കേന്ദ്രമന്ത്രിയുടെ ഹിന്ദി കത്തിന് തമിഴിൽ മറുപടിയെഴുതി എംപി
പ്രത്യേക ലേഖകൻ
Sunday, October 27, 2024 4:55 AM IST
ന്യൂഡൽഹി: ഹിന്ദിയിൽ കത്തെഴുതിയ കേന്ദ്രമന്ത്രിക്ക് തമിഴിൽ മറുപടിയെഴുതി ഡിഎംകെ എംപി. രാജ്യസഭാ എംപി പുതുക്കോട്ടൈ എം.എം. അബ്ദുള്ളയാണു കേന്ദ്രമന്ത്രി രവ്നീത് സിംഗ് ബിട്ടുവിന്റെ ഹിന്ദി കത്തിനു തമിഴിൽ മറുപടി നൽകിയത്. കേന്ദ്രമന്ത്രിയുടെ ഹിന്ദിയിലെഴുതിയ കത്തിലെ ഒരു വാക്കുപോലും തനിക്കു മനസിലായില്ലെന്ന് അബ്ദുള്ള തമിഴിലെഴുതി.
ട്രെയിനുകളിലെ ഭക്ഷണത്തിന്റെ ഗുണനിലവാരം, ശുചിത്വം എന്നിവയുമായി ബന്ധപ്പെട്ടാണു ഡിഎംകെ നേതാവ് കേന്ദ്ര റെയിൽവേ സഹമന്ത്രിക്കു കത്തയച്ചത്. റെയിൽവെ സഹമന്ത്രിയുടെ ഓഫീസിൽനിന്നുള്ള കത്ത് എപ്പോഴും ഹിന്ദിയിലാണ്.
തനിക്കു ഹിന്ദി അറിയില്ലെന്നും ദയവായി ഇംഗ്ലീഷിൽ കത്തയയ്ക്കണമെന്നും മന്ത്രിയുടെ ഓഫീസിലെ ഉദ്യോഗസ്ഥരെ വിളിച്ചുപറഞ്ഞു. പക്ഷേ വീണ്ടുമെത്തിയ കത്തും ഹിന്ദിയിലായിരുന്നു. അതിനാൽ അവർക്കു മനസിലാകാവുന്ന തരത്തിൽ മറുപടി അയച്ചു- മന്ത്രിയുടെ ഹിന്ദി കത്തും തമിഴിലുള്ള എംപിയുടെ മറുപടിയും ഒരുമിച്ച് എക്സിൽ പോസ്റ്റ് ചെയ്തുകൊണ്ട് അബ്ദുള്ള വിശദീകരിച്ചു.