ആന്‍റിബയോട്ടിക്കുകളെക്കുറിച്ച് ബോധവത്കരണം : കുടുംബശ്രീയുമായി കൈകോര്‍ത്ത് ആരോഗ്യവകുപ്പ് : Deepika.com Nattu Visesham

KOTTAYAM

ആന്‍റിബയോട്ടിക്കുകളെക്കുറിച്ച് ബോധവത്കരണം : കുടുംബശ്രീയുമായി കൈകോര്‍ത്ത് ആരോഗ്യവകുപ്പ്

Sunday, November 17, 2024 5:33 AM IST

കോട്ടയം: ആന്‍റിബയോട്ടിക്കുകളുടെ അമിതമായ ഉപയോഗം ഉയര്‍ത്തുന്ന ഭീഷണികളെക്കുറിച്ച് ബോധവത്കരണം നടത്താന്‍ ആരോഗ്യവകുപ്പ് കുടുംബശ്രീയുമായി കൈകോര്‍ക്കുന്നു. ആന്‍റിബയോട്ടിക്കുകളുടെ ദുരുപയോഗത്തിനെതിരേ ആരോഗ്യ പ്രവര്‍ത്തകരെയും ജനങ്ങളെയും സജ്ജമാക്കുന്നതിന്‍റെ ഭാഗമായി 18 മുതല്‍ 24 വരെ ബോധവത്കരണ പരിപാടികള്‍ സംഘടിപ്പിക്കും. 18നു കോട്ടയം ജില്ലയിലെ കുടുംബശ്രീ സിഡിഎസ് അധ്യക്ഷന്മാര്‍ക്കായി സംഘടിപ്പിക്കുന്ന ജില്ലാതല സെമിനാര്‍ ജില്ലാ പഞ്ചായത്ത് പ്രസിഡന്‍റ് കെ.വി. ബിന്ദു ഉദ്ഘാടനം ചെയ്യും.

19ന് ആരോഗ്യവകുപ്പും കുടുംബശ്രീയും ചേര്‍ന്ന് എല്ലാ പഞ്ചായത്തുകളിലും നഗരസഭകളിലും കുടുംബശ്രീ എഡിഎസ് അധ്യക്ഷമാര്‍ക്കും അയല്‍ക്കൂട്ടങ്ങളിലെ സാമൂഹ്യ വികസനസമിതി കണ്‍വീനര്‍മാര്‍ക്കുമായി ബോധവത്കരണ ക്ലാസ് സംഘടിപ്പിക്കും. ഇവരുടെ നേതൃത്വത്തില്‍ അയല്‍ക്കൂട്ടങ്ങളില്‍ ചര്‍ച്ച് ചെയ്ത് പൊതുജനങ്ങളിലേക്ക് ബോധവത്കരണം എത്തിക്കുകയാണ് ലക്ഷ്യം. 21ന് എല്ലാ സര്‍ക്കാര്‍ ഡോക്ടര്‍മാര്‍ ഉള്‍പ്പെടെയുള്ള ആരോഗ്യ പ്രവര്‍ത്തകര്‍ക്കും ബോധവത്കരണം നടത്തും.

25 മുതല്‍ 30 വരെ സ്‌കൂള്‍ അധ്യാപകര്‍ക്കും രക്ഷാകര്‍ത്താക്കള്‍ക്കായി സ്‌കൂള്‍തലത്തില്‍ ബോധവത്കരണം നടത്തും. ആശാ പ്രവര്‍ത്തകരുടെ നേതൃത്വത്തില്‍ ഭവനസന്ദര്‍ശനത്തിലൂടെയും ഇത് സംബന്ധിച്ച വിവരങ്ങള്‍ ജനങ്ങളിലെത്തിക്കും.

ആന്‍റിബയോട്ടിക്കുകളുടെ ദുരുപയോഗം ഒഴിവാക്കാന്‍ ഒരേ സമയം പൊതുജനങ്ങള്‍, ആരോഗ്യ പ്രവർത്തകര്‍, മരുന്നു വില്പനശാലകള്‍ എന്നിവര്‍ ഒത്തൊരുമിച്ച് പ്രവർത്തിക്കേണ്ടതാണെന്ന ബോധ്യപ്പെടുത്തലാണ് ലക്ഷ്യമിടുന്നത്. മെഡിക്കല്‍ സ്റ്റോര്‍ ഉടമകളുടെ അസോസിയേഷന്‍ ഡോക്ടറുടെ കുറിപ്പടിയില്ലാതെ ആന്‍റിബയോട്ടിക്കുകള്‍ വില്‍ക്കില്ലെന്ന് തീരുമാനിച്ചിട്ടുണ്ട്. ഇതിനാവശ്യമായ പരിശോധന ഡ്രഗ് കണ്‍ട്രോള്‍ വകുപ്പ് നടത്തുന്നുണ്ട്.

കുറിപ്പടിയില്ലാത്ത ആന്‍റിബയോട്ടിക് മൃഗങ്ങള്‍ക്കും ദോഷം ക്ഷീരകര്‍ഷകര്‍ ഉള്‍പ്പെടെയുള്ളവര്‍ മൃഗ ഡോക്ടര്‍മാരുടെ കുറിപ്പടിയില്ലാതെ പശുക്കള്‍ക്ക് മരുന്നുനല്‍കുന്നതും മരുന്ന് നല്‍കിക്കഴിഞ്ഞാല്‍ പാലില്‍ ആന്‍റിബയോട്ടിക്കിന്‍റെ അംശം കാണാനിടയുള്ള കാലയളവിനുള്ളില്‍ കറക്കുന്ന പാല്‍ വില്‍ക്കുന്നതും ഒഴിവാക്കണം.

കോഴി, താറാവ് എന്നിവയ്ക്ക് രോഗം വരാതിരിക്കാന്‍ ആന്‍റിബയോട്ടിക്കുകള്‍ നല്‍കുന്നതും ഇറച്ചിയിലൂടെ ആന്‍റിബയോട്ടിക്കുകള്‍ മനുഷ്യ ശരീരത്തിലെത്തിനിടയാക്കും. അണുബാധ ഒഴിവാക്കാന്‍ മുന്‍കരുതലായി മൃഗങ്ങള്‍ക്കു മത്സ്യകൃഷിയിലും ആന്‍റിബയോട്ടിക്കുകള്‍ ഉപയോഗിക്കുന്നത് അപകടകരമാണ്.

അണുബാധയുണ്ടായാല്‍ ഡോക്ടറുടെ നിര്‍ദ്ദേശപ്രകാരം മാത്രമാണ് ആന്‍റിബയോട്ടിക്കുകള്‍ മൃഗങ്ങള്‍ക്കും നല്‍കാവൂ. ആന്‍റിബയോട്ടിക്കുകള്‍ സ്ഥിരമായി മനുഷ്യശരീരത്തിലെത്തിക്കഴിഞ്ഞാല്‍ അവ മരുന്നുകള്‍ക്കെതിരേ പ്രതിരോധം നേടിയിട്ടുള്ള രോഗാണുക്കളെ സൃഷ്ടിക്കുകയും പിന്നീട് സാധാരണ അണുബാധവന്നാല്‍ പോലും മരുന്നുകള്‍ ഫലപ്രമല്ലാതായിത്തീരുകയും ചെയ്യും.