ട്രെയിന്‍ യാത്രക്കാരുടെ സ്വര്‍ണാഭരണങ്ങള്‍ കവര്‍ച്ച ചെയ്ത യുപി സ്വദേശികള്‍ അറസ്റ്റില്‍
Wednesday, October 4, 2023 12:28 AM IST
മംഗളൂരു: തിരുവനന്തപുരത്തിനും ഗോവയ്ക്കുമിടയിലെ രാത്രികാല തീവണ്ടികളില്‍ ഉറങ്ങിക്കിടക്കുന്ന യാത്രക്കാരുടെ സ്വര്‍ണാഭരണങ്ങളും വിലപിടിപ്പുള്ള മുതലുകളും കവര്‍ച്ച ചെയ്യുന്നത് പതിവാക്കിയ യുപി സ്വദേശികള്‍ മംഗളൂരുവില്‍ ആര്‍പിഎഫിന്‍റെ പിടിയിലായി.
മിര്‍സാപൂര്‍ സ്വദേശികളായ അഭയ് രാജ് സിംഗ് (26), ഹരിശങ്കര്‍ ഗിരി (25) എന്നിവരാണ് മംഗളൂരു ജംഗ്ഷന്‍ റെയില്‍വേ സ്റ്റേഷനില്‍ വച്ച് പിടിയിലായത്.
തിരുവനന്തപുരം-ഗോവ പാതയില്‍ രാത്രികാലങ്ങളില്‍ ഉറങ്ങിക്കിടക്കുന്ന യാത്രക്കാരുടെ സ്വര്‍ണാഭരണങ്ങളും മറ്റും കവര്‍ച്ച ചെയ്യപ്പെട്ട സംഭവങ്ങള്‍ അടിക്കടി ഉണ്ടാകുന്ന സാഹചര്യത്തില്‍ പാലക്കാട് ആര്‍പിഎഫ് ക്രൈം ഇന്‍റലിജന്‍സ് വിഭാഗവും സ്‌പെഷല്‍ സ്‌ക്വാഡും സംയുക്ത സംഘം രൂപീകരിച്ച് അന്വേഷണം നടത്തിവരികയായിരുന്നു.
പിടിയിലായവരുടെ കൈയില്‍നിന്ന് ആറരലക്ഷത്തോളം രൂപ വിലവരുന്ന 16 പവന്‍ സ്വര്‍ണാഭരണങ്ങളും പിടിച്ചെടുത്തു. ഉത്തര്‍പ്രദേശില്‍നിന്നും വിമാനമാര്‍ഗം ഗോവയില്‍ എത്തുകയും അവിടെനിന്നും തിരുവനന്തപുരം വരെയും തിരിച്ചും രാത്രിവണ്ടികളില്‍ യാത്ര ചെയ്ത് മോഷണം നടത്തി തിരിച്ചുപോവുകയുമായിരുന്നു ഇവരുടെ രീതി.
രാജ്യത്തിന്‍റെ മറ്റു ഭാഗങ്ങളിലും സമാനമായ രീതിയില്‍ ഇവര്‍ കവര്‍ച്ചകള്‍ നടത്തിയതായാണു സൂചന. ആര്‍പിഎഫ് ക്രൈം ഇന്‍സ്‌പെക്ടര്‍ എന്‍. കേശവദാസ്, മംഗളൂരു ജംഗ്ഷന്‍ ആര്‍പിഎഫ് ഇന്‍സ്‌പെക്ടര്‍ മനോജ്കുമാര്‍ യാദവ് എന്നിവരുടെ നേതൃത്വത്തിലുള്ള പ്രത്യേക സംഘമാണ് പ്രതികളെ അറസ്റ്റ് ചെയ്തത്. ഇവരെ തുടര്‍നടപടികള്‍ക്കായി മംഗളൂരു റെയില്‍വേ പോലീസിന് കൈമാറി.