പരപ്പ: പരപ്പയില് രണ്ടു സ്കൂള് വിദ്യാര്ഥികള്ക്ക് പേപ്പട്ടിയുടെ കടിയേറ്റു. പരപ്പ കുണ്ടൂച്ചിയിലെ ഷെഫീഖിന്റെ മകന് അതിലാൻ ഹാദി (10), പരപ്പയിലെ റിയാസിന്റെ മകന് റിസ്വാന് (11) എന്നിവര്ക്കാണ് കടിയേറ്റത്. ഇരുവരെയും കാഞ്ഞങ്ങാട് ജില്ലാ ആശുപത്രിയില് പ്രവേശിപ്പിച്ചു.
ഇന്നലെ വൈകുന്നേരം മദ്രസയില് നിന്നും മടങ്ങിവരവെയാണ് പരപ്പയില് വെച്ച് ഇരുവര്ക്കും പേപ്പട്ടിയുടെ കടിയേറ്റത്. കറുത്ത നിറത്തിലുള്ള നായയാണ് കുട്ടികളെ കടിച്ചത്. ഇതു പരപ്പ ടൗണില് തന്നെ ഉണ്ടെന്ന് നിഗമനം. പഞ്ചായത്തിന്റെ ഭാഗത്തുനിന്നും യാതൊരു നടപടിയും എടുക്കുന്നില്ല എന്ന് ആരോപിച്ച് നാട്ടുകാര് പരപ്പയില് സംഘടിച്ചു. വെള്ളരിക്കുണ്ട് പോലീസ് സ്ഥലത്തെത്തി.