കാഞ്ഞങ്ങാട്: റെയിൽപാതയുടെ ഇരുവശങ്ങളിലുമുള്ള ചതുപ്പുനിലങ്ങളിൽ പൂത്തുനില്ക്കുന്ന പായൽച്ചെടികൾ യാത്രക്കാർക്ക് ദൃശ്യവസന്തമൊരുക്കുന്നു.
റെയിൽവേ സ്റ്റേഷന്‍റെ തെക്കുവശത്ത് രണ്ടു കിലോമീറ്ററോളം ദൂരത്തിലാണ് നീലക്കുറിഞ്ഞി പൂത്തുനില്ക്കുന്ന മലഞ്ചെരിവുകളെ അനുസ്മരിപ്പിക്കുന്ന വിധത്തിൽ പായൽച്ചെടികളിൽ നീലനിറത്തിലുള്ള പൂക്കൾ നിറഞ്ഞിരിക്കുന്നത്.
മുൻവർഷങ്ങളിലും ഈ സമയത്ത് പായലുകൾ പൂക്കാറുണ്ടെങ്കിലും ഇത്രയും പൂക്കൾ ഒരുമിച്ച് കാണുന്നത് ആദ്യമായിട്ടാണെന്ന് നാട്ടുകാർ പറയുന്നു. പൂക്കൾക്ക് നല്ല നീലനിറവും സാമാന്യം വലുപ്പവുമുണ്ട്. ഓണക്കാലത്തോടടുത്ത സമയങ്ങളിൽ ഇവിടെ വെള്ളയും ചുവപ്പും നിറങ്ങളിലുള്ള താമരയും ആമ്പലും പൂത്തുനിറയാറുണ്ട്. ആ സമയം വരെ ഈ പൂക്കൾ കൂടി നിലനിന്നാൽ ട്രെയിൻ യാത്രക്കാർക്ക് അത് മനോഹരമായ ദൃശ്യവസന്തം സമ്മാനിക്കും.