കള്ളാക്കുറിച്ചി മദ്യദുരന്തം മരിച്ചവർ 48 ആയി; 30 പേരുടെ നില ഗുരുതരം
Saturday, June 22, 2024 3:34 AM IST
ചെന്നൈ: കള്ളാക്കുറിച്ചി മദ്യദുരന്തത്തിൽ മരിച്ചവരുടെ എണ്ണം 48 ആയി. മുപ്പതോളം പേരുടെ നില ഗുരുതരമാണ്. 29 പേരുടെ മൃതദേഹം ബന്ധുക്കൾക്ക് വിട്ടുനൽകിയതായി കള്ളാക്കുറിച്ചി കളക്ടർ എം.എസ്. പ്രശാന്ത് പറഞ്ഞു.
വ്യാജമദ്യം കഴിച്ച 165 പേരാണ് കള്ളാക്കുറിച്ചി, ജിപ്മർ, സേലം, മുണ്ടിയമ്പാക്കം എന്നീ സർക്കാർ ആശുപത്രികളിലായി കഴിഞ്ഞ ദിവസം ചികിത്സ തേടിയത്. ഇതുവരെ 47 പേർ മരണപ്പെട്ടു. ചികിത്സയിലുള്ള 118 പേരിൽ 30 പേരുടെ നിലഗുരുതരമാണെന്നും കളക്ടർ അറിയിച്ചു.
ജില്ലയിൽ വ്യാജമദ്യ വില്പന തടയാൻ പ്രത്യേക സംഘങ്ങൾ രൂപവത്കരിച്ചിട്ടുണ്ടെന്നും ശക്തമായ നടപടികൾക്ക് നിർദേശം നൽകിയതായും കളക്ടർ മാധ്യമപ്രവർത്തകരോടു പറഞ്ഞു.