സംഘർഷം; ചാമ്പ്യന്‍സ് ബോട്ട് ലീഗ് ഉദ്ഘാടനമത്സരം അലങ്കോലപ്പെട്ടു : Deepika.com Nattu Visesham

KOTTAYAM

സംഘർഷം; ചാമ്പ്യന്‍സ് ബോട്ട് ലീഗ് ഉദ്ഘാടനമത്സരം അലങ്കോലപ്പെട്ടു

Sunday, November 17, 2024 5:33 AM IST

കോട്ടയം: ചാമ്പ്യന്‍സ് ബോട്ട് ലീഗിന്‍റെ ഉദ്ഘാടനമത്സരം അലങ്കോലപ്പെട്ടു. സംഘര്‍ഷത്തെത്തുടര്‍ന്ന് മത്സരം ഉപേക്ഷിച്ചു. താഴത്തങ്ങാടിയില്‍ ഇന്നലെ നടന്ന മത്സരത്തില്‍ ഫൈനലില്‍ എത്താതെ പുറത്തായ കുമരകം ടൗണ്‍ ബോട്ട് ക്ലബ് ട്രാക്കിനുകുറുകെ വള്ളമിട്ട് മത്സരം അലങ്കോലപ്പെടുത്തുകയായിരുന്നു.

ഇതിനെച്ചൊല്ലി തുഴച്ചില്‍കാരും സംഘാടകരും തമ്മില്‍ രൂക്ഷമായ തര്‍ക്കമുണ്ടായതോടെയാണ് മത്സരം റദ്ദാക്കിയത്. മഴയത്ത് മത്സരം നടത്തിയതാണ് തങ്ങള്‍ പുറത്താകാന്‍ കാരണമെന്ന് ആരോപിച്ചായിരുന്നു ഇവരുടെ പ്രതിഷേധം.

ഇതിനെത്തുടര്‍ന്ന് മത്സരം ഉപേക്ഷിച്ചെന്ന് അറിയിപ്പ് വന്നതോടെ പ്രതിഷേധവുമായി ചെറുവള്ളങ്ങള്‍ രംഗത്തെത്തിയത് സംഘര്‍ഷാവസ്ഥക്കും ഇടയാക്കി. തുഴച്ചിലുകാരും പോലീസുകാരും തമ്മില്‍ ഉന്തുംതള്ളുമുണ്ടായി. പോലീസുകാര്‍ തുഴച്ചിലുകാരെ മര്‍ദിച്ചതായും ആക്ഷേപമുണ്ട്. പിന്നീട് പ്രതിഷേധക്കാരെ പോലീസ് കസ്റ്റഡിയിലെടുത്തു.

ചുണ്ടന്‍വള്ളങ്ങളുടെ ആദ്യ ഹീറ്റ്‌സ് മത്സരത്തിനിടെയാണ് മഴ ആരംഭിച്ചത്. കുമരകം ടൗണ്‍ ബോട്ട് ക്ലബ്ബിന്‍റെ നടുഭാഗം ചുണ്ടന്‍ ഒന്നാമതായി ഫിനിഷ് ചെയ്തു. തുടര്‍ന്ന് മഴക്ക് ശേഷം അരമണിക്കൂറോളം പിന്നിട്ടാണ് രണ്ടും മൂന്നും ഹീറ്റ്‌സുകള്‍ നടത്തിയത്.

കാരിച്ചാല്‍ ചുണ്ടന്‍ രണ്ടാം ഹീറ്റ്‌സിലെ ജേതാവായി. രണ്ടാം ഹീറ്റ്‌സില്‍ ഇഞ്ചോടിഞ്ച് വ്യത്യാസത്തിലാണ് കാരിച്ചാലും വീയപുരവും ഫിനിഷിംഗ് പോയിന്‍റിലെത്തിയത്. നിരണമാണ് മൂന്നാം ഹീറ്റ്‌സില്‍ വിജയിച്ചത്. അവസാനറൗണ്ടിലേക്കുള്ള ചുണ്ടന്‍വള്ളങ്ങളുടെ ലിസ്റ്റില്‍നിന്നു ചെറിയ സമയത്തിന്‍റെ വ്യത്യാസത്തിലാണ് നടുഭാഗം ചുണ്ടന്‍ പുറത്തായത്. ഇതാണ് തുഴച്ചില്‍കാരെ പ്രകോപിതരാക്കിയത്.

ഇതോടെ മഴയത്ത് നടന്ന ആദ്യ ഹീസ്റ്റ് മത്സരം വീണ്ടും നടത്തുകയോ അല്ലെങ്കില്‍ ഫൈനലില്‍ തങ്ങളെക്കൂടി ഉള്‍പ്പെടുത്തണമെന്നായി കുമരകം ടൗണ്‍ ബോട്ട് ക്ലബ്ബ്. ആവശ്യം അംഗീകരിക്കില്ലെന്ന് സംഘാടകര്‍ അറിയിച്ചതോടെയാണ് തുഴച്ചിലുകാര്‍ വള്ളം ട്രാക്കിനു കുറുകെയിട്ട് മത്സരം അലങ്കോലപ്പെടുത്തിയത്.

തുഴഞ്ഞ ചുണ്ടന്‍ വള്ളങ്ങള്‍ക്ക് ഹീറ്റ്‌സ് മത്സരത്തിന്‍റെ സമയം അനുസരിച്ച് പോയന്‍റുകള്‍ നല്‍കാനും മത്സരങ്ങള്‍ക്ക് തടസം സൃഷ്ടിച്ച ക്ലബുകള്‍ക്കെതിരേ നടപടി സ്വീകരിക്കാനുമാണ് സംഘാടക സമിതിയുടെ തീരുമാനം.

മഴ വില്ലനായി

കോട്ടയം: കാണികളുടെ കരഘോഷത്തില്‍ ആരംഭിച്ച ആവേശകമായ മത്സരം ശക്തമായ മഴയെത്തുടര്‍ന്നാണ് അലങ്കോലപ്പെട്ടത്. മഴ വില്ലനായതോടെ മണിക്കൂറുകളോളം ഇരുകരകളുമായി തിങ്ങിനിറഞ്ഞ വള്ളംകളി ആരാധര്‍ നിരാശരായി മടങ്ങി.

ചുണ്ടന്‍ വള്ളങ്ങളുടെ ആദ്യ ഹീറ്റ്‌സ് മത്സരത്തിനിടെയാണ് മഴ പെയ്തത്. തുടക്കത്തില്‍ ആവേശത്തോടെ കൈയടിച്ച കാണികളെ തുടര്‍ന്ന് മഴ അലോസരപ്പെടുത്തി. പവലിയനിലും മറ്റും കുട പിടിച്ചാണ് കാണികള്‍ തുടര്‍ന്നുള്ള മത്സരങ്ങള്‍ വീക്ഷിച്ചത്.

മഴമൂലം ഹീറ്റ്‌സ് മത്സരങ്ങള്‍ അരമണിക്കൂര്‍ വൈകിയാണ് തുടങ്ങിയത്. മത്സരത്തില്‍നിന്നു പുറത്തായെന്ന പ്രതിഷേധവുമായി കുമരകം ടൗണ്‍ ബോട്ട് ക്ലബ്ബിന്‍റെ നടുഭാഗം ചുണ്ടന്‍ കുറുകെയിട്ടതോടെ മത്സരം പൂര്‍ണമായും അലങ്കോലപ്പെടുകയായിരുന്നു.

മത്സരം മുടങ്ങിയത് സംഘാടകരുടെ പിഴവാണെന്ന ആക്ഷേപവുമായി തുഴച്ചിലുകാര്‍ പ്രതിഷേധിച്ചതോടെ ഏറെ നാളുകളായി കാത്തിരുന്ന ജലോത്സവം ഉപേക്ഷിച്ച് കാണികള്‍ ഗാലറിയില്‍നിന്നു മടങ്ങി.