ADVERTISEMENT

ADVERTISEMENT

ക്രിസ്തുജ്യോതി ഗ്രൂപ്പ് സ്ഥാപനങ്ങളില്‍ മാനേജേഴ്‌സ് ഡേ

ചെത്തിപ്പുഴ: ക്രിസ്തുജ്യോതി ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സിനു കീഴിലുള്ള ക്രിസ്തുജ്യോതി കോളജ്, ക്രിസ്തു ജ്യോതി, പ്ലാസിഡ് വിദ്യാവിഹാര്‍, ക്രിസ്തുജ്യോതി വിദ്യാനികേതന്‍, ക്രിസ്തുജ്യോതി കിൻഡര്‍ ഗാര്‍ട്ടന്‍ എന്നിവയുടെ സംയുക്താഭിമുഖ്യത്തില്‍ ഇന്നു മാനേജഴ്‌സ് ദിനം ആഘോഷിക്കും.

വികാരി ജനറാള്‍ ഫാ. ജോസി താമരശേരിയുടെ അധ്യക്ഷതയില്‍ ചേരുന്ന പൊതുസമ്മേളനത്തില്‍ ക്രിസ്തുജ്യോതി ഗ്രൂപ്പ് സ്ഥാപനങ്ങളുടെ മാനേജരായ റവ.ഡോ. തോമസ് കല്ലുകളത്തെ ആദരിക്കും.

ഫാ. ടോമി ഇലവുങ്കല്‍, ഫാ. സ്‌കറിയ എതിരേറ്റ്, ഫാ. ജോഷി ചീരാംകുഴി, ഫാ. ഫിലിപ്പോസ് തുണ്ടുവാലിച്ചിറ, ഡോ. ജോബിന്‍ എസ്. കൊട്ടാരം, എന്‍.ഒ. ആന്‍റണി എന്നിവര്‍ പ്രസംഗിക്കും.

ADVERTISEMENT

ഓണപ്പൂവസന്തവുമായി വാഴൂർ ബ്ലോക്ക് പഞ്ചായത്ത്

പൊൻകുന്നം: ഓണത്തിന് പൂക്കളമൊരുക്കാൻ ആവശ്യമായ പൂക്കൾ പ്രാദേശികമായി ലഭ്യമാക്കുക എന്ന ലക്ഷ്യത്തോടെ ഓണപ്പൂവസന്തം പുഷ്പകൃഷി പദ്ധതിയുമായി വാഴൂർ ബ്ലോക്ക് പഞ്ചായത്ത്. 2025-26 വാർഷിക പദ്ധതിയിൽ ഉൾപ്പെടുത്തി രണ്ടേകാൽ ലക്ഷം രൂപ ചെലവഴിച്ചാണ് പദ്ധതി നടപ്പാക്കുന്നത്. ബ്ലോക്ക് പഞ്ചായത്ത് പരിധിയിലെ 50 കർഷക ഗ്രൂപ്പുകൾ വഴിയാണ് ബന്ദിപ്പൂ (ചെണ്ടുമല്ലി) കൃഷി നടത്തുന്നത്. തൈകൾ നട്ട് 45-ാം ദിവസം മുതൽ പൂവിട്ടു തുടങ്ങും. ഒരു ചെടിയിൽനിന്നു മൂന്നുമുതൽ നാലു കിലോ വരെ പൂക്കൾ ലഭിക്കുമെന്നാണ് പ്രതീക്ഷ. ഓറഞ്ച്, മഞ്ഞ നിറത്തിലുള്ള ബന്ദിപ്പൂക്കളാണ് കൃഷി ചെയ്യുന്നത്. പൊൻകുന്നം ഗവ. വിഎച്ച്എസ്എസിൽ നടന്ന ബ്ലോക്ക്തല പുഷ്പകൃഷിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി നിർവഹിച്ചു. ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ, ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, ബ്ലോക്ക് പഞ്ചായത്തംഗം ഷാജി പാമ്പൂരി, മിനി സേതുനാഥ്, ലതാ ഉണ്ണികൃഷ്ണൻ, പഞ്ചായത്തംഗങ്ങളായ സുമേഷ് ആൻഡ്രൂസ്, ആന്‍റണി മാർട്ടിൻ, ശ്രീലത സന്തോഷ്, കൃഷി അസിസ്റ്റന്‍റ് ഡയറക്ടർ സിമി ഇബ്രാഹിം, സ്കൂൾ പ്രിൻസിപ്പൽ എം.എച്ച്. നിയാസ്, ഹെഡ്മിസ്ട്രസ് എം.സി. രജനി, പിടിഎ പ്രസിഡന്‍റ് പി.ജി. ജനീവ് എന്നിവർ പ്രസംഗിച്ചു.

പെരുന്ന ഗവൺമെന്‍റ് എല്‍പി സ്‌കൂള്‍ ഞെരുക്കത്തില്‍ : എല്‍പി സ്‌കൂളും വനിതാ ഐടിഐയും പ്രവര്‍ത്തിക്കുന്നത് ഒരു കെട്ടിടത്തില്‍

ചങ്ങനാശേരി: പെരുന്ന ഗവൺമെന്‍റ് എല്‍പി സ്‌കൂള്‍ കെട്ടിടത്തില്‍ പ്രവര്‍ത്തിക്കുന്നത് എല്‍പി സ്‌കൂളും വനിതാ ഐടിഐയും. സ്ഥലദൗര്‍ലഭ്യത്തില്‍ ഇരു സ്ഥാപനങ്ങളും ഞെരുങ്ങുന്നു. ഒരു നൂറ്റാണ്ടിലധികം ചരിത്രമുള്ള സ്‌കൂളിനാണ് ഈ ദുര്‍ഗതി. മഴക്കാല ദുരിതം വര്‍ധിക്കുമ്പോള്‍ ഈ സ്‌കൂളിൽ ദുരിതാശ്വാസ ക്യാമ്പ് തുറക്കുന്നതും പതിവാണ്. പെരുന്ന ഗവൺമെന്‍റ് എല്‍പി സ്‌കൂളില്‍ അമ്പത് വിദ്യാര്‍ഥികളും നാല് അധ്യാപകരുമാണുള്ളത്. എങ്ങും ഇടംകിട്ടാതെ വന്നതോടെയാണ് 12 വര്‍ഷംമുമ്പ് സര്‍ക്കാര്‍ അനുവദിച്ച വനിത ഐടിഐ ഈ എല്‍പി സ്‌കൂള്‍ കെട്ടിടത്തില്‍ പ്രവര്‍ത്തനം തുടങ്ങിയത്. എംഎല്‍എയായിരുന്ന സി.എഫ്. തോമസിന്‍റെ ശ്രമഫലമായാണ് വ്യവസായ വകുപ്പിന്‍റെ കീഴിലുള്ള ഈ ഐടിഐ ചങ്ങനാശേരിയില്‍ അനുവദിച്ചത്. സ്ഥലമില്ല, കെട്ടിടവുമില്ല; വികസനമുരടിപ്പില്‍ വനിതാ ഐടിഐ സ്ഥലപരിമിതിയില്‍ ചങ്ങനാശേരി വനിതാ ഐടിഐ നട്ടംതിരിയുന്നു. 12 വര്‍ഷങ്ങള്‍ക്കുമുമ്പ് ചങ്ങനാശേരിയില്‍ അനുവദിച്ച കോട്ടയം ജില്ലയിലെ വനിതകള്‍ക്കായുള്ള ഏക ഐടിഐയാണ് സ്വന്തമായി സ്ഥലവും കെട്ടിടവുമില്ലാതെ മുടന്തി നീങ്ങുന്നത്. എന്‍സിവിടി അംഗീകാരമുള്ള ഡിസിവിൽ, എസ്‌സിവിടി അംഗീകാരമുള്ള കമ്പ്യൂട്ടര്‍ ഓപ്പറേറ്റര്‍ ആൻഡ് പ്രോഗ്രാമിംഗ് അസിസ്റ്റന്‍റ് എന്നീ രണ്ട് ട്രേഡുകളിലെ നാല് ബാച്ചുകളിലായി നൂറോളം ട്രെയിനികളാണ് ഈ സ്ഥാപനത്തിലുള്ളത്. എന്‍സിവിടി നോംസ് പ്രകാരം ഈ സ്ഥാപനത്തിന് ഒരേക്കര്‍ ഏഴുസെന്‍റ് സ്ഥലമാണ് ആവശ്യമായുള്ളത്. ഈ സ്ഥലം ചങ്ങനാശേരി നഗരസഭ നല്‍കാമെന്ന ധാരണയിലാണ് ഐടിഐ താത്കാലികമായി ഗവൺമെന്‍റ് എല്‍പി സ്‌കൂളില്‍ പ്രവര്‍ത്തനമാരംഭിച്ചത്. സ്ഥലം ലഭിച്ചാല്‍ വ്യാ വസായിക വകുപ്പ് കെട്ടിടം നിര്‍മിച്ചു നല്‍കാമെന്ന് ഉറപ്പുനൽകിയിട്ടുണ്ട്. എന്നാല്‍, കാലം ഇത്രയുമായിട്ടും നഗരസഭ ഐടിഐക്ക് സ്ഥലം അനുവദിച്ചു നല്‍കിയിട്ടില്ല. ഇതുമൂലം ഈ സ്ഥാപനത്തിന്‍റെ വികസന സാധ്യതകളും അടഞ്ഞിരിക്കുകയാണ്. നിവേദനം നല്‍കും ഐടിഐക്ക് ഉചിതമായ സ്ഥലം അനുവദിക്കണമെന്നാവശ്യപ്പെട്ട് അധികാരികള്‍ക്ക് നിവേദനം സമര്‍പ്പിക്കും. ജയമോള്‍ ബി. കവിയൂര്‍ വനിതാ ഐടിഐ പിടിഎ പ്രസിഡന്‍റ് സ്ഥലം കണ്ടെത്തും വനിതാ ഐടിഐക്ക് അനുയോജ്യമായ സ്ഥലം കണ്ടെത്തി നല്‍കും. കൃഷ്ണകുമാരി രാജശേഖരന്‍ മുനിസിപ്പല്‍ ചെയര്‍പേഴ്‌സണ്‍ വ്യവസായിക വകുപ്പ് കെട്ടിടം നിര്‍മിച്ചു നല്‍കും വനിതാ ഐടിഐക്ക് നഗരസഭ സ്ഥലം അനുവദിച്ചാല്‍ വ്യാവസായിക വകുപ്പ് കെട്ടിടം നിര്‍മിച്ചുനല്‍കും. ജോബ് മൈക്കിള്‍ എംഎല്‍എ

വാർധക്യം സന്തോഷകരമാക്കാൻ സീയോനിൽ ഗ്രേസ്ഫുൾ ധ്യാനം

ചങ്ങനാശേരി: അതിരൂപതയുടെ കുന്നന്താനം സീയോൻ ധ്യാനകേന്ദ്രത്തിൽ അറുപതു വയസിനു മുകളിലുള്ളവർക്കായി നടത്തിവരുന്ന ഗ്രേസ്ഫുൾ ധ്യാനം 27 മുതൽ 30 വരെ നടക്കും. ധ്യാനകേന്ദ്രം ഡയറക്‌ടർ ഫാ. തോമസ് പ്ലാപ്പറന്പിൽ, ഫാ. ഷാജി തുന്പേച്ചിറയിൽ എന്നിവരുടെ നേതൃത്വത്തിലാണ് നാലുദിവസം ധ്യാനകേന്ദ്രത്തിൽ താമസിച്ചുള്ള ധ്യാനം നടത്തുന്നത്. വാർധക്യത്തിലെ പ്രശ്നങ്ങളും പ്രതിവിധികളും സംബന്ധിച്ച് വിദഗ്ധരായ ഡോക്‌ടർമാരും വൈദികരും പ്രഭാഷണം നടത്തും. വാർധക്യകാലത്തെ അവഗണനയും അനാരോഗ്യവും മറന്ന് സന്തോഷം കണ്ടെത്താൻ നാലുദിവസങ്ങളിലായി നടക്കുന്ന സൗഖ്യദായക ശുശ്രൂഷകൾ, കൗൺസലിംഗ്, വ്യായാമപരിശീലനം എന്നിവ സഹായിക്കുന്നു. കൂടുതൽ വിവരങ്ങൾക്കും രജിസ്ട്രേഷനും 8086399023, 9495107045 എന്നീ നന്പരുകളിൽ ബന്ധപ്പെടുക.

എസ്ബി കോളജില്‍ ബിരുദദാനച്ചടങ്ങ് ഇന്ന്

ചങ്ങനാശേരി: എസ്ബി കോളജില്‍ ബിരുദദാനച്ചടങ്ങ് ഇന്നു രാവിലെ 10ന് നടക്കും. മഹാത്മാഗാന്ധി യൂണിവേഴ്‌സിറ്റി വൈസ്ചാന്‍സലര്‍ പ്രഫ. സി.ടി. അരവിന്ദകുമാര്‍ മുഖ്യാതിഥിയായിരിക്കും. ആര്‍ച്ച്ബിഷപ് മാര്‍ തോമസ് തറയില്‍ അനുഗ്രഹപ്രഭാഷണം നടത്തും. കോളജ് മാനേജര്‍ മോണ്‍. ആന്‍റണി എത്തയ്ക്കാട്ട്, കോളജ് പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍, വൈസ്പ്രിന്‍സിപ്പല്‍ ഫാ. ജോസ് മുല്ലക്കരി എന്നിവര്‍ പ്രസംഗിക്കും. 2025ലെ "ബെസ്റ്റ് ഔട്ട്ഗോയിംഗ് സ്റ്റുഡന്‍റ്- ലൂമിനറി അവാര്‍ഡ്’ നേടിയ പി. അപര്‍ണ മറുപടിപ്രസംഗം നടത്തും. ബിരുദം സ്വീകരിക്കുന്ന വിദ്യാര്‍ഥികളും അവരുടെ മാതാപിതാക്കളും ഉള്‍പ്പെടെ രണ്ടായിരത്തോളം ആളുകള്‍ ചടങ്ങില്‍ പങ്കെടുക്കും. കോളജ് ഗ്രൗണ്ടിലും ഇന്‍ഡോര്‍ സ്റ്റേഡിയത്തിലും ഉള്‍പ്പെടെ വിപുലമായ പാര്‍ക്കിംഗ് ക്രമീകരണങ്ങള്‍ ഒരുക്കിയിട്ടുണ്ട്.

ദേശീയ പണിമുടക്ക് ചങ്ങനാശേരിയില്‍ പൂർണം

ചങ്ങനാശേരി: കേന്ദ്രസര്‍ക്കാരിന്‍റെ തെറ്റായ തൊഴിലാളി ദ്രോഹനയങ്ങള്‍ക്കെതിരേ സംയുക്ത ട്രേഡ് യൂണിയനുകളും സര്‍ക്കാര്‍ ജീവനക്കാരുടെ ഫെഡറേഷനുകളും നടത്തിയ ദേശീയ പണിമുടക്ക് ചങ്ങനാശേരിയില്‍ പൂര്‍ണം. റവന്യു ടവര്‍ ഉള്‍പ്പെടെ സര്‍ക്കാര്‍ ഓഫീസുകളില്‍ ജീവനക്കാരുടെ ഹാജര്‍നില കുറവായിരുന്നു. സ്‌കൂളുകളും കോളജുകളും പ്രവര്‍ത്തിച്ചില്ല. നഗരത്തിലും ഗ്രാമീണമേഖലകളിലും കടകമ്പോളങ്ങള്‍ അടഞ്ഞുകിടന്നു. പണിമുടക്കനുകൂലികള്‍ പ്രകടനത്തിനിടെ ഹെഡ്‌ പോസ്റ്റ് ഓഫീസിലേക്കു തള്ളിക്കയറി ഓഫീസ് പ്രവര്‍ത്തനം നിര്‍ത്തിവയ്ക്കണമെന്ന് ആവശ്യപ്പെട്ടു. ഇത് പോസ്റ്റ് ഓഫീസ് ജീവനക്കാരുമായി തര്‍ക്കത്തിനിടയാക്കി. സംഭവം മൊബൈലില്‍ ചിത്രീകരിച്ച ബിജെപി അനുകൂല സംഘടനയായ ഭാരതീയ പോസ്റ്റല്‍ എംപ്ലോയീസ് ഫെഡറേഷന്‍ ചങ്ങനാശേരി ഡിവിഷന്‍ സെക്രട്ടറിയും പോസ്റ്റ്മാനുമായ കാവാലം നാരകത്തറ സ്വദേശി വിഷ്ണു ചന്ദ്ര (32)നെ സമരനാനുകൂലികള്‍ മര്‍ദിച്ചതായും പരാതിയുണ്ട്. പരിക്കേറ്റ ഇയാളെ ചങ്ങനാശേരി ജനറല്‍ ആശുപത്രിയില്‍ പ്രവേശിപ്പിച്ചു. ഇതേത്തുടര്‍ന്ന് പോസ്റ്റ് ഓഫീസ് അടച്ചു. പോസ്റ്റ്മാനെ കൈയേറ്റം ചെയ്തതു സംബന്ധിച്ച് പോസ്റ്റ്മാസ്റ്റര്‍ ചങ്ങനാശേരി പോലീസ് സ്റ്റേഷനില്‍ പരാതി നല്‍കി. കെഎസ്ആര്‍ടിസി ഡിപ്പോയിലെ ജീവനക്കാര്‍ പലരും ഹാജരായെങ്കിലും പുലര്‍ച്ചെ 4.40നുള്ള നെടുംകണ്ടം സര്‍വീസ് മാത്രമേ ഓടിയുള്ളൂ. നഗരത്തിലൂടെ കടന്നുപോയ കെഎസ്ആര്‍ടിസി, അന്തര്‍സംസ്ഥാന ടൂറിസ്റ്റ് ബസുകളും സമരാനുകൂലികള്‍ തടഞ്ഞു. സമരാനുകൂലികള്‍ കെഎസ്ആര്‍ടിസി ബസുകള്‍ യാത്രക്കാരെ ഇറക്കിവിട്ടശേഷം ഡിപ്പോയിലേക്കു കയറ്റിയിടീച്ചു. സ്വകാര്യ ബസുകളും ഓട്ടോ ടാക്‌സികളും ഓടിയില്ല. ഹോട്ടലുകള്‍ അടഞ്ഞുകിടന്നു. ചില ബാറുകള്‍ തുറന്നുപ്രവര്‍ത്തിച്ചു. സംയുക്ത ട്രേഡ് യൂണിയന്‍റെ നേതൃത്വത്തില്‍ നഗരത്തില്‍ പ്രകടനവും ഹെഡ് പോസ്റ്റ് ഓഫീസ് മാര്‍ച്ചും നടത്തി. ടിബി റോഡില്‍നിന്നും ആരംഭിച്ച മാര്‍ച്ച് നഗരം ചുറ്റി പോസ്റ്റ് ഓഫീസ് ജംഗ്ഷനില്‍ സമാപിച്ചു. തുടര്‍ന്നു നടന്ന സമ്മേളനം സിഐടിയു ജില്ലാ വൈസ് പ്രസിഡന്‍റ് കെ.സി. ജോസഫ് ഉദ്ഘാടനം ചെയ്തു. എഐടിയുസി മണ്ഡലം പ്രസിഡന്‍റ് കെ.ടി. തോമസ് അധ്യക്ഷത വഹിച്ചു. സമരസമിതി നേതാക്കളായ ടി.എസ്. നിസ്താര്‍, കെ.ഡി. സുഗതന്‍, പി.എ. നിസാര്‍, ടി.പി. അജികുമാര്‍, അഡ്വ.പി.എ. നിസാര്‍, പി.ആര്‍. അനില്‍കമാര്‍, അഡ്വ.കെ. മാധവന്‍പിള്ള, ജോജി ജോസഫ് എന്നിവര്‍ പ്രസംഗിച്ചു. കുറിച്ചി, പായിപ്പാട്, മാടപ്പള്ളി, തൃക്കൊടിത്താനം പോസ്റ്റ് ഓഫീസുകളിലേക്കും സമരസമിതി മാര്‍ച്ച് സംഘടിപ്പിച്ചു.

കാറിൽനിന്ന് കഞ്ചാവ് പിടികൂടി

തലയോലപ്പറമ്പ്: യുവാക്കൾ സഞ്ചരിച്ച കാർ സ്കൂട്ടറിൽ ഇടിച്ചുണ്ടായ അപകടത്തെത്തുടർന്ന് സ്ഥലത്തെത്തിയ പോലീസ് നടത്തിയ പരിശോധനയിൽ വാഹനത്തിൽനിന്നു കഞ്ചാവ് കണ്ടെടുത്തു. സംഭവവുമായി ബന്ധപ്പെട്ട് ഒരാൾക്കെതിരേ പോലീസ് കേസ് രജിസ്റ്റർ ചെയ്തു. ചൊവ്വാഴ്ച രാത്രി 10.45ന് മറവൻതുരുത്ത് - ടോൾ റോഡിൽ മണിശേരി ക്ഷേത്രത്തിനു സമീപമാണ് അപകടം നടന്നത്. കാർ ഓടിച്ചിരുന്ന ചെമ്പ് തുരുത്തുമ്മ സ്വദേശി ജിത്തുവി (25)നെതിരേയാണ് തലയോലപ്പറമ്പ് പോലീസ് കേസെട‌ുത്തത്. മൂന്നംഗ സംഘം കാറിൽ കോട്ടയം ഇല്ലിക്കൽക്കല്ലിൽ പോയി തിരികെ വരുന്നതിനിടെ നിയന്ത്രണം വിട്ട കാർ മുന്നിൽപ്പോയ സ്കൂട്ടറിനു പിന്നിൽ ഇടിച്ചാണ് അപകടം. തുടർന്ന് നാട്ടുകാർ ഓടിക്കുടുകയും ഇവരെ തടയുകയുമായിരുന്നു. സംഭവമറിഞ്ഞ് തലയോലപ്പറമ്പ് പോലീസ് സ്ഥലത്തെത്തുകയും ഇവർ ലഹരി ഉപയോഗിച്ചതായി സംശയമുണ്ടെന്ന് നാട്ടുകാർ പറഞ്ഞതോടെ കാർ പരിശോധിക്കുകയുമായിരുന്നു. കാറിന്‍റെ ഡാഷ് ബോർഡിൽ സൂക്ഷിച്ചിരുന്ന മൂന്നു ഗ്രാം കഞ്ചാവ് പോലീസ് കണ്ടെടുത്തു. തുടർന്ന് കാറിലുണ്ടായിരുന്ന മറ്റു രണ്ടു യുവാക്കളെ പോലിസ് സ്റ്റേഷനിലേക്കു കൊണ്ടുവരികയായിരുന്നു. വാഹനം ഓടിച്ചിരുന്ന യുവാവ്, അപകടത്തിൽ പരിക്കേറ്റയാളെ വൈക്കം താലൂക്ക് ആശുപത്രിയിൽ ചികിത്സക്കായി കൊണ്ടുപോയ ശേഷം തിരികെ എത്തിയതോടെ ഇയാളെ അറസ്റ്റ് ചെയ്യുകയായിരുന്നു. യുവാവിനെ പിന്നീട് ജാമ്യത്തിൽ വിട്ടു. കാർ പോലീസ് കസ്റ്റഡിയിലെടുത്തു. അപകടത്തിൽ സാരമായി പരിക്കേറ്റ സ്കൂട്ടർ യാത്രികൻ താലൂക്ക് ആശുപത്രിയിൽ ചികിത്സയിലാണ്.

കുറുപ്പന്തറ സെന്‍റ് സേവ്യേഴ്സ് വിഎച്ച്എസ്എസിൽ മെറിറ്റ് ഡേ

കുറുപ്പന്തറ: സെന്‍റ് സേവ്യേഴ്‌സ് വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ പിടിഎയുടെയും പൂര്‍വ വിദ്യാര്‍ഥീ സംഘടനയായ ആസ്‌ക്കിന്‍റെയും (എഎഎസ്‌കെ) സംയുക്താഭിമുഖ്യത്തില്‍ മെറിറ്റ് ഡേ ആചരിച്ചു. എസ്എസ്എല്‍സി, പ്ലസ്ടു പരീക്ഷകളില്‍ ഫുള്‍ എ പ്ലസ് നേടിയവരെയും എല്‍എസ്എസ്, യുഎസ്എസ്, എന്‍എംഎംഎസ് പരീക്ഷകളില്‍ മികച്ച വിജയം നേടിയ വിദ്യാര്‍ഥികളെയും ആദരിച്ചു. മോന്‍സ് ജോസഫ് എംഎല്‍എ പരിപാടിയുടെ ഉദ്ഘാടനം നിര്‍വഹിച്ചു. ‌ യോഗത്തില്‍ സ്‌കൂള്‍ മാനേജര്‍ ഫാ. ജോസ് വള്ളോംപുരയിടം അധ്യക്ഷത വഹിച്ചു. സിനിമാ സംവിധായകനായ ബിന്‍റോ സ്റ്റീഫന്‍, പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍, വാര്‍ഡ് മെമ്പര്‍ ആന്‍സി സിബി, പ്രിന്‍സിപ്പല്‍ അനൂപ് കെ. സെബാസ്റ്റ്യന്‍, ഹെഡ്മാസ്റ്റര്‍ ജോഷി ജോര്‍ജ്, പിടിഎ പ്രസിഡന്‍റ് ഷാജി കടുന്നക്കരി, ആസ്‌ക് പ്രസിഡന്‍റ് കെ.എം. ടോമി, അധ്യാപക പ്രതിനിധി പി.ജെ. സിജോ, മെര്‍ളിന്‍ ആന്‍ ബിജോ എന്നിവര്‍ പ്രസംഗിച്ചു.

മാലിന്യസംഭരണകേന്ദ്രം നിര്‍മിക്കാനുള്ള നീക്കത്തിനെതിരേ നാട്ടുകാര്‍ രംഗത്ത്

പെരുവ: റേഷന്‍കടയ്ക്കും അങ്കണവാടിക്കും വീടുകള്‍ക്കും സമീപം മാലിന്യസംഭരണകേന്ദ്രം നിര്‍മിക്കാനുള്ള നീക്കത്തിനെതിരേ നാട്ടുകാര്‍ രംഗത്ത്. മുളക്കുളം പഞ്ചായത്തിലെ വടുകുന്നപ്പുഴയിലെ മിനി വ്യവസായ കേന്ദ്രത്തിലാണ് മാലിന്യം സംഭരിക്കാന്‍ പ്ലാന്‍റ് നിര്‍മിക്കുന്നത്. ഇതിനെതിരേ സമീപവാസികളും നാട്ടുകാരും പ്രതിഷേധവുമായി രംഗത്ത് എത്തിയിരിക്കുകയാണ്. പഞ്ചായത്തിലെ മുഴുവന്‍ വാര്‍ഡുകളിലെയും മാലിന്യങ്ങള്‍ സംഭരിക്കാന്‍വേണ്ടിയാണ് ഇവിടെ ബഹുനില കെട്ടിടം നിര്‍മിക്കാനുദേശിക്കുന്നത്. പ്ലാന്‍റ് നിര്‍മിക്കുന്ന സ്ഥലത്തുനിന്നു മീറ്ററുകള്‍ മാറിയാണ് പൊതുവിതരണ കേന്ദ്രവും മൃഗസംരക്ഷണ വകുപ്പിന്‍റെ സബ്‌സെന്‍ററും പ്രവര്‍ത്തിക്കുന്നത്. ഇവിടെനിന്ന് 25 മീറ്റര്‍ മാറി അങ്കണവാടിയും നൂറു മീറ്റര്‍ ദൂരത്തില്‍ പ്രാഥമികാരോഗ്യകേന്ദ്രത്തിന്‍റെ സബ് സെന്‍ററും പ്രവര്‍ത്തിക്കുന്നു. കൂടാതെ യുവജനങ്ങള്‍ ഷട്ടില്‍ കളിക്കുന്ന കോര്‍ട്ടും ഇവിടെയാണ് സ്ഥിതിചെയ്യുന്നുത്. ഇതിനു ചുറ്റുമായി നിരവധി വീടുകളും കിണറുകളുമുണ്ട്. ദിവസവും നൂറുകണക്കിന് ആളുകളാണ് ഇവിടെ വിവിധ ആവശ്യങ്ങള്‍ക്കായി എത്തുന്നത്. കൂടാതെ ചെല്ലാനിരപ്പ് ഭാഗത്തേക്ക് സഞ്ചരിക്കുന്ന കാല്‍നടയാത്രക്കാരും ഇതുവഴിയാണ് കടന്നുപോകുന്നത്. ഇപ്പോള്‍ ഇവിടെ പഞ്ചായത്തിലെ ഒന്ന്, രണ്ട് വാര്‍ഡുകളിലെ വീടുകളില്‍നിന്നും ഹരിതകര്‍മസേന സംഭരിച്ച പ്ലാസ്റ്റിക് മാലിന്യങ്ങളാണ് ചാക്കുകളിലാക്കി സൂക്ഷിച്ചിരിക്കുന്നത്. ഇതു മഴയും വെയിലുമേറ്റ് ചീഞ്ഞ് ദുര്‍ഗന്ധം വമിക്കുകന്ന സ്ഥിതിയിലാണ്. പുതിയതായി നിര്‍മിക്കുന്ന മാലിന്യസംഭരണ പ്ലാന്‍റ് ഇവിടെനിന്നു മാറ്റിയില്ലെങ്കില്‍ ശക്തമായ സമരപരിപാടികള്‍ സംഘടിപ്പിക്കുമെന്ന് നാട്ടുകാര്‍ പറയുന്നു.

വൈക്കത്ത്‌ ദേശീയ പണിമുടക്ക് പൂർണം

വൈക്കം: കേന്ദ്ര സർക്കാരിന്‍റെ തൊഴിലാളിദ്രോഹ നയങ്ങൾക്കെതിരേ സംയുക്ത ട്രേഡ് യൂണിയനുകളും സർക്കാർ ജീവനക്കാരുടെ ഫെഡറേഷനുകളും നടത്തിയ ദേശീയ പണിമുടക്ക് വൈക്കത്ത്‌ പൂർണം. സിവിൽ സ്റ്റേഷനിലെ ഉൾപ്പെടെ സർക്കാർ ഓഫീസുകളിൽ ജീവനക്കാർ എത്താത്തതിനെത്തുടർന്ന് സർക്കാർ ഓഫീസുകൾ തുറന്നു പ്രവർത്തിച്ചില്ല. സ്കൂളുകളും കോളജുകളും വ്യാപാരശാലകളും ചന്തകളും പെട്രോൾ പമ്പുകളും അടഞ്ഞുകിടന്നു. എന്നാൽ, ആശുപത്രികളുടെയും മരുന്നുകടകളുടെയും പ്രവർത്തനങ്ങൾക്ക് തടസമുണ്ടായില്ല. കെഎസ്ആർടിസി- സ്വകാര്യ ബസുകളും ഓട്ടോ ടാക്സികളും പണിമുടക്കി. സംയുക്ത ട്രേഡ് യൂണിയന്‍റെ നേതൃത്വത്തിൽ വൈക്കം തൊഴിലാളി ദ്രോഹ നയങ്ങൾക്കെതിരേ നഗരത്തിൽ പ്രകടനവും ബിഎസ്എൻഎൽ ഓഫീസ് മാർച്ചും നടത്തി. ദേവസ്വം ഗ്രൗണ്ടിൽനിന്ന് ആരംഭിച്ച മാർച്ച്‌ ബിഎസ്എൻഎൽ ഓഫീസിനു മുന്നിൽ സമാപിച്ചു. തുടർന്ന് ബിഎസ്എൻഎൽ ഓഫീസിനു മുന്നിൽ ചേർന്ന പ്രതിഷേധ സമരം സിഐടിയു സംസ്ഥാന കമ്മിറ്റി അംഗം കെ.കെ. ഗണേശൻ ഉദ്ഘാടനം ചെയ്തു. എ ഐ ടിയുസി നേതാവ് പി. സുഗതൻ അധ്യക്ഷത വഹിച്ചു. ടി.എൻ. രമേശൻ, പി.വി. പുഷ്കരൻ, പി.എസ്. പുഷ്കരൻ, എം.എൻ. അനിൽകുമാർ, സി.പി. പ്രമോദ്, ഏബ്രഹാം പഴയകടവൻ, സി.പി. ജയരാജ്‌, കെ.അജിത്, ടി.ജി. ബാബു, സി.കെ. ആശ എംഎൽഎ എന്നിവർ പ്രസംഗിച്ചു.

തെരുവുനായശല്യം വർധിക്കുന്നു

മണർകാട്: പെരുമാനുർ കുളം മുതൽ കണിയാംകുന്നു വരെയുള്ള ഭാഗത്ത് തെരുവുനായ ശല്യം രൂക്ഷമാകുന്നതായി പരാതി. പ്രദേത്തെ വീടുകളുടെ ഗേറ്റ് തുറന്നാൽ വീട്ടുമുറ്റത്തേക്ക് നായ്ക്കൾ ചാടി കടക്കും. ഭയം കാരണം ഇവ തിരികെ പോകുന്നവരെ വീടടച്ച് അകത്തിരിക്കുകയേ മാർഗമുള്ളൂവെന്ന് നാട്ടുകാർ പറയുന്നു. നായ്ക്കൾ കാരണം ബാങ്കിൽ വരാൻ ഇടപാടുകാർക്കു പേടിയാണെന്ന് ഇവിടെ പ്രവർത്തിക്കുന്ന ബാങ്കിലെ ജീവനക്കാരും പറ‍യുന്നു. കണിയാംകുന്ന് ഭാഗത്തു മൂന്ന് സ്കൂളുകളുണ്ട്. ഇന്നലെ നായ പിന്നാലെ വരുന്നതു കണ്ട് ഓടിയ വിദ്യാർഥിയുടെ കാലിനു റോഡിൽ വീണു പരിക്കേറ്റിരുന്നു. വഴിയിൽ കൂടെ നടക്കാൻ പോലും ഇപ്പോൾ ഭയമാണെന്നും പ്രശ്നം പരിഹരിക്കാൻ ബന്ധപ്പെട്ട അധികൃതർ നടപടിയെടുക്കണമെന്നുമാണ് നാട്ടുകാരുടെ ആവശ്യം.

സംരംഭക സംരക്ഷണത്തിന് നിയമം വേണം: ഫ്രാന്‍സിസ് ജോര്‍ജ്

കോട്ടയം: സംരംഭക സംരക്ഷണ നിയമനിര്‍മാണം നടത്തണമെന്നും സംരംഭങ്ങളുടെ നിലനില്പിനും വളര്‍ച്ചയ്ക്കും അനുയോജ്യമായ സാമ്പത്തിക പങ്കാളികളായി ധനകാര്യ സ്ഥാപനങ്ങള്‍ മാറണമെന്നും ഫ്രാന്‍സിസ് ജോര്‍ജ് എംപി. ബില്‍ഡേഴ്സ് അസോസിയേഷന്‍ ഓഫ് ഇന്ത്യ കോട്ടയം പ്രസ്‌ക്ലബ്ബില്‍ സംഘടിപ്പിച്ച സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. ബില്‍ഡേഴ്സ് അസോസിയേഷന്‍ ഏറ്റുമാനൂര്‍ സെന്‍റര്‍ ചെയര്‍മാന്‍ ഷാജി ഇലവത്തില്‍ അധ്യക്ഷത വഹിച്ചു. ചീഫ് കോ-ഓര്‍ഡിനേറ്റര്‍ എബി. എം. പൊന്നാട്ട്, ബില്‍ഡേഴ്സ് അസോസിയേഷന്‍ ഓഫ് ഇന്ത്യ സ്റ്റേറ്റ് ചെയര്‍മാന്‍ കെ.എ. ജോണ്‍സണ്‍, സുരേഷ് പൊറ്റക്കാട്, കേരള സ്റ്റേറ്റ് സ്‌മോള്‍ സ്‌കെയില്‍ ഇന്‍സ്ട്രീസ് അസോസിയേഷന്‍ ജില്ലാ പ്രസിഡന്‍റ് കെ. ദിലീപ് കുമാര്‍, കിഫ്ബി കോണ്‍ട്രാക്‌ടേഴ്‌സ് അസോസിയേഷന്‍ സെക്രട്ടറി പോള്‍ ടി. മാത്യു, ഗവൺമെന്‍റ് കോണ്‍ട്രാക്ടേഴ്‌സ് അസോസിയേഷന്‍ പ്രസിഡന്‍റ് വര്‍ഗീസ് കണ്ണമ്പള്ളി, എംഎസ്എംഇ ബോറവേഴ്സ് അസോസിയേഷന്‍ പ്രസിഡന്‍റ് ജോഷ് ലോറന്‍സ് എന്നിവര്‍ പ്രസംഗിച്ചു.

മാന്നാനം പാലത്തിന്‍റെ ‌നിര്‍മാണം പുനരാരംഭിക്കുന്നു

കോട്ടയം: സാങ്കേതിക പ്രശ്നങ്ങളെത്തുടര്‍ന്ന് മുടങ്ങിക്കിടന്നിരുന്ന മാന്നാനം പാലത്തിന്‍റെ നിര്‍മാണം പുനരാരംഭിക്കുന്നു. കെഎസ്ടിപിയുടെ നേതൃത്വത്തില്‍ റീ ബില്‍ഡ് കേരള പദ്ധതിയില്‍ ഉള്‍പ്പെടുത്തി 24.83 കോടി രൂപ ചെലവഴിച്ചാണ് പാലം നിര്‍മിക്കുന്നത്. ദേശീയ ജലപാതാ മാനദണ്ഡങ്ങള്‍ പാലിച്ച് നിര്‍മിക്കുന്ന പുതിയ പാലം 228.7 മീറ്റര്‍ നീളത്തിലും 12 മീറ്റര്‍ വീതിയിലും വര്‍ഷകാല ജലനിരപ്പില്‍നിന്ന് ആറു മീറ്റര്‍ ഉയരത്തിലുമാണ് പണിയുന്നത്. നീണ്ടൂര്‍, അതിരമ്പുഴ പഞ്ചായത്തുകളെ ബന്ധിപ്പിച്ച് മാന്നാനം-നീണ്ടൂര്‍ റോഡില്‍ പെണ്ണാര്‍ തോടിനു കുറുകെയാണ് പാലം. മാന്നാനംപാലം പൊളിച്ച് പുതുക്കിപ്പണിയാന്‍ മുന്പേ നടപടികളാവുകയും പണികള്‍ തുടങ്ങുന്ന ഘട്ടത്തിലെത്തുകയും ചെയ്തിരുന്നതാണ്. എന്നാല്‍ പെണ്ണാര്‍ തോട് ദേശീയ ജലപാതയിലുള്‍പ്പെടുത്തി വിജ്ഞാപനം വന്നതോടെയാണ് ഒരു വര്‍ഷമായി നിര്‍മാണം മുടങ്ങിക്കിടന്നിരുന്നത്. ദേശീയ ജലപാതയുടെ മുകളിലുള്ള പാലങ്ങള്‍ക്ക് നിയമമനുസരിച്ച് 41 മീറ്റര്‍ നീളം, 12 മീറ്റര്‍ വീതി, വര്‍ഷകാലജലനിരപ്പില്‍ നിന്ന് ആറു മീറ്റര്‍ ഉയരം എന്നിവ വേണം. നിര്‍മാണം ആരംഭിച്ച പാലത്തിന് 10 മീറ്റര്‍ നീളവും നാലു മീറ്റര്‍ വീതിയുമായിരുന്നു. മന്ത്രി വി.എന്‍. വാസവന്‍റെ ഇടപെടലിനെത്തുടര്‍ന്നാണ് ദേശീയ ജലപാതാ മാനദണ്ഡങ്ങള്‍ പാലിച്ച് പുതിയ പാലം നിര്‍മിക്കാന്‍ പുതിയ രൂപരേഖ തയാറാക്കിയത്. ഒരേസമയം ഒരു വാഹനത്തിനു മാത്രം കടന്നുപോകാവുന്ന വീതിയേ പഴയ പാലത്തിന് ഉണ്ടായിരുന്നുള്ളൂ. പാലത്തിന്‍റെ കൈവരികളും ബീമുകളും ദ്രവിച്ച നിലയിലാണ്. പാലം പണി മുടങ്ങിയത് പ്രദേശത്തെ ജനങ്ങളെ തീരാദുരിതത്തിലാക്കിയിരുന്നു. മാന്നാനത്തുനിന്ന് നീണ്ടൂര്‍ ഭാഗത്തേക്കു പോകുന്ന വാഹനങ്ങള്‍ ഇപ്പോള്‍ വില്ലൂന്നിയിലെത്തിയാണ് യാത്ര തുടരുന്നത്. പുതിയ പാലം വരുന്നതോടെ കല്ലറ, നീണ്ടൂര്‍ ഭാഗങ്ങളില്‍നിന്നെത്തുന്നവര്‍ക്ക് എളുപ്പത്തില്‍ മാന്നാനത്തേക്കും മെഡിക്കല്‍ കോളജിലേക്കുമൊക്കെ എത്താനാവും. മാന്നാനത്തെ വിദ്യാഭ്യാസസ്ഥാപനങ്ങളില്‍ പഠിക്കുന്ന നൂറുകണക്കിനു വിദ്യാര്‍ഥികള്‍ക്കും സൗകര്യമാവും.

വളര്‍ത്തുനായ്ക്കളെ വഴിയില്‍ ഉപേക്ഷിക്കുന്നതു വ്യാപകമെന്ന്

പാമ്പാടി: വളര്‍ത്തുനായ്ക്കളെ വാഹനങ്ങളില്‍ കൊണ്ടുവന്ന് വഴിയില്‍ ഉപേക്ഷിക്കുന്നതു വ്യാപകം. പൂതകുഴി, നെടുങ്ങോട്ടുമല, കന്നുവെട്ടി, ഇല്ലിമറ്റം തുടങ്ങിയ പ്രദേശങ്ങളിലാണ് വളര്‍ത്തുനായ്ക്കളെ ഉപേക്ഷിക്കുന്നത്. രോഗം ബാധിച്ചവയും പ്രായാധിക്യമുള്ളവയും വിദേശത്തു താമസമാക്കാന്‍ ഒരുങ്ങുന്നവരുടെയും നായ്ക്കളാണ് ഉപേക്ഷിക്കപ്പെടുന്നവയില്‍ കൂടുതലും. ഇത്തരം നായ്ക്കളെ ഉപേക്ഷിക്കാന്‍ ഉയര്‍ന്ന വാടകയ്ക്ക് സ്ഥിരമായി ഓടുന്ന വാഹനങ്ങളുമുണ്ട്. കര്‍ശന പരിശോധന മൂലം വഴിയില്‍ ഭക്ഷ്യമാലിന്യങ്ങള്‍ ഉപേക്ഷിക്കുന്നതു കുറഞ്ഞത് പട്ടികളെ വളര്‍ത്തുകോഴികളെ പിടിച്ചു ഭക്ഷണമാക്കാന്‍ നിര്‍ബന്ധിതരാക്കുന്നു. വലിയ ഫാമുകളിലും വീടുകളില്‍ വളര്‍ത്തുന്ന കോഴികളെയും ഒരുപോലെ ഇവ ആക്രമിക്കുകയാണ്. കഴിഞ്ഞ മൂന്നുമാസത്തിനുള്ളില്‍ പതിനായിരത്തോളം കോഴികളാണ് നായ്ക്കളുടെ ആക്രമണത്തിനിരയായത്. അതീവ ഗൗരവമേറിയ ഈ വിഷയം പരിഹരിക്കാന്‍ കര്‍ശന നടപടി സ്വീകരിക്കണമെന്ന് കര്‍ഷക കോണ്‍ഗ്രസ് ജില്ലാ ജനറല്‍ സെക്രട്ടറി എബി ഐപ്പ് ആവശ്യപ്പെട്ടു.

വനിതാ കമ്മീഷന്‍ സെമിനാര്‍ ഇന്ന്

കോട്ടയം: സംസ്ഥാന വനിതാ കമ്മീഷനും ജില്ലാ പഞ്ചായത്തും സംയുക്തമായി സ്ത്രീകളും ആരോഗ്യവും, സൈബര്‍ ഇടങ്ങളിലെ ചതിക്കുഴികള്‍ എന്നീ വിഷയങ്ങളില്‍ സംസ്ഥാനതല സെമിനാര്‍ സംഘടിപ്പിക്കും. ജില്ലാ പഞ്ചായത്ത് ഹാളില്‍ ഇന്നു രാവിലെ 10ന് വനിതാ കമ്മീഷന്‍ അംഗം അഡ്വ. ഇന്ദിര രവീന്ദ്രന്‍ സെമിനാര്‍ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ അധ്യക്ഷത വഹിക്കും. ചങ്ങനാശേരി ജനറല്‍ ആശുപത്രി ഗൈനക്കോളജിസ്റ്റ് കണ്‍സള്‍ട്ടന്‍റ് ഡോ.എല്‍. ലതാകുമാരി, കേരള പോലീസ് സൈബര്‍ എക്‌സ്‌പേര്‍ട്ട് ബി. ശ്യംകുമാര്‍, ജില്ലാ പഞ്ചായത്തംഗങ്ങളായ വൈസ് പ്രസിഡന്‍റ് ജോസ് പുത്തന്‍കാലാ, പി.ആര്‍. അനുപമ, പി.എം. മാത്യു, മഞ്ജു സുജിത്, ഹൈമി ബോബി, ജില്ലാ പഞ്ചായത്ത് സെക്രട്ടറി പി.എസ്. ഷിനോ, കേരള വനിതാ കമ്മീഷന്‍ മെംബര്‍ സെക്രട്ടറി വൈ.ബി. ബീന, കേരള വനിതാ കമ്മീഷന്‍ റിസര്‍ച്ച് ഓഫീസര്‍ എ.ആര്‍. അര്‍ച്ചന എന്നിവര്‍ പങ്കെടുക്കും.

എസ്എഫ്ഐക്കാരെ അറസ്റ്റ് ചെയ്യണമെന്ന്

കോട്ടയം: കാലിക്കറ്റ് സര്‍വകലാശാലയില്‍ ജീവനക്കാരെ ക്രൂരമായി ആക്രമിക്കുകയും ഗുരുതരമായി പരിക്കേല്‍പ്പിക്കുകയും ചെയ്ത എസ്എഫ്‌ഐക്കാരെ ജാമ്യമില്ലാ വകുപ്പു പ്രകാരം കേസ് ചുമത്തി അറസ്റ്റ് ചെയ്യണമെന്ന് ഫെഡറേഷന്‍ ഓഫ് ഓള്‍ കേരള യൂണിവേഴ്‌സിറ്റി എംപ്ലോയീസ് ഓര്‍ഗനൈസേഷന്‍സ് സംസ്ഥാന കമ്മിറ്റി ആവശ്യപ്പെട്ടു. അതിക്രൂരമായ ആക്രമണത്തില്‍ പോലീസ്, കേസ് രജിസ്റ്റര്‍ ചെയ്തു കുറ്റക്കാരെ അറസ്റ്റ് ചെയ്യണമെന്നവശ്യപ്പെട്ട് ഇന്നു കേരളത്തിലെ എല്ലാ സര്‍വകലാശാലകളിലും പ്രതിഷേധസമരം സംഘടിപ്പിക്കുമെന്ന് ഫെഡറേഷന്‍ സംസ്ഥാന പ്രസിഡന്‍റ് എന്‍. മഹേഷ്, ജനറല്‍ സെക്രട്ടറി ജയന്‍ ചാലില്‍, ട്രഷറര്‍ കെ. എസ്. ജയകുമാര്‍ എന്നിവര്‍ അറിയിച്ചു.

ദേശീയ പണിമുടക്ക് പാന്പാടിമേഖലയിൽ പൂർണം

പാമ്പാടി: ഇന്നലെ നടന്ന ദേശീയ പണിമുടക്ക് മണർകാട്, പുതുപ്പള്ളി, മീനടം, പാമ്പാടി, കൂരോപ്പട, വാഴൂർ തുടങ്ങിയ സ്ഥലങ്ങളിൽ പൂർണമായിരുന്നു. വ്യാപാര സ്ഥാപനങ്ങളൊന്നും തുറന്നു പ്രവർത്തിച്ചില്ല. രാവിലെ തുറന്ന ബാങ്കുകൾ ഉൾപ്പെടെയുള്ള ധനകാര്യ സ്ഥാപനങ്ങൾ പണിമുടക്കനുകൂലികളെത്തി അടപ്പിച്ചു. ഒരിടത്തും ഇടപാടുകാരെത്തിയില്ല. കൃഷിഭവൻ, എഇഒ ഓഫീസുകളൊന്നും തുറന്നില്ലെങ്കിലും പാമ്പാടി വില്ലേജ് ഓഫീസ് തുറന്നുപ്രവർത്തിച്ചു. സിപിഎം പ്രവർത്തകരെത്തി വില്ലേജ് ഓഫീസ് അടപ്പിക്കാൻ ശ്രമിച്ചെങ്കിലും പോലീസെത്തി അനിഷ്ടസംഭവങ്ങൾ ഒഴിവാക്കി. വൈകുന്നേരം അഞ്ചുവരെ ഓഫീസ് തുറന്നിരിക്കണമെന്ന് വില്ലേജ് ഓഫീസറുടെ ചുമതലയുള്ള അസിസ്റ്റന്‍റിന് താക്കീതു നൽകിയാണ് സമരാനുകൂലികൾ പിരിഞ്ഞുപോയത്. ഇരുചക്ര വാഹനങ്ങളും സ്വകാര്യ കാറുകളും നിരത്തിലിറങ്ങി. ഹോട്ടലുകളൊന്നും പ്രവർത്തിക്കാതിരുന്നതിനാൽ ടൗണുകളിലെത്തിയവർ ഭക്ഷണം കിട്ടാതെ വലഞ്ഞു.

ജോലിചെയ്യുന്ന ബാങ്കിൽനിന്നു പണം തട്ടിയ യുവാവ് പിടിയിൽ

ഗാന്ധിനഗര്‍: എച്ച്ഡിഎഫ്‌സി ബാങ്ക് കുമാരനല്ലൂര്‍ ബ്രാഞ്ചില്‍ സാമ്പത്തിക ക്രമക്കേടുകള്‍ നടത്തിയ ജീവനക്കാരന്‍ അറസ്റ്റില്‍. പനച്ചിക്കാട് ഐമാന്‍ കവല മലയില്‍ ടോണി വര്‍ഗീസ് (31) ആണ് അറസ്റ്റിലായത്. പ്രതി ടെല്ലറായി ജോലി ചെയ്തു വന്നിരുന്ന എച്ച്ഡിഎഫ്‌സി സംക്രാന്തി ബ്രാഞ്ചിന്‍റെ കൗണ്ടറില്‍നിന്നും 2024 നവംബര്‍ 21ന് ഉച്ചയ്ക്ക് ഒന്നിനും വൈകുന്നേരം അഞ്ചിനും ഇടയ്ക്കുള്ള സമയത്ത് പ്രതി ബാങ്കിന്‍റെതന്നെ രണ്ട് അക്കൗണ്ടുകളില്‍ മൂന്നു ലക്ഷം രൂപ നിക്ഷേപിച്ചതായി ഡെപ്പോസിറ്റ് സ്ലിപ്പില്‍ എഴുതി ഒപ്പിട്ട് ബാങ്കില്‍ വയ്ക്കുകയായിരുന്നു. തുടര്‍ന്ന് അന്നേദിവസം ഉച്ചയ്ക്ക് ഒന്നിന് മറ്റൊരു അക്കൗണ്ടിലേക്ക് രണ്ടു ലക്ഷം രൂപയും പകല്‍ 3.30ഓടെ വേറൊരു അക്കൗണ്ടിലേക്ക് ഒരു ലക്ഷം രൂപയും ട്രാന്‍സ്ഫര്‍ ചെയ്ത് പിന്‍വലിച്ചെടുത്തു. തുടര്‍ന്ന് കാഷ് കൗണ്ടറില്‍നിന്ന് 1,100 രൂപ പണമായും ഇയാള്‍ എടുത്തു. ആകെ 3,01,100 രൂപ ബാങ്കില്‍നിന്നും തട്ടിയെടുത്തതായാണ് അന്വേഷണത്തിലൂടെ കണ്ടെത്തിയത്. സംഭവത്തില്‍ പ്രതി സ്റ്റേഷനില്‍ കീഴടങ്ങിയതിനെത്തുടര്‍ന്ന് അറസ്റ്റ് രേഖപ്പെടുത്തി കോടതിയില്‍ ഹാജരാക്കി. പ്രതിയെ റിമാന്‍ഡ് ചെയ്തു.

1.713 കിലോ കഞ്ചാവുമായി മൂന്നു പേര്‍ പിടിയില്‍

കോട്ടയം: വീടിനുള്ളില്‍നിന്നും വില്പനയ്ക്കായി എത്തിച്ച കഞ്ചാവുമായി സ്ത്രീ ഉള്‍പ്പെടെ മൂന്നു പേര്‍ പിടിയില്‍. കാരാപ്പുഴ പയ്യമ്പിള്ളിച്ചിറയില്‍ ഈശ്വരി (47), പൂത്തറ ഹൗസില്‍ അഖില്‍ പി. രാജ്(27), മലരിക്കല്‍ ചുങ്കത്ത് ഹൗസില്‍ അക്ഷയ് സി. അജി (26) എന്നിവരെയാണ് വെസ്റ്റ് പോലീസ് അറസ്റ്റ് ചെയതത്. ജില്ലാ പോലീസ് ചീഫ് എ. ഷാഹുല്‍ ഹമീദിനു ലഭിച്ച രഹസ്യവിവരത്തെത്തുടര്‍ന്ന് ഇന്നലെ രാത്രി 12.30ന് നടത്തിയ പരിശോധനയില്‍ ഒന്നാം പ്രതിയായ ഈശ്വരിയും കുടുംബവും താമസിച്ചുവരുന്ന വീട്ടിൽനിന്നാണ് 1.713 കിലോഗ്രാം കഞ്ചാവുമായി മൂന്നു പ്രതികളെയും പിടികൂടിയത്. കേസിലെ പ്രതികളായ അഖില്‍, അക്ഷയ് എന്നിവര്‍ ലഹരിവസ്തുക്കള്‍ കച്ചവടത്തിനായി സൂക്ഷിച്ച നിരവധി കേസുകളിലെ പ്രതികളാണ്. ഒന്നാംപ്രതി ഈശ്വരിയുടെ മകന്‍ സുന്ദര്‍ ഗണേഷ് കാപ്പാ നിയമപ്രകാരം ജില്ലയില്‍നിന്നു നാടുകടത്തപ്പെട്ട പ്രതിയാണ്. ഇയാള്‍ക്കെതിരേ തിരുപ്പൂരില്‍ എട്ടു കിലോ കഞ്ചാവുമായി പിടിക്കപ്പെട്ട കേസും നിലവിലുണ്ട്. പ്രതികളെ കോടതിയില്‍ ഹാജരാക്കി.

മഴ മാറി മാനം തെളിഞ്ഞു : വെള്ളപ്പൊക്കദുരിതത്തില്‍നിന്നു കുമരകത്തിന് മോചനം അകലെ

കുമരകം: കുമരകം നിവാസികള്‍ക്കു വെള്ളപ്പൊക്കമെന്നത് പണ്ടു വര്‍ഷകാലത്ത് മാത്രമായെത്തുന്ന അതിഥിയായിരുന്നുവെങ്കില്‍ ഇന്നു കുമരകത്തെ നിത്യസന്ദര്‍ശകനായ വില്ലനായി മാറിയിരിക്കുന്നു. കുമരകത്തെ ഭൂരിഭാഗം പ്രദേശങ്ങളിലെയും ആറുകളും തോടുകളും ചെറുചാലുകളുമെല്ലാം പോളയും പുല്‍ക്കെട്ടുകളും തിങ്ങിനിറഞ്ഞും എക്കലും ചെളിയും അടിഞ്ഞും നീരൊഴുക്ക് നിലച്ചിരിക്കുന്ന അവസ്ഥയിലാണ്. വര്‍ഷങ്ങള്‍ക്കുമുന്പ് കുമരകത്ത് വേമ്പനാട്ട് കായലിലേക്ക് വെള്ളം ഒഴുകിപ്പോയിരുന്നതും ജല ഗതാഗതത്തിനും മറ്റും ഉപയോഗിച്ചിരുന്ന പല തോടുകളും ഇപ്പോള്‍ നാമമാത്രമായി മാറി. പല തോടുകളും ഓടകള്‍ക്കു സമാനമായി എന്നു പറയുന്നതില്‍ ഒട്ടും അതിശയോക്തിയില്ല. ഭരണാധികാരികള്‍ക്ക് ഇതൊന്നും അറിവില്ലാത്ത കാര്യമല്ല. എന്നാൽ, ഈ ദുരിതത്തിന് ശാശ്വതപരിഹാരം കണ്ടെത്താന്‍ ആരും ശ്രമിക്കുന്നില്ല. മുന്‍കാലങ്ങളില്‍ വെള്ളപ്പൊക്കം ഉണ്ടായാല്‍ നാല്, അഞ്ച് ദിവസങ്ങള്‍കൊണ്ട് വെള്ളം ഇറങ്ങിപ്പോകുമായിരുന്നു. കഴിഞ്ഞ രണ്ട് മൂന്നു വര്‍ഷങ്ങളായി ഈ അവസ്ഥ മാറിയിട്ടുണ്ട്. കിഴക്കന്‍ വെള്ളവും പെയ്ത്തൂ വെള്ളവും കൃത്യമായി കായലിലേക്കും തുടര്‍ന്ന് കടലിലേക്കും ഒഴുകിപ്പോകുന്നതിന് ഉണ്ടായിട്ടുള്ള തടസങ്ങള്‍ ഏറെയാണ്. കുമരകത്തിന്‍റെ ഹൃദയഭാഗമായ കുമരകം മത്സ്യമാര്‍ക്കറ്റിന്‍റെ സമീപത്തുകൂടി ഒഴുകിയിരുന്ന തോട് ഇപ്പോള്‍ ഓടയായി മാറിക്കഴിഞ്ഞു. മുന്‍കാലങ്ങളില്‍ മത്സ്യത്തൊഴിലാളികള്‍ ഈ തോട്ടിലൂടെ വള്ളത്തിലെത്തി മത്സ്യവ്യാപാരം നടത്തിയിരുന്നുവെന്നത് ഇപ്പോഴത്തെ അവസ്ഥ കണ്ടാല്‍ ആരും വിശ്വസിക്കില്ല. മാത്രമല്ല, ഇപ്പോള്‍ ഈ തോട് കുപ്പത്തൊട്ടിയായും മാറി. ഇതുപോലെ നിരവധി തോടുകളാണു കുമരകത്തിന്‍റെ വിവിധ പ്രദേശങ്ങളില്‍ വീതി കുറഞ്ഞും എക്കലും ചെളിയും അടിഞ്ഞും നാമാവശേഷമായിക്കൊണ്ടിരിക്കുന്നത്. കുമരകത്തിന്‍റെ പ്രവേശനകവാടമായ രണ്ടാം കലുങ്ക് തോട്, ഒന്നാം കലുങ്ക് തോട് തുടങ്ങി ഉദാഹരണങ്ങള്‍ ഏറെയാണ്. വര്‍ഷകാല ആരംഭത്തില്‍ത്തന്നെ വെള്ളപ്പൊക്കത്തെ നേരിടേണ്ടി വരുന്ന അവസ്ഥ, ലോകത്തിലെതന്നെ പ്രധാന വിനോദസഞ്ചാര കേന്ദ്രങ്ങളില്‍ ഒന്നായ കുമരകത്തിന്‍റെ പ്രശസ്തിക്കും മങ്ങലേൽപ്പിക്കുന്നു. മികച്ച ടൂറിസം ഗ്രാമം എന്ന പദവിക്കൊപ്പം, ദുരിതം പേറുന്ന ഗ്രാമമെന്ന പദവിയും കുമരകത്തിന് അനുയോജ്യമായി തീര്‍ന്നിരിക്കുകയാണ്. തോടുകള്‍ റോഡുകള്‍ക്കായി ശോഷിച്ചതും പാലങ്ങളുടെ കാലുകളില്‍ പോളയും വലിയ പുല്‍ക്കെട്ടുകളും തങ്ങിനില്‍ക്കുന്നതും നീരൊഴുക്കിനെ സാരമായി ബാധിക്കുന്നു. കുമരകത്തെ പ്രധാന തോടുകളിലൊന്നായ കോട്ടത്തോട്ടില്‍ ചന്തഭാഗത്തെ പാലങ്ങളില്‍ പുല്‍ക്കെട്ടുകള്‍ തങ്ങി നില്‍ക്കുന്നതു സ്ഥിരം കാഴ്ചയാണ്. യാത്രാ ദുരിതം മാറാന്‍ പുതുക്കിപ്പണിയാന്‍ പൊളിച്ച കോണത്താറ്റു പാലവും ഇപ്പോള്‍ വെള്ളപ്പൊക്കദുരിതത്തിനു കാരണമാകുന്നുണ്ട്. പാലം പണിയാന്‍ നിര്‍മിച്ച താത്കാലിക ബണ്ട് ആശുപത്രി തോട്ടിലൂടെയുള്ള നീരൊഴുക്കിനെ തടസപ്പെടുത്തുന്നു. പാലം നിര്‍മാണത്തിനായി പൈലിംഗ് നടത്തിയപ്പോള്‍ ഉണ്ടായ ചെളിയും എക്കലും കോട്ടത്തോട്ടില്‍ ഒഴുകിയെത്തിയതും നീരൊഴുക്ക് നിലയ്ക്കാന്‍ പ്രധാന കാരണമാണ്. ശ്രീനാരായണ മത്സര വള്ളംകളി നടക്കാന്‍ ഏതാനും മാസം ബാക്കിനില്‍ക്കേ എക്കലും ചെളിയും നിറഞ്ഞ് ആഴംകുറഞ്ഞ തോടിന്‍റെ അവസ്ഥ വള്ളംകളിയെ പ്രതികൂലമായി ബാധിക്കുമെന്ന ആശങ്ക കുമരകത്തെ ജലോത്സവപ്രേമികള്‍ പങ്കുവയ്ക്കുന്നുണ്ട്. വേമ്പനാട്ടു കായലിലും ചെറുതോടുകളിലും കൈയേറ്റം നടക്കുന്നുവെന്ന കാര്യം പലതവണ മാധ്യമങ്ങള്‍ റിപ്പോര്‍ട്ട് ചെയ്തിട്ടും കാര്യക്ഷമമായ നടപടികള്‍ ഉണ്ടായിട്ടില്ലെന്നത്കൈയേറ്റങ്ങള്‍ തുടരുവാന്‍ പ്രേരകമാകുന്നുവെന്നാണ് നാട്ടുകാരുടെ ആക്ഷേപം. പഞ്ചായത്തും ജലസേചന വകുപ്പും മുന്‍കൈയെടുത്ത് കുമരകത്തെ തോടുകൾ പുനരുദ്ധരിച്ച് നീരൊഴുക്ക് വർധിപ്പിക്കുന്നതിലൂടെ ഗ്രാമീണ ടൂറിസം മേഖലയ്ക്കു പുത്തനുണര്‍വ് ഉണ്ടാകുന്നതോടൊപ്പം കുമരകം നിവാസികള്‍ക്കു കൂടുതല്‍ തൊഴിലവസരങ്ങള്‍ ലഭ്യമാകുകയും ചെയ്യും. വര്‍ഷകാലം പിന്‍വാങ്ങാന്‍ ഇനിയും ആഴ്ചകള്‍ ബാക്കിനില്‍ക്കവേ, വീണ്ടുമൊരു വെള്ളപ്പൊക്ക ദുരിതമനുഭവിക്കുവാന്‍ അവസര മൊരുക്കരുതേ എന്നാണ് നാട്ടുകാരുടെ അഭ്യര്‍ഥന.

പണിമുടക്കില്‍ ജനം വലഞ്ഞു

കോട്ടയം: കേന്ദ്രസര്‍ക്കാരിന്‍റെ തൊഴിലാളി വിരുദ്ധ നയങ്ങള്‍ക്കെതിരേ സംയുക്ത കേന്ദ്ര ട്രേഡ് യൂണിയനുകളും ജീവനക്കാരുടെ ഫെഡറേഷനുകളും ആഹ്വാനം ചെയ്ത അഖിലേന്ത്യാ പണിമുടക്ക് ജില്ലയില്‍ ജനജീവിതത്തെ ബാധിച്ചു. വിവിധയിടങ്ങളില്‍ സമരാനുകൂലികള്‍ കെഎസ്ആര്‍ടിസി ബസുകളും ടാക്‌സി വാഹനങ്ങളും തടഞ്ഞു. ചങ്ങനാശേരിയില്‍ ഹെഡ്‌പോസ്‌റ്റോഫീസ് ജീവനക്കാരനു സമരാനുകൂലികളുടെ മര്‍ദനമേറ്റു. സ്വകാര്യ വാഹനങ്ങള്‍ യഥേഷ്ടം നിരത്തിലുണ്ടായിരുന്നു. സ്വകാര്യ ബസുകള്‍ നിരത്തിലിറങ്ങാതെ പൂര്‍ണമായും പണിമുടക്കില്‍ പങ്കുചേര്‍ന്നു. കെഎസ്ആര്‍ടിസിയിലും പണിമുടക്ക് പൂര്‍ണമായിരുന്നു. ചില ഡിപ്പോകളില്‍ ഏതാനും സര്‍വീസുകള്‍ അയച്ചു. ഈരാറ്റുപേട്ട, കാഞ്ഞിരപ്പള്ളി എന്നിവിടങ്ങളില്‍ സമരാനുകൂലികള്‍ കെഎസ്ആര്‍ടിസി ബസുകള്‍ തടഞ്ഞു. ജീവനക്കാരുടെ ഫെഡറേഷനുകളും പണിമുടക്കില്‍ പങ്കെടുത്തതോടെ സര്‍ക്കാര്‍ ഓഫീസുകളില്‍ ജീവനക്കാരുടെ എണ്ണം കുറവായിരുന്നു. കളക്ടറേറ്റില്‍ ഹാജര്‍നില തീര്‍ത്തും കുറവായിരുന്നു. സ്‌കൂളുകളും പ്രവര്‍ത്തിച്ചില്ല. വ്യാപാരികളും പണിമുടക്കില്‍ പങ്കുചേര്‍ന്ന് തുറന്നില്ല. ചെറിയ തട്ടുകടകളും ഏതാനും കടകളും തുറന്നുപ്രവര്‍ത്തിച്ചു. മെഡിക്കല്‍ ഷോപ്പുകള്‍ തുറന്നു പ്രവര്‍ത്തിച്ചു. പൊതുഗതാഗതം സ്തംഭിച്ചതോടെ മാര്‍ക്കറ്റുകള്‍ ഉള്‍പ്പെടെ വ്യാപാര മേഖല ജില്ലയില്‍ പൂര്‍ണമായും നിശ്ചലമായിരുന്നു. കര്‍ഷകരും തൊഴിലാളികളും കേന്ദ്ര, സംസ്ഥാന സര്‍ക്കാര്‍ ജീവനക്കാരും അധ്യാപകരും പൊതുമേഖലാ ജീവനക്കാരും ബാങ്കിംഗ്, ഇന്‍ഷ്വറന്‍സ് ജീവനക്കാരും പണിമുടക്കില്‍ പങ്കെടുത്തതോടെ ബാങ്കിംഗ്, ഇന്‍ഷ്വറന്‍സ്, പൊതുമേഖല സ്ഥാപനങ്ങളും ഫാക്ടറികളും പണിയിടങ്ങളും സ്തംഭിച്ചു. അവശ്യ സര്‍വീസുകളായ ആശുപത്രി, പാല്‍, പത്രം എന്നിവയെ പണിമുടക്കില്‍ നിന്നൊഴിവാക്കിയിരുന്നു. പണിമുടക്കിന്‍റെ ഭാഗമായി സംയുക്ത ട്രേഡ് യൂണിയന്‍ ജില്ലാ കോഓര്‍ഡിനേഷന്‍ കമ്മിറ്റിയുടെ ആഭിമുഖ്യത്തില്‍ ജില്ലാതല പ്രകടനം കോട്ടയത്ത് നടന്നു. തിരുനക്കരയില്‍ ആരംഭിച്ച പ്രകടനം നഗരത്തിലെ വിവിധ ഭാഗങ്ങള്‍ ചുറ്റി തിരുനക്കര സ്വകാര്യ ബസ് സ്റ്റാന്‍ഡ് മൈതാനത്ത് അവസാനിച്ചു. തുടര്‍ന്ന് ചേര്‍ന്ന പൊതുസമ്മേളനം സിഐടിയു സംസ്ഥാന വൈസ്പ്രസിഡന്‍റ് ടി. ആര്‍. രഘുനാഥന്‍ ഉദ്ഘാടനം ചെയ്തു. എഐടിയുസി ജില്ലാ സെക്രട്ടറി വി.കെ. സന്തോഷ്‌കുമാര്‍ അധ്യക്ഷനായി. കെ. അനില്‍കുമാര്‍, വി.ബി. ബിനു, സി. കെ. ശശിധരന്‍, കെ.ആര്‍. അജയ്, എം.കെ. പ്രഭാകരന്‍, പി.ജെ. വര്‍ഗീസ്, പി.കെ. ആനന്ദക്കുട്ടന്‍, രാജീവ് നെല്ലിക്കുന്നേല്‍, പോള്‍സണ്‍ പീറ്റര്‍, സി.കെ. സുഹൈബ, സജീഷ് സ്‌കറിയ, എം.കെ. ദിലീപ്, സീമ എസ്. നായര്‍ തുടങ്ങിയവര്‍ പ്രസംഗിച്ചു. പാലാ, ഈരാറ്റുപേട്ട, കാഞ്ഞിരപ്പള്ളി, ചങ്ങനാശേരി, ഏറ്റുമാനൂര്‍, കടുത്തുരുത്തി, വൈക്കം, പാമ്പാടി എന്നിവിടങ്ങളിലും പ്രദേശികതലങ്ങളിലും കേന്ദ്ര സര്‍ക്കാര്‍ ഓഫീസുകള്‍ക്കു മുമ്പില്‍ പ്രകടനവും പ്രതിഷേധ കൂട്ടായ്മകളും നടന്നു. പണിമുടക്ക് കാഞ്ഞിരപ്പള്ളി താലൂക്കില്‍ പൂര്‍ണമായിരുന്നു. രാവിലെ തുറന്ന ചില കടകളും ബാങ്കുകളും സമരക്കാര്‍ വന്ന് അടപ്പിച്ചു. നിരത്തിലിറങ്ങിയ കെഎസ്ആര്‍ടിസി, ടാക്‌സി വാഹനങ്ങളും സമരക്കാര്‍ തടഞ്ഞു. കാഞ്ഞിരപ്പള്ളി സിവില്‍ സ്റ്റേഷനില്‍ തഹസില്‍ദാര്‍ ഉള്‍പ്പെടെ വിവിധ ഓഫീസുകളിലായി 14 ജീവനക്കാര്‍ മാത്രമാണ് എത്തിയത്. വൈക്കത്ത് പണിമുടക്ക് പൂർണമായിരുന്നു. കെഎസ്ആർടിസി,സ്വകാര്യബസുകൾ നിരത്തിലിറങ്ങിയില്ല. വൈക്കം -തവണക്കടവ്, പൂത്തോട്ട - പെരുമ്പളം ബോട്ട് സർവീസുകളും വൈക്കം - തവണക്കടവ്, നേരേകടവ് - മാക്കേക്കടവ്, ചെമ്മനാകരി - മണപ്പുറം ചങ്ങാട സർവീസും നിലച്ചു. കോവിലകത്തുംകടവ്, ചെമ്പ്, തലയോലപ്പറമ്പ് മാർക്കറ്റുകളും അടഞ്ഞുകിടന്നു. പൊതുപണിമുടക്ക് ചങ്ങനാശേരി മേഖലയിലും പൂര്‍ണം. സ്വകാര്യവാഹനങ്ങള്‍ ഓടി. വ്യാപാര സ്ഥാപനങ്ങള്‍ അടഞ്ഞുകിടന്നു. തുറന്നുപ്രവര്‍ത്തിച്ച ചങ്ങനാശേരി ഹെഡ്‌പോസ്റ്റ് ഓഫീസിലേക്കു തള്ളിക്കയറിയ സമരാനുകൂലികളും ജീവനക്കാരുമായി തര്‍ക്കമുണ്ടാകുകയും ബിജെപി അനുകൂല സംഘടനയായ ഭാരതീയ പോസ്റ്റല്‍ എംപ്ലോയീസ് ഫെഡറേഷന്‍ ചങ്ങനാശേരി ഡിവിഷന്‍ സെക്രട്ടറിയും പോസ്റ്റുമാനുമായ കാവാലം നാരകത്തറ സ്വദേശി വിഷ്ണു ചന്ദ്രന് മര്‍ദനമേല്‍ക്കുകയും ചെയ്തു. ഈരാറ്റുപേട്ടയിൽ സമരാനുകൂലികൾ കെഎസ്ആർടിസി ബസും സ്വകാര്യ വാഹനങ്ങളും തടഞ്ഞു. ഈരാറ്റുപേട്ട ഡിപ്പോയിൽ നിന്നും ആലപ്പുഴയിലേക്ക് സർവീസ് ആരംഭിച്ച ബസാണ് സെൻട്രൽ ജംഗ്ഷനിൽ തടഞ്ഞത്. കട്ടപ്പനയിൽ നിന്നും എത്തിയ ബസും നഗരത്തിൽ തടഞ്ഞു. പാലായിൽ കടകമ്പോളങ്ങള്‍ അടഞ്ഞുകിടന്നു. സ്വകാര്യ ബസുകള്‍ നിരത്തിലിറങ്ങിയില്ല. സര്‍ക്കാര്‍ ഓഫീസുകളില്‍ ഹാജര്‍നില പകുതിയിലും കുറവായിരുന്നു. കോട്ടയം സിഎംഎസ് കോളേജിന് സമീപത്തെ ഐസിഐസിഐ ബാങ്ക് സമരാനുകൂലികളെത്തി പൂട്ടിച്ചു. കെഎസ്ആര്‍ടിസി ചുരുക്കം ചില സര്‍വീസുകള്‍ നടത്തി. തൃശൂരില്‍ നിന്നും പാലായ്ക്ക് വരികയായിരുന്ന പാലാ ഡിപ്പോയുടെ ബസിനു നേരേ മൂവാറ്റുപുഴയ്ക്ക് സമീപം പണിമുടക്ക് അനുകൂലികള്‍ കല്ലെറിഞ്ഞു. ബസിന്‍റെ ചില്ലുകള്‍ പൊട്ടിയിട്ടുണ്ട്. ദൃശ്യങ്ങള്‍ പകര്‍ത്തിയ മാധ്യമപ്രവര്‍ത്തകന് മര്‍ദനമേറ്റു.

വേളാങ്കണ്ണി ട്രെയിനിന് ഇനി ആധുനിക കോച്ചുകള്‍

കോട്ടയം: എറണാകുളത്തുനിന്നു കോട്ടയം വഴി വേളാങ്കണ്ണിയിലേക്കു പോകുന്ന ട്രെയിനിന് ആധുനിക കോച്ചുകള്‍ അനുവദിച്ചു. ജര്‍മന്‍ സാങ്കേതികവിദ്യയിലൂടെ റെയില്‍വേ കോച്ച് ഫാക്ടറി വികസിപ്പിച്ച എല്‍എച്ച്ബി പോര്‍ച്ചുഗല്‍ കോച്ച് ഉപയോഗിച്ചാണ് ഇനിമുതല്‍ വേളാങ്കണ്ണി ട്രെയിന്‍ സര്‍വീസ് നടത്തുന്നത്. നിലവിലുള്ള കോച്ചുകളേക്കാള്‍ കൂടുതല്‍ സൗകര്യങ്ങളുള്ളതാണ് ഈ കോച്ചുകള്‍. ഏതെങ്കിലും വിധത്തിലുള്ള അപകടങ്ങള്‍ സംഭവിക്കുമ്പോള്‍ ഒരു കോച്ചിന്‍റെ മുകളിലേക്ക് മറ്റൊരു കോച്ച് കയറുന്ന അവസ്ഥ ഉണ്ടാകാറുണ്ട്. ഇത്തരം അപകടങ്ങള്‍ ഈ കോച്ചുകളില്‍ താരതമ്യേന കുറവാണ് ഉണ്ടാകുന്നത്. മാത്രവുമല്ല യാത്രക്കാര്‍ക്ക് അപകടം സംഭവിക്കുവാനുള്ള സാധ്യതകളും വിരളമാണെന്നാണ് വിദഗ്ധര്‍ അഭിപ്രായം. കാലപ്പഴക്കം വന്ന വേളാങ്കണ്ണി ട്രെയിനിന്‍റെ കോച്ചുകള്‍ മാറ്റണമെന്നു ഫ്രാന്‍സിസ് ജോര്‍ജ് എംപി ഉള്‍പ്പെടെയുള്ള ജനപ്രതിനിധികള്‍ റെയില്‍വേ മന്ത്രിയോട് നിരന്തരമായി ആവശ്യപ്പെട്ടതിന്‍റെ അടിസ്ഥാനത്തിലാണ് പുതിയ കോച്ചുകള്‍ അനുവദിച്ചിട്ടുള്ളത്. കന്നി യാത്രയില്‍ കോട്ടയത്ത് എത്തിയ ട്രെയിനിന് ഫ്രാന്‍സിസ് ജോര്‍ജ് എംപിയുടെ നേതൃത്വത്തില്‍ സ്റ്റേഷനില്‍ സ്വീകരണം നൽകി. സ്റ്റേഷന്‍ മാനേജര്‍ പി.ജി. വിജയകുമാര്‍, ഡെപ്യൂട്ടി സ്റ്റേഷന്‍ മാസ്റ്റര്‍ മാത്യു ജോസഫ്, ട്രാന്‍സ്പോര്‍ട്ടേഷന്‍ ഇന്‍സ്‌പെക്ടര്‍ ജോ പ്രവീണ്‍ എന്നിവര്‍ സംബന്ധിച്ചു. ആഴ്ചയില്‍ തിങ്കളാഴ്ചയും ശനിയാഴ്ചയുമായി രണ്ട് സര്‍വീസാണു വേളാങ്കണ്ണിക്കുള്ളത്. എറണാകുളത്തുനിന്നും പുറപ്പെടുന്ന ട്രെയിന്‍ ഉച്ചകഴിഞ്ഞ് രണ്ടിന് കോട്ടയത്തും പിറ്റേദിവസം രാവിലെ 5.40നു വേളാങ്കണ്ണിയിലും എത്തിച്ചേരും. അന്നുതന്നെ വൈകുന്നേരം 6.40നു തിരിച്ചുപോരുന്ന ട്രെയിന്‍ രാവിലെ 10.10ന് കോട്ടയത്ത് എത്തിച്ചേരുന്ന വിധത്തിലാണ് സര്‍വീസ് ക്രമീകരിച്ചിരിക്കുന്നത്.

മെഡി.‍ കോളജ്: മന്ത്രിമാരുടെ നേതൃത്വത്തില്‍ ഓപ്പറേഷന്‍ തിയറ്ററുകളുടെ നിര്‍മാണ പുരോഗതി വിലയിരുത്തി

കോട്ടയം: മെഡിക്കല്‍ കോളജിലെ പുതിയ സര്‍ജിക്കല്‍ ബ്ലോക്കിലെ ഓപ്പറേഷന്‍ തിയറ്ററുകളുടെ നിര്‍മാണ പുരോഗതി മന്ത്രിമാരായ വീണാ ജോര്‍ജ്, വി.എന്‍. വാസവന്‍ എന്നിവരുടെ നേതൃത്വത്തില്‍ വിലയിരുത്തി. സര്‍ജിക്കല്‍ ബ്ലോക്കില്‍ ഒ.ടി. ഇന്‍റഗ്രേഷന്‍ പ്രവര്‍ത്തനങ്ങള്‍ പുരോഗമിക്കുന്നു. ഓപ്പറേഷന്‍ തിയറ്ററുകള്‍ സമയബന്ധിതമായി പൂര്‍ത്തിയാക്കാനും പാക്സ് മെഷീന്‍ എത്രയും വേഗം ലഭ്യമാക്കാനും നിര്‍ദേശം നല്‍കി. സര്‍ജിക്കല്‍ ബ്ലോക്കിലെ ടെലിഫോണ്‍ കണക്‌ഷനുകള്‍ ഉള്‍പ്പെടെയുള്ളവ വേഗത്തില്‍ത്തന്നെ ലഭ്യമാക്കണം. പൂര്‍ത്തിയാക്കാനുള്ള പ്രവൃത്തികള്‍ സമയബന്ധിതമായി തീര്‍ക്കാനും സൗകര്യങ്ങള്‍ക്കനുസരിച്ച് ജീവനക്കാരെ നിയമിക്കാനും നിര്‍ദേശം നല്‍കി. ആരോഗ്യ വകുപ്പ് അഡീഷണല്‍ ചീഫ് സെക്രട്ടറി, എന്‍എച്ച്എം സ്റ്റേറ്റ് മിഷന്‍ ഡയറക്ടര്‍, മെഡിക്കല്‍ വിദ്യാഭ്യാസ വകുപ്പ് ഡയറക്ടര്‍, കെഎംഎസ്‌സിഎല്‍ ജനറല്‍ മാനേജര്‍, കോട്ടയം മെഡിക്കല്‍ കോളജ് പ്രിന്‍സിപ്പല്‍, സൂപ്രണ്ട് തുടങ്ങിയവര്‍ യോഗത്തില്‍ പങ്കെടുത്തു.

കീം ഹൈക്കോടതി വിധി നിരാശാജനകം: കേരള സ്റ്റേറ്റ് സ്‌കൂള്‍ ടീച്ചേഴ്‌സ് ഫ്രണ്ട്

പാലാ: കീം പ്രവേശന പരീക്ഷയിലെ മാര്‍ക്ക് ഏകീകരണത്തിലെ അപാകതകള്‍ പരിഹരിച്ച് പൊതുവിദ്യാലയങ്ങളിലെ വിദ്യാര്‍ഥികള്‍ക്ക് നീതി ലഭ്യമാക്കി പ്രസിദ്ധീകരിച്ച കീം ഫലം റദ്ദാക്കിയ ഹൈക്കോടതി സിംഗിള്‍ ബഞ്ച് വിധി നിരാശാജനകമാണെന്നും സര്‍ക്കാര്‍ അപ്പീല്‍ പോകണമെന്നും കേരള സ്റ്റേറ്റ് സ്‌കൂള്‍ ടീച്ചേഴ്‌സ് ഫ്രണ്ട് സംസ്ഥാന പ്രസിഡന്‍റ് ടോബിന്‍ കെ. അലക്‌സ് സര്‍ക്കാരിനോട് ആവശ്യപ്പെട്ടു. പൊതുവിദ്യാലയങ്ങളില്‍ പഠിക്കുന്ന സാധാരണക്കാരായ കുട്ടികള്‍ക്ക് എന്‍ജിനിയറിംഗ് കോളജ് പ്രവേശനം എളുപ്പത്തില്‍ ലഭ്യമാക്കുക എന്ന ഉദ്ദേശ്യത്തോടെയാണ് എം.എ. ബേബി വിദ്യാഭ്യാസമന്ത്രിയായിരുന്നപ്പോള്‍ കീം റാങ്ക് ലിസ്റ്റ് തയാറാക്കാന്‍ ഹയര്‍ സെക്കൻഡറിയുടെ 50 ശതമാനം മാര്‍ക്ക് ഉള്‍പ്പെടുത്തിയത്. ഇത് പൊതുവിദ്യാലയങ്ങളില്‍ പഠിക്കുന്ന സാധാരണക്കാരായ വിദ്യാര്‍ഥികള്‍ക്ക് വളരെയധികം പ്രയോജനം നല്‍കുന്നതായിരുന്നു. എന്നാല്‍ ഇക്കഴിഞ്ഞ വര്‍ഷത്തെ കീം 2024 റാങ്ക് ലിസ്റ്റ് പ്രസിദ്ധീകരിച്ചപ്പോള്‍ കേരള സിലബസില്‍ പഠിച്ചവരോട് വലിയ അനീതിയാണ് കാണിച്ചത്. ബോര്‍ഡ് പരീക്ഷയുടെ മാര്‍ക്ക് സ്റ്റാന്‍ഡേര്‍ഡൈസേഷന്‍ നടത്തിയതിലെ അപാകതമൂലം മിടുക്കരായ പല കുട്ടികള്‍ക്കും നമ്മുടെ മികച്ച എന്‍ജിനിയറിംഗ് കോളജുകളില്‍ പ്രവേശനം നിഷേധിക്കപ്പെട്ടു. ഇത് സ്റ്റേറ്റ് കുട്ടികളുടെ അവസരം നിഷേധിക്കലാണെന്നും ഉന്നത വിദ്യാഭ്യാസരംഗത്ത് നമ്മുടെ പൊതുവിദ്യാലയങ്ങളിലെ കുട്ടികള്‍ തഴയപ്പെടുന്നതിന് കാരണമാകുമെന്നും സംഘടന മുഖ്യമന്ത്രിക്കും പൊതു വിദ്യാഭ്യാസവകുപ്പ് മന്ത്രി വി. ശിവന്‍കുട്ടിക്കും നല്‍കിയ നിവേദനത്തില്‍ ചൂണ്ടിക്കാണിച്ചിരുന്നു.

ഓണത്തെ വരവേൽക്കാൻ ചെണ്ടുമല്ലി കൃഷിയുമായി പ്രവിത്താനം സെന്‍റ് മൈക്കിൾസ് സ്കൂൾ

പ്രവിത്താനം: സെന്‍റ് മൈക്കിള്‍സ് ഹയര്‍ സെക്കന്‍ഡറി സ്‌കൂളില്‍ ഓണത്തെ വരവേല്‍ക്കാനായി ചെണ്ടുമല്ലി കൃഷി ആരംഭിച്ചു. കൃഷിവകുപ്പിന്‍റെ മാര്‍ഗനിര്‍ദേശത്തോടെ വാണിജ്യാടിസ്ഥാനത്തില്‍ ഒരുക്കുന്ന പൂക്കൃഷിയുടെ ഉദ്ഘാടനം ളാലം ബ്ലോക്ക് പഞ്ചായത്ത് വൈസ് പ്രസിഡന്‍റും പൂര്‍വ വിദ്യാര്‍ഥിയുമായ ആനന്ദ് ചെറുവള്ളി നിര്‍വഹിച്ചു. ഓണാഘോഷത്തോടനുബന്ധിച്ച് സ്‌കൂളില്‍ ഉപയോഗിക്കാനും ആവശ്യക്കാര്‍ക്ക് വില്പനയ്ക്കായുമാണ് കൃഷി ആരംഭിച്ചിരിക്കുന്നത്. ചടങ്ങില്‍ ഹെഡ്മാസ്റ്റര്‍ ജിനു ജെ. വല്ലനാട്ട്, പിടിഎ എക്‌സിക്യൂട്ടീവ് മെംബര്‍ തോമസുകുട്ടി വട്ടപ്പലം, അധ്യാപകര്‍, അനധ്യാപകര്‍, കാര്‍ഷിക ക്ലബ് അംഗങ്ങള്‍ എന്നിവര്‍ പങ്കെടുത്തു.

സ്ഥാപകന്‍റെ സ്മരണകൾ നിറച്ച് പ്രസംഗമത്സരവുമായി കുറവിലങ്ങാട് സെന്‍റ് മേരീസ് സ്‌കൂൾ

കുറവിലങ്ങാട്: സ്ഥാപകന്‍റെ ഓർമകൾ ഉജ്വലിപ്പിക്കാൻ പ്രസംഗമത്സരവുമായി കുറവിലങ്ങാട് സെന്‍റ് മേരീസ് സ്‌കൂൾ. നാടിന് ഇംഗ്ലീഷ് വിദ്യാഭ്യാസം സമ്മാനിച്ച നിധീരിക്കൽ മാണിക്കത്തനാരുടെ ഓർമകൾ സജീവമാക്കി സെന്‍റ് മേരീസ് ബോയ്‌സ് ഹയർ സെക്കൻഡറി സ്‌കൂൾ ഹൈസ്‌കൂൾ വിഭാഗമാണ് ഇടവകയുടെ മാനേജ്‌മെന്‍റിലുള്ള സെന്‍റ് മേരീസ് സ്‌കൂളുകളിലെ വിദ്യാർഥികൾക്കായി മത്സരം നടത്തിയത്. യുപി വിഭാഗത്തിൽ സെന്‍റ് മേരീസ് ഗേൾസ് സ്‌കൂളിലെ ഇവാന മരിയ ഷെറി, മന്നാ എന്നിവർ യഥാക്രമം ഒന്നും രണ്ടും സ്ഥാനങ്ങളും ബോയ്‌സ് സ്‌കൂളിലെ അദ്വൈത് കൃഷ്ണ മൂന്നാം സ്ഥാനവും കരസ്ഥമാക്കി. ഹൈസ്‌കൂൾ വിഭാഗത്തിൽ ഗേൾസ് സ്‌കൂളിലെ ആൽഫി മരിയ, ദേവി നന്ദന, ആൻ അൽഫോൻസ് ബിജു എന്നിവർ സമ്മാനാർഹരായി. വിജയികൾക്ക് സ്‌കൂൾ അസിസ്റ്റന്‍റ് മാനേജർ ഫാ. ആന്‍റണി വാഴക്കാലായിൽ സമ്മാനങ്ങൾ വിതരണം ചെയ്തു. ഹെഡ്മാസ്റ്റർ കെ.എം. തങ്കച്ചൻ, ദേവമാതാ കോളജ് മുൻ പ്രിൻസിപ്പൽ ഡോ. ജോയി ജേക്കബ് തൊണ്ടാംകുഴി, ബെന്നി കോച്ചേരി, ഫാ. ജിസ് ജോൺ, ജിജോ ജോസഫ് എന്നിവർ പ്രസംഗിച്ചു.

വെള്ളിലാപ്പള്ളി കണ്ണാലാത്ത് ജംഗ്ഷനില്‍ മദ്യവില്പനശാല തുടങ്ങാന്‍ നീക്കം

രാമപുരം: വെള്ളിലാപ്പള്ളി കണ്ണാലത്ത് ജംഗ്ഷന് സമീപം സര്‍ക്കാര്‍ മദ്യവില്പനശാലയുടെ ഔട്ട്‌‌ലെറ്റ് തുടങ്ങാന്‍ വീണ്ടും നീക്കം തുടങ്ങി. ജനവാസ മേഖലയായ ഇവിടേക്ക് മദ്യവില്പനശാല കൊണ്ടുവരാനുള്ള അണിയറ നീക്കം സജീവമായതോടെ എതിര്‍പ്പുമായി നാട്ടുകാരും രംഗത്തെത്തി. മൂന്നു മാസം മുമ്പ് ഇവിടെ സ്വകാര്യ വ്യക്തിയുടെ ഉടമസ്ഥതയിലുള്ള കെട്ടിടത്തില്‍ മദ്യ വില്പനശാല തുടങ്ങാന്‍ ആലോചന നടന്നെങ്കിലും നാട്ടുകാരുടെ എതിര്‍പ്പിനെത്തുടര്‍ന്ന് പിന്മാറുകയായിരുന്നു. മദ്യശാലയ്ക്ക് സ്ഥലം കണ്ടെത്തിയ കെട്ടിടത്തിന് 50 മീറ്റര്‍ ഉള്ളിലാണ് തേവലപ്പുറം ക്ഷേത്രമുള്ളത്. ഇടുങ്ങിയതും വളവുമുള്ള റോഡാണ് നിര്‍ദ്ദിഷ്ട കെട്ടിടത്തിന്‍റെ മുന്നിലൂടെ കടന്നു പോകുന്നത്. ഇവിടെ മദ്യശാല തുറക്കുന്നത് റോഡിനിരുവശവും വാഹനങ്ങള്‍ പാര്‍ക്ക് ചെയ്യുന്നതിനും അപകടങ്ങള്‍ ഉണ്ടാകുന്നതിനും ജനങ്ങളുടെ സ്വൈരജീവിതത്തെ സാരമായി ബാധിക്കുന്നതിനും ഇടയാക്കുമെന്ന് ജനങ്ങള്‍ ആശങ്കപ്പെടുന്നു. പ്രദേശത്തെ ജനങ്ങളുടെ സമാധാന ജീവിതത്തെ ബാധിക്കുന്ന തീരുമാനം എടുക്കരുതെന്ന് രാമപുരം പഞ്ചായത്ത് ഭരണസമിതിക്കും സ്ഥലം എംപി, എംഎല്‍എ, എക്‌സൈസ് മന്ത്രി, കളക്ടര്‍, എക്‌സൈസ്-പോലീസ് വകുപ്പ് ഉന്നത ഉദ്യോഗസ്ഥര്‍ തുടങ്ങിയവര്‍ക്കും പ്രദേശവാസികള്‍ ഒപ്പിട്ട നിവേദനം നല്‍കിയിട്ടുണ്ട്. രാമപുരത്ത് പഞ്ചായത്ത് ബസ് സ്റ്റാന്‍ഡ് ബില്‍ഡിംഗില്‍ തുടങ്ങാന്‍ സ്ഥലം കണ്ടെത്തിയിരുന്ന മദ്യവില്പനശാല ആരുടെയോ സ്വാധീനത്തിലാണ് ഇടുങ്ങിയതും അപകടസാധ്യതയുള്ളതുമായ കണ്ണലത്ത് ജംഗ്ഷനിലേക്ക് കൊണ്ടുവരുന്നതെന്നും പറയുന്നു.

കുറവിലങ്ങാട് ഇടവക 27-ാം വാർഡിലെ മുഴുവൻ വീടുകളിലും ഇനി ചന്ദനസുഗന്ധം

കുറവിലങ്ങാട്: മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ ഒരു വാർഡിലെ മുഴുവൻ കുടുംബങ്ങളിലും ചന്ദനത്തൈകൾ നട്ടു. ഇടവകയിലെ 27-ാം വാർഡിലെ മൂന്ന് യൂണിറ്റുകളിലായുള്ള 99 വീടുകളിലാണ് കുടുംബക്കൂട്ടായ്മ യൂണിറ്റുതല ഉദ്ഘാടനങ്ങളോടനുബന്ധിച്ച് ചന്ദനത്തൈകൾ നട്ടത്. വാർഡിന്‍റെ നാമഹേതുകയായ വിശുദ്ധ അൽഫോൻസാമ്മയുടെ ഓർമകൾ നിറയ്ക്കാൻ അൽഫോൻസാ മരം എന്ന പേരിലാണ് തൈകൾ നട്ടുവളർത്തുന്നത്. വാർഡ് യോഗപ്രതിനിധി ബെന്നി കോച്ചേരിയാണ് ചന്ദനത്തൈകൾ കുടുംബങ്ങൾക്ക് സമ്മാനിച്ചത്. പദ്ധതിയുടെ ഉദ്ഘാടനം കുടുംബക്കൂട്ടായ്മാ ജനറൽ ലീഡർ ബോബിച്ചൻ നിധീരി, യൂണിറ്റ് പ്രസിഡന്‍റ് പോൾസൺ ചേലക്കാപ്പിള്ളിക്ക് നൽകി നിർവഹിച്ചു. വിവിധ യൂണിറ്റുകളിൽ വിൻസെന്‍റ് ജെ. നിധീരി, ജോർജുകുട്ടി സിറിയക് നിധീരി എന്നിവർ തൈകൾ ഏറ്റുവാങ്ങി. നിധീരിക്കൽ മാണിക്കത്തനാർ സ്മാരക പ്രബന്ധരചന, ലഹരിവിരുദ്ധ ഡിജിറ്റൽ പോസ്റ്റർ മത്സരങ്ങളും എക്‌സൈസ് വകുപ്പ് ലഹരിവിരുദ്ധ ലഘുലേഖ പ്രചാരണം, വാർഡ്തല തീം സോംഗ് പ്രകാശനം തുടങ്ങിയ പ്രവർത്തനങ്ങളും വാർഡ്തലത്തിൽ നടത്തി. പാലാ രൂപതയുടെ സാമൂഹിക സേവന വിഭാഗമായ പാലാ സോഷ്യൽ വെൽഫെയർ സൊസൈറ്റിയുടെ നേതൃത്വത്തിലുള്ള അഗ്രിമ കാർഷിക നഴ്‌സറിയിൽനിന്നാണ് ചന്ദനത്തൈകൾ ലഭ്യമാക്കിയത്. സോൺ ഡയറക്ടർ ഫാ. തോമസ് താന്നിമലയിൽ, ഫാ. ബ്ലെസൺ ചേലയ്ക്കാപ്പള്ളിൽ, സോൺ ഭാരവാഹികളായ സണ്ണി വെട്ടിക്കാട്ട്, ആശ വിക്ടർ കുന്നുമല, യോഗപ്രതിനിധികളായ ബെന്നി കോച്ചേരി, സുനിൽ ഒഴുക്കനാക്കുഴി, ഡോ. നിധീഷ് നിധീരി, മുൻ യോഗപ്രതിനിധി സാജു കണ്ണന്താനം, യൂണിറ്റ് ഭാരവാഹികളായ പോൾസൺ ചേലക്കാപ്പള്ളിൽ, ജോസ് കുളങ്ങരതൊട്ടി, ബിബിൻ തുരുത്തേൽ, സുമി റോയ് ഓലിക്കാട്ടിൽ, ലിജി ജയ്‌സൺ മറ്റുപിള്ളിൽ എന്നിവർ പ്രസംഗിച്ചു.

മാർ അപ്രേം മെത്രാപ്പോലീത്തയുടെ വിയോഗം: നസ്രാണി മഹാസംഗമ സ്മരണയിൽ കുറവിലങ്ങാട്

കുറവിലങ്ങാട്: പൗരസ്ത്യ അസീറിയൻ സഭയുടെ ഭാരതത്തിലെ അധ്യക്ഷനായി അര നൂറ്റാണ്ട് സേവനം ചെയ്ത മാർ അപ്രേം മെത്രാപ്പോലീത്ത സ്വർഗയാത്രയാകുമ്പോൾ നാടിന്‍റെ ഓർമകളിൽ നിറയുന്നത് കുറവിലങ്ങാട് നസ്രാണി മഹാസംഗമത്തിലുയർന്ന ഗംഭീരശബ്ദം. 2019 സെപ്റ്റംബർ ഒന്നിന് കുറവിലങ്ങാട് ആതിഥ്യമരുളിയ നസ്രാണി മഹാസംഗമത്തിന് വിവിധ ക്രൈസ്തവ സഭാമേലധ്യക്ഷന്മാർക്കൊപ്പം മാർ അപ്രേം മെത്രാപ്പോലീത്തയും പങ്കെടുത്തിരുന്നു. സഹോദരസഭകളുടെ കൂട്ടായ മുന്നേറ്റത്തെക്കുറിച്ചായിരുന്നു മാർ അപ്രേമിന്‍റെ വാക്കുകൾ മുഴുവനും. മാതൃസഹോദരിയെ കുറവിലങ്ങാട് ഇടവകയിലേക്ക് വിവാഹം ചെയ്ത് അയച്ചതോടെ മൂന്നു വയസുള്ളപ്പോൾ മുതൽ കുറവിലങ്ങാടുമായി വലിയ ബന്ധമുണ്ടെന്ന് മെത്രാപ്പോലീത്ത അനുസ്മരിച്ചിരുന്നു. നാം ഒരിക്കൽ ഒന്നായിരുന്നുവെന്ന് തെളിയിക്കുന്ന സമ്മേളനമെന്നാണ് നസ്രാണി മഹാസംഗമത്തെ മാർ അപ്രേം വിശേഷിപ്പിച്ചത്. ഒന്നായിരുന്നുവെന്ന് പ്രസംഗിക്കാൻ എളുപ്പമാണ്. ഒന്നായി പ്രവർത്തിക്കുന്നതിൽ മാതൃകയാകണം. സഭകൾ സഹകരിക്കുന്നതാണ് സഭകൾക്ക് നല്ലത്. കലഹിച്ച് ചാവണമെന്നാണ് പലരും ആഗ്രഹിക്കുന്നതെങ്കിലും സഹകരിച്ച് പ്രവർത്തിക്കണമെന്നാണ് തന്‍റെ ആഗ്രഹമെന്നും മാർ അപ്രേം പറഞ്ഞത് ഇന്നലെയെന്ന പോലെ ഒട്ടേറെപ്പേരുടെ ചെവികളിൽ മുഴങ്ങുന്നുണ്ട്. ഇപ്പോഴത്തെ പാലാ രൂപത മുഖ്യവികാരി ജനറാളായ മോൺ. ജോസഫ് തടത്തിൽ കുറവിലങ്ങാട് ആർച്ച്പ്രീസ്റ്റായിരിക്കെയാണ് ഇരുപതിനായിരത്തോളം പ്രതിനിധികൾ പങ്കെടുത്ത കുറവിലങ്ങാട് നസ്രാണി മഹാസംഗമത്തിന് കുറവിലങ്ങാട് ആതിഥ്യമരുളിയത്. പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ടിന്‍റെ അനുസ്മരണ വാക്കുകളിലും കുറവിലങ്ങാട് നസ്രാണി മഹാസംഗമത്തിലെ മാർ അപ്രേമിന്‍റെ സാന്നിധ്യം പ്രത്യേകം പരാമർശിച്ചിരുന്നു.

കെഎസ്ആര്‍ടിസി പാലാ ഡിപ്പോയുടെ പഴയ കെട്ടിടം ദുരവസ്ഥയില്‍

പാലാ: കെഎസ്ആര്‍ടിസി പാലാ ഡിപ്പോയിലെ പഴയ കെട്ടിടത്തിന്‍റെ തൂണുകളുടെ ഉള്ളിലെ കമ്പികള്‍ ദ്രവിച്ച് അപകടാവസ്ഥയില്‍. 1976ല്‍ നിര്‍മിച്ച ഇരുനില കെട്ടിടമാണ് തകര്‍ച്ചയുടെ വക്കിലെത്തി നില്‍ക്കുന്നത്. മേല്‍ക്കൂരയുടെ കോണ്‍ക്രീറ്റ് പാളികള്‍ അടര്‍ന്നുവീഴുന്നുണ്ട്. തകര്‍ച്ചയിലുള്ള കെട്ടിടത്തിനു താഴെയാണ് യാത്രക്കാര്‍ ബസ് കാത്ത് നില്‍ക്കുന്നത്. പുതിയ കെട്ടിടത്തിന്‍റെ ഉദ്ഘാടനം നടത്തിയെങ്കിലും പ്രവര്‍ത്തനം ആരംഭിച്ചിട്ടില്ല. അഞ്ചു കോടി രൂപ ചെലവില്‍ അയ്യായിരം ചതുരശ്രയടി വിസ്തീര്‍ണമുള്ള കെട്ടിടമാണ് സൗകര്യങ്ങള്‍ ഒരുക്കാത്തതിനാല്‍ ഉദ്ഘാടനം കഴിഞ്ഞ് മൂന്നു വര്‍ഷമായിട്ടും പ്രയോജനമില്ലാതെ കിടക്കുന്നത്. പുതിയ കെട്ടിടത്തില്‍ അടിസ്ഥാന സൗകര്യങ്ങള്‍ ഒരുക്കുന്നതിന് ബജറ്റില്‍ നാലു കോടി രൂപ അനുവദിച്ചിട്ടുണ്ടെന്നും പണി പൂര്‍ത്തീകരിച്ച് ഉടന്‍ പ്രവര്‍ത്തനം പുതിയ കെട്ടിടത്തിലേക്കു മാറ്റുമെന്നും എടിഒ വി. അശോക് കുമാര്‍ പറഞ്ഞു.

ദേശീയ പണിമുടക്ക് പൂര്‍ണം

പാലാ: സംയുക്ത ട്രേഡ് യൂണിയന്‍റെ നേതൃത്വത്തില്‍ നടത്തിയ പണിമുടക്ക് പാലായിലും സമീപ പഞ്ചായത്തുകളിലും പൂര്‍ണം. ടൗണിലെ കടകമ്പോളങ്ങള്‍ അടഞ്ഞുകിടന്നു. ഗ്രാമപ്രദേശങ്ങളില്‍ ഹോട്ടലുകളും ചില കടകളും തുറന്നു പ്രവര്‍ത്തിച്ചു. സ്വകാര്യബസുകള്‍ നിരത്തിലിറങ്ങിയില്ല. കെഎസ്ആര്‍ടിസി ഭാഗികമായി സര്‍വീസ് നടത്തി. തൊടുപുഴ, വൈക്കം, ഈരാറ്റുപേട്ട, കോട്ടയം, കാഞ്ഞിരമറ്റം തുടങ്ങിയ സ്ഥലങ്ങളിലേക്കായിരുന്നു സര്‍വീസ് നടത്തിയത്. ഡിപ്പോയില്‍ കൂടുതല്‍ ജീവനക്കാര്‍ ഹാജരായിരുന്നെങ്കിലും യാത്രക്കാര്‍ ഇല്ലാതിരുന്നതിനാല്‍ സര്‍വീസ് നടത്തിയില്ല. ഗവണ്‍മെന്‍റ് ഓഫീസുകളില്‍ ഹാജര്‍നില കുറവായിരുന്നു. ഓട്ടോ ടാക്‌സി തൊഴിലാളികളില്‍ ബിഎംഎസ് യൂണിയൻ ഒഴിച്ച് മറ്റെല്ലാ തൊഴിലാളികളും പണിമുടക്കിന്‍റെ ഭാഗമായി. പാലാ ടൗണിലും പഞ്ചായത്ത് കേന്ദ്രങ്ങളിലും പ്രകടനവും കേന്ദ്രസര്‍ക്കാര്‍ സ്ഥാപനങ്ങള്‍ക്ക് മുമ്പില്‍ ധര്‍ണയും നടന്നു. പാലാ ഹെഡ് പോസ്റ്റ്ഓഫീസിന് മുമ്പില്‍ നടന്ന ധര്‍ണ സിപിഎം ഏരിയ സെക്രട്ടറി സജേഷ് ശശി ഉദ്ഘാടനം ചെയ്തു. സിപിഐ മണ്ഡലം എക്‌സിക്യൂട്ടീവ് അംഗം സിബി ജോസഫ് അധ്യക്ഷത വഹിച്ചു. സിഐടിയു ജില്ലാ ജോയിന്‍റ് സെക്രട്ടറി ഷാര്‍ളി മാത്യു, സിപിഐ മണ്ഡലം സെക്രട്ടറി പി.കെ ഷാജകുമാര്‍, കേരള കോണ്‍ഗ്രസ്-എം നിയോജകമണ്ഡലം പ്രസിഡന്‍റ് ടോബിന്‍ കെ. അലക്‌സ്, ജോസുകുട്ടി പൂവേലില്‍, കെ.എസ്. രമേശ് ബാബു, ബിജി മണ്ഡപം എന്നിവര്‍ പ്രസംഗിച്ചു. ഈരാറ്റുപേട്ടയിൽ ഈരാറ്റുപേട്ട: സംയുക്ത യൂണിനുകൾ പ്രഖ്യാപിച്ച ദേശീയ പൊതുപണിമുടക്കിൽ ഈരാറ്റുപേട്ടയിലും സമീപപ്രദേശങ്ങളിലും കടകൾ അടഞ്ഞുകിടന്നു. വ്യാപാര സ്ഥാപനങ്ങൾ തുറന്ന് പ്രവർത്തിക്കരുതെന്ന് സമരാനുകൂലികൾ നേരിട്ടെത്തി ആവശ്യപ്പെടുകയായിരുന്നു. ബാങ്കുകളും തുറന്ന് പ്രവർത്തിക്കാൻ അനുവദിച്ചില്ല. ഈരാറ്റുപേട്ട കെഎസ്ആർടിസി ഡിപ്പോയിൽനിന്ന് ആലപ്പുഴയിലേക്ക് സർവീസ് ആരംഭിച്ച ബസ് സെൻട്രൽ ജംഗ്ഷനിൽ എത്തിയപ്പോൾ തടഞ്ഞു. കട്ടപ്പനയിൽനിന്നെത്തിയ ബസും ടൗണിൽ തടഞ്ഞു. സിപിഎം, സിഐടിയു, എഐടിയുസി പ്രവർത്തകരാണ് വാഹനങ്ങൾ തടഞ്ഞത്. പോലീസ് സംഘവും സ്ഥലത്തുണ്ടായിരുന്നു. കുറവിലങ്ങാട്ട് കുറവിലങ്ങാട്: വിവിധ സംഘടനകൾ ആഹ്വാനം ചെയ്ത് പണിമുടക്ക് കുറവിലങ്ങാട്, മരങ്ങാട്ടുപിള്ളി, ഉഴവൂർ, വെളിയന്നൂർ, കടപ്ലാമറ്റം പ്രദേശത്ത് പണിമുടക്ക് പൂർണം. എംസി റോഡിൽ കുറവിലങ്ങാട് ഭാഗത്ത് കെഎസ്ആർടിസി ബസുകൾ സമരക്കാർ തടഞ്ഞു. ബാങ്കുകളടക്കം തുറന്നു പ്രവർത്തിച്ച സ്ഥാപനങ്ങൾ അടയ്ക്കണമെന്ന ആവശ്യവുമായി സമരക്കാർ സമീപിച്ചു.

ഓണപ്പൂവസന്തവുമായി വാഴൂർ ബ്ലോക്ക് പഞ്ചായത്ത്

പൊൻകുന്നം: ഓണത്തിന് പൂക്കളമൊരുക്കാൻ ആവശ്യമായ പൂക്കൾ പ്രാദേശികമായി ലഭ്യമാക്കുക എന്ന ലക്ഷ്യത്തോടെ ഓണപ്പൂവസന്തം പുഷ്പകൃഷി പദ്ധതിയുമായി വാഴൂർ ബ്ലോക്ക് പഞ്ചായത്ത്. 2025-26 വാർഷിക പദ്ധതിയിൽ ഉൾപ്പെടുത്തി രണ്ടേകാൽ ലക്ഷം രൂപ ചെലവഴിച്ചാണ് പദ്ധതി നടപ്പാക്കുന്നത്. ബ്ലോക്ക് പഞ്ചായത്ത് പരിധിയിലെ 50 കർഷക ഗ്രൂപ്പുകൾ വഴിയാണ് ബന്ദിപ്പൂ (ചെണ്ടുമല്ലി) കൃഷി നടത്തുന്നത്. തൈകൾ നട്ട് 45-ാം ദിവസം മുതൽ പൂവിട്ടു തുടങ്ങും. ഒരു ചെടിയിൽനിന്നു മൂന്നുമുതൽ നാലു കിലോ വരെ പൂക്കൾ ലഭിക്കുമെന്നാണ് പ്രതീക്ഷ. ഓറഞ്ച്, മഞ്ഞ നിറത്തിലുള്ള ബന്ദിപ്പൂക്കളാണ് കൃഷി ചെയ്യുന്നത്. പൊൻകുന്നം ഗവ. വിഎച്ച്എസ്എസിൽ നടന്ന ബ്ലോക്ക്തല പുഷ്പകൃഷിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി നിർവഹിച്ചു. ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ, ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, ബ്ലോക്ക് പഞ്ചായത്തംഗം ഷാജി പാമ്പൂരി, മിനി സേതുനാഥ്, ലതാ ഉണ്ണികൃഷ്ണൻ, പഞ്ചായത്തംഗങ്ങളായ സുമേഷ് ആൻഡ്രൂസ്, ആന്‍റണി മാർട്ടിൻ, ശ്രീലത സന്തോഷ്, കൃഷി അസിസ്റ്റന്‍റ് ഡയറക്ടർ സിമി ഇബ്രാഹിം, സ്കൂൾ പ്രിൻസിപ്പൽ എം.എച്ച്. നിയാസ്, ഹെഡ്മിസ്ട്രസ് എം.സി. രജനി, പിടിഎ പ്രസിഡന്‍റ് പി.ജി. ജനീവ് എന്നിവർ പ്രസംഗിച്ചു.

മന്ത്രി വീണാ ജോർജിന്‍റെ രാജി ആവശ്യപ്പെട്ട് കോൺഗ്രസ് പ്രതിഷേധമാർച്ചും ധർണയും

കാഞ്ഞിരപ്പള്ളി: ആരോഗ്യമന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ട് കോൺഗ്രസ് സംസ്ഥാന വ്യാപകമായി നടത്തുന്ന സമരത്തോടനുബന്ധിച്ച് കാഞ്ഞിരപ്പള്ളി നിയോജകമണ്ഡലം കമ്മിറ്റിയുടെ നേതൃത്വത്തിൽ ജനറൽ ആശുപത്രിയിലേക്ക് നടത്തിയ പ്രതിഷേധ മാർച്ചും ധർണയും ഡിസിസി പ്രസിഡന്‍റ് നാട്ടകം സുരേഷ് ഉദ്ഘാടനം ചെയ്തു. നുണകളാൽ കെട്ടിപ്പടുത്ത കേരളത്തിലെ ആരോഗ്യരംഗം ഒന്നൊന്നായി തകർന്നു വീഴുകയാണെന്നും മെഡിക്കൽ കോളജിലെ കെട്ടിടം നിലംപതിച്ച് ബിന്ദു എന്ന വീട്ടമ്മ മരിച്ചത് ഇതിന്‍റെ ഏറ്റവും ഒടുവിലത്തെ ഉദാഹരണം മാത്രമാണെന്നും നാട്ടകം സുരേഷ് പറഞ്ഞു. മന്ത്രി വീണാ ജോർജിനെതിരേ കൊലക്കുറ്റത്തിനു കേസെടുക്കണമെന്നും മന്ത്രിസ്ഥാനം രാജിവച്ച് പൊതുസമൂഹത്തോടു മാപ്പു പറയണമെന്നും അദ്ദേഹം ആവശ്യപ്പെട്ടു. കോൺഗ്രസ് ബ്ലോക്ക് പ്രസിഡന്‍റ് പി. ജീരാജ് അധ്യക്ഷത വഹിച്ചു. ഡിസിസി ജനറൽ സെക്രട്ടറിമാരായ പി.എ. ഷെമീർ, പ്രഫ. റോണി കെ. ബേബി, സുഷമ ശിവദാസ്, യുഡിഎഫ് നിയോജകമണ്ഡലം കൺവീനർ ജിജി അഞ്ചാനി, ജോ പായിക്കാടൻ, അഭിലാഷ് ചന്ദ്രൻ, സനോജ് പനക്കൽ, ബിജു പത്യാല, സേവ്യർ മൂലകുന്ന്, സാലു പി. മാത്യു, അജിത അനിൽ, ഷെറിൻ സലിം, ഒ.എം. ഷാജി, എമേഴ്സൺ ദേവസ്യ, നായിഫ് ഫൈസി, എം.കെ. ഷെമീർ തുടങ്ങിയവർ പ്രസംഗിച്ചു.

പഠനത്തോടൊപ്പം സംരംഭത്തിന് തുടക്കംകുറിച്ച് വിദ്യാർഥികൾ

മണിമല: പഠനത്തോടൊപ്പം സംരംഭത്തിന് തുടക്കംകുറിച്ച് വിദ്യാർഥികൾ. കറിക്കാട്ടൂർ സിസിഎം ഹയർ സെക്കൻഡറി സ്കൂളിലെ വിഷ്ണു വിനോദ്, ബ്രിന്‍റോ ജോസഫ് ബിനോയി, സി. ജോനാത് മോൻ, അജിൻ സോണി എന്നിവരാണ് മെന്‍റർ അഞ്ജു സോവിച്ചന്‍റെ മേൽനോട്ടത്തിൽ പുതിയ സംരംഭത്തിന് തുടക്കംകുറിച്ചത്. അഡ് സോഫ്റ്റ് എന്ന പേരിൽ ആരംഭിച്ച പുതിയ സംരംഭം പൊതുജനങ്ങൾക്കും വിവിധ സ്ഥാപനങ്ങൾക്കും പരസ്യ വീഡിയോകൾ നിർമിച്ചു നൽകുക, പോസ്റ്ററുകൾ നിർമിക്കുക എന്നീ ലക്ഷ്യങ്ങളോടെയാണ് ആരംഭിക്കുന്നത്. കെ.ആർ. നാരായണൻ ഇൻസ്റ്റ്യൂട്ട് ഓഫ് വിഷ്വൽ സയൻസ് ആൻഡ് ആർട്സിൽനിന്നു പരിശീലനം നേടിയ ശേഷമായിരിക്കും കുട്ടികൾ പുതിയ സംരംഭവുമായി രംഗത്തുവരിക. മണിമല പഞ്ചായത്ത് പ്രസിഡന്‍റ് സിറിൽ തോമസ് പുതിയ സംരംഭത്തിന്‍റെ ലോഗോ പ്രകാശനം ചെയ്തു. സ്കൂൾതലത്തിൽ തുടങ്ങുന്ന ആദ്യ സ്റ്റാർട്ടപ്പാണ് അഡ് സോഫ്റ്റ് എന്ന് സ്കൂൾ അധികൃതർ പറഞ്ഞു. പഠനാനന്തരം തൊഴിൽ അന്വേഷകരാകാതെ തൊഴിൽദാതാക്കളാകാൻ വിദ്യാർഥികളെ പര്യാപ്തരാക്കുക എന്നതാണ് ഈ സ്റ്റാർട്ടപ്പിന്‍റെ പ്രഥമ ലക്ഷ്യം. പഠനത്തോടൊപ്പം കുട്ടികൾക്ക് ഒരു തൊഴിൽ പരിശീലനം കൂടിയാണ് ഈ സ്റ്റാർട്ടപ്പിലൂടെ ലഭ്യമാവുക.

മണിമല പഞ്ചായത്തിലെ നവീകരിച്ച മേലേക്കുളം നാടിന് സമര്‍പ്പിച്ചു

മണിമല: മണിമല പഞ്ചായത്തിലെ നവീകരിച്ച മേലേക്കുളം നാടിന് സമര്‍പ്പിച്ചു. കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെയും മണിമല പഞ്ചായത്തിന്‍റെയും നേതൃത്വത്തില്‍ പഞ്ചായത്തിലെ 12-ാം വാര്‍ഡില്‍ അമൃത് സരോവര്‍ പദ്ധതിയില്‍ ഏഴുലക്ഷം രൂപ ചെലവഴിച്ച് പുനരുദ്ധാരണം നടത്തി ഉപയോഗയോഗ്യമാക്കിയ പൊതുകുളത്തിന്‍റെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് നിര്‍വഹിച്ചു. കഴിഞ്ഞ പ്രളയത്തിലും പ്രകൃതിക്ഷോഭത്തിലുംപെട്ട് മൂടിപ്പോയതിനെത്തുടര്‍ന്ന് മാലിന്യംതള്ളൽ കേന്ദ്രമായി മാറിയിരുന്ന മേലേകുളം മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി വഴിയാണ് ഉപയോഗയോഗ്യമാക്കി പൊതുജനങ്ങള്‍ക്കായി സമര്‍പ്പിച്ചത്. മരം വീണ് തകര്‍ന്ന കുളത്തിന്‍റെ അരികും പടികളും കെട്ടി ജിഐ പൈപ്പ് കൊണ്ടുള്ള ഫെന്‍സിംഗും നടത്തി. 86 അടി നീളവും 56 അടി വീതിയും 19 അടി ആഴവുമുള്ള കുളത്തില്‍ 15 ലക്ഷം ലിറ്ററോളം വെള്ളം സംഭരിക്കാനുള്ള ശേഷിയുണ്ട്. യോഗത്തിൽ പഞ്ചായത്ത് പ്രസിഡന്‍റ് സിറിള്‍ തോമസ് അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, ബ്ലോക്ക് പഞ്ചായത്തംഗങ്ങളായ ജയശ്രീ ഗോപിദാസ്, ഷക്കീല നസീര്‍, ടി.ജെ. മോഹനന്‍, കെ.എസ്. എമേഴ്സണ്‍, സാജന്‍ കുന്നത്ത്, രത്നമ്മ രവീന്ദ്രന്‍, ബിഡിഒ എസ്. ഫൈസല്‍, ജോയിന്‍റ് ബിഡിഒ ടി.ഇ. സിയാദ്, പഞ്ചായത്തംഗങ്ങളായ റോസമ്മ ജോണ്‍, ഷാഹുല്‍ ഹമീദ്, മോളി മൈക്കിള്‍, പി.സി. ജമീമ, വ്യവസായവകുപ്പ് ഓഫീസര്‍ കെ.കെ. ഫൈസല്‍, എംജിഎന്‍ആര്‍ഇജിഎസ് ജീവനക്കാരായ രഹ്‌ന രമേശ്, ടോമി, സതീശ് തുടങ്ങിയവര്‍ പ്രസംഗിച്ചു.

ചെന്നാപ്പാറ ജനവാസമേഖലയിൽ വീണ്ടും പുലിയെത്തി

മുണ്ടക്കയം: ചെന്നാപ്പാറ ജനവാസമേഖലയിൽ തുടർച്ചയായി രണ്ടാം ദിവസവും പുലിയെത്തി. രണ്ടു വളർത്തുമൃഗങ്ങളെ പുലി ആക്രമിച്ചു. പെരുവന്താനം പഞ്ചായത്തിലെ ചെന്നാപ്പാറ മുകൾ ഭാഗത്താണ് ജനവാസ മേഖലയിൽ പുലി ഇറങ്ങിയത്. തിങ്കളാഴ്ച രാത്രിയിൽ ചിറകോട് സുരേന്ദ്രന്‍റെ പശുവിനെ പുലി ആക്രമിച്ചു. ആക്രമണത്തിൽ പശുവിന് ഗുരുതരമായി പരിക്കേറ്റിരുന്നു. ഇതിനു പിന്നാലെയാണ് ചൊവ്വാഴ്ച രാത്രി 10.30ന് നെല്ലിവിള പുത്തൻവീട്ടിൽ ഇസ്മായിലിന്‍റെ വളർത്തുപോത്തിനു നേരേ പുലിയുടെ ആക്രമണമുണ്ടായത്. പുലി ആക്രമിക്കുന്നതിനിടെ കയറുപൊട്ടിച്ച പോത്ത് ലയങ്ങളുടെ സമീപം ഓടിയെത്തി. പോത്തിന് പിന്നാലെയെത്തിയ പുലിയെ ഇതരസംസ്ഥാന തൊഴിലാളികൾ കാണുകയും ഇവർ ബഹളം ഉണ്ടാക്കിയതിനെത്തുടർന്ന് പ്രദേശവാസികൾ ഓടിക്കൂടിയപ്പോൾ പുലി ഓടിമറഞ്ഞതായും നാട്ടുകാർ പറഞ്ഞു. തുടർന്ന് വനപാലകരെത്തി പ്രദേശത്ത് തെരച്ചിൽ നടത്തി. പുലിയെ നേരിട്ടു കണ്ടതോടെ പ്രദേശവാസികൾ ഏറെ ഭീതിയിലാണ്. പുലിയുടെ സാന്നിധ്യം തുടർച്ചയായി ഉണ്ടായതിനെത്തുടർന്ന് കൂട് വയ്ക്കാൻ വനം വകുപ്പ് തീരുമാനിച്ചിരിക്കുകയാണ്.

ഖാദി നൂൽനൂൽപ്പ് നിർമാണകേന്ദ്രത്തിനു തുടക്കം

കാഞ്ഞിരപ്പള്ളി: ബ്ലോക്ക് പഞ്ചായത്തിന്‍റെ നേതൃത്വത്തിൽ 2024-25 വാർഷിക പദ്ധതിയിൽ നാലു ലക്ഷം രൂപ ചെലവഴിച്ച് മണിമല പഞ്ചായത്തിലെ കറിക്കാട്ടൂരിൽ ഖാദി നൂൽനൂൽപ്പ് കേന്ദ്രത്തിന്‍റെ പ്രവർത്തനം ആരംഭിച്ചു. ബ്ലോക്ക് പഞ്ചായത്ത് പ്രിസഡന്‍റ് അജിത രതീഷ് ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സിറിൾ തോമസ് അധ്യക്ഷത വഹിച്ചു. പത്ത് നൂല്‍നൂല്‍പ്പ് യന്ത്രങ്ങളില്‍ 11 പേര്‍ക്ക് നേരിട്ടു തൊഴില്‍ ലഭിക്കുന്ന പദ്ധതിയാണ് വിഭാവനം ചെയ്തിരിക്കുന്നത്. കോട്ടയം ജില്ലയിലെ എല്ലാ ഖാദി സെന്‍ററുകളിലേക്കും ആവശ്യമായ നൂൽ ഇവിടെ ഉത്പാദിപ്പിക്കും. നൂല്‍ നിര്‍മാണ കേന്ദ്രത്തിന്‍റെ പൂര്‍ണ നിയന്ത്രണം ഖാദി ബോര്‍ഡിന്‍റെ നേതൃത്വത്തിലാണ്. കാഞ്ഞിരപ്പളളി വ്യവസായവകുപ്പ് ഓഫീസർ കെ.കെ. ഫൈസൽ പദ്ധതി നിർവഹണത്തിന് മേൽനോട്ടം വഹിക്കും. 2500 കിലോഗ്രാം നൂൽ എല്ലാ മാസവും ഉത്പാദിപ്പിക്കും. ഇവിടെ തൊഴിൽ ചെയ്യുന്നവർക്ക് പ്രതിമാസം 15,000 രൂപ ശമ്പളം ലഭ്യമാക്കും. ബ്ലോക്ക് പഞ്ചായ്ത്ത വൈസ് പ്രസിഡന്‍റ് ജോളി മടുക്കക്കുഴി പദ്ധതി വിശദീകരണം നടത്തി. ബ്ലോക്ക് പഞ്ചായത്തംഗങ്ങളായ ജയശ്രീ ഗോപിദാസ്, ഷക്കീല നസീർ, ടി.ജെ. മോഹനൻ, കെ.എസ്. എമേഴ്സണ്‍, സാജൻ കുന്നത്ത്, രത്നമ്മ രവീന്ദ്രൻ, വാർഡ് മെംബർ ജോസഫ് കുഞ്ഞ്, ബിഡിഒ എസ്. ഫൈസൽ, ജോയിന്‍റ് ബിഡിഒ ടി.ഇ. സിയാദ്, വ്യവസായവകുപ്പ് ഓഫീസർ കെ.കെ. ഫൈസൽ, ഖാദി ബോർഡ് പ്രോജക്‌ട് ഓഫീസർ മനോജ് കുമാർ തുടങ്ങിയവർ പ്രസംഗിച്ചു.

ക്ഷീരവർധിനി റിവോൾവിംഗ് ഫണ്ട് വിതരണം

എലിക്കുളം: പാമ്പാടി ബ്ലോക്ക് പഞ്ചായത്ത് 2025-26 വാർഷിക പദ്ധതിയിൽ ഉൾപ്പെടുത്തിയ ക്ഷീരവർധിനി റിവോൾവിംഗ് ഫണ്ട് പദ്ധതിയിലൂടെ 14 ക്ഷീരസംഘങ്ങൾക്കായി 28 ലക്ഷം രൂപ വിതരണം ചെയ്യും. ബ്ലോക്കിന്‍റെ പരിധിയിലെ 27 ക്ഷീരസംഘങ്ങളിൽനിന്ന് തെരഞ്ഞെടുക്കപ്പെട്ട 14 സംഘങ്ങൾക്കാണ് ആദ്യഘട്ടത്തിൽ ആനുകൂല്യം. ഓരോ സംഘത്തിനും രണ്ടുലക്ഷം രൂപ വീതം ലഭിക്കും. ഇവയിലെ അഞ്ച് കർഷകർക്ക് പശുവിനെ വാങ്ങുന്നതിനായി 40,000 രൂപ പലിശരഹിത വായ്പയായി നൽകും. പാൽ വിറ്റുകിട്ടുന്ന തുകയിൽനിന്ന് തവണകളായി സംഘത്തിൽ തിരിച്ചടച്ച് ആ തുക ആറാമത്തെ ക്ഷീരകർഷകന് കൊടുക്കുന്നതിലൂടെ റിവോൾവിംഗ് ഫണ്ട് സംഘത്തിലുള്ള ക്ഷീരകർഷകർക്കെല്ലാം ഗുണം ചെയ്യും. ആകെ 70 പശുക്കളെ വാങ്ങാൻ പദ്ധതിത്തുക ഉപകരിക്കുമെന്ന് ഡയറി എക്സ്റ്റൻഷൻ ഓഫീസർ എം.വി. കണ്ണൻ പറഞ്ഞു. ഇന്ന് ബ്ലോക്ക് പഞ്ചായത്ത് ഹാളിൽ പ്രസിഡന്‍റ് ബെറ്റി റോയി മണിയങ്ങാട്ട് പദ്ധതി ഉദ്ഘാടനം ചെയ്യും. വൈസ് പ്രസിഡന്‍റ് പ്രഫ. എം.കെ. രാധാകൃഷ്ണൻ അധ്യക്ഷത വഹിക്കും.

ദേശീയ പണിമുടക്ക്: കെഎസ്ആർടിസി, ടാക്സി വാഹനങ്ങൾ തടഞ്ഞു

കാഞ്ഞിരപ്പള്ളി: കേന്ദ്രസർക്കാരിന്‍റെ തൊഴിലാളിവിരുദ്ധ നയങ്ങൾക്കെതിരേ ട്രേഡ് യൂണിയൻ സംയുക്ത സമിതി പ്രഖ്യാപിച്ച ദേശീയ പണിമുടക്ക് കാഞ്ഞിരപ്പള്ളി താലൂക്കിൽ പൂർണം. കടകന്പോളങ്ങൾ പൂർണമായും അടഞ്ഞുകിടന്നു. രാവിലെ തുറന്ന ചില കടകളും ബാങ്കുകളും സമരക്കാർ വന്ന് അടപ്പിച്ചു. നിരത്തിലിറങ്ങിയ കെഎസ്ആർടിസി, ടാക്സി വാഹനങ്ങളും സമരക്കാർ തടഞ്ഞു. ആലപ്പുഴയിൽനിന്ന് കുമളിയിലേക്ക് 25 പേരുമായി പുറപ്പെട്ട കെഎസ്ആർടിസി ബസ് പൊൻകുന്നം ആയപ്പോഴേക്കും യാത്രക്കാർ പൂർണമായി ഇറങ്ങി. പിന്നീട് കുമളിയിലേക്ക് യാത്രക്കാർ ഇല്ലാതെ സർവീസ് നടത്തിയ ഈ ബസും പിന്നാലെ യാത്രക്കാരുമായി വന്ന രണ്ട് കെഎസ്ആർടിസി ബസുകളും സമരക്കാർ തടഞ്ഞിട്ടു. പിന്നീട് ബസുകൾ വിട്ടയച്ചു. ഏതാനും സ്വകാര്യ വാഹനങ്ങൾ മാത്രമാണ് നിരത്തിലിറങ്ങിയത്. കാഞ്ഞിരപ്പള്ളി സിവിൽ സ്റ്റേഷനിൽ തഹസിൽദാർ ഉൾപ്പെടെ വിവിധ ഓഫീസുകളിലായി 14 ജീവനക്കാർ മാത്രമാണ് എത്തിയത്. തുറന്നു പ്രവർത്തിച്ച കുരിശുങ്കൽ ജംഗ്ഷനിലെ ഹെഡ് പോസ്റ്റ്ഓഫീസ് പ്രതിഷേധക്കാരെത്തി അടപ്പിച്ചു. പണിമുടക്കിന്‍റെ ഭാഗമായി തൊഴിലാളികൾ താലൂക്കിന്‍റെ വിവിധയിടങ്ങളിൽ പ്രകടനവും യോഗവും നടത്തി. കാഞ്ഞിരപ്പള്ളി ഹെഡ് പോസ്റ്റ്ഓഫീസ് പടിക്കൽ നടത്തിയ ധർണ മുതിർന്ന സിഐടിയു നേതാവ് വി.പി. ഇസ്മായിൽ ഉദ്ഘാടനം ചെയ്തു. സിപിഎം കാഞ്ഞിരപ്പള്ളി ഏരിയാ സെക്രട്ടറി ഷമീം അഹമ്മദ്, വി.പി. ഇബ്രാഹിം, പി.കെ. നസീർ, ടി.കെ. ജയൻ, കെ.എസ്. ഷാനവാസ്, കെ.എൻ. ദാമോദരൻ തുടങ്ങിയവർ പ്രസംഗിച്ചു. പൊൻകുന്നത്ത് പൊൻകുന്നം: ദേശീയ പണിമുടക്കിന് ഐക്യദാർഢ്യം പ്രഖ്യാപിച്ച് സംയുക്ത തൊഴിലാളി യൂണിയൻ ചിറക്കടവ് പഞ്ചായത്ത് കമ്മിറ്റി പൊൻകുന്നം ടൗണിൽ പ്രകടനവും പ്രതിഷേധ യോഗവും നടത്തി. സിഐടിയു വാഴൂർ ഏരിയാ സെക്രട്ടറി ഡി. ബൈജു ഉദ്ഘാടനം ചെയ്തു. ഐ.എസ്. രാമചന്ദ്രൻ അധ്യക്ഷത വഹിച്ചു. പണിമുടക്കിനെത്തുടർന്ന് പൊൻകുന്നം മിനി സിവിൽ സ്റ്റേഷനിലെ സർക്കാർ ഓഫീസുകൾ ഭൂരിഭാഗവും പ്രവർത്തിച്ചില്ല. ജോയിന്‍റ് ആർടി ഓഫീസ്, എക്‌സൈസ് ഓഫീസ് എന്നിവ മാത്രമാണ് പ്രവർത്തിച്ചത്. കെഎസ്ആർടിസി പൊൻകുന്നം ഡിപ്പോയിൽനിന്ന് ഇന്നലെ മൂന്ന് ബസുകൾ സർവീസ് നടത്തി. തിരുവനന്തപുരത്തേക്ക് ഒരു ബസും പാലാ-പൊൻകുന്നം റൂട്ടിൽ രണ്ടു ബസുമാണ് സർവീസ് നടത്തിയത്. കെകെ റോഡിൽ സർവീസുകളൊന്നുമില്ലായിരുന്നു. എരുമേലിയിൽ എരുമേലി: കെഎസ്ആർടിസി എരുമേലി സെന്‍ററിൽ ഇന്നലെ ദേശീയ പണിമുടക്ക് ദിനത്തിൽ ആകെ ഓടിയത് ഒരു ബസ്. ഇതാകട്ടെ എരുമേലി മുതൽ പൊൻകുന്നം വരെ സർവീസ് നടത്തിയ ശേഷം തിരിച്ചുവന്നു. മൊത്തം 120 ജീവനക്കാരുള്ള എരുമേലി സെന്‍ററിൽ ഇന്നലെ ജോലിക്ക് എത്തിയത് 14 പേർ. ഇവർ ഹാജർ ഒപ്പിട്ട് ജോലി ചെയ്യാനില്ലാതെ മടങ്ങി. ഇന്നലെ പണിമുടക്കാതെ എല്ലാ ബസുകളും സർവീസ് നടത്തണമെന്ന ഗതാഗതമന്ത്രിയുടെ കർശന നിർദേശമുണ്ടായിരുന്നു. ഇത് മുൻനിർത്തിയാണ് പേരിന് ഒരു ബസ് സർവീസ് നടത്തിയതെന്ന് ജീവനക്കാർ പറയുന്നു. അതേസമയം യാത്രക്കാർ കുറവായതിനാൽ നഷ്ടം മൂലമാണ് സർവീസ് നടത്താതിരുന്നതെന്ന് സെന്‍ററിലെ ചാർജ് ഓഫീസർ പറഞ്ഞു. ധർണ നടത്തി കാഞ്ഞിരപ്പള്ളി: പൊതുപണിമുടക്കിന്‍റെ ഭാഗമായി പാറത്തോട് പോസ്റ്റ്ഓഫീസിന് മുന്പിൽ ധർണ നടത്തി. സിപിഎം പാറത്തോട് ലോക്കൽ സെക്രട്ടറി പി.കെ. ബാലൻ ഉദ്ഘാടനം ചെയ്തു. മുണ്ടക്കയം ബിഎസ്എൻഎൽ ഓഫീസിന് മുന്നിൽ പ്രകടനവും ധർണയും നടത്തി. സിഐടിയു ജില്ലാ വൈസ് പ്രസിഡന്‍റ് കെ. രാജേഷ് ഉദ്ഘാടനം ചെയ്തു. കൂട്ടിക്കൽ പോസ്റ്റ്ഓഫീസിനു മുന്നിൽ നടത്തിയ ധർണ സിപിഎം കൂട്ടിക്കൽ ലോക്കൽ സെക്രട്ടറി പി.എസ്. സജിമോൻ ഉദ്ഘാടനം ചെയ്തു. എരുമേലി പോസ്റ്റ്ഓഫീസ് പടിക്കൽ നടത്തിയ ധർണ സിപിഎം കാഞ്ഞിരപ്പള്ളി ഏരിയാ കമ്മിറ്റിയംഗം ടി.എസ്. കൃഷ്ണകുമാർ ഉദ്ഘാടനം ചെയ്തു.

കുടുംബ സംഗമവും പുതിയ ഭാരവാഹികളുടെ സ്ഥാനാരോഹണവും നടത്തി

ചങ്ങനാശേരി: യുവജന ശക്തീകരണത്തോടൊപ്പം രോഗികളെയും ആലംബഹീനരെയും ചേര്‍ത്തുനിര്‍ത്തുന്നതിനായി വൈഎംസിഎ പ്രസ്ഥാനം പ്രതിജ്ഞാബദ്ധമാണെന്ന് ഇന്ത്യന്‍ വൈഎംസിഎയുടെ ദേശീയ ജനറല്‍ സെക്രട്ടറി എന്‍.വി. എല്‍ദോ. ചങ്ങനാശേരി വൈഎംസിഎ സംഘടിപ്പിച്ച കുടുംബ സംഗമവും പുതിയ ഭാരവാഹികളുടെ സ്ഥാനാരോഹണവും ഉദ്ഘാടനം ചെയ്യുകയായിരുന്നു അദ്ദേഹം. പ്രസിഡന്‍റ് ഡോ. റോയി ജോസഫ് അധ്യക്ഷത വഹിച്ചു. എസ്ബി കോളജ് പ്രിന്‍സിപ്പല്‍ റവ. ഡോ. ടെഡി കാഞ്ഞുപറമ്പില്‍ അനുഗ്രഹപ്രഭാഷണം നടത്തി. കേരള റീജൺ വൈസ് ചെയര്‍മാന്‍ കുര്യന്‍ തൂമ്പുങ്കല്‍, റീജൺ പരിസ്ഥിതി ബോര്‍ഡ് ചെയര്‍മാന്‍ ജോര്‍ജ് മാത്യു, ജോസ് കുളങ്ങര, ടോമിച്ചന്‍ അയ്യരുകുളങ്ങര എന്നിവര്‍ പ്രസംഗിച്ചു. പുതിയ ഭാരവാഹികളായി എം.എം. മാത്യു (പ്രസിഡന്‍റ്), പ്രഫ. സോജി ജോസഫ് (സെക്രട്ടറി), ജോണിച്ചന്‍ കൂട്ടുമ്മല്‍കാട്ടില്‍ (ട്രഷറര്‍), ടി.ഡി. തോമസ് ( വൈസ് പ്രസിഡന്‍റ്), കെ.പി. മാത്യു ( ജോയിന്‍റ് സെക്രട്ടറി) എന്നിവര്‍ ചുമതലയേറ്റു.

പൂവത്തുംമൂട്-എൻഇഎസ് ബ്ലോക്ക് റോഡിലെ വെള്ളക്കെട്ടിന് പരിഹാരം വേണം

മാടപ്പള്ളി: പൂവത്തുംമൂട്-എൻഇഎസ് ബ്ലോക്ക് റോഡിലെ വെള്ളക്കെട്ടിന് പരിഹാരം കാണണമെന്നാവശ്യപ്പെട്ട് മാടപ്പള്ളി പ്രണവം റസിഡന്‍റ്സ് വെൽഫയർ അസോസിയേഷൻ പ്രസിഡന്‍റ് വി.ഐ. ജോഷിയും സെക്രട്ടറി പി.ഡി. രവീന്ദ്രനും ചേർന്ന് പിഡബ്ലിയുഡി എൻജിനിയർക്ക് നിവേദനം നൽകി. പത്തു വർഷങ്ങൾക്കു മുമ്പ് വളരെ മികച്ച രീതിയിൽ റീടാർ ചെയ്ത റോഡിൽ ഒരു മഴ പെയ്താൽ വെള്ളക്കെട്ടുണ്ടാകുന്നത് പതിവാണ്. ഇത് ദിവസങ്ങളോളം സഞ്ചാരത്തിന് തടസം സൃഷ്ടിക്കുന്നതായി നിവേദനത്തിൽ പറയുന്നു. മാടപ്പള്ളി ക്ഷേത്രം, എൻഇഎസ് ബ്ലോക്ക്, സിഎസ്എൽപി, ഗവ. എൽപി, സിഎസ്, ഗുഡ്ഷെപ്പേർഡ്, സെന്‍റ് പീറ്റേഴ്സ്, കാർമൽ എന്നീ സ്കൂളുകളിലേക്കുള്ള വിദ്യാർഥികളും സ്കൂൾ വാഹനങ്ങൾ, സ്വകാര്യ ബസുകൾ, മറ്റു വാഹനങ്ങൾ ഉൾപ്പെടെയുള്ളവ ഈ റോഡിലൂടെയാണ് യാത്ര ചെയ്യുന്നത്. കരിക്കണ്ടം മുതൽ വടക്കോട്ട് കേളി ജംഗ്ഷൻ വരെ ഏകദേശം 400 മീറ്റർ ഭാഗത്താണ് വെള്ളക്കെട്ടുണ്ടാകുന്നത്. റോഡിന്‍റെ പടിഞ്ഞാറുഭാഗത്തുകൂടി ഉണ്ടായിരുന്ന ഓട ഇല്ലാത്തതും മറ്റൊരു കാരണമാണ്. റോഡിന്‍റെ ഇരുവശത്തുമുള്ള സംരക്ഷണഭിത്തി പല സ്ഥലങ്ങളിലും ഇടിഞ്ഞ നിലയിലാണ്. കരിക്കണ്ടം മുതൽ തെങ്ങണവരെയുള്ള ഓടയും അടച്ച അവസ്ഥയിലാണ്. റോഡ്‌ സഞ്ചാരം സുഗമമാക്കുന്നതിന് അടിയന്തര നടപടികൾ സ്വീകരിക്കണമെന്ന് നിവേദനത്തിലൂടെ ആവശ്യപ്പെട്ടു.

പൈനാപ്പിൾ-ചോക്ലേറ്റുകള്‍ നിറഞ്ഞ് ഗുഡ്‌ഷെപ്പേര്‍ഡ് സ്‌കൂള്‍ അങ്കണം

ചങ്ങനാശേരി: പൈനാപ്പിള്‍-ചോക്ലേറ്റ് ദിനാഘോഷം സംഘടിപ്പിച്ച് തെങ്ങണ ഗുഡ് ഷെപ്പേര്‍ഡ് പബ്ലിക് സ്‌കൂള്‍ ആൻഡ് ജൂണിയര്‍ കോളജ്. വിദ്യാര്‍ഥികളും രക്ഷിതാക്കളും വീടുകളില്‍ പാകംചെയ്തു കൊണ്ടുവന്ന ചോക്ലേറ്റ് പൈനാപ്പിള്‍ വിഭവങ്ങളുടെയും സ്വാദിഷ്ടങ്ങളായ പുഡിംഗുകളുടെയും പ്രദര്‍ശനം അവയുടെ മേന്മയും തനിമയും വിളമ്പി. പൈനാപ്പിളിന്‍റെ ശാസ്ത്രീയ ഘടന സൂക്ഷ്മദര്‍ശിനിയിലൂടെ നിരീക്ഷിക്കാനും ഗുണഗണങ്ങള്‍ സ്ലൈഡ് ഷോയിലൂടെ കണ്ടറിയാനും പ്രത്യേക സജ്ജീകരണമുണ്ടായിരുന്നു. ആഘോഷങ്ങളുടെ ഭാഗമായി പ്രച്ഛന്ന വേഷ മത്സരം, ഫാഷന്‍ ഷോ, ബ്രസീലിയന്‍ നൃത്തം, വിവിധ രചനാ മത്സരങ്ങള്‍ തുടങ്ങിയവയും സംഘടിപ്പിച്ചു. സ്‌കൂള്‍ ചെയര്‍മാന്‍ ഡോ. വര്‍ക്കി ഏബ്രഹാം ഉദ്ഘാടനം ചെയ്തു. സെക്രട്ടറി പ്രിജോ കെ. ഏബ്രഹാം, ട്രഷറര്‍ പ്രിയ കെ. ഏബ്രഹാം, പ്രിന്‍സിപ്പല്‍ സുനിത സതീഷ്, വൈസ് പ്രിന്‍സിപ്പല്‍ സോണി ജോസ്, അസി. മാനേജര്‍ തമ്പി കുര്യന്‍, പിടിഎ വൈസ് പ്രസിഡന്‍റ് ഷമീം കാസിം എന്നിവര്‍ നേതൃത്വം നല്‍കി.

സ്വകാര്യബസ് സമരം: യാത്രക്കാരും വിദ്യാര്‍ഥികളും ദുരിതത്തിലായി

ചങ്ങനാശേരി: വിവിധ ആവശ്യങ്ങളുന്നയിച്ച് സ്വകാര്യബസുടമകള്‍ നടത്തിയ പണിമുടക്ക് പൂര്‍ണം. സ്വകാര്യബസുകള്‍ മാത്രം സര്‍വീസുകള്‍ നടത്തുന്ന ചങ്ങനാശേി-മണിമല, വാഴൂര്‍, കുരിശുംമൂട്-കോട്ടയം, തെങ്ങണവഴി കോട്ടയം, തെങ്ങണ-വെങ്കോട്ട, ചങ്ങനാശേരി-കവിയൂര്‍, കന്നുംപുറം-മാന്താനം റൂട്ടുകളിലാണ് സമരം വിദ്യാര്‍ഥികളടക്കം യാത്രക്കാരെ വലച്ചത്. സമരത്തെ നേരിടാന്‍ വാഴൂര്‍ റൂട്ടില്‍ കെഎസ്ആര്‍ടിസി ബസുകള്‍ കൂടുതല്‍ സർവീസ് നടത്തിയെങ്കിലും യാത്രക്കാരു ടെ ദുരിതം പരിഹരിക്കാന്‍ പര്യാപ്തമായില്ല. സ്വകാര്യ ബസ് സമരത്തെത്തുടര്‍ന്ന് ഇന്നലെ കെഎസ്ആര്‍ടിസി ചങ്ങനാശേരി ഡിപ്പോയില്‍ വരുമാന വര്‍ധനയുണ്ടായിട്ടുണ്ട്.

കുറിച്ചി പഞ്ചായത്തിലെ രണ്ടു വാര്‍ഡുകളില്‍ ഹരിതഗ്രാമം പദ്ധതി

ചങ്ങനാശേരി: കുറിച്ചി പഞ്ചായത്തിലെ എട്ട്, ഒമ്പത് വാര്‍ഡുകളെ ഹരിത ഗ്രാമമാക്കാന്‍ പദ്ധതി. ഹൗമാര ഇന്‍റഗ്രേറ്റഡ് ഫാമും മുത്തൂറ്റ് ഫിനാന്‍സും ചേര്‍ന്നാണ് പദ്ധതി നടപ്പിലാക്കുന്നത്. ഓണക്കാലത്ത് വിഷരഹിതമായ പച്ചക്കറി ലഭ്യമാക്കുകയാണ് ഇതിലൂടെ പഞ്ചായത്ത് ലക്ഷ്യം വയ്ക്കുന്നത്. തൊഴിലുപ്പ് തൊഴിലാളികള്‍ അരിപാകി മുളപ്പിച്ച മുന്തിയ ഇനം പച്ചക്കറി തൈകള്‍ 125 എണ്ണംവീതം രണ്ടു വാര്‍ഡുകളിലെയും കുടുംബങ്ങള്‍ക്ക് നല്‍കി. വെണ്ട, വഴുതന, പയര്‍, മുളക്, തക്കാളി ഇനത്തില്‍ 50വീതം തൈകളാണ് നല്‍കിയത്. കുറിച്ചി പഞ്ചായത്ത് പ്രസിഡന്‍റ് സുജാത സുശീലന്‍ ഹരിതഗ്രാമം പദ്ധതി ഉദ്ഘാടനം ചെയ്തു. ഹൗമാര ഇന്‍റഗ്രേറ്റഡ് ഫാം സെക്രട്ടറി ബേബിച്ചന്‍ കൈതയില്‍ അധ്യക്ഷത വഹിച്ചു. പഞ്ചായത്ത് മെമ്പര്‍മാരായ ബി.ആര്‍. മഞ്ജീഷ്, സ്മിത ബൈജു, കൃഷി ഓഫീസര്‍ ഡോ. സുനില്‍കുമാര്‍, വത്സമ്മ ശിവന്‍കുട്ടി, ഫിനിമോള്‍ ജോസഫ്, ടി.സി. ലക്ഷ്മണന്‍, ജോസഫ് പി. ചാക്കോ എന്നിവര്‍ പ്രസംഗിച്ചു.

മീറ്റ് ദ് ലൂമിനറീസ് പ്രോഗ്രാം സംഘടിപ്പിച്ചു

ചങ്ങനാശേരി: സ്ഥിരപരിശ്രമവും ലക്ഷ്യബോധവും ഉണ്ടെങ്കില്‍ ഏതൊരു വിദ്യാര്‍ഥിക്കും സിവില്‍ സര്‍വീസ് പരീക്ഷകളില്‍ തിളക്കമാര്‍ന്ന വിജയം നേടാന്‍ കഴിയുമെന്ന് 2023ലെ ഇന്ത്യന്‍ സിവില്‍ സര്‍വീസ് പരീക്ഷാ ജേതാവും ഇന്ത്യന്‍ ഇന്‍ഫര്‍മേഷന്‍ സര്‍വീസില്‍ ഉദ്യോഗസ്ഥയുമായ പൂര്‍വവിദ്യാര്‍ഥിനി ദിവ്യ ആന്‍ മാത്യു. വാഴപ്പള്ളി സെന്‍റ് തെരേസാസ് സ്‌കൂള്‍ ഹയര്‍സെക്കന്‍ഡറി വിഭാഗം രജത ജൂബിലി ആഘോഷങ്ങളോടനുബന്ധിച്ച് നടത്തുന്ന മീറ്റ് ദ് ലൂമിനറീസ് പ്രോഗ്രാമിന്‍റെ മൂന്നാം എപ്പിസോഡില്‍ വിദ്യാര്‍ഥികളോട് സംവദിക്കുകയായിരുന്നു അവര്‍. സമൂഹത്തിന്‍റെ വ്യത്യസ്ത മേഖലകളില്‍ ഉജ്വലമായ പ്രവര്‍ത്തനങ്ങള്‍ കാഴ്ചവയ്ക്കുന്ന വ്യക്തികളെ വിദ്യാര്‍ഥികള്‍ക്ക് പരിചയപ്പെടുത്തുന്ന പരിപാടിയാണ് മീറ്റ് ദ ലൂമനറി. പ്രിന്‍സിപ്പല്‍ ഷിജി വര്‍ഗീസ്, അധ്യാപകരായ എം.ജെ. സിനോ മോന്‍, കാതറിന്‍ ജോസഫ് എന്നിവര്‍ പ്രസംഗിച്ചു.

കെഎസ്ആർടിസിയിലെ അദർ ഡ്യൂട്ടി : ഗതാഗത മന്ത്രിയുടെ വാക്കിന് ചങ്ങനാശേരി ഡിപ്പോയിൽ പുല്ലുവില

ചങ്ങനാശേരി: കെഎസ്ആർടിസി ചീഫ് ഓഫീസിന്‍റെ അനുമതിയില്ലാതെ ജീവനക്കാരെ അദർ ഡ്യൂട്ടിക്ക് നിയോഗിക്കരുതെന്ന ഗതാഗതമന്ത്രിയുടെ നിർദേശത്തെ ചങ്ങനാശേരി ഡിപ്പോ തള്ളിക്കളയുന്നതായി ആക്ഷേപം. ചങ്ങനാശേരി മെയിൻ സ്റ്റാൻഡ്, പെരുന്ന ബസ് സ്റ്റാൻഡ് എന്നിങ്ങനെ രണ്ടു സ്റ്റാൻഡുകളിലായാണ് ചങ്ങനാശേരി ഡിപ്പോയുടെ പ്രവർത്തനം. മെയിൻ സ്റ്റാൻഡിലെ സ്റ്റേഷൻ മാസ്റ്റർ ഡ്യൂട്ടി 21 ഉം പെരുന്ന ബസ് സ്റ്റാൻഡിലെ സ്റ്റേഷൻ മാസ്റ്റർ ഡ്യൂട്ടി 10.5മാണ്. ഡിപ്പോയിലെ ആകെയുള്ള 31.5 സ്റ്റേഷൻ മാസ്റ്റർ ഡ്യൂട്ടിക്കായി മൂന്ന് സ്റ്റേഷൻ മാസ്റ്റർമാരെ കൂടാതെ രണ്ട് അദർ ഡ്യൂട്ടി കണ്ടക്ടർമാർക്കും മാത്രമാണ് അനുവാദമുള്ളത്. എന്നാൽ ഡിപ്പോയിൽ നാലും അഞ്ചും കണ്ടക്ടർമാരാണ് ബസിൽ ഡ്യൂട്ടിക്കു പോകാതെ അദർ ഡ്യൂട്ടി ചെയ്തു വരുന്നത്. സ്റ്റേഷൻ മാസ്റ്റർമാർ ലീവ് എടുത്തു തങ്ങൾക്കു താത്പര്യമുള്ള കണ്ടക്ടർമാരെ ലൈൻ ഡ്യൂട്ടിക്കു വിടാതെ അദർ ഡ്യൂട്ടിക്ക് നിയോഗിക്കുന്നതായാണ് ആക്ഷേപം ഉയരുന്നത്. ഇതു കോർപറേഷന്‍റെ പ്രതിദിന വരുമാനം കുറയാൻ കാരണമാകുന്നതായാണ് ഒരു വിഭാഗം തൊഴിലാളികൾ ചൂണ്ടിക്കാണിക്ക ുന്നത്.

തിട്ടയിടിഞ്ഞ് അപകടാവസ്ഥയിലായ മാന്തുരുത്തി റോഡിന് സംരക്ഷണം കാലി വീപ്പ

മാന്തുരുത്തി: തിട്ട ഇടിഞ്ഞ് അപകടാവസ്ഥയിലായ റോഡിന് കാലി ടാര്‍ വീപ്പ സംരക്ഷണ ഭിത്തിയാക്കി അധികൃതര്‍. സ്‌കൂള്‍ ബസുകള്‍, ടിപ്പറുകള്‍ തുടങ്ങി നൂറുകണക്കിനു വാഹനങ്ങള്‍ ദിവസേന സഞ്ചരിക്കുന്ന മാന്തുരുത്തി-നെടുംകുന്നം റോഡിനാണ് പൊതുമരാമത്ത് വക കാലി ടാര്‍ വീപ്പ സംരക്ഷണം. ജില്ലയിലെ ആദ്യകാല പിഡബ്ല്യുഡി റോഡുകളിലൊന്നായ മാന്തുരുത്തി-നെടുംകുന്നം റോഡിനോടുള്ള അധികൃതരുടെ അവഗണനയാണ് ഇതിലൂടെ വ്യക്തമാകുന്നതെന്ന് നാട്ടുകാര്‍ പറയുന്നു. ചങ്ങനാശേരി-വാഴൂര്‍ റോഡിനെയും ചങ്ങനാശേരി-മണിമല റോഡിനെയും തമ്മില്‍ ബന്ധിപ്പിക്കുന്ന പ്രധാന റോഡാണിത്. പല അവസരങ്ങളിലായി മുന്നൂറു മീറ്ററോളം ദൂരത്തില്‍ തിട്ട ഇടിഞ്ഞ് സമീപത്തെ തോട്ടില്‍ പതിച്ചിട്ട് രണ്ടു വര്‍ഷത്തോളമായി. അമിതഭാരം കയറ്റി ടിപ്പര്‍ ലോറികള്‍ കടന്നുപോയതാണ് റോഡിന്‍റെ തിട്ട ഇടിഞ്ഞുതാഴാന്‍ കാരണമായതെന്ന് നാട്ടുകാര്‍ക്ക് പറയുന്നു. ആദ്യം റോഡിന്‍റെ ഒരു വശത്ത് വിള്ളല്‍ പ്രത്യക്ഷപ്പെടുകയായിരുന്നു. ഇത് അധികൃതരുടെ ശ്രദ്ധയില്‍പ്പെടുത്തിയെങ്കിലും വാഹനസഞ്ചാരം നിയന്ത്രിക്കുന്നതിനോ, റോഡിന്‍റെ അറ്റകുറ്റപ്പണി നടത്തുന്നതിനോ ബന്ധപ്പെട്ട വകുപ്പ് അധികൃതര്‍ തയാറാകാത്തതാണ് കൂടുതലായി റോഡിന്‍റെ തിട്ട ഇടിയാന്‍ കാരണമായത്. സംരക്ഷണം ഒരുക്കി സ്ഥാപിച്ച ചില വീപ്പകള്‍ മറിഞ്ഞുവീണ അവസ്ഥയിലുമാണ്.

ലഹരിവിരുദ്ധ സെമിനാറും റാലിയും നടത്തി

പെരുവ: മറ്റപ്പള്ളിക്കുന്ന് ജംഗ്ഷനില്‍ മറ്റപ്പള്ളിക്കുന്ന് റെസിഡന്‍റ്സ് അസോസിയേഷന്‍റെയും ജിവിഎച്ച്എസ്എസ് ഗേള്‍സ് സ്‌കൂളിലെ എന്‍എസ്എസ് യൂണിറ്റിന്‍റെയും സംയുക്താഭിമുഖ്യത്തില്‍ ലഹരിവിരുദ്ധ സെമിനാറും റാലിയും ലഹരിവിരുദ്ധ ചുവരെഴുത്ത് പ്രകാശനവും നടന്നു. റെസിഡന്‍റ്സ് അസോസിയേഷന്‍ പ്രസിഡന്‍റ് റോബര്‍ട്ട് തോട്ടുപുറം അധ്യക്ഷത വഹിച്ച യോഗം മുന്‍ പ്രസിഡന്‍റ് ഫിലിപ്പ് ആക്കാംപറമ്പില്‍ ഉദ്ഘാടനം ചെയ്തു. പ്രിന്‍സിപ്പൽ എസ്. ജയന്‍ മുഖ്യപ്രഭാഷണം നടത്തി. പെരുവ പ്രാഥമികാരോഗ്യ കേന്ദ്രത്തിലെ ജൂണിയര്‍ ഹെല്‍ത്ത് ഇന്‍സ്പെക്ടര്‍ കെ.എം. രാജു ലഹരിയെക്കുറിച്ച് ക്ലാസ് നടത്തി. കരാട്ടെ മാസ്റ്റര്‍ ജോഷി ചാക്കോയുടെ നേതൃത്വത്തില്‍ സെല്‍ഫ് ഡിഫന്‍സ് അഭ്യാസമുറകള്‍ പ്രദര്‍ശിപ്പിച്ചു. എന്‍എസ്എസ് കുട്ടികള്‍ ലഹരിവിരുദ്ധ നാടകം അവതരിപ്പിച്ചു. എംആര്‍എ അംഗങ്ങളായ ഏബ്രഹാം തോട്ടുപുറം, പി. ലിജോ എന്നിവർ സ്‌കിറ്റ് അവതരിപ്പിച്ചു. അസോസിയേഷന്‍ ട്രഷറര്‍ രാജന്‍ ചേരുംകുഴി, അധ്യാപകരായ അലക്‌സ് മാത്യു, എം.സി. സിന്ധുമോള്‍, പി.വി. ഉണ്ണി, ലക്ഷ്മി എം. ജോണ്‍, ഡി.വി. ബിന്ദു, റോസിലി തങ്കന്‍ എന്നിവര്‍ പ്രസംഗിച്ചു.

ബിന്ദുവിന്‍റെ വീടിന്‍റെ നിർമാണം‍ പൂര്‍ത്തിയാക്കും: മന്ത്രി ഡോ. ആര്‍. ബിന്ദു

തലയോലപ്പറമ്പ്: മെഡിക്കല്‍ കോളജ് ആശുപത്രിക്കെട്ടിടഭാഗം ഇടിഞ്ഞുണ്ടായ അപകടത്തില്‍ മരിച്ച ഡി. ബിന്ദുവിന്‍റെ വീടിന്‍റെ നിര്‍മാണം ഉന്നത വിദ്യാഭ്യാസവകുപ്പിനു കീഴിലുള്ള എന്‍എസ്എസ് യൂണിറ്റുകള്‍ ചേര്‍ന്ന് പൂര്‍ത്തീകരിച്ചു നല്‍കുമെന്ന് മന്ത്രി ഡോ. ആര്‍. ബിന്ദു. തലയോലപ്പറമ്പ് ഉമ്മാംകുന്നിലുള്ള ബിന്ദുവിന്‍റെ വീട് സന്ദര്‍ശിച്ച മന്ത്രി ഇതുസംബന്ധിച്ച കരാര്‍ കരാറുകാരന്‍ അജിക്ക് കൈമാറി. സി.കെ. ആശ എംഎല്‍എ, എന്‍എസ്എസ് സംസ്ഥാന ഓഫീസര്‍ ഡോ. ആര്‍.എന്‍. അന്‍സാര്‍, എന്‍എസ്എസ് എംജി സര്‍വകലാശാലാ കോ-ഓര്‍ഡിനേറ്റര്‍ ഡോ. ഇ.എന്‍. ശിവദാസ് എന്നിവരും ഒപ്പമുണ്ടായിരുന്നു. ഇവര്‍ മൂന്നു പേര്‍ക്കുമാണ് നിര്‍മാണത്തിന്‍റെ മേല്‍നോട്ടച്ചുമതല. 12.80 ലക്ഷം രൂപയുടെ എസ്റ്റിമേറ്റാണ് തയാറാക്കിയിരിക്കുന്നത്. അടുത്ത ദിവസംതന്നെ നിര്‍മാണം ആരംഭിക്കും. 50 ദിവസത്തിനകം പൂര്‍ത്തിയാക്കാനാണുദ്ദേശിക്കുന്നത്. എന്‍എസ്എസ് വിദ്യാര്‍ഥികള്‍ സമാഹരിക്കുന്ന തുകയ്‌ക്കൊപ്പം സുമനസുകളും സഹകരിക്കുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു. ഇന്നലെ രാവിലെ ബിന്ദുവിന്‍റെ വീട്ടിലെത്തിയ മന്ത്രി അമ്മ സീതാലക്ഷ്മി, ഭര്‍ത്താവ് വിശ്രുതന്‍, മകന്‍ നവനീത് എന്നിവരെക്കണ്ട് സര്‍ക്കാര്‍ എല്ലാ സഹായവും ലഭ്യമാക്കുമെന്ന് അറിയിച്ചു. മകള്‍ നവമിയുടെ ചികിത്സ നല്ല രീതിയില്‍ പൂര്‍ത്തിയാക്കുമെന്നും മന്ത്രി കുടുംബാംഗങ്ങളെ അറിയിച്ചു.

കോൺഗ്രസ് നടത്തിയ താലൂക്ക് ആശുപത്രി മാർച്ചിൽ സംഘർഷം

വൈക്കം: മന്ത്രിവീണാ ജോർജ് രാജിവയ്ക്കണമെന്നാവശ്യപ്പെട്ട് താലൂക്ക് ആശുപത്രിയിലേക്ക് കോൺഗ്രസ് നടത്തിയ പ്രതിഷേധ മാർച്ചിൽ നേരിയ സംഘർഷം. വൈക്കം താലൂക്ക് ആശുപത്രിക്ക് ഏതാനും മീറ്റർ അകലെ പ്രതിഷേധ മാർച്ച് പോലീസ് തടഞ്ഞതിനെത്തുടർന്ന് പോലീസും പ്രവർത്തകരും തമ്മിൽ വാക്കേറ്റവും ഉന്തുംതള്ളുമുണ്ടായി. ധർണ കെപിസിസി ജനറൽ സെക്രട്ടറി അഡ്വ. പി.എ. സലിം ഉദ്ഘാടനം ചെയ്തു. സർക്കാർ ആശുപത്രികളിലെ ചികിത്സ സുരക്ഷിതമല്ലെന്ന് മന്ത്രി സജി ചെറിയാന്‍റെ വെളിപ്പെടുത്തൽ വളരെ ഗൗരവത്തോടെ കാണണമെന്നും മെഡിക്കൽ കോളജ് ആശുപത്രിക്കെട്ടിടം തകർന്നു വീട്ടമ്മ മരിച്ചതിന്‍റെ ഉത്തരവാദിത്വത്തിൽനിന്നു സർക്കാരിന് ഒഴിഞ്ഞുമാറാനാവില്ലെന്നും പി.എ. സലിം പറഞ്ഞു. വൈക്കം, തലയോലപ്പറമ്പ് ബ്ലോക്ക് കോൺഗ്രസ് കമ്മിറ്റികളുടെ നേതൃത്വത്തിൽ നടത്തിയ ധർണയിൽ വൈക്കം ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് പി.ഡി. ഉണ്ണി അധ്യക്ഷത വഹിച്ചു. തലയോലപ്പറമ്പ് ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് എം.കെ. ഷിബു, മോഹൻ ഡി. ബാബു, അബ്ദുൾ സലാം റാവുത്തർ, അഡ്വ. എ.സനീഷ് കുമാർ, പി.വി. പ്രസാദ്, ജയ് ജോൺ, പി.പി. സിബിച്ചൻ, അക്കരപ്പാടം ശശി, വിജയമ്മ ബാബു, വി. ബിൻസ്, വിവേക് പ്ലാത്താനത്ത്, പി.ടി. സുഭാഷ്, പ്രീതാ രാജേഷ്, വെച്ചൂർ സുരേഷ്കുമാർ, പി.കെ. മണിലാൽ, കെ.കെ.കൃഷ്ണകുമാർ, വർഗീസ് പുത്തൻചിറ എന്നിവർ പ്രസംഗിച്ചു.

ഞാറ്റുവേലച്ചന്ത ഉദ്ഘാടനം ചെയ്തു

വൈക്കം: വൈക്കം നഗരസഭ കൃഷിഭവന്‍റെ ആഭിമുഖ്യത്തില്‍ ഞാറ്റുവേലച്ചന്തയും ആത്മ കോട്ടയത്തിന്‍റെ കര്‍ഷക പരിശീലന പരിപാടിയും സംഘടിപ്പിച്ചു. വൈക്കം സത്യഗ്രഹ സ്മാരക ഹാളില്‍ നഗരസഭാ ചെയര്‍പേഴ്‌സണ്‍ പ്രീതാ രാജേഷ് വൈക്കം അഗ്രിക്കേഷന്‍ സെന്‍റര്‍ സെക്രട്ടറി കെ.വി. പവിത്രന് പച്ചക്കറിത്തൈകൾ കൈമാറി ഞാറ്റുവേലച്ചന്തയുടെയും കര്‍ഷക പരിശീലന പരിപാടിയുടെയും ഉദ്ഘാടനം നിര്‍വഹിച്ചു. വൈസ് ചെയര്‍മാന്‍ പി.ടി. സുഭാഷ് അധ്യക്ഷത വഹിച്ചു. ജില്ലാ കൃഷി ഓഫീസര്‍ ജോ ജോസ്, കോട്ടയം ആത്മ പ്രോജക്ട് ഡയറക്ടര്‍ മിനിജോര്‍ജ്, ആത്മ വൈബയോ ഗ്രൂപ്പ് പ്രസിഡന്‍റ് വേണുഗോപാല്‍, നഗരസഭാംഗങ്ങളായ സിന്ധു സജീവന്‍, ബിന്ദു ഷാജി, എന്‍. അയ്യപ്പന്‍, രാധിക ശ്യാം, ഗിരിജ, കവിത, ലേഖ, രേണുക രതീഷ്, രാജശ്രീ, മോഹനകുമാരി, ആര്‍. സന്തോഷ്, വൈക്കം ബ്ലോക്ക് കൃഷി ഓഫീസ് ഡയറക്ടര്‍ വിനു ചന്ദ്രബോസ്, കാര്‍ഷിക വികസനസമിതി അംഗങ്ങളായ പി. സോമന്‍പിള്ള, ബി. ഗോപാലകൃഷ്ണന്‍, ജോണ്‍ ചെത്തിയില്‍, മോഹനന്‍, കൃഷി ഉദ്യോഗസ്ഥരായ മെയ്‌സണ്‍ മുരളി, വി.വി. സിജി, ആശാ കുര്യന്‍, നിമിഷ കുര്യന്‍, രമ്യ എന്നിവര്‍ പ്രസംഗിച്ചു.

അഖിലകേരള പ്രസംഗമത്സരം: സമ്മാന വിതരണം നടത്തി

കടുത്തുരുത്തി: വിശുദ്ധ തോമാശ്ലീഹാ നിക്ഷേപിച്ച വിശ്വാസത്തിന്‍റെ നിധി വരുംതലമുറകളിലേക്ക് കൈമാറുകയെന്നതാണ് വിശ്വാസികളുടെ ഉത്തരവാദിത്വവും കടമയുമെന്ന് ഫൊറോനാ വികാരി ഫാ.മാത്യു ചന്ദ്രന്‍കുന്നേല്‍. കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളിയില്‍ നടത്തിയ അഖിലകേരള പ്രസംഗമത്സര വിജിയകള്‍ക്കുള്ള സമ്മാനവിതരണം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. കൈമാറിക്കിട്ടിയ വിശ്വാസദീപം കൂടുതല്‍ ശോഭയോടെ വരുംതലമുറകളിലേക്ക് കൈമാറാന്‍ കഴിയണമെന്ന് സമ്മേളനത്തില്‍ മഖ്യപ്രഭാഷണം നടത്തിയ പ്രഫ. കുര്യാസ് കുമ്പളക്കുഴി ഓര്‍മിപ്പിച്ചു. അധ്യാപകനും പ്രഭാഷകനും കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളി ഇടവകാംഗവുമായിരുന്ന ഫാ. ജി.ടി. വടക്കേലിന്‍റെ സ്മരണാര്‍ഥമാണ് അഖിലകേരള പ്രസംഗമത്സരം സംഘടിപ്പിച്ചത്. സണ്‍ഡേ സ്‌കൂള്‍ ഡയറക്ടര്‍ ഫാ. ജോണ്‍ നടുത്തടം, സഹവികാരി ഫാ. ഏബ്രഹാം പെരിയപ്പുറം, സണ്‍ഡേ സ്‌കൂള്‍ ഹെഡ്മാസ്റ്റര്‍ ടോമി അഗസ്റ്റിന്‍ കരിക്കാട്ടില്‍, സിസ്റ്റര്‍ ലിസി വട്ടക്കുന്നേല്‍ എസ്എബിഎസ് തുടങ്ങിവര്‍ പ്രസംഗിച്ചു.

പെരുവ-പിറവം റോഡ് ഗതാഗതയോഗ്യമാക്കണം

കടുത്തുരുത്തി: മുളക്കുളം പഞ്ചായത്തെന്ന് കേട്ടാല്‍ ആദ്യം ഓര്‍മയിലെത്തുക പെരുവ ടൗണാണ്. ചെറുതെങ്കിലും ഗ്രാമീണമേഖലയായ മുളക്കുളത്തിന്‍റെ ടൗണാണ് പെരുവ. പഞ്ചായത്ത് ഓഫീസ്, ബാങ്കുകള്‍, പ്രധാനപ്പെട്ട സര്‍ക്കാര്‍ സ്‌കൂളുകള്‍ എല്ലാം പെരുവയിലും കവലയ്ക്ക് സമീപത്തുമായാണ് സ്ഥിതിചെയ്യുന്നത്. പെരുവ കവലയില്‍നിന്ന് പിറവത്തേക്കും ഇലഞ്ഞിവഴി കൂത്താട്ടുകുളത്തിനും തലയോലപ്പറമ്പിനും കടുത്തുരുത്തിക്കും പോകാം. പെരുവയില്‍നിന്ന് പിറവത്തേക്കുള്ള വഴി തകര്‍ച്ചയിലായിട്ടു കാലങ്ങളായി. പെരുവ-പിറവം റോഡ് നന്നാക്കാന്‍ തുടങ്ങിയിട്ടും അത്രതന്നെകാലങ്ങളായി. തകര്‍ന്ന റോഡിലെ കുഴിയിലൂടെയും പാതിനിര്‍മിച്ച ഭാഗങ്ങളിലൂടെയുമുള്ള അപകടയാത്രയാണ് നികുതിദായകരായ ജനങ്ങളിപ്പോഴും നടത്തുന്നതെന്നുമാത്രം. കവല കഴിഞ്ഞുള്ള ഒന്നരക്കിലോമീറ്റര്‍ ദൂരമാണ് വര്‍ഷങ്ങളായി തകര്‍ന്നു കിടക്കുന്നത്. പെരുവ-പിറവം റോഡ് പെരുവ മുതല്‍ വടുകുന്നപ്പുഴ ശിവന്‍പടിവരെയുള്ള ഭാഗം റോഡ് പൂര്‍ണമായും തകര്‍ന്നു കിടക്കുകയാണ്. പെരുവയിലെ രണ്ടു പ്രധാനപ്പെട്ട ഗവണ്‍മെന്‍റ് സ്‌കൂളുകളിലേക്ക് വിദ്യാര്‍ഥികള്‍ പോകുന്ന വഴിയാണ് നടന്നുപോലും പോകാന്‍ പറ്റാത്തവിധം തകര്‍ന്നു കിടക്കുന്നത്. നിരവധി തവണ അധികൃതരെ സമീപിച്ചെങ്കിലും തിരിഞ്ഞു നോക്കിയില്ലെന്ന് വിദ്യാര്‍ഥികളും അധ്യാപകരും നാട്ടുകാരും പറയുന്നു. സ്‌കൂള്‍ തുറക്കുന്നതിനു മുമ്പ് ബോയ്സ് സ്‌കൂളിന് മുന്‍വശം ജനപ്രതിനിധികളുടെ നേതൃത്വത്തില്‍ മണ്ണിട്ട് നികത്തിയെങ്കിലും അത് വീണ്ടും കുഴിയായി മാറിയിരിക്കുകയാണ്. ദിവസവും ബസുകളും സ്‌കൂള്‍ വാഹനങ്ങളും ഉൾപ്പെടെ നൂറു കണക്കിനു വാഹനങ്ങൾ സഞ്ചരിക്കുന്ന വഴിയില്‍ ഇരുചക്രവാഹനങ്ങള്‍ അപകടത്തില്‍പ്പെടുന്നത് നിത്യസംഭവമാണ്. ഗേള്‍സ് സ്‌കൂളിന് മുന്‍വശമുള്ള കുഴികളിൽ വാഹനങ്ങള്‍ വന്നുവീഴുന്നത് കാണുമ്പോള്‍ നെഞ്ചത്ത് കൈ വച്ചുപോകും. ശിവന്‍പടി മുതല്‍ മുതിരക്കാല വളവിനു സമീപംവരെ റോഡ് ഉയര്‍ത്തി കോണ്‍ക്രീറ്റ് ചെയ്തിട്ടുണ്ടെങ്കിലും ഇരുവശവും മണ്ണിട്ട് ഉയര്‍ത്താത്തത് അപകടഭീഷണിയാകുന്നു. മുതിരക്കാല വളവ് മുതല്‍ മുളക്കുളം അമ്പലപ്പടിവരെയുള്ള ഭാഗവും തകര്‍ന്ന നിലയിലാണ്. റീബില്‍ഡ് കേരള പദ്ധതി റോഡ് നിര്‍മാണം പെരുവ മുതല്‍ എറണാകുളം ജില്ലയിലെ പെരുവംമൂഴി വരെയുള്ള 21 കിലോമീറ്റര്‍ റോഡ് റീബില്‍ഡ് കേരള പദ്ധതിയില്‍ ഉള്‍പ്പെടുത്തി നിര്‍മാണം നടന്നുവരികയായിരുന്നു. 2021 ജൂലൈയിലാണ് നിര്‍മാണം തുടങ്ങയത്. 2023 ജൂലൈയില്‍ തീരേണ്ടതായിരുന്നു റോഡ് നിര്‍മാണം. 2023 ഡിസംബര്‍വരെ കാലാവധി നീട്ടി നല്‍കിയെങ്കിലും നിര്‍മാണം പൂര്‍ത്തിയായില്ല. ഈ പദ്ധതിവഴി നന്നാക്കാന്‍ ഉള്‍പ്പെടുത്തിയിരുന്ന കോട്ടയം ജില്ലയിലെ സ്ഥലങ്ങളാണ് തകര്‍ന്നത്. 97 കോടിയുടെ പദ്ധതിയായിരുന്നു. കെഎസ്ടിപി മൂവാറ്റുപുഴ ഡിവിഷനായിരുന്നു നിര്‍മാണച്ചുമതല. ആദ്യഘട്ടം നിര്‍മാണം നടത്തിയ കരാര്‍ കമ്പനി പാതിവഴിയില്‍ നിര്‍മാണം ഉപേക്ഷിച്ചുപോയതോടെ റോഡും തകര്‍ന്നു കിടക്കുകയാണ്. എത്രയും വേഗം ഈ റോഡിലെ അറ്റകുറ്റപ്പണിയെങ്കിലും നടത്തി റോഡ് സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം. ഹൈക്കോടതി ഇടപെടല്‍ കരാര്‍ കാലാവധി അവസാനിച്ച പെരുവ-പിറവം-പെരുവംമുഴി റോഡിന്‍റെ പണികള്‍ പുര്‍ത്തിയാക്കണമെന്നും തകര്‍ന്നു കിടക്കുന്ന പെരുവ -പിറവം റോഡിന്‍റെ അറ്റകുറ്റപ്പണികള്‍ ഉടന്‍ നടത്തണമെന്നുമാവശ്യപ്പെട്ട് അഭിഭാഷകനായ മുളക്കുളം സ്വദേശി അഡ്വ. എന്‍.പി. സേതു ഹൈക്കോടതിയില്‍ റിട്ട് ഹര്‍ജി സമര്‍പ്പിച്ചു. ഹര്‍ജി പരിഗണിച്ച കോടതി എതിര്‍കക്ഷികളായ പൊതുമരാമത്ത് വകുപ്പ്, കെഎസ്ടിപി എന്നിവര്‍ക്ക് നോട്ടീസയച്ചു. കാലാവധി കഴിഞ്ഞിട്ടും പുര്‍ത്തിയാക്കാത്ത അനാസ്ഥയുടെ കാരണം കാണിച്ച് രണ്ടാഴ്ചയ്ക്കകം റിപ്പോര്‍ട്ട് നല്‍കാന്‍ ഹൈക്കോടതി നിര്‍ദേശം നല്‍കിയിരിക്കുകയാണ്. ജസ്റ്റീസ് എന്‍. നഗരേഷിന്‍റെ ബെഞ്ചിലാണ് കേസ് പരിഗണിച്ചത്. കേസില്‍ ഹര്‍ജിക്കാരനുവേണ്ടി അഡ്വ. ജോര്‍ജ് സെബാസ്റ്റ്യന്‍ ഹാജരായി.

ആം ആദ്മി പാർട്ടി ജനകീയ ഉപരോധസമരം നടത്തി

അതിരമ്പുഴ: മുണ്ടുവേലിപ്പടി-വേദഗിരി-കുറുമള്ളൂർ റോഡ് സഞ്ചാര യോഗ്യമാക്കണമെന്നാവശ്യപ്പെട്ട് ആം ആദ്മി പാർട്ടി ജനകീയ ഉപരോധസമരം നടത്തി. നാലു വർഷമായി റോഡ് തകർന്നുകിടക്കുകയാണ്. തോമസ് ചാഴികാടൻ എംപിയായിരുന്നപ്പോൾ പ്രധാനമന്ത്രി ഗ്രാമീണ സധക് യോജന പദ്ധതി പ്രകാരം ഫണ്ട് അനുവദിച്ചെങ്കിലും സാങ്കേതിക കാരണങ്ങളാൽ റോഡ് നിർമാണം സ്തംഭിക്കുകയായിരുന്നു. ആം ആദ്മി പാർട്ടി തദ്ദേശവാസികളിൽനിന്ന് ഒപ്പുശേഖരിച്ച് സ്ഥലം എംഎൽഎയും മന്ത്രിയുമായ വി.എൻ. വാസവന് നിവേദനം സമർപ്പിച്ചു. എന്നിട്ടും നടപടികളൊന്നും ഉണ്ടാകാത്ത സാഹചര്യത്തിലാണ് ഉപരോധസമരം നടത്തിയത്. റോഡ് നന്നാക്കാനുള്ള നടപടികൾ ആരംഭിച്ചില്ലെങ്കിൽ നിരാഹാരം ഉൾപ്പെടെയുള്ള സമരപരിപാടികളിലേക്ക് ആം ആദ്മി പാർട്ടി നീങ്ങുമെന്ന് ഭാരവാഹികൾ മുന്നറിയിപ്പ് നൽകി. ആം ആദ്മി പാർട്ടി നിയോജക മണ്ഡലം പ്രസിഡന്‍റ് അഭിലാഷ് കുര്യൻ സമരം ഉദ്ഘാടനം ചെയ്തു. അതിരമ്പുഴ പഞ്ചായത്ത് കമ്മിറ്റി പ്രസിഡന്‍റ് ജോയി ചാക്കോ അധ്യക്ഷത വഹിച്ചു. ജില്ലാ ട്രഷറർ കെ.സി. സണ്ണി, നിയോജക മണ്ഡലം സെക്രട്ടറി സജി ഇരുപ്പുമല, ത്രേസ്യാമ്മ അലക്സ്, മിനി ബെന്നി, അതിരമ്പുഴ പഞ്ചായത്ത് അംഗം ജോജോ ആട്ടയിൽ തുടങ്ങിയവർ പ്രസംഗിച്ചു.

ലയണ്‍സ് ക്ലബ്: ഭാരവാഹികളെ തെരഞ്ഞെടുത്തു

ചിങ്ങവനം: ചിങ്ങവനം ലയണ്‍സ് ക്ലബ് ഭാരവാഹികളുടെ സ്ഥാനാരോഹണം ഡിസ്ട്രിക്ട് ഗവര്‍ണര്‍ ജോര്‍ജ് ചെറിയാന്‍ നിര്‍വഹിച്ചു. പ്രസിഡന്‍റായി തമ്പി തോമസ്, സെക്രട്ടറിയായി ബജി കെ. വര്‍ഗീസ്, അഡ്മിനിസ്‌ട്രേറ്ററായി ജോണ്‍ മാത്യു, ട്രഷററായി എന്‍. മത്തായിക്കുട്ടി എന്നിവരാണ് തെരഞ്ഞെടുക്കപ്പെട്ടത്. കെ.കെ. കുരുവിള, ബിനോയി കുര്യന്‍, പ്രീതാകുമാരി, സാബു തോട്ടുങ്കല്‍, മാത്യു സെബാസ്റ്റ്യന്‍ എന്നിവര്‍ പ്രസംഗിച്ചു.

മികച്ച ബാങ്കിനുള്ള സംസ്ഥാന പുരസ്‌കാരം പാമ്പാടി സഹകരണ ബാങ്കിന്

പാമ്പാടി: മികച്ച സഹകരണ ബാങ്കിനുള്ള സംസ്ഥാന പുരസ്‌കാരം പാമ്പാടി സർവീസ് സഹകരണ ബാങ്കിന് ലഭിച്ചു. ഒരു ലക്ഷം രൂപയും പ്രശസ്‌തിപത്രവും ശില്പവും അടങ്ങുന്നതാണ് പുരസ്‌കാരം. സംസ്ഥാനത്തെ 1634 പ്രാഥമിക കാർഷിക സഹകരണ സംഘങ്ങളിൽനിന്നാണ് നേട്ടം. രാജ്യാന്തര സഹകരണ ദിനത്തിൽ ബാങ്ക് പ്രസിഡന്‍റ് വി.എം. പ്രദീപ്, സെക്രട്ടറി കെ.എസ്. അമ്പിളി എന്നിവർ മന്ത്രി വി.എൻ.വാസവനിൽനിന്ന് അവാർഡ് സ്വീകരിച്ചു. 1924 ഡിസംബർ 13നാണ് പാമ്പാടി സഹകരണ ബാങ്ക് റജിസ്‌റ്റർ ചെയ്‌തത്. ആദ്യം പരസ്‌പര സഹായ സ്ഥാപനമായി 76 അംഗങ്ങളും 118 രൂപ മുലധനവുമായിട്ടാണ് ആരംഭം. കുരിക്കാട് കെ.ഇ. മാത്യുവാണ് ആദ്യ പ്രസിഡന്‍റ്. ഒരു പ്രൈമറി സ്‌കൂൾ ഏറ്റെടുത്തു. 1945ന് ശേഷം അത്യാവശ്യ ഭക്ഷ്യസാധനങ്ങൾ സംഘത്തിലൂടെ വിതരണം ചെയ്തു. തുടർന്ന് മൂന്നു റേഷൻ കടകൾ ഏറ്റെടുത്തുനടത്തി. 1974ൽ സൗത്ത്പാമ്പാടിയിൽ കേന്ദ്ര ഓഫിസും പിന്നീട് പാമ്പാടി ബ്രാഞ്ച്, പാമ്പാടി പ്രഭാത -സായാഹ്‌ന ബ്രാഞ്ച്, ഓർവയൽ ബ്രാഞ്ച്, കങ്ങഴ ബ്രാഞ്ച് എന്നിവ തുടങ്ങി. 24,000 അംഗങ്ങളുള്ള ബാങ്കിനു കീഴിൽ അഞ്ചു വളം ഡിപ്പോകൾ, മൂന്നു നീതി ‌സ്റ്റോറുകൾ, സബ്‌സിഡി നിരക്കിൽ മരുന്നുകൾ നൽകുന്ന മെഡിക്കൽ ഷോപ്, ജനസേവന കേന്ദ്രം. മാർജിൻ ഫ്രീ ഷോപ്, കാർഷിക വിപണന കേന്ദ്രം, പച്ചക്കറി റെഡി ടു കുക്ക് എന്നിവയുണ്ട്. 17 വർഷമായി 20 ശതമാനം ലാഭവീതം വിതരണം ചെയ്യുന്ന ബാങ്ക് കൂടിയാണിത്.

യുഡിഎഫ് എംഎല്‍എമാര്‍ അസത്യപ്രചാരണങ്ങള്‍ നടത്തുന്നുവെന്ന്

കോട്ടയം: ആരോഗ്യമന്ത്രിക്കെതിരേയും കോട്ടയം മെഡിക്കല്‍ കോളജിനെതിരേയും യുഡിഎഫ് എംഎല്‍എമാര്‍ അസത്യപ്രചാരണങ്ങള്‍ നടത്തുകയാണെന്ന് സിപിഎം. ആരോഗ്യമന്ത്രിയുടെ രക്തം വിഷം നിറഞ്ഞതാണെന്നും അതു കുത്തിവച്ചാല്‍ ആളുകള്‍ മരിക്കുമെന്നുംവരെയാണ് തിരുവഞ്ചൂര്‍ രാധാകൃഷ്ണന്‍ എംഎല്‍എ പറഞ്ഞതെന്ന് സിപിഎം സംസ്ഥാന കമ്മിറ്റിയംഗം കെ. അനില്‍കുമാര്‍ ആരോപിച്ചു. കോട്ടയം നഗരസഭയുടെ കെട്ടിടത്തില്‍നിന്ന് സ്ലാബ് ഇടിഞ്ഞുവീണ് ഒരാള്‍ മരിച്ചിരുന്നു. സംഭവത്തില്‍ പായിപ്പാട് സ്വദേശിയായ ആ മനുഷ്യനെ ഒന്നു കാണാന്‍ എംഎല്‍എയും നഗരസഭാ അധികൃതരും തയാറായില്ല, ധനസഹായം നല്‍കുകയും ചെയ്തില്ല. ഇതു യുഡിഎഫിന്‍റെ ഇരട്ടത്താപ്പാണ്. യുഡിഎഫ് ഭരണകാലത്ത് കോട്ടയം മെഡിക്കല്‍ കോളജില്‍ ലിഫ്റ്റ് പൊട്ടിവീണു കോട്ടയം സ്വദേശിയായ രോഗി മരിച്ചു. ഒരു സഹായവും ഉമ്മന്‍ ചാണ്ടി സര്‍ക്കാര്‍ ചെയ്തില്ല. അന്ന് ആരോഗ്യമന്ത്രിയും മുഖ്യമന്ത്രിയുംരാജിവച്ചില്ല. 2013-ല്‍ മെഡിക്കല്‍ കോളജിലെ 14-ാം വാര്‍ഡ് കോംപ്ലക്‌സ് അണ്‍ഫിറ്റാണെന്നു പറഞ്ഞ് യുഡിഎഫ് സര്‍ക്കാരിനു റിപ്പോര്‍ട്ട് കിട്ടിയിട്ട് സര്‍ക്കാര്‍ അനങ്ങിയില്ല. എല്‍ഡിഎഫ് സര്‍ക്കാര്‍ വന്നതിനുശേഷമാണു പുതിയ ശുചിമുറി നിര്‍മിച്ചത്. കേരളത്തിലെ മെഡിക്കല്‍ കോളജ് സംവിധാനത്തെ സംരക്ഷിക്കേണ്ടതുണ്ട്. അതിന് എല്‍ഡിഎഫ് നേതൃത്വം നല്‍കുമെന്നും അനില്‍കുമാര്‍ പത്രസമ്മേളനത്തില്‍ പറഞ്ഞു.

ഡോ. വര്‍ഗീസ് ജേക്കബ് ചുമതലയേറ്റു

കോട്ടയം: കോട്ടയം ഗവ. കോളജ് പ്രിന്‍സിപ്പലായും കോളജ് വിദ്യാഭ്യാസ വകുപ്പ് കോട്ടയം മേഖല ഉപമേധാവിയായും ഡോ. വര്‍ഗീസ് ജേക്കബ് ചുമതലയേറ്റു. പത്തനംതിട്ട ചെന്നീര്‍ക്കര സ്വദേശിയാണ് ഡോ. വര്‍ഗീസ് ജേക്കബ്. 1996-ല്‍ കോഴിക്കോട് ദേവഗിരി സെന്‍റ് ജോസഫ് കോളജില്‍ ഗണിതശാസ്ത്ര വിഭാഗം ലക്ചററായി ഔദ്യോഗികജീവിതം ആരംഭിച്ച അദ്ദേഹം വെണ്ണിക്കുളം ഗവ. പോളിടെക്‌നിക് ഗവ. കോളജ്, കോട്ടയം ഗവ. കോളജ് എന്നിവിടങ്ങളില്‍ അധ്യാപകനായും വകുപ്പ് മേധാവിയായും സേവനം ചെയ്തു. തിരുവല്ല ഇരവിപേരൂര്‍ സെന്‍റ് ജോണ്‍സ് ഹയര്‍ സെക്കന്‍ഡറി സ്‌കൂള്‍ അധ്യാപിക ശോഭ മേരി വര്‍ക്കിയാണ് ഭാര്യ. മക്കള്‍ സാന്‍ജോ വര്‍ഗീസ് എറണാകുളത്ത് ഐടി മേഖലയില്‍ ഉദ്യോഗസ്ഥനാണ്. സനയ് വര്‍ഗീസ് രാജഗിരി കോളജില്‍ രണ്ടാംവര്‍ഷ എന്‍ജിനിയറിംഗ് വിദ്യാര്‍ഥിയാണ്.

കോൺഗ്രസ് പന്തംകൊളുത്തി പ്രകടനം നടത്തി

അതിരമ്പുഴ: കോട്ടയം മെഡിക്കൽ കോളജ് ആശുപത്രിയിൽ കെട്ടിടം ഇടിഞ്ഞുവീണു മരിച്ച ബിന്ദുവിന്‍റെ മരണത്തിനുത്തരവാദികളായ മന്ത്രിമാരായ വി.എൻ. വാസവനും വീണാ ജോർജും രാജിവയ്ക്കണമെന്നാവശ്യപ്പെട്ട് കോൺഗ്രസ് അതിരമ്പുഴ മണ്ഡലം കമ്മിറ്റി പ്രതിഷേധയോഗവും പന്തംകൊളുത്തി പ്രകടനവും നടത്തി. മണ്ഡലം പ്രസിഡന്‍റ് ജൂബി ഐക്കരക്കുഴി അധ്യക്ഷത വഹിച്ച പ്രതിഷേധ യോഗം ബ്ലോക്ക് പ്രസിഡന്‍റ് ജോറോയ് പൊന്നാറ്റിൽ ഉദ്ഘാടനം ചെയ്തു. പി.വി. മൈക്കിൾ, ടോം പണ്ടാരക്കുളം, ജോയ് വേങ്ങച്ചുവട്ടിൽ, ഹരിപ്രകാശ് മാന്നാനം, ജോസഫ് എട്ടുകാട്ടിൽ, എൻ.എൻ. ശ്രീനിവാസൻ, ബിജു വലിയമല, ബി. മോഹനചന്ദ്രൻ, ഉലഹന്നാൻ വർഗീസ്, ഷാജു ഉദിച്ചമുകളേൽ, ടോമി മണ്ഡപത്തിൽ, സനൽ കാട്ടാത്തി, മത്തായി കല്ലുവെട്ടാൻകുഴി, ദിലീപ് തിരുമുറ്റത്ത്, ഗോപൻ തൃക്കേല്‍, ജോർജ് പുളിങ്ങാപള്ളി എന്നിവർ പ്രസംഗിച്ചു.

ക്ഷീരസമൃദ്ധിയിലേക്ക് പാമ്പാടി ബ്ലോക്ക് പഞ്ചായത്ത് : ക്ഷീരവര്‍ധിനി റിവോള്‍വിംഗ് ഫണ്ട് പദ്ധതിയുടെ ഉദ്ഘാടനം നാളെ

പാമ്പാടി: ക്ഷീര കാര്‍ഷികരംഗത്ത് പുതിയൊരു അധ്യായം കുറിച്ച് പാമ്പാടി ബ്ലോക്ക് പഞ്ചായത്ത്. ക്ഷീരോത്‍പാദന മേഖലയെ ശക്തിപ്പെടുത്താനും കര്‍ഷകര്‍ക്കു സാമ്പത്തിക പിന്തുണ ഉറപ്പാക്കുക എന്ന ലക്ഷ്യത്തോടെയുള്ള ക്ഷീരവര്‍ധിനി റിവോള്‍വിംഗ് ഫണ്ട് പദ്ധതിക്ക് തുടക്കമാവുന്നു. പാമ്പാടി ബ്ലോക്ക് പഞ്ചായത്തിന്‍റെ 2025-26 വാര്‍ഷിക പദ്ധതിയില്‍ ഉള്‍പ്പെടുത്തി 28 ലക്ഷം രൂപ വിനിയോഗിച്ചാണ് പദ്ധതി നടപ്പാക്കുന്നത്. ബ്ലോക്കിന്‍റെ പരിധിയില്‍ വരുന്ന 27 ക്ഷീരസംഘങ്ങളില്‍നിന്ന് തെരഞ്ഞെടുത്ത 14 സംഘങ്ങളാണ് പദ്ധതിയുടെ ഗുണഭോക്താക്കള്‍. തെരഞ്ഞെടുക്കപ്പെട്ട ക്ഷീരസഹകരണ സംഘങ്ങള്‍ക്ക് രണ്ടുലക്ഷം രൂപ വീതം നല്‍കുകയും ലഭിച്ച തുക സംഘത്തിലുള്ള അഞ്ച് ക്ഷീരകര്‍ഷകര്‍ക്ക് പശുവിനെ വാങ്ങുന്നതിനായി പലിശരഹിത വായ്പയായി 40,000 രൂപ വീതം വിതരണം ചെയ്യുകയുമാണ് പദ്ധതിയുടെ ലക്ഷ്യമെന്ന് ഡയറി എക്സ്റ്റന്‍ഷന്‍ ഓഫീസര്‍ എം.വി. കണ്ണന്‍ പറഞ്ഞു. പാല്‍ വിറ്റുകിട്ടുന്ന തുകയില്‍നിന്ന് 40,000 രൂപ കര്‍ഷകന് ക്ഷീരസംഘത്തിന് തിരിച്ചടച്ച് ആ തുക ആറാമത്തെ ക്ഷീരകര്‍ഷകന് കൊടുക്കുന്നതിലൂടെ റിവോള്‍വിംഗ് ഫണ്ട് സംഘത്തിലുള്ള ക്ഷീരകര്‍ഷകര്‍ക്കെല്ലാം ഗുണം ചെയ്യുന്നു. പദ്ധതിയുടെ പ്രാരംഭഘട്ടത്തില്‍ 14 ക്ഷീരസംഘങ്ങളിലുമായി 70ഓളം പശുക്കളെ വാങ്ങാനാവും എന്ന് അദ്ദേഹം വ്യക്തമാക്കി. പുതിയ ക്ഷീരകര്‍ഷകരെ പ്രോത്സാഹിപ്പിക്കാനും നിലവിലുള്ള ക്ഷീര കര്‍ഷകര്‍ക്ക് കൈത്താങ്ങാവാനും ക്ഷീരവര്‍ധനി പദ്ധതിക്കാവും എന്ന് ളാക്കാട്ടൂര്‍ ക്ഷീരസംഘം പ്രസിഡന്‍റ് ജോയ്മോന്‍ വാക്കയില്‍ പറഞ്ഞു. പദ്ധതിയുടെ ഉദ്ഘാടനം നാളെ രാവിലെ 10.30ന് പാമ്പാടി ബ്ലോക്ക് പഞ്ചായത്ത് അധ്യക്ഷ ബെറ്റി റോയ് മണിയങ്ങാട്ട് നിര്‍വഹിക്കും. ബ്ലോക്ക് പഞ്ചായത്ത് വൈസ് പ്രസിഡന്‍റ് പ്രഫ. എം.കെ. രാധാകൃഷ്ണന്‍ അധ്യക്ഷത വഹിക്കും.

കെഎസ്ആര്‍ടിസി ബസ് ഓട്ടോറിക്ഷയിലിടിച്ച് ഓട്ടോറിക്ഷാ ഡ്രൈവര്‍ക്കു ഗുരുതര പരിക്ക്

കോട്ടയം: എംസി റോഡില്‍ എസ്എച്ച് മൗണ്ട് മംഗളം ജംഗ്ഷനില്‍ കെഎസ്ആര്‍ടിസി ബസ് ഓട്ടോറിക്ഷയില്‍ ഇടിച്ച് ഓട്ടോറിക്ഷാ ഡ്രൈവര്‍ക്കു ഗുരുതര പരിക്ക്. നഗരത്തിലെ ഓട്ടോറിക്ഷാ ഡ്രൈവറായ മള്ളൂശേരി വലച്ചിറ രാജേഷിനാണ് (42) പരിക്കേറ്റത്. ഇന്നലെ ഉച്ചകഴിഞ്ഞ് 2.30നാണ് സംഭവം. തൃശൂരില്‍നിന്നു കോട്ടയത്തേക്കു വരികയായിരുന്ന കെഎസ്ആര്‍ടിസി ബസ്, വട്ടമൂട് ഭാഗത്തുനിന്നു വന്ന ഓട്ടോറിക്ഷയില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ഓട്ടോറിക്ഷയുടെ മുന്‍ഭാഗം പൂര്‍ണമായി തകര്‍ന്നു. പുറകിലേക്കു മറിഞ്ഞു വീണ ഓട്ടോറിക്ഷാ ഡ്രൈവര്‍ക്കു സാരമായി പരിക്കേറ്റു. ഓടിക്കൂടിയ നാട്ടുകാരും കെഎസ്ആര്‍ടിസി ജീവനക്കാരും ചേര്‍ന്ന് ഇയാളെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഗാന്ധിനഗര്‍ പോലീസ് മേല്‍നടപടികള്‍ സ്വീകരിച്ചു. മോട്ടോര്‍ വാഹന വകുപ്പ് അധികൃതരും സ്ഥലത്തെത്തിയിരുന്നു.

നീര്‍നായശല്യം: ആറ്റിലും തോട്ടിലും ഇറങ്ങാന്‍ പേടിച്ച് ജനങ്ങള്‍

നീര്‍നായശല്യം രൂക്ഷം; കുളിക്കാനി‍റങ്ങിയയാൾക്ക് കടിയേറ്റു കോട്ടയം: ജില്ലയുടെ വിവിധ പ്രദേശങ്ങളിലെ തോടുകളിലും ആറുകളിലും നീര്‍നായകളുടെ ശല്യം രൂക്ഷമായി. മീനച്ചിലാറ്റിലും ഇടത്തോടുകളിലുമാണ് വലിയതോതില്‍ ശല്യം വര്‍ധിച്ചിരിക്കുന്നത്. ആറിന്‍റെ തീരത്ത് താമസിക്കുന്നവര്‍ ഭീതിയോടെയാണു കഴിയുന്നത്. വിജയപുരം, കുമരകം, അയ്മനം, ആര്‍പ്പൂക്കര, തിരുവാര്‍പ്പ്, കോട്ടയം, താഴത്തങ്ങാടി മേഖലകളിലാണ് നീര്‍നായ ശല്യം രൂക്ഷമായുള്ളത്. കഴിഞ്ഞ ദിവസം നീര്‍നായ കടിച്ചു കുത്തിവയ്പ് എടുത്തതിനുശേഷം വീട്ടിലെത്തിയ വേളൂര്‍ സ്വദേശിയായ വീട്ടമ്മ ഹൃദയാഘാതം മൂലം മരണപ്പെട്ടിരുന്നു.ഇവരുടെ ബന്ധുവായ മറ്റൊരാളെയും പാണംപടി കടവില്‍വച്ചു നീര്‍നായ കടിച്ചിരുന്നു. ആറ്റില്‍ കുളികഴിഞ്ഞു തലതോര്‍ത്തുമ്പോഴാണ് പുറകില്‍നിന്നു നീര്‍നായയുടെ കടിയേറ്റത്. തുടര്‍ന്നു കോട്ടയം മെഡിക്കല്‍ കോളജിലെത്തി കുത്തിവയ്‌പെടുത്തു മടങ്ങുകയായിരുന്നു. ആറുകളുടെയും കായലുകളുടെയും സമീപം താമസിക്കുന്നവര്‍ വെള്ളത്തില്‍ ഇറങ്ങാന്‍ ഭയപ്പെടുകയാണ്. തുണി അലക്കാനും പാത്രങ്ങള്‍ കഴുകാനും വെള്ളത്തില്‍ ഇറങ്ങാന്‍ കഴിയാത്ത സ്ഥിതിയാണ്. ലക്ഷങ്ങള്‍ മുടക്കി മീന്‍വളര്‍ത്തലില്‍ ഏര്‍പ്പെട്ട കര്‍ഷകരും നീര്‍നായ ശല്യം മൂലം പൊറുതിമുട്ടുകയാണ്. കൂട്ടമായെത്തുന്ന ഇവ കുളങ്ങളിലെ മീനുകളെ ഭക്ഷണമാക്കും. കുളങ്ങള്‍ക്ക് ചുറ്റും കട്ടികൂടിയ വലകള്‍ ഉപയോഗിച്ച് സുരക്ഷ ഒരുക്കിയിട്ടും ഇവയുടെ ശല്യത്തില്‍നിന്നു രക്ഷപ്പെടാന്‍ സാധിക്കുന്നില്ലെന്ന് കര്‍ഷകര്‍ പരാതിപ്പെടുന്നു. മുന്‍വര്‍ഷങ്ങളില്‍ ചില സ്ഥലങ്ങളില്‍ മാത്രം കണ്ടിരുന്ന നീര്‍നായകള്‍ ഇപ്പോള്‍ വ്യാപകമായിരിക്കുകയാണ്. തീരവാസികള്‍ വസ്ത്രങ്ങള്‍ കഴുകുന്നതിനും കുളിക്കാനും ആശ്രയിക്കുന്നത് തോടുകളെയാണ്. നീര്‍നായകള്‍ വെള്ളത്തിലൂടെ കൂട്ടമായി പോകുന്നത് പലപ്പോഴും കാണാം. മീനച്ചിലാറ്റില്‍ പൂവത്തുംമൂട് മുതല്‍ വട്ടമൂട് വരെയുള്ള പല ഭാഗങ്ങളിലും പാറമ്പുഴ ഡിപ്പോ കടവ് ഭാഗത്ത് ഉള്‍പ്പെടെ നീര്‍നായകളെ പതിവായി കാണാറുണ്ടെന്നു പ്രദേശവാസികള്‍ പറഞ്ഞു. ഇവയുടെ അക്രമം ഭയന്നു പലരും ഈ സമയത്ത് ആറുകളിലേക്ക് പോകാറില്ല. മാസങ്ങള്‍ക്ക് മുമ്പു തിരുവാര്‍പ്പ് മീന്‍ചിറ ഭാഗത്ത് തോട്ടില്‍ കുളിക്കാനിറങ്ങിയ ആളെയും നീര്‍നായ കടിച്ചു പരിക്കേല്‍പ്പിച്ചിരുന്നു. കടവില്‍ വസ്ത്രം അലക്കുകയായിരുന്ന വീട്ടമ്മയെയും നീര്‍നായ കടിച്ചിരുന്നു. നട്ടാശേരിക്കുസമീപവും വീട്ടമ്മയെ നീര്‍നായ ആക്രമിച്ചിരുന്നു. നീര്‍നായയെ ക്ഷുദ്രജീവിയായി പ്രഖ്യാപിക്കണമെന്ന് കോട്ടയം: തീരപ്രദേശത്ത് താമസിക്കുന്നവര്‍ക്കും മീന്‍വളര്‍ത്തലില്‍ എര്‍പ്പെട്ടിരിക്കുന്ന കര്‍ഷകര്‍ക്കും നീര്‍നായ കടുത്ത ഭീഷണിയായി മാറിയ സാഹചര്യത്തില്‍ ഇവയെ ക്ഷുദ്രജീവിയായി പ്രഖ്യാപിക്കാന്‍ നടപടി സ്വീകരിക്കണമെന്ന് കര്‍ഷക കോണ്‍ഗ്രസ് ജില്ലാ ജനറല്‍ സെക്രട്ടറി എബി ഐപ്പ് ആവശൃപ്പെട്ടു. അടിയന്തരമായി ബന്ധപ്പെട്ടവര്‍ ഇടപെട്ട് നീര്‍നായകളുടെ ശല്യത്തിനു ശാശ്വത പരിഹാരം കാണണമെന്ന ആവശ്യം ശക്തമായിരിക്കുകയാണ്.

പാലായില്‍ മൊബൈല്‍ വെറ്ററിനറി സര്‍ജറി യൂണിറ്റ് ആരംഭിച്ചു

പാലാ: വെറ്ററിനറി ഹോസ്പിറ്റലില്‍ മൊബൈല്‍ സര്‍ജറി യൂണിറ്റ് ആരംഭിച്ചു. ജില്ലയില്‍ പ്രവര്‍ത്തിക്കുന്ന മൊബൈല്‍ സര്‍ജറി യൂണിറ്റിന്‍റെ ആദ്യ പ്രവര്‍ത്തന കേന്ദ്രമായാണ് പാലാ വെറ്ററിനറി പോളി ക്ലിനിക്കിനെ തെരഞ്ഞെടുത്തത്. സര്‍ജറി യൂണിറ്റിന്‍റെ ഉദ്ഘാടനം നഗരസഭാ ചെയര്‍മാന്‍ തോമസ് പീറ്റര്‍ നിര്‍വഹിച്ചു. വൈസ് ചെയര്‍പേഴ്‌സണ്‍ ബിജി ജോജോ, വികസന സ്റ്റാന്‍ഡിംഗ് കമ്മിറ്റി ചെയര്‍മാന്‍ സാവിയോ കാവുകാട്ട്, ജില്ലാ വെറ്ററിനറി ഓഫീസര്‍ ഡോ. മനോജ്, ഡോ. സുജ, ഡോ. ജോജി മാത്യു തുടങ്ങിയവര്‍ പ്രസംഗിച്ചു.

കാരുണ്യത്തിന്‍റെ കൈകളുമായി ചെമ്മലമറ്റം സ്കൂൾ വിദ്യാർഥികൾ

ചെമ്മലമറ്റം: സഹജീവികളോടുള്ള കാരുണ്യവും സ്നേഹവും പ്രകടമാക്കി ചെമ്മലമറ്റം ലിറ്റിൽ ഫ്ളവർ ഹൈസ്കൂൾ നടപ്പാക്കുന്ന കാരുണ്യ പദ്ധതിക്ക് തുടക്കമായി. എല്ലാ ചൊവ്വാഴ്ചകളിലും വിവിധ സ്ഥാപനങ്ങളിൽ ഭക്ഷണപ്പൊതികൾ വിതരണം ചെയ്താണ് വിദ്യാർഥികൾ കാരുണ്യ പ്രവർത്തനങ്ങളിൽ പങ്കാളികളാകുന്നത്. സ്കൂളിലെ വിദ്യാർഥികളും അധ്യാപകരും ഈ കാരുണ്യ പ്രവർത്തനത്തിൽ പങ്കാളികളാകും. ഹെഡ്മാസ്റ്റർ ജോബെറ്റ് തോമസ്, സിസ്റ്റർ ഡീനാ തോമസ്, ഷെറിൻ ബേബി തുടങ്ങിയവർ നേതൃത്വം നൽകും.

കുടുംബക്കൂട്ടായ്മാ ഭാരവാഹികൾ തീക്ഷ്ണതയോടെ പ്രവർത്തിക്കണം: മോൺ. ജോസഫ് തടത്തിൽ

കുറവിലങ്ങാട്: കുടുംബക്കൂട്ടായ്മാ ഭാരവാഹികൾ തീക്ഷ്ണതയോടെ പ്രവർത്തിക്കണമെന്ന് പാലാ രൂപത മുഖ്യവികാരി ജനറാൾ മോൺ. ജോസഫ് തടത്തിൽ. മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ കുടുംബക്കൂട്ടായ്മാ പ്രവർത്തനങ്ങളുടെ ഉദ്ഘാടനം - കെൻശ് ബയ്‌ത്തേ - നിർവഹിക്കുകയായിരുന്നു അദ്ദേഹം. ആർച്ച് പ്രീസ്റ്റ് റവ.ഡോ. തോമസ് മേനാച്ചേരി അധ്യക്ഷത വഹിച്ചു. ഇടവകയുടെ പുതുക്കിയ വെബ്‌സൈറ്റിന്‍റെ ഉദ്ഘാടനവും കുടുംബക്കൂട്ടായ്മാ ഗാനത്തിന്‍റെ അവതരണവും നടത്തി. കുടുംബക്കൂട്ടായ്മ പാലാ രൂപത ഡയറക്ടർ റവ. ഡോ. ജോസഫ് അരിമറ്റത്ത് ഇടവക കുടുംബക്കൂട്ടായ്മ കൈപ്പുസ്തകത്തിന്‍റെ പ്രകാശനം നിർവഹിച്ചു. രൂപത പ്രസിഡന്‍റ് സെബാസ്റ്റ്യൻ പയ്യാനിമണ്ഡപം, ഡയറക്ടർ ഫാ. പോൾ കുന്നുംപുറത്ത്, ഫാ. ജോസഫ് മണിയഞ്ചിറ, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമല, പാസ്റ്ററൽ അസിസ്റ്റന്‍റ് ഫാ. ജോസ് കോട്ടയിൽ, ജനറൽ ലീഡർ ബോബിച്ചൻ നിധീരി, കൂട്ടായ്മ മേഖലാ പ്രസിഡന്‍റ് ബിജു താന്നിക്കത്തറപ്പേൽ, സോൺ ലീഡർ ഷൈജു പാവുത്തിയേൽ, സെക്രട്ടറി ഷൈനി സാബു മഞ്ഞപ്പള്ളി എന്നിവർ പ്രസംഗിച്ചു.

കളരിയാമ്മാക്കല്‍ പാലത്തിന് വഴി തുറക്കുന്നു

പാലാ: മൂവാറ്റുപുഴ-പുനലൂര്‍ സംസ്ഥാന പാതയിൽ പാലാ-പൊന്‍കുന്നം റോഡിലെ പന്ത്രണ്ടാംമൈലിൽനിന്ന് ആരംഭിച്ച് പാലാ-പൂഞ്ഞാര്‍ റോഡിലെ ചെത്തിമറ്റത്ത് എത്തിച്ചേരുന്ന രണ്ടാംഘട്ട പാലാ റിംഗ് റോഡിന്‍റെ അവസാന ഭാഗത്തുള്ള കളരിയാമ്മാക്കല്‍ പാലത്തിന്‍റെ അപ്രോച്ച് റോഡിന് ആവശ്യമായ ഭൂമി ഏറ്റെടുക്കുന്നതിന് സാമൂഹിക ആഘാത പഠനത്തിനുള്ള നടപടികള്‍ ആരംഭിച്ചു. രാജഗിരി കോളജ് ഓഫ് സോഷ്യല്‍ സയന്‍സസാണ് സാമൂഹിക ആഘാത പഠനത്തിനു നേതൃത്വം നല്‍കുക. നടപടികളുടെ ഭാഗമായി പഠനം നടത്തുന്ന ഏജന്‍സിയുടെ പ്രതിനിധികളും പൊതുമരാമത്ത് നിരത്തുവിഭാഗം ഉദ്യോഗസ്ഥരും സ്ഥലം സന്ദര്‍ശിച്ച് ഭൂവുടമകളുമായി സംസാരിച്ചിരുന്നു. എട്ടു സര്‍വേ നമ്പറിലുള്ള അഞ്ചു വ്യക്തികളുടെ സ്ഥലമാണ് അപ്രോച്ച് റോഡ് നിര്‍മാണത്തിനായി ഏറ്റെടുക്കുക. എല്ലാ ഭൂമി ഉടമസ്ഥരെയും നേരില്‍ക്കണ്ട് ഹിയറിംഗിനുള്ള സമയവും സ്ഥലവും അറിയിക്കും. ഇതിനായി 15 ദിവസത്തെ നോട്ടീസാണ് നിയമാനുസരണം ലഭ്യമാകുക. അപ്രോച്ച് റോഡ് നിര്‍മാണത്തിനായി 13 കോടിയുടെ സര്‍ക്കാര്‍ ഭരണാനുമതി നേരത്തേ നല്‍കിയിരുന്നു. സമീപന പാതയ്ക്കു രണ്ടു പേരുടെ മാത്രം ഭൂമി മാത്രമേ ആവശ്യമുള്ളൂ എന്നുള്ള പ്രചാരണം തെറ്റാണെന്നും റിപ്പോര്‍ട്ട് സമര്‍പ്പിച്ചാലുടന്‍ റവന്യുവകുപ്പ് ഭൂമി ഏറ്റെടുക്കല്‍ വിജ്ഞാപനം പുറപ്പെടുവിക്കുമെന്നും ജോസ് കെ. മാണി അറിയിച്ചു. നിര്‍ദിഷ്ട അപ്രോച്ച് റോഡിന്‍റെ നീളം ഏകദേശം 200 മീറ്ററും വീതി 15 മീറ്ററുമാണ്. മീനച്ചിൽ മുന്‍ പഞ്ചായത്ത് പ്രസിഡന്‍റ് സാജോ പൂവത്താനി, മുന്‍ പഞ്ചായത്തംഗം സണ്ണി വെട്ടം, ജിനു വാട്ടപ്പള്ളി, ഷാജി വടക്കേതലയ്ക്കല്‍ എന്നിവര്‍ പഠനസംഘത്തോടൊപ്പം ഉണ്ടായിരുന്നു.

കാഞ്ഞിരപ്പള്ളി ഫൊറോന മാതൃവേദി മെസഞ്ചർ മീറ്റ്

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രലിൽ കാഞ്ഞിരപ്പള്ളി ഫൊറോന മാതൃവേദി മെസഞ്ചർ മീറ്റ് നടത്തി. കത്തീഡ്രൽ അസിസ്റ്റന്‍റ് വികാരി ഫാ. തോമസ് ആലപ്പാട്ടുകുന്നേൽ സമ്മേളനം ഉദ്ഘാടനം ചെയ്തു. ഫൊറോന ഡയറക്ടർ ഫാ. റെജി മാത്യു വയലുങ്കൽ അധ്യക്ഷത വഹിച്ചു . രൂപത ഡയറക്ടർ ഫാ. മാത്യു ഓലിക്കൽ പ്രവർത്തനങ്ങളെ വിലയിരുത്തി തുടർ പ്രവർത്തനങ്ങളുടെ ഒരു നേർചിത്രം ആമുഖ സന്ദേശത്തിലൂടെ നൽകി. രൂപത അനിമേറ്റർ സിസ്റ്റർ റോസ്മി എസ്എബിഎസ്, ബ്രദർ കെവിൻ, രൂപത പ്രസിഡന്‍റ് ജിജി പുളിയംകുന്നേൽ എന്നിവർ പ്രസംഗിച്ചു. രൂപത ഭാരവാഹികളും ഫൊറോനയിലെ എല്ലാ ഇടവകയിൽ നിന്നുമുള്ള ഭാരവാഹികളും അനിമേറ്റേഴ്സും സമ്മേളനത്തിൽ പങ്കെടുത്തു.

ചിറക്കടവ് പഞ്ചായത്തിൽ നടീൽ ഉത്സവം

പൊൻകുന്നം: ചിങ്ങമാസത്തിൽ വിഷരഹിത പച്ചക്കറി ലഭ്യമാക്കുക എന്ന ലക്ഷ്യത്തോടെ ചിറക്കടവ് പഞ്ചായത്തിൽ കുടുബശ്രീ മുഖാന്തരം നടപ്പാക്കുന്ന "ഒരു മുറം പച്ചക്കറി' പദ്ധതിയുടെ നടീൽ ഉത്സവം പഞ്ചായത്ത് പ്രസിഡന്‍റ് സി.ആർ. ശ്രീകുമാർ ഉദ്ഘാടനം ചെയ്തു. പഞ്ചായത്തംഗം സുമേഷ് ആൻഡ്രൂസ് അധ്യക്ഷത വഹിച്ചു. ആന്‍റണി മാർട്ടിൻ, സതി സുരേന്ദ്രൻ, കെ.എ. ഏബ്രഹാം, ഷാക്കി സജീവ്, ശ്രീലത സന്തോഷ്, അമ്പിളി ശിവദാസ്, ഉഷ പ്രകാശ്, അരുൺകുമാർ, ശാലിനി ബിപിൻ, സുൾഫി സീമ, ഇ.സി. ആശ എന്നിവർ പ്രസംഗിച്ചു. പി.വി. ശാന്തമ്മയുടെ ഒരേക്കർ സ്ഥലത്താണ് പച്ചക്കറി കൃഷി ചെയ്യുന്നത്.

ഷട്ടറുകൾ മോഷണം പോയി; പഞ്ചായത്ത് ഓഫീസ് ഉപരോധിച്ചു

പെരുവന്താനം: മണിക്കല്ലിലെ തിലകൻ സ്മാരക ലേക്ക് ആൻഡ് പാർക്കിന്‍റെ ഷട്ടറുകൾ മോഷണം പോയി. സംഭവത്തിൽ പഞ്ചായത്ത് ദിവസങ്ങൾക്ക് ശേഷമാണ് പോലീസിൽ പരാതി നൽകിയതെന്നും പരാതിയിൽ സംഭവത്തിന്‍റെ ഗൗരവം കാണിക്കാത്തതിനെത്തുടർന്ന് പോലീസ് അന്വേഷണം നടന്നില്ലെന്നും ആരോപിച്ച് എൽഡിഎഫ് അംഗങ്ങളുടെ നേതൃത്വത്തിൽ പഞ്ചായത്ത് ഓഫീസ് പടിക്കൽ ഉപരോധസമരം സംഘടിപ്പിച്ചു. പഞ്ചായത്തിൽ കഴിഞ്ഞ എൽഡിഎഫ് ഭരണകാലത്ത് നിർമിച്ചതാണ് മണിക്കല്ലിലെ തിലകൻ സ്മാരക ലേക്ക് ആൻഡ് പാർക്ക്. എന്നാൽ പിന്നീടുവന്ന യുഡിഎഫ് ഭരണസമിതിയുടെ കെടുകാര്യസ്ഥത മൂലം പദ്ധതി പൂർണമായും സ്തംഭിച്ച് പ്രവർത്തനം നിലച്ചതായി എൽഡിഎഫ് അംഗങ്ങൾ ആരോപിച്ചു. പദ്ധതിയുടെ ഭാഗമായി നിർമിച്ചിരുന്ന തടയണയിൽ വെള്ളം തടഞ്ഞു നിർത്താനായി അരലക്ഷത്തോളം രൂപ ചെലവഴിച്ച് ഷട്ടറുകൾ നിർമിച്ചിരുന്നു. ഇതാണ് മോഷണം പോയത്. പഞ്ചായത്തംഗങ്ങളായ എം.സി. സുരേഷ്, പ്രഭാവതി, ജാൻസി, സാലിക്കുട്ടി, സിപിഎം ഏലപ്പാറ ഏരിയാ കമ്മിറ്റി അംഗം ബേബി മാത്യു, ലോക്കൽ സെക്രട്ടറി എ. ബിജു, ഷാജി പി. ജോസഫ് എന്നിവർ പ്രസംഗിച്ചു.

നടപ്പാതകളിൽ കാട് കയറി; കാൽനടയാത്രക്കാർ ദുരിതത്തിൽ

എരുമേലി: റോഡുകളുടെ വശങ്ങളിൽ വളർന്ന പൊന്തക്കാടുകൾ വെട്ടി മാറ്റണമെങ്കിൽ ശബരിമല സീസണാകണം. എരുമേലിയിലെ സ്ഥിതിയാണിത്. ടൗണിൽ നടപ്പാതകളിൽ വരെ പൊന്തക്കാടുകൾ നിറഞ്ഞു. നവംബർ ആകുമ്പോഴാണ് ശബരിമല തീർഥാടന കാലം ആരംഭിക്കുക. അപ്പോഴാണ് മരാമത്ത് വകുപ്പ് റോഡിന്‍റെ വശങ്ങൾ തെളിക്കുക. ഇതിനുശേഷം കാട് തെളിക്കൽ അടുത്ത ശബരിമല സീസൺ എത്തുമ്പോഴാണ്. എരുമേലി ടൗണിൽ സർക്കാർ ആശുപത്രി, പോലീസ് സ്റ്റേഷൻ എന്നിവിടങ്ങളിലേക്ക് ക്ഷേത്രം ഭാഗത്തുള്ള റോഡിന്‍റെ വശത്തെ നടപ്പാതയിൽ കാടുകൾ നിറഞ്ഞ നിലയിലാണ്. കൊരട്ടി റോഡിൽ ഇരുവശങ്ങളിലും കാടുകൾ മൂലം കാൽനട യാത്രക്കാർ ബുദ്ധിമുട്ടുന്നു. കാഞ്ഞിരപ്പള്ളി-എരുമേലി റോഡിലും എരുമേലി-മുക്കൂട്ടുതറ-കണമല-പമ്പാവാലി റോഡിലും എരുമേലി-റാന്നി റോഡിലും കണമല-കോരുത്തോട് റോഡിലും മിക്കയിടങ്ങളിൽ റോഡിന്‍റെ വശങ്ങൾ പൊന്തക്കാടുകളും മുൾപ്പടർപ്പുകളും നിറഞ്ഞിരിക്കുകയാണ്. പാമ്പ്‌ ഉൾപ്പെടെ ഇഴജന്തുക്കളുടെ ശല്യവുമുണ്ട്. അപകടങ്ങൾ ഒഴിവാക്കാൻ കാട് തെളിക്കൽ ജോലികൾ അടിയന്തരമായി നടത്തണമെന്ന ആവശ്യമുയർന്നു.

പ്രതിഷേധ മാർച്ചും ധർണയും നടത്തി

മുണ്ടക്കയം: ആരോഗ്യ മേഖലയോടുള്ള സംസ്ഥാന സർക്കാരിന്‍റെ അനാസ്ഥയ്ക്കെതിരേയും കോട്ടയം മെഡിക്കൽ കോളജ് ദുരന്തത്തിന് ഉത്തരവാദികളായ മന്ത്രി വീണാ ജോർജും മന്ത്രി വി.എൻ. വാസവനും രാജിവയ്ക്കണമെന്നാവശ്യപ്പെട്ടും കോൺഗ്രസ് മുണ്ടക്കയം ബ്ലോക്ക് കമ്മിറ്റിയുടെ നേതൃത്വത്തിൽ മുണ്ടക്കയം ഗവൺമെന്‍റ് ആശുപത്രിയിലേക്ക് പ്രതിഷേധ മാർച്ചും ധർണയും നടത്തി. കല്ലേപാലം ജംഗ്ഷനിൽനിന്നു കോൺഗ്രസ് ബ്ലോക്ക് കമ്മിറ്റി പ്രസിഡന്‍റ് ബിനു മറ്റക്കരയുടെ നേതൃത്വത്തിൽ ആരംഭിച്ച പ്രതിഷേധ മാർച്ച് മുണ്ടക്കയം ഗവൺമെന്‍റ് ആശുപത്രി പടിക്കൽ ചാണ്ടി ഉമ്മൻ എംഎൽഎ ഉദ്ഘാടനം ചെയ്തു. പ്രകാശ് പുളിക്കൻ, റോയ് കപ്പലുമാക്കൽ, കെ.എം. നൈസാം, രഞ്ജു തോമസ്, നാസർ പനച്ചി, വസന്ത് തെങ്ങുംപള്ളി, വിജയമ്മ ബാബു, സലിം കണ്ണങ്കര, ടി.ജെ. ജോൺസൺ, ടി.വി. ജോസഫ്, എൻ.ആർ. സുരേഷ്, ബി. ജയചന്ദ്രൻ, റെജി അമ്പാറ, ബെന്നി ചേറ്റുവഴി, ടി.ടി. സാബു, ജോമോൻ നീറുവേലി, ഷാജി തുണ്ടിയിൽ, ജാൻസി സാബു, ഏലമ്മ ജോസ് തുടങ്ങിയവർ പ്രസംഗിച്ചു.

"പുഞ്ചിരി' കാരുണ്യ പദ്ധതിയുമായി പിവൈഎംഎ

വിഴിക്കത്തോട്: പിവൈഎംഎ ലൈബ്രറി പാലിയേറ്റീവ് വിഭാഗത്തിന്‍റെ "പുഞ്ചിരി' കാരുണ്യ പദ്ധതി ജില്ലാ പഞ്ചായത്ത്‌ പ്രസിഡന്‍റ് ഹേമലത പ്രേംസാഗർ ഉദ്ഘാടനം ചെയ്തു. പാവപ്പെട്ട കിടപ്പുരോഗികൾക്ക് ചികിത്സാസഹായം നൽകുന്ന പദ്ധതിയാണ് പുഞ്ചിരി. താലൂക്ക് ലൈബ്രറി കൗൺസിൽ പ്രസിഡന്‍റ് പി.കെ. ബാബു ലാൽ അധ്യക്ഷത വഹിച്ചു. സ്റ്റേറ്റ് ലൈബ്രറി കൗൺസിൽ അംഗം പൊൻകുന്നം സെയ്ദ്, ലൈബ്രറി കൗൺസിൽ കോട്ടയം ജില്ലാ വൈസ് പ്രസിഡന്‍റ് ബി. ഹരികൃഷ്ണൻ, പഞ്ചായത്ത്‌ മെംബർ സിന്ധു സോമൻ, താലൂക്ക് ലൈബ്രറി കൗൺസിൽ സെക്രട്ടറി ജോർജ് സെബാസ്റ്റ്യൻ, പിവൈഎംഎ പ്രസിഡന്‍റ് കെ.കെ. പരമേശ്വരൻ, താലൂക്ക് ലൈബ്രറി കൗൺസിൽ അംഗങ്ങളായ ടി.കെ. രാമചന്ദ്രൻ നായർ, സന്തോഷ്‌ മഞ്ഞാക്കൻ എന്നിവർ പ്രസംഗിച്ചു. പദ്ധതിയുടെ ആദ്യ ഗഡുവിന്‍റെ ചെക്ക് മറ്റത്തിൽ മെഡിക്കൽ സ്റ്റോർ ഉടമയ്ക്ക് ജില്ലാ പഞ്ചായത്ത്‌ പ്രസിഡന്‍റ് കൈമാറി.

സ്വകാര്യബസ് പണിമുടക്കിൽ യാത്രക്കാര്‍ വലഞ്ഞു

കോട്ടയം: വിവിധ ആവശ്യങ്ങളുന്നയിച്ച് സ്വകാര്യ ബസുകള്‍ നടത്തിയ പണിമുടക്ക് യാത്രക്കാരെ വലച്ചു. ജില്ലയിലെ 950 സ്വകാര്യബസുകളാണ് പണിമുടക്കുന്നത്. സമീപ ജില്ലകളില്‍നിന്നും കോട്ടയം ജില്ലയിലെത്തുന്ന മൂന്നൂറില്‍പ്പരം ബസുകളും പണിമുടക്കില്‍ പങ്കുചേര്‍ന്നു. ബസ് സമരത്തെ തുടര്‍ന്ന് കെഎസ്ആര്‍ടിസി ബസുകളില്‍ നല്ല തിരക്കാണ് അനുഭവപ്പെട്ടത്. വിദ്യാര്‍ഥികൾക്കും ജോലിക്കാര്‍ക്കും യഥാസമയം സ്‌കൂളിലും ഓഫീസിലുമെത്താന്‍ സാധിച്ചില്ല. സ്വകാര്യ വാഹനങ്ങളും കൂടുതലായി നിരത്തിലിറങ്ങി. സ്വകാര്യ ബസുകള്‍ മാത്രമായി സര്‍വീസ് നടത്തുന്ന റൂട്ടുകളില്‍ യാത്രാക്ലേശം രൂക്ഷമായിരുന്നു. വൈറ്റില, മുണ്ടക്കയം, വൈക്കം, ചേര്‍ത്തല, കുമരകം എന്നിവിടങ്ങളിലേക്ക് കെഎസ്ആര്‍ടിസി അധിക സര്‍വീസുകള്‍ നടത്തി. കോട്ടയം മെഡിക്കല്‍ കോളജിലേക്കും രാവിലെ സ്‌പെഷല്‍ സര്‍വീസുകളുണ്ടായിരുന്നു. സ്വകാര്യ ബസുകള്‍ മാത്രം സര്‍വീസ് നടത്തുന്ന കിടങ്ങൂര്‍-മണര്‍കാട് റൂട്ടില്‍ യാത്രക്കാര്‍ വലഞ്ഞു. ഈരാറ്റുപേട്ട-കാഞ്ഞിരപ്പള്ളി, ഈരാറ്റുപേട്ട-തൊടുപുഴ, കോട്ടയം-കുമളി, പുതുപ്പള്ളി -ഞാലിയാകുഴി തുടങ്ങിയ റൂട്ടുകളില്‍ ബസുകള്‍ കിട്ടാതെ യാത്രാക്കാര്‍ വലഞ്ഞു. കോട്ടയം, വൈക്കം, ചങ്ങനാശേരി കെഎസ്ആര്‍ടിസി ഡിപ്പോകളിലും രാവിലെ നല്ല തിരക്കാണ് അനുഭവപ്പെട്ടത്. സൂചനാ പണിമുടക്കിന് പിന്നാലെ 22 മുതല്‍ അനിശ്ചിതകാല സമരത്തിനും തയാറെടുക്കുകയാണ് ബസുടമകള്‍. ലിമിറ്റഡ് സ്റ്റോപ്പ്, ദീര്‍ഘദൂര ബസ് പെര്‍മിറ്റുകള്‍ അതേപടി പുതുക്കി നല്‍കുക, വിദ്യാര്‍ഥികളുടെ ടിക്കറ്റ് നിരക്ക് വര്‍ധിപ്പിക്കുക, ഇ ചെല്ലാന്‍ വഴിയുള്ള പിഴചുമത്തല്‍ അവസാനിപ്പിക്കുക തുടങ്ങിയ ആവശ്യങ്ങളാണ് ബസുടമകള്‍ ഉന്നയിക്കുന്നത്.

തേങ്ങയാണു വിപണിയിലെ താരം; വെളിച്ചെണ്ണയോ‍ കണ്ണുനിറയ്ക്കും

കോട്ടയം: വെളിച്ചെണ്ണ വിലക്കുതിപ്പിനു തടയിടുമെന്ന് കൃഷിമന്ത്രി പി. പ്രസാദ് പറയുന്നതല്ലാതെ ജനങ്ങള്‍ക്ക് നിലവില്‍ യാതൊരു ആശ്വാസവുമില്ല. തേങ്ങാ ചില്ലറവില 90 രൂപയും വെളിച്ചെണ്ണയ്ക്ക് 500 രൂപയുമായി കുതിക്കുന്നു. ഓണത്തിന് വീട്ടമ്മമാരുടെ കൈപൊള്ളില്ലെന്നും വില നിയന്ത്രിക്കുമെന്നുമാണ് കൃഷിമന്ത്രിയുടെ പ്രഖ്യാപനം. റേഷന്‍കടകളിലൂടെ സബ്‌സിഡി നിരക്കില്‍ ഓണത്തിന് ഒരു കിലോ വെളിച്ചെണ്ണ വിതരണം ചെയ്യാന്‍ ഭക്ഷ്യവകുപ്പിന് ആലോചനയുണ്ട്. എന്നാല്‍ ഓണം എത്തുംവരെ എങ്ങനെ അടുക്കള ഓടിക്കുമെന്ന ചോദ്യത്തിന് ഉത്തരമില്ല. തമിഴ്‌നാട്ടിലും ആന്ധ്രയിലും കര്‍ണാടകത്തിലുംനിന്നു തേങ്ങായെത്തിച്ചു വില കുറയ്ക്കുമെന്ന മന്ത്രിയുടെ പ്രസ്താവനയില്‍ കഴമ്പില്ല. കേരളം നാളികേരത്തിന് ആശ്രയിക്കുന്ന എല്ലാ സംസ്ഥാനങ്ങളിലും തേങ്ങാ വില കൂടുതലും ഉത്പാദനം കുറവുമാണ്. ശ്രീലങ്ക, മാലി എന്നിവിടങ്ങളില്‍നിന്ന് തേങ്ങ എത്തിക്കുക മാത്രമാണ് നിലവിലെ പോംവഴി. ഇക്കൊല്ലം ഏറ്റവും കൂടുതല്‍ വില ഉയര്‍ന്ന ഭക്ഷ്യോത്പന്നം തേങ്ങയാണ്. ജനുവരി ആദ്യം ലിറ്ററിന് 200 രൂപയ്ക്ക് താഴെ നിന്നിരുന്ന വെളിച്ചെണ്ണ വില 450 കടന്നു. തേങ്ങ കിലോ 85-90 രൂപയിലുമെത്തി. തേങ്ങയുടെയും വെളിച്ചെണ്ണയുടെയും ഉപയോഗം കുറയ്ക്കാന്‍ വീടുകളും ഹോട്ടലുകളും കേറ്ററിംഗ് സ്ഥാപനങ്ങളും നിര്‍ബന്ധിതരായിരിക്കുന്നു. മാത്രമല്ല തേങ്ങ ഉപയോഗിച്ചുള്ള കറികളേറെയും ഒഴിവാക്കുകയാണ്. വിലവര്‍ധനയ്ക്ക് മുന്നില്‍ താളം തെറ്റുകയാണ് അടുക്കള ബജറ്റ്. വെളിച്ചെണ്ണയ്ക്ക് പകരം വിലക്കുറവുള്ള സൂര്യകാന്തി, പാം ഓയിലുകളെയാണ് ഏറെപ്പേരും ആശ്രയിക്കുന്നത്. കഴിഞ്ഞ വര്‍ഷം ജൂലൈയില്‍ ഒരു കിലോ വെളിച്ചെണ്ണയ്ക്ക് 170 രൂപയായിരുന്നു വില. ഒരു വര്‍ഷം പിന്നിടുമ്പോള്‍ 300 രൂപയുടെ കയറ്റമാണ്. ഇതേ കാലത്ത് തേങ്ങാവില 35 രൂപയില്‍നിന്ന് തൊണ്ണൂറിലെത്തി. അതായത് 55 രൂപയുടെ മുന്നേറ്റം. വിപണിയില്‍ അല്‍പം വിലക്കുറവുള്ള നിരവധി ബ്രാന്‍ഡ് വെളിച്ചെണ്ണയുണ്ട്. എന്നാല്‍ ഇവയില്‍ ചിലത് ഗുരുതരമായ ആരോഗ്യപ്രശ്‌നങ്ങളുണ്ടാക്കുന്നവയും. കടുംമഞ്ഞ നിറമുള്ള ചില ഇനങ്ങളില്‍ വെളിച്ചെണ്ണയുടെ അംശം കുറവാണെന്നും രാസവസ്തുക്കളുടെ മിശ്രിതമാണെന്നും പറയുന്നു. ഇക്കൊല്ലം ഓണത്തിന് ഉപ്പേരിവില റിക്കാര്‍ഡ് കുറിക്കും. ഏത്തക്കുല വില 120 വരെ എത്തുമെന്നാണ് വ്യാപാരികള്‍ പറയുന്നത്. അങ്ങനെയെങ്കില്‍ ഓണസദ്യയില്‍ ഉപ്പേരിക്ക് ഇടമുണ്ടാകാനിടയില്ല. തേങ്ങ ചേരുന്ന പലഹാരങ്ങളേറെയും ഹോട്ടലുകളില്‍നിന്നു പടിയിറങ്ങി. ദോശ തയാറാക്കിയാല്‍ ചട്‌നിക്കു പകരം സാമ്പാര്‍ മാത്രമേയുള്ളൂ. വില പിടിവിട്ടു കയറുന്ന പശ്ചാത്തലത്തില്‍ കേരഫെഡ് മുഖേന അസംസ്‌കൃത തേങ്ങ സംഭരിക്കാനുള്ള ആലോചനയിലാണ് സര്‍ക്കാര്‍. ഇവ കൊപ്രയാക്കി മാറ്റി എണ്ണ വിപണിയിലെത്തിക്കും. കാസര്‍ഗോഡ്, കണ്ണൂര്‍, മലപ്പുറം, കോഴിക്കോട്, പാലക്കാട്, തൃശൂര്‍ ജില്ലകളില്‍നിന്ന് നാളികേര വികസന ബോര്‍ഡ് നിശ്ചയിച്ച സംഭരണ വിലയേക്കാള്‍ ഒരു രൂപ കൂടുതല്‍ നല്‍കി തേങ്ങ സംഭരിക്കാനാണു തീരുമാനം. ലോകമെമ്പാടും നാളികേര ഉത്പാദനത്തില്‍ 25 ശതമാനമാണ് കുറവുണ്ടായതെന്നും ദക്ഷിണേന്ത്യയില്‍ ഇത് 40 ശതമാനമാണെന്നും കൃഷി മന്ത്രി പി. പ്രസാദ് പറയുന്നു. പാം ഓയില്‍, സൂര്യകാന്തി എണ്ണ വില യഥാക്രമം ലിറ്ററിന് 120 രൂപയും 150 രൂപയും ആയിരിക്കെ വെളിച്ചെണ്ണ ചില്ലറ വില 450 രൂപയ്ക്ക് മുകളിലാണ്. കേരളത്തില്‍ കൊപ്ര വില കിലോയ്ക്ക് 272 രൂപയും തമിഴ്‌നാട്ടില്‍ 245 രൂപയുമാണ്.

ഉത്പാദനം പരിമിതം; റബര്‍ വില മെച്ചപ്പെട്ടു

കോട്ടയം: മഴക്കെടുതിയില്‍ ടാപ്പിംഗ് നിലച്ചതോടെ റബര്‍ വില ഉയരുന്നു. ഇന്നലെ ഷീറ്റിന് ആര്‍എസ്എസ് നാലിന് 203, ഗ്രേഡ് അഞ്ചിന് 200 എന്ന നിരക്കില്‍ വില കയറി. 205 രൂപയ്ക്ക് വ്യവസായികള്‍ ഡീലര്‍മാരില്‍നിന്ന് ഷീറ്റ് വാങ്ങി. മഴക്കാല സംസ്‌കരണം ബുദ്ധിമുട്ടായതോടെ ഏറെപ്പേരും ഷീറ്റ് ഉത്പാദനത്തില്‍നിന്ന് പിന്‍വാങ്ങി. സ്റ്റോക്ക് പരിമിതമായതിനാല്‍ ലാറ്റക്‌സ്, ഒട്ടുപാല്‍ വിലയിലും വര്‍ധനയുണ്ട്. വിദേശത്ത് ഡിമാന്‍ഡ് വര്‍ധിച്ചതും ആഭ്യന്തര ഉത്പാദനം കുറഞ്ഞതും റബറിന് നേട്ടമായി. ലാറ്റക്‌സ് കമ്പനികള്‍ക്ക് സ്റ്റോക്ക് വളരെ പരിമിതമാണ്. അടുത്ത രണ്ടാഴ്ച മഴ വീണ്ടും ശക്തിപ്പെടുന്ന സാഹചര്യത്തില്‍ വില ഇനിയും മെച്ചപ്പെടാനാണ് സാധ്യത. റബറിന് കഴിഞ്ഞ ഓഗസ്റ്റില്‍ 250 രൂപയായി റിക്കാര്‍ഡ് വില കുറിച്ചു. 2011 ഏപ്രില്‍ അഞ്ചിന് ലഭിച്ച 243 രൂപയുടെ റെക്കാര്‍ഡാണ് അന്ന് തിരുത്തിക്കുറിച്ചത്.

മെഡിക്കൽ കോളജ് അപകടം: പ്രതിപക്ഷത്തെ പ്രതിരോധിക്കാന്‍ സിപിഎം

കോട്ടയം: മെഡിക്കല്‍ കോളജ് ആശുപത്രിയില്‍ കെട്ടിടം വീണ് തലയോലപ്പറമ്പ് സ്വദേശിനി ബിന്ദു (52) മരിച്ച സംഭവത്തില്‍ സര്‍ക്കാരിനും സിപിഎമ്മിനുമുണ്ടാക്കിയ ആഘാതം തടയാന്‍ മെഡിക്കല്‍ കോളജില്‍ത്തന്നെ പ്രതിരോധം ഒരുക്കി സിപിഎം. ഇതിന്‍റെ ഭാഗമായി ഇന്നലെ എല്‍ഡിഎഫ് നേതൃത്വത്തില്‍ മെഡിക്കല്‍ കോളജിനു മുമ്പില്‍ സേവ് മെഡിക്കല്‍ കോളജ് എന്ന പേരില്‍ ജനകീയ കൂട്ടായ്മ സംഘടിപ്പിച്ചു. മന്ത്രി വി.എന്‍. വാസവനാണ് കൂട്ടായ്മ ഉദ്ഘാടനം ചെയ്തത്. എല്‍ഡിഎഫിന്‍റെ പ്രമുഖ നേതാക്കള്‍ പങ്കെടുത്ത കൂട്ടായ്മയില്‍ വലിയ ജനപങ്കാളിത്തം പാര്‍ട്ടി നേതൃത്വം ഉറപ്പാക്കിയിരുന്നു. കഴിഞ്ഞദിവസം ചേര്‍ന്ന സിപിഎം സംസ്ഥാന സെക്രട്ടേറിയറ്റ് യോഗവും കോട്ടയം, പത്തനംതിട്ട ജില്ലാ കമ്മിറ്റിയും മെഡിക്കല്‍ കോളജ് സംഭവം സര്‍ക്കാരിനും പാര്‍ട്ടിക്കും അവമതിപ്പുണ്ടാക്കിയതായി വിലയിരുത്തിയിരുന്നു. എന്നാല്‍ മന്ത്രിമാരായ വി.എന്‍. വാസവനും വീണാ ജോര്‍ജിനും ഇക്കാര്യത്തില്‍ തെറ്റുപറ്റിയിട്ടില്ലെന്നും മന്ത്രിമാര്‍ക്കെതിരേ പ്രതിപക്ഷം നടത്തുന്ന ആരോപണങ്ങളെയും സമരങ്ങളെയും പ്രതിരോധിക്കാനും സിപിഎം സംസ്ഥാന നേതൃത്വം ഇരു ജില്ലാ കമ്മിറ്റികള്‍ക്കും നിര്‍ദേശം നല്‍കി. ഇതിന്‍റെ ഭാഗമായി സിപിഎം സംസ്ഥാന കമ്മിറ്റിയംഗംകൂടിയായ കെ. അനില്‍കുമാര്‍ എംഎല്‍എമാരായ തിരുവഞ്ചൂര്‍ രാധാകൃഷ്ണനും ചാണ്ടി ഉമ്മനുമെതിരേ രൂക്ഷമായ ആരോപണങ്ങളുമായി രംഗത്തെത്തി. യുഡിഎഫ് കാലത്തെ അപകടമരണങ്ങളില്‍ സഹായം നല്‍കിയില്ലെന്നും മുന്‍ മുഖ്യമന്ത്രി ഉമ്മന്‍ചാണ്ടിയുടെ കാലത്ത് മെഡിക്കല്‍ കോളജ് കെട്ടിടം അപകടാവസ്ഥയിലാണെന്ന് റിപ്പോര്‍ട്ട് കിട്ടിയിട്ടും നടപടിയുണ്ടായില്ലെന്നുമായിരുന്നു അനില്‍കുമാറിന്‍റെ ആരോപണം. പത്തനംതിട്ടയില്‍ ജനാധിപത്യ മഹിളാ അസോസിയേഷനാണ് വീണാ ജോര്‍ജിനു പ്രതിരോധവുമായി രംഗത്തെത്തിയത്. കഴിഞ്ഞ ദിവസം മരിച്ച ബിന്ദുവിന്‍റെ വീട്ടില്‍ പുലര്‍ച്ചെ ആരോഗ്യമന്ത്രി എത്തിയപ്പോള്‍ പാര്‍ട്ടി ജില്ലാ സെക്രട്ടറിയുടെയും സംസ്ഥാന കമ്മിറ്റിയംഗത്തിന്‍റെയും നേതൃത്വത്തിലാണ് സുരക്ഷാകവചമൊരുക്കിയത്. വരും ദിവസങ്ങളില്‍ മെഡിക്കല്‍ കോളജിന്‍റെ സേവനം ഉപയോഗിക്കുന്ന രോഗികളെയും മെഡിക്കല്‍ കോളജ് ആശുപത്രിയിലെത്തുന്നവരെയും സംഘടിപ്പിച്ചു പ്രതിരോധം തീര്‍ക്കാനാണ് സിപിഎം ശ്രമം. കഴിഞ്ഞ ദിവസങ്ങളില്‍ മെഡിക്കല്‍ കോളജിനു മുമ്പിലെ പ്രതിപക്ഷ സമരങ്ങള്‍ രോഗികള്‍ക്കും ജീവനക്കാര്‍ക്കും വലിയ ബുദ്ധിമുട്ടുണ്ടാക്കിയിരുന്നു. സമരക്കാര്‍ ആശുപത്രി കോമ്പൗണ്ടിനുള്ളിലേക്ക് ഇരച്ചുകയറി. രോഗികളുമായി എത്തിയ വാഹനങ്ങള്‍ തടയുകയും ചെയ്തിരുന്നു. സമരത്തിനെതിരേ പോലീസിന്‍റെ പ്രതിരോധവും ജലപീരങ്കിയും രോഗികള്‍ക്ക് ബുദ്ധിമുട്ടുണ്ടാക്കി. ഇതിനെതിരെ രോഗികളെയും കൂട്ടിരിപ്പുകാരെയും സംഘടിപ്പിക്കാനാണ് സിപിഎം തീരുമാനം. ആരോഗ്യമന്ത്രി വീണാ ജോര്‍ജിനെതിരേ നടക്കുന്ന സമരത്തെ പ്രതിരോധിക്കാന്‍ സിപിഎമ്മിന്‍റെ വനിതാ സംഘടനയായ മഹിളാ അസോസിയേഷനെയും ഡിവൈഎഫ്‌ഐയെയുമാണ് രംഗത്തിറക്കിയത്. അസോസിയേഷന്‍ സംസ്ഥാന വൈസ്പ്രസിഡന്‍റും സിപിഎം പത്തനംതിട്ട ജില്ലാ സെക്രട്ടേറിയറ്റംഗവുമായ കോമളം അനിരുദ്ധന്‍റെ നേതൃത്വത്തില്‍ പത്തനംതിട്ടയില്‍ മഹിളകളുടെ വലിയ പ്രതിഷേധപ്രകടനമാണ് നടന്നത്. യൂത്ത് കോണ്‍ഗ്രസ് നേതാക്കളുടെ സമരത്തിനെതിരേ കോമളം അനിരുദ്ധന്‍ വെല്ലുവിളി നടത്തുകയും ചെയ്തിരുന്നു.

എം.പി. പോള്‍ ചെറുകഥാ പുരസ്‌കാരം ആഷ് അഷിതയ്ക്ക്

കോട്ടയം: എം.പി. പോള്‍ ചെറുകഥാ പുരസ്‌കാരം ആഷ് അഷിതയ്ക്ക് ലഭിച്ചു. ആഷ് അഷിതയുടെ മുങ്ങാങ്കുഴി എന്ന ചെറുകഥാ സമാഹാരത്തിനാണ് സാഹിതീസഖ്യം ഏര്‍പ്പെടുത്തിയ എം.പി. പോള്‍ പുരസ്‌കാരം ലഭിച്ചത്. സാഹിതീസഖ്യത്തിന്‍റെ 91-ാമത് വാര്‍ഷികവും പുരസ്‌കാര സമര്‍പ്പണവും എം.പി. പോളിന്‍റെ ചരമദിനമായ 12നു കോട്ടയം ദര്‍ശന സാംസ്‌കാരിക കേന്ദ്രത്തില്‍ മന്ത്രി വി.എന്‍. വാസവന്‍ സമ്മാനിക്കും. ഡോ. കുര്യാസ് കുമ്പളക്കുഴി അധ്യക്ഷത വഹിക്കും. എം.പി. പോള്‍ ചെറുകഥാ പുരസ്‌കാരം കൂടാതെ ക്യാപ്റ്റന്‍ ഗോവിന്ദ്, ജോണി ജെ. പ്ലാത്തോട്ടം, രമേശന്‍ മുല്ലശേരി എന്നിവര്‍ക്ക് ചെറുകഥയ്ക്കുള്ള സ്പെഷല്‍ ജൂറി പുരസ്‌കാരവും സതീഷ് ചേലാട്ട്, പ്രഫ. നെടുംകുന്നം രഘുദേവ് എന്നിവര്‍ക്ക് സ്പെഷല്‍ ജൂറി മാധ്യമപുരസ്‌കാരവും സമ്മാനിക്കും. ദര്‍ശന കവിയരങ്ങ് കോട്ടയം, സാഹിത്യ സഹൃദയവേദി പാമ്പാടി, സഹൃദയ സമിതി പാലാ, കലാസാഹിത്യ വേദി മീനടം, സാഹിതി കോട്ടയം, കവിയരങ്ങ് കുടമാളൂര്‍, കാവ്യവേദി ഏറ്റുമാനൂര്‍, കാവ്യാരാമം, ഹാസ്യതാവളം, ആറന്മുള സത്യവ്രതന്‍, പരസ്പരം വായനക്കൂട്ടം എന്നീ സാഹിത്യ സംഘടനകളെയും സമ്മേളനത്തില്‍ ആദരിക്കും.

പിക്കപ്പ് വാനും ബൊലേറോയും കൂട്ടിയിടിച്ച് യുവാവ് മരിച്ചു

ഏറ്റുമാനൂർ: പിക്കപ്പ് വാനും ബൊലേറോയും കൂട്ടിയിടിച്ച് യുവാവ് മരിച്ചു. പുന്നത്തുറ വെസ്റ്റ് മാളിയേക്കൽ ഷാജി ജോസഫിന്‍റെ മകൻ ജോമി ഷാജി (31) ആണ് മരിച്ചത്. പട്ടിത്താനം - മണർകാട് ബൈപാസ് റോഡിൽ പേരൂർ കണ്ടൻചിറയ്ക്കു സമീപം ഞായറാഴ്ച രാത്രിയിലാണ് അപകടമുണ്ടായത്. നെടുമ്പാശേരിയിൽ നിന്ന് പള്ളിക്കുന്നിലെ വീട്ടിലേക്ക് പോകുമ്പോഴാണ് വീടിന് രണ്ടു കിലോമീറ്റർ മാത്രം അകലെവച്ച് അപകടം സംഭവിച്ചത്. ജോമി ഓടിച്ചിരുന്ന ബൊലേറോയും പിക്കപ്പ് വാനുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ തകർന്ന വാഹനം വെട്ടിപ്പൊളിച്ചാണ് ജോമിയെ പുറത്തെടുത്തത്. ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്ന് ഉച്ചകഴിഞ്ഞ് മൂന്നിന് പള്ളിക്കുന്ന് സെന്‍റ് തോമസ് പള്ളിയിൽ നടക്കും. മാതാവ് മേരി ഷാജി കുറവിലങ്ങാട് ഒഴുകയിൽ കുടുംബാംഗം. ഭാര്യ ഡിന്‍റു ഏബ്രഹാം ചക്കാമ്പുഴ കൊച്ചുപറമ്പിൽ കുടുംബാംഗം. മകൾ: ജിയന്ന മേരി ജോമി. സഹോദങ്ങൾ: എമിലി, സിസ്റ്റർ അൽഫോൻസ എൽഡബ്ല്യുഎസ്എച്ച്, ആൽവി.

ജില്ലയില്‍ അഖിലേന്ത്യാ പണിമുടക്ക് തുടങ്ങി

കോട്ടയം: കേന്ദ്രസര്‍ക്കാരിന്‍റെ തൊഴിലാളി വിരുദ്ധ നയങ്ങള്‍ക്കെതിരേ സംയുക്ത കേന്ദ്ര ട്രേഡ് യൂണിയനുകളും ജീവനക്കാരുടെ ഫെഡറേഷനുകളും ആഹ്വാനം ചെയ്ത അഖിലേന്ത്യാ പണിമുടക്ക് ജില്ലയില്‍ ആരംഭിച്ചു. സ്വകാര്യ ബസ് ജീവനക്കാര്‍ പണിമുടക്കില്‍ പങ്കെടുക്കുന്നുണ്ട്. കെഎസ്ആര്‍ടിസിയില്‍ ജീവനക്കാര്‍ പണിമുടക്കില്‍ പങ്കെടുക്കില്ലെന്ന് മന്ത്രി പ്രഖ്യാപിച്ചെങ്കിലും ജീവനക്കാരുടെ സംഘടനകള്‍ പ്രഖ്യാപനത്തെ തള്ളുകയും നേതാക്കള്‍ സമരത്തില്‍ പങ്കെടുക്കുമെന്ന് അറിയിക്കുകയും ചെയ്തതോടെ കെഎസ്ആര്‍ടിസി സര്‍വീസുകളും മുടങ്ങുമെന്നുറപ്പായി. ചുരുക്കത്തില്‍ പൊതുഗതാഗതം സ്തംഭിക്കും. ജീവനക്കാരുടെ ഫെഡറേഷനുകളും പണിമുടക്കില്‍ പങ്കെടുക്കുന്നതോടെ സര്‍ക്കാര്‍ ഓഫീസുകളില്‍ ജീവനക്കാരുടെ എണ്ണം കുറവായിരിക്കും. സമരത്തിന് ഐക്യദാര്‍ഢ്യം പ്രഖ്യാപിച്ചിട്ടില്ലെങ്കിലും വ്യാപാരികളും കടകള്‍ തുറക്കാന്‍ സാധ്യത കുറവാണ്. പൊതുഗതാഗതം സ്തംഭിക്കുന്നതോടെ വ്യാപാര മേഖലയും സ്തംഭിക്കുമെന്നാണ് വ്യാപാരി വ്യവസായി ഏകോപന സമിതി നേതാക്കള്‍ പറയുന്നത്. ഇടത് അനുകൂല വ്യാപാര സംഘടനയായ വ്യാപാരി വ്യവസായി സമിതി പണിമുടക്കിനു പിന്തുണ പ്രഖ്യാപിച്ചിട്ടുണ്ട്. കര്‍ഷകരും തൊഴിലാളികളും കേന്ദ്ര, സംസ്ഥാന സര്‍ക്കാര്‍ ജീവനക്കാരും അധ്യാപകരും പൊതുമേഖലാ ജീവനക്കാരും ബാങ്കിംഗ്, ഇന്‍ഷ്വറന്‍സ് ജീവനക്കാരും പണിമുടക്കില്‍ പങ്കെടുക്കുമെന്ന് അറിയിച്ചിട്ടുണ്ട്. അവശ്യ സര്‍വീസുകളായ ആശുപത്രി, പാല്‍, പത്രം എന്നിവയെ പണിമുടക്കില്‍നിന്നൊഴിവാക്കിയിട്ടുണ്ട്. പണിമുടക്കിന്‍റെ ഭാഗമായി സംയുക്ത ട്രേഡ് യൂണിയന്‍ ജില്ലാ കോ ഓര്‍ഡിനേഷന്‍ കമ്മിറ്റിയുടെ ആഭിമുഖ്യത്തില്‍ ജില്ലാതല പ്രകടനം കോട്ടയത്ത് രാവിലെ നടക്കും. പാലാ, ഈരാറ്റുപേട്ട, കാഞ്ഞിരപ്പള്ളി, ചങ്ങനാശേരി, ഏറ്റുമാനൂര്‍, കടുത്തുരുത്തി, വൈക്കം, പാമ്പാടി നിയോജക മണ്ഡല കേന്ദ്രങ്ങളിലും പ്രദേശികതലങ്ങളിലും കേന്ദ്ര സര്‍ക്കാര്‍ ഓഫീസുകള്‍ക്കു മുമ്പില്‍ പ്രകടനവും പ്രതിഷേധ കൂട്ടായ്മകളും സംഘടിപ്പിച്ചിട്ടുണ്ട്. ഇന്ന് അര്‍ധരാത്രി വരെ 24 മണിക്കൂറാണു പണിമുടക്ക്. വിലക്കയറ്റം തടയുക, ലേബര്‍കോഡുകള്‍ പിന്‍വലിക്കുക, പൊതുമേഖലാ ഓഹരി വില്പന അവസാനിപ്പിക്കുക, മിനിമം വേതനം 26,000 രൂപയായും പെന്‍ഷന്‍ 9000 രൂപയായും നിശ്ചയിക്കുക, സ്‌കീം വര്‍ക്കര്‍മാരെ തൊഴിലാളികളായി അംഗീകരിക്കുക തുടങ്ങിയ ആവശ്യങ്ങളുയര്‍ത്തിയാണു പൊതുപണിമുടക്ക്. പണിമുടക്കിന്‍റെ ഭാഗമായി ഇന്നലെ പഞ്ചായത്ത്, മുനിസിപ്പല്‍ കേന്ദ്രങ്ങളില്‍ വിളംബര ജാഥയും പന്തംകൊളുത്തി പ്രകടനവും നടന്നു. പൊരുതി നേടിയ തൊഴിലവകാശങ്ങള്‍ കവര്‍ന്നെടുക്കാന്‍ ആരെയും അനുവദിക്കില്ലെന്നും തൊഴിലാളികളുടെ താക്കീതായി പൊതുപണിമുടക്ക് മാറുമെന്നും സംയുക്ത ട്രേഡ് യൂണിയന്‍ നേതാക്കള്‍ പറഞ്ഞു.

ആരോഗ്യമേഖലയുടെ അനാരോഗ്യം അതിഗുരുതരം: ടോമി കല്ലാനി

പാലാ: കേരളത്തിലെ ആരോഗ്യ മേഖലയുടെ അനാരോഗ്യം അതിഗുരുതരമെന്നും അതിനു തെളിവാണ് മന്ത്രി സജി ചെറിയാന്‍റെ തുറന്നുപറച്ചിലെന്നും കെപിസിസി നിര്‍വാഹക സമിതി അംഗം ടോമി കല്ലാനി. ആരോഗ്യമേഖലയോടുള്ള സര്‍ക്കാരിന്‍റെ അവഗണനയ്ക്കും അനാസ്ഥയ്ക്കുമെതിരേ കോണ്‍ഗ്രസ് ബ്ലോക്ക് കമ്മിറ്റികളുടെ നേതൃത്വത്തില്‍ ആശുപത്രിക്ക് മുന്നില്‍ നടത്തിയ ധര്‍ണ ഉദ്ഘാടനം ചെയ്ത് പ്രസംഗിക്കുകയായിരുന്നു ടോമി കല്ലാനി. നൂറുകണക്കിന് പ്രവര്‍ത്തകര്‍ പങ്കെടുത്ത മാര്‍ച്ച് ആശുപത്രി ഗേറ്റിലേക്ക് കടത്തിവിടാതെ പോലീസ് ബലം പ്രയോഗിച്ച് തടഞ്ഞത് സംഘര്‍ഷാവസ്ഥയുണ്ടാക്കി. ഉന്തും തള്ളും ഉണ്ടായെങ്കിലും ആശുപത്രി കവാടത്തില്‍ തന്നെ യോഗം നടന്നു. ബ്ലോക്ക് പ്രസിഡന്‍റ് എന്‍. സുരേഷ് അധ്യക്ഷത വഹിച്ചു. മോളി പീറ്റര്‍, സി.ടി. രാജന്‍, ആര്‍. സജീവ്, പ്രഫ.സതീശ് ചൊള്ളാനി, ആര്‍. പ്രേംജി, രാജന്‍ കൊല്ലംപറമ്പില്‍, സാബു ഏബ്രഹാം, ബെന്നി ചോക്കാട്ട്, ഷോജി ഗോപി, ആര്‍. ശ്രീകല, ജയിംസ് ജീരകത്തില്‍, സന്തോഷ് മണര്‍കാട്ട്, സാബു അവുസേപ്പറമ്പില്‍, ടി.ജെ. ബഞ്ചമിന്‍, ആനി ബിജോയി, ബെന്നി കച്ചിറമറ്റം, ടോണി തൈപ്പറമ്പില്‍, തോമസുകുട്ടി നെച്ചിക്കാട്ട്, ഉണ്ണി കുളപ്പുറം, പ്രേംജിത്ത് ഏര്‍ത്തയില്‍ തുടങ്ങിയവര്‍ പ്രസംഗിച്ചു. സർക്കാർ ആരോഗ്യസംവിധാനം വൻ പരാജയം: തോമസ് കല്ലാടൻ ഈരാറ്റുപേട്ട: സർക്കാർ ആരോഗ്യ സംവിധാനം വൻ പരാജയമാണെന്നും കോട്ടയം മെഡിക്കൽ കോളജ് ദുരന്തം ഇത് ശരിവയ്ക്കുന്നെന്നും കെപിസിസി നിർവാഹക സമിതി അംഗം തോമസ് കല്ലാടൻ. മന്ത്രി വീണാ ജോർജിന്‍റെ രാജി ആവശ്യപ്പെട്ട് കോൺഗ്രസ് പൂഞ്ഞാർ ബ്ലോക്ക് കമ്മിറ്റി ഈരാറ്റുപേട്ട പ്രാഥമികാരോഗ്യ കേന്ദ്രത്തിലേക്ക് നടത്തിയ മാർച്ച് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കോൺഗ്രസ് ബ്ലോക്ക് പ്രസിഡന്‍റ് വി.എം. മുഹമ്മദ് ഇല്യാസ് അധ്യക്ഷത വഹിച്ചു. പി.എച്ച്. നൗഷാദ്, വർക്കിച്ചൻ വയമ്പോത്തനാൽ, ജോർജ് സബാസ്റ്റ്യൻ, അനസ് നാസർ, റോജി പൂഞ്ഞാർ എന്നിവർ പ്രസംഗിച്ചു.

എൻഎസ്എസ് യൂണിയൻ ക്ഷേത്രങ്ങളിൽ ബജറ്റ്

പൊൻകുന്നം: എൻഎസ്എസ് പൊൻകുന്നം യൂണിയന്‍റെ ഉടമസ്ഥതയിലുള്ള ക്ഷേത്രങ്ങളുടെ ബജറ്റ് അവതരിപ്പിച്ചു. നായകസഭാംഗവും യൂണിയൻ പ്രസിഡന്‍റുമായ എം.എസ്. മോഹൻ അധ്യക്ഷത വഹിച്ചു. യൂണിയൻ സെക്രട്ടറി പ്രവീൺ ആർ. നായർ ബജറ്റ് അവതരിപ്പിച്ചു. പുതിയകാവ് ദേവീക്ഷേത്രം, പാലപ്ര ഭഗവതി ക്ഷേത്രം, പൂതക്കുഴി ശ്രീകൃഷ്ണസ്വാമി ക്ഷേത്രം എന്നിവയുടെ ബജറ്റുകളാണ് അംഗീകരിച്ചത്. 1.08 കോടി രൂപയുടെ ബജറ്റാണ് പുതിയകാവ് ദേവസ്വത്തിന്. പാലപ്ര ദേവസ്വത്തിൽ 1.17 കോടി രൂപയുടെ ബജറ്റും പൂതക്കുഴി ദേവസ്വത്തിന് 37.87 ലക്ഷം രൂപയുടെ ബജറ്റുമാണ് അംഗീകരിച്ചത്. പുതിയകാവ് ദേവീക്ഷേത്രത്തിൽ വിവിധ വികസനപ്രവർത്തനങ്ങൾക്ക് തുക വകയിരുത്തി. പാലപ്ര ക്ഷേത്രത്തിൽ സപ്താഹമണ്ഡപവും പൂതക്കുഴി ക്ഷേത്രത്തിൽ വിവിധ വികസനവുമാണ് ലക്ഷ്യമിടുന്നത്. യൂണിയൻ കമ്മിറ്റിയംഗങ്ങളായ എം.ജി. ബാലകൃഷ്ണൻനായർ, പി.കെ. ബാബുക്കുട്ടൻനായർ, കെ.പി. മുകുന്ദൻ, പി.വി. രാധാകൃഷ്ണൻനായർ, കെ.ആർ. രവീന്ദ്രനാഥ്, ജയകുമാർ ഡി. നായർ, കെ.എസ്. ജയകൃഷ്ണൻനായർ, എം.ജി. മോഹൻദാസ്, കെ.ആർ. സുരേഷ്ബാബു, ബാബു ശിവൻകുട്ടി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]