ഗുജറാത്തിൽ പത്ത് ഹോട്ടലുകൾക്കു വ്യാജബോംബ് ഭീഷണി
Sunday, October 27, 2024 4:55 AM IST
രാജ്കോട്ട്: ഗുജറാത്തിലെ രാജ്കോട്ടിൽ പത്ത് ഹോട്ടലുകൾക്കു ബോംബ് ഭീഷണി. മണിക്കൂറുകളോളം നഗരത്തെ മുൾമുനയിൽ നിർത്തിയെങ്കിലും വിശദപരിശോധനയിൽ ഭീഷണി വ്യാജമാണെന്ന് കണ്ടെത്തി. ഇന്നലെ ഉച്ചയ്ക്ക് 12:45 ഓടെ ഇമെയിൽ സന്ദേശമായാണു ഭീഷണി എത്തിയത്.
ഏതാനും മണിക്കൂറുകൾക്കുള്ളിൽ പത്ത് ഹോട്ടലുകൾ ബോംബ് വച്ച് തകർക്കുമെന്ന് കാൻ ഡെൻ എന്നയാളുടെ പേരിലാണ് സന്ദേശം എത്തിയത്. മണിക്കൂറോളം നീണ്ട പരിശോധനയ്ക്കുശേഷം ഭീഷണി വ്യാജമാണെന്നു സ്ഥിരീകരിക്കുകയായിരുന്നു.