വിദ്യാഭ്യാസ വകുപ്പ് സമഗ്ര ശിക്ഷയുമായി സഹകരിച്ച് അധ്യാപകർ, രക്ഷിതാക്കൾ എന്നിവർക്കു പരിശീലനം നൽകി, ഓണ്‍ സൈറ്റ് സപ്പോർട്ട് ഉറപ്പാക്കുന്നതിലൂടെ അധ്യാപകർക്കും കുട്ടികൾക്കും നിരന്തരമായി പ്രഗല്ഭരായ വിദ്യാഭ്യാസ പ്രവർത്തകരുടെ പിന്തുണ ലഭിക്കും. രക്ഷിതാക്കൾക്കും സ്കൂളുമായി ബന്ധപ്പെട്ട് പ്രവർത്തിക്കുന്നവർക്കും പ്രത്യേക പരിശീലനം നൽകും. വെള്ളാർമല, മുണ്ടക്കൈ സ്കൂളുകളിലെ വിദ്യാർഥികൾക്ക് മെന്‍ററിംഗ് സൗകര്യവും ഏർപ്പെടുത്തും.
മേപ്പാടി ഗവ. ഹയർസെക്കൻഡറി സ്കൂളിൽ അധിക സൗകര്യത്തിനായി ബിൽഡിംഗ് അസോസിയേഷൻ ഓഫ് ഇന്ത്യ നിർമിക്കുന്ന 12 ക്ലാസ് മുറികൾ ഉൾപ്പെട്ട കെട്ടിടത്തിന്‍റെ ശിലാഫലകം മന്ത്രി അനാഛാദനം ചെയ്തു.
പ്രകൃതിദുരന്തത്തിൽ എസ്എസ്എൽസി സർട്ടിഫിക്കറ്റുകൾ നഷ്ടപ്പെട്ടവരുടെ സർട്ടിഫിക്കറ്റുകൾ മന്ത്രി വിതരണം ചെയ്തു. നിലവിലെ നടപടിക്രമങ്ങളും നിശ്ചിത ഫീസും ഒഴിവാക്കിയാണു സർട്ടിഫിക്കറ്റുകൾ ലഭ്യമാക്കിയത്.
ജില്ലാ വിദ്യാഭ്യാസ ഓഫീസ് മുഖേന സർട്ടിഫിക്കറ്റ് നഷ്ടപ്പെട്ട 188 അപേക്ഷകരുടെ വിവരങ്ങൾ ശേഖരിച്ച് പരീക്ഷാ ഭവനിലേക്ക് ലഭ്യമാക്കിയതിൽ 135 പേരുടെ സർട്ടിഫിക്കറ്റുകളാണ് വിതരണം ചെയ്തത്. ശേഷിക്കുന്ന 33 സർട്ടിഫിക്കറ്റുകൾ 2000 ത്തിന് മുൻപുള്ളവ ആയതിനാൽ സർട്ടിഫിക്കറ്റിന്‍റെ ഒന്നാം പേജ് പൂരിപ്പിക്കാൻ ബന്ധപ്പെട്ട സ്കൂളുകളിലേക്ക് അയച്ചു നൽകിയതായും മന്ത്രി പറഞ്ഞു.
നടപടി വേഗത്തിൽ പൂർത്തിയാക്കി സർട്ടിഫിക്കറ്റുകൾ വിതരണം ചെയ്യും. ദുരന്ത ഘട്ടത്തിൽ വയനാട്ടിലെ ജനതയ്ക്കൊപ്പം നിലകൊണ്ട എല്ലാവർക്കും മന്ത്രി നന്ദി പറഞ്ഞു.