കോട്ടയം ചാന്നാനിക്കാട് സ്വദേശി ‌17 ലക്ഷം തട്ടിയെടുത്തതായി പരാതി : Deepika.com Nattu Visesham

KOTTAYAM

കോട്ടയം ചാന്നാനിക്കാട് സ്വദേശി ‌17 ലക്ഷം തട്ടിയെടുത്തതായി പരാതി

Sunday, November 17, 2024 7:22 AM IST

കോട്ടയം: വാഹന വില്‍പന കരാര്‍ ലംഘിച്ച കോട്ടയം ചാന്നാനിക്കാട് സ്വദേശി 17 ലക്ഷം രൂപ തട്ടിയെടുത്തതായി പരാതി. ചങ്ങനാശേരി മാമ്മൂട് ഏത്തക്കാട്ടില്‍ ഷേര്‍ളി ജേക്കബാണ് തട്ടിപ്പിനിരയായത്.

ചാന്നാനിക്കാട് സ്വദേശി ടി.സി. തോമസിന്‍റെ ഉടമസ്ഥതയിലുള്ള സ്വകാര്യബസ് പെര്‍മിറ്റ് സഹിതം 25 ലക്ഷം രൂപയ്ക്കു വാങ്ങാന്‍ ടി.സി. തോമസ് കഴിഞ്ഞ മാര്‍ച്ചില്‍ താനുമായി കരാറുണ്ടാക്കിയതായി ഷേര്‍ളി ജേക്കബ് പത്രസമ്മേളനത്തില്‍ പറഞ്ഞു.

ഇതിനുശേഷം രണ്ടുഘട്ടമായി 17 ലക്ഷംരൂപയും അഞ്ച് ലക്ഷം രൂപയുടെ ബ്ലാങ്ക് ചെക്കും കൈമാറി. തുടര്‍ന്നു ബസ് ഷേര്‍ളി ജേക്കബിനു കൈമാറി. എന്നാല്‍, മാസങ്ങള്‍ കഴിഞ്ഞിട്ടും തന്‍റെ പേരിലേക്ക് ബസിന്‍റെ ഉടമസ്ഥാവകാശം മാറ്റിനല്‍കാന്‍ ടി.സി. തോമസ് തയാറായില്ല.

ഇതിനിടയില്‍ ബസിന്‍റെ പെര്‍മിറ്റ് പുതുക്കുന്നതിനെയും ടി.സി. തോമസ് എതിര്‍ത്തു. ബസ് കഴിഞ്ഞ സെപ്റ്റംബറില്‍ ഇയാള്‍ ബലമായി കൈവശപ്പെടുത്തുകയും ചെയ്തു. ഇതോടെ ബസ് മോഷണം പോയെന്നു കാട്ടി കോട്ടയം ഈസ്റ്റ് പോലീസിലും ജില്ലാ പോലീസ് ചീഫിനു പരാതി നല്‍കിയിട്ടും തുടര്‍നടപടികള്‍ ഉണ്ടായില്ല.

അന്വേഷണം ആവശ്യപ്പെട്ട് കോടതിയെ സമീപിച്ചതോടെ പരിശോധിക്കാന്‍ ഉത്തരവിട്ടെങ്കിലും വേഗത്തിലുള്ള നടപടികൾ ഉണ്ടായില്ലെന്ന് ഷേര്‍ളി ജേക്കബ് പറയുന്നു. വിഷയത്തില്‍ ഗതാഗതമന്ത്രിക്ക് അടക്കം പരാതി നല്‍കാനൊരുങ്ങുകയാണ് ഷേർളി.