ADVERTISEMENT

ADVERTISEMENT

കെജിഒഎ ജില്ലാ സമ്മേളനം

തൊടുപുഴ: കേരള ഗസറ്റഡ് ഓഫീസേഴ്സ് അസോസിയേഷൻ ജില്ലാ സമ്മേളനത്തോടനുബന്ധിച്ച് നടന്ന പ്രതിനിധി സമ്മേളനം സിഐടിയു സംസ്ഥാന കമ്മിറ്റി അംഗം കെ. അനിൽകുമാർ ഉദ്ഘാടനം ചെയ്തു. ജില്ലാ പ്രസിഡന്‍റ് ബിജു സെബാസ്റ്റ്യൻ അധ്യക്ഷത വഹിച്ചു.

സംസ്ഥാന വൈസ് പ്രസിഡന്‍റ് കുഞ്ഞിമമ്മു പറവത്ത്, സംസ്ഥാന സെക്രട്ടറി ജയൻ പി. വിജയൻ, സംസ്ഥാന സെക്രട്ടേറിയറ്റംഗം ഡോ. ബോബി പോൾ, പി.എം. ഫിറോസ്, പി.എസ്. അബ്ദുൽ സമദ്, പി.എസ്. വിശാഖ് എന്നിവർ പ്രസംഗിച്ചു.

ADVERTISEMENT

ഫണ്ടില്ല പിഎംഎവൈ പദ്ധതി അവതാളത്തിൽ

ഉപ്പുതറ: ഫണ്ടില്ലാത്തതിനാൽ പിഎംഎവൈ പദ്ധതിയിൽ വീട് നിർമിക്കാനാകാതെ ത്രിതലപഞ്ചായത്തുകൾപ്രതിസന്ധിയിൽ. സംസ്ഥാനത്ത് ഭവനരഹിതരായ 1,946 97 പേരാണ് പിഎംഎവൈ പദ്ധതിയിൽ വീടിന് അപേക്ഷ നൽകിയത്. ഇതിൽ 60,550 എണ്ണം സർക്കാരിന്‍റെ പദ്ധതി രേഖയിൽ രജിസ്റ്ററായി. ജിയോ ടാഗ് വഴി 38, 160 വീടിന് അനുമതി നൽകി. പണം കിട്ടുമെന്ന പ്രതീക്ഷയിൽ പദ്ധതിയിൽ ഉൾപ്പെട്ടവർ ഉണ്ടായിരുന്ന വീട് പൊളിച്ച് പണി തുടങ്ങി. പലരും മൂന്നാം ഘട്ടം വരെ പൂർത്തിയാക്കി. എന്നാൽ ഫണ്ടിനു വേണ്ടി കാത്തിരിക്കുകയാണിവർ. ഒന്നാം ഗഡു 23740 പേർക്കും , രണ്ടാം ഗഡു 1342. പേർക്കും മൂന്നാം ഗഡു ലഭിച്ചത് 11 പേർക്ക് മാത്രമാണ് കിട്ടിയത്. നാലാം ഗഡു ആർക്കും കിട്ടിയില്ല. ആകെ നാല് ലക്ഷം രൂപയാണ് ഗുണ ഭോക്താക്കൾക്ക് ലഭിക്കേണ്ടത്. 2022-23 സാമ്പത്തിക വർഷത്തെ കണക്കാണിത്. കേന്ദ്ര പദ്ധതി പ്രകാരം ഒരു വീടിന് നാല് ലക്ഷം രൂപയാണ് ഓരോ ഗുണഭോക്താവിനും സർക്കാർ നൽകുന്നത്. ഇതിൽ കേന്ദ്ര വിഹിതം 72,000 രൂപയാണ്. സംസ്ഥാനം 1.2 ലക്ഷം രൂപയും ജില്ലാ പഞ്ചായത്ത് 98,000 രൂപയും ബ്ലോക്ക് പഞ്ചായത്ത് 1.12 ലക്ഷം രൂപയും ഗ്രാമ പഞ്ചായത്ത് 70,000 രൂപയും നൽകണം. ത്രിതല പഞ്ചായത്തുകൾ ഈ ഫണ്ട് കണ്ടെത്തി വീടിന്‍റെ ഘട്ടങ്ങൾ പൂർത്തിയാക്കണം. നിർമിച്ച വീടുകളുടെ കണക്ക് നൽകിയാൽ മാത്രമേ കേന്ദ്ര സർക്കാർ വിഹിതം നൽകുകയുള്ളു. സംസ്ഥാന സർക്കാരിന്‍റെ വിഹിതവും കൃത്യമായി കിട്ടുന്നില്ലന്നും പരാതിയുണ്ട്. ത്രിതല പഞ്ചായത്തുകൾക്ക് വലിയ സാമ്പത്തിക ബാധ്യതയാണ് ഇതുമൂലം ഉണ്ടായിരിക്കുന്നത്. അംഗീകരിച്ച പട്ടിക അനുസരിച്ച് വാർഷിക പദ്ധതിയേക്കാൾ കൂടുതൽ പണം പിഎംഎവൈക്ക് വേണ്ടി ചെലവിടേണ്ട ഗതികേടിലാണ് പഞ്ചായത്തുകൾ ലൈഫ് പദ്ധതിക്കുവേണ്ടി സംസ്ഥാന സർക്കാരിന്‍റെ അനുമതിയോടെ ഹഡ്കോയിൽ നിന്ന് വായ്പ എടുത്തിരിക്കുകയാണ് പല പഞ്ചായത്തുകളും. പിഎംഎവൈക്ക് കൂടി വായ്പ എടുക്കാൻ കഴിയുന്നില്ല. വായ്പ തിരിച്ചടയ്ക്കാൻ തന്നെ വാർഷിക പദ്ധതിയിൽ നല്ലൊരു ശതമാനം തുക നീക്കിവയ്ക്കേണ്ടി വരുന്നുണ്ട്. ഇതുകാരണം പിഎംജിഎസ്‌വൈ വീടുകൾക്ക് പുതിയതായി ഫണ്ട് നൽകാനോ അനുവദിച്ചത് പൂർത്തിയാക്കാനോ കഴിയുന്നില്ല. പദ്ധതിയിലേക്ക് പുതിയ അപേക്ഷകൾ സ്വീകരിക്കാനും നിർദ്ദേശമുണ്ട്. ഗുണഭോക്തൃ പട്ടികയിൽ പേരു വന്ന നൂറുകണക്കിനാളുകളാണ് ഉണ്ടായിരുന്ന വീട് പൊളിച്ചത്. ഒന്നും , രണ്ടും മൂന്നും ഘട്ടങ്ങൾ പൂർത്തിയാക്കിയെങ്കിലും ഫണ്ട് കിട്ടാത്തതെ വിഷമിക്കുകയാണ് ഇവരെല്ലാം ഒരോ ദവസവും ത്രിതല പഞ്ചായത്തുകളുടെ ഓഫീസുകൾ കയറിയിറങ്ങുകയാണ്.മറുപടി നൽകാൻ കഴിയാതെ ജനപ്രതിനിധികളും, ജീവനക്കാരും ബുദ്ധിമുട്ടുകയാണ്.

ഇടുക്കിയുടെ മണ്ണിലും കസ്തൂരിരംഗന്‍ കൈയൊപ്പു ചാര്‍ത്തി

കെ.എസ്. ഫ്രാന്‍സിസ് കട്ടപ്പന: ബഹിരാശ ശാസ്ത്രജ്ഞന്‍ ഡോ. കെ. കസ്തൂരിരംഗന്‍റെ കൈയൊപ്പ് ഇടുക്കിയുടെ മണ്ണിലും പതിഞ്ഞു. പ്രഫ. മാധവ് ഗാഡ്ഗില്‍ ചെയര്‍മാനായി രൂപീകരിച്ച വെസ്റ്റേൺ‍ ഗാട്ട്‌സ് എക്കോളജി എക്‌സേപേര്‍ട്ട് പാനല്‍ (ഡബ്ല്യുഇഇപി) തയാറാക്കിയ പശ്ചിമഘട്ട പരിസ്ഥിതി സംരക്ഷണ റിപ്പോര്‍ട്ട് ഇടുക്കി ജില്ല ഉള്‍പ്പെടെയുള്ള കേരളത്തിലെ പശ്ചിമഘട്ട മേഖലകളില്‍ പ്രതിഷേധത്തിന്‍റെ വേലിയേറ്റം ഉണ്ടാക്കിയപ്പോള്‍ പ്രതിഷേധം ശമിപ്പിക്കാന്‍ കേന്ദ്രസര്‍ക്കാര്‍ രൂപീകരിച്ച പശ്ചിമഘട്ട സംരക്ഷണ വര്‍ക്കിംഗ് പാനല്‍ ചെയര്‍മാനായിരുന്നു ഡോ. കെ. കസ്തൂരിരംഗന്‍. അദ്ദേഹത്തിന്‍റെ നേതൃത്വത്തിലുള്ള കമ്മിറ്റി തയാറാക്കി കേന്ദ്ര വനം-പരിസ്ഥിതി മന്ത്രാലയത്തിനു സമര്‍പ്പിച്ച റിപ്പോര്‍ട്ടാണ് ഇന്നും പശ്ചിമഘട്ട പരിസ്ഥിതി സംരക്ഷണ വിഷയത്തില്‍ വനം-പരിസ്ഥിതി മന്ത്രാലയത്തിന്‍റെ പരിഗണനയിലുള്ളത്. എക്കളോജിക്കലി സെന്‍സിറ്റീവ് ഏരിയ (ഇഎസ്എ) സംബന്ധിച്ച അന്തിമ വിജ്ഞാപനം ഇതുവരെ പുറത്തിറങ്ങിയിട്ടില്ലെങ്കിലും (കരടു വിജ്ഞാപനം പുതുക്കിക്കൊണ്ടിരിക്കുകയാണ്) കസ്തൂരിരംഗന്‍ റിപ്പോര്‍ട്ട് സജീവമായി നിലനില്‍ക്കുകയാണ്. ലോക പ്രശസ്ത പരിസ്ഥിതി ശാസ്ത്രജ്ഞനായ ഗാഡ്ഗില്‍ തയാറാക്കിയ റിപ്പോര്‍ട്ട് ജനസൗഹാര്‍ദമായി നടപ്പിലാക്കാനുള്ള നിര്‍ദേശങ്ങള്‍ സമര്‍പ്പിക്കുകയായിരുന്നു ബഹിരാകാശ ശാസ്ത്രജ്ഞനായ ക്‌സതൂരിരംഗന്‍. പശ്ചിമഘട്ടത്തിന്‍റെ 75 ശതമാനം പ്രദേശങ്ങള്‍ ഇഎസ്എയായി പ്രഖ്യാപിക്കുന്നതായിരുന്നു ഗാഡ്ഗില്‍ ശിപാര്‍ശ. ഇഎസ്എ മൂന്നു സോണുകളാക്കി നിരോധനങ്ങളും നിയന്ത്രണങ്ങളും ഏര്‍പ്പെടുത്തി പരിസ്ഥിതി സംരക്ഷിക്കാനുള്ള ഗാഡ്ഗില്‍ ശിപാര്‍ശയില്‍ രാജ്യത്തെ 142 താലൂക്കുകളാണ് ഉള്‍പ്പെട്ടിരുന്നത്. കസ്തൂരിരംഗന്‍ റിപ്പോര്‍ട്ടില്‍ പശ്ചിമഘട്ടത്തെ 37 ശതമാനം പ്രദേശങ്ങളാണ് പരിസ്ഥിതിലോല പ്രദേശങ്ങളായി പുനര്‍ നിര്‍ണയം ചെയ്തത്. അതായത് 60,000 ചതുരശ്ര കി.മി പ്രദേശം പരിസ്ഥിതി ലോലമായി കസ്തൂരിരംഗന്‍ പുനർനിര്‍ണയിച്ചു. മാധവ് ഗാഡ്ഗില്‍ റിപ്പോര്‍ട്ടില്‍ നിര്‍ദേശിച്ച പ്രദേശത്തിന്‍റെ പകുതി വിസ്തീര്‍ണമാണിത്. ഗാഡ്ഗിലിന്‍റെ മൂന്നു പരിസ്ഥിതിലോല സോണുകള്‍ മാറ്റി ഒറ്റ സോണാക്കി കസ്തൂരിരംഗന്‍ പുനര്‍ നിര്‍ണയിച്ചു. പരിസ്ഥിതി സംരക്ഷിക്കുന്നതിന് ഗാഡ്ഗിലും കസ്തൂരിരംഗനും നിര്‍ദേശിച്ച നിരോധനങ്ങളിലും നിയന്ത്രണങ്ങളിലും തമ്മില്‍ കാര്യമായ വ്യത്യാസം ഉണ്ടായിട്ടില്ല. റിപ്പോര്‍ട്ട് തയാറാക്കുന്നതിന്‍റെ ഭാഗമായ കസ്തൂരിരംഗന്‍ ഉള്‍പ്പെടെയുള്ള സംഘം ഇടുക്കിയിലും സിറ്റിംഗ് നടത്തിയിരുന്നു.

ഫ്രാൻസിസ് മാർപ്പാപ്പ സ്നേഹത്തിന്‍റെയും കരുണയുടെയും വെളിച്ചം വിതറിയ വ്യക്തിത്വം: മാർ ജോൺ നെല്ലിക്കുന്നേൽ

വാഴത്തോപ്പ്: ഫ്രാൻസിസ് മാർപാപ്പ സ്നേഹത്തിന്‍റെയും കരുണയുടെയും വെളിച്ചം വിതറിയ വ്യക്തിത്വമാണെന്ന് ഇടുക്കി ബിഷപ് മാർ ജോൺ നെല്ലിക്കുന്നേൽ. വാഴത്തോപ്പ് സെന്‍റ് ജോർജ് കത്തീഡ്രലിൽ നടന്ന ഇടുക്കി രൂപതയുടെ ഫ്രാൻസിസ് പാപ്പ അനുസ്മരണത്തിൽ സംസാരിക്കുകയായിരുന്നു അദ്ദേഹം. ലോകത്തിന് ഒരു പുതിയ ദർശനം നൽകാൻ ഫ്രാൻസിസ് മാർപാപ്പക്ക് കഴിഞ്ഞു. പുതിയൊരു സംസ്കാരത്തെ അദ്ദേഹം വളർത്തി. സ്നേഹവും പ്രത്യാശയുമാണ് ക്രിസ്തീയ വിശ്വാസത്തിന്‍റെ കാതലെന്ന് അദ്ദേഹം പഠിപ്പിച്ചു. ജനങ്ങളുടെ പാപ്പായായി ആണ് ഫ്രാൻസിസ് പാപ്പ അറിയപ്പെടുന്നത്. ജയിലുകളിൽ കഴിഞ്ഞവരോടും തെരുവുകളിൽ അലഞ്ഞവരോടും കുടിയേറ്റക്കാരോടും അഭയാർഥികളോടും അദ്ദേഹം കാണിച്ച കരുതലും സ്നേഹവും അദ്ദേഹത്തെ വ്യത്യസ്തനാക്കി. ഫ്രാൻസിസ് മാർപാപ്പയുടെ പ്രബോധനങ്ങളും അദ്ദേഹത്തിന്‍റെ ജീവിതശൈലികളും ജനങ്ങളെ ആകർഷിക്കുന്നതായിരുന്നു. ക്രൈസ്തവർക്കും അക്രൈസ്തവർക്കും അവിശ്വാസികൾക്ക് പോലും ഫ്രാൻസിസ് മാർപാപ്പയുടെ പ്രബോധനങ്ങളെ സ്വീകരിക്കാൻ കഴിഞ്ഞു. കാരണം മാനുഷിക മൂല്യങ്ങളിൽ ഊന്നിയായിരുന്നു അദ്ദേഹത്തിന്‍റെ പ്രബോധനങ്ങൾ. പ്രകൃതിയെ സ്നേഹിക്കണമെന്നും അതിനെ ചൂഷണം ചെയ്യുന്നത് പാപമാണെന്നും അദ്ദേഹം പഠിപ്പിച്ചു. യുദ്ധത്തെ എതിർക്കുകയും യുദ്ധത്തിന് പരിശ്രമിക്കുന്നവരെ അദ്ദേഹം വിമർശിക്കുകയും ചെയ്തു. ലോകത്ത് സമാധാനവും ശാന്തിയും നിലനിർത്താൻ ഉപയുക്തമായിരുന്നു അദ്ദേഹത്തിന്‍റെ വാക്കുകളെന്നും മാർ ജോൺ നെല്ലിക്കുന്നേൽ അനുസ്മരിച്ചു. സമർപ്പിതരുടെ നേതൃത്വത്തിൽ കരുണയുടെ ജപമാല ചൊല്ലി പ്രാർത്ഥിച്ചു. തുടർന്ന് ആരാധന നടന്നു. മാർ ജോൺ നെല്ലിക്കുന്നേലിന്‍റെ മുഖ്യകാർമികത്വത്തിൽ സമൂഹബലിയും നടന്നു. രൂപതയിലെ വൈദികർ സഹകാർമികരായി. വിശുദ്ധ കുർബാനയ്ക്കുശേഷം ഫ്രാൻസിസ് മാർപാപ്പക്ക് വേണ്ടി പ്രത്യേക അനുസ്മരണ പ്രാർത്ഥന നടത്തി. തുടർന്ന് നടന്ന മെഴുകുതിരി പ്രദക്ഷിണത്തിൽ നൂറുകണക്കിന് വിശ്വാസികൾ സംബന്ധിച്ചു. പ്രദക്ഷിണത്തെത്തുടർന്ന് ഫ്രാൻസിസ് മാർപാപ്പയുടെ ചിത്രത്തിന് മുമ്പിൽ പുഷ്പാർച്ചനയും നടത്തി. രൂപത വികാരി ജനറാൾമാരായ മോൺ. ജോസ് കരിവേലിക്കൽ, മോൺ. ജോസ് പ്ലാച്ചിക്കൽ, മോൺ. ഏബ്രഹാം പുറയാറ്റ്, കത്തീഡ്രൽ വികാരി ഫാ. ഫ്രാൻസിസ് ഇടവക്കണ്ടം, ഫാ. മാർട്ടിൻ പൊൻപനാൽ എന്നിവർ അനുസ്മരണ പരിപാടികൾക്ക് നേതൃത്വം നൽകി.

പട്ടയഭൂമി വനഭൂമിയാക്കുന്നത് അംഗീകരിക്കില്ല: പി.ജെ. ജോസഫ്

തൊടുപുഴ: പട്ടയഭൂമി അടക്കമുള്ള സ്ഥലങ്ങൾ വനഭൂമിയാക്കാനുള്ള നീക്കം അംഗീകരിക്കാനാവില്ലെന്നും സർക്കാരിന്‍റെ പരിഗണനയിലുള്ള പട്ടയ അപേക്ഷകളിൽ ഉടൻ തീരുമാനം വേണമെന്നും പി.ജെ. ജോസഫ് എംഎൽഎ ആവശ്യപ്പെട്ടു. വണ്ണപ്പുറം പഞ്ചായത്തിലെ പട്ടയം ലഭിച്ചതും ജോയിന്‍റ് വെരിഫിക്കേഷൻ നടത്തിയതും വനംവകുപ്പ് ജണ്ടയിട്ട് തിരിച്ചതിന് പുറത്തുള്ള സ്ഥലവും ഉൾപ്പെടെ 4005 ഏക്കർ ഭൂമി വനഭൂമിയാണെന്ന നിലപാട് അംഗീകരിക്കാനാകില്ല. ഈ പ്രദേശത്തിനുള്ളിൽ മൃഗാശുപത്രി, പോസ്റ്റോഫീസ്, അങ്കണവാടി, പഞ്ചായത്ത് കമ്യൂണിറ്റി ഹാൾ, ലൈബ്രറി അടക്കമുള്ള സ്ഥാപനങ്ങൾ അനേക വർഷങ്ങളായി പ്രവർത്തിക്കുന്നുണ്ട്. നാരങ്ങാനം-വട്ടത്തൊട്ടി റോഡ്, നാരങ്ങാനം-ചാത്തൻപുഴപ്പടി-എടത്തൊട്ടി റോഡ്, ഇളയിടംപടി-നെയ്കുത്തനാൽ റോഡ്, നാരങ്ങാനം-അന്പലംപടി-താഴത്തേക്കുടി റോഡ് ഉൾപ്പെടെയുള്ളവയുടെ നിർമാണത്തിന് സർക്കാർ ഫണ്ടനുവദിക്കുകയും ഇതു പൂർത്തീകരിച്ചിട്ടുള്ളതുമാണ്. സർക്കാർ ആവശ്യപ്പെട്ട പ്രകാരം നാലായിരത്തോളം പട്ടയ അപേക്ഷകൾ പരിഗണനയിലാണ്. ഇവർക്ക് പട്ടയം ലഭിക്കുന്നതിനാവശ്യമായ നടപടി ത്വരിതപ്പെടുത്തണമെന്നും ജോസഫ് ആവശ്യപ്പെട്ടു.

ഭൂപ്രശ്നം പരിഹരിക്കുന്നതിൽ നിസംഗത: പ്രഫ. എം.ജെ. ജേക്കബ്

അടിമാലി: ഭൂപ്രശ്നങ്ങൾ പരിഹരിക്കുന്നതിൽ കേന്ദ്രസംസ്ഥാന സർക്കാരുകൾക്ക് ഗുരുതരമായ നിസംഗതയാണെന്ന് കേരള കോണ്‍ഗ്രസ് ജില്ലാ പ്രസിഡന്‍റ് പ്രഫ. എം.ജെ. ജേക്കബ് പറഞ്ഞു. പാർട്ടി കൊന്നത്തടി മണ്ഡലം കണ്‍വൻഷൻ പാറത്തോട് സഹകരണബാങ്ക്ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം. വന്യമൃഗശല്യം പരിഹരിക്കുന്നതിൽ സർക്കാർ പരാജയപ്പെട്ടതായും അദ്ദേഹം പറഞ്ഞു. കാർഷിക, കാർഷികേതര വായ്പകളുടെ പലിശ എഴുതിത്തള്ളാൻ 12,000 കോടി രൂപയുടെ ഇടുക്കി പാക്കേജിൽനിന്നു 2000 കോടി രൂപ നീക്കിവയ്ക്കണമെന്നും വായ്പകളുടെ കാലാവധി ദീർഘിപ്പിക്കണമെന്നും ജപ്തി നടപടികൾ നിർത്തിവയ്ക്കണമെന്നും ആവശ്യപ്പെട്ടു. മണ്ഡലം പ്രസിഡന്‍റ് ജോബി അഗസ്റ്റിൻ പേടിക്കാട്ടുകുന്നേൽ അധ്യക്ഷത വഹിച്ചു. സംസ്ഥാന കോ-ഓർഡിനേറ്റർ അപു ജോണ്‍ ജോസഫ്, എറണാകുളം ജില്ലാ പ്രസിഡന്‍റ് ഷിബു തെക്കുംപുറം, സംസ്ഥാന ഉന്നതാധികാര സമിതിയംഗം നോബിൾ ജോസഫ്, കേരള കർഷക യൂണിയൻ സംസ്ഥാന പ്രസിഡന്‍റ് വർഗീസ് വെട്ടിയാങ്കൽ, ജില്ലാ പഞ്ചായത്തംഗം ഷൈനി സജി, ഇടുക്കി നിയോജക മണ്ഡലം പ്രസിഡന്‍റ്് ജോയി കൊച്ചുകരോട്ട്, അഡ്വ. എബി തോമസ്, സണ്ണി തെങ്ങുംപള്ളി, വർഗീസ് സക്കറിയ തുടങ്ങിയവർ പ്രസംഗിച്ചു.

ഫ്രാൻസിസ് പാപ്പായുടെ നാണയശേഖരങ്ങൾക്കു മുന്നിൽ സ്നേഹപ്രണാമവുമായി ജോജോ

മൂലമറ്റം: തിരുസഭയിലെ ആദ്യത്തെ മാർപാപ്പയായ വിശുദ്ധ പത്രോസ് മുതൽ കഴിഞ്ഞദിവസം കാലം ചെയ്ത ഫ്രാൻസിസ് മാർപാപ്പവരെയുള്ളവരുടെ സ്റ്റാന്പുകൾ, ചിത്രങ്ങൾ ആലേഖനം ചെയ്ത നാണയങ്ങൾ, മെഡലുകൾ എന്നിവയുടെ അപൂർവ ശേഖരവുമായി അറക്കുളം പ്ലാക്കൂട്ടത്തിൽ ജോജോ പി. കുര്യാക്കോസ്. ഫ്രാൻസിസ് പാപ്പായുടെ പേരിൽ 2015-ൽ വത്തിക്കാൻ പുറത്തിറക്കിയ ഒന്പതുനാണയങ്ങളുടെ സെറ്റ്, 2013-ൽ വത്തിക്കാൻ ഇറക്കിയ പാപ്പായുടെ കോപ്പർമെഡൽ, സ്റ്റാന്പും നാണയവും അടങ്ങിയ കാർഡ്, ബ്രിട്ടൻ ഇറക്കിയ ഫ്രാൻസിസ് മാർപാപ്പായുടെ കോയിൻ കവർ, ആഫ്രിക്കൻ രാജ്യമായ പലാവു പുറത്തിറക്കിയ ചരിത്രസമ്മേളനം എന്ന്ആലേഖനം ചെയ്ത പോപ്പ് ബനഡിക്ട് പതിനാറാമന്‍റെയും ഫ്രാൻസിസ് മാർപാപ്പയുടെയും ചിത്രം അടങ്ങിയ നാണയങ്ങൾ, പീയൂസ് 11-ാമൻ മാർപാപ്പ തുടങ്ങി ഫ്രാൻസിസ് മാർപാപ്പ വരെയുള്ള എട്ട് പാപ്പാമാരുടെ ചിത്രങ്ങൾ അടങ്ങിയ വത്തിക്കാൻ സിറ്റിയുടെ 80 വർഷം എന്ന പേരിൽ ഇറക്കിയ നാണയം, ഫ്രാൻസിസ് പാപ്പായുടെ മരണത്തിനു മുന്പ് ഇറക്കിയ സ്റ്റാന്പും നാണയവും-ഇതെല്ലാം കാണുന്പോൾ അവയ്ക്കു മുന്നിൽ സ്നേഹപ്രണാമം അർപ്പിക്കുകയാണ് ജോജോ. വിവിധ പാപ്പാമാരുടെ ജീവിതത്തിലെ സുപ്രധാന സംഭവങ്ങൾ സൂചിപ്പിക്കുന്ന വിവിധ രാജ്യങ്ങളുടെ സ്റ്റാന്പുകൾ, ചിത്രങ്ങൾ ആലേഖനം ചെയ്ത നാണയങ്ങൾ, മെഡലുകൾ എന്നിവയും ജോജോയുടെ ശേഖരത്തിലുണ്ട്. ഇതിനു പുറമേ 200-ഓളം രാജ്യങ്ങളുടെ കറൻസികൾ, നൂറുവർഷം പഴക്കമുള്ള കലണ്ടറുകൾ, ആഫ്രിക്കൻ സ്വർണഖനിയിലെ മണ്ണ്, പഴയകാല എഴുത്ത് സാമഗ്രിയായ താളിയോല, അളവുതൂക്ക ഉപകരണങ്ങൾ, മദർതെരേസയുടെ ചിത്രം ആലേഖനം ചെയ്ത അഞ്ച്, 100,1000 രൂപയുടെ നാണയങ്ങൾ, രാജഭരണകാലത്തെ നാണയങ്ങൾ, ഡാവിഞ്ചി, മദർതെരേസ, ഗാന്ധിജി തുടങ്ങിയവരുടെ മില്ലേനിയം മെഡലുകൾ, അൽഫോൻസാ നാണയങ്ങൾ, പ്രൗഡ് ഓഫ് ഇന്ത്യ എന്നപേരിൽ ഇറക്കിയ 24 കാരറ്റ് സ്വർണത്തിൽ പ്ലേറ്റ് ചെയ്ത റെപ്ലിക സ്റ്റാന്പുകൾ, ലണ്ടൻ ഒളിന്പിക്സിൽ ഇറക്കിയ 30 നാണയങ്ങൾ, ബ്രിട്ടീഷ് രാജകുടുംബാംഗങ്ങളുടെ നാണയങ്ങൾ എന്നിവയെല്ലാം നിധിപോലെ ഇദ്ദേഹം സൂക്ഷിക്കുന്നു. വാഴക്കുളം വിശ്വജ്യോതി എൻജിനിയറിംഗ് കോളജിലെ റിട്ട. അസി.പ്രഫസറും ഇടുക്കി ഫിലാറ്റലിക് ആന്‍ഡ ന്യൂമിസമാറ്റിക് സൊസൈറ്റി മെംബറുമാണ് ഇദ്ദേഹം. ഭാര്യ ബെൻസി (റിട്ട. ജോയിന്‍റ് രജിസ്ട്രാർ). മക്കൾ: റോഷൻ, റോജൻ.

പ്രചോദിനി 2025 ഉദ്ഘാടനം ചെയ്തു

കാഞ്ഞിരപ്പള്ളി: രൂപത മാതൃവേദിയുടെ നേതൃത്വത്തിൽ അമ്മമാരുടെ സമഗ്രമായ വളർച്ച ലക്ഷ്യമാക്കി ഒരു വർഷം നീണ്ടുനിൽക്കുന്ന പ്രചോദിനി 2025 പൊടിമറ്റം നിർമല റിന്യൂവൽ സെന്‍ററിൽ നടത്തി. വികാരി ജനറാൾ ഫാ. ബോബി അലക്‌സ് മണ്ണംപ്ലാക്കൽ ഉദ്ഘാടനം ചെയ്തു. രൂപത മാതൃവേദി പ്രസിഡന്‍റ് ജിജി ജേക്കബ് അധ്യക്ഷത വഹിച്ചു. രൂപത മാതൃവേദി ഡയറക്‌ടർ ഫാ. മാത്യു ഓലിക്കൽ, ഫാ. വർഗീസ് കാക്കല്ലിൽ, രൂപത ആനിമേറ്റർ സിസ്റ്റർ ജ്യോതി മരിയ സിഎസ്എൻ, ജുബി വേഴമ്പശേരി, ബ്രദർ കെവിൻ നീറണാക്കുന്നേൽ എന്നിവർ പ്രസംഗിച്ചു. രൂപതയുടെ വിവിധ ഇടവകകളിൽനിന്നുമുള്ള മാതാക്കൾ പരിശീലന പരിപാടിയിൽ പങ്കെടുക്കുകയും രൂപത, ഫൊറോന എക്‌സിക്യൂട്ടീവ് അംഗങ്ങൾ പരിപാടിക്ക് നേതൃത്വം നൽകുകയും ചെയ്തു.

എംസി കട്ടപ്പന ഒന്നാം ചരമവാര്‍ഷികാചരണം മേയ് 14ന്

കട്ടപ്പന: അന്തരിച്ച നാടകാചാര്യന്‍ എംസി കട്ടപ്പനയുടെ ഒന്നാം ചരമവാര്‍ഷിക ആചരണം മേയ് 14ന് കട്ടപ്പനയില്‍ വിപുലമായി ആചരിക്കാന്‍ തീരുമാനം. ഇതിന് മുന്നോടിയായി വിവിധ സംഘടനാ പ്രതിനിധികളുടെ യോഗം കട്ടപ്പനയില്‍ ചേര്‍ന്നു. എംസിയുടെ സംഭാവനകള്‍ രേഖപ്പെടുത്തിയ ഓര്‍മ പുസ്തകത്തിന്‍റെ പ്രകാശനം, അനുസ്മരണ പ്രഭാഷണം, കട്ടപ്പന ദര്‍ശനയുടെ നാടകമായ സെനീബിന്‍റെ അവതരണം എന്നിവ ഇതിന്‍റെ ഭാഗമായി നടത്തും. 30ലേറെ പ്രൊഫഷണല്‍ നാടകങ്ങളിലായി 7000ലേറെ വേദികളില്‍ എംസി കട്ടപ്പന അഭിനയിച്ചിട്ടുണ്ട്. നിരവധി സിനിമകളിലും സീരിയലുകളിലും അദ്ദേഹം വേഷമിട്ടിട്ടുണ്ട്. കാഴ്ച, പളുങ്ക്, നായകന്‍ തുടങ്ങിയവയാണ് ശ്രദ്ധേയ ചിത്രങ്ങള്‍. 2007-ല്‍ കൊല്ലം അരീനയുടെ "ആരും കൊതിക്കുന്ന മണ്ണ്' എന്ന നാടകത്തിലെ അഭിനയത്തിന് മികച്ച നടനുള്ള സംസ്ഥാന സര്‍ക്കാര്‍ അവാര്‍ഡ് ലഭിച്ചു. 2014-ല്‍ കേരള സംഗീത നാടക അക്കാദമിയുടെ അഭിനയശ്രീ പുരസ്‌കാരവും ലഭിച്ചു. വാര്‍ധക്യസഹജമായ അസുഖത്തെത്തുടര്‍ന്ന് ചികിത്സയിലിരിക്കെയാണ് അന്ത്യം. കട്ടപ്പന പ്രസ് ക്ലബ് ഹാളില്‍ ചേര്‍ന്ന യോഗത്തില്‍ നഗരസഭാ ചെയര്‍പേഴ്‌സണ്‍ ബീനാ ടോമി അധ്യക്ഷയായി. വൈസ് ചെയര്‍മാന്‍ അഡ്വ കെ.ജെ. ബെന്നി, കൗണ്‍സിലര്‍ സിജു ചക്കുംമൂട്ടില്‍, വിവിധ സംഘടനാപ്രതിനിധികള്‍, കലാ-സാംസ്‌കാരിക, മാധ്യമ പ്രവര്‍ത്തകര്‍ തുടങ്ങിയവര്‍ പങ്കെടുത്തു.

ദൈവകരുണയുടെ കണ്‍വന്‍ഷനും പുതുഞായര്‍ ആഘോഷങ്ങളും നാളെ സമാപിക്കും

നെടുങ്കണ്ടം: നെടുങ്കണ്ടം കരുണാ ആനിമേഷന്‍ ആൻഡ് ഡിവൈന്‍ മേഴ്സി റിട്രീറ്റ് സെന്‍ററിൽ നടന്നുവരുന്ന ദൈവകരുണയുടെ മൂന്നാമത് കണ്‍വന്‍ഷനും തിരുനാളും പുതുഞായര്‍ ആഘോഷങ്ങളും നാളെ സമാപിക്കും. 18നാണ് കണ്‍വന്‍ഷന്‍ ആരംഭിച്ചത്. വിവിധ ദിവസങ്ങളില്‍ വൈകുന്നേരം 4.30ന് വിശുദ്ധ കുര്‍ബാന, വചനപ്രഘോഷണം, ആരാധന, നൊവേന തുടങ്ങിയവ നടന്നുവരുന്നു. കേരളത്തിലെ പ്രമുഖ വചനപ്രഘോഷകരായ സിസ്റ്റര്‍ ലിസ്യൂ മരിയ, ഫാ. ജയിംസ് മഞ്ഞാക്കല്‍, ഫാ. സിജോ തയ്യാലയ്ക്കല്‍, മഞ്ജിത തെരേസ, ബ്രദർ സാബു ആറുതൊട്ടിയില്‍, ബ്രദർ സന്തോഷ് കരുമാത്ര, ഫാ. ജിന്‍സ് ചീങ്കല്ലേല്‍ തുടങ്ങിയവരാണ് വചനപ്രഘോഷണങ്ങള്‍ക്ക് നേതൃത്വം നല്‍കിയത്. ഇന്നലെ സീറോ മലബാര്‍ സഭ കൂരിയാ ബിഷ്‍ മാര്‍ സെബാസ്റ്റ്യന്‍ വാണിയപ്പുരയ്ക്കലിന്‍റെ മുഖ്യ കാര്‍മികത്വത്തില്‍ പൊന്തിഫിക്കല്‍ കുര്‍ബാന നടന്നു. ഇന്നു വൈകുന്നേരം നടക്കുന്ന വിശുദ്ധ കുര്‍ബാനയ്ക്ക് ഇടുക്കി രൂപത വികാരി ജനറാള്‍ മോണ്‍. ജോസ് പ്ലാച്ചിക്കല്‍ കാര്‍മികത്വം വഹിക്കും. സമാപന ദിവസമായ നാളെ വൈകുന്നേരം 4.30 ന് ഇടുക്കി ബിഷപ്‍ മാര്‍ ജോണ്‍ നെല്ലിക്കുന്നേല്‍ വിശുദ്ധ കുര്‍ബാനയ്ക്കും തിരുനാളിനും ദിവ്യകാരുണ്യ പ്രദക്ഷിണത്തിനും മുഖ്യ കാര്‍മികത്വം വഹിക്കും. കണ്‍വന്‍ഷന് റിട്രീറ്റ് സെന്‍റർ ഡയറക്ടര്‍ ഫാ. ജയിംസ് മാക്കിയില്‍, അസി. ഡയറക്ടര്‍ ഫാ. ബിബിന്‍ അറയ്ക്കല്‍, ഡെന്നി താണുശേരിക്കാരന്‍, ഷിജോ ശൗര്യാംകുഴി, ബ്രദർ റെജി പുതുപ്പറമ്പില്‍, ബ്രദർ വിനോദ് കളപ്പുരയ്ക്കല്‍ തുടങ്ങിയവര്‍ നേതൃത്വം നല്‍കി വരുന്നു.

ബജറ്റ് ടൂറിസം: ജില്ലയ്ക്ക് 1.25 കോടി നേട്ടം

തൊടുപുഴ: ജനപ്രീതി നേടിയ ബജറ്റ് ടൂറിസം സെല്ലിന്‍റെ ഉല്ലാസയാത്രകളിലൂടെ ജില്ലയിൽ കെഎസ്ആർടിസി കൊയ്തെടുത്തത് ലക്ഷങ്ങൾ. വിവിധ വിനോദസഞ്ചാര കേന്ദ്രങ്ങളിലേക്കും കടലിലും കായലിലും ഉൾപ്പെടെ ഉല്ലാസ യാത്ര നടത്തി 1.25 കോടിയാണ് കോർപറേഷന് മൂന്ന് വർഷത്തിനിടെ ജില്ലയിൽനിന്നു ലഭിച്ചത്. 2022 മുതൽ 2025 വരെയുള്ള കണക്കാണിത്. നിലവിൽ തൊടുപുഴ, മൂന്നാർ, മൂലമറ്റം എന്നിവിടങ്ങളിലാണ് ബജറ്റ് ടൂറിസം സെൽ സജീവമായി പ്രവർത്തിക്കുന്നത്. കട്ടപ്പന, കുമളി എന്നീ ഡിപ്പോകളിൽനിന്ന് ഉല്ലാസ യാത്രകൾ ബജറ്റ് ടൂറിസത്തിന്‍റെ ഭാഗമായി സംഘടിപ്പിക്കുന്നുണ്ട്. തൊടുപുഴ ഡിപ്പോയിൽനിന്നു മാത്രം 80 ലക്ഷത്തിലധികം രൂപയാണ് വരുമാനം ലഭിച്ചത്. 52 യാത്രകളിൽനിന്നായി 17 ലക്ഷം നേടിയ മൂലമറ്റം ഡിപ്പോയും നേട്ടം കൈവരിച്ചു. ഇതുവരെ 1720 പേരാണ് ബജറ്റ് ടൂറിസത്തിന്‍റെ ഭാഗമായി യാത്രയിൽ പങ്കാളികളായത്. ഗവി, ആലപ്പുഴ അർത്തുങ്കൽ പള്ളി, കൊച്ചി കപ്പൽയാത്ര, മൂന്നാർ- വട്ടവട, മറയൂർ -കാന്തല്ലൂർ - ചതുരംഗപ്പാറ, ഇല്ലിക്കൽകല്ല് -വാഗമണ്‍, വർക്കല ശിവഗിരി, അതിരപ്പിള്ളി-വാഴച്ചാൽ- മലക്കപ്പാറ, രാമക്കൽമേട് -അഞ്ചുരുളി, വയനാട് എന്നിവിടങ്ങളിലേക്ക് പതിവായി യാത്ര നടത്തുന്നുണ്ട്. വിനോദ യാത്രകൾക്ക് പുറമേ നിരവധി തീർഥാടന യാത്രകളും അന്തർ സംസ്ഥാന യാത്രകളും ബജറ്റ് ടൂറിസം സെൽ നടത്തുന്നുണ്ട്. ബജറ്റ് ടൂറിസം സെല്ലിന്‍റെ ചുമതലക്കാർക്കു പുറമേ കോ-ഓർഡിനേഷന് 1500 പേരടങ്ങുന്ന രണ്ട് വാട്ട്സാപ്പ് ഗ്രൂപ്പുകളും രൂപീകരിച്ചിട്ടുണ്ട്. മൂന്നാറിന്‍റെ സൗന്ദര്യം നുകരാൻ വീണ്ടും ഡബിൾ ഡെക്കർ മൂന്നാറിന്‍റെ സൗന്ദര്യം ആസ്വദിക്കാൻ റോയൽ വ്യൂ ഡബിൾ ഡെക്കർ ബസ് അടുത്തിടെയാണ് ഇറക്കിയതെങ്കിലും ഇത് വൻ ഹിറ്റായതോടെ ഒരു ബസ് കൂടി നിരത്തിലിറക്കാനുള്ള നീക്കത്തിലാണ് കെഎസ്ആർടിസി അധികൃതർ. കഴിഞ്ഞ ഫെബ്രുവരി എട്ടിനാണ് മൂന്നാറിൽ റോയൽ വ്യൂ ഡബിൾ ഡെക്കർ ബസ് സർവീസ് ആരംഭിച്ചത്. ഇതിനോടകം 35 ലക്ഷം രൂപയ്ക്കുമേൽ വരുമാനം നേടിക്കഴിഞ്ഞു. ആധുനിക രീതിയിലുള്ള ബസ് നിർമാണത്തിന് വേണ്ടി വന്ന 30 ലക്ഷം രൂപ തിരിച്ചുപിടിച്ചാണ് ലാഭത്തിലേക്ക് കടന്നത്. നിലവിൽ ഒന്നരലക്ഷത്തോളം പേർ ഇതിൽ യാത്ര ചെയ്തിട്ടുണ്ട്. 50 സീറ്റുള്ള വാഹനത്തിൽ മുകൾനിലയിൽ 38 പേർക്കും താഴെ 12 പേർക്കും സഞ്ചരിക്കാം. താഴത്തെ നിലയിൽ 200 രൂപയും മുകൾ നിലയിൽ 400 രൂപയുമാണ് ചാർജ്. മൂന്നാർ ഡിപ്പോയിൽനിന്ന് സർവീസ് ആരംഭിച്ച് കൊച്ചി-ധനുഷ്കോടി ദേശീയപാതയിലെ സിഗ്നൽ ലൈറ്റ്, ലാക്കാട് വ്യൂ പോയിന്‍റ്, ഗ്യാപ്പ് റോഡ് വഴി പെരിയകനാൽ വെള്ളച്ചാട്ടം വഴി തിരിച്ചെത്തുന്നതാണ് മൂന്ന് മണിക്കൂർ യാത്ര. രാവിലെ ആറ്, ഒന്പത്, ഉച്ചയ്ക്ക് 12.30, വൈകുന്നേരം നാല് എന്നീ സമയങ്ങളിലാണ് യാത്ര ക്രമീകരിച്ചിരിക്കുന്നത്. ബജറ്റ് ടൂറിസം സെല്ലിന്‍റെ പ്രവർത്തനം മികച്ച രീതിയിൽ മുന്നേറുന്നുണ്ടെന്നും പദ്ധതി ഓരോ ദിവസവും കൂടുതൽ ജനകീയമാകുകയാണെന്നും ജില്ലാ കോ-ഓർഡിനേറ്റർ എൻ.ആർ. രാജീവ് പറഞ്ഞു.

ചോറ്റുപാറ സ്കൂളിലെ മൂന്ന് അധ്യാപികമാർക്ക് സംസ്ഥാന അവാർഡ്

നെടുങ്കണ്ടം: ഒന്നാം ക്ലാസിലെ അക്കാദമിക് വിജയ വഴികൾ പങ്കിട്ട സംസ്ഥാന അധ്യാപക സംഗമത്തിൽ ചോറ്റുപാറ ആർപിഎംഎൽപി സ്കൂളിന് മികച്ച നേട്ടം. സ്കൂളിലെ മൂന്ന് അധ്യാപികമാരെ സംസ്ഥാനത്തെ മികച്ച ഒന്നാം ക്ലാസ് അധ്യാപകരായി തെരഞ്ഞെടുത്തു. ഒന്നാംക്ലാസ് അധ്യാപികമാരായ എ. അശ്വതി, എം.ബി. ബിന്ദു, പ്രനീഷ കൃഷ്ണൻ എന്നിവരെയാണ് മികച്ച അധ്യാപികമാരായി തെരഞ്ഞെടുത്തത്. ആർപിഎം ഫാമിലിയുടെ ടീം വർക്ക്, നവാഗതർക്കായി തയാറാക്കിയ കഥാപുസ്തകം, ഓരോ ക്ലാസ് പ്രവർത്തനത്തിലും രക്ഷിതാക്കളുടെ സജീവസാന്നിധ്യം, മികവഴക് വീഡിയോ, വിദ്യാലയം വീട്ടിലേക്ക് എന്നീ പ്രവർത്തനങ്ങളുമെല്ലാമാണ് ഇവരെ അവാർഡിന് അർഹരാക്കിയതെന്ന് പ്രധാന അധ്യാപിക ആർ. ദീപമോൾ, രക്ഷിതാക്കളുടെയും മറ്റ് സഹപ്രവർത്തകരുടെയും അകമഴിഞ്ഞ പിന്തുണയാണ് നേട്ടത്തിന് കാരണമെന്ന് അവാർഡ് ജേതാക്കൾ പറഞ്ഞു. അധ്യാപക കൂട്ടായ്മയാണ് നേമം ഗവൺമെന്‍റ് യുപി സ്കൂളിൽ വച്ച് "മികവഴക്' എന്ന പേരിൽ അധ്യാപക സംഗമം സംഘടിപ്പിച്ചത്.

കേരള ഗവൺമെന്‍റ് കോണ്‍ട്രാക്റ്റേഴ്സ് ഫെഡറേഷന്‍ ജില്ലാ സമ്മേളനം നാളെ

കട്ടപ്പന: കേരള ഗവ. കോണ്‍ട്രാക്ടേഴ്സ് ഫെഡറേഷന്‍ ജില്ലാ സമ്മേളനം 27ന് കട്ടപ്പന സഹകരണ ബാങ്ക് ഓഡിറ്റോറിയത്തില്‍ നടക്കും. പൊതുസമ്മേളനം ജില്ലാ പഞ്ചായത്ത് പ്രസിഡന്‍റ് രാരിച്ചന്‍ നീറണാക്കുന്നേല്‍ ഉദ്ഘാടനം ചെയ്യും. ജില്ലയിലെ ഗവണ്‍മെന്‍റ് കരാറുകാര്‍ വലിയ പ്രതിസന്ധിയിലൂടെയാണ് നിലവില്‍ കടന്നു പോകുന്നതെന്ന് ഭാരവാഹികള്‍ പറഞ്ഞു. തൊടുപുഴ താലൂക്ക് ഒഴിച്ച് മറ്റ് ഒരു താലൂക്കിലും ക്രഷറുകളോ, പാറമടകളോ ഇല്ല. അതുകൊണ്ട് അടുത്ത ജില്ലകളില്‍ നിന്നും കമ്പം, തേനി എന്നീ സ്ഥലങ്ങളില്‍ നിന്നുമാണ് നിര്‍മാണ സാധനങ്ങള്‍ എത്തിക്കുന്നത്. 100 മുതല്‍ 200 കിലോ മീറ്റര്‍ വരെ ദൂരമുണ്ട്. 15 കിലോമീറ്ററിനുളളില്‍ മെറ്റിരിയല്‍സ് ലഭിക്കുമെന്ന അനുമാനത്തിലാണ് എസ്റ്റിമേറ്റ് തയാറാക്കിയത്. ഇതിനാല്‍ വര്‍ക്ക് കോണ്‍ട്രാക്ടേഴ്‌സിന് വലിയ നഷ്ടമാണ് ഉണ്ടാകുന്നത്. അതുകൊണ്ട് തന്നെ ഇടുക്കി ജില്ലയിലെ വികസന പ്രവര്‍ത്തനങ്ങള്‍ വലിയ പ്രതിസന്ധിയിലാണ്. എല്ലാ താലുക്കിലും രണ്ട്, മൂന്ന് പാറമടകള്‍, ക്രഷര്‍ എന്നിവ അനുവദിച്ച് പ്രശ്ന പരിഹാരം കാണണമെന്നും ഭാരവാഹികള്‍ പറഞ്ഞു. സമ്മേളനത്തില്‍ ജില്ലാ പ്രസിഡന്‍റ് ഷാജി ജോസഫ് അധ്യക്ഷത വഹിക്കും. മുന്‍ എം.എല്‍.എ ഇ.എം ആഗസ്തി മുഖ്യപ്രഭാഷണം നടത്തും. സംസ്ഥാന സെക്രട്ടറി കൃഷ്ണന്‍, സംസ്ഥാന വര്‍ക്കിങ് പ്രസിഡന്‍റ് കെ.ജെ വര്‍ഗീസ്, രക്ഷാധികാരി വി.കെ.സി. മമ്മദ് കോയ, സംസ്ഥാന ജോയിന്‍റ് സെക്രട്ടറി ജോമോന്‍ മാത്യു, ജില്ലാ സെക്രട്ടറി ജോണ്‍സണ്‍, കട്ടപ്പന സഹകരണ ബാങ്ക് പ്രസിഡന്‍റ് ജോയി വെട്ടിക്കുഴി, സിപിഎം ജില്ലാ കമ്മിറ്റിയംഗം സജി തുടങ്ങിയവര്‍ പ്രസംഗിക്കും. അംഗങ്ങളുടെ മക്കളില്‍ എസ്എസ്എല്‍സി, പ്ലസ്ടു പരീക്ഷകളില്‍ മികച്ച വിജയം നേടിയവര്‍ക്ക് ഉപഹാരം നല്‍കുമെന്ന് ഷാജി ജോസഫ്, ജോണ്‍സണ്‍, ജോമോന്‍ മാത്യു, സിബി തോമസ്, സുരേഷ് എന്നിവര്‍ പറഞ്ഞു.

കട്ടപ്പന നഗരസഭാപരിധിയില്‍ കുടിവെള്ള വിതരണം: ടെന്‍ഡര്‍ ഏറ്റെടുക്കാന്‍ ആളില്ല

കട്ടപ്പന: നഗരസഭയിൽ അടിയന്തര കൗണ്‍സില്‍ യോഗം ചേര്‍ന്നു. നഗരസഭാപരിധിയില്‍ കുടിവെള്ള വിതരണത്തിന്‍റെ ടെന്‍ഡറില്‍ ആരും പങ്കെടുക്കാത്തത് സംബന്ധിച്ച് ചര്‍ച്ച ചെയ്തു. കഴിഞ്ഞ വര്‍ഷം കുടിവെള്ളം വിതരണം ചെയ്ത വകയില്‍ 7 ലക്ഷത്തോളം രൂപ കരാറുകാര്‍ക്ക് നല്‍കാനുള്ളതായി പ്രതിപക്ഷ കൗൺസിലർമാർ അടക്കം ആരോപണം ഉന്നയിച്ചു. സര്‍ക്കാര്‍ അനുമതി ലഭിച്ചശേഷമേ തുക നല്‍കാന്‍ കഴിയുകയുള്ളൂവെന്ന് ഭരണസമിതി അറിയിച്ചു. അമൃത് കുടിവെള്ള പദ്ധതിയുടെ കണക്ഷനുകള്‍ നല്‍കുന്ന വിഷയവും ചര്‍ച്ചയായി. 2023-24 സാമ്പത്തിക വർഷത്തെ കേരള സംസ്ഥാന ഓഡിറ്റ് വകുപ്പ് കാര്യാലയം ലഭ്യമാക്കിയ വരവ് ചിെലവ് കണക്കുകളിന്മേലുള്ള ഓഡിറ്റ് റിപ്പോർട്ട്‌ സംബന്ധിച്ച് ചർച്ചകൾ ഉയർന്നു. റിപ്പോർട്ടിന്‍റെ അടിസ്ഥാനത്തിൽ ഉയർന്ന പരാമർശങ്ങൾക്ക് മേലുള്ള മറുപടി, പദ്ധതി നിർവഹണ ഉദ്യോഗസ്ഥന്മാരിൽ നിന്നും ലഭ്യമാകുന്നതിനും ഓഡിറ്റ് പരാമർശങ്ങൾ ഒഴിവാക്കുന്നതിന് ഓഡിറ്റ് വകുപ്പിന് റിപ്പോർട്ട് നൽകുന്നതിനും ഉള്ള തീരുമാനത്തിനായി വിഷയം കൗൺസിലിൽ സമർപ്പിച്ചു. മുൻവർഷങ്ങളിലെ വർക്കുകൾ കോൺട്രാക്ടർമാർ കരാർ എടുത്തിട്ടും അവ നടപ്പിലാക്കാത്തതിനാൽ സ്പില്ലോവറിൽ ഉൾപ്പെട്ടു. ഇത്തരത്തിൽ പദ്ധതികൾ ഏറ്റെടുത്ത ശേഷം നടത്താതിരിക്കുന്ന കരാറുകാരെ കരിമ്പട്ടികയിൽ ഉൾപ്പെടുത്തണമെന്നും യോഗത്തിൽ കൗൺസിലർമാർ ആവശ്യം ഉന്നയിച്ചു.

ബൈക്കും കാറും കൂട്ടിയിടിച്ച് രണ്ടു പേര്‍ക്ക് പരിക്കേറ്റു

കട്ടപ്പന: അടിമാലി-കുമളി ദേശീയപാതയില്‍ കട്ടപ്പന അമ്പലക്കവലയ്ക്ക് സമീപം ബൈക്കും കാറും കൂട്ടിയിടിച്ച് രണ്ടുപേര്‍ക്ക് പരിക്കേറ്റു. ബൈക്ക് യാത്രികരായ വെള്ളയാംകുടി സ്വദേശികള്‍ നിസാര പരിക്കുകളോടെ രക്ഷപ്പെട്ടു. വെള്ളിയാഴ്ച ഉച്ചയ്ക്ക് 12.30ഓടെ സെന്‍റ് മര്‍ത്താസ് കോൺവെന്‍റിനു സമീപമാണ് അപകടം. കട്ടപ്പനയില്‍നിന്ന് കുന്തളംപാറ ഭാഗത്തേക്ക് പോയ കാറില്‍ വള്ളക്കടവില്‍നിന്ന് കട്ടപ്പനയിലേക്ക് വന്ന ബൈക്ക് നിയന്ത്രണംവിട്ട് ഇടിക്കുകയായിരുന്നു. ബൈക്കിന്‍റെ മുന്‍ഭാഗം തകര്‍ന്നു. കാറിനും കേടുപാടുണ്ട്. കഴിഞ്ഞദിവസം ഇതേസ്ഥലത്ത് മൂന്നുകാറുകള്‍ കൂട്ടിയിടിച്ചിരുന്നു. അപകടസാധ്യതാ മേഖലയില്‍ സുരക്ഷാ സംവിധാനങ്ങള്‍ ഒരുക്കിയിട്ടില്ല.

തൊമ്മന്‍കുത്ത് സംഭവം: പ്രതിഷേധം ശക്തമാകുന്നു

കളക്ടര്‍ക്ക് പരാതി തൊടുപുഴ: കൈവശഭൂമി വനഭൂമിയാണെന്ന് റിപ്പോര്‍ട്ട് നല്‍കിയ വണ്ണപ്പുറം വില്ലേജ് ഓഫീസര്‍ എന്‍.കെ.ഷാജിക്കെതിരെ നടപടി ആവശ്യപ്പെട്ട് പ്രദേശവാസികളായ ആറുകര്‍ഷകര്‍ ചേര്‍ന്ന് ഇടുക്കി ജില്ലാ കളക്ടര്‍ വി. വിഗ്നേശ്വരി, തൊടുപുഴ തഹസില്‍ദാര്‍ എന്നിവര്‍ക്ക് പരാതി നല്‍കി. ആറരപതിറ്റാണ്ടായി തങ്ങളുടെ കൈവശത്തിലുള്ളതും കൃഷിചെയ്തുവരുന്നതുമായ ഭൂമിയാണ് വനഭൂമിയാണെന്ന് കാണിച്ച് റിപ്പോര്‍ട്ട് നല്‍കിയത്. തൊമ്മന്‍കുത്ത് സെന്‍റ്് തോമസ് പള്ളിയുടെ കൈവശഭൂമിയില്‍ സ്ഥാപിച്ച കുരിശ് വനംവകുപ്പ് പൊളിച്ചുനീക്കിയതില്‍ ശക്തമായ പ്രതിഷേധം ഉയരുന്നതിനിടെയാണ് വില്ലേജ് ഓഫീസര്‍ സ്ഥലം സന്ദര്‍ശിക്കുകയോ കൃത്യമായ രേഖകള്‍ പരിശോധിക്കുകയോ ചെയ്യാതെ കുരിശ് പൊളിച്ചുനീക്കിയ സ്ഥലം ഉള്‍പ്പെടുന്ന 4005 ഏക്കര്‍ റിസര്‍വ് വനഭൂമിയാണെന്നു റിപ്പോര്‍ട്ട് നല്‍കിയത്. ഇതുവനംവകുപ്പ് ഉദ്യോഗസ്ഥരുമായി ചേര്‍ന്ന് ഒത്തുകളി നടത്തിയതാണ്.ഇതു സംബന്ധിച്ച് കൃത്യമായി അന്വേഷണം നടത്തണമെന്നും ആവശ്യപ്പെട്ടാണ് പരാതി നല്‍കിയിരിക്കുന്നത്. മുഖ്യമന്ത്രിക്ക് ഭീമഹര്‍ജി തൊടുപുഴ: മുഖ്യമന്ത്രി പിണറായി വിജയന് തൊമ്മന്‍കുത്ത്, നാരുംകാനം പ്രദേശത്തെ ജനങ്ങള്‍ ഭീമഹര്‍ജി നല്‍കും. മന്ത്രിസഭയുടെ നാലാംവാര്‍ഷികം ഉദ്ഘാടനം ചെയ്യാന്‍ 28നു നെടുങ്കണ്ടത്ത് എത്തുന്ന മുഖ്യമന്ത്രിയെ നേരില്‍ക്കണ്ട് ഹര്‍ജി നല്‍കാനാണ് നാട്ടുകാരുടെ തീരുമാനം. അതേ സമയം കൈവശഭൂമിയിലെ കുരിശ്‌പൊളിച്ചുനീക്കിയ സംഭവത്തില്‍ പ്രതിഷേധം കൂടുതല്‍ ശക്തമാകുകയാണ്. അടുത്തമാസം ഒന്നിന് വൈകുന്നേരംനാലിന് മുണ്ടന്‍മുടി അച്ചന്‍കവലയില്‍ യുഡിഎഫിന്‍റെ നേതൃത്വത്തില്‍ പ്രതിഷേധ യോഗം സംഘടിപ്പിച്ചിട്ടുണ്ട്. മാത്യു കുഴല്‍നാടന്‍ എംഎല്‍എ ഉദ്ഘാടനം ചെയ്യും. വനം-റവന്യുവകുപ്പുകള്‍ക്കെതിരേ പ്രതിഷേധവുമായി സിപിഎം തൊടുപുഴ: തൊമ്മന്‍കുത്തില്‍ കുരിശ് സ്ഥാപിച്ചത് വനംവകുപ്പിന്റെ ഭൂമിയിലാണെന്ന വാദം അടിസ്ഥാനരഹിതമാണെന്ന് സിപി എം ജില്ലാ സെക്രട്ടറി സി. വി. വര്‍ഗീസ്. കുരിശ് നീക്കംചെയ്ത സ്ഥലം സന്ദര്‍ശിച്ച ശേഷം മാധ്യമങ്ങളോടു പ്രതികരിക്കുകയായിരുന്നു അദ്ദേഹം. പതിറ്റാണ്ടുകളായി ഇവിടെ നിന്നിരുന്ന തെങ്ങ് പിഴുതുമാറ്റിയശേഷം അവിടെയാണ് കുരിശ് സ്ഥാപിച്ചത്. ഈ ഭൂമി കര്‍ഷകന്‍റേതാണെന്നതിന് അടിസ്ഥാനപരമായ തെളിവ് ഇവിടെയുള്ള കൃഷിയാണ്. 1991-ല്‍പട്ടയത്തിനായി അന്നുറവന്യു മന്ത്രിയായിരുന്ന കെ. എം. മാണിക്ക് പ്രദേശവാസികള്‍ ഭീമഹര്‍ജി നല്‍കിയിരുന്നു. പട്ടയ നടപടികള്‍ക്കായി സംയുക്ത പരിശോധന അടിയന്തരമായി നടത്തണമെന്ന് അദ്ദേഹം അന്ന് ഉത്തരവിടുകയും ചെയ്തിരുന്നു. ഇതിന്‍റെ രേഖകള്‍ പ്രദേശവാസികളുടെ പക്കലുണ്ട്. കാല്‍നൂറ്റാണ്ടിലേറെയായി പട്ടയ നടപടിയിലേക്ക് നീങ്ങിയ പ്രദേശമാണിത്. എല്‍ഡിഎഫ് സര്‍ക്കാരിന്‍റെ പരിശ്രമഫലമായി കേരളത്തില്‍ വനഭൂമിയുമായി അതിര്‍ത്തി പങ്കിടുന്ന പ്രദേശങ്ങളില്‍ സംയുക്ത പരിശോധന നടത്തി പട്ടയം നല്‍കണമെന്ന് തീരുമാനമെടുത്തു. ജില്ലയിലെ 24വില്ലേജുകള്‍ വനാതിര്‍ത്തി പങ്കിടുന്നുണ്ട്. ഈ പട്ടികയിലാണ് വണ്ണപ്പുറം പഞ്ചായത്തുമുള്ളത്. സംയുക്ത പരിശോധന നടത്തി പ്രദേശവാസികള്‍ക്ക് പട്ടയം നല്‍കാനുള്ള നടപടികളിലേക്ക് സര്‍ക്കാര്‍ അംഗീകരിച്ച സന്ദര്‍ഭത്തിലാണ് ബോധപൂര്‍വം വനംവകുപ്പ് ഇത്തരമൊരു നിലപാട് സ്വീകരിച്ചത്. ഭൂമിയെ സബന്ധിച്ച് ആധികാരികമായി റിപ്പോര്‍ട്ട് ആവശ്യപ്പെടേണ്ടത് കളക്ടറാണ്. റേഞ്ച് ഓഫീസര്‍ ചോദിച്ചപ്രകാരം റിപ്പോര്‍ട്ട് സമര്‍പ്പിക്കേണ്ട ആവശ്യം വില്ലേജ് ഓഫീസര്‍ക്കില്ല. റവന്യു, വനം ഉദ്യോഗസ്ഥരും കപട പരിസ്ഥിതിവാദികളുമാണ് ഇതിനു പിന്നില്‍. സര്‍ക്കാരിന്‍റെ സല്‍പേര് കളങ്കപ്പെടുത്താനുള്ള നീക്കമാണിത്. 28നുമുഖ്യമന്ത്രി നെടുങ്കണ്ടത്ത് എത്തുമ്പോള്‍ പ്രദേശവാസികള്‍ക്ക് നേരിട്ട് കാണാന്‍ ്അവസരമൊരുക്കുമെന്നും അദ്ദേഹം പറഞ്ഞു.

മുഖംമൂടിധാരിയുടെ സാന്നിധ്യം ആളുകളില്‍ ആശങ്ക ഉയര്‍ത്തുന്നു

അടിമാലി: അടിമാലി ടൗണ്‍ പരിസരത്ത് ഇടവഴിയില്‍ മുഖംമൂടി ധാരിയുടെ സാന്നിധ്യം ആളുകളില്‍ ആശങ്ക ഉയര്‍ത്തുന്നു. ടൗണ്‍പരിസരത്ത് കോയിക്കക്കുടി ഭാഗത്താണ് ഇടവഴിയില്‍ മുഖംമൂടിധാരിയുടെ സാന്നിധ്യം ശ്രദ്ധയില്‍പ്പെട്ടിട്ടുള്ളത്. വീടുകള്‍ക്ക് സമീപത്തെ ഇടവഴിയിലൂടെ അജ്ഞാതന്‍ നടന്നുനീങ്ങുന്ന ദൃശ്യം പ്രദേശത്തെ സുരക്ഷാ കാമറയില്‍ പതിഞ്ഞു.

പൈപ്പ് പൊട്ടി കുടിവെള്ളം പാഴാകുന്നു

കട്ടപ്പന: ഇരട്ടയാർ ഗ്രാമപഞ്ചായത്ത് കാറ്റാടിക്കവല വാർഡിൽ രാജേന്ദ്രൻ പടി ഭാഗത്ത് മാസങ്ങളായി കുടിവെള്ള പൊതുനിരത്തിൽ പാഴാകുന്നു. നിരവധിതവണ വാട്ടർ അഥോറിറ്റി അധികൃതരെ വിവരമറിയിച്ചിട്ടും നടപടി ഒന്നും ഉണ്ടാകുന്നില്ല എന്ന് നാട്ടുകാർ പറയുന്നു. വേനൽ കടുത്തതോടെ കുടിവെള്ളം പാഴാക്കാതെ സംരക്ഷിക്കേണ്ട ഈ സാഹചര്യത്തിൽ വാട്ടർ അഥോറിറ്റി അധികൃതർ മാസങ്ങളായി കുടിവെള്ളം പൊതുനിരത്തൽ പാഴാക്കുകയാണ്. ഓരോ ദിവസവും കുടിവെള്ളം പമ്പ് ചെയ്യുമ്പോൾ ലക്ഷക്കണക്കിന് ലിറ്റർ വെള്ളമാണ് പൈപ്പ് പൊട്ടി പൊതുനിരത്തിൽ പാഴാകുന്നത്. വാട്ടർ അഥോറിറ്റിയുടെ ഇരട്ടയാർ നോർത്ത് പമ്പ് ഹൗസിൽനിന്നുമാണ് ഈ ഭാഗത്തേക്ക് വെള്ളം എത്തിക്കുന്നത്. ഇരട്ടയാർ ഡാമിൽനിന്നു വെള്ളം ശേഖരിച്ച് ശുദ്ധീകരിച്ചാണ് വീടുകളിൽ എത്തുന്നത്. വേനൽ കടുത്ത സാഹചര്യത്തിൽ ഡാമിൽ വെള്ളം കുറയുകയുമാണ്. ഈ സമയത്ത് ജലം സംരക്ഷിക്കേണ്ട സ്ഥാനത്താണ് വാട്ടർ അഥോറിറ്റി കുടിവെള്ളം പൊതുനിരത്തിൽ പാഴാക്കുന്നത്.

പി.ജെ. ജോസഫിനെ സന്ദര്‍ശിച്ച് അന്‍വര്‍

തൊടുപുഴ: മുന്‍ എംഎല്‍എയും തൃണമൂല്‍ കോണ്‍ഗ്രസ് നേതാവുമായ പി.വി.അന്‍വര്‍ പി.ജെ.ജോസഫ് എംഎല്‍എയെ പുറപ്പുഴയിലെ വസതിയിലെത്തി സന്ദര്‍ശിച്ചു. യുഡിഎഫ് ഘടകകക്ഷി നേതാക്കളുമായുള്ള ചര്‍ച്ച ആശാവഹമാണെന്നും മുന്നണി പ്രവേശനത്തിന് ധൃതിയില്ലെന്നും കൂടിക്കാഴ്ചയ്ക്കു ശേഷം അന്‍വര്‍ പറഞ്ഞു. രാഷ്ട്രീയ കക്ഷിയെന്നനിലയില്‍ തൃണമൂലിന് മുന്നണി പ്രവേശനം അനിവാര്യമാണെന്നും അദ്ദേഹം പറഞ്ഞു. യുഡിഎഫിലെ കാരണവൻമാരിലൊരാളാണ് പി.ജെ.ജോസഫ്. അദ്ദേഹത്തെ കണ്ട് കാര്യങ്ങള്‍ സംസാരിക്കുകയെന്നത് ഒരു മര്യാദയാണ്. മുന്നണി പ്രവേശനമുമായി ബന്ധപ്പെട്ട് ഒരു നേതാവും എതിര്‍പ്പ് പ്രകടിപ്പിച്ചിട്ടില്ല. പിണറായിസം അവസാനിപ്പിക്കാന്‍ വേണ്ടിയാണ് ഞാന്‍ രാജിവച്ചത്. അതിനുവേണ്ടിയാണ് മുന്നണി പ്രവേശനമെന്നും പി.വി.അന്‍വര്‍ പറഞ്ഞു.കേരളത്തില്‍ സിപിഎമ്മും ബിജെപിയും തമ്മിലുള്ള സംയോജനമാണ് നടക്കുന്നത്. പുതിയ എകെജി സെന്‍ററിന്‍റെ നിറം കാവിയായതും അതിനാലാണെന്ന് അന്‍വര്‍ പരിഹസിച്ചു. സിപിഎമ്മുമായി പ്രശ്‌നങ്ങളുള്ള നേതാക്കളെ സംസ്ഥാന നേതൃത്വത്തില്‍നിന്ന് ഒഴിവാക്കി രാജീവ് ചന്ദ്രശേഖര്‍ വന്നത് ആര്‍എസ്എസ്-ബിജെപി-സിപിഎം കൂട്ടുകെട്ട് ശക്തമാക്കാനാണ്. നിലമ്പൂരില്‍ ഉപതെരഞ്ഞെടുപ്പ് നടക്കുമോ എന്നതില്‍ സംശയമുണ്ട്. അതിനുള്ള നടപടികളൊന്നും നടക്കാത്തത് അതുകൊണ്ടാണ്. തൊമ്മന്‍കുത്തിലെ നാരങ്ങാനത്ത് വനംവകുപ്പ് കുരിശ് തകര്‍ത്ത സംഭവം ബിജെപിയെ പ്രീണിപ്പിക്കാനുള്ള പിണറായി വിജയന്‍റെ ശ്രമമാണ്. ഇന്നലെ വൈകുന്നേരം അഞ്ചോടെയാണ് പി.വി.അന്‍വര്‍ തൊടുപുഴയില്‍ എത്തിയത്. തൃണമൂല്‍ കോണ്‍ഗ്രസില്‍ ചേര്‍ന്ന സജി മഞ്ഞക്കടമ്പിലും അദ്ദേഹത്തിനൊപ്പമുണ്ടായിരുന്നു.

ജമ്മുകാഷ്മീരിലെ ഭീകരാക്രമണം: പ്രതിഷേധം

വ്യാപാരികൾ നെടുംങ്കണ്ടം: ജമ്മു കാശ്മീരിൽ ഭീകരാക്രമണത്തിൽ കൊല്ലപ്പെട്ട നിരപരാധികൾക്ക് ആദരാഞ്ജലികൾ അർപ്പിച്ച് കേരള വ്യാപാരി വ്യവസായി ഏകോപന സമിതി തൂക്കുപാലം യൂണിറ്റിന്‍റെ നേതൃത്വത്തിൽ തൂക്കുപാലത്ത് മൗനജാഥ നടത്തി. വ്യാപാരി വ്യവസായി ഏകോപന സമിതി തൂക്കുപാലം യൂണിറ്റ് പ്രസിഡന്‍റ് വി. എം സാലി, സെക്രട്ടറി പി.എൻ. ചിന്ത, ടി.കെ. തോമസ്, കെ. സുബൈർ, ഹുസൈൻ മോഡേൺ, സുനിൽ അറക്കുളം തുടങ്ങിയവർ നേതൃത്വം നൽകി. കോൺഗ്രസ് രാജാക്കാട് രാജാക്കാട്: കോണ്‍ഗ്രസ് രാജാക്കാട് മണ്ഡലം കമ്മിറ്റിയുടെ നേതൃത്വത്തില്‍ രാജാക്കാട് ടൗണിൽ മെഴുകുതിരി തെളിച്ച് ആദരാഞ്ജലി അര്‍പ്പിച്ച് ഭീകരവിരുദ്ധ പ്രതിജ്ഞ എടുത്തു. മണ്ഡലം കമ്മിറ്റി പ്രസിഡന്‍റ് ജോഷി കന്യാക്കുഴി, കെപിസിസി അംഗം ആർ. ബാലൻപിള്ള, ഉടുമ്പൻചോല ബ്ലോക്ക് പ്രസിഡന്‍റ് എം.പി. ജോസ്, ബിജു പുത്തൻപുര, കിങ്ങിണി രാജേന്ദ്രൻതുടങ്ങിയവർ നേതൃത്വം നൽകി. സംഘപരിവാർ അടിമാലി അടിമാലി: ജമ്മുകാഷ്മീരിലെ ഭീകരാക്രമണത്തിലും കൂട്ടക്കുരുതിയിലും പ്രതിഷേധിച്ച് സംഘപരിവാര്‍ പ്രവര്‍ത്തകര്‍ അടിമാലിയില്‍ പ്രകടനം നടത്തി. ജില്ലാ കാര്യവാഹ് ബാബു, എം.പി. ജയന്‍, എ.പി. ശെല്‍വന്‍ തുടങ്ങിയവർ നേതൃത്വം നല്‍കി. കോണ്‍ഗ്രസ് ദേവികുളം അടിമാലി: യൂത്ത് കോണ്‍ഗ്രസ് ദേവികുളം നിയോജക മണ്ഡലം കമ്മിറ്റിയുടെ ആഭിമുഖ്യത്തില്‍ പ്രധിഷേധ ജ്വാല സംഘടിപ്പിച്ചു.കോണ്‍ഗ്രസ് മുന്‍ അടിമാലി ബ്ലോക്ക് പ്രസിഡന്‍റ് ജോര്‍ജ് തോമസ്, യൂത്ത് കോണ്‍ഗ്രസ് നിയോജക മണ്ഡലം പ്രസിഡന്‍റ് അനില്‍ കനകന്‍, കോണ്‍ഗ്രസ് അടിമാലി മണ്ഡലം പ്രസിഡന്‍റ് ഹാപ്പി കെ. വര്‍ഗീസ്, യൂത്ത് കോണ്‍ഗ്രസ് മുന്‍ സംസ്ഥാന സെക്രട്ടറി എം.എ. അന്‍സാരി, അമല്‍ ബാബു തുടങ്ങിയവര്‍ നേതൃത്വം നൽകി. കോണ്‍ഗ്രസ് കട്ടപ്പന കട്ടപ്പന: കോണ്‍ഗ്രസ് കട്ടപ്പന മണ്ഡലം കമ്മിറ്റി ദീപം തെളിയിച്ച് ഭീകരവിരുദ്ധ പ്രതിജ്ഞ എടുത്തു. കട്ടപ്പന നഗരസഭാ മിനി സ്റ്റേഡിയത്തില്‍ എഐസിസി അംഗം അഡ്വ. ഇ.എം. അഗസ്തി ഉദ്ഘാടനം ചെയ്തു. മണ്ഡലം പ്രസിഡന്‍റ് സിജു ചക്കുംമൂട്ടില്‍, കെപിസിസിസി സെക്രട്ടറി തോമസ് രാജന്‍, ജോയി ആനിത്തോട്ടം, കെ.എ. മാത്യു, സിബി പാറപ്പായി, ഷാജി വെള്ളംമാക്കല്‍ തുടങ്ങിയവര്‍ പ്രസംഗിച്ചു.

ശന്പളവർധന നടപ്പാക്കാത്തത് പ്രതിഷേധാർഹം: കെപിഎസ്ടിഎ

തൊടുപുഴ: സമഗ്ര ശിക്ഷ കേരളയിലെ ജീവനക്കാരുടെ വേതനം അഞ്ച് ശതമാനം വർധിപ്പിച്ചിരിക്കെ പദ്ധതിയിലെ സ്പെഷൽ എഡ്യുക്കേറ്റേഴ്സിനെയും സ്പെഷലിസ്റ്റ് അധ്യാപകരെയും വർധനയിൽനിന്ന് ഒഴിവാക്കിയ സർക്കാർ നടപടി അംഗീകരിക്കാൻ കഴിയില്ലെന്ന് കെപിഎസ്ടിഎ ജില്ലാ കമ്മിറ്റി. ഒന്പത് വർഷമായി വേതനവർധന ലഭിക്കാത്ത സംസ്ഥാനത്തെ ഏക തൊഴിൽ വിഭാഗമാണ് കരാർ അടിസ്ഥാനത്തിൽ നിയമിക്കപ്പെട്ട സ്പെഷൽ എഡ്യുക്കേറ്റേഴ്സ്. 28815 രൂപ പ്രതിമാസ വേതനമുണ്ടായിരുന്ന സെക്കൻഡറി വിഭാഗം സ്പെഷൽ എഡ്യുക്കേറ്റേഴ്സിന്‍റെ വേതനം 25000 രൂപയായി 2018ൽ സർക്കാർ വെട്ടിക്കുറച്ചിരുന്നു. പൊതുവിദ്യാലയങ്ങളിൽ സ്പെഷൽ എഡ്യുക്കേറ്റേഴ്സ് തസ്തിക സൃഷ്ടിക്കണമെന്നും നിലവിലെ കരാർ അധ്യാപകരെ സ്കൂളുകളിൽ സ്ഥിരപ്പെടുത്തണമെന്നും സുപ്രീം കോടതി 2025 മാർച്ച് ഏഴിന് ഉത്തരവിട്ടിരുന്നു. 12 ആഴ്ചകൾക്കകം സ്പെഷൽ എഡ്യുക്കേറ്റേർമാരുടെ സ്ഥിരനിയമന നടപടി പൂർത്തീയാക്കണമെന്നും സുപ്രീംകോടതി വിധിച്ചിരുന്നു. എന്നാൽ കോടതിവിധി വന്ന് ഒന്നര മാസം കഴിഞ്ഞിട്ടും നടപടി സ്വീകരിക്കാൻ സർക്കാർ തയാറായിട്ടില്ലെന്ന് യോഗം കുറ്റപ്പെടുത്തി. സംസ്ഥാന സെക്രട്ടറി പി.എം. നാസർ ഉദ്ഘാടനം ചെയ്തു. ജില്ലാ പ്രസിഡന്‍റ് ജോബിൻ കദളിക്കാട്ടിൽ അധ്യക്ഷത വഹിച്ചു. ബിജോയി മാത്യു, ജോർജ് ജേക്കബ്, വി.കെ.ആറ്റ്‌ലി, സുനിൽ ടി. തോമസ്, ഷിന്‍റോ ജോർജ്, സജി മാത്യു, എം.വി. ജോർജുകുട്ടി, ടി. ശിവകുമാർ എന്നിവർ പ്രസംഗിച്ചു.

ജില്ലാ ഹോമിയോ ആശുപത്രി വികസനം: ഭൂരേഖ കൈമാറി

മുട്ടം: ജില്ലാ ഹോമിയോ ആശുപത്രിയുടെ വികസനത്തിനായി റവന്യൂ വകുപ്പിൽനിന്ന് ലഭിച്ച ഭൂമിയുടെ രേഖ കൈമാറ്റ ചടങ്ങും രക്തദാന ക്യാന്പും ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ഉദ്ഘാടനം ചെയ്തു. ജില്ലാ പഞ്ചായത്ത് വൈസ് പ്രസിഡന്‍റ് ഉഷാകുമാരി മോഹൻകുമാർ അധ്യക്ഷത വഹിച്ചു. ഭൂരേഖ തഹസിൽദാർ കെ.എച്ച്. സക്കീറിൽനിന്നു ഭൂമിയുടെ രേഖകൾ ജില്ലാ പഞ്ചായത്ത് പ്രസിഡന്‍റും ഹോമിയോപ്പതി ജില്ലാ മെഡിക്കൽ ഓഫീസർ ഡോ. വിനീത ആർ. പുഷ്കരനും ചേർന്ന് ഏറ്റുവാങ്ങി. ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ കെ.ജി.സത്യൻ, ആശുപത്രി സൂപ്രണ്ട് ഡോ. പി.ജി. ബിജു, മെഡിക്കൽ ഓഫീസർ ഡോ. അനു ജോസഫ്, മാനേജ്മെന്‍റ് കമ്മിറ്റി അംഗം ടോമി ജോർജ് എന്നിവർ പ്രസംഗിച്ചു. ഡോ. ദേവി അന്തർജനം ക്ലാസ് നയിച്ചു.

ഇതരസംസ്ഥാന തൊഴിലാളികളുടെ വിവരശേഖരണവുമായി പോലീസ്

തൊടുപുഴ: ഇതര സംസ്ഥാന തൊഴിലാളികൾ ഉൾപ്പെടുന്ന ക്രിമിനൽ കേസുകൾ കൂടുതലായി റിപ്പോർട്ട് ചെയ്യപ്പെടുന്ന സാഹചര്യത്തിൽ ജില്ലയിലെ വിവിധ മേഖലകളിൽ തൊഴിൽ ചെയ്യുന്ന ഇതര സംസ്ഥാന തൊഴിലാളികളുടെ പൂർണ വിവരം ശേഖരിക്കാൻ പോലീസിന്‍റെ നീക്കം. തൊഴിലുടമകളുടെയും കരാറുകാരുടെയും തൊഴിലാളികളെ താമസിപ്പിക്കുന്ന കെട്ടിട ഉടമകളുടെയും യോഗം വിളിച്ച് അതിഥി പോർട്ടലിൽ രജിസ്റ്റർ ചെയ്യുന്നതടക്കമുള്ള നിർദേശം നൽകാനാണ് തീരുമാനം. ആദ്യ യോഗം മൂന്നാർ പോലീസിന്‍റെ നേതൃത്വത്തിൽ ടാറ്റാ ഓൾഡ് മൂന്നാർ സ്കൗട്ട് സെൻട്രലിൽ നടത്തി. എല്ലാ പോലീസ് സ്റ്റേഷൻ പരിധിയിലും യോഗം ചേർന്ന് മേയ് 15ന് മുന്പായി നടപടികൾ പൂർത്തിയാക്കും. തൊഴിൽ തേടിയെത്തുന്നവരുടെ വിവരങ്ങൾ അതിഥി പോർട്ടലിൽ രജിസ്റ്റർ ചെയ്യുന്നതിന് നിർദ്ദേശമുണ്ടെങ്കിലും പല തൊഴിലുടമകളും ഇക്കാര്യം പാലിക്കാത്തതിനാലാണ് നടപടി. മാനദണ്ഡങ്ങൾ കൃത്യമായി പാലിക്കാതെയും പോലീസിലോ വിവിധ വകുപ്പുകളിലോ അറിയിക്കാതെയും പല തൊഴിലുടമകളും ജില്ലയിലെന്പാടും ഇതര സംസ്ഥാന തൊഴിലാളികളെ ജോലിക്ക് നിയോഗിച്ചിട്ടുള്ളതായി ശ്രദ്ധയിൽപ്പെട്ടതിനെത്തുടർന്ന് കളക്ടറാണ് നടപടിക്ക് നിർദേശിച്ചത്. ഏതാനും നാളുകളായി ഇതരസംസ്ഥാന തൊഴിലാളികൾ കൊലപാതകം ഉൾപ്പെടെയുള്ള ഗുരുതര കുറ്റകൃത്യങ്ങളിലും ലഹരി ഉത്പന്നങ്ങൾ കടത്തിക്കൊണ്ടുവന്ന് വിൽപ്പന നടത്തുന്നതിലുമടക്കം പങ്കാളികളാകുന്നത് ശ്രദ്ധയിൽപ്പെട്ടതിനെത്തുടർന്നാണ് പോലീസിന്‍റെ നീക്കം. ജില്ലയിൽ 23,000 പേർ മാത്രമാണ് നിലവിൽ അതിഥി പോർട്ടലിൽ രജിസ്റ്റർ ചെയ്തിരിക്കുന്നത്. തൊടുപുഴ, മൂന്നാർ, ശാന്തൻപാറ, പീരുമേട്, നെടുങ്കണ്ടം എന്നിവിടങ്ങളിലെ ലേബർ ഓഫീസുകളിലാണ് രജിസ്ട്രേഷനുള്ളത്. കാർഷിക, നിർമാണ, വ്യാപാര മേഖലകളിൽ ആയിരക്കണക്കിന് ഇതര സംസ്ഥാന തൊഴിലാളികൾ ജോലി ചെയ്യുന്നതിനാൽ ഇവരുടെ എണ്ണം ഇതിലും ഏറെയാണെന്നാണ് സൂചന. രജിസ്റ്റർ ചെയ്യാത്തതിനാൽ കുറ്റകൃത്യം നടത്തി നാടുവിട്ടാൽ ഇവരെ കണ്ടെത്താനും പോലീസിന് ഏറെ പണിപ്പെടേണ്ടി വരും. ഏലത്തോട്ടം മേഖലകളിലും മറ്റും കുടുംബസമേതമാണ് അതിഥി തൊഴിലാളികൾ ജോലിയെടുക്കുന്നത്. അസാം, ബീഹാർ, ജാർഖണ്ഡ്, പശ്ചിമ ബംഗാൾ, ഒറീസ അടക്കമുള്ള വിവിധ ഉത്തരേന്ത്യൻ സംസ്ഥാനങ്ങളിൽനിന്നുള്ള ധാരാളം തൊഴിലാളികൾ ജില്ലയിലുണ്ടെന്ന് ജില്ലാ ലേബർ ഓഫീസർ കെ.ആർ. സ്മിത പറഞ്ഞു. തൊടുപുഴ, മൂന്നാർ മേഖലകളിലാണ് കൂടുതൽ പേരുള്ളത്. രജിസ്റ്റർ ചെയ്യാതെ മാറിനിൽക്കുന്നവരുണ്ട്. പൂർണമായ വിവരങ്ങൾ കണ്ടെത്താൻ പരമാവധി ശ്രമം നടത്തുന്നുണ്ടെന്നും ലേബർ ഓഫീസർ പറഞ്ഞു. നിർദേശങ്ങൾ തൊഴിൽ, കെട്ടിട ഉടമകൾ തൊഴിലാളികളുടെ വിവരങ്ങളടങ്ങിയ രജിസ്റ്റർ സൂക്ഷിക്കണം. ആധാർ കാർഡിന്‍റെ പകർപ്പ്, ഫോട്ടോ, മേൽവിലാസം, ഫോണ്‍ നന്പർ എന്നിവ വാങ്ങണം, പകർപ്പ് തൊട്ടടുത്ത പോലീസ് സ്റ്റേഷനിൽ നൽകണം. തൊഴിലാളികളുടെ വിവരങ്ങൾ അതിഥി പോർട്ടലിൽ രജിസ്റ്റർ ചെയ്യണം. തൊഴിലാളികൾ നാട്ടിലെത്തിയത്, തിരികെ പോയത്, എവിടെയാണ് താമസിച്ചത് തുടങ്ങിയ വിവരങ്ങൾ സൂക്ഷിക്കണം. തൊഴിലാളികൾ താമസിക്കുന്നിടത്ത് ലഹരി ഉപയോഗവും നിയമവിരുദ്ധ പ്രവർത്തനങ്ങളും നടക്കുന്നുണ്ടോയെന്ന് ഉടമകൾ പരിശോധിക്കണം, നിയമലംഘനങ്ങൾ പോലീസിനെ അറിയിക്കണം. ബാലവേല ശ്രദ്ധയിൽപ്പെട്ടാൽ ഉദ്യോഗസ്ഥരെ അറിയിക്കണം. ലഹരി ഉപയോഗമോ വിൽപ്പനയോ ശ്രദ്ധയിൽപെട്ടാൽ യോദ്ധാവ് വാട്ട്സ്ആപ്പ് നന്പറായ 9995966666, 9497912594 എന്ന നന്പറിലോ, പോലീസ് സ്റ്റേഷനിലോ അറിയിക്കണം.

ഇടുക്കി രൂപതയിൽ മാർപാപ്പാ അനുസ്മരണം ഇന്ന്

ചെറുതോണി: ഇടുക്കി രൂപതയിൽ ഇന്നു ഫ്രാൻസിസ് മാർപാപ്പാ അനുസ്മരണം നടത്തും. വാഴത്തോപ്പ് സെന്‍റ് ജോർജ് കത്തീഡ്രൽ പള്ളിയിൽ വൈകുന്നേരം 5.15ന് പ്രത്യേക ആരാധനയും 5.45ന് സമൂഹ ബലിയും തുടർന്നു മെഴുകുതിരി പ്രദക്ഷിണവും നടക്കും. സമൂഹ ബലിക്ക് ബിഷപ് മാർ ജോണ്‍ നെല്ലിക്കുന്നേൽ മുഖ്യകാർമികത്വം വഹിക്കും. രൂപതയിലെ മുഴുവൻ വൈദികരും സഹകാർമികരാകും. രൂപതയിലെ സന്യാസിനിമാരുടെ പ്രതിനിധികളുംഭക്തസംഘടനാ ഭാരവാഹികളും ഇടവകപ്രതിനിധികളും അനുസ്മരണ പരിപാടികളിൽ പങ്കാളികളാകും. ഫ്രാൻസിസ് മാർപാപ്പയുടെ ചിത്രത്തിൽ പുഷ്പാർച്ചനയും നടത്തും. മാർ ജോണ്‍ നെല്ലിക്കുന്നേൽ അനുസ്മരണ സന്ദേശം നൽകും. രൂപതയിലെ എല്ലാ ഇടവകകളിലും ശനി, ഞായർ ദിവസങ്ങളിൽ പാപ്പായുടെ പ്രത്യേക അനുസ്മരണം നടത്തും. ഞായറാഴ്ച പള്ളിയിൽ പാപ്പായുടെ സ്മരണാർഥം വിശുദ്ധ ബലിയർപ്പിക്കുകയും പുതിയ മാർപാപ്പയ്ക്കായി പ്രാർഥിക്കുകയും ചെയ്യണമെന്ന് ബിഷപ് നിർദേശിച്ചു.

ഫ്രാൻസിസ് മാർപാപ്പാ സ്മരണയിൽ കാഞ്ഞിരപ്പള്ളി രൂപതയിൽ പ്രാർഥനാദിനം

കാഞ്ഞിരപ്പള്ളി: ഫ്രാൻസിസ് മാർപാപ്പയുടെ കബറടക്ക ശുശ്രൂഷകൾ നടത്തപ്പെടുന്ന നാളെ കാഞ്ഞിരപ്പള്ളി രൂപതയിൽ പ്രത്യേക പ്രാർഥനാദിനമായി ആചരിക്കുന്നതിന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ നിർദേശം നൽകി. രൂപതയിലെ എല്ലാ ഇടവകകളിലും പരിശുദ്ധ പിതാവിനെ അനുസ്മരിച്ച് വിശുദ്ധ കുർബാന അർപ്പിക്കുകയും ഒപ്പീസ് നടത്തുകയും ചെയ്യും. യാമ ശുശ്രൂഷകളിലുൾപ്പെടെ കുടുംബ നമസ്കാരങ്ങളിൽ പരിശുദ്ധ പിതാവിനെ പ്രത്യേകം സ്മരിക്കും. രൂപതയിലെ എല്ലാ ഓഫീസുകൾക്കും വിദ്യാഭ്യാസ സ്ഥാപനങ്ങളുൾപ്പെടെയുള്ള സ്ഥാപനങ്ങൾക്കും അവധിയായിരിക്കും. ‌മുൻകൂട്ടി നിശ്ചയിച്ച പരീക്ഷകൾ നടത്തപ്പെടുന്നതാണ്. പരിശുദ്ധ പിതാവിന്‍റെ കബറടക്ക ശുശ്രൂഷയിൽ ദൃശ്യ- ശ്രാവ്യ മാധ്യമങ്ങളിലൂടെ ആത്മനാ പങ്കുചേരുന്നതിനും നിർദേശം നൽകിയിട്ടുണ്ട്. പ്രാർഥനാദിനങ്ങളായാചരിക്കുന്ന ഒന്പതു ദിവസങ്ങളിലും രൂപതയിലെ ഇടവകകളിലെയും സ്ഥാപനങ്ങളിലെയും എല്ലാ ആഘോഷ പരിപാടികളും ഒഴിവാക്കേണ്ടതാണ്. മുൻകൂട്ടി നിശ്ചയിച്ച തിരുനാളുകളും പ്രത്യേക പ്രാധാന്യമുള്ള പരിപാടികളും മാറ്റി വയ്ക്കാനാവാത്ത സാഹചര്യമാണെങ്കിൽ മാത്രം പരിശുദ്ധ പിതാവിനെ അനുസ്മരിച്ചും അദ്ദേഹത്തോടുള്ള ആദരവ് പ്രകടിപ്പിച്ചും ആഘോഷങ്ങൾ ഒഴിവാക്കി നടത്താവുന്നതാണെന്ന് രൂപത കേന്ദ്രത്തിൽനിന്ന് അറിയിച്ചു.

ഫ്രാന്‍സിസ് മാര്‍പാപ്പ മൂന്നാം ക്രിസ്തു: മാര്‍ ജോസഫ് കല്ലറങ്ങാട്ട്

പാലാ: രണ്ടാം ക്രിസ്തു എന്ന് ചരിത്രത്തില്‍ അറിയപ്പെടുന്ന വിശുദ്ധ ഫ്രാന്‍സിസിന്‍റെ നാമം സ്വീകരിച്ച ഫ്രാന്‍സിസ് മാര്‍പാപ്പയെ ചരിത്രം മൂന്നാം ക്രിസ്തു എന്ന് വിശേഷിപ്പിക്കുമെന്ന് പാലാ ബിഷപ് മാര്‍ ജോസഫ് കല്ലറങ്ങാട്ട്. പാലാ സെന്‍റ് തോമസ് കത്തീഡ്രലില്‍ ഇന്നലെ നടന്ന അനുസ്മരണയോഗത്തില്‍ പ്രസംഗിക്കുകയായിരുന്നു ബിഷപ്. ഫ്രാന്‍സിസ് പാപ്പാ നിര്‍വചനങ്ങള്‍ക്ക് അതീതമായി സമാനതകളില്ലാത്ത നേതൃത്വ മികവിലൂടെ ഒരായുസ് മുഴുവന്‍ സുവിശേഷത്തിന്‍റെ മൂല്യങ്ങളെ ലോകത്തിന് പകര്‍ന്നുതന്ന വിശ്വപൗരനാണ് എന്നും അദ്ദേഹം കൂട്ടിച്ചേര്‍ത്തു. ലോകത്തെ മുഴുവന്‍ പ്രകാശിപ്പിക്കുന്ന വെളിച്ചമായിരുന്ന അദ്ദേഹം ഇരുപത്തിയൊന്നാം നൂറ്റാണ്ടില്‍ നമ്മുടെ ചിന്താമണ്ഡലത്തെ നിരന്തരം സ്വാധീനിച്ച വ്യക്തിയാണെന്നും അനുസ്മരണ സന്ദേശത്തില്‍ ബിഷപ് വിശ്വാസികളെ ഓര്‍മിപ്പിച്ചു. അനുസ്മരണയോഗത്തിലും പ്രാര്‍ഥനാ ശുശ്രൂഷയിലും പാലാ രൂപതാ മുന്‍ അധ്യക്ഷന്‍ മാര്‍ ജോസഫ് പള്ളിക്കാപ്പറമ്പിലും രൂപതയിലെ എല്ലാ വൈദികരും പാസ്റ്ററല്‍ കൗണ്‍സില്‍ അംഗങ്ങളും കത്തീഡ്രല്‍ ഇടവകാംഗങ്ങളും പങ്കെടുത്തു. മുഖ്യവികാരി ജനറാള്‍ മോണ്‍. ജോസഫ് തടത്തില്‍ സ്വാഗതം പറഞ്ഞു. എംഎസ്ടി ഡയറക്ടര്‍ ജനറാള്‍ റവ.ഡോ. വിന്‍സെന്‍റ് ജോസഫ് കദളികാട്ടില്‍പുത്തന്‍പുര, വികാരി ജനറാള്‍മാരായ മോണ്‍. ജോസഫ് മലേപ്പറമ്പില്‍, മോണ്‍. സെബാസ്റ്റ്യന്‍ വേത്താനത്ത്, മോണ്‍. ജോസഫ് കണിയോടിക്കല്‍, കത്തീഡ്രല്‍ പള്ളി വികാരി റവ.ഡോ. ജോസ് കാക്കല്ലില്‍, രൂപത പ്രൊക്യുറേറ്റര്‍ റവ.ഡോ. ജോസഫ് മുത്തനാട്ട് എന്നിവര്‍ നേതൃത്വം നല്‍കി. രൂപത ചാന്‍സലര്‍ റവ. ഡോ. ജോസഫ് കുറ്റിയാങ്കല്‍ നന്ദി പറഞ്ഞു.

കോളജ് ബസ് കൊക്കയിലേക്ക് മറിഞ്ഞ് പരിക്ക്

മൂലമറ്റം: പുള്ളിക്കാനം ഡിസി കോളജിന് സമീപം ബസ് കൊക്കയിലേക്ക് മറിഞ്ഞു. ഡിസി കോളജിന്‍റെ ബസാണ് അപകടത്തിൽപ്പെട്ടത്. ഇന്നലെ രാത്രി 7.15 നായിരുന്നു അപകടം. കോളജിന്‍റെ കോമ്പൗണ്ടിലേക്ക് തന്നെയാണ് ബസ് മറിഞ്ഞത്. ചെന്നൈയിൽനിന്നെത്തിയ വിദ്യാർഥികളുമായി ഡിസി കോളജിലേക്ക് വരുന്നതിനിടെയാണ് അപകടം. വാഗമൺ ഭാഗത്തുനിന്നു കോളജിലേക്ക് വരുന്ന വഴിയാണ് അപകടം ഉണ്ടായത്. 30 അടി താഴ്ചയിലേക്കാണ് ബസ് മറിഞ്ഞത്. കനത്ത കോടമഞ്ഞ് കാരണം ഡ്രൈവർക്ക് വഴി കാണാൻ കഴിയാതിരുന്നതാണ് അപകട കാരണമെന്ന് കരുതുന്നു. 25 ഓളം വിദ്യാർഥികളാണ് ബസിൽ ഉണ്ടായിരുന്നത്. പരിക്കേറ്റവരെ നാട്ടുകാർ മൂലമറ്റത്തെ സ്വകാര്യ ആശുപത്രിയിൽ എത്തിച്ചു. മൂലമറ്റം അഗ്നിരക്ഷാസേനയും വാഗമൺ പോലീസും സ്ഥലത്തെത്തിയിരുന്നു. സാരമായി പരിക്കേറ്റ ഡ്രൈവർ ഇടാട്ട് കാഞ്ഞിരക്കാട്ടുകുന്നേൽ ജോസുകുട്ടിയെ (35) സ്വകാര്യ ആശുപത്രിയിൽ പ്രവേശിപ്പിച്ചു. മറ്റു വിദ്യാർഥികളുടെ പരിക്ക് ഗുരുതരമല്ലെന്ന് ആശുപത്രി അധികൃതർ പറഞ്ഞു.

നിയന്ത്രണം വിട്ട കാർ തോട്ടിലേക്കു മറിഞ്ഞു

തൊടുപുഴ: മണക്കാട് - ചിറ്റൂർ റൂട്ടിൽ ആൽപാറയ്ക്ക് സമീപം നിയന്ത്രണം വിട്ട കാർ വൈദ്യുതി പോസ്‌റ്റ് ഇടിച്ചു തകർത്ത് തോട്ടിലേയ്ക്കു മറിഞ്ഞു. കാർ ഡ്രൈവർ നിസാര പരിക്കോടെ രക്ഷപ്പെട്ടു. ഇന്നലെ ഉച്ചയ്ക്ക് ഒന്നോടെയായിരുന്നു അപകടം. തെങ്ങനാട്ട് പാലത്തിനു സമീപത്തെ പോസ്റ്റിൽ ഇടിച്ച കാർ 12 അടി താഴ്‌ചയുള്ള തോട്ടിലേക്ക് മറിയുകയായിരുന്നു. വെങ്ങല്ലൂർ പനച്ചികുന്നേൽ സാബുവിന്‍റെ കാറാണ് അപകടത്തിൽപ്പെട്ടത്. എതിരേ വന്ന വാഹനത്തിന് സൈഡ് നൽകാനായി വാഹനം വെട്ടിച്ചപ്പോൾ നിയന്ത്രണം വിട്ടു മറിയുകയായിരുന്നു. തൊടുപുഴ അഗ്നിരക്ഷാ സ്റ്റേഷൻ ഓഫീസർ ബിനു സെബാസ്റ്റ്യന്‍റെ നേതൃത്വത്തിൽ തൊടുപുഴയിൽനിന്ന് അഗ്‌നിശമനസേന സ്ഥലത്തെത്തി രക്ഷാപ്രവർത്തനം നടത്തി.

പള്ളിയുടെ മുകളിൽനിന്നു വീണ യുവാവ് മരിച്ചു

ഉപ്പുതറ: പള്ളിപ്പെരുന്നാളിന് തോരണം കെട്ടുന്നതിനിടെ കാൽവഴുതി വീണ് പരിക്കേറ്റ യുവാവ് ചികിത്സയിലിരിക്കേ മരിച്ചു. വളകോട് ചിറയിൽ യോഹന്നാന്‍റെ മകൻ മനോജ് (39) ആണ് മരിച്ചത്. 23 മുതൽ 27വരെ നടത്താനിരുന്ന വളകോട് സെന്‍റ്് ജോർജ് മലങ്കര കത്തോലിക്ക പള്ളിപ്പെരുന്നാളിന്‍റെ അലങ്കാരപ്പണിക്കിടെ 21 തിങ്കളാഴ്ച രാവിലെ 11 നാണ് അപകടം. തോരണം വലിച്ചുകെട്ടുന്നതിനിടെ പള്ളിക്ക് മുകളിൽനിന്ന് കാൽ വഴുതി വീഴുകയായിരുന്നു. വീഴ്ചയിൽ തലയ്ക്ക് ഗുരുതരമായി പരിക്കേറ്റു. ഒപ്പമുണ്ടായിരുന്നവർ മനോജിനെ പാലായിലെ സ്വകാര്യ ആശുപത്രിയിൽ പ്രവേശിപ്പിച്ചു. വ്യാഴാഴ്ച രാവിലെ 11.15 ന് മരിച്ചു. അപകടത്തെത്തുടർന്ന് പള്ളിപ്പെരുനാൾ മാറ്റിവച്ചു. പോസ്റ്റ് മോർട്ടത്തിനു ശേഷം മൃതദേഹം ഇന്ന് ഉച്ചയ്ക്കു വീട്ടിലെത്തിക്കും. തുടർന്നു മൂന്നിന് തുടങ്ങുന്ന അന്ത്യകർമത്തിനുശേഷം അഞ്ചിന് വളകോട് സെന്‍റ് ജോർജ് മലങ്കര കത്തോലിക്ക പള്ളി സെമിത്തേരിയിൽ സംസ്കരിക്കും. മാതാവ്: അന്നമ്മ. സഹോദരങ്ങൾ: മഞ്ചു, ബിൻസി.

മകളോട് ലൈംഗികാതിക്രമം: പിതാവിന് 17 വർഷം കഠിനതടവ്

ചെറുതോണി: പതിമൂന്നുകാരിയായ മകളോട് ലൈംഗികാതിക്രമം നടത്തിയ കേസിൽ കുട്ടിയുടെ പിതാവിന് 17 വർഷം കഠിന തടവും 1,50,000 രൂപ പിഴയും. പൈനാവ് അതിവേഗ കോടതി ജഡ്ജി ലൈജുമോൾ ഷെരീഫ് ആണ് ശിക്ഷ വിധിച്ചത്. പൂമാല സ്വാദേശിയായ 41 കാരനെയാണ് ശിക്ഷിച്ചത്. 2022 ലാണ് കേസിനാസ്പദമായ സംഭവം. കുട്ടിയുടെ മാതാവ് കുട്ടിയെയും അനുജത്തിയെയും വീട്ടിലിരുത്തി അയൽക്കൂട്ടത്തിന് പോയ സമയം പിതാവ് കുട്ടിയെ മുറിയിൽ വിളിച്ചുവരുത്തി അതിക്രമം കാണിച്ചുവെന്നാണ് കേസ്. അതിന് മുൻപും പ്രതി പലതവണ ഇപ്രകാരം ചെയ്തിട്ടുള്ളതായും കുട്ടി മൊഴിയിൽ പറയുന്നു. ട്യൂഷൻ കഴിഞ്ഞു വീട്ടിൽ പോകാൻ മടികാണിച്ചിരുന്ന കുട്ടിയെ ശ്രദ്ധിച്ച കൂട്ടുകാരി ഈ വിവരം സ്വന്തം വീട്ടിൽ പറഞ്ഞു. തുടർന്ന് നടത്തിയ കൗൺസലിംഗിലാണ് പീഡന വിവരം പുറത്തായത്. 13 സാക്ഷികളെയും 15 പ്രമാണങ്ങളും പ്രൊസീക്യൂഷൻ കോടതിയിൽ ഹാജരാക്കി. വിസ്താരവേളയിൽ പെൺകുട്ടിയുടെ മാതാവ് കൂറുമാറി പ്രതിക്ക് അനുകൂലമായി മൊഴി പറയുന്ന സാഹചര്യവും ഉണ്ടായി. എസ്ഐ ജിബിൻ തോമസ്, എഎസ്ഐ ജെയ്സൺ ജോൺ, സീനിയർ സിവിൽ പോലീസ് ഓഫീസർ പി.കെ. ആശ തുടങ്ങിയവരാണ് കേസ് അന്വേഷണം നടത്തിയത്. പോസ്ക്യൂഷനു വേണ്ടി സ്പെഷൽ പബ്ലിക് പ്രോസീക്യൂട്ടർ അഡ്വ. ഷിജോമോൻ ജോസഫ് കോടതിയിൽ ഹാജരായി.

ബൈക്കും ബസും കൂട്ടിയിടിച്ച് യുവാവിന് പരിക്ക്

മുട്ടം: സ്വകാര്യ ബസിന് പിന്നിൽ ബൈക്ക് ഇടിച്ചുകയറി യുവാവിന് പരിക്കേറ്റു. മുട്ടം കുറ്റിക്കാട്ടിൽ അജിൻ സജിക്കാണ് (21) പരിക്കേറ്റത്. ഇന്നലെ ഉച്ചയ്ക്ക് 12.45 ന് മുട്ടം ടെലഫോണ്‍ എക്സേഞ്ചിന് സമീപത്തായിരുന്നു അപകടം. മുന്നിൽ പോയ ബസ് റോഡിൽ പെട്ടെന്ന് നിർത്തിയതിനെത്തുടർന്ന് പിന്നാലെ വന്ന ബൈക്ക് നിയന്ത്രണം നഷ്ടപ്പെട്ട് ബസിൽ ഇടിക്കുകയായിരുന്നു. തൊടുപുഴയിലുള്ള സ്വകാര്യ ആശുപത്രിയിൽ പ്രവേശിപ്പിച്ച അജിയെ പിന്നീട് കോട്ടയം മെഡിക്കൽ കോളജിലേക്ക് മാറ്റി. മുട്ടം പോലീസും സ്ഥലത്തെത്തിയിരുന്നു.

പന്നിമറ്റം-മേത്തൊട്ടി-മൂലക്കാട് റോഡ് ടാറിംഗ് പൂർത്തിയാക്കും

ഇടുക്കി: പാതിവഴിയിൽ ടാറിംഗ് നിലച്ച പന്നിമറ്റം- മേത്തൊട്ടി മൂലക്കാട് റോഡിന്‍റെ ടാറിംഗ് മനുഷ്യാവകാശ കമ്മീഷന്‍റെ ഇടപെടലിനെത്തുടർന്ന് പൂർത്തിയാക്കാൻ വഴിയൊരുങ്ങുന്നു. ചെയർപേഴ്സണ്‍ ജസ്റ്റിസ് അലക്സാണ്ടർ തോമസ് ജില്ലാ പഞ്ചായത്ത് പ്രോഗ്രാം ഇംപ്ലിമെന്‍റ് യൂണിറ്റ് എക്സിക്യൂട്ടീവ് എൻജനിയറെ വിളിച്ചുവരുത്തി നൽകിയ നിർദേശത്തിന്‍റെ അടിസ്ഥാനത്തിലാണ് ടാറിംഗ് പുനരാരംഭിക്കുന്നത്. 2018ലാണ് റോഡിന്‍റെ നിർമാണം പൂർത്തിയാക്കിയത്. റോഡിന്‍റെ 900 മീറ്റർ ടാറിംഗ് പൂർത്തിയാക്കാനുണ്ടെന്നാണ് പരാതി. അവശേഷിക്കുന്ന ഭാഗത്തിന്‍റെ ടാറിംഗ് കാലതാമസം കൂടാതെ പൂർത്തിയാക്കണമെന്ന് ജസ്റ്റിസ് അലക്സാണ്ടർ തോമസ് എക്സിക്യൂട്ടീവ് എൻജനിയർക്ക് നിർദേശം നൽകി. 285 മീറ്റർ റോഡ് മാത്രമാണ് ടാറിംഗ് നടത്താനുള്ളതെന്ന് എക്സിക്യൂട്ടീവ് എൻജനീയർ അറിയിച്ചു. വനംവകുപ്പിന്‍റെ അധീനതയിലുള്ള സ്ഥലമായതിനാൽ സാങ്കേതികമായും പ്രായോഗികമായും സാന്പത്തികമായും ടാറിംഗ് നടത്താൻ ബുദ്ധിമുട്ടുണ്ട്. പിഎംജിഎസ്‌വൈ പദ്ധതി പ്രകാരമാണ് ടാറിംഗ് പൂർത്തിയാക്കിയതെന്നും റിപ്പോർട്ടിൽ പറയുന്നു. എന്നാൽ പിഎംജിഎസ്‌വൈ പദ്ധതിയിലെ പുതുക്കിയ ചട്ടപ്രകാരം അവശേഷിക്കുന്ന ഭാഗത്തിന്‍റെ ടാറിംഗ് നടത്താമെന്ന് റിപ്പോർട്ടിൽ പറയുന്നു. ബാക്കിയുള്ള ഭാഗത്തിന്‍റെ ടാറിംഗ് സംബന്ധിച്ച പദ്ധതി രൂപരേഖ ഗ്രാമസഡക് സർവേ ആപ് പ്രകാരം സമർപ്പിച്ചതായി എക്സിക്യൂട്ടീവ് എൻജനിയർ അറിയിച്ചു. ഇതിനുള്ള അനുമതിയും കേന്ദ്ര വനംവകുപ്പിന്‍റെ എൻഒസിയും ലഭിച്ചാൽ അപാകത പരിഹരിക്കാമെന്ന് റിപ്പോർട്ടിൽ പറയുന്നു. വനംവകുപ്പിന്‍റെ അനുമതിക്കായി പരിവേഷ് പോർട്ടൽ മുഖേന കേന്ദ്രസർക്കാരിന് അപേക്ഷ നൽകുന്നതാണെന്നും റിപ്പോർട്ടിൽ പറയുന്നു. എത്രയും വേഗം കേന്ദ്ര സർക്കാരിൽനിന്ന് അനുമതി ലഭ്യമാക്കണമെന്ന് ജസ്റ്റിസ് അലക്സാണ്ടർ തോമസ് ഉത്തരവിൽ പറഞ്ഞു. മനുഷ്യാവകാശ പ്രവർത്തകനായ ഡോ. ഗിന്നസ് മാടസാമി സമർപ്പിച്ച പരാതിയിലാണ് നടപടി.

ആനച്ചാല്‍ തട്ടാത്തിമുക്കില്‍ ഹെറിറ്റേജ് സെന്‍റര്‍ ഒരുങ്ങുന്നു

അടിമാലി: ആനച്ചാല്‍ തട്ടാത്തിമുക്കില്‍ പള്ളിവാസല്‍ പഞ്ചായത്തിന്‍റെ നേതൃത്വത്തില്‍ ഹെറിറ്റേജ് സെന്‍റർ ഒരുങ്ങുന്നു. മൂന്നാറിന്‍റെ പ്രവേശന കവാടമെന്ന നിലയില്‍ പള്ളിവാസല്‍ പഞ്ചായത്തിന്‍റെ വിനോദസഞ്ചാര സാധ്യതകള്‍ക്ക് കൂടുതല്‍ കരുത്ത് പകരാന്‍ ലക്ഷ്യമിട്ടാണ് ഹെറിറ്റേജ് സെന്‍റർ ഒരുങ്ങുന്നത്. ഇതിന്‍റെ അവസാന പ്രവര്‍ത്തനങ്ങള്‍ നടക്കുകയാണെന്ന് പള്ളിവാസല്‍ പഞ്ചായത്ത് പ്രസിഡന്‍റ് വി.ജി. പ്രജീഷ്കുമാര്‍ പറഞ്ഞു. സാംസ്‌കാരിക ഗാലറിക്കൊപ്പം പ്രാദേശികമായി ഉത്പാദിപ്പിക്കപ്പെടുന്ന സുഗന്ധവ്യഞ്ജന ഉത്പന്നങ്ങളുടെ വില്‍പ്പനകേന്ദ്രം കൂടിയടങ്ങുന്നതാണ് ഹെറിറ്റേജ് സെന്‍റർ. പഞ്ചായത്തിന്‍റെ പ്ലാന്‍ ഫണ്ടും തനത് ഫണ്ടും വിനിയോഗിച്ച് 25 ലക്ഷത്തോളം രൂപ ചെലവഴിച്ചാണ് സെന്‍റർ യാഥാര്‍ഥ്യമാക്കുന്നത്. ആനച്ചാല്‍ രണ്ടാംമൈല്‍ റോഡരികിലാണ് സെന്‍റർ ഒരുക്കുന്നത്.

ജില്ലയിലെ പട്ടയ-കൈവശ ഭൂമികള്‍ വനമാക്കാന്‍ നീക്കം: ബിജോ മാണി

തൊടുപുഴ: ഇടുക്കിയിലെ പട്ടയ-കൈവശ ഭൂമികള്‍ പിടിച്ചെടുത്തു വനമാക്കാനാണ് തൊമ്മന്‍കുത്ത് നാരങ്ങാനത്തെ കൈവശ ഭൂമിയിലെ കുരിശ് വനംവകുപ്പധികൃതര്‍ പൊളിച്ചതെന്നു ഡിസിസി ജനറല്‍ സെക്രട്ടറി ബിജോ മാണി പത്രസമ്മേളനത്തില്‍ ആരോപിച്ചു. വനവിസ്തൃതി വര്‍ധിപ്പിക്കാന്‍ സര്‍ക്കാര്‍ ഗൂഢനീക്കം നടത്തുകയായിരുന്നു. ഇതിനുവേണ്ടിയാണ് കുരിശ് നിന്നിരുന്ന സ്ഥലമുള്‍പ്പെടെ വണ്ണപ്പുറം വില്ലേജിലെ 4,005 ഏക്കര്‍ വനഭൂമിയാണെന്നു വില്ലേജ് ഓഫീസര്‍ റിപ്പോര്‍ട്ട് നല്‍കിയത്. ജില്ലയിലെ മലയോരമേഖലയില്‍ ദൂരവ്യാപക പ്രത്യാഘാതം ഉണ്ടാക്കുന്നതാണ് ഈ റിപ്പോര്‍ട്ട്. തൊടുപുഴ റിസര്‍വില്‍ ഉള്‍പ്പെട്ട ഭൂമിയാണെന്നും ജോയിന്‍റ് വെരിഫിക്കേഷനില്‍ ഈ ഭൂമി ഉള്‍പ്പെട്ടിട്ടില്ലെന്നുമാണ് കുരിശ് പൊളിച്ചതിനും പിന്നീട് ദു:ഖവെള്ളിയാഴ്ച കുരിശിന്‍റെ വഴി തടയാന്‍ ശ്രമിച്ചതിനും കാരണമായി വനംവകുപ്പ് പറഞ്ഞത്. ഈ വാദം തെറ്റാണെന്നു 2016 ജനുവരി ഒന്നിനു മുഖ്യമന്ത്രിയുടെ അധ്യക്ഷതയില്‍ ചേര്‍ന്ന ഉന്നതതല യോഗത്തിന്‍റെ മിനിട്‌സും 2020-ല്‍ റവന്യു വകുപ്പ് പുറത്തിറക്കിയ ഉത്തരവും പരിശോധിച്ചാല്‍ വ്യക്തമാകും. 1902-ലാണ് തൊടുപുഴ റിസര്‍വ് വിജ്ഞാപനം ചെയ്തത്. ജില്ലയില്‍ ഇപ്പോഴുള്ള പട്ടയ കൈവശഭൂമികളെല്ലാം നൂറ്റാണ്ടുകള്‍ക്കു മുന്‍പ് വനമായിരുന്നു. അതിനാല്‍ ഏതെങ്കിലും റിസര്‍വ് നോട്ടിഫിക്കേഷന്‍റെ ഭാഗവുമായിരുന്നു എല്ലാ സ്ഥലങ്ങളും. ഈ ഭൂമിയിലാണ് സര്‍ക്കാര്‍ വിവിധ പദ്ധതികളിലായി ജനങ്ങളെ കുടിയിരുത്തിയത്. 123 വര്‍ഷം മുന്‍പുള്ള വിജ്ഞാപനത്തില്‍ ഉള്‍പ്പെട്ട ഭൂമിയാണെന്നാണ് കുരിശ് പൊളിച്ച സംഭവത്തെ ന്യായീകരിക്കാന്‍ വനം വകുപ്പ് നടത്തുന്ന ന്യായ വാദം. ഇതംഗീകരിച്ചാല്‍ നൂറ്റാണ്ടുകള്‍ക്കു മുന്‍പ് വനഭൂമിയായിരുന്നതിന്‍റെ പേരില്‍ ജില്ലയിലെ ഏതൊരു പട്ടയ-കൈവശ ഭൂമിയിലും വനം വകുപ്പിന് അവകാശവാദ മുന്നയിക്കാന്‍ കഴിയും. ഇതു ഒരുകാരണവശാലും അംഗീകരിക്കാനാവില്ല. തെറ്റായ റിപ്പോര്‍ട്ട് നല്‍കിയ വില്ലേജ് ഓഫീസര്‍ക്കെതിരെയും കൈവശഭൂമിയില്‍ സ്ഥാപിച്ച കുരിശ് നീക്കം ചെയ്ത വനംവകുപ്പ് റേഞ്ച് ഓഫീസര്‍ക്കെതിരേയും കര്‍ശന നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു. വനം വകുപ്പ് തകര്‍ത്ത കുരിശ് അതേ സ്ഥാനത്ത് പുനഃസ്ഥാപിക്കാന്‍ തയാറാകണമെന്നും ബിജോ മാണി ആവശ്യപ്പെട്ടു. തൊടുപുഴ ബ്ലോക്ക് കോണ്‍ഗ്രസ് പ്രസിഡന്‍റ് ഷിബിലി സാഹിബ്, മണ്ഡലം പ്രസിഡന്‍റ് രാജേഷ് ബാബു എന്നിവരും പത്രസമ്മേളനത്തില്‍ പങ്കെടുത്തു.

മുള്ളരിങ്ങാട് പ്രദേശത്തെ മുൾമുനയിലാക്കി കാട്ടാനകൾ

തൊടുപുഴ: പതിവായി കാട്ടാന ആക്രമണം ഉണ്ടാകുന്ന മുള്ളരിങ്ങാട് നിവാസികളുടെ ഉറക്കം നഷ്ടപ്പെട്ടിട്ട് നാളേറെയായെങ്കിലും ഇക്കാര്യത്തിൽ അധികൃതരുടെ ഭാഗത്തുനിന്നു പരിഹാരനടപടികൾ ഉണ്ടാകാത്തതിൽ പ്രതിഷേധവുമായി നാട്ടുകാർ. കാട്ടാനകൾ പതിവായി ജനവാസമേഖലയിൽ എത്തുന്നതോടെ ഇവിടെ ജനങ്ങളുടെ സ്വൈരജീവിതം താറുമാറായ നിലയിലാണ്. കഴിഞ്ഞ ദിവസം മുള്ളരിങ്ങാട് ജംഗ്ഷനു സമീപം വരെ കാട്ടാനയെത്തി. പ്രദേശത്തെ റോഡുകളിൽകൂടി സന്ധ്യ കഴിഞ്ഞാൽ സഞ്ചരിക്കാൻ പോലും കഴിയാത്ത അവസ്ഥയാണെന്ന് നാട്ടുകാർ പറഞ്ഞു. മുള്ളരിങ്ങാട് കാട്ടാന ശല്യം പതിവായി ഉണ്ടാകാറുണ്ടെങ്കിലും ഇവിടെ ആനയുടെ ആക്രമണത്തിൽ യുവാവ് കൊല്ലപ്പെട്ടതോടെയാണ് ജനം കൂടുതൽ ഭീതിയിലായത്. കഴിഞ്ഞ ഡിസംബർ 29-നാണ് മുള്ളരിങ്ങാട് അമയൽതൊട്ടിയിൽ പാലിയത്ത് അമർ ഇബ്രാഹിം കാട്ടാന ആക്രമണത്തിൽ മരിച്ചത്. സുഹൃത്ത് മൻസൂറിനു പരിക്കേൽക്കുകയും ചെയ്തു. ഇതേത്തുടർന്ന് പ്രദേശത്ത് കാട്ടാന പ്രതിരോധ സംവിധാനങ്ങൾ ശക്തമാക്കണമെന്ന് നാട്ടുകാർ ആവശ്യപ്പെട്ടു. എന്നാൽ മുള്ളരിങ്ങാട് കാട്ടാന പ്രതിരോധ നടപടികൾ സ്വീകരിക്കുമെന്ന് അധികൃതർ പ്രഖ്യാപിച്ചെങ്കിലും ഇതെല്ലാം പാഴ‌്‌വാക്കായി. ഇരുപതോളം കാട്ടാനകൾ ഇപ്പോൾ പ്രദേശത്ത് തന്പടിച്ചിരിക്കുകയാണെന്ന് നാട്ടുകാർ പറയുന്നു. ഇവിടെ വൈദ്യുതിവേലി ഉൾപ്പെടെ പ്രതിരോധ സംവിധാനങ്ങൾ ഇല്ലാത്തതിനാൽ ആനകൾ കൂട്ടത്തോടെ ജനവാസ മേഖലകളിലേക്ക് ഇറങ്ങി കൃഷി നശിപ്പിക്കുകയാണ്. ഒട്ടേറെ യാത്രക്കാർ സഞ്ചരിക്കുന്ന ചാത്തമറ്റം - മുള്ളരിങ്ങാട് റൂട്ടിലും ആനകൾ ഇറങ്ങുന്നുണ്ട്. കഴിഞ്ഞ ദിവസം ജോലി സ്ഥലത്തുനിന്നു വന്ന സ്കൂട്ടർ യാത്രക്കാരനെ ആനകൾ കൂട്ടത്തോടെ ആക്രമിക്കാൻ ശ്രമിച്ചു. ഇയാൾ ഓടി രക്ഷപ്പെടുകയായിരുന്നു. കാട്ടാനപ്പേടി മൂലം രാത്രിയാകുന്നതോടെ നാട്ടുകാർ വീടുകളിൽനിന്നു പുറത്തിറങ്ങാത്ത സാഹചര്യമാണ് നില നിൽക്കുന്നത്. പാതയോരങ്ങളിൽ തീ കൂട്ടിയും മറ്റുമാണ് ആനകളെ നാട്ടുകാർ പ്രതിരോധിച്ചിരുന്നതെങ്കിലും ഇവരും മടുത്ത് ഇതിൽനിന്നു പിൻവാങ്ങിയ നിലയിലാണ്. പ്രദേശത്ത് മൂന്നംഗ ആർആർടി സംഘമുണ്ടെങ്കിലും ഇവരുടെ പ്രവർത്തനവും കാര്യമായ പ്രയോജനം ചെയ്യുന്നില്ല. കാട്ടാന ആക്രമണത്തിൽ യുവാവ് മരിച്ചതിനെത്തുടർന്ന് ജനവാസമേഖലയിൽ ഫെൻസിംഗ് നിർമാണത്തിനായി പി.ജെ. ജോസഫ് എംഎൽഎയുടെ ആസ്തി വികസന ഫണ്ടിൽനിന്നു 10 ലക്ഷം രൂപയും ഡീൻ കുര്യാക്കോസ് എംപി എട്ടു ലക്ഷം രൂപയും അനുവദിച്ചിരുന്നു. എന്നാൽ എസ്റ്റിമേറ്റ് തയാറാക്കി ടെണ്ടർ ക്ഷണിക്കുന്ന നടപടികൾ മാത്രമാണ് ഇതുവരെ പൂർത്തിയായത്. കഴിഞ്ഞ 21 നായിരുന്നു ടെണ്ടർ നൽകാനുള്ള അവസാന തിയതി. ഏഴു ലക്ഷം രൂപയാണ് ഒരു കിലോമീറ്റർ ഫെൻസിംഗ് നിർമിക്കാനായി സാധാരണ അനുവദിക്കുന്നത്. നിലവിൽ അനുവദിച്ചിരിക്കുന്ന ഫണ്ടുപയോഗിച്ച് രണ്ടരക്കിലോമീറ്റർ മാത്രമാണ് ഫെൻസിംഗ് സ്ഥാപിക്കാനാകുക. ഇതും എപ്പോൾ നടപ്പാക്കാനാകുമെന്ന കാര്യത്തിൽ വ്യക്തതയില്ല. ഇതിനിടെ കാട്ടാന ആക്രമണത്തിൽ കൊല്ലപ്പെട്ട അമൽ ഇബ്രാഹിമിന്‍റെ കുടുംബത്തിന് അനുവദിച്ച പത്തു ലക്ഷം രൂപയിൽ ബാക്കി നൽകാനുള്ള ആറു ലക്ഷം രൂപ അടുത്ത ദിവസം ജില്ലയിൽ മുഖ്യമന്ത്രി പങ്കെടുക്കുന്ന ചടങ്ങിൽ നൽകാൻ തീരുമാനിച്ചിട്ടുണ്ട്.

തോരണം കെട്ടുന്നതിനിടെ വീണ് പരിക്കേറ്റ യുവാവ് മരിച്ചു

ഉപ്പുതറ: പള്ളിപ്പെരുന്നാളിന് തോരണം കെട്ടുന്നതിനിടെ കാൽവഴുതി വീണ് പരിക്കേറ്റ യുവാവ് ചികിത്സയിലിരിക്കെ മരിച്ചു. വളകോട് ചിറയിൽ യോഹന്നാന്‍റെ മകൻ മനോജ് (39) ആണ് മരിച്ചത്. വളകോട് സെന്‍റ് ജോർജ് മലങ്കര കത്തോലിക്ക പള്ളിപ്പെരുന്നാളിന്‍റെ അലങ്കാര പണിയ്ക്കിടെ കഴിഞ്ഞ തിങ്കളാഴ്ച രാവിലെ 11നായിരുന്നു അപകടം. തോരണം വലിച്ചു കെട്ടുന്നതിനിടെ പള്ളിയ്ക്ക് മുകളിൽനിന്ന് കാൽ വഴുതി വീഴുകയായിരുന്നു. വീഴ്ചയിൽ തലയ്ക്ക് ഗുരുതരമായി പരിക്കേറ്റ മനോജിനെ ഒപ്പമുണ്ടായിരുന്നവർ ഉടൻ പാലായിലെ സ്വകാര്യ ആശുപത്രിയിൽ പ്രവേശിപ്പിച്ചു. തീവ്രപരിചരണ വിഭാഗത്തിൽ വെന്‍റിലേറ്ററിന്‍റെ സഹായത്തോടെയാണ് ജീവൻ നിലനിർത്തിയിരുന്നത്. പോസ്റ്റ് മോർട്ടത്തിനു ശേഷം മൃതദേഹം ഇന്ന് ഉച്ചയ്ക്കു ഭവനത്തിലെത്തിക്കും. തുടർന്ന് മൂന്നിന് ഭവനത്തിലെ ശുശ്രൂഷകൾക്കു ശേഷം അഞ്ചിന് വളകോട് സെന്‍റ് ജോർജ് മലങ്കര കത്തോലിക്ക പള്ളി സെമിത്തേരിയിൽ സംസ്കരിക്കും. അമ്മ: അന്നമ്മ. സഹോദരങ്ങൾ: മഞ്ജു, ബിൻസി. മനോജിനുണ്ടായ അപകടത്തെ തുടർന്ന് പള്ളിപ്പെരുന്നാൾ മാറ്റിവച്ചു.

കാറും ബൈക്കും കൂട്ടിയിടിച്ച് യുവാവ് മരിച്ചു

തൊടുപുഴ: കാറും ബൈക്കും കൂട്ടിയിടിച്ച് യുവാവ് മരിച്ചു. കോരുത്തോട് മടുക്ക കോസടി വയലുങ്കല്‍ സുരേഷിന്‍റെ മകൻ വി.എസ്. ആകാശ് (21) ആണ് മരിച്ചത്. ഇന്നലെ വൈകുന്നേരം 5.15 ഓടെ കോലാനി - വെങ്ങല്ലൂര്‍ ബൈപാസിലായിരുന്നു അപകടം. സമീപത്തുള്ള ഓട്ടോജെറ്റ് കാര്‍വാഷ് സ്ഥാപനത്തിലെ ജീവനക്കാരനായിരുന്നു ആകാശ്. പനിയായതിനാല്‍ ഇന്നലെ അവധിയിലായിരുന്ന ആകാശ് വെങ്ങല്ലൂര്‍ ഭാഗത്തേക്ക് പോയശേഷം തിരികെ സ്ഥാപനത്തിന് തൊട്ടടുത്തുള്ള താമസ സ്ഥലത്തേക്കു വരുന്നതിനിടെയായിരുന്നു അപകടം. കനത്ത മഴയിൽ എതിരേ വന്ന കാറില്‍ ഇടിച്ച ബൈക്ക് മണക്കാട് സ്വദേശി സഞ്ചരിച്ച സ്‌കൂട്ടറിലും ഇടിച്ചു. തലയ്ക്ക് ഗുരുതര പരിക്കേറ്റ ആകാശിനെ ഉടൻ വെങ്ങല്ലൂരുള്ള സ്വകാര്യ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം പോസ്റ്റ്മോര്‍ട്ടത്തിനു ശേഷം ബന്ധുക്കൾക്ക് വിട്ടുകൊടുക്കും. അമ്മ: സുമ കുമാരി. സഹോദരൻ: അശ്വിൻ. തൊടുപുഴ പോലീസ് സ്ഥലത്തെത്തി മേൽനടപടികൾ സ്വീകരിച്ചു.

ബൈക്ക് അപകടത്തിൽ യുവാവ് മരിച്ചു

ചെറുതോണി: ദേശീയപാതയിൽ ആലുവ - അങ്കമാലി റൂട്ടിൽ നിയന്ത്രണം വിട്ട ബൈക്ക് മീഡിയനിൽ ഇടിച്ച് ബൈക്ക് യാത്രികനായ യുവാവ് മരിച്ചു. ഇടുക്കി മണിയാറൻകുടി - പെരുങ്കാല സ്വദേശി കുന്നത്തുപാറയിൽ (കിഴക്കേടത്ത്) കെ.എസ്. പവിജിത്ത് (25) ആണ് മരിച്ചത്. ഭാര്യ കീരിത്തോട് സ്വദേശിനി ആഗ്നസിന് പരിക്കേറ്റു. അങ്കമാലിയിൽ കല്യാണത്തിൽ പങ്കെടുത്ത് മടങ്ങുമ്പോഴായിരുന്നു അപകടം. സംസ്കാരം ഇന്ന് 10ന് മണിയാറൻകുടി സെന്‍റ് മേരീസ് പള്ളിയിൽ. പരേതനായ സുധന്‍റെ മകനാണ് പവിജിത്ത്. അമ്മ: ബിന്ദു. സഹോദങ്ങൾ: സുബിൻ, അനഘ, അപർണ. എറണാകുളത്ത് സ്വകാര്യ കമ്പനിയിൽ ജീവനക്കാരനായിരുന്നു പവിജിത്ത്.

നിര്‍ത്തിയിട്ടിരുന്ന ബസിനടിയിലേക്ക് ബൈക്ക് ഇടിച്ചുകയറി രണ്ടുപേര്‍ക്ക് പരിക്ക്

നെടുങ്കണ്ടം: രാത്രി റോഡരികില്‍ നിര്‍ത്തിയിട്ടിരുന്ന ബസിനടിയിലേക്ക് ബൈക്ക് ഇടിച്ചുകയറി രണ്ട് പേര്‍ക്ക് പരിക്കേറ്റു. ചൊവ്വാഴ്ച രാത്രിയാണ് നെടുങ്കണ്ടം-താന്നിമൂട് റോഡില്‍ അപകടം നടന്നത്. അപകടത്തില്‍ കോമ്പയാര്‍ സ്വദേശികളായ അഭിജിത്ത്, ആദിത്യന്‍ എന്നിവര്‍ക്ക് പരിക്കേറ്റു. ഒരാളുടെ നില ഗുരുതരമാണ്. താന്നിമൂട് റോഡില്‍ വളവിന് സമീപം നിര്‍ത്തിയിട്ടിരുന്ന ബസ് ശ്രദ്ധയില്‍പ്പെടാതിരുന്നതാണ് അപകടകാരണം. ഇടിയുടെ ആഘാതത്തില്‍ ബൈക്ക് ബസിന് അടിയിലേക്ക് പോകുകയായിരുന്നു. ഇരുവരെയും ഉടന്‍ തന്നെ നെടുങ്കണ്ടം താലൂക്ക് ആശുപത്രിയില്‍ എത്തിച്ച് പ്രാഥമിക ചികിത്സ നല്‍കിയശേഷം കട്ടപ്പനയിലെ സ്വകാര്യ ആശുപത്രിയിലേക്ക് മാറ്റി.

കളക്ടർ ഇടപെട്ടു: സിവിൽ സ്റ്റേഷനിലെ പെരുന്തേനീച്ചക്കൂട് നീക്കി

തൊടുപുഴ: ജില്ലാ കളക്ടർ ഇടപെട്ടതിനെത്തുടർന്ന് തൊടുപുഴ മിനി സിവിൽ സ്റ്റേഷനിൽ ജീവനക്കാർക്ക് ഭീതിയായി നിലനിന്നിരുന്ന പെരുന്തേനീച്ചക്കൂട് നീക്കം ചെയ്തു. കെട്ടിടത്തിന്‍റെ പിൻഭാഗത്ത് മുകൾ നിലയിലെ ജനാലയ്ക്കു സമീപമാണ് പെരുന്തേനീച്ച കൂടു കൂട്ടിയത്. കാലങ്ങളായി ഇവിടെ തേനീച്ചക്കൂട് ഉണ്ടായിരുന്നെങ്കിലും ഇതു നീക്കംചെയ്യാൻ അധികൃതർ നടപടി സ്വീകരിച്ചിരുന്നില്ല. കഴിഞ്ഞ 11ന് പെരുന്തേനീച്ചക്കൂടിന്‍റെ ചിത്രം ദീപികയിൽ പ്രസിദ്ധീകരിച്ചിരുന്നു. പിന്നീട് ജില്ലാ കളക്ടറുടെ ഒൗദ്യോഗിക ഫേസ്ബുക്ക് പേജിലൂടെ പത്രത്തിന്‍റെ കട്ടിംഗ് സഹിതം ഇക്കാര്യം കളക്ടർ വി. വിഗ്നേശ്വരിയുടെ ശ്രദ്ധയിൽപ്പെടുത്തി. ഇത് ഉടൻ തന്നെ നീക്കം ചെയ്യുമെന്ന് ദീപിക ഫോട്ടോഗ്രാഫർക്ക് കളക്ടറുടെ മറുപടിയും ലഭിച്ചു. ഇതിനു പിന്നാലെയാണ് കഴിഞ്ഞ ദിവസം രാത്രി തേനീച്ചക്കൂട് നശിപ്പിച്ചത്. കഴിഞ്ഞ മാസം തിരുവനന്തപുരം കളക്ടറേറ്റിൽ സുരക്ഷാ പരിശോധനയ്ക്കിടെ പെരുന്തേനീച്ചക്കൂട് ഇളകി ഒട്ടേറെ ജീവനക്കാർക്ക് തേനീച്ചയുടെ കുത്തേറ്റിരുന്നു.

വിത്ത് മഹോത്സവം സംഘടിപ്പിച്ചു

മുട്ടം: പത്താമുദയത്തോടനുബന്ധിച്ച് കാക്കൊന്പ് ആർപിഎസിൽ കെആർജി ഇവന്‍റ്സിന്‍റെയും കിസാൻ ഹെൽത്ത് ക്ലബ്ബിന്‍റെയും നേതൃത്വത്തിൽ വിത്ത് മഹോത്സവവും സൗജന്യ വിത്തുവിതരണവും തൈ നടീലും നടത്തി. കാക്കൊന്പ് സെന്‍റ് മേരീസ് പള്ളി വികാരി ഫാ. സെബാസ്റ്റ്യൻ കുന്പിളുമൂട്ടിൽ ഉദ്ഘാടനം ചെയ്തു. ആർപിഎസ് പ്രസിഡന്‍റ് ജോസഫ് മാത്യു, കെആർജി പ്രസിഡന്‍റ് ബെന്നി മാത്യു, കിസാൻ ഹെൽത്ത് ക്ലബ് പ്രസിഡന്‍റ് കെ.എ. ജോസഫ് എന്നിവർ പ്രസംഗിച്ചു.

എബിസി സെന്‍റർ; നടപടികൾ തുടങ്ങിയിട്ട് വർഷങ്ങൾ; പ്രാരംഭഘട്ടം പോലും ആയില്ല

തൊടുപുഴ: ജില്ലയിൽ കുട്ടികൾ ഉൾപ്പെടെ തെരുവുനായ്ക്കളുടെ കടിയേൽക്കുന്നവരുടെ എണ്ണം അനിയന്ത്രിതമായി വർധിക്കുന്പോഴും എബിസി സെന്‍റർ നിർമാണം വൈകുന്നു. നൂറുകണക്കിനു നായ്ക്കളാണ് ജനങ്ങളിൽ ഭീതി പരത്തി ജില്ലയുടെ മുക്കിലും മൂലയിലും ചുറ്റിത്തിരിയുന്നത്. കഴിഞ്ഞ ദിവസം വണ്ടിപ്പെരിയാറിൽ രണ്ടു കുട്ടികൾക്ക് തെരുവുനായയുടെ കടിയേറ്റു. അരണക്കൽ എസ്റ്റേറ്റ് വള്ളക്കടവ് കൊക്കക്കാട് ലയത്തിൽ സുരേഷിന്‍റെ മകൻ കപിനേഷ് (5), ശശികുമാറിന്‍റെ മകൾ വർഷിണി (5) എന്നീ കുട്ടികളാണ് തെരുവുനായയുടെ ആക്രമണത്തിനിരയായത്. ചൊവ്വാഴ്ച ഉച്ചയ്ക്കായിരുന്നു സംഭവം. കുട്ടികൾ കളിക്കുന്നതിനിടെയാണ് തെരുവുനായ ഓടിയെത്തി കടിച്ചത്. ചൊവ്വാഴ്ച മാത്രം ജില്ലയിൽ വിവിധയിടങ്ങളിലായി 18 പേർക്കാണ് നായ്ക്കളുടെ കടിയേറ്റത്. ഈ ആഴ്ചയിൽ 41 പേരെ നായ്ക്കൾ ആക്രമിച്ചു പരിക്കേൽപ്പിച്ചതായാണ് കണക്ക.് ഈ മാസം ഇതുവരെ 394 പേർക്ക് നായ്ക്കളുടെ കടിയേറ്റു. ഈ വർഷം നാലു മാസം പൂർത്തിയാകാറായപ്പോൾ മാത്രം സർക്കാർ കണക്കുപ്രകാരം നായ്ക്കളുടെ കടിയേറ്റ് ചികിത്സ തേടിയത് 2777 പേരാണ്. നായ്ക്കളുടെ ആക്രമണത്തിനിരയാകുന്നവരുടെ എണ്ണം ഇത്രയും ഭീതിജനകമായി വർധിച്ചിട്ടും ഇവയുടെ നിയന്ത്രണത്തിൽ അധികൃതർ കാട്ടുന്ന മെല്ലെപ്പോക്കാണ് ജനങ്ങളുടെ പ്രതിഷേധത്തിനിടയാക്കുന്നത്. എബിസി സെന്‍റർ ഇല്ലാത്ത ജില്ലയായ ഇടുക്കിയിൽ സെന്‍റർ നിർമിക്കാനുള്ള നടപടികൾ തുടങ്ങിയിട്ട് വർഷങ്ങൾ പിന്നിട്ടെങ്കിലും ഇപ്പോഴും പ്രാരംഭഘട്ടം പോലും പിന്നിട്ടിട്ടില്ല. കുയിലിമലയിൽ ജില്ലാ പഞ്ചായത്ത് വിട്ടുനൽകിയ അരയേക്കർ സ്ഥലത്താണ് നായ്ക്കളുടെ വന്ധ്യംകരണത്തിനും മറ്റുമായുള്ള എബിസി സെന്‍റർ നിർമിക്കുന്നത്. ഇതിനായി മൂന്നരക്കോടിയാണ് വകയിരുത്തിയിരിക്കുന്നത്. ജില്ലാ പഞ്ചായത്തിന്‍റെയും എട്ട് ബ്ലോക്ക് പഞ്ചായത്തുകളുടെയും 52 പഞ്ചായത്തുകളുടെയും ഫണ്ടാണ് പദ്ധതിക്കായി നീക്കിവച്ചത്. പദ്ധതിയുടെ ടെണ്ടർ നടപടികൾ പൂർത്തിയാക്കി നിർമാണ ജോലികൾ ആരംഭിച്ചതായാണ് ജില്ലാ പഞ്ചായത്ത് അധികൃതർ പറയുന്നത്. നേരത്തേ രണ്ട് ബ്ലോക്കുകളുടെ പരിധിയിൽ ഒരു സെന്‍റർ വീതം നാല് കേന്ദ്രങ്ങൾ ആരംഭിക്കാനായിരുന്നു പദ്ധതിയിട്ടിരുന്നതെങ്കിലും പ്രദേശവാസികളുടെ എതിർപ്പിനെത്തുടർന്ന് ഇത് തുടങ്ങാനായില്ല. പിന്നീടാണ് ജില്ലാ ആസ്ഥാനത്ത് ജനവാസമേഖലയിൽനിന്നു മാറി സെന്‍റർ തുടങ്ങാൻ ജില്ലാ പഞ്ചായത്ത് തീരുമാനിച്ചത്. കുയിലിമല -മൈക്രോവേവ് റോഡിനു സമീപമാണ് സെന്‍റർ നിർമിക്കുന്നത്. ഇവിടെ നിന്നിരുന്ന മരങ്ങൾ മുറിച്ചുമാറ്റി ശിലാസ്ഥാപനം നടത്തി നിർമാണത്തിനു തുടക്കമിടുകയും ചെയ്തു. ഇതിനിടെ ഗ്രാമ, ബ്ലോക്ക് പഞ്ചായത്തുകളുടെ വിഹിതമായ തുക ലഭ്യമാകാത്തതും പദ്ധതിക്ക് തടസമായിരുന്നു. ജില്ലാ പഞ്ചായത്തിന്‍റെ ഫണ്ട് വിനിയോഗിച്ചാണ് ഇപ്പോഴുള്ള നിർമാണ പ്രവർത്തനങ്ങൾ നടത്തുന്നത്. ഫണ്ടുകൾ ലഭ്യമാക്കി നിർമാണം വേഗത്തിൽ പൂർത്തിയാക്കാനുള്ള നടപടി സ്വീകരിക്കുമെന്ന് ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ പറഞ്ഞു.

കൃഷിവകുപ്പിന്‍റെ നേതൃത്വത്തില്‍ നെടുങ്കണ്ടത്ത് പ്രീമിയം ഔട്ട്‌ലെറ്റ്

‌നെടുങ്കണ്ടം: കൃഷിവകുപ്പിന്‍റെ നേതൃത്വത്തില്‍ നെടുങ്കണ്ടത്ത് പ്രീമിയം ഔട്ട്‌ലെറ്റ് പ്രവര്‍ത്തനം ആരംഭിച്ചു. കര്‍ഷകര്‍ ഉത്പാദിപ്പിക്കുന്ന ഗുണനിലവാരമുള്ള മൂല്യവര്‍ധിത ഉത്പന്നങ്ങള്‍ വിതരണം ചെയ്യുന്നതിനും ഇതുവഴി കര്‍ഷകര്‍ക്ക് വരുമാനം വര്‍ധിപ്പിക്കുന്നതിനുമായാണ് സംസ്ഥാന കൃഷിവകുപ്പിന്‍റെ സഹായത്തോടെ നെടുങ്കണ്ടം ബ്ലോക്ക് പഞ്ചായത്തിന് കീഴില്‍ പ്രീമിയം ഔട്ട്‌ലെറ്റ് ആരംഭിച്ചത്. 2018ല്‍ പ്രവര്‍ത്തനം ആരംഭിച്ച ബ്ലോക്ക് ലെവല്‍ ഫെഡറേറ്റഡ് മാര്‍ക്കറ്റുമായി ചേര്‍ന്നാണ് ഔട്‌ലെറ്റ് പ്രവര്‍ത്തിക്കുന്നത്. ജില്ലയിലെ ആദ്യ പ്രീമിയം ഔട്ട്‌ലെറ്റാണ് നെടുങ്കണ്ടത്തേത്. വിപണിയിലൂടെ കര്‍ഷകര്‍ ഉത്പാദിപ്പിക്കുന്ന പഴം, പച്ചക്കറി, പാല്‍, തൈര്, തേന്‍ ഉത്്പന്നങ്ങള്‍, ചക്ക ഉത്്പന്നങ്ങള്‍, സുഗന്ധവ്യഞ്ജനങ്ങള്‍, ധാന്യങ്ങള്‍, മില്ലറ്റുകള്‍, അച്ചാറുകള്‍, നവ സംരംഭകരുടെ ഉത്പന്നങ്ങള്‍, പച്ചക്കറി വിത്തുകള്‍, തൈകള്‍ തുടങ്ങിയവ ലഭ്യമാണ്. നെടുങ്കണ്ടം കൃഷി അസി. ഡയറക്ടര്‍ ഓഫീസ് കോമ്പൗണ്ടില്‍ ആരംഭിച്ച പ്രീമിയംഔട്ട്‌ലെറ്റിന്‍റെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് കെ.ടി. കുഞ്ഞ് നിർവഹിച്ചു. ഗ്രാമപഞ്ചായത്ത് പ്രസിഡന്‍റ് പ്രിമി ലാലിച്ചന്‍ അധ്യക്ഷത വഹിച്ചു. ഗ്രാമപഞ്ചായത്തംഗം ജോജി ഇടപ്പള്ളിക്കുന്നേല്‍ മുഖ്യപ്രഭാഷണം നടത്തി. കൃഷി ഓഫീസര്‍ അനന്തുരാജ് പദ്ധതി വിശദീകരണം നടത്തി. ജെസി കുര്യന്‍, നിധിന്‍ കുമാര്‍, ബോണ്‍സി, കെ. രമേശന്‍, കെ.എം. ഷാജി, ഓമനക്കുട്ടന്‍ തുടങ്ങിയവര്‍ പ്രസംഗിച്ചു.

കുടുംബവഴക്ക്: മകൻ അമ്മയെ കോടാലിക്ക് മർദിച്ചു

കട്ടപ്പന: കുടുംബവഴക്കിനെത്തുടര്‍ന്ന് വൃദ്ധയെ മകന്‍ കോടാലി ഉപയോഗിച്ച് ക്രൂരമായി മര്‍ദിച്ച് പരിക്കേല്‍പ്പിച്ചു. കട്ടപ്പന പാറക്കടവിലാണ് സംഭവം. കൊല്ലപ്പള്ളി കമലമ്മ (75)യ്ക്കാണ് പരിക്കേറ്റത്. കൈകാലുകള്‍ക്കും തലയ്ക്കും ഗുരുതരമായി പരിക്കേറ്റ ഇവരെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. സംഭവത്തില്‍ മകന്‍ പ്രസാദിനെ (46) കട്ടപ്പന പൊലീസ് കസ്റ്റഡിയിലെടുത്തു. ബുധനാഴ്ച രാവിലെയാണ് സംഭവം. കമലമ്മയും പ്രസാദും തമ്മില്‍ വര്‍ഷങ്ങളായി കുടുംബപ്രശ്‌നം നിലനില്‍ക്കുന്നുണ്ട്. ഇതേത്തുടര്‍ന്ന് കട്ടപ്പന കോടതിയില്‍ കേസും നിലവിലുണ്ട്. കോടതിയുടെ നിര്‍ദേശാനുസരണം വീടിനുസമീപത്ത് ചെറിയ മുറി നിര്‍മിച്ച് ഇവിടെയാണ് കമലമ്മ താമസിച്ചുവന്നത്. കഴിഞ്ഞദിവസം കമലമ്മ പുറത്തേയ്ക്കുപോകുന്ന വഴിയില്‍ മകനും മരുമകളും കോഴിക്കൂട് സ്ഥാപിച്ചു. ഇതോടെ കമലമ്മയുടെ യാത്രാമാര്‍ഗം തടസപ്പെട്ടു. ഇതേച്ചൊല്ലി വാക്കുതര്‍ക്കമുണ്ടായി. തുടര്‍ന്ന് പ്രസാദ് കോടാലി ഉപയോഗിച്ച് കമലമ്മയെ ക്രൂരമായി മർദിക്കുകയായിരുന്നു. മര്‍ദനത്തില്‍ വൃദ്ധയുടെ കാല് ഒടിഞ്ഞു. കട്ടപ്പന താലൂക്ക് ആശുപത്രിയില്‍ പ്രവേശിപ്പിച്ചെങ്കിലും പരിക്ക് ഗുരുതരമായതിനാല്‍ കോട്ടയം മെഡിക്കല്‍ കോളേജ് ആശുപത്രിയിലേക്ക് കൊണ്ടുപോയി. പ്രസാദിനെതിരേ പൊലീസ് വധശ്രമത്തിന് കേസെടുത്തു. വര്‍ഷങ്ങളായി ഇവര്‍ തമ്മില്‍ കുടുംബപ്രശ്‌നമുള്ളതായി നാട്ടുകാര്‍ പറയുന്നു. പ്രസാദിന്‍റെ ഭാര്യയും കമലമ്മയെ നിരന്തരമായി മർദിക്കുകയും ആക്ഷേപിക്കുകയും ചെയ്യുക പതിവായിരുന്നു നാട്ടുകാർ പറയുന്നു. കമലമ്മയുടെ ഭര്‍ത്താവ് ദിവാകരന്‍ പശുത്തൊഴുത്തിന് സമീപത്ത് ഷെഡ്ഡിലാണ് താമസിക്കുന്നത്. പ്രസാദിനും ഇയാളുടെ ഭാര്യക്കുമെതിരേ നിരവധി ആരോപണങ്ങളാണ് ഉള്ളത്. കമലമ്മയുടെ മൊഴി രേഖപ്പെടുത്തിയ പ്രസാദിന്‍റെ ഭാര്യക്കെതിരേയും നടപടി ഉണ്ടാകും

ജോയിന്‍റ് വെരിഫിക്കേഷൻ നടത്തണം: ഡീൻ കുര്യാക്കോസ് എംപി

തൊടുപുഴ: തൊമ്മൻകുത്തിൽ കുരിശു പിഴുത സംഭവത്തിൽ റവന്യു വകുപ്പിന്‍റെ ബിടിആർ രേഖകൾ ആധികാരികമല്ലെന്ന് ഡീൻ കുര്യാക്കോസ് എംപി. ബിടിആർ രേഖകൾ അടിസ്ഥാനപ്പെടുത്തി രേഖകളിൽ സ്ഥലത്തിന്‍റെ നിജസ്ഥിതി തീർപ്പുകൽപ്പിക്കാനാവില്ല. 1930കളിലെ ബിടിആർ രജിസ്റ്റർ മാത്രമാണ് ആധികാരികമെന്ന് പ്രചരിപ്പിക്കുന്നത് ശരിയല്ല. സംയുക്തപരിശോധന നടത്തി തീർപ്പുകൽപ്പിക്കാത്ത എല്ലായിടങ്ങളിലും റവന്യൂ ബിടിആർ രേഖ വച്ച് വനമാണെന്ന് സ്ഥാപിക്കാൻ വനംവകുപ്പ് അനാവശ്യ ശ്രമം നടത്തുന്നത് വനവിസ്തൃതി വർധിപ്പിക്കാനാണ്. അതിനാൽ അടിയന്തരമായി ജോയിന്‍റ് വെരിഫിക്കേഷൻ നടത്തി പ്രശ്നം പരിഹരിക്കണം. ആരാധനാലയങ്ങളും വിദ്യാഭ്യാസ സ്ഥാപനങ്ങളും ആശുപത്രികളും മതസ്ഥാപനങ്ങളും നിരവധി ടൗണ്‍ഷിപ്പുകളും കൈവശഭൂമിയിൽ ഉയർന്നുവരികയും അവ നിയമവത്കരിക്കാൻ സർക്കാർ നയപരമായ തീരുമാനവും എടുക്കുകയും ചെയ്തിട്ടുള്ളതാണ്. തൊമ്മൻകുത്ത് ദേവാലയത്തിന്‍റെ കുരിശിനും കുടിയേറ്റ കർഷകനും ഈ സംരക്ഷണം ലഭ്യമാക്കാൻ സർക്കാരിന് ഉത്തരവാദിത്വമുണ്ട്. വനംവകുപ്പിന് കൃഷിഭൂമി തീറെഴുതി കൊടുക്കാനുള്ള ശ്രമം ജനകീയ സമരത്തിലൂടെ ചെറുത്തുതോൽപ്പിക്കുമെന്നും പരിപാവനമായ കുരിശിനെ അപമാനിച്ച ഉദ്യോഗസ്ഥർക്കെതിരേ നടപടി സ്വീകരിക്കണമെന്നും ഡീൻ കുര്യാക്കോസ് ആവശ്യപ്പെട്ടു.

മരിയൻ കോളജിൽ അന്തർദേശീയ കിക്‌ബോക്സിംഗ് പരിശീലനക്യാമ്പ്

കുട്ടിക്കാനം: മരിയൻ കോളജിൽ 30 വരെ നടക്കുന്ന 10ാമത് അന്തർദേശീയ കിക്‌ബോക്സിംഗ് പരിശീലന ക്യാമ്പ് ആരംഭിച്ചു. വാക്കോ ഇന്ത്യ കേരള അസോസിയേഷനും മരിയൻ കോളജിലെ ഹെൽത്ത് ആൻഡ് വെൽനെസ് ഡിപ്പാർട്ട്മെന്‍റും സംയുക്തമായാണ് ക്യാമ്പ് സംഘടിപ്പിച്ചിരിക്കുന്നത്. ദേശീയ, അന്തർദേശീയ തലത്തിൽ അംഗീകരിക്കപ്പെട്ടിട്ടുള്ള പരിശീലകരുടെ നേതൃത്വത്തിലാണ് ക്യാമ്പ് നടത്തപ്പെടുന്നത്. ഏകദേശം 200ഓളം കായികപ്രതിഭകൾ പരിശീലനത്തിൽ പങ്കെടുക്കുന്നുണ്ട്. കിക്‌ബോക്സിംഗിനെപ്പറ്റി ആഴത്തിൽ പഠിക്കാൻ സാധിക്കുന്നതോടൊപ്പം ആഗോളതലത്തിൽ അംഗീകരിക്കപ്പെടുന്ന പരിശീലന മാതൃകകൾ വഴി താരങ്ങൾക്ക് അത്യുന്നതമായ പരിശീലനം ലഭ്യമാകുന്നു. വിവിധ സംസ്ഥാനങ്ങളിൽനിന്നുമെത്തിയ കായികതാരങ്ങൾക്കും ഉയർന്ന നിലവാരത്തിലുള്ള പരിശീലനം നേടാൻ ആഗ്രഹിക്കുന്നവർക്കും ഈ ക്യാമ്പ് പുതിയ അനുഭവങ്ങളും അറിവുകളും പകരുന്ന പ്രധാന വേദിയായിരിക്കുമെന്ന് സംഘാടകർ വ്യക്തമാക്കി.

ദൈവത്തെ മുറുകെപ്പിടിച്ചാൽ ഐശ്വര്യം: ഫാ. റാഫേൽ കോക്കാടൻ

തൊടുപുഴ: ദൈവത്തെ മുറുകെപ്പിടിക്കുകയും തിൻമയെ ഉപേക്ഷിച്ച് തിരിച്ചു വരികയും ചെയ്താൽ ജീവിതത്തിൽ ഐശ്വര്യമുണ്ടാകുമെന്ന് കടലുണ്ടി ഏൽ റൂഹാ ധ്യാന കേന്ദ്രം ഡയറക്ടർ ഫാ. റാഫേൽ കോക്കാടൻ പറഞ്ഞു. തൊടുപുഴ ഡിവൈൻ മേഴ്സി ഷ്റൈൻ ഓഫ് ഹോളിമേരിയിൽ നടന്ന രണ്ടാം ദിവസത്തെ ബൈബിൾ കണ്‍വൻഷനിൽ വചനസന്ദേശം നൽകുകയായിരുന്നു അദ്ദേഹം. തിൻമയിലേയ്ക്ക് വഴുതിവീണാൽ നമ്മുടെ ജീവിതം തകർന്നുപോകും. എന്നാൽ അനുതപിച്ച് തിരിച്ചുവന്നാൽ ദൈവത്തിന്‍റെ കാരുണ്യം ജീവിതത്തിലേക്ക് കടന്നുവരുമെന്നും അദ്ദേഹം പറഞ്ഞു. ദൈവകരുണയുടെ നൊവേന, വിശുദ്ധ കുർബാന, ദിവ്യകാരുണ്യ ആരാധന, സൗഖ്യ ശുശ്രൂഷ എന്നിവയും കണ്‍വൻഷനോടനുബന്ധിച്ച് നടത്തും. ആയിരക്കണക്കിന് വിശ്വാസികളാണ് കണ്‍വൻഷനിൽ പങ്കെടുക്കുന്നത്.

കല്ലാറിലെ‍ കുടുംബാരോഗ്യ കേന്ദ്രം ഉടൻ പൂർത്തീകരിക്കണം

അടിമാലി: അടിമാലി കല്ലാറിലെ കുടുംബാരോഗ്യ കേന്ദ്രത്തിനായി നിര്‍മിക്കുന്ന പുതിയ കെട്ടിടത്തിന്‍റെ നിർമാണം വേഗത്തിലാക്കണമെന്ന ആവശ്യം ശക്തമാകുന്നു. 2018ലെ പ്രളയത്തില്‍ ബലക്ഷയം സംഭവിച്ചതിനെത്തുടര്‍ന്നായിരുന്നു കല്ലാറില്‍ കുടുംബാരോഗ്യ കേന്ദ്രത്തിനായി പുതിയ കെട്ടിടം നിര്‍മിക്കുന്നതിനുള്ള നടപടികള്‍ ആരംഭിച്ചത്. ദേശീയപാതയോരത്ത് താഴത്തെ കല്ലാറിലാണ് പുതിയ കെട്ടിടം നിർമിക്കുന്നത്. സംസ്ഥാന സര്‍ക്കാരിന്‍റെ 1.60 കോടി രൂപയും പള്ളിവാസല്‍ പഞ്ചായത്തിന്‍റെ 37 ലക്ഷം രൂപയും ഉപയോഗിച്ചാണ് കെട്ടിടം നിര്‍മിക്കുന്നത്. ബലക്ഷയം വന്ന കെട്ടിടം പൊളിച്ചുനീക്കി മണ്‍ജോലികള്‍ നടത്തി. കെട്ടിടത്തിന്‍റെ ഒരു ഭാഗത്തെ സ്ട്രക്ച്ചർ ജോലികള്‍ പൂര്‍ത്തീകരിച്ചു. നിലവില്‍ കുടുംബാരോഗ്യ കേന്ദ്രം പ്രവര്‍ത്തിക്കുന്നത് ദേശീയപാതയോരത്ത് തന്നെയുള്ള പരിമിതമായ സൗകര്യമുള്ള കെട്ടിടത്തിലാണ്. തോട്ടംമേഖലയില്‍നിന്നുള്ള നിരവധി കുടുംബങ്ങളടക്കം ആശ്രയിക്കുന്ന ആരോഗ്യ കേന്ദ്രമാണ് കല്ലാറിലെ കുടുംബാരോഗ്യ കേന്ദ്രം. ആദ്യം പ്രാഥമികാരോഗ്യ കേന്ദ്രമായിരുന്ന ചികിത്സാലയത്തെ പിന്നീട് കുടുംബാരോഗ്യ കേന്ദ്രമായി ഉയര്‍ത്തുകയായിരുന്നു. പുതിയ കെട്ടിടത്തിന്‍റെ ജോലികള്‍ പൂര്‍ത്തിയായൽ കുടുംബാരോഗ്യ കേന്ദ്രത്തിന്‍റെ അടിസ്ഥാന സൗകര്യം കൂടുതല്‍ മെച്ചപ്പെടുത്താനാകും.

ജോയിന്‍റ് കൗണ്‍സിൽ ജില്ലാ സമ്മേളനം നടത്തി

കട്ടപ്പന: ജോയിന്‍റ് കൗണ്‍സിൽ ജില്ലാ സമ്മേളനം നടത്തി. പ്രതിനിധി സമ്മേളനം സംസ്ഥാന ജനറൽ സെക്രട്ടറി ജയചന്ദ്രൻ കല്ലിംഗൽ ഉദ്ഘാടനം ചെയ്തു. പങ്കാളിത്ത പെൻഷൻ പദ്ധതി പിൻവലിക്കും എന്ന സർക്കാർ വാഗ്ദാനം അടിയന്തരമായി നടപ്പാക്കണമെന്നും അല്ലാത്തപക്ഷം ശക്തമായ തുടർ സമരങ്ങൾക്ക് രൂപം നൽകുമെന്നും അദ്ദേഹം പറഞ്ഞു. ജില്ലാ പ്രസിഡന്‍റ് കെ.എസ്. രാഗേഷ് അധ്യക്ഷത വഹിച്ചു. നരേഷ് കുമാർ കുന്നിയൂർ, വി.ആർ. ശശി, ആർ. രമേശ്, ഡി. ബിനിൽ, എസ്.കെ.എം. ബഷീർ, കെ.വി. സാജൻ, കെ.ആർ. ലോമിമോൾ, ആർ. ബിജുമോൻ എന്നിവർ പ്രസംഗിച്ചു. ഭാരവാഹികളായി കെ.എസ്. രാഗേഷ് -പ്രസിഡന്‍റ്, വി.കെ. ജിൻസ്, വി.എം. ഷൗക്കത്തലി, സി.ജി. അജീഷ -വൈസ് പ്രസിഡന്‍റുമാർ, ആർ. ബിജുമോൻ-സെക്രട്ടറി, എ.കെ. സുഭാഷ്, ഡി.കെ. സജിമോൻ -ജോയിന്‍റ് സെക്രട്ടറിമാർ, പി.ടി. ഉണ്ണി -ട്രഷറർ എന്നിവരെ തെരഞ്ഞെടുത്തു.

മൂന്നാർ പുഷ്പമേള മേയ് ഒന്നിന് തുടങ്ങും

മൂന്നാർ: മൂന്നാർ പുഷ്പമേള മേയ് ഒന്നു മുതൽ 10വരെ നടക്കും. ജില്ലാ ടൂറിസം വകുപ്പിന്‍റെ നേതൃത്വത്തിൽ ഗവ. ബൊട്ടാണിക്കൽ ഗാർഡനിലാണ് സഞ്ചാരികൾക്ക് വർണവിസ്മയ കാഴ്ചയൊരുക്കി പുഷ്പമേള ഒരുങ്ങുന്നത്. അവധിക്കാലത്ത് മൂന്നാറിലെത്തുന്ന സന്ദർശകരെ ആകർഷിക്കുക എന്ന ഉദ്ദേശ്യത്തോടെയാണ് മേള സംഘടിപ്പിച്ചിരിക്കുന്നത്. പുഷ്പമേളയ്ക്കു പുറമേ മ്യൂസിക്കൽ ഫൗണ്ടൻ, ഭക്ഷ്യമേള, സെൽഫി പോയിന്‍റ്, കലാപരിപാടികൾ, വിപണനമേള എന്നിവയും നടത്തും. ജമന്തി, മാരിഗോൾഡ്, ഡയാന്‍റിസ്, വിട്രോണി, പുത്തിൻ സെത്തിയ, ക്രിസാന്തിസം, ഹിഗോണി, സലേഷ്യ, വിങ്ക തുടങ്ങിയ പതിവു ഇനം പൂക്കൾക്കൊപ്പം വൈവിധ്യമാർന്ന നാനൂറിലധികം പൂക്കൾ മേളയുടെ ആകർഷണമാണ്. വിദേശത്തുനിന്ന് എത്തിക്കുന്ന അലീസിയ, റോസ്, ഓർക്കിഡ്, ആന്തൂറിയം എന്നിവയും പ്രദർശനത്തിനുണ്ടാവും. ഒരു ദിവസം രണ്ടു തവണയാണ് മ്യൂസിക്കൽ ഫൗണ്ടൻ ഉണ്ടാവുക. വൈകുന്നേരം ആറു മുതൽ കലാപരിപാടികളും അരങ്ങേറും.

സംസ്ഥാന മാസ്റ്റർ ഷെഫ് മത്സരം നാളെ മൂന്നാറിൽ

തൊടുപുഴ: മൂന്നാറിലെ ഹോട്ടൽ ആന്‍ഡ് റിസോർട്ടുകളുടെ സംഘടനയായ മൂന്നാർ ഡെസ്റ്റിനേഷൻ മേക്കേഴ്സിന്‍റെ ആഭിമുഖ്യത്തിൽ സ്പൈസ് മാസ്റ്റർ 2025 എന്ന പേരിൽ സംസ്ഥാന മാസ്റ്റർ ഷെഫ് മത്സരം നാളെ രാവിലെ 10ന് സൂര്യനെല്ലി മൂന്നാർ കേറ്ററിംഗ് കോളജിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ടിവി അവതാരകയും പാചക വിദഗ്ധയുമായ ലക്ഷ്മി നായർ മുഖ്യാതിഥിയായിരിക്കും. ജില്ലാ ടൂറിസം മേധാവി ടി.ജി. ഷൈൻ ഉദ്ഘാടനം ചെയ്യും. ഡിടിപിസി സെക്രട്ടറി ജിതീഷ് ജോസ്, ടിസൻ തച്ചങ്കരി, കേരള ട്രാവൽമാർട്ട് പ്രതിനിധികൾ, ടൂറിസം ട്രേഡ് യൂണിയൻ നേതാക്കൾ തുടങ്ങിയവർ പങ്കെടുക്കും. 50,000 രൂപയും പ്രശസ്തി പത്രവും ഫലകവുമാണ് ഒന്നാം സ്ഥാനക്കാർക്കുള്ള പുരസ്കാരം. രണ്ടും മൂന്നും സ്ഥാനക്കാർക്ക് യഥാക്രമം 25000, 12500 രൂപയും പ്രശസ്തി പത്രവും ഫലകവും നൽകും. അറുപതിൽപ്പരം ഷെഫുമാരും വീട്ടമ്മമാരും ഓണ്‍ലൈൻ രജിസ്ട്രേഷൻ പൂർത്തിയാക്കിയതായി സംഘാടകർ പറഞ്ഞു. പരിപാടി സ്പോണ്‍സർ ചെയ്തിരിക്കുന്നത് അബാദ് ഫുഡ്സ് ആണ്. പത്രസമ്മേളനത്തിൽ എംഡിഎം പ്രസിഡന്‍റ് ബേസിൽ യോയാക്കി, മുൻ പ്രസിഡന്‍റ് വർഗീസ് ഏലിയാസ്, ട്രഷറർ പ്രമോദ് എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]