നോർവിച്ച്: യുകെയിൽ അന്തരിച്ച സേവ്യർ ഫിലിപ്പോസ് മരങ്ങാട്ടിന്റെ (അപ്പച്ചൻകുട്ടി - 73) സംസ്കാരം ബുധനാഴ്ച നോർവിച്ചിൽ നടക്കും. മക്കളെ സന്ദർശിക്കുവാനും പേരക്കുട്ടികളുടെ ആഘോഷമായ ദിവ്യകാരുണ്യ സ്വീകരണത്തിലും ജ്ഞാനസ്നാനത്തിലും പങ്കുചേരുവാനുമാണ് സേവ്യർ ഫിലിപ്പോസ് യുകെയിലെത്തിയത്.
അന്ത്യോപചാര തിരുക്കർമങ്ങളിലും സംസ്കാര ശുശ്രൂഷകളിലും ഗ്രേറ്റ് ബ്രിട്ടൻ സീറോമലബാർ എപ്പാർക്കിയുടെ അധ്യക്ഷൻ മാർ ജോസഫ് സ്രാമ്പിക്കൽ മുഖ്യ കാർമികത്വം വഹിക്കും. ചാൻസലർ റവ.ഡോ. മാത്യു പിണക്കാട്ട് സഹ കാർമികത്വം വഹിക്കുന്നതാണ്.
സെന്റ് ജോർജ് കത്തോലിക്കാ ദേവാലയത്തിൽ വച്ചാണ് അന്ത്യോപചാര തിരുക്കർമങ്ങൾ നടക്കുക. തിരുക്കർമങ്ങൾക്കും പൊതുദർശനത്തിനും ശേഷം നോർവിച്ച് സിറ്റി സെമിത്തേരിയിൽ സംസ്കാരം നടക്കും.
സെന്റ് തോമസ് സീറോമലബാർ മിഷൻ നോർവിച്ച് വികാരി ഫാ. ജിനു മുണ്ടുനടക്കൽ അന്ത്യോപചാര - സംസ്കാര ശുശ്രുഷകൾക്കും അനുബന്ധ ചടങ്ങുകൾക്കും അജപാലന നേതൃത്വം വഹിക്കും.
ഫാ. ഡാനി മോളോപ്പറമ്പിൽ, ഫാ.ഫിലിഫ് പന്തമാക്കൽ, ഫാ.ഇമ്മാനുവേൽ ക്രിസ്റ്റോ നെരിയാംപറമ്പിൽ, ഫാ. ജോസ് അഞ്ചാനിക്കൽ തുടങ്ങിയ വൈദികർ സഹ കാർമികത്വം വഹിക്കുന്നതാണ്.
കൂടാതെ സിറോമലബാർ വൈദികരും ക്നാനായ യാക്കോബായ, ഓർത്തഡോക്സ് വൈദികരും വിടവാങ്ങൽ ശുശ്രൂഷകളിൽ സന്നിഹിതരാവും. കോട്ടയം തുരുത്തി സ്വദേശിയായ പരേതൻ, ചങ്ങനാശേരി അതിരൂപതയിലെ മർത്ത് മറിയം ഫൊറോനാ പള്ളി ഇടവകാംഗമാണ്.
ഭാര്യ പരേതയായ ലിസമ്മ സേവ്യർ, തുരുത്തി, കരിങ്ങട കുടുംബാംഗം. അൻസ് സേവ്യർ, നോർവിച്ചിൽ താമസിക്കുന്ന അനിത, അമല, അനൂപ് എന്നിവർ മക്കളും ജിന്റാ മാലത്തുശേരി (ഇഞ്ചിത്താനം), നോർവിച്ചിൽ താമസിക്കുന്ന ജെറീഷ് പീടികപറമ്പിൽ (കുറിച്ചി), സഞ്ജു കൈനിക്കര (വലിയകുളം), സോണിയ നെല്ലിപ്പള്ളി (ളായിക്കാട്) എന്നിവർ മരുമക്കളുമാണ്. പരേതനായ തങ്കച്ചൻ മരങ്ങാട്ട്, ആന്റണി ഫിലിപ്പ് (തുരുത്തി) എന്നിവർ സഹോദരങ്ങളും.
സേവ്യർ ഫിലിപ്പോസിന്റെ വേർപാട് കുടുംബാംഗങ്ങളോടൊപ്പം മലയാളി സമൂഹത്തെയാകെ വേദനിപ്പിച്ചിരിക്കുകയാണ്. പരേതന് അന്ത്യാജ്ഞലി അർപ്പിക്കുന്നതിനും വിടയേകുന്നതിനുമായി ദേവാലയത്തിൽ പൊതുദർശനം ക്രമീകരിക്കുന്നുണ്ട്.
ബുധനാഴ്ച രാവിലെ 11.15ന് അന്ത്യോപചാര തിരുക്കർമങ്ങൾ നോർവിച്ചിൽ ആരംഭിക്കുന്നതും പൊതുദർശനത്തിനു ശേഷം നോർവിച്ച് സിറ്റി സെമിത്തേരിയിൽ സംസ്കരിക്കുന്നതുമാണ്.
പള്ളിയുടെ വിലാസം: St George Catholic Church, Sprowston Road, Norwich, NR3 4HZ.
സെമിത്തേരി: Norwich City (Earlham Cemetery), Farrow Road, NR5 8AH.