ഹരിഹരന്‍ അഡ്ജസ്റ്റ്‌മെന്‍റ് ചോദിച്ചു: ചാര്‍മിള കൊച്ചി: സംവിധായകന്‍ ഹരിഹരനെതിരേ ഗുരുതര ആരോപണവുമായി നടി ചാര്‍മിള. ഹരിഹരന്‍ അഡ്ജസ്റ്റ്‌മെന്‍റിനു തയാറാണോയെന്നു ചോദിച്ചു. വഴങ്ങാന്‍ തയാറല്ലെന്നു പറഞ്ഞതോടെ ഒരു സിനിമയില്‍നിന്നുതന്നെ അദ്ദേഹം ഒഴിവാക്കിയെന്നും ചാര്‍മിള ആരോപിച്ചു. മലയാളസിനിമയിലെ സംവിധായകരും നടന്മാരും നിര്‍മാതാക്കളുമടക്കം 28 പേര്‍ മോശമായി പെരുമാറിട്ടുണ്ടെന്നും അവര്‍ വെളിപ്പെടുത്തി.
“അര്‍ജുനന്‍ പിള്ളയും അഞ്ച് മക്കളും എന്ന ചിത്രത്തിന്‍റെ സെറ്റില്‍വച്ചും പീഡിപ്പിക്കാന്‍ ശ്രമം നടന്നു. നിര്‍മാതാവും പ്രൊഡക്ഷന് മാനേജരും ചേര്‍ന്നാണു പീഡിപ്പിക്കാന്‍ ശ്രമിച്ചത്. എന്‍റെയും അസിസ്റ്റന്‍റിന്‍റെയും സാരി വലിച്ചൂരാന്‍ ശ്രമിച്ചു. പുരുഷ അസിസ്റ്റന്‍റിനെ മര്‍ദിച്ചു. റിസപ്ഷനിസ്റ്റും പീഡനശ്രമത്തിനു കൂട്ടുനിന്നു. മുറിയില്‍നിന്ന് ഇറങ്ങിയോടിയാണു പീഡനശ്രമത്തില്‍നിന്നു രക്ഷപ്പെട്ടത്. ഇറങ്ങിയോടിയ എന്നെ രക്ഷിച്ചത് ഹോട്ടലിനു പുറത്തുണ്ടായിരുന്ന ഓട്ടോ ഡ്രൈവര്‍മാരാണ്.
അടുത്ത കാലത്ത് ഇല്ലാത്ത ഷൂട്ടിനു ബുക്ക് ചെയ്തും അഡ്ജസ്റ്റ്‌മെന്‍റ് ആവശ്യപ്പെട്ടു. ദുരനുഭവങ്ങള്‍ കൂടുതല്‍ മലയാള സിനിമയിലായിരുന്നു.
വഴങ്ങാത്തതിനാല്‍ അവസരങ്ങള്‍ കുറഞ്ഞു. തന്‍റെ പല സുഹൃത്തുക്കളും പെട്ടുപോയിട്ടുണ്ട്.
ദുരനുഭവമുണ്ടായ ആളുകളുടെ പേരുകള്‍ പറയുന്നില്ല. എനിക്ക് മകനുണ്ട്. അതിനാല്‍ മറ്റു നടപടികളിലേക്കു കടക്കുന്നില്ല” ചാര്‍മിള പറഞ്ഞു.