ADVERTISEMENT

ADVERTISEMENT

വിജയോത്സവം സംഘടിപ്പിച്ചു

മതിലകം സെന്‍റ്് ജോസഫ്സ്
ഹയർ സെക്കൻഡറി സ്കൂൾ

പള്ളിവളവ്‌: മതിലകം സെന്‍റ്് ജോസഫ്സ് ഹയർ സെക്കൻഡറി സ്കൂളിൽ 2024-25 അധ്യയന വർഷത്തിലെ എസ്എസ്എൽസി, പ്ലസ് ടു, എൽഎസ്‌എസ്, യുഎസ്എസ് പരീക്ഷകളിൽ ഉന്നത വിജയം കരസ്ഥ മാക്കിയ വിദ്യാർഥികൾക്ക് അനുമോദനമേകി. മതിലകം പള്ളിവളവ് സാൻജോ കൺവൻഷൻ സെന്‍ററിൽ സംഘടിപ്പിച്ച പുരസ്കാരദാന സമ്മേളനം ഇ.ടി. ടൈസൺ എംഎൽഎ ഉദ്ഘാടനം ചെയ്തു. സ്കൂൾ പിടിഎ സംഘടിപ്പിച്ച അനുമോദന സമ്മേളനത്തിൽ പിടിഎ പ്രസിഡന്‍റ് സി.എം. ജുഗുനു അധ്യക്ഷത വഹിച്ചു. ഹെഡ്മാസ്റ്റർ ജോജി ജോസഫ് ആമുഖപ്രസംഗം നടത്തി.

മതിലകം ബ്ലോക്ക് പഞ്ചായത്ത്‌ പ്രസിഡന്‍റ് സി.കെ. ഗിരിജ എസ്എസ്എൽസി പുരസ്‌കാര ദാനവും ജില്ലാപഞ്ചായത്ത്‌ മെമ്പർ സുഗത ശശിധരൻ പ്ലസ് ടു പുരസ്‌കാര ദാനവും മതിലകം ഗ്രാമപഞ്ചായത്ത്‌ പ്രസിഡന്‍റ് സീനത്ത് ബഷീർ എൽഎസ്എസ്, യുഎസ്എസ്, എൻഎംഎംഎസ് പുരസ്‌കാരദാനവും സ്കൂൾ മാനേജർ ഫാ. ഷൈജൻ കളത്തിൽ എൻഡോവ്മെന്‍റ് വിതരണവും നിർവഹിച്ചു.

മതിലകം ഗ്രാമപഞ്ചായത്ത്‌ വൈസ് പ്രസിഡന്‍റ് ടി.എസ്. രാജു, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ സുമതി സുന്ദരൻ, പ്രിൻസിപ്പൽ ഡോമനിക് സാവിയോ, പിടിഎ വൈസ് പ്രസിഡന്‍റ് ധനേഷ് കാവാലം, മാതൃസംഗമം പ്രസിഡന്‍റ് റഹിയാനത്ത് അൻസാരി, മാനേജ്മെന്‍റ്് സെക്രട്ടറി മാർട്ടിൻ പെരേര, ഡെപ്യൂട്ടി ഹെഡ്മിസ്ട്രസ് സുനി സെബാസ്റ്റ്യൻ, സ്റ്റാഫ്‌ സെക്രട്ടറി വി.എം. റിയാസ് തുടങ്ങിയവർ പ്രസംഗിച്ചു.

ചെമ്പുച്ചിറ സർക്കാർ
ഹയര്‍സെക്കന്‍ഡറി സ്‌കൂളില്‍

മറ്റത്തൂര്‍: ചെമ്പുച്ചിറ സര്‍ക്കാര്‍ ഹയര്‍സെക്കന്‍ഡറി സ്‌കൂളിലെ വിജയോത്സവം ജില്ലാ പഞ്ചായത്ത് പ്രസിഡന്‍റ് വി.എസ്. പ്രിന്‍സ് ഉദ്ഘാടനം ചെയ്തു. പിടിഎ പ്രസിഡന്‍റ് പി.എസ്. പ്രശാന്ത് അധ്യക്ഷത വഹിച്ചു.

പഞ്ചായത്തംഗം ശാന്തി ബാബു, എസ്എംസി വൈസ് ചെയര്‍മാന്‍ സന്തോഷ് കുന്നുമ്മല്‍, എംപിടിഎ വൈസ് പ്രസിഡന്‍റ് സുനിത സുനില്‍, വികസന‌സമിതി കണ്‍വീനര്‍ ടി. ബാലകൃഷ്ണമേനോന്‍, പ്രിന്‍സിപ്പല്‍ കെ. സതീഷ്, പ്രധാനാധ്യാപിക കൃപകൃഷ്ണന്‍, സീനിയര്‍ അധ്യാപിക കെ. ജി. ഗീത എന്നിവര്‍ പ്രസംഗിച്ചു.

സ്‌കൂളിലെ 28 ക്ലാസ് മുറികളിലേക്ക് ഉപയോഗപ്പെടുത്താനായി അധ്യാപിക പി.കെ. അജിത സ്‌പോണ്‍സര്‍ ചെയ്ത് സ്ഥാപിച്ച സൗണ്ട് സിസ്റ്റം ജില്ലാപഞ്ചായത്ത് പ്രസിഡന്‍റ് സ്വിച്ച് ഓണ്‍ ചെയ്തു. നാഷണല്‍ പവര്‍ ലിഫ്റ്റിംഗ് ചാമ്പ്യന്‍ഷിപ്പില്‍ ഗോള്‍ഡ് മെഡല്‍ നേടിയ ഹൈസ്‌കൂള്‍ അധ്യാപിക സി.ബി. സുനിതാദേവി, സൗണ്ട് സിസ്റ്റം സ്‌പോണ്‍സര്‍ ചെയ്ത അധ്യാപിക പി.കെ.അജിത എന്നിവരെ ആദരിച്ചു.

എസ്എസ്എല്‍സി, പ്ലസ്ടു, യുഎസ്എസ്, എല്‍എസ്എസ് പരീക്ഷകളില്‍ ഉന്നതവിജയം നേടിയ വിദ്യാര്‍ഥികളെ ഉപഹാരം നല്‍കി അനുമോദിച്ചു.

ADVERTISEMENT

നാലമ്പലദർശന പുണ്യത്തിന് ഒരുങ്ങി ശ്രീവില്വാദ്രിനാഥ ക്ഷേത്രം

തിരുവില്വാമല: ക്ഷേത്രങ്ങളിൽ ഇനി ഒരു മാസക്കാലം രാമായണ മാസാചരണത്തിന്‍റെ നാളുകൾ. ശ്രീവില്വാദ്രിനാഥക്ഷേത്രം, പറക്കോട്ടുകാവ്, പാമ്പാടി സോമേശ്വരം മഹാദേവക്ഷേത്രം, കൊച്ചുപറക്കോട്ടുകാവ്, വടക്കേ കൂട്ടാല ഭദ്രകാളിക്ഷേത്രം തുടങ്ങി മേഖലയിലെ വിവിധ ക്ഷേത്രങ്ങളിൽ ഒരുക്കങ്ങൾ പൂർത്തിയായി. ശ്രീരാമ - ലക്ഷ്മണൻമാരുടെ പ്രതിഷ്ഠയുള്ള വില്വാദ്രിനാഥ ക്ഷേത്രത്തിൽ രാമായണ മാസാചരണത്തോടനുബന്ധിച്ച് നാലമ്പലദർശനത്തിന് ഇന്ന് തുടക്കമാകും. ശ്രീരാമ-ലക്ഷ്മണ-ശത്രുഘ്ന ക്ഷേത്രദർശനപൂർത്തീകരണങ്ങൾ ഒരു ദിവസംതന്നെ നടത്തുന്ന പാലക്കാട് കേന്ദ്രീകരിച്ചുള്ള നാലമ്പലദർശനപാതയിൽ തിരുവില്വാമല വില്വാദ്രിനാഥക്ഷേത്രം, 18 കിലോമീറ്റർ അകലെ പാലക്കാട് കുഴൽമന്ദത്തിനടുത്തുള്ള പുൽപ്പുര മന്ദം ഭരതക്ഷേത്രം, കൽക്കുളം ശത്രുഘ്ന ക്ഷേത്രം എന്നീ ക്ഷേത്രങ്ങളാണ് ഉൾപ്പെടുന്നത്. ഈ പാത താരതമ്യേന തിരക്കു കുറഞ്ഞതും പാലക്കാടിന്‍റെ പ്രകൃതിഭംഗിയുടെ പാശ്ചാത്തലമുള്ളതുമാണ്. ഇരട്ട ശ്രീകോവിലുകളുള്ള ശ്രീ വില്വാദ്രിനാഥക്ഷേത്രത്തിൽ ഹനുമാൻസ്വാമിയെ കൂടി ദർശിക്കാമെന്നതാണ് ഈ നാലമ്പലദർശനത്തിലെ മറ്റൊരു മാഹാത്മ്യം. രാമായണ മാസാചരണത്തോടനുബന്ധിച്ച് ക്ഷേത്രത്തിൽ രാമായണ പാരായണം, പ്രസാദ ഊട്ട്, ചുറ്റുവിളക്ക് എന്നിവയുണ്ടാകും. ക്ഷേത്രത്തിൽ ഇന്നു വൈകീട്ട് 6.30ന് അകലൂർ ഭഗവതി നൃത്ത കലാക്ഷേത്രം അവതരിപ്പിക്കുന്ന നൃത്താർച്ചന അരങ്ങേറും.

വള്ളംമറിഞ്ഞ് ഒരാളെ കാണാതായി; രണ്ടുപേർ നീന്തിരക്ഷപ്പെട്ടു

ചേറ്റുവ: മത്സ്യബന്ധനത്തിനുള്ള ചെറുവള്ളം മറിഞ്ഞ് ഒരാളെ കാണാതായി; രണ്ടു പേർ നീന്തി കരപ്പറ്റി. ചേറ്റുവ അഴിമുഖത്തിന് പടിഞ്ഞാറ് ശക്തമായ കാറ്റിലും തിരയിലും പെട്ട് മീന്‍പിടിത്ത ചെറുവള്ളം ഇന്നലെ വൈകിട്ട് ആറോടെ മറിഞ്ഞത്. വള്ളത്തിലുണ്ടായിരുന്ന മൂന്ന് പേരില്‍ ഒരാളെ കാണാതായി. കയ്പമംഗലം കൂരിക്കുഴി നെച്ചിപ്പറമ്പില്‍ അഷ്‌റഫിന്‍റെ മകന്‍ അന്‍സിലി(18)നെയാണ് കാണാതായത്. വലപ്പാട് ബീച്ച് സ്വദേശികളായ കല്ലയില്‍ ബിബിന്‍(38), തട്ടാരുപുരയ്ക്കല്‍ വിജിത്ത്(35) എന്നിവരാണ് നീന്തിരക്ഷപ്പെട്ടത്. ഏത്തായി ബീച്ചിലേയ്ക്ക് നീന്തിക്കയറിയ ഇവരെ ഏങ്ങണ്ടിയൂര്‍ എംഐ ആശുപത്രിയിൽ പ്രവേശിപ്പിച്ചു. വലപ്പാട് കഴിമ്പ്രം സ്വദേശി രാജുവിന്‍റെ ഉടമസ്ഥതയിലുള്ള ശ്രീ മഹാസേനന്‍ വള്ളത്തിന്‍റെ കാരിയര്‍ വള്ള(ഡിങ്കി)മാണ് അപകടത്തില്‍ പെട്ടത്. കടല്‍ പെട്ടെന്ന് പ്രക്ഷുബ്ധമായതിനെ തുടര്‍ന്ന് ചേറ്റുവ ഹാര്‍ബറിലേക്കു വരികയായിരുന്ന വള്ളം മറിയുകയായിരുന്നു. വള്ളത്തിലുണ്ടായിരുന്ന മൂന്നുപേരും ഏറെ നേരം മറിഞ്ഞ വള്ളത്തില്‍ പിടിച്ചുനിന്ന് രക്ഷപ്പെടാന്‍ ശ്രമിക്കുന്നതിനിടെ അന്‍സില്‍ പിടിത്തം വിട്ട് മുങ്ങിപ്പോകുകയായിരുന്നുവെന്ന് പറയുന്നു. മുനയ്ക്കകടവ് തീരദേശ പോലീസും മത്സ്യതൊഴിലാളികളും ബോട്ടിലും വള്ളങ്ങളിലുമായി അന്‍സിലിനായി തെരച്ചില്‍ നടത്തിയെങ്കിലും കണ്ടെത്താനായില്ല. രാത്രിയിലും തെരച്ചിൽ നടത്തുണ്ടെങ്കിലും കാലാവസ്ഥ പ്രതികൂലമാണ്. അപകടത്തില്‍പെട്ട കാരിയര്‍ വള്ളം മത്സ്യതൊഴിലാളികളുടെ സഹായത്തോടെ കരയ്ക്കുകയറ്റി.

യൂത്ത് കോണ്‍ഗ്രസ് മാര്‍ച്ചില്‍ സംഘര്‍ഷം

പുതുക്കാട്: യൂത്ത് കോണ്‍ഗ്രസ് പുതുക്കാട് നിയോജക മണ്ഡലം കമ്മിറ്റിയുടെ നേതൃത്വത്തില്‍ കൊടകര ബ്ലോക്ക് പഞ്ചായത്ത് ഓഫീസിലേക്കു നടത്തിയ മാര്‍ച്ചില്‍ സംഘര്‍ഷം. ബാരിക്കേഡ് മറികടന്ന പ്രവര്‍ത്തകര്‍ക്കുനേരെ പോലീസ് ജലപീരങ്കി പ്രയോഗിച്ചു. നാലു യൂത്ത് കോണ്‍ഗ്രസ് പ്രവര്‍ത്തകര്‍ക്കു പരിക്കേറ്റു. ഇവരെ പുതുക്കാട് താലൂക്ക് ആശുപത്രിയില്‍ പ്രവേശിപ്പിച്ചു. ഫൈസല്‍ ഇബ്രാഹിം, ജോജു പുന്നക്കര, റിന്‍റോ ജോണ്‍സണ്‍, ജെറോം ജോണ്‍ എന്നിവര്‍ക്കാണ് പരിക്കേറ്റത്. ബ്ലോക്ക് ഓഫീസിലേക്ക് തള്ളിക്കയറാന്‍ ശ്രമിച്ച യൂത്ത് കോണ്‍ഗ്രസ് നിയോജക മണ്ഡലം പ്രസിഡന്‍റ് ഫൈസല്‍ ഇബ്രാഹിം, സംസ്ഥാന സെക്രട്ടറി ജെറോം ജോണ്‍ എന്നിവരെ പോലീസ് കൈയ്യേറ്റം ചെയ്തുവെന്നാരോപിച്ച് പ്രവര്‍ത്തകരും പോലീസും വാക്കുതര്‍ക്കമുണ്ടായി. പുതുക്കാട് ഗവ. താലൂക്ക് ആശുപത്രിയിലെ നിര്‍മാണപ്രവര്‍ത്തനങ്ങളിലെ അഴിമതി വിജിലന്‍സ് അന്വേഷിക്കണമെന്നാവശ്യപ്പെട്ടായിരുന്നു മാര്‍ച്ച്. തുടര്‍ന്ന് നടന്ന ഉപരോധസമരം ഡിസിസി ജനറല്‍ സെക്രട്ടറി ശോഭ സുബിന്‍ ഉദ്ഘാടനം ചെയ്തു. പുതുക്കാട് നിയോജകമണ്ഡലം പ്രസിഡന്‍റ് ഫൈസല്‍ ഇബ്രാഹിം അധ്യക്ഷത വഹിച്ചു. നേതാക്കളായ സതീഷ് വിമലന്‍, ജെറോം ജോണ്‍ വട്ടക്കുഴി, കെ.എല്‍. ജോസ്, പോള്‍സണ്‍ തെക്കുംപീടിക, നൈജോ ആന്‍റോ, ജസ്റ്റിന്‍ ജോണ്‍സന്‍, കെ. ഗോപാലകൃഷ്ണന്‍, ടി.എം. ചന്ദ്രന്‍, സെബി കൊടിയന്‍, സുധന്‍ കാരയില്‍, പി.ടി. വിനയന്‍, സിജോ പുന്നക്കര, ജിമ്മി മഞ്ഞളി, ജെന്‍സന്‍ കണ്ണത്ത്, ഷാഫി കല്ലൂപറമ്പില്‍, കെ.എസ്. മനോജ് കുമാര്‍, ലിനോ മൈക്കിള്‍, ആന്‍സ് ആന്‍റോ, ശ്യാംരാജ്, ഹരന്‍ ബേബി, റിന്‍റോ ജോണ്‍സന്‍, ജിജോ പുന്നക്കര എന്നിവര്‍ പ്രസംഗിച്ചു. എട്ടു പ്രവര്‍ത്തകരെ പോലീസ് അറസ്റ്റ് ചെയ്ത് ജാമ്യത്തില്‍ വിട്ടയച്ചു. ഫൈസല്‍ ഇബ്രാഹിം, ആല്‍വിന്‍ വര്‍ഗീസ്, ജെറോം ജോണ്‍, ജെസ്റ്റിന്‍ ജോണ്‍സന്‍, റിന്‍റോ ജോണ്‍സണ്‍, വൈശാഖ് ഐത്തടാന്‍, ജിമ്മി മഞ്ഞളി, ജെന്‍സണ്‍ കണ്ണത്ത് എന്നിവരെയാണ് അറസ്റ്റ് ചെയ്തത്.

പോളിടെക്നിക്കിൽ സംഘട്ടനം

തൃപ്രയാർ: സംസ്ഥാന ഇന്‍റർപോളി കലോത്സവത്തിലുണ്ടായ എസ്എഫ്ഐ ആക്രമണത്തിൽ പ്രതിഷേധിച്ച് സംസ്ഥാനവ്യാപകമായി കെഎസ്‌യു ആഹ്വാനം ചെയ്ത വിദ്യാഭ്യാസ ബന്ദിൽ തൃപ്രയാർ പോളി ടെക്നിക്കിൽ സമരം ചെയ്ത കെഎസ്‌യു ഭാരവാഹികളെ ആകമിച്ചതായി പരാതി. യൂണിറ്റ് പ്രസിഡന്‍റ് ആഷിക്ക്, സെക്രട്ടറി അദ്നാൻ എന്നിവർക്കു നേരെയാണ് എസ്എഫ്ഐ പ്രവർത്തകർ ആക്രമണം നടത്തിയത്. പരിക്കേറ്റ ഇരുവരേയും വലപ്പാട് ഗവൺമെന്‍റ് ആശുപത്രിയിൽ പ്രവേശിപ്പിച്ചു. മുൻ ഡിസിസി പ്രസിഡന്‍റ് ജോസ് വള്ളൂർ, കോൺഗ്രസ്‌ നാട്ടിക മണ്ഡലം പ്രസിഡന്‍റ് പി.എം. സിദ്ദിഖ്, മുൻ നാട്ടിക പഞ്ചായത്ത് പ്രസിഡന്‍റ് പി. വിനു, വലപ്പാട് പഞ്ചായത്ത്‌ മെമ്പർ വൈശാഖ് വേണുഗോപാൽ, കെഎസ്‌യു ജില്ലാ വൈസ് പ്രസിഡന്‍റ് ഉവൈസ് നാസർ, ജില്ലാ സെക്രട്ടറി എം.വി. വൈഭവ്, യൂത്ത് കോൺഗ്രസ്‌ നേതാക്കളായ സഗീർ പടുവിങ്ങൽ, ലായേഷ് മാങ്ങാട്ട് എന്നിവർ ആശുപത്രിയിൽ ചികിത്സയിൽ കഴിയുന്നവരെ സന്ദർശിച്ചു.

മികച്ച നേട്ടവുമായി മുണ്ടൂർ കുടുംബാരോഗ്യകേന്ദ്രം

മുണ്ടൂർ : നാഷണല്‍ ക്വാളിറ്റി അഷ്വറന്‍സ് സ്റ്റാൻഡേർഡ്സ് പട്ടികയിൽ മികച്ച നേട്ടവുമായി കൈപ്പറമ്പ് പഞ്ചായത്തിലെ മുണ്ടൂർ കുടുംബരോഗ്യ കേന്ദ്രം. നേരത്തെ തന്നെ ഈ പട്ടികയിൽ ഇവർ ഇടം പിടിച്ചിരുന്നെങ്കിലും ഇത്തവണ ദേശീയ ഗുണനിലവാര അംഗീകാരം ലഭിച്ച സംസ്ഥാനത്തെ ഏഴ് ആരോഗ്യകേന്ദ്രങ്ങളിൽ ഏറ്റവും മികച്ച പോയിന്‍റായ 96.63 ശതമാനം നേടിയാണ് പ്രവേശനം. നാഷണല്‍ ക്വാളിറ്റി അഷ്വറന്‍സ് സ്റ്റാൻഡേർഡ്സ് അംഗീകാരത്തിന് മൂന്നു വര്‍ഷത്തെ കാലാവധിയാണുള്ളത്. മികച്ച നേട്ടം കൈവരിക്കാനായതിന്‍റെ സന്തോഷത്തിലാണ് കൈപ്പറമ്പ് ഗ്രാമപഞ്ചായത്തും മുണ്ടൂർ കുടുംബാരോഗ്യ കേന്ദ്രത്തിലെ ജീവനക്കാരും നാട്ടുകാരും.

"ആ തോക്ക് ഇപ്പോഴും ശബ്ദിച്ചുകൊണ്ടിരിക്കുന്നു'

തൃശൂർ: രാഷ്ട്രപിതാവായ ഗാന്ധിജിയുടെ നെഞ്ചിലേക്കു വെടിയുണ്ടകൾ ഉതിർത്ത തോക്ക് ശബ്ദിച്ചു കൊണ്ടേയിരിക്കുന്ന ഭയാനകമായ അന്തരീക്ഷമാണ് ഇന്ന് ഇന്ത്യയിൽ എന്പാടുമെന്നു പി. ബാലചന്ദ്രൻ എംഎൽഎ അഭിപ്രായപ്പെട്ടു. ജോയിന്‍റ് കൗണ്‍സിൽ നന്മ സാംസ്കാരികവേദിയുടെ സർഗാത്മക പ്രതിരോധം ഉദ്ഘാടനംചെയ്തു സംസാരിക്കുകയായിരുന്നു അദ്ദേഹം. ബഹിരാകാശത്തുനിന്നുള്ള കാഴ്ചയിൽ അതിരുകളില്ലാത്ത സുന്ദരമായ ഭൂമി, വിവിധങ്ങളായ അതിരുകൾ സൃഷ്ടിച്ച് അതിനപ്പുറവും ഇപ്പുറവും നിന്ന് പോരടിക്കുന്ന മനുഷ്യരും പൊതു ഇടത്തിൽ ഒരു പൊതിച്ചോറ് തുറന്നു ഭക്ഷിക്കുന്പോൾപോലും അതിലെ മാംസാഹാരം മറച്ചുപിടിക്കേണ്ട വിധത്തിൽ മാറിക്കൊണ്ടിരിക്കുന്ന ചുറ്റുപാടുകളും നമ്മെ ഭയപ്പെടുത്തുന്നുവെന്നും എംഎൽഎ കൂട്ടിച്ചേർത്തു. ജോയിന്‍റ് കൗണ്‍സിൽ സംസ്ഥാനചെയർമാൻ എസ്. സജീവ് അധ്യക്ഷത വഹിച്ച ചടങ്ങിൽ സാഹിത്യകാരൻ ടി.ഡി. രാമകൃഷ്ണൻ മുഖ്യപ്രഭാഷണം നടത്തി. എഴുത്തുകാരി ലിസി, യുവകലാസാഹിതി രക്ഷാധികാരി ഇ.എം. സതീശൻ എന്നിവർ പ്രഭാഷണം നടത്തി. കെ.പി. ഗോപകുമാർ, വി.വി. ഹാപ്പി, എം.എസ് സുഗതകുമാരി തുടങ്ങിയവർ പ്രസംഗിച്ചു.

ചക്കംകണ്ടത്ത് മാലിന്യം തള്ളാൻ നഗരസഭ തീരുമാനം; ഇല്ലെന്ന് എംഎൽഎ

ചാവക്കാട്: ചക്കംകണ്ടത്തെ മാലിന്യ സംസ്കരണ ശാലയിലേക്ക് ടാങ്കർ ലോറി വഴി ശുചിമുറി മാലിന്യം എത്തിക്കാൻ ഗുരുവായൂർ നഗരസഭ കൗൺസിൽ എടുത്ത തീരുമാനം റദ്ദാക്കണമെന്ന് പൗരാവകാശ വേദി ആവശ്യപ്പെട്ടു. കഴിഞ്ഞമാസം 28ന് ചേർന്ന ഗുരുവായൂർ കൗൺസിൽ യോഗ ത്തിലാണ് ഭരണകക്ഷിയായ സിപിഐയുടെ വിയോജന കുറിപ്പ് തള്ളി സിപിഎമ്മും പ്രതിപക്ഷവും ചേർന്ന് ഗുരുവായൂരിലെ കക്കൂസ് മാലിന്യം ചക്കംകണ്ടത്ത് തള്ളാൻ തീരുമാനിച്ചത്. ഗുരുവായൂർ നഗരസഭ ചെയർമാന്‍റെ സാന്നിധ്യത്തിലാണ് ഗുരുവായൂരിലെ മാലിന്യം ലോറിയിൽ കൊണ്ടുവന്ന് ചക്കംകണ്ടത്ത് തള്ളുകയില്ലെന്ന് എംഎൽഎ പറഞ്ഞത്. പ്രഖ്യാപനം ആത്മാർത്ഥതയുള്ളതാണെങ്കിൽ ശുരുവായൂർ നഗരസഭയുടെ കൗൺസിൽ യോഗം വിളിച്ചു ചേർത്ത് തീരുമാനം റദ്ദ് ചെയ്യുകയാണ് വേണ്ടതെന്ന് പൗരാവകാശ വേദി ആവശ്യപ്പെട്ടു. കൗൺസിൽ തന്നെ തിരുത്താതെ എംഎൽഎ യുടെ അധ്യക്ഷതയിൽ യോഗം ചേർന്ന് തീരുമാനം നടപ്പിലാക്കില്ലെന്ന് പ്രഖ്യാപിച്ചത് തെരഞ്ഞെടുപ്പ് മുന്നിൽ കണ്ട് ജനങ്ങളുടെ കണ്ണിൽ പൊടിയിടാനുള്ള തന്ത്രമാണെന്ന് പൗരവേദി ആരോപിച്ചു. നഗരസഭ കൗൺസിൽ യോഗം ചേർന്ന് മാലിന്യം തള്ളാനുള്ള തീരുമാനം റദ്ദ് ചെയ്യണമെന്നാവശ്യപ്പെട്ട് 20 ന് ഞായറാഴ്ച വൈകീട്ട് അഞ്ചിന് താലൂക്ക്പൗരാവകാശ വേദിയുടെയും ചാവക്കാട് താലൂക്ക് പൗരസമിതിയുടെയും നേത്രത്ത്വത്തിൽ ചക്കംകണ്ടത്ത് പ്രതിഷേധ യോഗം സംഘടിപ്പിക്കും.

പാലയൂർ ഫെസ്റ്റ് വർണാഭമായി

പാലയൂർ: യൂത്ത് ഓഫ് പാലയൂരിന്‍റെ നേതൃത്വത്തിൽ പാലയൂർ ഫെസ്റ്റ് ആഘോഷിച്ചു. ചാവക്കാട് പോലീസ് സ്റ്റേഷൻ പരിസരത്ത് നിന്നാരംഭിച്ച എഴുന്നള്ളിപ്പിന് മൂന്ന് ആനകൾ അണിനിരന്നു വിവിധവാദ്യമേളങ്ങൾ അകമ്പടിയായി.ബ്രദേഴ്സ് ക്ലബിന്‍റെ നേതൃത്വത്തിൽ സെന്‍റ് ആന്‍റണീസ് കോൺവന്‍റ് പരിസരത്ത് നിന്നും മലാക്ക് ക്ലബിന്‍റെ നേതൃത്വത്തിൽ മുതുവട്ടൂർ സെന്‍ററിൽ നിന്നും എഴുന്നള്ളിപ്പുകൾ ആരംഭിച്ചു. എഴുന്നള്ളിപ്പുകൾ രാത്രി പാലയൂരിൽ സമാപിച്ചു. ജെറിൻ ജോസ്, എൻ.ജി. മേ ജോ, വിബിൻ കെ. വിൻസന്‍റ്, ബിനിൽ ജോസ്, ഹെൽവിൻ ജോർജ്, ജേക്കബ് ജോൺസൻ, പ്രിൻസ് പിയൂസ് തുടങ്ങിയവർ നേതൃത്വം നൽകി.

കുരിയച്ചിറ മാലിന്യ പ്ലാന്‍റ്: തീരുമാനങ്ങൾ നടപ്പാക്കിയില്ലെങ്കിൽ മാലിന്യം തടയും: സമരസമിതി

കുരിയച്ചിറ: ജൈവമാലിന്യസംസ്കരണ പ്ലാന്‍റ് പുനർനിർമാണവുമായി ബന്ധപ്പെട്ടു കളക്ടറുടെ ചേംബറിൽ നടന്ന സംയുക്തയോഗത്തിലെടുത്ത തീരുമാനങ്ങൾ നടപ്പാക്കാതെ മാലിന്യമെത്തിച്ചാൽ തടയുമെന്നു ആക്‌ഷൻ കൗണ്‍സിൽ ഫോർ ക്ലീൻ കുരിയച്ചിറ കൂട്ടായ്മ. ജില്ലാ കളക്ടറുടെ തീരുമാനങ്ങൾ മേയർ അട്ടിമറിച്ചെന്ന് ആരോപിച്ചു പ്ലാന്‍റിന്‍റെ ഉദ്ഘാടനദിവസം കൂട്ടായ്മ പ്രതിഷേധിച്ചിരുന്നു. മൂന്നുകോടി ചെലവിട്ടു മുംബൈയിൽനിന്ന് എത്തിച്ച മെഷീൻ വാറന്‍റി കാലയളവ് കഴിഞ്ഞതിനുശേഷമാണു സ്ഥാപിച്ചതെന്ന ആരോപണവും ഉദ്ഘാടനദിവസംതന്നെ ഉയർന്നിരുന്നു. പ്ലാന്‍റിലേക്കു സ്ഥിരം വൈദ്യുതി കണക്‌ഷൻ നൽകാതെ മന്ത്രിയെ ബോധ്യപ്പെടുത്താനുള്ള ശ്രമംമാത്രമാണു നടന്നതെന്ന് ആക്‌ഷൻ കൗണ്‍സിൽ ചൂണ്ടിക്കാട്ടി. മാലിന്യസംസ്കരണം പാളിയതോടെ കഴിഞ്ഞവർഷം നടത്തിയ സമരത്തെത്തുടർന്നാണ് ആധുനിക പ്ലാന്‍റ് സ്ഥാപിക്കാൻ തീരുമാനമായത്. മേയ് 28നു കളക്ടർ സംയുക്ത മീറ്റിംഗ് വിളിച്ചു. 2024 ജൂണ്‍ നാലിനു കോർപറേഷൻ മിനിറ്റ്സും പുറത്തിറക്കി. മീറ്റിംഗിലെ തീരുമാനം കഴിഞ്ഞ 13 മാസത്തിനിടെ കോർപറേഷൻ നടപ്പാക്കിയിട്ടില്ലെന്നു സമരസമിതി ആരോപിക്കുന്നു. പ്ലാന്‍റിന്‍റെ പ്രവർത്തനം കൃത്യമായി നടക്കുന്നുണ്ടോയെന്ന് അറിയാൻ അഞ്ച് കൗണ്‍സിലർമാർ ഉൾപ്പെടെയുള്ള മോണിറ്ററിംഗ് കമ്മിറ്റി രൂപീകരിക്കുക, കൂട്ടായ്മ അംഗങ്ങൾക്കു തിരിച്ചറിയൽ കാർഡ് അടക്കം നൽകുക, പ്ലാന്‍റിന്‍റെ പ്രവർത്തനത്തിൽ അപാകതയുണ്ടെങ്കിൽ റിപ്പോർട്ട് നൽകുക എന്നിവയടങ്ങുന്നതാണ് തീരുമാനം. നിലവിൽ പ്ലാന്‍റിലേക്ക് ആർക്കും പ്രവേശനം നൽകിയിട്ടില്ല. പ്ലാന്‍റ് പ്രവർത്തനക്ഷമമായാൽ 24 ഡിവിഷനുകളിൽനിന്നുള്ള മാലിന്യമെത്തും. അതിനുമുന്പ് ആവശ്യങ്ങളിൽ ചർച്ച നടത്തണമെന്നും ശക്തനിൽ സ്ഥാപിക്കേണ്ട മെഷീനാണ് കുരിയച്ചിറയിലുള്ളതെന്നും ഇതിനെതിരേ വിജിലൻസിൽ പരാതി നൽകിയിട്ടുണ്ടെന്നും സമരസമിതി പറഞ്ഞു.

യുവാവിനെ ആക്രമിച്ച ഗുണ്ട അറസ്റ്റില്‍

കാട്ടൂര്‍: കാപ്പ ഉത്തരവ് ലംഘിച്ച് യുവാവിനെ ആക്രമിച്ച കേസില്‍ കുപ്രസിദ്ധ ഗുണ്ടയെ കാട്ടൂര്‍ പോലീസ് അറസ്റ്റ് ചെയ്തു. നിരവധി ക്രിമിനല്‍ കേസുകളിലെ പ്രതിയായ കാട്ടൂര്‍ ഇല്ലിക്കാട് സ്വദേശി കതിരപ്പുള്ളി വീട്ടില്‍ തിലേഷിനെ (40) യാണ് അറസ്റ്റ് ചെയ്തത്. കാപ്പ ചുമത്തപ്പെട്ടതിനാൽ ഇരിങ്ങാലക്കുട ഡിവൈഎസ്പി ഓഫീസില്‍ 2025 മാര്‍ച്ച് 28 മുതല്‍ ആറുമാസ കാലത്തേക്ക് എല്ലാ ബുധനാഴ്ചയും ഒപ്പുവയ് ക്കേണ്ടയാളാണിത്. കാപ്പ ഉത്തരവ് ലംഘിച്ച് കഴിഞ്ഞ ദിവസം രാത്രി 11 ന് കാട്ടൂര്‍ എസ്എന്‍ഡിപി അമ്പലത്തിനു സമീപത്തുള്ള ബസ് സ്റ്റോപ്പിനടുത്തുവച്ച് കാറിന്‍റെ അതിവേഗത ചോദ്യം ചെയ്തതിലുള്ള വൈ രാഗ്യത്താല്‍ ബൈക്ക് യാത്രക്കാരനായ കരാഞ്ചിറ തേക്കൂട്ട് വീട്ടില്‍ സിബിന്‍ രാധ (31) യെ തിലേഷ് അസഭ്യം പറഞ്ഞ് ബൈക്കില്‍ വച്ചിരുന്ന ഹെല്‍മറ്റ് കൊണ്ട് തലക്കടിച്ച് പരിക്കേല്‍പ്പിക്കുകയായിരുന്നു. പോലീസ് തിലേഷ് സ ഞ്ചരിച്ചിരുന്ന കാറും കസ്റ്റഡിയിലെടുത്തു. കാട്ടൂര്‍, ഇരിങ്ങാലക്കുട, പഴയന്നൂര്‍, ആലപ്പുഴ രാമങ്കരി പോലീസ് സ്റ്റേഷനുകളിലായി രണ്ട് വധശ്രമക്കേസുൾപ്പടെ 13 ക്രിമിനല്‍ കേസുകളിലെ പ്രതിയാണ് തിലേഷ്. കാട്ടൂര്‍ സിഐ ഇ.ആര്‍. ബൈജു, സബ് ഇന്‍സ്പെക്ടര്‍ ബാബു ജോര്‍ജ്, എഎസ്ഐ കെ.ഡി. മനോജ്, സീനിയര്‍ സിവില്‍ പോലീസ് ഓഫീസര്‍മാരായ സി.ജി. ധനേഷ്, ജോഷി ജോര്‍ജ് എന്നിവരാണ് അന്വേഷണസംഘത്തിലുണ്ടായിരുന്നത്.

കരുവന്നൂര്‍ പള്ളിയില്‍ മെഗാമെഡിക്കല്‍ ക്യാമ്പ് 20ന്

കരുവന്നൂര്‍: സെന്‍റ്് മേരീസ് പള്ളിയില്‍ കത്തോലിക്ക കോണ്‍ഗ്രസിന്‍റെ ആഭിമുഖ്യത്തില്‍ അമല ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സിന്‍റെ സഹകരണത്തോടെ മെഗാ മെഡിക്കല്‍ ക്യാമ്പ് സംഘടിപ്പിക്കുന്നു. 20 ന് രാവിലെ ഒന്പതു മുതല്‍ പള്ളി മതബോധന ഹാളിലാണ് ക്യാമ്പ്. ക്യാമ്പിന്‍റെ ഉദ്ഘാടനം മുന്‍ സര്‍ക്കാര്‍ ചീഫ് വിപ്പ് അഡ്വ. തോമസ് ഉണ്ണിയാടന്‍ നിര്‍വഹിക്കും. അമല ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ് ജോയിന്‍റ്് ഡയറക്ടര്‍ ഫാ. ഷിബു പുത്തന്‍പുരയ്ക്കല്‍ സിഎംഐ മുഖ്യാതിഥി ആയിരിക്കും. കത്തോലിക്ക കോണ്‍ഗ്രസ് പ്രസിഡന്‍റ്് ജോസഫ് തെക്കൂടന്‍ അധ്യക്ഷത വഹിക്കും. പള്ളി വികാരിയും ഡയറക്ടറുമായ ഫാ. ഡേവിസ് കല്ലിങ്ങല്‍ മുഖ്യപ്രഭാഷണം നടത്തും. ജനറല്‍ മെഡിസിന്‍, ഗൈനക്കോളജി, സര്‍ജറി, കാര്‍ഡിയോളജി, ഇഎന്‍ടി, ഓര്‍ത്തോ, കിഡ്‌നി എന്നീ ഏഴ് ചികിത്സാവിഭാഗങ്ങളുടെ വിദഗ്ധരായ ഡോക്ടര്‍മാരും അമല മെഡിക്കല്‍ ടീമും നേതൃത്വം നല്‍കും. പാപ്പ്സ്മിയര്‍ ടെസ്റ്റ്, ഓഡിയോമെട്രി, ഇസിജി, ബിപി, ഷുഗര്‍ തുടങ്ങിയ ടെസ്റ്റുകളും പ്രത്യേകമായി കിഡ്‌നി സ്‌ക്രീനിംഗ് ടെസ്റ്റും സൗജന്യമായി ലഭിക്കും. ക്യാമ്പില്‍ പങ്കെടുക്കുന്ന രോഗികള്‍ക്ക് അമലയിലെ തുടര്‍ചികിത്സകള്‍ക്ക് 40 ശതമാനം വരെ ഡിസ്‌കൗണ്ട് ലഭിക്കും. ക്യാമ്പില്‍ പങ്കെടുക്കുന്ന അര്‍ഹരായ രോഗികള്‍ക്ക് സൗജന്യമായി മരുന്നുകളും നല്‍കുന്നുണ്ട്. ക്യാമ്പ് ദിവസം രാവിലെ എട്ടുമുതല്‍ 11 വരെ രജിസ്്‌ട്രേഷന്‍ സൗകര്യം ഒരുക്കിയിട്ടുണ്ട്.

സെന്‍റ് ജോസഫ്സ് കോളജിന് എല്‍ഇഡി വാളും സൗണ്ട് സിസ്റ്റവും മന്ത്രി ആര്‍. ബിന്ദു കൈമാറി

ഇരിങ്ങാലക്കുട: സെന്‍റ് ജോസഫ്സ് കോളജിലേക്ക് ഇരിങ്ങാലക്കുട എംഎല്‍എയും മന്ത്രിയുമായ ഡോ. ആര്‍. ബിന്ദുവിന്‍റെ 2023- 24 വര്‍ഷത്തെ പ്രത്യേക വികസന ഫണ്ടില്‍ നിന്നും അനുവദിച്ച എല്‍ഇഡി വാളിന്‍റെയും സൗണ്ട് സിസ്റ്റത്തിന്‍റെയും ഉദ്ഘാടനം മന്ത്രി ഡോ. ആര്‍. ബിന്ദു നിര്‍വഹിച്ചു. സെന്‍റ്് ജോസഫ്സ് കോളജ് ഓഡിറ്റോറിയത്തില്‍ നടന്ന ചടങ്ങില്‍ മന്ത്രി ഡോ. ആര്‍. ബിന്ദു എല്‍ഇഡി വോളും സൗണ്ട് സിസ്റ്റവും കോളജിന് കൈമാറി. 25 ലക്ഷം രൂപ ഉപയോഗിച്ചാണ് 15.75 അടി നീളവും 8.4 അടി വീതിയുമുള്ള എല്‍ഇഡി വോളും 12000 വാട്ട് സൗണ്ട് സിസ്റ്റവും കോളജിന് നല്‍കിയത്. ഇരിങ്ങാലക്കുട നഗരസഭ ചെയര്‍പേഴ്സണ്‍ മേരിക്കുട്ടി ജോയ് അധ്യക്ഷത വഹിച്ചു. പ്രിന്‍സിപ്പല്‍ സിസ്റ്റര്‍ ഡോ. ബ്ലെസി, കൗണ്‍സിലര്‍ ഫെനി എബിന്‍ വെള്ളാനിക്കാരന്‍, റെയ്ച്ചല്‍ റോസ്, ഐക്യുഎസി കോ-ഓര്‍ഡിനേറ്റര്‍ ഡോ. ടി.വി. ബിനു എന്നിവര്‍ പങ്കെടുത്തു.

എൽഡിഎഫ് അക്രമത്തിനു കാരണം അസഹിഷ്ണുത: പഞ്ചായത്ത് പ്രസിഡന്‍റ്

ചാലക്കുടി: കോടശേരി പഞ്ചായത്തിലെ കോൺഗ്രസ് ഭരണത്തിൽ അസഹിഷ്ണുത മൂത്താണ് എൽ ഡിഎഫ് അക്രമം നടത്തിയതെന്ന് കോടശേരി പഞ്ചായത്ത് പ്രസിഡന്‍റ്് കെ.പി. ജെയിംസ് ആരോപിച്ചു. വെള്ളിക്കുളങ്ങര പോലീസ് എൽഡിഎഫിന് കൂട്ടുനിൽക്കുന്നതായും അദ്ദേഹം ആരോപിച്ചു. ഹരിതകർമസേനയിലെ 20 ൽ പരം അംഗങ്ങൾ പരാതി നൽകിയതിനാലാണ് ഹരിതകർമസേന പ്രസിഡന്‍റ്് തെരഞ്ഞെടുപ്പ് റദ്ദാക്കിയതെന്ന് പഞ്ചായത്ത് പ്രസിഡന്‍റ് പറഞ്ഞു. പഞ്ചായത്തിൽ ഭരണപക്ഷം നടത്തുന്ന വികസന പ്രവർത്തനങ്ങൾ എൽഡിഎഫ് അംഗങ്ങൾ മനപ്പൂർവം തകർക്കാൻ ശ്രമിക്കുന്നതിന്‍റെ ഭാഗമായാണ് പഞ്ചായത്തിലെ കഴിഞ്ഞ ദിവസം ഉണ്ടായ അനിഷ്ട സംഭവങ്ങളെ ന്നും ഹരിതകർമസേന ഉണ്ടാക്കിയത് ഇപ്പോഴത്തെ കോൺഗ്രസ് ഭരണസമിതിയുടെ കാലത്താ ണെന്നും അദ്ദേഹം പറഞ്ഞു. എന്നാൽ അതിനെ കുടുംബശ്രീയുടെ കീഴിലാക്കാൻ എൽഡിഎഫ് ശ്രമിക്കുകയാണ്. കുടുംബശ്രീ അംഗങ്ങളല്ലാത്ത നാലു പേരെ ഒഴിവാക്കിയാണ് അവിടെ പ്രസിഡന്‍റ്് തെരഞ്ഞെടുപ്പ് നടത്തിയത്. പരാതി ലഭിച്ചപ്പോഴാണ് തെരഞ്ഞെടുപ്പ് ഭരണസമിതിയോഗം റദ്ദാക്കിയത്‌. ഈ യോഗത്തിൽ നിന്ന് ഇറങ്ങിപ്പോയ എൽഡി എഫ് അംഗങ്ങൾ കോൺഗ്രസ് അംഗങ്ങളെ തടയുകയായിരുന്നു. സംഘർഷത്തിൽ പരിക്കേറ്റ ഭരണകക്ഷി അംഗവും മുൻ പഞ്ചായത്ത് പ്രസിഡന്‍റുമായ റിജു മാവേലി ഗുരുതരമായി പരിക്കേറ്റ് എറണാകുളത്ത് ചികിത്സയിലാണ്. എന്നാൽ വെള്ളിക്കുളങ്ങര പോലീസ് എൽഡിഎഫ് അംഗങ്ങൾക്കെതിരെ നടപടിയെടുക്കുന്നില്ല. നടപടിയെടുക്കുന്നില്ലെങ്കിൽ കോൺഗ്രസ് നേതൃത്വത്തിൽ പോലീസ് സ്റ്റേഷൻ മാർച്ച് നടത്തുമെന്ന് പറഞ്ഞു. കോൺഗ്രസ് പരിയാരം ബ്ലോക്ക് പ്രസിഡന്‍റ് എം.ടി. ഡേവിസ്, കോടശേരി മണ്ഡലം പ്രസിഡന്‍റ് ജോൺസൺ മാളിയേക്കൽ, കോ ൺഗ്രസ് ബ്ലോക്ക് സെക്രട്ടറി റിൻ സൺ മണവാളൻ, പഞ്ചായത്ത് അംഗങ്ങളായ സി.വി. ആന്‍റണി, ഡെന്നി വർഗീസ് എന്നിവരും പത്രസമ്മേളനത്തിൽ പങ്കെടുത്തു.

കളിക്കളം ഇപ്പോള്‍ ചെളിക്കളം

ഇരിങ്ങാലക്കുട: ഞാറ്റുവേലകഴിഞ്ഞു, ഇനി ഞാറുനടുവാന്‍ കാത്തിരിക്കുകയാണ് ഇരിങ്ങാലക്കുടയിലെ ഒരു കൂട്ടം കായിക പ്രേമികള്‍. ഉഴുതുമറിച്ച് വിത്തിറക്കാന്‍ പാകമായിരിക്കുന്ന അവസ്ഥയിലാണു നഗരസഭ മൈതാനത്തിന്‍റെ ഇപ്പോഴത്തെ അവസ്ഥ. മൈതാനത്തിന്‍റെ പടിഞ്ഞാറേ അരികില്‍ ഒരിടത്ത് സെപ്റ്റിക് ടാങ്കിന്‍റെ കുഴിയും മറുഭാഗത്ത് വേസ്റ്റുകള്‍ നിക്ഷേപിച്ച കുഴിയും. ക്രെയിനും ലോറിയും ഉള്‍പ്പടെയുള്ള വലിയ വാഹനങ്ങള്‍ കയറിയിറങ്ങി നഗരസഭയുടെ മൈതാനം ഇപ്പോള്‍ ചെളിപ്പാടമായിരിക്കുകയാണ്. ശക്തമായ മഴയില്‍ പലപ്പോഴും മൈതാനത്തിനുള്ളില്‍ വെള്ളം കെട്ടിനില്‍ക്കുന്നതു പതിവായതിനാല്‍ അന്നൊന്നും കണ്ടില്ലെന്നുനടിച്ച നഗരസഭ ഞാറ്റുവേല മഹോത്സവത്തിനു മുന്നോടിയായി മൈതാനത്തിന്‍റെ ചുറ്റുമുള്ള കാനകളുടെ സ്ലാബുകള്‍ ഇളക്കിമാറ്റി വൃത്തിയാക്കിയിരുന്നു. വടക്കുഭാഗത്തെ കാനവൃത്തിയാക്കലിന് അല്‍പം വൃത്തി കൂടിപ്പോയി. കാനകളുടെ വീതി കൂടിയതിനാല്‍ സ്ലാബുകള്‍ പകുതിയും കാനകള്‍ക്കുള്ളിലെ വെള്ളത്തിലാണ്. പടര്‍ന്നുപന്തലിച്ച് തണലേകിയിരുന്ന ഒരു മരവും ഇവിടെ കടപുഴകി. ഞാറ്റുവേല മഹോത്സവത്തിനു പിന്നാലെ അതേ‌വേദിയില്‍ സിപിഐയുടെ ജില്ലാ സമ്മേളനത്തോടനുബന്ധിച്ചുള്ള പൊതുസമ്മേളനവും അരങ്ങേറി. ഇതിനിടയില്‍ പ്രതിഷേധം ശക്തമായപ്പോള്‍ സെപ്റ്റിക് ടാങ്കിന്‍റെ കുഴിമൂടി. ഫുഡ് സ്റ്റാളിലെ വേസ്റ്റ് വെള്ളം ഒഴുക്കി‌വിട്ടിരുന്ന കുഴി ഞാറ്റുവേല മഹോത്സവം കഴിഞ്ഞതിനു പിന്നാലെ മൂടി. ഇനി ഈ മൈതാനം കായികപ്രേമികള്‍ക്ക് ഉപയോഗിക്കാന്‍ കഴിയുംവിധം എന്നുനേരെയാകും എന്ന ആശങ്ക ബാക്കിയാവുകയാണ്. മുമ്പ് ഇവിടെ നടത്തിയ കെഎല്‍ 45 മൈതാനത്തേക്ക് വാഹനം കയറിയതിന്‍റെ പേരില്‍ ഒരു ലക്ഷം രൂപ പിഴ ഈടാക്കിയ നഗരസഭയാണ് അടുത്തകാലത്തൊന്നും നേരെയാക്കാന്‍ കഴിയാത്ത‌വിധം മൈതാനത്തെ നശിപ്പിച്ചിരിക്കുന്നത്. ലഹരിക്കെതിരേ ലഹരി കളിക്കളങ്ങളാകട്ടെ എന്ന മുദ്രാവാക്യം മുഴക്കിയ രാഷ്ട്രീയ നേതാക്കളുടെ കൈകള്‍തന്നെ ഇരിങ്ങാലക്കുടയുടെ ഹൃദയമായ മൈതാനത്തെ നാശോന്മുഖമാക്കിയതില്‍ കായികപ്രേമികള്‍ക്കിടയില്‍ കടുത്ത പ്രതിഷേധമുണ്ട്.

നാലമ്പലദര്‍ശനം: സ്‌പെഷല്‍ കെഎസ്ആര്‍ടിസി ബസ് സര്‍വീസ് ഫ്ലാഗ്ഓഫ് ചെയ്തു

ഇരിങ്ങാലക്കുട: നാലമ്പലദര്‍ശനത്തിനായുള്ള കെഎസ്ആര്‍ടി സി സ്‌പെഷല്‍ സര്‍വീസിന്‍റെ ഫ്ലാഗ്‌ഓഫ് ഉന്നത വിദ്യാഭ്യാസമന്ത്രി ഡോ. ആര്‍. ബിന്ദു നിര്‍വഹിച്ചു. കെഎസ്ആര്‍ടിസി ഇരിങ്ങാലക്കുട യൂണിറ്റില്‍നിന്നും രണ്ട് നാലമ്പല സര്‍വീസുകള്‍ ഇന്നുമുതല്‍ ആരംഭിക്കും. രാവിലെ ആറിനും 6.30 നും ഇരിങ്ങാലക്കുട കെഎസ്ആര്‍ടിസി സ്റ്റാന്‍ഡില്‍നിന്നുമാണ് യാത്ര ആരംഭിക്കുന്നത്. ഇരിങ്ങാലക്കുട നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. കൂടല്‍മാണിക്യം ദേവസ്വം ബോര്‍ഡ് ചെയര്‍മാന്‍ അഡ്വ. ഗോപി, ചാലക്കുടി അസി. ട്രാന്‍സ്‌പോര്‍ട്ട് ഓഫീസര്‍ കെ.ജെ. സുനില്‍, കൗണ്‍സിലര്‍മാരായ സ്മിത കൃഷ്ണകുമാര്‍, അമ്പിളി ജയന്‍, കൂടല്‍മാണിക്യം ദേവസ്വം ബോര്‍ഡ് അഡ്മിനിസ്‌ട്രേറ്റര്‍ ജി.എസ്. രാധേഷ് എന്നിവര്‍ പങ്കെടുത്തു.

ആരോഗ്യ ബോധവത്കരണ സെമിനാർ

ചാലക്കുടി: ചാലക്കുടി റെസിഡൻസ് അസോസിയേഷൻ കോ-ഒാർഡിനേഷൻ ട്രസ്റ്റ് (ക്രാക്റ്റ്) വനിതാവിഭാഗം വനിതകൾക്കായി ഹെൽത്ത് അവെയർനെസ് സെമിനാർ നടത്തി. ക്രാക്റ്റ് പ്രസിഡന്‍റ്് പോൾ പാറയിൽ ഉദ്ഘാടനം ചെയ്തു. ക്രാക്റ്റ് വനിതാവിംഗ് പ്രസിഡന്‍റ്് സിമി അനൂപ് അധ്യക്ഷത വഹിച്ചു. ഹെൽത്ത് അവെയർനെസ് സെ മിനാറിന്‍റെ ഭാഗമായി ഡോ. ടി. രാ ജൻ "മരുന്നില്ലാതെ എങ്ങനെ ജീവിക്കാം' എന്ന വിഷയത്തിൽ ക്ലാസ് നയിച്ചു. ക്രാക്റ്റ് സെക്രട്ടറി പി. ഡി. ദിനേഷ്, വനിതാവിംഗ് സെക്രട്ടറി സ്മിജ സണ്ണി, കൗൺസിലർ വി.ജെ. ജോജി, എൽസി ഡേവിസ്, ഹേമലത ചന്ദ്രബാബു, ജിഷ ഗിരീഷ് എന്നിവർ പ്രസംഗിച്ചു.

ഒ.പി. ബാലൻമേനോൻ ശതാഭിഷേക ആഘോഷം 19, 20 തീയതികളിൽ

തൃശൂർ: ജീവകാരുണ്യപ്രവർത്തകനായ ഒ.പി. ബാലൻമേനോന്‍റെ ശതാഭിഷേക ആഘോഷങ്ങൾ 19, 20 തീയതികളിൽ നടക്കും. 19നു വിവേകോദയം സ്കൂളിൽ ഉച്ചയ്ക്കുശേഷം മൂന്നിനു ശിശുസംരക്ഷണമേഖലയിലെ ഇന്നത്തെ പ്രശ്നങ്ങൾ, പരിഹാരം, മാർഗനിർദേശങ്ങൾ വിഷയത്തിൽ വിദഗ്ധർ പങ്കെടുക്കുന്ന സെമിനാർ. ജില്ലാ ശിശുസംരക്ഷണസമിതി മുൻചെയർമാൻ പി.ഒ. ജോർജ് നേതൃത്വം കൊടുക്കും. 20നു രാവിലെ 10.30നു നീരാഞ്ജലി ഓഡിറ്റോറിയത്തിൽ പി. ബാലചന്ദ്രൻ എംഎൽഎ ഉദ്ഘാടനം നിർവഹിക്കും. തേറന്പിൽ രാമകൃഷ്ണൻ അധ്യക്ഷത വഹിക്കും. സുഹൃദ്സംഗമം ഡോ. പി.വി. കൃഷ്ണൻനായർ ഉദ്ഘാടനം ചെയ്യും. ഉച്ചയ്ക്കുശേഷം രണ്ടിനു കലാസായാഹ്നത്തിന്‍റെ ഉദ്ഘാടനം എം.പി. സുരേന്ദ്രൻ ഉദ്ഘാടനം ചെയ്യും. അമ്മന്നൂർ കുട്ടൻചാക്യാരുടെ കൂത്ത്, കലാമണ്ഡലം സിന്ധുവിന്‍റെ നങ്ങ്യാർകൂത്ത്, ഗാനസുധ എന്നിവ നടക്കും. വൈകീട്ട് 4.30നു സമാപനസമ്മേളനവും സമാദരണീയവും മന്ത്രി കെ. രാജൻ ഉദ്ഘാടനം ചെയ്യും. മേയർ എം.കെ. വർഗീസ് മുഖ്യാതിഥിയാകും. പത്രസമ്മേളനത്തിൽ ശ്രീധരൻ തേറമ്പിൽ, കെ. രാധാകൃഷ്ണൻ, കെ. നന്ദകുമാർ, സി.കെ. കുട്ടിശങ്കരൻ എന്നിവർ പങ്കെടുത്തു.

യുവാവ് ജീവനൊടുക്കിയ സംഭവം; കാമുകിയടക്കം മൂന്നുപേർ അറസ്റ്റില്‍

ഇരിങ്ങാലക്കുട: കരുവന്നൂര്‍ തേലപ്പിള്ളിയില്‍ യുവാവ് ജീവനൊടുക്കിയ സംഭവത്തില്‍ ആത്മഹത്യാപ്രേരണക്കുറ്റത്തിന് മൂന്നുപേര്‍ അറസ്റ്റില്‍. ഒല്ലൂര്‍ അഞ്ചേരി കൊല്ലംപറമ്പില്‍ വീട്ടില്‍ അഖില (31), ഭർത്താവ് ജീവന്‍ (31), സഹോദരൻ വല്ലച്ചിറ ചെറുശേരി ആട്ടേരി അനൂപ് (38) എന്നിവരാണ് അറസ്റ്റിലായത്. 2025 ജനുവരി 23ന് കരുവന്നൂര്‍ തേലപ്പിള്ളിയിലാണ് യുവാവ് ജീവനൊടുക്കിയത്. ആത്മഹത്യാക്കുറിപ്പ് അന്വേഷണത്തിനിടെ കണ്ടെത്തിയിരുന്നു. യുവാവ് മറ്റൊരു സ്ത്രീയുമായി വിവാഹം ഉറപ്പിച്ചിരുന്നു. ഇതറിഞ്ഞ കാമുകിയായിരുന്ന അഖിലയും ഭര്‍ത്താവായ ജീവനും അഖിലയുടെ സഹോദരന്‍ അനൂപും യുവാവിന്‍റെ തേലപ്പിള്ളിയിലുള്ള വീട്ടില്‍ കയറി ബഹളമുണ്ടാക്കിയതിലും വിവാഹം മുടക്കുകയും ചെയ്തതിലുള്ള മനോവിഷമത്തിലാണ് യുവാവ് ആത്മഹത്യ ചെയ്തത്. ഇരിങ്ങാലക്കുട പോലീസ് സ്റ്റേഷന്‍ ഇന്‍സ്പെക്ടര്‍ എം.എസ്. ഷാജന്‍, സബ് ഇന്‍സ്പെക്ടര്‍മാരായ പി.ആര്‍. ദിനേശ് കുമാര്‍, സി.എം. ക്ലീറ്റസ്, സതീശന്‍, എഎസ്ഐ മെഹറുന്നീസ, സിപിഒമാരായ അര്‍ജുന്‍, തെസ്നി ജോസ്, വിനീത്, കിഷോര്‍ എന്നിവരാണ് അന്വേഷണ സംഘത്തിലുണ്ടായിരുന്നത്.

കർക്കടകപ്പുലരി പിറക്കുന്നു, കരിവീരച്ചന്തംനിറയും ആനയൂട്ട് ഇന്ന്

തൃശൂർ: കർക്കടകപ്പുലരി ഇന്ന്. വിണ്ണിൽ കരിമേഘങ്ങൾ നിറയുന്പോൾ മണ്ണിൽ വടക്കുന്നാഥക്ഷേത്രാങ്കണത്തിൽ കരിവീരച്ചന്തവും നിറയും. കർക്കടകം ഒന്നിനു വർഷങ്ങളായി നടത്തുന്ന ഗജപൂജയും ആനയൂട്ടും ഇന്നാണ്. എല്ലാ വർഷവും നടത്തുന്ന അഷ്ടദ്രവ്യ മഹാഗണപതിഹോമവും ആനയൂട്ടും ക്ഷേത്രം തന്ത്രി ബ്രഹ്മശ്രീ പുലിയന്നൂർ ശങ്കരനാരായണൻ നന്പൂതിരിപ്പാടിന്‍റെ മുഖ്യകാർമികത്വത്തിലാണ് നടക്കുക. നാലുവർഷത്തിലൊരിക്കൽ നടത്താറുള്ള ഗജപൂജയും ഇത്തവണയുണ്ട്. പ്രത്യേകം തയാറാക്കിയ പന്തലിൽ കരിന്പടംവിരിച്ച് അഞ്ചാനകളെ വീതം മഞ്ഞപ്പട്ടണിയിച്ച് ഇരുത്തി പൂജിക്കും. ആനയൂട്ടിനെത്തുന്നവയിൽ പിടിയാനകളുടെ എണ്ണം കൂടുതലാണ്. ഗുരുവായൂർ ദേവസ്വത്തിൽനിന്ന് ഏഴ് ആനകൾ ആനയൂട്ടിനെത്തും. അറുപതോളം ആനകൾ ഉറപ്പായിട്ടുള്ളതിൽ ഒന്പതു പിടിയാനകളുണ്ട്. ഉണക്കലരിനിവേദ്യമാണ് വലിയ ഉരുളകളാക്കി ആനകൾക്കു നൽകുക. എസ്എൻഎ ഔഷധശാലയിൽ തയാറാക്കിയ ഔഷധക്കൂട്ടുകളും കരിന്പ്, തണ്ണിമത്തൻ, കൈതച്ചക്ക, കദളിപ്പഴം, കണിവെള്ളരി തുടങ്ങിയവും ആനകൾക്കു നൽകും. 12,008 നാളികേരം, 2500 കിലോ ശർക്കര, 200 കിലോ നെയ്യ്, 1000 കിലോ അവിൽ, 100 കിലോ മലർ, തേൻ, ഗണപതിനാരങ്ങ എന്നിവ ഉപയോഗിച്ചാണ് അഷ്ടദ്രവ്യ മഹാഗണപതിഹോമപ്രസാദം തയാറാക്കുക. ആനയൂട്ടു കാണാൻ വൻതിരക്ക് അനുഭവപ്പെടുമെന്നതിനാൽ തിരക്ക് നിയന്ത്രിക്കുന്നതിനായി ആളുകൾക്കു ക്ഷേത്രത്തിനകത്തേക്കു പ്രവേശിക്കാൻ പടിഞ്ഞാറേനടയിൽ താത്കാലിക ഫ്ളൈഓവർ നിർമിച്ചിട്ടുണ്ട്.

തൃശൂർ റെയിൽവേ സ്റ്റേഷനിലെ 59 ജീവനക്കാർക്കു ഭക്ഷ്യസുരക്ഷാ പരിശീലനം നൽകി

തൃശൂർ: റെയിൽവേ സ്റ്റേഷനുകളിലെ യാത്രക്കാർക്കും സന്ദർശകർക്കും സുരക്ഷിതവും ആരോഗ്യകരവുമായ ഭക്ഷണം ഉറപ്പാക്കുക എന്ന ലക്ഷ്യത്തോടെ ഈറ്റ് റൈറ്റ് സ്റ്റേഷൻ പദ്ധതിക്കു തൃശൂർ റെയിൽവേ സ്റ്റേഷനിൽ തുടക്കമായി. പദ്ധതിയുടെ ആദ്യഘട്ടമെന്ന നിലയിൽ റെയിൽവേ സ്റ്റേഷൻ കേന്ദ്രീകരിച്ച് പ്രവർത്തിക്കുന്ന വിവിധ സ്ഥാപനങ്ങളിലെ ജീവനക്കാർക്ക് ഭക്ഷ്യസുരക്ഷാ പരിശീലനം സംഘടിപ്പിച്ചു. റെയിൽവേ സ്റ്റേഷൻ അഡീഷണൽ ചീഫ് മെഡിക്കൽ സൂപ്രണ്ട് ഡോ. സെബാസ്റ്റ്യൻ ജോസഫ് ഉദ്ഘാടനം ചെയ്തു. തൃശൂർ റെയിൽവേ സ്റ്റേഷൻ പാഴ്സൽ ഹാളിൽ നടന്ന പരിശീലനത്തിൽ 59 ജീവനക്കാർ പങ്കെടുത്തു. എഫ്എസ്എസ്ഐഎ അംഗീകൃത ട്രെയ്നർ ക്ലാസുകൾക്കു നേതൃത്വം നൽകി. റെയിൽവേ സ്റ്റേഷൻ പരിസരത്തെ റീട്ടെയിൽ ഔട്ട്‌ലറ്റുകൾ, റീട്ടെയിൽ കം കാറ്ററിംഗ് സ്ഥാപനങ്ങൾ, ഫുഡ് പ്ലാസകൾ, ഫുഡ് കോർട്ടുകൾ, കിയോസ്കുകൾ എന്നിവിടങ്ങളിലെ ജീവനക്കാർ പരിശീലനത്തിൽ പങ്കെടുത്തു. ഭക്ഷ്യസുരക്ഷാ അസിസ്റ്റന്‍റ് കമ്മീഷണറുടെ നിർദേശാനുസരണം ഭക്ഷ്യസുരക്ഷാ വകുപ്പ് തൃശൂർ സർക്കിളിന്‍റെ നേതൃത്വത്തിലാണ് പദ്ധതി നടപ്പാക്കുന്നത്. ഭക്ഷ്യസുരക്ഷാ ഓഫീസർ എം.എസ്. സിക്തമോൾ അധ്യക്ഷത വഹിച്ചു. സെൻട്രൽ ഭക്ഷ്യസുരക്ഷാ ഓഫീസർ രാജപാണ്ഡ്യൻ, സെൻട്രൽ ഹെൽത്ത് ഇൻസ്പെക്ടർമാരായ എം.എ. അരുണ്‍, സ്റ്റേഷൻ മാസ്റ്റർ രാം കുമാർ, ചീഫ് കൊമേഴ്സ്യൽ ഇൻസ്പെക്ടർ എൽദോ തുടങ്ങിയവർ പങ്കെടുത്തു.

ഇരിങ്ങാലക്കുട സെന്‍റ് ജോസഫ്സിൽ അന്താരാഷ്‌ട്ര പരിസ്ഥിതി ചലച്ചിത്രമേള‌

തൃശൂർ: ഇരിങ്ങാലക്കുട സെന്‍റ് ജോസഫ്സ് കോളജിൽ അന്താരാഷ്‌ട്ര പരിസ്ഥിതി ചലച്ചിത്രമേള "ഋതു'വിന്‍റെ രണ്ടാംപതിപ്പ് നാളെയും മറ്റന്നാളും നടക്കുമെന്നു ഫെസ്റ്റിവൽ ചെയർമാനും കോളജ് പ്രിൻസിപ്പലുമായ സിസ്റ്റർ ഡോ. ബ്ലെസി പത്രസമ്മേളനത്തിൽ പറഞ്ഞു. നാളെ രാവിലെ 9.30നു ചലച്ചിത്രവികസന കോർപറേഷൻ ചെയർമാൻ പ്രേംകുമാർ ഉദ്ഘാടനം നിർവഹിക്കും. ചലച്ചിത്രകേന്ദ്ര ചെയർമാൻ ചെറിയാൻ ജോസഫ്, ഇരിങ്ങാലക്കുട സൊസൈറ്റി പ്രസിഡന്‍റ് മനീഷ് അരിക്കാട്ട് തുടങ്ങിയവർ പ്രസംഗിക്കും. അരവിന്ദ് മോഹൻരാജ് സംവിധാനംചെയ്ത "കാട്, കാടർ, ഓങ്കൽ' ആണ് ഉദ്ഘാടനചിത്രം. തുടർന്ന് ഇരുപതോളം സിനിമകളും അവയുടെ സംവിധായകരും മേളയുടെ ഭാഗമാകും. രാവിലെ 9.30 മുതൽ വൈകീട്ട് ആറുവരെ നടക്കുന്ന പ്രദർശനത്തിൽ പൊതുജനങ്ങൾക്കും പ്രവേശനമുണ്ടായിരിക്കും. ‌ചലച്ചിത്രമേളയ്ക്കു മുന്നോടിയായി ഇന്ന് ഉച്ചയ്ക്കുശേഷം 2.30നു തുരുമ്പ് എന്ന ആശയത്തെ മുൻനിർത്തിയുള്ള ഫാഷൻ ഷോ "കാളിക' നടക്കും. തൃശൂർ ചലച്ചിത്രകേന്ദ്ര, ഇരിങ്ങാലക്കുട ഫിലിം സൊസൈറ്റി, ഇന്ദുചൂഡൻ ഫൗണ്ടേഷൻ എന്നിവയുടെ സഹകരണത്തോടെ പുനരുപയോഗം, പരിസ്ഥിതിപ്രവർത്തനം എന്നീ ആശയങ്ങൾ ഉൾക്കൊണ്ടാണു ചലച്ചിത്രമേളയുടെ പ്രവർത്തനങ്ങൾ നടക്കുന്നത്. വനംവകുപ്പ്, കൃഷിഭവൻ തുടങ്ങിയ സർക്കാർ സ്ഥാപനങ്ങളും സഹകരിക്കുന്നുണ്ട്. മേളയോടനുബന്ധിച്ച് ഇന്ദുചൂഡൻ ഫൗണ്ടേഷൻ നേതൃത്വം നൽകുന്ന ഫോട്ടോഗ്രഫി എക്സിബിഷനും മധുസൂദനൻ നയിക്കുന്ന ലൈവ് കാരിക്കേച്ചറും റിസർച്ച് ഹാളിൽ നടക്കും. ഹിസ്റ്ററി വിഭാഗത്തിന്‍റെ നേതൃത്വത്തിൽ തത്സമയ മൺപാത്രനിർമാണം, വില്പന, ചരിത്രപ്രദർശനം എന്നിവയുണ്ടാകും. ഭിന്നശേഷിക്കാരായ കുട്ടികളുടെ ഉത്പന്നങ്ങളുടെ പ്രദർശനവും വില്പനയും നിപ്മർ, സാൻജോ ക്രാഫ്റ്റ് സ്റ്റാളുകളിൽ നടക്കും. എഴുത്തുകാർക്കും വായനക്കാർക്കുമുള്ള ഇടങ്ങൾ, ഓപ്പൺ കോർഡ്‌സ്‌ എന്ന തത്സമയസംഗീതപരിപാടി, ഋതുരാം ഡാൻസ് ഷോ, പരമ്പരാഗതകളികൾ, ഭക്ഷണമേള, വെള്ളത്തിന്‍റെ ഗുണനിലവാരപരിശോധന, ഇ വേസ്റ്റ് നിർമാർജനം, ഇക്കോപോട്ട് വില്പന, ഭക്ഷ്യവസ്‌തുക്കളിലെ മായംകണ്ടെത്തൽ, പരിസ്ഥിതിസൗഹൃദ ബിസിനസ് ആശയങ്ങളുടെ മത്സരം, പേപ്പർ പ്രസന്‍റേഷൻ മത്സരം, വിവിധ സെമിനാറുകൾ, സംവാദങ്ങൾ, യാത്രകൾ, കുട്ടികൾക്കായി ഓലയിൽ കലാമത്സരം, വൈദ്യരത്നം ആശുപത്രിയുമായി സഹകരിച്ചുള്ള ആയുർവേദ മെഡിക്കൽ ക്യാമ്പ് എന്നിവ വിവിധ ദിവസങ്ങളിലായി നടക്കും. മേളയുടെ പുതുക്കിയ ലോഗോ റിലീസ് ഇന്നസെന്‍റ് സോണറ്റ് നിർവഹിച്ചു. ഫെസ്റ്റിവൽ ബാഗ്, ബാഡ്‌ജ് എന്നിവയുടെ പ്രകാശനം വേണുജി നിർവഹിച്ചു. എൻസിസി അവതരിപ്പിച്ച കാവേറ്റം തീം പ്രദർശനോദ്ഘാടനവും കാർണിവൽ കൊടിയേറ്റവും മന്ത്രി ആർ. ബിന്ദു നിർവഹിച്ചു. പത്രസമ്മേളനത്തിൽ ഫെസ്റ്റിവൽ ഡ‍യറക്ടർ ലിറ്റി ചാക്കോ, സംഘാടകസമിതി ചെയർമാൻ ചെറിയാൻ ജോസഫ്, സംഘാടകസമിതി വൈസ് ചെയർമാൻ പി.കെ. ഭരതൻ, സ്റ്റുഡന്‍റ് കോ ഓർഡിനേറ്റർ ഗൗരി എന്നിവരും പങ്കെടുത്തു.

കളക്‌ടർ വാക്കുപാലിച്ചു; അവധി "സ്നേഹപൂർവം സൽമാന്'

തൃശൂർ: തന്നെ ഓടിത്തോല്പിച്ച സൽമാനു നൽകിയ വാക്ക് ജില്ലാ കളക്ടർ പാലിച്ചു. മഴമുന്നറിയിപ്പിന്‍റെ ഭാഗമായി ഇന്നു ജില്ലയിലെ വിദ്യാഭ്യാസസ്ഥാപനങ്ങൾക്കു പ്രഖ്യാപിച്ച അവധി സൽമാനു ഡെഡിക്കേറ്റ് ചെയ്ത് കളക്ടർ അർജുൻ പാണ്ഡ്യൻ. അവധി അറിയിപ്പിന്‍റെ പോസ്റ്ററിൽ "സ്നേഹപൂർവം സൽമാന്...' എന്നും ചേർത്തു. സൽമാനൊപ്പമുള്ള ഒരു പടവും. കഴിഞ്ഞമാസം പാലപ്പിള്ളിയിൽനിന്നു ചിമ്മിനി റോഡിലൂടെയുള്ള 12 കിലോമീറ്റർ മാരത്തണിനിടെയാണ് ഏഴാംക്ലാസുകാരൻ സൽമാൻ, കളക്ടറെ ഓടിത്തോല്പിച്ചാൽ അവധി നൽകുമോ എന്നു ചോദിച്ചത്. ഓക്കേ പറഞ്ഞ കളക്ടർ ഒടുവിൽ സൽമാനൊപ്പമാണ് ഫിനിഷിംഗ് പോയിന്‍റിൽ എത്തിയത്. തന്‍റെ ഒപ്പമെത്തിയ സൽമാനെ ചേർത്തുപിടിച്ചഅദ്ദേഹം, മഴയുടെ സാഹചര്യങ്ങളും മുന്നറിയിപ്പും കണക്കിലെടുത്താണ് അവധികൾ നിശ്ചയിക്കുന്നതെന്നും അടുത്ത അവധി സൽമാനു ഡെഡിക്കേറ്റ് ചെയ്യുമെന്നും ഉറപ്പുനൽകി. ഇന്നലെ അതിശക്തമായ മഴയായിരുന്നു. ഓറഞ്ച് അലർട്ടും പ്രഖ്യാപിച്ചു. ഇതോടെ അവധിയുണ്ടാകുമോ എന്ന കുട്ടികളുടെ ചോദ്യങ്ങൾക്കുള്ള മറുപടികൂടിയായാണ് കളക്ടർ സൽമാനും സൽമാനെപ്പോലെ സ്പോർട്സിനെ സ്നേഹിക്കുന്ന കൊച്ചുകൂട്ടുകാർക്കുമായി അവധി ഡെഡിക്കേറ്റ് ചെയ്തത്. ഈ മഴഅവധികൾ വീട്ടിലിരുന്നു പഠിക്കാനും മറ്റു പ്രവൃത്തികൾക്കുമായി ഉപയോഗിക്കണം. പുഴകളിലോ മറ്റു ജലാശയങ്ങളിലോ ഇറങ്ങാതെ വീട്ടിൽ ഇരിക്കണമെന്നും കളക്ടർ ഫേസ്ബുക്ക് പോസ്റ്റിൽ കുറിച്ചു. വലിയ സ്വപ്നങ്ങൾ കാത്തുസൂക്ഷിക്കുകയും പരിശ്രമിക്കുകയും ചെയ്യുന്ന എല്ലാ കൂട്ടുകാർക്കും, അവ യാഥാർഥ്യമാവട്ടെ എന്നാശംസിക്കുന്നു. വലിയ നേട്ടങ്ങളിലേക്ക് ഓടിക്കുതിക്കുവാൻ സൽമാനും സാധിക്കട്ടെ എന്ന വാക്കുകളോടെയാണ് കളക്ടർ പോസ്റ്റ് അവസാനിപ്പിച്ചത്.

ഹോമിയോപ്പതി ജില്ലാ ആശുപത്രി വിഭാഗത്തിൽ ഒന്നാംസ്ഥാനം

തൃശൂർ: പ്രഥമ സംസ്ഥാന ആയുഷ് കായകല്പ് അവാർഡ് പ്രഖ്യാപനത്തിൽ അംഗീകാരനിറവിൽ ജില്ല. ഹോമിയോപ്പതി വകുപ്പ് ജില്ലാ ആശുപത്രികളിൽ 99.17 ശതമാനം മാർക്ക് നേടി തൃശൂർ ജില്ലാ ഹോമിയോപ്പതി ആശുപത്രി ഒന്നാംസ്ഥാനം കരസ്ഥമാക്കി. സർക്കാർ ആയുഷ് ആരോഗ്യസ്ഥാപനങ്ങളിലെ ശുചിത്വം, മാലിന്യപരിപാലനം, അണുബാധനിയന്ത്രണം എന്നിവയിൽ സംസ്ഥാനത്തു മികച്ച പ്രവർത്തനം കാഴ്ചവച്ചതിനാണ് പുരസ്കാരം. പത്തുലക്ഷം രൂപയാണ് അവാർഡ് തുകയായി ആശുപത്രിയുടെ തുടർപ്രവർത്തനങ്ങൾക്കായി ലഭിക്കുക. ഐഎസ്എം സബ് ജില്ലാ ആശുപത്രി വിഭാഗത്തിൽ ചേലക്കര ഗവ. ആയുർവേദ ആശുപത്രി ഒരു ലക്ഷം രൂപയുടെ കമൻഡേഷൻ അവാർഡ് കരസ്ഥമാക്കി. 95.09 ശതമാനം മാർക്ക് നേടിയാണ് പുരസ്കാരം നേടിയത്. ഐഎസ്എം, ഹോമിയോപ്പതി വകുപ്പുകളിൽ ആയുഷ് ആരോഗ്യ സ്വാസ്ഥ്യകേന്ദ്രങ്ങൾക്കു ജില്ലാ അടിസ്ഥാനത്തിൽ 98.33 ശതമാനം മാർക്ക് നേടി കയ്പമംഗലം ആയുർവേദ ഡിസ്പെൻസറിയും, 99.58 ശതമാനം മാർക്കോടെ അയ്യന്തോൾ ആയുർവേദ ഡിസ്പെൻസറിയും ഒന്നാംസ്ഥാനം കരസ്ഥമാക്കി. ഒരു ലക്ഷം രൂപവീതമാണ് അവാർഡ് തുകയായി ലഭിക്കുക. ചൊവ്വന്നൂർ, വെള്ളാങ്ങല്ലൂർ, കാടുകുറ്റി, കോലഴി, പുത്തൂർ, കൈപ്പറന്പ് എന്നിവിടങ്ങളിലെ ഡിസ്പെൻസറികൾ ഇതേ വിഭാഗത്തിൽ 30,000 രൂപയുടെ കമൻഡേഷൻ അവാർഡുകൾ നേടി. സംസ്ഥാനത്തെ സർക്കാർ ആയുഷ് സ്ഥാപനങ്ങളുടെ ഗുണമേന്മ ഉറപ്പാക്കുകയാണ് കായകല്പ് അവാർഡുകളുടെ ലക്ഷ്യം.

കിണറുകളിലെ രാസമാലിന്യം ; കാട്ടൂരിൽ കൂട്ട ഉപവാസം

കാട്ടൂര്‍: മിനി എസ്റ്റേറ്റില്‍നിന്നുള്ള കുടിവെള്ളമലിനീകരണത്തിനെതിരേയുള്ള റിലേ നിരാഹാരസമരത്തിന്‍റെ പത്താംദിനത്തില്‍ നടന്ന കൂട്ട ഉപവാസം മുന്‍ ഗവ. ചീഫ് വിപ്പ് അഡ്വ. തോമസ് ഉണ്ണിയാടന്‍ ഉദ്ഘാടനം നിര്‍വഹിച്ചു. കേരള കോണ്‍ഗ്രസ് സംസ്ഥാനസെക്രട്ടറി മിനി മോഹന്‍ദാസ്, ജില്ലാ സെക്രട്ടറി സേതുമാധവന്‍, ബിജെപി മേഖലാ പ്രസിഡന്‍റ് എ. നാഗേഷ്, എഐവൈഎഫ് ജില്ലാ വൈസ് പ്രസിഡന്‍റ് ടി.വി. വിപിന്‍, കെ. സതീഷ്, മഹിളാ കോണ്‍ഗ്രസ് ജില്ലാ സെക്രട്ടറി അംബുജ രാജന്‍, പഞ്ചായത്തംഗം സ്വപ്ന ജോര്‍ജ് എന്നിവര്‍ സംസാരിച്ചു. അബ്ദുല്‍ മുത്തലിഫ് എടക്കാട്ടുപറമ്പില്‍, നാസര്‍ വീരതിടവഴി, ഡേവിസ് തെക്കേക്കര, ശരവണന്‍ വാലത്ത്, ദാസന്‍ തളിയപറമ്പില്‍, ജയ്ഹിന്ദ് രാജന്‍, വിനോദ് തിയത്തുപറമ്പില്‍, സാബു ആലുക്ക, അംബുജ രാജന്‍, ലിജ ജോണ്‍സന്‍ തെക്കേക്കര, മനില ധര്‍മന്‍ വാലത്ത്, മോളി പിയുസ് മാളിയേക്കല്‍, ജയമണി തിരുകുളം, ദേവി രമേഷ് കല്ലിങ്ങല്‍, സുഹറ അഷ്റഫ് തൊപ്പിയില്‍, ആമിനക്കുഞ്ഞി കാട്ടിലപ്പീടികയില്‍, ഗീത ബാലന്‍ തിയത്തുപറമ്പില്‍, വനജ ഗ്രീഷ്‌കുമാര്‍ ഉള്ളാട്ടില്‍ എന്നിവരാണ് ഇന്നലെ കൂട്ട നിരാഹാരം അനുഷ്ഠിച്ചത്.

നെഞ്ചുവേദനയെതുടർന്ന് സ്കൂൾബസ് ഡ്രൈവർ മരിച്ചു

മാള: സ്കൂൾബസ് ഡ്രൈവർ വിദ്യാർഥികളുമായി പോകവെ കുഴഞ്ഞുവീണു മരിച്ചു. കുരുവിലശേരി സ്വദേശിയും പൂപ്പത്തി സരസ്വതി വിദ്യാലയത്തിലെ സ്കൂൾബസ് ഡ്രൈവറുമായ മാരിക്കൽ കരിപ്പാത്ര സഹദേവൻ(64) ആണ് മരിച്ചത്. യാത്രയ്ക്കിടെ നെഞ്ചുവേദനയുണ്ടായ ഉടനേ അപകടമില്ലാത്ത വിധത്തിൽ വാഹനം നിർത്തി കുട്ടികളെ സുരക്ഷിതരാക്കിയതിനുശേഷമാണ് സഹദേവൻ മരണത്തിനു കീഴടങ്ങിയത്. ഇന്നലെ വൈകീട്ട് നാലുമണിക്കാണ് സംഭവം. ബസിൽ ഒന്പതു വിദ്യാർഥികളും സ്കൂൾജീവനക്കാരിയുമുണ്ടായിരുന്നു. ജീവനുവേണ്ടി പോരാടിയ സഹദേവനെ ആശുപത്രിയിൽ കൊണ്ടുപോകുന്നതിനായി സ്കൂൾജീവനക്കാരി സമീപത്തെ വീട്ടുകാരെ സമീപിച്ചെങ്കിലും സഹായം ലഭിച്ചില്ലത്രെ. അടുത്തുള്ള പെട്രോൾ പമ്പിലെ ജീവനക്കാരാണ് സഹദേവനെ ആശുപത്രിയിൽ കൊണ്ടുപോകാൻ സഹായിച്ചത്. അതുവഴിവന്ന കാറിൽ സഹദേവനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പത്തുമിനിറ്റിലധികം സഹദേവൻ ബസിൽതന്നെ കിടക്കുന്ന അവസ്ഥയായിരുന്നു. ഇന്ന് ഇൻക്വസ്റ്റ് കഴിഞ്ഞു പോസ്റ്റ്മോർട്ടം നടത്തിയതിനുശേഷം മൃതദേഹം ബന്ധുക്കൾക്കു വിട്ടുനൽകും. സംസ്കാരം ഇന്ന് ഉച്ചയ്ക്കു രണ്ടിനു വീട്ടുവളപ്പിൽ. ഭാര്യ: രജനി. മക്കൾ: ശരണ്യ, നികേഷ്. മരുമകൻ: കൃഷ്ണകുമാർ.

സമരത്തോടു മുഖംതിരിച്ച് സിപിഎം; സിപിഐ സമരത്തിൽ സജീവം

കാട്ടൂര്‍: കാട്ടൂര്‍ പഞ്ചായത്ത് ഭരിക്കുന്നത് ഇടതുമുന്നണി. മുന്നണിയിലെ സിപിഎം സമരത്തില്‍നിന്നു വിട്ടുനിൽക്കുമ്പോള്‍ ഘടകകക്ഷിയായ സിപിഐ സമരരംഗത്തു സജീവമാണ്. കുടിവെള്ളവിഷയത്തില്‍ ജനങ്ങള്‍ക്കൊപ്പമാണ് തങ്ങളെന്നാണ് സിപിഐ നല്കുന്ന വിശദീകരണം. കുടിവെള്ളപ്രശ്നം ബാധിക്കുന്ന നാലു വാര്‍ഡുകളില്‍ ആറാംവാര്‍ഡിനെ പ്രതിനിധീകരിക്കുന്നതു പഞ്ചായത്ത് വൈസ് പ്രസിഡന്‍റുകൂടിയായ സിപിഎം അംഗം വി.എം. കമറുദീനാണ്. നാലാം വാര്‍ഡിനെ പ്രതിനിധീകരിക്കുന്നതു സിപിഎം അംഗം മുന്‍ പഞ്ചായത്ത് പ്രസിഡന്‍റായ ഷീജ പവിത്രനും, ഏഴാം വാര്‍ഡിനെ പ്രതിനിധീകരിക്കുന്നതു സിപിഎം അംഗം ജയശ്രീയുമാണ്. സിപിഎം സമരത്തില്‍നിന്നു വിട്ടുനിൽക്കുമ്പോള്‍ അഞ്ചാംദിവസത്ത സമരം ഉദ്ഘാടനം ചെയ്തത് സിപിഐ യുവജനസംഘടനയായ എഐവൈഎഫ് കാട്ടൂര്‍ മേഖല പ്രസിഡന്‍റ് എൻ.ഡി. ധനേഷായിരുന്നു. കഴിഞ്ഞദിവസം നിരാഹാരമിരുന്നവരില്‍ എഐവൈഎഫ് ജോയിന്‍റ് സെക്രട്ടറി സാബു പോളായിരുന്നു. എല്‍ഡിഎഫ് നേതൃയോഗങ്ങള്‍ ഈ വിഷയം ചര്‍ച്ചചെയ്താല്‍ സിപിഎമ്മിന്‍റെ നിലപാടിനെ ശക്തമായി എതിര്‍ക്കുമെന്ന നിലപാടാണ് സിപിഐയുടേത്. നേതൃത്വത്തിന്‍റെ നിര്‍ദേശങ്ങളെ മറികടന്നാണ് പല സിപിഎം അംഗങ്ങളും സമരത്തില്‍ പങ്കെടുത്തത്. മുന്‍ പഞ്ചായത്ത് കമ്മിറ്റി അംഗങ്ങള്‍ ഉള്‍പ്പടെ കഴിഞ്ഞദിവസം നടന്ന മനുഷ്യച്ചങ്ങലയില്‍ പങ്കെടുത്തിരുന്നു.

സി. സദാനന്ദന്‍റെ രാജ്യസഭാംഗത്വം അക്രമ രാഷ്ട്രീയത്തിനുള്ള മറുപടി: ശോഭ സുരേന്ദ്രൻ

തൃശൂർ: അക്രമരാഷ്ട്രീയത്തിനുള്ള മറുപടിയാണു സി. സദാനന്ദന്‍റെ രാജ്യസഭാംഗത്വമെന്നും ഇടതുപക്ഷവും കോണ്‍ഗ്രസും വിറളിപൂണ്ടിരിക്കുകയാണെന്നും ബിജെപി സംസ്ഥാന ജനറൽ സെക്രട്ടറി ശോഭ സുരേന്ദ്രൻ. വി.ഡി. സതീശൻ പിണറായി വിജയനെ സംരക്ഷിക്കുന്ന നിലപാടാണു സ്വീകരിക്കുന്നത്. ബിജെപിയെ പരാജയപ്പെടുത്താൻ കോണ്‍ഗ്രസ് സിപിഎമ്മിനെ പിന്തുണയ്ക്കുന്നു. കേരളത്തിലെ ജനങ്ങൾ വരുന്ന തെരഞ്ഞെടുപ്പിൽ ബിജെപിക്കൊപ്പം നിൽക്കുമെന്നും ശോഭ പറഞ്ഞു. പുതുതായി പാർട്ടിയിൽ ചേർന്നവർക്ക് അംഗത്വം നൽകുന്ന ചടങ്ങ് ബിജെപി ജില്ലാ ഓഫീസിൽ ഉദ്ഘാടനംചെയ്തു പ്രസംഗിക്കുകയായിരുന്നു അവർ. വലപ്പാട് മുൻ സിപിഎം ലോക്കൽ കമ്മിറ്റി അംഗം ഇ.കെ. രാമചന്ദ്രൻ, ഭാരതീയ ദളിത് കോണ്‍ഗ്രസ് മണ്ഡലം പ്രസിഡന്‍റും കെപിഎംഎസ് തൃശൂർ യൂണിയൻ പ്രസിഡന്‍റുമായ വിമൽ, മുൻ കോണ്‍ഗ്രസ് മണ്ഡലം വൈസ് പ്രസിഡന്‍റ് പോൾ കുന്നേൽ, ഡിവൈഎഫ്ഐ മരത്താക്കര ഈസ്റ്റ് യൂണിറ്റ് സെക്രട്ടറി ടി.ജി. ഗിരീഷ്, കോണ്‍ഗ്രസ് - എസ് നേതാവ് രാംകുമാർ ജി. മേനോൻ, ഫുട്ബോൾ കോച്ച് വിശാഖ് വിശ്വനാഥ്, ജോസ് കുറ്റൂക്കാരൻ, വില്ലി മുള്ളക്കര, പി.എസ്. അമൽ, മുൻ സിപിഎം പ്രവർത്തകൻ പി.വി. രാജൻ എന്നിവരാണു ബിജെപിയിൽ ചേർന്നത്.

രാസവളം വിലവർധനയ്ക്കെതിരേ കർഷകസംഘം സമരം

തൃശൂർ: രാസവളത്തിനുള്ള സബ്സിഡി കേന്ദ്രസർക്കാർ വെട്ടിക്കുറച്ചതിൽ പ്രതിഷേധിച്ചുനടത്തിയ ഏജീസ് ഓഫീസ് മാർച്ച് കർഷകസംഘം തൃശൂർ ജില്ലാ സെക്രട്ടറി എ.എസ്.കുട്ടി ഉദ്ഘാടനം ചെയ്തു. കെ.ആർ. ഗോപിനാഥൻ, ജില്ലാ ജോയിന്‍റ് സെക്രട്ടറി കെ. രവീന്ദ്രൻ, ജില്ലാ വൈസ് പ്രസിഡന്‍റ് ഗീത ഗോപി, തൃശൂർ ഏരിയ സെക്രട്ടറി എം. ശിവശങ്കരൻ, എ.വി. പ്രദീപ് കുമാർ എന്നിവർ പ്രസംഗിച്ചു. ചേർപ്പ് പോസ്റ്റ് ഓഫീസ് മാർച്ച് കർഷകസംഘം ജില്ലാ പ്രസിഡന്‍റ് പി.ആർ. വർഗീസ്, കൊടകരയിൽ ജില്ലാ ട്രഷറർ ടി.എ. രാമകൃഷ്ണൻ, മാളയിൽ പി.കെ. ഡേവീസ്, മണ്ണുത്തിയിൽ എം.എം. അവറാച്ചൻ, ഒല്ലൂരിൽ കെ.വി. സജു എന്നിവർ ഉദ്ഘാടനം ചെയ്തു. ജില്ലാ ജോയിന്‍റ് സെക്രട്ടറി സെബി ജോസഫ് ചാലക്കുടിയിലും ജില്ലാ വൈസ് പ്രസിഡന്‍റുമാരായ എം. ബാലാജി കുന്നംകുളത്തും പി.എസ്. ബാബു പഴയന്നൂരിലും ജില്ലാ എക്സിക്യൂട്ടീവ് അംഗങ്ങളായ ടി.വി. ഹരിദാസ് മുല്ലശേരിയിലും എം.എൻ. സത്യൻ പുറനാട്ടുകരയിലും എം.എ. ഹാരീസ് ബാബു തളിക്കുളത്തും ടി.ജി. ശങ്കരനാരായണൻ ഇരിങ്ങാലക്കുടയിലും കർഷകസംഘം ജില്ലാ കമ്മിറ്റി അംഗങ്ങളായ ടി.വി. സുനിൽകുമാർ വടക്കാഞ്ചേരിയിലും പനങ്ങാട് എം.എസ്. മോഹനനും വള്ളത്തോൾനഗറിൽ കെ.കെ. ബാബുവും ചാവക്കാട് മാലിക്കുളം അബ്ബാസും ഉദ്ഘാടനം ചെയ്തു.

ഉറപ്പുകൾ പ്രഹസനം; കുരുക്കിനു പരിഹാരമില്ല

സ്വന്തം ലേഖകർ എറണാകുളം- തൃശൂർ ദേശീയപാത 544 ലെ ഗതാഗതക്കുരുക്ക് പരിഹരിക്കാൻ ഹൈക്കോടതി നൽകിയ സമയപരിധി അവസാനിക്കുന്പോഴും റോഡുകൾ പഴയപടി. ഒരാഴ്ചയ്ക്കകം പരിഹരിച്ചില്ലെങ്കിൽ പാലിയേക്കരയിലെ ടോൾ നിർത്തുമെന്നായിരുന്നു ഹൈക്കോടതിയുടെ മുന്നറിയിപ്പ്. ഹൈക്കോടതി നിർദേശം കണക്കിലെടുക്കാതെ ദേശീയപാത അഥോറിറ്റിയുടെ മെല്ലെപ്പോക്ക് ഇന്നലെയും തുടർന്നു. ചിറങ്ങര, മുരിങ്ങൂർ, പേരാന്പ്ര, ആന്പല്ലൂർ, മുടിക്കോട്, കല്ലിടുക്ക്, വാണിയന്പാറ എന്നിവിടങ്ങളിലെ അടിപ്പാതനിർമാണമാണു പ്രതിസന്ധിയാകുന്നത്. സർക്കാരുമായി ചർച്ചചെയ്തു പരിഹാരമുണ്ടാക്കുമെന്നു ദേശീയപാത അഥോറിറ്റി ഉറപ്പു‌നൽകിയിരുന്നെങ്കിലും ഇന്നലെ വൈകിട്ടും ഈ മേഖലകളിൽ വാഹന യാത്രികരുടെ ദുരിതത്തിനു പരിഹാരമൊന്നുമുണ്ടായിട്ടില്ല. മുരിങ്ങൂർ, കൊരട്ടി, ചിറങ്ങര മേഖലകളിൽ ഗതാഗതക്കുരുക്കും യാത്രാദുരിതവും തുടരുന്ന പശ്ചാത്തലത്തിൽ ഇന്നത്തെ കോടതി വിധിയിൽ കണ്ണുംനട്ടിരിക്കുകയാണ് ജനങ്ങൾ. കുണ്ടും കുഴിയും നിറഞ്ഞ റോഡിൽ, വാഹനങ്ങളുടെ നീണ്ടനിരയിൽപ്പെട്ട് മണിക്കൂറുകളോളം കുരുക്കിൽ കിടന്നുവലയുന്ന സാധാരണ ജനങ്ങൾക്ക് ഏകപ്രതീക്ഷ ഇനി കോടതി മാത്രമാണ്. യാത്രാദുരിതത്തിന് അറുതി വരുത്തുവാൻ യാതൊരു ക്രിയാത്മക ഇടപെടലും ഉത്തരവാദപ്പെട്ടവരുടെ ഭാഗത്തുനിന്ന് ഉണ്ടായിട്ടില്ല. സ്വച്ഛസഞ്ചാരം സാധ്യമാകാത്ത റോഡിൽ യാത്രക്കാർ ടോൾ നൽകുന്നതെന്തിനെന്ന പ്രസക്തമായ ചോദ്യത്തിന് ഒരു തീർപ്പ് ഇന്നു കോടതിയിൽനിന്നു ജനം പ്രതീക്ഷിക്കുന്നുണ്ട്. ജില്ലാ കളക്ടറുടെയും ജനപ്രതിനിധികളുടെയും സാന്നിധ്യത്തിൽ ഹൈവേ അധികൃതരും കരാർ കമ്പനിയും മാസങ്ങളായി ജനങ്ങൾക്കു നൽകുന്ന ഓരോ ഉറപ്പുകളും സമയപരിധികളും ജലരേഖകളായി മാറി. വാഹനങ്ങൾ കടത്തിവിടാൻ ബദൽ റോഡുകൾ ഒരുക്കാതെ പ്രധാനപാത വെട്ടിപ്പൊളിച്ചതുതന്നെ ആസൂത്രണത്തിലെ പരാജയമാണ്. അടിപ്പാത - മേൽപ്പാല നിർമാണം നടക്കുന്ന ഇടങ്ങളിൽ പ്രവൃത്തികൾ കൃത്യമായി ഏകോപിപ്പിക്കാൻ എൻഎച്ച്എഐക്ക് കഴിയുന്നില്ല. വിരലിലെണ്ണാവുന്ന തൊഴിലാളികൾമാത്രമാണ് ചിറങ്ങരയിലും മുരിങ്ങൂരിലുള്ളത്. മഴയ്ക്കു ചെറിയൊരു ശമനമുണ്ടായാൽ ബദൽറോഡ് ടാർ ചെയ്യാമെന്ന ഉറപ്പ് വൃഥാവിലായി. കൊരട്ടി ജംഗ്ഷനിലെ വെള്ളക്കെട്ടുനിവാരണത്തിന് ഈ മാസം ആദ്യവാരം പണിതുടങ്ങുമെന്ന പ്രോജക്ട് ഡയറക്ടറുടെ ഉറപ്പും വെറുതെയായി. മഴ പെയ്താൽ റോഡിൽ ചെളിയും വെള്ളക്കെട്ടുമാണെങ്കിൽ മഴയൊന്നു മാറിനിന്നാൽ പ്രദേശം മുഴുവൻപൊടിപടലമാണ്. വാഹനങ്ങൾ വഴിതിരിച്ചുവിട്ടതോടെ ഗ്രാമീണവഴികളും പൊതുമരാമത്തു പാതകളും തകർന്നു. അറ്റകുറ്റപ്പണികൾ ചെയ്തുതരാൻ എൻഎച്ച്എഐ വിമുഖത കാണിച്ചതോടെ കോടതിയെ സമീപിക്കാൻ തീരുമാനിച്ചിരിക്കുകയാണ് കൊരട്ടി, കാടുകുറ്റി പഞ്ചായത്തുകൾ. അടിപ്പാതനിര്‍മാണം നടക്കുന്ന ആമ്പല്ലൂരില്‍ സര്‍വീസ് റോഡിലെ കുഴികള്‍ നികത്താത്തതു പ്രതിഷേധത്തിനിടയാക്കുന്നു. അടിപ്പാതയുടെ ഇരുഭാഗത്തുമുള്ള റോഡില്‍ കുഴികള്‍ നിറഞ്ഞതോടെ രൂക്ഷമായ ഗതാഗതക്കുരുക്കാണ് അനുഭവപ്പെടുന്നത്. മഴ കനത്തതോടെ കുഴികളില്‍ വെള്ളംകെട്ടിനില്‍ക്കുന്നത് അപകടങ്ങള്‍ക്കും ഇടയാക്കുന്നു. ഇരുചക്രവാഹനയാത്രക്കാരാണ് ഏറെയും കുഴികളില്‍ തെന്നിവീഴുന്നത്. നാട്ടുകാരുടെ കണ്ണില്‍ പൊടിയിടുന്നതിനായി കുഴികളില്‍ മണ്ണിട്ടുനികത്തുന്ന പ്രഹസനമാണ് ആമ്പല്ലൂരില്‍ നടക്കുന്നത്. മഴപെയ്താല്‍ ചെളിക്കുണ്ടായി മാറുകയാണ് റോ ഡുകൾ.

66 വര്‍ഷത്തെ കാത്തിരിപ്പ്; എടത്തിപ്പറമ്പിലെ രുഗ്മണിയമ്മയുടെ ഭൂമിക്കു രേഖയായി

ഇരിങ്ങാലക്കുട: നീണ്ട 66 വര്‍ഷത്തെ കാത്തിരിപ്പിനൊടുവില്‍ എടത്തിപറമ്പില്‍ 76 കാരിയായ രുഗ്മണിയമ്മയ്ക്ക് സ്വന്തം ഭൂമിയില്‍ തല ചായ്ക്കാം. തലമുറകളായി പറപ്പൂക്കര പഞ്ചായത്തില്‍ കഴിയുന്ന രുഗ്മണിയമ്മയ്ക്ക് തനിക്കുള്ളതായ ഭൂമിയുടെ രേഖകള്‍ ഒടുവില്‍ ലഭിച്ചു. ഇരിങ്ങാലക്കുട- പുതുക്കാട് മണ്ഡലംതല പട്ടയമേളയിലാണ് രേഖ ലഭിച്ചത്. പറപ്പൂക്കര പഞ്ചായത്തിലെ മൂന്നുസെന്‍റ്് മാത്രമുള്ള ഭൂമിയിലാണ് രുഗ്മണിയമ്മ കൊച്ചുവീട് നിര്‍മിച്ചുതാമസിക്കുന്നത്. തനിക്കായി വീടോ ഭൂമിയോ ഇല്ലെന്ന് പരിഭവിച്ചിരുന്ന രുഗ്മണിയമ്മയ്ക്ക് ഈ ഉടമസ്ഥാവകാശം വലിയ ആശ്വാസമാണ്.

അന്താരാഷ്ട്ര ചലച്ചിത്രമേളകള്‍ തുറന്നിടുന്നത് ലോകത്തിന്‍റെ വാതായനങ്ങള്‍: മന്ത്രി ആര്‍. ബിന്ദു

ഇരിങ്ങാലക്കുട: അന്താരാഷ്ട്ര ചലച്ചിത്രമേളകള്‍ തുറന്നിടുന്നത് ലോ കത്തിന്‍റെ വാതായനങ്ങളെന്ന് മന്ത്രി ആര്‍. ബിന്ദു. ഋതു അന്താരാഷ്ട്ര പരിസ്ഥിതി ചലച്ചിത്ര മേളയുടെ കൊടിയേറ്റം നിര്‍വഹിക്കുകയായിരുന്നു മന്ത്രി. പരിസ്ഥിതിയുടെ സംരക്ഷണവും കരുതലും യുവതലമുറയുടെ കൂടി ഉത്തരവാദിത്വമാണെന്ന് മന്ത്രി കൂട്ടിചേര്‍ത്തു. സാമ്പത്തിക പിന്നാക്കാവസ്ഥയിലുള്ള പഠനത്തില്‍ മിടുക്കിയായ ഒരു വിദ്യാര്‍ഥിനിക്ക് മന്ത്രി ധനസഹായം പ്രഖ്യാപിച്ചു. ഇരിങ്ങാലക്കുട നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. പ്രിന്‍സിപ്പല്‍ സിസ്റ്റര്‍ ഡോ. ബ്ലെസി, നഗരസഭ കൗണ്‍സിലര്‍ ഫെനി എബിന്‍ വെള്ളാനിക്കാരന്‍, ഐക്യുഎസി കോ- ഒാര്‍ഡിനേറ്റര്‍ ഡോ. ടി.വി. ബിനു, ഋതു അന്താരാഷ്ട്ര പരിസ്ഥിതി ചലച്ചിത്ര മേളയുടെ കോ-ഓര്‍ഡിനേറ്റര്‍ ലിറ്റി ചാക്കോ, രാധാകൃഷ്ണന്‍ വെട്ടത്ത്, റെയ്ച്ചല്‍ റോസ് എന്നിവര്‍ പ്രസംഗിച്ചു.

അഖില കേരള ടേബിള്‍ ടെന്നീസ് ടൂര്‍ണമെന്‍റ് സമാപിച്ചു

ഇരിങ്ങാലക്കുട: 32-ാംമത് ഡോണ്‍ ബോസ്‌കോ സ്‌കൂള്‍ അഖില കേരള ഓഷണ്‍ സ്റ്റേറ്റ് റാങ്കിംഗ് ടൂര്‍ണമെന്‍റും ഇന്‍റര്‍ സ്‌കൂള്‍ ടേബിള്‍ ടെന്നീസ് ടൂര്‍ണമെന്‍റും സമാപിച്ചു. മൂന്നു ദിവസങ്ങളിലായി ഡോണ്‍ ബോസ്‌കോ സില്‍വര്‍ ജൂബിലി മെമ്മോറിയല്‍ ഇന്‍ഡോര്‍ സ്റ്റേഡിയത്തില്‍നടന്ന മത്സരത്തിന്‍റെ സമാപനത്തില്‍ ടേബിള്‍ ടെന്നീസ് ഫെഡറേഷന്‍ ഇന്ത്യ സീനിയര്‍ വൈസ്പ്രസിഡന്‍റും ടേബിള്‍ ടെന്നീസ് അസോസിയേഷന്‍ കേരള പ്രസിഡന്‍റുമായ പത്മജ എസ്. മേനോന്‍ മുഖ്യാതിഥിയായിരുന്നു. വിജയികള്‍ക്കുള്ള സമ്മാനദാനവും പത്മജ എസ്. മേനോന്‍ നിര്‍വഹിച്ചു. സ്‌കൂള്‍ മാനേജര്‍ ഫാ. ഇമ്മാനുവേല്‍ വട്ടക്കുന്നേല്‍, ഹയര്‍ സെക്കന്‍ഡറി പ്രിന്‍സിപ്പല്‍ ഫാ. ഷിനോ കളപ്പുരയ്ക്കല്‍, സെന്‍ട്രല്‍ സ്‌കൂള്‍ പ്രിന്‍സിപ്പല്‍ ഫാ. ജിതിന്‍ മൈക്കിള്‍, അഡ്മിനിസ്ട്രേറ്റര്‍ ഫാ. ജിനോ കുഴിതൊട്ടിയില്‍, സ്പിരിച്ച്വല്‍ ആനിമേറ്റര്‍ വര്‍ഗീസ് ജോണ്‍ പുത്തനങ്ങാടി, എല്‍പി സ്‌കൂള്‍ ഹെഡ്മിസട്രസ്് സിസ്റ്റര്‍ വി.പി. ഓമന, ജോസഫ് ചാക്കോ, പരിശീലകന്‍ സൗ മ്യ ബാനര്‍ജി എന്നിവര്‍ സന്നിഹിതരായിന്നു.

അയലക്കുഞ്ഞുങ്ങളെ പിടിച്ച വള്ളം പിടിച്ചെടുത്ത് ഫിഷറീസ്

അഴീക്കോട്: അയലക്കുഞ്ഞുങ്ങളെ പിടിച്ച വള്ളം ഫിഷറീസ് മറൈൻ എൻഫോഴ്സ്മെന്‍റ് ഉദ്യോ ഗസ്ഥർ പിടിച്ചെടുത്തു. അധികൃതരുടെ മുന്നറിയിപ്പ് വകവയ്ക്കാതെയാണ് അയലക്കുഞ്ഞുങ്ങളെ പിടിച്ചത്. അഴീക്കോട് തീരത്തോടുചേര്‍ന്ന് ചെറുമീനുകളെ പിടിച്ച അഴീക്കോട് സ്വദേശി കുറ്റിക്കാട്ട് ലത്തീഫിന്‍റെ ഉടമസ്ഥതയിലുള്ള ത്വയ്ബ എന്ന വള്ളമാണ് ഉദ്യോഗസ്ഥര്‍ പിടികൂടിയത്. അധികൃതരുടെ പരിശോധനയിൽ ഈ വള്ളത്തിന് രജിസ്ട്രേഷനും ലൈസൻസും ഉണ്ടായിരുന്നില്ല. വള്ളത്തില്‍നിന്ന് 14 സെന്‍റിമീറ്ററില്‍ താഴെ വലിപ്പമുള്ള 500 കിലോ അയലക്കുഞ്ഞുങ്ങളും ഫിഷറീസ് അധികൃതര്‍ പിടികൂടി. പിടിച്ചെടുത്ത ചെറുമത്സ്യങ്ങളെ പിന്നീട് പുറംകടലില്‍ നിക്ഷേപിച്ചു.വള്ളം ഉടമയിൽ നിന്ന് 23000 രൂപ പിഴ ഈടാക്കി. അഴീക്കോട് ഫിഷറീസ് സ്റ്റേഷൻ അസി. ഡകറക്ടർ സി. സീമയുടെ നേതൃത്വത്തിലുള്ള അന്വേഷണ സംഘമാണ് വള്ളം പിടികൂടിയത്. സംഘത്തിൽ എഎഫ്ഇഒ സം നാഗോപൻ, എഫ്‌ഒ സഹന ഡോ ൺ, ജയചന്ദ്രൻ, ഇ.ആർ. ഷിനിൻ കുമാർ, വി.എം. ഷൈബു, വി. എൻ. പ്രശാന്ത്കുമാർ, റഫീക്ക്, ഷിഹാബ്, സുബീഷ് എന്നിവരും ഉണ്ടായിരുന്നു.

വികസനമുരടിപ്പിനെതിരേ സമരം സംഘടിപ്പിക്കും: തോമസ് ഉണ്ണിയാടന്‍

ആളൂര്‍: പഞ്ചായത്തിലെ വികസനമുരടിപ്പിനെതിരെ സമരം സം ഘടിപ്പിക്കുമെന്ന് കേരള കോണ്‍ഗ്രസ് ഡെപ്യൂട്ടി ചെയര്‍മാന്‍ തോമസ് ഉണ്ണിയാടന്‍ പറഞ്ഞു.കേരള കോണ്‍ഗ്രസ് ആളൂര്‍ മണ്ഡ ലം സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ആസന്നമായ പഞ്ചായത്ത് - നിയമസഭ തെരഞ്ഞടുപ്പുകളില്‍ പാര്‍ട്ടി സ്വീകരിക്കുന്ന രാഷ്ട്രീയ നയസമീപനരേഖക്ക് സമ്മേളനം രൂപം നല്‍കി. എല്ലാ വാര്‍ഡുകളിലും കുടുംബസംഗമങ്ങളും പ്രതിഷേധ സമരസംഗമങ്ങളും തുടര്‍ന്ന് മണ്ഡലംതല മെഗാകുടുംബസംഗമവും നടത്താന്‍ സമ്മേളനം തീരുമാനിച്ചു. മണ്ഡലം പ്രസിഡന്‍റ് നൈജു ജോസഫ് ഊക്കന്‍ അധ്യക്ഷത വഹിച്ചു. സംസ്ഥാന വൈസ് ചെയര്‍മാന്‍ എം.പി. പോളി, സംസ്ഥാന ജനറല്‍ സെക്രട്ടറി മിനി മോഹന്‍ദാസ്, നിയോജക‌മണ്ഡലം പ്രസിഡന്‍റ്് റോക്കി ആളൂക്കാരന്‍, സേതുമാധവന്‍ പറയംവളപ്പില്‍, സിജോയ് തോമസ്, പി.ടി. ജോര്‍ജ്, ജോബി മംഗലന്‍, ജോജോ മാടവന, എ.കെ. ജോസ്, എന്‍.കെ.കൊച്ചുവാറു, ജോര്‍ജ് കുറ്റിക്കാടന്‍ തുടങ്ങിയവര്‍ പ്രസംഗിച്ചു. മണ്മറഞ്ഞ കേരള കോണ്‍ഗ്രസ് നേതാക്കളായ മുന്‍ എംപി കെ. മോഹന്‍ദാസ്, വര്‍ഗീസ് മാവേലി, ഡേവിസ് ആളൂക്കാരന്‍ എന്നി വരെ അനുസ്മരിച്ചു. മുതിര്‍ന്ന കേരള കോണ്‍ഗ്രസ് നേതാക്കളെ സമ്മേളനത്തില്‍ ആദരിച്ചു.

വ്യവസായവൈദഗ്ധ്യം ആര്‍ജിക്കാന്‍ വിദ്യാർഥികളെ സജ്ജരാക്കും: മന്ത്രി

ഇരിങ്ങാലക്കുട: സാങ്കേതിക വിദ്യാലയങ്ങളില്‍ ഇന്‍ഡസ്ട്രികള്‍ക്ക് ആവശ്യമായ വൈദഗ്ധ്യം ആര്‍ജിക്കാന്‍ കഴിയുന്ന വിധത്തില്‍ വിദ്യാര്‍ഥികള്‍ക്ക് വിപുലമായ സാധ്യതകളാണ് സംസ്ഥാന സര്‍ക്കാര്‍ ഒരുക്കുന്നതെന്ന് മന്ത്രി ഡോ. ആര്‍ ബിന്ദു. ലോക യുവജന നൈപുണ്യ ദിനാചരണവും നൈപുണി സെന്‍ററുകളുടെ ഉദ്ഘാടനവും ഇരിങ്ങാലക്കുട ക്രൈസ്റ്റ് എന്‍ജിനീയറിംഗ് കോളജില്‍ നിര്‍വഹിച്ചുകൊണ്ട് പ്രസംഗിക്കുകയായിരുന്നു മന്ത്രി. അസാപ്പിന്‍റെ നേതൃത്വത്തില്‍ 150ല്‍പരം കോഴ്സുകള്‍ പഠിക്കാന്‍ ഇന്ന് വിദ്യാര്‍ഥികള്‍ക്ക് അവസരമുണ്ട്. ആര്‍ട്ടിഫിഷ്യല്‍ ഇന്‍റലിജന്‍സും റോബോട്ടിക്സ് സയന്‍സും ക്ലൗഡ് കമ്പ്യൂട്ടിംഗും ഉള്‍പ്പെടെ ഏറ്റവും പുത്തന്‍ സാങ്കേതികവിദ്യ അടക്കമുള്ള മേഖലകളില്‍ പരിശീലനം നല്‍കാന്‍ ഇന്നു കഴിയും. കൂടുതല്‍ തൊഴിലവസരങ്ങളിലേക്ക് വിശ്വാസത്തോടെ കടന്നു ചെല്ലാന്‍ കുട്ടികളെ ഒരുക്കുകയാണ് വിജ്ഞാനകേരളം പദ്ധതിയിലൂടെയെന്നും മന്ത്രി പറഞ്ഞു. കെ-ഡിസ്‌കിന്‍റെ ഡിഡബ്ല്യുഎംഎസ് ഓണ്‍ലൈന്‍ പോര്‍ട്ടലില്‍ പരമാവധി വിദ്യാര്‍ഥികളെ രജിസ്റ്റര്‍ ചെയ്യിപ്പിച്ച് ഒരു വര്‍ഷക്കാലം ഒരു ലക്ഷം തൊഴില്‍ നല്‍കാനുള്ള പരിശീലനമാണ് വിജ്ഞാന കേരളത്തിലൂടെ നടക്കുന്നത്. വിദ്യാര്‍ഥികളിലെ സംരംഭക താല്പര്യങ്ങള്‍ ഏറ്റവും അധികം പ്രോത്സാഹിപ്പിക്കുന്ന സര്‍ക്കാരാണ് ഇപ്പോള്‍ ഉള്ളത്. തൊഴില്‍ അന്വേഷകര്‍ എന്നതില്‍നിന്ന് തൊഴില്‍ സൃഷ്ടാക്കളായി മാറാന്‍ സാധിക്കണെന്നും മന്ത്രി കൂട്ടിച്ചേര്‍ത്തു. കേരള ഗ്ലോബല്‍ സമ്മിറ്റിന്‍റെ വെബ്സൈറ്റ് ലോഞ്ചും ആദ്യ രജിസ്ട്രേഷനും വ്യവസായ മന്ത്രി പി. രാജീവ് ഓണ്‍ലൈനായി നിര്‍വഹിച്ചു. വിജ്ഞാന കേരളം മുഖ്യ ഉപദേഷ്ടാവ് ഡോ. ടി.എം. തോമസ് ഐസക് ആമുഖ പ്രഭാഷണം നടത്തി. കെ - ഡിസ്‌ക് മെമ്പര്‍ സെക്രട്ടറി ഡോ. പി.വി. ഉണ്ണികൃഷ് ണന്‍, കില ജില്ലാ ഫെസിലിറ്റേറ്റര്‍ അനൂപ് കിഷോര്‍, ഇരിങ്ങാലക്കുട എന്‍ജിനീയറിംഗ് കോളജ് എക്‌സിക്യൂട്ടീവ് ഡയറക്ടര്‍ ഫാ. ജോണ്‍ പാലിയേക്കര തുടങ്ങിയവര്‍ പ്രസംഗിച്ചു.

കോടശേരിയിൽ ഹർത്താൽ നടത്തി

കുറ്റിച്ചിറ: കോടശേരി പഞ്ചായത്ത് ഓഫീസിൽവച്ച് കോൺഗ്രസ് അംഗങ്ങളെ ആക്രമിച്ച എൽഡി എഫ് അംഗങ്ങുടെ നടപടിയിൽ പ്രതിഷേധിച്ച് കോടശേരി പഞ്ചായത്തിൽ കോൺഗ്രസ് ഹർത്താൽ ആചരിച്ചു. കുറ്റിച്ചിറയിൽ നടത്തിയ പ്രതിഷേധപ്രകടനം കോൺഗ്രസ് പരിയാരം ബ്ലോക്ക് പ്രസിഡന്‍റ് എം.ടി. ഡേവിസ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോൺസൺ മാളിയേക്കൽ അധ്യക്ഷത വഹിച്ചു. പഞ്ചായത്ത് പ്രസിഡന്‍റ്് കെ.പി. ജെയിംസ്, ഡിസിസി സെക്രട്ടറി ടി.എ. ആന്‍റോ, സി.വി. ആന്‍റണി, അഡ്വ. ലിജോ ജോൺ, ഡെന്നി വർഗീസ്, റിക്സൻ മണവാളൻ, പഞ്ചായത്ത് അംഗങ്ങൾ തുടങ്ങിയവർ പ്രകടനത്തിനു നേതൃത്വം നൽകി.

ഫ്ലക്സ്ബോർഡ് തകർന്നുവീണു; വിദ്യാർഥി രക്ഷപ്പെട്ടത് തലനാരിഴയ്ക്ക്

വടക്കാഞ്ചേരി: തകർന്നുവീണ ഫ്ലക്സ്ബോർഡില്‌നിന്നു വിദ്യാർഥി രക്ഷപ്പെട്ടത് തലനാരിഴയ്ക്ക്. സംസ്ഥാനപാതയിൽ വടക്കാഞ്ചേരി ഐസിഐസിഐ ബാങ്കിന് എതിർവശത്തെ വ്യാപാരസ്ഥാപനത്തിന്‍റെ ഫ്ലക്സ്ബോർഡാണ് ഇന്നലെ രാവിലെ 9.30 ഓടെ തകർന്നുവീണത്. വിദ്യാർഥി ഫോണിൽ സംസാരിച്ചു ഫുട്പാത്തിലൂടെ നടക്കുന്നതിനിടെ തൊട്ടുമുന്നിൽ ഫ്ലക്സ്ബോർഡ് വീഴുകയായിരുന്നു. സംഭവസമയത്ത് പ്രദേശത്ത് ജനങ്ങൾ ഇല്ലാത്തതിനാൽ വൻ അപകടംഒഴിവായി. വടക്കാഞ്ചേരി ടൗണിന്‍റെ വിവിധ ഭാഗങ്ങളിൽ വ്യാപാരസ്ഥാപനങ്ങളിൽ അപകട ഭീഷണിയായി ഇത്തരത്തിൽ ഫ്ലക്സ്ബോർഡുകൾ ഉള്ളതായി നാട്ടുകാർ പറയുന്നു. നഗരസഭ അധികൃതരുടെ പരിശോധനകൾ കാര്യക്ഷമമല്ലാത്തതാണ് ഇത്തരം സംഭവങ്ങൾ ഉണ്ടാകുന്നതെന്നും പറഞ്ഞു. ഒരിക്കൽ സ്ഥാപിക്കുന്ന ബോർഡുകൾ കാലപ്പഴക്കംചെന്നാലും മാറ്റിസ്ഥാപിക്കാറില്ല. ഇത്തരം ബോർഡുകൾ അധികൃതർ ഇടപ്പെട്ട് ഉടൻ നീക്കംചെയ്യാനുള്ള നടപടികൾ ഉണ്ടാകണമെന്നും നാട്ടുകാർ ആവശ്യപ്പെട്ടു.

മുള്ളൂർക്കര റെയിൽവേ മേൽപ്പാലം: മണ്ണുപരിശോധന നടത്തി

വടക്കാഞ്ചേരി: മുള്ളൂർക്കര റെയിൽവേ മേൽപ്പാലം നിർമാണത്തിന്‍റെ ആദ്യഘട്ടമായി മണ്ണുപരിശോധന നടന്നു. ഉദ്യോഗസ്ഥരുടെയും ജനപ്രതിനിധികളുടെയും സാന്നിധ്യത്തിലായിരുന്നു പരിശോധന. കെആർഡിസിഎൽ റെയിൽവേ ഓവർബ്രിഡ്ജ് സെക്‌ഷൻ എൻജിനീയർ നിതിൻ ജോസഫ് പരിശോധനയ്ക്ക് നേതൃത്വംനൽകി. ഏകദേശം 700 മീറ്ററോളം നീളത്തിലാണ് പാലം. റോഡിനു മാത്രമായി ഏഴരമീറ്റർ വീതിവരും. ഇരുവശങ്ങളിലും ഒന്നരമീറ്റർ വീതിയിൽ നടപ്പാതയും നിർമിക്കും. ഒരുവർഷത്തിനുള്ളിൽ സ്ഥലമേറ്റെടുപ്പ് പൂർത്തിയാക്കി 15 മാസത്തിനകം പാലം നിർമിക്കാനാണ് ലക്ഷ്യമിടുന്നത്. കഴിഞ്ഞദിവസം കെ. രാധാകൃഷ്ണൻ എംപി സന്ദർശിച്ചു. വടക്കാഞ്ചേരി, വള്ളത്തോൾനഗർ റെയിൽവേ സ്റ്റേഷനുകൾക്കിടയിലെ മുള്ളൂർക്കര ലെവൽക്രോസിന് പകരമായി നിർമിക്കുന്ന റെയിൽവേ ഓവർബ്രിഡ്ജിന്‍റെ നിർമാണച്ചെലവ് നൂറുശതമാനം റെയിൽവേ വഹിക്കും. യു.ആർ. പ്രദീപ് എംഎൽഎ, മുള്ളൂർക്കര പഞ്ചായത്ത് പ്രസിഡന്‍റ് ഗിരിജ മേലേടത്ത്, സ്ഥിരംസമിതി അധ്യക്ഷന്മാരായ ശശികല സുബ്രഹ്മണ്യൻ, ഷാദിയ അമീർ, പ്രതിഭാ മനോജ്, പഞ്ചായത്തംഗം എം.പി. കുഞ്ഞിക്കോയ തങ്ങൾ, എം.എച്ച്. അബ്ദുൽസലാം, വി. രഘു എന്നിവരും ഒപ്പമുണ്ടായിരുന്നു.

500ൽപ്പരം ക്ഷേത്രങ്ങളിലേക്ക് ഇല്ലംനിറയ്ക്കായി കതിർക്കറ്റകളൊരുക്കി ആലാട്ട് തറവാട്ടുകാർ

എരുമപ്പെട്ടി: കേരളത്തിലെ ക്ഷേത്രങ്ങളിലെ ഇല്ലംനിറയ്ക്കായ് പഴുന്നാന - ചെമ്മന്തിട്ട പാടശേഖത്തിൽ നെൽക്കതിരുകളൊരുങ്ങി. പഴുന്നാന ആലാട്ട് തറവാട്ടുകാരാണ് ഇല്ലംനിറയ്ക്കായ് ഇത്തവണയും കതിരുകൾ വിളയിച്ചത്. കേരളത്തിലെ 500ൽപരം ക്ഷേത്രങ്ങളിലേക്ക് ഇല്ലംനിറയ്ക്കായി കതിർക്കറ്റകൾ കൊണ്ടുപോകുന്നത് ആലാട്ട് തറവാട്ടിൽ നിന്നാണ്. ഗുരുവായൂർ ക്ഷേത്രത്തിലേക്ക് അരനൂറ്റാണ്ടായി കതിർക്കറ്റകൾ നൽകുന്നുണ്ട്. ശബരിമല, ചോറ്റാനിക്കര, വൈക്കം, ഇരിങ്ങാലക്കുട കൂടൽമാണിക്യം, തൃപ്രയാർ, ആറാട്ടുപുഴ, കൊടുങ്ങല്ലൂർ, തളി, തൃപ്പൂണിത്തുറ, ഏറ്റുമാനൂർ, തിരുനക്കര തുടങ്ങിയ ക്ഷേത്രങ്ങളിലേയ്ക്കും നിറപുത്തിരിക്ക് കതിർക്കറ്റകൾ ഇവിടെനിന്നു കൊണ്ടുപോകുന്നു. തിരുവിതാംകൂർ ദേവസ്വം ബോർഡിന് കീഴിലുള്ള 135 ക്ഷേത്രങ്ങളിലേക്കും കതിർക്കറ്റകൾ ഇവിടെനിന്നുതന്നെ. 60 വർഷം മുമ്പാണ് ആലാട്ട് തറവാട്ടിലെ കാരണവർമാരായ വേലപ്പന്‍റെയും ഇറ്റ്യാമന്‍റെയും നേതൃത്വത്തിൽ ഇല്ലംനിറയ്ക്ക് കതിർ വിളയിക്കാൻ തുടങ്ങിയത്. അവരുടെ കാലശേഷം പിൻമുറക്കാരായ കൃഷ്ണൻകുട്ടി, ബാബു, രാജൻ, ചന്ദ്രൻ എന്നിവരാണ് കതിരൊരുക്കുന്നത്. വിഷു കഴിഞ്ഞാൽ അടുത്ത മുഹൂർത്തത്തിൽ വിത്തിറക്കും. 90 ദിവസംകൊണ്ട് കതിരിടുന്ന കനക ഇനത്തിലുള്ള വിത്താണ് ഉപയോഗിക്കുന്നത്. ഓരോവർഷങ്ങളിലും നാലായിരത്തിലധികം കതിർക്കറ്റകളാണ് ക്ഷേത്രങ്ങളിലേക്ക് കൊണ്ടുപോകുന്നത്. ലക്ഷണമൊത്ത കതിരുകൾ ലഭിക്കുമെന്നതിനാലാണ് ഇവിടേയ്ക്ക് ആവശ്യക്കാരെത്തുന്നത്. ഇത്തവണത്തെ ആദ്യ കതിർക്കറ്റ ആനായിക്കൽ ചീരംകുളം ഭഗവതിക്ഷേത്രത്തിലേയ്ക്കാണ്. ആലാട്ട് ബാബുവിന്‍റെ കൃഷിയിടത്തിൽ പ്രസിഡന്‍റ് കെ.ബി. അശോക്‌കുമാർ ആദ്യ കതിർ കൊയ്തെടുത്ത് ഉദ്ഘാടനംചെയ്തു. സെക്രട്ടറി കെ.എസ്. ചന്ദ്രൻ, വൈസ് പ്രസിഡന്‍റ് ജനവർധനൻ കല്ലായിയിൽ, ഭാരവാഹികളായ രവീന്ദ്രൻ, സദാശിവൻ, സഞ്ജയ്, ബാജി എന്നിവർ പങ്കെടുത്തു.

പാൽവില കൂട്ടിയാൽ എതിർക്കില്ല: വി.ഡി. സതീശൻ

തൃശൂർ: മിൽമ പാൽവില വർധിപ്പിച്ചാലും എതിർക്കില്ലെന്നു പ്രതിപക്ഷനേതാവ് വി.ഡി. സതീശൻ. കേരളത്തിലെ ക്ഷീരകർഷകരുടെ ഉന്നമനത്തിനു നിലകൊള്ളുമെന്നും മിൽമ ഉത്പന്നങ്ങൾ നിലവാരമുള്ളതാണെന്നും അദ്ദേഹം പറഞ്ഞു. റെസ്റ്റോറന്‍റ് ശൃംഖലയിലെ മിൽമയുടെ മൂന്നാമത്തെ സംരംഭമായ മിൽമ റിഫ്രഷ് വെജ് ആൻഡ് നോണ്‍വെജ് റെസ്റ്റോറന്‍റ് രാമവർമപുരത്ത് ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. പുതിയ സംരംഭമായ മിൽമ മിലികാർട്ടിന്‍റെ താക്കോൽദാനം മിൽമ ചെയർമാൻ കെ.എസ്. മണി നിർവഹിച്ചു. പി. ബാലചന്ദ്രൻ എംഎൽഎ, മിൽമ എറണാകുളം മേഖല യൂണിയൻ ചെയർമാൻ സി.എൻ. വത്സലൻപിള്ള, മേഖല യൂണിയൻ ചെയർമാൻ എം.ടി. ജയൻ, കോർപറേഷൻ കൗണ്‍സിലർമാരായ ഐ. സതീഷ് കുമാർ, രാജശ്രീ ഗോപൻ, മാനേജിംഗ് ഡയറക്ടർ വിത്സണ്‍ ജെ. പുറവക്കാട്ട് പ്രസംഗിച്ചു.

മുഴുവൻപേരെയും ഭൂമിയുടെ ഉടമകളാക്കുക ലക്ഷ്യം: മന്ത്രി കെ. രാജൻ

കുന്നംകുളം: റവന്യൂവകുപ്പിന്‍റെ പ്രവർത്തനങ്ങളിൽ ഏറ്റവും പ്രധാനം ഭൂരഹിതരായ മുഴുവൻപേരെയും ഭൂമിയുടെ ഉടമകളാക്കി മാറ്റുക എന്ന ലക്ഷ്യംവച്ചുള്ളതാണെന്ന് മന്ത്രി കെ. രാജൻ. കേരള സർക്കാർ ഭൂരഹിതരില്ലാത്ത കേരളം എന്ന ചരിത്രനേട്ടം കൈവരിക്കാൻ ഒരുങ്ങുന്നതിന്‍റെ ഭാഗമായി കുന്നംകുളം നിയോജകമണ്ഡലത്തിൽനടന്ന പട്ടയമേള ഉദ്ഘാടനംചെയ്തു സംസാരിക്കുകയായിരുന്നു മന്ത്രി. സാധാരണക്കാരന് അർഹമായ ഭൂമി ലഭിക്കാൻ നിലവിലുള്ള ചട്ടങ്ങൾക്ക് ഭേദഗതിവരുത്തേണ്ടത് അനിവാര്യമാണെങ്കിൽ അതിൽ സർക്കാർ ഇടപെടുമെന്നും നിയമങ്ങളും ചട്ടങ്ങളും മനുഷ്യനിർമിതമാണെന്നും മന്ത്രി കൂട്ടിച്ചേർത്തു. കേരളത്തിൽ ഡിജിറ്റൽ സർവേ പൂർത്തിയാകുന്ന മുറയ്ക്ക് വില്ലേജിലെ ജനങ്ങൾക്ക് അവരുടെ ഭൂമിയുടെയും കെട്ടിടങ്ങളുടെയും വിശദാംശങ്ങൾ സമ്പൂർണമായി മനസിലാക്കാൻ കഴിയുന്ന ചിപ്പ് ഘടിപ്പിച്ച, എടിഎം കാർഡിന്‍റെ വലിപ്പമുള്ള ഡിജിറ്റൽ റവന്യുകാർഡ് നവംബറിൽ പുറത്തിറക്കുമെന്നും മന്ത്രി പറഞ്ഞു. 262 പേർക്കാണ് പട്ടയം വിതരണം ചെയ്തത്. എ.സി. മൊയ്തീൻ എംഎൽഎ അധ്യക്ഷതവഹിച്ചു. കുന്നംകുളം മുനിസിപ്പൽ ചെയർപേഴ്സൺ സീത രവീന്ദ്രൻ, ചൊവ്വന്നൂർ ബ്ലോക്ക് പഞ്ചായത്ത് പ്രസിഡന്‍റ് ആൻസി വില്യംസ്, എരുമപ്പെട്ടി പഞ്ചായത്ത് പ്രസിഡന്‍റ് ബസന്ത് ലാൽ, ജില്ലാ പഞ്ചായത്ത് അംഗം എ.വി. വല്ലഭൻ തുടങ്ങിയവർ സംസാരിച്ചു.

ആറാട്ടുപുഴ മന്ദാരക്കടവിലെ ബലിതർപ്പണം പൊതുജനത്തിനു നിഷേധിക്കുന്നെന്നു പരാതി

തൃശൂർ: കാലാകാലങ്ങളായി ബലിതർപ്പണം നടത്തുന്ന ആറാട്ടുപുഴ മന്ദാരക്കടവിലെ ബലിതർപ്പണം പൊതുജനങ്ങൾക്കു നിഷേധിക്കുന്നതായി പരാതി. കടവിലെ ബലിതർപ്പണം ശിവരാത്രി കമ്മിറ്റി കുത്തക അവകാശമാക്കി വയ്ക്കുന്നതായാണ് വാർഡ് മെന്പർ അടക്കമുള്ളവരുടെ പരാതി. പാപമോചനത്തിനും ബലിതർപ്പണത്തിനും ജില്ലയിലെതന്നെ പ്രധാന പുണ്യസ്ഥലമായി ഭക്തജനങ്ങൾ കാണുന്ന മന്ദാരക്കടവിൽ ബലിതർപ്പണത്തിനായി സ്വന്തം നിലയിൽ കർമികളെ കൊണ്ടുവന്ന് ബലിയിടാനോ അല്ലെങ്കിൽ മന്ദാരക്കടവിൽ ബലിയർപ്പിക്കാൻ സഹായിക്കുന്ന കർമികളെ ഉപയോഗിച്ചു ബലിയിടാനോ കഴിയുമായിരുന്നു. എന്നാൽ 2014 ജൂണ്‍ 15ന് ആറാട്ടുപുഴ ധർമക്ഷേത്രത്തിൽ നടത്തിയ താംബൂലപ്രശ്നവിധിപ്രകാരം മന്ദാരക്കടവിൽ ചില അശുദ്ധാതിക്രിയകൾ നടന്നുവരുന്നതായി തെളിയുകയും അസ്ഥിദോഷങ്ങൾ കണ്ടെത്തുകയും ചെയ്തു. അതിനാൽ ബലിതർപ്പണം ഒഴിച്ച് അസ്ഥിനിമജ്ജനമോ സംസ്കാരക്രിയകളോ ചെയ്യരുതെന്നു പഞ്ചായത്ത് അധികൃതർ അടക്കമുള്ളവരുടെ നേതൃത്വത്തിൽ തീരുമാനമായി. എന്നാൽ, ഈ താബൂലപ്രശ്നം ചൂണ്ടിക്കാട്ടി ശിവരാത്രി കമ്മിറ്റി മന്ദാരക്കടവിൽ ഏകാധിപത്യം പുലർത്തുകയാണ് എന്നാണ് പരാതി. കർക്കടകവാവ്, തുലാംവാവ്, ശിവരാത്രി തുടങ്ങി പുണ്യദിനങ്ങളിലെല്ലാം ശിവരാത്രി കമ്മിറ്റി ഭക്തജനങ്ങളിൽനിന്നു വൻതോതിൽ പണംപിരിച്ച് ബലിതർപ്പണം നടത്തുന്നു എന്നും മന്ദാരക്കടവ് സംരക്ഷണ‌സമിതി പരാതിപ്പെടുന്നു. മന്ദാരക്കടവ് ഉൾപ്പെടുന്ന വല്ലച്ചിറ ഗ്രാമപഞ്ചായത്ത് ആറാം വാർഡ് മെന്പർ കെ. രവീന്ദ്രനാഥടക്കം പ്രതിഷേധവുമായി രംഗത്തുവന്നിരിക്കുകയാണ്. പ്രദേശത്തെ ഭക്തജനങ്ങളെയടക്കം ഉൾപ്പെടുത്തി ആറാട്ടുപുഴ മന്ദാരക്കടവ് സംരക്ഷണസമിതി രൂപീകരിച്ചാണ് ശിവരാത്രി കമ്മിറ്റിക്കെതിരേ പ്രതിഷേധം ശക്തമാക്കിയിരിക്കുന്നത്. ബന്ധപ്പെട്ട അധികൃതർ ഉചിതമായ ഇടപെടൽ നടത്തി എല്ലാ ഭക്തജനങ്ങൾക്കും തുല്യാവകാശം നൽകണമെന്നും അതിനായി ഇടപെടണമെന്നും ഭാരവാഹികൾ ആവശ്യപ്പെട്ടു. പത്രസമ്മേളനത്തിൽ കെ. രവീന്ദ്രനാഥ്, സംരക്ഷണസമിതി അംഗങ്ങളായ കെ. ഹരിനാരായണൻ, സി.കെ. രാജഗോപാൽ, സുനിൽ, ദാമോദരൻ ഇളയത് എന്നിവർ പങ്കെടുത്തു.

നടത്തിപ്പിനു പ്രത്യേക വിഭാഗം, നവീകരണത്തിന് രണ്ടുകോടി

ചാവക്കാട്: ശുചിമുറിമാലിന്യത്തിൽ മുങ്ങി ദുരിതത്തിലായ ചക്കംകണ്ടം നിവാസികളെ രക്ഷിക്കുന്നതിനായി ഗുരുവായൂർ അഴുക്കുചാൽ പദ്ധതിയുടെ നടത്തിപ്പിനുമാത്രമായി പ്രത്യേക സെക്‌ഷന്‍ ആരംഭിക്കാനും ചക്കംകണ്ടത്തെ പ്ലാന്‍റില്‍ നവീകരണം ഉള്‍പ്പെടെയുള്ള പ്രവര്‍ത്തനങ്ങള്‍ നടത്താനും ഉന്നതതലസമിതിയില്‍ തീരുമാനം. ഗുരുവായൂര്‍ സീവറേജ് പദ്ധതിയുമായി ബന്ധപ്പെട്ട് എൻ.കെ. അക്ബർ എംഎല്‍എ, വാട്ടര്‍ അഥോറിറ്റി ചീഫ് എൻജിനീയര്‍ വി.കെ. പ്രദീപ് എന്നിവരുടെ സാന്നിധ്യത്തിലാണ് ചാവക്കാട് റസ്റ്റ്ഹസില്‍ ഉന്നതതലയോഗം ചേര്‍ന്നത്. അഴുക്കുചാല്‍ പദ്ധതിയുടെ നിര്‍വഹണത്തിന് പ്രത്യേക സെക്‌ഷന്‍ ഇല്ലാത്തതും ജോലിഭാരംകൂടിയതും പ്രർത്തനത്തെ ബാധിച്ചു. സീവറേജ് പദ്ധതിക്ക് മാത്രമായി പ്രത്യേകവിഭാഗം രൂപീകരിക്കുന്നതിന് സര്‍ക്കാരിലേക്ക് ശുപാര്‍ശനല്‍കാൻ ധാരണയായി. നിലവില്‍ ചക്കംകണ്ടത്ത് പ്രവര്‍ത്തിക്കുന്ന അഴക്കുചാൽശാലയുടെ നവീകരണപ്രവര്‍ത്തനങ്ങള്‍ നടത്താനും പമ്പിംഗ് മെയിനിലെ പൈപ്പുകള്‍മാറ്റി പുതിയവ സ്ഥാപിക്കാനും തീരുമാനമായി. ശാലയുടെ നവീകരണത്തിനായി 55 ലക്ഷം രൂപയുടെ ഭരണാനുമതി നല്‍കിയതായി വാട്ടര്‍ അഥോറിറ്റി സൂപ്രണ്ടിംഗ് എൻജിനീയര്‍ യോഗത്തെ അറിയിച്ചു. രണ്ടുകോടിയോളം രൂപ അഴുക്കുചാല്‍പദ്ധതിയുടെ നവീകരണത്തിനായി വേണ്ടിവരുമെന്ന് യോഗം വിലയിരുത്തി. തുക സര്‍ക്കാര്‍ ഫണ്ടായും അമൃത് പദ്ധതിയില്‍ ഉള്‍പ്പെടുത്തിയും കണ്ടെത്തുന്നതിന് ധാരണയായി. ഗുരുവായൂര്‍ നഗരത്തിലെ മുഴുവന്‍ പ്രദേശങ്ങളിലേയും മാലിന്യങ്ങള്‍ ശേഖരിക്കുന്നതിനുള്ള പൈപ്പ് ലൈനുകള്‍ ഇല്ലാത്ത സാഹചര്യത്തില്‍ ഈ പ്രദേശങ്ങളിലേക്കുകൂടി സീവറേജ് പദ്ധതി നടപ്പിലാക്കുന്നതിനു വിശദമായപദ്ധതി എത്രയുംവേഗം തയാറാക്കി സമര്‍പ്പിക്കുന്നതിന് വാട്ടര്‍ അഥോറിറ്റിയുടെ പിപിഡി ആൻഡ് സീവറേജ് വിഭാഗത്തെ ചുമതലപ്പെടുത്തി. ചക്കംകണ്ടം പ്ലാന്‍റിലേക്ക് വാഹനത്തിൽ നേരിട്ട് ശുചിമുറിമാലിന്യം എത്തിക്കുന്നതിനുള്ള പദ്ധതിയില്ലെന്ന് എംഎൽഎ പറഞ്ഞു. യോഗത്തില്‍ നഗരസഭാധ്യക്ഷരായ എം. കൃഷ്ണദാസ്, ഷീജ പ്രശാന്ത് ഉൾപ്പെടെയുള്ള ജനപ്രതിനിധികളും ഉദ്യോഗസ്ഥരും പങ്കെടുത്തു.

ജൂബിലിയിൽ പ്ലാസ്റ്റിക് സർജറി ദിനം ആചരിച്ചു

തൃശൂർ: ജൂബിലി മിഷൻ ആശുപത്രിയിലെ പ്ലാസ്റ്റിക് സർജറി - തീപ്പൊള്ളൽ വിഭാഗവും ജൂബിലിയിലെ ഐഎംഎ ബ്രാഞ്ചും കൈരളി പ്ലാസ്റ്റിക് അസോസിയേഷനും സംയുക്തമായി ജൂബിലിയിൽ പ്ലാസ്റ്റിക് സർജറി ദിനം ആചരിച്ചു. ആശുപത്രി ഡയറക്ടർ ഫാ. റെന്നി മുണ്ടൻകുരിയൻ ഉദ്ഘാടനം ചെയ്തു. അനസ്തേഷ്യ വിഭാഗം പ്രഫസർ ഡോ. സി.വി. ഡേവിസ് അധ്യക്ഷത വഹിച്ചു. ജൂബിലി നഴ്സിംഗ് കോളജ് പ്രിൻസിപ്പൽ ഡോ. ഏയ്ഞ്ചല ജ്ഞാനദുരൈ മുഖ്യാതിഥിയായി. ആശുപത്രി അസിസ്റ്റന്‍റ് ഡയറക്ടർ ഫാ. ടെറിൻ മുള്ളക്കര, പ്രിൻസിപ്പൽ ഡോ. എം.എ. ആൻഡ്രൂസ്, സിഇഒ ഡോ. ബെന്നി ജോസഫ്, മെഡിക്കൽ സൂപ്രണ്ട് ഡോ. ഷിബു സി. കള്ളിവളപ്പിൽ, ജൂബിലി ഐഎംഎ ബ്രാഞ്ച് സെക്രട്ടറി ഡോ. മുഹമ്മദ് റാഫി, പ്ലാസ്റ്റിക് സർജറി- തീപ്പൊള്ളൽ വിഭാഗം അസോസിയേറ്റ് പ്രഫസർമാരായ ഡോ. നവീൻ ഐസക് ജോണ്‍, ഡോ. ഓംപ്രകാശ് എന്നിവർ പ്രസംഗിച്ചു. പ്ലാസ്റ്റിക് സർജറി - തീപ്പൊള്ളൽ വിഭാഗം മേധാവി ഡോ. കെ.എം. പ്രദ്യോത് സ്വാഗതവും അസോസിയേറ്റ് പ്രഫസർ ഡോ. ഹേമങ്ങ് അരവിന്ദ്കുമാർ സാങ്‌വി നന്ദിയും പറഞ്ഞു.

യുവഎഴുത്തുകാരി മരിച്ചനിലയിൽ

അവണൂർ: എഴുത്തുകാരിയും സോഷ്യല്‍ മീഡിയ ആക്ടിവിസ്റ്റുമായ വിനീത കുട്ടഞ്ചേരി(44) അന്തരിച്ചു. തിങ്കളാഴ്ച രാത്രി 7.30 ഓടെ വീട്ടില്‍ തൂങ്ങിമരിച്ചനിലയില്‍ കണ്ടെത്തുകയായിരുന്നു. ഭാരതീയ ദളിത് സാഹിത്യ അക്കാദമിയുടെ മലയാളസാഹിത്യത്തിനുള്ള 2019ലെ അവാര്‍ഡ് ജേതാവാണ്. സാമൂഹ്യ-സംസ്കാരികരംഗങ്ങളിൽ സജീവസാന്നിധ്യമായിരുന്നു. അവണൂര്‍ പഞ്ചായത്തിന്‍റെ പരിധിയില്‍ ആദ്യമായി ജനകീയഹോട്ടല്‍ നടത്തിയിരുന്നു. കടുത്ത സാമ്പത്തികപ്രതിസന്ധിയെതുടര്‍ന്ന് ഹോട്ടല്‍ അടച്ചുപൂട്ടി. കടങ്ങള്‍ വീട്ടാന്‍വേണ്ടി വിദേശത്തേക്കു ജോലിക്കായി പോയെങ്കിലും തൊഴില്‍ നഷ്ടപ്പെട്ടു തിരിച്ചുവന്നു. കഴിഞ്ഞ ശനിയാഴ്ച വിനീതയുടെ വിന്‍സന്‍റ് വാന്‍ഗോഗിന്‍റെ വേനല്‍പ്പക്ഷി എന്ന പുസ്തകം മന്ത്രി ആർ. ബിന്ദു പ്രകാശനംചെയ്തിരുന്നു. നിരവധി കവിതകള്‍ രചിച്ചിട്ടുണ്ട്. നിനക്കായ് എന്ന ഗാനത്തിന്‍റെ സംവിധായിക എന്നനിലയിലും പ്രശസ്തി നേടി. സംസ്‌കാരം നടത്തി. അവണൂര്‍ മണിത്തറ കാങ്കില്‍ വീട്ടില്‍ രാജുവാണ് ഭര്‍ത്താവ്. മക്കള്‍: ശ്രീരാജി, ശ്രീനന്ദ.

ആരോഗ്യമേഖലയെ തകർത്ത മന്ത്രി രാജിവയ്ക്കണം

തൃശൂർ: ആരോഗ്യമേഖലയെ പാടേ തകർത്ത മന്ത്രി വീണാ ജോർജ് രാജിവയ്ക്കണമെന്നു കേരള കോണ്‍ഗ്രസ് - ജേക്കബ് സംസ്ഥാന ജനറൽ സെക്രട്ടറി കെ.ആർ. ഗിരിജൻ. കോട്ടയം മെഡിക്കൽ കോളജിൽ കെട്ടിടം ഇടിഞ്ഞുവീണു മരിച്ച ബിന്ദുവിന്‍റെ വീട്ടുകാർക്കു സർക്കാർ നൽകിയ സഹായധനം അപര്യാപ്തമാണ്. സർക്കാരിന്‍റെ കെടുകാര്യസ്ഥതയുടെ ഏറ്റവും വലിയ ഉദാഹരണമാണ് അവിടെ സംഭവിച്ചത്. എൽഡിഎഫ് സർക്കാർ ആരോഗ്യമേഖലയോടു കാണിക്കുന്ന കെടുകാര്യസ്ഥതയ്ക്കെതിരേ കേരള കോണ്‍ഗ്രസ്-ജേക്കബ് ജില്ലാ കമ്മിറ്റിയുടെ ആഭിമുഖ്യത്തിൽ ഡിഎംഒ ഓഫീസിനുമുൻപിൽ നടന്ന പ്രതിഷേധധർണ ഉദ്ഘാടനം ചെയ്യുകയായിരുന്നു അദ്ദേഹം. പാർട്ടി ജില്ലാ പ്രസിഡന്‍റ് പി.എം. ഏലിയാസ് അധ്യക്ഷത വഹിച്ചു. നേതാക്കളായ സോമൻ കൊളപ്പാറ, വസന്തൻ ചിയ്യാരം, ഷാജു വടക്കൻ, സി.എം. ബാലസുന്ദരൻ, കെ.ആർ. സുനിൽകുമാർ, സി.ഒ. എൽദോസ് എന്നിവർ പ്രസംഗിച്ചു.

കുടുംബങ്ങൾക്കു ഡിജിറ്റൽ റവന്യൂ കാർഡ് നൽകും: കെ. രാജൻ

തൃശൂർ: പട്ടയം കൊടുക്കാനുള്ള കുടുംബവരുമാന‌പരിധി ഒരുലക്ഷത്തിൽനിന്ന് രണ്ടരലക്ഷമാക്കി ഉയർത്തുമെന്നും ഡിജിറ്റൽ റീസർവേ പൂർത്തിയാക്കിയ വില്ലേജുകളിലെ കുടുംബങ്ങൾക്ക് എടിഎം മാതൃകയിൽ ഡിജിറ്റൽ റവന്യൂ കാർഡ് നൽകുമെന്നും മന്ത്രി കെ. രാജൻ. ടൗണ്‍ഹാളിൽ തൃശൂർ താലൂക്കുതല പട്ടയമേള ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. വരുമാനവുമായി ബന്ധപ്പെട്ടു പട്ടയവിതരണം മുടങ്ങാതിരിക്കാനുള്ള നീക്കങ്ങളാണു സർക്കാർ നടത്തുന്നത്. 312 വില്ലേജുകളിൽ റീസർവേ പൂർത്തിയാക്കി. ഇവിടെയുള്ള കുടുംബങ്ങൾക്കു നവംബറോടെ ചിപ്പും ഡിജിറ്റൽ നന്പറും ഉൾപ്പെടുത്തിയ ഡിജിറ്റൽ റവന്യൂ കാർഡ് നൽകും. ഭൂമിയുടെ അളവ്, നികുതി, പണയത്തിലാണോ, ജാതി, മതം, വരുമാനം, കെട്ടിടത്തിന്‍റെ അളവ് എന്നിങ്ങനെ വില്ലേജ് ഓഫീസുകളിൽ കയറിയിറങ്ങാതെതന്നെ ലഭിക്കാവുന്ന തരത്തിൽ രേഖകൾ ഡിജിറ്റൈസ് ചെയ്യും. വില്ലേജ് ഓഫീസുകളിൽനിന്നു ലഭിക്കുന്ന സർട്ടിഫിക്കറ്റുകൾപോലെ ബാങ്ക് ഉൾപ്പെടെയുള്ള ഓഫീസുകളിൽ ഇവ ഹാജരാക്കാൻ കഴിയും. ഓഫീസുകളിൽ വിവിധ സർട്ടിഫിക്കറ്റുകൾക്കു കയറിയിറങ്ങുന്ന സാഹചര്യം ഒഴിവാക്കും. ഭൂവുടമകൾക്കായി കുട്ടികളുടെ വിവരങ്ങൾ ഉൾപ്പെടെ ഡിജിലോക്കർ സംവിധാനവും പരിഗണനയിലാണ്. വരുമാനസർട്ടിഫിക്കറ്റ്, മക്കളുടെ ജാതിസർട്ടിഫിക്കറ്റ് എന്നിവയെല്ലാം ഡിജിലോക്കറിലൂടെ വില്ലേജ് ഓഫീസുകളിൽ ലഭ്യമാക്കും. റവന്യൂ വകുപ്പിന്‍റെ പ്രവർത്തനങ്ങൾക്കു വേഗംകൂട്ടാൻ ഇതു സഹായിക്കും. ഓരോ വാർഡ് അംഗത്തെയും സമീപിച്ച് ആർക്കൊക്കെ പട്ടയം ലഭിക്കാനുണ്ടെന്നു മനസിലാക്കിയാണു പട്ടിക തയാറാക്കിയത്. പട്ടയം ലഭിച്ചവർ ഭൂമിയുടെ അവകാശം വരുംതലമുറയ്ക്കു വിതരണംചെയ്യണമെന്നും മന്ത്രി പറഞ്ഞു. പാണഞ്ചേരി വില്ലേജിലെ തട്ടിൽ അന്തോണി- എൽസി ദന്പതികൾ മന്ത്രിയിൽനിന്ന് ആദ്യപട്ടയം ഏറ്റുവാങ്ങി. ജില്ലാ കളക്ടർ അർജുൻ പാണ്ഡ്യൻ, എംഎൽഎമാരായ പി. ബാലചന്ദ്രൻ, സി.സി. മുകുന്ദൻ, ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ്, സബ് കളക്ടർ അഖിൽ വി. മേനോൻ എന്നിവർ പങ്കെടുത്തു.

സമരം ശക്തമാകുന്നു, നാളെ കൂട്ട ഉപവാസം

കാട്ടൂര്‍: കാട്ടൂര്‍ മിനി എസ്റ്റേറ്റില്‍നിന്നുള്ള രാസമാലിന്യംമൂലം കിണര്‍വെള്ളം മലിനമാകുന്നതിനെതിരേ സമരം ശക്തമാകുന്നു. സമരത്തിനു പിന്തുണയുമായി നിരവധി രാഷ്ട്രീയസംഘടനകളും സാമുദായികസംഘടനകളും രംഗത്തുവന്നിട്ടുണ്ട്. നാളെ സമീപവാസി കളെല്ലാംചേര്‍ന്ന് കമ്പനിക്കു മുന്നിലെ സമരപ്പന്തലില്‍ കൂട്ടനിരാഹാരമിരിക്കും. തുടര്‍ന്നു സമരം പഞ്ചായത്ത് ഓഫീസിനു മുന്നിലേക്കു വ്യാപിപ്പിക്കും. വെള്ളിയാഴ്ച കാട്ടൂര്‍ പഞ്ചായത്ത് ഓഫീസിലേക്ക് പ്രതിഷേധ മാര്‍ച്ച് നടക്കും. കാട്ടൂര്‍ സ്‌കൂള്‍പരിസരത്തുനിന്നാണ് മാര്‍ച്ച് ആരംഭിക്കുക. റിലേ നിരാഹാരമിരിക്കുന്ന ജനകീയ കുടിവെള്ളസംരക്ഷണവേദിക്കു പിന്തുണയുമായി കോണ്‍ഗ്രസും ബിജെപിയും സമരപ്പന്തലിലെത്തി. കെപിസിസി മുന്‍ ജനറല്‍ സെക്രട്ടറി എം.പി. ജാക്സണ്‍, ബിജെപി മണ്ഡലം പ്രസിഡന്‍റ് ആര്‍ച്ച അനീഷ്, ജനറല്‍ സെക്രട്ടറി വി.സി. രമേഷ്, നഗരസഭാ കൗണ്‍സിലര്‍ വിജയകുമാരി അനിലന്‍ എന്നിവരാണ് സമരപ്പന്തലിലെത്തി ഐക്യദാര്‍ഢ്യം പ്രഖ്യാപിച്ചത്. അബ്ദുള്‍ മുത്തലിഫ് എടക്കാട്ടപറമ്പില്‍, രാജേഷ് കാട്ടൂര്‍ വടക്കുമുറി, ചരുവില്‍ ഷൈന്‍, സാബു ആലുക്ക എന്നിവരാണ് ഉപവാസമനുഷ്ഠിച്ചത്. മഹിളാ കോണ്‍ഗ്രസ് സംസ്ഥാന സെക്രട്ടറി രാജലക്ഷ്മി കുറുമാത്ത് ഉദ്ഘാടനം ചെയ്തു.

പച്ചപ്പിൽ പതിയിരിക്കും പകർച്ചവ്യാധികൾ...

സി.ജി. ജിജാസൽ തൃശൂർ: കാലാവസ്ഥയിലെ അടിക്കടിയുള്ള മാറ്റങ്ങൾ പലവിധ രോഗങ്ങൾക്കും വഴിവയ്ക്കുന്പോൾ നമ്മുടെ അറിവില്ലായ്മയും പലവിധ പകർച്ചവ്യാധികൾക്കും വഴിതുറക്കുന്നുണ്ടെന്ന് ആരോഗ്യവകുപ്പിന്‍റെ മുന്നറിയിപ്പ്. പനിബാധിതരുടെ എണ്ണം പ്രതിദിനം ആയിരം കടക്കുന്ന ജില്ലയിൽ ഡെങ്കിപ്പനിബാധിതരുടെ എണ്ണവും ഉയരുന്ന സാഹചര്യത്തിലാണ് പച്ചപ്പിൽ പതിയിരിക്കുന്ന പകർച്ചവ്യാധികളെക്കുറിച്ചുള്ള മുന്നറിയിപ്പ് നൽകുന്നത്. നിലവിലെ റിപ്പോർട്ടുകൾപ്രകാരം ഈ മാസത്തെ ആദ്യ ഒൻപതു ദിവസങ്ങളിൽ ജില്ലയിൽ 49 പേർക്കു ഡെങ്കി സ്ഥിരീകരിച്ചപ്പോൾ 109 പേർ ഡെങ്കി ലക്ഷണങ്ങളുമായി ആശുപത്രിയിൽ ചികിത്സതേടിയിട്ടുണ്ട്. തൃശൂർ കോർപറേഷനിലാണ് കൂടുതൽ പേർക്കും ഡെങ്കി റിപ്പോർട്ടുചെയ്തത് - 12 പേർ. ഇതിനിടെ ജില്ലയിൽ മലേറിയയും റിപ്പോർട്ടു ചെയ്തിട്ടുണ്ട്. ഡെങ്കിക്കു പച്ചപ്പിന്‍റെ കൂട്ട് പലരും വീട്ടിൽ അലങ്കാരത്തിനായി വയ്ക്കുന്ന ഇൻഡോർ പ്ലാന്‍റുകൾ ഡെങ്കിപ്പനി പടരാൻ പ്രധാന വഴികളിലൊന്നാണെന്ന് അധികൃതർ പറയുന്നു. വീടിനുള്ളിലെ പ്ലാന്‍റ് പാത്രങ്ങളിൽ വെള്ളം ദിവസങ്ങളോളം മാറ്റാതെ സൂക്ഷിക്കുന്നതു കൊ തുകുകൾക്കു വളരാനുള്ള സാഹചര്യം ഒരുക്കുകയാണ്. ഡെങ്കി പരത്തുന്ന കൊതുകുകൾക്ക് 50 മീറ്ററോളംമാത്രമാണ് പറക്കാൻ കഴിയുക. അതിനാൽതന്നെ രോഗം വീട്ടിൽനിന്നുതന്നെയാണ് പിടിപെടുന്നതെന്നും ഡിഎംഒ ടി.പി. ശ്രീദേവി ദീപികയോടു പറഞ്ഞു. പലരും മണിപ്ലാന്‍റ് അടക്കമുള്ള ചെടികൾ വീടുകളിൽ വയ്ക്കുന്നതു പണവും ഐശ്വര്യവും വരുമെന്ന വിശ്വാസത്തിലാണെന്നും എന്നാൽ സൂക്ഷിച്ചില്ലെങ്കിൽ പണമല്ല പണിയാണ് ഇതിലൂടെ കിട്ടുകയെന്നും ആരോഗ്യവകുപ്പ് പറയുന്നു. ശ്രദ്ധിക്കുക • പ്ലാന്‍റുകളുടെ വെള്ളം ദിവസേന മാറ്റുക. • ചെടികൾ വളർത്തുന്ന കുപ്പിക ളുടെ വായ്‌വട്ടം പഞ്ഞികൊണ്ട് അടയ്ക്കുക. • പരിസരം വൃത്തിയായി സൂക്ഷിക്കുക • പനി, തലവേദന, കാഴ്ചക്കുറവ് തുടങ്ങിയ ലക്ഷണങ്ങൾ കണ്ടാൽ ഉടൻ ചികിത്സതേടുക. റിപ്പോർട്ട് ചെയ്ത് മലേറിയയും പകർച്ചപ്പനികൾ പടരുന്ന ജില്ലയിൽ മലേറിയയും. ഈ മാസം ഇതിനകം ആറുപേർക്കാണ് മലേറിയ ബാധിച്ചിരിക്കുന്നത്. ഈ മാസം ഒന്നിനു നാലുപേർക്കു മലേറിയ സ്ഥിരീകരിച്ചു. മാള, അവണൂർ, കോലഴി, കൈപ്പറന്പ് എന്നിവിടങ്ങളിൽനിന്നാണ് മലേറിയ റിപ്പോർട്ട് ചെയ്തിരിക്കുന്നത്. തോളൂർ, മതിലകം എന്നിവിടങ്ങളിൽ ഓരോരുത്തർക്കും മലേറിയ ബാധിച്ചു. കൊതുകുജന്യരോഗങ്ങളിൽ ഏറ്റവും മാരകമായ ഒന്നായ മലേറിയ യഥാസമയം കണ്ടെത്തി ശരിയായ ചികിത്സ നൽകിയില്ലെങ്കിൽ മരണത്തിനുവരെ കാരണമാകും. പനി, വിറയൽ, തലവേദന, ഓക്കാനം, ഛർദി , വിളറിയ മഞ്ഞച്ച തൊലിപ്പുറം , സന്ധിവേദന, വിളർച്ച, മൂത്രത്തിന്‍റെ നിറംമാറ്റം എന്നിവയാണ് മലേറിയയുടെ പ്രധാന ലക്ഷണങ്ങൾ. പനിബാധിതർ 1000 പനിബാധിതരുടെ എണ്ണം കുറയാതെ തൃശൂർ ജില്ല. ഒടുവിലെ റിപ്പോർട്ടുകൾപ്രകാരം ഈ മാസം ഒന്പതുവരെ 9332 പേർ പനിബാധിച്ച് ചികിത്സതേടിയപ്പോൾ 102 പേരെ അഡ്മിറ്റ് ചെയ്തു. ഇതിൽ നാലാംതീയതിയാണ് കൂടുതൽ പനിബാധയും റിപ്പോർട്ട് ചെയ്തത് -1120 പേർ. കുറവ് ആറിന് - 720 പേർ. എലിപ്പനിയെതുടർന്ന് 14 പേർ ചികിത്സ തേടിയപ്പോൾ 20 പേർ എലിപ്പനിസംശയത്തിലും ചികിത്സ തേടി. ഒരു മരണം സ്ഥിരീകരിച്ചു. 17 പേർക്കു ഹെപ്പറ്റൈറ്റിസ് ബാധയും സ്ഥിരീകരിച്ചിട്ടുണ്ട്. അതിർത്തികൾകടന്ന് മലേറിയ; ആശങ്ക വേണ്ടെന്നു ഡിഎംഒ ജില്ലയിൽ മലേറിയ ബാധിച്ച കേസുകൾ റിപ്പോർട്ട് ചെയ്തിട്ടുണ്ടെങ്കിലും മലേറിയബാധ പടരുന്നില്ലെന്നും ഇതരസംസ്ഥാനങ്ങളിൽനിന്നെത്തുന്ന തൊഴിലാളികളിലാണ് ഇതു കണ്ടെത്തിയിരിക്കുന്നതെന്നും ഡിഎംഒ ടി.പി. ശ്രീദേവി അറിയിച്ചു. സ്ക്രീനിംഗ് ടെസ്റ്റിലൂടെയാണ് മലേറിയ കണ്ടെത്തുന്നത്. ആഫ്രിക്കപോലുള്ള രാജ്യങ്ങളിൽ ഇവ കൂടുതലായി ഉള്ളതിനാൽ അവിടങ്ങളിൽ പോയിവരുന്നവരിലും പരിശോധന നടത്തുന്നുണ്ടെന്നും തദ്ദേശീയരായവരിൽ ഇതുവരെ രോഗം കണ്ടെത്തിയിട്ടില്ലെന്നും ആശങ്ക വേണ്ടെന്നും അവർ അറിയിച്ചു.

മൺമറഞ്ഞവരെ സ്മരിച്ച് തർപ്പണത്തിരുനാളിന് സമാപനം

പാലയൂർ: മാർതോമ മേജർ ആർക്കിഎപ്പിസ്കോപ്പൽ തീർഥകേന്ദ്രത്തിലെ മാർ തോമാശ്ലീഹായുടെ തർപ്പണത്തിരുനാൾ ഭക്തിനിർഭരമായ പ്രദക്ഷിണത്തോടെ സമാപിച്ചു. പ്രദക്ഷിണത്തിന് സെന്‍റ് കുര്യാക്കോസ്, സെന്‍റ് സെബസ്റ്റ്യാനോസ് എന്നിവരു ടെ തിരുസ്വരൂപങ്ങളും എഴുന്നള്ളിച്ചു. തിരുനാൾദിനത്തിൽ രാവിലെനടന്ന തിരുക്കർമങ്ങൾക്ക് ആർച്ച് പ്രീസ്റ്റ റവ.ഡോ. ഡേവിസ് കണ്ണമ്പുഴ, ഫാ. ക്ലിന്‍റ് പാണേങ്ങാടൻ കാർമികത്വംവഹിച്ചു. ആഘോഷമായ തിരുനാൾ പാട്ടുകുർബാനയ്ക്ക് മൈനർ സെമിനാരി റെക്ടർ ഫാ. ജോയ് പുത്തൂർ മുഖ്യകാർമികനായിരുന്നു. അതിരൂപത വൈസ് ചാൻസലർ റവ.ഡോ. ഷിജോ ചിരിയങ്കണ്ടത്ത് സന്ദേശംനൽകി. ഉച്ചകഴിഞ്ഞ് തളിയക്കുളക്കരയിൽനടന്ന ദിവ്യബലിക്കും സമൂഹമാമോദീസയ്ക്കും സഹായമെത്രാൻ മാർ ടോണി നീലങ്കാവിൽ മുഖ്യകാർമികനായിരുന്നു. ഫാ. അഗസ്റ്റിൻ കുളപ്പുറം, ഫാ. മാനുവൽ എന്നിവർ സഹകാർമികത്വംവഹിച്ചു. വൈകീട്ടുനടന്ന സമാപന ദിവ്യബലിക്ക് ഇടവക അംഗങ്ങളായ ഫാ. ദിജോ ഒലക്കേങ്കിൽ, ഫാ. ജോൺപോൾ ചെമ്മണ്ണൂർ എന്നിവർ കാർമികരായി. തുടർന്ന് തിരുനാൾപ്രദക്ഷിണം നടത്തി. തുടർന്ന് വർണമഴയും മെഗാ ബാൻഡ്ഷോയുമുണ്ടായി. മൺമറഞ്ഞവർക്കായി ഇന്നലെ രാവിലെ തിരുക്കർമങ്ങൾ അർപ്പിച്ചു. രാത്രി ഗാനമേളയുണ്ടായി. ആർച്ച്പ്രീസ്റ്റ് റവ.ഡോ. ഡേവിസ് കണ്ണമ്പുഴ, സഹവികാരി ഫാ. ക്ലിന്‍റ് പാണേങ്ങാടൻ, സിസ്റ്റർ റോസ്മേരി, ജനറൽ കൺവീനർ ടി.ജെ. ഷാജു, ട്രസ്റ്റിമാരായ പി.എ. ഹൈസൺ, ഫ്രാൻസിസ് ചിരിയങ്കണ്ടത്ത്, ചാക്കോ പുലിക്കോട്ടിൽ, സേവ്യർ വാകയിൽ, സെക്രട്ടറിമാരായ ബിജു മുട്ടത്ത്, ബിനു താണിക്കൽ, കൺവീനർമാരായ തോമസ് വാകയിൽ, ഇ.എം. സാജൻ, എൻ.കെ. ജോൺസൻ, സി.ഡി. ജോസ്, ഫ്രാൻസി ചൊവ്വല്ലൂർ, സൈജോ സൈമൺ, ഇ.എ. തോമസ്, സി.വി. വിൻസന്‍റ്, സി.ഡി. ഫ്രാൻസിസ്, ജെഫിൻ ജോണി, ജെറിൻ ജോസ്, ജോഫി പാലയൂർ തുടങ്ങിയവർ നേതൃത്വംനൽകി.

വാഹനാപകടങ്ങളില്‌ പരിക്ക്

മുതുവറ: തൃശൂർ- കുറ്റിപ്പുറം റോഡിൽ പുഴയ്ക്കലിൽ ഇന്നലെ രാവിലെയുണ്ടായ വാഹനാപകടത്തിൽ നാലുപേർക്ക് പരിക്ക്. സ്വകാര്യ ബസ് നിയന്ത്രണംവിട്ട് പിക്കപ്പ് വാനിലിടിച്ചാണ് അപകടം. ഒരേദിശയിൽ സഞ്ചരിച്ചിരുന്ന പിക്കപ്പ് വാനിന്‍റെ പിന്നിൽ സ്വകാര്യ ബസ് ഇടിക്കുകയായിരുന്നു. ഇടിയുടെ ആഘാതത്തിൽ നിയന്ത്രണംവിട്ട പിക്കപ്പ് വാൻ കാൽനടയാത്രക്കാരനെയും സ്കൂട്ടർ യാത്രക്കാരിയെയും ഇടിച്ചു തെറിപ്പിച്ചു. തുടർന്ന് സമീപത്തെ അടാട്ട് പഞ്ചായത്തിന്‍റെ മോട്ടോർ ഷെഡിൽ ഇടിച്ചാണ് വാഹനംനിന്നത്. അപകടത്തിൽ പരിക്കേറ്റ കാൽനടയാത്രക്കാരൻ മേപ്പുറത്ത് വീട്ടിൽ സുധീഷ്(42), സ്കൂട്ടർ യാത്രകരായ അരിമ്പൂർ സ്വദേശികളായ ഷീജ(52), ജ്യോതി ബാബു(61), പിക്കപ്പ് വാനിന്‍റെ ഡ്രൈവർ കണ്ണൂർ സ്വദേശി അഭിജിത്ത്(22) എന്നിവരെ ആശുപത്രിയിൽ പ്രവേശിപ്പിച്ചു. വടക്കാഞ്ചേരി: പുളിഞ്ചോട് പമ്പിനുസമീപം ബൈക്ക് ലോറിയിലിടിച്ചു. അപകടത്തില്‌ പരിക്കേറ്റ തിരുത്തിപ്പറമ്പ് സ്വദേശി ജെൻസൻ(42)നെ ആക്ട്സ് പ്രവർത്തകർ തൃശൂർ മെഡിക്കൽ കോളജിൽ എത്തിച്ചു. കഴിഞ്ഞദിവസം അർധരാത്രിയിലായിരുന്നു അപകടം. വടക്കാഞ്ചേരി: ഓട്ടോറിക്ഷയും ബൈക്കും കൂട്ടിയിടിച്ച് ബൈക്ക് യാത്രികനും ഓട്ടോ ഡ്രൈവർക്കും പരിക്കേറ്റു. തൃശൂർ - ഷൊർണൂർ സംസ്ഥാനപാതയിൽ വാഴക്കോടുവച്ചായിരുന്നു അപകടം. ഇടിയുടെ അഘാതത്തിൽ നിയന്ത്രണംവിട്ട ഓട്ടോറിക്ഷ പരിസരത്തെ കാനയിലേക്ക് തലകീഴായി മറിഞ്ഞു. ഓട്ടോറിക്ഷയിൽ യാത്രക്കാർ ഉണ്ടായിരുന്നെങ്കിലും രക്ഷപ്പെട്ടു. ബൈക്ക് യാത്രികനായ മരത്താക്കര സ്വദേശി അലൻ(23), ഓട്ടോ ഡ്രൈവർ വാഴക്കോട് സ്വദേശിക് കുന്നത്തുപീടികയിൽ വീട്ടിൽ കബീർ എന്നിവർക്കാണ് പരിക്കേറ്റത്. പരിക്കേറ്റവരെ നാട്ടുകാർചേർന്ന് വടക്കാഞ്ചേരി ജില്ലാശുപത്രിയിൽ പ്രവേശിപ്പിച്ചു. പട്ടിക്കാട്: തോട്ടപ്പടി മേൽപ്പാതയിൽ ബൈക്കുകൾ കൂട്ടിയിടിച്ചുണ്ടായ അപകടത്തിൽ പീച്ചി പോലീസ് സ്റ്റേഷനിലെ സീനിയർ സിപിഒ വിനീഷിന് പരിക്കേറ്റു. ഇദ്ദേഹത്തെ തൃശൂരിലെ ആശുപത്രിയിൽ പ്രവേശിപ്പിച്ചു. രാത്രി എട്ടുമണിയോടെ തൃശൂർ ഭാഗത്തേയ്ക്കുള്ള പാതയിലാണ് അപകടമുണ്ടായത്.

കൊണ്ടാഴി ഗ്രാമപഞ്ചായത്ത് ഓഫീസ് ഉദ്ഘാടനം

ചേലക്കര: നവീകരിച്ച കൊണ്ടാഴി ഗ്രാമപഞ്ചായത്ത് ഓഫീസിന്‍റെ ഉദ്ഘാടനം പ്രതിപക്ഷനേതാവ് വി.‌ഡി. സതീശൻ നിർവഹിച്ചു. നിശ്ചയദാർഢ്യത്തോടെ വിവിധ ഫണ്ടുകൾ ഉപയോഗിച്ച് ബഹുരാഷ്ട്രകമ്പനി ഓഫീസുകൾക്ക് സമാനമായി ഓഫീസ് സജ്ജമാക്കിയ പഞ്ചായത്തിനെ അഭിനന്ദിക്കുന്നതായും വികസനകാര്യത്തിൽ ഭരണ, പ്രതിപക്ഷ ഭേദമില്ലാതെ എല്ലാവരെയും ഒരുമിച്ച് കൊണ്ടുപോകുന്നതിന് പഞ്ചായത്തുകൾക്ക് കഴിയണമെന്നും വി.ഡി. സതീശൻ പറഞ്ഞു. മുൻകാല പഞ്ചായത്ത് പ്രസിഡന്‍റുമാരെയും ഉദ്യോഗസ്ഥരെയും ചടങ്ങിൽ ആദരിച്ചു. യു.ആർ. പ്രദീപ് എംഎൽഎ അധ്യക്ഷനായി. കെ. രാധാകൃഷ്ണൻ എംപി മുഖ്യാതിഥിയായി. തദ്ദേശ സ്വയംഭരണവകുപ്പ് അസിസ്റ്റന്‍റ് എന്‌ജിനീയർ സി. പി. സിബിൻ റിപ്പോർട്ട് അവതരിപ്പിച്ചു. 55.97 ലക്ഷം രൂപ ചെലവിലാണ് പഞ്ചായത്ത് ഓഫീസ് നവീകരിച്ചത്. കൊണ്ടാഴി ഗ്രാമപഞ്ചായത്ത് പ്രസിഡന്‍റ് കെ. ശശിധരൻ, സ്റ്റാൻഡിംഗ് കമ്മിറ്റി ചെയർമാൻ ദീപ എസ്.നായർ, തിരുവില്വാമല ഗ്രാമപഞ്ചായത്ത് പ്രസിഡന്‍റ് കെ. പത്മജ എന്നിവർ പ്രസംഗിച്ചു.

മണ്ണെണ്ണ‌വിതരണം: പ്രതിസന്ധി രൂക്ഷം

വടക്കാഞ്ചേരി: തലപ്പിള്ളി താലൂക്കിലെ റേഷൻ മണ്ണെണ്ണ വിതരണത്തിൽ പ്രതിസന്ധി. താലൂക്കിലെ 129 റേഷൻ കടകളിലും സർക്കാർ പ്രഖ്യാപിച്ച മണ്ണെണ്ണ ഇതുവരെ എത്തിയിട്ടില്ല. വാതിൽപ്പടി വിതരണത്തെചൊല്ലി റേഷൻ വ്യാപാരികളും സിവിൽ സപ്ലെെസും തമ്മിൽ നിലനിൽക്കുന്ന തർക്കമാണ് പ്രശ്നത്തിന് ആധാരം. തർക്കം ഹൈക്കോടതി പരിഗണനയിലാണ്. മണ്ണെണ്ണ മുൻകാലങ്ങളിൽ ലഭ്യമാക്കിയിരുന്നതുപോലെ വാതിൽപ്പടിയായി നൽകണമെന്നാണ് ആൾ കേരള റേഷൻ ഡീലേഴ്‌സ് അസോസിയേഷന്‍റെ ആവശ്യം. ഇതുസംബന്ധിച്ച് നൽകിയ ഹർജി കോടതി കഴിഞ്ഞദിവസം പരിഗണിക്കുകയും 10 ദിവസത്തിനകം തീരുമാനമറിയിക്കാൻ സിവിൽ സപ്ലൈസ് വകുപ്പിനോട് ആ വശ്യപ്പെടുകയും ചെയ്തിരിക്കുകയാണ്. 80,000 ലിറ്റർ മണ്ണെണ്ണയാണ് താലൂക്കിൽ വിതരണംചെയ്യേണ്ടത്. നേരത്തെ മൊത്ത വിതരണ ഏജൻസി ടാങ്കർലോറികളിൽ ഡോർഡെലിവറി നടത്തിയിരുന്നു. വ്യാപാരികളാണ് ചെലവ് നൽകിയിരുന്നത്. മണ്ണെണ്ണ വിഹിതത്തിൽ കുറവ് വന്നതോടെ ഏജൻസി പിൻവാങ്ങി. ഇതോടെ വിതരണംനിലച്ചു. അതോടെ തൃശൂർ ഏജൻസിക്ക് ചുമതലനൽകി. അതും പരാജയമായി. പിന്നീട് പട്ടാമ്പി ഏജൻസിക്ക് വിതരണാവകാശംനൽകി. ഇയാളുടെ മരണത്തോടെ ഇപ്പോൾ മലപ്പുറം ഏജൻസിയാണ് കരാറുകാരൻ. ഇവിടെപോയി മണ്ണെണ്ണയെടുത്ത് വിതരണം ചെയ്യണമെന്നാണ്ഉദ്യോഗസ്ഥരുടെ ആവശ്യം. മണ്ണെണ്ണ സുരക്ഷിതമായി കൊണ്ടുവരാൻ ടാങ്കർ ആവശ്യമാണ്. പെട്ടിഓട്ടോറിക്ഷയിലോ തുറന്ന വാഹനത്തിലോ കൊണ്ടുവരണമെന്നാണ് ഉദ്യോഗസ്ഥർ പറയുന്നത്. ഇത് നിയമവിരുദ്ധമാണ്. അതിന് തയാറില്ലെന്ന നിലപാടിലാണ് റേഷൻ വ്യാപാരികൾ. എന്നാൽ കൃത്യമായ അളവിൽ മണ്ണെണ്ണ എത്തിച്ചുനൽകിയാൽ കമ്മീഷൻപോലും ഇല്ലാതെ വിതരണം ചെയ്യാൻ തയാറാണെന്ന് എകെആർഡിഎ തലപ്പിള്ളി താലൂക്ക് പ്രസിഡന്‍റ് കെ. സേതുമാധവൻ പറഞ്ഞു.

ഗ്യാസ് ക്രിമറ്റോറിയം ഉദ്ഘാടനംചെയ്തു

പറപ്പൂർ: തോളൂർ ഗ്രാമപഞ്ചായത്ത് നിർമാണം പൂർത്തിയാക്കിയ ഗ്യാസ് ക്രിമറ്റോറിയം ശാന്തിതീരത്തിന്‍റെ ഉദ്ഘാടനം നിയമസഭാ പ്രതിപക്ഷ നേതാവ് വി.ഡി. സതീശൻ നിർവഹിച്ചു. സേവ്യർ ചിറ്റിലപ്പിള്ളി എംഎൽഎ അധ്യക്ഷതവഹിച്ചു. പഞ്ചായത്ത് പ്രസിഡന്‍റ് ശ്രീകല കുഞ്ഞുണ്ണി ആമുഖ പ്രസംഗം നടത്തി. പുഴയ്ക്കൽ ബ്ലോക്ക് പ്രസിഡന്‍റ് ലീലാ രാമകൃഷ്ണൻ മുഖ്യാതിഥിയായിരുന്നു. ജനപ്രതിനിധികളായ ലില്ലി ജോസ്, ഷീന വിൽസൺ, സരസമ്മ സുബ്രഹ്മണ്യൻ, കെ.ജി പോൾസൺ, വി.കെ രഘുനാഥൻ എന്നിവർ പ്രസംഗിച്ചു.

കാണാതായ സൈനികനായി ഹേബിയസ് കോര്‍പ്പസ് ഹര്‍ജി

ഗുരുവായൂർ: പരിശീലനത്തിനായി മുംബൈ ബാന്ദ്രയിൽനിന്ന് യുപിയിലെ ബറേലിക്ക് ട്രയിനിൽപോയി കാണാതായ യുവ സൈനികനായി ഹൈക്കോടതിയില്‍ ഹേബിയസ് കോര്‍പ്പസ് ഹര്‍ജി നല്‍കി. ഗുരുവായൂർ താമരയൂർ കൊങ്ങണംവീട്ടിൽ ഗഫൂറിന്‍റെയും ഫൗസിയയുടേയും മകൻ ഫർസീൻ ഗഫൂറിനായി(28) ഭാര്യ സെറീനയാണ് ഹര്‍ജി നല്‍കിയത്. ഹര്‍ജി പരിഗണിച്ച ജസ്റ്റിസ് ദേവന്‍ രാമചന്ദ്രന്‍, ജസ്റ്റിസ് എം.ബി. സ്നേഹലത എന്നിവര്‍ ഉള്‍പ്പെട്ട ഡിവിഷന്‍ ബഞ്ച് അടുത്ത തിങ്കളാഴ്ചയ്ക്കുമുമ്പ് കേന്ദ്ര, സംസ്ഥാന സര്‍ക്കാരുകളോട് വിശദീകരണംനല്‍കാന്‍ ആവശ്യപ്പെട്ടു. ഗുരുവായൂർ താമരയൂർ സ്വദേശി അഡ്വ.വി.വി. ജോയ് മുഖേനയാണ് ഹര്‍ജി നല്‍കിയത്. ആര്‍മിയില്‍ പൂനെ റെജിമെന്‍റില്‍ ആംഡ് ഫോഴ്സസ് മെഡിക്കല്‍ കോളജില്‍ ഫാര്‍മസിസ്റ്റായി ജോലിചെയ്യുന്ന ഫര്‍സീന്‍ ബറേലിയിലുള്ള ആര്‍മി ആശുപത്രിയിലേക്ക് കഴിഞ്ഞ 10നാണ് ബാന്ദ്ര റെയിൽവെ സ്റ്റേഷനിൽനിന്ന് യാത്രതിരിച്ചത്. എന്‍.കെ. അക്ബര്‍ എംഎല്‍എ, മുസ്ലിം ലീഗ് സംസ്ഥാന വൈസ് പ്രസിഡന്‍റ് സി.എച്ച്. റഷീദ് എന്നിവര്‍ ഫര്‍സീന്‍റെ വീട് സന്ദര്‍ശിച്ചു.

ശാപമോക്ഷം ലഭിക്കാതെ തിരുവില്വാമല ക്ഷേത്രം ബസ് സ്റ്റാൻഡ്

തിരുവില്വാമല: രാമായണമാസാചരണത്തിനും നാലമ്പലദർശനത്തിനും വ്യാഴാഴ്ച തുടക്കമാകാനിരിക്കെ തിരുവില്വാമല ക്ഷേത്രം ബസ് സ്റ്റാൻഡിന് ഇപ്പോഴും ശാപമോക്ഷംകിട്ടാത്ത അവസ്ഥയാണ്. കർക്കടകം ഒന്നുമുതൽ 31 വരെ നാലമ്പലദർശനതിന് ഇവിടെ നിരവധിഭക്തരെത്തും. ഭക്തജനങ്ങൾക്ക് സൗകര്യമാകുമായിരുന്ന ബസ് സ്റ്റാൻഡാണ് അവഗണനയിൽ കിടക്കുന്നത്. അലഞ്ഞു നടക്കുന്ന കാളകൾക്കും തെരുവുപട്ടികൾക്കും വിശ്രമിക്കാനുള്ള ഒരു ഇടമാണ് ഇപ്പോളീ സ്റ്റാൻഡ്. ടൗണിൽനിന്നു മുക്കാൽ കിലോമീറ്റർ ദൂരമുണ്ട് വില്വാദ്രിനാഥ ക്ഷേത്രത്തിലേക്ക്. കർക്കിടകമാസത്തിൽ ആയിരക്കണക്കിന് തീർഥാടകരെത്തുന്ന ഈ ക്ഷേത്രത്തിലേക്കെത്താൻ വേണ്ടത്ര സൗകര്യമില്ല. ക്ഷേത്രത്തോടുചേർന്നുള്ള ഈ ബസ് സ്റ്റാൻഡിൽ ബസുകളെത്തിയാൽ ആളുകൾക്ക് എളുപ്പത്തിൽ എത്തിച്ചേരാം. ഇവിടമാകെ ഇപ്പോൾ വൃത്തികേടായി കിടക്കുകയാണ്. ക്ഷേത്രദർശനത്തിനെത്തുന്ന യാത്രക്കാർക്കുവേണ്ടിയാണ് 2010ൽ ക്ഷേത്രം സ്റ്റാൻഡും നിർമിച്ചത്. മുഖ്യമന്ത്രി, ആർടിഒ, കളക്ടർ തുടങ്ങിയവർക്ക് പരാതിനൽകി പഠിച്ചപണി പതിനെട്ടും നോക്കിയിട്ടും ബസുകൾ ടൗണിൽ വന്നു തിരിച്ചുപോവുകയല്ലാതെ ഇവിടേയ്ക്ക് വരുന്നില്ല. തൃശൂർ എൻഫോഴ്സ്മെന്‍റ് സ്ക്വാഡിലെ ഉദ്യോഗസ്ഥരെത്തി സ്റ്റാൻഡിൽ കയറാത്ത ബസുകൾക്കെതിരേ നടപടി സ്വീകരിച്ചുവെങ്കിലും വീണ്ടും പഴയപടിയായി കാര്യങ്ങൾ. തിരുവില്വാമലവഴി കടന്നുപോകുന്ന എല്ലാ ബസുകളും ക്ഷേത്രം സ്റ്റാൻഡ് വഴി പോകണമെന്നാണ് ഭക്തജനങ്ങളുടെ ആവശ്യം. യു.ആർ. പ്രദീപ് എംഎൽഎ ഇടപെട്ട് ക്ഷേത്രം സ്റ്റാൻഡിൽ കെഎസ്ആർടിസി സ്റ്റേ സെന്‍ററിന്‍റെ സാധ്യതയെക്കുറിച്ച് അവലോകനയോഗം ചേർന്നു. കെഎസ്ആർടിസി റീജിയണൽ മാനേജർ അടക്കമുള്ള ഉദ്യോഗസ്ഥരും പഞ്ചായത്ത് പ്രസിഡന്‍റ്, വൈസ് പ്രസിഡന്‍റ് തുടങ്ങി ജനപ്രതിനിധികളും പങ്കെടുത്തു. ഇപ്പോൾ സ്റ്റേ സെന്‍ററിന് കെട്ടിടം നിർമിക്കാൻ എംഎൽഎ 22 ലക്ഷം രൂപ അനുവദിച്ചിട്ടുണ്ട്. ഹൈമാസ്റ്റ് ലൈറ്റ് സ്ഥാപിക്കാനും തീരുമാനമുണ്ടെന്നറിയുന്നു.

മുഴുവഞ്ചേരി തുരുത്ത്- ചക്കരപ്പാടം പാലം റോഡ് നാടിനു സമര്‍പ്പിച്ചു

പടിയൂര്‍: പടിയൂര്‍ പഞ്ചായത്തിലെ മുഴുവഞ്ചേരി തുരുത്ത്- ചക്കരപ്പാടം പാലം റോഡ് നാടിനു സമര്‍പ്പിച്ചു. റോഡിന്‍റെ ഉദ്ഘാടനം മന്ത്രി ആര്‍. ബിന്ദു നിര്‍വഹിച്ചു. ഇരിങ്ങാലക്കുട എംഎല്‍എയും മന്ത്രിയുമായ ആര്‍. ബിന്ദുവിന്‍റെ ആസ്തി വികസന ഫണ്ടില്‍ ഉള്‍പ്പെടുത്തി 30ലക്ഷം രൂപ ചെലവഴിച്ചാണ് പടിയൂര്‍ പഞ്ചായത്തിലെ ഒമ്പതാം വാര്‍ഡിലെ മുഴുവഞ്ചേരിതുരുത്ത് -ചക്കരപ്പാടം പാലം റോഡ് നിര്‍മിച്ചത്. 266 മീറ്റര്‍ നീളത്തില്‍ എട്ട് മീറ്റര്‍ വീതിയിലാണ് ഈ റോഡിന്‍റെ നിര്‍മാണം പൂര്‍ത്തിയാക്കിയത്. മുഴുവഞ്ചേരി തുരുത്ത് അങ്കണവാടി പരിസരത്ത് നടന്ന ചടങ്ങില്‍ പടിയൂര്‍ പഞ്ചായത്ത് പ്രസിഡന്റ് ലിജി രതീഷ് അധ്യക്ഷത വഹിച്ചു. പടിയൂര്‍ പഞ്ചായത്ത് വൈസ് പ്രസിഡന്‍റ്് പ്രേമവത്സന്‍, വാര്‍ഡ് മെമ്പര്‍ കെ.വി. സുകുമാരന്‍ എന്നിവര്‍ സംസാരിച്ചു.

നവീകരിച്ച സ്കൂൾ ഓഡിറ്റോറിയവും ക്രിയേറ്റീവ് കോർണറും തുറന്നു

അന്നമനട: സർക്കാർ യു.പി.സ്കൂളിൽ അന്നമനട ഗ്രാമപഞ്ചായത്ത് 2024-25 വാർഷിക പദ്ധതിയിൽ ഉൾപ്പെടുത്തി നവീകരിച്ച ഓഡിറ്റോറിയവും തൊഴിലധിഷ്ഠിത വിദ്യാഭ്യാസനയത്തിന്‍റെ ഭാഗമായി സംസ്ഥാന സർക്കാരും സമഗ്രശിക്ഷ കേരളവും ഏഴുലക്ഷം രൂപ വിനിയോഗിച്ച് നടപ്പിലാക്കുന്ന ക്രിയേറ്റീവ് കോർണറും തുറന്നു. വിദ്യാർഥികൾക്ക് ഇലക്ട്രോണിക് - ഇലക്ട്രിക് മേഖലയിലും കേക്ക് നിർമാണം, തയ്യൽ തുടങ്ങിയവയിലും പരിശീലനം നൽകി സൃഷ്ടിപരമായ കഴിവുകളെ പരിപോഷിപ്പിക്കുകയാണ് ക്രിയേറ്റിവ് കോർണറിലൂടെ ലക്ഷ്യമിടുന്നത്. ഗ്രാമപഞ്ചായത്ത് പ്രസിഡന്‍റ്് പി.വി. വിനോദ് ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മറ്റി ചെയർമാൻ കെ.എ. ഇക്ബാൽ അധ്യക്ഷത വഹിച്ചു. പഞ്ചായത്ത് സ്ഥിരം സമിതി അധ്യക്ഷൻമാരായ ടി.കെ. സതീശൻ, മഞ്ജു സതീശൻ, ഗ്രാമപഞ്ചായത്ത് അംഗങ്ങളായ ഷിജ നസീർ , കെ.കെ. രവി നമ്പൂതിരി, കെ.എ. ബൈജു, ടി.വി. സുരേഷ്കുമാർ, ബിപിസി ഡോ. ലിജു, പ്രധാനാധ്യാപിക സൈന, പിടിഎ പ്രസിഡന്‍റ്് ദിവ്യ എന്നിവർ പ്രസംഗിച്ചു.

യുവാവിനെ ആക്രമിച്ച് മൊബൈൽ തട്ടിയെടുത്ത സംഭവത്തിൽ മൂന്ന് യുവാക്കൾക്കെതിരേ കേസ്

കയ്പമംഗലം: മൂന്നുപീടിക സെന്‍ററിൽ ബസ് കാത്ത് നിന്ന യുവാവിനെ ആക്രമിച്ച് മൊബൈൽ തട്ടിയെടുത്ത സംഭവത്തിൽ മൂന്ന് യുവാക്കൾക്കെതിരെ കയ്പമംഗലം പോലീസ് കേസെടുത്തു. ചാവക്കാട് തിരുവത്ര സ്വദേശികളായ നികേഷ്, നിസാമുദ്ദീൻ, മുർഷാദ് എന്നിവർക്കെതിരെയാണ് പോലീസ് പിടിച്ചുപറി, ആക്രമണം തുടങ്ങിയ കുറ്റകൃത്യങ്ങൾ ചുമത്തി കേസ് രജിസ്റ്റർ ചെയ്തത്. കയ്പമംഗലം ചളിങ്ങാട് സ്വദേശി പുത്തേഴത്ത് വീട്ടിൽ ശാഹുൽ ഹമീദിന്‍റെ മകൻ സാഹിൽ (19) ആണ് അക്രമത്തിനിരയായത്. ഇന്നലെ പുലർച്ചെ ഒന്നരയോടെയാണ് സംഭവം. എറണാകുളത്ത് പഠന സ്ഥലത്തേക്ക് പോകാനായി ബസ് കാത്തുനിൽക്കുകയായിരുന്നു സാഹിൽ. ബൈക്കിൽ വന്ന മൂന്ന് യുവാക്കളാണ് അക്രമം നടത്തിയത്. ഇരുമ്പ് കമ്പികൊണ്ട് അടിച്ചു പരിക്കേൽപ്പിക്കുകയും മൊബൈൽ ഫോണും എയർ പോഡും പിടിച്ച് വാങ്ങി കടന്നുകളയുകയും ചെയ്തു. ബഹളം കേട്ട് സെന്‍ററിലെ ഒട്ടോഡ്രൈവർമാർ പോലീസിനെ വിളിച്ചപ്പോഴേക്കും ഇവർ ബൈക്കുമായി കടന്നുകളഞ്ഞു. പോലീസ് ഇവരെ പിന്തുടർന്ന് പിന്നാലെ കൂടി. ഇതിനിടെ കൊടുങ്ങല്ലൂർ വടക്കേ നടയിലെത്തിയ യുവാക്കളുടെ ബൈക്ക് ബാരിക്കേഡിൽ ഇടിച്ച് മറിഞ്ഞ് അപകടത്തിൽപെടുകയും ചെയ്തു. സാരമായി പരിക്കേറ്റ മൂന്നുപേരെയും കളമശേരി മെഡിക്കൽ കോളജ് ആശുപത്രിയിൽ എത്തിച്ചിട്ടുണ്ട്. ചാവക്കാട് തിരുവത്ര സ്വദേശികളായ നികേഷ്, നിസാമുദ്ദീൻ, മുർഷാദ് എന്നിവരാണ് ബൈക്കിൽ ഉണ്ടായിരുന്നത്. ഇവർ മൂന്നുപേരും ആശുപത്രിയിൽ പോലീസ് വലയത്തിലാണ്.

സ്വകാര്യബസ് യാത്രക്കാരിയുടെ സ്വർണമാല മോഷ്ടിച്ചു

ചാലക്കുടി: സ്വകാര്യബസ് യാത്രക്കാരിയുടെ മൂന്നേകാൽ പവന്‍റെ സ്വർണമാല സ്ത്രീമോഷ്ടാക്കൾ പൊട്ടിച്ചു കൊണ്ടുപോയി. പൊയ്യ മേലൂക്കാടൻ സോമസുന്ദരന്‍റെ ഭാര്യ രാധികയുടെ സ്വർണമാലയാണ് നഷ്ടപ്പെട്ടത്. പൊയ്യയിൽ നിന്നും ചാലക്കുടിയിലേക്കു വരികയായിരുന്ന സ്വകാര്യബസിലാണ് മോഷണം നടന്നത്. ചാലക്കുടി ബസ് സ്റ്റാൻഡിൽ ഇറങ്ങിയ രാധിക മേലൂരിൽ ജോലിസ്ഥലത്തെത്തിയപ്പോഴാണ് മാല മോഷണംപോയ വിവരം അറിയുന്നത്. ചാലക്കുടിയിലെത്തി സ്വകാര്യ ബസുകാരെ വിവരം അറിയിച്ചു. ഉടനെ ബസിലെ സിസിടിവി ദൃശ്യങ്ങൾ പരിശോധിച്ചപ്പോൾ മോഷണം നടന്നതിന്‍റെ ദൃശ്യങ്ങൾ ലഭിച്ചു. ചാലക്കുടി റെയിൽവേ സ്റ്റേഷനിൽ നിന്നും ബസിൽ കയറിയ സ്ത്രീ ബസിൽനിന്നു രാധിക ഇറങ്ങുന്ന സമയത്തു മാല കട്ട് ചെയ്ത് എടുക്കുന്നതാണ് കണ്ടത്. പോലീസിൽ പരാതി നല്കി. തമിഴ്നാട് സ്ത്രീമോഷണസംഘമാണ് മോഷണം നടത്തിയതെന്ന് അന്വേഷണത്തിൽ വ്യക്തമായിട്ടുണ്ട്. പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

ബൈക്ക് മോഷണം: അന്തർജില്ലാ മോഷ്ടാവ് അറസ്റ്റിൽ

കാടുകുറ്റി: കാടുകുറ്റിയിൽനിന്നു ബൈക്ക് മോഷ്ടിച്ച കേസിൽ അന്തർജില്ലാ മോഷ്ടാവ് അറസ്റ്റിൽ. ചാലക്കുടി ചട്ടിക്കുളം സ്വദേശി ചെരിയേക്കര സുനാമി ജെയ്സൺ എന്നറിയപ്പെടുന്ന ജെയ്സനെ (55) യാണ് കൊരട്ടി പോലീസ് അറസ്റ്റ് ചെയ്തത്. കാതിക്കുടം സ്വദേശി അഭിനവിന്‍റെ വീട്ടിലെ കാർപോർച്ചിൽനിന്ന് ഇക്കഴിഞ്ഞ 25ന് പാഷൻ പ്രോ മോട്ടോർസൈക്കിൾ മോഷണംപോയ കേസിലാണ് അറസ്റ്റ്. വാഹനം മോഷ്ടിച്ച് പോകവേ ഹെൽമറ്റ് വയ്ക്കാത്തതിനു മോട്ടോർ വാഹന വകുപ്പിന്‍റെ ഫൈൻ ബൈക്ക് ഉടമയായ അഭിനവിനു വന്നിരുന്നു. തുടർന്ന് എഐ കാമറയിൽ പതിഞ്ഞ വീഡിയോ പരിശോധിച്ചതിൽ നിന്നാണ് പ്രതിയെ തിരിച്ചറിഞ്ഞത്. അന്തിക്കാട് പോലീസ് സ്റ്റേഷൻ പരിധിയിലെ ചാഴൂരുള്ള വീടിന്‍റെ മുമ്പിലെ ഷെഡിൽവച്ചിരുന്ന ഹീറോ ഹോണ്ട ബൈക്ക് ഇയാൾ ഇക്കഴിഞ്ഞ 30ന് മോഷ്ടിച്ച് കടത്തി കൊണ്ടുപോകവേ കോഴിക്കോട് ഫറോക്ക് പോലീസിന്‍റെ വാഹനപരിശോധനയ്ക്കിടെ പിടിലായി. ഇയാൾ പിന്നീട് കോഴിക്കോട് ജില്ലാ ജയിലിലേക്ക് റിമാൻഡി ലായ വിവരം കൊരട്ടി പോലീസിനു ലഭിച്ചു. തുടർന്ന് കോടതിയുടെ അനുമതിയോടെ കോഴിക്കോട് ജില്ലാ ജയിലിൽവച്ച് കൊരട്ടി പോലീസ് അറസ്റ്റ് ചെയ്യുകയായിരുന്നു. കൊരട്ടി, അന്തിക്കാട്, കയ്പമംഗലം, കൊടകര, കുന്നംകുളം, ഒറ്റപ്പാലം, കുന്നമംഗലം, ചേലക്കര, വടക്കാഞ്ചേരി, ആലത്തൂർ, അമ്പലമേട്, നടക്കാവ്, ഫറോക്ക് പോലീസ് സ്റ്റേഷനുകളിലായി പതിനഞ്ച് മോഷണക്കേസുകളിൽ ജെയ്സൺ പ്രതിയാണ്. കൊരട്ടി സിഐ അമൃത് രംഗൻ, എസ്ഐമാരായ ഒ.ജി. ഷാജു, സുമേഷ് കുമാർ, സിപിഒ ശ്രീജിത്ത് എന്നിവരാണ് അന്വേഷണസംഘത്തിലുണ്ടായിരുന്നത്.

ഇ.ടി. ടൈസൺ എംഎൽഎ വീണ്ടും അധ്യാപകനായി

കയ്പമംഗലം: മയക്കുമരുന്ന് മാഫിയകൾക്കു താക്കീതായി കയ്പമംഗലം മണ്ഡലത്തിൽ മയക്കുമരുന്നുകൾക്കെതിരേ കുട്ടികളെയാകെ അണിനിരത്തുന്ന ജനകീയ കാമ്പയിന് തുടക്കമായി. ഇതിന്‍റെ ഭാഗമായി മതിലകം സെന്‍റ്് ജോസഫ് ഹയർ സെക്കൻഡറി സ്കൂളിൽ നടന്ന ബോധവത്്കരണപരിപാടിയിലാണ് എംഎൽഎ അധ്യാപകനായത്. സ്കൂളിലെ എട്ട്,ഒന്പത്, 10 എന്നീ ക്ലാസുകളിലെ അധ്യാപകർ, എഴുത്തുകാർ, വിദ്യാഭ്യാസ-ആരോഗ്യപ്രവർത്തകർ, എക്സൈസ് ഉദ്യോഗസ്ഥർ, വ്ലോഗർമാർ, ഡിഇഒ, എഇഒ, ബിപിസിമാർ തുടങ്ങിയ മേഖലകളിലെ തെരഞ്ഞെടുത്ത 51 പേരാണ് മതിലകം സെന്‍റ്് ജോസഫ് ഹയർ സെക്കൻഡറി സ്കൂളിൽ എത്തിച്ചേർന്നത്. പൊതുസ്വീകാര്യനായ എംഎൽഎ അടക്കമുള്ള പുതിയ അധ്യാപകരെ തങ്ങളുടെ ക്ലാസ്മുറികളിൽ ലഭ്യമായപ്പോൾ കുട്ടികൾ വാചാലരായി. അവർ തങ്ങളുടെ സംശയങ്ങളും, ആശങ്കകളും ക്ലാസിലെത്തിയ റിസോഴ്സ്പേഴ്സൺമാരുമായി പങ്കുവച്ചു. തുടർന്നും കുട്ടികൾക്ക് ഈ മേഖലയിൽ ഉണ്ടാകുന്ന പ്രശ്നങ്ങൾക്ക് പരിഹാരമായി മണ്ഡലം സമിതി ഒപ്പമുണ്ടാവുമെന്നും ഹെൽപ്പ് ഡെസ്ക് പ്രവർത്തനങ്ങളും കൗൺസലിംഗും നിരന്തരം ലഭ്യമാകുമെന്നും മണ്ഡലം സമിതിയുടെ ചെയർമാനുമായ എംഎൽഎ പറഞ്ഞു. മതിലകം ഗ്രാമപഞ്ചായത്ത് പ്രസിഡന്‍റ്്‌ സീനത്ത് ബഷീർ, ശാസ്ത്ര സാഹിത്യപരിഷത്ത് പ്രസിഡന്‍റ് ടി.കെ. മീരാഭായി, അധ്യാപക അവാർഡ് ജേതാക്കളായ കെ.കെ. ഹരീഷ് കുമാർ, വി.കെ. മുജീബ് റഹ്മാൻ, എ.കെ. മൊയ്തീൻ, വ്ലോഗർ മൊനി ഷെബീർ, എഴുത്തുകാരായ ആദിത്യൻ കാതിക്കോട്, ഹവ്വ , അഫ്നാസ്, മാനേജർ ഫാ. ഷൈജൻ കളത്തിൽ, എക്സൈസ് സിഐ ബാല സുബ്രഹ്മണ്യൻ, എംഇഎസ് അസ്മാബി കോളജിലെ സൈക്കോളജി വിഭാഗം തലവൻ ലത്തീഫ് ചേനത്ത്, സ്വരക്ഷ കൺവീനർ പി.ആർ. ശ്രീധർ, ഇ.ആർ. രേഖ എന്നിവർ വിവിധ ക്ലാസ് മുറികളിൽ ക്ലാസുകൾ നയിച്ചു. കോ-ഓർഡിനേറ്റർ ടി. എസ്. സജീവൻ, ഹെഡ്മാസ്റ്റർ ജോജി ജോസഫ് തുടങ്ങിയവർ പ്രസംഗിച്ചു. ക്ലാസുകൾക്ക് ശേഷം കുട്ടികൾ മൈതാനിയിൽ "സേ നോ ടു ഡ്രഗ്സ്' എന്ന ഇംഗ്ലീഷ് അക്ഷരരൂപത്തിൽ അണിനിരന്ന് മയക്ക്മരുന്നുവിരുദ്ധ പ്രതിജ്ഞ ചൊല്ലി. ശിൽപി ഡാവിഞ്ചി സുരേഷ് ഒരുക്കിയ ഈ അക്ഷര ശിൽപം അതീവ മനോഹരവും ഹൃദ്യവുമായി മാറി. 200 അടി നീളവും 15 അടി വീതിയിലും അക്ഷര ശില്പത്തിൽ ആയിരത്തോളം കുട്ടികളാണ് പങ്കാളികളായത്.

കോടശേരി പഞ്ചായത്ത് യോഗം കോൺഗ്രസ് അംഗങ്ങളെ പ്രതിപക്ഷം തടഞ്ഞുവച്ചു

ചാലക്കുടി: കോടശേരി പഞ്ചായത്ത് യോഗം കഴിഞ്ഞ് പുറത്തിറങ്ങാൻ ശ്രമിച്ച കോൺഗ്രസ് അംഗങ്ങളെ പ്രതിപക്ഷമായ എൽഡി എഫ് അംഗങ്ങൾ തടഞ്ഞു. പുറത്തേക്കുപോകാൻ ശ്രമിച്ച കോൺഗ്രസ് അംഗങ്ങളായ റിജു മാവേലി, ഷിമ ബെന്നി, ജിനി ബെന്നി എന്നിവർക്കു മർദനമേറ്റു. ഇവരെ ചാലക്കുടി സെന്‍റ് ജെയിംസ് ആശുപത്രിയിൽ പ്രവേശിപ്പിച്ചു. തർക്കത്തെതുടർന്ന് മൂന്ന് എൽഡിഎഫ് അംഗങ്ങളെയും ആശുപത്രിയിൽ പ്രവേശിപ്പിച്ചു. ശകുന്തള വത്സൻ, സജിത ഷാജി, വി.ജെ. വില്യംസ് എന്നിവരേയാണ് ചാലക്കുടി താലൂക്ക് ആശുപത്രിയിൽ പ്രവേശിപ്പിച്ചത്. ഇന്നലെ ഹരിതകർമസേനയിലേക്ക് നടന്ന തെരഞ്ഞെടുപ്പ് പഞ്ചായത്ത് കമ്മറ്റി റദ്ദ് ചെയ്യാൻ തീരുമാനിച്ചതാണ് സംഘർഷത്തിനു കാരണം. ഹരിതകർമ സേനയിലേക്ക് നടന്ന തെരഞ്ഞെടുപ്പിൽ കുടുബശ്രീ അംഗങ്ങളല്ലാത്ത നാലുപേരെ വോട്ട് ചെയ്യാൻ അനുവദിച്ചില്ല. ഇതേ തുടർന്ന് ഹരിത കർമസേനയിലെ 22 പേർ പഞ്ചായത്ത് കമ്മറ്റിക്ക് നൽകിയ പരാതിയെ തുടർന്നാണ് ഇലക്‌ഷൻ റദ്ദ് ചെയ്യാൻ പഞ്ചായത്ത് കമ്മറ്റി തീരുമാനിച്ചത്. പ്രതിപക്ഷം എതിർക്കുകയും യോഗം കഴിഞ്ഞപ്പോൾ ഭരണകക്ഷി അംഗങ്ങളെ തടഞ്ഞുവയ്ക്കുകയും ചെയ്തതാണ് സംഘർഷത്തിൽ കലാശിച്ചത്. ഇരുപക്ഷവും പഞ്ചായത്ത് ഓഫീസിൽ പ്രതിഷേധം നടത്തി. കോൺഗ്രസ് അംഗങ്ങളെ മർദിച്ചവരെ അറസ്റ്റ് ചെയ്യണമെന്നാവശ്യപ്പെട്ട് ഇന്ന് യുഡിഎഫ് പോലീസ് സ്റ്റേഷൻ മാർച്ച് നടത്താൻ തീരുമാനിച്ചിട്ടുണ്ട്. എംഎൽഎ പ്രതിഷേധിച്ചു ചാലക്കുടി: കോടശേരി മുൻ ഗ്രാമപഞ്ചായത്ത് പ്രസിഡന്‍റ്് റിജു മാവേലി, ഗ്രാമ പഞ്ചായത്തംഗങ്ങളായ ഷീമ ബെന്നി, ജിനി ബെന്നി എന്നിവരെ എൽഡിഎഫ് പഞ്ചായത്തംഗങ്ങൾ സംഘംചേർന്ന് ആക്രമിച്ച് പരിക്കേൽപ്പിച്ചതിൽ ശക്തമായ പ്രതിഷേധം രേഖപ്പെടുത്തുന്നതായി സനീഷ്‌കുമാർ ജോസഫ് എംഎൽഎ അറിയിച്ചു. കേരളത്തിൽ അധികാരത്തിലിരിക്കുന്നതിന്‍റെ അഹന്തയിൽ എൽഡിഎഫ് പഞ്ചായത്ത് അംഗങ്ങൾക്ക് രാഷ്ട്രീയ അന്ധത ബാധിച്ചിരിയ്ക്കുകയാണെന്നും പഞ്ചായത്ത് തെരഞ്ഞെടുപ്പ് അടുത്തതോടെ വിറളിപൂണ്ട് ഈ ആക്രമണം നടത്തിയവർക്കെതിരെ പോലീസ് കേസ് രജിസ്റ്റർ ചെയ്തു. തുടർനടപടികൾ സ്വീകരിക്കണമെന്നും എംഎൽഎ ആവശ്യപ്പെട്ടു. കോടശേരി പഞ്ചായത്തിൽ ഇന്നു ഹർത്താൽ ചാലക്കുടി: കോടശേരി പഞ്ചായത്ത് യുഡി എഫ് അംഗങ്ങളെ എൽഡിഎഫ് അംഗങ്ങൾ ആക്രമിച്ചതിൽ പ്രതിഷേധിച്ച് യുഡിഎഫ് ഇന്നു കോടശേരി പഞ്ചായത്തിൽ ഹർത്താലിന് ആഹ്വാനം ചെയ്തു. രാവിലെ ആറുമുതൽ വൈകീട്ട് ആറുവരെയാണ് ഹർത്താൽ പ്രഖ്യാപിച്ചിരിക്കുന്നത്.

കൊടുങ്ങല്ലൂർ നഗരസഭ കൗൺസിൽ യോഗത്തിനിടെ പ്രതിപക്ഷബഹളം

കൊടുങ്ങല്ലൂർ: നഗരസഭ കൗൺസിൽ യോഗത്തിനിടെ പ്രതിപക്ഷ ബഹളം. നഗരസഭ ചെയർപേഴ്സനെ തടഞ്ഞു. വനിതാ കൗൺസിലർമാരെ കൈയേറ്റം ചെയ്തതായും പരാതി. ചെയർപേഴ്സൺ ഉൾപ്പെടെ ഭരണപക്ഷത്തെ മൂന്ന് വനിതാ കൗൺസിലർമാരെ താലൂക്ക് ആശുപത്രിയിൽ പ്രവേശിപ്പിച്ചു. ഇന്നലെ ഉച്ചയ്ക്കുശേഷം ചേർന്ന നഗരസഭാ യോഗത്തിനിടെയാണ് അനിഷ്ടസംഭവങ്ങൾ അരങ്ങേറിയത്. വാർഷികപദ്ധതി ഭേദഗതിയുമായി ബന്ധപ്പെട്ടുള്ള വിഷയത്തച്ചൊല്ലി പ്രതിപക്ഷത്തെ ബിജെപി കൗൺസിലർമാർ പ്രതിഷേധമുയർത്തുകയായിരുന്നു. ഭരണപക്ഷ കൗൺസിലർമാരുടെ വാർഡുകളിലേക്കുമാത്രമാണ് ഫണ്ട് അനുവദിക്കുന്നത് എന്നായിരുന്നു ബിജെപി കൗൺസിലർമാരുടെ ആരോപണം. ബഹളത്തിനിടെ അജൻഡകൾ പാസായതായി അറിയിച്ചു. ചെയർപേഴ്സൺ ടി.കെ. ഗീത തന്‍റെ ഓഫീസിലേക്കു മടങ്ങി. തുടർന്ന് ബിജെപി കൗൺസിലർമാർ ചെയർപേഴ്സനെ ഓഫീസിൽ തടഞ്ഞുവയ്ക്കുകയായിരുന്നു. പ്രതിഷേധക്കാരെ മറികടന്ന് പുറത്തുപോകാൻ ശ്രമിച്ച തന്നെയും കൗൺസിലർ അലീമ റഷീദിനെയും കെ.എ. വത്സലയെയും ബിജെപി കൗൺസിലർമാർ കയ്യേറ്റം ചെയ്തതായി ചെയർപേസൺ ടി.കെ. ഗീത ആരോപിച്ചു. എന്നാൽ വാർഷിക പദ്ധതി ഭേദഗതിയിൽ പ്രതിപക്ഷ കൗൺസിലർമാരുടെ വാർഡുകളെ പൂർണമായും അവഗണിച്ചതായും ഇതിനെ ചോദ്യം ചെയ്തപ്പോൾ ചെയർപേഴ്സൺ യോഗം പിരിച്ചുവിട്ട് ഇറങ്ങി പോവുകയും ആയിരുന്നു. ഇത് ചോദ്യം ചെയ്ത പ്രതിപക്ഷ വനിത കൗൺസിലർമാരെ ഭരണപക്ഷ കൗൺസിലർ മർദിച്ചതായും പ്രതിപക്ഷ നേതാവ് ടി.എസ്. സജീവനും ആരോപിച്ചു.

പുളിക്കലച്ചിറ താത്കാലിക ബണ്ട്റോഡ് ബലപ്പെടുത്തി

അരിപ്പാലം: നാലമ്പല തീര്‍ഥാടനത്തിനു മുന്‍പായി പ്രദേശത്തെ വെള്ളക്കെട്ട് പരിഹരിച്ച് പൊതുമരാമത്തുവകുപ്പ് ബണ്ട് റോഡ് ബലപ്പെടുത്തി. നാലമ്പല തീര്‍ഥാടനം വ്യാഴാഴ്ച ആരംഭിക്കാനിരിക്കെയാണ് നടപടി. തെങ്ങിന്‍മുട്ടികള്‍ സ്ഥാപിച്ച് ബണ്ടുയര്‍ത്തി അതിനുമുകളില്‍ മെറ്റല്‍, ക്വാറി വേസ്റ്റ്, ജിപിസി എന്നിവ ഇട്ടാണ് ബലപ്പെടുത്തിയിരിക്കുന്നത്. പടിയൂര്‍- പൂമംഗലം പഞ്ചായത്തുകളെ ബന്ധിപ്പിക്കുന്ന കോടംകുളം റോഡില്‍ കോള്‍പ്പാടശേഖരത്തിനു മധ്യത്തിലാണ് പുളിക്കലച്ചിറ പാലം നിര്‍മിക്കുന്നത്. നാലമ്പലതീര്‍ഥാടനകാലത്ത് പായമ്മല്‍ ശത്രുഘ്‌നക്ഷേത്രത്തിലെത്തുന്ന ഭക്തജനങ്ങളുടെ വാഹനങ്ങള്‍ ഇതുവഴിയാണ് തിരിച്ചുവിട്ടിരുന്നത്. പുതിയ പാലം നിര്‍മിക്കുന്നതിനായി പഴയ പാലം പൊളിച്ചുനീക്കുകയും വാഹനങ്ങള്‍ കടന്നുപോകുന്നതിനായി സമീപത്ത് ഒരു ബണ്ട് റോഡ് തയ്യാറാക്കുകയും ചെയ്തിരുന്നു. എന്നാല്‍, ഫില്ലര്‍ കാപ്പില്‍ അപാകം കണ്ടതോടെ പാലത്തിന്റെ നിര്‍മാണം നിര്‍ത്തിവച്ചു. ഇതിനിടയില്‍ കാലവര്‍ഷം ശക്തമായതോടെ പാടത്തിനു കുറുകെ സ്ഥാപിച്ചിരുന്ന ബണ്ട് റോഡില്‍ വെള്ളം തടഞ്ഞ് നീരൊഴുക്ക് തടസപ്പെട്ടു. പടിയൂര്‍, പൂമംഗലം പഞ്ചായത്തുകളിലെ പാടത്തോടുചേര്‍ന്നുള്ള പ്രദേശങ്ങള്‍ വെള്ളത്തിലാകുകയും നിരവധി കുടുംബങ്ങളെ മാറ്റിപ്പാര്‍പ്പിക്കുകയും ചെയ്തു. ഇതിനെത്തുടര്‍ന്ന് പ്രദേശവാസികള്‍ പ്രതിഷേധം ശക്തമാക്കിയതോടെ ബണ്ട് റോഡിന്‍റെ മുകള്‍ ഭാഗത്തുനിന്ന് മണ്ണുനീക്കി നീരൊഴുക്ക് പുനഃസ്ഥാപിക്കുകയായിരുന്നു. നാലമ്പലദര്‍ശനം ആരംഭിക്കുന്നതിനുമുന്‍പുതന്നെ അപാകങ്ങള്‍ പരിഹരിച്ച് ഗതാഗതം സുഗമമാക്കുന്നതിനു വേണ്ട നടപടികള്‍ സ്വീകരിക്കാന്‍ മന്ത്രി ആര്‍. ബിന്ദുവിന്‍റേയും ജില്ലാ കളക്ടറുടെയും നേതൃത്വത്തില്‍ നടന്ന ഓണ്‍ലൈന്‍ യോഗത്തില്‍ ഉദ്യോഗസ്ഥര്‍ക്ക് നിര്‍ദേശം നല്‍കിയിരുന്നു. ഇതിന്‍റെ അടിസ്ഥാനത്തില്‍ പൊതുമരാമത്തുവകുപ്പ് കൂടുതല്‍ പൈപ്പുകള്‍ സ്ഥാപിച്ച് ബണ്ടുയര്‍ത്തി താത്കാലിക റോഡ് ബലപ്പെടുത്തുകയായിരുന്നു. പൂമംഗലം പഞ്ചായത്ത് പ്രസിഡനന്‍റ് കെ.എസ്. തമ്പി അടക്കമുള്ളവരെത്തി റോഡിന്‍റെ മെറ്റലിംഗ് വിലയിരുത്തി.

കിണറ്റിൽവീണ് മരിച്ചനിലയിൽ

ചുവന്നമണ്ണ്: പാറയ്ക്കൽ കേശവൻ ഭാര്യ ഉഷ(58)യെ വീട്ടുമുറ്റത്തെ കിണറ്റിൽ മരിച്ചനിലയിൽ കണ്ടെത്തി. ഞായറാഴ്ച വൈകീട്ടാണ് മൃതദേഹം കിണറ്റിൽ കണ്ടെത്തിയത്. പീച്ചി പോലീസ് സ്ഥലത്തെത്തി നാട്ടുകാരുടെ സഹായത്തോടെ മൃതദേഹം പുറത്തെടുക്കുകയായിരുന്നു. പോസ്റ്റ്മോർട്ടത്തിനുശേഷം മൃതദേഹം സംസ്കരിച്ചു.

ചാലക്കുടി ടൗൺ റോട്ടറി ക്ലബ് ഭാരവാഹികളുടെ സ്ഥാനരോഹണം

ചാലക്കുടി: ടൗൺ റോട്ടറി ക്ലബ് പുതിയ ഭാരവാഹികളുടെ സ്ഥാനാരോഹണ ചടങ്ങ് മുൻ ഡിസ്ട്രിക്ട് ഗവർണർ വേണുഗോപാലമേനോൻ ഉദ്ഘാടനം നിർവഹിച്ചു. ടൗൺ റോട്ടറി ക്ലബ് പ്രസിഡന്‍റ് പി.ഡി. ദിനേശ് അധ്യക്ഷനായിരുന്നു. പുതിയ പ്രസിഡന്‍റായി അഡ്വ. കെ. കുഞ്ഞുമോനും, സെക്രട്ടറിയായി മൻഹർ മൻസൂർ, ട്രഷററായി അഡ്വ. സുനിൽ കളരിക്കൽ എന്നിവർ സ്ഥാനമേറ്റു. 2025 വർഷത്തെ കമ്മ്യൂണിറ്റി പ്രോജക്ടിന്‍റെ ഉദ്ഘാടനം സനീഷ്കുമാർ ജോസഫ് എംഎൽഎ നിർവഹിച്ചു. വിആർ പുരം സ്വദേശിയായ ഇരുകണ്ണുകൾക്കും കാഴ്ച നഷ്ടപ്പെട്ട വിദ്യാർഥിനിക്ക് ലാപ്ടോപ്പ് നൽകികൊണ്ടാണ് ഉദ്ഘാടനം നിർവഹിച്ച്ത്. മുനിസിപ്പൽ ചെയർമാൻ ഷിബു വാലപ്പൻ മുഖ്യപ്രഭാഷണം നടത്തി. അസിസ്റ്റന്‍റ് ഗവർണർ ഡേവിസ് കോനുപ്പറമ്പൻ, ജോജു പതിയാപറമ്പിൽ, അഡ്വ. കെ. കുഞ്ഞുമോൻ, ടി.സി.സത്യൻ, വിപിൻ വിജയൻ, ജീസസ് ചാക്കോ, സംഗീത് സജിലേഷ് ബാലൻ, മൻഹർ മൻസൂർ, അനീഷ് കുഞ്ഞപ്പൻ തുടങ്ങിയവർ പ്രസംഗിച്ചു.

ഉന്നതവിജയികളെ അനുമോദിച്ചു

ആളൂര്‍ പഞ്ചായത്ത് ആളൂര്‍: ഗ്രാമപഞ്ചായത്തിന്‍റെ നേതൃത്വത്തില്‍ എസ്എസ്എല്‍സി, പ്ലസ്ടു പരീക്ഷകളില്‍ ഉന്നത വിജയം നേടിയ വിദ്യാര്‍ഥികളേയും വിദ്യാലയങ്ങളേയും അനുമോദിച്ചു. "മികവ് 2025' എന്ന പേരില്‍ സംഘടിപ്പിച്ച അനുമോദന ചടങ്ങ് ജില്ലാ കളക്ടര്‍ അര്‍ജുന്‍ പാണ്ഡ്യൻ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.ആര്‍. ജോജോ അധ്യക്ഷത വഹിച്ചു. ജില്ലാ പഞ്ചായത്ത് അംഗം പി.കെ ഡേവീസ്, ഗ്രാമപഞ്ചായത്ത് വൈസ് പ്രസിഡന്‍റ്് രതി സുരേഷ്, ബിന്ദു ഷാജു, ജോസ് മാഞ്ഞുരാന്‍, ധിപിന്‍ പാപ്പച്ചന്‍, ഷൈനി തിലകന്‍, സന്ധ്യ നൈസന്‍, ജുമൈല സഹീര്‍ തുടങ്ങിയവര്‍ പ്രസംഗിച്ചു. നെല്ലായി സഹകരണ ബാങ്ക് കൊടകര: നെല്ലായി-പറപ്പൂക്കര സര്‍വിസ് സഹകരണ ബാങ്കിന്‍റെ ആഭിമുഖ്യത്തില്‍ എസ്എസ്എല്‍സി, പ്ലസ് ടു പരീക്ഷകളില്‍ ഫുള്‍ എപ്ലസ് നേടിയ വിദ്യാര്‍ഥികളെ ആദരിച്ചു. "ആദരണീയം 2025' എന്ന പേരില്‍ സംഘടപ്പിച്ച ചടങ്ങ് സനീഷ് കുമാര്‍ ജോസഫ് എംഎല്‍എ ഉദ്ഘാടനം ചെയ്തു. ബാങ്ക് പ്രസിഡന്‍റ് എസ്.ഹരീഷ് കുമാര്‍ അധ്യക്ഷത വഹിച്ചു. കെപിസിസി സെക്രട്ടറി അഡ്വ. ഷാജി കോടങ്കണ്ടത്ത്, മുന്‍ ബാങ്ക് പ്രസിഡന്‍റ് എം.ഒ.ജോണ്‍, പഞ്ചായത്തംഗം കെ.കെ. രാജന്‍, വൈസ് പ്രസിഡന്‍റ് കെ.കെ. സുരേന്ദ്രന്‍, ഭരണ സമിതി അംഗങ്ങളായ പി.പി. ഡേവിസ്, പി.ആര്‍. പ്രശാന്ത്, പി.നന്ദകമാര്‍, കെ.എസ്. രഘു, പി.വി.ബിജു, ശ്രീഹരി കര്‍ത്ത, അമ്പിളി സജീവന്‍, നിഷി ശശിധരന്‍, റിന്‍ഷിദ ഷിഫാജ്, സെക്രട്ടറി ബ്രീസി ജോണ്‍ എന്നിവര്‍ പ്രസംഗിച്ചു. എസ്എസ്എല്‍സി പരീക്ഷയില്‍ നൂറ് ശതമാനം വിജയം നേടിയ നാല് സ്‌കൂളുകള്‍ക്ക് ചടങ്ങില്‍ ട്രോഫി നല്കി ആദരിച്ചു.

തുമ്പൂര്‍ എസ്എച്ച്‌സി എല്‍പി സ്‌കൂളിന്‍റെ ശതാബ്ദി ആഘോഷം ഉദ്ഘാടനം ചെയ്തു

തുമ്പൂര്‍: എസ്എച്ച്‌സി എല്‍പി സ്‌കൂളിന്‍റെ ഒരു വര്‍ഷം നീണ്ടുനില്‍ക്കുന്ന ശതാബ്ദി ആഘോഷങ്ങള്‍ ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു ഉദ്ഘാടനം ചെയ്തു. ആഘോഷങ്ങള്‍ക്ക് മുന്നോടിയായി സ്‌കൂള്‍ സ്ഥാപക വിശുദ്ധ മറിയംത്രേസ്യയുടെ കബറടത്തില്‍ നിന്നും ദീപശിഖ പ്രയാണം നടന്നു. ശതാബ്ദിക്ക് ആരംഭം കുറിച്ച് സ്‌കൂള്‍ മാനേജര്‍ സിസ്റ്റര്‍ ഡോ. ഇസബല്‍ കൊടിയുയര്‍ത്തി. തുടര്‍ന്ന് ഉദ്ഘാടന സമ്മേളനത്തില്‍ ഹോളി ഫാമിലി സന്യാസസഭയുടെ മദര്‍ ജനറല്‍ സിസ്റ്റര്‍ ഡോ. ആനി കുര്യാക്കോസ് അധ്യക്ഷത വഹിച്ചു. പൂര്‍വ വിദ്യാര്‍ഥിയും ലോകത്തിലെ പ്രമുഖ കാര്‍ഡിയോ സര്‍ജനുമായ ഡോ. ബിനോയ് ചാട്ടുപറമ്പില്‍ മുഖ്യാതിഥി ആയിരുന്നു. പാവനാത്മ പ്രൊവിന്‍ഷ്യല്‍ സിസ്റ്റര്‍ ഡോ. ട്രീസാ ജോസഫ് ലോഗോ പ്രകാശനവും തുമ്പൂര്‍ പള്ളി വികാരി ഫാ. സിബു കള്ളാപറമ്പില്‍ അനുഗ്രഹപ്രഭാഷണവും നടത്തി. മാള എഇഒ കെ.കെ. സുരേഷ്, ഗ്രാമപഞ്ചായത്ത് അംഗങ്ങളായ സ്വപ്ന സെബാസ്റ്റ്യന്‍, രഞ്ജിത ഉണ്ണികൃഷ്ണന്‍, ഒഎസ്എ പ്രസിഡന്‍റ് ആര്‍.കെ. ജയരാജന്‍, പിടിഎ പ്രസിഡന്‍റ്് അല്‍ജോ ജോസ്, എംപിടി പ്രസിഡന്‍റ്് കൃഷ്ണപ്രിയ, സ്‌കൂള്‍ ലീഡര്‍ കുമാരി കെ.ആര്‍. കാര്‍ത്തിക എന്നിവര്‍ സംസാരിച്ചു. ഹെഡ്മിസ്ട്രസ് സിസ്റ്റര്‍ റോസ്‌ലറ്റ് സ്വാഗതവും ജനറല്‍ കണ്‍വീനര്‍ ഷാറ്റൊ കുരിയന്‍ നന്ദിയും പറഞ്ഞു. ശതാബ്ദി ആഘോഷങ്ങളുടെ ഭാഗമായി നടത്തുന്ന പരിപാടികളുടെ വിശദവിവരങ്ങള്‍ മുകുന്ദന്‍ ചെറാട്ട് അവതരിപ്പിച്ചു. ശതാബ്ദി ആഘോഷങ്ങലുടെ ഭാഗമായി ഡയാലിസിസ് ആവശ്യമുള്ള 100 വ്യക്തികള്‍ക്ക് സൗജന്യമായി ഡയാലിസിസ് നടത്തും. കാന്‍സര്‍ പോലെയുള്ള മഹാരോഗങ്ങള്‍ മുന്‍കൂട്ടി കണ്ടെത്തി ചികിത്സിക്കാന്‍ ഉതകുന്ന രീതിയില്‍ മെഗാ മെഡിക്കല്‍ ക്യാമ്പ് നടത്തും. അത്താണിയില്‍ സ്ഥാപിച്ചിട്ടുള്ള അപകടാവസ്ഥയിലായ ബസ്‌സ്റ്റോപ്പ് പുനര്‍നിര്‍മിക്കും. ശതാബ്ദി സ്മാരകമായി സ്‌കൂളില്‍ വിദ്യാര്‍ഥികള്‍ക്ക് ഭക്ഷണം കഴിക്കുന്നതിനായി ഊട്ടുപുര നിര്‍മിക്കും.

ആളൂര്‍ ജംഗ്ഷന്‍ വികസനം ത്വരിതഗതിയില്‍ പൂര്‍ത്തിയാക്കും: മന്ത്രി ആർ. ബിന്ദു

ഇരിങ്ങാലക്കുട: ആളൂര്‍ ജംഗ്ഷന്‍ വികസന പ്രവര്‍ത്തനങ്ങള്‍ ത്വരിതഗതിയില്‍ പൂര്‍ത്തിയാക്കുമെന്ന് മന്ത്രി ഡോ. ആര്‍. ബിന്ദു അറിയിച്ചു. ആളൂര്‍ പഞ്ചായത്തിലെ കൊമ്പൊടിഞ്ഞാമാക്കല്‍ ജംഗ്ഷനിലെ ഗതാഗതക്കുരുക്കുകള്‍ക്ക് ശാശ്വത പരിഹാരമായി റോഡ് വികസന പദ്ധതിയുടെ ഭാഗമായി പൊതുമരാമത്തു വകുപ്പ് തയാറാക്കിയ അലൈന്‍മെന്‍റ് പ്ലാന്‍ അംഗീകരിക്കുന്നതിനും തുടര്‍നടപടികള്‍ സ്വീകരിക്കുന്നതിനുമായി ജനപ്രതിനിധികള്‍, പൊതുജനങ്ങള്‍, വ്യാപാരികള്‍ എന്നിവരുമായി നടത്തിയ യോഗത്തില്‍ സംസാരിക്കുകയായിരുന്നു മന്ത്രി. 2024-25 സംസ്ഥാന ബജറ്റില്‍ 20 കോടി രൂപയാണ് ആളൂര്‍ ജംഗ്ഷന്‍ വികസനത്തിനായി വകയിരുത്തിയിരിക്കുന്നത്. പ്രാരംഭ ഘട്ടത്തില്‍ 1.20 ലക്ഷം രൂപ പിഡബ്ല്യുഡിക്ക് കൈമാറിയിട്ടുണ്ട്. ഇതിന്‍റെ അടിസ്ഥാനത്തില്‍ അലൈന്‍മെന്‍റ് പ്ലാനും ഇന്‍വെസ്റ്റിഗേഷനും പൂര്‍ത്തിയായി. നാലു ദിശകളിലേക്കും 100 മീറ്റര്‍ വീതി കൂട്ടിയാണ് അലൈന്‍മെന്‍റ്് പ്ലാന്‍ ഒരുക്കിയിരിക്കുന്നത്. കൊടകര-കൊടുങ്ങല്ലൂര്‍ സംസ്ഥാന പാതയില്‍ 20 മീറ്ററും ചാലക്കുടി-വെള്ളാങ്കല്ലൂര്‍ ജില്ലാതല റോഡില്‍ 15 മീറ്ററുമാണ് നിര്‍ദ്ദേശിച്ചിട്ടുള്ള വീതി. പദ്ധതിയുടെ ഭാഗമായി ഏകദേശം ഒരു ഏക്കര്‍ എട്ട് സെന്‍റ് ഭൂമി ഏറ്റെടുക്കേണ്ടതുണ്ടാകും. റോഡിനൊപ്പം ബസ്‌വേയുടെ നിര്‍മാണവും പദ്ധതിയില്‍ ഉള്‍പ്പെടുത്തിയിട്ടുണ്ട്. ഭൂമി ഏറ്റെടുക്കലിനായി മതിയായ നഷ്ടപരിഹാരം നല്‍കുമെന്നും ആവശ്യമായ ഭൗതിക സൗകര്യങ്ങള്‍ ഒരുക്കി പ്രദേശവാസികളെ ഉള്‍പ്പെടുത്തി പദ്ധതി നടപ്പാക്കുമെന്നും മന്ത്രി പറഞ്ഞു. അലൈന്‍മെന്‍റ്് പ്ലാന്‍ അസി. എക്‌സി. എന്‍ജിനീയര്‍ നവീന്‍ അവതരിപ്പിച്ചു. ജില്ലാ പഞ്ചായത്ത് അംഗം പി.കെ. ഡേവിസ്, ആളൂര്‍ പഞ്ചായത്ത് പ്രസിഡന്‍റ്് കെ.ആര്‍. ജോജോ, വൈസ് പ്രസിഡനന്‍റ്് രതി, സ്റ്റാന്‍ഡിംഗ് കമ്മിറ്റി അധ്യക്ഷരായ ദിപിന്‍ പാപ്പച്ചന്‍, ഷൈനി തിലകന്‍, വാര്‍ഡ് മെമ്പര്‍ മിനി പോളി, മാള ബ്ലോക്ക് പഞ്ചായത്ത് അംഗം ജുമൈല ഷഗീര്‍, എക്‌സി. എന്‍ജിനീയര്‍ രാകേഷ് തുടങ്ങിയവര്‍ പങ്കെടുത്തു.

വിമുക്തി ഡീഅഡിക്‌ഷൻ സെന്‍ററിലേക്ക് കായിക ഉപകരണങ്ങൾ നൽകി

ചാലക്കുടി: പോട്ട ലിറ്റിൽഫ്ലവർ പള്ളി കെസിവൈഎം സംഘടനയുടെ ആഭിമുഖ്യത്തിൽ താലൂക്ക് ഹോസ്പിറ്റലിൽ പ്രവർത്തിച്ചുവരുന്ന വിമുക്തി ഡീഅഡിക‌്ഷൻ സെന്‍ററിലേക്ക് കായിക ഉപകരണങ്ങൾ നൽകി. നഗരസഭ ചെയർമാൻ ഷിബു വാലപ്പൻ അധ്യക്ഷത വഹിച്ചു. സനീഷ് കുമാർ ജോസഫ് എംഎൽഎ ഉദ്ഘാടനം നിർവഹിച്ചു. വിമുക്തി ഡീഅഡിക‌്ഷൻ സെന്‍റർ ഡോ. പീറ്റർ കിണറ്റിങ്കലിന് കായിക ഉപകരണങ്ങളുടെ കിറ്റ് കൈമാറി, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ദീപു ദിനേശ്, പോട്ട ലിറ്റിൽഫ്ലവർ പള്ളി വികാരി ഫാ. ടോം മാളിയേക്കൽ, അസിസ്റ്റന്‍റ്് വികാരി ഫാ. ജേക്കബ് കുറ്റിക്കാടൻ, ഫാ. റെയ്‌സൻ തട്ടിൽ, കൈക്കാരൻ ഡേവിസ് മാളിയേക്കൽ, വാർഡ് കൗൺസിലർ വി.ജെ. ജോജി, എക്സൈസ് അസിസ്റ്റന്‍റ്് ഇൻസ്പെക്ടർ കെ.കെ.രാജു തുടങ്ങിയവർ പ്രസംഗിച്ചു.

വാഹന ഷോറൂമിൽ ആക്രമണം: പ്രതികൾ അറസ്റ്റിൽ

തൃപ്രയാർ: നാട്ടിക വടക്കേ പെട്രോൾപമ്പിന് സമീപത്തെ പ്രിൻസ് മോട്ടോഴ്സിൽ അതിക്രമിച്ചുകയറി ഉടമയെയും മകനെയും ജീവനക്കാരനേയും ആക്രമിച്ച് പരിക്കേൽപ്പിച്ച പ്രതികൾ അറസ്റ്റിൽ. വാടാനപ്പിള്ളി ബീച്ച് സ്വദേശികളായ പണ്ടാറത്തിൽ വീട്ടിൽ സാലിഹ്(43), പണ്ടാറത്തിൽ വീട്ടിൽ ആദിൽ(21) എന്നിവരെയാണ് വലപ്പാട് പോലീസ് അറസ്റ്റ് ചെയ്തത്. നാട്ടിക ലെമെർ സ്കൂളിന് സമീപം കാളക്കൊടുവത്ത് വീട്ടിൽ മധുസൂദനൻ(55), മകൻ അദേൽ കൃഷ്ണ(21), സാഥാപനത്തിലെ ജീവനക്കാരൻ എന്നിവരെ പ്രതികൾ കൈകൊണ്ടും സ്ക്രൂഡ്രൈവർകൊണ്ടും ആക്രമിച്ച് പരിക്കേൽപ്പിച്ചു. മധുസൂദനനെ വലിച്ചെറിഞ്ഞതിനെ തുടർന്ന് ഗ്ലാസ് തകര്‌ന്നു. പ്രതികളായ സ്വാലിഹും ആദിലും കൊണ്ടുവന്ന പെട്ടി ഓട്ടോ വേഗം സർവീസ് ചെയ്യണമെന്ന് ആവശ്യപ്പെടുകയായിരുന്നു. ജീവനക്കാരൻ തിരക്കായതിനാൽ ഇപ്പോൾ ചെയ്യാൻപറ്റില്ലെന്നു പറഞ്ഞപ്പോൾ ഇവർ സ്പാനർ ആവശ്യപ്പെട്ടു. സ്പാനർ പുറത്തുള്ള ജോലികൾക്ക് കൊടുക്കാറില്ലെന്ന് ഉടമ മധുസൂദനൻ പറഞ്ഞതിനെ തുടർന്നാണ് പ്രതികൾ ആക്രമണംനടത്തിയത്. സാലിഹ് നാല് ക്രിമിനൽകേസിലെ പ്രതിയാണ്. വലപ്പാട് സിഐ എം.കെ. രമേഷ്, എസ്ഐമാരായ വിജു, ഉണ്ണി, എഎസ്ഐമാരായ സുനിൽകുമാർ, സജയൻ, സിപിഒമാരായ അലി, ജെസ്‌ലിൻ തോമസ് എന്നിവരാണ് പ്രതികളെ അറസ്റ്റ് ചെയ്ത സംഘത്തിലുണ്ടായിരുന്നത്.

ഗുരുവായൂർ സ്വദേശിയായ സൈനികനെ കാണാനില്ലെന്നു പരാതി

ഗുരുവായൂർ: ഉത്തർപ്രദേശിലെ ബറേലിയിലേക്ക് പരിശീലനത്തിനുപോയ ഗുരുവായൂർ സ്വദേശിയായ സൈനികനെ കാണാതായതായി പരാതി. താമരയൂർ പൊങ്ങണംവീട്ടിൽ ഫർസീൻ ഗഫൂറിനെ(28)യാണ് കാണാതായത്. പൂനെയിലെ ആർമി മെഡിക്കൽ കോളജിലാണ് ഇയാള്‌ ജോലിചെയ്‌തിരുന്നത്. ബറേലിയിലേക്കുപോകാൻ ഒൻപതിനാണ് ബാന്ദ്രയിൽനിന്ന് റാംനഗർ എക്‌സ്പ്രസ് ട്രെയിനിൽ കയറിയത്. 10ന് രാത്രി പത്തരയോടെ ഭാര്യയെ ഫോണിൽവിളിച്ചു. പിന്നീട് ഫോണിൽ ബന്ധപ്പെടാനായില്ലെന്ന് അടുത്തബന്ധു പറഞ്ഞു. ബറേലിക്ക് ടിക്കറ്റ് കിട്ടാത്തതിനാൽ തൊട്ടടുത്തുള്ള ഇസത്ത്നഗറിലേക്കാണ് ടിക്കറ്റെടുത്തിരുന്നത്. ഇസത്ത്നഗറിലെ ടവർ ലൊക്കേഷനാണ് അവസാനമായി കാണിച്ചത്. പരിശീലനസ്ഥലത്ത് എത്തിയിട്ടില്ല. ഒറ്റയ്ക്കാണ് യാത്രചെയ്‌തിരുന്നതെന്നും ബന്ധു പറഞ്ഞു. മൂന്നുമാസം മുൻപാണ് ഫർസീൻ ഗഫൂര്‌ അവസാനമായി നാട്ടിൽവന്നത്. പോലീസ് അന്വേഷണം ഊർജിതമാക്കി. സൈനികതലത്തിലും അന്വേഷണംനടക്കുന്നുണ്ട്. ബന്ധുക്കളും സുഹൃത്തുക്കളും ഫർസിനെ തെരഞ്ഞു ബറേലിയിലേക്ക് പുറപ്പെട്ടു. ബന്ധുക്കൾ എൻ.കെ. അക്ബർ എംഎൽഎയ്ക്കും കേന്ദ്രമന്ത്രി സുരേഷ് ഗോപി എംപിക്കും പരാതിനൽകി.

വീട് കത്തിനശിച്ചു

ഏങ്ങണ്ടിയൂർ: വീട് കത്തിനശിച്ചു. മൂന്നാംവാർഡിൽ പനയംകുളങ്ങര ക്ഷേത്രത്തിനുവടക്ക് തേർവീട്ടിൽ പരേതനായ കൊച്ചുമോന്‍റെ ഭാര്യ ഉഷയുടെ ഓലമേഞ്ഞവീടാണ് ഇന്നലെരാവിലെ എട്ടോടെ പൂർണമായി കത്തിനശിച്ചത്. ഒറ്റയ്ക്ക് താമസിക്കുന്ന ഉഷ വീടുകളിൽ പണിക്കുപോയ നേരത്താണ് വീടിനു തീപിടിച്ചത്. നിമിഷനേരംകൊണ്ട് എല്ലാം കത്തി ചാമ്പലായി. ആളുകൾ ഓടിക്കൂടിയെങ്കിലും തീ കെടുത്താൻ കഴിഞ്ഞില്ല. ആധാരം, ആധാർകാർഡ്, റേഷൻ കാർഡ് അടക്കമുള്ള രേഖകളും ടിവി, പുതിയ അലമാര, കസേരകൾ, വസ്ത്രങ്ങൾ, വീട്ടുപകരണങ്ങൾ അടക്കം എല്ലാം കത്തിനശിച്ചു. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് നിഗമനം. വിവരമറിഞ്ഞ് ഏങ്ങണ്ടിയൂർ പഞ്ചായത്ത് പ്രസിഡന്‍റ് ബിന്ദു സുരേഷടക്കം നിരവധിപേർ വീട്ടിലെത്തി. താമസിക്കാൻ ഇടമില്ലാതായ ഉഷ തൽക്കാലം പണിക്കുപോകുന്ന വീട്ടിൽ താമസിക്കും. ലൈഫ് പദ്ധതിയിൽ ഉൾപ്പെട്ടിട്ടുള്ള ഉഷയെ വീട് നിർമിക്കുംവരെ വാടകവീടെടുത്ത് താമസിപ്പിക്കുമെന്ന് പഞ്ചായത്ത് ജനപ്രതിനിധികൾ അറിയിച്ചു.

പരാതിപ്പെടുന്നവരുടെ പേരില്‍ കള്ളക്കേസെടുക്കുന്നുവെന്ന്

പുതുക്കാട്: ചെങ്ങാലൂര്‍ മാട്ടുമലയിലെ സ്വകാര്യ ക്രഷറിനെതിരേ പരാതിപ്പെടുന്നവരുടെ പേരില്‍ കള്ളക്കേസെടുക്കുന്ന പോലീസ് നടപടി അവസാനിപ്പിക്കണമെന്ന് ശാസ്ത്രസാഹിത്യപരിഷത്ത് ആവശ്യപ്പെട്ടു. ക്രഷര്‌ നിബന്ധനകള്‍ലംഘിച്ചാണ് പ്രവര്‍ത്തിക്കുന്നത്. ഇതിനെതിരേ 2019 മുതല്‍ ശാസ്ത്രസാഹിത്യപരിഷത്ത് സമരത്തിലാണ്. ക്രഷര്‍ ഉടമയുടെ മൊഴിയുടെ അടിസ്ഥാനത്തിലാണ് അഞ്ചു പരിഷത്ത് പ്രവര്‍ത്തകരുടെ പേരില്‍ പുതുക്കാട് പോലീസ് കേസെടുത്തതെന്നും പരിഷത്ത് പ്രവര്‍ത്തകര്‍ പുതുക്കാട് വാർത്താസമ്മേളനത്തിൽ പറഞ്ഞു. പരിഷത്ത് കൊടകര മേഖല പരിസരം വിഷയസമിതി കണ്‍വീനറായ പി.എന്‍. ഷിനോഷിനെതിരേ രണ്ടുതവണ കേസെടുത്തു. എന്നാല്‍ ക്രഷര്‍ യൂണിറ്റുമായി ബന്ധപ്പെട്ട നാലുപേര്‍ ഷിനോഷിനെ ആക്രമിച്ചിട്ടും അതിനെതിരേ കേസെടുത്തില്ല. റിപ്പോര്‍ട്ട് സമര്‍പ്പിച്ച അന്നത്തെ പുതുക്കാട് എസ്എച്ച്ഒ കൈക്കൂലി വാങ്ങിയ കേസില്‍ സസ്‌പെന്‍ഷനിലായിരുന്നുവെന്നും പരിഷത്ത് ആരോപിച്ചു. ഷിനോഷിനെതിരെ കുറ്റപത്രം സമര്‍പ്പിച്ചതില്‍ അന്വേഷണ ഉദ്യോഗസ്ഥരുടെ ഭാഗത്ത് വീഴ്ചയുണ്ടെന്നും പുതുക്കാട് പോലീസ് കോടതിയില്‍ സമര്‍പ്പിച്ച റിപ്പോര്‍ട്ട് റദ്ദാക്കി വീണ്ടും അന്വേഷിക്കാന്‍ ജില്ല ക്രൈംബ്രാഞ്ചിനെ ചുമതലപ്പെടുത്തിയിട്ടുണ്ടെന്നും പരിഷത്ത് പ്രവര്‍ത്തകര്‍ പറയുന്നു. നാട്ടുകാര്‍ക്കുമുന്നില്‍ നടന്ന സംഭവങ്ങളില്‍ ഒരു സാക്ഷിയുടെപോലും മൊഴിയെടുക്കാതിരുന്നത് ഗുരുതരമായ വീഴ്ചയാണെന്നും പരിഷത്ത് ആരോപിച്ചു. പരിഷത്ത് കൊടകര മേഖല കമ്മിറ്റി സെക്രട്ടറി എ.ടി. ജോസ്, കെ.കെ. അനീഷ്കുമാർ, എം. മോഹൻദാസ്, കെ.ജി. ലിപിൻ എന്നിവർ വാർത്താസമ്മേളനത്തിൽ പങ്കെടുത്തു.

മത്സ്യബന്ധന വലകള്‌ കാണാതായി; അറുപതോളം കുടുംബങ്ങൾ പട്ടിണിയില്‌

വടക്കാഞ്ചേരി: വാഴാനി ഡാമിലെ മത്സ്യബന്ധനത്തിനുള്ള വല കാണാതായതോടെ ഹരിജൻ ഗിരിജൻ ഫിഷറീസ് സഹകരണസംഘത്തിലെ അറുപതോളം കുടുംബങ്ങൾ പട്ടിണിയിലായി. മത്സ്യബന്ധനവലകൾ കൂട്ടത്തോടെ മോഷണംപോയിട്ട് ഒരുമാസം പിന്നിട്ടെങ്കിലും പോലീസിന്‍റെ നടപടികൾക്ക് വേഗം പോരെന്നാണ് ആക്ഷേപം. പുതുതായി വാങ്ങിയ 30,000 രൂപയുടെ വലകളാണ് നഷ്ടപെട്ടത്. വിഷംകലരാത്ത നാടൻമത്സ്യങ്ങൾ കുറഞ്ഞവിലയ്ക്ക് ലഭിക്കുമെന്നതിനാൽ പ്രദേശവാസികൾക്കും പ്രയോജന കരമായിരുന്നു സംഘത്തിന്‍റെ പ്രവർത്തനം. മഴക്കാലം എത്തിയതോടെ ധാരാളം മീൻ ലഭിക്കുന്ന സമയമാണ്. പ്രതികളെക്കുറിച്ചുള്ള സൂചനകൾ ഉൾപ്പടെ വടക്കാഞ്ചേരി പോലീസിൽ സംഘം പ്രസിഡന്‍റ് രാമൻകുട്ടി പരാതിനൽകിയിട്ടും മോഷ്ടാക്കൾ കാണാമറയത്താണ്. പുതിയ വല വാങ്ങാൻ സംഘത്തിൽ പണമില്ലാത്തതിനാൽ മത്സ്യബന്ധനം പൂർണമായും നിലച്ചു. സ്ഥിരമായി ജോലിക്കെത്തുന്ന കുടുംബങ്ങൾ പട്ടിണിയിലാണ്. ഭൂരിഭാഗംപേരും ശാരീരിക ബുദ്ധിമുട്ടുകൾ ഉള്ളവരാണെന്നതിനാൽ മറ്റ് ജോലികൾക്കുപോകാൻ ക ഴിയില്ല. പോലീസ് മോഷ്ടാക്കളെ കണ്ടെത്തി വല തിരിച്ചുലഭിക്കാനുള്ള വഴിയൊരുക്കണമെന്നുമാണ്‌ തൊഴിലാളികളുടെ ആവശ്യം. വാഴാനി ഡാമിൽ മത്സ്യക്കുഞ്ഞുങ്ങളെ നിക്ഷേപിക്കാനും വളർച്ചയെത്തുമ്പോൾ പിടികൂടി വിൽക്കാനുമുള്ള അവകാശം സഹകരണസംഘത്തിലെ അംഗങ്ങൾക്ക് മാത്രമാണുള്ളത്. പുറമെനിന്നുള്ളവർക്ക് മത്സ്യബന്ധനത്തിന് കർശന വിലക്കുണ്ട്. എന്നാൽ അടുത്തിടെ വാഴാനി ഡാമിൽനിന്നു വിലക്കുലംഘിച്ച് യുവാക്കൾ മത്സ്യബന്ധനംനടത്തിയത് തർക്കത്തിന് വഴിവച്ചിരുന്നു. ഡാമിന്‍റെ വൃഷ്ടിപ്രദേശമായ പെരുംചിറയിലാണ് ഫിഷറീസ് സഹകരണസംഘം മെമ്പർമാർ ഇവരെ കണ്ടെത്തിയത്. അനധികൃത മത്സ്യബന്ധനംപാടില്ലെന്ന് അറിയിച്ചെങ്കിലും യുവാക്കൾ എതിര്‌ക്കുകയായിന്നു. അന്ന് യുവാക്കൾ, സംഘം അംഗങ്ങളെ വെല്ലുവിളിച്ചാണ് മടങ്ങിയതെന്നു പറയുന്നു. ഈ സംഭവത്തിനു പിന്നാലെയാണ് വലകൾ കാണാതായത്.

തരംഗ് 2കെ25 സംഘടിപ്പിച്ചു

ചൂണ്ടൽ: നഴ്സിംഗ് എഡ്യുക്കേഷൻ ഫോറം ആനുവൽ കൾച്ചറൽ മീറ്റ് തരംഗ് 2കെ25 ചൂണ്ടൽ സെന്‍റ് ജോസഫ്സ് നഴ്സിംഗ് സ്കൂളിൽ സംഘടിപ്പിച്ചു. നഴ്സിംഗ് എഡ്യുക്കേഷൻ ഫോറം മുൻ പ്രസിഡന്‍റ് സിസ്റ്റര്‌ കാതറിൻ പോൾ സിഎംസി ഉദ്ഘാടനംചെയ്തു. തൃശൂർ ജൂബിലി മിഷൻ മെഡിക്കൽ കോളജ് ആശുപത്രി അസി. ഡയറക്ടർ ഫാ. ജോയ്സൺ ചെറുവത്തൂർ അധ്യക്ഷത വഹിച്ചു. ജില്ലാ സഹകരണ ആശുപത്രി പ്രസിഡന്‍റ് ടി.കെ. പൊറിഞ്ചു മുഖ്യാതിഥിയായി. ചൂണ്ടൽ ഗ്രാമപഞ്ചായത്ത് പ്രസിഡന്‍റ് രേഖാ സുനിൽ, ചൂണ്ടൽ സെന്‍റ് ജോസഫ്സ് മിഷൻ ആശുപത്രി അഡ്മിനിസ്ട്രേറ്റർ സിസ്റ്റര്‌ ചെറുപുഷ്പം സിഎംസി, വാർഡ് മെമ്പർ നാൻസി ആന്‍റണി, പ്രിൻസിപ്പല്‌ സിസ്റ്റര്‌ ഡോ. ലിസാ പോൾ സിഎംസി, വി.ജെ ലിനറ്റ് എന്നിവർ സംസാരിച്ചു. ജില്ലയിലെ 14 നഴ്സിംഗ് സ്ഥാപനങ്ങളില്‌നിന്നുള്ള വിദ്യാർഥികൾ മീറ്റിൽ പങ്കെടുത്തു. മത്സരങ്ങളിൽചൂണ്ടൽ സെന്‍റ് ജോസഫ്സ് ആശുപത്രി നഴ്സിംഗ് സ്കൂള്‌ ഓവറോൾ ഫസ്റ്റ് കരസ്ഥമാക്കി. അമല നഴ്സിംഗ്, പാവറട്ടി സാൻ ജോസ് നഴ്സിംഗ് എന്നീ സ്കൂളുകൾ രണ്ടാംസ്ഥാനം പങ്കിട്ടു. കുന്നംകുളം മലങ്കര ഓർത്തോഡോക്സ് നഴ്സിംഗ് സ്കൂൾ മൂന്നാംസ്ഥാനം കരസ്ഥമാക്കി.

ജില്ലാ പോലീസ് സഹകരണ സംഘം: വിദ്യാഭ്യാസ പുരസ്കാര വിതരണം

തൃശൂർ: ജില്ലാ പോലീസ് സഹകരണസംഘത്തിന്‍റെ ആഭിമുഖ്യത്തിൽ നടത്തിയ വിദ്യാഭ്യാസ-സ്പോർട്സ് അവാർഡ് വിതരണവും സർവീസിൽനിന്നു വിരമിച്ചവർക്കുള്ള ആദരവും കേരള പോലീസ് അക്കാദമി ഡയറക്ടർ പി. വാഹിദ് ഉദ്ഘാടനംചെയ്തു. ജില്ല കളക്ടർ അർജുൻ പാണ്ഡ്യൻ സമ്മാനദാനം നിർവഹിച്ചു. സംഘം പ്രസിഡന്‍റും സിറ്റി പോലീസ് കമ്മീഷണറുമായ ആർ. ഇളങ്കോ വിരമിച്ച സംഘാംഗങ്ങളെ ആദരിച്ചു. കേരളവർമ കോളജ് അസി. പ്രഫസർ അരുണ്‍ കരിപ്പാൽ, സഹകരണസംഘം വൈസ് പ്രസിഡന്‍റ് പി. രാജു, ബോർഡ് അംഗങ്ങളായ കെ.ഐ. വിത്സണ്‍, പി.കെ. ജോസ്, എം.വി. അനിലൻ, കെ.എ. യൂസഫ്, ഇ.ജെ. പ്രിയ, പി.ഐ. മൻസൂർ, കെ.ജെ. ജോർജ് വർഗീസ്, സി.ജി. ദിനി, ഷിബു ജോർജ്, പി.പി. അനീഷ്, ഇ.വി. സ്മിത, സംഘം സെക്രട്ടറി എം.എസ്. ഷീന എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]