ADVERTISEMENT

ADVERTISEMENT

ബഹുമുഖ പ്രതിഭാ സംഗമം

കോതമംഗലം: ഊന്നുകൽ സഹകരണ ബാങ്കിന്‍റെ ആഭിമുഖ്യത്തിൽ സമൂഹത്തിന്‍റെ വിവിധ മേഖലകളിൽ പ്രാവീണ്യം നേടിയ വ്യക്തികളെ ആദരിക്കാൻ ബഹുമുഖ പ്രതിഭാ സംഗമം നടത്തി. ആന്‍റണി ജോൺ എംഎൽഎ ഉദ്ഘാടനം നിർവഹിച്ചു. ബാങ്ക് പ്രസിഡന്‍റ് എം.എസ്. പൗലോസ് അധ്യക്ഷത വഹിച്ചു.

കവളങ്ങാട് പഞ്ചായത്ത് പ്രസിഡന്‍റ് ഷിബു പടപറമ്പത്ത് മുഖ്യ പ്രഭാഷണം നടത്തി. എഇഒ കെ.ബി. സജീവ്, കോതമംഗലം താലൂക്ക് ഹോസ്പിറ്റൽ സുപ്രണ്ട് ഡോ. സാം പോൾ, കൃഷി ഓഫീസർ കെ.എ. സജി, ബാങ്ക് വൈസ് പ്രസിഡന്‍റ് തോമസ് പോൾ,

ഭരണസമിതി അംഗങ്ങളായ ജോയി പോൾ, വി.സി. മാത്തച്ചൻ, ജോസഫ് ജോർജ്, കെ.ഡി. അഭിലാഷ്, പി.എം. ഹൈദ്രോസ് , ലിസി ജോയി, സോണിയ കിഷോർ, സെക്രട്ടറി കെ.കെ. ബിനോയി എന്നിവർ പ്രസംഗിച്ചു.

ADVERTISEMENT

വരുമാനക്കുതിപ്പില്‍ ജില്ലയിലെ വിനോദ സഞ്ചാര കേന്ദ്രങ്ങള്‍

കൊച്ചി: വരുമാനക്കുതിപ്പില്‍ ജില്ലയിലെ വനംവകുപ്പിന്‍റെ കീഴിലെ വിനോദ സഞ്ചാര കേന്ദ്രങ്ങള്‍. കഴിഞ്ഞ മൂന്ന് വര്‍ഷത്തിനിടെ ലക്ഷങ്ങളുടെ വരുമാനമാണ് ഓരോ ടൂറിസം കേന്ദ്രങ്ങളില്‍ നിന്നും നേടാനായത്. എറണാകുളം ജില്ലയിലെ ഫോറസ്റ്റ് ഡിവിഷന്‍ ഓഫീസുകള്‍ക്ക് കീഴിലുള്ള ടൂറിസം കേന്ദ്രങ്ങളിലാണ് സമീപകാലത്തായി വരുമാന നേട്ടം ഉണ്ടായിട്ടുള്ളത്. മലയാറ്റൂര്‍ ഫോറസ്റ്റ് ഡിവിഷന് കീഴിലുള്ള മുളങ്കുഴി, പാണിയേലി പോര്, ഭൂതത്താന്‍കെട്ട് എന്നിവിടങ്ങളിലും കാലടി പ്രകൃതി പഠനകേന്ദ്രത്തിന് (എന്‍എസ്‌സി) കീഴിലെ അഭയാരണ്യം, പാണംകുഴി, മംഗളവനം, സുവര്‍ണോദ്യാനം എന്നിവിടങ്ങളിലും കോതമംഗലം ഫോറസ്റ്റ് ഡിവിഷന് കീഴിലുള്ള ഇടുക്കി ജില്ലയിലെ തൊമ്മന്‍കുത്തിലുമാണ് കഴിഞ്ഞ മൂന്നു വര്‍ഷത്തിനിടെ വരുമാനത്തില്‍ വലിയ കുതിപ്പ് ഉണ്ടായിട്ടുള്ളത്. വനം വകുപ്പിന്‍റെ പ്രവര്‍ത്തനങ്ങള്‍ക്ക് പുറമേ സമൂഹമാധ്യമങ്ങളിലടക്കം വിനോദ സഞ്ചാര കേന്ദ്രങ്ങളെക്കുറിച്ചുള്ള മനോഹര ദൃശ്യങ്ങളും ചെറു വീഡിയോകളും സഞ്ചാരികളെ ഇവിടേക്ക് എത്തിക്കുന്നതിന് സഹായകമായിട്ടുണ്ടെന്നാണ് വിലയിരുത്തല്‍. സന്ദര്‍ശകരുടെ എണ്ണം വര്‍ധിക്കുന്നതോടെ പ്രദേശങ്ങളിലെ അടിസ്ഥാന വിസകന സൗകര്യങ്ങളും വര്‍ധിപ്പിക്കണമെന്ന് ആവശ്യവും ഉയരുന്നുണ്ട്. ജില്ലയില്‍ കഴിഞ്ഞ മൂന്ന് വര്‍ഷത്തിനിടെ ഏറ്റവുമധികം വരുമാനം നേടിയത് മലയാറ്റൂര്‍ പാണിയേലി പോരിലാണ്. 1.95 കോടി രൂപയാണ് ഇവിടെ ലഭിച്ചത്. മലയാറ്റൂർ ഭൂതത്താന്‍കെട്ടാണ് തൊട്ടുപിന്നില്‍ 65.74 ലക്ഷം, എന്‍എസ്‌സി കാലടി അഭയാരണ്യം 60.01 ലക്ഷം, മലയാറ്റൂര്‍ മുളങ്കുഴി മഹാഗണി 24.83 ലക്ഷം, എന്‍എസ്‌സി കാലടി സുവര്‍ണോദ്യാനം 9.61 ലക്ഷം, എന്‍എസ്‌സി കാലടി (എറണാകുളം) മംഗളവനം 7.83 ലക്ഷം, എന്‍എസ്‌സി കാലടി പാണംകുഴി 3.88 ലക്ഷം എന്നിങ്ങനെയാണ് വകുപ്പിന് കീഴിലെ മറ്റ് വിനോദ സഞ്ചാര കേന്ദ്രങ്ങളിലെ വരുമാനം.

കാടുകയറി ഭൂതത്താൻകെട്ടിലെ ക്വാർട്ടേഴ്സുകൾ

കോതമംഗലം: ടൂറിസ്റ്റ് കേന്ദ്രമായ ഭൂതത്താൻകെട്ടിലെ ക്വാർട്ടേഴ്സുകൾ കാടുകയറി നശിക്കുന്നു. പെരിയാർവാലിയുടെ ഉടമസ്ഥതയിലുള്ളതാണ് ക്വാർട്ടേഴ്സുകൾ. കാട് മൂടിയിരിക്കുന്ന പരിസരം, ആൾത്താമസമില്ലാത്ത കെട്ടിടങ്ങൾ. ഒറ്റനോട്ടത്തിൽ സ്ഥലപ്പേരിലുള്ള ഭൂതങ്ങളിവിടെയാണോ എന്ന് പോലും തോന്നിപ്പിക്കുന്ന അന്തരീക്ഷം. മുമ്പ് പെരിയാർവാലിയിലെ ജീവനക്കാരുടെ ക്വാട്ടേഴ്സുകളായിരുന്നു ഈ കെട്ടിടങ്ങൾ. പതിനഞ്ചോളം ക്വാർട്ടേഴ്സുകളിൽ ഇപ്പോൾ ഉപയോഗിക്കുന്നത് രണ്ടെണ്ണം മാത്രം. മറ്റുള്ളവയെല്ലാം ആവശ്യത്തിന് പരിപാലനമില്ലാതെ തകർച്ചയുടെ വക്കിൽ. ഇതേ അവസ്ഥ തുടർന്നാൽ കെട്ടിടങ്ങൾ ഉപയോഗശൂന്യമാകാൻ അധികകാലം കാത്തിരിക്കേണ്ടതില്ല. ക്വാർട്ടേഴ്സ് കെട്ടിടങ്ങൾ ടൂറിസം ആവശ്യത്തിന് ഉപയോഗപ്പെടുത്താൻ മുമ്പ് തീരുമാനമെടുത്തിരുന്നതാണ്. കെടിഡിസിക്ക് കൈമാറാനും നടപടി എടുത്തിരുന്നു. വിനോദ സഞ്ചാരികൾക്കായുള്ള കോട്ടേജുകളാക്കി മാറ്റാനായിരുന്നു തീരുമാനം. ഇതിന്‍റെ ഭാഗമായി ലക്ഷക്കണക്കിന് രൂപ മുടക്കി കെട്ടിടങ്ങളുടെ അറ്റകുറ്റപ്പണി നടത്തിയതുമാണ്. കെടിഡിസിയുടെ നേതൃത്വത്തിൽ വികസന പദ്ധതികളും ആസൂത്രണം ചെയ്തിരുന്നു. ഇതിന് മുന്നോടിയായി ബിയർ പാർലർ തുടങ്ങി. ഈ നീക്കത്തിന് മുൻകൈയെടുത്തവർ സ്ഥാനങ്ങളിൽ നിന്ന് മാറിയത് പദ്ധതിക്ക് തിരിച്ചടിയായി. പിന്നീട് ബിയർ പാർലർ അടച്ചുപൂട്ടി. കെടിഡിസി ഭൂതത്താൻകെട്ടിനോട് സലാം പറഞ്ഞു. ഇറിഗേഷൻ ടൂറിസം പദ്ധതിയുടെ ഭാഗമായി പെരിയാർവാലിയുടെ കെട്ടിടങ്ങളടക്കം കരാറെടുത്ത സ്വകാര്യ കമ്പനിക്ക് കൈമാറാൻ ജലവിഭവ വകുപ്പ് തീരുമാനിച്ചിരുന്നു. ഇതിൽ ക്വാട്ടേഴ്സ് കെട്ടിടങ്ങളും ഉൾപ്പെടും. പദ്ധതിയുടെ തുടർനടപടികൾ അനിശ്ചിതത്വത്തിലാണ്. റിസർവോയറിന്‍റെയും തടാകത്തിന്‍റെയും സമീപത്താണ് ഈ കെട്ടിടങ്ങൾ. കെട്ടിടങ്ങൾ ഫലപ്രദമായി ഉപയോഗിക്കാൻ കഴിഞ്ഞാൽ ടൂറിസ്റ്റ് കേന്ദ്രത്തിന്‍റെ മുഖച്ഛായ മാറും. പൊതുഖജനാവിലേക്ക് വരുമാനവും ലഭിക്കും. ക്വാർട്ടേഴ്സുകൾക്ക് സമീപം ഡാം സൈറ്റിനോട് ചേർന്ന് നിർമിച്ചിട്ടുള്ള വാച്ച് ടവറും പ്രവേശനം നിഷേധിച്ച് നോക്കുകുത്തിയായി നിലകൊള്ളുകയാണ്. പെരിയാർവാലി എക്സിക്യുട്ടീവ് എൻജിനീയർ അടക്കമുള്ള ഉദ്യോഗസ്ഥൻ കഴിഞ്ഞ ദിവസം സ്ഥലത്ത് നേരിട്ടെത്തി പരിശോധന നടത്തി. തുടർനടപടികൾ ഉടൻ ഉണ്ടാകുമെന്ന് പ്രതീക്ഷയിലാണ് പ്രദേശവാസികൾ.

ലൈറ്റ് ഹൗസ് ബീച്ചിൽ സുരക്ഷ തീരെ പോരാ

വൈപ്പിൻ: അവധി ദിവസങ്ങളിലും വിശേഷദിവസങ്ങളിലും നിരവധി സന്ദർശകർ എത്തുന്ന പുതുവൈപ്പ് ലൈറ്റ് ഹൗസ് ബീച്ചിൽ സന്ദർശകർക്ക് സുരക്ഷ പോരെന്ന് ആക്ഷേപം. ലൈഫ് ഗാർഡുകളോ പോലീസോ സേവനത്തിൽ ഇല്ലാത്തതിനാൽ പരിധിവിട്ട് കടലിൽ കുളിക്കുന്നവരെ വിലക്കാനും നിയന്ത്രിക്കാനും ആരുമില്ല. മാത്രമല്ല, അപകടത്തിൽപ്പെട്ടാൽ രക്ഷാപ്രവർത്തനത്തിലും മറ്റും യാതൊരു സംവിധാനങ്ങളും ഇവിടെയില്ല. ഏതാനും ദിവസങ്ങൾക്കു മുമ്പ് മഹാരാജാസ് കോളജിലെ ഒരു വിദ്യാർഥി മുങ്ങിമരിച്ച ഫോർട്ട് വൈപ്പിൻ പെബിൾസ് ബീച്ചിലെ സ്ഥിതിയും ഇതുതന്നെയാണ്. നിയന്ത്രിക്കാൻ ആളില്ലാത്തതിനാൽ ഇവിടെ എത്തുന്ന സന്ദർശകർ പരിധിവിട്ട് കടലിൽ ഇറങ്ങി കുളിക്കുക പതിവാണെന്ന് പ്രാദേശവാസികൾ പറയുന്നു. ഈ സാഹചര്യത്തിൽ അവധി ദിനങ്ങളിൽ രണ്ട് ബീച്ചുകളിലും ലൈഫ് ഗാർഡുകളുടെ സേവനം ലഭ്യമാക്കണമെന്ന് നാട്ടുകാർ ജില്ലാ ടൂറിസം പ്രമോഷൻ കൗൺസിൽ അധികൃതരോട് ആവശ്യപ്പെട്ടു.

പുതിയ സിറ്റി പോലീസ് കമ്മീഷണറേറ്റ് : "നിര്‍മാണം സമയബന്ധിതമായി പൂര്‍ത്തിയാക്കണം'

കൊച്ചി: എറണാകുളം ഹൈക്കടതി ജംഗ്ഷനു സമീപം നിർമിക്കുന്ന കൊച്ചി സിറ്റി പോലീസ് കമ്മീഷണറേറ്റ് സമയബന്ധിതമായി പൂര്‍ത്തിയാക്കണമെന്ന ആവശ്യം ശക്തമാകുന്നു. നിര്‍മാണ പ്രവര്‍ത്തനങ്ങള്‍ ദ്രുതഗതിയില്‍ പൂര്‍ത്തിയാക്കാനായി സര്‍ക്കാര്‍തലത്തില്‍ കൂടുതല്‍ ഫണ്ട് അനുവദിക്കണമെന്ന ആവശ്യമാണ് പോലീസ് ഉദ്യോഗസ്ഥര്‍ക്കുളളത്. കമ്മീഷണറേറ്റിന്‍റെ നിര്‍മാണം പൂര്‍ത്തീകരിക്കുന്നതിനുള്ള ഫണ്ട് 2026- 27 പ്ലാന്‍ പ്രപ്പോസലില്‍ ഉള്‍പ്പെടുത്തുന്നതിനുള്ള നടപടി സംസ്ഥാന പോലീസ് മേധാവി തലത്തില്‍ സ്വീകരിച്ചിട്ടുണ്ടെന്ന് മുഖ്യമന്ത്രി പറയുമ്പോഴും അത് സമയബന്ധിതമായി അനുവദിക്കണമെന്ന് പോലീസ് ഉദ്യോഗസ്ഥര്‍ ആവശ്യപ്പെടുന്നു. നിലവില്‍ ഷണ്‍മുഖം റോഡിലെ റവന്യൂ ടവറില്‍ ഭവന നിര്‍മാണ ബോര്‍ഡിന്‍റെ കെട്ടിടത്തിലാണ് വലിയ തുക വാടക നല്‍കി കൊച്ചി പോലീസ് ആസ്ഥാനം പ്രവര്‍ത്തിക്കുന്നത്. പരിമിതമായ സൗകര്യത്തില്‍ സിറ്റി പോലീസ് കമ്മീഷണര്‍, മൂന്ന് ഡിസിപിമാര്‍, വിവിധ സ്‌പെഷല്‍ യൂണിറ്റുകള്‍ ഉള്‍പ്പെടെയുള്ള ഓഫീസുകളാണ് ഇവിടെയുളളത്. പുതിയ കെട്ടിടത്തിന്‍റെ നിര്‍മാണ പ്രവര്‍ത്തനങ്ങള്‍ പൂര്‍ത്തിയായാല്‍ എല്ലാ വിഭാഗങ്ങളെയും ഒരു കുടക്കീഴില്‍ കൊണ്ടുവരാനാകും. അതിലുപരി ഇപ്പോൾ നല്കിവരുന്ന വന്‍വാടകയും ഒഴിവാക്കാനാകും. 2007ലാണ് കൊച്ചി സിറ്റി പോലീസ് ആസ്ഥാനം പൊളിച്ചത്. ബഹുനിലക്കെട്ടിടം നിര്‍മിക്കുന്നതിനുള്ള പാരിസ്ഥിതിക അനുമതിയുമായി ബന്ധപ്പെട്ടതായിരുന്നു പ്രാരംഭ ഘട്ടത്തിലെ കാലതാമസം. ഇതിനായി നിര്‍ദിഷ്ട പദ്ധതിയില്‍ മാറ്റം വരുത്തി. പിന്നീട്, പോലീസ് ഓഫീസ് കം കൊമേഴ്‌സല്‍ സമുച്ചയം എന്ന ആശയത്തിലും എതിരഭിപ്രായം ഉണ്ടായി. തുടര്‍ന്ന് കെട്ടിടത്തിനുള്ളിലെ വാണിജ്യസ്ഥാപനങ്ങള്‍ ഒഴിവാക്കി പോലീസ് സമുച്ചയം മാത്രം നിര്‍മിക്കാന്‍ തീരുമാനിക്കുകയായിരുന്നു. 2021ലാണ് പുതിയ കെട്ടിടത്തിനായി അന്നത്തെ സിറ്റി പോലീസ് കമ്മീഷണർ സി.എച്ച്. നാഗരാജുവിന്‍റെ മേല്‍നോട്ടത്തില്‍ തറക്കല്ലിട്ടത്. കേരള പോലീസ് ഹൗസിംഗ് ആന്‍ഡ് കണ്‍സ്ട്രക്ഷന്‍ കോര്‍പറേഷനാണ് നിര്‍മാണ പ്രവര്‍ത്തനങ്ങള്‍ ചെയ്യുന്നത്. ഒരു ലക്ഷം ചതുരശ്ര‌യടിയിൽ 11 നിലക്കെട്ടിടത്തിന്‍റെ നിര്‍മാണം ഘട്ടങ്ങളായാണ് നടക്കുന്നത്. രണ്ടാം ഘട്ടത്തിന്‍റെ 65 ശതമാനം പൂര്‍ത്തിയായി. ഇതില്‍ 30 കോടി രൂപയുടെ പണി പൂര്‍ത്തിയായതായി ഉന്നത പോലീസ് ഉദ്യോഗസ്ഥന്‍ പറഞ്ഞു. 11 നിലകളില്‍ നാല് നിലകള്‍ പാര്‍ക്കിംഗിനായും മറ്റു നിലകള്‍ കൊച്ചി സിറ്റി പോലീസ് കമ്മീഷണറുടെ കീഴില്‍ വരുന്ന ഓഫീസുകള്‍ക്കായുമാണ് നീക്കിവച്ചിരിക്കുന്നത്.

മയക്കുമരുന്ന് വില്പനയ്ക്കും ഉപയോഗത്തിനുമെതിരെ ഒറ്റരാത്രി 31 കേസ്

കൊച്ചി: നഗരത്തില്‍ മയക്കുമരുന്ന് വില്പനയ്ക്കും ഉപയോഗത്തിനുമെതിരെ നടപടി കടുപ്പിച്ച് പോലീസ്. ശനിയാഴ്ച രാത്രിയില്‍ വിവിധയിടങ്ങളിലായി നടന്ന പ്രത്യേക പരിശോധനയില്‍ 31 കേസുകളാണ് പോലീസ് രജിസ്റ്റര്‍ ചെയ്തത്. ഇതിനു പുറമേ മദ്യപിച്ചു വാഹനം ഓടിച്ചതിന് 152 കേസുകളും, അബ്കാരി ആക്ട് പ്രകാരം 26 കേസുകളും രജിസ്റ്റര്‍ ചെയ്തു. വിവിധ കേസുകളിലായി ഒറ്റ രാത്രി 229 പേര്‍ക്കെതിരെയാണ് കൊച്ചി സിറ്റി പോലീസ് നടപടി സ്വീകരിച്ചത്. ലഹരി ഉപയോഗം അടക്കമുള്ള കേസുകളും നിയമലംഘനങ്ങളും വര്‍ധിക്കുന്ന സാഹചര്യത്തിലാണ് പോലീസിന്‍റെ നടപടി. വരും ദിവസങ്ങളിലും ശക്തമായ പരിശോധന ഉണ്ടാകുന്ന് സിറ്റി പോലീസ് കമ്മീഷണര്‍ പുട്ട വിമലാദിത്യ അറിയിച്ചു.

നെടുമ്പാശേരിയിൽ എംഡിഎംഎയുമായി ഐടി വിദ്യാർഥി പിടിയിൽ

നെടുമ്പാശേരി: നെടുമ്പാശേരി വിമാനത്താവള പരിസരത്ത് 400 ഗ്രാം എംഡിഎംഎയുമായി ഐടി വിദ്യാർഥി പിടിയിൽ. കായംകുളം ഗവ. ആശുപത്രിക്ക് സമീപം ആലപ്പുറത്ത് ശിവശങ്കർ (21) നെയാണ് റൂറൽ ജില്ലാ ലഹരി വിരുദ്ധ സ്ക്വാഡും നെടുമ്പാശേരി പോലീസും ചേർന്ന് പിടികൂടിയത്. പിടികൂടിയ രാസ ലഹരിക്ക് പത്ത് ലക്ഷത്തിലേറെ രൂപ വിലവരും. ജില്ലാ പോലീസ് മേധാവി എം. ഹേമലതയ്ക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ നടന്ന പരിശോധനയിൽ എയർപോർട്ട് ഭാഗത്ത് വില്പനയ്ക്കെത്തിച്ചപ്പോഴണ് ഇയാളെ കസ്റ്റഡിയിലെടുത്തത്. ബൈക്കിൽ പ്രത്യേകം പായ്ക്ക് ചെയ്ത് ഒളിപ്പിച്ച നിലയിലാണ് രാസലഹരി കണ്ടെത്തിയത്. ഇയാൾ വലിയൊരു മയക്കുമരുന്ന് ശൃംഖലയുടെ ഭാഗമാണെന്നാണ് ലഭ്യമാകുന്ന വിവരം. നർക്കോട്ടിക്ക് സെൽ ഡി വൈഎസ്പി ജെ. ഉമേഷ് കുമാർ, ആലുവ ഡിവൈഎസ്പി ടി.ആർ. രാജേഷ്, ഇൻസ്പെക്ടർ എം.എച്ച്. അനുരാജ്, എസ്ഐ എസ്.എസ്. ശ്രീലാൽ എന്നിവരാണ് അന്വേഷണ സംഘത്തിലുണ്ടായിരുന്നത്.

കനത്ത മഴയിൽ മുങ്ങി നഗരവീഥികൾ : ജനം വലഞ്ഞു

കൊച്ചി: തകര്‍ത്തു പെയ്ത മഴയില്‍ വെള്ളത്തിലായി കൊച്ചി. ഇന്നലെ പുലര്‍ച്ചെ പെയ്ത മഴയിലാണ് നഗരത്തിന്‍റെ വിവിധയിടങ്ങളിൽ വെള്ളക്കെട്ട് രൂപപ്പെട്ടത്. രണ്ടര മണിക്കൂറിലേറെ തോരാതെ പെയ്ത മഴയില്‍ എറണാകുളം സൗത്ത് റെയില്‍വേ സ്റ്റേഷന്‍ പരിസരത്ത് വലിയ തോതില്‍ വെള്ളക്കെട്ട് രൂപപ്പെട്ടത് ഏറെ ദുരിതമുണ്ടാക്കി. റെയില്‍വേ സ്റ്റേഷന്‍റെ പ്രധാന പ്രവേശന കവാടത്തിനും മെട്രോ സ്റ്റേഷനുമിടയിലുള്ള ഭാഗത്തുമായി രൂപപ്പെട്ട വെള്ളക്കെട്ട് വാഹന, കാല്‍നട യാത്രക്കാര്‍ ഒരുപേലെ പ്രതിസന്ധി തീര്‍ത്തു. കാല്‍നടയായി സ്റ്റേഷനിലേക്കും പുറത്തേക്കും കടക്കാന്‍ കഴിയാത്ത നിലയിലായിരുന്നു വെള്ളക്കെട്ട്. സമീപത്തെ ഡ്രെയ്നേജ് വഴി വെള്ളം ഒഴുകിപ്പോകാതെ വന്നതോടെയാണ് വെള്ളക്കെട്ട് രൂപപ്പെട്ടത്. ഇതോടെ ആളുകള്‍ക്ക് മെട്രോ പില്ലറിന് കീഴിലുള്ള ഉയര്‍ന്ന ഭാഗത്തുകൂടി കയറി താഴേക്ക് ചാടിയിറങ്ങി കടന്നുപോകേണ്ട സ്ഥിതിയായിരുന്നു. പ്രായമായവരും കുട്ടികളും സ്ത്രീകളും ഉള്‍പ്പെടെയുള്ളവര്‍ വലിയ ദുരിതത്തിലായി. റെയില്‍വേ സ്റ്റേഷനിലേക്ക് ബാഗുകളടക്കമായി എത്തിയവര്‍ ഏറെ പണിപ്പെട്ടാണ് മറുവശത്തെത്തിയത്. വെള്ളക്കെട്ടില്‍ വാഹനങ്ങള്‍ നിന്നുപോകുന്ന സ്ഥിതിയും ഉണ്ടായി. ഇതിനു പുറമേ നഗരത്തിനുള്ളിലെ ഇടറോഡുകളും എംജി റോഡിലെ ചില ഭാഗങ്ങളും വെള്ളത്തിലായി. മഴ ശമിച്ചതോടെ വെള്ളം ഒഴുകിപ്പോയെങ്കിലും ഇടറോഡുകളിലടക്കം പ്ലാസ്റ്റിക് അടക്കമുള്ള മാലിന്യങ്ങള്‍ അടിഞ്ഞത് കാല്‍നടയാത്രക്കാര്‍ക്ക് ബുദ്ധിമുട്ടുണ്ടാക്കി. ഇന്നലെ വൈകുന്നേരത്തോടെയാണ് വെള്ളക്കെട്ടിന് ശമനമായത്. അതിനിടെ മഴമുന്നറിയിപ്പ് തുടരുന്ന സാഹചര്യത്തില്‍ കാലാവസ്ഥാ വകുപ്പ് ജില്ലയില്‍ ഇന്ന് ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. സൗത്തില്‍ പെയ്തത് 130 മില്ലിമീറ്റര്‍ മഴ എറണാകുളം സൗത്തില്‍ 130 മില്ലീമീറ്റര്‍ മഴയാണ് ഇന്നലെ രാവിലെ വരെയുള്ള 12 മണിക്കൂറില്‍ പെയ്തത്. എറണാകുളം ബോട്ട് ജെട്ടി പരിസരത്ത് 145 മില്ലീമീറ്ററും ഡിഎച്ച് ഗ്രൗണ്ട് ഭാഗത്ത് 139.5 മില്ലീമീറ്ററും മഴ രേഖപ്പെടുത്തി. മട്ടാഞ്ചേരി 117 മില്ലീമീറ്റര്‍, കടവന്ത്ര 103 മില്ലീമീറ്റര്‍, കൊച്ചി നാവിക ആസ്ഥാനം 94.2 മില്ലീമീറ്റര്‍, പിറവം 30 മില്ലീമീറ്റര്‍ എന്നിങ്ങനെയാണ് മറ്റിടങ്ങളില്‍ പെയ്ത മഴയുടെ അളവ്. എറണാകുളം സൗത്ത് മുതല്‍ പനമ്പിള്ളി നഗര്‍ വരെയുള്ള ഭാഗത്താണ് കനത്ത വെള്ളക്കെട്ടുണ്ടായത്. നഗരത്തിലെ മറ്റ് ഭാഗങ്ങളില്‍ കാര്യമായ വെള്ളക്കെട്ട് ഉണ്ടായതായി ശ്രദ്ധയില്‍പ്പെട്ടില്ല. ഒരു ചെറിയ സ്ഥലത്ത് കൂടുതലായി മഴ പെയ്തതോ വെള്ളം കായലിലേക്ക് ഒഴുകി പോകുന്നതിന്്‍ തടസമുണ്ടായതോ ആകാം കാരണം. മുല്ലശേരി കനാലിന്‍റെ നവീകരണ പ്രവൃത്തികൾ നടക്കുന്നതിനാല്‍ അതിന്‍റേതായ തടസങ്ങളും വെള്ളം ഒഴുകിപ്പോകുന്നതിന് പ്രശ്നം സൃഷ്ടിച്ചിട്ടുണ്ടോയെന്നും പരിശോധിക്കേണ്ടതുണ്ട്. മേയര്‍ എം. അനില്‍കുമാര്‍

വലിയ ഷിപ്പുകള്‍ക്കും ഇവിടം ഓക്കെ...കരുത്ത് തെളിയിച്ച് കൊച്ചിന്‍ ഷിപ്‌യാര്‍ഡ്

കൊച്ചി: രാജ്യത്തെ കപ്പല്‍ നിര്‍മാണ രംഗത്ത് നിര്‍ണായക ചുവടുവയ്പ്പുമായി കരുത്ത് തെളിയിച്ചിരിക്കുകയാണ് കൊച്ചിന്‍ ഷിപ്‌യാര്‍ഡ്. നാവികസേനയുടെ ശേഖരത്തിലേക്ക് ആറാമത്തെ അന്തര്‍വാഹിനി ആക്രമണ പ്രതിരോധ കപ്പലിന് പുറമേ രാജ്യത്തെ ഏറ്റവും വലിയ ഡ്രഡ്ജിംഗ് ഷിപ്പ് നിര്‍മിച്ച് നീറ്റിലിറക്കിയതാണ് ഇതില്‍ ഏറ്റവും പുതിയ ചുവടുവയ്പ്പ്. അതും 90 ശതമാനവും തദ്ദേശീയമായി നിര്‍മിച്ച കപ്പല്‍ നിര്‍മാണ സാമഗ്രികള്‍ ഉപയോഗിച്ച്. എല്‍എന്‍ജി ഇന്ധനത്തില്‍ പ്രവര്‍ത്തിക്കുന്ന കപ്പല്‍ നിര്‍മിച്ചു നല്‍കാന്‍ ലോകത്തെ മൂന്നാമത്തെ വലിയ ഷിപ്പിംഗ് കമ്പനി, കൊച്ചിന്‍ ഷിപ്‌യാര്‍ഡില്‍ നിന്ന് താത്്‍പര്യപത്രം ക്ഷണിച്ചതും കഴിഞ്ഞ ദിവസമായിരുന്നു. ഇതാദ്യമായാണ് കേന്ദ്ര ഷിപ്പിംഗ് മന്ത്രാലയത്തിന് കീഴിലുള്ള പൊതുമേഖലാ കപ്പല്‍ നിര്‍മാണ ശാലയ്ക്ക് എല്‍എന്‍ജി കപ്പലുകള്‍ നിര്‍മിക്കാനുള്ള കരാര്‍ ലഭിക്കുന്നത്. മഗ്ദല സ്‌പെഷലാണ് നാവികസേനയ്ക്ക് വേണ്ടി കൊച്ചി കപ്പല്‍ശാല നിര്‍മിക്കുന്ന എട്ട് ആന്‍റി സബ്മറൈന്‍ വാര്‍ഫെയര്‍ ഷാലോ വാട്ടര്‍ ക്രാഫ്റ്റുകളില്‍ ആറാമത്തേതാണ് ഇന്നലെ നീറ്റിലിറക്കിയ ഐഎന്‍എസ് മഗ്ദല. രാജ്യത്ത് തദ്ദേശീയമായി രൂപകല്പന ചെയ്തു നിര്‍മിച്ച അന്തര്‍വാഹിനി കപ്പലിന് 78 മീറ്റര്‍ നീളവും 896 ടണ്‍ ഭാരവുമുണ്ട്. മണിക്കൂറില്‍ 25 നോട്ടിക്കല്‍ മൈല്‍ വേഗത്തില്‍ സഞ്ചരിക്കാന്‍ ശേഷിയുള്ള കപ്പലില്‍ അത്യാധുനിക അണ്ടര്‍വാട്ടര്‍ സെന്‍സറുകള്‍, വെള്ളത്തില്‍നിന്നു വിക്ഷേപിക്കാവുന്ന സ്വയം നിയന്ത്രിത ടോര്‍പ്പിഡോകള്‍, റോക്കറ്റുകള്‍, മൈനുകള്‍ വിന്യസിക്കാനുള്ള സംവിധാനം എന്നിവ ഒരുക്കിയിട്ടുണ്ട്. നേരത്തെ ഐഎന്‍എസ് മാഹി, ഐഎന്‍എസ് മാല്‍വന്‍, ഐഎന്‍എസ് മാംഗ്രോള്‍, ഐഎന്‍എസ് മാല്‍പേ, ഐഎന്‍എസ് മുള്‍ക്കി എന്നിങ്ങനെ അഞ്ച് അന്തര്‍വാഹിനി ആക്രമണ പ്രതിരോധ കപ്പലുകള്‍ നാവികസേനയ്ക്ക് കൈമാറിയിരുന്നു. ഭീമന്‍ ഗോദാവരി ഡ്രഡ്ജിംഗ് കോര്‍പറേഷന്‍ ഓഫ് ഇന്ത്യക്കു വേണ്ടി കൊച്ചി കപ്പല്‍ശാല നിര്‍മിക്കുന്ന രാജ്യത്തെ ഏറ്റവും വലിയ ഡ്രഡ്ജറാണ് ഡിസിഐ ഡ്രഡ്ജ് ഗോദാവരി. 12,000 ക്യുബിക് മീറ്റര്‍ ശേഷിയുള്ള സക്ഷന്‍ ഹോപ്പര്‍ ഡ്രഡ്ജറാണിത്. നെതര്‍ലന്‍ഡ്‌സിലെ റോയല്‍ ഐഎച്ച്‌സിയുമായി സഹകരിച്ചായിരുന്നു നിര്‍മാണം. 127 മീറ്റര്‍ നീളവും 28.4 മീറ്റര്‍ വീതിയുമാണ് കപ്പലിനുള്ളത്. വലിയ ചരക്കുകപ്പലുകള്‍ക്കടക്കം രാജ്യത്തെ തുറമുഖങ്ങളിലേക്ക് അടുപ്പിക്കാവുന്ന തരത്തില്‍ തുറമുഖ നവീകരണം, കപ്പല്‍ ചാലുകളുടെ പരിപാലനം എന്നിവയാണ് ഇതിലൂടെ ലക്ഷ്യമിടുന്നത്. കേന്ദ്ര സര്‍ക്കാരിന്‍റെ ആത്മനിര്‍ഭര്‍ ഭാരത് പദ്ധതിയുടെ ഭാഗമായി 2022 മാര്‍ച്ചിലാണ് ഡ്രഡ്ജർ നിര്‍മാണം ആരംഭിച്ചത്. ഇതോടെ വലിയ കപ്പലുകളുടെ നിര്‍മാണത്തിനും ശേഷി തെളിയിച്ചിരിക്കുകയാണ് കൊച്ചിന്‍ ഷിപ്‌യാര്‍ഡ്. സാങ്കേതികത്തികവില്‍ ഹൈബ്രിഡ് വെസല്‍ തീരത്തുനിന്ന് വളരെ അകലെയായുള്ള പ്രവൃത്തികള്‍ക്കായി പ്രത്യേകം രൂപകല്പന ചെയ്തതാണ് ഇന്നലെ കമ്മീഷന്‍ ചെയ്ത ഹൈബ്രിഡ് ഇലക്ട്രിക് മെഥനോള്‍ റെഡി സര്‍വീസ് ഓപ്പറേഷന്‍ വെസല്‍. സാധാരണഗതിയില്‍ ഡീസല്‍ എന്‍ജിനുകള്‍ പ്രവര്‍ത്തിപ്പിക്കാനും കാറ്റാടിപ്പാടങ്ങളിലെ ടര്‍ബൈനുകള്‍ക്കടുത്ത് വളരെ കുറഞ്ഞ വേഗത്തില്‍ സഞ്ചരിക്കുമ്പോഴോ, ഡോക്ക് ചെയ്യുമ്പോഴോ വൈദ്യുതി ഉപയോഗിച്ച് പ്രവര്‍ത്തിപ്പിക്കാനും കഴിയുന്ന രീതിയിലാണ് കപ്പലിന്‍റെ നിര്‍മാണം. ഭാവിയില്‍ മെഥനോള്‍ ഇന്ധനമായി ഉപയോഗിക്കാനുള്ള സാങ്കേതിക സൗകര്യത്തോടെയാണ് ഈ കപ്പല്‍ നിര്‍മിച്ചിരിക്കുന്നത്. മണിക്കൂറില്‍ 13 നോട്ടിക്കല്‍ മൈല്‍ വേഗതയുള്ള കപ്പലിന് 93 മീറ്റര്‍ നീളവും 19.6 മീറ്റര്‍ വീതിയുമാണുള്ളത്. കാര്‍ബൺ പുറംതള്ളല്‍ കുറയ്ക്കുന്നതിനാവശ്യമായ ക്ലീനര്‍ എനര്‍ജി സംവിധാനങ്ങളോടെ രൂപകല്പന ചെയ്ത ഇത് ഓഫ്‌ഷോര്‍ സാങ്കേതിക വിദഗ്ധര്‍ക്കുള്ള ഒരു ഫ്‌ളോട്ടിംഗ് ഹോട്ടലായും ഉപയോഗിക്കാം. അടുത്ത ലക്ഷ്യം വമ്പന്‍ ബ്ലോക്ക് നിര്‍മാണ യൂണിറ്റ് കൊച്ചി: കപ്പല്‍ നിര്‍മാണത്തിലെ സുപ്രധാന ഘടകമായ സ്റ്റീല്‍ ബ്ലോക്കുകള്‍ നിര്‍മിക്കുന്നതിനായി വല്ലാര്‍പാടം കണ്ടെയ്‌നര്‍ ടെര്‍മിനലിനു സമീപം പുതിയ ബ്ലോക്ക് ഫാബ്രിക്കേഷന്‍ ഫെസിലിറ്റി (ബിഎഫ്എഫ്) സ്ഥാപിക്കാനുള്ള പദ്ധതിയിലാണ് കൊച്ചിന്‍ ഷിപ്‌യാർഡ് (സിഎസ്എല്‍). 80 ഏക്കര്‍ വിസ്തൃതിയില്‍ ആഗോള പങ്കാളിത്തത്തോടെ ഒരു ലക്ഷം ടണ്‍ ശേഷി പ്രതിവര്‍ഷം ഒരു ലക്ഷം ടണ്‍ ബ്ലോക്ക് നിര്‍മാണശേഷിയുള്ള വമ്പന്‍ പ്ലാന്‍റാണു നിര്‍മിക്കുക. സാങ്കേതിക അനുമതികള്‍ ലഭിച്ച ശേഷം 20 മാസത്തിനകം യൂണിറ്റ് സജ്ജമാക്കാന്‍ കഴിയുമെന്നാണു പ്രതീക്ഷ. നിലവിലെ പ്ലാന്‍റിന് 20,000 ടണ്‍ ശേഷിയാണുള്ളത്. പുതിയ ഡ്രൈഡോക് സജ്ജമായതോടെ എല്‍എന്‍ജി കാരിയറുകളും വിമാനവാഹിനിക്കപ്പലുകളും ഉള്‍പ്പെടെ വമ്പന്‍ കപ്പലുകള്‍ നിര്‍മിക്കാന്‍ സിഎസ്എലിനു കഴിയും.

തുറവൂരിൽ വനിതാ ജിം സെന്‍റർ തുടങ്ങി

അങ്കമാലി : തുറവൂർ പഞ്ചായത്ത് 13-ാം വാർഡിലെ ഐശ്വര്യ നഗർ അങ്കണവാടി മന്ദിരത്തിൽ 'ഷീ സ്പെയ്സ് വനിത ജിം ' സെന്‍റർ പ്രവർത്തനമാരംഭിച്ചു. രാജ്യസഭ എംപി പി.പി. സുനീർ ഉദ്ഘാടനം നിർവഹിച്ചു. ബ്ലോക്ക് പഞ്ചായത്ത് 12.50 ലക്ഷം രൂപയും രാജ്യസഭ എം പി ഫണ്ടിൽ നിന്നും മൂന്നു ലക്ഷം രൂപയും ചെലവഴിച്ചാണ് പദ്ധതി നിർവഹണം. വനിതകൾക്ക് വ്യായാമത്തിന് ആവശ്യമായ ത്രഡ് മിൽ, സ്പിൻ ബൈക്ക്, ബാർബെൽസ്, ഡം ബെൽസ് ഉപകരണങ്ങളും യോഗ, സൂംബ, റീഡിംഗ് സെന്‍റകളും മ്യൂസിക് സ്റ്റേഷൻ യുവതി ക്ലബ് എന്നിവയും ഉൾപ്പെടുന്നതാണ് പദ്ധതി. തുറവൂർ പഞ്ചായത്ത് പ്രസിഡന്‍റ് ജെസി ജോയ് അധ്യക്ഷത വഹിച്ചു. ബ്ലോക്ക് പ്രസിഡന്‍റ് കൊച്ചുത്രേസ്യ തങ്കച്ചൻ മുഖ്യാതിഥിയായിരുന്നു. ബ്ലോക്ക് വൈസ് പ്രസിഡന്‍റ് ബിജു കാവുങ്ങ പ്രതിഭകളെ ആദരിച്ചു. യുവതി ക്ലബിന്‍റെ ഉദ്ഘാടനം പഞ്ചായത്ത് വൈസ് പ്രസിഡന്‍റ് റോയി സെബാസ്റ്റ്യൻ നിർവഹിച്ചു. മേരി ദേവസിക്കുട്ടി, ലാലി ആന്‍റു, സരിതാ സുനിൽ, സീലിയ വിന്നി , എം.എം. പരമേശ്വരൻ , സീന ജിജോ, സാലി വിൽസൻ, എം.എസ്. ശ്രീകാന്ത്, ജോസഫ് പാറേക്കാട്ടിൽ തുടങ്ങിയവർ പങ്കെടുത്തു.

വയോജന ദിനം ആഘോഷിച്ചു

ഫോര്‍ട്ടുകൊച്ചി: ജീവിത സായാഹ്നത്തിലുണ്ടാകുന്ന രോഗങ്ങളെക്കുറിച്ചും അതിനുള്ള വ്യായാമ പരിശീലനങ്ങളെക്കുറിച്ചും ബോധവത്കരണം നടത്തി വയോജന ദിനം ആഘോഷിച്ചു. കുമ്പളങ്ങി സെന്‍റ് ജോസഫ് ഇടവകയിലാണ് ജൂബിലിയാഘോഷത്തോടനുബന്ധിച്ച് "ഉണര്‍വ് 'എന്ന പേരില്‍ സംഗമം സംഘടിപ്പിച്ചത്. കുമ്പളങ്ങി ഗ്രാമ പഞ്ചായത്ത് പ്രസിഡന്‍റ് സൂസന്‍ ജോസഫ് സംഗമം ഉദ്ഘാടനം ചെയ്തു. വികാരി ഫാ.ആന്‍റണി നെടുംപറമ്പില്‍ അധ്യക്ഷത വഹിച്ച ചടങ്ങില്‍ ലൂര്‍ദ് ഹോസ്പിറ്റലിലെ ഡോ. റോമിയോ റോഡിഗ്രസ് ജീവിതശൈലി രോഗങ്ങളെക്കുറിച്ചും ഫിസിയോതെറാപ്പിസ്റ്റ് സിസ്റ്റര്‍ മിനി ജോര്‍ജ് വ്യായാമ പരിശീലനത്തെക്കുറിച്ചും ക്ലാസെടുത്തു. മെറ്റില്‍ഡാ മൈക്കിള്‍, റാഫേല്‍ നാളികാട്ട് എന്നിവര്‍ ആശംസകള്‍ അർപ്പിച്ചു.

എറണാകുളം റൂറലിൽ മയക്കുമരുന്ന് കേസുകൾ വർധിക്കുന്നു

ആലുവ: മയക്കുമരുന്നിനെതിരെ കർശന നടപടികളും ബോധവത്കരണ പരിപാടികളുമായി റൂറൽ ജില്ലാ പോലീസ് മുന്നോട്ട് പോകുന്നുണ്ടെങ്കിലും കേസുകൾ വർധിക്കുന്നതായി റിപ്പോർട്ട്. കഴിഞ്ഞ വർഷം 750 ഗ്രാം എംഡിഎംഎ കണ്ടെടുത്തപ്പോൾ കഴിഞ്ഞ 10 മാസക്കാലയളവിൽ ഇരട്ടിയാണ് വർധന. എറണാകുളം റൂറൽ ജില്ലയിൽ മയക്കുമരുന്നുമായി ബന്ധപ്പെട്ട് 3210 കേസുകൾ രജിസ്റ്റർ ചെയ്തു. 3398 പേരെ അറസ്റ്റ് ചെയ്തു. ഇതിൽ 19 എണ്ണം വില്പനയ്ക്കായി കൊണ്ടുവന്ന കേസുകളാണ്. കഴിഞ്ഞ വർഷം ആകെ രജിസ്റ്റർ ചെയ്തത് 2037 കേസുകളാണ്, ഇതിൽ 2217 പ്രതികളാണ് ഉണ്ടായിരുന്നത്. എംഡിഎംഎ കൂടി ഒന്നര കിലോഗ്രാമോളം എംഡിഎംഎയാണ് ഈ വർഷം ഇതുവരെ പിടികൂടിയത്. കഴിഞ്ഞവർഷം 750 ഗ്രാമായിരുന്നു. ഇന്നലെ നെടുമ്പാശേരിയിൽ ഐടി വിദ്യാർഥിയുടെ പക്കൽനിന്ന് കണ്ടെടുത്ത 400 ഗ്രാം എംഡിഎംഎയാണ് പിടിച്ചെടുത്തതിൽ ഏറ്റവും കൂടുതൽ. അങ്കമാലിയിൽ കാറിൽ കടത്തുന്നതിനിടെ 200 ഗ്രാം രാസലഹരി പോലീസ് കസ്റ്റഡിയിലെടുത്തിരുന്നു. ബംഗളൂരുവിൽ നിന്നാണ് ലഹരി കൊണ്ടുവന്നത്. ടൂറിസ്റ്റ് ബസിൽ കടത്തിയ 200 ഗ്രാം എംഡിഎംഎയും അങ്കമാലിയിൽ വച്ച് പിടികൂടിയിരുന്നു. 142 ഗ്രാം മെത്താഫിറ്റാമിൻ, രണ്ട് കിലോ ഹാഷിഷ് ഓയിൽ, 600 ഗ്രാം ഹെറോയിൻ എന്നിവയും ഈ വർഷം പിടികൂടി. ആറ് കഞ്ചാവ് ചെടികൾ കണ്ടെടുത്തു. അഞ്ച് എൽഎസ്ഡി സ്റ്റാമ്പുകളും, 36 നൈട്രാസെപാം ഗുളികകളും പിടികൂടിയവയിൽപ്പെടുന്നു. പിറ്റ് എൻഡിപിഎസ് ആക്ട് പ്രകാരം നാല് മയക്കുമരുന്ന് വ്യാപാരികളെ കരുതൽ തടങ്കലിൽ അടച്ചു. ട്രെയിൻ മാർഗം കഞ്ചാവ്; വില 25,000 മുതൽ 30,000 വരെ റൂറൽ ജില്ലാ പോലീസ് മേധാവി എം. ഹേമലതയുടെ നേതൃത്വത്തിൽ ഇതുവരെ നടത്തിയ പരിശോധനകളിൽ 475 കിലോഗ്രാം കഞ്ചാവാണ് പിടികൂടിയത്. കഴിഞ്ഞവർഷം 270 കിലോയാണ് പിടികൂടിയത്. ഇതിൽ 90 കിലോഗ്രാം കഞ്ചാവ് തടിയിട്ട്പറമ്പ് പോലീസ് സ്റ്റേഷൻ പരിധിയിൽ നിന്നാണ് പിടികൂടിയത്. മൂന്നു പേരാണ് ഇതുമായി ബന്ധപ്പെട്ട് പിടിയിലായത്. രണ്ട് കേസുകളിലായി 60 കിലോ കഞ്ചാവ് കാലടി പോലീസ് സ്റ്റേഷൻ അതിർത്തിയിൽ നിന്ന് പിടികൂടി. രണ്ടു കേസുകളിലായി അഞ്ച് ഇതരസംസ്ഥാന തൊഴിലാളികളെ അറസ്റ്റ് ചെയ്തു. സൈക്കിൾ പമ്പിൽ കടത്തിയ 24 കിലോ കഞ്ചാവ് നെടുമ്പാശേരിയിൽ നിന്ന് പിടികൂടിയിരുന്നു. അന്തർസംസ്ഥാന ബന്ധമുള്ള കടത്തുകാരെയാണ് ഇതു മായി ബന്ധപ്പെട്ട് അറസ്റ്റ് ചെയ്തത്. 18 കിലോ കഞ്ചാവ് കുറുപ്പംപടിയിൽ നിന്നും 12 കിലോ കഞ്ചാവ് പെരുമ്പാവൂരിൽ നിന്നും പിടികൂടിയിരുന്നു. ഒഡീഷയിൽ നിന്നും ആന്ധ്രയിൽ നിന്നും ആണ് കേരളത്തിലേക്ക് കൂടുതലായി കഞ്ചാവ് എത്തുന്നത്. ഇതരസംസ്ഥാന തൊഴിലാളികളുടെ കടത്തിന് നേതൃത്വം നല്കുന്നത്. കിലോയ്ക്ക് 2000 മുതൽ 3000 രൂപ വരെ നൽകി കഞ്ചാവ് വാങ്ങി ഇവിടെ 25,000, 30,000 രൂപ നിരക്കിലാണ് വിൽക്കുന്നത്. ട്രെയിൻ മാർഗമാണ് കഞ്ചാവ് എത്തിക്കുന്നത്. ആഡംബര കാറുകളിൽ കഞ്ചാവ് കടത്തിയ മൂന്ന് ടീമിനെ റൂറൽ ജില്ലയിൽ ഈ വർഷം പിടികൂടി.

വിദ്യാർഥികൾക്ക് ത്രിദിന നേതൃത്വ പരിശീലന ക്യാമ്പ് തുടങ്ങി

അങ്കമാലി : റോട്ടറി ക്ലബ് 3205ന്‍റെ നേതൃത്വത്തില്‍ പാലക്കാട്, തൃശൂര്‍, എറണാകുളം, ഇടുക്കി ജില്ലകളിലെ വിദ്യാര്‍ഥികള്‍ക്കായി നടത്തപ്പെടുന്ന നേതൃത്വ പരിശീലന ക്യാമ്പ് ആരംഭിച്ചു. കറുകുറ്റി അസീസി ശാന്തികേന്ദ്രയില്‍ സംഘടിപ്പിച്ച ചടങ്ങിൽ ഡിസ്ട്രിക്ട് ഗവര്‍ണര്‍ ഡോ. ജി.എന്‍. രമേശ് ഉദ്ഘാടനം നിർവഹിച്ചു. അങ്കമാലി റോട്ടറി ക്ലബ് പ്രസിഡന്‍റ് അഡ്വ. കിറോഷ് രാജന്‍ അധ്യക്ഷത വഹിച്ചു. കുട്ടികളില്‍ വ്യക്തിത്വ വികസനം, നേതൃപാടവം, ഭാഷാ നൈപുണ്യം തുടങ്ങിയവയ്ക്ക് ട്രെയിനിംഗ് നല്‍കുകയാണ് ക്യാമ്പിന്‍റെ ഉദ്ദേശ്യം. 25 സ്കൂളുകളില്‍ നിന്നും തിരഞ്ഞെടുക്കപ്പെട്ട 113 വിദ്യാർഥിനികളാണ് മൂന്നു ദിവസത്തെ ക്യാമ്പില്‍ പങ്കെടുക്കുന്നത്. കരിക്കടവ് ട്രൈബല്‍ ഉന്നതിയിലെ കുട്ടികളും ഈ ക്യാമ്പില്‍ പങ്കെടുക്കുന്നുണ്ട്. ഡിസ്ട്രിക്ട് സോണല്‍ ചെയര്‍മാന്‍ ജോസഫ് കണിച്ചായി, ഡിസ്ട്രിക്ട് ഇന്‍ററാക്റ്റ് ചെയര്‍ കെ. അനില്‍ വര്‍മ്മ, അസിസ്റ്റന്‍റ് ഗവര്‍ണര്‍ ടി. എം. നാസര്‍, ജനറല്‍ കണ്‍വീനര്‍ ആര്‍. ജയചന്ദ്രന്‍ , ആഷിശ് വിചിത്രം, നൈജു പുതുശേരി, രാജേഷ് രാഘവന്‍, ബാബു ഉറുമീസ്, ഡോ. ബെന്നി കുര്യന്‍, ആന്‍റു ഡൊമിനിക്, പാപ്പച്ചന്‍ തെക്കേക്കര, ചാൾസ് ജെ. തയ്യിൽ തുടങ്ങിയവർ പ്രസംഗിച്ചു.

ജോണി വൈപ്പിന് 14ന് അവാർഡ് സമ്മാനിക്കും

വൈപ്പിൻ: ഈ വർഷത്തെ മികച്ച സാമൂഹ്യപ്രവർത്തകനുള്ള സർവോദയം കുര്യൻ അവാർഡ് നേടിയ ഫോർട്ട്‌വൈപ്പിൻ സ്വദേശി ജോണി വൈപ്പിന് അടുത്ത 14ന് നടക്കുന്ന സർവോദയം കുര്യന്‍റെ 26 -ാം അനുസ്മരണ സമ്മേളനത്തിൽ പുരസ്കാരം സമ്മാനിക്കുമെന്ന് ട്രസ്റ്റ് പ്രസിഡന്‍റ് പോൾ ജെ. മാമ്പിള്ളി അറിയിച്ചു. ഞാറക്കൽ മഞ്ഞുരാൻ സെന്‍ററിൽ വച്ച് നടക്കുന്ന ചടങ്ങിൽ കെപിസിസി നിർവാഹക സമിതി അംഗം കെ.പി. ഹരിദാസ് അവാർഡ് സമ്മാനിക്കും. പൊതുപ്രവർത്തനത്തിലും ജീവകാരുണ്യ പ്രവർത്തനങ്ങളിലും ഒരേപോലെ തിളങ്ങുന്ന വ്യക്തി എന്ന നിലയിലാണ് ജോണിയെ അവാർഡിന് തെരഞ്ഞെടുത്തത്. ഒരു ലക്ഷം രൂപയും, ഫലകവും പ്രശസ്തി പത്രവും അടങ്ങുന്നതാണ് പുരസ്കാരം. അറുന്നൂറോളം അനാഥ ശിശുക്കളുടെ രക്ഷകനും അവശരുടെയും ആലംബഹീനരുടെയും അത്താണി ആയിരുന്ന ഞാറക്കൽ സ്വദേശിയായ സർവോദയം കുര്യന്‍റെ പേരിൽ സർവോദയം കുര്യൻ സ്മാരക ട്രസ്റ്റ് ആണ് അവാർഡ് ഏർപ്പെടുത്തിയിട്ടുള്ളത്.

അങ്കമാലി ഉപജില്ലാ കലാമേള മൂക്കന്നൂരിൽ; ഒരുക്കങ്ങൾ പൂർത്തിയായി

അങ്കമാലി: വിദ്യാഭ്യാസ ഉപജില്ല കലാമേളയ്ക്ക് മൂക്കന്നൂർ സേക്രഡ് ഹാർട്ട്‌ ഓർഫനേജ് ഹൈകൂൾ ഒരുങ്ങി. പന്തലിന്‍റെ കാൽനാട്ടുകർമം റോജി എം. ജോൺ എംഎൽഎ നിർവഹിച്ചു. ചടങ്ങിൽ മൂക്കന്നൂർ ഗ്രാമ പഞ്ചായത്ത്‌ പ്രസിഡന്‍റും കലാമേള സംഘാടക സമിതി ചെയർമാനുമായ കെ.വി. ബിബീഷ് അധ്യക്ഷത വഹിച്ചു. വിവിധ രചനാ മത്സരങ്ങൾ കഴിഞ്ഞ ദിവസം നടത്തി. നാളെ മുതൽ 23 വരെയാണ് കലാമത്സരങ്ങൾ അരങ്ങേറുന്നത്. 12 വേദികളിലായി നടക്കുന്ന മത്സരങ്ങളിൽ അങ്കമാലി ഉപജില്ലയിലെ 125 വിദ്യാലയങ്ങളിൽ നിന്നായി അയ്യായിരത്തോളം കുട്ടികൾ പങ്കെടുക്കുന്നുണ്ട്. കലാമേളയ്ക്ക് തുടക്കമായി നാളെ രാവിലെ ഒന്പതിന് സ്കൂൾ മാനേജർ ബ്രദർ ഡോ. വർഗീസ് മഞ്ഞളി പതാക ഉയർത്തും. റോജി എം. ജോൺ എം എൽ എ യുടെ അധ്യക്ഷതയിൽ ചേരുന്ന പൊതുസമ്മേളനം ബെന്നി ബഹനാൻ എം പി ഉദ്ഘാടനം ചെയ്യും. ചടങ്ങിൽ ജില്ലാ പഞ്ചായത്ത്‌ പ്രസിഡന്‍റ് മനോജ്‌ മൂത്തേടൻ മുഖ്യപ്രഭാഷണം നടത്തും. ജനറൽ കൺവീനറും എസ്എച്ച്ഒ എച്ച്എസ് ഹെഡ്മിസ്ട്രസുമായ സോണിയ വർഗീസ്, ഉപജില്ല വിദ്യാഭ്യാസ ഓഫീസർ സീന പോൾ, എസ്എച്ച് ഒ എച്ച് എസ് പി ടി എ പ്രസിഡന്‍റ് നൈജോ ആന്‍റണി, സ്കൂൾ ലീഡർ ഏയ്ഞ്ചൽ പ്രിൻസൻ തുടങ്ങിയവരുടെ നേതൃത്വത്തിൽ വിപുലമായ സംഘാടക സമിതി പ്രവർത്തിക്കുന്നു.

റോഡരികിൽ കാലഹരണപ്പെട്ട വാഹനക്കൂട്ടം : ആലുവ ട്രഷറി റോഡിൽ പാർക്കിംഗ് ദുഷ്ക്കരം

ആലുവ: ട്രഷറി റോഡിലെ സബ് ജയിലിന് മുന്നിൽ ജയിൽ വകുപ്പിന്‍റെയും പോലീസ് കേസിൽ ഉൾപ്പെട്ടതുമായ വാഹനങ്ങൾ തുരുമ്പെടുത്ത് നശിക്കുന്നു. ഇതുമൂലം വിവിധ ആവശ്യങ്ങൾക്കായി വരുന്നവരുടെ വാഹനങ്ങൾ പാർക്ക് ചെയ്യാൻ സ്ഥലം ഇല്ലാതായെന്നാണ് പരാതി. പ്രധാന റോഡിൽ നിന്ന് ആലുവ സബ് ട്രഷറിയിലേക്കുള്ള ട്രഷറി റോഡിലെ അരികിലാണ് കാലഹരണപ്പെട്ട വാഹനങ്ങൾ ഉപേക്ഷിച്ചിരിക്കുന്നത്. ജയിൽ വകുപ്പിന്‍റെ വാഹനങ്ങളോടൊപ്പം ആലുവ പോലീസ് പിടിച്ചെടുത്ത വാഹനങ്ങളും മാസങ്ങളായി കിടന്ന്‌ തുരുമ്പെടുക്കുകയാണ്. ഇവിടെ ആലുവ സബ് ജയിൽ കൂടാതെ റൂറൽ ജില്ലാ സൈബർ പോലീസ് സ്റ്റേഷൻ, ആലുവ ടൗൺ പോലീസ് സ്റ്റേഷൻ എന്നിവയും പ്രവർത്തിക്കുന്നുണ്ട്. മജിസ്‌ട്രേറ്റ് കോടതിയുടെ പുതിയ കെട്ടിടം ഉയരുന്നതിനാൽ നിർമാണ ആവശ്യത്തിനായി വാഹനങ്ങൾ കടന്നു പോകുന്ന വഴി കൂടിയാണ്. പ്രധാന റോഡിലും ഇത് തന്നെയായിരുന്നു സ്ഥിതി. ട്രാഫിക് പോലീസ്, ടൗൺ പോലീസ് തുടങ്ങിയവർ പിടിച്ചെടുക്കുന്ന മണൽ ലോറികൾ അടക്കമാണ് പ്രധാന റോഡിൽ ഇട്ടിരുന്നത്. എന്നാൽ കഴിഞ്ഞ ദിവസം ടാറിംഗ് നടന്നതോടെ വാഹനങ്ങൾ എല്ലാം കളമശേരിയിലെ പോലീസ് ക്യാമ്പിന് പിന്നിലേക്ക് മാറ്റി. അതേപോലെ ട്രഷറി റോഡിലെ തുരുമ്പെടുക്കുന്ന വാഹനങ്ങളും മാറ്റണമെന്നാണ് പ്രദേശവാസികൾ ആവശ്യപ്പെടുന്നത്.

മത്സ്യഫാമിലെത്തിയ മലന്പാന്പ് പിടിയിൽ

തൃപ്പൂണിത്തുറ: ഫിഷ് ഫാമിൽ അതിഥിയായെത്തി മീനുകളെ വിഴുങ്ങിയ മലമ്പാമ്പ് വലയിൽ കുടുങ്ങി. എരൂർ സ്വദേശി സുരേന്ദ്രനും സുഹൃത്തുക്കളായ ആറ് പേരും ചേർന്ന് നടത്തുന്ന വടക്കേക്കോട്ട കടക്കോടം എരൂർ ഫിഷ് ഫാമിലാണ് മലമ്പാമ്പ് കെണിയിലായത്. കരിമീൻ, തിലാപ്പിയ മീനുകളെ വളർത്തുന്ന ഫാമിൽ ഇന്നലെ രാവിലെ ഏഴിനാണ് മലമ്പാമ്പിനെ കണ്ടത്. പുഴയോട് ചേർന്ന് പ്രത്യേകം കെട്ടിത്തിരിച്ച ഭാഗത്ത് മീനുകളെ പിടിക്കാനായി കൂട് സ്ഥാപിച്ചിട്ടുണ്ടായിരുന്നു. കൂടിൽ കയറി മീനുകളെ മുഴുവൻ വിഴുങ്ങിയ മലമ്പാമ്പിന് പിന്നീട് പുറത്തിറങ്ങാൻ പറ്റാതെ വലയിൽ കുരുങ്ങിയതാണ് കെണിയായത്. രാവിലെ ഫാമിലെത്തിയ സുരേന്ദ്രൻ മീൻ കൂട് ഉയർത്തിയപ്പോൾ മീനിന് പകരം കണ്ടത് വലിയ മലമ്പാമ്പിനെയാണ്. ഉടനെ തന്നെ മീൻവല കൂടിൽ കുടുങ്ങിയ മലമ്പാമ്പിനെ വലിച്ച് കരയിൽ കയറ്റിയ ശേഷം സുഹൃത്തുക്കളെയും വിളിച്ച് തിരിച്ചു വന്നപ്പോൾ വല തകർത്ത് മലമ്പാമ്പ് പുറത്ത് ചാടിയിരുന്നു. എല്ലാവരും ചേർന്ന് ഏറെ പണിപ്പെട്ട് വീണ്ടും മലമ്പാമ്പിനെ വലയിൽ കുടുക്കിയ ശേഷം ഇരുമ്പഴിക്കൂടിനകത്താക്കി വാർഡ് കൗൺസിലർ ജയ പരമേശ്വരനേയും ഫോറസ്റ്റ് സ്നേക്ക് റെസ്ക്യൂ ടീമിനെയും വിവരമറിയിച്ചു. ഉച്ചയ്ക്ക് 12 ഓടെ സ്നേക്ക് റെസ്ക്യു ടീമിലെ ജിയോയും വിക്കിയും സ്ഥലത്തെത്തി 15 കിലോ തൂക്കവും ഏഴ് അടി നീളവും വരുന്ന മലമ്പാമ്പിനെ പിടികൂടി കൊണ്ടുപോയി. സ്ത്രീകളും കുട്ടികളുമടക്കം ധാരാളം പേർ മലമ്പാമ്പിനെ പിടികൂടിയത് കാണാനെത്തിയിരുന്നു.

ഏലൂരിൽ സ്നേഹവീട് കൈമാറി

കളമശേരി: മന്ത്രി പി.രാജീവ് മണ്ഡലത്തില്‍ 30 വീട് നിര്‍മിച്ച നല്‍കുന്ന സ്‌നേഹവീട് പദ്ധതിയില്‍ ഏലൂര്‍ വടക്കുംഭാഗത്തെ മാട്ടുപുറത്ത് പരേതനായ കൊല്ലംപറമ്പില്‍ ചെല്ലമണിയുടെ ഭാര്യ കാര്‍ത്തികയ്ക്ക് സുരക്ഷിത ഭവനം കൈമാറി. മാട്ടുപുറത്ത് നടന്ന ചടങ്ങില്‍ മന്ത്രിയുടെ സാന്നിധ്യത്തില്‍ നടന്‍ ടിനി ടോം താക്കോല്‍ കൈമാറി. കുടുംബനാഥ വിധവകളായവരുള്‍പ്പെടെ ദരിദ്ര വിഭാഗത്തില്‍ പെട്ടവര്‍ക്കായി വിവിധ സ്ഥാപനങ്ങളുടെ സഹായത്തോടെ നടപ്പാക്കുന്ന പദ്ധതിയാണ് ഇത്. പദ്ധതിയില്‍ 11വീടുകള്‍ നിര്‍മാണത്തിന്‍റെ വിവിധ ഘട്ടത്തിലാണ്.രണ്ട് മക്കളുള്ള വിധവയായ കാര്‍ത്തികയ്ക്കാണ് വീട് നിര്‍മിക്കുന്നത്. കളമശേരി സെന്‍റഎ പോള്‍സ് കോളേജിലെ എന്‍എസ്എസ് യൂണിറ്റ് മുന്‍കൈയെടുത്താണ് കുടുംബത്തിനായി നാല് സെന്‍റ് സ്ഥലം വാങ്ങി നല്‍കിയത്. ഒമ്പത് ലക്ഷം രൂപയാണ് നിര്‍മാണച്ചെലവ്. ചടങ്ങില്‍ ഏലൂര്‍ നഗരസഭാ ചെയര്‍പേഴ്‌സണ്‍ എ.ഡി. സുജില്‍ അധ്യക്ഷനായി. പി.എ. ഷിബു, ജയശ്രീ സതീഷ്, ടി.എം. ഷെനിന്‍, പി.എ. ഷെറീഫ്, നിസി സാബു, കെ.എ. മാഹിന്‍, സെന്‍റ് പോള്‍സ് കോളജ് വൈസ് പ്രിന്‍സിപ്പല്‍ ഡോ.ജോസ് സേവ്യര്‍, എന്‍എസ്എസ് പ്രോഗ്രാം ഓഫീസര്‍ വി.ജി. രാജേഷ് മോന്‍ തുടങ്ങിയവര്‍ സംസാരിച്ചു.

വേന്പനാട്ടു കായലിൽ പോളപ്പായൽ നിറഞ്ഞു; മത്സ്യത്തൊഴിലാളികൾ ദുരിതത്തിൽ

അരൂർ: അരൂർ മേഖലയിലെ വിശാലമായ കായലിലും പായൽ നിറഞ്ഞു. മത്സ്യ ബന്ധനത്തിന് പോകാൻ കഴിയാതെ ഉൾനാടൻ മത്സ്യത്തൊഴിലാളികൾ ദുരിതത്തിലായി. കായലിൽ വ്യാപകമായി പായൽ നിറഞ്ഞതോടെ മത്സ്യബന്ധനം നടത്താൻ കഴിയുന്നില്ലെന്ന് ഉൾനാടൻ മത്സ്യത്തൊഴിലാളികൾ പറയുന്നു. അരൂർ, അരൂക്കുറ്റി, ചന്തിരൂർ, എരമല്ലൂർ, കോടംതുരുത്ത്, കുത്തിയതോട്, തുറവൂർ, പെരുമ്പളം,പനങ്ങാട്, നെട്ടൂർ, കുമ്പളം ഭാഗത്താണ് പായൽ നിറഞ്ഞു കിടക്കുന്നത്. ഒഴുക്കു വലകളും ഊന്നി വലകളും തിങ്ങി ഒഴുകി എത്തുന്ന പായൽക്കൂട്ടം കടുത്ത നാശമാണ് ഉണ്ടാക്കുന്നത്. മത്സ്യബന്ധനത്തിന് കായലിലൂടെ വള്ളം ഇറക്കാൻ പോലും കഴിയുന്നില്ല. പ്രയാസപ്പെട്ട് വലകെട്ടിയാൽ പായൽ തിങ്ങി കിടക്കുന്ന കായലിൽ വല അഴിച്ചെടുക്കാൻ പോലും കഴിയാത്ത സ്ഥിതിയാണ്.അരൂർ മേഖലയിലെ വിസ്തൃതമായ പാടശേഖരങ്ങളിലെ പായലാണ് കായലുകളിലേക്ക് ഇപ്പോൾ ഒഴുകുന്നത്. തണ്ണീർമുക്കം ബണ്ട് വഴി കുട്ടനാടൻ പാടശേഖരങ്ങളിൽ കിടക്കുന്ന പോളപ്പായൽ വേമ്പനാട്ടു കായലിലേക്ക് ഒഴുകിയെത്തുന്ന സ്ഥിതിയും ഉണ്ടാകും. ഉൾനാടൻ കായലിന്‍റെ ഉപരിതലത്തിൽ തിങ്ങിക്കൂടി വളർന്ന് വെള്ളത്തിലേക്കുള്ള സൂര്യപ്രകാശം തടഞ്ഞ് ആവാസ വ്യവസ്ഥ തകർക്കുന്നത് മൂലം മത്സ്യസമ്പത്തിന് കനത്ത നാശം ഉണ്ടാകും. പോളപ്പായൽ പിടിമുറുക്കിയതിനാൽ വേമ്പനാട്ടുകായൽ നിർജീവമാകുന്ന അവസ്ഥയാണ് ഇപ്പോഴുള്ളതെന്ന് ഉൾനാടൻ മത്സ്യത്തൊഴിലാളികൾ പറയുന്നു. പോള ഇല്ലാതാക്കുന്നതു ലക്ഷ്യമിട്ട് പദ്ധതികൾ പലതും ആസൂത്രണം ചെയ്തെങ്കിലും ഒന്നും നടപ്പാകുന്നില്ലെന്നാണ് ആക്ഷേപം. പോളപ്പായൽ പ്രശ്നത്തിനു പരിഹാരം കാണാൻ പായൽ ഉറവിടത്തിൽ തന്നെ നശിപ്പിക്കുവാൻ നടപടി വേണമെന്നാണ് തൊഴിലാളികൾ ആവശ്യപ്പെടുന്നത്.

കൊച്ചി കോര്‍പറേഷന്‍ പുതിയ ആസ്ഥാന മന്ദിരം ഉദ്ഘാടനം നാളെ

കൊച്ചി: കാല്‍ നൂറ്റാണ്ട് കാലത്തെ കാത്തിരിപ്പിനൊടുവില്‍ കൊച്ചി കോര്‍പറേഷന്‍ പുതിയ ആസ്ഥാന മന്ദിരം നാളെ വൈകിട്ട് മൂന്നിന് മുഖ്യമന്ത്രി പിണറായി വിജയന്‍ നാടിന് സമര്‍പിക്കും. മലിനജല സംസ്‌കരണ സംവിധാനത്തിന്‍റെയും കുടിവെള്ള ടാങ്കിന്‍റെയും ഉള്‍പ്പടെ ആവസാനഘട്ട പണികള്‍ പൂര്‍ത്തീയാകാനുണ്ട്. ഇവ വരും ദിവസങ്ങളില്‍ പൂര്‍ത്തിയാക്കും. കൗണ്‍സില്‍ ഹാളും മേയറുടെ ഓഫീസും പൂര്‍ണസജ്ജമായതിനാല്‍ അടുത്ത കൗണ്‍സില്‍ യോഗം പുതിയ മന്ദിരത്തില്‍ നടത്താനാണ് ശ്രമിക്കുന്നതെന്ന് മേയര്‍ അഡ്വ. എം. അനില്‍കുമാര്‍ പറഞ്ഞു. ബേസ്‌മെന്‍റ്, ഗ്രൗണ്ട് ഫ്‌ളോറുകള്‍ ഉള്‍പ്പടെ 1.68 ലക്ഷം സ്‌ക്വയര്‍ഫീറ്റില്‍ ആറ് നിലകളിലായണ് മന്ദിരം നിര്‍മിച്ചിരിക്കുന്നത്. ഒന്നാംനിലയിലാണ് കൗണ്‍സില്‍ ഹാളും മേയറുടേയും ഡെപ്യൂട്ടി മേയറുടേയും ചേംബറുകളും. സ്ഥിരം സമിതി അധ്യക്ഷരുടെ ഓഫീസ് മുറികളും മേയറുടേയും ഡെപ്യൂട്ടി മേയറുടേയും ഓഫീസുകളും ഒന്നാം നിലയില്‍ തന്നെയാണുള്ളത്. ഉത്തരേന്ത്യന്‍ വാസ്തുശില്പ നിര്‍മിതിയില്‍ മനോഹരമാണ് കൗണ്‍സില്‍ ഹാള്‍. നിലവില്‍ 74 കൗണ്‍സിലര്‍മാരാണുള്ളതെങ്കിലും 82 പേര്‍ക്കുള്ള ഇരിപ്പിടങ്ങളുണ്ട്. മേയറുടെ ഡയസിന് ഇരുവശവുമാണ് ഉദ്യോഗസ്ഥര്‍ക്കുള്ള ഇരിപ്പിടം. ഹാളിന്‍റെ പിന്നിലായി പൊതുജനങ്ങള്‍ക്കും മാധ്യമപ്രവര്‍ത്തകര്‍ക്കും ഇരിക്കാനുള്ള സൗകര്യവുമുണ്ട്. കൊച്ചിയുടെ പൈതൃകം അടയാളപ്പെടുത്തുന്ന ഗ്രൗണ്ട് ഫ്ളോറിലെ കലാസൃഷ്ടി ശ്രദ്ധേയമാണ്. മുന്നില്‍ അറബിക്കടലിന്‍റെ റാണി ശില്‍പവും സ്ഥാപിച്ചിട്ടുണ്ട്. പൊതുജന സേവന കേന്ദ്രം ഗ്രൗണ്ട് ഫ്‌ളോറിലാണ്. രണ്ടാം നില മുതലാണ് വിവിധ വിഭാഗം ഉദ്യോഗസ്ഥരുടെ ഓഫീസുകളും മിനികോണ്‍ഫറന്‍സ് ഹാളും. സി.എം. ദിനേശ് മണി മേയര്‍ ആയിരിക്കെ 2006 ല്‍ നിര്‍മാണം ആരംഭിക്കുമ്പോള്‍ 18.75 കോടിയായിരുന്നു എസ്റ്റിമേറ്റ്. 2018 ല്‍ 24.7 കോടിയായി ഉയര്‍ന്നു. എസ്റ്റിമേറ്റില്‍ സ്ട്രക്ച്ചര്‍ പൂര്‍ത്തിയാക്കുന്നത് മാത്രമാണ് ഉള്‍പ്പെടുത്തിയിരുന്നത്. പ്ലംബിംഗ്, ഇലക്ട്രിഫിക്കേഷന്‍, ലിഫ്റ്റ്, ഇന്‍റീരിയര്‍ തുടങ്ങിയ കാര്യങ്ങള്‍ ഉണ്ടായിരുന്നില്ല. ഇക്കാര്യങ്ങള്‍ക്കൂടി ഉള്‍പ്പെടുത്തി 2020 ല്‍ നിര്‍മാണ ചിലവ് 43 കോടിയായി ഉയര്‍ത്തിയുള്ള എസ്റ്റിമേറ്റ് തയാറാക്കി. നിര്‍മാണം പൂര്‍ത്തിയാകുമ്പോള്‍ 61 കോടിയായി ഉയരുമെന്നാണ് മേയര്‍ ഇപ്പോള് പറയുന്നത്. മറൈൻഡ്രൈവില്‍ ഗോശ്രീ പാലത്തിനടുത്ത് അബ്ദുല്‍ കലാം മാര്‍ഗിനോടുചേര്‍ന്നുള്ള ഒന്നരയേക്കറിലാണ് പുതിയ ആസ്ഥാനമന്ദിരം. ഉദ്ഘാടന ചടങ്ങില്‍ മേയര്‍ അഡ്വ. എം. അനില്‍കുമാര്‍ അധ്യക്ഷത വഹിക്കും. മന്ത്രിമാരായ എം.ബി. രാജേഷ്, പി. രാജീവ് എന്നിവര്‍ മുഖ്യാതിഥികളാകും. ഹൈബി ഈഡന്‍ എംപി, എംഎല്‍എമാരായ ടി.ജെ. വിനോദ്, കെ.ജെ. മാക്‌സി, കെ. ബാബു, ഉമാ തോമസ്, ജിസിഡിഎ ചെയര്‍മാന്‍ കെ. ചന്ദ്രന്‍പിള്ള, മുന്‍ മേയര്‍മാരായ കെ. ബാലചന്ദ്രന്‍, കെ.ജെ. സോഹന്‍, ടോണി ചമ്മണി, സൗമിനി ജയിന്‍ തുടങ്ങിയവര്‍ പങ്കെടുക്കും.

പാനിപ്ര-കൊമ്പൻപാറ റോഡ് ഉദ്ഘാടനം ചെയ്തു

കോതമംഗലം: ബ്ലോക്ക് പഞ്ചായത്ത് വാർഷിക പദ്ധതിയിൽ നിർമാണം പൂർത്തീകരിച്ച കോട്ടപ്പടി പാനിപ്ര - കൊമ്പൻപാറ റോഡ് ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ ഉദ്ഘാടനം ചെയ്തു. തദ്ദേശ സ്വയംഭരണ സ്ഥാപനങ്ങളുടെയും പൊതുജനങ്ങളുടെയും സഹകരണത്തോടെ 14.40 ലക്ഷം രൂപ ചെലവഴിച്ചാണ് റോഡ് പണി പൂർത്തീകരിച്ചത്. വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. വാർഡംഗം റംല മുഹമ്മദ്, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷരായ ജോമി തെക്കേക്കര, ജെയിംസ് കോറമ്പേൽ, സാലി ഐപ്പ്, മെമ്പർമാരായ അനീസ് ഫ്രാൻസിസ്,നിസാമോൾ ഇസ്മായിൽ എന്നിവർ പങ്കെടുത്തു.

കൂത്താട്ടുകുളം ടൗൺ ഫൊറോന പള്ളിയിൽ നൊവേന തിരുനാളിന് കൊടിയേറി

കൂത്താട്ടുകുളം: കൂത്താട്ടുകുളം ടൗൺ ഫൊറോന പള്ളിയിൽ നൊവേന തിരുനാളിന് കൊടിയേറി. പാലാ രൂപത വികാരി ജനറാൾ മോൺ. ജോസഫ് തടത്തിൽ കൊടിയേറ്റ് നിർവഹിച്ചു. വികാരി ഫാ. ജെയിംസ് കുടിലിൽ, സഹവികാരി ഫാ. ജോസഫ് മരോട്ടിക്കൽ എന്നിവർ തിരുക്കർമങ്ങൾക്ക് നേതൃത്വം നൽകി. ഈ മാസം 28 വരെ വിശുദ്ധ യൂദാശ്ലീഹായുടെ നൊവേന തിരുനാൾ ആഘോഷിക്കും. 28 വരെ ദിവസവും വൈകുന്നേരം 6.15ന് 1001 എണ്ണത്തിരി തെളിക്കൽ ശുശ്രൂഷ ഉണ്ടായിരിക്കും.

‘എന്‍റെ നാട് ’കൂട്ടായ്മയുടെ പ്രവർത്തനം മാതൃകാപരമെന്ന്

കോതമംഗലം: ജീവകാരുണ്യ പ്രവർത്തനങ്ങളിൽ എന്‍റെ നാട് ജനകീയ കൂട്ടായ്മ മാതൃകയാണെന്ന് നടി സീമ ജി. നായർ. എന്‍റെ നാട് ജനകീയ കൂട്ടായ്മയുടെ പത്താം വാർഷികത്തിന്‍റെ ഭാഗമായി കോതമംഗലം ലയൺസ് ഹാളിൽ സംഘടിപ്പിച്ച ‘അമ്മ മനസ്’ പദ്ധതിയുടെ ഉദ്ഘാടനം നിർവഹിക്കുകയായിരുന്നു അവർ. കഴിഞ്ഞ പത്ത് വർഷക്കാലം കൊണ്ട് സാധാരണ മനുഷ്യരുടെ ജീവിതം ഉയർന്ന നിലവാരത്തിലേക്ക് എത്തിക്കാൻ സഹായകമായ വിവിധ പദ്ധതികളാണ് എന്‍റെ നാട് ജനകീയ കൂട്ടായ്മ ഏറ്റെടുത്ത് നടത്തിയിട്ടുള്ളത്. ഇത്തരം പ്രവർത്തനങ്ങളുമായി തുടർന്നും മുന്നോട്ടു പോകണമെന്ന് സീമ ജി. നായർ പറഞ്ഞു. എന്‍റെ നാട് ചെയർമാൻ ഷിബു തെക്കുംപുറം അധ്യക്ഷത വഹിച്ചു. മുൻസിപ്പൽ കൗൺസിലർമാരായ ഷിബു കുര്യാക്കോസ്, ബബിത മത്തായി, ലിസി പോൾ, എന്‍റെ നാട് വൈസ് ചെയർപേഴ്സൺ ബിജി ഷിബു, ബ്ലോക്ക് പഞ്ചായത്തംഗം ജെയിംസ് കോറമ്പേൽ, കർഷക കോൺഗ്രസ് സംസ്ഥാന ജനറൽ സെക്രട്ടറി പി.സി. ജോർജ്, കേരള കോൺഗ്രസ് സംസ്ഥാന സെക്രട്ടറി സി.കെ. സത്യൻ, പഞ്ചായത്ത് മുൻ പ്രസിഡന്‍റ് മാമച്ചൻ ജോസഫ്, പഞ്ചായത്ത് വൈസ് പ്രസിഡന്‍റ് ബീന റോജോ, എന്‍റെ നാട് സെക്രട്ടറി പി.എ. പാദുഷ, എന്‍റെ നാട് ഉന്നതാധികാര സമിതിയംഗം കെ.പി. കുര്യാക്കോസ്, എം.യു. ബേബി, വനിതാ മിത്ര നിയോജകമണ്ഡലം പ്രസിഡന്‍റ് ഉഷ ബാലൻ, പോൾ വർഗീസ്, കെ.എം. പോൾ, ടി.എം. സിദ്ദിഖ്, സജി തെക്കേക്കര, അനിൽ രാമൻ നായർ എന്നിവർ പ്രസംഗിച്ചു.

മൂവാറ്റുപുഴ ബ്ലോക്ക് പഞ്ചായത്ത് കേരളോത്സവം തുടങ്ങി

വാഴക്കുളം: മൂവാറ്റുപുഴ ബ്ലോക്ക് പഞ്ചായത്ത് കേരളോത്സവത്തിന് വാഴക്കുളത്ത് തുടക്കമായി. വാഴക്കുളം കാർമൽ സിഎംഐ പബ്ലിക് സ്കൂൾ സ്റ്റേഡിയത്തിൽ മാത്യു കുഴൽനാടൻ എംഎൽഎ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ അധ്യക്ഷത വഹിച്ചു. വൈസ് പ്രസിഡന്‍റ് ജോസി ജോളി, പഞ്ചായത്ത് പ്രസിഡന്‍റ് ആൻസി ജോസ്, ജില്ലാ പഞ്ചായത്തംഗം ഉല്ലാസ് തോമസ്, കാർമൽ സ്കൂൾ പ്രിൻസിപ്പൽ ഫാ. ജോൺസൺ വെട്ടിക്കുഴിയിൽ, സാറാമ്മ ജോൺ, ഷിവാഗോ തോമസ്, ഡോ. ജോസ് അഗസ്റ്റിൻ, രമ രാമകൃഷ്ണൻ, മേഴ്സി ജോർജ്, പി.എസ്. സുധാകരൻ തുടങ്ങിയവർ പ്രസംഗിച്ചു. 26ന് ബ്ലോക്ക് പഞ്ചായത്ത് ഹാളിൽ നടക്കുന്ന കലാമത്സരങ്ങളോടെ കേരളോത്സവം സമാപിക്കും. സമാപന സമ്മേളനത്തിന്‍റെ ഉദ്ഘാടനവും സമ്മാന വിതരണവും ഡീൻ കുര്യാക്കോസ് എംപി നിർവഹിക്കും.

കനത്ത മഴ: വീടിന് മുകളിലേക്ക് മണ്ണിടിഞ്ഞ് വീണു

കല്ലൂർക്കാട്: കനത്ത മഴയിൽ വീടിന് മുകളിലേക്ക് മണ്ണിടിഞ്ഞ് വീണു, ആളപായമില്ല. കല്ലൂർക്കാട് പത്താം വാർഡ് മണിയന്ത്രം വാദ്യപിള്ളി രഞ്ജിത്തിന്‍റെ വീടിന്‍റെ മുകളിലേക്കാണ് മണ്ണിടിഞ്ഞു വീണത്. ഇന്നലെ വൈകുന്നേരം 5.30ഓടെയായിരുന്നു സംഭവം. മഴ ശക്തമായതോടെ മണിയന്ത്രം മലയിൽനിന്ന് വെള്ളം കുത്തിയൊഴുകി വീടിന്‍റെ പുറകുവശത്തെ മൺതിട്ട ഇടിഞ്ഞ് അടുക്കള ഭാഗത്തേക്ക് വീഴുകയായിരുന്നു. സംഭവസമയം രഞ്ജിത്തിന്‍റെ ഭാര്യ ലിൻഡ മാത്രമാണ് വീട്ടിലുണ്ടായിരുന്നത്. മഴ തുടർന്നാൽ ഇനിയും മണ്ണിടിയാനുള്ള സാധ്യതയുള്ളതിനാൽ രാത്രി മറ്റൊരു വീട്ടിലേക്ക് ഇവർ മാറിയിരിക്കുകയാണ്. പ്രദേശത്തെ മറ്റു വീടുകളിൽ വെള്ളം കയറിയിട്ടുണ്ട്.

‘നാടകാന്തം’സാൻജോയും കാർമലും

തൊടുപുഴ: അഭിനയരംഗത്തു വ്യക്തിമുദ്ര പതിപ്പിച്ച ഫാ. സിജു പോൾ പാലത്താനത്ത് സംവിധാനം നിർവഹിച്ച ഇംഗ്ലീഷ് നാടകങ്ങൾ വിജയമധുരം പങ്കിട്ടു. കൊടുവേലി സാൻജോ സിഎംഐ പബ്ലിക് സ്കൂളിന്‍റെയും വാഴക്കുളം കാർമൽ പബ്ലിക് സ്കൂളിന്‍റെയും നാടകം സംവിധാനം ചെയ്തത് ഇദ്ദേഹമാണ്. യൂജിൻ ദാനീലിന്‍റെ വേർ ദ ക്രോസ് ഈസ് മെയ്ഡ് എന്ന നാടകത്തിന്‍റെ പശ്ചാത്തലത്തിൽ കാർമൽ സ്കൂൾ അവതരിപ്പിച്ച നാടകം ഭാവത്തിലും അഭിനയത്തിലും നാടകീയതയിലും മികച്ചുനിന്നു. കപ്പൽ തകർന്നു വർഷങ്ങൾ കഴിഞ്ഞിട്ടും നിധിയുമായി തിരിച്ചുവരുമെന്ന സ്വപ്നവുമായി കഴിയുന്ന ക്യാപ്റ്റൻ ബാർട്ടിലെറ്റിനെയാണ് ഇതിൽ അവതരിപ്പിക്കുന്നത്. ക്യാപ്റ്റൻ മരിക്കുന്പോൾ മകൻ നാറ്റ് ആ ദൗത്യം ഏറ്റെടുക്കുകയും കുടുംബംമുഴുവൻ വിനാശകരമായ അത്യാഗ്രഹത്തിനു അടിമപ്പെടുകയും ചെയ്യുന്ന രംഗങ്ങളാണ് നാടകത്തിൽ അനാവരണം ചെയ്യുന്നത്. കെവിൻ ആന്‍റണി, ജോഷി, ടെസ ഷിമ്മി, ജെറോം മാത്യു, ജൂഡ് ജെയിംസ് എന്നിവരായിരുന്നു അഭിനേതാക്കൾ. സാൻജോ സ്കൂൾ കിംഗ് ലിയർ എന്ന നാടകത്തിന്‍റെ പശ്ചാത്തലത്തിൽ സ്വത്തുക്കൾ എഴുതിവാങ്ങി മാതാപിതാക്കളെ കറിവേപ്പില പോലെ പുറന്തള്ളുന്ന സാമൂഹിക വ്യവസ്ഥയെ തുറന്നുകാട്ടുന്നു. ഡാൻസി ജോയി, ഇവ റോസ് സിബി, ആൻമരിയ ബിനു, നേഹ കാപ്പൻ, പീറ്റർ ജോസഫ്, ഏഡൻ, ജോവാൻ, ജൂവൽ യേശുദാസ്, മിലൻ തെക്കേക്കര എന്നിവരാണ് ഇതിൽ മികവാർന്ന അഭിനയം കാഴ്ചവച്ചത്. ആദിത്യനാഥ്, ജെസ്വിൻ ജിനേഷ് എന്നിവരാണ് രംഗപടമൊരുക്കിയത്. കഴിഞ്ഞ പത്തു വർഷമായി ഫാ. സിജു പോളിന്‍റെ സംവിധാനത്തിൽ അരങ്ങേറിയ നാടകങ്ങൾക്കായിരുന്നു ഒന്നാം സ്ഥാനം. ഇത്തവണ തന്‍റെ സംവിധാനത്തിൽ അവതരിപ്പിച്ച രണ്ടു നാടകങ്ങളും ഒന്നാം സ്ഥാനം നേടിയതിന്‍റെ സന്തോഷത്തിലാണ് അച്ചനും വിദ്യാർഥികളും. ആതിഥേയ സ്കൂളായ വിമല പബ്ലിക് സ്കൂളിനാണ് രണ്ടാം സ്ഥാനം. വാലി ഓഫ് സ്ക്രീനിംഗ് ബീസ് എന്ന നാടകമാണ് ഇവർ അവതരിപ്പിച്ചത്.

വേങ്ങച്ചുവട്ടിൽ 220 കെവി ടവർലൈൻ പൊട്ടിവീണു

ഒഴിവായത് വൻ ദുരന്തം വാഴക്കുളം: 220 കെവി വൈദ്യുത ടവറിൽ നിന്ന് ലൈൻ പൊട്ടിവീണു. അപകടത്തിൽ ആർക്കും പരിക്കില്ല. ഇന്നലെ ഉച്ചകഴിഞ്ഞ് മൂന്നോടെ വേങ്ങച്ചുവട്ടിലാണ് ലൈൻ പൊട്ടിവീണത്. കൊട്ടിക്കൽ രാജൻ, സഹോദരൻ തങ്കൻ എന്നിവരുടെ വീടുകളുടെ മുകളിലാണ് വലിയ ശബ്ദത്തോടെ ലൈൻ പതിച്ചത്. മേഖലയിൽ നിരവധി പേരുടെ പുരയിടങ്ങളിൽ ചെറിയ നാശനഷ്ടങ്ങളുണ്ടായിട്ടുണ്ട്. വീടുകളുടെ മുറ്റത്തോ, പുരയിടങ്ങളിലോ ആരുമില്ലാതിരുന്നതിനാൽ വൻ അപകടം ഒഴിവാകുകയായിരുന്നു. വീടുകളിലേക്ക് വൈദ്യുതി എത്തിക്കുന്ന വിതരണ ലൈനുകളിൽ 220 കെവി ലൈൻ ശക്തിയോടെ വീണതു മൂലം ഏതാനും വൈദ്യുത പോസ്റ്റുകൾക്കും വിതരണ ലൈനുകൾക്കും തകരാർ ഉണ്ടായിട്ടുണ്ട്. ഇടുക്കിയിൽ നിന്ന് കളമശേരിയിലേക്ക് വൈദ്യുതി എത്തിക്കുന്ന സംവിധാനമാണിത്. ലൈൻ പൊട്ടുമ്പോൾ തന്നെ വൈദ്യുതബന്ധം വിച്ഛേദിക്കപ്പെടുന്നതിനാൽ ഇതിലൂടെ വൈദ്യുതി പ്രസരിച്ച് അപകടമുണ്ടാകില്ലെന്ന് അധികൃതർ പറഞ്ഞു. വൈദ്യുതി സെക്ഷൻ ഓഫീസുകളിൽ വിവരമറിയിച്ച് ഇതര വൈദ്യുത ബന്ധങ്ങൾ വിഛേദിച്ചു. വൈദ്യുതി വകുപ്പ് അധികൃതർ സ്ഥലത്തെത്തി മേൽനടപടികൾ സ്വീകരിച്ചു.

ബൈക്കപകടത്തിൽ പരിക്കേറ്റയാൾ മരിച്ചു

പറവൂർ: ബൈക്കുകൾ കൂട്ടിയിടിച്ച് പരിക്കേറ്റ് ചികിത്സയിലായിരുന്ന പെരുമ്പടന്ന കളത്തിൽ വീട്ടിൽ കെ.എസ്. മനോജ് (47) മരിച്ചു. കഴിഞ്ഞ വെള്ളിയാഴ്ച ഉച്ചയ്ക്ക് 12.30ന് തട്ടുകടവ് പാലത്തിന് സമീപത്തായിരുന്നു അപകടം. ഗുരുതര പരിക്കേറ്റതിനെ തുടർന്ന് കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെ ഇന്നലെ 12നാണ് മരിച്ചത്. സംസ്കാരം ഇന്ന് ഉച്ചകഴിഞ്ഞ്. പെയിന്‍റിംഗ് തൊഴിലാളിയാണ്. ഭാര്യ: പ്രമിത. മക്കൾ: ഭഗത് കൃഷ്ണ, അജ്മൽകൃഷ്ണ.

യുവതി ട്രെയിൻ തട്ടി മരിച്ചനിലയിൽ

നെടുമ്പാശേരി: പുറയാർ റെയിൽവേ ഗേറ്റിന് സമീപം അജ്ഞാത യുവതിയെ ട്രെയിൻ തട്ടി മരിച്ചനിലയിൽ കണ്ടെത്തി. 35 - 40 വയസ് തോന്നിക്കും. 5.3 അടി ഉയരമുണ്ട്. തടിച്ച ശരീരം, ഇരുനിറം, ഇടത് കവിളിൽ കറുത്ത മറുക്, നീല ചുരിദാറും കറുത്ത പാന്‍റ്സും കറുത്ത ഷോളുമായിരുന്നു വേഷം. ഇന്നലെ ഉച്ചയ്ക്ക് 1.35 ഓടെ പുറയാർ റെയിൽവേ ഗേറ്റിൽ നിന്നും 500 മീറ്റർ മാറി റെയിൽവേ ട്രാക്കിൽ നാട്ടുകാരാണ് മൃതദേഹം കണ്ടത്. മൃതദേഹം ജില്ലാ ആശുപത്രി മോർച്ചറിയിലേക്ക് മാറ്റി. നെടുമ്പാശേരി പോലീസ് കേസെടുത്തു. ഫോൺ: 0484 2610611, +919497933048.

സംസ്ഥാന സ്‌കൂള്‍ കായികമേള : സ്വര്‍ണക്കപ്പിന് ജില്ലയില്‍ ഉജ്വല സ്വീകരണം

കൊച്ചി: സംസ്ഥാന സ്‌കൂള്‍ കായികമേളയില്‍ ഓവറോള്‍ ചാമ്പ്യന്മാരാകുന്ന ജില്ലയ്ക്ക് നല്‍കുന്ന സ്വര്‍ണക്കപ്പിന് (ചീഫ് മിനിസ്റ്റേഴ്‌സ് ട്രോഫി) ജില്ലയില്‍ ആവേശോജ്വലമായ സ്വീകരണം. രാവിലെ ഒമ്പതിന് ആലുവ വിദ്യാധിരാജ സ്‌കൂളില്‍ എത്തിച്ച സ്വര്‍ണക്കപ്പ് വിദ്യാര്‍ഥികളുടെ വാദ്യമേളത്തിന്‍റെ അകമ്പടിയോടെ അന്‍വര്‍ സാദത്ത് എംഎല്‍എ സ്വീകരിച്ചു. തുടര്‍ന്ന് കളമശേരി വൊക്കേഷണല്‍ ഹയ ര്‍സെക്കന്‍ഡറി സ്‌കൂളില്‍ എത്തിയ ട്രോഫി പര്യടനയാത്ര വിദ്യാര്‍ഥികള്‍ ബാന്‍ഡ് മേളത്തിന്‍റെ അകമ്പടിയോടെ സ്വീകരിച്ചു. എറണാകുളം സെന്‍റ് തെരേസാസ് ഹയര്‍ സെക്കന്‍ഡറി സ്‌കൂളില്‍ എത്തിയ ട്രോഫി പര്യടനത്തിന് ടി.ജെ. വിനോദ് എംഎല്‍എയുടെ നേതൃത്വത്തില്‍ സ്വീകരണം നല്‍കി. തൃപ്പൂണിത്തുറ സെന്‍റ് ജോസഫ് യുപി സ്‌കൂളില്‍ എത്തിയ പര്യടനം തൈക്കൂടം സെന്‍റ് അഗസ്റ്റിന്‍ യുപി സ്‌കൂളിലെ വിദ്യാര്‍ഥികളുടെ സ്‌കേറ്റിംഗിന്‍റെ അകമ്പടിയോടെയാണ് സ്വീകരിച്ചത്. കോലഞ്ചേരി സെന്‍റ് പീറ്റേഴ്‌സ് ഹയര്‍ സെക്കന്‍ഡറി സ്‌കൂളില്‍ എത്തിയ സ്വർണക്കപ്പിന് പി.വി. ശ്രീനിജന്‍ എംഎല്‍എയുടെ നേതൃത്വത്തില്‍ സ്വീകരണം നല്‍കി. മൂവാറ്റുപുഴ സെന്‍റ് അഗസ്റ്റിന്‍സ് ഹയര്‍ സെക്കന്‍ഡറി സ്‌കൂളിലെ സ്വീകരണത്തോടെ സ്വര്‍ണക്കപ്പും വഹിച്ചുള്ള വിളംബര ഘോഷയാത്രയുടെ ജില്ലയിലെ പര്യടനം അവസാനിച്ചു. അടുത്തദിവസം കോട്ടയം പത്തനംതിട്ട, ആലപ്പുഴ, കൊല്ലം ജില്ലകളിലെ സ്‌കൂളുകളിലൂടെ കടന്നുപോകുന്ന പര്യടനം 21ന് വേദിയായ തിരുവനന്തപുരത്ത് എത്തും. വിവിധ ഇടങ്ങളിലായി നടന്ന സ്വീകരണ പരിപാടിയില്‍ വിദ്യാഭ്യാസ വകുപ്പ് ഡെപ്യൂട്ടി ഡയറക്ടര്‍ സുബിന്‍ പോള്‍, ജില്ലാ വിദ്യാഭ്യാസ വകുപ്പ് ഓഫീസര്‍ എം.എ. ഷീല തുടങ്ങിയവര്‍ പങ്കാളികളായി. photo: സംസ്ഥാന സ്‌കൂള്‍ കായികമേള സ്വര്‍ണക്കപ്പിന് ആലുവ വിദ്യാധിരാജ സ്‌കൂളില്‍ നല്‍കിയ സ്വീകരണത്തില്‍ ലഹരിക്കെതിരെ ബോധവത്കരണം നല്‍കുന്നതിനായി അവതരിപ്പിച്ച കാക്കാരിശി നാടകത്തില്‍ നിന്ന്

സംസ്ഥാന സ്‌കൂള്‍ കായികമേള : സ്വര്‍ണക്കപ്പിന് ജില്ലയില്‍ ഉജ്വല സ്വീകരണം

കൊച്ചി: സംസ്ഥാന സ്‌കൂള്‍ കായികമേളയില്‍ ഓവറോള്‍ ചാമ്പ്യന്മാരാകുന്ന ജില്ലയ്ക്ക് നല്‍കുന്ന സ്വര്‍ണക്കപ്പിന് (ചീഫ് മിനിസ്റ്റേഴ്‌സ് ട്രോഫി) ജില്ലയില്‍ ആവേശോജ്വലമായ സ്വീകരണം. രാവിലെ ഒമ്പതിന് ആലുവ വിദ്യാധിരാജ സ്‌കൂളില്‍ എത്തിച്ച സ്വര്‍ണക്കപ്പ് വിദ്യാര്‍ഥികളുടെ വാദ്യമേളത്തിന്‍റെ അകമ്പടിയോടെ അന്‍വര്‍ സാദത്ത് എംഎല്‍എ സ്വീകരിച്ചു. തുടര്‍ന്ന് കളമശേരി വൊക്കേഷണല്‍ ഹയ ര്‍സെക്കന്‍ഡറി സ്‌കൂളില്‍ എത്തിയ ട്രോഫി പര്യടനയാത്ര വിദ്യാര്‍ഥികള്‍ ബാന്‍ഡ് മേളത്തിന്‍റെ അകമ്പടിയോടെ സ്വീകരിച്ചു. എറണാകുളം സെന്‍റ് തെരേസാസ് ഹയര്‍ സെക്കന്‍ഡറി സ്‌കൂളില്‍ എത്തിയ ട്രോഫി പര്യടനത്തിന് ടി.ജെ. വിനോദ് എംഎല്‍എയുടെ നേതൃത്വത്തില്‍ സ്വീകരണം നല്‍കി. തൃപ്പൂണിത്തുറ സെന്‍റ് ജോസഫ് യുപി സ്‌കൂളില്‍ എത്തിയ പര്യടനം തൈക്കൂടം സെന്‍റ് അഗസ്റ്റിന്‍ യുപി സ്‌കൂളിലെ വിദ്യാര്‍ഥികളുടെ സ്‌കേറ്റിംഗിന്‍റെ അകമ്പടിയോടെയാണ് സ്വീകരിച്ചത്. കോലഞ്ചേരി സെന്‍റ് പീറ്റേഴ്‌സ് ഹയര്‍ സെക്കന്‍ഡറി സ്‌കൂളില്‍ എത്തിയ സ്വർണക്കപ്പിന് പി.വി. ശ്രീനിജന്‍ എംഎല്‍എയുടെ നേതൃത്വത്തില്‍ സ്വീകരണം നല്‍കി. മൂവാറ്റുപുഴ സെന്‍റ് അഗസ്റ്റിന്‍സ് ഹയര്‍ സെക്കന്‍ഡറി സ്‌കൂളിലെ സ്വീകരണത്തോടെ സ്വര്‍ണക്കപ്പും വഹിച്ചുള്ള വിളംബര ഘോഷയാത്രയുടെ ജില്ലയിലെ പര്യടനം അവസാനിച്ചു. അടുത്തദിവസം കോട്ടയം പത്തനംതിട്ട, ആലപ്പുഴ, കൊല്ലം ജില്ലകളിലെ സ്‌കൂളുകളിലൂടെ കടന്നുപോകുന്ന പര്യടനം 21ന് വേദിയായ തിരുവനന്തപുരത്ത് എത്തും. വിവിധ ഇടങ്ങളിലായി നടന്ന സ്വീകരണ പരിപാടിയില്‍ വിദ്യാഭ്യാസ വകുപ്പ് ഡെപ്യൂട്ടി ഡയറക്ടര്‍ സുബിന്‍ പോള്‍, ജില്ലാ വിദ്യാഭ്യാസ വകുപ്പ് ഓഫീസര്‍ എം.എ. ഷീല തുടങ്ങിയവര്‍ പങ്കാളികളായി. photo: സംസ്ഥാന സ്‌കൂള്‍ കായികമേള സ്വര്‍ണക്കപ്പിന് ആലുവ വിദ്യാധിരാജ സ്‌കൂളില്‍ നല്‍കിയ സ്വീകരണത്തില്‍ ലഹരിക്കെതിരെ ബോധവത്കരണം നല്‍കുന്നതിനായി അവതരിപ്പിച്ച കാക്കാരിശി നാടകത്തില്‍ നിന്ന്

വടാട്ടുപാറയിലെ വീടുകളിൽ കുരങ്ങുശല്യം

കോതമംഗലം: കാട്ടാന ഉൾപ്പെടെയുള്ള വന്യജീവികളെ കൊണ്ട് പൊറുതി മുട്ടിയ വടാട്ടുപാറയിൽ കുരങ്ങുശല്യവും വ്യാപകമായിരിക്കുകയാണ്. കൃഷി നശിപ്പിക്കുന്നതിനൊപ്പം വീടുകൾക്കുള്ളിൽ പ്രവേശിച്ചും നാശം വരുത്തുന്നു. ഒറ്റയ്ക്കും കൂട്ടമായും എത്തുന്ന കുരങ്ങുകൾ പ്രദേശത്തെ തെങ്ങുകൾ എല്ലാം കാലിയാക്കും. വീടുകളിലെ അടുക്കളയിൽ കയറി ഭക്ഷണ സാധനങ്ങൾ കഴിക്കുന്നതും പാത്രങ്ങൾ നശിപ്പിക്കുന്നതും പ്രദേശവാസികളെ ഭീതിയിലാഴ്ത്തിയിരിക്കുകയാണ്. കഴിഞ്ഞ ദിവസം വടാട്ടുപാറ പണ്ടാരൻസിറ്റി വലിയകാലായിൽ ജോമോന്‍റെ വീട്ടിലെ അടുക്കളയിൽ കയറിയ കുരങ്ങനെ മണിക്കൂറുകൾ നീണ്ട ശ്രമത്തിനൊടുവിലാണ് പുറത്തു ചാടിക്കാനായത്. പ്രദേശത്ത് കൃഷി ചെയ്തിരിക്കുന്ന കപ്പ, വാഴ, ചേമ്പ്, ചേന, കൊക്കോ, മറ്റ് പഴവർഗങ്ങൾ എന്നിവയെല്ലാം കുരങ്ങുകൾ വ്യാപകമായി നശിപ്പിക്കുന്നുണ്ട്.

സ്റ്റീഫന്‍ ദേവസിയുടെ എസ്ഡി സ്‌കേപ്‌സ് സ്റ്റുഡിയോ പ്രവര്‍ത്തനമാരംഭിച്ചു

കൊച്ചി: സംഗീതജ്ഞന്‍ സ്റ്റീഫന്‍ ദേവസിയുടെ പുതിയ സംരംഭമായ എസ്.ഡി സ്‌കേപ്‌സ് സ്റ്റുഡിയോ കൊച്ചിയില്‍ പ്രവര്‍ത്തനം ആരംഭിച്ചു. മന്ത്രി പി.രാജീവ് സ്റ്റുഡിയോ ഉദ്ഘാടനം ചെയ്തു. ഒറ്റപ്പാലം, സുന്ദരഗിരി എന്നിങ്ങനെ രണ്ട് സ്റ്റുഡിയോകളാണ് എസ്ഡി സ്‌കേപ്പ്‌സിലൂടെ തുടങ്ങിയത്. ഒറ്റപ്പാലം സ്റ്റുഡിയോയുടെ നാമകരണ പ്രഖ്യാപനം നടന്‍ രമേഷ് പിഷാരടിയും സുന്ദരഗിരി സ്റ്റുഡിയോയുടെ നാമകരണ പ്രഖ്യാപനം കളമശേരി നഗരസഭ മുന്‍ ചെയര്‍മാന്‍ ജമാല്‍ മണക്കാടനും നിര്‍വഹിച്ചു. ഉച്ച കഴിഞ്ഞ് നടന്ന ചടങ്ങില്‍ നടന്‍ മോഹന്‍ലാല്‍ മുഖ്യാതിഥിയായി. മോഹന്‍ലാല്‍, ആന്‍റണി പെരുമ്പാവൂര്‍, നിര്‍മാതാവ് രഞ്ജിത്ത്, ഗായകന്‍ എം.ജി ശ്രീകുമാര്‍ എന്നിവര്‍ ചേര്‍ന്നാണ് സ്റ്റീഫനൊപ്പം നിലവിളക്ക് കൊളുത്തി സ്റ്റുഡിയോയുടെ പ്രവര്‍ത്തനങ്ങള്‍ക്ക് തുടക്കമിട്ടത്. സ്റ്റീഫന്‍ ദേവസിക്കൊപ്പം പിയാനോ വായിച്ച് സംഗീത വിരുന്നും മോഹന്‍ലാല്‍ ഒരുക്കിയതോടെ സദസിനും വേറിട്ട അനുഭവമായി. സ്റ്റുഡിയോയ്ക്ക് മുന്നില്‍ വൃക്ഷ തൈ നട്ടാണ് മോഹന്‍ലാല്‍ മടങ്ങിയത്.

രാജ്യത്തെ ഏറ്റവും വലിയ ഡ്രഡ്ജര്‍ ഉള്‍പ്പെടെ മൂന്ന് കപ്പലുകള്‍ നീറ്റിലിറക്കി കൊച്ചിന്‍ ഷിപ്പ്‌യാര്‍ഡ്

കൊച്ചി: മേക്ക് ഇന്‍ ഇന്ത്യ ആശയത്തില്‍ 90 ശതമാനവും തദ്ദേശീയ ഉത്പന്നങ്ങള്‍ ഉപയോഗിച്ച് നിര്‍മിച്ച മൂന്നു വ്യത്യസ്തയിനം കപ്പലുകള്‍ നീറ്റിലിറക്കി കൊച്ചിന്‍ ഷിപ്പ്‌യാര്‍ഡ്. നാവികസേനയ്ക്ക് വേണ്ടി നിര്‍മിച്ച അന്തര്‍വാഹിനി ആക്രമണ പ്രതിരോധ കപ്പല്‍, ഹൈബ്രിഡ് ഇലക്ട്രിക് മെഥനോള്‍റെഡി കമ്മീഷനിംഗ് സര്‍വീസ് ഓപ്പറേഷന്‍ വെസല്‍, രാജ്യത്തെ ഏറ്റവും വലിയ ഡ്രഡ്ജറായ ഡിസിഐ ഡ്രഡ്ജ് ഗോദാവരി എന്നിവയാണ് ഇന്നലെ നീറ്റിലിറക്കിയത്. രാജ്യത്തിന്‍റെ നാവിക പ്രതിരോധ മേഖല, വാണിജ്യ കപ്പല്‍ നിര്‍മാണം, ഹരിത സമുദ്രഗതാഗതം എന്നിവയില്‍ കൊച്ചിന്‍ ഷിപ്പ്‌യാര്‍ഡ് കരസ്ഥമാക്കിയ എന്‍ജിനീയറിംഗ് വൈദഗ്ധ്യത്തിന്‍റെയും നേതൃത്വ മികവിന്‍റെയും തെളിവാണ് പുതിയ കപ്പലുകളെന്ന് കൊച്ചിന്‍ ഷിപ്പ്‌യാര്‍ഡ് ചെയര്‍മാനും മാനേജിംഗ് ഡയറക്ടറുമായ മധു എസ്.നായര്‍ പറഞ്ഞു. ഇന്ത്യന്‍ നേവിക്കുവേണ്ടി നിര്‍മിച്ച ആറാമത്തെ അന്തര്‍വാഹിനി കപ്പലാണ് ആന്‍റി സബ്മറൈന്‍ വാര്‍ഫെയര്‍ ഷാലോ വാട്ടര്‍ ക്രാഫ്റ്റ് എഎസ്ഡബ്ല്യു എസ്ഡബ്ല്യുസി. നാവികസേന വൈസ് അഡ്മിറല്‍ ആര്‍.സ്വാമിനാഥന്‍റെ പത്‌നി രേണു രാജാറാം ലോഞ്ചിംഗ് നിര്‍വഹിച്ചു. 12,000 ക്യുബിക് മീറ്റര്‍ കപ്പാസിറ്റിയുള്ള രാജ്യത്തെ ഏറ്റവും വലിയ സക്ഷന്‍ ഹോപ്പര്‍ ഡ്രഡ്ജര്‍ ഡിസിഐ ഡ്രഡ്ജ് ഗോദാവരിയുടെ ലോഞ്ചിംഗ് ഡ്രഡ്ജിംഗ് കോര്‍പറേഷന്‍ ഓഫ് ഇന്ത്യ പ്രതിനിധി ശിരോഭൂഷണം സുജാത നിര്‍വഹിച്ചു. തീരത്തുനിന്ന് അകലെയായുള്ള പ്രവര്‍ത്തികള്‍ക്കായി രൂപകല്‍പ്പന ചെയ്ത ഹൈബ്രിഡ് ഇലക്ട്രിക് മെഥനോള്‍റെഡി കമ്മീഷനിംഗ് സര്‍വീസ് ഓപ്പറേഷന്‍ വെസലിന്‍റെ ലോഞ്ചിംഗ് കൊച്ചി പോര്‍ട്ട് അഥോറിറ്റി ചെയര്‍പേഴ്‌സണ്‍ ബി കാശിവിശ്വനാഥന്‍റെ പത്‌നി വസന്തയും നിര്‍വഹിച്ചു. ചടങ്ങില്‍ നാവികസേന വൈസ് അഡ്മിറല്‍ ആര്‍ സ്വാമിനാഥന്‍, കൊച്ചി പോര്‍ട്ട് അഥോറിറ്റി ചെയര്‍പേഴ്‌സണ്‍ ബി.കാശിവിശ്വനാഥന്‍, ഡ്രഡ്ജിംഗ് കോര്‍പറേഷന്‍ ഓഫ് ഇന്ത്യ ലിമിറ്റഡ് ചെയര്‍മാന്‍ ഡോ. എം.അംഗമുത്തു, പെലാജിക് വിന്‍ഡ് സര്‍വീസസ് സിഇഒ ആന്ദ്രെ ഗ്രോനെവെല്‍ഡ്, കൊച്ചിന്‍ ഷിപ്പ്‌യാര്‍ഡ് സിഎംഡി മധു എസ്.നായര്‍ തുടങ്ങിയവര്‍ പങ്കെടുത്തു.

കാപ്പ ചുമത്തി ജയിലിലടച്ചു

കൊച്ചി: നഗരത്തില്‍ നിരന്തരം ക്രിമിനില്‍ പ്രവര്‍ത്തനങ്ങളിലേര്‍പ്പെട്ടിരുന്നയാളെ കാപ്പ ചുമത്തി ജയിലിലടച്ചു. പാലാരിവട്ടം മാമംഗലത്ത് വാടകയ്ക്ക് താമസിക്കുന്ന തിരുവനന്തപുരം കടകംപിള്ളി കണ്ണംതറ ജൊസിയ നാവിസില്‍ തിയോഫി(അനി)നാണ് കേരള സാമൂഹ്യവിരുദ്ധ പ്രവര്‍ത്തനങ്ങള്‍ (തടയല്‍) നിയമ പ്രകാരം ജയിലിലടച്ചത്. എറണാകുളം സെന്‍ട്രല്‍ സ്റ്റേഷന്‍ പരിധിയിലും സമീപ പോലീസ് സ്റ്റേഷനിലും മറ്റു ജില്ലകളിലും നിരവധി ക്രിമിനല്‍ കേസില്‍ പ്രതിയായിട്ടുള്ളയാളാണ് ഇയാള്‍. നിലവില്‍ റിമാന്‍ഡിലാണ്.

24.7 കോടി തട്ടിയ സംഭവം: പ്രതികളുടെ ബാങ്ക് അക്കൗണ്ടുകളും സിംകാര്‍ഡുകളും പരിശോധിക്കുന്നു

കൊച്ചി: ഫാര്‍മസ്യൂട്ടിക്കല്‍ കമ്പനി ഉടമയില്‍ നിന്നും 24.7 കോടി രൂപ തട്ടിയെടുത്ത കേസില്‍ അറസ്റ്റിലായ പ്രതികളില്‍ നിന്ന് കണ്ടെടുത്ത ബാങ്ക് അക്കൗണ്ടുകളും മൊബൈല്‍ സിം കാര്‍ഡുകളും കേന്ദ്രീകരിച്ച് അന്വേഷണം. തട്ടിപ്പിലൂടെ സമ്പാദിച്ച പണം ആരിലേക്കെല്ലാമാണ് എത്തിയിട്ടുള്ളത് അടക്കമുള്ള കാര്യങ്ങളില്‍ വ്യക്തത തേടാനാണ് അന്വേഷണസംഘത്തിന്‍റെ നീക്കം. തട്ടിപ്പുമായി ബന്ധപ്പെട്ട് പ്രവര്‍ത്തിച്ച മറ്റുചില ആളുകളെക്കുറിച്ച് അന്വേഷണസംഘത്തിന് വിവരം ലഭിച്ചിട്ടുണ്ട്. പ്രതികളില്‍ നിന്ന് പിടികൂടിയ മൊബൈല്‍ ഫോണുകളും, ലാപ്‌ടോപ്പ്, കംപ്യൂട്ടര്‍ എന്നിവയും ശാസ്ത്രീയ പരിശോധനയ്ക്കു വിധേയമാക്കും. നിലവില്‍ അന്വേഷണസംഘത്തിന് ലഭിച്ച സൂചനകളില്‍ വ്യക്തത തേടുന്നതിന് പ്രതികളെ ചോദ്യം ചെയ്യുന്നതിന് കസ്റ്റഡി അപേക്ഷ സമര്‍പ്പിച്ചു.

തിരുവിതാംകൂര്‍ ദേവസ്വം ബോര്‍ഡിന് ഹൈക്കോടതിയുടെ വിമര്‍ശനം

കൊച്ചി:തിരുവിതാംകൂര്‍ ദേവസ്വം ബോര്‍ഡിനെ വിമര്‍ശിച്ച് ഹൈക്കോടതി. കാലഹരണപ്പെട്ട ലഡ്ജറുകളും കടലാസ് വൗച്ചറുകളും മറ്റുമാണ് ഇപ്പോഴും ആധാരമാക്കുന്നത്. ക്ഷേത്രങ്ങളുടെ ഫണ്ട് ദുരുപയോഗം ചെയ്യുന്നതിന് ഇത് മറയാക്കുകയാണ്. സമയബന്ധിതമായി ഓഡിറ്റ് നടത്തുന്നതില്‍ ഉദ്യോഗസ്ഥര്‍ക്ക് ഗുരുതര വീഴ്ചയുണ്ടെന്നും ജസ്റ്റീസ് രാജവിജയരാഘവന്‍, ജസ്റ്റീസ് കെ.വി.ജയകുമാര്‍ എന്നിവരുള്‍പ്പെട്ട ഡിവിഷന്‍ ബെഞ്ച് നിരീക്ഷിച്ചു. പെന്‍ഷന്‍ ആനുകൂല്യങ്ങള്‍ തടഞ്ഞതിനെതിരേ ദേവസ്വം മുന്‍ ഡെപ്യൂട്ടി കമ്മീഷണര്‍ പദ്മനാഭനുണ്ണി സമര്‍പ്പിച്ച പരാതിയില്‍ ദേവസ്വം ഓംബുഡ്‌സമാന്‍ സമര്‍പ്പിച്ചറിപ്പോര്‍ട്ട് പരിഗണിക്കുകയായിരുന്നു ഹൈക്കോടതി. ഫണ്ട് വിനിയോഗത്തില്‍ സുതാര്യതയുണ്ടാകുന്നില്ല. കൃത്യമായ പരിശോധനകളും നടക്കുന്നില്ല. സിസ്റ്റത്തിന്‍റെ പൂര്‍ണ പരാജയമാണിത്. അതിനാല്‍ കേന്ദ്രീകൃത ധനകാര്യ മാനേജ്‌മെന്‍റ് സംവിധാനം സജ്ജമാക്കണം. പണമിടപാട് ഓണ്‍ലൈനാക്കണം. ഓഡിറ്റര്‍ക്കും സൂപ്പര്‍വൈസര്‍ക്കും ഇത് പ്രാപ്യമാക്കണം. വാര്‍ഷിക ഓഡിറ്റിംഗ് ഉറപ്പാക്കണമെന്നും കോടതി പറഞ്ഞു.

സ്റ്റുഡന്‍റ്സ് ബിനാലെ: ക്യൂറേറ്റർമാരെ പ്രഖ്യാപിച്ചു

കൊച്ചി: വളർന്നുവരുന്ന യുവകലാകാരന്മാർക്ക് കൊച്ചി ബിനാലെ ഫൗണ്ടേഷന്‍റെ (കെബിഎഫ്) കലാ-വിദ്യാഭ്യാസ സംരംഭമായ സ്റ്റുഡന്‍റ്സ് ബിനാലെയ്ക്കായുള്ള സഹ-ക്യൂറേറ്റർമാരുടെ പേരുകൾ പ്രഖ്യാപിച്ചു. രാജ്യത്തെ ഏഴു മേഖലകളായി തിരിച്ചാണ് സ്റ്റുഡന്‍റ്സ് ബിനാലെയ്ക്കുള്ള ക്യൂറേറ്റര്‍മാരെ തെരഞ്ഞെടുത്തത്. സർക്കാർ ധനസഹായമുള്ള ആർട്സ് കോളജുകളുമായി സഹകരിച്ച് വളർന്നുവരുന്ന കലാകാരന്മാരെ അവരുടെ പരിശീലനത്തെക്കുറിച്ച് ആഴത്തില്‍ ചിന്തിക്കാനും തങ്ങളുടെ സൃഷ്ടികൾ അന്താരാഷ്ട്ര വേദിയിൽ പ്രദർശിപ്പിക്കാനുമുള്ള അവസരമാണ് ഈ പരിപാടിയിലൂടെ നല്‍കുന്നത്. 150ലധികം സ്ഥാപനങ്ങളിലെ വിദ്യാർഥികളുമായി ഇടപെട്ടാണ് ക്യൂറേറ്റര്‍മാര്‍ പ്രവര്‍ത്തിക്കുക. അവർ വിദ്യാർഥികളുമായി ആശയവിനിമയം നടത്തി പ്രദർശനത്തിൽ പങ്കെടുക്കേണ്ടവരെ തെരഞ്ഞെടുക്കുകയും, ഇതിനായി പ്രോജക്ടുകൾ വികസിപ്പിക്കുന്നതിന് സഹകരിച്ച് പ്രവര്‍ത്തിക്കുകയും ചെയ്യും. ബിനാലെയുടെ ആറാം പതിപ്പ് ഡിസംബർ 12 മുതൽ 2026 മാർച്ച് 31 വരെയാണ്. ഡിസംബര്‍ 13ന് സ്റ്റുഡന്‍റ്സ് ബിനാലെ പ്രദര്‍ശനം ആരംഭിക്കും.

കത്തോലിക്ക കോൺഗ്രസ് : അവകാശ സംരക്ഷണ യാത്രയ്ക്ക് ഊഷ്മള സ്വീകരണം

കോതമംഗലം: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ നടത്തുന്ന അവകാശ സംരക്ഷണയാത്രയ്ക്ക് കോതമംഗലം രൂപതയില്‍ ആവേശോജ്വല സ്വീകരണം. ഇന്നലെ വൈകുന്നേരം കോതമംഗലത്ത് എത്തിയ യാത്രയെ സമ്മേളന വേദിയായ സെന്‍റ് ജോര്‍ജ് കത്തീഡ്രല്‍ ഓഡിറ്റോറിയത്തിലേക്ക് പതാകകളുടെയും മുദ്രാവാക്യങ്ങളുടെയുംവാദ്യമേളങ്ങളുടെയും അകമ്പടിയോടെ സ്വീകരിച്ചു. രൂപത വികാരി ജനറാള്‍ മോണ്‍. ഡോ.പയസ് മലേക്കണ്ടത്തില്‍ സ്വീകരണ സമ്മേളനം ഉദ്ഘാടനം ചെയ്തു. സാധാരണക്കാരുടെ അര്‍ഹമായ ആവശ്യങ്ങള്‍ക്കുനേരെ വീണ്ടും സര്‍ക്കാര്‍ മുഖം തിരിക്കുകയാണെങ്കില്‍ കത്തോലിക്ക കോണ്‍ഗ്രസിന്‍റെ നേതൃത്വത്തില്‍ പ്രതിഷേധ സമരങ്ങള്‍ക്ക് കേരളം വേദിയാകുമെന്ന് അദ്ദേഹം പറഞ്ഞു. ദിനചര്യ പോലെ സമുദായത്തെ പുലഭ്യം പറയുന്ന രാഷ്ട്രീയ നേതാക്കള്‍ മര്യാദ പുലര്‍ത്തണമെന്നും അവഗണനയും അധിക്ഷേപവും തുടര്‍ന്നാല്‍ കൈയുംകെട്ടി നോക്കി നില്‍ക്കില്ലെന്നും ജാഥാ ക്യാപ്റ്റനും ഗ്ലോബല്‍ പ്രസിഡന്‍റുമായ പ്രഫ.രാജീവ് കൊച്ചുപറമ്പില്‍ പറഞ്ഞു. രൂപത പ്രസിഡന്‍റ് സണ്ണി കടൂത്താഴെ അധ്യക്ഷത വഹിച്ചു. ഗ്ലോബല്‍ ഡയറക്ടര്‍ ഫാ.ഫിലിപ്പ് കവിയില്‍, രൂപത ഡയറക്ടര്‍ ഫാ. മാനുവല്‍ പിച്ചളക്കാട്ട്, വികാരി ജനറാള്‍ മോണ്‍.ഡോ. വിന്‍സെന്‍റ് നെടുങ്ങാട്ട്, കത്തീഡ്രല്‍ വികാരി റവ. ഡോ. മാത്യു കൊച്ചുപുരയ്ക്കല്‍, മുന്‍ ഗ്ലോബല്‍ പ്രസിഡന്‍റ് ബിജു പറയനിലം, ജോസുകുട്ടി ഒഴുകയില്‍, ജോയ്‌സ് മേരി ആന്‍റണി, മത്തച്ചന്‍ കളപ്പുരക്കല്‍, തമ്പി പിട്ടാപ്പിള്ളില്‍, ബെന്നി ആന്‍റണി, രാജേഷ് ജോണ്‍, ടോണി പുഞ്ചക്കുന്നേല്‍, ട്രീസാ ലിസ് സെബാസ്റ്റ്യന്‍, ജോര്‍ജ് കോയിക്കല്‍, ബിജു സെബാസ്റ്റ്യന്‍, ഷൈജു ഇഞ്ചക്കല്‍ എന്നിവര്‍ പ്രസംഗിച്ചു. രൂപതയിലെ വിവിധ യൂണിറ്റുകളില്‍ നിന്നായി വൈദികരും സന്യസ്തരും പ്രവര്‍ത്തകരുമടക്കം ആയിരങ്ങള്‍ സ്വീകരണ പരിപാടിയില്‍ പങ്കെടുത്തു. നീതി നിഷേധിക്കുന്ന ഭരണാധികാരികൾക്ക് ഇന്നും വിമോചന സമരഭീതി: രാജീവ് കൊച്ചുപറമ്പിൽ അങ്കമാലി കല്ലറയിൽ പുഷ്പാർച്ചന നടത്തി അങ്കമാലി: നീതി നിഷേധിക്കുന്ന ഭരണാധികാരികൾക്ക് ഇന്നും വിമോചന സമരത്തിന്‍റെ ഭീതിയുണ്ടെന്നു കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് രാജീവ് കൊച്ചുപറമ്പിൽ. കത്തോലിക്ക കോൺഗ്രസ് അവകാശ സംരക്ഷണ യാത്രയുടെ എറണാകുളം ജില്ലയിലെ പര്യടനത്തിന് തുടക്കം കുറിച്ച്, അങ്കമാലി ബസലിക്കയിലെ വിമോചന സമര രക്തസാക്ഷികളുടെ കല്ലറയിൽ പുഷ്പാർച്ചന നടത്തി സംസാരിക്കുകയായിരുന്നു അദ്ദേഹം. നീതിക്കായുള്ള ജനകീയ പോരാട്ടത്തിന്‍റെ സ്വാഭാവിക പരിണാമമായിരുന്നു വിമോചന സമരം. സാധാരണക്കാർക്ക് നീതി ഉറപ്പാക്കാത്ത സർക്കാരുകൾ എക്കാലവും അതിനെ ഭയപ്പെടുന്നുവെന്നും അദ്ദേഹം പറഞ്ഞു . ഗ്ലോബൽ ഡയറക്ടർ ഫാ. ഫിലിപ്പ് കവിയിൽ, ജനറൽ സെക്രട്ടറി ഡോ. ജോസ്കുട്ടി ജെ. ഒഴുകയിൽ , അങ്കമാലി ബസലിക്ക റെക്ടർ ഫാ. ലൂക്കോസ് കുന്നത്തൂർ, സെബി വർഗീസ് , ബെന്നി ആന്‍റണി, രാജേഷ് ജോൺ, ട്രീസ ലിസ് സെബാസ്റ്റ്യൻ , ജോർജ് കോയിക്കൽ, ബിജു സെബാസ്റ്റ്യൻ, പത്രോസ് വടക്കുംചേരി, ഫ്രാൻസിസ് മൂലൻ, എസ്.ഐ. തോമസ്, ബേബി പൊട്ടനാനി, ജോൺസൺ പടയാട്ടി, സെബാസ്റ്റ്യൻ ചെന്നേക്കാടൻ, ആന്‍റണി പാലമറ്റം, സെജോ ജോൺ തുടങ്ങിയവർ പ്രസംഗിച്ചു. യാത്രയ്ക്ക് എറണാകുളം-അങ്കമാലി അതിരൂപത സമിതി കാലടിയിൽ സ്വീകരണം നൽകി.

പെരുന്പാവൂർ ഉപജില്ലാ സ്‌കൂള്‍ കലോത്സവം 22 മുതല്‍

പെരുമ്പാവൂര്‍: ഉപജില്ലാതല കേരള സ്‌കൂള്‍ കലോത്സവം 22 മുതല്‍ 25 വരെ വെങ്ങോല ശാലേം വിഎച്ച്എസ്, ശാലേം ഇംഗ്ലീഷ് മീഡിയം, മാര്‍ത്തോമ എല്‍പി സ്‌കൂളുകളിലായി 11 വേദികളില്‍ നടക്കും. 22ന് രാവിലെ ഒന്പതിന് എഇഒ ഒ.കെ. ബിജിമോള്‍ പതാക ഉയര്‍ത്തും. തുടര്‍ന്ന് രചനാ മത്സരങ്ങള്‍ നടക്കും. 23-ന് ഉച്ചകഴിഞ്ഞ് മൂന്നിന് ബെന്നി ബഹനാന്‍ എംപി 64-ാമത് കലോത്സവം വര്‍ണ്ണോത്സവം 2025 ഉദ്ഘാടനം ചെയ്യും. മാത്യൂസ് മാര്‍ അപ്രേം മെത്രാപ്പോലീത്ത അനുഗ്രഹ പ്രഭാഷണം നടത്തും. ലോഗോ തയാറാക്കിയ വിദ്യാര്‍ഥി പി.എന്‍. മുഹമ്മദ് നിഹാലിനെ ആദരിക്കും. എല്‍ദോസ് കുന്നപ്പിള്ളി എംഎല്‍എ അധ്യക്ഷത വഹിക്കും. പി.വി. ശ്രീനിജന്‍ എംഎല്‍എ ലോഗോ സമ്മാനദാനം നടത്തും. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍, ബ്ലോക്ക് പഞ്ചായത്ത് പ്രസിഡന്‍റുമാരായ കെ.എം. അന്‍വര്‍ അലി, എന്‍.എം. സലിം, സംഘാടക സമിതി ചെയര്‍മാന്‍ ഗ്രാമപഞ്ചായത്ത് പ്രസിഡന്‍റ് പി.പി. എല്‍ദോസ് തുടങ്ങിയ വിവിധ തദ്ദേശ സ്വയംഭരണ സ്ഥാപനത്തിലെ അധ്യക്ഷര്‍, ജനപ്രതിനിധികള്‍, മാനേജ്മെന്‍റ് പ്രതിനിധികള്‍ എന്നിവര്‍ പങ്കെടുക്കും. ഉപ ജില്ലയിലെ 80 സ്‌കൂളുകളില്‍ നിന്നായി എല്‍പി, യുപി, ഹൈസ്‌കൂള്‍, ഹയര്‍ സെക്കന്‍ഡറി വിഭാഗങ്ങളില്‍ 6000ത്തോളം വിദ്യാര്‍ഥികള്‍ മത്സരങ്ങളിൽ പങ്കെടുക്കും.

കറുകുറ്റിയിൽ ബിജെപി പ്രകടനവും അംഗത്വ വിതരണവും

അങ്കമാലി: ജനങ്ങൾ ആഗ്രഹിക്കുന്ന മാറ്റവും വികസനവും എല്ലായിടത്തും കൊണ്ടുവരാനാണ് ബിജെപി ലക്ഷ്യമിടുന്നതെന്നും എല്ലാ തെരഞ്ഞെടുപ്പുകളെയും തങ്ങൾ ഫൈനലായാണ് കാണുന്നതെന്നും സംസ്ഥാന പ്രസിഡന്‍റ് രാജീവ് ചന്ദ്രശേഖർ. വിവിധ പാർട്ടികളിൽ പ്രവർത്തിച്ചിരുന്ന 300 ഓളം പേർക്ക് ബിജെപിയിൽ അംഗത്വം നൽകി കറുകുറ്റിയിൽ സംഘടിപ്പിച്ച ചടങ്ങിലാണ് അദ്ദേഹം ഇക്കാര്യങ്ങൾ പറഞ്ഞത്. കറുകുറ്റി പഞ്ചായത്ത് കമ്യൂണിറ്റി ഹാളിൽ നടന്ന യോഗത്തിൽ എറണാകുളം നോർത്ത് ജില്ലാ പ്രസിഡന്‍റ് എം.എ. ബ്രഹമ രാജ് അധ്യക്ഷനായി. സംസ്ഥാന വൈസ് പ്രസിഡന്‍റ് വി. ഉണ്ണികൃഷ്ണൻ മാസ്റ്റർ മുഖ്യപ്രഭാഷണം നടത്തി. സംസ്ഥാന വൈസ് പ്രസിഡന്‍റ് ഷോൺ ജോർജ്, സംസ്ഥാന സെക്രട്ടറിമാരായ ജിജി ജോസഫ്, ഡോ. രേണു സുരേഷ്, നാഷണൽ കൗൺസിൽ അംഗം പി.എം. വേലായുധൻ, ജില്ലാ ജനറൽ സെക്രട്ടറിമാർ തുടങ്ങിയവർ പ്രസംഗിച്ചു.

സ്ലാബിന്‍റെ കോൺക്രീറ്റ് ഇളകി : സംസ്ഥാനപാതയിൽ ഇരുചക്ര വാഹനങ്ങൾക്ക് അപകടക്കെണി

വൈപ്പിൻ: വൈപ്പിൻ സംസ്ഥാനപാതയിലെ എട്ടു പാലങ്ങളുടെയും മേൽഭാഗത്തെ കോൺക്രീറ്റ് തകർച്ചയിൽ. ജിഡ ഫണ്ട് ഉപയോഗിച്ച് ഒരു വ്യാഴവട്ട കാലത്തിനു മുൻപ് നിർമിച്ച പാലങ്ങൾ ഇരുചക്ര വാഹനങ്ങൾക്ക് അപകടക്കെണിയായി മാറിയിരിക്കുകയാണ്. മാത്രമല്ല ഇത് ഭാവിയിൽ പാലങ്ങൾക്ക് ബലക്ഷയം ഉണ്ടാക്കുമെന്നും ചൂണ്ടിക്കാണിക്കപ്പെടുന്നു. മേൽഭാഗം ടാർ ചെയ്യാത്തതിനെ തുടർന്നാണ് ഇങ്ങനെ പൊട്ടിപ്പൊളിയുന്നത്. പള്ളിപ്പുറം കോൺവന്‍റ്, ചെറായി കരുത്തല, കുഴുപ്പിള്ളി വാടകത്തോട്, എടവനക്കാട് ചാത്തങ്ങാട്, പഴങ്ങാട്, അണിയിൽ, നായരമ്പലം, മാനാട്ടുപറമ്പ് എന്നീ പാലങ്ങളിലാണ് മേൽഭാഗത്തെ കോൺക്രീറ്റ് ഇളകിക്കിടക്കുന്നത്. പരാതി ഉയരുമ്പോൾ എല്ലാം പൊതുമരാമത്ത് വകുപ്പ് പൊട്ടിപ്പൊളിഞ്ഞ ഭാഗത്ത് അല്പം കോൺക്രീറ്റ് മിശ്രിതം ഇട്ട് ഓട്ടയടയ്ക്കുകയാണ് പതിവ്. ഒരാഴ്ച തികയും മുമ്പേ ഇത് വീണ്ടും പൊട്ടിപ്പൊളിയും. പാലം ടാർ ചെയ്യേണ്ടത് പൊതുമരാമത്ത് വകുപ്പ് പാലം വിഭാഗമാണത്രേ. എന്നാൽ ഇവരാകട്ടെ പാലം നിർമിച്ച സമയത്ത് ടാറിങ് നടത്തിയില്ല. ഇതിനാലാണ് റോഡ് വിഭാഗം റോഡ് ടാറി നടത്തിയിട്ടും പാലം ടാർ ചെയ്യാതിരുന്നതെന്നാണ് അറിവ്.

ഇന്‍റർ കോളജ് മാത്‍സ് ക്വിസ്: നിർമല ജേതാക്കൾ

ആരക്കുന്നം: ടോക് എച്ച് എൻജിനീയറിംഗ് കോളജ്, മാത്‍സ് ഡിപ്പാർട്മെന്‍റ് സംഘടിപ്പിച്ച അഖിലകേരള ഇന്‍റർ കോളജ് ക്വിസ് മത്സരത്തിൽ മൂവാറ്റുപുഴ നിർമല കോളജ് ജേതാക്കളായി. കോതമംഗലം എംഎ കോളജ് രണ്ടാം സ്ഥാനവും, ടോക് എച്ച് മൂന്നാം സ്ഥാനവും കരസ്ഥമാക്കി. ക്വിസ് മത്സരത്തിന്‍റെ ഉദ്ഘാടനം ടോക് എച്ച് സ്ഥാപനങ്ങളുടെ മാനേജർ കുര്യൻ തോമസ് നിർവഹിച്ചു. ഡോ. ലിജു അലക്സ് വീശിഷ്ടാതിഥിയായി. ടോക്എച്ച് സെക്രട്ടറി മധു ചെറിയാൻ, പ്രിൻസിപ്പൽ ഡോ. പ്രീതി തെക്കെത്ത് എന്നിവർ സംബന്ധിച്ചു. ജേതാക്കൾക്ക് എവർ റോളിംഗും ട്രോഫിയും ക്യാഷ് അവാർഡും സമ്മാനിച്ചു.

ആദ്യ എട്ട് ഡിവിഷനുകള്‍ സ്ത്രീ സംവരണം: വാര്‍ഡ് നിര്‍ണയത്തില്‍ വട്ടംകറങ്ങി മുന്നണികള്‍

കൊച്ചി: തദ്ദേശ തെരഞ്ഞെടുപ്പിന് മുന്നോടിയായി കൊച്ചി കോര്‍പറേഷന്‍റെ സംവരണ വാര്‍ഡ് നിര്‍ണയം പൂര്‍ത്തിയായപ്പോള്‍ വട്ടംകറങ്ങി രാഷ്ട്രീയ പാര്‍ട്ടികളും സ്ഥാനാര്‍ഥി മോഹികളും. പശ്ചിമകൊച്ചി മേഖലയില്‍ ഒന്ന് മുതല്‍ എട്ടുവരെയുള്ള ഡിവിഷനുകള്‍ സ്ത്രീ സംവരണമായതോടെ സീറ്റുകളുടെ അനുപാതം തന്നെ മാറിപ്പോയെന്നാണ് ഇവരുടെ അഭിപ്രായം. ഒരു മേഖല മുഴുവന്‍ സ്ത്രീ സംവരണമാകുമ്പോള്‍ അടുത്ത തവണ ഈ സീറ്റുകളൊക്കെ ജനറല്‍ വിഭാഗത്തിലേക്ക് വരും. ഇതു സ്ഥിരമായ അസുന്തലിതാവസ്ഥ സൃഷ്ടിക്കുമെന്നും നേതാക്കള്‍ ആശങ്കപ്പെടുന്നു. സംവരണ നിര്‍ണയത്തിനെതിരെ കോടതിയെ സമീപിക്കാനൊരുങ്ങുകയാണ് പശ്ചിമകൊച്ചി മേഖലയിലെ രാഷ്ട്രീയ കക്ഷി നേതാക്കള്‍. ഒന്ന് മുതല്‍ എട്ടുവരെയുള്ള ഫോര്‍ട്ട്‌കൊച്ചി, കല്‍വത്തി, ഈരവേലി, കരിപ്പാലം, ചെറളായി, മട്ടാഞ്ചേരി, ചക്കാമാടം, കരുവേലിപ്പടി ഡിവിഷനുകളാണ് പുതിയ നിര്‍ണയത്തില്‍ വനിതാ സംവരണ വാര്‍ഡുകളായത്. നേരത്തെ ഫോര്‍ട്ട്‌കൊച്ചി, കല്‍വത്തി, ഈരവേലി, കരിപ്പാലം, കൊച്ചങ്ങാടി, ചെറളായി, പനയപ്പിള്ളി ഡിവിഷനുകള്‍ ജനറല്‍ വിഭാഗവും മട്ടാഞ്ചേരി വനിതാ സംവരണവുമായിരുന്നു. വാര്‍ഡ് പുനര്‍വിഭജനത്തില്‍ ഇതില്‍ പല വാര്‍ഡുകളുടെയും പേരുകളും നമ്പറുകളും മാറി. വാര്‍ഡ് പുനര്‍വിഭജനത്തിന് മുന്‍പ് 74 ഡിവിഷനുകള്‍ ഉണ്ടായിരുന്ന കൊച്ചി കോര്‍പറേഷനില്‍ അതിര്‍ത്തി നിര്‍ണയത്തിനു ശേഷം 76 ഡിവിഷനുകളായി വര്‍ധിച്ചു. ചില ഡിവിഷനുകള്‍ വിഭജിച്ച് രണ്ടായി. ഏതാനും ഡിവിഷനുകള്‍ നഷ്ടപ്പെട്ടു. മറ്റു ചില ഡിവിഷനുകളുടെ പേരുകള്‍ തന്നെ മാറി. ഡിവിഷനുകളുടെ എണ്ണം വര്‍ധിച്ചപ്പോള്‍ സ്ത്രീ സംവരണ വാര്‍ഡുകളുടെ എണ്ണം 37ല്‍ നിന്ന് 38 ആയും വര്‍ധിച്ചു. പുതുതായി ചേര്‍ക്കപ്പെട്ട മുണ്ടംവേലി വെസ്റ്റും ചങ്ങമ്പുഴയും വനിതാ സംവരണ വാര്‍ഡുകളായി. പട്ടികജാതി സംവരണത്തിലും മാറ്റം ഉണ്ടായിട്ടുണ്ട്. കഴിഞ്ഞ തവണ തട്ടാഴം, വടുതല ഈസ്റ്റ്, തഴപ്പ് ഡിവിഷനുകളായിരുന്നു പട്ടികജാതി സംവരണമെങ്കില്‍ ഇത്തവണ തമ്മനം, ഇടക്കൊച്ചി സൗത്ത്, കതൃക്കടവ് ഡിവിഷനുകളാണ് പട്ടികജാതി സംവരണമായത്. ഇതില്‍ ഇടക്കൊച്ചിയും തമ്മനവും പട്ടികജാതി സ്ത്രീ സംവരണവുമാണ്.

അവകാശ സംരക്ഷണ യാത്രയ്ക്ക് സ്വീകരണം

കാലടി: നീതി ഔദാര്യമല്ല അവകാശമാണ് എന്ന മുദ്രാവാക്യവുമായ് സർക്കാരിന്‍റെ ക്രൈസ്തവ സമൂഹത്തോടുള്ള അവഗണനക്കെതിരെ കത്തോലിക്ക കോൺഗ്രസ് ഗ്ലോബൽ സമിതി കാസർകോട് മുതൽ തിരുവനന്തപുരത്തേക്ക് നടത്തുന്ന അവകാശ സംരക്ഷണ യാത്രയ്ക്ക് കാലടിയിൽ സ്വീകരണം നൽകി. എൽഎഫ് ആശുപത്രി ഡയറക്ടർ ഫാ. ജേക്കബ് ജി. പാലയ്ക്കപ്പിള്ളി സ്വീകരണ യോഗം ഉദ്ഘാടനം ചെയ്തു. അതിരൂപത പ്രസിഡന്‍റ് എസ്.ഐ. തോമസ് ശങ്കുരിക്കൽ അധ്യക്ഷത വഹിച്ചു. ഗ്ലോബൽ സമിതി പ്രസിഡന്‍റ് റവ. ഡോ. ഫിലിപ്പ് കവിയിൽ മുഖ്യ പ്രഭാഷണം നടത്തി. ജാഥ ക്യാപ്റ്റൻ രാജീവ് കൊച്ചുപറമ്പിൽ, കാലടി ഗ്രാമപഞ്ചായത്ത് പ്രസിഡന്‍റ് ഷൈജൻ തോട്ടപ്പിള്ളി, ജനറൽ സെക്രട്ടറി ബേബി പൊട്ടനാനി, ട്രഷറർ ജോൺസൺ പടയാട്ടിൽ എന്നിവർ പ്രസംഗിച്ചു.

വയോധികയുടെ മരണം: ദുരൂഹതയെന്ന പരാതിയിൽ പോസ്റ്റുമോർട്ടം നടത്തി

പറവൂർ: കെടാമംഗലം ചൂണ്ടാണിക്കാവിലെ വയോധികയുടെ മരണത്തിൽ ദുരൂഹതയുണ്ടെന്ന പരാതി ഉയർന്നതോടെ മൃതദേഹം പോസ്റ്റ് മോർട്ടം നടത്തിയ ശേഷം സംസ്കരിച്ചു. ശിവശക്തി വീട്ടിൽ പരേതനായ ചന്ദ്രശേഖരൻ നായരുടെ ഭാര്യ തങ്കമണി (74)യുടെ മൃതദേഹമാണ് എറണാകുളം മെഡിക്കൽ കോളജിൽ പോലീസ് സർജൻ പോസ്റ്റ്മോർട്ടം നടത്തിയത്. അസ്വാഭാവിക മരണത്തിനാണ് കേസെടുത്തിട്ടുള്ളത്. പോസ്റ്റ്മോർട്ടം റിപ്പോർട്ട് ലഭിച്ചതിനു ശേഷം തുടർനടപടികൾ സ്വീകരിക്കുമെന്നു മുനമ്പം ഡിവൈഎസ്‌പി എസ് ജയകൃഷ്ണൻ പറഞ്ഞു.

ആസിഡ് വീണ് യാത്രികര്‍ക്ക് പൊള്ളൽ: ടാങ്കര്‍ ലോറി ഡ്രൈവറെ അറസ്റ്റ് ചെയ്തു

കൊച്ചി : ഓടിക്കൊണ്ടിരുന്ന ടാങ്കര്‍ ലോറിയില്‍നിന്ന് സള്‍ഫ്യൂരിക് ആസിഡ് ദേഹത്തുവീണ് ബൈക്ക് യാത്രികരായ മൂന്നു പേര്‍ക്ക് പൊള്ളലേറ്റ സംഭവത്തില്‍ ടാങ്കര്‍ ലോറി ഡ്രൈവറെ അറസ്റ്റു ചെയ്തു. പാലാ തീക്കോയി മാടപ്പള്ളി എം.ആര്‍. ഗിരീഷിനെ(36) ആണ് എറണാകുളം സൗത്ത് പോലീസ് അറസ്റ്റ് ചെയ്തത്. അപകടകരമായി വാഹനമോടിച്ചതിനും അലക്ഷ്യമായി രാസവസ്തു കൈകാര്യം ചെയ്തതിനുമാണ് കേസ്. ഇയാളെ പിന്നീട് സ്റ്റേഷന്‍ ജാമ്യത്തില്‍ വിട്ടയച്ചു. സംഭവത്തില്‍ കണ്ണമാലി കക്കടവ് പാലക്കാപ്പള്ളി വീട്ടില്‍ പി.എസ്. ബിനീഷിനാണ്(36) സാരമായി പൊള്ളലേറ്റത്. ബിനീഷിനെ കൂടാതെ ബൈക്ക് യാത്രികരായ ദമ്പതികള്‍ക്കും ആസിഡ് വീണ് നിസാരമായി പൊള്ളലേറ്റിരുന്നു. ചൊവ്വാഴ്ച വൈകിട്ട് 6.45ന് തേവര സിഗ്‌നലിനു സമീപമായിരുന്നു അപകടം.

സെന്‍റ് റീത്താസ് സ്കൂളിന് ഐക്യദാർഢ്യവുമായി കൊച്ചി രൂപത ബിസിസി

തോപ്പുംപടി: പള്ളുരുത്തി സെന്‍റ് റീത്താസ് സ്കൂളിന് പിന്തുണയും ഐക്യദാർഡ്യവുമറിയിച്ച് കൊച്ചി രൂപത കുടുംബയൂണിറ്റ് കേന്ദ്ര സമിതി കോൺവന്‍റിൽ സന്ദർശനം നടത്തി. ബിസിസി രൂപത ഡയറക്ടർ ഫാ.ബെന്നി തോപ്പിപറമ്പിൽ , പാസ്റ്ററൽ സെന്‍റർ ഡയറക്ടർ ഫാ. ജോസഫ് ചിറാപ്പിള്ളി എന്നിവരുടെ നേതൃത്വത്തിലാണ് രൂപത ഭാരവാഹികൾ സന്ദർശനം നടത്തിയത്. കൺവീനർ പോൾ ബെന്നി പുളിക്കൽ, സെക്രട്ടറി പീറ്റർ പി. ജോർജ്, ട്രഷറർ മാർഗരറ്റ് ലോറൻസ് , ഫൊറോന കൺവീനർമാരായ ആൽബി ഗൊൺസാൽവൂസ്, ജസ്റ്റിൻ മുല്ലപറമ്പിൽ, ഫെലിക്സ് കാട്ടിശേരി, സോണി ആലുങ്കൽ, കെ.ജെ. സനൂപ് എന്നിവരും ഒപ്പമുണ്ടായിരുന്നു.

അണഞ്ഞത് ബെത്‌ലഹേമിന്‍റെ സ്നേഹദീപം

പെരുമ്പാവൂർ: അശരണർക്ക് കൈത്താങ്ങായിരുന്ന കൂവപ്പടി ബെത്ലഹേമിന്‍റെ മേരി ചേച്ചി വിടവാങ്ങി. ജീവിതത്തിൽ തഴയപ്പെട്ട ആയിരങ്ങൾക്ക് അത്താണിയും അഭയവുമായിത്തീർന്ന ബെത്‌ലഹേം അഭയഭവന്‍റെ എല്ലാമെല്ലാമായ മേരി എസ്തപ്പാന്‍റെ വിയോഗം തീർത്ത ശൂന്യത നികത്താനാവാത്തതാണ്. ആരോരുമില്ലാത്ത മാനസികാസ്വസ്ഥ്യമുള്ള അനേകർക്ക് അമ്മയായിരുന്നു മേരി എസ്തപ്പാൻ. വാഹനാപകടത്തെ തുടർന്ന് ചികിത്സയിലായിരുന്നു. രണ്ടു മാസം മുമ്പ് അഭയഭവന്‍റെ ഒരാവശ്യവുമായി തിരുവനന്തപുരത്തേക്ക് പോകും വഴി അടൂരിലുണ്ടായ കാറപകടത്തിൽ ഗുരുതര പരിക്ക് പറ്റി അടൂരിലും തുടർന്ന് എറണാകുളത്തും ചികിത്സയിലായിരുന്നു. കൂവപ്പടി ഗ്രാമത്തിൽ മൂന്ന് മക്കളുടെ മാതാവായി വീട്ടിൽ ഒതുങ്ങിക്കഴിഞ്ഞിരുന്ന മേരി എസ്തപ്പാൻ ഒരു നിയോഗം പോലെ, തെരുവിൽ തള്ളപ്പെട്ടിരുന്ന രോഗിയായ ഒരു എൺപത് വയസുകാരന് ഭക്ഷണം വാങ്ങിക്കൊടുത്ത് വീട്ടിലേക്ക് കൊണ്ടുവന്ന് തുടങ്ങിയ കാരുണ്യ പ്രവർത്തിയാണ് ഇന്ന് അഞ്ഞൂറോളം അശരണരെ സംരക്ഷിക്കുന്ന പ്രസ്ഥാനമായി വളർന്നത്. മേരി എസ്തപ്പാൻ ജീവകാരുണ്യ രംഗത്ത് മാതൃക: ബാബു ജോസഫ് പെരുമ്പാവൂർ: നിരാലംബരായ ആയിരക്കണക്കിന് അഗതികൾക്ക് അഭയമൊരുക്കിയ കൂവപ്പടി ബെത്‌ലേഹം അഭയഭവൻ ചാരിറ്റബിൾ സൊസൈറ്റിയുടെ സ്ഥാപക മേരി എസ്തപ്പാന്‍റെ നിര്യാണത്തിൽ കേരള കോൺഗ്രസ്-എം സംസ്ഥാന സെക്രട്ടറിയും അഭയഭവൻ ഡയറക്ടറുമായ ബാബു ജോസഫ് അനുശോചിച്ചു. ജീവകാരുണ്യ പ്രവർത്തങ്ങളിൽ കേരളത്തിന്‌ മുഴുവൻ മാതൃകയായ വനിതയെയാണ് നഷ്ടമായത്. അഭയഭവനിലൂടെ സാധാരണ ജീവിതത്തിലേക്ക് തിരിച്ചെത്തിയ അനേകരുടെ നല്ല ജീവിതങ്ങൾ മേരി എസ്തപ്പാന്‍റെ സേവനസപര്യയുടെ സാക്ഷ്യങ്ങളാണെന്നും ബാബു ജോസഫ് അനുസ്മരിച്ചു.

ആലുവയിൽ പൈപ്പിടുന്നതിനു മുൻപ് ടാറിംഗ്; വകുപ്പുകൾ തമ്മിൽ പോര്

റോഡുകൾ ടാർ ചെയ്തതോടെ കുടിവെള്ള പൈപ്പ് മാറ്റാനാകാതെ വാട്ടർ അഥോറിറ്റി ആലുവ: മുന്നറിയിപ്പില്ലാതെ ആലുവയിലെ പ്രധാന റോഡുകൾ ഏതാനും രാത്രികൾ കൊണ്ട് പൊതുമരാമത്ത് വകുപ്പ് ടാറിംഗ് നടത്തിയത് വാട്ടർ അഥോറിറ്റിയെ വെട്ടിലാക്കി. കുടിവെള്ള പൈപ്പുകൾ മാറ്റുന്നതിനായി അനുവദിച്ച 3.57 കോടി രൂപയുടെ പദ്ധതി ഇതോടെ വെള്ളത്തിലായി. ആലുവ നഗരത്തിലെ കാലപ്പഴക്കം ചെന്ന ഭൂഗർഭ കുടിവെള്ള പൈപ്പുകൾ മാറ്റി പുതിയത് സ്ഥാപിക്കേണ്ട പദ്ധതിയാണ് ഇതോടെ നിർത്തിവയ്‌ക്കേണ്ടി വന്നിരിക്കുന്നത്. ഇതിനായി നഗരത്തിലെ പ്രധാന സ്ഥലങ്ങളിൽ പുതിയ പൈപ്പുകൾ ഇറക്കുകയും ചെയ്തു. ടെണ്ടർ പൂർത്തിയായതിനാൽ റോഡ് കുഴിക്കുന്നതിന് വാട്ടർ അഥോറിട്ടി അനുമതി നൽകിയത് പരിഗണിക്കാതെയാണ് പൊതുമരാമത്ത് വകുപ്പ് കഴിഞ്ഞ ദിവസങ്ങളിൽ റോഡ് ടാറിംഗ് നടത്തിയത്. നഗരത്തിലെ ബാങ്ക് ജംഗ്ഷൻ, ബൈപാസ് ജംഗ്ഷൻ മേഖലകളിൽ ഏതാനും മാസമായി കുടിവെള്ളം കിട്ടുന്നില്ല. കേന്ദ്ര സർക്കാരിന്‍റെ അമൃതം പദ്ധതി - 2 പ്രകാരം തീർക്കേണ്ട ജോലിയാണിത്. 10 ദിവസത്തിനകം പൂർത്തിയാക്കാമെന്ന് അറിയിച്ചിട്ടും പൊതുമരാമത്ത് വകുപ്പ് അനുവദിച്ചില്ലെന്നാണ് വാട്ടർ അഥോറിട്ടി അധികൃതർ ആരോപിക്കുന്നത്. ഇനി റോഡ് കുത്തിപ്പൊളിച്ചാൽ സോഷ്യൽ മീഡിയയിലൂടെ ട്രോൾ വരുമെന്ന പ്രശ്നവും ഉദ്യോഗസ്ഥരെ അലട്ടുന്നുണ്ട്. അതേസമയം കാലാവസ്ഥ അനുകൂലമായ സാഹചര്യത്തിൽ ടാറിംഗ് പൂർത്തിയാക്കിയില്ലെങ്കിൽ കരാറുകാരൻ വിട്ടുപോകുമെന്നും അതിനാലാണ് നഗരത്തിലെ 11 റോഡുകൾ അഞ്ച് കോടി രൂപ മുടക്കി ടാർ ചെയ്തതെന്നാണ് പൊതുമരാമത്ത് ഉദ്യോഗസ്‌ഥർ പറയുന്നത്. പെരുമ്പാവൂർ ദേശസാത്കൃത റോഡിൽ വാട്ടർ അഥോറിട്ടിക്ക് പൈപ്പ് ഇടാൻ അനുമതി നൽകിയിട്ട് മാസങ്ങളെടുത്താണ് പൂർത്തിയാക്കിയത്. റോഡ് ടാറിംഗ് വൈകിയതിന് കോടതിയിൽ മറുപടി പറയേണ്ടിവന്നത് പൊതുമരാമത്ത് വകുപ്പ് ആയിരുന്നു. ഇതിൽ വകുപ്പുകൾ തമ്മിൽ ഉണ്ടായ പോരാണ് പുതിയ സംഭവ വികാസത്തിനു പിന്നിലെന്നാണ് സൂചന. ആലുവ നഗരത്തിലെ പമ്പ് കവല - ആർ.എസ് റോഡ്, പമ്പ് കവല - മാർവർ കവല, ബാങ്ക് കവല - മുനിസിപ്പൽ സ്റ്റാൻഡ്, ആർഎസ് - സീനത്ത് കവല റോഡുകളിൽ ഡിഐ പൈപ്പുകൾ സ്ഥാപിക്കുന്നതിനാണ് ഫണ്ട് അനുവദിച്ചത്. പൈപ്പുകൾ മാറ്റിയില്ലെങ്കിൽ ഉയർന്ന മർദ്ദത്തിൽ വെള്ളം പമ്പ് ചെയ്യുന്പോൾ പുതിയ റോഡ് തകരുമെന്ന് വാട്ടർ അഥോറിറ്റി മുന്നറിയിപ്പു നൽകി.

കിർടാഡ്‌സ് ജില്ലാതല ക്വിസ്: യുസി കോളജ് ഒന്നാമത്

ആലുവ: ഗോത്ര ജനതയുമായി ബന്ധപ്പെട്ട ഗവേഷണ-പരിശീലന പ്രവർത്തനങ്ങൾ നടത്തുന്ന കിർടാഡ്‌സ് വകുപ്പ് സംഘടിപ്പിച്ച ജില്ലാതല ക്വിസ് മത്സരത്തിൽ കോളജ് വിഭാഗത്തിൽ യുസി കോളജും ഹയർ സെക്കൻഡറി വിഭാഗത്തിൽ പുല്ലേപ്പടി ദാറുൽ ഉലൂം എച്ച് എസ്എസും ഒന്നാം സ്ഥാനം നേടി. സംസ്ഥാനതല മത്സരത്തിൽ ജില്ലയെ പ്രതിനിധീകരിച്ച് ഇവർ മത്സരിക്കും. വി.കെ. അനുഗ്രഹ്, നിതിയ പൗലോസ് എന്നിവർ യുസി കോളജിന് വേണ്ടിയും മിസ്വാബ് ഇബ്നു അൻവർ, എൽ. മുത്തു എന്നിവർ ദാറുൽ ഉലൂം എച്ച്എസ്എസിനു വേണ്ടിയും മത്സരിച്ചു. കോളജ് വിഭാഗത്തിൽ രണ്ടാം സ്ഥാനം: അഭിനയ് കെ. അശോകൻ, അലക്സ് ജോസ് (കുസാറ്റ്), മൂന്നാം സ്ഥാനം: സോണാ ഡേവി, അലിയ ഫാത്തീം: (യുസി കോളജ്). സ്‌കൂൾ വിഭാഗം: രണ്ടാം സ്ഥാനം: ആദിൽ കൃഷ്ണ, അക്ഷയ് കുമാർ (നന്ത്യാട്ട്കുന്നം, എസ്എൻവി), മൂന്നാം സ്ഥാനം: ഹാഷ്‌ലിൻ ജോസഫ്, കെ.എം. റിധ ആയിഷ ( ഇടപ്പള്ളി ഗവ. എച്ച്എസ്എസ്).

ട്രെയിനില്‍നിന്ന് വീണ് അച്ഛനും മകള്‍ക്കും പരിക്ക്

അങ്കമാലി: അങ്കമാലിയില്‍ ട്രെയിനില്‍നിന്ന് വീണ് അച്ഛനും മകള്‍ക്കും പരിക്ക്. അങ്കമാലി റെയില്‍വേ സ്‌റ്റേഷനില്‍ ഇന്നലെ വൈകിട്ട് 6.30നാണ് അപകടം. രണ്ടാം നമ്പര്‍ പ്ലാറ്റ്‌ഫോമില്‍ എറണാകുളം –ഷൊര്‍ണൂര്‍ മെമു ട്രെയിനില്‍ നിന്നാണ് വീണത്. തലയ്ക്ക് നിസാര പരിക്കേറ്റ ഇദ്ദേഹത്തെ സ്വകാര്യ ആശുപത്രിയില്‍ പ്രവേശിപ്പിച്ചു. കുട്ടിയുമായി ട്രെയിനില്‍ കയറാന്‍ ശ്രമിക്കുന്നതിനിടെയാണ് അപകടം. കുട്ടിയെ ട്രെയിനിന്‍റഎ പടിയില്‍ നിര്‍ത്തിയശേഷം ചാടിക്കയറാന്‍ ശ്രമിച്ചെങ്കിലും ഇരുവരും പ്ലാറ്റ്‌ഫോമിലേക്ക് തെറിച്ചുവീഴുകയായിരുന്നു.

സ്കൂട്ടർ അപകടത്തിൽ തൊഴിലാളിക്കു പരിക്ക്

വാഴക്കുളം: കാറും സ്കൂട്ടറും കൂട്ടിയിടിച്ചുണ്ടായ അപകടത്തിൽ പൈനാപ്പിൾ തൊഴിലാളിക്കു പരിക്കേറ്റു. ചാറ്റുപാറ നിരപ്പേൽ ബെന്നി ജോണിനാണ് (49) കൈയ്ക്കും കാലിനും നടുവിനും പരിക്കേറ്റത്. വെള്ളിയാഴ്ച വൈകുന്നേരം ആറരയോടെ കദളിക്കാട് മണിയന്തടം കവലയ്ക്കു സമീപമായിരുന്നു അപകടമുണ്ടായത്. വാഴക്കുളത്തുനിന്ന് മണിയന്തടം ഭാഗത്തേക്കു പോകുകയായിരുന്ന ബെന്നിയുടെ സ്കൂട്ടറിൽ എതിർദിശയിൽ വന്ന കാർ ഇടിക്കുകയായിരുന്നു. കൈമുട്ടിനും കാൽമുട്ടിലും പൊട്ടലുണ്ട്. അരഭാഗത്തും പരിക്കേറ്റിട്ടുണ്ട്. പ്രദേശവാസികൾ ചേർന്ന് ബെന്നിയെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു.

പാലിയേറ്റീവ് സെന്‍റർ സന്ദർശിച്ചു

പൈങ്ങോട്ടൂർ: പൈങ്ങോട്ടൂർ സെന്‍റ് ജോസഫ് ഹയർ സെക്കൻഡറി സ്കൂളിലെ സ്കൗട്സ് ആൻഡ് ഗൈഡ്സ് അംഗങ്ങൾ പോത്താനിക്കാട് പാലിയേറ്റീവ് സെന്‍റർ സന്ദർശിച്ചു. സ്കൗട്സ് മാസ്റ്റർ സിസ്റ്റർ ഫീന, റെയ്ഞ്ചർ ലീഡർ സിസ്റ്റർ സ്മിനു എന്നിവരോടൊപ്പമാണ് കുട്ടികൾ പാലിയേറ്റീവ് സെന്‍ററിൽ എത്തിയത്. ഒരു ദിവസം സെന്‍ററിൽ ചെലവഴിക്കുകയും രോഗികളായി കഴിയുന്നവർക്ക് പരിചരണങ്ങൾ നൽകുകയും ചെയ്തു. പാലിയേറ്റീവും പരിസരങ്ങളും വൃത്തിയാക്കി ചെടികൾ നട്ടുപിടിപ്പിച്ച ശേഷമാണ് കുട്ടികൾ മടങ്ങിയത്.

കോതമംഗലം ഉപജില്ലാ ശാസ്ത്രമേള : സെന്‍റ് അഗസ്റ്റിൻസ് സ്കൂളിന് ഓവറോൾ

കോതമംഗലം: പൈങ്ങോട്ടൂർ സെന്‍റ് ജോസഫ് ഹയർ സെക്കൻഡറി സ്കൂളിൽ നടന്ന കോതമംഗലം കോതമംഗലം ഉപജില്ലാ ശാസ്ത്രമേളയിൽ 1086 പോയിന്‍റ് നേടി കോതമംഗലം സെന്‍റ് അഗസ്റ്റിൻസ് ഗേൾസ് ഹയർ സെക്കൻഡറി സ്കൂൾ ഓവറോൾ ചാമ്പ്യൻഷിപ്പ് കരസ്ഥമാക്കി. 812 പോയിന്‍റോടെ പൈങ്ങോട്ടൂർ സെന്‍റ് ജോസഫ് ഹയർസെക്കൻഡറി സ്കൂൾ റണ്ണറപ്പായി. സയൻസ്, സോഷ്യൽ സയൻസ്, വർക്സ് എക്സ്പീരിയൻസ്, ഗണിതശാസ്ത്രം, ഐടി എന്നീ അഞ്ച് വിഷയങ്ങളെ അടിസ്ഥാനമാക്കിയുള്ള മത്സരങ്ങളാണ് ശാസ്ത്രമേളയിൽ അരങ്ങേറിയത്. അഞ്ചു മേളകളിലും ചാമ്പ്യൻഷിപ്പ് ട്രോഫി കരസ്ഥമാക്കിയാണ് സെന്‍റ് അഗസ്റ്റിൻസ് ഗേൾസ് ഹയർ സെക്കൻഡറി സ്കൂൾ ഓവറോൾ ചാമ്പ്യൻഷിപ് കരസ്ഥമാക്കിയത്. സമാപന സമ്മേളനത്തിൽ ജില്ലാ പഞ്ചായത്ത് അംഗം റാണിക്കുട്ടി ജോർജിൽ നിന്നും ട്രോഫികൾ പ്രിൻസിപ്പൽ സിസ്റ്റർ ഷിബി മാത്യു, ഹെഡ് മിസ്ട്രസ് സിസ്റ്റർ റിനി മരിയ, അധ്യാപകർ, വിദ്യാർഥികൾ എന്നിവർ ചേർന്ന് ഏറ്റുവാങ്ങി.

ഒഴുക്കിൽപ്പെട്ട കാർ യാത്രികനെ രക്ഷപെടുത്തി

കോതമംഗലം: കനത്ത മഴയിൽ കുടമുണ്ടപാലത്തിൽ കുത്തൊഴുക്കില്‍പ്പെട്ട കാർ യാത്രികനെ രക്ഷപെടുത്തി. വെള്ളിയാഴ്ച സന്ധ്യയോടെ പെയ്ത പേമാരിയില്‍ അപ്രതീഷിതമായാണ് കുടമുണ്ട പാലം വെള്ളത്തിലായത്. പാലത്തിലൂടെ കടന്നുപോകുമ്പോഴാണ് കാര്‍ കുത്തൊഴുക്കില്‍പ്പെട്ടത്. പാലത്തിന്‍റെ കൈവരിയില്‍തട്ടി നിന്നതാണ് രക്ഷയായത്. അല്ലെങ്കില്‍ കാര്‍ പുഴയിലേക്ക് മറിയുമായിരുന്നു. കാര്‍ ഓഫായതിന് പിന്നാലെ ഡ്രൈവര്‍ പുറത്തിറങ്ങിയിരുന്നു. രാത്രിപത്തരയോടെയാണ് സംഭവം. നാട്ടുകാര്‍ വടംകൊണ്ട് കെട്ടി കാര്‍ പിടിച്ചുനിറുത്തി. പിന്നീട് ഫയര്‍ഫോഴ്സ് എത്തിയാണ് കരയിലെത്തിച്ചത്. കുത്തുകുഴി സ്വദേശിയുടേതാണ് കാര്‍. ഡ്രൈവര്‍ മാത്രമെ വാഹനത്തിൽ ഉണ്ടായിരുന്നുള്ളു. മറുകരയിലേക്ക് പാലത്തിലൂടെ കടന്നുപോയപ്പോള്‍ പ്രശ്നമുണ്ടായിരുന്നില്ല. അടിവാട് ഭാഗത്തുനിന്ന് മടങ്ങുമ്പോഴാണ് അപകടം. കുത്തൊഴുക്കുള്ളവിവരം മനസിലായില്ലെന്ന് ഡ്രൈവര്‍ പറഞ്ഞു. കനത്ത മഴയുണ്ടായാല്‍ കുടമുണ്ട പാലം വെള്ളത്തിലാകുന്നത് പതിവാണ്. തൊട്ടുചേർന്ന് ഉയരം കൂട്ടി നിർമാണം പൂർത്തിയാക്കിയിട്ടുള്ള പാലം വർഷങ്ങൾ പിന്നിട്ടിട്ടും കമ്മീഷൻ ചെയ്തിട്ടില്ല.

കീരംപാറ ഇടവകയിൽ സ്നേഹവീട് വെഞ്ചിരിപ്പ് ഇന്ന്

കോതമംഗലം: കീരംപാറ സെന്‍റ് സെബാസ്റ്റ്യൻസ് ഇടവകയിൽ നടപ്പിലാക്കുന്ന സ്നേഹസ്പർശം ഭവന നിർമാണ പദ്ധതിയുടെ ഭാഗമായി നിർമിച്ചിട്ടുള്ള രണ്ടാമത് സ്നേഹവീട് വെഞ്ചിരിപ്പ് ഇന്ന് നടത്തും. രാവിലെ 10 ന് കോതമംഗലം രൂപത സോഷ്യൽ സർവീസ് ഡയറക്ടർ ഫാ. ജോസഫ് കൊച്ചുപറമ്പിൽ ദിവ്യബലിയർപ്പിക്കും. തുടർന്ന് സ്നേഹവീടിന്‍റെ വെഞ്ചിരിപ്പും നിർവഹിക്കും. ഇടവകയിൽ സ്നേഹസ്പർശം പദ്ധതിവഴി ഈ വർഷം പൂർത്തികരിക്കുന്ന രണ്ടാമത്തെ വീടാണിത്. അടുത്ത ഘട്ടത്തിൽ ഒരുമിച്ച് നിർമിക്കുന്ന മൂന്നു വിടുകളുടെ നിർമാണം നാളെ ആരംഭിക്കും. ജനവരിയിൽ ഇവ പൂർത്തികരിക്കാനാണ് ലക്ഷ്യമിടുന്നത്. മാതൃവേദി, ഫാമിലി അപ്പസ്റ്റേലേറ്റ്, പിതൃവേദി എന്നീ സംഘടനകളുടെ നേതൃത്വത്തിലാണ് വീട് നിർമിക്കുന്നത്. ഇടവക സമൂഹത്തിന്‍റെയും അദ്യുദയകാംക്ഷികളുടെയും സംഘടനകളുടെയും സഹകണത്തോടെയാണ് ഭവനനിർമാണത്തിനുള്ള തുക കണ്ടെത്തുന്നത്. 2026 ഓടു കൂടി ഇടവകയിലെ മുഴുവൻ ഭവനരഹിതർക്കും വീടുവച്ചു നൽകുക എന്ന ലക്ഷ്യമിട്ടാണ് സ്നേഹസ്പർശം പദ്ധതി പ്രവർത്തിക്കുന്നതെന്ന് വികാരി ഫാ. മാത്യു കൊച്ചുപുരയ്ക്കൽ പറഞ്ഞു.

മറ്റുള്ളവരേയും നമ്മളായിത്തന്നെ കാണണം: ജസ്റ്റീസ് ദേവൻ രാമചന്ദ്രൻ

പിറവം: നമ്മൾ ഓരോരുത്തരും മറ്റുള്ളവരേയും നമ്മളായിത്തന്നെ കാണണമെന്നും, ഒറ്റയ്ക്കാണെന്നുള്ള ചിന്ത മനസിൽനിന്നും തുടച്ചു നീക്കണമെന്നും ഹൈക്കോടതി ജസ്റ്റീസ് ദേവൻ രാമചന്ദ്രൻ. കേരളത്തിലെ ജനങ്ങളുടെ ഒത്തൊരുമയും, പങ്കാളിത്തവുമെല്ലാം മറ്റെല്ലാ സംസ്ഥാനങ്ങൾക്കും മാതൃകയാണ്. പിറവത്ത് നടന്ന അമേരിക്കയിലെ മലയാളി സംഘടനയായ ഫോമ യുടെ കാരുണ്യ ചികിത്സ സഹായ പദ്ധതി ഉദ്ഘാടനം ചെയ്തു കൊണ്ട് പ്രസംഗിക്കുകയായിരുന്നു ജസ്റ്റീസ്. പിറവം ഹോളി കിംഗ്സ് പാരിഷ് ഹാളിൽ നടന്ന ചടങ്ങിൽ നഗരസഭാ ചെയർപേഴ്സൺ ജൂലി സാബു അധ്യക്ഷത വഹിച്ചു. കെ.എം. മാണി ബജറ്റ് റീസേർച്ച് സെന്‍റർ ചെയർപേഴ്സൺ നിഷ ജോസ് കെ. മാണി നഗരസഭാ പരിധിയിലെ 450 ഓളം രോഗികൾക്കുള്ള ഭക്ഷ്യ ധാന്യ കിറ്റ് -സാമ്പത്തിക സഹായത്തിന്‍റെ വിതരണോദ്ഘാടനം നിർവഹിച്ചു. ഫോമ പ്രസിഡന്‍റ് ബേബി മണക്കുന്നേലിന്‍റെ നേതൃത്വത്തിൽ നടന്ന പരിപാടിയിൽ മുൻ എംഎൽഎ മാരായ വി. ജെ. പൗലോസ്, എം. ജെ. ജേക്കബ്, മുൻ നഗരസഭാ ചെയർമാനും, ഫോമയുടെ കേരള കൺവൻഷൻ സംഘാടകനുമായ സാബു കെ. ജേക്കബ്, നഗരസഭാ വൈസ് ചെയർമാൻ കെ. പി. സലിം തുടങ്ങിയവർ പ്രസംഗിച്ചു. മികച്ച സംസ്ഥാന കർഷകനായി തെരെഞ്ഞെടുത്ത മോനു വർഗീസ് മാമനും, ലഹരി വിരുദ്ധ പ്രവർത്തകൻ ബേബി കാളിയമ്പുറത്തിനും, പിവത്തു ഫോമ നടത്തിയ അമൃത മെഗാ മെഡിക്കൽ ക്യാമ്പുമായി സഹകരിച്ച പിറവം ബിപിസി കോളജ്, വെൽ കെയർ കോളജ് ഓഫ് നഴ്സിംഗ് വെട്ടിക്കൽ,എന്നീ വിദ്യാഭ്യാസ സ്ഥാപനങ്ങൾക്കും, ആർ എൽ വി വിദ്യാദാസിനും പുരസ്കാരങ്ങൾ വിതരണം ചെയ്തു. ഇതിനൊപ്പം നഗരസഭയിലെ 27 ആശാ വർക്കർമാരെയും ഫോമയുടെ നേതൃത്വത്തിൽ ആദരിച്ചു.

ഇന്‍റര്‍ സ്‌കൂള്‍ അക്വാട്ടിക് ചാമ്പ്യന്‍ഷിപ്പ്

മൂവാറ്റുപുഴ: സെന്‍റ് തോമസ് പബ്ലിക് സ്‌കൂളിന്‍റെ ആഭിമുഖ്യത്തില്‍ നടന്ന ഹൈഡ്രത്തോണ്‍ 2025- ഇന്‍റര്‍ സ്‌കൂള്‍ അക്വാട്ടിക് ചാമ്പ്യന്‍ഷിപ്പ് നഗരസഭാധ്യക്ഷന്‍ പി.പി എല്‍ദോസ് ഉദ്ഘാടനം ചെയ്തു. നഗരസഭാംഗം കെ.ജി അനില്‍കുമാര്‍ അധ്യക്ഷത വഹിച്ചു. സ്‌കൂള്‍ മാനേജര്‍ ഫാ. ജോണ്‍ പുത്തൂരാന്‍, പ്രിന്‍സിപ്പല്‍ മേരി സാബു, അഡ്മിനിസ്‌ട്രേറ്റര്‍ സൂനാമ്മ ജോണ്‍ എന്നിവര്‍ പ്രസംഗിച്ചു. കേരളത്തിന്‍റെ വിവിധ ജില്ലകളില്‍ നിന്നുള്ള സിബിഎസ്ഇ, ഐസിഎസ്ഇ, സ്റ്റേറ്റ് സിലബസുകളില്‍ പഠിക്കുന്ന ആറ് മുതല്‍ 17 വയസു വരെയുള്ള 150 ഓളം കുട്ടികള്‍ 29 കാറ്റഗറികളിലായി ആണ്‍കുട്ടികളുടെയും പെണ്‍കുട്ടികളുടെയും മത്സരങ്ങളില്‍ മാറ്റുരച്ചു. വിജയികള്‍ക്ക് കാഷ് പ്രൈസും മൊമെന്‍റോയും നല്‍കി.

അവകാശങ്ങള്‍ക്കായി സമുദായം ഒന്നിച്ചു നില്‍ക്കും: മോണ്‍. മലേക്കണ്ടത്തില്‍

കോതമംഗലം: ന്യായമായ അവകാശങ്ങള്‍ക്കുവേണ്ടി സമുദായം ഒന്നിച്ചു നില്‍ക്കുമെന്നു കോതമംഗലം രൂപത വികാരി ജനറാള്‍ മോണ്‍ ഡോ. പയസ് മലേക്കണ്ടത്തില്‍ പറഞ്ഞു. കത്തോലിക്ക കോണ്‍ഗ്രസിന്‍റെ അവകാശ സംരക്ഷണയാത്രയ്ക്ക് കോതമംഗലത്തു നല്‍കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കത്തോലിക്ക കോണ്‍ഗ്രസ് നേതൃത്വം കൊടുത്തിട്ടുള്ള സമരങ്ങള്‍ കേരള സമൂഹത്തിലുണ്ടാക്കിയിട്ടുള്ള സ്വാധീനം നമുക്ക് അറിവുള്ളതാണ്. വിമോചന സമരവും മലയാളി മെമ്മോറിയല്‍ ഉള്‍പ്പെടെയുള്ള ഇടപെടലുകളും കത്തോലിക്കര്‍ക്ക് വേണ്ടി മാത്രമല്ല സമൂഹത്തിന് നന്മയായി അനീതിക്കെതിരേ എന്നും ശക്തമായ നില്‍ക്കുന്ന ചരിത്രമാണ് കത്തോലിക്ക സഭയ്ക്കുള്ളതെന്നും അദ്ദേഹം പറഞ്ഞു. സര്‍ക്കാരുകളുടെ ജനവിരുദ്ധ സമീപനങ്ങളെയും മര്യാദകേടിനെയും എന്നും എതിര്‍ക്കുകയും തോല്‍പ്പിക്കുകയും ചെയ്ത ചരിത്രമാണ് സമുദായത്തിന്‍റേതെന്നു കത്തോലിക്കാ കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ പറഞ്ഞു. കത്തോലിക്ക സമുദായം, തെറ്റുകാരാണെന്ന് വരുത്തി തീര്‍ക്കാനുള്ള ആസൂത്രിതമായ ശ്രമങ്ങള്‍ നാനാഭാഗത്തുനിന്ന് ഉണ്ടാകുന്നുണ്ടെന്ന് സമുദായ അംഗങ്ങള്‍ തിരിച്ചറിയുന്നുണ്ടെന്നും അദ്ദേഹം പറഞ്ഞു. വന്യമൃഗങ്ങളും വനം വകുപ്പ് അധികൃതരും ഒരുപറ്റം അധികാരികളും കര്‍ഷകരെ വേട്ടയാടുകയാണെന്ന് കത്തോലിക്കാ കോണ്‍ഗ്രസ് കോതമംഗലം രൂപത പ്രസിഡന്‍റ് സണ്ണി കടൂത്താഴെ ചൂണ്ടിക്കാട്ടി. ഫാമിലി അപ്പോസ്തലേറ്റ് - ഡിഎഫ്‌സി രൂപത ഡയറക്ടര്‍ റവ. ഡോ. ആന്‍റണി പുത്തന്‍കുളം, സോഷ്യല്‍ സര്‍വീസ് രൂപത ഡയറക്ടര്‍ ഫാ. ജോസഫ് കൊച്ചുപറമ്പില്‍, ഫൊറോന പ്രസിഡന്‍റ് ബിജു വെട്ടിക്കുഴ, കത്തീഡ്രല്‍ യൂണിറ്റ് പ്രസിഡന്‍റ് ബിനോയ് പള്ളത്ത്, ഫൊറോന സെക്രട്ടറി സോണി പാമ്പക്കല്‍, ഫാമിലി അപ്പോസ്തലേറ്റ് രൂപത പ്രസിഡന്‍റ് ഡിഗോള്‍ ജോര്‍ജ്, ഡിഎഫ്‌സി ഫൊറോന പ്രസിഡന്‍റ് ജോര്‍ജ് മങ്ങാട്ട്, പിതൃവേദി രൂപത സെക്രട്ടറി ജിജി പുളിക്കല്‍, മാതൃവേദി പ്രസിഡന്‍റ് ഫിലോ ജോര്‍ജ് തെക്കേകുന്നേല്‍ എന്നിവര്‍ ജാഥാ ക്യാപ്റ്റനും സഹയാത്രികര്‍ക്കും ഹാരാര്‍പ്പണം നടത്തി.

സെൻട്രൽ കേരള സിബിഎസ്ഇ സഹോദയ കലോത്സവം : തൊട്ടതെല്ലാം പൊന്നാക്കി ക്രിസ്‌ലിൻ സജി

തൊടുപുഴ: ഹൈക്കോടതി വിധിയുമായി കലോത്സവത്തിനെത്തിയ ക്രിസ്‌ലിൻ സജി തൊട്ടതെല്ലാം പൊന്നാക്കി. മൂവാറ്റുപുഴ നിർമല പബ്ലിക് സ്കൂളിലെ പത്താം ക്ലാസ് വിദ്യാർഥിയായ ക്രിസ്‌ലിൻ കാറ്റഗറി 3 വിഭാഗത്തിൽ ഭരതനാട്യം, നാടോടി നൃത്തം, കുച്ചിപ്പുടി എന്നീ ഇനങ്ങളിലാണ് ഒന്നാം സ്ഥാനത്തെത്തിയത്. ഭരതനാട്യ മത്സരത്തിൽ സ്കൂൾ തലത്തിൽ ക്രിസ്ലിൻ രണ്ടാം സ്ഥാനത്തായിരുന്നു. തുടർന്ന് ഹൈക്കോടതിയിൽ നിന്നും അനുകൂല വിധി സന്പാദിച്ചാണ് സെൻട്രൽ കേരള സഹോദയ കലോത്സവത്തിൽ മാറ്റുരയ്ക്കാനെത്തിയത്. താളപ്പെരുമ എന്ന പ്രമേയം അവതരിപ്പിച്ചാണ് നാടോടി നൃത്തത്തിൽ ഒന്നാമതെത്തിയത്. കഴിഞ്ഞ വർഷം കുച്ചുപ്പുടിയിലും അതിന് മുന്പ് നാടോടി നൃത്തത്തിലും മിന്നും പ്രകടനം കാഴ്ചവച്ച് ഒന്നാം സ്ഥാനം കരസ്ഥമാക്കിയിരുന്നു. ഇന്നലെ നടന്ന കുച്ചുപ്പുടിയിലും ഒന്നാമതെത്തിയാണ് ഈ മിടുക്കി കലോത്സവത്തിൽ താരമായത്. മൂവാറ്റുപുഴ ചക്രാംവേലിൽ സജി - നീന ദന്പതികളുടെ മകളാണ്. എറണാകുളത്ത് നാട്യശാല സ്കൂൾ ഓഫ് ഡാൻസ് നടത്തുന്ന സൂരജ് നായരാണ് ഗുരു. കുച്ചുപ്പുടിയിൽ സുവർണ നേട്ടം തൊടുപുഴ: കുച്ചിപ്പുടി ബോയ്സ് വിഭാഗത്തിൽ വാഴക്കുളം കാർമൽ പബ്ലിക് സ്കൂളിന് തിളക്കമേറെ. കാറ്റഗറി -4 വിഭാഗത്തിൽ പ്ലസ് വണ്‍ വിദ്യാർഥിയായ ദേവനാരായണൻ സുഭാഷ് ഒന്നാം സ്ഥാനം നേടിയപ്പോൾ കാറ്റഗറി -3 ൽ ഇതേ സ്കൂളിലെ നദാൻ ക്രിസ്റ്റോ ജോർജും ഒന്നാം സ്ഥാനം കരസ്ഥമാക്കി. ഒൻപതാം ക്ലാസ് വിദ്യാർഥിയാണ് നദാൻ. ദേവനാരായണന് ഭരതനാട്യം, നാടോടി നൃത്തം, ദഫ്മുട്ട് എന്നിവയിൽ രണ്ടാം സ്ഥാനവും ലഭിച്ചിരുന്നു. കോൽക്കളിയിലും ദഫ്മുട്ടിലും നിർമല തൊടുപുഴ: കോൽക്കളിയിലും ദഫ്മുട്ടിലും വാഴക്കുളം നിർമല പബ്ലിക് സ്കൂളിന്‍റെ ആധിപത്യം. എട്ടു മുതൽ പത്തു വരെ ക്ലാസുകളിലെ കുട്ടികളാണ് കോൽക്കളിയിൽ അരങ്ങു തകർത്തത്. കഴിഞ്ഞ രണ്ടു വർഷം ഒഴിച്ച് പത്തു വർഷം ഒപ്പന മത്സരത്തിൽ സ്കൂൾ ഒന്നാം സ്ഥാനം നേടിയിരുന്നു. ഇത്തവണ ഒരു മീ മുമേൽ മുഹമ്മത്ത് എന്നു തുടങ്ങുന്ന ഗാനമാണ് കോൽക്കളിയ്ക്ക് ഉപയോഗിച്ചത്. പാനായിക്കുളം മാഹിൻ മേത്താനമാണ് കോൽക്കളി പരിശീലിപ്പിച്ചത്. അഫ്സൽ തമ്മനമാണ് ദഫ്മുട്ടിൽ ഗുരു. ഇരട്ടി മധുരവുമായി നിയ തൊടുപുഴ: കാറ്റഗറി - 3 വിഭാഗം ഓട്ടൻതുള്ളലിൽ ഒന്നാം സ്ഥാനം നേടിയ നിയ അനി മാത്യുവിന് ഇരട്ടി മധുരം. ഇതിനു പുറമെ മോഹിനിയാട്ടത്തിനും നിയ ഒന്നാം സ്ഥാനം നേടിയിരുന്നു. 25 മണിക്കൂർ തുടർച്ചയായി ഓട്ടൻതുള്ളൽ അവതരിപ്പിച്ച് ഗിന്നസ് വേൾഡ് റിക്കാർഡ് നേടിയ കുറിച്ചിത്താനം ജയകുമാറാണ് ഗുരു. രമ്യ ഹരീഷാണ് മോഹിനിയാട്ടം പരിശീലിപ്പിക്കുന്നത്. കിരാതം കഥയാണ് ഓട്ടൻതുള്ളലിൽ നിയ അവതരിപ്പിച്ചത്. ചെറുപ്പം മുതൽ നൃത്തം അഭ്യസിക്കുന്ന നിയ വാഴക്കുളം ബെത്ലഹേം ഇന്‍റർനാഷണൽ സ്കൂളിൽ പത്താം ക്ലാസ് വിദ്യാർഥിനിയാണ്. തൊടുപുഴ സ്വദേശി അനിമോൻ മാത്യു - രമ്യ ദന്പതികളുടെ മകളാണ്.

വയോധികയെ കിണറ്റിൽ മരിച്ചനിലയിൽ കണ്ടെത്തി

നെടുമ്പാശേരി: വീട്ടുമുറ്റത്തെ കിണറ്റിൽ വയോധികയെ മരിച്ചനിലയിൽ കണ്ടെത്തി. അത്താണി പള്ളിക്കൽ വീട്ടിൽ മാത്തുക്കുട്ടിയുടെ ഭാര്യ സാറാമ്മ(85)യാണ് മരിച്ചത്. വെള്ളിയാഴ്ച വൈകുന്നേരമാണ് സാറാമ്മയെ കാണാതായത്. തുടർന്ന് നടത്തിയ തെരച്ചിലിൽ വീടിനു പിന്നിലെ കിണറ്റിൽ മൃതദേഹം കണ്ടെത്തുകയായിരുന്നു. അങ്കമാലിയിൽ നിന്ന് അഗ്നിരക്ഷാ സേനയും നെടുമ്പാശേരി പോലീസുമെത്തിയാണ് കിണറ്റിൽ നിന്ന് മൃതദേഹം പുറത്തെടുത്തത്. പോലീസ് മേൽനടപടികൾ പൂർത്തിയാക്കിയ ശേഷം മൃതദേഹം ആലുവ ജില്ലാ ആശുപത്രി മോർച്ചറിയിലേക്ക് മാറ്റി. സംസ്കാരം പിന്നീട് നെടുമ്പാശേരി സെന്‍റ് ജോർജ് യാക്കോബായ പള്ളിയിൽ. മക്കൾ: ലോപ്പസ് പള്ളിക്കൽ, അന്നമ്മ, ഫാ. ജോസഫ് പള്ളിക്കൽ, എലിസബത്ത്.

മഹാകവി ചങ്ങമ്പുഴ, പ്രഫ. എം.കെ. സാനു അനുസ്മരണം 21 ന്

കൊച്ചി: മഹാകവി ചങ്ങമ്പുഴ, പ്രഫ. എം.കെ. സാനു അനുസ്മരണം, നാടക സെമിനാര്‍, പുസ്തക പ്രകാശനം എന്നിവ 21 ന് വൈകിട്ട് 6.30 ന് ഇടപ്പള്ളി ചങ്ങമ്പുഴ പാര്‍ക്കില്‍ നടക്കും. പ്രഫ. എം. തോമസ് മാത്യു അനുസ്മരണ പ്രഭാഷണം നടത്തും. തുടര്‍ന്നു നടക്കുന്ന നാടക സെമിനാറില്‍ ടി.എം. എബ്രഹാം, ഷെര്‍ളി സോമസുന്ദരന്‍ തുടങ്ങിയവര്‍ പങ്കെടുക്കും. ചടങ്ങില്‍ കെ.എ. മുരളീധരന്‍ എഴുതിയ ചങ്ങമ്പുഴയും സാനുവും നാടകം പുതിയ പതിപ്പ് പ്രകാശനം ചെയ്യും. ചങ്ങമ്പുഴയും സാനുവും നാടകത്തിന്‍റെ വായനാവതരണവും ഉണ്ടായിരിക്കും. ചങ്ങമ്പുഴ സാംസ്‌കാരിക കേന്ദ്രവും വിശ്വം ആര്‍ട്‌സും ചേര്‍ന്നാണ് പരിപാടി സംഘടിപ്പിച്ചിട്ടുള്ളത്.

അങ്കമാലി ബ്ലോക്ക് തല ഭിന്നശേഷി കലോത്സവം വർണദളങ്ങൾ-25 അരങ്ങേറി

അങ്കമാലി : സർഗവാസനകൾക്കും ക്രിയാത്മകതയ്ക്കും പരിമിതികളില്ലെന്ന് തെളിയിച്ച് അങ്കമാലി ബ്ലോക്ക് പഞ്ചായത്തിൽ ഭിന്നശേഷി കലോത്സവം വർണ ദളങ്ങൾ -25 സംഘടി പ്പിച്ചു. 2025- 26 വാർഷിക പദ്ധതിയിൽ ഉൾപ്പെട്ട പരിപാടിയാണിത്. ബ്ലോക്ക് പഞ്ചായത്തിന്‍റെ പരിധിയിലുള്ള എട്ട് ഗ്രാമ പഞ്ചായത്തുകളിൽ നിന്നുള്ള ഭിന്നശേഷിക്കാരായ നൂറിൽപ്പരം കുട്ടികൾ പങ്കെടുത്തു. ജില്ലാ പഞ്ചായത്ത് പ്രസിഡന്‍റ് മനോജ് മുത്തേടൻ ഉദ്ഘാടനം നിർവഹിച്ചു. ബ്ലോക്ക്‌ പഞ്ചായത്ത്‌ പ്രസിഡന്‍റ് കൊച്ചുത്രേസ്യ തങ്കച്ചൻ അധ്യക്ഷത വഹിച്ചു. സമാപന സമ്മേളനം റോജി എം. ജോൺ ഉദ്ഘാടനം ചെയ്യുകയും സമ്മാനവിതരണം നിർവഹിക്കുകയും ചെയ്തു. ബ്ലോക്ക് വൈസ് പ്രസിഡന്‍റ് ബിജു കാവുങ്ങ, സ്റ്റാൻഡിംഗ് കമ്മറ്റി ചെയർമാൻമാരായ മനോജ് മുല്ലശേരി, ലാലി ആന്‍റു, റാണി പോളി, പഞ്ചായത്ത് പ്രസിഡന്‍റുമാരായ ലതിക ശശികുമാർ, കെ.വി. ബിബീഷ് , പി.യു. ജോമോൻ, മെമ്പർമാരായ മേരി ദേവസിക്കുട്ടി, ഷിജി ജോയി, സീലിയ വിന്നി , സിജോ ചൊവ്വരാൻ, കെ.വി. അഭിജിത്ത്, ശിശുവികസന പദ്ധതി ഓഫീസർമാരായ ഡോ. ജയന്തി പി. നായർ, സൗമ്യ വർഗീസ് എന്നിവർ പ്രസംഗിച്ചു.

ഉപജില്ലാ കായികമേള; ചുള്ളി സെന്‍റ് ജോർജ് സ്കൂളിലെ പ്രതിഭകൾക്ക് ആദരം

അങ്കമാലി: അങ്കമാലി വിദ്യാഭ്യാസ ഉപജില്ലാ കായികമേളയിൽ റണ്ണറപ്പായ ചുള്ളി സെന്‍റ്് ജോർജ് ഇംഗ്ലീഷ് മീഡിയം ഹൈസ്കൂളിലെ പ്രതിഭകൾക്ക് ആദരം. സ്കൂൾ പിടിഎയും സ്കൂൾ മാനേജ്മെന്‍റ് കമ്മിറ്റിയും ചേർന്ന് സംഘടിപ്പിച്ച അനുമോദന മീറ്റിംഗിൽ അങ്കമാലി എംഎൽഎ റോജി എം ജോൺ പുരസ്കാരങ്ങൾ വിതരണം ചെയ്തു. സ്കൂൾ മാനേജർ ഫാ.ഷനു മൂഞ്ഞേലി അധ്യക്ഷനായിരുന്നു. അങ്കമാലി ബ്ലോക്ക് പഞ്ചായത്ത് വൈസ് പ്രസിഡന്‍റ് ബിജു കാവുങ്ങ, കായിക അധ്യാപകൻ ജിതിൻ പി. നായരെ പൊന്നാടയണിയിച്ച് ആദരിച്ചു. അയ്യമ്പുഴ ഗ്രാമപഞ്ചായത്ത് വൈസ് പ്രസിഡന്‍റ് റിജി ഫ്രാൻസിസ് എൽപി ഓവറോൾ പുരസ്കാരവും, വിദ്യാഭ്യാസ ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ടിജോ ജോസഫ് എൽപി മിനി ബോയ്സ് ഓവറോൾ പുരസ്കാരവും. വ്യക്തിഗത ചാമ്പ്യന്മാരായ കെവിൻ ഷൈജു, അഭിനവ് ധനീഷ്, അൽന ബൈജു എന്നിവർക്കുള്ള പുരസ്കാരം വാർഡ് മെമ്പർ വർഗീസ് മാണിക്യത്താൻ, യുപി കിഡ്ഡീസ് ഓവറോൾ പുരസ്കാരം വാർഡ് മെമ്പർ മേരി ജോണി മൂലൻ എന്നിവർ സമർപ്പിച്ചു. ചടങ്ങിൽ പ്രിൻസിപ്പൽ പി.ജെ. തോമസ് , വൈസ് പ്രിൻസിപ്പൽ പയസ് തോമസ്, പിടിഎ പ്രസിഡന്‍റ് ടിജോ ജോസ് തുടങ്ങിയവർ സംസാരിച്ചു.

ആലുവ കോടതി സമുച്ചയ പദ്ധതി ടെൻഡർ നടപടികളിലേക്ക്

ആലുവ: മൂന്ന് വർഷം മുമ്പ് ഭരണാനുമതി ലഭിച്ച ആലുവ കോടതി സമുച്ചയ പദ്ധതിയുടെ ടെൻഡർ നടപടികളിലേക്ക് നീങ്ങുന്നു. പുതുക്കിയ എസ്റ്റിമേറ്റ് പ്രകാരം സാങ്കേതികാനുമതിയും ലഭിച്ചതോടെയാണ് ടെൻഡർ നടപടികൾ ആരംഭിക്കുന്നത്. എന്നാൽ തദ്ദേശസ്വയംഭരണ തെരഞ്ഞെടുപ്പ് പ്രഖ്യാപനം വന്നാൽ തറക്കല്ലിടൽ വൈകുമെന്നാണ് സൂചന. പുതുക്കിയ രൂപരേഖ പ്രകാരം ആറ് നിലകളിലായി 86,090.76 ചതുരശ്ര അടി കെട്ടിടമാണ് പഴയ കോടതിയിരുന്ന അതേ സ്ഥലത്ത് നിർമിക്കുന്നത്. രണ്ടു നിലകൾ ബേസ്‌മെന്‍റിൽ പാർക്കിംഗിനും മുകളിൽ നാല് നിലകളിലായി കോടതികളുമാണ്. പുതിയ കെട്ടിടത്തിൽ മുൻസിഫ് കോടതി, കുടുംബ കോടതി, ഫാസ്റ്റ് ട്രാക്ക് പോക്‌സോ സ്‌പെഷ്യൽ കോടതി, ജുഡീഷ്യൽ മജിസ്‌ട്രേറ്റ് ഒന്ന്, ജുഡീഷ്യൽ മജിസ്‌ട്രേറ്റ് രണ്ട് എന്നീ കോടതികൾക്ക് പുറമെ മറ്റൊരു കോടതിക്കുമുള്ള സ്ഥലമുണ്ടാകും.

ശബരിമല സ്വർണക്കൊള്ള; പിണറായി രാജിവയ്ക്കണമെന്ന് ദീപദാസ് മുൻഷി

അരൂർ: ശബരിമലയിലെ സ്വർണക്കൊള്ളയുടെ ധാർമിക ഉത്തരവാദിത്തം ഏറ്റെടുത്ത് മുഖ്യമന്ത്രി പിണറായി വിജയനും ദേവസ്വം ബോർഡ് പ്രസിഡന്‍റും രാജിവച്ച് പുറത്തുപോകണമെന്ന് എഐസിസി ജനറൽ സെക്രട്ടറി ദീപാ ദാസ് മുൻഷി. എഐസിസി പ്രവർത്തകസമിതി അംഗം കൊടുക്കുന്നിൽ സുരേഷ് എംപി നയിക്കുന്ന വിശ്വാസ സംരക്ഷണയാത്രയ്ക്ക് അരൂർ ചേർത്തല നിയോജകമണ്ഡലം കോൺഗ്രസ് കമ്മിറ്റികൾ തുറവൂരിൽ നൽകിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അവർ. സ്വർണക്കൊള്ളയുടെ ഉത്തരവാദിത്വത്തിൽ നിന്ന് തിരുവിതാംകൂർ ദേവസ്വം ബോർഡിനും സംസ്ഥാന സർക്കാരിനും ഒഴിഞ്ഞുമാറാൻ കഴിയില്ലെന്നും അവർ പറഞ്ഞു. അഡ്വ. ഷാനിമോൾ ഉസ്മാൻ അധ്യക്ഷത വഹിച്ചു. ടി.എൻ. പ്രതാപൻ, ഡിസിസി പ്രസിഡന്‍റ് ബി. ബാബു പ്രസാദ്, എം.ലിജു തുടങ്ങിയവർ പ്രസംഗിച്ചു.

പോളിടെക്‌നിക് തെരഞ്ഞെടുപ്പ് : മൂന്നിടത്ത് എസ്എഫ്‌ഐ, രണ്ടിടത്ത് കെഎസ്‌യു

കൊച്ചി: ജില്ലയിലെ പോളിടെക്‌നിക്ക് കോളജുകളിലേക്ക് നടന്ന യൂണിയന്‍ തെരഞ്ഞെടുപ്പില്‍ മൂന്നിടത്ത് എസ്എഫ്‌ഐയും രണ്ടിടത്ത് കെഎസ്‌യുവും ജയിച്ചതായി സംഘടനാ ഭാരവാഹികള്‍ അറിയിച്ചു. പെരുമ്പാവൂര്‍ കൂവപ്പടി പോളിടെക്‌നിക്, കളമശേരി ഗവ.വനിതാ പോളിടെക്‌നിക്, അറയ്ക്കപ്പടി ജയ്ഭാരത് എന്നിവിടങ്ങളിലാണ് എസ്എഫ്‌ഐ ജയം അവകാശപ്പെട്ടത്. അതേസമയം കളമശേരി ഗവ. പോളിടെക്‌നിക്കില്‍ 30 വര്‍ഷങ്ങള്‍ക്ക് ശേഷം എസ്എഫ്‌ഐയില്‍ നിന്ന് തിരിച്ചു പിടിച്ചതായി കെഎസ് യു ഭാരവാഹികള്‍ അവകാശപ്പെട്ടു. ചേലാട് ഗവ. പോളി എസ്എഫ്‌ഐയില്‍ നിന്ന് തിരിച്ചുപിടിച്ചതായും കെഎസ് യു ഭാരവാഹികള്‍ പറഞ്ഞു.

ഇന്ദിരാ ഗാന്ധി കോളജ് ഓഫ് നേഴ്‌സിംഗിൽ ബിരുദദാന ചടങ്ങ്

കൊച്ചി : ഇന്ദിരാ ഗാന്ധി കോളജ് ഓഫ് നേഴ്‌സിംഗിന്‍റെ ബിരുദദാനചടങ്ങും കോളജ് ദിനാഘോഷവും ഹൈബി ഈഡന്‍ എംപി ഉദ്ഘാടനം ചെയ്തു. ഇന്ദിരാ ഗാന്ധി കോ ഓപ്പറേറ്റീവ് ഹോസ്പിറ്റല്‍ പ്രസിഡന്‍റ് എം.ഒ. ജോണ്‍, അധ്യക്ഷത വഹിച്ചു. എംഎല്‍എമാരായ ടി.ജെ.വിനോദ്, ഉമ തോമസ് എന്നിവര്‍ ബിരുദദാന സന്ദേശം നല്‍കി. പ്രിന്‍സിപ്പല്‍ പ്രഫ. ഡോ. ജിന്‍സി ജോണ്‍ വാര്‍ഷിക റിപ്പോര്‍ട്ട് അവതരിപ്പിച്ചു. സെക്രട്ടറി അജയ് തറയില്‍, ഡയറക്ടര്‍മാരായ അഗസ്റ്റസ് സിറിള്‍, പി.വി. അഷറഫ്, എന്‍.എ. എബ്രഹാം, ഹസീന മുഹമ്മദ്, ഇന്ദിരാ ഭായ് പ്രസാദ്, പി.ഡി. അശോകന്‍, കെ.പി. വിജയകുമാര്‍, നേഴ്‌സിംഗ് സൂപ്രണ്ട് ലീലാമ്മ ഫിലിപ്പ്, വൈസ് പ്രിന്‍സിപ്പൽ പ്രഫ. എ. ക്രിസ്റ്റല്‍ എന്നിവര്‍ പ്രസംഗിച്ചു. എച്ച്ഒഡി പ്രഫ. കൊച്ചു റാണി ലാസര്‍ ബിരുദധാരികള്‍ക്ക് പ്രതിജ്ഞാ വാചകം ചൊല്ലിക്കൊടുത്തു. തുടര്‍ന്ന് നടന്ന കോളജ് ദിനാഘോഷത്തില്‍ സിനിമാതാം മാത്യൂ തോമസ് പങ്കെടുത്തു.

ആലുവ ഉപജില്ലാ സ്കൂൾ കലോത്സവം: ലോഗോ പ്രകാശനം ചെയ്തു

ആലുവ: നവംബർ ഒന്ന് മുതൽ അഞ്ച് വരെ നടക്കുന്ന ആലുവ ഉപജില്ലാ സ്കൂൾ കലോത്സവത്തിന്‍റെ ലോഗോ പ്രകാശനം ചെയ്തു. സ്വാഗത സംഘം രൂപീകണ യോഗ ഉദ്ഘാടനവും ലോഗോ പ്രകാശനവും ആലുവ നഗരസഭാ ചെയർമാൻ എം.ഒ. ജോൺ നിർവഹിച്ചു. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഫാസിൽ ഹുസൈൻ അധ്യക്ഷത വഹിച്ചു. ഉപജില്ലാ വിദ്യാഭ്യാസ ഓഫീസർ സനൂജ ഷംസു, പ്രൈമറി എച്ച്എം ഫോറം സെക്രട്ടറി സി.ഐ. നവാസ് തുടങ്ങിയവർ പ്രസംഗിച്ചു. പ്രധാന വേദിയായ ആലുവ മഹാത്മാ ഗാന്ധി മുനിസിപ്പൽ ടൗൺ ഹാൾ കൂടാതെ എട്ട് ഇടങ്ങളും മേളയ്ക്ക് വേദിയാകും. മന്ത്രി പി. രാജീവ്, പ്രതിപക്ഷ നേതാവ് വി.ഡി. സതീശൻ എന്നിവരെ മുഖ്യ രക്ഷാധികാരികളാക്കിയും ആലുവ നഗരസഭാധ്യക്ഷൻ എം.ഒ. ജോണിനെ ചെയർമാനാക്കിയും, ആലുവ ജിജിഎച്ച് എസ് പ്രിൻസിപ്പാൾ കെ.എം. ബിന്ദുവിനെ ജനറൽ കൺവീനർ ആക്കിയും സ്വാഗതസംഘം രൂപീകരിച്ചു.

രണ്ടാംഘട്ട ടെട്രാപോഡ് കടല്‍ഭിത്തി നിർമാണം: നടപടി ഉണ്ടാകുമോ? തകര്‍ന്ന വീടുകളിലേക്ക് മടങ്ങി ദുരിതബാധിതര്‍

കൊച്ചി: കടലാക്രമണത്തെത്തുടര്‍ന്ന് തകര്‍ന്ന വീടുകള്‍ക്ക് ഇക്കുറിയും സംരക്ഷണം ലഭിക്കില്ലെന്ന് ഏറെക്കുറേ ഉറപ്പായതോടെ വാസയോഗ്യമല്ലാത്ത വീടുകളിലേക്ക് മടങ്ങിയെത്തി പുത്തന്‍തോട് ചെറിയകടവ് നിവാസികള്‍. ചെല്ലാനം തീരത്ത് ടെട്രാപോഡ് കടല്‍ഭിത്തി നിര്‍മിക്കുന്നതിനുള്ള 306 കോടി രൂപയുടെ രണ്ടാംഘട്ട പദ്ധതിക്ക് സംസ്ഥാന സര്‍ക്കാര്‍ അംഗീകാരം നല്‍കി 108 ദിവസം പിന്നിട്ടിട്ടും തുടര്‍നപടികള്‍ എങ്ങുമെത്താതായതോടെയാണിത്. ചെല്ലാനം മുതല്‍ പുത്തന്‍തോട് വരെയുള്ള 7.3 കിലോമീറ്റര്‍ ദൈര്‍ഘ്യമുള്ള പദ്ധതിയുടെ ആദ്യഘട്ടം 2023ല്‍ 347 കോടി ചെലവില്‍ പൂര്‍ത്തിയായിരുന്നു. പുത്തന്‍തോട് മുതല്‍ ചെറിയകടവ് വരെയുള്ള ശേഷിക്കുന്ന 3.6 കിലോമീറ്റര്‍ ഭാഗവും പ്രാരംഭ പദ്ധതിയില്‍ ഉള്‍പ്പെടുത്തിയിരുന്നെങ്കിലും പദ്ധതി നിര്‍വാഹകരായ ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിക്ക് പുതുക്കിയ എസ്റ്റിമേറ്റ് കാരണം പുത്തന്‍തോട് വരെ മാത്രമേ പൂര്‍ത്തിയാക്കാന്‍ കഴിഞ്ഞിരുന്നുള്ളൂ. നിരവധി നിവേദനങ്ങളുടെയും പ്രതിഷേധങ്ങള്‍ക്കുമൊടുവില്‍ കഴിഞ്ഞ ജൂലൈ രണ്ടിന് 306 കോടിരൂപ ചെലവഴിച്ച് കടല്‍ഭിത്തി നിര്‍മിക്കാന്‍ സര്‍ക്കാര്‍ അനുമതി നല്‍കി. എന്നാല്‍ 108 ദിവസം പിന്നിട്ടിട്ടും ഇതില്‍ കാര്യമായ തുടര്‍നടപടികള്‍ സര്‍ക്കാര്‍ സ്വീകരിച്ചിട്ടില്ല. വാസയോഗ്യമല്ല എങ്കിലും... കടലാക്രമണത്തില്‍ തകര്‍ന്ന പ്രദേശത്തെ ഭൂരിഭാഗം വീടുകളും ഇന്നും വാസയോഗ്യമല്ല. എങ്കിലും ഇനിയും വാടക കൊടുക്കാന്‍ സാഹചര്യം ഇല്ലാത്ത പലരുമാണ് ഇവിടേക്ക് മടങ്ങി എത്തുന്നത്. സാമ്പത്തിക ശേഷി ഉള്ളവര്‍ മാത്രമാണ് ഇപ്പോഴും വാടക വീടുകളില്‍ തുടരുന്നത്. ഏതാനും ചിലര്‍ ബന്ധുവീടുകളിലും താമസം തുടരുകയാണ്. ശുചിമുറി മണ്ണ് അടിഞ്ഞ് ഉപയോഗശൂന്യമായത് മുതല്‍ ഒരുഭാഗം തകര്‍ന്ന് വീണ വീടുകള്‍ വരെയുണ്ട് ഇവിടെ. ഏതാനും ചില വീടുകള്‍ അറ്റകുറ്റപ്പണി നടത്തി വാസയോഗ്യമാക്കാനുള്ള തയാറെടുപ്പിലാണ്. കടല്‍ താരതമ്യേന ശാന്തമായ നവംബര്‍ മുതല്‍ മേയ് വരെയുള്ള ആറു മാസ കാലയളവില്‍ നിര്‍മാണ പ്രവൃത്തികള്‍ നടപ്പിലാക്കിയില്ലെങ്കില്‍ വീണ്ടും കടല്‍കയറ്റ ദുരിതം ആവര്‍ത്തിക്കുമെന്ന് ദുരിതബാധിതര്‍ പറയുന്നു. ധര്‍ണ 28ന് പദ്ധതി അനിശ്ചിതമായി നീളുന്ന സാഹചര്യത്തില്‍ ശാശ്വത പരിഹാരം ആവശ്യപ്പെട്ട് ചെല്ലാനംകൊച്ചി ജനകീയ വേദിയുടെ നേതൃത്വത്തില്‍ പ്രതിഷേധ പരിപാടികള്‍ ശക്തമാക്കുന്നു. ഇതിന്‍റെ ഭാഗമായി 28 ന് തോപ്പുംപടിയില്‍ ഒരു ദിവസം നീണ്ടുനില്‍ക്കുന്ന ധര്‍ണ സംഘടിപ്പിക്കുന്നു.

യുവാവിനെ കുത്തിക്കൊലപ്പെടുത്താൻ ശ്രമിച്ചയാൾ പിടിയിൽ

മൂവാറ്റുപുഴ : യുവാവിനെ കുത്തിക്കൊലപ്പെടുത്താന്‍ ശ്രമിച്ചയാൾ പിടിയിൽ. മുളവൂര്‍ പേഴയ്ക്കാപ്പിള്ളി പ്ലാവിന്‍ചുവട് ചക്കുങ്ങല്‍ ഷിനാജ് സലിമി(36)നെയാണ് മൂവാറ്റുപുഴ പോലീസ് സബ് ഇന്‍സ്പെക്ടര്‍ എസ്.എന്‍. സുമിതയുടെ നേതൃത്വത്തില്‍ അറസ്റ്റ് ചെയ്തത്. പേഴയ്ക്കപ്പിള്ളിയില്‍ വാക്കുതര്‍ക്കത്തിനിടെ കത്തികൊണ്ട് യുവാവിനെ കുത്തുകയായിരുന്നു. കുത്തേറ്റയാളും പ്രതിയും മൂവാറ്റുപുഴ പോലീസ് സ്റ്റേഷനിലെ സാമൂഹ്യവിരുദ്ധരുടെ ലിസ്റ്റിലുള്ളവരാണ്.

അഗതികൾക്ക് അന്നമൊരുക്കി സെന്‍റ് മേരീസിലെ വിദ്യാർഥിനികൾ

കൊച്ചി: ലോക ഭക്ഷ്യദിനാചരണത്തിന്‍റെ ഭാഗമായി എറണാകുളം സെന്‍റ് മേരീസ് സിജിഎച്ച്എസിൽ അഗതികൾക്കുവേണ്ടി അരിയും ഭക്ഷ്യധാന്യങ്ങളും ശേഖരിച്ചു നൽകി. പാലാരിവട്ടത്തുള്ള ലവ് ആൻഡ് കെയർ ജീവകാരുണ്യ പ്രസ്ഥാനവുമായി സഹകരിച്ചാണു വിദ്യാർഥിനികൾ പദ്ധതി നടപ്പാക്കിയത്. സ്കൂൾ അങ്കണത്തിൽ നടന്ന ചടങ്ങിൽ ലവ് ആൻഡ് കെയർ കോ ഓർഡിനേറ്റർമാരായ മിനി ഡേവിസ്, പ്രഭ കുഞ്ഞുമോൻ, ജോൺ എന്നിവർക്ക് ഹെഡ്മിസ്ട്രസ് സിസ്റ്റർ പി.കെ. ലൗലി ഭക്ഷ്യധാന്യങ്ങൾ കൈമാറി. വ്യാഴാഴ്ചകളിൽ വിവിധ ക്ലാസുകളിലെ വിദ്യാർഥികളും അധ്യാപകരും തെരുവിൽ അലയുന്നവർക്കായി പൊതിച്ചോർ നൽകുന്നുണ്ടെന്ന് ഹെഡ്മിസ്ട്രസ് അറിയിച്ചു.

ബിജെപി ഭരണത്തിലൂടെ സമഗ്ര വികസനം: രാജീവ് ചന്ദ്രശേഖർ

തൃപ്പൂണിത്തുറ: ബിജെപി മുനിസിപ്പാലിറ്റിയിൽ ഭരണത്തിലെത്തുന്നതോടെ തൃപ്പൂണിത്തുറയുടെ സമഗ്ര വികസനം സാധ്യമാകുമെന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. തൃപ്പൂണിത്തുറയിൽ നടന്ന ബിജെപി മുനിസിപ്പൽ നേതൃയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സംസ്ഥാനത്ത് ബിജെപി ഭരിക്കുന്ന പഞ്ചായത്തുകളും മുനിസിപ്പാലിറ്റികളും അഴിമതി രഹിതമായ ഭരണവും വികസന പദ്ധതികളുമായി വേറിട്ടു നിൽക്കുകയാണെന്നും സുതാര്യവും ഉത്തരവാദിത്തമുള്ളതുമായ ഭരണനിർവഹണം മറ്റുള്ളവർക്ക് മാതൃകയായി നിലകൊള്ളുന്നുണ്ടെന്നും അദ്ദേഹം പറഞ്ഞു. മണ്ഡലം പ്രസിഡന്‍റ് അജിത്ത് അധ്യക്ഷത വഹിച്ചു. ജില്ലാ അധ്യക്ഷൻ കെ.എസ്. ഷൈജു, സംസ്ഥാന ഉപാധ്യക്ഷൻ ഉണ്ണികൃഷ്ണൻ മാസ്റ്റർ, മണ്ഡലം ഇൻചാർജ് സമീർ ശ്രീകുമാർ, ജനറൽ സെക്രട്ടറിമാരായ നവീൻ കേശവൻ, കെ.ബി. ചന്ദ്രൻ തുടങ്ങിയവർ പ്രസംഗിച്ചു. മുനിസിപ്പാലിറ്റിയിലെ പൗര പ്രമുഖരുമായി അദ്ദേഹം സംവദിച്ചു.

മനുഷ്യാവകാശ കമ്മീഷൻ ഇടപെട്ടു : പെരുമ്പാവൂര്‍ താലൂക്കാശുപത്രിയില്‍ രോഗികളുടെ ദുരിതത്തിന് പരിഹാരം

കൊച്ചി : പെരുമ്പാവൂര്‍ താലൂക്കാശുപത്രിയില്‍ ലിഫ്റ്റ് ഇല്ലാത്തതിനാല്‍ രോഗികളെ സ്‌ട്രെക്ചറില്‍ ചുമന്നുകൊണ്ടുപോയതു പോലുള്ള സംഭവങ്ങള്‍ ആവര്‍ത്തിക്കാതിരിക്കാന്‍ നടപടികള്‍ സ്വീകരിച്ചിട്ടുണ്ടെന്ന് എറണാകുളം ഡിഎംഒ മനുഷ്യാവകാശ കമ്മീഷനെ അറിയിച്ചു. മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസിന്‍റെ ഇടപെടലിന്‍റെ അടിസ്ഥാനത്തിലാണ് നടപടി. അംഗപരിമിതരെയും നടക്കാന്‍ ബുദ്ധിമുട്ടുള്ളവരെയും ആശുപത്രിയുടെ താഴത്തെ നിലയിലാണ് പ്രവേശിപ്പിക്കുന്നതെന്ന് റിപ്പോര്‍ട്ടില്‍ പറയുന്നു. ഓഗസ്റ്റ് 26 ന് പത്തടിപ്പാലം റസ്റ്റ് ഹൗസില്‍ നടത്തിയ സിറ്റിംഗില്‍ ഡിഎംഒയുടെ പ്രതിനിധിയും താലൂക്കാശുപത്രി സൂപ്രണ്ടും ഹാജരായിരുന്നു. താലൂക്കാശുപത്രിയിലെ ഒപിയും കാഷ്വാലിറ്റിയും ഒരു ബ്ലോക്കിലായിരുന്നുവെന്നും വാര്‍ഡ് നവീകരണ സമയത്ത് ഒപിയും കാഷ്വാലിറ്റിയും താത്കാലികമായി താഴത്തെ നിലയിലേക്ക് മാറ്റിയെന്നും റിപ്പോര്‍ട്ടില്‍ പറയുന്നു. അഞ്ചാം വാര്‍ഡിലെ കിടപ്പുരോഗികളെ ഒന്നാം നിലയിലുള്ള ആറാം വാര്‍ഡിലേക്ക് മാറ്റി. ആശുപത്രിയില്‍ ലിഫ്റ്റ് ഇല്ലാത്തതിനാല്‍ പടിക്കെട്ട് വഴിയാണ് ഇവരെ കൊണ്ടുപോയത്. ഇതാണ് പരാതിക്ക് ആസ്പദമായത്. ബ്ലോക്കിന്‍റെ നവീകരണം പൂര്‍ത്തിയാക്കി ഒപിയും കാഷ്വാലിറ്റിയും ആ ബ്ലോക്കിലേക്ക് മാറ്റിയതായി ആശുപത്രി സൂപ്രണ്ട് അറിയിച്ചു. ആശുപത്രിക്കെട്ടിടത്തിന് കാലപ്പഴക്കമുള്ളതിനാൽ ലിഫ്റ്റ് സ്ഥാപിക്കാന്‍ ബുദ്ധിമുട്ടുണ്ട്. കിടപ്പുരോഗികളുടെ എണ്ണം വര്‍ധിച്ചാല്‍ കുറെ രോഗികളെയെങ്കിലും മുകളിലത്തെ നിലയിലുള്ള വാര്‍ഡില്‍ പ്രവേശിപ്പിക്കേണ്ടി വന്നേക്കാമെന്നും സൂപ്രണ്ട് അറിയിച്ചു. ബുദ്ധിമുട്ടുകൾ പരിഹരിച്ച സാഹചര്യത്തില്‍ കമ്മീഷൻ കേസ് തീര്‍പ്പാക്കി.

ആലുവ എട്ടേക്കർ തീർഥാടനകേന്ദ്രത്തിൽ യൂദാ തദേവൂസിന്‍റെ തിരുനാൾ 22 മുതൽ

ആലുവ: ആലുവ എട്ടേക്കർ തീർഥാടനകേന്ദ്രത്തിൽ വിശുദ്ധ യൂദാ തദേവൂസിന്‍റെ തിരുനാൾ 22 ന് ആരംഭിക്കും. അന്ന് വൈകുന്നേരം 5.30 ന് കോട്ടപ്പുറം ബിഷപ് ഡോ. അംബ്രോസ് പുത്തൻവീട്ടിൽ കൊടിയേറ്റും. തുടർന്ന് ആഘോഷമായ ദിവ്യബലി. 30 നാണ് പ്രസിദ്ധമായ ഊട്ടുതിരുനാൾ. 22 മുതൽ ദിവസവും വൈകിട്ട് 5.30 ന് ദിവ്യബലി ഉണ്ടാകും. തിരുനാൾ ദിനമായ 26 ന് രാവിലെ 9.30 ന് കോഴിക്കോട് ആർച്ച്ബിഷപ് ഡോ. വർഗീസ് ചക്കാലക്കലിന്‍റെ മുഖ്യകാർമികത്വത്തിൽ ആഘോഷമായ ദിവ്യബലി. തുടർന്ന് ചൂണ്ടി ഭാഗത്തേക്ക് പ്രദക്ഷിണം. വൈകിട്ട് 5.30 ന് തിരുനാൾ ദിവ്യബലി. രാത്രി ഏഴിന് മൂന്നാമത് ഫ്രീ സ്റ്റൈൽ ഡാൻസ് ഫൈനൽ എഡിഷൻ മത്സരം. വരാപ്പുഴ അതിരൂപതയിലെയും എറണാകുളം-അങ്കമാലി അതിരൂപതയിലെയും ഇടവകകൾ പങ്കെടുക്കും. ഊട്ടുതിരുന്നാൾ ദിനമായ 30ന് രാവിലെ ആറു മുതൽ രാത്രി ഏഴു വരെ തിരുക്കർമങ്ങൾ ഉണ്ടാകും. രാവിലെ 9.30 ന് തിരുനാൾ ദിവ്യബലിക്ക് കണ്ണൂർ ബിഷപ് ഡോ. അലക്‌സ് വടക്കുംതല മുഖ്യകാർമികത്വം വഹിക്കും. തുടർന്ന് നേർച്ച സദ്യ ആശീർവാദം. രാവിലെ 10.30 മുതൽ രാത്രി 10 വരെ ഊട്ടുനേർച്ച ഉണ്ടായിരിക്കും. ഒരു ലക്ഷത്തോളം പേരെ പ്രതീക്ഷിക്കുന്നതായി ഊട്ടുതിരുനാൾ രക്ഷാധികാരികളായ അൻവർ സാദത്ത് എംഎൽഎ, പഞ്ചായത്ത് പ്രസിഡന്‍റ് സി. കെ. ലിജി , വികാരി ഫാ. റോക്കി കൊല്ലംപറമ്പിൽ എന്നിവർ പത്രസമ്മേളനത്തിൽ പറഞ്ഞു. സഹ വികാരി ഫാ. ജിലു ജോസ് മുല്ലൂർ, ജനറൽ കൺവീനർ ജോണി ക്രിസ്റ്റഫർ എന്നിവരും പത്രസമ്മേളനത്തിൽ പങ്കെടുത്തു.

റബർ ഉത്പാദക സംഘം പൊതുയോഗം

കല്ലൂർക്കാട്: റബർ ഉത്പാദക സംഘത്തിന്‍റെ വാർഷിക പൊതുയോഗം കല്ലൂർക്കാട് വ്യാപാരഭവൻ ഓഡിറ്റോറിയത്തിൽ നടത്തി. ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ ഉദ്ഘാടനം ചെയ്തു. സംഘം പ്രസിഡന്‍റ് ജോയി തോമസ് അധ്യക്ഷത വഹിച്ചു. ജോയി ജോർജ്, ജോമോൾ ജേക്കബ് എന്നിവരെ പഞ്ചായത്ത് പ്രസിഡന്‍റ് സുജിത്ത് ബേബി ആദരിച്ചു. ബ്ലോക്ക് പഞ്ചായത്തംഗം പ്രഫ.ഡോ. ജോസ് അഗസ്റ്റിൻ അവാർഡുദാനം നിർവഹിച്ചു. ഷൈനി ജെയിംസ്, ദേവി നന്ദന, ജോസ് പാലക്കുഴി, ജോസ് മാത്യു പുത്തൻപുര എന്നിവർ പ്രസംഗിച്ചു.

കൂത്താട്ടുകുളം ടൗണ്‍ ഫൊറോന പള്ളിയില്‍ നൊവേന തിരുനാൾ

കൂത്താട്ടുകുളം: കൂത്താട്ടുകുളം ടൗണ്‍ ഫൊറോന പള്ളിയില്‍ 19 മുതല്‍ 28 വരെ വിശുദ്ധ യൂദാശ്ലീഹായുടെ നൊവേന തിരുനാൾ ആഘോഷിക്കുന്നതാണെന്ന് വികാരി ഫാ. ജെയിംസ് കുടിലില്‍, സഹവികാരി ഫാ. ജോസഫ് മരോട്ടിക്കല്‍ എന്നിവര്‍ അറിയിച്ചു. 19 മുതല്‍ 28 വരെ ദിവസവും വൈകുന്നേരം 6.15ന് 1001 എണ്ണത്തിരി തെളിക്കല്‍ ശുശ്രൂഷ ഉണ്ടായിരിക്കും. 19ന് വൈകുന്നേരം അഞ്ചി പാലാ രൂപത വികാരി ജനറാൾ മോൺ. ജോസഫ് തടത്തില്‍ തിരുനാളിന് കൊടിയേറ്റും. തുടർന്നുള്ള വിവിധ ദിവസങ്ങളിലായി തിരുനാൾ ആഘോഷങ്ങളും ചടങ്ങുകളും നടക്കും. പ്രധാന തിരുനാൾ ദിവസമായ 28ന് രാവിലെ 5.30, 7 എന്നീ സമയങ്ങളിൽ കുർബാനയും നൊവേനയും ഉണ്ടായിരിക്കുന്നതാണ്. 10 നു ആഘോഷമായ തിരുനാൾ പാട്ടുകുർബാന തുടർന്ന് നൊവേന. 11.45, വൈകുന്നേരം 3, 5 എന്നീ സമയങ്ങളിൽ കുർബാന, നൊവേന. തുടർന്ന് 1001 എണ്ണ തിരിതെളിക്കൽ ശുശ്രൂഷയോടെ തിരുനാൾ സമാപിക്കും. കൈകാരന്മാരായ ബാബു സ്റ്റീഫൻ മാനംമൂട്ടിൽ, സണ്ണി ജേക്കബ് കടവുങ്കൽ, ജോസ് വർഗീസ് വെള്ളരിങ്ങൽ, എബിൻ എബ്രഹാം മരുതുവെട്ടിയാനിക്കൽ എന്നിവർ പരിപാടികൾക്ക് നേതൃത്വം നൽകും.

ഉതുമ്പേലിതണ്ട് കുടിവെള്ള പദ്ധതി ആരംഭിച്ചു

വാഴക്കുളം: ആവോലി പഞ്ചായത്ത് രണ്ടാം വാർഡിലെ ഉതുമ്പേലിതണ്ട് കുടിവെള്ള പദ്ധതി ഡീൻ കുര്യാക്കോസ് എംപി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ഷെൽമി ജോൺസ് അധ്യക്ഷത വഹിച്ചു. ജില്ല പഞ്ചായത്തംഗം ഉല്ലാസ് തോമസ് സ്വിച്ച് ഓൺ നിർവഹിച്ചു. പഞ്ചായത്ത് വൈസ് പ്രസിഡന്‍റ് ബിജു മുള്ളംകുഴിയിൽ, പഞ്ചായത്തംഗങ്ങളായ അഷ്‌റഫ്‌ മൊയ്‌തീൻ കക്കാട്ട്, ജോർജ് തെക്കുംപുറം, ബിന്ദു ജോർജ്, വി.എസ്. ഷെഫാൻ, സൗമ്യ ഫ്രാൻസിസ്, ആൻസമ്മ വിൻസെന്‍റ് തുടങ്ങിയവർ പങ്കെടുത്തു. സ്ഥലം വിട്ടുനൽകിയവരെ ചടങ്ങിൽ ആദരിച്ചു. ആവോലി പഞ്ചായത്തിന്‍റെ 20 ലക്ഷവും ജില്ലാ പഞ്ചായത്തിന്‍റെ 15 ലക്ഷവും ഉൾപ്പെടെ 35 ലക്ഷത്തോളം ചെലവിലാണ് പദ്ധതി പൂർത്തീകരിച്ചത്. സ്ഥലം കണ്ടെത്തി കിണറും അരകിലോമീറ്ററോളം ദൈർഘ്യത്തിൽ പൈപ്പും ഇരുപതിനായിരം ലിറ്റർ സംഭരണ ശേഷിയുള്ള ടാങ്കും സ്ഥാപിച്ചാണ് പദ്ധതി നടപ്പാക്കിയത്.

റോഡിന്‍റെ വശങ്ങൾ കാടുകയറുന്നു

ഇലഞ്ഞി: മുത്തോലപുരം പറുദീസ ജംഗ്ഷനിൽ റോഡിന്‍റെ വശങ്ങളിൽ കാടുകയറിയതിനാൽ അപകടങ്ങൾ വർധിക്കുന്നതായി പരാതി. വളവുകൾ ഏറെയുള്ള റോഡിന്‍റെ വശങ്ങളെല്ലാം കാടുകയറിയ അവസ്ഥയിലാണ്. പള്ളി, സ്കൂൾ, ആയുർവേദ ആശുപത്രി തുടങ്ങിയ സ്ഥലങ്ങളിലേക്ക് ദിവസവും 100 കണക്കിന് ആളുകളാണ് ഇതുവഴി കടന്നു പോകുന്നത്. ഈ ഭാഗത്തെ ബസ് കാത്തിരിപ്പ് കേന്ദ്രവും കാട് കയറി ഉപയോഗശൂന്യമായ നിലയിലാണുള്ളത്. പ്രദേശങ്ങളിൽ ഇഴജന്തുക്കളുടെ ശല്യത്തിന് പുറമെ വേസ്റ്റ് നിക്ഷേപവും സ്ഥിരമായിരിക്കുകയാണ്. അടിയന്തരമായി പ്രദേശത്തെ കാട് വെട്ടിത്തെളിക്കണമെന്നാണ് പ്രദേശവാസികളുടെ ആവശ്യം.

ആയുർവേദ ആശുപത്രി മന്ദിരോദ്ഘാടനം

കല്ലൂർക്കാട്: കലൂർ ഗവ. ആയുർവേദ ആശുപത്രിയുടെ പുതിയ കെട്ടിടത്തിന്‍റെ ഉദ്ഘാടനം പ്രതിപക്ഷ നേതാവ് വി.ഡി. സതീശൻ നിർവഹിച്ചു. മാത്യു കുഴൽനാടൻ എംഎൽഎ അധ്യക്ഷത വഹിച്ചു. ഡീൻ കുര്യാക്കോസ് എംപി മുഖ്യപ്രഭാഷണം നടത്തി. മുൻ എംഎൽഎ മാരായ ജോസഫ് വാഴയ്ക്കൻ, എൽദോ ഏബ്രഹാം, ജില്ല പഞ്ചായത്ത് പ്രസിഡന്‍റ് മനോജ് മൂത്തേടൻ, ബ്ലോക്ക് പഞ്ചായത്തു പ്രസിഡന്‍റ് കെ.ജി. രാധാകൃഷ്ണൻ, സുജിത് ബേബി തുടങ്ങിയവർ പ്രസംഗിച്ചു. എംപി ഫണ്ട്, കൊച്ചിൻ ഷിപ്പ്‌യാർഡ് സിഎസ്ആർ ഫണ്ട്, പഞ്ചായത്ത് ഫണ്ട് എന്നിവയിൽ നിന്നുള്ള 60 ലക്ഷം വിനിയോഗിച്ചാണ് നിർമാണം പൂർത്തീകരിച്ചത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]