ്ധ ബോധവത്കരണവും ലഹരിവിരുദ്ധ സന്ദേശയാത്രയും സംഘടിപ്പിച്ചു. ആര്യനാട് സർക്കിൾ ഇൻസ് പെക്ടർ വി.എസ്. അജീഷ് ഉദ് ഘാടനം ചെയ്തു. അസോസിയേഷൻ പ്രസിഡന്‍റ് സുനിൽകുമാർ അധ്യക്ഷനായി. പഞ്ചായത്തംഗം ഒസൻകുഞ്ഞ്, അസോസിയേഷൻ സെക്രട്ടറി എം.ഷാഫി, എഡ്യൂപോയിന്‍റ് സ്കിൽ ഡെവലപ്മെന്‍റ് അക്കാഡമി പ്രിൻസിപ്പൽ പൂവച്ചൽ ഫിറോസ്ഖാൻ ബാഖവി, ആര്യനാട് എക്സൈസ് ഇൻസ്പെക്ടർ എസ്. കുമാർ, അസിസ്റ്റന്‍റ് എക്സൈസ് ഇൻസ്പെക്ടർ വി. ഗിരീഷ്, ഡോ. അബ്ദുൽസലാം, എസ്. സബീർ തുടങ്ങിയവർ സംസാരിച്ചു. മികച്ച സേവനത്തിന് ഡിജിപിയുടെ ബാഡ്ജ് ഓഫ് ഓണർ അവാർഡ് കരസ്ഥമാക്കിയ തിരുവനന്തപുരം അഗ്നിശമന രക്ഷാനിലയത്തിലെ സീനിയർ ഫയർ ആൻഡ് റെസ്ക്യൂ ഓഫീസർ എം.ഷാഫിയെ ചടങ്ങിൽ ആദരിച്ചു. ചാരുംമൂട്ടിൽ ലഹരിവിരുദ്ധ സന്ദേശയാത്ര സംഘടിപ്പിച്ചു.

റോഡുവശത്ത് കഞ്ചാവ് ചെടി കണ്ടെത്തി

പേരൂര്‍ക്കട: തിരുവനന്തപുരം എക്‌സൈസ് റേഞ്ച് ഇന്‍സ്‌പെക്ടര്‍ എസ്. ഹരികൃഷ്ണന്‍റെ നേതൃത്വത്തിലുള്ള സംഘം നടത്തിയ പരിശോധനയില്‍ റോഡുവശത്ത് കഞ്ചാവ് ചെടി കണ്ടെത്തി. മണ്ണന്തല സ്റ്റേഷന്‍ പരിധിയില്‍ പരുത്തിപ്പാറ പാണന്‍വിള ഭാഗത്തെ ബിഎസ്എന്‍എല്‍ ഓഫീസിനു മുന്‍വശത്തെ റോഡരികിൽനിന്നാണ് കഞ്ചാവ് ചെടി കണ്ടെത്തിയത്. രഹസ്യവിവരത്തെ തുടര്‍ന്നാണ് റേഞ്ച് ഇന്‍സ്‌പെക്ടര്‍ ഉള്‍പ്പെട്ട സംഘം ഇവിടെ പരിശോധന നടത്തിയത്. റോഡുവശത്ത് കാട്ടുചെടികള്‍ പടര്‍ന്നു കിടക്കുന്ന ഭാഗത്താണ് 90 സെന്‍റി മീറ്റർ വലുപ്പം വരുന്ന കഞ്ചാവ് ചെടി കണ്ടെത്തിയത്. തുടര്‍പരിശോധനയ്ക്കായി ചെടി ശേഖരിച്ചിട്ടുണ്ട്. ആരാണ് ഈ ഭാഗത്ത് കഞ്ചാവ് ചെടി നട്ടുവളര്‍ത്തിയതെന്നു വ്യക്തമായിട്ടില്ല. എക്‌സൈസ് സംഘം ഇതുസംബന്ധിച്ച് അന്വേഷണം തുടരുന്നുണ്ട്.

പോഷൺ അഭിയാൻ: പോഷകാഹാര എക്സിബിഷൻ

നെയ്യാറ്റിൻകര: പോഷൻ അഭിയാന്‍റെ ഭാഗമായി പോഷന്‍ പക്വാഡ- 2025 നോടനുബന്ധിച്ച് പെരുമ്പഴുതൂർ സെക്ടറിലെ 22 അങ്കണവാടികളും ചേർന്നു പോഷക ആഹാര എക്സിബിഷൻ സംഘടിപ്പിച്ചു. തൊഴുക്കൽ അങ്കണവാടിയിൽ നടത്തിയ എക്സിബിഷൻ നെയ്യാറ്റിൻകര നഗരസഭ ആരോഗ്യ സ്റ്റാൻഡിംഗ് കമ്മറ്റി ചെയർമാൻ ജെ. ജോസ് ഫ്രാങ്ക്ളിൻ ഉദ്ഘാടനം ചെയ്തു. ഐസിഡിഎസ് സൂപ്പർവൈസർ ഷിനി, ഹെൽത്ത് സ്റ്റാഫുകൾ, അങ്കണവാടി അധ്യാപകർ, രക്ഷിതാക്കൾ, കുട്ടികൾ എന്നിവർ പരിപാടിയിൽ പങ്കെടുത്തു.

സ്വതന്ത്ര കർഷകസംഘം സുവർണ ജൂബിലി ആഘോഷം

നെടുമങ്ങാട്: പാലക്കാട് മേയ് 16 മുതൽ നടക്കുന്ന സ്വതന്ത്ര കർഷക സംഘത്തിന്‍റെ സുവർണ ജൂബിലി സമ്മേളനം വിജയിപ്പിക്കുന്നതിന്‍റെ ഭാഗമായി നെടുമങ്ങാട് നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച പ്രവർത്തക യോഗത്തിന്‍റെ ഉദ്ഘാടനവും നിയോജക മണ്ഡലതല പ്രചാരണ സമിതിയുടെ പോസ്റ്റർ പ്രകാശനവും മുസ്‌ലിം ലീഗ് ജില്ലാ സെക്രട്ടറി കന്യാകുളങ്ങര ഷാജഹാൻ നിർവഹിച്ചു. സ്വതന്ത്ര കർഷകസംഘം നിയോജക മണ്ഡലം പ്രസിഡന്‍റ് വെമ്പായം സലാം അധ്യക്ഷത വഹിച്ചു. മുസ്‌ലിം ലീഗ്, കർഷകസംഘം ഭാരവാഹികളായ നെടുമങ്ങാട് എം. നസീർ, മുഹമ്മദ് ബഷീർ, പുലിപ്പാറ യൂസഫ്, കരകുളം സന്തോഷ്, അബ്ദുൽ ഹക്കീം, സൈഫുദ്ദീൻ, സലീം, വെമ്പായം സുബൈർ, വെമ്പായം ഷെരീഫ്, ഷിബിൻ, പോത്തൻകോട് റാഫി തുടങ്ങിയവർ സംസാരിച്ചു.

ജെ.സി. ഡാനിയേല്‍ സ്മൃതിദിനവും ആദരവും

പാറശാല: മലയാള സിനിമയുടെ പിതാവ് ജെ.സി. ഡാനിയേലിന്‍റെ 50-ാമത് ഓര്‍മദിനം ജെ. സി. ഡാനിയേല്‍ ഫൗണ്ടേഷന്‍ ട്രസ്റ്റിന്‍റെ ആഭിമുഖ്യത്തില്‍ നെയ്യാറ്റിന്‍കര നഗരസഭാ സ്റ്റേഡിയത്തിലെ ജെ. സി. ഡാനിയേലിന്‍റെ സ്മൃതി മണ്ഡപത്തിന് മുന്നില്‍ സംഘടിപ്പിച്ചു. സി.കെ. ഹരീന്ദ്രന്‍ എംഎല്‍എ ഉദ്ഘാടനം നിര്‍വഹിച്ചു. കേരളത്തില്‍ ആദ്യമായി ജെ.സി. ഡാനിയേലിന്‍റെ പ്രതിമ ജന്മനാട്ടില്‍ സ്ഥാപിച്ച നഗരസഭ ചെയര്‍മാന്‍ പി.കെ. രാജമോഹനനെ ജെ.സി. ഡാനിയേലിന്‍റെ മകന്‍ ഹാരിസ് ഡാനിയേല്‍ ഉപഹാരം നല്‍കി ആദരിച്ചു. ഫൗണ്ടേഷന്‍ ചെയര്‍പേഴ്‌സണ്‍ സോന എസ്. നായര്‍ പ്രശസ്തിപത്രവും സെക്രട്ടറി സാബുകൃഷ്ണ മെഡലും സമര്‍പ്പിച്ചു. അഡ്വ. ബി. ജയചന്ദ്രന്‍ നായര്‍ അധ്യക്ഷനായിരിന്നു. കേരള ഗാന്ധി സ്മാരക നിധി ജോയിന്‍റ് സെക്രട്ടറി വി. കെ മോഹന്‍, വിനോദ് വൈശാഖി, കെ.ആര്‍. അജയന്‍, സജിലാല്‍ നായര്‍, സുരേഷ് തമ്പി, സുശീല ഡാനിയേല്‍, ജെ. രാഗീഷ്, ഗോപന്‍ ശാസ്തമംഗലം, റഹിം പനവൂര്‍, ഡോ. അനീഷ് കുറുപ്പ്, ഗോപകുമാര്‍, ജോണ്‍ സെല്‍വനാഥന്‍, മുരളി കോട്ടയ്ക്കകം എന്നിവര്‍ സംസാരിച്ചു.

വിദ്യാഭ്യാസ സ്ഥാപനങ്ങളുടെ വികസനത്തില്‍ മുന്നേറ്റം: വി.കെ. പ്രശാന്ത് എംഎല്‍എ

പേരൂര്‍ക്കട: വിദ്യാഭ്യാസ സ്ഥാപനങ്ങളുടെ അടിസ്ഥാന സൗകര്യ വികസനത്തില്‍ വന്‍ മുന്നേറ്റം സൃഷ്ടിക്കാന്‍ കഴിഞ്ഞതായി വി.കെ. പ്രശാന്ത് എംഎല്‍എ. റീജണല്‍ ഇന്‍സ്റ്റിറ്റ്യൂട്ട് ഓഫ് ലാംഗ്വേജ് ട്രെയിനിംഗിലെ പുതിയ മന്ദിരത്തിന്‍റെ തറക്കല്ലിടല്‍ വട്ടിയൂര്‍ക്കാവ് മണ്ഡലത്തിലെ കുന്നുകുഴി വാര്‍ഡില്‍ പിഎംജിയില്‍ നിര്‍വഹിക്കുകയായിരുന്നു അദ്ദേഹം. പുതിയ ഹൈടെക് മന്ദിരങ്ങള്‍, കമ്പ്യൂട്ടര്‍ ലാബുകള്‍, ജലഗുണനിലവാര പരിശോധന ലാബുകള്‍, സ്മാര്‍ട്ട് ക്ലാസ് റൂമുകള്‍, സ്‌കൂള്‍ ബസുകള്‍, ശുചിമുറികള്‍, പാചകപ്പുരകള്‍ തുടങ്ങി നിരവധി സൗകര്യങ്ങളാണ് സര്‍ക്കാരിന്‍റെ വിവിധ ഫണ്ടുകള്‍ ഉപയോഗിച്ച് തയാറാക്കിയിട്ടുള്ളതെന്നും അദ്ദേഹം കൂട്ടിച്ചേര്‍ത്തു. പുതിയ മന്ദിരം നിര്‍മിക്കുന്നതിനായി രണ്ടു കോടി രൂപയുടെ ഭരണാനുമതിയാണ് ലഭിച്ചത്. 2660 സ്‌ക്വയര്‍ ഫീറ്റ് വിസ്തീര്‍ണമുള്ള കെട്ടിടത്തില്‍ ക്ലാസ്മുറി, ടോയ്ലറ്റ് ബ്ലോക്ക്, വരാന്ത, സ്റ്റെയര്‍കേസ് റൂം എന്നിവ നിര്‍മിക്കും. ചടങ്ങില്‍ നഗരസഭ സ്റ്റാന്റിംഗ് കമ്മിറ്റി ചെയര്‍മാന്‍ മേടയില്‍ വിക്രമന്‍, റീജണല്‍ ഇന്‍സ്റ്റിറ്റ്യൂട്ട് ഓഫ് ലാംഗ്വേജ് ട്രെയിനിംഗ് പിടിഎ പ്രസിഡന്‍റ് സി.ആര്‍. രവീന്ദ്ര രാജന്‍, കുന്നുകുഴി വാര്‍ഡ് കൗണ്‍സിലര്‍ എ. മേരിപുഷ്പം, പൊതുമരാമത്ത് കെട്ടിടവിഭാഗം എഇഇ എസ്. സനല്‍ കുമാര്‍ എന്നിവര്‍ പങ്കെടുത്തു.

അന്പൂരി എച്ച്്എസ് വിദ്യാര്‍ഥികളുടെ കൂട്ടായ്മ ഇന്ന്

വെള്ളറട: അമ്പൂരി സെന്‍റ് തോമസ് ഹൈസ്‌കൂളിലെ 1975 ബാച്ച് പത്താം ക്ലാസ് വിദ്യാര്‍ഥികളുടെ കൂട്ടായ്മ ഇന്നു നടക്കും. മായം അഗസ്ത്യ വെബ് റിസോര്‍ട്ടില്‍ കൂടുന്ന യോഗത്തില്‍ ഗോള്‍ഡന്‍ ജൂബിലി വര്‍ഷം എന്ന പ്രത്യേകതയുണ്ട്. ഈ വിദ്യാര്‍ഥി കൂട്ടായ്മയില്‍ സഹകരിക്കാന്‍ താല്പര്യമുള്ള എല്ലാവരും പങ്കെടുക്കണമെന്ന് വിദ്യാര്‍ഥി കൂട്ടായ്മ അറിയിച്ചു.

ഉണ്ടൻകോട് പള്ളിയിൽ തിരുനാൾ കൊടിയേറി

നിലമാമൂട്: ഉണ്ടൻകോട് സെന്‍റ് ജോസഫ്സ് ഫൊറോന ഇടവക പള്ളിയിൽ 111-ാമത് ഇടവക തിരുനാളിനു വികാരി ഫാ. ജോസഫ് അനിൽ കൊടിയേറ്റി. പ്രാരംഭ തിരുനാൾ ദിവ്യബലിക്ക് നെയ്യാറ്റിൻകര രൂപത വികാരി ജനറാൾ മോൺ. വിൻസന്‍റ് കെ. പീറ്റർ, നെടുമങ്ങാട് റീജണൽ കോ-ഓർഡിനേറ്റർ മോൺ. റൂഫസ് പയസ്‌ലീൻ എന്നിവർ മുഖ്യകാർമികത്വം ഹിച്ചു. ഫാ. സുജിൻ വചനസന്ദേശം നൽകി. ഇന്നു വൈകുന്നേരം 4.30ന് ബൈബിൾ പാരായണം, ജപമാല, ലിറ്റിനി, 6.30ന് ഫാ. രാജദാസിന്‍റെ മുഖ്യകാർമികത്വത്തിൽ ദിവ്യബലി എന്നിവയുണ്ടാകും. നാളെ വൈകുന്നേരം 6.30നു ഫാ. ക്രിസ്തുദാസ് തോംസന്‍റെ മുഖ്യകാർമികത്വത്തിൽ ദിവ്യബലി. ഫാ. അരുൺകുമാർ വചനസന്ദേശം നൽകും. എട്ടിനു ദിവ്യകാരുണ്യ പ്രദക്ഷിണം. വ്യാഴാഴ്ച വൈകുന്നേരം 6.30ന് ഫാ. ജയരാജിന്‍റെ മുഖ്യകാർമികത്വത്തിൽ തിരുനാൾ സമാപന ദിവ്യബലി. ഫാ. റോബർട്ട് വിൻസന്‍റ് വചനസന്ദേശം നൽകും.രാത്രി എട്ടിനു ടെലി സീരിയൽ പ്രദ ർശനവും ഉണ്ടായിരിക്കും.

അല്മായ ദിനാഘോഷ സമ്മേളനവും ഫ്രാൻസിസ് മാർപാപ്പ അനുസ്മരണവും

തിരുവനന്തപുരം: മലങ്കര കാത്തലിക് അസോസിയേഷൻ എംസിഎ സഭാതല സമിതിയുടെ ആഭിമുഖ്യത്തിൽ എംസിഎ പാറശാല രൂപതാ സമിതിയുടെ ആതിഥേയത്വത്തിൽ അല്മായ ദിനാഘോഷസമ്മേളനവും ഫ്രാൻസിസ് മാർപാപ്പ അനുസ്മരണവും മേയ് നാലിനു ഉച്ചയ്ക്കു രണ്ടിനു പാറശാല സെന്‍റ് മേരീസ് കോട്ടവിള കത്തീഡ്രൽ ദേവാലയത്തിൽ നടത്തും. മാവേലിക്കര രൂപത അധ്യക്ഷനും എംസിഎയുടെ സഭാതല ചെയർമാനുമായ ഡോ. ജോഷ്വ ഇഗ്നാത്തിയോസ് ഉദ്ഘാടനം ചെയ്യും. പാറശാല രൂപതാ മെത്രാൻ ഡോ. തോമസ് മാർ യൗസേബിയോസ് മുഖ്യപ്രഭാഷണം നടത്തും. മലങ്കര കാത്തലിക് അസോസിയേഷൻ എസ്.ആർ. ബൈജു അധ്യക്ഷത വഹിക്കും. സഭാതല, രൂപതാതല, ജില്ലാതല, യൂണിറ്റുതല ഭാരവാഹികളും എംസിയുടെ അംഗങ്ങളും പങ്കെടുക്കും. സമ്മേളനത്തിന്‍റെ ഒരുക്കങ്ങൾ പൂർത്തിയായതായി സ്പിരിച്വൽ ഡയറക്ടർ ഫാ. തോമസ് പൊറ്റപുരയിടം, എംസിഎയുടെ പാറശാല രൂപത പ്രസിഡന്‍റ് സബീഷ് പീറ്റർ, തിരുവല്ലം ജനറൽ സെക്രട്ടറി അനീഷ് വടകര, വൈസ് പ്രസിഡന്‍റ് ജോൺ ഷൈജു, പാറശാല ട്രഷറർ സുമനലാൽ, വൈദിക ജില്ലാ പ്രസിഡന്‍റ് ഷൈൻ കുടയാൽ, മുൻ സഭാതല സെക്രട്ടറിയും കെസിഎഫ് വൈസ് പ്രസിഡന്‍റുമായ ധർമരാജ് പിൻങ്കുളം തുടങ്ങിയവർ അറിയിച്ചു.

വിഴിഞ്ഞം തുറമുഖം: വിജിഎഫ് ഫണ്ട് ഗ്രാന്‍റായി നൽകാത്തത് അത്ഭുതപ്പെടുത്തുന്നെന്ന് തരൂർ

വിഴിഞ്ഞം: വിഴിഞ്ഞം തുറമുഖത്തിനുള്ള വി.ജി.എഫ് ഫണ്ട് ഗ്രാന്‍റായി നൽകുന്നതിനു പകരം വായ്പയായി നൽകിയ കേന്ദ്ര സർക്കാറിന്‍റെ തീരുമാനം അത്ഭുതപ്പെടുത്തുന്നതാണെന്ന് ഡോ. ശശി തരൂർ എംപി. അടുത്ത മാസം രണ്ടിനു പ്രധാനമന്ത്രി തുറമുഖം രാജ്യത്തിനു സമർപ്പിക്കുന്നതിനു മുന്നോടിയായി വിഴിഞ്ഞം തുറമുഖത്ത് സന്ദർശനം നടത്തിയ ശേഷം മാധ്യമപ്രവർത്തകരോട് സംസാരിക്കുകയായിരുന്നു ഡോ. തരൂർ. പല പ്രതിസന്ധികളെയും തരണം ചെയ്തു പദ്ധതി യാഥാർഥ്യമായതിൽ അതിയായ സന്തോഷമുണ്ട്. വികസന കാര്യത്തിൽ കക്ഷി രാഷ്ട്രീയ വേർതിരിവുകൾ പാടില്ലെന്നതാണു തന്‍റെ നിലപാട്. തുറമുഖ നിർമാണവുമായി ബന്ധപ്പെട്ടുള്ള നഷ്ടപരിഹാര പാക്കേജ് വിതരണത്തിലുള്ള പോരായ്മയിൽ തനിക്ക് അതൃപ്തിയുണ്ട്. തൊഴിൽ നഷ്ടപ്പെട്ടവരെ ചേർത്തു നിറുത്തേണ്ടതും മതിയായ നഷ്ടപരിഹാരം നൽകേണ്ടതും സർക്കാരിന്‍റെ കടമയാണ്. മുൻ മുഖ്യമന്ത്രി ഉമ്മൻ ചാണ്ടിയുടെ നിശ്ചയദാർഢ്യം കൊണ്ടാണ് തുറമുഖ നിർമാണത്തിനു തുടക്കം കുറിക്കാനായതെന്നും നിലവിലെ സർക്കാരു തുറമുഖം യാഥാർഥ്യമാക്കുന്നതിൽ വലിയ പങ്കുവഹിച്ചതായും ശശി തരൂർ പറഞ്ഞു. അദാനി പോർട്ട് സിഇഒ പ്രദീപ് ജയരാമൻ, കോർപ്പറേറ്റ് അഫയേഴ്സ് മേധാവി അനിൽ ബാലകൃഷ്ണൻ എന്നിവരും തരൂരിനൊപ്പമുണ്ടായിരുന്നു.

സാഫല്യം ഭവനസമുച്ചയം നിർമാണോദ്ഘാടനം

വലിയതുറ: തിരുവനന്തപുരം നഗരസഭ വള്ളക്കടവ് വാർഡിൽ നിർമിക്കുന്ന "സാഫല്യം' ഭവന സമുച്ചയത്തിന്‍റെ നിർമാണോദ്ഘാടനം മന്ത്രി വി. ശിവൻകുട്ടി നിർവഹിച്ചു. സാഫല്യം പോലുള്ള പദ്ധതികൾ നമ്മുടെ വികസന മാതൃകയുടെ മാനുഷിക മുഖത്തെ പ്രതിഫലിപ്പിക്കുന്നതാണ്. സ്ഥിരമായ ഭവനം നൽകുന്നതിലൂടെ കുട്ടികൾക്കു സ്വപ്നം കാണാൻ കഴിയുന്ന, കുടുംബങ്ങൾക്കു സുരക്ഷിതത്വത്തോടെ ജീവിക്കാൻ കഴിയുന്ന, സമൂഹങ്ങൾക്ക് ഒരുമിച്ച് അഭിവൃദ്ധി പ്രാപിക്കാൻ കഴിയുന്ന ഒരു മികച്ച ഭാവിക്ക് അടിത്തറയിടുകയാണ് സർക്കാർ ചെയ്യുന്നതെന്നു മന്ത്രി വി. ശിവൻകുട്ടി കൂട്ടിച്ചേർത്തു. നഗരസഭയിലെ നൂറു വാർഡുകളിലും വളരെ വേഗത്തിലുള്ള വികസന പ്രവർത്തനങ്ങളാണ് നടക്കുന്നത്. ജനങ്ങളുടെ ആവശ്യങ്ങളും അഭിലാഷങ്ങളുമനുസരിച്ചാണ് വികസനം സാധ്യമാക്കുന്നത്. സാഫല്യം ഭവന സമുച്ചയം പൂർത്തിയാകുന്നത്തോടെ ഭൂരഹിത, ഭവനരഹിതരായ 96 കുടുംബങ്ങളുടെ വീട് എന്ന സ്വപ്നമാണ് യാഥാർഥ്യമാകുന്നത്. 12 ബ്ലോക്കുകളായി എട്ടു യൂണിറ്റുകളാണ് നിർമിക്കുന്നത്. ഊരാളുങ്കൽ ലേബർ കോൺട്രാക്ടേഴ്സ് കോ-ഓപ്പറേറ്റീവ് സൊസൈറ്റിക്കാണ് നിർമാണ ചുമതല. വള്ളക്കടവ് വാർഡിന്‍റെയും നാടിന്‍റെയും ചിരകാല സ്വപ്നമാണ് സാഫല്യം ഭവന സമുച്ചയത്തിലൂടെ പൂവണിയുന്നതെന്ന് ആന്‍റണി രാജു എംഎൽഎ പറഞ്ഞു. വള്ളക്കടവ് വാർഡിലുള്ള എല്ലാ പിഡബ്ല്യുഡി റോഡുകളും രാജ്യാന്തര നിലവാരത്തിലേക്കു മാറ്റുന്ന വിധത്തിലുള്ള നിർമാണം പുരോഗമിക്കുകയാണ്. ഇഞ്ചക്കൽ -വള്ളക്കടവ്, സുലൈമാൻ റോഡുകളുടെ ആദ്യഘട്ട നിർമാണം പൂർത്തിയായി. അവസാനഘട്ട നിർമാണ പ്രവർത്തനങ്ങൾ പുരോഗമിക്കുകയാണെന്നും എംഎൽഎ പറഞ്ഞു. വള്ളക്കടവ് പാലത്തിന്‍റെ നിർമാണം അടുത്താഴ്ച ആരംഭിക്കും. 18 മാസംകൊണ്ടു പണി പൂർത്തിയാക്കും. വികസന കാര്യത്തിൽ തിരുവനന്തപുരം ബഹുദൂരം മുന്നിലാണെന്നും ആന്‍റണി രാജു വ്യക്തമാക്കി. വള്ളക്കടവ് പ്രിയദർശിനി നഗർ ഗ്രൗണ്ടിൽ നടന്ന ചടങ്ങിൽ മേയർ ആര്യാ രാജേന്ദ്രൻ അധ്യക്ഷത വഹിച്ചു. ഡെപ്യൂട്ടി മേയർ പി.കെ. രാജു, നഗരസഭ വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഷാജിത നാസർ എന്നിവർ പങ്കെടുത്തു.

വര്‍ഷങ്ങള്‍ക്കുശേഷം തിലക് നഗര്‍ റോഡ് യാഥാര്‍ഥ്യമായി

പേരൂര്‍ക്കട: പാറോട്ടുകോണം തിലക് നഗര്‍ റോഡ് ഒടുവില്‍ റീ ടാര്‍ ചെയ്തു. നാലുവര്‍ഷമായി തകര്‍ച്ചയിലായിരുന്നു റോഡ്. ഒന്നരകിലോമീറ്ററോളം വരുന്ന റോഡ് പാറോട്ടുകോണം ജംഗ്ഷനില്‍നിന്ന് ഉള്ളൂര്‍ കൃഷിഓഫീസിനു സമീപത്തേക്ക് പ്രധാനറോഡിലേക്കാണ് വന്നുചേരുന്നത്. പൂര്‍ണമായും തകര്‍ന്നുകിടന്ന റോഡ് ആകര്‍ഷകമായിട്ടാണ് ടാറിംഗ് പൂര്‍ത്തീകരിച്ചിരിക്കുന്നത്. ആവശ്യമായ ഹമ്പുകള്‍ സ്ഥാപിക്കുകയും അവ തിരിച്ചറിയുന്നതിനുവേണ്ടി അടയാളങ്ങള്‍ വരയ്ക്കുകയും ചെയ്തു. സമീപത്തെ ഓട വൃത്തിയാക്കി മഴവെള്ളം ഒരുകാരണവശാലും റോഡില്‍ കെട്ടിനില്‍ക്കാത്തവിധം പ്ലാന്‍ ചെയ്തു. അതിനുശേഷമാണു റോഡിന്‍റെ ടാറിംഗ് പൂര്‍ത്തീകരിച്ചത്. വാഹനയാത്രയും കാല്‍നടയാത്രയും ദുഷ്‌കരമായിരുന്ന റോഡ് ഇപ്പോള്‍ നാട്ടുകാര്‍ക്ക് ഇപ്പോള്‍ ഒരു 'തിലക'മാണ്. പ്രധാന റോഡിലേക്കു വന്നുചേരുന്നതിനു നിരവധി കുടുംബങ്ങള്‍ ആശ്രയിക്കുന്ന റോഡാണ് തിലക് നഗര്‍ റോഡ്. വാര്‍ഡ് കൗണ്‍സിലര്‍ ജോണ്‍സണ്‍ ജോസഫിന്‍റെ ഇടപെടലിലൂടെ തിരുവനന്തപുരം നഗരസഭാ ഫണ്ടില്‍നിന്ന് അഞ്ചുലക്ഷം രൂപ വിനിയോഗിച്ചാണ് റോഡിന്‍റെ ടാറിംഗ് പൂര്‍ത്തീകരിച്ചത്.

അവശനിലയിൽ ഉപേക്ഷിക്കപ്പെട്ട അതിഥി തൊഴിലാളിയെ മെഡിക്കൽ കോളജ് ആശുപത്രിയിലേക്കു മാറ്റി

നെടുമങ്ങാട് : അവശനിലയിൽ ബസ് സ്റ്റോപ്പിൽ ഉപേക്ഷിക്കപ്പെട്ട അതിഥി തൊഴിലാളിയെ ലീഗൽ സർവീസസ് അഥോറിട്ടി ഇടപെട്ട് മെഡിക്കൽ കോളജ് ആശുപത്രിയിലേയ്ക്ക് മാറ്റി. രണ്ടു ദിവസമായി നെടുമങ്ങാട് കല്ലമ്പാറ എൽഐസി ഓഫീസിനു മുന്നിലെ ബസ് സ്റ്റോപ്പിൽ കാലിലെ വ്രണം പുഴുവരിച്ച നിലയിൽ കണ്ടെത്തിയ സഞ്ജയ് ഹോത്ത എന്ന വയോധികനെയാണ് ലീഗൽ സർവീസസ് അഥോറിട്ടി മുൻകൈ എടുത്ത് ആശുപത്രിയിൽ പ്രവേശിപ്പിച്ചത്. നാട്ടിൽ എത്തിക്കാമെന്ന വ്യാജേനെ സുഹൃത്ത് ബസ് സ്റ്റോപ്പിൽ ഉപേക്ഷിച്ചു കടന്നതാണെന്ന് ഇയാൾ പറയുന്നു. ഇയാളെ സംബന്ധിച്ച് വിവരങ്ങൾ അറിയാവുന്നവർ 773682 6789 എന്ന നമ്പറിൽ അറിയിക്കണമെന്നു പോലീസ് പറഞ്ഞു.

വാട്ടര്‍ റസ്‌ക്യു എക്യുപ്‌മെന്‍റ് ഹബ്ബ് ഉദ്ഘാടനം ചെയ്തു

പേരൂര്‍ക്കട: തിരുവനന്തപുരം ഫയര്‍ഫോഴ്‌സിന്‍റെ സ്‌കൂബ വിഭാഗത്തിനുവേണ്ടി നിര്‍മിച്ച വാട്ടര്‍ റസ്‌ക്യു എക്യുപ്‌മെന്‍റ് ഹ ബ്ബിന്‍റെ ഉദ്ഘാടനം ഡിജിപി പത്മകുമാര്‍ ഐപിഎസ് നിര്‍വഹിച്ചു. ഹിന്ദുസ്ഥാന്‍ ലാറ്റക്‌സിന്‍റെ ഫണ്ടില്‍നിന്നു 10 ലക്ഷത്തോളം രൂപ ചെലവിട്ടാണ് ഹബ് നിര്‍മിച്ചത്. സ്‌കൂബയുടെ സ്യൂട്ടുകള്‍, അണ്ടര്‍ വാട്ടര്‍ ക്യാമറകള്‍, എയര്‍ഫില്ലിംഗ്, നൈഫ്, ടോര്‍ച്ചുകള്‍, ഡൈവ് കമ്പ്യൂട്ടറുകള്‍, കമ്മ്യൂണിക്കേഷന്‍ സിസ്റ്റം തുടങ്ങിയവയാണ് ഹബ്ബില്‍ സൂക്ഷിക്കുക. ഫയര്‍ഫോഴ്‌സ് ഡയറക്ടര്‍ നൗഷാദ്, ഡയറക്ടര്‍ (അഡ്മിനിസ്‌ട്രേഷന്‍) അരുണ്‍ അല്‍ഫോണ്‍സ്, എച്ച്എല്‍എല്‍ ജീവനക്കാര്‍ തുടങ്ങിയവര്‍ പങ്കെടുത്തു.

പ്രകൃതിവാതക പൈപ്പ് ലൈൻ പൊട്ടിയത് പരിഭ്രാന്തിയുണ്ടാക്കി

ശ്രീകാര്യം: മേൽപാല നിർമാണത്തിനു തൂണുകൾ ഉണ്ടാക്കാനായി മണ്ണുമാന്തി യന്ത്രം കൊണ്ടു കുഴിയെടുമ്പോൾ പ്രകൃതി വാതക പൈപ്പ് ലൈൻ പൊട്ടിയതു പരിഭ്രാന്തിയുണ്ടാക്കി. ഇന്നലെ വൈകുന്നേരം 5.30 മണിയോടെ ശ്രീകാര്യം ജംഗ്ഷനു സമീപം ഇളംകുളത്താണു പ്രകൃതിവാതകം ചോർന്ന് അൻപത് മീറ്ററോളം ഭാഗത്ത് പടർന്നത്. പ്രകൃതി വാതക കമ്പനിയിലെ ഉദ്യോഗസ്ഥരെത്തി വാൽവടച്ചതോടെയാണ് ഗ്യാസ് ഒഴുക്ക് നിലച്ചത്. മണ്ണുമാന്തി യന്ത്രത്തിന്‍റെ കൈകൾതട്ടി വാതക പൈപ്പിന്‍റെ ഒരു ഭാഗത്തെ ഒട്ടിപ്പ് ഇളകിയതിനെ തുടർന്നു വാതകം ഉയരത്തിലേയ്ക്ക് പൊങ്ങി സമീപത്തു പടരുകയായിരുന്നു. നിർമാണത്തിലേർപ്പെട്ടിരുന്ന തൊഴിലാളികൾ ഉടൻ തന്നെ ശ്രീകാര്യം പോലീസിലും കഴക്കൂട്ടം അഗ്നിശമനസേനാ വിഭാഗത്തിലും പ്രകൃതി വാതക പൈപ്പ് ലൈൻ കമ്പനിക്കാരെയും വിവരം അറിയിച്ചു. പിന്നീട് പോലീസ് സ്ഥല ത്തെത്തി സമീപത്തുള്ള ആളുകളെയും കച്ചവട സ്ഥാപനങ്ങളിലുള്ളവരെയും മാറ്റി. അതിനിടയിൽ ഗ്യാസ് പൈപ്പ് ലൈൻ കമ്പനിയുടെ ഓപ്പറേറ്റർ എത്തി ഗ്യാസ് കണക്‌ഷന്‍റെ വാൽവ് അടച്ചു. ഏകദേശം അൻപത് മീറ്റർ ദൂരത്തോളം ഗ്യാസ് പടർന്നു. എൽപിജി ഗ്യാസ് പോലെ അന്തരീഷത്തിൽ പെട്ടെന്നു പടർന്നു പിടിക്കുന്ന വാതകമല്ല പ്രകൃതിവാതകമെന്ന് അധികൃതർ അറിയിച്ചു. പൊട്ടിയ പൈപ്പ് ശരിയാക്കാനുള്ള ജോലികൾ ഇന്ന് ആരംഭിക്കുമെന്ന് കമ്പനി അധികൃതർ അറിയിച്ചു.

ലഹരി വിരുദ്ധ സന്ദേശവുമായി വിദ്യാർഥികൾ വീട്ടിലെത്തും

കാട്ടാക്കട: ലഹരിക്കെതിരെ മനുഷ്യചങ്ങല ഒരുക്കാൻ കാട്ടാക്കട. ലഹരി വിരുദ്ധ സന്ദേശവുമായി വിദ്യാർഥികൾ വീട്ടിലെത്തുന്ന തരത്തിലാണ് കാട്ടാക്കട മണ്ഡലത്തിൽ മനുഷ്യച്ചങ്ങല നടപ്പിലാക്കുന്നത്. ഇതിനുള്ള പ്രവൃത്തികൾ അന്തിമഘട്ടത്തിൽ. മയക്കുമരുന്നിൽനിന്നു സമൂഹത്തെ രക്ഷിക്കാൻ പ്രതിരോധവും പ്രചാരണവും തീർക്കുന്ന തരത്തിലാണ് പ്രവർത്തനം. മേയ് 10നു വൈകുന്നേരം നാലിനു മയക്കുമരുന്നിനെതിരായ മനുഷ്യച്ചങ്ങല തീർക്കും. "മാനവ ശൃംഖല' എന്ന പരിപാടി കുണ്ടമൺകടവിൽ ആരംഭിച്ച് മണ്ഡപത്തിൻകടവുവരെ നീളും. മേയ് രണ്ടിനു രാവിലെ എട്ടിനാണ് "മയക്കുമരുന്നിനെതിരേ കാട്ടാക്കട' കാന്പയിന്‍റെ ഔദ്യോഗിക ഉദ്ഘാടനം. സാംസ്‌കാരികവകുപ്പ് ഡയറക്ടർ ദിവ്യ എസ്. അയ്യർ മുഖ്യാതിഥിയാകും. പ്രമുഖ വ്യക്തിത്വങ്ങൾ വിദ്യാർഥികളുമായി സംവദിക്കും. കുട്ടികളുടെ കളരിപ്പയറ്റ്, സൂംബ ഡാൻസ്, മറ്റു കലാപരിപാടികൾ, ലഹരിവിരുദ്ധപ്രതിജ്ഞ തുടങ്ങിയവ നടക്കും. മലയിൻകീഴ് ആർട്സ് ആൻഡ് സയൻസ് കോളജിലെ എൻഎസ്എസ് വോ ളന്‍റിയർമാർ കാട്ടാക്കട മണ്ഡലത്തിലെ ഓരോ വാർഡിലും കയറിയിറങ്ങി ലഹരിവിരുദ്ധസന്ദേശം പ്രചരിപ്പിക്കുകയും സർവേയും നടത്തും. ഓരോ വാർഡിലും 10 എൻഎസ്എസ് വോളന്‍റിയർമാർ വീതം മൂന്നുദിവസം താമസിച്ചാണ് പദ്ധതി നടപ്പാക്കുന്നത്. ഓരോ ദിവസവും നൂറുവീടുകൾ സന്ദർശിച്ച് ലഹരിക്കെതിരേ ബോധവത്കരണം നടത്തും. വേനലവധിയിൽ മൊബൈൽ, ടിവി എന്നിവയിൽനിന്നു കുട്ടികളെ മോചിപ്പിച്ചു കലാകായിക അനുഭവങ്ങളിലേക്കെത്തിക്കുന്നതും പദ്ധതിയുടെ ഭാഗമാണ്. മണ്ഡലത്തിലെ 120 വാർഡുകളിലായി 2000-ത്തോളം വോളന്‍റിയർമാരാണ് ലഹരിവിരുദ്ധ സന്ദേശവുമായെത്തുന്നത്. മണ്ഡലത്തിലെ വിവി ധ പഞ്ചായത്ത് പ്രസിഡന്‍റുമാരും പോലീസ്, എക്‌സൈസ് ഉദ്യോഗസ്ഥരും സംയുക്തമായാണ് പരിപാടികൾ സംഘടിപ്പിക്കുന്നത്.

മുതലപ്പൊഴിയിൽ മത്സ്യബന്ധന വള്ളം മറിഞ്ഞു: 17 പേർ രക്ഷപ്പെട്ടു

തിരുവനന്തപുരം: മുതലപ്പൊഴിയിൽ മത്സ്യബന്ധന വള്ളം മറിഞ്ഞു. തൊഴിലാളികൾ അത്ഭുതകരമായി രക്ഷപെട്ടു. ഇന്നലെ ഉച്ചക്ക് ആയിരുന്നു സംഭവം. പൂത്തുറ സ്വദേശി ലിജോയുടെ ഉടമസ്ഥതയിലുള്ള വേളാങ്കണ്ണി മാത എന്ന വള്ളമാണ് അപകടത്തിൽപെട്ടത്. വള്ളത്തിൽ പതിനേഴു മത്സ്യതൊഴിലാളികൾ ഉണ്ടായിരുന്നു. പൊഴിമുഖത്തെ മണൽത്തിട്ടയിൽ ഇടിച്ച വള്ളം തലകീഴായി മറിയുകയായിരുന്നു. കടലിൽവീണ തൊഴിലാളികൾ നീന്തി കരയ്ക്കു യറി. ചെറിയ പരിക്ക് മാത്രമാണ് തൊഴിലാളികൾക്ക് സംഭവിച്ചത്. മുതലപ്പൊഴിയിൽനിന്നും നീക്കം ചെയ്‌ത മണൽ കരയിൽനിന്നും തിരികെ കടലിലേക്ക് ഇറങ്ങുന്നുവെന്നു മത്സ്യത്തൊഴിലാളികൾ ആരോപിച്ചു.

പഹൽഗാം തീവ്രവാദി ആക്രമണം: ആദരാഞ്ജലികൾ അർപ്പിച്ചു

നേമം: ജമ്മുകശ്മീരിലെ പഹൽഗാമിൽ തീവ്രവാദികളുടെ വെടിയേറ്റു കൊല്ലപ്പെട്ടവർക്ക് ആദരാ ഞ്ജലിയർപ്പിക്കാൻ ദീനദയാൽ സാംസ്കാരിക സമിതിയുടെ ആഭിമുഖ്യത്തിൽ ശാന്തിവിള ജംഗ്ഷനിൽ അനുസ്മരണ യോഗം ചേർന്നു. പുഷ്പാർച്ചനയും നടത്തി. സമിതി ചെയർമാൻ ശാന്തിവിള വിനോദ് അധ്യക്ഷത വഹിച്ചു. നഗരസഭ പ്രതിപക്ഷ നേതാവ് എം.ആർ. ഗോപൻ അനുസ്മരണ സമ്മേളനം ഉദ്ഘാടനം ചെയ്തു. കല്ലിയൂർ പഞ്ചായത്ത്‌ പ്രസിഡന്‍റ് എം. സോമശേഖരൻ നായർ, പഞ്ചായത്ത്‌ മുൻ പ്രസിഡന്‍റ് ചന്തു കൃഷ്ണ, ശാന്തിവിള മുജീബ് റഹ്‌മാൻ-സിപിഐ, നേമം രാജൻ -കോൺഗ്രസ്‌ ഐ, വെള്ളായണി മനോജ്‌ - ബിജെ പി, സി. കൃഷ്ണകുമാർ എന്നിവർ യോഗത്തിൽ പ്രസംഗിച്ചു.

ചികിത്സയിലായിരുന്ന തടവുകാരന്‍ മരിച്ചു

മെഡിക്കല്‍കോളജ്: ശാരീരിക അസ്വാസ്ഥ്യത്തെ തുടര്‍ന്ന് തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലായിരുന്ന തടവുകാരന്‍ മരിച്ചു. പൂജപ്പുര സെന്‍ട്രല്‍ ജയിലിലെ തടവുകാരന്‍ കൊല്ലം സ്വദേശി മണിയന്‍ (73) ആണ് മരിച്ചത്. ഈമാസം 10 നാണ് മണിയനെ ശാരീരിക വൈഷമ്യത്തെ തുടര്‍ന്ന് ആശുപത്രിയില്‍ പ്രവേശിപ്പിച്ചത്. ഇവിടെ ചികിത്സയിലിരിക്കെ കഴിഞ്ഞദിവസം ഉച്ചകഴിഞ്ഞ് 2.30നായിരുന്നു മരണം. ഒരു ക്രിമിനല്‍ക്കേസിലാണ് മണിയന്‍ തടവുശിക്ഷ അനുഭവിച്ചുവന്നിരുന്നത്. മൃതദേഹം മെഡിക്കല്‍കോളജ് ആശുപത്രി മോര്‍ച്ചറിയില്‍.

ഘോഷയാത്രക്കിടെ മേളക്കാരൻ കുഴഞ്ഞുവീണ് മരിച്ചു

പൂവാർ: ഘോഷയാത്രക്കിടെ മേളക്കാരൻ കുഴഞ്ഞുവീണ് മരിച്ചു. കരിച്ചൽ ദേവീക്ഷേത്രത്തിൽ നടന്ന വിളക്കുകെട്ട് ഘോഷയാത്രയ്ക്ക് ചെണ്ടമേളത്തിനെത്തിയ കരുംകുളം പള്ളം ആലകെട്ടിയ കോളനിയിൽ ശ്രീധരൻ-ഭാരതി ദമ്പതികളുടെ മകൻ പ്രതാപൻ (39) ആണ് മരിച്ചത്. കഴിഞ്ഞദിവസം രാത്രി എട്ടരയോടെയാണ് സംഭവം. ക്ഷേത്രത്തിലെ വാർഷിക ഉത്സവത്തിന്‍റെ സമാപനത്തിനു മുന്നോടിയായി നടന്ന വിളക്ക് കെട്ട് ഘോഷയാത്രക്ക് സുഹൃത്തുക്കളോടൊപ്പം വാദ്യമേളത്തിന് എത്തിയതായിരുന്നു പ്രതാപൻ. സന്ധ്യയോടെ ഊറ്ററ പള്ളിക്കര തെക്കത് നടയിൽ നിന്നും തുടങ്ങിയ ഘോഷയാത്ര രാത്രിയോടെ ക്ഷേത്രത്തിന് സമീപം എത്തിയതോടെ പ്രതാപന് ശാരീരിക അസ്വസ്ഥത അനുഭവപ്പെട്ടു. തുടർന്ന് കുഴഞ്ഞ് വീണതിനെ തുടർന്ന് ഒപ്പമുണ്ടായിരുന്നവർ 108 ആംബുലൻസിൽ വിഴിഞ്ഞം ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മെഡിക്കൽ കോളജ് ആശുപത്രിയിൽ പോസ്റ്റ്മോർട്ടത്തിനു ശേഷം മൃതദേഹം മുട്ടത്തറ മോക്ഷ കവാടത്തിൽ സംസ്കരിച്ചു. ഭാര്യ വിനി. മക്കൾ: ഹരി, അശ്വതി. സഞ്ചയനം. വ്യാഴം രാവിലെ ഒന്പതിന്. കാഞ്ഞിരംകുളം പോലീസ് കേസെടുത്തു.

പാപ്പനംകോട്ട് ഉത്സവത്തിനു കൊടിയേറി

നേമം: പാപ്പനംകോട് പട്ടാരത്ത് ശ്രീചാമുണ്ഡേശ്വരി ക്ഷേത്രത്തിലെ പൊങ്കാല മഹോത്സവത്തിനു തന്ത്രി വടക്കൻ പറവൂർ രാകേഷ് കൊടിയേറ്റി. മേൽശാന്തി ഷാൻപോറ്റി, ട്രസ്റ്റ് ഭാരവാഹികൾ എന്നിവർ പങ്കെടുത്തു. ഉത്സവനാളുകളിൽ ക്ഷേത്ര ചടങ്ങുകൾക്ക് പുറമെ വിവിധ കലാപരിപാടികളും നടക്കും. മേയ് ഒന്നിന് കാവടി ഘോഷയാത്രയും അഗ്നിക്കാവടിയും നടക്കും. ശനിയാഴ്ച വൈകുന്നേരം 6.30ന് ആനപ്പുറത്ത് എഴുന്നള്ളത്ത്. ആറാം തിയതി ചൊവ്വാഴ്ച രാവിലെ 10.30 നാണ് പൊങ്കാല.

സ്മരണാഞ്ജലിയർപ്പിച്ചു

വിതുര: പഹൽഗാം ഭീകരാക്രമണത്തിൽ കൊല്ലപ്പെട്ടവർക്ക് വിതുര കോൺഗ്രസ് മണ്ഡലം കമ്മിറ്റി സ്മരണാഞ്ജലി അർപ്പിച്ചു.മണ്ഡലം പ്രസിഡന്‍റ് ഇ.എം. നസീർ, വിഷ്ണു ആനപ്പാറ, ബി.എൽ.മോഹനൻ, റമീസ് ഹുസൈൻ, ശുഭമണി, സലിം മേമല, സുധിൻ, രഘു, സിദ്ദിഖ്, അനിൽ മങ്കാല, വിനോദ്കുമാർ, ഷാജി കടമ്പറ, വിപിൻലാൽ, അനിൽ, പ്രകാശ്,നിധിൻ, തള്ളച്ചിറ വിനോദ് തുടങ്ങിയവർ പങ്കെടുത്തു. നെടുമങ്ങാട്: പഹൽഗാമിലെ ഭീകരാക്രമണത്തിൽ കൊല്ലപ്പെട്ടവർക്ക് ഇന്ത്യൻ നാഷണൽ കോൺഗ്രസ് ഉഴമലയ്ക്കൽ മണ്ഡലം കമ്മിറ്റിയുടെ നേതൃത്വത്തിൽ ആദരാഞ്ജലികൾ അർപ്പിക്കുകയും ഭീകര വിരുദ്ധ പ്രതിജ്ഞ എടുക്കുകയും ചെയ്തു. മണ്ഡലം പ്രസിഡന്‍റ് അഡ്വ. രാജീവ് സത്യൻ, എൻ. ബാബു, പി. സക്കീർ ഹുസൈൻ, അരുവിയോട് സുരേന്ദ്രൻ, ഒസന്‍ കുഞ്ഞ്, എ. മോഹനൻ ഷൈജു പരുത്തിക്കുഴി ശ്യാംകുമാർ, ഉഷ, അബൂബക്കർ കുളപ്പട തുടങ്ങിയവർ സംസാരിച്ചു.

തീവ്രവാദി ആക്രമണം: ജ്വാല തെളിയിച്ചു

മെഡിക്കല്‍കോളജ്: പഹല്‍ഗാമില്‍ കൊല്ലപ്പെട്ടവര്‍ക്ക് ആദരാഞ്ജലി അര്‍പ്പിച്ച് ഡിവൈഎഫ്ഐ കേശവദാസപുരം മേഖല കമ്മിറ്റിയുടെ നേതൃത്വത്തില്‍ ഭീകരവിരുദ്ധ ജ്വാല തെളിയിച്ചു. പട്ടം എല്‍ഐസി ഓഫീസിനു മുന്നില്‍ ചേര്‍ന്ന സമാധാന സദസ് ജില്ല കമ്മിറ്റിയംഗം അംശു വാമദേവന്‍ ഉദ്ഘാടനം ചെയ്തു. മേഖല സെക്രട്ടറി ആര്‍. അജിത്ത്, എല്‍. ജോസഫ് വിജയന്‍, രഞ്ജിത് എന്നിവർ പ്രസംഗിച്ചു.

അമരവിള- കാരക്കോണം റോഡ് നിർമാണം: ഉപരോധ സമരം നടത്തി

വെള്ളറട: അമരവിള കാരക്കോണം റോഡ് നിര്‍മാണത്തിനായി മതിയായ വീതിയില്‍ കുന്നത്തുകാല്‍ ജംഗ്ഷനില്‍ പുറമ്പോക്ക് ഭൂമി ഏറ്റെടുക്കാത്തതിലും അപകടകരമായ രീതിയില്‍ കെട്ടിടങ്ങൾ പൊളിച്ചു നിര്‍ത്തിയിരിക്കുന്നതിലും പ്രതിഷേധിച്ച് ബി ജെപി കുന്നത്തുകാല്‍ ഏരിയാ കമ്മിറ്റിയുടെ നേതൃത്വത്തില്‍ കുന്നത്തുകാലില്‍ റോഡ് ഉപരോധം നടത്തി. ഏരിയാ പ്രസിഡന്‍റ് വണ്ടിത്തടം ദിലീപിന്‍റെ അധ്യക്ഷതയില്‍ പാറശാല മണ്ഡലം പ്രസിഡന്‍റ് മണവാരി രതീഷ് ഉപരോധം ഉദ്ഘാടനം ചെയ്തു.

ലോട്ടറി വിൽപ്പനയുടെ മറവില്‍ മദ്യവില്‍പ്പന; ഒരാള്‍ പിടിയില്‍

പേരൂര്‍ക്കട: ലോട്ടറിടിക്കറ്റ് വില്‍പ്പനയുടെ മറവില്‍ മദ്യവില്‍പ്പന നടത്തിയ ആളെ തമ്പാനൂര്‍ പോലീസ് പിടികൂടി. വലിയശാല സ്വദേശി മോഹന്‍കുമാര്‍ (60) ആണ് പിടിയിലായത്. മൂന്നുലിറ്റര്‍ വരുന്ന ഇന്ത്യന്‍ നിര്‍മിത വിദേശമദ്യമാണ് ഇയാളുടെ സ്‌കൂട്ടറില്‍നിന്നു പിടികൂടിയത്. തമ്പാനൂര്‍ ലാല്‍ ടൂറിസ്റ്റ് ഹോമിന് എതിര്‍വശത്ത് ലോട്ടറികച്ചവടം നടത്തിവരുന്ന മോഹന്‍കുമാര്‍ ഇതിന്‍റെ മറവില്‍ അനധികൃത മദ്യവില്‍പ്പന നടത്തിവരികയായിരുന്നു. തമ്പാനൂര്‍ സിഐ വി.എം. ശ്രീകുമാറും സംഘവുമാണ് മദ്യം പിടികൂടിയത്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

മഴയിൽ ഉണ്ടപ്പാറയിൽ മണ്ണിടിച്ചിൽ : കുളപ്പട പനയ്ക്കോട് റോഡിൽ മങ്ങാട്ടുപാറയ്ക്കു സമീപം ടാറിംഗ് കേടായി

നെടുമങ്ങാട്: കുളപ്പട - പനയ് ക്കോട് - മന്നൂർകോണം റോഡിൽ മങ്ങാട്ടുപാറയ്ക്ക് സമീപം ടാറിംഗ് കേടായി. ടാറിംഗിന്‍റെ അടിഭാഗം താഴ്ന്നതാണ് ഇതിനു കാരണം. കുറച്ചു നാളായി ഇവിടെ ടാറിംഗ് തകർന്ന നിലയിലാണ്. ബസുകൾ ഉൾപ്പെടെ ഒട്ടേറെ വലിയ വാഹനങ്ങൾ സഞ്ചരിക്കുന്ന റോഡാണിത്. ഏഴു കിലോമീറ്ററിലധികം വരുന്ന റോഡിൽ ടാറിംഗ് നടത്തിയിട്ട് രണ്ടു വർഷത്തിലധികമായി. ഉഴമലയ്ക്കൽ–തൊളിക്കോട് പഞ്ചായത്തുകളെ ബന്ധിപ്പിക്കുന്ന പ്രധാന റോഡാണിത്. ഈ പഞ്ചായത്തുകളുടെ അതിർത്തി പ്രദേശമായ ഉണ്ടപ്പാറയിൽ റോഡിന്‍റെ വശങ്ങളിൽ മഴയിൽ മണ്ണിടിച്ചിലുമുണ്ട്. വശത്ത് ഉയർന്ന് നിൽക്കുന്ന മൺത്തിട്ടയാണ് ഇടിഞ്ഞ് റോഡിലേക്ക് വീഴുന്നത്. ഇവിടെ ഒട്ടേറെ സ്ഥലങ്ങളിൽ മൺതിട്ട ഇടിച്ചു റോഡിന്‍റെ വശത്ത് ടാറിംഗിനോടു ചേർന്നു വീണുകിടക്കുന്നതും കാണാം. മങ്ങാട്ടുപാറയ്ക്കു സമീപം ടാറിംഗ് കേടായ ഭാഗം ഉടനടി നവീകരിച്ചില്ലെങ്കിൽ വലിയ കുഴികൾ രൂപപ്പെടാൻ സാധ്യതയുണ്ട്. കൂടാതെ ഉണ്ടപ്പാറയിലെ മണ്ണിടിച്ചിലിനും ഉടൻ പരിഹാരം കണ്ടില്ലെങ്കിൽ വാഹനങ്ങൾ അപകടത്തിൽപെടാനും സാധ്യതയുണ്ട്. റോഡിലെ പ്രശ്നങ്ങൾ പരിഹരിക്കുന്നതിനുള്ള നടപടികൾ അധികൃതരുടെ ഭാഗത്ത് നിന്ന് ഉണ്ടാകണമെന്ന് യാത്രക്കാർ ആവശ്യപ്പെട്ടു.

പെൺകുട്ടിയെ തട്ടിക്കൊണ്ടുപോയ യുവാവ് ലുധിയാനയില്‍ പിടിയില്‍

പേരൂര്‍ക്കട: പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടുപോയ യുവാവിനെ പഞ്ചാബിലെ ലുധിയാനയില്‍നിന്ന് ഫോര്‍ട്ട് പോ ലീസ് പിടികൂടി. ജാര്‍ഖണ്ഡ് സ്വദേശി മുഹമ്മദ്‌ ദാവൂദ് (24) ആണ് പിടിയിലായത്. ബിഹാര്‍ സ്വദേശിനിയാണ് പെണ്‍കുട്ടി. മുഹമ്മദ്‌ ദാവൂദ് ചാലയ്ക്കകത്ത് മത്സ്യക്കച്ചവടം നടത്തിവരുന്നയാളാണ്. ഒരുമാസത്തിനു മുമ്പ് ഇന്‍സ്റ്റാഗ്രാം വഴിയാണ് ദാവൂദ് പെണ്‍കുട്ടിയുമായി പരിചയപ്പെടുന്നത്. 23ന് രാവിലെയാണ് പെണ്‍കുട്ടിയുടെ വീട്ടില്‍നിന്ന് ഇയാള്‍ കടത്തിക്കൊണ്ടു പോയത്. രക്ഷിതാക്കള്‍ നല്‍കിയ പരാതിയെത്തുടര്‍ന്ന് ഫോര്‍ട്ട് സിഐ ശിവകുമാറിന്‍റെ നിര്‍ദേശപ്രകാരമായിരുന്നു അന്വേഷണം. പെണ്‍കുട്ടിയെ ജാര്‍ഖണ്ഡ്, ഡല്‍ഹിവഴി പഞ്ചാബിലെ ലുധിയാനയിലെത്തിച്ചശേഷം അവിടെ ഒരു ഗ്രാമത്തില്‍ ഒളിവില്‍ക്കഴിഞ്ഞു വരികയായിരുന്നു. ഫോര്‍ട്ട് എസ്ഐ സുരേഷ്, എസ്‌സിപിഒമാരായ ലിപിന്‍ രാജ്, ശ്രീജിത്ത്, സിപിഒ പ്രവീണ്‍ എന്നിവരാണ് ലുധിയാനയില്‍ നിന്ന് ഇരുവരെയും കസ്റ്റഡിയിലെടുത്തത്. ‌ ഇയാള്‍ക്കെതിരേ പോക്‌സോ കേസാണ് രജിസ്റ്റര്‍ ചെയ്തത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ബസ് കാത്തിരിപ്പു കേന്ദ്രം ഉദ്ഘാടനം ചെയ്തു

വെള്ളറട: കുന്നത്തുകാല്‍ പഞ്ചായത്ത് കുറുവാട് ജംഗ്ഷനില്‍ നിര്‍മിച്ച ബസ് കാത്തിരിപ്പു കേന്ദ്രത്തിന്‍റെയും, കുന്നത്തുകാല്‍ പഞ്ചായത്തിലെ വിവിധ കേന്ദ്രങ്ങളില്‍ എംഎല്‍എയുടെ പ്രാദേശിക വികസന ഫണ്ടില്‍ നിന്നും സ്ഥാപിച്ച മിനി മാസ്റ്റ് ലൈറ്റുകളുടേയും ഉദ്ഘാടനം സി.കെ. ഹരീന്ദ്രന്‍ എംഎല്‍എ നിര്‍വഹിച്ചു. കുന്നത്തുകാല്‍ പഞ്ചായത്തിലെ കൈതക്കുഴി, ചെറുപാലക്കോട്, കുളക്കോട്, വിട്ടിയറം ക്ഷേത്രം, തേരണി, പടപ്പില്‍തോട്ടം, കല്ലറത്തല്‍ ഇലങ്കം, പള്ളിവിള, തുരുത്തിമൂല, വ്‌ലാങ്കുളം, മിഷന്‍വീട് ജംഗ്ഷന്‍, കോട്ടുക്കോണം സിഎസ്‌ഐ ചര്‍ച്ച് ആശുപത്രി, തച്ചന്‍കോട്, കുളപ്പുറത്തുകോണം എന്നീ സ്ഥലങ്ങളിലാണ് ലൈറ്റുകള്‍ സ്ഥാപിച്ചത്. പഞ്ചായത്ത് പ്രസിഡന്‍റ് ആര്‍.അമ്പിളി, വൈസ് പ്രസിഡന്‍റ് ജി. കുമാര്‍, സ്റ്റാൻഡിംഗ് കമ്മറ്റി ചെയര്‍മാന്‍മാരായ അഡ്വ. എസ്.എസ് റോജി, മേരി മിനി ഫ്‌ലോറ, ബ്ലോക്ക് പഞ്ചായത്ത് അംഗം ഒ. വസന്തകുമാരി പഞ്ചായത്ത് അംഗങ്ങളായ ഡി. ലൈല, സിന്ധു, അനീഷ്, രതീഷ്, ജയപ്രസാദ്, പഞ്ചായത്ത് മുന്‍ പ്രസിഡന്‍റ് അരുണ്‍, ആര്‍. പരമേശ്വരപിള്ള എന്നിവർ പ്രസംഗിച്ചു.

വിതുര ജെഴ്സിഫാമിൽ തൊഴിലാളികളുടെ പ്രതിഷേധം

വിതുര : വിതുര ജെഴ്സിഫാമിന്‍റെ ഭൂമി കേരള ലൈവ് സ്റ്റോക്ക് ഡെവലപ്മെന്‍റ് ബോർഡിനു കൈമാറാൻ നീക്കം നടക്കുന്നതായി ആരോപിച്ച് തൊഴിലാളി സംഘടനകളുടെ പ്രതിഷേധം. കഴിഞ്ഞ ദിവസങ്ങളിൽ സ്ഥലം പരിശോധിക്കാൻ കെഎൽഡി അധികൃതർ എത്തിയതായി തൊഴിലാളികൾ പറയുന്നു. ഇതിനെ തുടർന്നാണ് അവരുടെ പ്രതിഷേധം. എന്നാൽ കാലി വളർത്തലും പാൽ ഉദ്പാദനവും വർധിപ്പിക്കുകയാണ് ലക്ഷ്യമിടുന്നതെന്ന് അധികൃതർ പറയുന്നു. സൗകര്യമുള്ള ഭൂമിക്കായി വിവിധ ഫാമുകൾ സന്ദർശിക്കുന്നതിന്‍റെ ഭാഗമായാണ് ഇവിടെ എത്തിയതെന്നാണ് അവരുടെ വിശദീകരണം. 400-ഹെക്ടറിലധികം വിസ്തീർണമുണ്ടായിരുന്ന ഭൂമിയിൽ നിന്നാണ് ഐസറിന് സ്ഥലം നൽകിയത്. നിലവിൽ 99-ഹെക്ടർ മാത്രമാണ് അവശേഷിക്കുന്നത്. ജില്ലയിൽ തന്നെ പാലുദ്പാദനത്തിൽ മുൻ പന്തിയിലാണ് ഫാം. എന്നാൽ തീറ്റപ്പുല്ല് നട്ടുപിടിപ്പിക്കാനുള്ള സ്ഥലം അപര്യാപ്തമാണെന്നാണ് ജീവനക്കാർ പറയുന്നത്. ഈ സാഹചര്യത്തിൽ കെഎൽഡിക്ക് സ്ഥലം വിട്ടുനൽകുന്നത് ഫാമിന്‍റെ പ്രവർത്തനം നിലയ്ക്കാൻ കാരണമാകുമെന്നും അവർ പറയുന്നു. നിലവിൽ 400- പശുക്കളാണ് ഫാമിലുള്ളത്. 1400 ലിറ്റർ പാൽ പ്രതിദിനം ഉദ്പാദിപ്പിക്കുന്നു. കൂടാതെ 150-ലധികം ആടുകളും ഇവിടെയുണ്ട്. 116- സ്ഥിരം തൊഴിലാളികൾ ജോലി ചെയ്യുന്നു. കൂടാതെ കാഷ്വൽ, ദിവസ വേതന വിഭാഗത്തിൽ 37 പേരുമുണ്ട്.

ഫണ്ട് അനുവദിച്ചിട്ടും രക്ഷയില്ല; എന്‍സിസി കുളം അവഗണനയില്‍

പേരൂര്‍ക്കട: തിരുവനന്തപുരം നഗരസഭ അഞ്ചുകോടി രൂപ ഫണ്ട് അനുവദിച്ചിട്ടും കരാറുകാരന്‍ കനിയാത്തതിനാല്‍ പാറോട്ടുകോണത്തെ എന്‍സിസി കുളം അവഗണനയില്‍. ചതുരാകൃതിയിലുള്ള കുളത്തിലെ വെള്ളം ശുചീകരിച്ച് പായല്‍ നീക്കല്‍, ഇടിഞ്ഞുവീണ സംരക്ഷണഭിത്തി കെട്ടല്‍, കുളത്തില്‍ മഴക്കാലത്ത് കൂടുതലായി വരുന്ന വെള്ളം കനാല്‍വഴി തിരിച്ചുവിടല്‍ എന്നിവയാണ് പദ്ധതിയില്‍ ഉണ്ടായിരുന്നത്. കുളത്തിന്‍റെ ഒരുഭാഗം ഇടിച്ചുപൊളിച്ചതോടെ സ്വകാര്യവ്യക്തികള്‍ക്ക് വീടുകളിലേക്ക് പോകാനുണ്ടായിരുന്ന വഴി നഷ്ടമായി. കരിങ്കല്ലുകളിലും സ്ലാബുകളിലും കാല്‍വച്ചാണ് ഇവര്‍ ഇപ്പോള്‍ സഞ്ചരിച്ചുകൊണ്ടിരിക്കുന്നത്. പണിക്കാവശ്യമായ പലകള്‍ കുളത്തിനു സമീപം കൊണ്ടിറക്കിയത് ചിതലുകള്‍ കയറാവുന്ന അവസ്ഥയിലാണ്. കുളത്തിനു നഗരസഭ ഫണ്ട് അനുവദിച്ചിട്ട് ആറുമാസം കഴിഞ്ഞുവെന്നാണ് സൂചന. ഫണ്ട് വേണ്ടുന്നവിധം ഉപയോഗിക്കാതെ കരാറുകാരന്‍ ഉരുണ്ടുകളിക്കുകയാണെന്നാണ് നാട്ടുകാര്‍ പറയുന്നത്. അതേസമയം കുളത്തിന്‍റെ കരാര്‍ ഏറ്റെടുത്തയാള്‍ക്കു പണി ചെയ്യുന്നതുമൂലം നഷ്ടം സംഭവിക്കുമെന്നും അതുകൊണ്ട് അയാള്‍ പണി പാതിവഴിയില്‍ ഉപേക്ഷിച്ചതാണെന്നും ആരോപണമുണ്ട്. നിരവധി ജനങ്ങള്‍ കാര്‍ഷിക ആവശ്യങ്ങള്‍ക്കു കുളത്തിലെ വെള്ളം ഉപയോഗിച്ചിരുന്നതാണ്. കുളം നാശോന്മുഖമാവുകയും പരിസരം കാടുപിടിക്കുകയും ചെയ്തതോടെ കഞ്ചാവു മാഫിയ ഈ ഭാഗത്ത് തമ്പടിക്കുന്നുണ്ട്. പട്രോളിംഗിനിടെ ഇത്തരം സാമൂഹികവിരുദ്ധരെ മണ്ണന്തല പോലീസ് പിടികൂടാന്‍ ശ്രമിക്കാറുണ്ടെങ്കിലും അവര്‍ ഓടി രക്ഷപ്പെടുകയാണ് പതിവ്.

ജ്യൂസ് കടയില്‍നിന്നു പുക ഉയര്‍ന്നതു പരിഭ്രാന്തി പരത്തി

പേരൂര്‍ക്കട: ജ്യൂസ് കടയില്‍ നിന്നു പുക ഉയര്‍ന്നതു പരിഭ്രാന്തി പരത്തി. അട്ടക്കുളങ്ങരയില്‍ പ്രവര്‍ത്തിക്കുന്ന തിരുവല്ലം സ്വദേശി ബിജുവിന്‍റെ ഉടമസ്ഥതയിലുള്ള കിട്ടൂസ് സ്റ്റോഴ്‌സില്‍ നിന്നാണ് പുക ഉയര്‍ന്നത്. കടയ്ക്കുള്ളിലുണ്ടായിരുന്ന ഫ്രീസറിന്‍റെ ഇലക്ട്രിക്കല്‍ ഭാഗം ഷോര്‍ട്ടായതായിരുന്നു പ്രശ് നം. തിരുവനന്തപുരം ഫയര്‍ സ്റ്റേഷനില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സുധീഷ് ചന്ദ്രന്‍റെ നേതൃത്വത്തില്‍ ഒരു യൂണിറ്റെത്തിയെങ്കിലും അപ്പോഴേക്കും പ്രശ്‌നം പരിഹരിച്ചിരുന്നു.

അമ്മയും മക്കളും ലിഫ്റ്റില്‍ കുടുങ്ങി; ഫയർഫോഴ്സ് രക്ഷിച്ചു

നെയ്യാറ്റിന്‍കര : നെയ്യാറ്റിന്‍കരയിലെ ഒരു പ്രമുഖ ടെക്സ്റ്റൈല്‍സിന്‍റെ ഒന്നാം നിലയിലെ ലിഫ്റ്റില്‍ കുടങ്ങിയ അമ്മയേയും രണ്ടുമക്കളേയും ഫയര്‍ ആന്‍ഡ് റസ്ക്യൂ ഫോഴ്സ് വിഭാഗം രക്ഷപ്പെടുത്തി. ഇന്നലെ ഉച്ചയ്ക്ക് രണ്ടോടെയായിരുന്നു സംഭവം. ഭര്‍ത്താവിനും മക്കളോടുമൊപ്പമാണ് നെയ്യാറ്റിന്‍കരയിലെ സ്വകാര്യവസ്ത്ര വ്യാപാര കേന്ദ്രത്തില്‍ യുവതിയും മക്കളായ കാളീചരണ്‍, ശ്രേയ എന്നിവരുമെത്തിയത്. ഇവരൊരുമിച്ച് ലിഫ്റ്റിൽ ഫസ്റ്റ് ഫ്ലോറില്‍ നിന്നും അടുത്ത നിലയിലേയ്ക്ക് പോകുന്നതിനിടയിലാണ് കുടങ്ങിയത്. ലിഫ്റ്റിന്‍റെ വാതില്‍ തുറക്കാന്‍ വസ്ത്രവ്യാപാര കേന്ദ്രത്തിലെ ആളുകൾ ശ്രമിച്ചെങ്കിലും നടന്നില്ല. നിര്‍വാഹമില്ലാതെ നെയ്യാറ്റിന്‍കര ഫയര്‍ ആന്‍ഡ് റസ്ക്യൂ വിഭാഗത്തെ വിളിച്ചറിയിക്കുകയായിരുന്നു. ഇവിടെനിന്നു സീനിയര്‍ ഓഫീസര്‍ രമേഷിന്‍റെ നേതൃത്വത്തില്‍ എത്തിയ സംഘം ഹൈഡ്രോളിക് ഉപകരണത്തിന്‍റെ സഹായത്താല്‍ ലിഫ്റ്റിൽനിന്നും അമ്മയേയും രണ്ടു കുഞ്ഞുങ്ങളേയും രക്ഷിച്ചു.

ശ്രീ ചിത്തിര തിരുനാള്‍ നാഷണല്‍ അവാര്‍ഡുകൾ സമ്മാനിച്ചു

വെള്ളറട: കുന്നത്തുകാല്‍ ശ്രീ ചിത്തിര തിരുനാള്‍ ട്രസ്റ്റ് ഏര്‍പ്പെടുത്തിയിട്ടുള്ള 2024-25 വര്‍ഷങ്ങ ളിലെ നാഷണല്‍ അവാര്‍ഡ് വിതരണം ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ നിര്‍വഹിച്ചു. 2024 ലെ അവാര്‍ഡിന് സിനിമാ താരം ജയറാമും 2025ലെ അവാർ ഡിനു ഒളിംപ്യന്‍ പി.ആര്‍. ശ്രീജേഷും അര്‍ഹരായി. രണ്ടുലക്ഷം രൂപയും പ്രശസ്തി പത്രവും ഫലകവുമടങ്ങുന്നതാണ് പുരസ്‌കാരം. ശാസ്ത്രം, സാങ്കേതികവിദ്യ, ഭരണം, കൃഷി, കല, സിനിമ, സംഗീതം, സാഹിത്യം, വൈദ്യം, കായികം, രാഷ്ട്രത്തിന് നല്‍കിയിട്ടുള്ള സംഭാവനകള്‍ മുതലായ മേഖലകളിലെ മികച്ച സംഭാവനയക്കാണ് പുരസ്‌കാരം. ഈ വര്‍ഷത്തെ അവാര്‍ഡ് പ്രഖ്യാപനം മുന്‍ അംബാസഡര്‍ ടി.പി ശ്രീനിവാസനാണു നിര്‍വഹിച്ചത്. ശ്രീചിത്തിരതിരുനാള്‍ സ്‌കൂളില്‍ നടന്ന ചടങ്ങില്‍ ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ മുഖ്യാതിഥിയായി പങ്കെടുത്തു. മുന്‍ അംബാസഡര്‍ ടി.പി. ശ്രീനിവാസൻ, സ്‌കൂള്‍ പ്രിന്‍സിപ്പല്‍ പുഷ്പവല്ലി, മാനേജിംഗ് ട്രസ്റ്റി ടി. സതീഷ് കുമാര്‍ എന്നിവർ പങ്കെ ടുത്തു. ചോറ്റാനിക്കര സത്യന്‍ നാരായണന്‍ മാരാര്‍, നര്‍ത്തകി ഇന്ദുലേഖ എന്നിവരുടെ കലാപരിപാടികളും നടന്നു.

മാനവരാശിക്ക് വേണ്ടിയുള്ള ജീവിതമായിരുന്നു മാർപാപ്പയുടേത്: സ്വാമി അഭയാനന്ദ

കഴക്കൂട്ടം: മതത്തിനപ്പുറം മാനവരാശിക്ക് വേണ്ടിയുള്ള ജീവിതമായിരുന്നു ഫ്രാൻസിസ് മാർപാപ്പയുടെതെന്നു ചെമ്പഴന്തി ശ്രീനാരായണഗുരുകുലം മഠാധിപതി സ്വാമി അഭയാനന്ദ. ഇന്‍റർ റിലിജിയസ് ഫെലോഷിപ്പ് കഴക്കൂട്ടത്ത് സംഘടിപ്പിച്ച ഫ്രാൻസിസ് മാർപാപ്പ അനുസ്മരണ ചടങ്ങിൽ പ്രസംഗിക്കുകയായിരുന്നു അദ്ദേഹം. മനുഷ്യകുലത്തിന്‍റെ നന്മയ്ക്കും സമാധാനത്തിനും പ്രകൃതിയുടെ പരിപാലനത്തിനുവേണ്ടി നിലകൊണ്ട മഹാ ആചാര്യനെയാണ് ലോകത്തിനു നഷ്ടമായതെന്നും അദ്ദേഹം അനുസ്മരിച്ചു. യുദ്ധത്തിന്‍റെ ഭീകരതയിൽ കഷ്ടപ്പെടുന്ന ജനങ്ങൾക്ക് വേണ്ടി തന്‍റെ അവസാന ഹൃദയത്തുടിപ്പിലും ശബ്ദിച്ച സമാധാനത്തിന്‍റെ വെള്ളരിപ്രാവിനെയാണ് ഫ്രാൻസിസ് മാർപാപ്പയുടെ വിയോഗത്തിലൂടെ മാനവകുലത്തിന് നഷ്ടമായതെന്ന് ഇമാം അൽ ഹാബിസ് അർഷാദ് കാശ്മീ പറഞ്ഞു. കാലത്തിനനുസരിച്ച് സഭയുടെ മുൻഗണനകൾ ധീരതയോടെ നവീകരിച്ച ശ്രേഷ്ഠ ഇടയനായിരുന്നു ഫ്രാൻസിസ് മാർപാപ്പ എന്ന് അധ്യക്ഷത വഹിച്ച കഴക്കൂട്ടം സെന്‍റ് ജോസഫ് ഇടവക വികാരി ഫാ. ദീപക് ആന്‍റോ അഭിപ്രായപ്പെട്ടു. ഡോ. ഉമ്മൻ വി. ഉമ്മൻ, ആർ. ശ്രീകുമാർ, അണിയൂർ പ്രസന്നകുമാർ, കഴക്കൂട്ടം അനിൽ, ജ്യോതിസ് ചന്ദ്രൻ, ജി. ജയചന്ദ്രൻ, ഡോ. യൂജിൻ ഗോമസ്, ജോൺ വിനേഷ്യസ്, എച്ച്.എസ്. ആദർശ്, ആന്‍റണി ആൽബർട്ട്, ബാലചന്ദ്രൻ നായർ, ഗ്രേഷ്യസ് പെരേര, ഭൂവനചന്ദ്രൻ നായർ, ജോർജ്ജ് കുലാസ്, ടൈറ്റസ് ആന്‍റണി തുടങ്ങിയവർ പ്രസംഗിച്ചു.

തിരുവനന്തപുരം വിമാനത്താവളത്തിൽ വ്യാജ ബോംബ് ഭീഷണി

വലിയതുറ: തിരുവനന്തപുരം ജില്ലാ കോടതിക്കും കലക്ടറേറ്റിനും ഹോട്ടലുകള്‍ക്കും ബോംബു ഭീഷണി ഉണ്ടായതിനു പിന്നാലെ തിരുവനന്തപുരം അന്താരാഷ്ട്ര വിമാനത്താവളത്തിനും ബോംബ് ഭീഷണിയുണ്ടായി. ഇന്നലെ രാവിലെ 9.30 ഓടുകൂടി എയര്‍പോര്‍ട്ട് മാനേജരുടെ ഇ-മെയിലിലേയ്ക്കാണു ഭീഷണി സന്ദേശം എത്തിയത്. ഭീഷണി സന്ദേശത്തിന്‍റെ പശ്ചാത്തലത്തില്‍ വിമാനത്താവളത്തില്‍ പരിശോധന ശക്തമാക്കിയതായി ബന്ധപ്പെട്ട അധികൃതര്‍ വ്യക്തമാക്കി. ബോംബ് ഭീഷണി എത്തിയതോടെ വിമാനത്താവള അധികൃതര്‍ വിവരം വലിയതുറ പോലീസിനേയും ബോംബ് സ്‌ക്വാഡ്, ഫയര്‍ഫോഴ്‌സ് എന്നിവരെ അറിയിക്കുകയായിരുന്നു. അവര്‍ എത്തി പരിശോധന നടത്തിയെങ്കിലും യാതൊന്നും കണ്ടെത്താന്‍ കഴിഞ്ഞില്ല. ഇതോടെ ഭീഷണി വ്യാജമാണെന്ന അനുമാനത്തിലെത്തുകയായിരുന്നു അധികൃതര്‍. ബോംബ് സ്‌ക്വാഡും പോലീസും സി.ഐഎസ്എഫും സംയുക്തമായിട്ടാണു പരിശോധന നടത്തിയത്. ഇ-മെയില്‍ വിലാസമുണ്ടാക്കിയതു ഡാര്‍ക്ക് വെബില്‍നിന്നാണെന്നാണ് സൂചന. ആയതിനാല്‍ തന്നെ ഭീഷണിയുടെ ഉറവിടം കണ്ടുപിടിക്കാന്‍ പോലീസ് ഇരുട്ടില്‍ തപ്പേണ്ടിവരും എന്നാണു വിദഗ്ധാഭിപ്രായം. ബോംബു ഭീഷണി സന്ദേശം എത്തിയ ഉടന്‍ തന്നെ തിരുവനന്തപുരം എയര്‍പോര്‍ട്ട് ബോംബ് ത്രറ്റ് അസസ്‌മെന്‍റ് കമ്മിറ്റിയുടെ നേതൃത്വത്തില്‍ എയര്‍പോര്‍ട്ടിനുള്ളില്‍ വേണ്ടവിധത്തിലുളള സുരക്ഷാ ക്രമീകരണങ്ങള്‍ ഒരുക്കുകയായിരുന്നു. കമ്മിറ്റിയുടെ നേതൃത്വത്തില്‍ തന്നെ സുരക്ഷയ്ക്കായുളള വിവിധ സെക്യൂരിറ്റി ഏജന്‍സികളെ ഏകോപിക്കുകയായിരുന്നു. അതിനാല്‍ വിമാനത്താവളത്തിനുള്ളില്‍ യാത്രക്കാര്‍ക്കോ വിമാനത്താവളത്തിനുള്ളിലെ പ്രവര്‍ത്തനങ്ങള്‍ക്കോ യാതൊരുവിധത്തിലുമുള്ളതടസമോ പ്രയാസമോ നേരിടേണ്ടി വന്നില്ല.

നാടുകാണി ശ്രീധർമശാസ്താ ക്ഷേത്രത്തിലെ പഞ്ചലോഹ വിഗ്രഹവും രത്നവും കവർന്നു

പ്രതികളിൽ ഒരാൾ പിടിയിൽ; ഒരാൾ രക്ഷപ്പെട്ടു കാട്ടാക്കട: കാട്ടാക്കട പോലീസ് സ്റ്റേഷൻ അതിർത്തിയിലെ പൂവച്ചൽ നാടുകാണി ശ്രീധർമശാസ്താ ക്ഷേത്രത്തിലെ പഞ്ചലോഹ വിഗ്രഹവും വൈഡൂര്യക്കല്ലുകളും കവർന്നു. പ്രതി മറ്റൊരു മോ ഷണ ശ്രമത്തിനിടെ പിടിയിൽ. മറ്റൊരു മോഷണ ശ്രമത്തിനിടെ മോഷ്ടാക്കളിൽ ഒരാളായ സോജൻ ആര്യൻകോട് പോലീസിന്‍റെ പിടിയിലായിരുന്നു. പ്രധാന മോഷ്ടാവ് പ്രിൻസിന്‍റെ സഹായിയാണു സോജൻ. ഇയാളെ ചോദ്യം ചെയ്തപ്പോഴാണ് പഞ്ചലോഹ വിഗ്രഹം മോഷ്ടിച്ചതായും ഇതു മാരായമുട്ടത്തെ ഒരു വീട്ടിൽ ഒളിപ്പിച്ചതായും പോലീസിനു വിവരം ലഭിച്ചത്. ശാസ്താവിന്‍റെ 110 കിലോ ഭാരമുള്ള പഞ്ചലോഹ വിഗ്രഹമാണ് കവർന്നത്. ഇന്നലെ രാവിലെ ക്ഷേത്രം തുറക്കാനെത്തിയ പൂജാരിയാണ് പ്രധാന ശ്രീകോവിലിന്‍റെ വാതിൽ പൊളിച്ച നിലയിൽ കണ്ടെത്തിയത്. ഉപദേവന്മാരായ മുരുകൻ, ഗണപതി എന്നിവരുടെ ശ്രീകോവിലിന്‍റെ വാതിലും പൊളിച്ചിട്ടുണ്ട്. മുരുകസ്വാമിയുടെ വിഗ്രഹം മറിച്ചിട്ട നിലയിലായിരുന്നു. ഇവിടെ വൈഡൂര്യം ഉണ്ടോ എന്നു പരിശോധിക്കുന്നതിനാണു വിഗ്രഹം മറിച്ചിട്ടതെന്നാണ് നിഗമനം. മോഷ്ടിച്ച പഞ്ചലോഹ വിഗ്രഹം പാറ ഇടുക്കിലൂടെ അര കിലോമീറ്ററിലധികം വലിച്ചിഴച്ചാണു കടത്തിയത്. ഇവിടുത്തെ മോഷണത്തിനുശേഷം പ്രദേശത്തെ മറ്റൊരു ക്ഷേത്രത്തിൽ കാണിക്കവഞ്ചി മോഷ്ടിച്ചശേഷം മടങ്ങുന്നതിനിടെയാണ് സോജൻ പോലീസിന്‍റെ പിടിയിലായത്. ഇയാളെ ചോദ്യം ചെയ്യുന്നതിനിടെ പ്രധാനപ്രതിയായ പ്രിൻസ് സ്ഥലത്ത് നിന്നും രക്ഷപ്പെടുകയായിരുന്നു. പ്രിൻസിനായി പോലീസ് വ്യാപക തെരച്ചിൽ ആരംഭിച്ചിട്ടുണ്ട്. മാറനല്ലൂർ പോലീസ് സ്റ്റേഷനിൽ ഇയാൾക്കെതിരേ നിരവധി കേസുകൾ നിലവിലുണ്ട്. മോഷണ ഉരുപ്പടികൾ ഉരുക്കാനായി പ്രിൻസിന്‍റെ വീട്ടിൽ സജീകരിച്ചിട്ടുള്ള ആല പോലീസ് കണ്ടെത്തി. ഇവിടെ ഉണ്ടായിരുന്ന വസ്തുക്കൾ പോലീസ് കണ്ടെടുത്തു. സ്ഥലത്ത് ഫോറൻസിക് സംഘം പരിശോധന നടത്തി. പ്രതിയെ ചോദ്യം ചെയ്തുവരികയാണ്. ‌‌

‘പുലിയാണ് ’വിഴിഞ്ഞം തുറമുഖത്തിലെ പുലിമുട്ട്

എസ്. രാജേന്ദ്രകുമാർ വിഴിഞ്ഞം : വിഴിഞ്ഞം അന്താരാഷ്ട്ര തുറമുഖത്തിന്‍റെ യഥാർഥ പുലിയാണ് സുരക്ഷ വേലിയായ പുലിമുട്ട്. പ്രകൃതി പ്രതിഭാസമായ അറബിക്കടലിന്‍റെ തിരമാലകളെ മൂന്നു കിലോമീറ്ററോളം തോൽപ്പിച്ച് കേരളത്തിന്‍റെ വികസന സ്വപ്നത്തിനു സുരക്ഷയൊരുക്കലാണ് ജോലി. ഇന്ത്യയിലെ മറ്റൊരു തുറമുഖത്തിനും അവകാശപ്പെടാൻ പറ്റാത്ത തരത്തിലുള്ള വിശാലമായ ബ്രേക്ക് വാട്ടർ ഒരുക്കി ചരക്കുമായെത്തുന്ന കൂറ്റൻ കണ്ടെയ്നർ കപ്പലുകൾക്ക് വാർഫിൽ അടുക്കാൻ അവസരമൊരുക്കാനുള്ള ചുമതലും പുലിമുട്ടിനുണ്ട്. തീരത്തുനിന്നു കടലിന്‍റെ ഉള്ളിലേക്ക് മൂന്നു കിലോമീറ്ററോളം നീളത്തിൽ നിർമിച്ച പുലിമുട്ടിൻന്‍റെ മുകൾപ്പരപ്പിനു പത്ത് മീറ്റർ വീതിയുണ്ട്. ഇരുപത് മുതൽ ഇരുപത്തിരണ്ടു മീറ്റർ വരെ ആഴമുള്ള ഉൾക്കടലിലെ തിരച്ചുഴിയെ തള്ളി നീക്കി ഒരു സ്തൂപത്തിന്‍റെ മാതൃകയിലാണ് കല്ലിട്ടു കെട്ടിപ്പൊക്കിയത്. മുകൾപ്പരപ്പ് കോൺക്രീറ്റു പാകി കണ്ടെയ്നറുകൾക്ക് കടന്നു പോകാൻ പാകത്തിൽ വിശാലമായ റോഡും യാഥാർഥ്യമാക്കി. കേരളത്തിലെയും തമിഴ്നാട്ടിലെയും വിവിധ ക്വാറികളിൽനിന്നു കരയിലൂടെയും കടൽ വഴിയും കൊണ്ടു വന്ന 62 ലക്ഷം ടൺ പാറ വേണ്ടി വന്നു പുലിമുട്ടിന്‍റെ ഒന്നാം ഘട്ട നിർമാണം പൂർത്തിയാക്കാൻ. തമിഴ്നാട്ടിലെ കന്യാകുമാരി, തിരുനെൽവേലി ജില്ലകളിലും കേരളത്തിൽ തിരുവന്തപുരം, കൊല്ലം ജില്ലകളിൽ നിന്നുള്ളതുമായ വിവിധ ക്വാറികൾ വിഴിഞ്ഞം തുറമുഖത്തിനായി പൊട്ടിക്കേണ്ടിവന്നു. തിരുനെൽവേലിയിലും കന്യാകുമാരിയിൽ നിന്നുമായി ടിപ്പർ ലോറികളിൽ കര മാർഗ്ഗം കൂറ്റൻ പാറക്കല്ലുകൾ എത്തിയപ്പോൾ കൊല്ലത്തുനിന്നു മുതലപ്പൊഴിയിൽ എത്തിച്ച പാറകൾ ബാർജുകളിൽ കടൽ മാർഗം വിഴിഞ്ഞത്തു കൊണ്ടുവന്നു നിക്ഷേപിച്ചു. പൂർണമായി കേരള സർക്കാരിന്‍റെ ഖജനാവിൽ നിന്നുള്ള 1500 കോടി ചിലവിൽ ആറുവർഷം കൊണ്ടാണ് ഈ തുറമുഖസുരക്ഷാ കവചം സഫലമാക്കിയത്. കരിങ്കല്ലുകൊണ്ടുള്ള നീളമേറിയ റോസിനെ സംരക്ഷിക്കാൻ മൂന്നു കാലിൽ സിമെന്‍റ് കോൺക്രീറ്റിൽ നിർമിച്ച കൂറ്റൻ ടഡ്രോ പാടുകൾ കൂടി നിരത്തി തിരമാലകളെ പൂർണമായി പരാജയപ്പെടുത്തി, ഏതു കാലാവസ്ഥയിലും അലറിയടിച്ച് വരുന്ന തിരമാലകളെ വിഴിഞ്ഞം തുറമുഖത്തേക്കു കടക്കാതെ സംരക്ഷിക്കുന്നതും ഈപുലിമുട്ട് തന്നെയാണ്. പുലിമുട്ടിന്‍റെ സംരക്ഷണത്തിൽ കിലോമീറ്ററുകളോളം പരന്നുകിടക്കുന്ന ബ്രേക്ക് വാട്ടറിനുള്ളിൽ ഏത് സമയത്തും ഏതു തരം കപ്പലുകൾക്കും പ്രവേശിക്കാമെന്നതും ഏറെ പ്രത്യേകതാണ്. ആധുനിക സാങ്കേതികവിദ്യയിൽ നിർമിച്ചകൂറ്റൻ പുലിമുട്ടിന്‍റെ കരുത്തിൽ ലോകത്തിന്‍റെ വിവിധ കോണുകളിൽനിന്നു പത്തു മാസത്തിനുള്ളിൽ 277 ചരക്ക് കപ്പലുകൾ വിഴിഞ്ഞം തുറമുഖത്തടുന്നു. അ ഞ്ചു ലക്ഷത്തി എൺപത്തിയെ ണ്ണായിരം കണ്ടെയ്നറുകളും കൈകാര്യം ചെയ്ത തുറമുഖം ലോക രാജ്യങ്ങൾക്കു മുന്നിൽ കരുത്തു തെളിയിച്ചു.

ഒൻപത് ദിവസത്തെ വിജയോത്സവം 30ന് തുടങ്ങും

തിരുവനന്തപുരം: റഷ്യൻ ഹൗസ്, "റൂസ്കിയ് മിർ' ഫൗണ്ടേഷനും ന്യൂഡൽഹിയിലെ റഷ്യൻ എംബസിയുമായി സഹകരിച്ച്, രണ്ടാം ലോകമഹായുദ്ധത്തിലെ സോവിയറ്റ് വിജയത്തിന്‍റെ 80-ാം വാർഷികം ആഘോഷിക്കുന്നതിന്‍റെ ഭാഗമായി, ഒമ്പതു ദിവസം നീളുന്ന വിവധ പരിപാടികൾ സംഘടിപ്പിക്കുന്നു. ആഘോഷപരിപാടിയുടെ ഭാഗമായി സെമിനാറുകൾ, പ്രദർശനങ്ങൾ, മത്സരങ്ങൾ, ചലച്ചിത്രമേള, സംഗീത വിരുന്ന് എന്നിവ നടത്തും. ആഘോഷങ്ങൾക്ക് 30 തുടക്കമാകും. മന്ത്രിമാർ, ഡിപ്ലോമാറ്റുകൾ, മുൻ സൈനിക ഉദ്യോഗസ്ഥർ, അന്താരാഷ്ട്രകാര്യ വിദഗ്ധർ, ചരിത്രകാരൻമാർ, വിദ്യാർഥികൾ തുടങ്ങിയവർ പങ്കെടുക്കും. 30 നു വൈകുന്നേരം മോസ്കോ സ്റ്റേറ്റ് കോൺസർവേറ്ററിയിലെ സോളോയിസ്റ്റുകളുടെ ഓപ്പറ സംഗീത നിശ ഉണ്ടാകും. മേയ് എട്ടിന്, 80 പേർ ചേർന്ന് 80 മീറ്റർ നീളമുള്ള സെന്‍റ് ജോർജ് റിബൺ പ്രദർശിപ്പിക്കും. പാസുകൾക്ക്, +91 73562 24024 (വാട്സ്ആപ്പ്) എന്ന നമ്പറിൽ ബന്ധപ്പെടുക.

പുതിയതുറ സെന്‍റ് നിക്കോളാസ് പള്ളിയിൽ തിരുനാളിനു കൊടിയേറി

വിഴിഞ്ഞം: കൊച്ചെടത്വ എന്നും പൊറ്റയിൽ പള്ളി എന്നും അറിയപ്പെടുന്ന പ്രമുഖ തീർഥാടന കേന്ദ്രമായ വിശുദ്ധ നിക്കോളാസ് പള്ളിയിൽ വിശുദ്ധ ഗീവർഗീസ് സഹദായുടെ തിരുനാളിന് കൊടിയേറി. പുതിയതുറ കുരിശടിയിലെ ജപമാലയെ തുടർന്ന് അശ്വാരൂഡ സേന, കുരിശ് വാഹകർ, അൾത്താര ബാലകർ, മുത്തുകുട ചൂടിയ സ്ത്രീകൾ, വാദ്യമേളങ്ങൾ, ഭക്തസഭകൾ എന്നിവരുടെ അകമ്പടിയോടെ കൊടിമരത്തിലേക്കു പതാക പ്രദക്ഷിണം നടന്നു. കൊടിമരത്തിനു മുന്നിൽ പൂജ നൃത്തം, ഇടവക ചരിത്രം, പ്രാർഥന നൃത്തം എന്നിവുമുണ്ടായിരുന്നു. പരിശുദ്ധത്മാവിന്‍റെ ഗാനാലാപനവും ബൈബിൾ വായനയ്ക്കുംശേഷം വജ്ര ജൂബിലി ഗാനമായ "ദിവ്യാത്മ ഗീവർഗീസ്' പ്രകാശനം ചെയ്തു. തുടർന്നു പതാക വെഞ്ചരിച്ച് ഇടവക വികാരി ഫാ. ഗ്ലാഡിൻ അലക്സ് കൊടിയേറ്റം നിർവഹിച്ചു. ഫാ. ജറാൾഡ് മുഖ്യകാർമികനായ ദിവ്യബലിയിൽ ഫാ. മൈക്കിൾ തോമസ് വചനപ്രഘോഷണം നടത്തി. ഇന്നു രാവിലെ ആറിനും 10.30 നും ദിവ്യബലി ഉണ്ടായിരിക്കും. വൈകുന്നേരം ആറിനു പുതിയതുറ ബീച്ച് മൈതാനത്തിൽ ദിവ്യബലി ഉണ്ടായിരിക്കും. പതിനായിരകണക്കിനു തീർഥാടകർ എത്തുന്ന തിരുനാൾ ദിനങ്ങളിൽ പോലീസ്, ഫയർ ഫോഴ്സ്, എക്സൈസ്, ആരോഗ്യം വകുപ്പ്, വാട്ടർ അഥോറിറ്റി, പിഡബ്ല്യൂഡി, കെഎസ്ഇബി എന്നീ വകുപ്പുകളുടെ സേവനം ഉണ്ടാകും. കെഎസ്ആർടിസി പ്രത്യേക ബസ് സർവീസ് ആരംഭിച്ചു. തീർഥാടകരുടെ സഹയത്തിനായി സേവാസംഘം ഓഫീസും ഇടവക ജനങ്ങളുടെ നേതൃത്വത്തിൽ വോളന്‍റിയർമാരും സജ്ജരാണ്. ജനപ്രധിനിധികളും ഉത്സവക്കമ്മിറ്റിയും ഇടവക കമ്മിറ്റിയും അടങ്ങുന്ന സംഘം ഓരോ ദിവസവും നടക്കുന്ന കാര്യങ്ങൾ മുഴുവൻ വിലയിരുത്തും. തിരുനാളാഘോഷം മേയ് നാലിനു സമാപിക്കും.

വെഞ്ഞാറമൂട് കൂട്ടക്കൊല: അന്വേഷണം പൂർത്തിയായി: കുടുംബത്തിനു കടബാധ്യത 48 ലക്ഷം: അഫാൻ ഏകപ്രതി, കുറ്റപത്രം അടുത്തമാസം

വെഞ്ഞാറമൂട് : വെഞ്ഞാറമ്മൂട് കൂട്ടക്കൊലയ്കക്കു കാരണം കടബാധ്യതയെന്ന് ഉറപ്പിച്ച് പൊലീസ്. കേസിൽ പോലീസിന്‍റെ അന്വേഷണം പൂർത്തിയായി. കേസിലെ ഏകപ്രതിയായ അഫാന്‍റെ കുടുംബത്തിന് 48 ലക്ഷം രൂപയുടെ കടബാധ്യതയുണ്ടെന്നും പോലീസ് വ്യക്തമാക്കി. അന്വേഷണം പൂർത്തിയായതിനു പിന്നാലെ കുറ്റപത്രം തയാറാക്കൽ നടപടികളിലേക്ക് പോലീസ് കടന്നു. അടുത്തമാസത്തോടെ കുറ്റപത്രം സമർപ്പിക്കും. കുതിച്ചുയർന്ന കടവും കടക്കാർ പണം തിരികെ ചോദിച്ചതിലെ ദേഷ്യവുമാണ് കൊലയുടെ കാരണമായി അന്വേഷണസംഘം കണ്ടെത്തിയത്. ബന്ധുക്കളിൽ നിന്നായി 16 ലക്ഷം രൂപയും 17 ലക്ഷം രൂപയുടെ ഹൗസിംഗ് ലോണും മൂന്നുലക്ഷം രൂപയുടെ പഴ് സണൽ ലോണും ഒന്നര ലക്ഷത്തിന്‍റെ ബൈക്ക് ലോണും 10 ലക്ഷത്തിന്‍റെ പണയവുമായിരു ന്നു കടം. അമ്മയും വല്ല്യമ്മയും സഹോദരനും ബന്ധുക്കളും കാമുകിയുമടക്കം ആറു പേരെയാണ് അഫാൻ ചുറ്റികയ്ക്ക് അടിച്ചുവീഴ്ത്തിയത്. കടം വീട്ടാൻ സഹായിക്കാതിരുന്നതോടെയാണ് വല്ല്യമ്മ, പിതൃസഹോദരൻ, ഇദ്ദേഹത്തിന്‍റെ ഭാര്യ എന്നിവരെ കൊന്നതെന്നും പണയംവച്ച സ്വർണം തിരികെ ചോദിച്ചതിന്‍റെ വൈരാഗ്യത്തിലാണു കാമുകിയെ കൊന്നതെന്നും പോലീസ് പറയുന്നു. പതിനഞ്ചുപേരിൽ നിന്നായാണ് കുടുംബം പണം കടം വാങ്ങിയിരുന്നത്. അഫാൻ ഏക പ്രതിയായ കേസിൽ അമ്മ ഷെമീനയെ മുഖ്യസാക്ഷിയാക്കും. കൊലയുടെ കാരണം കൂടാതെ സമയക്രമവും പോലീസ് ഉറപ്പിച്ചു. ഫെബ്രുവരി 24നു രാവിലെ 10.30ന് അമ്മയെ ആക്രമിച്ചു, 11.30ന് വല്യമ്മയേയും ഒന്നരയ്ക്കും രണ്ടിനുമിടയിൽ പിതൃസഹോദരനേയും ഭാര്യയേയും കൊന്നു. പിന്നീട് ബാറിൽ പോയി മദ്യപിച്ച ശേഷം വൈകുന്നേരം 4.15 ഓടെ ഫർസാനയേയും നാലേ മുക്കാലോടെ അനിയനേയും ആക്രമിച്ചെന്നാണു കണ്ടെത്തൽ.

ബഹറിനിൽ മലയാളി കുഴഞ്ഞു വീണ് മരിച്ചു

പേയാട് : ബഹറിനിൽ മലയാളി കുഴഞ്ഞു വീണ് മരിച്ചു. തിരുമല സ്വദേശി ഡി. എ. ഗിരീഷ് (50) ആണ് മരിച്ചത്. ജുഫൈർ ക്ലബിൽ രാത്രി ഷട്ടിൽ കളിക്കുന്നതിനിടെയാണ് കുഴഞ്ഞു വീണ് മരിച്ചത്. ബഹ്റൈനിലെ ബാങ്കിലെ ജീവനക്കാരനായിരുന്നു. മൃതദേഹം ഇപ്പോൾ സൽമാനിയ ആശുപത്രിയിലാണ്. നാട്ടിലേക്ക് കൊണ്ടു പോകാനുള്ള നടപടിക്രമങ്ങൾ പുരോഗമിക്കുകയാണ്. സംസ്കാര ചടങ്ങുകൾ നാട്ടിലെത്തിച്ച ശേഷം. ഭാര്യ: ഷീജ. മക്കൾ: ഗ്രീഷ്മ (മെഡിക്കൽ വിദ്യാർഥി), ഗൗരി (വിദ്യാർഥിനി).

മാവിന്‍റെ ശിഖരം ഒടിഞ്ഞു വീണ് യുവാവ് മരിച്ചു

പൂവാർ: മാങ്ങ പറിക്കുന്നതിനിടെ ശിഖരം ഒടിഞ്ഞ് വീണ് യുവാവ് മരിച്ചു. പൂവാർ അരുമാനൂർ പള്ളിവിള ആറാട്ടുകടവിൽ പരേതനായ സുകുമാരന്‍റെയും ശ്യാമളയുടെയും മകൻ കെ. എസ്. രാജീവൻ (ഉണ്ണി-46) ആണ് മരിച്ചത്. കൂലിപ്പണിക്കാരനായിരുന്നു. ഇന്നലെ ഉച്ചയ്ക്ക് രണ്ടരയോടെ അരുമാനൂർ ജംഗ്ഷന് സമീപത്തായിരുന്നു അപകടം. മാവിൻ മാങ്ങ പറിക്കാന്നതിനിടെ ശിഖരം ഒടിഞ്ഞു താഴെ വീഴുകയായിരുന്നു. തലയ്ക്ക് ഗുരുതരമായി പരിക്കേറ്റ രാജീവനെ ഉടൻ തന്നെ നെയ്യാറ്റിൻകര ജനറൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം തിരുവനന്തപുരം മെഡിക്കൽ കോളജ് ആശുപ്രതി മോർച്ചറിയിൽ. പോസ്റ്റ്മോർട്ടത്തിനു ശേഷം സംസ്കാരം ഇന്ന് വൈകുന്നേരം നടക്കും. പീതാംബരൻ, സാക്ഷ എന്നിവർ സഹോദരങ്ങളാണ്. പൂവാർ പോലീസ് കേസെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]