ADVERTISEMENT

ADVERTISEMENT

‘എന്‍റെ കേരളം’സര്‍ക്കാരിന്‍റെ വികസന സാക്ഷ്യമാകും: മന്ത്രി എ.കെ. ശശീന്ദ്രന്‍

പിലിക്കോട്: രണ്ടാം പിണറായി വിജയന്‍ സര്‍ക്കാരിന്‍റെ നാലാം വാര്‍ഷികാഘോഷവും ‘എന്‍റെ കേരളം’ പ്രദര്‍ശന മേളയും സര്‍ക്കാരിന്‍റെ വികസന സാക്ഷ്യമാകുമെന്ന് ജില്ലയുടെ ചുമതലയുള്ള മന്ത്രി എ.കെ. ശശീന്ദ്രന്‍ പറഞ്ഞു.

കാലിക്കടവ് പടുവളം ബ്ലോക്ക് പഞ്ചായത്ത് ഹാളിൽ മേളയുടെ ജില്ലാതല സംഘാടകസമിതി യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. എം.രാജഗോപാലൻ എംഎൽഎ അധ്യക്ഷത വഹിച്ചു.

ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണൻ, നിലേശ്വരം ബ്ലോക്ക് പഞ്ചായത്ത് പ്രസിഡന്‍റ് മാധവൻ മണിയറ, നീലേശ്വരം നഗരസഭാധ്യക്ഷ ടി.വി.ശാന്ത, പഞ്ചായത്ത് പ്രസിഡന്‍റുമാരായ വി.വി.സജീവൻ, പി.പി. പ്രസന്നകുമാരി, സി.വി. പ്രമീള, ജില്ലാ പഞ്ചായത്ത് സ്ഥിരം സമിതി അധ്യക്ഷൻ എം.മനു, എഡിഎം പി.അഖിൽ, ജില്ലാ ഇൻഫർമേഷൻ ഓഫീസർ എം.മധുസൂദനൻ എന്നിവർ സംബന്ധിച്ചു.

ADVERTISEMENT

കാസര്‍ഗോഡ് നഗരത്തിലെ ഒറ്റത്തൂണ്‍ പാലം ഗതാഗതത്തിന് തുറന്നു

കാസര്‍ഗോഡ്: ദേശീയപാത ഒന്നാം റീച്ചില്‍ ഉള്‍പ്പെടുന്ന കാസര്‍ഗോഡ് നഗരത്തിലെ ഒറ്റത്തൂണ്‍ മേല്‍പ്പാലം താത്കാലികമായി ഗതാഗതത്തിന് തുറന്നുകൊടുത്തു. ഇന്നലെ വൈകുന്നേരത്തോടെയാണ് കാസര്‍ഗോഡ് നഗരത്തില്‍ മംഗലാപുരത്തു നിന്ന് ചെര്‍ക്കളയിലേക്കുള്ള ഭാഗം തുറന്നു കൊടുത്തത്. ദേശീയ പാതയിൽ തലപ്പാടി മുതൽ ചെങ്കള വരെയുള്ള 39 കിലോമീറ്റർ ദൈർഘ്യമുള്ള ആദ്യറീച്ചില്‍ കാസർഗോഡ് നഗരത്തിന്‍റെ ഹൃദയഭാഗത്തു കൂടി കടന്നുപോവുന്ന മേൽപ്പാലത്തിന്‍റെ ഒരു ഭാഗം തുറന്നു കൊടുത്തതോടെ നഗരത്തിലെ ഗതാഗത ക്കുരുക്കിനും ഒരുപരിധിവരെ പരിഹാരമാവുകയാണ്. ഈ ഭാഗത്ത് സര്‍വീസ് റോഡിന്‍റെ നിര്‍മാണം ആരംഭിച്ചതോടെ കഴിഞ്ഞ ദിവസങ്ങളിള്‍ വലിയ ഗതാഗതക്കുരുക്കാണ് അനുഭവപ്പെട്ടിരുന്നത്. ഇത് പരിഗണിച്ചാണ് മേല്‍പ്പാലം തുറന്നു കൊടുത്തത്. 1.13 കിലോമീറ്റർ നീളവും 27 മീറ്റർ വീതിയുമുള്ള പാലത്തിന് 29 സ്പാനുകളാണുള്ളത്. കറന്തക്കാട് അഗ്നിരക്ഷാ നിലയത്തിന് മുന്നിൽനിന്നും തുടങ്ങി നുള്ളിപ്പാടി അയ്യപ്പക്ഷേത്രത്തിന് മുന്നിലാണ് പാലം അവസാനിക്കുന്നത്. പാലത്തിന്‍റെ അടിഭാഗത്ത് വാഹന പാർക്കിംഗിനൊപ്പം ഷട്ടിൽ കോർട്ട്, ഓപ്പൺ ജിം തുടങ്ങിയ പദ്ധതികള്‍ ഒരുക്കാന്‍ ജില്ലാ ഭരണകൂടവും ഡിടിപിസിയും ഒരുങ്ങുന്നുണ്ട്.

പുതിയ ബസ് പെർമിറ്റുകൾക്ക് കാത്തിരിപ്പ് നീളുന്നു

കാസർഗോഡ്: മാസങ്ങളുടെ കാത്തിരിപ്പിനു ശേഷം ജില്ലയിൽ റീജണൽ ട്രാൻസ്പോർട്ട് അഥോറിറ്റി യോഗം ചേർന്നെങ്കിലും തുടർനടപടികൾ പിന്നെയും വൈകുന്നു. ഏറ്റവുമൊടുവിൽ ഫെബ്രുവരി 19 ന് ചേർന്ന ആർടിഎ യോഗത്തിന്‍റെ തീരുമാനങ്ങൾ ഇനിയും പ്രസിദ്ധീകരിച്ചിട്ടില്ല. ഗ്രാമീണ പാതകളിൽ പുതിയ ബസ് പെർമിറ്റുകൾക്കായുള്ള 55 അപേക്ഷകളാണ് യോഗം പരിഗണിച്ചിരുന്നത്. ആർടിഎ യോഗത്തിന്‍റെ തീരുമാനം പുറത്തുവരാത്തതിനാൽ ബസ് ഉടമകളുടെയും നാട്ടുകാരുടെയും കാത്തിരിപ്പ് നീളുകയാണ്. തീരുമാനം പുറത്തുവരുമ്പോൾ പുതിയ പെർമിറ്റുകൾ അനുവദിക്കപ്പെട്ടവരുടെ കാര്യത്തിലും സമയക്രമം ലഭിക്കണമെങ്കിൽ ഇനി മാസങ്ങൾ കഴിഞ്ഞ് അടുത്ത യോഗം ചേരുന്നതിനായി കാത്തിരിക്കേണ്ടിവരും. മുൻകാലങ്ങളിൽ പുതിയ പെർമിറ്റുകൾ ആർടിഎ യോഗം അംഗീകരിച്ച ശേഷമാണ് ബന്ധപ്പെട്ട ഓപ്പറേറ്റർമാർ ബസ് വാങ്ങിയിരുന്നത്. ബസ് വാങ്ങിയതിനുശേഷം അതിന്‍റെ രേഖകൾ ഹാജരാക്കിയാൽ സമയക്രമം നിശ്ചയിച്ച് നല്കുകയായിരുന്നു പതിവ്. എന്നാൽ ഇപ്പോൾ മുൻകൂട്ടി ബസുകൾ വാങ്ങി അതിന്‍റെ രേഖകൾ ഹാജരാക്കിയാൽ മാത്രമേ ആദ്യം പെർമിറ്റും പിന്നീട് സമയക്രമവും അനുവദിച്ച് നല്കുന്നുള്ളൂ. ലക്ഷങ്ങൾ വായ്പയെടുത്ത് ബസുകൾ വാങ്ങിയതിനുശേഷം പെർമിറ്റ് കിട്ടാൻ അപേക്ഷ നല്കി മാസങ്ങളും വർഷങ്ങളും കാത്തിരിക്കേണ്ട അവസ്ഥയിലാണ് ഇപ്പോൾ ഉടമകൾ. വായ്പയുടെ തിരിച്ചടവ് തന്നെ ഇതിനകം അവരെ കടക്കെണിയിലാക്കുമെന്ന നിലയാണ്. മുൻകാലങ്ങളിൽ ഒന്നു മുതൽ മൂന്ന് മാസം വരെയുള്ള ഇടവേളകളിൽ ആർടിഎ യോഗം ചേർന്ന് പെർമിറ്റ് അപേക്ഷകളുടെയും സമയക്രമത്തിന്‍റെയും കാര്യത്തിൽ തീരുമാനമെടുത്തിരുന്നു. എന്നാൽ ഇപ്പോൾ ഏഴു മാസം വരെ വൈകിയാണ് യോഗം ചേരുന്നത്. അതിന്‍റെ തന്നെ തീരുമാനം പുറത്തുവരാൻ പിന്നെയും രണ്ടു മാസത്തിലേറെ എടുക്കുന്ന അവസ്ഥയാണ്. അപേക്ഷകൾ വച്ചുതാമസിപ്പിക്കാതെ പെട്ടെന്നുതന്നെ പെർമിറ്റുകളും സമയക്രമവും നിശ്ചയിച്ച് നല്കിയാൽ ബസുടമകൾക്കൊപ്പം സർക്കാരിനും നികുതികളുടെ രൂപത്തിൽ ലക്ഷങ്ങളുടെ വരുമാനമാണ് ലഭിക്കുക. റോഡുകളുണ്ടായിട്ടും ബസുളില്ലാതെ വലയുന്ന ഒട്ടനവധി പ്രദേശങ്ങളിലെ ജനങ്ങളുടെ യാത്രാദുരിതത്തിനും പരിഹാരമാകും. അപേക്ഷകരെ വർഷങ്ങളോളം വലയ്ക്കുമ്പോൾ ഈ ഗുണഫലങ്ങളെല്ലാം നഷ്ടമാവുകയാണ്. പുതിയ പെർമിറ്റുകൾ കിട്ടാൻ പ്രയാസമാണെന്ന സ്ഥിതിയുണ്ടാകുന്നത് പഴയ പെർമിറ്റുകൾ മറിച്ചുവിൽക്കുന്നവർക്ക് പ്രോത്സാഹനമാകുന്നതായി ബസ് ഉടമകൾ പറയുന്നു. പെർമിറ്റുകൾ കൈമാറ്റം ചെയ്യുന്നതിന് നിയമതടസങ്ങളുണ്ടെങ്കിലും അതിനെ മറികടന്ന് കൈമാറ്റങ്ങൾ നടക്കുന്നുണ്ട്. ജില്ലയിൽ വർഷങ്ങളായി ഓടാതെ വച്ചിരിക്കുന്ന പഴയ സ്വകാര്യ ബസ് പെർമിറ്റുകൾ 10 ലക്ഷത്തിന് മുകളിലുള്ള തുകയ്ക്കാണ് കൈമാറ്റം ചെയ്യപ്പെടുന്നത്. പുതിയ ബസുകൾ വാങ്ങി പെർമിറ്റിനായി മാസങ്ങളും വർഷങ്ങളും കാത്തിരിക്കേണ്ടി വരുന്നതിന്‍റെ നഷ്ടം കണക്കിലെടുത്താണ് പലരും ഇത്രയും തുക നല്കി പഴയ പെർമിറ്റുകൾ വാങ്ങുന്നത്. ജില്ലയിൽ 1995 കാലഘട്ടത്തിൽ 1200 ഓളം സ്വകാര്യ ബസുകൾ സർവീസ് നടത്തിയിരുന്നു. ഇപ്പോൾ അത് 350 വരെയായി ചുരുങ്ങി. മലയോരത്ത് ഒട്ടേറെ പുതിയ റോഡുകൾ വന്നിട്ടും ബസ് സർവീസുകൾ തുടങ്ങിയിട്ടില്ല. പലയിടങ്ങളിലും ജീപ്പുകളുടെയും മറ്റും സമാന്തര സർവീസുകളെയാണ് നാട്ടുകാർ ആശ്രയിക്കുന്നത്. എന്നിട്ടും പുതിയ ബസുകൾ വാങ്ങി സർവീസ് തുങ്ങൻ തയ്യാറായി വരുന്ന സംരംഭകരോട് മുഖം തിരിക്കുന്ന സമീപനമാണ് അധികൃതർ സ്വീകരിക്കുന്നതെന്നാണ് ബസ് ഉടമകളുടെ പരാതി.

കുളിർമ ബോധവത്കരണ പരിപാടി

ചെറുവത്തൂർ: കൊടുംചൂടിൽ വെന്തുരുകുന്ന നാടിനെ പ്രകൃതിസൗഹൃദമായ അന്തരീക്ഷത്തിലേക്ക് തിരിച്ചെത്തിക്കുകയെന്ന ലക്ഷ്യത്തോടെ എനർജി മാനേജ്മെന്‍റ് സെന്‍റർ കേരള, കാൻഫെഡ് സോഷ്യൽ ഫോറം എന്നിവയുടെ സംയുക്താഭിമുഖ്യത്തിൽ കുളിർമ ബോധവത്കരണ പരിപാടി സംഘടിപ്പിച്ചു. തൃക്കരിപ്പൂർ നിയമസഭാ മണ്ഡലം തലത്തിലുള്ള പരിപാടിയാണ് ചെറുവത്തൂരിൽ സംഘടിപ്പിച്ചത്. പഞ്ചായത്ത് പ്രസിഡന്‍റ് സി.വി.പ്രമീള ഉദ്ഘാടനം ചെയ്തു. കാൻഫെഡ് സോഷ്യൽ ഫോറം ചെയർമാൻ കുക്കാനം റഹ്മാൻ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് പി.വി.രാഘവൻ, പി.പത്മിനി, രാജൻ കൊടക്കാട്, എൻ. സുകുമാരൻ എന്നിവർ പ്രസംഗിച്ചു.

‘എന്‍റെ കേരളം’ സംഘാടക സമിതി ഓഫീസ് തുറന്നു

പിലിക്കോട്: സംസ്ഥാന സര്‍ക്കാരിന്‍റെ നാലാം വാര്‍ഷികാഘോഷത്തിന്‍റെ സംസ്ഥാനതല ഉദ്ഘാടനത്തോടനുബന്ധിച്ച് നാളെ മുതൽ കാലിക്കടവ് മൈതാനത്ത് സംഘടിപ്പിക്കുന്ന എന്‍റെ കേരളം പ്രദര്‍ശന വിപണന മേളയുടെ സംഘാടക സമിതി ഓഫീസ് എം. രാജഗോപാലന്‍ എംഎല്‍എ ഉദ്ഘാടനം ചെയ്തു. പിലിക്കോട് പഞ്ചായത്ത് പ്രസിഡന്‍റ് പി.പി. പ്രസന്ന കുമാരി അധ്യക്ഷത വഹിച്ചു. പിആര്‍ഡി ഇലക്ട്രോണിക്‌സ് മീഡിയ ഡിവിഷന്‍ അഡീഷണല്‍ ഡയറക്ടര്‍ വി.പി. പ്രമോദ് കുമാര്‍, ഫീല്‍ഡ് പബ്ലിസിറ്റി ആന്‍റ് കള്‍ച്ചറല്‍ അഫയേഴ്‌സ് ഡെപ്യൂട്ടി ഡയറക്ടര്‍ എം.നാഫിഹ്, കോഴിക്കോട് റീജിയണല്‍ ഡെപ്യൂട്ടി ഡയറക്ടര്‍ കെ.ടി.ശേഖരന്‍, എഡിഎം പി.അഖില്‍, ജില്ലാ ഇന്‍ഫര്‍മേഷന്‍ ഓഫീസര്‍ എം. മധുസൂദനന്‍ എന്നിവര്‍ പങ്കെടുത്തു.

വ്യാജ സ്വർണം പണയം: നാലുപേർക്കെതിരെ കേസ്

കാഞ്ഞങ്ങാട്: സഹകരണ ബാങ്കിലും സ്വകാര്യ ധനകാര്യ സ്ഥാപനത്തിലുമായി വ്യാജ സ്വർണം പണയപ്പെടുത്തിയതുമായി ബന്ധപ്പെട്ട് നാലുപേർക്കെതിരെ കേസ്. കരിന്തളം സർവീസ് സഹകരണബാങ്കിൽ വ്യാജ സ്വർണം പണയംവയ്ക്കാൻ ശ്രമിച്ചതിന് കൊല്ലംപാറയിലെ വി.രമ്യ (32), കരിന്തളം സ്വദേശികളായ ഷിജിത്ത്, രതികല എന്നിവർക്കെതിരെയാണ് ബാങ്ക് സെക്രട്ടറി വി.മധുസൂദനന്‍റെ പരാതിയിൽ നീലേശ്വരം പോലീസ് കേസെടുത്തത്. ബുധനാഴ്ച സ്വർണപ്പണയ വായ്പയ്ക്കായി ഇവർ കൊണ്ടുവന്ന 26,400 ഗ്രാം സ്വർണം വ്യാജമാണെന്ന് തിരിച്ചറിഞ്ഞതോടെയാണ് ബാങ്ക് അധികൃതർ പോലീസിൽ പരാതി നല്കിയത്. കാഞ്ഞങ്ങാട്ടെ മുത്തൂറ്റ് ഫിൻകോർപ്പ് ലിമിറ്റഡിൽ മൂന്നുമാസം മുമ്പ് വ്യാജ സ്വർണം പണയം വച്ച് പണം തട്ടിയതിനാണ് കൊളവയൽ മുട്ടുന്തലയിലെ എ.നൗഷാദിനെതിരെ ഹോസ്ദുർഗ് പോലീസ് കേസെടുത്തത്. കഴിഞ്ഞ ജനുവരി 23 നാണ് ഇയാൾ മുത്തൂറ്റ് ശാഖയിൽ 11.9 ഗ്രാം സ്വർണം പണയപ്പെടുത്തി 65,726 രൂപയുടെ വായ്പയെടുത്തത്. ഈ സ്വർണം വ്യാജമാണെന്ന് പിന്നീട് പരിശോധനയൽ കണടെത്തിയതോടെയാണ് ബ്രാഞ്ച് മാനേജർ എം. മഞ്ജുള പോലീസിൽ പരാതി നല്കിയത്.

പരപ്പ ആസ്പിരേഷൻ ബ്ലോക്ക് പദ്ധതിക്ക് ദേശീയ തലത്തിൽ അംഗീകാരം

കാസർഗോഡ്: ജില്ലയിലെ പരപ്പ ആസ്പിരേഷൻ ബ്ലോക്ക് പദ്ധതിക്ക് ദേശീയതലത്തിൽ അംഗീകാരം. പൊതുഭരണത്തിലെ മികവിനുള്ള പ്രധാനമന്ത്രിയുടെ അവാർഡാണ് പദ്ധതിക്ക് ലഭിച്ചത്. സിവിൽ സർവീസ് ദിനമായ ഏപ്രിൽ 21 ന് ന്യൂഡൽഹിയിൽ നടക്കുന്ന ചടങ്ങിൽ ജില്ലാ കളക്ടർ കെ.ഇമ്പശേഖർ അവാർഡ് ഏറ്റുവാങ്ങും. ജില്ലാ കളക്ടറുടെ നേതൃത്വത്തിൽ വിവിധ വകുപ്പുകളെ ഏകോപിപ്പിച്ചുകൊണ്ട് പരപ്പ ബ്ലോക്കിൽ വിവിധ മേഖലകളിലായി നടപ്പിലാക്കിയ മികച്ച പ്രവർത്തനങ്ങൾക്കാണ് പുരസ്കാരം. രാജ്യത്തെ 264 ആസ്പിരേഷൻ ബ്ലോക്കുകളിൽ നിന്നാണ് പൊതുഭരണത്തിലെ മികവിനുള്ള ഒന്നാം സ്ഥാനം പരപ്പ ബ്ലോക്ക് നേടിയത്. ആരോഗ്യം, സാമൂഹികക്ഷേമം, കൃഷി, സംരംഭകത്വ വികസനം, ഗോത്രവർഗ മേഖലയിലെ ക്ഷേമ പ്രവർത്തനങ്ങൾ തുടങ്ങി വ്യത്യസ്ത മേഖലകളിൽ സുതാര്യവും സമയബന്ധിതവുമായി ആസൂത്രണം ചെയ്തു നടപ്പിലാക്കിയ മികവുറ്റ പ്രവർത്തനങ്ങളാണ് പ്രധാനമന്ത്രിയുടെ പുരസ്കാരത്തിന് പരപ്പയെ അർഹമാക്കിയത്. പദ്ധതി പ്രവർത്തനങ്ങൾക്ക് മികച്ച പിന്തുണ നല്കിയ ബ്ലോക്ക് പഞ്ചായത്ത് പ്രസിഡന്‍റ് എം.ലക്ഷ്മി, ബ്ലോക്ക് പരിധിയിലെ പഞ്ചായത്ത് പ്രസിഡന്‍റുമാരായ ടി.കെ.രവി, രാജു കട്ടക്കയം, ജോസഫ് മുത്തോലി, ഗിരിജ മോഹനൻ, പ്രസന്ന പ്രസാദ്, ടി.കെ.നാരായണൻ, പി.ശ്രീജ എന്നിവർക്കും ഭരണസമിതി അംഗങ്ങൾക്കും ജില്ലാതലത്തിലും ബ്ലോക്ക് തലത്തിലുമുള്ള ഉദ്യോഗസ്ഥർക്കും ജില്ലാ പ്ലാനിംഗ് ഓഫീസർ ടി.രാജേഷിനും സംഘത്തിനും പ്രത്യേകം നന്ദി അറിയിക്കുന്നതായി കളക്ടർ പറഞ്ഞു. കെ.ഇമ്പശേഖർ ജില്ലാ കളക്ടറായതിനുശേഷം ലഭിക്കുന്ന അഞ്ചാമത്തെ പുരസ്കാരവും ആദ്യത്തെ ദേശീയ പുരസ്കാരവുമാണ് ഇത്.

പട്ടികജാതി യുവജന സംഘത്തിന് വാദ്യോപകരണങ്ങള്‍ നല്കി

പരപ്പ: ബ്ലോക്ക് പഞ്ചായത്തിന്‍റെ 2024-25 വാര്‍ഷിക പദ്ധതിയില്‍ ഉള്‍പ്പെടുത്തി ഈസ്റ്റ് എളേരി പഞ്ചായത്തിലെ നന്മ പട്ടികജാതി യുവജനസംഘത്തിന് വാദ്യോപകരണങ്ങള്‍ നല്കി. ബ്ലോക്ക് പഞ്ചായത്ത് പ്രസിഡന്‍റ് എം.ലക്ഷ്മി വിതരണോദ്ഘാടനം നിര്‍വഹിച്ചു. വൈസ് പ്രസിഡന്‍റ് കെ.ഭൂപേഷ് അധ്യക്ഷത വഹിച്ചു. സ്ഥിരം സമിതി അധ്യക്ഷരായ രജനി കൃഷ്ണൻ, പി.വി.ചന്ദ്രൻ, അംഗങ്ങളായ പി.വി.ശ്രീലത, അരുൺ രംഗത്തുമല, എ.വി.രാജേഷ്, സി.രേഖ, സെക്രട്ടറി സി.എം.സുഹാസ്, ജോയിന്‍റ് ബിഡിഒ ബിജുകുമാർ, ബ്ലോക്ക് പട്ടികജാതി വികസന ഓഫീസർ ടി.വി.ശരത് എന്നിവർ സംബന്ധിച്ചു.

എംഡിഎംഎയുമായി യുവാവ് പിടിയിൽ

ചെറുവത്തൂർ: തുരുത്തി തലക്കട്ട് ക്ഷേത്രത്തിന് സമീപം 2.90 ഗ്രാം എംഡിഎംഎയുമായി സ്കൂട്ടറിൽ ഇരിക്കുകയായിരുന്ന യുവാവ് ചന്തേര പോലീസിന്‍റെ പിടിയിലായി. ചെറുവത്തൂർ പയ്യങ്കി സ്വദേശി സർബാസ് അഹമ്മദ് (31) ആണ് പിടിയിലായത്. വാഹന പരിശോധനയ്ക്കെത്തിയ പോലീസിനെ കണ്ട് പരിഭ്രമിക്കുകയും കടന്നുകളയാൻ ശ്രമിക്കുകയും ചെയ്തപ്പോഴാണ് പോലീസ് തടഞ്ഞുനിർത്തി പരിശോധിച്ചത്. എസ്ഐ കെ.പി.സതീഷിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.

തുറമുഖ ഭൂമിയും പാട്ടത്തിന്; വ്യവസായങ്ങൾക്കോ വിനോദസഞ്ചാരത്തിനോ ഉപയോഗിക്കാം

കാസർഗോഡ്: സംസ്ഥാനത്തെ ചെറുകിട തുറമുഖങ്ങളോടനുബന്ധിച്ചുള്ള റവന്യൂ ഭൂമി പൊതു-സ്വകാര്യ പങ്കാളിത്തത്തോടെയുള്ള പദ്ധതികൾക്കായി പാട്ടത്തിന് നല്കാൻ സംസ്ഥാന സർക്കാരിന്‍റെ പദ്ധതി. ഇതിന്‍റെ ഭാഗമായി കാസർഗോഡ് തളങ്കര ഫിഷിംഗ് ഹാർബറിന് സമീപമുള്ള 24 ഏക്കർ റവന്യൂ ഭൂമിയിൽ പുഴയോര ഹോസ്പിറ്റാലിറ്റി സോൺ വികസിപ്പിക്കാൻ കേരള മാരിടൈം ബോർഡ് താത്പര്യപത്രം ക്ഷണിച്ചു. റസ്റ്റോറന്‍റ് കം ഗെയിമിംഗ് സോൺ, വാടകയ്ക്കുള്ള കോട്ടേജുകൾ, പൂന്തോട്ടം, നടപ്പാത, ഇരിപ്പിടങ്ങൾ, ലഘുഭക്ഷണശാലകൾ, നാട്ടുചന്ത, ആംഫി തീയറ്റർ, പാർട്ടി ഏരിയ, മിനി ഓഡിറ്റോറിയം, ഫുഡ് കോർട്ട്, കുട്ടികൾക്കുള്ളകളിസ്ഥലം, അമ്യൂസ്മെന്‍റ് പാർക്ക് തുടങ്ങിയവയാണ് പുഴയോര ഹോസ്പിറ്റാലിറ്റി സോണിൽ സജ്ജമാക്കാൻ ഉദ്ദേശിക്കുന്നത്. സ്ഥലത്തിന്‍റെ ഉടമസ്ഥാവകാശം സർക്കാരിൽ നിലനിർത്തി പാട്ടത്തിനോ മറ്റേതെങ്കിലും വ്യവസ്ഥയിലോ സ്വകാര്യ ഏജൻസികൾക്ക് നടത്തിപ്പിന് കൈമാറും. പദ്ധതി നടപ്പിലാക്കാൻ ഉദ്ദേശിക്കുന്ന മാതൃകയും നിക്ഷേപത്തുകയും രൂപരേഖയുമടക്കം ഉൾക്കൊള്ളിച്ചുള്ള താത്പര്യപത്രങ്ങൾ മെയ് 16 നകം കേരള മാരിടൈം ബോർഡിന് സമർപ്പിക്കാനാണ് നിർദേശം. പദ്ധതി നടപ്പിലാക്കാനുദ്ദേശിക്കുന്ന സ്ഥലത്തിന്‍റെ രണ്ടു വശങ്ങളിൽ പുഴയും മറ്റു രണ്ടു വശങ്ങളിൽ റോഡുമാണ്. ബോട്ട് ജെട്ടിയുമുണ്ട്. ഈ സ്ഥലത്തുള്ള ഉപേക്ഷിച്ച ഗോഡൗണിനെ നവീകരിച്ച് വാട്ടർ ഫ്രണ്ട് റസ്റ്റോറന്‍റും ഗെയിമിംഗ് സോണുമാക്കി മാറ്റാനാണ് ഉദ്ദേശിക്കുന്നത്. കോട്ടേജുകൾ പുതുതായി നിർമിക്കാം. ആഘോഷങ്ങളും കൂടിച്ചേരലുകളും നടത്താൻ കഴിയുന്ന വിധത്തിൽ തുറന്ന പുൽത്തകിടിയും വെളിച്ച സംവിധാനങ്ങളും സ്ഥാപിക്കാനും ഉദ്ദേശിക്കുന്നുണ്ട്. കളിസ്ഥലത്ത് ടർഫ് മൈതാനവും നിർമിക്കാം. ഇതോടൊപ്പം മഞ്ചേശ്വരത്തും നീലേശ്വരം അഴിത്തലയിലും ലഭ്യമായ റവന്യൂ ഭൂമിയുടെ പ്രാഥമിക സർവേ നടത്തിയിട്ടുണ്ട്. സ്വകാര്യ ഏജൻസിയുടെ കീഴിലാണ് സർവേ നടത്തിയത്. കാഞ്ഞങ്ങാട് അജാനൂരിൽ പുതിയ മത്സ്യബന്ധന തുറമുഖത്തിന്‍റെ നിർമാണത്തിനുള്ള ഒരുക്കങ്ങളായതിനാൽ അതു കഴിഞ്ഞു മാത്രമേ അനുബന്ധ വികസനത്തിന് സാധ്യതയുള്ളൂ. കടൽ വിഭവങ്ങളുമായി ബന്ധപ്പെട്ട ഭക്ഷ്യസംസ്കരണ യൂണിറ്റുകളുൾപ്പെടെ തുടങ്ങാൻ കടലോര ഭൂമി ഉപയോഗിക്കാനാകുമെന്നാണ് വിലയിരുത്തൽ. സർക്കാർ മുന്നോട്ടുവയ്ക്കുന്ന പദ്ധതിയിൽ ആവശ്യമായ മാറ്റങ്ങളോ കൂട്ടിച്ചേർക്കലുകളോ വരുത്താൻ താത്പര്യപത്രം നല്കുന്ന ഏജികളെ അനുവദിക്കും. ഈ ആശയങ്ങൾ സർക്കാരിനുകൂടി സ്വീകാര്യമായാൽ മാത്രമേ കരാർ ഒപ്പിടുകയുള്ളൂ. സർക്കാരിന്‍റെ സ്ഥലവും സൗകര്യങ്ങളും ഉപയോഗപ്പെടുത്തിക്കൊണ്ട് നിക്ഷേപം നടത്താൻ സംരംഭകരെ അനുവദിക്കുന്നതിലൂടെ പ്രാദേശികമായി തൊഴിലവസരങ്ങളും വരുമാനവും വർധിപ്പിക്കാൻ കഴിയുമെന്നാണ് വിലയിരുത്തൽ.

വിദ്യാര്‍ഥികള്‍ക്ക് കഞ്ചാവ് നല്‍കിയ പ്രതിക്കെതിരെ കാപ്പ ചുമത്തി

കാസര്‍ഗോഡ്: നിരവധി ലഹരി കേസുകളിലും പോലിസിനെ ആക്രമിച്ച കേസിലും പ്രതിയായ കളനാട് സ്വദേശി കെ.കെ.സമീറിന് (34) എതിരെ കാപ്പ ചുമത്തി. 2022 മുതല്‍ 2025 ഇതുവരെ വരെ നിരവധി നിരോധിത ലഹരി ഉപയോഗവും വില്‍പനയിലും ഏര്‍പ്പെടുകയും ചെയ്ത പ്രതി 2022ല്‍ ഹൊസ്ദുര്‍ഗ്, അമ്പലത്തറ സ്റ്റേഷനുകളിലും 2023ല്‍ ഹൊസ്ദുര്‍ഗ്, ബേക്കല്‍ സ്റ്റേഷനുകളിലും 2024ല്‍ ബേക്കല്‍, മേല്‍പറമ്പ് സ്റ്റേഷനുകളിലും ലഹരി ഉപയോഗം, വില്‍പന നടത്തിയ കേസുകളില്‍ പ്രതിയാണ്. 2025ല്‍ കാസര്‍ഗോഡ് ടൗണ്‍ സ്റ്റേഷന്‍ പരിധിയില്‍ സ്‌കൂള്‍ വിദ്യാര്‍ഥികള്‍ക്ക് കഞ്ചാവ് വില്പന നടത്തിയ കേസിലും പ്രതിയായ ഇയാള്‍ ഈ കേസില്‍ പോലീസ് പിടികൂടാന്‍ ശ്രമിച്ചപ്പോള്‍ പോലീസിനെ ആക്രമിക്കുകയും ഒരു പോലീസുകാരനെ പരിക്കേല്‍പ്പിക്കുകയും ചെയ്തതിനും കേസ് രജിസ്റ്റര്‍ ചെയ്തിട്ടുണ്ട്.

മൗക്കോട് മദ്രസ ഉദ്ഘാടനവും സ്വലാത്ത് വാർഷികവും നാളെ മുതൽ

മൗക്കോട്: പുതുക്കിപ്പണിത മൗക്കോട് സിറാജുൽ ഹുദാ ഹയർ സെക്കൻഡറി മദ്രസ ഉദ്ഘാടനവും സ്വലാത്ത് വാർഷികവും നാളെ മുതൽ 23 വരെ തീയതികളിലായി നടക്കും. 23 ന് വൈകിട്ട് ആറുമണിക്ക് പാണക്കാട് സയ്യിദ് സാദിഖലി ശിഹാബ് തങ്ങൾ മദ്രസയുടെ ഉദ്ഘാടനം നിർവഹിക്കും. രാജ്‌മോഹൻ ഉണ്ണിത്താൻ എംപി, എം രാജഗോപാലൻ എംഎൽഎ എന്നിവർ മുഖ്യാതിഥികളാകും. സ്വലാത്ത് വാർഷികം നാളെ രാത്രി ഏഴുമണിക്ക് സമസ്‌ത ട്രഷറർ പി.പി. ഉമർ മുസ്‌ലിയാർ കൊയ്യോട് ഉദ്ഘാടനം ചെയ്യും. 22 ന് രാവിലെ നടക്കുന്ന വനിതാസംഗമം വെസ്റ്റ് എളേരി പഞ്ചായത്ത് പ്രസിഡന്‍റ് ഗിരിജ മോഹനൻ ഉദ്ഘാടനം ചെയ്യും. രാത്രി ഏഴു മണിക്ക് നവ ലിബറലിസം, യുക്തിവാദം എന്ന വിഷയത്തിൽ സംവാദം നടക്കും.

ജവഹർ നാട്ടുത്സവ്: സാംസ്കാരിക സമ്മേളനം നടന്നു

ഇരിയ: കാട്ടുമാടം ജവഹർ ആർട്സ് ആൻഡ് സ്‌പോർട്സ് ക്ലബ് രജതജൂബിലി ആഘോഷം ജവഹർ നാട്ടുത്സവ് -2025 ന്‍റെ ഭാഗമായുള്ള സാംസ്കാരിക സമ്മേളനം എൻ.എ.നെല്ലിക്കുന്ന് എംഎൽഎ ഉദ്ഘാടനം ചെയ്തു. രജനി നാരായണൻ അധ്യക്ഷത വഹിച്ചു. സിനിമ-സീരിയൽ താരം ഉണ്ണിരാജ് ചെറുവത്തൂർ, മജീഷ്യൻ ബാലചന്ദ്രൻ കൊട്ടോടി എന്നിവർ മുഖ്യാതിഥികളായി. കെ.വി.കേളു ഇരിയ, ഗോപി മുളവന്നൂർ, ഷിബിൻ ഉപ്പിലിക്കൈ, വിജയൻ ശങ്കരംപാടി, മാസ്റ്റർ മഹിപാൽ, അബ്ദുൾ റഷീദ്, ഷാലു മാത്യു, നവനീത് ചന്ദ്രൻ, അശ്വിൻ കൊല്ലാലയിൽ, വിനു വേലാശ്വരം, കെ.വി. ഗോപാലൻ ഇരിയ, കെ.ടി. കണ്ണൻ കാട്ടുമാടം, സതീശൻ ഇരിയ, വിഷ്ണു കാട്ടുമാടം എന്നിവർ പ്രസംഗിച്ചു. വിവിധ കലാപരിപാടികളും അരങ്ങേറി.

ഗസറ്റഡ് ഓഫീസേഴ്സ് അസോസിയേഷൻ ജില്ലാ സമ്മേളനം തുടങ്ങി

ചെറുവത്തൂർ: കേരള ഗസറ്റഡ് ഓഫീസേഴ്സ് അസോസിയേഷൻ (കെജിഒഎ) ജില്ലാ സമ്മേളനത്തിന് ചെറുവത്തൂരിൽ തുടക്കമായി. ഇന്നലെ വൈകിട്ട് ബസ് സ്റ്റാൻഡ് പരിസരത്ത് നടന്ന പൊതുസമ്മേളനം മുൻ എംഎൽഎ ടി.വി.രാജേഷ് ഉദ്ഘാടനം ചെയ്തു. സംഘാടക സമിതി ചെയർമാൻ മാധവൻ മണിയറ അധ്യക്ഷത വഹിച്ചു. കെജിഒഎ സംസ്ഥാന സെക്രട്ടറി എം.എൻ.ശരത്ചന്ദ്ര ലാൽ, സംസ്ഥാന സെക്രട്ടറിയറ്റ് അംഗങ്ങളായ എസ്.ദിലീപ്, വി.ചന്ദ്രൻ എന്നിവർ പ്രസംഗിച്ചു. നേരത്തേ തേജസ്വിനി ഓഡിറ്റോറിയത്തിൽ നടന്ന ജില്ലാ കൗൺസിൽ യോഗത്തിൽ ജില്ലാ പ്രസിഡന്‍റ് മധു കരിമ്പിൽ അധ്യക്ഷത വഹിച്ചു. ജില്ലാ സെക്രട്ടറി കെ.വി.രാഘവൻ പ്രവർത്തന റിപ്പോർട്ട് അവതരിപ്പിച്ചു. എം.അനുസൂര്യ, കെ.സജിത്ത് കുമാർ, പി.വി. സച്ചിൻരാജ്, ഡോ.രമ്യ എന്നിവർ പ്രസംഗിച്ചു. ഭാരവാഹികളായി മധു കരിമ്പിൽ (പ്രസിഡന്‍റ്), വൈശാഖ് ബാലൻ, പി.വി.ആർജിത (വൈ. പ്രസി), കെ.വി.രാഘവൻ (സെക്രട്ടറി), കെ.പി.ഗംഗാധരൻ, രമേശൻ കോളിക്കര (ജോ. സെക്ര), പി.കെ.ബാലകൃഷ്ണൻ (ട്രഷറര്‍) എന്നിവരെ തെരഞ്ഞെടുത്തു. ഇന്ന് രാവിലെ നടക്കുന്ന പ്രതിനിധി സമ്മേളനം എം.രാജഗോപാലൻ എംഎൽഎ ഉദ്ഘാടനം ചെയ്യും.

സൗജന്യ നേത്രപരിശോധന ക്യാമ്പ് നടത്തി

ബദിയടുക്ക: ബദിയടുക്ക സെന്‍റ് മേരീസ് പള്ളി ദിയാക്കോണിയയുടെ ആഭിമുഖ്യത്തിൽ ബേള കൗമുദി ഗ്രാമീണ നേത്രാലയത്തിന്‍റെ സഹകരണത്തോടെ സൗജന്യ നേത്രപരിശോധന ക്യാമ്പ് സംഘടിപ്പിച്ചു. ഇടവക വികാരി ഫാ.ചാക്കോ കുടിപ്പറമ്പിൽ ഉദ്ഘാടനം ചെയ്തു. ഡോ.എൻ.സുനിൽ, ഡോ.വിനയ ഗൗഡ എന്നിവർ പരിശോധനകൾ നടത്തി. നൂറോളം പേർ ക്യാമ്പിൽ പങ്കെടുത്തു.

ദളിതർ അധികാര രാഷ്ട്രീയത്തിന്‍റെ അകത്തളത്തിലെത്തണം: പി.രാമഭദ്രൻ

കാസർഗോഡ്: അകത്തളത്തിൽ എത്തപ്പെട്ടാൽ മാത്രമേ ദളിതർക്ക് പുരോഗതി കൈവരിക്കാൻ കഴിയുകയുള്ളൂവെന്ന് കേരള ദളിത് ഫെഡറേഷൻ (കെഡിഎഫ്) സംസ്ഥാന പ്രസിഡന്‍റും കരകൗശല വികസന കോർപ്പറേഷൻ ചെയർമാനുമായ പി.രാമഭദ്രൻ പറഞ്ഞു. ഡോ.ബി.ആർ അംബേദ്കറുടെ ജന്മദിനത്തോടനുബന്ധിച്ച് ദളിതരും രാഷ്ട്രീയ അധികാരവും എന്ന വിഷയത്തില്‍ കെഡിഎഫ് ജില്ലാ കമ്മിറ്റി സംഘടിപ്പിച്ച ചർച്ചാ സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം . രാഷ്ട്രീയ അധികാരം ഇല്ലാത്ത ജനവിഭാഗം കരയിൽ പിടിച്ചിട്ട മത്സ്യത്തെപ്പോലെയാണെന്ന് അദ്ദേഹം പറഞ്ഞു. ദളിതർക്ക് അർഹമായ രാഷ്ട്രീയ അധികാരം നാളിതുവരെയും കേരളത്തിൽ ലഭിച്ചിട്ടില്ല. അധികാരമുണ്ടെങ്കിലേ പാവപ്പെട്ട ജനങ്ങളുടെ ക്ഷേമത്തിനും വികസനത്തിനുമായി നയപരിപാടികൾ ആവിഷ്കരിച്ച് പ്രാവർത്തികമാക്കാൻ കഴിയൂവെന്ന് അദ്ദേഹം പറഞ്ഞു. കെഡിഎഫ് ജില്ലാ പ്രസിഡന്‍റ് ഗോപി കുതിരക്കൽ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് വിജയൻ സി. കുട്ടമത്ത്, സംസ്ഥാന പ്രവർത്തകസമിതി അംഗം കെ.പി.റുഫാസ്, നാരായണൻ പെരിയ, കെ.പി.കൃഷ്ണൻ പൂക്കളം, നാണു മുത്തനടുക്കം, എം.കമലാക്ഷി, രാജൻ സി.കാട്ടുമാടം എന്നിവര്‍ പ്രസംഗിച്ചു.

ജവഹർ നാട്ടുത്സവിന് സമാപനം

ഇരിയ: കാട്ടുമാടം ജവഹർ ആർട്സ് ആൻഡ് സ്‌പോർട്സ് ക്ലബ് രജതജൂബിലി ആഘോഷത്തിന്‍റെ ഭാഗമായുള്ള ജവഹർ നാട്ടുത്സവ് -2025 ന്‍റെ സമാപന പരിപാടി മുൻ കേന്ദ്രമന്ത്രി മുല്ലപ്പള്ളി ‌രാമചന്ദ്രൻ ഉദ്ഘാടനം ചെയ്തു. പുല്ലൂർ-പെരിയ പഞ്ചായത്ത്‌ പ്രസിഡന്‍റ് സി.കെ.അരവിന്ദാക്ഷൻ അധ്യക്ഷത വഹിച്ചു. ക്രൈംബ്രാഞ്ച് ഡിവൈഎസ്പി ഉത്തംദാസ് മുഖ്യാതിഥിയായി.സംഘാടക സമിതി ചെയർമാൻ രാജൻ പെരിയ പതാക ഉയർത്തി. വെള്ളച്ചിയമ്മ കാട്ടുമാടം ഭദ്രദീപം കൊളുത്തി. വിളംബര ഘോഷയാത്ര കോടോം-ബേളൂർ പഞ്ചായത്ത്‌ വൈസ് പ്രസിഡന്‍റ് പി.ദാമോദരൻ ഫ്ലാഗ് ഓഫ് ചെയ്തു. ഡിസിസി പ്രസിഡന്‍റ് പി.കെ.ഫൈസൽ, ഹക്കീം കുന്നിൽ, കെ.വി.ഗോപാലൻ ഇരിയ, കെ.ടി.കണ്ണൻ കാട്ടുമാടം, രജനി നാരായണൻ, രതീഷ് ആർ.കാട്ടുമാടം, സതീശൻ ഇരിയ, വിഷ്ണു കാട്ടുമാടം എന്നിവർ പ്രസംഗിച്ചു.

എരിക്കുളത്ത് വീണ്ടും മണ്ണെടുപ്പ് കാലം

നീലേശ്വരം: ജില്ലയുടെ മൺപാത്ര ഗ്രാമമായ എരിക്കുളത്ത് വിഷുവിന് പിന്നാലെ വീണ്ടും മണ്ണെടുപ്പ് കാലം തുടങ്ങി. അടുത്ത ഒരു വർഷക്കാലത്തേക്ക് മൺപാത്രങ്ങൾ നിർമിക്കുന്നതിനുള്ള കളിമണ്ണാണ് വിഷുവിനു പിന്നാലെയുള്ള രണ്ടാഴ്ചക്കാലം കൊണ്ട് എരിക്കുളം വയലിൽനിന്ന് കുഴിച്ചെടുക്കുന്നത്. വയലിൽ പലയിടത്തായി മേൽമണ്ണ് നീക്കി ആഴത്തിൽ കുഴിയെടുത്താണ് കളിമണ്ണ് ശേഖരിക്കുക. പരമ്പരാഗത രീതിയിൽ മൺപാത്രങ്ങൾ നിർമിക്കുന്ന കുടുംബങ്ങളിലെ ആൺ-പെൺ വ്യത്യാസമില്ലാതെ മുഴുവൻ ആളുകളും മണ്ണെടുപ്പിൽ പങ്കാളികളാകും. സർക്കാർ ഉദ്യോഗസ്ഥരുൾപ്പെടെ മറ്റ് തൊഴിലുകൾ ചെയ്യുന്നവരും ഒപ്പം ചേരാറുണ്ട്. ഓരോ വീടിന്‍റെയും മുറ്റത്ത് തളമുണ്ടാക്കിയാണ് കിളച്ചെടുത്ത കളിമണ്ണ് സൂക്ഷിച്ചുവയ്ക്കുക. ഇടവപ്പാതി കഴിയാറാകുമ്പോഴേക്കും അടുത്ത സീസണിലേക്കുള്ള മൺപാത്രങ്ങളുടെ നിർമാണം തുടങ്ങും. എരിക്കുളം ഗ്രാമത്തിൽ പരമ്പരാഗത രീതിയിൽ നിർമിക്കുന്ന മൺപാത്രങ്ങൾക്ക് ഭൗമസൂചികാ പദവി ലഭ്യമാക്കുന്നതിനുള്ള നടപടിക്രമങ്ങൾ അവസാനഘട്ടത്തിലാണ്. സാധാരണ രീതിയിലുള്ള മൺകലങ്ങൾക്കും വിഷുവിനോടനുബന്ധിച്ച് ചിത്രപ്പണികൾ നടത്തിയ കണിക്കലങ്ങൾക്കുമൊപ്പം പുതിയ കാലത്തിന്‍റെ ആവശ്യങ്ങൾക്കനുസൃതമായ പുതിയ രൂപങ്ങളിലും മൺപാത്രങ്ങൾ നിർമിക്കുന്നുണ്ട്. എരിക്കുളം വയലിലെ കളിമണ്ണിൽ മഗ്നീഷ്യം, പൊട്ടാസ്യം, സിങ്ക് എന്നിവയ്ക്കു പുറമേ 20 ശതമാനത്തോളം കാത്സ്യവുമുണ്ടെന്ന് ഗവേഷണങ്ങളിൽ കണ്ടെത്തിയിട്ടുണ്ട്. ഈ മണ്ണുകൊണ്ട് നിർമിക്കുന്ന പാത്രങ്ങൾക്ക് കൂടുതൽ ഉറപ്പും പോഷകസമ്പുഷ്ടതയും ലഭിക്കാൻ ഇത് വഴിയൊരുക്കുന്നു. വിഷുക്കാലത്ത് കണിക്കലങ്ങളുടെ രൂപത്തിലാണ് എരിക്കുളത്തെ മൺപാത്രങ്ങൾ ഏറ്റവുമധികം വിൽക്കപ്പെടുന്നത്. ഓരോ കുടുംബവും അവരവരുടെ ആവശ്യത്തിന് കളിമണ്ണ് ശേഖരിച്ചതിനു ശേഷം വീണ്ടും മേൽമണ്ണിട്ട് കുഴികൾ നികത്തും. ഈ രീതിയിൽ വർഷാവർഷം മണ്ണെടുത്ത് ഇളക്കിമറിക്കുന്നത് വയലിന്‍റെ ഫലഭൂയിഷ്ഠത നിലനിർത്താനും സഹായകമാകുന്നുണ്ട്. പത്തേക്കറിലധികം വിസ്തൃതിയുള്ള വയലിൽ മഴക്കാലത്ത് നെൽകൃഷിയും മറ്റു സമയങ്ങളിൽ സമൃദ്ധമായ പച്ചക്കറി കൃഷിയും നടക്കുന്നുണ്ട്.

കെഎസ്ആര്‍ടിസി ഡിപ്പോയില്‍ ടിക്കറ്റ് റിസര്‍വേഷന്‍ നിര്‍ത്തലാക്കി

കാസര്‍ഗോഡ്: കെഎസ്ആര്‍ടിസി കാസര്‍ഗോഡ് ഡിപ്പോയില്‍ ടിക്കറ്റ് റിസര്‍വേഷന്‍ സേവനം നിര്‍ത്തലാക്കി. എന്നാല്‍ ഇതേ ഡിപ്പോയില്‍ കര്‍ണാടക ട്രാന്‍സ്‌പോര്‍ട്ട് കോര്‍പറേഷന്‍ ബസുകള്‍ക്കുള്ള റിസര്‍വേഷന്‍ മുടക്കമില്ലാതെ തുടരുന്നുണ്ട്. ഒരുമാസം മുമ്പു വരെ ഉണ്ടായിരുന്ന റിസര്‍വേഷന്‍ സൗകര്യമാണ് കെഎസ്ആര്‍ടിസി ഒഴിവാക്കിയത്. കെഎസ്ആര്‍ടിസി കണ്ണൂര്‍, കോഴിക്കോട് ഡിപ്പോകളില്‍ റിസര്‍വേഷന്‍ സൗകര്യം തുടരുന്നുണ്ട്. കാസര്‍ഗോഡ് ഡിപ്പോയില്‍ രണ്ടാംനിലയിലായിരുന്നു റിസര്‍വേഷന്‍ കൗണ്ടര്‍. താഴത്തെ നിലയിലാണ് കര്‍ണാടക കെഎസ്ആര്‍ടിസിയുടെ റിസര്‍വേഷന്‍ കൗണ്ടര്‍. ഓണ്‍ലൈന്‍ വഴി റിസര്‍വേഷന്‍ ചെയ്യാന്‍ അറിയാത്തവര്‍ ഉള്‍പ്പെടെ പലരും ഡിപ്പോയില്‍ നേരിട്ടെത്തിയാണ് ഇതു ചെയ്തിരുന്നത്. ഇങ്ങനെ എത്തുന്നവരെയെല്ലാം ഇപ്പോള്‍ കെഎസ്ആര്‍ടിസി അധികൃതര്‍ മടക്കിവിടുകയാണ്. ഒടുവില്‍ ഇവരില്‍ പലരും താഴത്തെ നിലയിലുള്ള കര്‍ണാടക റിസര്‍വേഷന്‍ കൗണ്ടറില്‍ എത്തി കര്‍ണാടക കോര്‍പറേഷന്‍ ബസുകളില്‍ ടിക്കറ്റ് ബുക്ക് ചെയ്യുകയാണ്. ഡിപ്പോയിലെ ടിക്കറ്റ് ആന്‍ഡ് കാഷ് കൗണ്ടറിലെ ജീവനക്കാരുടെ സേവനം തുടര്‍ന്നും ഉപയോഗപ്പെടുത്തിയാല്‍ റിസര്‍വേഷന്‍ സൗകര്യം കൂടി യാത്രക്കാര്‍ക്ക് ലഭിക്കും. ഇതിന് അധിക സാമ്പത്തികബാധ്യതയില്ല. എന്നാല്‍ പ്രതിമാസം 500 ടിക്കറ്റ് റിസര്‍വേഷന്‍ ഉണ്ടെങ്കില്‍ മാത്രം കൗണ്ടര്‍ റിസര്‍വേഷന്‍ തുടര്‍ന്നാല്‍ മതിയെന്ന നിലാപാടിലാണ് അധികൃതര്‍. ഇതോടെ യാത്രക്കാര്‍ കര്‍ണാടക ബസുകളെ കൂടുതലായി ആശ്രയിക്കുന്നു. നേരത്തെ അനുവദിച്ചിരുന്ന കൗണ്ടര്‍ രണ്ടാംനിലയില്‍ ആയതിനാല്‍ അപ്പോഴും പലരും താഴത്തെ കൗണ്ടറിലാണ് ടിക്കറ്റെടുത്തിരുന്നത്. ഇതാണ് കേരള കെഎസ്ആർടിസിയുടെ റിസര്‍വേഷൻ കുറയാന്‍ കാരണമായത്.

നാട്യരത്‌നം കണ്ണന്‍ പാട്ടാളി ആശാന്‍ സ്മാരകമന്ദിര ഉദ്ഘാടനവും പുരസ്‌കാര സമര്‍പ്പണവും

കാസർഗോഡ്: നാട്യരത്‌നം കണ്ണന്‍ പാട്ടാളി കഥകളി ട്രസ്റ്റിനു വേണ്ടി പുതുതായി നിര്‍മിച്ച സ്മാരക മന്ദിര ഉദ്ഘാടനവും ആംഫി തിയേറ്റര്‍ സമര്‍പ്പണവും വാര്‍ഷിക ദിനാചരണവും 19, 20 തീയതികളില്‍ തച്ചങ്ങാട് അരവത്ത് നടക്കും. ഇതോടനുബന്ധിച്ച് രണ്ടു ദിവസങ്ങളില്‍ ആറു സെഷനുകളിലായി ദേശീയ സെമിനാര്‍ സംഘടിപ്പിക്കും. 19നു രാവിലെ 10നു നടക്കുന്ന സമ്മേളനം സി.എച്ച്.കുഞ്ഞമ്പു എംഎല്‍എ ഉദ്ഘാടനം ചെയ്യും. ഡോ. വൈ.വി.കണ്ണന്‍ മുഖ്യപ്രഭാഷണം നടത്തും. വൈകുന്നേരം നടക്കുന്ന സാംസ്‌കാരിക സമ്മേളനത്തില്‍ മട്ടന്നൂര്‍ ശങ്കരന്‍കുട്ടി മാരാര്‍ സ്മാരക മന്ദിരത്തിന്‍റെ ഉദ്ഘാടനവും ഭാവഭാരതി പുരസ്‌കാര സമര്‍പ്പണവും നിര്‍വഹിക്കും. ട്രസ്റ്റ് പുതുതായി നിര്‍മിച്ച ആംഫി തിയേറ്റര്‍ നസീര്‍ വെളിയില്‍ നാടിനു സമര്‍പ്പിക്കും. 20നു നടക്കുന്ന സമാപനസമ്മേളനത്തിന്‍റെ ഉദ്ഘാടനവും നാട്യാചാര്യ, പ്രതിഭ പുരസ്‌കാര സമര്‍പ്പണവും മന്ത്രി രാമചന്ദ്രന്‍ കടന്നപ്പള്ളി നിര്‍വഹിക്കും. രാജ്‌മോഹന്‍ ഉണ്ണിത്താന്‍ എംപി മുഖ്യാതിഥിയായിരിക്കും. പത്രസമ്മേളനത്തില്‍ എ.എം.ശ്രീധരന്‍, പി.വി. ഭാസ്‌കരന്‍, മധു മുദിയക്കാന്‍, പി.കെ. ജയരാജന്‍, നാസര്‍ പട്ടേല്‍ എന്നിവര്‍ പങ്കെടുത്തു.

പാലത്തിനായുള്ള കാത്തിരിപ്പ് തീരുന്നു

കരിന്തളം: കിനാനൂർ-കരിന്തളം, കോടോം-ബേളൂർ പഞ്ചായത്തുകളെ തമ്മിൽ ബന്ധിപ്പിക്കുന്ന കിളിയളം-വരഞ്ഞൂർ-കമ്മാടം കിഫ്ബി റോഡിൽ കിളിയളം ചാലിന് കുറുകെ പുതിയ പാലത്തിനായുള്ള കാത്തിരിപ്പ് തീരുന്നു. കിഫ്ബി പദ്ധതിയിൽ 4.2 കോടി രൂപ ചെലവിൽ നിർമിച്ച പുതിയ പാലത്തിന്‍റെ ഉദ്ഘാടനം 22 ന് പൊതുമരാമത്ത് മന്ത്രി പി.എ.മുഹമ്മദ് റിയാസ് നിർവഹിക്കും. കിഫ്ബി പദ്ധതിയിൽ 25 കോടി രൂപ ചെലവിൽ റോഡിന്‍റെ നിർമാണം പൂർത്തിയാക്കിയിട്ട് വർഷങ്ങളായെങ്കിലും കിളിയളം പാലത്തിന്‍റെ നിർമാണം പൂർത്തിയാകാത്തതിനാൽ റോഡ് കൊണ്ടുള്ള യഥാർഥ പ്രയോജനം ലഭിച്ചിരുന്നില്ല. പാലവും സമീപന റോഡുകളും 2016-17 വർഷം തന്നെ കിഫ്ബി പദ്ധതിയിൽ ഉൾപ്പെടുത്തിയിരുന്നെങ്കിലും സാങ്കേതിക നടപടിക്രമങ്ങൾ അനിശ്ചിതമായി നീണ്ടുപോവുകയായിരുന്നു. 2021 ലാണ് പദ്ധതിക്ക് പൊതുമരാമത്ത് വകുപ്പിന്‍റെ ഭരണാനുമതിയും സാങ്കേതികാനുമതിയും ലഭിച്ച് ടെൻഡർ വിളിച്ചത്. എന്നാൽ പ്രവൃത്തികൾ തുടങ്ങാനും പൂർത്തിയാകാനും പിന്നെയും വർഷങ്ങളെടുത്തു. പാലത്തിന്‍റെ നിർമാണം തുടങ്ങിയതോടെ ഇതുവഴിയുള്ള ഗതാഗതം തടസപ്പെട്ടതിനെ തുടർന്ന് സമീപപ്രദേശങ്ങളിലുള്ളവർ കടുത്ത യാത്രാദുരിതത്തിലായിരുന്നു. പുതിയ പാലം തുറക്കുന്നതോടെ ചാങ്ങാട്, പുതുക്കുന്ന്, വട്ടക്കല്ല്, ചേടിക്കുണ്ട് വരഞ്ഞൂർ പ്രദേശങ്ങളിലെ ജനങ്ങൾക്ക് കൊല്ലംപാറ വഴി നീലേശ്വരത്തേക്കും ബാനം, പരപ്പ വഴി താലൂക്ക് ആസ്ഥാനമായ വെള്ളരിക്കുണ്ടിലേക്കും കുറഞ്ഞ ദൂരത്തിൽ എത്താനാകും. മലയോരത്തിന്‍റെ പ്രകൃതിസൗന്ദര്യത്തോട് ചേർന്നു നിൽക്കുന്ന തരത്തിലുള്ള നിർമാണഭംഗിയും പാലത്തിന്‍റെ ആകർഷണമാണ്.

ലഹരി വിരുദ്ധ സന്ദേശ കാമ്പയിൻ

മഞ്ചേശ്വരം: സ്നേഹാലയ ലഹരി വിമോചന ചികിത്സാ കേന്ദ്രം, കാസർഗോഡ് ജില്ലാ കേരള പോലീസ് അസോസിയേഷൻ, മഞ്ചേശ്വരം പോലീസ് സ്റ്റേഷൻ എന്നിവയുടെ സംയുക്താഭിമുഖ്യത്തിൽ ഉപ്പള, ഹൊസങ്ങാടി എന്നിവിടങ്ങളിൽ ലഹരി വിരുദ്ധ സന്ദേശങ്ങൾ നൽകുന്ന ഫ്ലാഷ് മോബ്, മൈം, തെരുവ് നാടകം എന്നിവ ഉൾപ്പെടുന്ന കാമ്പയിൻ സംഘടിപ്പിച്ചു. കാസർഗോഡ് എഎസ്പി പി. ബാലകൃഷ്ണൻ നായർ കാമ്പയിൻ ഉദ്ഘാടനം ചെയ്തു. മഞ്ചേശ്വരം എസ്ഐ ഇ. അനൂപ് കുമാർ, കാഞ്ഞങ്ങാട് എസ്ഐ കെ. അജിത് കുമാർ, മഞ്ചേശ്വരം സ്നേഹാലയ ഡി അഡിക്ഷൻ സെന്‍റർ ഡയറക്‌ടർ ജോസഫ് ക്രാസ്റ്റ എന്നിവർ ലഹരി വിരുദ്ധ സന്ദേശം നൽകി. മഞ്ചേശ്വരം ജനമൈത്രി ബീറ്റ് പോലീസ് ഓഫീസർ മധു കറകടവത്ത് പ്രസംഗിച്ചു.

പ്രതിഷേധപ്രകടനം നടത്തി

കാഞ്ഞങ്ങാട്: യൂത്ത് കോൺഗ്രസ്‌ സംസ്ഥാന പ്രസിഡന്‍റ് രാഹുൽ മാങ്കൂട്ടത്തിനെതിരെ ബിജെപി നടത്തിയ കൊലവിളി പ്രസംഗത്തിൽ പ്രതിഷേധിച്ച് യൂത്ത് കോൺഗ്രസ്‌ ജില്ലാ കമ്മിറ്റിയുടെ നേതൃത്വത്തിൽ കാഞ്ഞങ്ങാട് നഗരത്തിൽ പ്രകടനവും യോഗവും നടത്തി. കെപിസിസി അംഗം ഹക്കീം കുന്നിൽ ഉദ്ഘാടനം ചെയ്തു. യൂത്ത് കോൺഗ്രസ്‌ ജില്ലാ പ്രസിഡന്‍റ് കെ.ആർ.കാർത്തികേയൻ അധ്യക്ഷത വഹിച്ചു. സംസ്ഥാന സെക്രട്ടറി ഉനൈസ് ബേഡകം, ജില്ലാ വൈസ് പ്രസിഡന്‍റ് രാജേഷ് തമ്പാൻ, വിനോദ് കപ്പിത്താൻ, ഗിരികൃഷ്ണൻ കൂടാല, ദീപു കല്ല്യോട്ട്, ശിവപ്രസാദ് അറുവാത്ത്, രജിത രാജൻ, രോഹിത് എറുവാട്ട്, ഷിബിൻ ഉപ്പിലിക്കൈ, എച്ച്.ആർ.വിനീത്, രതീഷ് ഞെക്ലി, സുധീഷ് പാത്തനടുക്കം, ഗുരുപ്രസാദ് കാടകം, മയൂഖ, ശരത്ത് മരക്കാപ്പ്, സുധീഷ് പാണൂർ എന്നിവർ നേതൃത്വം നല്കി.

പാണ്ടിക്കണ്ടം പാലത്തിലേക്ക് റോഡിന് കാത്തിരിപ്പ് നീളുന്നു

ബോവിക്കാനം: മുളിയാർ-ബേഡഡുക്ക പഞ്ചായത്തുകളെ തമ്മിൽ ബന്ധിപ്പിച്ച് പയസ്വിനി പുഴയ്ക്ക് കുറുകെയുള്ള പാണ്ടിക്കണ്ടം പാലം ഉദ്ഘാടനം ചെയ്തിട്ട് ഏഴു വർഷമാകുന്നു. 2018 മെയ് 18ന് അന്നത്തെ ജലവിഭവമന്ത്രി മാത്യു ടി.തോമസാണ് പാലം ഉദ്ഘാടനം ചെയ്തത്. ബേഡഡുക്ക പഞ്ചായത്തിലെ കൊളത്തൂരിൽ നിന്നും കുണ്ടംകുഴിയിൽ നിന്നും പാലത്തിലേക്ക് റോഡുകളുണ്ട്. പക്ഷേ മുളിയാർ പഞ്ചായത്തിന്‍റെ ഭാഗത്തെ റോഡ് ഇനിയും പൂർത്തിയാകാത്തതിനാൽ പാലം ഇതുവരെ പൂർണതോതിൽ ഗതാഗതത്തിന് പ്രയോജനപ്പെടുത്താനായിട്ടില്ല. കുട്ടിയാനത്തുനിന്ന് പാലത്തിലേക്കുള്ള വനപാതയിലൂടെ ജീപ്പുകൾ മാത്രം ഏറെ ബുദ്ധിമുട്ടി കടന്നുപോകുന്നുണ്ട്. മഴക്കാലമായാൽ അതും നിലയ്ക്കും. കുട്ടിയാനത്തുനിന്ന് മൂന്നര കിലോമീറ്റർ ദൂരമാണ് പാലത്തിലേക്കുള്ളത്. ഇതിൽ കഷ്ടിച്ച് ഒന്നര കിലോമീറ്റർ ദൂരം മാത്രമാണ് ടാർ ചെയ്ത റോഡുള്ളത്. ബാക്കിയുള്ള രണ്ട് കിലോമീറ്ററിൽ പകുതിയോളം ദൂരം വനമേഖലയിലൂടെ കടന്നുപോകുന്നതാണ്. ബാക്കി ഭാഗം സ്വകാര്യ വ്യക്തികളുടെ ഉടമസ്ഥതയിലുള്ള സ്ഥലങ്ങളാണ്. സ്വകാര്യ ഭൂമി റോഡിനായി വിട്ടുനല്കാൻ ഉടമകൾ തയ്യാറായിട്ടുണ്ടെങ്കിലും ഈ ഭാഗം ടാറിംഗ് നടത്താൻ പഞ്ചായത്തിന് ഇതുവരെ കഴിഞ്ഞിട്ടില്ല. വനത്തിലൂടെ കടന്നുപോകുന്ന ഭാഗം അളന്ന് തിട്ടപ്പെടുത്തിയിട്ടുണ്ടെങ്കിലും അത് വിട്ടുകിട്ടുന്നതിനുള്ള പ്രാഥമിക നടപടിക്രമങ്ങൾ പോലും തുടങ്ങിയിട്ടില്ല. മലയോരഹൈവേയ്ക്ക് വനഭൂമി വിട്ടുകിട്ടാൻ പോലും വർഷങ്ങളെടുക്കുന്ന സാഹചര്യത്തിൽ ഇനി നടപടിക്രമങ്ങൾ തുടങ്ങിയാലും എന്നേക്ക് വനഭൂമി വിട്ടുകിട്ടി റോഡ് നിർമാണം തുടങ്ങാൻ കഴിയുമെന്ന കാര്യത്തിൽ ആർക്കും ഒരു ധാരണയുമില്ല. നിലവിലുള്ള റോഡിൽ 600 മീറ്റർ ദൂരം രാജ്മോഹൻ ഉണ്ണിത്താൻ എംപിയുടെ ഫണ്ട് ഉപയോഗിച്ചും ബാക്കി കുറച്ചുദൂരം തൊഴിലുറപ്പ് പദ്ധതിയിൽ ഉൾപ്പെടുത്തിയും കോൺക്രീറ്റ് ചെയ്തിട്ടുണ്ട്. എംഎൽഎ ഫണ്ട് ഉപയോഗിച്ച് ചില ഭാഗങ്ങളിൽ പാർശ്വഭിത്തിയും നിർമിച്ചിട്ടുണ്ട്. പക്ഷേ വനഭൂമിയും സ്വകാര്യഭൂമിയും ഉൾപ്പെടുന്ന ബാക്കിഭാഗത്തുകൂടി റോഡ് നിർമിക്കാതെ ഇതൊന്നും കൊണ്ട് ഒരു പ്രയോജനവുമില്ലാത്ത സ്ഥിതിയാണ്. പഞ്ചായത്ത് ആസ്ഥാനമായ ബോവിക്കാനത്തുനിന്ന് കുട്ടിയാനം വരെ നല്ല റോഡുണ്ട്. കുട്ടിയാനത്തുനിന്ന് പാലത്തിലേക്ക് ഗതാഗതയോഗ്യമായ റോഡ് നിർമിച്ചാൽ ഈ പാലം വഴി ബോവിക്കാനത്തുനിന്ന് ബേഡഡുക്ക പഞ്ചായത്തിലെ കുണ്ടംകുഴി വരെ കുറഞ്ഞ ദൂരത്തിൽ എത്താൻ കഴിയും. ഇപ്പോൾ പൊയിനാച്ചി വഴിയോ കുറ്റിക്കോൽ വഴിയോ 20 കിലോമീറ്ററിലേറെ ചുറ്റി സഞ്ചരിക്കുന്ന ദൂരം 9 കിലോമീറ്ററായി കുറയും. ഇതുവഴി ബസ് സർവീസുകളും തുടങ്ങാനാകും. പാലം നിർമിക്കുമ്പോൾ നാട്ടുകാരുടെ മനസ്സിലുണ്ടായിരുന്ന പ്രതീക്ഷയും ഇതായിരുന്നു. പക്ഷേ റോഡിന്‍റെ കാര്യത്തിൽ പഞ്ചായത്ത് ഭരണസമിതികളും മറ്റു ജനപ്രതിനിധികളും നിസംഗത പാലിക്കുമ്പോൾ 21 കോടിയോളം രൂപ ചെലവഴിച്ച് നിർമിച്ച പാലം ഏഴു വർഷമായി വെറുതേ കിടക്കുകയാണ്. പുലി ഉൾപ്പെടെയുള്ള കാട്ടുമൃഗങ്ങൾക്ക് മുളിയാർ പഞ്ചായത്തിന്‍റെ ഭാഗത്തുനിന്ന് ബേഡഡുക്ക പഞ്ചായത്തിലേക്ക് കടക്കാൻ മാത്രമാണ് ഈ പാലം കാര്യമായി പ്രയോജനപ്പെട്ടിട്ടുള്ളത്. ഇനി എന്നേക്ക് റോഡ് വരുമെന്ന കാര്യത്തിൽ കൃത്യമായ ഉറപ്പ് നല്കാനും അധികൃതർക്ക് കഴിയുന്നില്ല.

പ്രതിഷേധ ധര്‍ണ നടത്തി

കാസര്‍ഗോഡ്: ബിജെപി സര്‍ക്കാര്‍ കോണ്‍ഗ്രസ് പാര്‍ട്ടിയെയും നേതാക്കളെയും രാഷ്ട്രീയ പകപോക്കലിന്‍റെ ഭാഗമായി വേട്ടയാടുന്നതിനെതിരെ ഡിസിസിയുടെ നേതൃത്വത്തില്‍ കാസര്‍ഗോഡ് ഹെഡ് പോസ്റ്റ് ഓഫീസിനുമുന്നില്‍ നടത്തിയ പ്രതിഷേധ ധര്‍ണ രാജ്മോഹന്‍ ഉണ്ണിത്താന്‍ എംപി ഉദ്ഘാടനം ചെയ്തു. സാജിദ് മവ്വല്‍ അധ്യക്ഷതവഹിച്ചു. പി.എ.അഷ്റഫലി, എം.സി.പ്രഭാകരന്‍, പി.വി.സുരേഷ്, എ.ഗോവിന്ദന്‍ നായര്‍, എം.രാജീവന്‍ നമ്പ്യാര്‍, കെ.ഖാലിദ്, ജവാദ് പുത്തൂര്‍, എ.വാസുദേവന്‍, അര്‍ജുനന്‍ തായലങ്ങാടി, ജി. നാരായണന്‍, എ.വേലായുധന്‍, ശ്യാമപ്രസാദ് മാന്യ, സി.അശോക് കുമാര്‍ എന്നിവര്‍ സംസാരിച്ചു.

പദ്ധതി നിര്‍വഹണ മികവില്‍ പുല്ലൂര്‍-പെരിയ പഞ്ചായത്ത്

പെരിയ: നികുതി പിരിവിലും പദ്ധതി നിര്‍വഹണത്തിലും നൂറുശതമാനം നേട്ടം കൈവരിച്ച് പുല്ലൂര്‍-പെരിയ പഞ്ചായത്ത്. പൊതു വികസന ഫണ്ടില്‍ 2,78,85,058 രൂപ വകയിരുത്തിയതില്‍ നൂറുശതമാനം ചെലവഴിച്ച് ജില്ലയില്‍ രണ്ടാം സ്ഥാനത്താണ് പുല്ലൂര്‍-പെരിയ പഞ്ചായത്ത്. പട്ടികജാതി പട്ടികവര്‍ഗ വികസന ഫണ്ടില്‍ യഥാക്രമം വകയിരുത്തിയ 11.94 ലക്ഷം രൂപയും 58.36 ലക്ഷം രൂപയും ചെലവഴിച്ചു. റോഡ് മെയിന്‍റനന്‍സ് ഗ്രാന്‍ഡ് ആകെ വകയിരുത്തിയ 4,41, 12,000 രൂപയില്‍ 89.5% തുകയും റോഡിതര മെയിന്‍റനന്‍സ് ഗ്രാന്‍ഡില്‍ 80.86% തുകയും ചെലവഴിച്ചു. ധനകാര്യ കമ്മിഷന്‍ ഗ്രാന്‍ഡില്‍ മുന്‍വര്‍ഷ ബാക്കി ഉള്‍പ്പെടെ 60,62,666 (143.28%) ധനകാര്യ കമ്മീഷന്‍ പ്രത്യേക ഉദ്ദേശ ഗ്രാന്‍ഡ് 2,03,57,235 (106.99%) ചെലവഴിച്ചു. ദേശീയ ഗ്രാമീണ തൊഴിലുറപ്പ് പദ്ധതിയില്‍ 1,82,424 തൊഴില്‍ദിനങ്ങള്‍ സൃഷ്ടിക്കുകയും 8,14, 65000 രൂപ ചെലവഴിക്കുകയും ചെയ്തു. ഭരണസമിതി അംഗങ്ങളുടെയും നിര്‍വഹണ ഉദ്യോഗസ്ഥരുടെയും, ജീവനക്കാരുടെയും കൂട്ടായ പരിശ്രമം കൊണ്ടാണ് പദ്ധതി നിര്‍വഹണം നൂറുശതമാനം ആയതെന്ന് പഞ്ചായത്ത് പ്രസിഡന്‍റ് സി.കെ. അരവിന്ദാക്ഷന്‍ പറഞ്ഞു.

ഗാന്ധിജിയുടേത് സമവായത്തിന്‍റെ രാമൻ: എ.എൻ. ഷംസീർ

തൃക്കരിപ്പൂർ: സമവായത്തിന്‍റെ രാമനായിരുന്നു മഹാത്മാഗാന്ധിയുടെ രാമനെന്ന് നിയമസഭ സ്പീക്കർ എ.എൻ. ഷംസീർ. തടിയൻകൊവ്വൽ മനീഷ തീയറ്റേഴ്സിനായി നിർമിച്ച കെട്ടിടം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കലാപ്രവർത്തനത്തിലൂടെ സമൂഹത്തിലേക്ക് ഒരു സംഭവത്തെ അവതരിപ്പിക്കപ്പെട്ടപ്പോൾ അതിനെതിരെ കോലാഹലമുണ്ടാക്കുന്നവരുടെ ലക്ഷ്യം വളരെ വലുതാണെന്ന് അദ്ദേഹം കൂട്ടിച്ചേർത്തു. എം. രാജഗോപാലൻ എംഎൽഎ അധ്യക്ഷത വഹിച്ചു. സിനിമാതാരം നിഖില വിമൽ മുഖ്യാതിഥിയായിരുന്നു. ഉദിനൂർ ബാലഗോപാലൻ, എ. മാധവൻ എന്നിവരെ ആദരിച്ചു. പി.പി. കുഞ്ഞികൃഷ്ണൻ, സി.വി. ഷാജി, ടി. വിജയലക്ഷ്മി, എ. ബാബുരാജ്, എ.പി. രാജേഷ് എന്നിവർ പ്രസംഗിച്ചു.

നളിനിക്ക് വിഷുക്കൈനീട്ടമായി സ്‌നേഹവീട്

കാഞ്ഞങ്ങാട്: സ്വന്തമായി അടച്ചുറപ്പുറപ്പുള്ള ഒരു വീട് എന്ന സ്വപ്നം ചാമുണ്ഡിക്കുന്ന് റെയില്‍വേ ലൈനിന് സമീപത്തെ ദേജുനായിക്ക്-വി.നളിനി ദമ്പതികള്‍ക്ക് വിഷുക്കൈനീട്ടം പോലെ യാഥാര്‍ഥ്യമായി. തകര്‍ന്നടിഞ്ഞ് വാസയോഗ്യമല്ലാത്ത ഒരു കൂരയിലായിരുന്നു ഇരുവരുടെയും താമസം. ഇവരുടെ കഷ്ടപ്പാട് കണ്ടറിഞ്ഞാണ് അജാനൂര്‍ പഞ്ചായത്ത് കുടുംബശ്രീ മോഡൽ സിഡിഎസ് ഒരു വീട് വച്ചു കൊടുക്കാന്‍ തീരുമാനിച്ചത്. പദ്ധതി പ്രവര്‍ത്തനം തുടങ്ങി അപേക്ഷ പ്രകാരം തികച്ചും അര്‍ഹമായ ഒരു കുടുംബത്തെ തന്നെയാണ് ഈ പദ്ധതിക്കായി അജാനൂര്‍ സിഡിഎസ് തെരഞ്ഞെടുത്തത് യുദ്ധകാല അടിസ്ഥാനത്തില്‍ ആറുമാസം കൊണ്ട് 6.50 ലക്ഷം രൂപ ചെലവഴിച്ചു കൊണ്ടാണ് രണ്ടു കിടപ്പുമുറികളും സ്വീകരണമുറിയും അടുക്കളയും ശുചിമുറിയും ഉള്ള വീട് നിര്‍മിച്ചു നല്‍കിയത്. ഓരോ വാര്‍ഡുകളിലും 100 രൂപയുടെ സമ്മാന കൂപ്പണ്‍ അച്ചടിച്ച് വിതരണം ചെയ്താണ് വീടു നിര്‍മിക്കാനുള്ള തുക കണ്ടെത്തിയത്. എം.രാജഗോപാലന്‍ എംഎല്‍എ താക്കോല്‍ദാനം നിര്‍വഹിച്ചു. പഞ്ചായത്ത് പ്രസിഡന്‍റ് ടി.ശോഭ അധ്യക്ഷതവഹിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ മുഖ്യാതിഥിയായിയിരുന്നു. കുടുംബശ്രീ എക്‌സിക്യൂട്ടീവ് ഡയറക്ടര്‍ എച്ച്.ദിനേശന്‍, ജില്ലാ കുടുംബശ്രീ എഡിഎംസി ഡി.ഹരിദാസ്, ബ്ലോക്ക് പ്രസിഡന്‍റ് കെ.മണികണ്ഠന്‍, പഞ്ചായത്ത് വൈസ്പ്രസിഡന്‍റ് കെ.സബീഷ്, സ്ഥിരംസമിതി അധ്യക്ഷരായ കെ.മീന, കെ. കൃഷ്ണന്‍, ഷീബ ഉമ്മര്‍, ബ്ലോക്ക് പഞ്ചായത്തംഗം എം.ജി.പുഷ്പ, ദേവി രവീന്ദ്രന്‍, കെ.സുജാത, കെ.രാജ്‌മോഹന്‍, കുഞ്ഞിരാമന്‍ എക്കാല്‍, ഹമീദ് ചേരക്കാടത്ത്, സി.മുഹമ്മദ്കുഞ്ഞിഎന്നവര്‍ സംസാരിച്ചു. സിഡിഎസ് ചെയര്‍പേഴ്‌സണ്‍ എം.വി.രത്‌നകുമാരി സ്വാഗതവും വൈസ്‌ചെയര്‍പേഴ്‌സണ്‍ ബിന്ദു നന്ദിയും പറഞ്ഞു.

ഹെഡ്‌ലോഡ് ആൻഡ് ജനറൽ വർക്കേഴ്സ് യൂണിയൻ ഏരിയാസമ്മേളനം

പരപ്പ: ഹെഡ്‌ലോഡ് ആൻഡ് ജനറൽ വർക്കേഴ്സ് യൂണിയൻ (സിഐടിയു) നീലേശ്വരം ഏരിയാസമ്മേളനം മെയ് നാലിന് പരപ്പയിൽ നടത്തും. സംഘാടകസമിതി രൂപീകരണയോഗം ജില്ലാ സെക്രട്ടറി കെ.മോഹനൻ ഉദ്ഘാടനം ചെയ്തു. എ.ആർ.രാജു അധ്യക്ഷതവഹിച്ചു. ടി.പി.തങ്കച്ചൻ, വിനോദ് പന്നിത്തടം, എ. ആർ.വിജയകുമാർ, വി.ബാലകൃഷ്ണൻ, അമൽ തങ്കച്ചൻ, സി.എച്ച്.അബ്ദുൾ നാസർ, എം.ഹരീന്ദ്രൻ, കെ.നാരായണൻ എന്നിവർ പ്രസംഗിച്ചു. ഇ.കെ.ചന്ദ്രൻ സ്വാഗതവും കെ.നാരായണൻ നന്ദിയും പറഞ്ഞു.

കര്‍ഷകസമരത്തിന്‍റെ പാരമ്പര്യം അവകാശപ്പെടുന്നവര്‍ കാര്‍ഷികവിളകള്‍ നശിപ്പിക്കാന്‍ നേതൃത്വം നല്‍കുന്നു: ഹക്കീം കുന്നിൽ

കാഞ്ഞങ്ങാട്: കര്‍ഷകരുടെ പ്രശ്‌നങ്ങള്‍ക്ക് വേണ്ടി പോരാട്ടം നടത്തിയെന്ന് അവകാശപ്പെടുന്നവര്‍ കാര്‍ഷിക വിളകള്‍ നശിപ്പിക്കുന്നതിന് നേതൃത്വം കൊടുക്കുകയാണെന്ന് കെപിസിസി മെമ്പര്‍ ഹക്കീം കുന്നില്‍. രോഗത്തെ അതിജീവിച്ച് കാര്‍ഷിക പ്രവര്‍ത്തിയില്‍ ഏര്‍പ്പെട്ട ആവിക്കരയിലെ എ.ജയരാജന്‍റെ കൃഷിയും മതിലും തകര്‍ത്തവരില്‍ നഷ്ടപരിഹാരം ഈടാക്കി പ്രതികളെ അറസ്റ്റ് ചെയ്യണമെന്നും അദ്ദേഹം ആവശ്യപ്പെട്ടു. സംഭവസ്ഥലം യുഡിഎഫ് നേതാക്കളോടൊപ്പം സന്ദര്‍ശിച്ചു. ഡിസിസി ജനറല്‍ സെക്രട്ടറി പി.വി.സുരേഷ്, കൂക്കള്‍ ബാലകൃഷ്ണന്‍, സിഎംപി ജില്ല സെക്രട്ടറി സി.വി. തമ്പാന്‍, ബ്ലോക്ക് കോണ്‍ഗ്രസ് പ്രസിഡന്‍റ് ഉമേശന്‍ വേളൂര്‍, യുഡിഎഫ് നിയോജകമണ്ഡലം ചെയര്‍മാന്‍ പ്രിന്‍സ് തോമസ്, മണ്ഡലം പ്രസിഡന്‍റ് കെ.പി.ബാലകൃഷ്ണന്‍, വിനോദ് ആവിക്കര എന്നിവരും ഒപ്പമുണ്ടായിരുന്നു.

മയിലാട്ടിയിൽ ബെസ് സ്ഥാപിക്കാൻ ജിൻഡാൽ ഗ്രൂപ്പുമായി കരാർ ഒപ്പിട്ടു

കാസർഗോഡ്: മയിലാട്ടി 220 കെവി സബ് സ്റ്റേഷനോടനുബന്ധിച്ച് 125 മെഗാവാട്ട് വൈദ്യുതി സംഭരിക്കാൻ ശേഷിയുള്ള ബെസ് (ബാറ്ററി എനർജി സ്റ്റോറേജ് സിസ്റ്റം) സംവിധാനം സ്ഥാപിക്കാൻ കെഎസ്ഇബി ജിൻഡാൽ ഗ്രൂപ്പിനു കീഴിലുള്ള നിയോ എനർജി ലിമിറ്റഡുമായി കരാർ ഒപ്പിട്ടു. പകൽസമയത്ത് അധികമായി ലഭിക്കുന്ന സൗരോർജ വൈദ്യുതി ബാറ്ററി സംവിധാനത്തിൽ സൂക്ഷിച്ചുവച്ച് വൈദ്യുതി ഉപഭോഗം കൂടുന്ന സമയങ്ങളിൽ കെഎസ്ഇബിയുടെ ലൈനിലേക്ക് നല്കുകയാണ് പദ്ധതിയുടെ ലക്ഷ്യം. നേരത്തേ മുള്ളേരിയയിൽ 60 മെഗാവാട്ട് അവർ ശേഷിയുള്ള മിനി ബെസ് സ്ഥാപിക്കാൻ കേന്ദ്ര ഊർജ മന്ത്രാലയത്തിന് കീഴിലുള്ള നാഷണൽ ഹൈഡ്രോ ഇലക്ട്രിക് പവർ കോർപറേഷനുമായി കരാറിലെത്തിയിരുന്നു. ബെസ് സംവിധാനം സ്ഥാപിക്കുന്നതോടെ പീക്ക് സമയങ്ങളിൽ പ്രധാന ലൈനിൽ നിന്നുള്ള വൈദ്യുതി വിതരണം മുടങ്ങിയാലും നാലു മണിക്കൂർ നേരം വരെ ഈ സംവിധാനത്തിൽ നിന്ന് വൈദ്യുതി വിതരണം ഉറപ്പുവരുത്താനാകും. ഇതോടെ വേനൽക്കാലങ്ങളിൽ അമിത വൈദ്യുതി ഉപഭോഗം മൂലം ലോഡ് ഷെഡിംഗ് ഏർപ്പെടുത്തേണ്ടിവരുന്ന അവസ്ഥ ഇല്ലാതാക്കാമെന്നാണ് പ്രതീക്ഷ. പൊതു-സ്വകാര്യ പങ്കാളിത്തത്തോടെയാണ് സംസ്ഥാനത്ത് ബെസ് സംവിധാനം നടപ്പിലാക്കുന്നത്. ഇപ്പോൾ കൂടുതൽ വൈദ്യുതി ആവശ്യം വരുന്ന പീക്ക് അവറുകളിൽ പുറത്തുനിന്ന് വാങ്ങുകയാണ് കെഎസ്ഇബി ചെയ്യുന്നത്. അതിന് കൂടുതൽ പണം നൽകേണ്ടി വരുന്നുണ്ട്. ബെസ് സംവിധാനം നിലവിൽ വരുന്നതോടെ ഈ അധികച്ചെലവ് കുറയ്ക്കാനാകുമെന്നാണ് വിലയിരുത്തൽ. കേന്ദ്ര ഊർജ മന്ത്രാലയത്തിൽ നിന്ന് സംസ്ഥാനത്തിന് ലഭിച്ച 135 കോടി രൂപയുടെ വയബിലിറ്റി ഫണ്ട് ഉപയോഗിച്ചാണ് പദ്ധതി നടപ്പിലാക്കുന്നത്. ആദ്യഘട്ടത്തിൽ സംസ്ഥാനത്തുടനീളം വിവിധ സ്ഥലങ്ങളിലായി ആകെ 750 മെഗാവാട്ട് വരെ ശേഷിയുള്ള ബെസുകൾ സ്ഥാപിക്കാനാണ് ലക്ഷ്യമിടുന്നത്.

ലൈബ്രറി കൗൺസിൽ മെന്‍റർമാർക്ക് പരിശീലനം തുടങ്ങി

തൃക്കരിപ്പൂർ: വായനയെന്ന അതിരില്ലാ ലോകത്തേക്ക് കുട്ടികളെ നയിക്കാൻ ഉതകുന്ന തരത്തിൽ ലൈബ്രറി കൗൺസിൽ നേതൃത്വത്തിൽ ബാലവേദി മെന്‍റർമാർക്കുള്ള ഏകദിന പരിശീലനത്തിന് തുടക്കമായി. മലയാളം പഠിക്കാം വായനയെ വരവേൽക്കാം എന്ന ലക്ഷ്യത്തിൽ കുട്ടികളെ പുസ്തകവായനയുടെ പരന്ന ലോകത്തേക്ക് നയിക്കാൻ സംസ്ഥാന ലൈബ്രറി കൗൺസിലിന്‍റെ ആഹ്വാന പ്രകാരമാണ് വിവിധ കേന്ദ്രങ്ങളിൽ മെന്‍റർമാർക്കുള്ള ഏകദിന പരിശീലനം സംഘടിപ്പിച്ചിട്ടുള്ളത്. ഹൊസ്ദുർഗ് താലൂക്ക് ലൈബ്രറി കൗൺസിലിന്‍റെ നേതൃത്വത്തിൽ മൂന്ന് കേന്ദ്രങ്ങളിലാണ് ബാലവേദി മെന്‍റർമാർക്ക് പരിശീലനം നടത്തുന്നത്. ആദ്യ പരിശീലന പരിപാടിയിൽ തൃക്കരിപ്പൂർ, പടന്ന, വലിയപറമ്പ്, പിലിക്കോട് പഞ്ചായത്തുകളിൽ പ്രവർത്തിക്കുന്ന ഗ്രന്ഥശാലകളിൽ നിന്ന് ഒരു മെന്‍ററാണ് പങ്കെടുക്കുന്നത്. കെഎംകെ സ്മാരക ഓഡിറ്റോറിയത്തിൽ കെ.ചന്ദ്രശേഖരൻ സ്മാരക ഗ്രന്ഥാലയത്തിന്‍റെ സഹകരണത്തോടെ സംഘടിപ്പിച്ച പരിശീലനം ജില്ലാ പഞ്ചായത്ത് സ്ഥിരംസമിതി അധ്യക്ഷൻ എം.മനു ഉദ്ഘാടനം ചെയ്തു. താലൂക്ക് ലൈബ്രറി കൗൺസിൽ പ്രസിഡന്‍റ് പി.വേണുഗോപാലൻ അധ്യക്ഷത വഹിച്ചു. പി.വി.ദിനേശൻ, വി.കെ.രതീശൻ, പി.ശ്രീധരൻ, പപ്പൻ കുട്ടമത്ത്, പി.വി.ഉണ്ണിരാജൻ, എം.നാരായണൻ എന്നിവർ പ്രസംഗിച്ചു. പരിശീലകരായ സുരേഷ് കുമാർ ബിരിക്കുളം, പ്രഭാകരൻ വലിയപറമ്പ് എന്നിവർ ക്ലാസുകളെടുത്തു. ഇന്ന് ചെറുവത്തൂർ തുരുത്തി നിലമംഗലം ഓഡിറ്റോറിയത്തിൽ ആലിനപ്പുറം കൈരളി ഗ്രന്ഥാലയത്തിന്‍റെയും കാഞ്ഞങ്ങാട് കിഴക്കുംകര മുച്ചിലോട്ട് ജിഎൽപി സ്കൂളിൽ ശാന്തികലാമന്ദിരം ഗ്രന്ഥാലയത്തിന്‍റെയും സഹകരണത്തോടെയുമാണ് മെന്‍റർമാർക്കുള്ള പരിശീലന പരിപാടി നടക്കും.

രാജപുരം ടൗണിലെ വെള്ളക്കെട്ട് ഒഴിവാക്കാൻ ജില്ലാ പഞ്ചായത്തിന്‍റെ ഇടപെടൽ

രാജപുരം: വേനൽമഴയ്ക്കൊപ്പം ചെളിവെള്ളത്തിൽ മുങ്ങി രാജപുരം ടൗൺ. സംസ്ഥാനപാത നവീകരണത്തിന്‍റെ ഭാഗമായുള്ള ഓവുചാലുകളുടെ നിർമാണം പൂർത്തിയാകാത്തതും രാജപുരം-ബളാൽ ജില്ലാ പഞ്ചായത്ത് റോഡിൽനിന്ന് വെള്ളം കുത്തിയൊഴുകിയതുമാണ് ടൗണിനെ വെള്ളത്തിൽ മുക്കിയത്. ജില്ലാ പഞ്ചായത്ത് അംഗം ഷിനോജ് ചാക്കോയുടെ ഇടപെടലിനെ തുടർന്ന് ജില്ലാ പഞ്ചായത്തിന്‍റെ അടിയന്തിര ആവശ്യങ്ങൾക്കായുള്ള ഫണ്ട് ഉപയോഗിച്ച് നിലവിലുള്ള ഓവുചാലുകളിലെ തടസങ്ങൾ നീക്കിയാണ് ടൗണിനെ വെള്ളക്കെട്ടിൽ നിന്ന് രക്ഷിച്ചത്. ടൗണിലെ വ്യാപാര സ്ഥാപനങ്ങളിലുൾപ്പെടെ വെള്ളം കയറിയതിനൊപ്പം ചപ്പുചവറുകളും കുമിഞ്ഞുകൂടിയിരുന്നു. രാജപുരം-ബളാൽ റോഡിനോടു ചേർന്ന ഓവുചാലുകളിൽ മഴക്കാലപൂർവ ശുചീകരണം നടക്കുന്നതിനു മുമ്പേ ശക്തമായ വേനൽമഴ പെയ്തതാണ് സ്ഥിതി വഷളാക്കിയത്. വ്യാപാരി നേതാക്കൾക്കും നാട്ടുകാർക്കുമൊപ്പം സ്ഥലത്തെത്തിയ ജില്ലാ പഞ്ചായത്ത് അംഗം ഷിനോജ് ചാക്കോ പ്രശ്നപരിഹാരത്തിനായി ജില്ലാ പഞ്ചായത്തിന്‍റെ അടിയന്തിര ഫണ്ടിൽനിന്നും തുക അനുവദിക്കുന്നതിനുള്ള നടപടി സ്വീകരിക്കുകയായിരുന്നു. തുടർന്ന് ജില്ലാ പഞ്ചായത്ത് അസി. എൻജിനീയറുടെ നിർദേശപ്രകാരം ജെസിബി ഉൾപ്പെടെ എത്തിച്ച് അടിയന്തിരമായി ഓവുചാലുകൾ വൃത്തിയാക്കിയതോടെ വെള്ളക്കെട്ടിന് തത്കാലത്തേക്കെങ്കിലും പരിഹാരമായി. സംസ്ഥാനപാത നവീകരണത്തിന്‍റെ ഭാഗമായി രാജപുരം ടൗണിൽ നാലുവരിപ്പാത നിർമിക്കാനാണ് പദ്ധതി തയ്യാറാക്കിയിരുന്നത്. നേരത്തേ ഉണ്ടായിരുന്ന ഡിവൈഡറുകളും കോൺക്രീറ്റ് ഓവുചാലുകളുമുൾപ്പെടെ ഇതിന്‍റെ ഭാഗമായി പൊളിച്ചുമാറ്റിയിരുന്നു. എന്നാൽ പുതിയ പാതയുടെ ഒരു പാളി ടാറിംഗ് നടത്തിയതല്ലാതെ പുതിയ ഡിവൈഡറുകളും ഓവുചാലുമുൾപ്പെടെയുള്ള അനുബന്ധ കാര്യങ്ങളൊന്നും ഇതുവരെ പൂർത്തിയായില്ല. ഇതോടെയാണ് മഴക്കാലത്ത് ടൗൺ വെള്ളത്തിൽ മുങ്ങുന്ന നിലയായത്. ടൗണിനേക്കാൾ ഉയരത്തിലുള്ള രാജപുരം-ബളാൽ റോഡിൽ നിന്നും വെള്ളം കുത്തിയൊലിച്ചെത്തുന്നത് പ്രശ്നം ഗുരുതരമാക്കുന്നു. ടൗണിലെ ഓവുചാലുകളുടെ നിർമാണം പൂർത്തിയാക്കാനായാൽ രാജപുരം-ബളാൽ റോഡിൽ നിന്നും ഒഴുകിയെത്തുന്ന വെള്ളത്തെ അതുവഴി തിരിച്ചുവിടാനാകും.

പ്ലാച്ചിക്കരയിൽ മരം കടപുഴകിവീണ് ഗതാഗതം തടസപ്പെട്ടു

ഭീമനടി: വെള്ളരിക്കുണ്ട്-ഭീമനടി റോഡിൽ പ്ലാച്ചിക്കരയിൽ വൻമരം കടപുഴകി വീണു. തലനാരിഴയ്ക്ക് ദുരന്തം വഴി മാറി. ഇന്നലെ വൈകുന്നേരം ആറോടെയാണ് റോഡിന് കുറുകെ മരം വീണത്. നൂറുകണക്കിന് വാഹനങ്ങൾ കടന്നു പോകുന്ന റോഡിൽ മരം വീണപ്പോൾ വാഹനങ്ങൾ ഇല്ലാതിരുന്നതു കാരണം വൻ ദുരന്തം ഒഴിവായി. നിരവധി തവണ അപകടാവസ്ഥ ചൂണ്ടിക്കാട്ടി നാട്ടുകാർ പരാതി നൽകിയിരുന്നതാണ്. അപകടം ചൂണ്ടിക്കാട്ടി ദീപിക വാർത്തയും നൽകിയിരുന്നു. രണ്ടു മണിക്കൂറിലിലേറ ഗതാഗതം തടസപ്പെട്ടു. പെരിങ്ങോത്ത് നിന്നെത്തിയ അഗ്നിശമന സേനയും നാട്ടുകാരും ചേർന്നാണ് മരം മുറിച്ച് മാറ്റിയത്.

വേനൽമഴയിലും കാറ്റിലും പാലാവയലിൽ വ്യാപകനാശം

പാലാവയൽ: വിഷുദിനത്തിൽ വൈകുന്നേരം നാലോടെ ശക്തമായ വേനൽമഴയ്ക്കൊപ്പം വീശിയടിച്ച കാറ്റിൽ പാലാവയലിലും പരിസരപ്രദേശങ്ങളിലും വ്യാപകനാശം. പാലാവയൽ, ഓടപ്പള്ളി, മെയ്യാൽ, മലാംകടവ്, ചാവറഗിരി, വെള്ളക്കല്ല്, മുനയംകുന്ന് ഭാഗങ്ങളിലാണ് വീടുകൾക്കും കാർഷികവിളകൾക്കും നാശനഷ്ടങ്ങൾ സംഭവിച്ചത്. മരങ്ങൾ വ്യാപകമായി ഒടിഞ്ഞു വീണു. ഒട്ടേറെ വീടുകൾക്ക് ഭാഗികമായ നാശനഷ്ടങ്ങൾ സംഭവിച്ചു. ഏക്കറു കണക്കിന് സ്ഥലത്തെ റബർ, കവുങ്ങ്, തെങ്ങ്, വാഴ കൃഷികൾക്കും നാശമുണ്ടായി. വിവിധയിടങ്ങളിലായി നാല്പതോളം വൈദ്യുത തുണുകൾ തകർന്നു വീണതോടെ പ്രദേശത്തെ വൈദ്യുതി ബന്ധം താറുമാറായി. പലയിടങ്ങളിലും ഇനിയും അറ്റകുറ്റപ്പണികൾ പൂർത്തിയായിട്ടില്ല. മരങ്ങൾ പൊട്ടി വീണ് പാലാവയൽ-ഓടക്കൊല്ലി, ഓടക്കൊല്ലി-വെള്ളക്കല്ല് റോഡുകളിൽ അങ്ങിങ്ങായി ഗതാഗതം തടസപ്പെട്ടു. പെരിങ്ങോത്തു നിന്നെത്തിയ അഗ്നിരക്ഷാസേനയുടെയും ചിറ്റാരിക്കാൽ പോലീസിന്‍റെയും നേതൃത്വത്തിൽ നാട്ടുകാരുടെ സഹായത്തോടെ രാത്രി തന്നെ മരങ്ങൾ നീക്കിയാണ് റോഡുകൾ തുറന്നത്. മലാംകടവ് വാർഡിൽ മോഹനൻ മുണ്ടപ്പള്ളിയിൽ, സജി ചാരംതൊട്ടി, ബേബി ഇടയാൽ, ജോസ് പുറയാറ്റിൽ, ഷാജു ആനത്താര, ജോണി വടക്കേക്കര, ഷിജോ ചേലക്കാട്ട്, സണ്ണി നായിക്കംപറമ്പിൽ, റോബിൻ ആനക്കല്ലിങ്കൽ, ഷാന്‍റു നല്ലുകുന്നേൽ, കുര്യാച്ചൻ അന്ത്യാംകുളം, ബിജു പറേയാലിൽ, അപ്പച്ചൻ ചാലിൽ എന്നിവരുടെയും പാലാവയൽ വാർഡിൽ പാമ്പക്കൽ തോമസ്, ജോസ് വട്ടക്കുന്നേൽ, കുഞ്ഞുമോൻ പോട്ടോത്ത്, ബെന്നി നെല്ലംകുഴിയിൽ, കൂട്ടുങ്കൽ ഷാജി എന്നിവരുടെയും വീടുകൾക്ക് കേടുപാടുകൾ സംഭവിച്ചു. ഷാജു കുറ്റിയാനി തറപ്പേൽ, കുരിശുംമൂട്ടിമലയിൽ ജോസ്, തോമസ് വലിയവിള, സെബാസ്റ്റ്യൻ ആനക്കല്ലിങ്കൽ എന്നിവരുടെ വീടുകൾക്കും നാശനഷ്ടമുണ്ടായി. പൊരിയത്ത് ജോസഫിന്‍റെ കോഴി ഫാം കാറ്റിൽ തകർന്നു വീണു. മുനയംകുന്നിലെ ഓസ്റ്റിൻ എളമ്പാശേരിയുടെ വീടിനു മുകളിൽ മരം വീണു. പാലാവയൽ സെന്‍റ് ജോൺസ് പള്ളി വക കൃഷിയിടത്തിലും ബേബി മണിമല, തറപ്പേൽ അപ്പച്ചൻ, സിബി മുട്ടത്ത്, ജോസ് കുണ്ടാലകോട്ട്, എ.കെ. ജോൺ അറയ്ക്കൽ, എ.കെ. ജോർജ് അറയ്ക്കൽ, ബിജു മാപ്പിളപറമ്പിൽ, ദേവസ്യ നരിമറ്റം, ജോർജുകുട്ടി മണ്ണഞ്ചേരിൽ, ജിജോ മണ്ണഞ്ചേരിൽ, ഷാജു പൊട്ടംപ്ലാക്കൽ, ബേബി പൊട്ടംപ്ലാക്കൽ, ജോഷി അന്ത്യാംകുളം, ജോബി അന്ത്യാംകുളം, ജോസ് പള്ളിക്കുന്നേൽ, ജോസഫ് കൊല്ലംപറമ്പിൽ, ആന്‍റണി ചാമക്കാല, ബാബു പോത്തനാമല, ആന്‍റണി വേലിക്കകത്ത്, കണിയാംകുന്നേൽ ജോണി, കാരക്കാട്ട് ബോബി, സുനിൽ കൂട്ടുങ്കൽ, ചെറിയാൻ പനന്തോട്ടം, ബോബി മാത്തശേരിൽ, ജോപ്പച്ചൻ ഞെഴുകുംകാട്ടിൽ എന്നിവരുടെ കൃഷിയിടങ്ങളിലും നാശനഷ്ടങ്ങളുണ്ടായി. പഞ്ചായത്ത് പ്രസിഡന്‍റ് ജോസഫ് മുത്തോലി, പഞ്ചായത്ത് അംഗങ്ങളായ പ്രശാന്ത് പാറേക്കുടിലിൽ, തേജസ് ഷിന്‍റോ, വില്ലേജ് അസിസ്റ്റന്‍റ് ബൈജു, അസി. കൃഷി ഓഫീസർ ജയപ്രകാശ് എന്നിവർ വിവിധയിടങ്ങൾ സന്ദർശിച്ച് നാശനഷ്ടങ്ങൾ വിലയിരുത്തി.

ബസ് കാത്തിരിപ്പുകേന്ദ്രം ഉദ്ഘാടനം ചെയ്തു

കരിവേടകം: മണപ്പാടി സ്വാശ്രയ സഹായസംഘം രജത ജൂബിലിയോടനുബന്ധിച്ച് പാമ്പയ്ക്കല്‍ ജോസിന്‍റെ സ്മരണയ്ക്കായി നിര്‍മിച്ച പനക്കാല്‍ ബസ് കാത്തിരിപ്പുകേന്ദ്രം മറൈന്‍ സയന്‍റിസ്റ്റ് ഡോ. രാഹുല്‍ യാദവും സിബിഐയില്‍ എസ്‌ഐ സെലക്‌ഷന്‍ ലഭിച്ച എം.കെ. അക്ഷയും ചേര്‍ന്ന് ഉദ്ഘാടനം ചെയ്തു. വാര്‍ഡ് മെംബര്‍ ജോസ് പാറത്തട്ടേല്‍ അധ്യക്ഷത വഹിച്ചു. ക്ഷേമകാര്യ സ്ഥിരംസമിതി അധ്യക്ഷ ലിസി തോമസ്, കെ. ബലരാമന്‍ നമ്പ്യാര്‍, കുഞ്ഞിരാമന്‍ തവനം, സന്തോഷ് അരമന, ഗീത രാധാകൃഷ്ണന്‍, എം.സി. മാധവന്‍, കുഞ്ഞമ്പു, ഭാസ്‌കരന്‍ പനക്കാല്‍, സുരേന്ദ്രനാഥ് മക്കട്ടി എന്നിവര്‍ പ്രസംഗിച്ചു.

പിലിക്കോട് ക്ഷേത്രത്തെക്കുറിച്ച് വ്യാജപ്രചാരണമെന്ന് ഭാരവാഹികള്‍

കാസര്‍ഗോഡ്: പിലിക്കോട് രയരമംഗലം ഭഗവതി ക്ഷേത്രത്തിന് അവമതിപ്പുണ്ടാക്കും വിധം പ്രചാരണങ്ങളാണ് കഴിഞ്ഞ രണ്ടു ദിവസങ്ങളിലായി നടന്നുവരുന്നതെന്ന് ഭാരവാഹികള്‍. ഒരുമാസത്തെ പാട്ടുത്സവവും പൂരോത്സവവും മറ്റു വിശേഷാല്‍ ചടങ്ങും നടക്കുന്ന ആരാധനാലയമെന്നതിനാല്‍ ക്ഷേത്ര നാലമ്പലത്തിനത്ത് ഭക്തര്‍ പ്രവേശിക്കാറില്ല. കലശോത്സവ സമാപനദിവസം ഏതാനും ചെറുപ്പക്കാര്‍ ക്ഷേത്രത്തിലെത്തി നാലമ്പലത്തില്‍ കയറാന്‍ അനുവാദം വേണമെന്ന് ക്ഷേത്രം തന്ത്രിയോട് ആവശ്യപ്പെട്ടിരുന്നു. പൂര്‍വികമായി നടന്നുവന്ന ആചാരാനുഷ്ഠാനങ്ങളില്‍ തനിക്ക് മാറ്റം വരത്താന്‍ ആകില്ലെന്നായിരുന്നു അദ്ദേഹം അറിയിച്ചത്. അതിനുശേഷം ഒരുമാസം പൂരോത്സവം നാട്ടുകൂട്ടായ്മയുടെ സഹായസഹകരണത്തോടെ ഭംഗിയായി നടന്നു. ഇതിനുശേഷം കഴിഞ്ഞ ഞായറാഴ്ച രാവിലെ 16 ഓളം പേര്‍ ക്ഷേത്രത്തിന് പടിഞ്ഞാറു ഭാഗത്തെ നടതുറന്ന് നാലമ്പലത്തിനകത്തേക്ക് കയറുകയും തിരിച്ചുപോവുകയും ചെയ്തു. ഈ സംഭവത്തെ വലിയതോതില്‍ തെറ്റിദ്ധാരണയുണ്ടാക്കും വിധത്തിലാണ് പ്രചാരണം നടത്തത്. രയരമംഗലം ക്ഷേത്രത്തില്‍ കാര്‍മികര്‍ ഒഴികെ മറ്റാരും നാലമ്പലത്തില്‍ പ്രവേശിക്കാറില്ലെന്നതാണ് വസ്തുതയെന്നിരിക്കെ മേല്‍ജാതിക്കാര്‍ക്കു മാത്രം പ്രവേശിക്കാമെന്നും കീഴ്ജാതിക്കര്‍ക്ക് പ്രവേശനം നിഷേധിക്കുന്നുവെന്ന വ്യാജപ്രചാരണം ജനങ്ങള്‍ തിരിച്ചറിയണമെന്നും ഭാരവാഹികള്‍ പറഞ്ഞു. പത്രസമ്മേളനത്തില്‍ ട്രസ്റ്റി ബോര്‍ഡ് ചെയര്‍മാന്‍ എന്‍.വി. രവീന്ദ്രന്‍, നവീകരണ സമിതി പ്രസിഡന്‍റ് എം.വി. തമ്പാന്‍ പണിക്കര്‍, വൈസ് പ്രസിഡന്‍റുമാരായ എം. ദാമോദരന്‍, എം.പി. പദ്മനാഭന്‍, സാമ്പത്തിക കമ്മിറ്റി ചെയര്‍മാന്‍ പി.കെ. വിനയകുമാര്‍, എം. ഭാസ്‌കരന്‍, പി.പി. അടിയോടി, കുഞ്ഞികൃഷ്ണന്‍ അടിയോടി, കെ.പി. ചന്ദ്രന്‍, പി.സി. പ്രസന്ന എന്നിവര്‍ സംബന്ധിച്ചു.

കാട്ടുമാടം ജവഹര്‍ ക്ലബ് നാട്ടുത്സവ് സമാപനത്തിലേക്ക്

കാഞ്ഞങ്ങാട്: ഇരിയ കാട്ടുമാടം ജവഹര്‍ ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബിന്‍റെ രജതജൂബിലി ആഘോഷത്തിന്‍റെ ഭാഗമായുള്ള നാട്ടുത്സവ് പരിപാടി സമാപനത്തിലേക്ക്. ഇന്നു രാവിലെ 10നു സൗജന്യ മെഡിക്കല്‍ ക്യാമ്പ് ജില്ലാ പഞ്ചായത്തംഗം ജോമോന്‍ ജോസ് ഉദ്ഘാടനം ചെയ്യും. നാളെ രാവിലെ എട്ടിനു കലവറ നിറയ്ക്കല്‍ ഘോഷയാത്ര. വൈകുന്നേരം അഞ്ചിന് നടക്കുന്ന പൊതുസമ്മേളനം മുന്‍മന്ത്രി മുല്ലപ്പള്ളി രാമചന്ദ്രന്‍ ഉദ്ഘാടനം ചെയ്യും. തുടര്‍ന്ന് വയോജന സംഗമം, വിവിധ കലാപരിപാടികള്‍. 18ന് രാവിലെ ആറിന് ആരോഗ്യ ബോധവത്കരണ ക്ലാസും യോഗ പരിശീലനവും. തുടര്‍ന്ന് പഴയകാല നാടന്‍ കളികളെ പരിചയപ്പെടുത്തലും പ്രദര്‍ശനവും ഗോപി മുളവന്നൂര്‍ ഉദ്ഘാടനം ചെയ്യും. രാവിലെ 11 മുതല്‍ കുട്ടിയുത്സവ് ഷിബിന്‍ ഉപ്പിലിക്കൈ ഉദ്ഘാടനം ചെയ്യും. ഉച്ചകഴിഞ്ഞ് മൂന്നിന് ലഹരിക്കെതിരായ യുവജന സെമിനാര്‍ യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി വി.പി. അബ്ദുള്‍ റഷീദ് ഉദ്ഘാടനം ചെയ്യും. വൈകുന്നേരം ആറിനു നടക്കുന്ന സാംസ്‌കാരിക സദസ് എന്‍.എ. നെല്ലിക്കുന്ന് എംഎല്‍എ ഉദ്ഘാടനം ചെയ്യും. സിനിമാതാരം ഉണ്ണിരാജ് ചെറുവത്തൂര്‍ മുഖ്യാതിഥിയാകും. 19നു രാവിലെ 10നു ഞാറ്റുവേല കാര്‍ഷിക സെമിനാര്‍ കെ. നീലകണ്ഠന്‍ ഉദ്ഘാടനം ചെയ്യും. ഉച്ചയ്ക്ക് രണ്ടിനു നടക്കുന്ന വനിതാസംഗമം പി.കെ. ജയശ്രീ ഉദ്ഘാടനം ചെയ്യും. ജില്ലാ പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷ ഗീത കൃഷ്ണന്‍ മുഖ്യാതിഥിയാകും. വൈകുന്നേരം ആറിനു സമാപന സമ്മേളനം ടി. സിദ്ദിഖ് എംഎല്‍എ ഉദ്ഘാടനം ചെയ്യും. രാത്രി 7.30നു പ്രസീത ചാലക്കുടി നയിക്കുന്ന മെഗാ ഫോക്ക് ഷോയോടുകൂടി ജവഹര്‍ നാട്ടുത്സവ് സമാപിക്കും. പത്രസമ്മേളനത്തില്‍ സംഘാടകസമിതി ചെയര്‍മാന്‍ രാജന്‍ പെരിയ, വൈസ് ചെയര്‍പേഴ്‌സണ്‍ രജനി നാരായണന്‍, ക്ലബ് പ്രസിഡന്‍റ് കെ.ടി. കണ്ണന്‍, സെക്രട്ടറി വിഷ്ണു കാട്ടുമാടം, പ്രോഗ്രാം കമ്മിറ്റി ചെയര്‍മാന്‍ എം. സതീശന്‍ ഇരിയ എന്നിവര്‍ പങ്കെടുത്തു.

മുംബൈ സ്‌പൈക്കേഴ്‌സ് ജേതാക്കള്‍

കല്യോട്ട്: രാജീവ്ജി ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബിന്‍റെ നേതൃത്വത്തില്‍ നടന്ന അഞ്ചാമത് കൃപേഷ്-ശരത് ലാല്‍ അഖിലേന്ത്യ വോളി ടൂര്‍ണമെന്‍റില്‍ ഇന്ദിരാജി അയ്യങ്കാവിനെ പരാജയപ്പെടുത്തി മുംബൈ സ്‌പൈക്കേഴ്‌സ് ജേതാക്കളായി. രാജമോഹ്‍ ഉണ്ണിത്താന്‍ എംപി ഉദ്ഘാടനം ചെയ്തു. ബി.പി. പ്രദീപ്കുമാര്‍ അധ്യക്ഷത വഹിച്ചു. ജില്ലാ പഞ്ചായത്തംഗം ജോമോന്‍ ജോസ് മുഖ്യാതിഥി ആയിരുന്നു. ബ്ലോക്ക് പഞ്ചായത്തംഗം എം.കെ. ബാബുരാജ്, യൂത്ത് കോണ്‍ഗ്രസ് ജില്ലാ പ്രസിഡന്‍റ് കെ.ആര്‍. കാര്‍ത്തികേയന്‍, ഉമേശന്‍ വേളൂര്‍, രാജന്‍ അരീക്കര, വിനോദ് കപ്പിത്താന്‍, ഐ.എസ്. വസന്തന്‍ എന്നിവര്‍ പ്രസംഗിച്ചു. വിജയികള്‍ക്ക് രക്തസാക്ഷികളുടെ പിതാക്കളായ കൃഷ്ണന്‍, സത്യനാരായണന്‍ എന്നിവര്‍ ചേര്‍ന്ന് സമ്മാനദാനം നടത്തി.

വീട്ടുമതില്‍ തകർത്തും കൃഷി‍ നശിപ്പിച്ചും പ്രതികാരം

കാഞ്ഞങ്ങാട്: ഫുട്‌ബോള്‍ കളിക്കുന്നതിനിടെ പന്തുവീണ് പച്ചക്കറികള്‍ നശിച്ചതിനു വഴക്കു പറഞ്ഞ വിരോധത്തില്‍ കോണ്‍ഗ്രസ് പ്രവര്‍ത്തകന്‍റെ വീട്ടുമതില്‍ തകര്‍ക്കുകയും കാര്‍ഷികവിളകള്‍ നശിപ്പിക്കുകയും ചെയ്തു. കാഞ്ഞങ്ങാട് ആവിക്കരയിലെ പരേതനായ ഡപ്യൂട്ടി കളക്ടര്‍ ടി. കുഞ്ഞിക്കണ്ണന്‍റെ മകനും മുന്‍ പ്രവാസിയുമായ എ. ജയരാജനാണ് നഷ്ടം സംഭവിച്ചത്. സംഭവത്തില്‍ ബല്ലയിലെ പ്രിയേഷ്, അജീഷ്, അനീഷ്, റഫീഖ് തുടങ്ങി 10 സിപിഎം പ്രവര്‍ത്തകര്‍ക്കെതിരെ ഹൊസ്ദുര്‍ഗ് പോലീസ് കേസെടുത്തു. വിഷുത്തലേന്ന് രാത്രി 12.30ഓടെ നടന്ന സംഭവം. "30 വര്‍ഷക്കാലം പ്രവാസിയായിരുന്നു. അസുഖത്തെത്തുടര്‍ന്നാണ് പ്രവാസം അവസാനിപ്പിച്ച് നാട്ടില്‍ തിരിച്ചെത്തിയത്. മംഗളൂരുവിലെ ആശുപത്രിയിലെ ചികിത്സയിലാണ് ഇപ്പോള്‍. ഡോക്ടർ നിദേശിച്ചതു പ്രകാരമാണ് വ്യായാമം ആകുമല്ലോയെന്നു കരുതിയാണ് വീട്ടിനു സമീപത്ത് ചെറിയ തോതില്‍ പച്ചക്കറി കൃഷി ചെയ്തു വരുന്നത്. കൃഷിയിടത്തിനു സമീപത്തു കുട്ടികള്‍ ഫുട്‌ബോള്‍ കഴിക്കാറുണ്ട്. കഴിഞ്ഞദിവസം കളിക്കുന്നതിനിടയില്‍ പന്തുവീണു പച്ചക്കറിത്തൈകള്‍ നശിക്കുകയും ഇതിന്‍റെ പേരില്‍ കുട്ടികളെ വഴക്കു പറയുകയും ചെയ്തിരുന്നു. ഈ വിരോധത്തിന്‍റെ പേരില്‍ ഒരുസംഘം ഭീഷണിപ്പെടുത്തി. അതിന്‍റെ തുടര്‍ച്ചയായിട്ടാണ് തിങ്കളാഴ്ച രാത്രി വൈദ്യുതി ബന്ധം വിച്ഛേദിച്ച ശേഷം വീട്ടുവളപ്പില്‍ അതിക്രമിച്ചു കയറി അക്രമം നടത്തിയത്. മതില്‍ തകര്‍ക്കുകയും തെങ്ങിന്‍റെ അടിഭാഗം പാതി മുറിച്ചും മറ്റൊരു തെങ്ങിന്‍റെ ഓലകള്‍ പൂര്‍ണമായും വെട്ടി മാറ്റുകയും ചെയ്തു. കവുങ്ങുകളും നശിപ്പിച്ചു.'-ജയരാജൻ പറഞ്ഞു. അക്രമത്തില്‍ രണ്ടുലക്ഷം രൂപയുടെ നഷ്ടമുണ്ടായിട്ടുണ്ട്.

രസികശിരോമണി പുരസ്‌കാരം ജയചന്ദ്രന്‍ തകഴിക്കാരന്

കാഞ്ഞങ്ങാട്: തിയേറ്റര്‍ ഗ്രൂപ്പ് കാഞ്ഞങ്ങാടിന്‍റെ രസികശിരോമണി കോമന്‍ നായര്‍ പുരസ്‌കാരത്തിന് നാടകനടന്‍ ജയചന്ദ്രന്‍ തകഴിക്കാരന്‍ അര്‍ഹനായി. 15,000 രൂപയും കാനായി കുഞ്ഞിരാമന്‍ രൂപകല്പന ചെയ്ത ശില്പവും അടങ്ങുന്ന പുരസ്‌കാരം 18നു രാവണീശ്വരം ശോഭന ക്ലബില്‍ നടക്കുന്ന നാടക ക്യാമ്പില്‍ ഇ. ചന്ദ്രശേഖരന്‍ എംഎല്‍എ സമ്മാനിക്കും. പത്രസമ്മേളനത്തില്‍ എന്‍. മണിരാജ്, കെ.വി. കൃഷ്ണന്‍, സി. നാരായണന്‍, വിനീഷ് ബാബു, സി.കെ. ശശി നമ്പ്യാര്‍, രവീന്ദ്രന്‍ നീലേശ്വരം, ഗംഗാധരന്‍ പള്ളിക്കാപ്പില്‍ എന്നിവര്‍ സംബന്ധിച്ചു.

എംബിബിഎസ് വിദ്യാര്‍ഥിനിയുടെ മരണം: സഹപാഠികള്‍ക്കും വാര്‍ഡനുമെതിരെ കുടുംബം

കാഞ്ഞങ്ങാട്: എറണാകുളം ഗവ. മെഡിക്കല്‍ കോളജിലെ മൂന്നാംവര്‍ഷ എംബിബിഎസ് വിദ്യാര്‍ഥിനി പി.പി. അമ്പിളി (24) ജീവനൊടുക്കാന്‍ കാരണം സഹപാഠികളുടെയും ഹോസ്റ്റല്‍ വാര്‍ഡന്‍റെയും മാനസികപീഡനമെന്ന് കുടുംബം. പടന്ന ഉദിനൂര്‍ തടിയന്‍കൊവ്വല്‍ സ്വദേശിനിയായ അമ്പിളിയെ ഈമാസം അഞ്ചിന് രാത്രി 11ന് ഹോസ്റ്റല്‍ ഫാനില്‍ തൂങ്ങിമരിച്ച നിലയില്‍ സഹപാഠി കണ്ടെത്തിയെന്നാണ് കുടുംബത്തിനു ലഭിച്ച വിവരം. എന്നാല്‍, ആറിനു പുലര്‍ച്ചെ 2.12 വരെ അമ്പിളിയുടെ ഫോണ്‍ ഉപയോഗത്തില്‍ ഇരുന്നതായി ബന്ധുക്കള്‍ പറയുന്നു. മൂന്നുപേര്‍ക്കൊപ്പമാണ് അമ്പിളി താമസിച്ചിരുന്നത്. ഇതില്‍ രണ്ടുപേര്‍ അമ്പിളിയെ സ്ഥിരമായി പരിഹസിക്കുകയും ദ്രോഹിക്കുകയും ചെയ്യുമായിരുന്നെന്ന് കുടുംബാംഗങ്ങള്‍ പറയുന്നു. ഡെര്‍മറ്റോളജി ഡിപ്പാര്‍ട്ട്‌മെന്‍റ് അധ്യാപിക കൂടിയായ വാര്‍ഡന്‍ ഇതിന് ഒത്താശ ചെയ്തു കൊടുത്തു. ഒരുതവണ ആത്മഹത്യ കുറിപ്പെഴുതി അമ്പിളിയുടെ ബാഗില്‍ നിക്ഷേപിച്ചിരുന്നു. എന്നാല്‍, ഇതു തന്‍റെ കൈയക്ഷരമല്ലെന്ന് അന്ന് അമ്പിളി പറഞ്ഞിരുന്നു. പിന്നീട് സഹപാഠികള്‍ തങ്ങളുടെ മേക്കപ്പ് കിറ്റ് അമ്പിളിയുടെ ബാഗില്‍ ഒളിപ്പിച്ചുവച്ച് അമ്പിളിയെ മോഷ്ടാവായി ചിത്രീകരിച്ചു. ഇത് അമ്പിളിയുടെ പഠനത്തെ സാരമായി ബാധിച്ചു. എംബിബിഎസ് ഒന്നാംവര്‍ഷ പരീക്ഷയില്‍ ബാച്ചിലെ ഒന്നാം റാങ്കുകാരിയായിരുന്ന അമ്പിളി രണ്ടാംവര്‍ഷം അനാട്ടമി പരീക്ഷയില്‍ പരാജയപ്പെട്ടു. ഇതേത്തുടര്‍ന്ന് അമ്പിളി സൈക്യാട്രിസ്റ്റിന്‍റെ സഹായം തേടിയിരുന്നു. മരിച്ചതിനുശേഷം അമ്പിളി മുമ്പു രണ്ടുതവണ ആത്മഹത്യയ്ക്കു ശ്രമിച്ചിട്ടുണ്ടെന്ന വ്യാജ വാര്‍ത്ത ഓൺലൈൻ മാധ്യമങ്ങളില്‍ നല്‍കിയതായും കുടുംബം ആരോപിക്കുന്നു. സംഭവത്തില്‍ വിശദമായ അന്വേഷണം ആവശ്യപ്പെട്ട് മുഖ്യമന്ത്രിക്കും സംസ്ഥാന പോലീസ് മേധാവിക്കും കളമശേരി പോലീസ് സ്‌റ്റേഷനിലും അമ്മ പി.പി. ഗീത പരാതി നല്‍കിയിട്ടുണ്ട്. ഹോട്ടല്‍ സപ്ലൈയറായ ചന്ദ്രന്‍റെയും തയ്യല്‍ തൊഴിലാളിയായ ഗീതയുടെയും മൂത്ത മകളായ അമ്പിളി പഠനത്തില്‍ മിടുക്കിയായിരുന്നു. എംബിബിഎസ് സ്വപ്‌നവുമായി എന്‍ട്രന്‍സ് എഴുതിയെങ്കിലും ആയുര്‍വേദ കോഴ്‌സിലാണ് അഡ്മിഷന്‍ ലഭിച്ചത്. താത്പര്യമില്ലായിരുന്നെങ്കിലും വീട്ടുകാരുടെ നിര്‍ബന്ധത്തിനു വഴങ്ങി തിരുവനന്തപുരം ഗവ. ആയുര്‍വേദ മെഡിക്കല്‍ കോളജില്‍ ചേര്‍ന്നു. എന്നാല്‍, വീട്ടുകാരോട് പോലും പറയാതെ എംബിബിഎസിനായി അമ്പിളി തയാറെടുക്കുന്നുണ്ടായിരുന്നു. ഒന്നരവര്‍ഷത്തെ കഠിനപരിശ്രമത്തിനൊടുവില്‍ കേരളത്തിലെ മികച്ച മെഡിക്കല്‍ കോളജുകളിലൊന്നായ എറണാകുളം കളമശേരിയിലെ മെഡിക്കല്‍ കോളജില്‍ എംബിബിഎസ് പ്രവേശനം നേടുകയായിരുന്നു.

തമിഴ്‌നാട് സ്വദേശിയുടെ ആക്രമണത്തില്‍ ഗുരുതരമായി പൊള്ളലേറ്റ യുവതി മരിച്ചു

കാസര്‍ഗോഡ്: തമിഴ്‌നാട് സ്വദേശി പെയിന്‍റ് തിന്നര്‍ ഒഴിച്ചു തീകൊളുത്തിയതിനെതുടര്‍ന്ന് ഗുരുതരമായി പൊള്ളലേറ്റ് ചികിത്സയിലായിരുന്ന യുവതി മരിച്ചു. ബേഡകം മുന്നാട് പേര്യയിലെ പ്രവാസിയായ നന്ദകുമാറിന്‍റെ ഭാര്യ സി.രമിത (30) ആണ് മരിച്ചത്. മംഗളൂരു എജെ ആശുപത്രിയില്‍ ചികിത്സയിലായിരുന്ന രമിത തിങ്കളാഴ്ച രാത്രി 12ഓടെയാണ് മരിച്ചത്. പ്രതി തമിഴ്‌നാട് ചിന്നപട്ടണം സ്വദേശി രാമാമൃതത്തെ (57) ബേഡകം പോലീസ് സംഭവം നടന്ന ദിവസം തന്നെ അറസ്റ്റ് ചെയ്തിരുന്നു. ഈമാസം എട്ടിന് ഉച്ചകഴിഞ്ഞ് 3.20ഓടെയാണ് സംഭവം. മുന്നാട് മണ്ണടുക്കത്ത് ചെറിയൊരു പലചരക്കുകട നടത്തുകയായിരുന്നു രമിത. ഇതേ കെട്ടിടത്തില്‍ തൊട്ടടുത്തായി ഫര്‍ണിച്ചര്‍ ഷോപ്പ് നടത്തുന്നയാളാണ് രാമാമൃതം. മദ്യലഹരിയില്‍ രാമാമൃതം രമിതയെ അസഭ്യം പറയുകയും തുറിച്ചുനോക്കുകയും ചെയ്യുന്നത് പതിവായതോടെ രമിത ബേഡകം പോലീസില്‍ പരാതി നല്‍കിയിരുന്നു. സംഭവത്തില്‍ പോലീസ് കേസെടുത്തില്ലെങ്കിലും ഇയാളെ താക്കീത് ചെയ്യുകയും ഇവിടെനിന്നും മുറിയൊഴിഞ്ഞു പോകാന്‍ ആവശ്യപ്പെടുകയും ചെയ്തു. ഇതിന്‍റ വിരോധത്തിലാണ് രാമാമൃതം സംഭവദിവസം കടയ്ക്കുള്ളില്‍ ഉണ്ടായിരുന്ന രമിതയുടെ ദേഹത്ത് പെയിന്‍റ് തിന്നര്‍ ഒഴിച്ച് പന്തംകൊണ്ട് തീകൊളുത്തിയത്. ദേഹമാസകലം തീപടര്‍ന്ന രമിത കടയ്ക്കുള്ളില്‍ വട്ടത്തില്‍ ഓടുകയായിരുന്നെന്ന് സംഭവത്തിന് സാക്ഷിയായ രമിതയുടെ സുഹൃത്ത് സജിത പറഞ്ഞു. 'പുറത്തേക്കിറങ്ങി നിലത്തുകിടന്നുരുളാന്‍ ഞാന്‍ അലറിവിളിച്ച് പറഞ്ഞു. അപ്പോഴാണ് ശ്രീകൃഷ്ണ ബസ് അവിടെയെത്തുന്നത്. യാത്രക്കാര്‍ ഓടിയെത്തി രമിതയുടെ ദേഹത്തു വെള്ളമൊഴിച്ചു. അപ്പോഴേക്കും രമിതയ്ക്ക് മാരകമായി പൊള്ളലേറ്റിരുന്നു. ഇതെല്ലാം അഞ്ചു മിനുറ്റിനുള്ളില്‍ സംഭവിച്ചു.'-സജിത പറഞ്ഞു. അതേസമയം ബസ് പോകാന്‍ തുടങ്ങുമ്പോഴേക്കും പ്രതി രാമാമൃതവും ഇതില്‍ കയറി. അയാളാണ് തീകൊളുത്തിയതെന്ന് സജിത വിളിച്ചുപറഞ്ഞപ്പോള്‍ ബസിന്‍റെ രണ്ടു വാതിലുകളും ഡ്രൈവര്‍ ലോക്ക് ചെയ്യുകയും ബസ് നേരെ ബേഡകം പോലീസ് സ്റ്റേഷനിലെത്തിച്ച് പ്രതിയെ പോലീസിന് കൈമാറുകയും ചെയ്തു. 90 ശതമാനം പൊള്ളലേറ്റ രമിതയ്ക്ക് അസഹ്യമായ വേദനയുള്ളതിനാല്‍ ആറുമണിക്കൂര്‍ ഇടവിട്ട് വേദനസംഹാരി നല്‍കിയിരുന്നു. രമിതയുടെ ചികിതസ്ക്കായി നാട്ടുകാര്‍ പണം സ്വരൂപിച്ചുവരികയായിരുന്നു. ദുബായില്‍ ഹോട്ടല്‍ ജീവനക്കാരനാണ് ഭര്‍ത്താവ് നന്ദകുമാര്‍. ഏകമകന്‍ ദേവനന്ദ് കുണ്ടകുഴി ജിഎച്ച്എസ്എസിലെ നാലാംക്ലാസ് വിദ്യാര്‍ഥിയാണ്. ബേഡകം ചുള്ളി ചീറ്റക്കയയിലെ രാമുണ്ണി-സുധ ദമ്പതികളുടെ മകളാണ് രമിത. സഹോദരങ്ങള്‍: രമ്യ, രജിന.

ഓട്ടോഡ്രൈവറുടെ കൊലപാതകം: മുന്‍ സ്‌കൂള്‍ ബസ് ഡ്രൈവര്‍ അറസ്റ്റില്‍

കാസര്‍ഗോഡ്: ഓട്ടോഡ്രൈവറെ കുത്തിക്കൊലപ്പെടുത്തി കിണറ്റില്‍ തള്ളിയ സംഭവത്തില്‍ പ്രതിയായ മുന്‍ സ്‌കൂള്‍ ബസ് ഡ്രൈവര്‍ അറസ്റ്റില്‍. കര്‍ണാടക മുല്‍ക്കി കൊളനാട് സ്വദേശി മുഹമ്മദ് ഷെരീഫിനെ (52) കൊലപ്പെടുത്തിയ കേസില്‍ കര്‍ണാടക സൂറത്കല്‍ കല്ലാപ്പു സ്വദേശി അഭിഷേക് ഷെട്ടി (25) ആണ് അറസ്റ്റിലായത്. ആറുമാസം മുമ്പ് സ്‌കൂള്‍ ബസ് തന്‍റെ ഓട്ടോറിക്ഷയ്ക്ക് സൈഡ് നല്‍കാത്തതിനെതുടര്‍ന്ന് ഷെരീഫും അഭിഷേകും തമ്മില്‍ വാക്കേറ്റമുണ്ടായിരുന്നു. ഇതിനു പിന്നാലെ മംഗളൂരുവിലെ ഓട്ടോഡ്രൈവര്‍മാര്‍ അഭിഷേക് ഓടിക്കുന്ന സ്‌കൂള്‍ ബസിന് മനഃപൂര്‍വം സൈഡ് നല്‍കാതിരിക്കുന്ന സംഭവങ്ങളുമുണ്ടായി. പിന്നീട് അശ്രദ്ധമായി ബസോടിക്കുന്നു എന്ന പരാതി ലഭിച്ചതിനെതുടര്‍ന്ന് അഭിഷേകിനെ ജോലിയില്‍നിന്നും പിരിച്ചുവിടുകയും ചെയ്തു. ഇതിന്‍റെ വിരോധത്തില്‍ ഈമാസം ഒമ്പതിന് മംഗളൂരു ബൈക്കംപാടിയില്‍നിന്നും ഷെരീഫിന്‍റെ ഓട്ടോ വാടകയ്ക്കു വിളിച്ച അഭിഷേക് കാസര്‍ഗോഡ് മഞ്ചേശ്വരം മഹലിംഗേശ്വര അഡ്കപള്ളയിലെ വിജനമായ സ്ഥലത്തെത്തിക്കുകയും കൈയില്‍ കരുതിയ കത്തി കൊണ്ട് കുത്തിക്കൊലപ്പെടുത്തി ആള്‍മറയില്ലാത്ത കിണറ്റില്‍ തള്ളുകയുമായിരുന്നു. കൃത്യം നടത്തിയശേഷം അഭിഷേക് റോഡിലേക്കിറങ്ങി ഒരു സ്‌കൂട്ടര്‍ കൈകാണിച്ചു നിര്‍ത്തി അതില്‍ക്കയറി തലപ്പാടിയിലേക്ക് പോവുകയും അന്നു രാത്രി അവിടെയുള്ള ബന്ധുവീട്ടില്‍ കഴിയുകയും ചെയ്തു. അന്നേദിവസം തന്നെ കിണറിനു സമീപത്ത് ഓട്ടോറിക്ഷ ചെരിഞ്ഞു കിടക്കുന്ന നിലയില്‍ കണ്ട വഴി യാത്രക്കാരനാണ് കിണറ്റില്‍ മൃതദേഹം കണ്ടെത്തിയത്. കിണറ്റിനരികില്‍ ചോരത്തുള്ളികളും ചെരുപ്പും പേഴ്‌സും കണ്ടെത്തിയിരുന്നു. നാട്ടുകാര്‍ വിവരമറിയിച്ചതിനെ തുടര്‍ന്ന് മഞ്ചേശ്വരം പോലീസ് സ്ഥലത്തെത്തി. മൃതദേഹം പുറത്തെടുത്തപ്പോള്‍ കഴുത്തിനു പിന്നില്‍ കുത്തേറ്റത് കണ്ടതോടെയാണ് സംഭവം കൊലപാതകമാണെന്ന് വ്യക്തമാകുന്നത്. ഓട്ടോയുടെ നമ്പര്‍ കേന്ദ്രീകരിച്ച് നടത്തിയ അന്വേഷണത്തില്‍ ആളെ തിരിച്ചറിഞ്ഞു. കര്‍ണാടക പോലീസുമായി ബന്ധപ്പെട്ടപ്പോള്‍ ഷെരീഫിനെ കാണാനില്ലെന്ന് വീട്ടുകാര്‍ മുല്‍ക്കി പോലീസ് സ്‌റ്റേഷനില്‍ പരാതി നല്‍കിയതായി അറിഞ്ഞു. സാധാരണ ഓട്ടം കഴിഞ്ഞ് രാത്രി 10നു മുമ്പ് വീട്ടിലെത്താറുള്ള ഷെരീഫ് പിറ്റേന്ന് രാവിലെയായിട്ടും എത്താത്തതിനെതുടര്‍ന്നാണ് വീട്ടുകാര്‍ പരാതി നല്‍കിയത്. ഇതേത്തുടര്‍ന്ന് കാസര്‍ഗോഡ് അഡീഷണല്‍ എസ്പി പി.ബാലകൃഷ്ണന്‍ നാര‍, ഡിവൈഎസ്പി സി.കെ.സുനില്‍കുമാര്‍ എന്നിവരുടെ മേല്‍നോട്ടത്തില്‍ മഞ്ചേശ്വരം ഇന്‍സ്‌പെക്ടര്‍ ഇ.അനൂപ്കുമാറിന്റെ നേതൃത്വത്തിലുള്ള പ്രത്യേക അന്വേഷണസംഘമാണ് കേസ് അന്വേഷിച്ചത്. കൊലപാതകത്തിന് ഉപയോഗിച്ച കത്തി പോലീസ് കണ്ടെടുത്തു. 14 ലഹരികടത്ത് കേസുകളിലെ പ്രതിയാണ് അഭിഷേക് ഷെട്ടി. ഇയാളുടെ പിതാവും കൊലക്കേസ് പ്രതിയാണ്. പ്രതി ഒറ്റയ്ക്കാണ് കൊലപാതകം നടത്തിയത്. ലഹരി ഇടപാടുകള്‍ക്കായി പലവട്ടം വന്നിട്ടുള്ളതിനാല്‍ മഞ്ചേശ്വരം മേഖല അഭിഷേകിന് സുപരിചിതമാണ്. തന്റെ പതിവ് ഹെയര്‍സ്റ്റൈല്‍ മാറ്റിയതിനാലും രാത്രിയായതിനാലും ഓട്ടം വിളിക്കാന്‍ വന്ന അഭിഷേകിനെ ഷെരീഫിന് തിരിച്ചറിയാന്‍ സാധിച്ചിരുന്നില്ലെന്ന് പോലീസ് പറഞ്ഞു. കര്‍ണാടക പോലീസിന്റെ സഹായത്തോടെ 208 സിസിടിവി കാമറകള്‍ കേന്ദ്രീകരിച്ചു നടത്തിയ അന്വേഷണമാണ് സംഭവം നടന്ന് മൂന്നുദിവസത്തിനകം പ്രതിയെ പിടികൂടാന്‍ സഹായിച്ചത്.

പഞ്ചായത്തിന്‍റെ റോഡ് കൈയേറി വേലികെട്ടാൻ വനംവകുപ്പിന്‍റെ നീക്കം

മാലോം: പുഞ്ചയിൽ പഞ്ചായത്തിന്‍റെ ആസ്തി രജിസ്റ്ററിലുള്ള റോഡ് കൈയേറി വനംവകുപ്പ് വേലികെട്ടാൻ കുഴികുത്തി. ബളാൽ പഞ്ചായത്തിലെ ഏഴ്, എട്ട് വാർഡുകളെ തമ്മിൽ ബന്ധിപ്പിക്കുന്ന മാലോം-മൈക്കയം റോഡിലെ പുഞ്ച ആനക്കുഴി ഭാഗത്താണ് വനംവകുപ്പ് ഫെൻസിങ്ങിനായി കുഴി കുത്തിയിരിക്കുന്നത്. വിവരമറിഞ്ഞ് പഞ്ചായത്ത് പ്രസിഡന്‍റ് രാജു കട്ടക്കയത്തിന്‍റെ നേതൃത്വത്തിൽ നാട്ടുകാർ പ്രതിഷേധവുമായി എത്തി. വനാതിർത്തിയോട് ചേർന്നുള്ള മലമ്പ്രദേശങ്ങളുടെ വികസനം ലക്ഷ്യമിട്ട് നാലു പതിറ്റാണ്ടു മുമ്പാണ് ഈ റോഡ് നിർമിച്ചത്. പഞ്ചായത്ത് വൈസ് പ്രസിഡന്‍റായിരുന്ന പി.ജി.ദേവ് മുൻകൈയെടുത്ത് കമാൻഡ് ഏരിയ ഡെവലപ്പ്മെന്‍റ് അഥോറിറ്റി (കാഡ) യുടെ പദ്ധതിയിലാണ് റോഡിന്‍റെ നിർമാണം പൂർത്തിയാക്കിയത്. ഇതിന് ജില്ലാ വികസന സമിതിയുടെ പ്രത്യേക അനുമതിയും ലഭിച്ചിരുന്നു. തുടർന്ന് വർഷങ്ങളോളം ഇതുവഴി സുഗമമായി വാഹനഗതാഗതം നടന്നിരുന്നു. എന്നാൽ പിന്നീട് വനംവകുപ്പ് ഇതുവഴിയുള്ള ഗതാഗതം തടഞ്ഞു. ഇതോടെ റോഡിൽ കാട് കയറി. പഞ്ചായത്തിന്‍റെ ആസ്തി രജിസ്റ്ററിൽ ഉൾപ്പെട്ട റോഡാണെങ്കിലും ഇവിടെ നവീകരണ പ്രവൃത്തികൾ നടത്തുന്നതും വനംവകുപ്പ് തടഞ്ഞു. ഇതോടെ ആലുവ-മൂന്നാർ രാജപാതയ്ക്ക് സംഭവിച്ചതുപോലെ ഈ റോഡ് ഫലത്തിൽ വനത്തിനുള്ളിലായി. റോഡ് വീണ്ടും ടാറിംഗ് നടത്തി ഗതാഗതം പുനസ്ഥാപിക്കാനുള്ള നടപടിക്രമങ്ങൾ നടന്നുവരുന്നതിനിടയിലാണ് വനംവകുപ്പ് റോഡ് കൈയേറി കുഴികുത്തിയതെന്ന് പഞ്ചായത്ത് പ്രസിഡന്‍റ് രാജു കട്ടക്കയം പറഞ്ഞു. റോഡിനെ വീണ്ടെടുക്കാനുള്ള അടിയന്തിര നടപടികൾ പഞ്ചായത്തിന്‍റെ ഭാഗത്തുനിന്നുണ്ടാകുമെന്നും അദ്ദേഹം വ്യക്തമാക്കി.

ലഹരിവിരുദ്ധ കാന്പയിന് തുടക്കം

ചെറുവത്തൂർ: ലഹരിവിപത്തിനെതിരെ കാമ്പയിനുമായി കൈതക്കാട് പയ്യങ്കി അൽമദാർ കൾച്ചറൽ ആൻഡ് ചാരിറ്റബിൾ സൊസൈറ്റി. രാജ്മോഹൻ ഉണ്ണിത്താൻ എംപി ഉദ്ഘാടനം ചെയ്തു. വി.കെ.മുഹമ്മദ് റഫീഖ് ഹാജി അധ്യക്ഷത വഹിച്ചു. റിട്ട. ഡിജിപി ഡോ.അലക്സാണ്ടർ ജേക്കബ് മുഖ്യ പ്രഭാഷണം നടത്തി. എം.രാജഗോപാലൻ എംഎൽഎ ഭവന നിർമാണ ധന സഹായം ചടങ്ങിൽ വിതരണം ചെയ്തു. എസ്.ടി.പി.ജമാലുദ്ദീൻ വിഷയാവതരണം നടത്തി. വിവിധ മേഖലയിലുള്ളവരെ ആദരിച്ചു. ടി.കെ.സി.മുഹമ്മദലി ഹാജി, എ.ആർ.എം.മഹമ്മദ് ഷഹീദ്, കെ.എം.സി.താജുദ്ദീൻ, വെള്ളരിക്കുണ്ട് ഇൻസ്പെക്ടർ ടി.പി.മുകുന്ദൻ, ഡിസിസി പ്രസിഡന്‍റ് പി.കെ.ഫൈസൽ, എം.ടി.പി.ബുഷ്റ, എം.വി.അബ്ദുൾ റഹ്മാൻ ഹാജി, പ്രഫ.പി.സി.അഷ്റഫ്, ഡോ.ടി.കെ.മുഹമ്മദലി, റിഷാദ് ഓരിമുക്ക്, എ.ജി.സി.ബഷീർ, കെ.പി.സതീഷ്, ഹംസൻ പയ്യങ്കി, എസ്.സി.മുഷ്താഖ്, എം.ഭാസ്കരൻ എന്നിവർ പ്രസംഗിച്ചു.

എല്ലാരും എന്‍റെ മക്കളാണ്; ക്ലാസിലെ മുഴുവൻ കുട്ടികൾക്കും വിഷുക്കോടിയുമായി ഒരധ്യാപിക

കാഞ്ഞങ്ങാട്: അധ്യയന വർഷം കഴിയുമ്പോൾ അധ്യാപികയെ വിട്ടുപോരാനാകാതെ കെട്ടിപ്പിടിച്ച് കരയുന്ന കുട്ടികൾ പലപ്പോഴും എൽപി സ്കൂൾ ക്ലാസുകളിലെ പതിവു കാഴ്ചയാണ്. അങ്ങനെ കുട്ടികളുമായി സ്നേഹം പങ്കുവച്ച് പിരിഞ്ഞ ഒരധ്യാപിക ആഴ്ചകൾ കഴിഞ്ഞപ്പോൾ തന്‍റെ പ്രിയപ്പെട്ട കുട്ടികൾക്ക് വിഷുക്കോടിയുമായി വീടുകളിലെത്തിയ കഥയാണ് ഇപ്പോൾ കാഞ്ഞങ്ങാട്ടെ കുട്ടികൾക്ക് പറയാനുള്ളത്. കാഞ്ഞങ്ങാട് നഗരസഭയിലെ മേലാങ്കോട്ട് എസികെഎൻഎം ഗവ: യുപി സ്കൂൾ അധ്യാപിക എസ്.എ. സുജനയാണ് ഒന്നാം ക്ലാസിലെ എല്ലാ കുട്ടികൾക്കും സ്വന്തം മക്കൾക്കെന്നപോലെ വിഷുക്കോടി വാങ്ങി അവരുടെ വീടുകളിലെത്തിയത്. ക്ലാസിലെ ഓരോ പെൺകുട്ടിയുടേയും ആൺകുട്ടിയുടേയും രൂപഭാവങ്ങൾ ഹൃദിസ്ഥമായ സുജന അവരവരുടെ അളവിനൊത്ത ഉടുപ്പുകൾ തന്നെയാണ് തെരഞ്ഞെടുത്ത് വാങ്ങിയത്. കഴിഞ്ഞ വർഷത്തെ ഒന്നാംക്ലാസിൽ പഠിച്ച നഗരസഭയുടെയും അജാനൂർ, മടിക്കൈ പഞ്ചായത്തുകളുടെയും വിവിധ ഭാഗങ്ങളിലായി താമസിക്കുന്ന 25 കുട്ടികളുടെ വീടുകളിലേക്കാണ് സുജന വിഷുക്കോടിയുമായി കയറിച്ചെന്നത്. സ്കൂളിലെ കാര്യമെല്ലാം മറന്ന് കളിയും കുസൃതിയുമായി നടക്കുകയായിരുന്ന കുട്ടികൾ പെട്ടെന്ന് ടീച്ചർ വരുന്നതുകണ്ട് അമ്പരന്നു. പൊടുന്നനേ അമ്പരപ്പ് ആവേശത്തിനും വിഷുക്കോടി കണ്ടതിന്‍റെ ആഹ്ളാദത്തിനും വഴിമാറി. അച്ഛനും അമ്മയ്ക്കും ചേച്ചിക്കുമൊക്കെ ടീച്ചറെ പരിചയപ്പെടുത്താനും ചില കുസൃതികൾ മറന്നില്ല. പഠനത്തിനൊപ്പം കളികളിലൂടെ അറിവുകൾ നേടുന്ന പാഠ്യേതര പ്രവർത്തനങ്ങളിലും കുട്ടികൾക്കൊപ്പം കട്ടയ്ക്ക് നിന്ന സുജന ടീച്ചറെ എല്ലാവർക്കും അത്രമേൽ ഇഷ്ടമായിരുന്നു. ജൂൺ മാസത്തിൽ രണ്ടാം ക്ലാസിലേക്ക് വരുമ്പോൾ ക്ലാസ് ടീച്ചറായിട്ടല്ലെങ്കിലും മറ്റേതെങ്കിലും വിധത്തിൽ വീണ്ടും കാണാമെന്ന് കുട്ടികൾക്കെല്ലാം ഉറപ്പുനല്കിയാണ് സുജന മടങ്ങിയത്.

കോൺഗ്രസ് കുടുംബസംഗമം സംഘടിപ്പിച്ചു

ബളാൽ: ബളാൽ മണ്ഡലം മൂന്നാം വാർഡ് കോൺഗ്രസ്‌ കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച മഹാത്മാഗാന്ധി കോൺഗ്രസ് കുടുംബസംഗമം പഞ്ചായത്ത് പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. ഡിസിസി വൈസ് പ്രസിഡന്‍റ് ബി.പി. പ്രദീപ് കുമാർ മുഖ്യപ്രഭാഷണം നടത്തി. ബളാൽ -രാജപുരം ജില്ലാ പഞ്ചായത്ത്‌ റോഡ് അടിയന്തിരമായി പൊതുമരാമത്ത് വകുപ്പ് ഏറ്റെടുത്ത് മെക്കാഡം ടാറിംഗ് നടത്തണമെന്ന് യോഗം ആവശ്യപ്പെട്ടു. വാർഡ് കോൺഗ്രസ് കമ്മിറ്റി പ്രസിഡന്‍റ് സി.വി.ശ്രീധരൻ അധ്യക്ഷത വഹിച്ചു. ഡിസിസി ജനറൽ സെക്രട്ടറി ഹരീഷ് പി.നായർ, മണ്ഡലം കോൺഗ്രസ് പ്രസിഡന്‍റ് എം.പി.ജോസഫ്, അലക്സ്‌ നെടിയകാലാ, ഷോബി ജോസഫ്, വി.മാധവൻ നായർ, ജോസ് എബ്രഹാം, കെ.സുരേന്ദ്രൻ, ജോസ് വർഗീസ്, ടി.വി. ചന്ദ്രൻ, എം.ടി.ദേവസ്യ, ജോസുകുട്ടി അറയ്ക്കൽ, പി.അരവിന്ദാക്ഷൻ എന്നിവർ പ്രസംഗിച്ചു.

കെപിഎസ്ടിഎ യാത്രയയപ്പ് സമ്മേളനം നടത്തി

ചട്ടഞ്ചാൽ: കെപിഎസ്ടിഎ കാസർഗോഡ് ഉപജില്ല കമ്മിറ്റിയുടെ നേതൃത്വത്തിൽ ഈ വർഷം സർവീസിൽ നിന്ന് വിരമിക്കുന്ന അംഗങ്ങൾക്ക് യാത്രയയപ്പ് നല്കി. ചട്ടഞ്ചാൽ അർബൻ ബാങ്ക് ഹാളിൽ നടന്ന യാത്രയയപ്പ് സമ്മേളനം സംസ്ഥാന വൈസ് പ്രസിഡന്‍റ് ഡോ.ജി.കെ. ഗിരീഷ് ഉദ്ഘാടനം ചെയ്തു. ബിജു കാവിൽ മുഖ്യപ്രഭാഷണം നടത്തി. ജില്ലാ പ്രസിഡന്‍റ് പി.ടി. ബെന്നി വിരമിക്കുന്ന അധ്യാപകരെ ആദരിച്ചു. ഉപജില്ലാ പ്രസിഡന്‍റ് എ. ജയദേവൻ അധ്യക്ഷനായി. സംസ്ഥാന നിർവാഹക സമിതി അംഗം ജോമി ടി. ജോസ്, സംസ്ഥാന സമിതി അംഗം സ്വപ്ന ജോർജ്, ജില്ലാ സെക്രട്ടറി കെ.ഗോപാലകൃഷ്ണൻ, കെ. സുഗതൻ, ആർ.വി. പ്രേമാനന്ദൻ, കെ.എ. ജോൺ, രജനി കെ. ജോസഫ്, എ. രാധാകൃഷ്ണൻ, ഹരീഷ്‌ പേറയിൽ, പി. ഷൈമ എന്നിവർ പ്രസംഗിച്ചു. വിരമിക്കുന്ന അധ്യാപകരായ കെ.വി. വാസുദേവൻ നമ്പൂതിരി, അശോകൻ കോടോത്ത്, പി.എസ്. സന്തോഷ് കുമാർ, കെ.ഐ.ശ ്രീവത്സൻ, ഡെന്നിസ് ജോൺ, റിനി തോമസ്, ടി.വി.ജനാർദ്ദനൻ, അനസൂയ, കെ. അജിത, അനിത എം. നായർ, ആനന്ദകൃഷ്ണൻ എടച്ചേരി, സി.എം.ജോബിച്ചൻ, കെ.പി. ലസിത എന്നിവർ മറുപടി ഭാഷണം നടത്തി. മലപ്പുറത്തേക്ക് സ്ഥലംമാറ്റം ലഭിച്ച് പോകുന്ന സൽമാൻ ജാഷിമിന് ഉപഹാരം നല്കി.

പ്രതിസന്ധികൾ നേരിടാൻ കുട്ടികളെ പ്രാപ്തരാക്കണം: സ്പീക്കർ

ചീമേനി: തിരിച്ചടികളില്‍ പതറിപ്പോകാതെ പ്രതിസന്ധികളെ നേരിടാനുള്ള മാനസിക ധൈര്യം നല്കി കുട്ടികളെ വളര്‍ത്താന്‍ അധ്യാപകർക്കും രക്ഷിതാക്കൾക്കും കഴിയണമെന്ന് സ്പീക്കര്‍ എ.എൻ.ഷംസീർ പറഞ്ഞു. താരതമ്യപഠനം നടത്താതെ ഓരോ കുട്ടിയുടെയും യഥാർഥ കഴിവുകൾ കണ്ടെത്തി അവയെ പരിപോഷിപ്പിക്കാൻ കഴിയണമെന്നും അദ്ദേഹം പറഞ്ഞു. ചീമേനി ഗവ. ഹയർ സെക്കൻഡറി സ്കൂളിനായി നിർമിച്ച പുതിയ കെട്ടിടം ഉദ്ഘാടനം ചെയ്ത് പ്രസംഗിക്കുകയായിരുന്നു സ്പീക്കര്‍. പുതിയ സ്റ്റേജിന്‍റെ ഉദ്ഘാടനം എം.രാജഗോപാലന്‍ എംഎല്‍എ നിർവഹിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷത വഹിച്ചു. നീലേശ്വരം ബ്ലോക്ക് പഞ്ചായത്ത് പ്രസിഡന്‍റ് മാധവന്‍ മണിയറ, ജില്ലാ പഞ്ചായത്ത് പൊതുമരാമത്ത് സ്ഥിരം സമിതി അധ്യക്ഷ കെ.ശകുന്തള, കയ്യൂര്‍-ചീമേനി പഞ്ചായത്ത് പ്രസിഡന്‍റ് എ.ജി. അജിത് കുമാര്‍, കാസര്‍ഗോഡ് വികസന പാക്കേജ് സ്‌പെഷ്യല്‍ ഓഫീസര്‍ വി.ചന്ദ്രന്‍, ഹയർ സെക്കൻഡറി മേഖലാ ഡെപ്യൂട്ടി ഡയരക്ടർ രാജേഷ്‌ കുമാര്‍, ജില്ലാ വിദ്യാഭ്യാസ ഉപഡയറക്ടര്‍ ടി.വി.മധുസൂദനന്‍, പൊതുമരാമത്ത് വകുപ്പ് എക്‌സിക്യുട്ടീവ് എൻജിനീയര്‍ എം.സജിത്ത്, ജില്ലാ പഞ്ചായത്ത് എക്‌സി. എൻജിനീയര്‍ എന്‍.ഷൈനി, പ്രിന്‍സിപ്പല്‍ ജി.സുനില്‍ കുമാര്‍, മുഖ്യാധ്യാപകൻ വി.കെ.സക്കറിയ, പിടിഎ പ്രസിഡന്‍റ് എം.ഗംഗാധരന്‍, കരിമ്പിൽ കൃഷ്ണൻ, കുര്യാക്കോസ് പ്ലാപ്പറമ്പില്‍, കരീം ചന്തേര, ജെറ്റോ ജോസഫ്, കൈപ്രത്ത് കൃഷ്ണന്‍ നമ്പ്യാര്‍, സണ്ണി അരമന എന്നിവർ പ്രസംഗിച്ചു.

സ്പെയിനിൽ മെഡിക്കൽ പിജി പ്രവേശനം വാഗ്ദാനംചെയ്ത് ലക്ഷങ്ങൾ തട്ടിയതിന് കേസ്

കാഞ്ഞങ്ങാട്: സ്പെയിനിലെ സൽമാൻസ മെഡിക്കൽ യൂണിവേഴ്സിറ്റിയിൽ പിജി പ്രവേശനം വാഗ്ദാനം ചെയ്ത് ലക്ഷങ്ങൾ തട്ടിയതിന് നാലുപേർക്കെതിരെ കേസ്. പരപ്പ മോലോത്തുംകുന്നിലെ ചന്ദ്രൻ പൈക്കയുടെ പരാതിയിൽ ഡൽഹി സ്വദേശികളായ അർച്ചന ഗൗതം, രാഹുൽ ഗൗതം, എ.കെ.പുഷ്പ, ബിഹാർ സ്വദേശി വിവേക് കുമാർ എന്നിവർക്കെതിരെയാണ് പോലീസ് കേസെടുത്തത്. പരതിക്കാരന്‍റെ മകന് പിജി പ്രവേശനം ശരിയാക്കിത്തരാമെന്ന് വാഗ്ദാനം ചെയ്ത് 2023, 2024 വർഷങ്ങളിലായി 14 ലക്ഷം രൂപയാണ് പ്രതികൾ വാങ്ങിയതെന്ന് പരാതിയിൽ പറയുന്നു. പ്രവേശനം ലഭിക്കാതെ വന്നതോടെ പിന്നീട് 10 ലക്ഷം രൂപ തിരികെ നല്കി. പല അവധികൾ പറഞ്ഞിട്ടും അവശേഷിക്കുന്ന നാലു ലക്ഷം രൂപ തിരികെ കിട്ടാതെ വന്നതോടെയാണ് പോലീസിൽ പരാതി നല്കിയതെന്ന് ചന്ദ്രൻ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]