കമ്മീഷന്‍റെ പരിഗണനാവിഷയങ്ങള്‍ അടിയന്തരമായി നിശ്ചയിക്കണം: കെആര്‍എല്‍സിസി
Monday, November 25, 2024 3:49 AM IST
കൊച്ചി: മുനമ്പം നിവാസികളുടെ ഭൂമിയിലെ അവകാശം പൂര്‍ണമായി സംരക്ഷിക്കാനും റവന്യു അവകാശങ്ങള്‍ പുനഃസ്ഥാപിക്കാനും കഴിയുംവിധം സര്‍ക്കാര്‍ പ്രഖ്യാപിച്ച ജുഡീഷല്‍ കമ്മീഷന്‍റെ പരിഗണനാവിഷയങ്ങള്‍ അടിയന്തരമായി നിശ്ചയിച്ചുനൽകണമെന്ന് കെആര്‍എല്‍സിസി ആവശ്യപ്പെട്ടു.
മൂന്നു മാസത്തെ കാലാവധിയാണ് കമ്മീഷനു നൽകിയിരിക്കുന്നത്. ഈ സമയപരിധിക്കുള്ളില്‍ റിപ്പോര്‍ട്ട് ലഭ്യമാക്കാന്‍ വേണ്ട നടപടികള്‍ സ്വീകരിക്കണം. കമ്മീഷന്‍ മാധ്യമങ്ങളിലൂടെ നടത്തുന്ന ചില പ്രതികരണങ്ങള്‍ മുനമ്പം നിവാസികളില്‍ ആശങ്ക വളര്‍ത്തുന്നവയാണ്. സമയം കൂടുതല്‍ വേണമെന്ന കമ്മീഷന്‍റെ ആവശ്യം അപ്രസക്തമാണ്.
സമയപരിധിയില്‍ അന്വേഷണം പൂര്‍ത്തിയാക്കാനാണു കമ്മീഷന്‍ ശ്രമിക്കേണ്ടത്.
ഇതിനാവശ്യമായ അടിസ്ഥാനസൗകര്യങ്ങളും മാനവശേഷിയും സര്‍ക്കാര്‍ ലഭ്യമാക്കണമെന്നും കെആര്‍എല്‍സിസി ജനറല്‍ സെക്രട്ടറി ഫാ. തോമസ് തറയില്‍, വൈസ് പ്രസിഡന്‍റ് ജോസഫ് ജൂഡ് എന്നിവര്‍ ആവശ്യപ്പെട്ടു.