ചന്നപട്ടണയിൽ നിഖിൽ കുമാരസ്വാമി ജെഡി-എസ് സ്ഥാനാർഥി
Friday, October 25, 2024 2:22 AM IST
ബംഗളൂരു: കർണാടകയിലെ ചന്നപട്ടണ നിയമസഭാ മണ്ഡലത്തിൽ കേന്ദ്രമന്ത്രി എച്ച്.ഡി. കുമാരസ്വാമിയുടെ മകൻ നിഖിൽ കുമാരസ്വാമി ജെഡി-എസ് സ്ഥാനാർഥിയാകും.
ലോക്സഭയിലേക്കു തെരഞ്ഞെടുക്കപ്പെട്ടതിനെത്തുടർന്ന് കുമാരസ്വാമി രാജിവച്ച സീറ്റാണിത്. 2019 ലോക്സഭാ തെരഞ്ഞെടുപ്പിൽ മാണ്ഡ്യയിലും 2023 നിയമസഭാ തെരഞ്ഞെടുപ്പിൽ രാമനഗരയിലും നിഖിൽ പരാജയപ്പെട്ടിരുന്നു.
കഴിഞ്ഞ ദിവസം ബിജെപി വിട്ട് കോൺഗ്രസിൽ ചേർന്ന സി.പി. യോഗീശ്വരയാണ് നിഖിലിന്റെ എതിരാളി. 2013ൽ എച്ച്.ഡി. കുമാരസ്വാമിയുടെ ഭാര്യ അനിതയെ യോഗീശ്വര പരാജയപ്പെടുത്തിയിരുന്നു. അഞ്ചു തവണ എംഎൽഎയായിട്ടുള്ള യോഗീശ്വര കർണാടക മുൻ മന്ത്രിയാണ്.