ഇപിക്കെതിരായ നടപടി ആശ്ചര‍്യപ്പെടുത്തുന്നു: ജാവദേക്കർ ഇ.പി. ജയരാജനെ എൽഡിഎഫ് കൺവീനർ സ്ഥാനത്തുനിന്നു നീക്കിയതിന് ഒരു കാരണമായി തന്നെ കണ്ടു എന്നതാണെന്ന സിപിഎം വെളിപ്പെടുത്തൽ ആശ്ചര‍്യപ്പെടുത്തുന്നതാണെന്ന് ബിജെപി കേരള പ്രഭാരി പ്രകാശ് ജാവദേക്കർ. ഇടതുമുന്നണിയുടെ ഏകാധിപത‍്യ മനസ്ഥിതിയും തൊട്ടുകൂടായ്മാ മനോഭാവവും അസഹിഷ്ണുതയുമാണ് ഇവിടെ പ്രകടമാകുന്നതെന്നും ജാവദേക്കർ സമൂഹമാധ‍്യമമായ എക്സിൽ പ്രതികരിച്ചു.
ഇ.പി. ജയരാജനെ പിണറായി ബലിയാടാക്കി: കെ. സുധാകരന്‍ ആലുവ: ഇ.പി. ജയരാജന്‍ പ്രകാശ് ജാവദേക്കറുമായി രഹസ്യചര്‍ച്ച നടത്തിയത് പിണറായി വിജയനുവേണ്ടിയാണെന്ന് കെപിസിസി പ്രസിഡന്‍റ് കെ. സുധാകരന്‍ എംപി. എന്നാൽ, പിടിക്കപ്പെട്ടപ്പോള്‍ പിണറായി വിജയന്‍ കൈയൊഴിഞ്ഞെന്നും സ്വന്തം തടി രക്ഷിക്കാന്‍ ആരെയും കുരുതി കൊടുക്കുന്ന പിണറായി കേരളത്തിനു ശാപമാണെന്നും സുധാകരൻ പറഞ്ഞു.
പി.വി. അന്‍വര്‍ എംഎല്‍എ ഉന്നത പോലീസ് ഉദ്യോഗസ്ഥര്ക്കെതിരേ ആക്ഷേപം ഉന്നയിച്ചിട്ടും മുഖ്യമന്ത്രി മറുപടി പറയുന്നില്ല. സ്വര്‍ണക്കടത്ത്, കരിമണല്‍ ഖനനം, മാസപ്പടി എന്നിവയിലൂടെ കോടികളുടെ അഴിമതിയാണ് പിണറായി വിജയന്‍ നടത്തികൊണ്ടിരിക്കുന്നത്. മകളുടെ പേരില്‍ വരെ അഴിമതി ആരോപണം ഉയര്‍ന്നിട്ടും മുഖ്യമന്ത്രി പ്രതികരിച്ചില്ലെന്നും കെപിസിസി പ്രസിഡന്‍റ് കുറ്റപ്പെടുത്തി.