ചേവായൂര്‍ സഹകരണ ബാങ്ക്: ഹർജിയിലെ ആവശ്യം തള്ളി
Tuesday, November 26, 2024 2:51 AM IST
കൊച്ചി: ചേവായൂര്‍ സഹകരണ ബാങ്ക് ഭരണസമിതിയെ നയപരമായ തീരുമാനമെടുക്കുന്നതില്‍ നിന്ന് വിലക്കണമെന്ന ആവശ്യം ഹൈക്കോടതി അനുവദിച്ചില്ല. തെരഞ്ഞെടുപ്പ് റദ്ദാക്കണമെന്നതടക്കം ആവശ്യമുന്നയിച്ച് നല്‍കിയ ഹര്‍ജിയിലെ ഇടക്കാല ആവശ്യമാണ് തള്ളിയത്.
തെരഞ്ഞെടുപ്പ് റദ്ദാക്കണമെന്ന ഹര്‍ജി തീര്‍പ്പാകും വരെ നയപരമായ തീരുമാനമെടുക്കുന്നത് തടയണമെന്നായിരുന്നു 11 കോണ്‍ഗ്രസ് സ്ഥാനാര്‍ഥികളുടെ ഇടക്കാല ആവശ്യം. അതേസമയം ഹര്‍ജിയില്‍ സംസ്ഥാന സഹകരണ തെരഞ്ഞെടുപ്പ് കമ്മീഷനടക്കം എതിര്‍കക്ഷികളോട് വിശദീകരണം തേടി.
സഹകരണ ബാങ്ക് തെരഞ്ഞെടുപ്പില്‍ വ്യാപക ക്രമക്കേട് നടത്തിയെന്നും ഇതിന്‍റെ ഭാഗമായി ഭയാനകാന്തരീക്ഷം സൃഷ്ടിച്ചെന്നുമായിരുന്നു ഹര്‍ജിയിലെ ആരോപണം.
തെരഞ്ഞെടുപ്പ് ദിവസം വോട്ടര്‍മാര്‍ ആക്രമിക്കപ്പെട്ട സ്ഥിതി വിശേഷമുണ്ടായി. കോണ്‍ഗ്രസ് പാനലിലുള്ള സ്ഥാനാര്‍ഥികള്‍ക്ക് പോലീസ് സംരക്ഷണം നല്‍കിയില്ലെന്നും ഹര്‍ജിയില്‍ ആരോപിക്കുന്നു.