ADVERTISEMENT

ADVERTISEMENT

നാഷണൽ ഹെറാൾഡ് കേസ്: കോണ്‍ഗ്രസ് മാർച്ച് നടത്തി

തൊടുപുഴ: ബിജെപിക്കെതിരായ എതിർശബ്ദങ്ങളെ അടിച്ചമർത്താൻ ശ്രമിക്കുന്നതിന്‍റെ ഭാഗമായാണ് നാഷണൽ ഹെറാൾഡ് കേസിൽ സോണിയാ ഗാന്ധിക്കും രാഹുൽ ഗാന്ധിക്കുമെതിരേ പ്രതികാര നടപടി സ്വീകരിക്കുന്നതെന്നു ഡിസിസി മുൻ പ്രസിഡന്‍റ് അഡ്വ. ജോയി തോമസ് പറഞ്ഞു.

ബിജെപി സർക്കാരിന്‍റെ പ്രതികാര നടപടിയിൽ പ്രതിഷേധിച്ച് ഡിസിസിയുടെ നേതൃത്വത്തിൽ ബിഎസ്എൻഎൽ ഓഫീസിലേക്കു നടത്തിയ മാർച്ചും ധർണയും ഉദ്ഘാടനം ചെയ്യുകയായിരുന്നു അദ്ദേഹം. ഡിസിസി ജനറൽ സെക്രട്ടറി എം.ഡി. അർജുനന്‍റെ അധ്യക്ഷതയിൽ ചേർന്ന യോഗത്തിൽ റോയ് കെ. പൗലോസ് മുഖ്യപ്രഭാഷണം നടത്തി.

നിഷ സോമൻ, ഷിബിലി സാഹിബ്, എൻ.ഐ. ബെന്നി, ടി.ജെ. പീറ്റർ, വി.ഇ. താജുദീൻ, ലീലമ്മ ജോസ്, രാജു ഓടയ്ക്കൽ, ബാബു കുര്യാക്കോസ് തുടങ്ങിയവർ പ്രസംഗിച്ചു.

ADVERTISEMENT

‘മിഷന്‍ സോളാര്‍ ഫെന്‍സിംഗ്’ ഫലപ്രദമാക്കാന്‍ വനംവകുപ്പ്

അടിമാലി: മനുഷ്യ-വന്യജീവി സംഘര്‍ഷ ലഘൂകരണത്തിന് മിഷന്‍ സോളാര്‍ ഫെന്‍സിംഗ് കൂടുതല്‍ ഫലപ്രദമാക്കാന്‍ വനംവകുപ്പ്. മനുഷ്യ-വന്യജീവി സംഘര്‍ഷ ലഘൂകരണത്തിനായി സംസ്ഥാന സര്‍ക്കാര്‍ പത്തു പദ്ധതികളാണ് നടപ്പിലാക്കുന്നത്. അതിലൊന്നാണ് മിഷന്‍ സോളാര്‍ ഫെന്‍സിംഗ്. പ്രവര്‍ത്തനരഹിതമായിരുന്നതും ഭാഗികമായി പ്രവര്‍ത്തിക്കുന്നതുമായ സോളാര്‍ ഫെന്‍സിംഗ് ലൈനുകള്‍ തകരാര്‍ പരിഹരിച്ച് കാര്യക്ഷമമാക്കുന്ന പ്രവര്‍ത്തനങ്ങൾ മാങ്കുളത്ത് വനംവകുപ്പ് ആരംഭിച്ചു. വനംവകുപ്പിന്‍റെ മാങ്കുളം ഡിവിഷനു കീഴില്‍ വരുന്ന മാങ്കുളം, ആനക്കുളം റെയ്ഞ്ചുകളിലായി 35 കിലോമീറ്റര്‍ ദൂരം സോളാര്‍ പവര്‍ ഫെന്‍സിംഗ് പൂര്‍ണമായും 7.5 കിലോമീറ്റര്‍ ദൂരം ഭാഗികമായും തകരാര്‍ പരിഹരിച്ച് പ്രവര്‍ത്തനക്ഷമമാക്കിയതായി ഹെറേഞ്ച് സര്‍ക്കിള്‍ ചീഫ് കണ്‍സര്‍വേറ്റര്‍ ആര്‍.എസ്. അരുണ്‍ പറഞ്ഞു. വിവിധ കോളജുകളിലെ എന്‍എസ്എസ് യൂണിറ്റുകളുടെയും മറ്റ് സന്നദ്ധ സേവന സംഘടനകളുടെയും കൂടി സഹകരണത്തോടെയാണ് ഫെന്‍സിംഗ് ലൈനുകളുടെ അറ്റകുറ്റപ്പണികള്‍ നടത്തുന്നത്. നിലവിലുള്ള സോളാര്‍ പവര്‍ ഫെന്‍സിംഗുകള്‍ക്ക് സമീപമുള്ള അടിക്കാടുകള്‍ തെളിക്കുന്ന ജോലികള്‍ വനംവകുപ്പ് നടത്തുന്നുണ്ട്.

പാലത്തിന്‍റെ നിർമാണം പൂർത്തിയാക്കണം

ആലക്കോട്: പഞ്ചായത്തിൽ പന്ത്രണ്ടാം വാർഡിൽ ആലക്കോട്-തെക്കുംഭാഗം റോഡിലെ പാലത്തിന്‍റെ നിർമാണം പൂർത്തിയാക്കണമെന്ന ആവശ്യം ശക്തമാകുന്നു. ബലക്ഷയം സംഭവിച്ചതോടെയാണ് പാലം പൊളിച്ചു നീക്കിയത്. എന്നാൽ ഏതാനും നാളുകൾ കഴിഞ്ഞപ്പോൾ പുതിയ പാലത്തിന്‍റെ നിർമാണം നിലച്ചു. പാലത്തിന്‍റെ നിർമാണം വൈകുന്നത് പ്രദേശവാസികളെ ദുരിതത്തിലാക്കിയിരിയ്ക്കുകയാണ്. നൂറുകണക്കിന് ആളുകൾ കമുകിൻ തടിയിട്ട് താത്കാലികമായി നിർമിച്ച നടപ്പാലത്തിലൂടെയാണ് ഇപ്പോൾ സഞ്ചരിക്കുന്നത്. മഴക്കാലത്തിനു മുന്പുതന്നെ പാലത്തിന്‍റ നിർമാണം അടിയന്തരമായി പൂർത്തിയാക്കണമെന്ന് കോണ്‍ഗ്രസ് ആലക്കോട് മമണ്ഡലം കമ്മിറ്റി ആവശ്യപ്പെട്ടു. യോഗത്തിൽ മണ്ഡലം പ്രസിഡന്‍റ് സി.വി.ജോമോൻ അധ്യക്ഷത വഹിച്ചു. തോമസ് മാത്യു കക്കുഴി, ചാർളി ആന്‍റണി , ബൈജു ജോർജ്, തങ്കപ്പൻ മടത്താഴത്ത്, ജോസ് താന്നിയ്ക്കൽ, മാത്യു നെല്ലിക്കുന്നേൽ എന്നിവർ പ്രസംഗിച്ചു.

സ്കൂളിൽ പോകാൻ പാലത്തിനായി നാലാം ക്ലാസുകാരി കളക്ടർക്ക് കത്തയച്ചു

ഉപ്പുതറ: ഒരു പാലത്തിനായി ഒരു നാലാം ക്ലാസുകാരി ജില്ലാ കളക്ടർക്ക് എഴുതിയ കത്ത് വൈറലായി. -കളക്ടർ ആന്‍റി, എന്‍റെ പേര് അനുശ്രീ അനുരാജ്, ഉപ്പുതറ ഒഎംഎൽപി സ്‌കൂളിൽ നാലാം ക്ലാസിൽ പഠിക്കുന്നു, ഇനി അഞ്ചാം ക്ലാസിലേക്കാണ്. ഉപ്പുതറ പഞ്ചായത്തിലെ 12-ാം വാർഡ് പത്തേക്കർ എന്ന സ്ഥലത്താണ് താമസിക്കുന്നത്. ഞാനും എന്‍റെ അനുജനും എന്‍റെ കൂട്ടുകാരും സ്കൂളിൽ പോകുന്നതു പേടിച്ചാണ്. കാരണം വീട്ടിൽനിന്ന് സ്കൂൾ ബസ് കയറാൻ ഒരു പാലം കയറണം. അതു മൂന്നു വർഷം മുൻപ് ഉണ്ടായ മഴയിൽ പൊളിഞ്ഞു പോയി. ഇപ്പോൾ ഇവിടെ ഉള്ള മാമൻമാർ ചേർന്ന് ഒരു ചെറിയ തടിപ്പാലം ഇട്ടിട്ടുണ്ട്, പക്ഷേ, അത് എപ്പോൾ വേണമെങ്കിലും താഴെ വീഴും എന്ന അവസ്ഥയിലാണ്. ജൂണിൽ സ്‌കൂൾ തുറക്കുമ്പോൾ ഞങ്ങൾക്ക് പേടി ഇല്ലാതെ പോകാൻ ഒരു പാലം നിർമിച്ചു തരാമോ‍, ... ഇതാണ് ഉപ്പുതറ പത്തേക്കർ സന്ധ്യാ ഭവനിൽ അനുരാജിന്‍റെയും ഗീതുവിന്‍റെയും മകൾ അനുശ്രീ എഴുതിയ കത്ത്. കളക്ടറുടെ പരാതി സെല്ലിന് ബുധനാഴ്ചയാണ് അനുശ്രീ കത്തയച്ചത്. അടുത്ത സ്കൂൾ വർഷത്തിനു മുൻപ് പുതിയ പാലം ഉണ്ടാകുമെന്ന പ്രതീക്ഷയിലാണ് അനുശ്രീ. 2000 ഓഗസ്റ്റിലുണ്ടായ കനത്ത മഴയിലാണ് പത്തേക്കർ പഞ്ചാരംപടിയിലെ പാലം ഒലിച്ചു പോയത്. ഇതോടെ നൂറോളം കുടുംബങ്ങളുടെ വാഹന യാത്ര മുടങ്ങി. ഉടൻ പാലം പണിയുമെന്ന് സ്ഥലം സന്ദർശിച്ച എംഎൽഎ, ത്രിതല പഞ്ചായത്ത് പ്രതിനിധികൾ എല്ലാവരും വാഗ്ദാനം നൽകി മടങ്ങി. ഒന്നും നടന്നില്ല. കാട്ടുകമ്പുകൾ ഉപയോഗിച്ച് നാട്ടുകാർ തടിപ്പാലം നിർമിച്ച് അതിനു മുകളിലൂടെയാണ് ഇപ്പോൾ തോട് മുറിച്ചു കടക്കുന്നത്. തോട്ടിൽ വെള്ളം ഉയരുമ്പോൾ പാലം ഒലിച്ചു പോകാറുമുണ്ട്. നാലുവർഷം കഴിഞ്ഞിട്ടും ശാശ്വതമായ പരിഹാരമുണ്ടാക്കാൻ അധികൃതർക്കായില്ല. പാലം തകർന്ന നാൾ മുതൽ വാഗ്ദാനങ്ങൾ കേട്ടുമടുത്ത നാട്ടുകാർക്ക് ഇപ്പോൾ കളക്ടർക്ക് അനുശ്രീ എഴുതിയ കത്തിൽ നടപടി ഉണ്ടാകുമെന്ന പ്രതീക്ഷയാണ്.

പെസഹാ ദിനത്തിൽ അപ്രതീക്ഷിത വൈദ്യുതി മുടക്കം: കെഎസ്ഇബി ഒാഫീസ് ഉപരോധിച്ചു

കട്ടപ്പന: പെസഹാ ദിനത്തിൽ വൈദ്യുതി വിച്ഛേദിച്ചതിനെതിരേ കെഎസ്ഇബി ഓഫീസ് കോൺഗ്രസിന്‍റെ നേതൃത്വത്തിൽ ഉപരോധിച്ചു. വേണ്ടവിധത്തിലുള്ള മുന്നറിയിപ്പ് നൽകാതെയാണ് ഉദ്യോഗസ്ഥർ കട്ടപ്പന സബ്സ്റ്റേഷന്‍റെ പരിധിയിലുള്ള വൈദ്യുതി വിച്ഛേദിച്ചത്. വ്യാഴാഴ്ച രാവിലെ ഒൻപതിനാണ് കട്ടപ്പന സബ് ഡിവിഷന്‍റെ കീഴിലെ വിവിധ മേഖലകളിൽ വൈദ്യുതി വിച്ഛേദിച്ചത്. ഉപഭോക്താക്കളുടെ മൊബൈൽ ഫോണുകളിലേക്ക് രാവിലെ 8.45നാണ് വൈദ്യുതി തടസപ്പെടുന്നതുമായി ബന്ധപ്പെട്ട സന്ദേശങ്ങൾ വന്നത്. തുടർന്ന് 15 മിനിറ്റിനുള്ളിൽ കട്ടപ്പന നഗരത്തിന്‍റെ ചുറ്റുമുള്ള പ്രദേശങ്ങളിൽ വൈദ്യുതി മുടങ്ങി. ഇതോടെ വിവിധ മേഖലകളിൽനിന്ന് പ്രതിഷേധവും ശക്തമായി. കെഎസ്ഇബി ഉദ്യോഗസ്ഥരുടെ നടപടിക്കെതിരേ കോൺഗ്രസിന്‍റെ നേതൃത്വത്തിൽ ഒാഫീസിനു മുന്നിൽ ഉപരോധം നടത്തി. പെസഹാ ദിനത്തിൽ ക്രൈസ്തവ സമൂഹത്തോട് വിവേചനപരമായ നടപടിയാണ് കെഎസ്ഇബി കാണിച്ചതെന്ന് നേതാക്കൾ ആരോപിച്ചു. വേനൽമഴയിൽ കട്ടപ്പന സബ്സ്റ്റേഷനിൽ ഉണ്ടായ തകരാറാണ് വൈദ്യുതി മുടക്കത്തിനു കാരണമെന്നാണ് അധികൃതരുടെ വിശദീകരണം. ഉപരോധത്തിനിടെ കെഎസ്ഇബി ജീവനക്കാരെ അടക്കം തടഞ്ഞുവയ്ക്കുകയും ചെയ്തു. ഇതോടെ കട്ടപ്പന പോലീസും സ്ഥലത്തെത്തി. മുടങ്ങിയ വൈദ്യുതി വിതരണം മുഴുവൻ മേഖലയിലും പുനഃസ്ഥാപിക്കുന്നതുവരെ നേതാക്കൾ സമരം തുടർന്നു.

പള്ളിവാസല്‍ ഗ്രാമപഞ്ചായത്തിലെ ഷി ലോഡ്ജ് നിര്‍മാണം അവസാന ഘട്ടത്തിൽ

അടിമാലി: പള്ളിവാസല്‍ ഗ്രാമപഞ്ചായത്തിന്‍റെ ഷി ലോഡ്ജ് നിര്‍മാണം അവസാന ഘട്ടത്തിലെത്തി. ബഹുവര്‍ഷ പദ്ധതിയായി ഒന്നേകാല്‍ കോടിയോളം രൂപ വകയിരുത്തിയാണ് പഞ്ചായത്ത് പദ്ധതി നടപ്പിലാക്കുന്നത്. ഏഴ് മുറികളും ഡോര്‍മിറ്ററിയും അടങ്ങുന്നതാണ് ഷി ലോഡ്ജ്. മൂന്നാറിലേക്കെത്തുന്ന വനിതകളായ വിനോദ സഞ്ചാരികള്‍ക്ക് സുരക്ഷിത താമസത്തിന് അവസരമൊരുക്കാന്‍ ലക്ഷ്യമിട്ടാണ് പള്ളിവാസല്‍ ഗ്രാമപഞ്ചായത്ത് ഷി ലോഡ്ജ് നിര്‍മിക്കുന്നത്. രണ്ടാംമൈലിലാണ് ഷി ലോഡ്ജിന്‍റെ നിര്‍മാണ പ്രവര്‍ത്തനങ്ങള്‍ പുരോഗമിക്കുന്നത്. ഏറെ വൈകാതെ പദ്ധതി പൂര്‍ത്തിയാക്കാനാകുമെന്ന് ഗ്രാമപഞ്ചായത്ത് പ്രസിഡന്‍റ് വി.ജി. പ്രതീഷ് കുമാര്‍ പറഞ്ഞു.

കുത്തുങ്കൽ പാലത്തിന്‍റെ അശാസ്ത്രീയ നിർമാണം അപകടം സൃഷ്ടിക്കുമെന്ന് ആക്ഷേപം

രാജാക്കാട്: കുത്തുങ്കൽ പാലത്തിന്‍റെ അശാസ്ത്രീയ നിർമാണം അപകടം സൃഷ്ടിക്കുമെന്ന് നാട്ടുകാർ. കൊടുംവളവിലെ വീതികുറഞ്ഞ പാലമാണ് അപകട സാധ്യത വർധിപ്പിക്കുന്നത്. മുൻപ് രാജാക്കാട് ഭാഗത്തേക്ക് ഇരുമ്പ് പൈപ്പുകളും ഷീറ്റും ആയി വന്ന ലോറി നിയന്ത്രണംവിട്ട് 30 അടി താഴ്ചയിൽ പുഴയിലേക്കു പതിച്ചിരുന്നു. ഗുരുതരമായി പരിക്കേറ്റ ലോറി ഡ്രൈവറും സഹായിയും തലനാരിഴയ്ക്കാണ് അന്ന് മരണത്തിൽനിന്നു രക്ഷപ്പെട്ടത്. അപകടം പാലത്തിന്‍റെ അശാസ്ത്രീയ നിർമാണം മൂലമായിരുന്നെന്ന ആരോപണം ശക്തമായിരുന്നു. കഴിഞ്ഞ സർക്കാരിന്‍റെ കാലത്ത് റോഡ് വീതികൂട്ടി ബിഎംബിസി നിലവാരത്തിൽ കുത്തുങ്കൽ മുതൽ മൈലാടുംപാറ വരെ നിർമിച്ചിരുന്നു. കുത്തുങ്കൽ ജംഗ്്ഷനു സമീപം ചെമ്മണ്ണാർ പുഴയ്ക്ക ു കുറുകെ വർഷങ്ങൾക്കു മുൻപ് നിർമിച്ച നാലു മീറ്റർ വീതിയുള്ള പാലം അതേപടി നിലനിർത്തിയാണ് റോഡ് നവീകരിച്ചത്. വളവു നിവർത്തി പാലം വീതി കൂട്ടി നിർമിക്കണമെന്ന് നിർമാണ ഘട്ടത്തിൽ നാട്ടുകാർ ആവശ്യപ്പെട്ടിരുന്നതാണ്. ഒൻപതു മീറ്റർ വീതിയിലുള്ള റോഡിനാണ് നാലു മീറ്റർ വീതിയുള്ള കൊടുംവളവിലെ പാലം. ഉടുമ്പൻചോല, സേനാപതി പഞ്ചായത്തുകളെ തമ്മിൽ ബന്ധിപ്പിക്കുന്ന പ്രധാന പാലമാണിത്. വട്ടക്കണ്ണിപ്പാറയിൽനിന്നു സ്ലീവാമല പള്ളിക്കുസമീപം കുത്തിറക്കമാണ്. റോഡ് പരിചയമില്ലാത്ത ഡ്രൈവർമാർ വലിയ വാഹനത്തിൽ ഇറക്കം ഇറങ്ങി വരുമ്പോൾ ഇടുങ്ങിയതും കൊടും വളവിലുള്ളതുമായ പാലം അപകടങ്ങൾക്ക് കാരണമാകുന്നുണ്ട്. പാലത്തിന്‍റെ അശാസ്ത്രീയത എത്രയും വേഗം പരിഹരിച്ച് പ്രദേശത്ത് അപകടസാധ്യത ഒഴിവാക്കണമെന്ന് പൊതുപ്രവർത്തകരും ആവശ്യപ്പെട്ടു.

ഇൻഡിഗോയിൽ അടിപൊളി യാത്ര സമ്മാനിച്ച പൈലറ്റ് വൈറലായി

തൊടുപുഴ: ഇൻഡിഗോ വിമാനത്തിൽ യാത്രക്കാരുമായി സൗഹൃദം പങ്കുവച്ചും സംവദിച്ചും പൈലറ്റ് ശരത് മാനുവൽ. സാധാരണ വിമാന യാത്രയ്ക്കിടെ കാബിൻ ക്രൂവിന്‍റെ നിർദേശങ്ങളാണ് കൂടുതലും കേൾക്കുന്നതെങ്കിൽ ഇവിടെ പുഞ്ചിരിതൂകി പച്ചമലയാളത്തിൽ കുശലം പറഞ്ഞ് പൈലറ്റ് അടുത്തെത്തിയപ്പോൾ യാത്രക്കാർക്ക് അതു വേറിട്ട അനുഭവമായി. സമൂഹമാധ്യമങ്ങളിൽ ഈ ദൃശ്യങ്ങൾ വൈറലായതോടെ വിമാനയാത്രക്കാർക്കിടയിൽ പൈലറ്റ് സ്റ്റാറായി മാറി. തൊടുപുഴ സ്വദേശിയായ ശരത് മാനുവലാണ് അബുദാബിയിൽനിന്നു കൊച്ചിയിലേക്ക് പുറപ്പെടാൻ തയാറായ ഇൻഡിഗോ വിമാനത്തിൽ യാത്രക്കാർക്ക് പുതുവിശേഷം സമ്മാനിച്ചത്. മലയാളി യാത്രക്കാരോട് രസകരമായി സംവദിക്കുന്നതിന്‍റെ ചിത്രങ്ങൾ ഇൻസ്റ്റഗ്രാമിൽ പങ്കുവച്ചതും ഇദ്ദേഹം തന്നെയായിരുന്നു. സഹപൈലറ്റും കാബിൻ ക്രൂവും ഉൾപ്പെടെ മുഴുവൻ പേരും മലയാളികളായെന്നതു മറ്റൊരു പ്രത്യേകതയായിരുന്നു. ഇൻഡിഗോ വിമാനസർവീസിന്‍റെ വിശേഷങ്ങൾ പങ്കുവച്ചാണ് അനൗണ്‍സ്മെന്‍റ് തുടങ്ങിയതുതന്നെ. എത്ര വർഷം കൂടിയാണ് നിങ്ങളെല്ലാം നാട്ടിലേക്കു മടങ്ങുന്നതെന്ന് ഓരോ യാത്രക്കാരനോടും ചോദിച്ച പൈലറ്റ് കൂടുതൽ വർഷം കഴിഞ്ഞ് മടങ്ങുന്നവർക്ക് സ്പെഷൽ ചായയും ഓഫർ ചെയ്തു. നാട്ടിലെത്തിയാൽ നിങ്ങൾ എന്തായിരിക്കും ആദ്യം ചെയ്യുകയെന്നതായിരുന്നു അടുത്ത ചോദ്യം. ഇത് അവരെ സ്വന്തംനാടിന്‍റെയും വീടിന്‍റെയും ഗൃഹാതുരത്വം ഉണർത്തുന്ന ഓർമകളിലേക്ക് നയിച്ചു. തുടർന്നു സുരക്ഷിത യാത്രയ്ക്കാവശ്യമായ നിർദേശങ്ങൾ നൽകാനും പൈലറ്റ് മറന്നില്ല. ഇവിടെ നിന്നു നാട്ടിലേക്ക് 2,800 കിലോമീറ്റർ ദൂരമുണ്ട്. മൂന്നുമണിക്കൂർ 45 മിനിറ്റുകൊണ്ടാണ് സാധാരണ നാട്ടിലെത്തുന്നത്. നിങ്ങൾ സ്പീഡിൽ ഓടിക്കാൻ പറഞ്ഞാൽ അതുചെയ്യാം. കുറച്ചുകൂടി നേരത്തേ എത്തിക്കാൻ ശ്രമിക്കാം. മധുരമൊഴിക്കിടെ പൈലറ്റ് പറഞ്ഞു. നിങ്ങൾ ഒരുകാര്യം മറക്കരുത്, എല്ലാവരും സീറ്റ് ബെൽറ്റിടണം. പൈലറ്റിന്‍റെ ഈ സംഭാഷണമാണ് സമൂഹമാധ്യമങ്ങളിൽ വൈറലായിരിക്കുന്നത്. 2014-ൽ ഇന്ത്യൻ ഒഫീഷ്യൽ കൊമേഴ്സ്യൽ ഫ്ളൈറ്റ് ലൈസൻസ് നേടിയ ശരത് 2016-ലാണ് ഇൻഡിഗോയിൽ ജൂണിയർ ഫസ്റ്റ് ഓഫീസറായി ജോലിയിൽ പ്രവേശിച്ചത്. തൊടുപുഴ വണ്ടമറ്റം പന്തയ്ക്കൽ മാനുവൽ ജോസഫ്-ലില്ലി ദന്പതികളുടെ മകനാണ്. സഹോദരൻ സേതുവും ഇൻഡിഗോയിൽ പൈലറ്റാണ്.

മറയൂരിൽ പറക്കും തവളയെ കണ്ടെത്തി

മറയൂർ: പശ്ചിമഘട്ട മഴക്കാടുകളിലെ പറക്കും തവള മറയൂരിൽ വിരുന്നെത്തി. ഇളിത്തേമ്പൻ തവള, പച്ചിലപ്പാറാൻ തുടങ്ങിയ പേരുകളിൽ അറിയപ്പെടുന്ന പച്ചത്തവളയെ മറയൂർ ഹോളിഡേയ്‌സ് ഉടമ ശാരദ ഭവനിൽ ശ്രീജേഷ് ഭാസ്കറിന്‍റെ വീട്ടുപറമ്പിലാണ് കണ്ടെത്തിയത്. വീടിനു പിന്നിലെ ഏലച്ചെടിയിൽ ഇരുന്ന തവള അടുത്ത ചെടിയിലേക്കു പറക്കുന്നതുകണ്ടാണ് ശ്രീജേഷ് ശ്രദ്ധിച്ചത്. അടുത്തെത്തി നിരീക്ഷിച്ചപ്പോഴാണ് അപൂർവയിനം തവളയാണെന്നു ബോധ്യമായത്. വിദേശ സഞ്ചാരികളുമായി ധാരാളം യാത്ര നടത്തുന്നയാളും റിസോർട്ടിന്‍റെ ഉടമയുമാണ് ശ്രീജേഷ്. മഴക്കാടുകളിലെ വലിയ മരങ്ങളിൽ കഴിയുന്ന ഇവയ്ക്ക് അടുത്ത മരത്തിലേക്ക് ഒഴുകിപ്പറക്കാനുള്ള കഴിവുണ്ട്. കൈകാലുകളും നെഞ്ചുമായി ബന്ധിച്ചിരിക്കുന്ന നേർത്ത സ്തരവും (പാട) വിരലുകൾക്കിടയിലെ ഓറഞ്ചുനിറത്തിലുള്ള സ്തരവുമാണ് ഇവയെ പറക്കാൻ സഹായിക്കുന്നത്. പറക്കുമ്പോൾ ശരീരത്തിലെ പാട കാറ്റുപിടിക്കത്തക്കവിധം വിടർത്തുകയും കൈകാലുകൾ വലിച്ചുനീട്ടി ശരീരം പരത്തുകയും ചെയ്യും. പറക്കുന്നതിനിടയിൽ വേഗം കുറയ്ക്കാനും കൂട്ടാനും വെട്ടിത്തിരിയാനുമെല്ലാം ഇവയ്ക്കു കഴിയും. ഒറ്റച്ചാട്ടത്തിൽ പതിനഞ്ചുമീറ്റർവരെ ഇവയ്ക്കു പറക്കാൻ സാധിക്കും. പകൽസമയം ഉറങ്ങുകയും രാത്രിയിൽ ഇരതേടുകയുമാണ് ഇവയുടെ രീതി. വലിയ കണ്ണുകളുള്ള ഇവകൾ ഇലകൾക്കിടയിൽ ഒളിച്ചിരിക്കാനും വിരുതന്മാരാണ്. വംശനാശ ഭീഷണി നേരിടുന്ന ഇവ റെഡ്ബുക്കിൽ സ്ഥാനം പിടിച്ചവയാണ്. റോക്കോഫോറസ് മലബാറിക്കസ് എന്ന് ശാസ്ത്രനാമമുള്ള മലബാർ ഗ്ലൈഡിംഗ് ഫ്രോഗ് എന്ന മരത്തവളയെ വനമേഖലയിലും കുന്നിൻപ്രദേശങ്ങളിലും കാണാം. റെഡ് ബുക്കിൽ ഇടം നേടിയിട്ടുണ്ടെങ്കിലും കേരളത്തിന്‍റെ വനമേഖലയിലെല്ലാം ഇവയുണ്ട്. വനനശീകരണം ഇവയുടെ നിലനില്പിനെ ബാധിക്കുന്നതായി വിദഗ്ധർ പറയുന്നു.

കൊച്ചി-ധനുഷ്‌കോടി ദേശീയപാതയുടെ നവീകരണജോലികള്‍ പുരോഗമിക്കുന്നു

അടിമാലി: കൊച്ചി-ധനുഷ്‌കോടി ദേശീയപാതയുടെ വികസനപ്രവര്‍ത്തനങ്ങൾ അതിവേഗം പുരോഗമിക്കുന്നു. മണ്ണ് നീക്കിയും സംരക്ഷണ ഭിത്തികള്‍ തീര്‍ത്തും പാതയുടെ വീതി വര്‍ധിപ്പിക്കുന്ന ജോലികളാണിപ്പോള്‍ നടക്കുന്നത്. ഓടകളുടെ നിര്‍മാണവും നടക്കുന്നു.കൊച്ചി മുതല്‍ മൂന്നാര്‍ വരെ 125 കിലോമീറ്റര്‍ ദൈര്‍ഘ്യത്തിലാണ് പദ്ധതി നടപ്പിലാക്കുന്നത്. 910 കോടി രൂപയ്ക്കാണ് പദ്ധതിയുടെ കരാര്‍ നൽകിയിരിക്കുന്നത്. പദ്ധതിയുടെ 110 കിലോമീറ്റര്‍ ദൂരവും വീതികൂട്ടി നവീകരിക്കാനാണ് പദ്ധതി. പാതയുടെ വീതി വര്‍ധിപ്പിക്കുന്നുണ്ടെങ്കിലും കൊടും വളവുകള്‍ നേരേയാക്കുന്നില്ലെന്ന പരാതിയും ഉയരുന്നുണ്ട്. നേര്യമംഗലത്ത് പുതിയ പാലവും പദ്ധതിയിലുണ്ട്. ഇതിന്‍റെ പ്രവര്‍ത്തനങ്ങളും പുരോഗമിക്കുകയാണ്. അഞ്ചു സ്പാനുകളിലായി 42.80 മീറ്റര്‍ നീളത്തില്‍ 13 മീറ്റര്‍ വീതിയിലുമാണ് പുതിയ പാലം നിർമിക്കുന്നത്. നിലവില്‍ നേര്യമംഗലം മുതല്‍ മൂന്നാര്‍ വരെയുള്ള പാതയുടെ വീതി കുറവ് തിരക്കേറുന്ന സമയങ്ങളില്‍ ഗതാഗതക്കുരുക്കിനും അപകടങ്ങള്‍ക്കും ഇടവരുത്തുന്നുണ്ട്. പാതയുടെ നവീകരണം പൂർത്തിയാകുന്നതോടെ ഗതാഗതക്കുരുക്കിനു പരിഹാരമാകുമെന്നാണ് പ്രതീക്ഷ.

പെസഹ കടന്നുപോകലിന്‍റെ തിരുനാൾ: മാർ ജോൺ നെല്ലിക്കുന്നേൽ

വാഴത്തോപ്പ്: പെസഹ തിരുനാളിന് ഈശോ പുതിയൊരു മാനം നൽകുകയാണ്. ദൈവവുമായി നാം നടത്തിയിട്ടുള്ള ഉടമ്പടിയുടെ പുതുക്കൽ കൂടിയാണ് പെസഹായെന്ന് ഇടുക്കി രൂപതാധ്യക്ഷൻ മാർ ജോൺ നെല്ലിക്കുന്നേൽ. വാഴത്തോപ്പ് സെന്‍റ് ജോർജ് കത്തീഡ്രലിൽ പെസഹാ തിരുനാൾ തിരുക്കർമങ്ങളിൽ സന്ദേശം നൽകുകയായിരുന്നു രൂപതാധ്യക്ഷൻ. പെസഹ കടന്നുപോകലിന്‍റെ തിരുനാളാണ്. കൂടാതെ, പെസഹാ തിരുനാൾ പൗരോഹിത്യം സ്ഥാപിച്ച ദിനം കൂടിയാണ്. നമ്മുടെ വിശ്വാസത്തിന്‍റെ കേന്ദ്രം വിശുദ്ധ കുർബാനയാണ്. വിശുദ്ധ കുർബാന ക്രിസ്തുവിന്‍റെ സ്നേഹത്തിന്‍റെ അടയാളമാണ്. വിശുദ്ധ കുർബാന സ്നേഹത്തിന്‍റെ കൂദാശയും ഐക്യത്തിന്‍റെ അടയാളവും ഉപവിയുടെ ഉടമ്പടിയുമാണ്. പെസഹാ തിരുനാളിൽ നടത്തുന്ന കാലു കഴുകൽ ദേവാലയത്തിൽ മാത്രം ഒതുങ്ങേണ്ടതല്ല. ഇത് ഓരോ വീടുകളിലും തുടരേണ്ടതാണ്. രോഗിയായി വീട്ടിൽ കഴിയുന്നവരെ സ്നേഹപൂർവം ശുശ്രൂഷിക്കുമ്പോൾ അവിടെ ക്രിസ്തു പഠിപ്പിച്ച എളിമയുടെയും ത്യാഗത്തിന്‍റെയും പാഠങ്ങൾ ജീവിതത്തിൽ പ്രാവർത്തികമാക്കുകയാണ്. സമൂഹത്തിലും കുടുംബത്തിലുമെല്ലാം ഐക്യവും സ്നേഹവും കളിയാടാൻ നാം പരിശ്രമിക്കണം. സമൂഹത്തിൽ നടമാടുന്ന തിന്മയുടെയും അനൈക്യത്തിന്‍റെയും സ്നേഹരാഹിത്യത്തിന്‍റെയും വാർത്തകൾ നമ്മെ അലോസരപ്പെടുത്തുന്നു. ഇതിൽനിന്നു സമൂഹത്തെ രക്ഷിക്കാനുള്ള മാർഗം സ്നേഹത്തിന്‍റെ ദൂതുമായി ജീവിക്കുക എന്നതു മാത്രമാണ്. ഒരു സ്നേഹസംസ്കാരം പടുത്തുയർത്താൻ പരിശ്രമിക്കേണ്ടതും ഐക്യത്തിന്‍റെ സാഹചര്യങ്ങൾ വളർത്തിയെടുക്കാൻ ശ്രമിക്കേണ്ടതും കാലഘട്ടത്തിന്‍റെ ആവശ്യമാണെന്നും അദ്ദേഹം പറഞ്ഞു. ഈശോ ശിഷ്യൻമാരുടെ കാലുകൾ കഴുകിയതിനെ അനുസ്മരിപ്പിച്ച് ബിഷപ് 12 പേരുടെ കാലുകൾ കഴുകി ചുംബിച്ചു. പെസഹാ തിരുക്കർമങ്ങളിൽ രൂപത വികാരി ജനറാൾ മോൺ. ജോസ് പ്ലാച്ചിക്കൽ, ഫാ. ജോസഫ് തച്ചുകുന്നേൽ, ഫാ. ഫ്രാൻസിസ് ഇടവക്കണ്ടം, ഫാ. മാത്യു അഴകനാക്കുന്നേൽ, ഫാ. ജോസഫ് കണ്ടത്തിൽ, ഫാ. അമൽ മണിമലക്കുന്നേൽ എന്നിവർ സഹകാർമികരായി.

ഡിവൈൻ മേഴ്സി ഷ്റൈനിൽ ദൈവകരുണയുടെ നൊവേന ഇന്നാരംഭിക്കും

തൊടുപുഴ: ദൈവകരുണയുടെ തീർഥാടന കേന്ദ്രമായ ഡിവൈൻ മേഴ്സി ഷ്റൈനിൽ ദൈവകരുണയുടെ തിരുനാളിന് ഒരുക്കമായുള്ള നൊവേന ഇന്നാരംഭിക്കും. ദുഃഖവെള്ളിയുടെ തിരുക്കർമങ്ങൾ രാവിലെ 6.30മുതൽ ടൗണ്‍പള്ളിയിൽആരംഭിക്കും. തുടർന്ന് 8.30നു പള്ളിയിൽനിന്നു ഷ്റൈനിലേക്ക് പരിഹാരപ്രദക്ഷിണം. 9.30നു ഷ്റൈനിൽ പീഡാനുഭവ സന്ദേശം. തുടർന്നു 10നു ദൈവകരുണയുടെ നൊവേന. നാളെ രാവിലെ 5.45നു വിശുദ്ധകുർബാന, നൊവേന. വൈകുന്നേരം 4.30നു നൊവേന, ലദീഞ്ഞ്, വിശുദ്ധകുർബാന. ഈസ്റ്റർ ദിനത്തിൽ രാവിലെ 6.30നു വിശുദ്ധകുർബാന, സന്ദേശം, ദൈവകരുണയുടെ നൊവേന. തുടർന്നുള്ള ദിവസങ്ങളിൽ രാവിലെ 5.45നു വിശുദ്ധകുർബാന, നൊവേന, വൈകുന്നേരം 4.30നു നൊവേന, ലദീഞ്ഞ്, ആഘോഷമായ വിശുദ്ധ കുർബാന എന്നിവയാണ് തിരുക്കർമങ്ങളെന്ന് റെക്ടർ ഫാ. ജോർജ് ചേറ്റൂർ, വൈസ് റെക്ടർ ഫാ. ആന്‍റണി വിളയപ്പിള്ളിൽ എന്നിവർ അറിയിച്ചു.

പെരുമ്പന്‍കുത്ത് ആറാംമൈല്‍- അന്‍പതാംമൈല്‍ റോഡ് നിര്‍മാണം പുനരാരംഭിച്ചു

അടിമാലി: മുടങ്ങിക്കിടന്നിരുന്ന മാങ്കുളം പഞ്ചായത്തിലെ പെരുമ്പന്‍കുത്ത് ആറാം മൈല്‍-അന്‍പതാംമൈല്‍ റോഡ് നിര്‍മാണം പുനരാരംഭിച്ചു. പഞ്ചായത്തിലെ 2, 3, 4 വാര്‍ഡുകളിലായുള്ള ആയിരത്തി അഞ്ഞൂറോളം കുടുംബങ്ങള്‍ ആശ്രയിക്കുന്ന റോഡ് 2018ലെ പ്രളയത്തിലാണ് തകര്‍ന്നത്. പിന്നീട് റീബില്‍ഡ് കേരളയില്‍ ഉള്‍പ്പെടുത്തി റോഡ് നിര്‍മാണത്തിനായി തുക അനുവദിച്ച് 2022 മാര്‍ച്ച് 26ന് നിര്‍മാണ ഉദ്ഘാടനം നടത്തുകയും ചെയ്തു. 270 ദിവസങ്ങള്‍ക്കുള്ളില്‍ നിര്‍മാണ ജോലികള്‍ പൂര്‍ത്തീകരിക്കാനായിരുന്നു കരാര്‍. എന്നാല്‍, കരാറുകാർ നിര്‍മാണ ജോലികള്‍ ആരംഭിച്ചെങ്കിലും പണികള്‍ പാതി വഴിയില്‍ നിര്‍ത്തിയതോടെ നാട്ടുകാര്‍ പ്രതിസന്ധിയിലായി. നിര്‍മാണമാരംഭിച്ച് മൂന്നു വര്‍ഷം പിന്നിട്ടിട്ടും പണികള്‍ പൂര്‍ത്തീകരിക്കാതെ വന്നതോടെ പ്രതിഷേധവും ശക്തമായി. ഇതിനെതുടർന്നാണ് റോഡിന്‍റെ നിര്‍മാണ ജോലികള്‍ പുനരാരംഭിച്ചത്. മുമ്പ്‌ റോഡിന്‍റെ മണ്‍ജോലികള്‍ നടത്തുകയും മെറ്റല്‍ വിരിക്കുകയും ചില കലുങ്കുകളുടെ നിര്‍മാണം നടത്തുകയും ചെയ്തിരുന്നു. ടാറിംഗ് ജോലികളും ഓടകളുടെയും മറ്റും നിര്‍മാണ ജോലികളും ചിലയിടങ്ങളില്‍ ടൈല്‍ വിരിക്കേണ്ട ജോലികളുമാണ് അവശേഷിക്കുന്നത്. പഞ്ചായത്തിലെ ഏക സര്‍ക്കാര്‍ വിദ്യാലയമായ ചിക്കണംകുടി സ്‌കൂളിലേക്കുള്ള ഏക റോഡ് കൂടിയാണിത്. കാല്‍നടയാത്ര പോലും ദുഃസഹമായ റോഡിലൂടെയാണ് നിലവില്‍ ആളുകള്‍ ചികിത്സാ സംബന്ധമായ ആവശ്യങ്ങള്‍ക്കുള്‍പ്പെടെ പുറം ലോകത്തേക്ക് യാത്ര ചെയ്യുന്നത്.

കാൽവരിയിലെ ത്യാഗസ്മരണയിൽ ഇന്നു ദുഃഖവെള്ളിയാചരണം

തൊടുപുഴ: കാൽവരിയിലെ മഹാത്യാഗത്തിന്‍റെ സ്മരണയിൽ ക്രൈസ്തവർ ഇന്ന് ദുഃഖവെള്ളിയാചരിക്കും. മാനവരക്ഷയ്ക്കായി കുരിശിൽ ജീവൻ അർപ്പിച്ച ക്രിസ്തുവിന്‍റെ ഉദാത്തമായ സ്നേഹത്തിന്‍റെയും ത്യാഗത്തിന്‍റെയും സ്മരണ പുതുക്കി ദേവാലയങ്ങളിൽ ഇന്നു ദുഃഖവെള്ളിയുടെ തിരുക്കർമങ്ങൾ നടക്കും. നോന്പിന്‍റെയും ഉപവാസത്തിന്‍റെയും ദിനങ്ങളിലൂടെ ആത്മവിശുദ്ധീകരണത്തിന്‍റെ ചൈതന്യത്തിലേക്ക് കടന്നുവന്ന വിശ്വാസ സമൂഹം ക്രൂശിതനു പിന്നാലെ പ്രാർഥനാമന്ത്രങ്ങളുമായി കുരിശിന്‍റെ വഴിയിലെ 14 സ്ഥലങ്ങൾ ധ്യാനിച്ച് പരിഹാര പ്രദക്ഷിണം നടത്തും. ജില്ലയിൽ എഴുകുംവയൽ, തുന്പച്ചി, ചക്കിക്കാവ് കാർമൽമൗണ്ട്, നെല്ലിക്കാമല നസ്രത്ത്മൗണ്ട് തുടങ്ങിയ തീർഥാടന കേന്ദ്രങ്ങളിലേക്ക് ആയിരങ്ങൾ കുരിശിന്‍റെ വഴിയുമായി നടന്നുനീങ്ങും. ദേവാലയങ്ങളിൽ ദുഃഖവെള്ളിയുടെ പ്രത്യേക തിരുക്കർമങ്ങൾ നടക്കും. പീഡാനുഭവ വായന, പരിഹാരപ്രദക്ഷിണം, സ്ലീവ ചുംബനം എന്നിവയുമുണ്ടാകും. വാഴത്തോപ്പ് സെന്‍റ് ജോർജ് കത്തീഡ്രൽപള്ളിയിൽ രാവിലെ 6.30നു ദുഃഖവെള്ളി തിരുക്കർമങ്ങൾ. തുടർന്നു വാഴത്തോപ്പ് കുരിശുമലയിലേക്ക് പരിഹാരപ്രദക്ഷിണം. തൊടുപുഴ ടൗണ്‍പള്ളിയിൽ രാവിലെ 6.30നു പീഡാനുഭവ തിരുക്കർമങ്ങൾ. 8.30നു ഡിവൈൻ മേഴ്സി ഷ്റൈൻ ഓഫ് ഹോളിമേരി ഗ്രോട്ടോയിലേക്ക് പരിഹാര പ്രദക്ഷിണം, തുടർന്നു പീഡാനുഭവസന്ദേശം. മുതലക്കോടം സെന്‍റ് ജോർജ് ഫൊറോന പള്ളിയിൽ രാവിലെ 6.30നു തിരുക്കർമങ്ങൾ. 8.30നു പരിഹാരപ്രദക്ഷിണം. കരിമണ്ണൂർ സെന്‍റ് മേരീസ് ഫൊറോനപള്ളിയിൽ രാവിലെ 6.15നു പീഡാനുഭവ തിരുക്കർമങ്ങൾ. ഉച്ചകഴിഞ്ഞ് മൂന്നിന് സെന്‍റ് ജോസഫ് എച്ച്എസ്എസിലേക്ക് പരിഹാര പ്രദക്ഷിണം, പീഡാനുഭവസന്ദേശം. മൂലമറ്റം സെന്‍റ് ജോർജ് ഫൊറോനപള്ളിയിൽ രാവിലെ ഏഴിന് പീഡാനുഭവ തിരുക്കർമങ്ങൾ. എട്ടിന് പള്ളിയിൽനിന്ന് അശോക കവലയിലേക്കും തിരിച്ച് പള്ളിയിലേക്കും പരിഹാര പ്രദക്ഷിണം. മൈലക്കൊന്പ് സെന്‍റ് തോമസ് ഫൊറോനപള്ളിയിൽ രാവിലെ 6.30നു തിരുക്കർമങ്ങൾ. തുടർന്നു പള്ളിയിൽ കുരിശിന്‍റെ വഴി. വൈകുന്നേരം 3.30നു മടക്കത്താനം കുരിശടിയിലേക്ക് പരിഹാരപ്രദക്ഷിണം. കരിങ്കുന്നം സെന്‍റ് അഗസ്റ്റിൻസ് പള്ളിയിൽനിന്നു രാവിലെ 7.30നു നെല്ലാപ്പാറ കുരിശുപള്ളിയിലേക്കും തിരിച്ച് പള്ളിയിലേക്കും കുരിശിന്‍റെ വഴി. 9.30നു പള്ളിയിൽ ദുഃഖവെള്ളി തിരുക്കർമങ്ങൾ. അറക്കുളം സെന്‍റ് മേരീസ് പുത്തൻപള്ളിയിൽ രാവിലെ ആറിന് ദുഃഖവെള്ളി തിരുക്കർമങ്ങൾ. തുടർന്ന് എട്ടിന് അശോകക്കവലയിൽനിന്ന് ഇടുക്കി റോഡിലൂടെ തുന്പച്ചി കുരിശുമലയിലേക്ക് പരിഹാര പ്രദക്ഷിണം. മൂലമറ്റം സ്നേഹവില്ലയിൽ ദുഃഖവെള്ളിയുടെ തിരുക്കർമങ്ങൾ രാവിലെ ഏഴിന്. തുടർന്നു പരിഹാര പ്രദക്ഷിണം. കാളിയാർ സെന്‍റ് റീത്താസ് ഫൊറോനപള്ളിയിൽ രാവിലെ 8.30നു പീഡാനുഭവ ശുശ്രൂഷ. തുടർന്നു കാളിയാർ സെന്‍റ് ജൂഡ് കപ്പേളയിലേക്കും തിരികെ പള്ളിയിലേക്കും പരിഹാര പ്രദക്ഷിണം. തുടങ്ങനാട് സെന്‍റ് തോമസ് ഫൊറോന പള്ളിയിൽ രാവിലെ 6.30നു പീഡാനുഭവ തിരുക്കർമങ്ങൾ. എട്ടിന് കുരിശിന്‍റെ വഴി കുഞ്ഞച്ചൻ കുരിശുമലയിലേക്ക്. മാറിക സെന്‍റ് ജോസഫ് ഫൊറോനപള്ളിയിൽ രാവിലെ 7.30നു തിരുക്കർമങ്ങൾ, കുരിശിന്‍റെ വഴി. വൈകുന്നേരം 4.30നു പരിഹാരപ്രദക്ഷിണം വഴിത്തല ചാപ്പലിലേക്ക്, തുടർന്നു പീഡാനുഭവസന്ദേശം. ദുഃഖശനിയാഴ്ച രാവിലെ പള്ളികളിൽ തിരുക്കർമങ്ങൾക്കു ശേഷം പുത്തൻവെള്ളം, പുത്തൻതീ വെഞ്ചരിപ്പ്, ജ്ഞാനസ്നാന വ്രതനവീകരണം എന്നിവ നടക്കും.

പഴക്കട ജപ്തി ചെയ്തത് ഹൈക്കോടതി സ്റ്റേ ചെയ്തു

അടിമാലി: വാഴക്കുല വ്യാപാരിയുടെ കട ജപ്തി ചെയ്ത കേരള ബാങ്ക് നടപടി ഹൈക്കോടതി രണ്ടു ദിവസത്തേക്ക് സ്റ്റേ ചെയ്തു. കട ജപ്തി ചെയ്ത് സീൽ ചെയ്തതോടെ ലക്ഷക്കണക്കിന് രൂപയുടെ ഏത്തക്കുലകളും പഴങ്ങളും ഉള്ളിലിരുന്ന് അഴുകിനശിക്കുന്ന സ്ഥിതിയായിരുന്നു. ഇതേത്തുടർന്നു കടയുടമയ്ക്ക് ഇവ നീക്കം ചെയ്യുന്നതിനാണ് രണ്ടു ദിവസം സാവകാശം അനുവദിച്ച് ഉത്തരവായത്. മാർക്കറ്റിംഗ് സൊസൈറ്റിയിൽനിന്ന് സ്ഥലം വാടകയ്ക്കെടുത്ത് കട നിർമിച്ചായിരുന്നു അക്ബർ വ്യാപാരം നടത്തിവന്നിരുന്നത്. അക്ബറിന് ബാങ്കുമായി നേരിട്ട് ഇടപാടില്ലെങ്കിലും മാർക്കറ്റിംഗ് സൊസൈറ്റിയിലെ കുടിശിക ഈടാക്കുന്നതിനാണ് കഴിഞ്ഞ ദിവസം ബാങ്ക് കട ജപ്തി ചെയ്തത്. ജപ്തി സംബന്ധിച്ച് തനിക്ക് അറിയിപ്പൊന്നും ലഭിച്ചിരുന്നില്ലെന്നും കടയ്ക്കുള്ളിലെ സ്റ്റോക്ക് നീക്കാൻ അവസരം നൽകാതെയാണ് ബാങ്കധികൃതർ സ്ഥാപനം പൂട്ടിയതെന്നും ആരോപണം ഉയർന്നിരുന്നു. ഇതിനു പിന്നാലെയാണ് കടയുടമ ഹൈക്കോടതിയെ സമീപിച്ചത്.

വഞ്ചിവയൽ കോളനിവികസനം: എംഎൽഎ ഫണ്ട് അനുവദിക്കണം

ഇടുക്കി: വഞ്ചിവയൽ ആദിവാസി കോളനിയിലേക്ക് കുടിവെള്ളം, റോഡ് തുടങ്ങിയ അടിസ്ഥാന സൗകര്യങ്ങൾ ഉറപ്പാക്കുന്നതിന് പീരുമേട് എംഎൽഎയുടെ ആസ്തിവികസന ഫണ്ടിൽനിന്ന് അനുവദിച്ച മൂന്നരക്കോടി രൂപ ധനവകുപ്പിൽനിന്നു അടിയന്തരമായി അനുവദിക്കുന്നതിനുള്ള നടപടികൾ സ്വീകരിക്കണമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റീസ് അലക്സാണ്ടർ തോമസ് വണ്ടിപ്പെരിയാർ പഞ്ചായത്ത് സെക്രട്ടറിക്ക് നിർദ്ദേശം നൽകി. ഫണ്ട് ലഭിച്ചാലുടൻ തുടർനടപടികൾ സ്വീകരിച്ച് വഞ്ചിവയൽ കോളനിയിൽ അടിസ്ഥാന സൗകര്യങ്ങൾ സമയബന്ധിതമായി ഒരുക്കണമെന്നും കമ്മീഷൻ നിർദ്ദേശിച്ചു. വഞ്ചിവയൽ കോളനിയിൽ അടിസ്ഥാന സൗകര്യങ്ങൾ നിഷേധിക്കുന്നതിനെതിരേ പൊതുപ്രവർത്തകനായ ഡോ. ഗിന്നസ് മാടസാമി സമർപ്പിച്ച പരാതിയിലാണ് നടപടി. എംഎൽഎയുടെ പ്രതിനിധിയും പഞ്ചായത്ത്, വനം അധികൃതരും കോളനി സന്ദർശിച്ചതായി കമ്മീഷൻ സിറ്റിംഗിൽ ഹാജരായ പഞ്ചായത്ത് അസിസ്റ്റന്‍റ് എൻജി നിയർ അറിയിച്ചു. എംഎൽഎ, അനുവദിച്ച തുകയ്ക്ക് എസ്റ്റിമേറ്റ് എടുത്തതായും വനംവകുപ്പിന്‍റെ അനുമതി ലഭിച്ചിട്ടുണ്ടെന്നും പഞ്ചായത്ത് അറിയിച്ചു. ഫണ്ട് അനുവദിക്കുന്നത് ധനവകുപ്പിന്‍റെ പരിഗണനയിലാണെന്നും ലഭിച്ചാലുടൻ ടെൻഡർ നടപടികൾ ആരംഭിക്കുമെന്നും റിപ്പോർട്ടിൽ പറയുന്നു. വണ്ടിപ്പെരിയാർ പഞ്ചായത്ത് സെക്രട്ടറി എത്രയും വേഗം ധനവകുപ്പിൽനിന്ന് അനുമതി ലഭിക്കാനുള്ള നടപടികൾ ത്വരിതപ്പെടുത്തി പരാതിക്ക് പരിഹാരം കാണണമെന്ന് ജസ്റ്റീസ് അലക്സാണ്ടർ തോമസ് ആവശ്യപ്പെട്ടു.

വിദേശത്തു ജോലി വാഗ്ദാനം ചെയ്ത് മാട്ടുക്കട്ട സ്വദേശി ജിനു ജോണ്‍സണ്‍ തട്ടിയത് ലക്ഷങ്ങള്‍

കട്ടപ്പന: വിദേശത്ത് ജോലി വാഗ്ദാനം ചെയ്ത് ലക്ഷങ്ങള്‍ തട്ടിയ യുവാവിനെ കട്ടപ്പന പോലീസ് പഞ്ചാബിലെ മൊഹാലിയില്‍നിന്ന് അറസ്റ്റ് ചെയ്തു. അയ്യപ്പന്‍കോവില്‍ മാട്ടുക്കട്ട മാട്ടയില്‍ ജിനു ജോണ്‍സണ്‍(39) ആണ് പിടിയിലായത്. മാള്‍ട്ട, ന്യൂസിലന്‍ഡ്, പോളണ്ട് എന്നിവിടങ്ങളില്‍ കെയര്‍ടേക്കര്‍ ജോലി വാഗ്ദാനം ചെയ്ത് പത്തിലേറെ ആളുകളില്‍നിന്ന് ഇയാള്‍ മൂന്നു മുതല്‍ നാലര ലക്ഷം രൂപ വരെ തട്ടിയെടുത്തിട്ടുള്ളതായാണ് പരാതിയുള്ളത്. മാട്ടുക്കട്ടയില്‍ ഇയാളുടെ ഉടമസ്ഥതയിലുണ്ടായിരുന്ന ജനസേവന കേന്ദ്രത്തിന്‍റെ മറവിലായിരുന്നു തട്ടിപ്പ്. കട്ടപ്പന പോലീസ് സ്റ്റേഷനില്‍ നാല് കേസുകള്‍ രജിസ്റ്റര്‍ ചെയ്തിട്ടുണ്ട്. പരാതിക്കാരില്‍നിന്ന് ആകെ 17 ലക്ഷത്തോളം രൂപ കബളിപ്പിച്ചു. ഉപ്പുതറ സ്റ്റേഷന്‍പരിധിയിലും നിരവധിപേര്‍ തട്ടിപ്പിനിരയായിട്ടുണ്ട്. ഏഴുമാസം മുമ്പ് ഏതാനും ആളുകളുടെ വിസ വന്നിട്ടുണ്ടെന്നും ഇതിന്‍റെ ആവശ്യത്തിനായി ഇയാൾ പഞ്ചാബിലേക്ക് പോകുകയാണെന്നും ഉദ്യോഗാര്‍ഥികളെ വിശ്വസിപ്പിച്ചു. മാസങ്ങള്‍ പിന്നിട്ടിട്ടും ജിനുവിനെ ഫോണില്‍ കിട്ടാതായതോടെ ആളുകള്‍ പോലീസില്‍ പരാതി നല്‍കുകയായിരുന്നു. കട്ടപ്പന പോലീസ് മൊഹാലിയിലെ സിരക്പൂരിലെത്തിയാണ് ജിനുവിനെ അറസ്റ്റ് ചെയ്തത്. കട്ടപ്പന, ഉപ്പുതറ മേഖലകളിലായി നിരവധിപേര്‍ തട്ടിപ്പിനിരയായിട്ടുണ്ടെന്നാണ് വിവരം. വരുംദിവസങ്ങളില്‍ ഇവരും പരാതികള്‍ നല്‍കും. കട്ടപ്പന ഡിവൈഎസ്പി വി. എ. നിഷാദ്‌മോന്‍റെ മേല്‍നോട്ടത്തില്‍ എസ്‌ഐ ബിജു ഡിജു ജോസഫ്, എസ് സിപിഒ അനൂപ്, സുരേഷ് ബി. ആന്‍റോ എന്നിവരാണ് പ്രതിയെ പിടികൂടിയത്.

കട്ടപ്പനയിൽ മൂന്ന് ആരോഗ്യകേന്ദ്രങ്ങൾ ഒരുമിച്ച് നാടിനു സമർപ്പിക്കുന്നു

കട്ടപ്പന: കട്ടപ്പനയിൽ മുന്ന് സൗജന്യ ആരോഗ്യ കേന്ദ്രങ്ങൾ ഒരുമിച്ചു നാടിന് സമർപ്പിക്കുന്നു. കട്ടപ്പന നഗര സഭയുടെ കിഴിൽ കാൻസർ രോഗ നിർണയ കേന്ദ്രം, നഗരജനകീയ ആരോഗ്യ കേന്ദ്രം, സ്പെഷാലിറ്റി ഡെന്‍റൽ ക്ലിനിക് എന്നിവയാണ് നാടിന് സമർപ്പിക്കുന്നത്. കട്ടപ്പന ബ്ലോക്ക് പഞ്ചായത്ത് ഓഫീസ് പ്രവർത്തിച്ചിരുന്ന പാറക്കടവിലെ കെട്ടിടത്തിലാണ് മുന്ന് ആരോഗ്യ കേന്ദ്രങ്ങളും ഒരുമിച്ചു പ്രവർത്തിക്കുന്നത്. 22ന് ഉച്ചയ്ക്ക് 12ന് മന്ത്രി റോഷി അഗസ്റ്റിൻ കാൻസർ രോഗ നിർണയ കേന്ദ്രത്തിന്‍റെ ഉദ്ഘാടനം നിർവഹിക്കും. നഗര ജനകീയ ആരോഗ്യ കേന്ദ്രത്തിന്‍റെ ഉദ്ഘാടനം അഡ്വ. ഡീൻ കുര്യാക്കോസ് എം പിയും സ്പെഷാലിറ്റി ഡെന്‍റൽ ക്ലിനിക് ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് വി.പി. ജോണും നിർവഹിക്കും. നഗരസഭയുടെ നിയന്ത്രണത്തിൽ പ്രവർത്തിക്കുന്ന താലൂക്കാശുപത്രിയുടെ മേൽനോട്ടത്തിൽ ജില്ലയിൽ ആദ്യമായാണ് ഒരു കാൻസർ രോഗനിർണയ കേന്ദ്രം ആരംഭിക്കുന്നത്. ദന്ത ചികിത്സാരംഗത്ത് ജില്ലയിൽ ആദ്യമായി കേന്ദ്രസർക്കാർ സഹകരണത്തോടെ നഗരസഭയുടെ നിയന്ത്രണത്തിൽ സ്പെഷാലിറ്റി ഡെന്‍റൽ ക്ലിനിക്കിനും തുടക്കമാകുകയാണ്. ഒരു കോടിയോളം രൂപ ചെലവഴിച്ചു കേന്ദ്ര സംസ്ഥാന സർക്കാരുകളുടെ സാന്പത്തിക സഹായവും ആരോഗ്യവകുപ്പിന്‍റെയും ബ്ലോക്ക് പഞ്ചായത്തിന്‍റെയും പ്രത്യേക പരിഗണനയും നിമിത്തമാണ് മൂന്ന് കേന്ദ്രങ്ങൾ ഒരുമിച്ച് പ്രവർത്തനമാരംഭിക്കാൻ കഴിഞ്ഞിട്ടുള്ളത് എന്ന് നഗരസഭ ചെയർപേഴ്സണ്‍ ബീന ടോമി പത്ര സമ്മേളനത്തിൽ പറഞ്ഞു. വൈസ് ചെയർമാൻ അഡ്വ. കെ.ജെ. ബെന്നി, കൗണ്‍സിലർമാരായ ജോയി വെട്ടിക്കുഴി, ജോയി ആനിത്തോട്ടം, സിബി പാറപ്പായി എന്നിവരും പത്ര സമ്മേളനത്തിൽ പങ്കെടുത്തു.

വെള്ളക്കെട്ട് മൂന്നു മാസത്തിനകം പരിഹരിക്കണം: മനുഷ്യാവകാശ കമ്മീഷൻ

ഇടുക്കി: പീരുമേട് താലുക്ക് ആശുപത്രിക്കു മുന്നിൽ വെള്ളക്കെട്ട് രൂപം കൊള്ളുന്ന സാഹചര്യം പൂർണമായും ഒഴിവാക്കാൻ മൂന്നു മാസത്തിനകം നടപടിയെടുക്കണമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റീസ് അലക്സാണ്ടർ തോമസ് പൊതുമരാമത്ത് വകുപ്പിന് നിർദേശം നൽകി. കാഞ്ഞിരപ്പള്ളി അസി. എക്സിക്യൂട്ടീവ് എൻജിനിയർക്കാണ് കമ്മീഷൻ നിർദേശം നൽകിയത്. പീരുമേട് ഫോറസ്റ്റ് സ്റ്റേഷനു മൂന്നിലായി അനധികൃതമായി നിർമിച്ച റാന്പ് കാരണമാണ് വെള്ളക്കെട്ട് ഉണ്ടാകുന്നതെന്ന് എക്സിക്യൂട്ടീവ് എൻജിനിയർ കമ്മീഷനെ അറിയിച്ചു. ഇതു പൊളിക്കാൻ പീരുമേട് ഫോറസ്റ്റ് ഓഫീസർക്ക് നിർദേശം നൽകിയിട്ടുണ്ട്. ദേശീയപാത വിഭാഗത്തിന്‍റെ അനുമതിയില്ലാതെയാണ് റാന്പ് നിർമിച്ചതെന്ന് റിപ്പോർട്ടിൽ പറയുന്നു. റാന്പ് ഇതുവരെ പൊളിച്ചില്ലെങ്കിൽ നീക്കം ചെയ്യാനുള്ള നടപടി ദേശീയപാത അധികൃതർ സ്വീകരിക്കണമെന്ന് കമ്മീഷൻ ആവശ്യപ്പെട്ടു. മൂന്നു മാസത്തിനകം പരാതിക്ക് പൂർണ പരിഹാരം കാണണമെന്നും ജസ്റ്റീസ് അലക്സാണ്ടർ തോമസ് ആവശ്യപ്പെട്ടു. പരാതി പരിഹരിച്ച ശേഷം റിപ്പോർട്ട് സമർപ്പിക്കണം. പീരുമേട് സ്വദേശി പി.പി. മജീദ് നൽകിയ പരാതിയിലാണ് നടപടി.

ഡോളിക്ക് ഇനി സ്നേഹമന്ദിരം അഭയകേന്ദ്രം

ചെറുതോണി: നാളുകളായി വാളറ, അടിമാലി പ്രദേശത്തുകൂടി അലഞ്ഞു നടന്നിരുന്ന ഡോളി ഷാജിയെ അടിമാലി പോലീസ് പടമുഖം സ്നേഹമന്ദിരത്തിലെത്തിച്ചു. മാനസികാസ്വാസ്ഥ്യം പ്രകടിപ്പിക്കുന്ന ഏകദേശം 58 വയസ് പ്രായം തോന്നിക്കുന്ന ഡോളി സ്നേഹമന്ദിരത്തിൽ എത്തുമ്പോൾ തീർത്തും അവശ നിലയിലായിരുന്നു. കാലിന്‍റെ വിരലിനു സാരമായ പരിക്കുണ്ട്. സ്വന്തമായി വീടോ സ്ഥലമോ ഇല്ല. പഞ്ചായത്ത്‌ അധികൃതരുടെയും നാട്ടുകാരുടെയും സഹായംകൊണ്ടാണ് ഇത്രയുംനാൾ ജീവിച്ചു വന്നത്. മക്കൾ ജീവിച്ചിരിപ്പുണ്ടെന്ന് പറയുന്നു. റോഡരികിലും കടത്തിണ്ണയിലും മറ്റുമാണ് ഇവർ അന്തിയുറങ്ങിയിരുന്നത്. നിരാലംബയായ ഡോളിയുടെ അവസ്ഥകൾ മനസിലാക്കി സ്നേഹമന്ദിരം ഡയറക്ടർ വി.സി. രാജു ഇവരെ ഏറ്റെടുക്കുകയായിരുന്നു. ഡോളി ഷാജിയെക്കുറിച്ച് എന്തെങ്കിലും വിവരങ്ങൾ അറിയുന്ന ബന്ധുക്കളോ പരിചയക്കാരോ ഉണ്ടെങ്കിൽ സ്നേഹമന്ദിരവുമായി ബന്ധപ്പെടണം. ഫോൺ - 9447463933, 9744287214.

ആശുപത്രി നിർമാണം: സർക്കാർ എതിർ സത്യവാങ്മൂലം നൽകണമെന്ന് ഹൈക്കോടതി

മൂന്നാർ: മൾട്ടി സ്പെഷാലിറ്റി ആശുപത്രിയുടെ നിർമാണത്തിൽ കാലതാമസം നേരിടുന്ന സാഹചര്യത്തിൽ സർക്കാരിനോട് എതിർ സത്യവാങ്മൂലം നൽകാൻ ഹൈക്കോടതി ആവശ്യപ്പെട്ടു. 2024 മേയ് 19ന് സർക്കാർ പുറപ്പെടുവിച്ച ഉത്തരവിൽ ഒരു വർഷത്തിനകം ആശുപത്രി നിർമാണം ആരംഭിക്കണമെന്നും അല്ലാത്ത പക്ഷം പദ്ധതി റദ്ദാകുമെന്നും സൂചിപ്പിച്ചിരുന്നു. ഈ കാലാവധി പൂർത്തിയാകാനിരിക്കെ പ്രാഥമിക നടപടികൾ പോലും എങ്ങുമെത്താത്ത സാഹചര്യത്തിലാണ് സർക്കാരിനോട് ഹൈക്കോടതി ഡിവിഷൻ ബഞ്ച് എതിർ സത്യവാങ്മൂലം ആവശ്യപ്പെട്ടിരിക്കുന്നത്. പദ്ധതി നഷ്ടമാകാതിരിക്കാനുള്ള നടപടികൾ സ്വീകരിക്കണമെന്നാവശ്യപ്പെട്ട് സെന്‍റർ ഫോർ പ്രൊട്ടക്ഷൻ ഓഫ് സോഷ്യൽ ജസ്റ്റീസ് എന്ന മനുഷ്യാവകാശ സംഘടന കോടതിയിൽ നൽകിയ റിട്ട് ഹർജിയിലാണ് കോടതി സർക്കാരിനോട് സത്യവാങ്മൂലം ആവശ്യപ്പെട്ടിരിക്കുന്നത്. രണ്ടാഴ്ചയ്ക്കുള്ളിൽ എതിർ സത്യവാങ്്മൂലം നൽകിയിരിക്കണം. ഹൈക്കോടതി ഡിവിഷൻ ബഞ്ചിലെ ജസ്റ്റീസ് അനിൽ നരേന്ദ്രനാണ് ഉത്തരവ് നൽകിയത്. അടിയന്തര സാഹചര്യമുണ്ടെങ്കിൽ അവധിക്കാല കോടതിയെ സമീപിക്കാനും അനുമതി നൽകിയിട്ടുണ്ട്. ദേവികുളം സാമൂഹ്യാരോഗ്യ കേന്ദ്രത്തിനു സമീപം സർവേ നന്പർ 201-ൽ ഉൾപ്പെട്ട അഞ്ചേക്കർ ഭൂമിയിൽ 78.25 കോടി രൂപയിലാണ് നിർമാണം നടത്താൻ തീരുമാനിച്ചിരുന്നത്. റവന്യൂ വകുപ്പിന്‍റെ അധീനതയിൽ ഉള്ള ഭൂമി ഉടമസ്ഥാവകാശം വകുപ്പിൽ തന്നെ നിലനിർത്തി കൈവശാവകാശത്തിനും ഉപയോഗത്തിനുമായി ആരോഗ്യവകുപ്പിന് നൽകണമെന്നായിരുന്നു ഉത്തരവിൽ പറഞ്ഞിരുന്നത്. സംസ്ഥാന ആരോഗ്യവകുപ്പ് ഡയറക്ടർ സ്ഥലം വിട്ടുകിട്ടുന്നതിനായി അപേക്ഷ നൽകിയെങ്കിലും തുടർനടപടികൾ ഉണ്ടായിട്ടില്ല. പദ്ധതിയുടെ നിയന്ത്രണാധികാരംകെഎസ്ഇബിക്കായിരുന്നു അനുവദിച്ചിരുന്നത്. പദ്ധതിയിൽ താത്പര്യമില്ലെന്ന് ചൂണ്ടിക്കാട്ടി കെഎസ്ഇബി പിന്മാറുകയും ചെയ്തു. ബന്ധപ്പെട്ട വകുപ്പുകളും ഉദാസീനത കാട്ടിയതോടെയാണ് പദ്ധതി റദ്ദാകുമെന്ന അവസ്ഥയിൽ എത്തിയത്. സംസ്ഥാന മെഡിക്കൽ, റവന്യു വകുപ്പുകളുടെ ഉന്നത ഉദ്യോഗസ്ഥർ സ്ഥലം സന്ദർശിച്ച് നിർദിഷ്ട ഭൂമി ആശുപത്രി നിർമാണത്തിന് അനുയോജ്യമാണെന്ന് ലാൻഡ് റവന്യൂ കമ്മീഷണർക്ക് റിപ്പോർട്ട് നൽകിയതിനെ തുടർന്നാണ് ആശുപത്രി നിർമാണത്തിനുള്ള ഉത്തരവ് സർക്കാർ പുറപ്പെടുവിച്ചത്. സർക്കാർ പുറപ്പെടുവിച്ച ഉത്തരവിൽ ഗവർണർ ഒപ്പു വയ്ക്കുകയും ചെയ്തിരുന്നു. ആയിരക്കണക്കിന് ആദിവാസികൾ ഉൾപ്പെടെയുള്ള മേഖലയിൽ മെച്ചപ്പെട്ട ചികിത്സയോ വിദഗ്ധ ചികിത്സയോ ലഭിക്കാൻ മണിക്കൂറുകൾ യാത്ര ചെയ്യേണ്ട സാഹചര്യത്തിൽ ബന്ധപ്പെട്ട സർക്കാർ വകുപ്പുകളുടെയും ഉദ്യോഗസ്ഥരുടെയും അനാസ്ഥ മൂലം പദ്ധതി നഷ്ടപ്പെടാൻ സാധ്യതയുള്ള സാഹചര്യത്തിലാണ് മനുഷ്യാവകാശ സംഘടന കോടതിയെ സമീപിച്ചത്.

നെടുങ്കണ്ടം കരുണാ റിട്രീറ്റ് സെന്‍ററിൽ ദൈവകരുണയുടെ കണ്‍വന്‍ഷനും തിരുനാളും

നെടുങ്കണ്ടം: ഇടുക്കി രൂപതയുടെ കീഴില്‍ നെടുങ്കണ്ടത്ത് പ്രവര്‍ത്തിക്കുന്ന കരുണ ആനിമേഷന്‍ ആൻഡ് ഡിവൈന്‍ മേഴ്‌സി റിട്രീറ്റ് സെന്‍ററിൽ ദൈവകരുണയുടെ മൂന്നാമത് കണ്‍വന്‍ഷനും തിരുനാളും പുതുഞായര്‍ ആഘോഷവും 18 മുതല്‍ 27 വരെ നടക്കുമെന്ന് ഡയറക്ടര്‍ ഫാ. ജയിംസ് മാക്കിയില്‍ അറിയിച്ചു. 18, 19 തീയതികളില്‍ വൈകുന്നേരം അഞ്ച് മുതല്‍ 8.30 വരെ കുരിശിന്‍റെ വഴി, ജാഗരണ പ്രാര്‍ഥന, നൊവേന തുടങ്ങിയവ നടക്കും. 20 മുതല്‍ വൈകുന്നേരം 4.30 ന് വിശുദ്ധ കുര്‍ബാന, വചന പ്രഘോഷണം, ആരാധന, നൊവേന എന്നിവ ഉണ്ടായിരിക്കും. 20ന് വൈകുന്നേരം 4.30 ന് ഇടുക്കി രൂപത വികാരി ജനറാള്‍ മോണ്‍. ജോസ് കരിവേലിക്കല്‍ കണ്‍വന്‍ഷന്‍ ഉദ്ഘാടനം ചെയ്യും. തുടര്‍ന്നുള്ള ദിവസങ്ങളില്‍ മോണ്‍. ഏബ്രഹാം പുറയാറ്റ്, ഫാ. മാര്‍ട്ടിന്‍ പൊന്‍പതാല്‍, ഫാ. ജോണ്‍ ചേനംചിറയില്‍, ഫാ. ബെഞ്ചമിന്‍ എന്നിവര്‍ വിശുദ്ധ കുര്‍ബാനകള്‍ക്ക് കാര്‍മികത്വം വഹിക്കും. വിവിധ ദിവസങ്ങളില്‍ കേരളത്തിലെ പ്രമുഖ വചന പ്രഘോഷകരായ ഫാ. സെബാസ്റ്റ്യന്‍ പൂവത്തിങ്കല്‍, സിസ്റ്റര്‍ ലിസ്യൂ മരിയ, ഫാ. ജയിംസ് മഞ്ഞാക്കല്‍, ഫാ.സിജോ തയ്യാലയ്ക്കല്‍, മഞ്ജിതാ തെരേസ, ബ്രദർ സാബു ആറുതൊട്ടിയില്‍, ബ്രദർ സന്തോഷ് കരുമാത്ര, ഫാ. ജിന്‍സ് ചീങ്കല്ലേല്‍ എന്നിവര്‍ ശുശ്രൂഷകള്‍ക്ക് നേതൃത്വം നല്‍കും. 25ന് വൈകുന്നേരം 4.30 നുള്ള വിശുദ്ധ കുര്‍ബാനയ്ക്ക് സീറോ മലബാര്‍ സഭ കൂരിയാ മെത്രാന്‍ മാര്‍ സെബാസ്റ്റ്യൻ വാണിയപ്പുരയ്ക്കല്‍ കാര്‍മികത്വം വഹിക്കും. സമാപന ദിവസമായ 27 ന് വൈകുന്നേരം 4.30 ന് ഇടുക്കി രൂപത മെത്രാന്‍ മാര്‍ ജോണ്‍ നെല്ലിക്കുന്നേല്‍ വിശുദ്ധ കുര്‍ബാനയ്ക്കും തിരുനാളിനും ദിവ്യകാരുണ്യ പ്രദക്ഷിണത്തിനും മുഖ്യ കാര്‍മികത്വം വഹിക്കും. റിട്രീറ്റ് സെന്‍റർ അസി. ഡയറക്ടര്‍ ഫാ. ബിബിന്‍ അറയ്ക്കല്‍, ഡെന്നി താണുശേരിക്കാരന്‍, ഷിജോ ശൗര്യാംകുഴി, ബ്രദർ റെജി പുതുപ്പറമ്പില്‍, ബ്രദർ വിനോദ് കളപ്പുരയ്ക്കല്‍ എന്നിവരും പത്രസമ്മേളനത്തില്‍ പങ്കെടുത്തു.

ലഹരിക്കെതിരേ ഗ്രീൻവാലി ഡെവലപ്മെന്‍റ് സൊസൈറ്റി

ചെറുതോണി: കോട്ടയം അതിരൂപതയുടെ സാമൂഹ്യ സേവന വിഭാഗമായ ഗ്രീൻവാലി ഡെവലപ്മെന്‍റ് സൊസൈറ്റിയുടെ നേതൃത്വത്തിൽ ലഹരിക്കെതിരേ-സാമൂഹ്യ വിപത്തിനെതിരേ എന്ന പദ്ധതിക്ക് തുടക്കമായി. ലഹരിക്കെതിരെ പ്രവർത്തന ഗ്രാമങ്ങളിൽ ബോധവത്കരണ ക്ലാസുകൾ സംഘടിപ്പിക്കുന്നതിനും സാമൂഹ്യ തിന്മകൾക്കെതിരേ പ്രവർത്തിക്കുന്നതിനും ഗ്രാമതലത്തിൽ ലഹരി വിരുദ്ധസേന രൂപീകരിക്കുകയാണ് പദ്ധതിയുടെ ലക്ഷ്യം. പദ്ധതിയുടെ ഉദ്ഘാടനം ചക്കുപള്ളം ഗ്രാമവികസന സമിതി പ്രസിഡന്‍റ് ഫാ. സ്റ്റിജോ തേക്കുംകാട്ടിൽ നിർവഹിച്ചു. ഗ്രീൻവാലി ഡെവലപ്മെന്‍റ് സൊസൈറ്റി സെക്രട്ടറി ഫാ. ജോബിൻ പ്ലാച്ചേരിപ്പുറത്ത് അധ്യക്ഷത വഹിച്ചു. യോഗത്തിൽ പ്രോഗാം ഓഫീസർ സിറിയക് പറമുണ്ടയിൽ, പ്രോഗ്രാം കോ- ഓർഡിനേറ്റർ സിസ്റ്റർ ജിജി വെളിഞ്ചായിൽ, മെറിൻ ഏബ്രാഹം, സ്വാശ്രയ സംഘ ഗ്രാമതല ഫെഡറേഷൻ പ്രസിഡന്‍റ് ഉഷ ഗോപി, ലിസി ജോസ് എന്നിവർ പ്രസംഗിച്ചു.

കീരിത്തോടിന്‍റെ വാനമ്പാടിക്ക് നാട് കണ്ണീരോടെ വിടനൽകി

ചെറുതോണി: കീരിത്തോട് ഗ്രാമത്തിലും കഞ്ഞിക്കുഴി എസ്എൻഹൈസ്കൂളിലും ഒരു പൂമ്പാറ്റയെപ്പോലെ പാറി നടന്ന് ഏവരുടെയും സ്നേഹഭാജനമായിരുന്ന അനിൻഡയ്ക്ക് നാട് കണ്ണീരിൽ കുതിർന്ന യാത്രാമൊഴി നൽകി. നേര്യമംഗലം-മണിയമ്പാറ ബസപകടത്തിൽ മരിച്ച അനിൻഡയുടെ ചേതനയറ്റ ശരീരം കീരിത്തോട്ടിലെ വീട്ടിലെത്തിച്ച ചൊവ്വാഴ്ച രാത്രി മുതൽ ഒരു ഗ്രാമം മുഴുവൻ തെക്കുമറ്റം വീട്ടിലേക്കു ഒഴുകിയെത്തുകയായിരുന്നു. ഇന്നലെ രാവിലെ ഇടുക്കി രൂപത ബിഷപ് മാർ ജോൺ നെല്ലിക്കുന്നേൽ വീട്ടിലെത്തി പ്രാർഥിച്ചു. ഡീൻ കുര്യാക്കോസ് എംപി ഉൾപ്പെടെ നൂറുകണക്കിനാളുകൾ വീട്ടിലെത്തി അന്തിമോപചാരമർപ്പിച്ചു. ചൊവ്വാഴ്ച രാവിലെ കോലഞ്ചേരിയിലെ സ്വകാര്യ മെഡിക്കൽ കോളജ് ആശുപത്രിയിൽ ചികിത്സയിൽ കഴിയുന്ന ജ്യേഷ്ഠ സഹോദരി അമാൻഡയെ കാണാനായി കെഎസ്‌ആർടിസി ബസിൽ അമ്മ മിനിയോടൊപ്പം പോകുമ്പോഴായിരുന്നു അപകടം. പിതാവ് തെക്കുമറ്റത്തിൽ ബെന്നി ആറു വർഷങ്ങൾക്കുമുമ്പ് കാൻസർ രോഗം പിടിപെട്ട് മരണമടഞ്ഞിരുന്നു. പിന്നീട് കൂലിപ്പണി ചെയ്തും തൊഴിലുറപ്പിനുപോയുമാണ് മിനി രണ്ടു മക്കളെയും വളർത്തിയത്. മൂത്ത മകൾ അമാൻഡ നഴ്സിംഗ് വിദ്യാർഥിനിയാണ്. അനിൻഡ കഞ്ഞിക്കുഴി എസ്എൻ ഹൈസ്കൂളിൽ നിന്ന് ഈ വർഷം ഒൻപതാം ക്ലാസ് പരീക്ഷയെഴുതി പത്തിലേക്കു പ്രവേശനം നേടിയിരുന്നു. പഠനത്തിൽ മിടുക്കിയായിരുന്ന അനിൻഡ സ്കൂളിലും കത്തിപ്പാറത്തടം സെന്‍റ് ജോർജ് യാക്കോബായ സുറിയാനി പള്ളിയിലും ഗായക സംഘത്തിലംഗമായിരുന്നു. നൃത്തത്തിലും മിടുക്കിയായിരുന്ന അനിൻഡ സ്കൂളിലെ സ്റ്റുഡന്‍റ് പോലീസ് കേഡറ്റുകൂടിയാണ്. പരിചയമുള്ളവരോടെല്ലാം കുശലാന്വേഷണം നടത്തിയിരുന്ന അച്ചൂട്ടി എന്നു വിളിക്കുന്ന അനിൻഡ കത്തിപ്പാറത്തടത്തിലെ ഇടവക പള്ളിയിലും കഞ്ഞിക്കുഴിയിലെ സ്കൂളിലുമെല്ലാം നിറസാന്നിധ്യമായിരുന്നു. നേര്യമംഗലം മണിയമ്പാറയില്‍ കെഎസ്ആര്‍ടിസി ബസ് താഴ്ചയിലേക്ക് പതിച്ച് ഉണ്ടായ അപകടത്തിൽ മരിച്ചത് കീരിത്തോട് സ്വദേശിനി അച്ചൂട്ടിയാണെന്നറിഞ്ഞതോടെ കീരിത്തോട് ഗ്രാമം ശോകമൂകമായിരുന്നു. കുമളിയില്‍നിന്ന് എറണാകുളത്തേക്ക് പോയ ബസാണ് അപകടത്തില്‍പ്പെട്ടത്. ബസ് നിയന്ത്രണം വിട്ടപ്പോൾ പുറത്തേക്കു തെറിച്ചു വീണ അനിൻഡ ബസിനടിയിൽപ്പെടുകയായിരുന്നു. രക്ഷാപ്രവർത്തകർ കോതമംഗലത്തുള്ള സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. അനിൻഡയുടെ മൃതദേഹം പൊതുദർശനത്തിനു ശേഷം കത്തിപ്പാറത്തടം സെന്‍റ് ജോർജ് യാക്കോബായ പള്ളിയിൽ വൻജനാവലിയുടെ സാന്നിധ്യത്തിൽ സംസ്കരിച്ചു.

കാളിയാറിൽ വാഹനാപകടം

കാളിയാർ: ഫാക്ടറി ജംഗ്ഷനിൽ വാഹനം മറിഞ്ഞു. ആർക്കും പരിക്കില്ല. ഇന്നലെ ഉച്ചയ്ക്ക് ഒന്നോടെയായിരുന്നു അപകടം. ആലുവയിൽനിന്നു വണ്ണപ്പുറത്തേക്ക് കെ.പി. നന്പൂതിരി ഉത്പന്നങ്ങളുമായി വന്ന പിക്കപ്പ് വാഹനമാണ് ടയർ പൊട്ടി റോഡിൽ മറിഞ്ഞത്. വാഹനത്തിന്‍റെ ചില്ലും ഓയിലും റോഡിൽ കിടന്നതുമൂലം ഇരുചക്ര വാഹന യാത്രക്കാർ ഉൾപ്പെടെയുള്ളവർ അപകടത്തിൽപ്പെടുന്നതിനു കാരണമായിരുന്നു. നാട്ടുകാർ അറിയിച്ചതിനെ തുടർന്നു തൊടുപുഴയിൽ നിന്നു സീനിയർ ഫയർ ഓഫീസർ എം.എൻ. വിനോദ് കുമാറിന്‍റെ നേതൃത്വത്തിൽ അഗ്നിരക്ഷാ സേന സ്ഥലത്തെത്തി. റോഡിലെ ചില്ലും വാഹനഭാഗങ്ങളും വെള്ളം പന്പ് ചെയ്തു നീക്കിയതിനു ശേഷം കൂടുതൽ സുരക്ഷയ്ക്കായി റോഡിലെ ഓയിലിൽ മരപ്പൊടി വിതറി അപകടാവസ്ഥ ഒഴിവാക്കുകയും ചെയ്തു. ഗ്രേഡ് സീനിയർ ഫയർ ഓഫീസർ ബിബിൻ എ. തങ്കപ്പൻ, ഫയർ ഓഫീസർമാരായ ഷിബിൻ ഗോപി, എഫ്എസ് ഫ്രിജിൻ , ഹോം ഗാർഡ് മാത്യു ജോസഫ് എന്നിവരായിരുന്നു സംഘത്തിൽ ഉണ്ടായിരുന്നത്.

തിരുവത്താഴ സ്മരണയിൽ ഇന്നു പെസഹാ ആചരണം

തൊടുപുഴ: ക്രിസ്തുനാഥൻ കുരിശുമരണത്തിനു മുന്പ് തന്‍റെ പ്രിയ ശിഷ്യരുമൊത്ത് അന്ത്യഅത്താഴത്തിൽ പങ്കെടുത്തതിന്‍റെയും വിശുദ്ധകുർബാന സ്ഥാപിച്ചതിന്‍റെയും അനുസ്മരണം ഇന്നു ക്രൈസ്തവ ദേവാലയങ്ങളിൽ നടക്കും. പെസഹ ആചരണത്തിന്‍റെ ഭാഗമായി ദേവാലയങ്ങളിൽ പ്രത്യേക തിരുക്കർമങ്ങൾ നടത്തും. എളിമയുടെ സന്ദേശം നൽകി ശിഷ്യൻമാരുടെ പാദങ്ങൾ കഴുകിയ ദിവ്യനാഥന്‍റെ മഹനീയ മാതൃക അനുസ്മരിച്ച് ദേവാലയങ്ങളിൽ കാൽകഴുകൽ ശുശ്രൂഷയും വിശുദ്ധകുർബാനയോടനുബന്ധിച്ചു നടക്കും. തുടർന്നു ദിവ്യകാരുണ്യ ആരാധന. വൈകുന്നേരം വീടുകളിൽ പെസഹ ആചരണത്തിന്‍റെ ഭാഗമായി അപ്പംമുറിക്കൽ ശുശ്രൂഷയും തിരുവചന പാരായണവും പാന വായനയും നടത്തും. കുടുംബകൂട്ടായ്മകളുടെ നേതൃത്വത്തിൽ വീടുകൾ സന്ദർശിച്ച് അപ്പംമുറിക്കൽ ശുശ്രൂഷയുമുണ്ടാകും. വൈകുന്നേരം ദിവ്യകാരുണ്യ ആരാധനയ്ക്കു ശേഷം ദേവാലയങ്ങളിലും അപ്പംമുറിക്കൽ ശുശ്രൂഷ നടക്കും. തൊടുപുഴ ടൗണ്‍പള്ളിയിൽ ഇന്നു രാവിലെ 6.30നു വിശുദ്ധകുർബാന, കാൽകഴുകൽ ശുശ്രൂഷ, തുടർന്നു 10 വരെ ദിവ്യകാരുണ്യആരാധന. വൈകുന്നേരം അഞ്ചുമുതൽ ആറുവരെ നടക്കുന്ന ആരാധനയോടെ സമാപിക്കും. മുതലക്കോടം സെന്‍റ് ജോർജ് ഫൊറോനപള്ളിയിൽ രാവിലെ 6.30നു വിശുദ്ധകുർബാന, കാൽകഴുകൽ ശുശ്രൂഷ. തുടർന്ന് ആരാധന.

എഴുകുംവയൽ കുരിശുമല കയറ്റത്തിനുള്ള ഒരുക്കങ്ങൾ പൂർത്തിയായി

കട്ടപ്പന: പ്രാർഥനയുടെയും ഭക്തിയുടെയും നോന്പാചരണത്തിന്‍റെയും ഭാഗമായി കുരിശുമല കയറാൻ ഒരുങ്ങുന്ന ലക്ഷക്കണക്കിന് വിശ്വാസികളെ സ്വീകരിക്കാൻ തയാറായി എഴുകുംവയൽ ഗ്രാമവും ഗ്രാമവാസികളും. ദുഃഖവെള്ളി ആചരണത്തിനും കുരിശുമല കയറ്റത്തിനും ഉള്ള എല്ലാ ഒരുക്കങ്ങളും പൂർത്തിയായതായി ഭാരവാഹികൾ അറിയിച്ചു. വിവിധ കമ്മിറ്റികളിലായി 500ലധികം വോളണ്ടിയർമാർ സജീവമായ പ്രവർത്തനങ്ങളിലാണ്. ദുഃഖവെള്ളിയാഴ്ച കുരിശുമലയിലെത്തുന്ന വിശ്വാസികൾക്ക് നേർച്ചക്കഞ്ഞിയോടൊപ്പം വിതരണം ചെയ്യുന്നതിനുള്ള അച്ചാർ നിർമാണം മാതാക്കളുടെ നേതൃത്വത്തിൽ പൂർത്തിയായി വരുന്നു. തീർഥാടകർക്ക് ആവശ്യമായ യാത്രാസൗകര്യങ്ങളും ഒരുക്കിയിട്ടുണ്ട്. ദുഃഖവെള്ളിയാഴ്ച രാവിലെ അഞ്ചു മണി മുതൽ കട്ടപ്പനയിൽനിന്നു സ്വകാര്യ ബസുകളും കെഎസ്ആർടിസി ബസുകളും കുരിശുമല ജംഗ്ഷനിലേക്ക് സർവീസ് നടത്തും. നെടുങ്കണ്ടത്തുനിന്നു രാവിലെ 6.30 മുതൽ കുരിശുമല ജംഗ്ഷനിലേക്ക് കെഎസ്ആർടിസിയുടെയും സ്വകാര്യ ബസുകളുടെയും സർവീസ് ഉണ്ടായിരിക്കും. കൂടാതെ തോപ്രാംകുടിയിൽ നിന്നും മുരിക്കാശേരി, പാണ്ടിപ്പാറ,കുമളി, ഉപ്പുതറ എന്നിവിടങ്ങളിൽനിന്നും കുരിശുമല ജംഗ്ഷനിലേക്ക് ബസ് സർവീസ് ഒരുക്കിയിട്ടുണ്ട്. മല അടിവാരത്തും ഇടവക ദേവാലയ പരിസരത്തും വാഹനങ്ങൾ പാർക്ക് ചെയ്യുന്നതിനുള്ള സൗകര്യങ്ങൾ ഉണ്ട്. അത്യാവശ്യ മെഡിക്കൽ സൗകര്യവും ആംബുലൻസ് സേവനവും വിശ്രമകേന്ദ്രവും ലഭ്യമാണ്. ഓഫീസ് അനൗണ്‍സ്മെന്‍റ് സൗകര്യങ്ങൾ ക്രമീകരിച്ചിട്ടുണ്ട്. കുടിവെള്ളം, നേർച്ചക്കഞ്ഞിവയ്ക്കാനുള്ള കമ്മിറ്റികൾ എന്നിവ സജീവമായി പ്രവർത്തിക്കും. കട്ടപ്പനയിൽ നിന്നുള്ള വാഹനങ്ങൾ ഇരട്ടയാർ-വലിയതോവാള-അഞ്ചുമുക്ക് വഴിയും നെടുങ്കണ്ടത്തു നിന്നുള്ള വാഹനങ്ങൾ ചേന്പളം-കൗന്തി വഴിയും ഇടുക്കി, തങ്കമണി ഭാഗത്തുനിന്നുമുള്ള വാഹനങ്ങൾ ശാന്തിഗ്രാം-വെട്ടിക്കാമറ്റം വഴിയും അടിമാലി-ചിന്നാർ ഭാഗത്തുനിന്നുള്ള വാഹനങ്ങൾ ഈട്ടിത്തോപ്പ്- പുത്തൻപാലം വഴിയും മഞ്ഞപ്പാറ ഭാഗത്തുനിന്നുള്ള വാഹനങ്ങൾ തൂവൽ-കൈലാസനഗർ വഴിയും മലയടിവാരത്ത് എത്തേണ്ടതാണ്. മാർ ജോണ്‍ നെല്ലിക്കുന്നേൽ നേതൃത്വം നൽകുന്ന കുരിശിന്‍റെ വഴികളിലൂടെയുള്ള പരിഹാര പ്രദക്ഷിണം, ദുഃഖവെള്ളിയാഴ്ച രാവിലെ ഏഴിന് കുരിശുമല അടിവാരത്തുള്ള ടൗണ്‍ കപ്പേളയിൽനിന്ന് ആരംഭിക്കും. തുടർന്ന് തിരുക്കർമങ്ങൾ തീർഥാടക ദേവാലയത്തിൽ മാർ ജോണ്‍ നെല്ലിക്കുന്നേലിന്‍റെ മുഖ്യകാർമികത്വത്തിൽ നടക്കുമെന്നു തീർഥാടക ദേവാലയ ഡയറക്ടർ ഫാ.തോമസ് വട്ടമല, ഫാ. ലിബിൻ വള്ളിയാംതടത്തിൽ, ഫാ. ആന്‍റണി പാലാപുളിക്കൽ എന്നിവർ അറിയിച്ചു. വാഹന സംബന്ധമായ വിവരങ്ങൾക്ക് 9447521827 എന്ന നന്പറിൽ ബന്ധപ്പെടാം.

തൊമ്മൻകുത്തിലെ കുരിശ്: വനംവകുപ്പിന്‍റെ വെല്ലുവിളി അവസാനിപ്പിക്കണമെന്ന് ആംആദ്മി

തൊടുപുഴ: തൊമ്മൻകുത്ത് പള്ളി നാരങ്ങാനം ഭാഗത്ത് സ്ഥാപിച്ച കുരിശ് വനം വകുപ്പ് എടുത്തു മാറ്റിയത് ആ പ്രദേശത്തെ ജനങ്ങളോടു വനംവകുപ്പ് നടത്തുന്ന വെല്ലുവിളിയാണെന്ന് ആം ആദ്മി പാർട്ടി. വനം വകുപ്പ് കാലങ്ങളായി തുടരുന്ന ധിക്കാരപരമായ നിലപാടുകളുടെ തുടർച്ചയാണ് ഈ സംഭവം. ആനയാടിക്കുത്ത് ടൂറിസ്റ്റ് കേന്ദ്രത്തിന്‍റെ മുകൾ ഭാഗത്തുകൂടി പുതിയ റോഡ് കടന്നുപോകുന്പോൾ ആ പ്രദേശത്തിന്‍റെ നിയന്ത്രണം കൈപ്പിടിയിൽ ഒതുക്കാൻ വനംവകുപ്പ് നടത്തുന്ന ഗൂഢാലോചനയുടെ ഭാഗമാണ് കുരിശു പിഴുതെറിഞ്ഞ് ജനങ്ങളെ ഭീഷണിപ്പെടുത്താൻ ശ്രമിക്കുന്നത്. പതിറ്റാണ്ടുകളായി പ്രദേശത്ത് വഴി സൗകര്യം ഇല്ലാതെ കഷ്ടപ്പെട്ടിരുന്ന ജനങ്ങൾക്ക് പ്രതീക്ഷയായി റോഡ് സൗകര്യമുണ്ടായപ്പോൾ കർഷകരുടെ ഭൂമി പിടിച്ചെടുക്കാനുള്ള വനം വകുപ്പിന്‍റെ നടപടികളുടെ തുടക്കമാണ് ഇതിനുപിന്നിൽ. ആം ആദ്മി പാർട്ടി ജില്ലാ പ്രസിഡന്‍റ് അഡ്വ. ബേസിൽ ജോണ്‍, ജാസിൽ കുന്നപ്പള്ളിൽ, റോയ് പ്ലാത്തോട്ടം, ബെന്നി, എ.പി.റോയ് എന്നിവർ തൊമ്മൻകുത്ത് പള്ളി വികാരി ഫാ. ജയിംസ് ഐക്കരമറ്റത്തെ സന്ദർശിച്ച് എല്ലാ പിന്തുണയും വാഗ്ദാനം ചെയ്തു.

കാൽനടയാത്രക്കാരെ "സ്വീകരിക്കാൻ' കലുങ്ക് കെണി

കട്ടപ്പന: മലയോര ഹൈവേയിൽ കട്ടപ്പന ഇരുപതേക്കർ ഭാഗത്ത് നിർമിച്ച കലുങ്ക് കാൽനട യാത്രക്കാർക്ക് ഭീഷണിയാകുന്നു. ഇവിടെ മഴവെള്ളം ഒഴുകിയെത്തുന്ന ഭാഗം കോണ്‍ക്രീറ്റ് ചെയ്യാത്തതാണ് അപകട ഭീഷണിക്കു കാരണം. കട്ടപ്പന താലൂക്ക് ആശുപത്രിയിൽ എത്തുന്നവരും വിദ്യാർഥികളും ഉൾപ്പെടെ നിരവധിപേർ ബസ് കാത്തുനിൽക്കുന്നതിനു സമീപമാണ് വലിയകുഴിയുള്ളത്. കലുങ്കിന് സമീപത്തായി മെഡിക്കൽ സ്റ്റോർ ഉൾപ്പെടെയുള്ള സ്ഥാപനങ്ങളും പ്രവർത്തിക്കുന്നുണ്ട്. കാൽനടയാത്രക്കാർ പലപ്പോഴും തലനാരിഴയ്ക്കാണ് അപകടത്തിൽനിന്നു രക്ഷപ്പെടുന്നത്. അടിയന്തരമായി ഇവിടെ സ്ലാബ് സ്ഥാപിച്ച് അപകടഭീഷണി ഒഴിവാക്കണമെന്ന് നാട്ടുകാർ ആവശ്യപ്പെട്ടു.

പുളിമൂട്ടിൽ സിൽക്സിന്‍റെ 18-ാം വാർഷികത്തിന് പ്രൗഢമായ തുടക്കം

തൊടുപുഴ: പുളിമൂട്ടിൽ സിൽക്സിന്‍റെ 18ാം വാർഷികാഘോഷങ്ങൾക്ക് തുടക്കമായി. ഇടുക്കി ബിഷപ് മാർ ജോണ്‍ നെല്ലിക്കുന്നേൽ ഷോറൂമിന്‍റെ വെഞ്ചരിപ്പ് നിർവഹിച്ചു.ഈസ്റ്റർ ആഘോഷങ്ങളോടനുബന്ധിച്ച് കൂടുതൽ കളക്‌ഷനുകൾ ഷോറൂമിൽ ഒരുക്കിയിട്ടുണ്ട്. പുതിയ കളക്‌ഷനുകൾ എല്ലാ സെക്‌ഷനുകളിൽ നിന്നും ഉപയോക്താക്കൾക്ക് തെരഞ്ഞെടുക്കാം. കുടുംബബജറ്റിന് അനുസരിച്ച് മികച്ച പർച്ചേസ് നടത്തുന്നതിനുള്ള അവസരമാണ് പുളിമൂട്ടിൽ സിൽക്സ് ഒരുക്കിയിരിക്കുന്നത്. കുട്ടികൾക്ക് ആകർഷമായ ആദ്യ കുർബാന വസ്ത്രങ്ങളുടെ വലിയ ശേഖരവും എത്തിച്ചിട്ടുണ്ട്. വെഡ്ഡിംഗ് കളക്‌ഷനുകളുടെ വലിയശേഖരവും സജ്ജീകരിച്ചിട്ടുണ്ട്. ഇതിനു പുറമേ ലേഡീസ് മെൻസ് വെയറുകൾ, വെഡ്ഡിംഗ് സാരികൾ, മെറ്റീരിയലുകൾ, ലെഹങ്കകൾ, ലാച്ചകൾ, ബ്രാൻഡഡ് മെൻസ് കളക്‌ഷൻ, കിഡ്സ് കളക്‌ഷൻ തുടങ്ങിയവയും വാങ്ങാനാകുമെന്ന് മാനേജിംഗ് ഡയറക്ടർ റോയി ജോണ്‍ പുളിമൂട്ടിൽ അറിയിച്ചു.

കണമല അട്ടിവളവിൽ ശബരിമല തീർഥാടക ബസ് മറിഞ്ഞു ; ഒരാൾ മരിച്ചു: 30 പേർക്കു പരിക്ക്

കണമല: സ്ഥിരം അപകടമേഖലയായ കണമല അട്ടിവളവിൽ ശബരിമല തീർഥാടക ബസ് നിയന്ത്രണംവിട്ട് മറിഞ്ഞ് ഒരാൾ മരിച്ചു. 30 പേർക്ക് പരിക്ക്. നാലുപേരുടെ നില അതീവ ഗുരുതരമാണ്. കർണാടക ഹാങ്കൽ താലൂക്ക് സ്വദേശി മാരുതി ഹരിഹരൻ (40) ആണ് മരിച്ചത്. പരിക്കേറ്റവരെ മുക്കൂട്ടുതറ, എരുമേലി, കാഞ്ഞിരപ്പള്ളി ആശുപത്രികളിൽ പ്രാഥമിക ചികിത്സ നൽകിയ ശേഷം കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി. അപകടം നടക്കുമ്പോൾ ബസിൽ 32 പേർ ഉണ്ടായിരുന്നു. ഇന്നലെ രാവിലെ ആറോടെയാണ് അപകടം. കർണാടകയിൽനിന്നുള്ള തീർഥാടകരാണ് അപകടത്തിൽപ്പെട്ടത്. റോഡിൽ മറിഞ്ഞ ബസ് റോഡിലൂടെ നിരങ്ങിപ്പോയി റോഡരികിലെ ക്രാഷ് ബാരിയർ ഇടിച്ചു തകർത്തുകൊണ്ടാണ് കുഴിയിലേക്ക് മറിഞ്ഞത്. താഴെ നിന്നിരുന്ന റബർ മരത്തിൽ തടഞ്ഞതുകൊണ്ട് വാഹനം കൊക്കയിലേക്ക് മറിഞ്ഞില്ല. ഇത് മൂലം വൻ ദുരന്തമാണ് ഒഴിവായത്. അപകടത്തിൽപ്പെട്ട ബസിന്‌ തകരാർ ഉണ്ടായിരുന്നതായി നാട്ടുകാർ പറയുന്നു. രാവിലെ 5.45 ഓടെ എരുത്വാപ്പുഴ കവലയിൽ എത്തിയ ബസ് അവിടെയുണ്ടായിരുന്ന നാട്ടുകാരനോട് ഡ്രൈവർ വണ്ടിക്ക് തകരാർ ഉണ്ടെന്നും അടുത്ത് വർക്ക്ഷോപ് ഉണ്ടോയെന്നും അന്വേഷിച്ചിരുന്നു. ആറോടെ അവിടെയുള്ള ഓട്ടോറിക്ഷക്കാർ കവലയിൽ എത്തുമെന്നും അവരെക്കൊണ്ട് വർക്ക്ഷോപ് മെക്കാനിക്കിനെ എത്തിക്കാമെന്നും പറഞ്ഞെങ്കിലും അതുവരെ സമയമില്ലെന്നും മുന്പോട്ടു പോവുകയായെന്നും പറഞ്ഞാണ് ഡ്രൈവർ വണ്ടി എടുത്തത്. മിനിറ്റുകൾക്കകം അപകടം സംഭവിക്കുകയും ചെയ്തു. അപകടം നടന്നയുടനെ ഓടിയെത്തിയ നാട്ടുകാരാണ് ആദ്യം രക്ഷാപ്രവർത്തനം നടത്തിയത്. പരിക്കേറ്റവരെ അതുവഴി വന്ന കെഎസ്ആർടിസി ബസിൽ കയറ്റിയാണ് ആശുപത്രിയിലേക്ക് ആദ്യം അയച്ചത്. പിന്നീട് എത്തിയ പോലീസും ഫയർ ഫോഴ്‌സും രക്ഷാപ്രവർത്തനം ഏറ്റെടുത്തു. സുരക്ഷക്കായി റോഡരികിൽ സ്ഥാപിച്ചിരുന്ന ക്രാഷ് ബാരിയർ ശരിയായി ഉറപ്പിച്ചിരുന്നില്ലെന്ന് നാട്ടുകാർ ആരോപിച്ചു. ബസ് ഇടിച്ച ഉടനെ ക്രാഷ് ബാരിയർ തകർന്നിരുന്നു. 2008ൽ ഇതേ സ്ഥലത്ത് ഉണ്ടായ ബസ് അപകടത്തിൽ കൊക്കയിലേക്ക് മറിഞ്ഞ ബസിലുണ്ടായിരുന്ന 14 പേർ മരണമടഞ്ഞിരുന്നു.

വിശുദ്ധവാര തിരുക്കർമങ്ങൾ

ആനവിലാസം: സെന്‍റ് ജോർജ് പള്ളിയിൽ പെസഹാ വ്യാഴാഴ്ച രാവിലെ 7.30ന് തിരുക്കർമങ്ങൾ ആരംഭിക്കും. 10 മുതൽ ദിവ്യകാരുണ്യ ആരാധന. ദുഃഖവെള്ളിയാഴ്ച രാവിലെ ഏഴിന് തിരുക്കർമങ്ങൾ ആരംഭിക്കും. രാവിലെ ഒൻപതിന് കുത്തുകൽശേരി കുരിശടിയിലേക്ക് പരിഹാര പ്രദക്ഷിണവും നേർച്ചക്കഞ്ഞിയും. ദുഃഖശനിയാഴ്ച രാവിലെ 6.30ന് തിരുക്കർമങ്ങൾക്ക് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ കാർമികത്വം നൽകും. തുടർന്ന് എട്ടുമുതൽ ഐൻ ഹൈറ്റ് യുവജന സംഗമം. ഈസ്റ്റർ ദിനത്തിൽ വെളുപ്പിന് 2.45 ന് തിരുക്കർമങ്ങൾ ആരംഭിക്കും. രണ്ടാമത്തെ വിശുദ്ധ കുർബാന രാവിലെ ഏഴിന്. വെള്ളാരംകുന്ന്: സെന്‍റ് മേരീസ് പള്ളിയിൽ വിശുദ്ധവാര തിരുക്കർമങ്ങൾക്ക് തുടക്കമായി. പെസഹാ വ്യാഴം വൈകുന്നേരം നാലിന് പെസഹാ തിരുക്കർമങ്ങൾ ആരംഭിക്കും. ഫാ. ജോണ്‍ കൈപ്പള്ളി മാലിയിൽ ഒഎസ്ബി, വികാരി റവ. ഡോ. അഗസ്റ്റിൻ പുതുപ്പറന്പിൽ, ഫാ. ഏബ്രഹാം പാലക്കുടിയിൽ, ഫാ. ആൽബിൻ പാറേക്കാട്ടിൽ എന്നിവർ തിരുക്കർമങ്ങളിൽ പങ്കെടുക്കും. ദുഃഖവെള്ളി തിരുക്കർമങ്ങൾ ഉച്ചകഴിഞ്ഞ് രണ്ടിന് ആരംഭിക്കും. കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ മുഖ്യകാർമികത്വം നൽകും. പള്ളിയിലെ പീഡാനുഭവ തിരുക്കർമങ്ങൾക്ക് ശേഷം നാലിന് വെള്ളാരംകുന്ന് സെന്‍റ് തോമസ് കുരിശുമലയിലേക്ക് പരിഹാര പ്രദക്ഷിണം. ദുഃഖശനി തിരുക്കർമങ്ങൾ രാവിലെ 6.15ന്, വികാരി റവ. ഡോ. അഗസ്റ്റിൻ പുതുപ്പറന്പിൽ കാർമികത്വം വഹിക്കും. ഉയിർപ്പ് തിരുനാൾ തിരുക്കർമങ്ങൾ ഞായർ വെളുപ്പിന് മൂന്നിന്.

–സര്‍ക്കാരിന്‍റെ പത്താം വാര്‍ഷികം: യുഡിഎഫ് ഉപവാസ സമരം നടത്തും

തൊടുപുഴ: ജനങ്ങളുടെ മേല്‍ അനാവശ്യ നിയന്ത്രണങ്ങള്‍ അടിച്ചേല്‍പ്പിച്ചും വാഗ്ദാന ലംഘനം നടത്തിയും മുഖ്യമന്ത്രി പിണറായി വിജയന്‍റെ ഒരു പതിറ്റാണ്ടു കാലത്തെ ഭരണം പൂര്‍ത്തിയാക്കുന്ന സാഹചര്യത്തില്‍ സര്‍ക്കാരിന്‍റെ വഞ്ചനാപരമായ നിലപാടില്‍ പ്രതിഷേധിച്ച് യുഡിഎഫ് ജില്ലാ കമ്മിറ്റിയുടെ ആഭിമുഖ്യത്തില്‍ 28ന് കട്ടപ്പനയില്‍ പ്രതിഷേധ റാലിയും ഉപവാസ സമരവും നടത്തുമെന്ന് ചെയര്‍മാന്‍ ജോയി വെട്ടിക്കുഴിയും കണ്‍വീനര്‍ പ്രഫ. എം.ജെ. ജേക്കബും പത്രസമ്മേളനത്തില്‍ അറിയിച്ചു. 2016 മേയ് 26ന് ജില്ലയിലെ എട്ട് വില്ലേജുകളില്‍ കെട്ടിട നിര്‍മാണ നിരോധനം ഏര്‍പ്പെടുത്തി ആരംഭിച്ച കര്‍ഷകദ്രോഹ നടപടികള്‍ തുടരുകയാണ്. 2019 ഓഗസ്റ്റ് 22ന് ജില്ലയില്‍ മാത്രം സമ്പൂര്‍ണ കെട്ടിട നിര്‍മാണ നിരോധനം ഏര്‍പ്പെടുത്താനും നിര്‍മിച്ചവയുടെ പട്ടയം റദ്ദാക്കി സര്‍ക്കാരിന് ഏറ്റെടുക്കാനുമുള്ള ഉത്തരവിനെതിരേ എല്ലാ രാഷ്‌ട്രീയ കക്ഷികളും ഹര്‍ത്താല്‍ ഉള്‍പ്പെടെയുള്ള സമരപരിപാടികള്‍ നടത്തുകയും ചെയ്തു. 2019 ഡിസംബര്‍ 17ന് ചേര്‍ന്ന സര്‍വകക്ഷി യോഗത്തില്‍ തൊട്ടടുത്ത നിയമസഭാ സമ്മേളനത്തില്‍ ഭൂപതിവ് നിയമം ഭേദഗതി ചെയ്ത് നിര്‍മാണ നിരോധനം പിന്‍വലിക്കുമെന്ന് പിണറായി നല്‍കിയ ഉറപ്പ് ഇതുവരെയും പാലിക്കപ്പെട്ടില്ല. ചട്ട ഭേദഗതിയിലൂടെ പരിഹരിക്കാമായിരുന്ന വിഷയം നാലു വര്‍ഷത്തിനുശേഷം നടത്തിയ നിയമ ഭേദഗതിയിലൂടെ സങ്കീര്‍ണമാക്കി ഇന്നും വ്യക്തതയില്ലാതെ അനിശ്ചിതത്വത്തില്‍ തുടരുകയാണ്. പത്തുചെയിന്‍ പ്രദേശത്തെ മുഴുവന്‍ കര്‍ഷകര്‍ക്കും പട്ടയം നല്‍കാമെന്ന യുഡിഎഫ് തീരുമാനം അട്ടിമറിച്ചു. ജില്ലയ്ക്കായി പ്രഖ്യാപിച്ച 12,000 കോടിയുടെ പ്രത്യേക പാക്കേജില്‍ ഉള്‍പ്പെടുത്തി നാലു വര്‍ഷത്തിനിടെ കര്‍ഷകര്‍ക്ക് നല്‍കിയ ആനുകൂല്യങ്ങളും തുകയും വ്യക്തമാക്കണം, കൂടാതെ ഇടുക്കി പാക്കേജിനെ സംബന്ധിച്ച് ധവളപത്രം പുറപ്പെടുവിക്കാന്‍ സര്‍ക്കാര്‍ തയാറാകണം. പ്രതിപക്ഷ നേതാവ് വി.ഡി. സതീശന്‍റെ നേതൃത്വത്തില്‍ യുഡിഎഫ് ഇടപെടല്‍ നടത്തിയില്ലെങ്കില്‍ വനംവകുപ്പ് ഉദ്യോഗസ്ഥരെ ഏകാധിപതികളാക്കിയുള്ള വന നിയമ ഭേദഗതി സര്‍ക്കാര്‍ പ്രാബല്യത്തില്‍ കൊണ്ടുവരുമായിരുന്നു. വന്യമൃഗ ആക്രമണം നിയന്ത്രിക്കാന്‍ യാതൊരു നടപടിയും സര്‍ക്കാര്‍ സ്വീകരിച്ചിട്ടില്ലെന്നും നേതാക്കള്‍ കുറ്റപ്പെടുത്തി. പത്രസമ്മേളനത്തില്‍ കെ.എം.എ. ഷുക്കൂര്‍, സുരേഷ് ബാബു, എം.കെ. പുരുഷോത്തമന്‍, ടി.എസ്. ഷംസുദ്ദീന്‍, എന്‍.ഐ. ബെന്നി എന്നിവരും പങ്കെടുത്തു.

തൊമ്മന്‍കുത്തിൽ കുരിശ് നീക്കിയതിനെതിരേ പ്രതിഷേധം അലയടിക്കുന്നു

കുരിശിനോടുള്ള അവഹേളനം അംഗീകരിക്കാനാവില്ല തൊടുപുഴ: തൊമ്മന്‍കുത്ത് പള്ളിയുടെ ഭാഗമായി നാരങ്ങാനത്ത് സ്ഥാപിച്ച കുരിശ് പൊളിച്ചു നീക്കിയ വനംവകുപ്പിന്‍റെ നടപടി അംഗീകരിക്കാനാവില്ലെന്നും കുരിശിനെ അവഹേളിക്കുന്ന പ്രവണത വര്‍ധിച്ചുവരുന്നത് പ്രതിഷേധാര്‍ഹമാണെന്നും കത്തോലിക്ക കോണ്‍ഗ്രസ് കോതമംഗലം രൂപത സമിതി. പട്ടയം ഇല്ലാത്ത സ്ഥലങ്ങളെല്ലാം തങ്ങളുടേതാണെന്ന വനംവകുപ്പിന്‍റെ വാദം അംഗീകരിക്കാന്‍ കഴിയില്ല. അറുപതും എഴുപതും വര്‍ഷങ്ങളായി താമസിക്കുന്ന ഭൂമിക്ക് പട്ടയം ലഭിക്കാത്തത് കര്‍ഷകരുടെ തെറ്റല്ല. ജോയിന്‍റ് വെരിഫിക്കേഷന്‍ പൂര്‍ത്തിയാക്കി പട്ടയം നല്‍കേണ്ട ഉത്തരവാദിത്വം സര്‍ക്കാരിനും ഉദ്യോഗസ്ഥര്‍ക്കുമാണ്. തങ്ങളുടെ ഉത്തരവാദിത്വം നിര്‍വഹിച്ചു പട്ടയം നല്‍കാതിരിക്കുകയും പിന്നീട് അങ്ങനെയുള്ള സ്ഥലങ്ങളിലെ നിര്‍മാണ പ്രവര്‍ത്തനങ്ങള്‍ക്ക് തടസം സൃഷ്ടിക്കുകയും ചെയ്യുന്നത് നെറികേടും ജനവഞ്ചനയുമാണെന്ന് കത്തോലിക്ക കോണ്‍ഗ്രസ് കുറ്റപ്പെടുത്തി. ജണ്ട സ്ഥാപിച്ചതിന് പുറത്തുള്ളതും 60 വര്‍ഷങ്ങളായി കൈവശമുള്ളതുമായ സ്ഥലത്ത് കുരിശ് സ്ഥാപിച്ചത് ഉള്‍പ്പെടെയുള്ള നിര്‍മാണ പ്രവര്‍ത്തനങ്ങള്‍ നടത്താന്‍ കഴിയില്ല എന്നുള്ളത് വെല്ലുവിളിയാണ്. ഇതിനടുത്ത് സര്‍ക്കാരിന്‍റെ ഇഎംഎസ് ഭവനപദ്ധതിയില്‍പ്പെടുത്തിയുള്ള വീടുകള്‍ ഉള്‍പ്പെടെ നിര്‍മിച്ചിട്ടുണ്ട്. പട്ടയമുള്ള സ്ഥലവും ഇതിനടുത്തു തന്നെയുണ്ടെങ്കിലും ഭൂരിപക്ഷം പേര്‍ക്കും പട്ടയം ലഭിച്ചിട്ടില്ല. വനംവകുപ്പിന്‍റെ നടപടിയില്‍ വിശ്വാസിസമൂഹത്തിനുണ്ടായ മുറിവുണക്കാന്‍ സര്‍ക്കാര്‍ അടിയന്തരമായി ഇടപെടണമെന്ന് കത്തോലിക്ക കോണ്‍ഗ്രസ് ആവശ്യപ്പെട്ടു. രൂപത പ്രസിഡന്‍റ് സണ്ണി കടൂത്താഴെ അധ്യക്ഷത വഹിച്ചു. ഡയറക്ടര്‍ റവ. ഡോ. മാനുവല്‍ പിച്ചളക്കാട്ട്, ജനറല്‍ സെക്രട്ടറി മാത്തച്ചന്‍ കളപ്പുരക്കല്‍, ട്രഷറര്‍ തമ്പി പിട്ടാപ്പിള്ളില്‍, സി.എ. തോമസ്, യു.വി. ചാക്കോ, ബിന്ദു ജോസ്, മേരി ആന്‍റണി, ഷൈജു ഇഞ്ചക്കല്‍, ജിജി പുളിക്കല്‍, ആന്‍റണി പുല്ലന്‍, ജോര്‍ജ് മങ്ങാട്ട്, അബി കാഞ്ഞിരപ്പാറ, ജോണ്‍ മുണ്ടന്‍കാവില്‍, ജോയ്‌സ് മേരി ആന്‍റണി, മാത്യു അഗസ്റ്റിന്‍, ബേബിച്ചന്‍ നിധീരിക്കല്‍, ബെന്നി തോമസ്, ജോര്‍ജ് കുര്യാക്കോസ്, ജിനു ആന്‍റണി, ജോണി ജേക്കബ്, കെ.എം. ജോസഫ്, ഇ.എം. പൈലി, വി.ജെ. റോജോ, സനില്‍ പി. ജോസ്, അമിതാ ജോണി, ജോസ് കുര്യന്‍, റോയ് മാത്യു, അഞ്ചു ജോസ് എന്നിവര്‍ പ്രസംഗിച്ചു. കുരിശ് നശിപ്പിച്ച നടപടി വെല്ലുവിളി: കേരള കോണ്‍ഗ്രസ്-എം തൊടുപുഴ: തൊമ്മന്‍കുത്ത് സെന്‍റ് തോമസ് പള്ളി സ്ഥാപിച്ച കുരിശ് നശിപ്പിച്ച വനംവകുപ്പിന്‍റെ നടപടി ജനങ്ങളോടുള്ള വെല്ലുവിളിയാണെന്ന് കേരള കോണ്‍ഗ്രസ്-എം തൊടുപുഴ നിയോജകമണ്ഡലം നേതൃയോഗം. 65 വര്‍ഷത്തിലധികമായി കൈവശത്തിലുള്ള ഭൂമിയിലാണ് പള്ളിയുടെ നേതൃത്വത്തില്‍ കുരിശ് സ്ഥാപിച്ചത്. ഈ പ്രദേശത്തെ വസ്തുവിന്‍റെ പട്ടയനടപടികള്‍ അടിയന്തരമായി പൂര്‍ത്തിയാക്കി കൈവശക്കാര്‍ക്ക് പട്ടയം നല്‍കാന്‍ സര്‍ക്കാര്‍ ഉത്തരവിട്ടിരിക്കുന്നതാണ്. കൂടാതെ ജോയിന്‍റ് വെരിഫിക്കേഷനും സര്‍വേ നടപടികളും പൂര്‍ത്തിയായതാണ്. ഈ ഭൂമിയിലാണ് കുരിശ് സ്ഥാപിച്ചത്. ജണ്ടയ്ക്കു പുറത്തുള്ള കൈവശഭൂമിയില്‍ അവകാശം സ്ഥാപിക്കാന്‍ വനംവകുപ്പിന് അവകാശമില്ല. കര്‍ഷകരുടെ കൈവശമുള്ള കൃഷിസ്ഥലങ്ങളും റവന്യു ഭൂമിയും കൈയേറി വനവിസ്തൃതി വര്‍ധിപ്പിക്കാനുള്ള വനംവകുപ്പിന്‍റെ ഗൂഢ നീക്കമാണിത്. ഇത് അംഗീകരിക്കാനാവില്ലെന്ന് നേതാക്കള്‍ പറഞ്ഞു. പ്രഫ. കെ.ഐ. ആന്‍റണി, അഗസ്റ്റിന്‍ വട്ടക്കുന്നേല്‍, റെജി കുന്നംകോട്ട്, ജിമ്മി മറ്റത്തിപ്പാറ, മനോജ് മാമല, ജോണി മുണ്ടയ്ക്കല്‍, സെബാസ്റ്റ്യന്‍ ആടുകുഴിയില്‍, ബിജു ഇല്ലിക്കല്‍, ലിയോ ജോയി എന്നിവര്‍ പ്രസംഗിച്ചു. നേതാക്കള്‍ കുരിശ് തകര്‍ത്ത സ്ഥലത്തിനു പുറമേ തൊമ്മന്‍കുത്ത് പള്ളി വികാരിയെയും സന്ദര്‍ശിച്ച് ചര്‍ച്ച നടത്തി. കുരിശു തകര്‍ത്തത് മതവികാരം വ്രണപ്പെടുത്താന്‍ തൊടുപുഴ: തൊമ്മന്‍കുത്ത് പള്ളിയുടെ അധീനതയിലുള്ളതും വര്‍ഷങ്ങളായി കൈവശത്തില്‍ ഉള്ളതും പട്ടയനടപടികള്‍ക്കായി മുന്നോട്ടു പോകുന്നതുമായ ഭൂമിയില്‍ സ്ഥാപിച്ചിരുന്ന കുരിശ് തകര്‍ത്തത് മതവികാരത്തെ വ്രണപ്പെടുത്താനുള്ള വനം ഉദ്യോഗസ്ഥ ശ്രമമാണെന്ന് കെപിസിസി ന്യൂനപക്ഷ വിഭാഗം നിയോജക മണ്ഡലം കമ്മിറ്റി ആരോപിച്ചു. യോഗം സംസ്ഥാന കോ-ഓര്‍ഡിനേറ്റര്‍ മനോജ് കോക്കാട്ട് ഉദ്ഘാടനം ചെയ്തു. പ്രസിഡന്‍റ് എസ്. ഷാജഹാന്‍ അധ്യക്ഷത വഹിച്ചു. ജില്ലാ സെക്രട്ടറി സണ്ണി മണര്‍കാട് പ്രമേയം അവതരിപ്പിച്ചു. പി.ജെ. തോമസ്, അബ്ദുള്‍ കരിം, പി.എസ്. സെബാസ്റ്റ്യന്‍ തുടങ്ങിയവര്‍ പ്രസംഗിച്ചു. യുഡിഎഫ് സംഘം സന്ദര്‍ശിച്ചു തൊമ്മന്‍കുത്ത്: പള്ളിയുടെ സ്ഥലത്തുനിന്ന കുരിശ് പിഴുത സംഭവത്തില്‍ സെന്‍റ് തോമസ് പള്ളി വികാരിക്കും വിശ്വാസികള്‍ക്കും എല്ലാ പിന്തുണയും നല്‍കുമെന്ന് യുഡിഎഫ് പ്രതിനിധി സംഘം ഉറപ്പു നല്‍കി. ഇത് വനംവകുപ്പിന്‍റെയും പിണറായി സര്‍ക്കാരിന്‍റെയും നീചമായ നടപടിയാണെന്നും കുരിശ് പുനഃസ്ഥാപിച്ച് വിശ്വാസിസമൂഹത്തോടും കോതമംഗലം രൂപതയോടും മാപ്പു പറയാന്‍ സര്‍ക്കാര്‍ തയാറാകണമെന്നും യുഡിഎഫ് ജില്ലാ കണ്‍വീനര്‍ പ്രഫ. എം.ജെ. ജേക്കബ് ആവശ്യപ്പെട്ടു. വണ്ണപ്പുറം പഞ്ചായത്ത് പ്രസിഡന്‍റ് എം.എ. ബിജു, മണ്ഡലം കണ്‍വീനര്‍ ബേബി വട്ടക്കുന്നേല്‍ തുടങ്ങിയവര്‍ ഒപ്പമുണ്ടായിരുന്നു. മാസങ്ങളായി മുള്ളരിങ്ങാട് മേഖലയിലെ ജനങ്ങള്‍ അനുഭവിക്കുന്ന കാട്ടാനശല്യത്തിന് പരിഹാരം കണ്ടെത്താന്‍ വനംവകുപ്പിന് സാധിച്ചിട്ടില്ല. കാട്ടാന ആക്രമണത്തില്‍ യുവാവ് കൊല്ലപ്പെട്ടിട്ട് നാലു മാസം കഴിഞ്ഞിട്ടും ഈ മേഖലയില്‍ പ്രതിരോധ നടപടി സ്വീകരിക്കാന്‍ വനംവകുപ്പ് തയാറായിട്ടില്ലെന്നും യുഡിഎഫ് കുറ്റപ്പെടുത്തി. പിന്തുണയുമായി ബിജെപി വണ്ണപ്പുറം: കുരിശിനെ അവഹേളിച്ച പിണറായി സര്‍ക്കാരിന്‍റെ നടപടി അപലപനീയമാണെന്നും ആരാധനാ സ്വാതന്ത്ര്യവും വിശ്വാസവും സംരക്ഷിക്കാന്‍ എല്ലാവിധ പിന്തുണയും ബിജെപി നല്‍കുമെന്നും മണ്ഡലം ജനറല്‍ സെക്രട്ടറി ജി. സുരേഷ്‌കുമാര്‍, ബിജെപി പഞ്ചായത്ത് കമ്മിറ്റി പ്രസിഡന്‍റ് സിറിള്‍ കെ. ജയിംസ്, കെ.യു. രമ്യാമോള്‍ തുടങ്ങിയവര്‍ പറഞ്ഞു.

സര്‍ക്കാര്‍ നടപടി അപലപനീയം: കത്തോലിക്ക കോണ്‍ഗ്രസ്

പാലാ: ഡല്‍ഹി അതിരൂപതയുടെ നേതൃത്വത്തില്‍ വര്‍ഷങ്ങളായി ഓശാന ഞായറാഴ്ച നടത്താറുണ്ടായിരുന്ന കുരിശിന്‍റെ വഴിക്ക് പോലീസ് അനുമതി നിഷേധിച്ചതില്‍ കത്തോലിക്ക കോണ്‍ഗ്രസ് പാലാ രൂപത സമിതി പ്രതിഷേധിച്ചു. എല്ലാ വര്‍ഷവും ഓശാന ഞായറാഴ്ച ഓള്‍ഡ് ഡല്‍ഹിയിലെ സെന്‍റ് മേരീസ് പള്ളിയില്‍നിന്ന് ആരംഭിച്ച് നഗരത്തിന്‍റെ വിവിധ ഭാഗങ്ങള്‍ കടന്ന് സേക്രഡ് ഹാര്‍ട്ട് കത്തീഡ്രലില്‍ അവസാനിക്കുന്ന രീതിയില്‍ ദൃശ്യാവിഷ്‌കാരത്തോടെ നടത്തിയിരുന്ന കുരിശിന്‍റെ വഴിക്ക് സുരക്ഷാ പ്രശ്‌നങ്ങളുണ്ടാകുമെന്നു കാട്ടി പോലീസ് അനുമതി നിഷേധിക്കുകയായിരുന്നു. ജനാധിപത്യപരമായും ഭരണഘടനാപരമായും അര്‍ഹമായ അവകാശങ്ങള്‍ നിഷേധിക്കരുതെന്ന് സമിതി സര്‍ക്കാരിനോട് ആവശ്യപ്പെട്ടു. രൂപത പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിച്ചു. റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, ജോസ് വട്ടുകുളം, ജോയി കണിപറമ്പില്‍, തുടങ്ങി യവർ പ്രസംഗിച്ചു.

ജില്ലാ സമ്മേളനം നടത്തി

തൊടുപുഴ: കേരള കോ-ഓപ്പറേറ്റീവ് എംപ്ലോയീസ് ഫ്രണ്ട് ജില്ലാ സമ്മേളനവും സര്‍വീസില്‍നിന്നു വിരമിക്കുന്നവര്‍ക്ക് യാത്രയയപ്പും നടത്തി. നഗരസഭാ ചെയര്‍മാന്‍ കെ. ദീപക് ഉദ്ഘാടനവും സഹകരണ ജനാധിപത്യ വേദി ജില്ലാ ചെയര്‍മാന്‍ ജോയി തോമസ് മുഖ്യപ്രഭാഷണവും നടത്തി. ജില്ലാ പ്രസിഡന്‍റ് ബിജു മാത്യു അധ്യക്ഷത വഹിച്ചു. എം. രാജു, ഇമ്മാനുവല്‍ സൈമണ്‍, യു.എം. ഷാജി, ടി.സി. ലൂക്കോസ്, ബിനു കാവുങ്കല്‍, ബിനു കുര്യക്കോസ്, ഷാജന്‍ ജോസഫ്, അനൂപ് ലൂക്കാ തുടങ്ങിയവര്‍ പ്രസംഗിച്ചു.

നായയെ വെട്ടിപ്പരിക്കേല്‍പ്പിച്ച ഉടമയ്‌ക്കെതിരേ കേസ്

തൊടുപുഴ: വിളിച്ചപ്പോള്‍ അടുത്തേക്ക് വരാത്തതിന് വളര്‍ത്തുനായയെ ഉടമ ക്രൂരമായി മര്‍ദിക്കുകയും പിന്നീട് വെട്ടിപ്പരിക്കേല്‍പ്പിച്ച നായയെ തെരുവില്‍ ഉപേക്ഷിക്കുകയും ചെയ്തതായി പരാതി. സംഭവത്തില്‍ മുതലക്കോടം സ്വദേശിക്കെതിരേ തൊടുപുഴ പോലീസ് കേസെടുത്തു. ഞായറാഴ്ച വൈകുന്നേരമാണ് കേസിനാസ്പദമായ സംഭവം. മുതലക്കോടം ഭാഗത്ത് ശരീരമാസകലം മുറിവേറ്റ് ഒരു നായ കിടക്കുന്നതായി കണ്ട നാട്ടുകാര്‍ അനിമല്‍ റെസ്‌ക്യൂ ടീമിനെ വിവരമറിയിച്ചു. തുടര്‍ന്ന് റെസ്‌ക്യൂ ടീം അംഗങ്ങളായ കീര്‍ത്തിദാസ്, മഞ്ജു എന്നിവര്‍ സ്ഥലത്തെത്തി നായയെ കണ്ടെത്തി. തുടര്‍ന്ന് ഇവര്‍ നടത്തിയ അന്വേഷണത്തില്‍ നാട്ടുകാരാണ് നായയ്ക്ക് ഗുരുതരമായി മുറിവേറ്റ സംഭവത്തെപ്പറ്റി വിവരം നല്‍കിയത്. ഉടമ നായയെ കൂടിനുള്ളില്‍ കയറ്റാന്‍ വിളിച്ചപ്പോള്‍ എത്താത്തതിന്‍റെ ദേഷ്യത്തില്‍ കൈയില്‍ കരുതിയിരുന്ന കത്തി ഉപയോഗിച്ച് നായയെ വെട്ടി പരിക്കേല്‍പ്പിക്കുകയായിരുന്നു. നായയുടെ നട്ടെല്ലിനോട് ചേര്‍ന്ന് അഞ്ചും ഇതിനു പുറമേ തലയിലും ആഴത്തിലുള്ള മുറിവുണ്ടായിരുന്നു. നായയെ ആശുപത്രിയിലെത്തിച്ച് അവശ്യമായ ചികിത്സ നല്‍കിയ ശേഷം അഭയകേന്ദ്രത്തിലേക്ക് മാറ്റി. നായയുടെ ശസ്ത്രക്രിയ അടക്കം പൂര്‍ത്തിയാക്കിയിട്ടുണ്ടെന്നും പൂര്‍ണ ആരോഗ്യവാനാകുന്ന മുറയ്ക്ക് നായയെ ദത്തെടുക്കാന്‍ താത്പര്യമുള്ളവര്‍ക്ക് നല്‍കുമെന്നും റെസ്‌ക്യൂ ടീം അംഗങ്ങള്‍ പറഞ്ഞു. അനിമല്‍ റെസ്‌ക്യൂ ടീമിന്‍റെ പരാതിയിലാണ് നായയെ ഉപദ്രവിച്ച ഉടമയ്‌ക്കെതിരേ തൊടുപുഴ പോലീസ് കേസെടുത്തത്.

ട്രൈബല്‍ ഹോസ്റ്റലിന്‍റെ ശോചനീയാവസ്ഥ പരിഹരിക്കണം

ഇടുക്കി: അടിമാലി മന്നാംകാലയില്‍ പ്രവര്‍ത്തിക്കുന്ന പ്രീമെട്രിക് ട്രൈബല്‍ ഹോസ്റ്റലിന്‍റെ ശോചനീയാവസ്ഥ പരിഹരിക്കുന്നതിനുള്ള പദ്ധതി രൂപരേഖയ്ക്ക് പട്ടികജാതി പട്ടികവര്‍ഗ വികസന വകുപ്പ് അധികൃതര്‍ അനുമതിയും ഫണ്ടും ലഭ്യമാക്കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസ്. അടിമാലി ട്രൈബല്‍ ഡെവലപ്മെന്‍റ് ഓഫീസറെ നേരിട്ട് വിളിച്ചുവരുത്തിയാണ് കമ്മീഷന്‍ നിര്‍ദേശം നല്‍കിയത്. ആണ്‍കുട്ടികളുടെ ഹോസ്റ്റല്‍ ഒന്നിലെയും രണ്ടിലെയും ശോചനീയാവസ്ഥ പരിഹരിക്കണമെന്ന പരാതിയിലാണ് ഉത്തരവ്. ട്രൈബല്‍ ഡെവലപ്മെന്‍റ് ഓഫീസര്‍ കമ്മീഷനില്‍ സമര്‍പ്പിച്ച റിപ്പോര്‍ട്ടില്‍ കെട്ടിടങ്ങള്‍ നവീകരിക്കുന്നതിന് 31,50,000ഉം 34,50,000ഉം രൂപയുടെ രണ്ട് എസ്റ്റിമേറ്റുകള്‍ ഭരണാനുമതിക്കും ഫണ്ട് അനുവദിക്കുന്നതിനുമായി 2022 ഡിസംബര്‍ ഒന്നിന് പട്ടികവര്‍ഗ വികസനവകുപ്പ് ഡയറക്ടര്‍ക്ക് അയച്ചതായി പറയുന്നു. എന്നാല്‍ ഡയറക്ടര്‍ തീരുമാനമെടുത്തിട്ടില്ല. കമ്മീഷന്‍ നിര്‍ദ്ദേശാനുസരണം എസ്റ്റിമേറ്റ് സംസ്ഥാനതല വര്‍ക്കിംഗ് ഗ്രൂപ്പില്‍ സമര്‍പ്പിക്കുന്നതിന് നടപടികള്‍ സ്വീകരിച്ചുവരുന്നതായി ട്രൈബല്‍ ഡെവലപ്‌മെന്‍റ് ഓഫീസര്‍ കമ്മീഷനെ അറിയിച്ചു. ഫണ്ട് അനുവദിക്കുന്ന മുറയ്ക്ക് പരാതികള്‍ക്ക് പരിഹാരം കാണും. കുട്ടികള്‍ക്ക് കിടക്ക വാങ്ങി നല്‍കുന്നതിനുള്ള നടപടികള്‍ സ്വീകരിച്ചുവരുന്നുണ്ട്. ഇക്കാര്യത്തില്‍ പട്ടികജാതി പട്ടികവര്‍ഗ ഡയറക്ടര്‍ എത്രയും വേഗം തീരുമാനമെടുക്കണമെന്ന് കമ്മീഷന്‍ നിര്‍ദേശിച്ചു. അനുമതിയും ഫണ്ടും ലഭ്യമാക്കി പൊതുമരാമത്ത് കെട്ടിട വിഭാഗത്തെക്കൊണ്ട് പണി പൂര്‍ത്തീകരിക്കണമെന്ന് ജസ്റ്റീസ് അലക്‌സാണ്ടര്‍ തോമസ് ആവശ്യപ്പെട്ടു. അടിമാലി ബ്ലോക്ക് പഞ്ചായത്ത് അംഗം കെ. കൃഷ്ണമൂര്‍ത്തി സമര്‍പ്പിച്ച പരാതിയിലാണ് നടപടി.

കാന്‍സര്‍ രോഗികള്‍ക്കായി സ്മിത ആശുപത്രിയില്‍ കാര്‍ ടി സെല്‍, ബിഎംടി സെന്‍റര്‍ ആരംഭിച്ചു

തൊടുപുഴ: കാന്‍സര്‍ രോഗികള്‍ക്കായി ദക്ഷിണേന്ത്യയിലെ ആദ്യത്തെ കാര്‍ ടി സെല്‍ തെറാപ്പിയുടെയും ബോണ്‍ മാരോ ട്രാന്‍സ്പ്ലാന്‍റിന്‍റെയും സെന്‍റര്‍ ഓഫ് എക്‌സലന്‍സ് തൊടുപുഴയില്‍ ആരംഭിച്ചു. രാജ്യത്തെ പ്രമുഖ കാന്‍സര്‍ റിസര്‍ച്ച് സ്ഥാപനമായ മുംബൈയിലെ സണ്‍ ആക്‌ട് കാന്‍സര്‍ ഇന്‍സ്റ്റിറ്റ്യൂട്ടിന്‍റെ സഹകരണത്തോടെ തൊടുപുഴയിലെ സ്മിത മെമ്മോറിയല്‍ ആശുപത്രിയില്‍ പ്രവര്‍ത്തനം ആരംഭിച്ച സെന്‍ററിന്‍റെ ഉദ്ഘാടനം ജില്ലാ കളക്ടര്‍ വി. വിഗ്‌നേശ്വരി നിര്‍വഹിച്ചു. സ്മിത ആശുപത്രി ചെയര്‍മാന്മാരായ ഡോ. സുരേഷ് എച്ച്. അഡ്വാനി, ഗീത അഡ്വാനി, സണ്‍ ആക്‌ട് സ്ഥാപകന്‍ ഡോ. വിജയ് പാട്ടീല്‍, സഹ സ്ഥാപകന്‍ ഡോ. അക്ഷയ് കാര്‍പെ, സിഇഒ കുശാഗ്ര ശര്‍മ, സ്മിത ഹോസ്പിറ്റല്‍ സിഇഒ ഡോ. രാജേഷ് നായര്‍, മെഡിക്കല്‍ ഡയറക്ടര്‍ ഡോ. ശീര്‍ഷക് ഘോഷ് എന്നിവര്‍ പ്രസംഗിച്ചു. ടി സെല്‍ റിസപ്റ്റര്‍ തെറാപ്പി, ട്യൂമര്‍ ഇന്‍ഫില്‍ട്രേറ്റിംഗ്, ലിംഫോ സൈറ്റ്, ഗാമ ഡെല്‍റ്റ ടി സെല്‍ പ്ലാറ്റ്‌ഫോം, ജീന്‍ തെറാപ്പി, ഡെഡിക്കേറ്റഡ് പീഡിയാട്രിക് ഓങ്കോളജി പ്രോഗ്രാം തുടങ്ങി വിദേശ രാജ്യങ്ങളില്‍ മാത്രം ലഭ്യമായ കാന്‍സര്‍ ചികിത്സാ സൗകര്യങ്ങളാണ് ഇവിടെ ലഭിക്കുന്നത്. ഏറ്റവും കുറഞ്ഞ ചെലവില്‍ അന്താരാഷ്‌ട്ര നിലവാരത്തില്‍ കാന്‍സര്‍ ചികിത്സ ലഭ്യമാണെന്നതാണ് ഇവിടത്തെ പ്രത്യേകത. സണ്‍ ആക്‌ട് കാന്‍സര്‍ ഇന്‍സ്റ്റിറ്റ്യൂട്ടിന്‍റെ ഇന്ത്യയിലെ അഞ്ചാമത് സെന്‍ററാണ് തൊടുപുഴയില്‍ ആരംഭിച്ചത്.

റോഡ് കുത്തിപ്പൊളിക്കാനെത്തിയ ഉദ്യോഗസ്ഥരെ നാട്ടുകാർ‍ തടഞ്ഞു

മുട്ടം: ജല്‍ ജീവന്‍ മിഷന്‍ പദ്ധതിയുടെ പൈപ്പ് സ്ഥാപിക്കുന്നതിന്‍റെ ഭാഗമായി മാത്തപ്പാറയിലെ റോഡ് കുത്തിപ്പൊളിക്കാന്‍ എത്തിയ വാട്ടര്‍ അഥോറിറ്റി ഉദ്യോഗസ്ഥരെയും കരാറുകാരനെയും ഹെവന്‍ വാലി റെസിഡന്‍റ്സ് അസോസിയേഷന്‍റെ നേതൃത്വത്തില്‍ നാട്ടുകാര്‍ തടഞ്ഞു. മാത്തപ്പാറ പ്രദേശത്ത് ഒരു വര്‍ഷം മുന്‍പ് കുത്തിപ്പൊളിച്ച റോഡിലെ ടാറിംഗ് പുനഃസ്ഥാപിച്ചതിന് ശേഷം മറ്റു ജോലികള്‍ ആരംഭിച്ചാല്‍ മതിയെന്ന് പറഞ്ഞാണ് നിര്‍മാണം തടസപ്പെടുത്തിയത്. ഇന്നലെ രാവിലെ 9.30ഓടെയാണ് റോഡ് കുത്തിപ്പൊളിക്കാന്‍ ജെസിബിയുമായി അധികൃതര്‍ പ്രദേശത്ത് എത്തിയത്. മുട്ടം, കുടയത്തൂര്‍, കരിങ്കുന്നം പഞ്ചായത്തുകളിലേക്ക് ശുദ്ധജല വിതരണത്തിന് പൈപ്പ് സ്ഥാപിക്കുന്നതിന് മാത്തപ്പാറയില്‍ വിവിധ പ്രദേശങ്ങളിലെ കുത്തിപ്പൊളിച്ച റോഡിലെ ടാറിംഗ് പുനഃസ്ഥാപിക്കാന്‍ ഒരു വര്‍ഷം കഴിഞ്ഞിട്ടും അധികൃതര്‍ യാതൊരു നടപടിയും സ്വീകരിച്ചിട്ടില്ല. ഇതിനെതിരേ ഹെവന്‍വാലി റെസിഡന്‍റ്സ് അസോസിയേഷന്‍ അന്നത്തെ ജില്ലാ കളക്ടര്‍, വാട്ടര്‍ അഥോറിറ്റി അധികൃതര്‍ തുടങ്ങിയവര്‍ക്ക് പരാതി നല്‍കിയിരുന്നു. ഇതേത്തുടര്‍ന്ന് രണ്ടാഴ്ചയ്ക്കകം ടാറിംഗ് പുനഃസ്ഥാപിക്കുമെന്ന് അധികൃതര്‍ ഉറപ്പ് നല്‍കിയിരുന്നു. എന്നാല്‍ ഇത് പാഴ്‌വാ ക്കായി മാറി. വലിയ ഗര്‍ത്തങ്ങള്‍ നിറഞ്ഞ റോഡിലൂടെ വാഹനങ്ങള്‍ക്ക് കടന്നുപോകാന്‍ കഴിയാത്ത അവസ്ഥയാണ്. ഇതേത്തുടര്‍ന്ന് പ്രദേശത്തെ ജനങ്ങളില്‍ വ്യാപക പ്രതിഷേധം ഉയരുന്നതിനിടെയാണ് വീണ്ടും റോഡ് കുത്തിപ്പൊളിക്കാന്‍ അധികൃതര്‍ എത്തിയത്. റെസിഡന്‍റ്സ് അസോസിയേഷന്‍ ഭാരവാഹികളായ സുനില്‍ അറയ്ക്കക്കണ്ടത്തില്‍, എം.എ. ഷബീര്‍, പി.പി. ജോസി, സോജി സോമന്‍, സജോ അരിശേരില്‍ എന്നിവര്‍ വാട്ടര്‍ അഥോറിറ്റി അധികൃതരുമായി നടത്തിയ ചര്‍ച്ചയില്‍ മാത്തപ്പാറ പ്രദേശത്തെ ടാറിംഗ് ജോലികള്‍ ഏറ്റവും അടുത്ത ദിവസം ആരംഭിക്കാന്‍ തീരുമാനമെടുത്തതിനെത്തുടര്‍ന്ന് പൈപ്പ് സ്ഥാപിക്കുന്ന ജോലികള്‍ ആരംഭിക്കുകയായിരുന്നു.

വിഭാഗീയതയ്ക്കെതിരേ ഒരുമയുടെ സാക്ഷ്യം നൽകാനാകണം: മാർ നെല്ലിക്കുന്നേൽ

രാജകുമാരി: വിഭാഗീയതയ്ക്കെതിരേ ഒരുമയുടെ ക്രൈസ്തവ സാക്ഷ്യം നൽകാൻ കഴിയണമെന്ന് ഇടുക്കി ബിഷപ് മാർ ജോണ്‍ നെല്ലിക്കുന്നേൽ. രാജകുമാരി ദൈവമാത തീർഥാടന ദേവാലയത്തിൽ ഓശാനത്തിരുക്കർമങ്ങൾക്ക് കാർമികത്വം വഹിച്ച് സന്ദേശം നൽകുകയായിരുന്നു അദ്ദേഹം. വിഭാഗീയതയുടെയും ഒറ്റ തിരിയലിന്‍റെയും അനുഭവങ്ങൾ സമൂഹത്തിൽ വളരുന്ന സാഹചര്യമാണ് ഇന്നുള്ളത്. കുടുംബങ്ങളിലും സമൂഹത്തിലും മനുഷ്യത്വപരമായ ഒരുമയോടെ സന്ദേശം നൽകാൻ എല്ലാവരും പരിശ്രമിക്കണം. ഭിന്നതയാണ് കുടുംബങ്ങളുടെയും സമൂഹത്തിന്‍റെയും തകർച്ചയ്ക്ക് കാരണം. ഇതിനെതിരേ ഐക്യത്തിന്‍റെയും ഒരുമയുടെയും സാക്ഷ്യം നൽകാൻ കൂട്ടായ പരിശ്രമം ആവശ്യമാണെന്നും ബിഷപ് പറഞ്ഞു. മോണ്‍.ഏബ്രഹാം പുറയാറ്റ്, ഫാ. ജോസഫ് തച്ചുകുന്നേൽ, ഫാ. അമൽ മണിമലക്കുന്നേൽ, ഫാ. അലക്സ് ചേർന്നംകുളം എന്നിവർ സഹകാർമികരായിരുന്നു.

ഭക്തിയുടെ നിറവിൽ ഓശാന ഞായർ ആചരണം

തൊടുപുഴ: സ്വർഗീയസ്നേഹത്തിന്‍റെ മധുരമൊഴികൾ പകർന്നുനൽകി കാരുണ്യത്തിന്‍റെ നേർസാക്ഷ്യമായി മാറിയ യേശുനാഥൻ വിനയത്തിന്‍റെ മാതൃക നല്കി കഴുതക്കുട്ടിയുടെ പുറത്ത് ജറൂസലെമിലേക്ക് നടത്തിയ പ്രവേശനത്തിന്‍റെ ഓർമയുമായി വിശ്വാസികൾ ഓശാന ഞായർ ആചരിച്ചു. ജില്ലയിലെ വിവിധ ദേവാലയങ്ങളിൽ നടന്ന ഭക്തിനിർഭരമായ ചടങ്ങിൽ കുരുത്തോലകൾ കൈയിലേന്തി നടത്തിയ പ്രദക്ഷിണം വിശ്വാസചൈതന്യം വിളിച്ചോതുന്നതായി. വിവിധ തീർഥാടന കേന്ദ്രങ്ങളിലും വിശുദ്ധ കുർബാന ഉൾപ്പെടെയുള്ള തിരുക്കർമങ്ങളിൽ ധാരാളം പേർ പങ്കാളികളായി.

കണ്ണാടിപ്പായയ്ക്ക് ഭൗമ സൂചികാപദവി

ചെറുതോണി: ആദിവാസികൾ നെയ്തെടുക്കുന്ന പുതുതലമുറയ്ക്ക് പരിചിതമല്ലാത്ത കണ്ണാടിപ്പായയ്ക്ക് ഭൗമസൂചിക പദവി ലഭിച്ചു. കഞ്ഞിക്കുഴി പഞ്ചായത്തിലെ വെണ്‍മണി പാലപ്ലാവ് ആദിവാസി കോളനിയിലെ ഉൗരാളി വിഭാഗത്തിൽപ്പെട്ട ആദിവാസികളാണ് കണ്ണാടിപ്പായ നെയ്തെടുക്കുന്നത്. ജില്ലയിലേക്ക് ഭൗമസൂചിക പദവിയെത്തുന്നത് ഇതു രണ്ടാംതവണയാണ്. കഴിഞ്ഞവർഷം വട്ടവട വെളുത്തുള്ളിക്കും ഭൗമസൂചിക പദവി ലഭിച്ചിരുന്നു. കേരളത്തിലെ ആദിവാസി വിഭാഗത്തിന് ആദ്യമായാണ് ഈ അംഗീകാരം ലഭിക്കുന്നത്. പാലപ്ലാവ് ആദിവാസി കോളനിയിൽ നൂറോളം ഉൗരാളി കുടുംബങ്ങളാണുള്ളത്. ഇതിൽ അറുപതോളം കുടുംബങ്ങളിൽ കണ്ണാടിപ്പായ നെയ്യുന്നുണ്ട്. ഇവരുടെ കുലത്തൊഴിലായ കണ്ണാടിപ്പായനിർമാണം ഉൗരാളി കുടുംബങ്ങളിൽപ്പെട്ട പ്രായമായ സ്ത്രീകൾ മാത്രമെ ഇവിടെ ചെയ്യുന്നുള്ളു. വനത്തിൽനിന്ന് പ്രത്യേകയിനം ഈറ്റ കൊണ്ടുവന്നാണ് കണ്ണാടിപ്പായ നെയ്യുന്നത്. പഴയ കാലത്ത് രാജാവിനെ മുഖം കാണിക്കാൻ ചെല്ലുന്പോൾ ആദിവാസികൾ കാണിക്കയായി സമർപ്പിച്ചിരുന്നത് കണ്ണാടി പ്പായയായിരുന്നു. ഏറെ മിനുസമുള്ളതും സൂര്യപ്രകാശത്തെ പ്രതിഫലിപ്പിക്കുന്നതുമായതിനാലാണ് ഇതിനെ കണ്ണാടിപ്പായ എന്നു വിളിക്കുന്നത്. ആറടി നീളവും നാലടി വീതിയുമുള്ളതാണ് ഒരു പായ. ഒരു പായ നെയ്തെടുക്കാൻ ഒരുമാസം വേണ്ടി വരും. 25,000 രൂപ മുതൽ 30,000 രൂപ വരെ ഒരു പായയ്ക്ക് വില ലഭിക്കും. ഏറെ ക്ഷമയും സൂക്ഷ്മതയും ആവശ്യമുള്ള തൊഴിലാണിത്. പ്രായം ചെന്നവർക്കേ ഇതു നെയ്തു പരിചയമുള്ളു. പരിശീലനം നൽകി പ്രോൽസാഹിപ്പിക്കാൻ അധികൃതർ തയാറാകാത്തതിനാൽ ഇപ്പോഴത്തെ തലമുറയ്ക്ക് പായ നെയ്യുന്നതിൽ പ്രാവീണ്യവുമില്ല. പ്രായമായവർ നാടുനീങ്ങുന്നതോടെ കണ്ണാടിപ്പായയും വിസ്മൃതിയിലാകുമെന്ന ആശങ്കയുമുണ്ട്. ഒരു കണ്ണാടിപ്പായ 10 വർഷം വരെ കേടുകൂടാതെയിരിക്കും. വനഗവേഷണകേന്ദ്രത്തിലെ ശാസ്ത്രജ്ഞന്മാരുടെയടക്കം കഴിഞ്ഞ ഒരു വർഷത്തെ പരിശ്രമത്തിന്‍റെ ഫലമായാണ് കഞ്ഞിക്കുഴിയിലെ ആദിവാസികൾ നെയ്തെടുക്കുന്ന കണ്ണാടിപ്പായയ്ക്ക് ഭൗമസൂചികാ പദവി ലഭിക്കുന്നത്.

ഇലവീഴാപൂഞ്ചിറയിൽ വഴിയോര വിശ്രമകേന്ദ്രം ഒരുങ്ങും

മൂലമറ്റം: ഇലവീഴാപ്പൂഞ്ചിറയിൽ വിനോദസഞ്ചാരികൾക്കായി വഴിയോര വിശ്രമ കേന്ദ്രം ഒരുങ്ങുന്നു. കുടയത്തൂർ പഞ്ചായത്തിന്‍റെ വർഷങ്ങളായുള്ള പരിശ്രമമാണ് യാഥാർഥ്യമാകുന്നത്. ഇലവീഴാപ്പൂഞ്ചിറയിൽ സർക്കാരിന്‍റെ ടേക്ക് എ ബ്രേക്ക് പദ്ധതിക്കായി ജില്ലാ പഞ്ചായത്ത് നേരത്തേ 35 ലക്ഷം രൂപ അനുവദിച്ചിരുന്നു. എന്നാൽ ഭൂമി സംബന്ധിച്ച് കുടയത്തൂർ-മൂന്നിലവ് പഞ്ചായത്തുകൾ തമ്മിൽ തർക്കമുണ്ടായതോടെ പദ്ധതി തടസപ്പെട്ടു. പഞ്ചായത്തിന്‍റെ അതിർത്തി നിർണയിക്കാൻ കഴിയാത്തതായിരുന്നു പ്രശ്നം. തുടർന്ന് കുടയത്തൂർ പഞ്ചായത്ത് റവന്യൂ വകുപ്പുമായി ബന്ധപ്പെട്ട് റീ സർവേ നടപടികൾ പൂർത്തിയാക്കി. തുടർന്ന് പത്തു സെന്‍റ് സ്ഥലം ജില്ലാ ഭരണകൂടം വഴിയോര വിശ്രമകേന്ദ്രത്തിനായി പഞ്ചായത്തിന് വിട്ടുനൽകി. ടെൻഡർ നടപടി ആരംഭിച്ചതായി ജില്ലാ പഞ്ചായത്തംഗം എം.ജെ. ജേക്കബ് പറഞ്ഞു. വിശ്രമകേന്ദ്രത്തിനു പുറമേ കോഫിഷോപ് , ശൗചാലയം, പാർക്കിംഗ് ഏരിയ എന്നിവ ഇവിടെ ഒരുക്കുമെന്ന് പഞ്ചായത്ത് പ്രസിഡന്‍റ് കെ.എൻ. ഷിയാസ്, അംഗം ആഷ റോജി എന്നിവർ പറഞ്ഞു.

കുരിശ് നശിപ്പിച്ച സംഭവം: നടപടി വേണം ഡീൻ കുര്യാക്കോസ് എംപി

തൊടുപുഴ: തൊമ്മൻകുത്ത് ഇടവക നാരങ്ങാനത്ത് സ്ഥാപിച്ച കുരിശ് നശിപ്പിച്ച വനംവകുപ്പ് നടപടി പ്രതിഷേധകരമാണെന്ന് ഡീൻ കുര്യാക്കോസ് എംപി പറഞ്ഞു. 60 വർഷത്തിലധികമായി കൈവശമുള്ള ഭൂമിയിലാണ് കുരിശ് സ്ഥാപിച്ചത്. ഇതിനെ കൈയേറ്റമായി ചിത്രീകരിക്കുന്നത് ശരിയല്ല. പട്ടയ നടപടികൾ പൂർത്തീകരിക്കുന്നതിനായി ജോയിന്‍റ് വേരിഫിക്കേഷൻ നടത്താൻ സർക്കാർ ഉത്തരവുള്ളതുമാണ്. ഈ ഘട്ടത്തിൽ കൈവശഭൂമിയിൽ അവകാശം സ്ഥാപിക്കാൻ വനംവകുപ്പിന് അവകാശമില്ല. കൂടുതൽ കൃഷി സ്ഥലങ്ങളും റവന്യൂ ഭൂമിയും വനമാക്കി മാറ്റാനുള്ള ഗൂഢാലോചനയാണ് ഇതിനുപിന്നിൽ. ഏതെങ്കിലും കൈയേറ്റക്കാരൻ സർക്കാർ ഭൂമിയിൽ കുരിശ് സ്ഥാപിക്കുന്നതും 60 വർഷമായി കൈവശ അവകാശമുള്ള ജണ്ടയ്ക്ക് വെളിയിലുള്ള സ്ഥലത്ത് ഇടവക ദേവാലയം ആരാധനയ്ക്കായി കുരിശ് സ്ഥാപിക്കുന്നതും രണ്ടായി കാണണം. പരിപാവനമായ കുരിശിനെ അപമാനിച്ചവർക്കെതിരേ നടപടി സ്വീകരിക്കണമെന്നും ഡീൻ ആവശ്യപ്പെട്ടു.

വഴിത്തല സഹ. ബാങ്ക് മിനി സൂപ്പർമാർക്കറ്റ് ഉദ്ഘാടനം

വഴിത്തല: സഹകരണ ബാങ്ക് ശതാബ്ദി ആഘോഷങ്ങളുടെ ഭാഗമായി നവീകരിച്ച മിനി സൂപ്പർ മാർക്കറ്റിന്‍റെയും നീതി മെഡിക്കൽ സ്റ്റോറിന്‍റെയും ഉദ്ഘാടനം മന്ത്രി വി.എൻ. വാസവൻ നിർവഹിച്ചു. സഹകരണ പ്രസ്ഥാനത്തെ ബാങ്കിംഗ് മേഖലയ്ക്കൊപ്പം കർഷകർക്കും സാധാരണക്കാർക്കും ഉപകരിക്കുന്ന വിധത്തിൽ കാർഷിക വിളകൾ സംഭരിച്ചു മൂല്യ വർധിത ഉത്പ്പനങ്ങളാക്കി മാറ്റുന്നത് ബാങ്കിനും കർഷകർക്കും ഒരുപോലെ ഉപകാരപ്പെടുമെന്ന് അദ്ദേഹം പറഞ്ഞു. പി.ജെ. ജോസഫ് എംഎൽഎ അധ്യക്ഷത വഹിച്ചു. ബാങ്ക് പ്രസിഡന്‍റ് ക്ലമന്‍റ് ഇമ്മാനുവേൽ, സർക്കിൾ സഹകരണ യൂണിയൻ ചെയർമാൻ വി.വി. മത്തായി, പുറപ്പുഴ പഞ്ചായത്ത് പ്രസിഡന്‍റ് എ.കെ. ഭാസ്കരൻ, മണക്കാട് പഞ്ചായത്ത് പ്രസിഡന്‍റ് പി.എസ്. ജേക്കബ്, ജോയിന്‍റ് രജിസ്ട്രർ റൈനു തോമസ്, പി.സി. ഏബ്രഹാം, ടോണി കുര്യാക്കോസ്, ജോണ്‍സൻ ജോസഫ്, ജോ സെബാസ്റ്റ്യൻ, സോമി വട്ടക്കാട്ട്, എൻ. റെജി എന്നിവർ പ്രസംഗിച്ചു.

ഓണ്‍ലൈൻ മുദ്രപത്രം: മന്ത്രിക്ക് പ്രിന്‍റേഴ്സ് അസോസിയേഷൻ നിവേദനം നൽകി

തൊടുപുഴ: മുദ്രപത്രം ഓണ്‍ലൈൻ സംവിധാനത്തിലേക്ക് മാറ്റിയതു ആവശ്യക്കാരെ കടുത്ത ദുരിതത്തിലാക്കിയതായി കേരള പ്രിന്‍റേഴ്സ് അസോസിയേഷൻ ചൂണ്ടിക്കാട്ടി. പ്രായമായവർക്കും സ്വന്തമായി മൊബൈൽ ഫോണ്‍ ഉപയോഗിക്കാത്തവർക്കുമാണ് കൂടുതൽ ദുരിതം. മുദ്രപത്രം വിൽക്കുന്ന സ്ഥാപനങ്ങളിൽ നീണ്ട ക്യൂ പലപ്പോഴും ദൃശ്യമാണ്. മുദ്രപത്രം വാങ്ങാനെത്തുന്നവരുടെ ഫോണിലേക്ക് ഒടിപി വരാനുള്ള കാലതാമസം സ്ഥാപന നടത്തിപ്പുകാരെയും ഒരുപോലെ വലയ്ക്കുകയാണ്. നെറ്റ്‌വർക്ക് ലഭിക്കാത്തതും പ്രതിസന്ധി സൃഷ്ടിക്കുന്നുണ്ട്. ഫോണ്‍ നന്പർ മാറിപ്പോയി പലർക്കും പണവും നഷ്ടപ്പെടുന്നുണ്ട്. മുദ്രപത്രവിൽപ്പന കൂടുതൽ ലഘൂകരിക്കണമെന്നാവശ്യപ്പെട്ട് കേരള പ്രിന്‍റേഴ്സ് അസോസിയേഷന്‍റെ നേതൃത്വത്തിൽ മന്ത്രി കടന്നപ്പള്ളി രാമചന്ദ്രന് നിവേദനം നൽകി. കെപിഎ ജില്ലാ പ്രസിഡന്‍റ് ടോം ചെറിയാൻ, തൊടുപുഴ മേഖലാ സെക്രട്ടറി ബിജി കോട്ടയിൽ എന്നിവരുടെ നേതൃത്വത്തിലാണ് നിവേദനം നൽ്കിയത്.

തേവാരംമെട്ട്-തേവാരം റോഡിനായി ജനകീയാവശ്യം ശക്തം

നെടുങ്കണ്ടം: ദക്ഷിണേന്ത്യയിലെ പ്രധാന നഗരങ്ങളായ കൊച്ചിയെയും മധുരയെയും കുറഞ്ഞ ദൂരത്തിൽ ബന്ധിപ്പിക്കുന്ന നെടുങ്കണ്ടം തേവാരംമെട്ട്-തേവാരം റോഡിനായുള്ള ജനകീയാവശ്യം വീണ്ടും സജീവമാകുന്നു. തമിഴ്നാടിന്‍റെ ഭാഗമായ മൂന്നര കിലോമീറ്ററോളം റോഡ് ഗതാഗതയോഗ്യമാക്കി പാത പുനരുജ്ജീവിപ്പിക്കണമെന്ന ആവശ്യത്തിന് ആറു പതിറ്റാണ്ട് പഴക്കമുണ്ട്. തമിഴ്നാട് വനംവകുപ്പിന്‍റെ എതിർപ്പാണ് മലയോര ജനതയുടെ ഈ സ്വപ്ന പാതയ്ക്ക് മേൽ കരിനിഴൽ വീഴ്ത്തുന്നത്. ഹൈറേഞ്ചിലെ കുടിയേറ്റ കാലത്ത് ഏറെ സജീവമായിരുന്ന പാതയാണ് നെടുങ്കണ്ടത്തിനു സമീപം തേവാരംമെട്ടിൽനിന്നു തേവാരത്തേക്കുള്ളത്. മുന്പ് ചരക്കുനീക്കം വരെ നടന്നിരുന്ന പാത തമിഴ്നാട് അടയ്ക്കുകയായിരുന്നു. എതിർപ്പുമായി വനംവകുപ്പ് 1964ൽ എംജിആർ തമിഴ്നാട് മുഖ്യമന്ത്രി ആയിരുന്നപ്പോഴാണ് ഈ റോഡ് നിർമാണത്തിന് പദ്ധതി തയാറാക്കിയത്. എന്നാൽ, തമിഴ്നാട് വനംവകുപ്പിന്‍റെ എതിർപ്പ് മൂലം പദ്ധതി നടപ്പാക്കാനായില്ല.പിന്നീട് 1981-ൽ റോഡിന്‍റെ നിർമാണോദ്ഘാടനം നടത്തിയിരുന്നു. തുടർന്ന് പല തവണ റോഡ് നിർമിക്കുമെന്ന പ്രഖ്യാപനം ഉണ്ടായെങ്കിലും ഒന്നും നടപ്പായില്ല. 2018-ൽ ശബരിമല തീർഥാടകർക്ക് സൗകര്യം ഒരുക്കുന്നതിനായി പാത പുനരുജ്ജീവിപ്പിക്കാൻ പദ്ധതി തയാറാക്കിയിരുന്നു. ആറരക്കോടി രൂപ ചെലവഴിച്ച് തമിഴ്നാട് പൊതുമരാമത്ത് വകുപ്പ് സാധ്യതാപഠനം നടത്തുകയും 25 കോടിയുടെ എസ്റ്റിമേറ്റ് ദേശീയപാതാ വിഭാഗത്തിന് കൈമാറുകയും ചെയ്തു. എന്നാൽ തമിഴ്നാട് വനംവകുപ്പ് പദ്ധതിക്ക് അനുമതി നൽകിയില്ല. ഒടുവിൽ കഴിഞ്ഞ വർഷം തമിഴ്നാട് വനം വകുപ്പ് റോഡ് തുറക്കുമെന്ന് പ്രഖ്യാപിച്ചെങ്കിലും അതും യാഥാർഥ്യമായില്ല. തമിഴ്നാട്ടിലേക്ക് കുറഞ്ഞ ദൂരം ഹൈറേഞ്ചിലെ മറ്റ് അന്തർ സംസ്ഥാന പാതകളെ അപേക്ഷിച്ച്, കുറഞ്ഞ ദൂരത്തിൽ തമിഴ്നാട്ടിൽ എത്താമെന്നതാണ് ഈ പാതയുടെ പ്രത്യേകത. നിലവിൽ ബോഡിമെട്ടിൽ നിന്നു വലിയ വളവുകൾ കടന്നുവേണം ബോഡി നായ്ക്കന്നൂരിലെത്താൻ. കൂടാതെ കന്പംമെട്ടിൽനിന്നു കന്പത്തെത്താൻ 12 കിലോമീറ്ററോളം ദൂരം സഞ്ചരിക്കണം. എന്നാൽ ദിർദിഷ്ട പാത യാത്രാദൂരവും സമയവും കുറയ്ക്കും. നേരത്തേ ജീപ്പ് സഞ്ചരിച്ചിരുന്ന പാത ഇന്ന് കുറ്റിക്കാടുകൾ മൂടിയ നിലയിലാണ്. റോഡ് യാഥാർഥ്യമായാൽ കൊച്ചിയും മധുരയും തമ്മിലുള്ള റോഡ് ഗതാഗതം കുറഞ്ഞ ദൂരത്തിൽ സാധ്യമാകും. ഇതിനു പുറമേ നെടുങ്കണ്ടത്തുനിന്നു 40 കിലോമീറ്റർ സഞ്ചരിച്ചാൽ തേനി മെഡിക്കൽ കോളേജിൽ എത്താം. കോട്ടയം മെഡിക്കൽ കോളേജിൽ എത്തിച്ചേരുന്നതിന്‍റെ പകുതി സമയമുണ്ടെങ്കിൽ ഈ വഴി തേനിയിൽ എത്തിച്ചേരാം. 120 കിലോമീറ്റർ സഞ്ചരിച്ചാൽ മധുര, ദിണ്ടിഗൽ എന്നീ സ്ഥലങ്ങളിൽ എത്തിച്ചേരാനും കഴിയും. റോഡ് യാഥാർഥ്യമാക്കാൻ കേന്ദ്ര വനം പരിസ്ഥിതി മന്ത്രാലയം ഇടപെടണമെന്ന ആവശ്യവുമായി കേരളം നിരവധി തവണ തമിഴ്നാടിനെ സമീപിക്കുകയും റോഡിന്‍റെ പ്രാധാന്യത്തെപ്പറ്റി കേരള നേതാക്കൾ തമിഴ്നാടിനെ ബോധ്യപ്പെടുത്തുകയും ചെയ്തിരുന്നു. ടൂറിസം രംഗത്ത് കുതിപ്പേകും പാത യാഥാർഥ്യമായാൽ ജില്ലയുടെ തന്നെ വാണിജ്യ, വ്യാവസായിക, വിദ്യാഭ്യാസ രംഗങ്ങളിൽ വലിയ മുന്നേറ്റമുണ്ടാക്കാൻ സാധിക്കുമെന്നാണ് വിലയിരുത്തൽ. തമിഴ്നാട് വഴി കേരളത്തിലെത്തുന്ന ഇതര സംസ്ഥാനങ്ങളിലെ അയ്യപ്പഭക്തർക്കും വലിയ അനുഗ്രഹമാകും. മറ്റ് സംസ്ഥാനങ്ങളിൽ പഠിക്കുന്ന വിദ്യാർഥികൾക്കും പാത ഗുണകരമാകും. തമിഴ്നാട്, കർണാടക, ആന്ധ്ര, തെലങ്കാന എന്നിവിടങ്ങളിൽ നിന്നെത്തുന്ന അയ്യപ്പ ഭക്തരുടെ വാഹനങ്ങൾ തേനി, തോരം വഴി കേരളത്തിലേക്ക് തിരിച്ചുവിടുകയും കോന്പയാർ മുണ്ടിയെരുമ കട്ടപ്പന വഴി കുട്ടിക്കാനത്ത് പ്രവേശിപ്പിക്കാനും സാധിക്കും. വിനോദസഞ്ചാര കേന്ദ്രങ്ങളായ രാമക്കൽമേട്, ചതുരംഗപ്പാറ, മാൻകുത്തിമേട് തുടങ്ങിയ പ്രദേശങ്ങളിലെ ടൂറിസം വികസനത്തിനും കരുത്തേകും. കർഷകർക്ക് തങ്ങളുടെ ഉത്പന്നങ്ങൾ തമിഴ്നാട്ടിൽ വിറ്റഴിക്കാനും തമിഴ്നാട്ടിൽനിന്ന് വിലക്കുറവിൽ പല സാധനങ്ങളും കേരളത്തിലേക്ക് എത്തിക്കാനും കഴിയും. റോഡ് നിർമാണം ആരംഭിക്കണമെന്നാവശ്യപ്പെട്ട് തമിഴ്നാട്ടിൽ ആക്‌ഷൻ കൗണ്‍സിൽ രൂപീകരിച്ചിട്ടുണ്ട്.

വിഷു ആഘോഷം: തിരക്കിൽ മുങ്ങി നാടും നഗരവും

തൊടുപുഴ: മലയാളികൾക്ക് വിളവെടുപ്പിന്‍റെയും സന്പത‌്സമൃദ്ധിയുടേയും ഉത്സവമായ വിഷു ആഘോഷത്തിനായി ജനങ്ങൾ വിപണികളിലേയ്ക്കിറങ്ങിയപ്പോൾ തിരക്കിൽ മുങ്ങി നാടും നഗരവും. പുലർച്ചേ കണ്‍നിറയെ കാണുന്നതിനായുള്ള വിഷുക്കണിയൊരുക്കാനും സദ്യവട്ടം തയാറാക്കാനും ആവശ്യമായ സാധനങ്ങൾ വാങ്ങാൻ കുടുംബസമേതമാണ് ജനങ്ങൾ ടൗണുകളിലെത്തിയത്. വിഷുവിന്‍റെ മുന്നൊരുക്കളുടെ ഭാഗമായി ഇന്നലെ രാവിലെ മുതൽ തന്നെ നഗര ഗ്രാമ വ്യത്യാസമില്ലാതെ കണിയൊരുക്കാനുള്ള സാധനങ്ങൾ വാങ്ങാനുള്ള വലിയ തിരക്കാണ് അനുഭവപ്പെട്ടത്. വിഷുക്കോടിയെടുക്കുന്നതിനും മറ്റുമായി തുണിക്കടകളിലും തിരക്കുതന്നെ. പഴങ്ങളുടെയും പച്ചക്കറിയുടെയും പടക്കങ്ങളുടെയും താത്കാലിക കടകളും ടൗണുകളിൽ സജീവമായിരുന്നു. കണിക്കൊന്ന പൂക്കൾ വില്പനയ്ക്കെത്തിച്ച് കച്ചവടക്കാരും നഗരത്തിൽ സജീവ സാന്നിധ്യമായി. കൊന്നപ്പൂ ഒരു പിടിക്ക് 50 രൂപ വരെയായിരുന്നു വില. യുവാക്കളും കുട്ടികളുമായിരുന്നു പ്രധാനമായും കൊന്നപ്പൂക്കളുടെ വില്പനക്കാർ. പല പാതയോരങ്ങളിലും കൊന്നപ്പൂക്കൾ വിൽക്കുന്ന കുട്ടികളെയും യുവാക്കളെയും കാണാമായിരുന്നു. ചെറുതും വലുതുമായ നിരവധി താത്കാലിക പടക്കക്കടകളാണ് നഗരത്തിന്‍റെ മുക്കിലും മൂലയിലും നിരന്നത്. ശബ്ദം കൂടുതലുള്ള പടക്കം പൊട്ടിക്കുന്നതിന് നിയന്ത്രണമുള്ളതുകൊണ്ട് വർണാഭമായ ചൈനീസ് പടക്കങ്ങൾക്കാണ് ആവശ്യക്കാർ ഏറെയുണ്ടായിരുന്നത്. വിഷുദിനമായ ഇന്നും പടക്കവിപണി സജീവമായിരിക്കും. മുൻ വർഷങ്ങളെ അപേക്ഷിച്ച് ഇത്തവണ വിലക്കയറ്റം കാര്യമായി ബാധിച്ചില്ലായെന്നത് സാധാരണക്കാർക്ക് ആശ്വാസമായി. വിഷു പ്രമാണിച്ച് കണി വെള്ളരിക്ക് നേരിയ തോതിൽ വില കൂട്ടിയാണ് കട്ടവടക്കാർ വില്പന നടത്തിയത്. എന്നാൽ പച്ചക്കറി ഉത്പന്നങ്ങൾക്ക് കാര്യമായ വില വർധനയുണ്ടായില്ല. എങ്കിലും വിഷുക്കച്ചവടം ഇത്തവണ കാര്യമായി ലഭിച്ചില്ലെന്ന് കച്ചവടക്കാർ പറഞ്ഞു. ഇന്നലെ ഞായറാഴ്ച ആയതിനാൽ പൊതുവേ നഗരത്തിൽ കാര്യമായ വാഹനത്തിരക്ക് അനുഭവപ്പെട്ടില്ല. തൊടുപുഴയിലും കട്ടപ്പനയിലും വൈകുന്നേരത്തോടെ ചെറിയ തോതിൽ ഗതാഗത സ്തംഭനമുണ്ടായി. തിരക്കുണ്ടാകാനുള്ള സാധ്യത കണക്കിലെടുത്ത് പ്രധാന ടൗണുകളിലെല്ലാം പോലീസിനെ വിന്യസിച്ചിരുന്നു.

നാരങ്ങാനത്ത് സ്ഥാപിച്ച കുരിശ് വനംവകുപ്പ് പൊളിച്ചുനീക്കി

കരിമണ്ണൂർ: തൊമ്മൻകുത്ത് സെന്‍റ് തോമസ് പള്ളിയുടെ നേതൃത്വത്തിൽ തോക്കുന്പൻസാഡിൽ റോഡിനോടു ചേർന്ന് നാരങ്ങാനം ഭാഗത്ത് സ്ഥാപിച്ച കുരിശ് പൊളിച്ചുനീക്കിയതിൽ വ്യാപക പ്രതിഷേധം. പള്ളിയുടെ കൈവശഭൂമിയിൽ വെള്ളിയാഴ്ചയാണ് കോണ്‍ക്രീറ്റ് കുരിശ് സ്ഥാപിച്ചത്. വലിയ നോന്പിലെ നാൽപ്പതാം വെള്ളിയാഴ്ച ഇടവകയുടെ നേതൃത്വത്തിൽ ഇവിടേക്ക് കുരിശിന്‍റെ വഴിയും നടത്തിയിരുന്നു. ഇതിനിടെയാണ് യാതൊരു മുന്നറിയിപ്പും നൽകാതെ വനംവകുപ്പ് ഉദ്യോഗസ്ഥർ പോലീസിന്‍റെ സഹായത്തോടെ സ്ഥലത്തെത്തി ഇന്നലെ രാവിലെ 11ഓടെ ജെസിബി ഉപയോഗിച്ച് കുരിശ് പൊളിച്ചുനീക്കിയത്. പിഴുതെടുത്ത കുരിശ് നശിപ്പിക്കാനായിരുന്നു ശ്രമം. ഈ സമയം സ്ഥലത്തുണ്ടായിരുന്ന വിശ്വാസികൾ ഇത് എതിർത്തതോടെ കുരിശ് ലോറിയിൽ കയറ്റി കൊണ്ടുപോകുകയായിരുന്നു. കുരിശ് പൊളിക്കുന്നത് എതിർത്ത നാട്ടുകാരനെ പോലീസ് പിടിച്ചുതള്ളുകയും ചെയ്തു. കുരിശ് പൊളിച്ചുനീക്കിയ സംഭവത്തിൽ ശക്തമായ പ്രതിഷേധമാണ് വിവിധ കോണുകളിൽനിന്ന് ഉയരുന്നത്. ഇന്നലെ വൈകുന്നേരം കത്തോലിക്ക കോണ്‍ഗ്രസിന്‍റെ നേതൃത്വത്തിൽ തൊമ്മൻകുത്ത് ടൗണിൽ പന്തംകൊളുത്തി പ്രകടനം നടത്തി. പ്രകടനത്തിൽ നൂറുകണക്കിനാളുകൾ പങ്കുചേർന്നു. വിഷയം ചർച്ച ചെയ്യാൻ ഇന്നു രാവിലെ പള്ളിയിൽ പൊതുയോഗം വിളിച്ചിട്ടുണ്ട്. കുരിശ് സ്ഥാപിച്ച സ്ഥലത്തുനിന്ന് ഒരുകിലോമീറ്ററോളം അകലെയാണ് വനംവകുപ്പിന്‍റെ ജണ്ടയുള്ളതെന്നും വർഷങ്ങളായി കൈവശത്തിലുള്ള ഭൂമിയിലാണ് കുരിശ് സ്ഥാപിച്ചിരുന്നതെന്നും വികാരി ഫാ. ജയിംസ് ഐക്കരമറ്റം പറഞ്ഞു. ഇവിടെ നിരവധി കുടുംബങ്ങൾ അധിവസിക്കുന്നുണ്ട്. ഇവർക്കെല്ലാം തങ്ങളുടെ സ്ഥലത്തിന് കൈവശരേഖയുമുണ്ട്. പള്ളിയുടെ കൈവശത്തിലുള്ള സ്ഥലത്ത് സ്ഥാപിച്ച കുരിശ് പൊളിച്ചുനീക്കുന്നതു സംബന്ധിച്ച് യാതൊരു അറിയിപ്പും നൽകിയിരുന്നില്ലെന്നും അദ്ദേഹം വ്യക്തമാക്കി. നേരത്തേ നെയ്യശേരി-തോക്കുന്പൻസാഡിൽ റോഡ് നിർമാണവുമായി ബന്ധപ്പെട്ട് നിരവധി തവണ തടസവാദവുമായി വനംവകുപ്പ് രംഗത്തുവന്നിരുന്നു. റോഡ് നിർമാണ കരാറുകാർക്കെതിരേ കേസെടുത്തതോടെ നിർമാണ പ്രവർത്തനം ദിവസങ്ങളോളം മുടങ്ങുകയും ചെയ്തു. ഇതിനു പുറമേ ആയിരക്കണക്കിനു സഞ്ചാരികൾ എത്തുന്ന ആനയാടിക്കുത്തിലേക്കുള്ള പ്രവേശനം തടയുന്നതിനും വനംവകുപ്പ് നേരത്തേ ശ്രമം നടത്തിയിരുന്നു. ആനയാടിക്കുത്തും വനംവകുപ്പിന്‍റെ അധീനതയിലാക്കാനുള്ള ശ്രമമാണ് ഇതിനു പിന്നിലെന്ന് നാട്ടുകാർ ആരോപിച്ചു. കർഷകൻ നട്ടുപിടിപ്പിച്ച സ്വന്തം കൃഷിയിടത്തിലെ മരങ്ങൾ വെട്ടിയെടുക്കുന്നതിനും വനംവകുപ്പ് തടസം നിൽക്കുകയാണ്. ഇതുമൂലം മരങ്ങൾ വാങ്ങാൻ ആരും തയാറാകുന്നില്ല. ആരെങ്കിലും വാങ്ങിയാൽ നാമമാത്ര വില മാത്രമാണ് കർഷകനു ലഭിക്കുന്നത്. സമീപനാളിൽ വനംവകുപ്പിന്‍റെ അനാവശ്യഇടപെടൽ പ്രദേശത്ത് വർധിച്ചുവരികയാണ്. ഇതു വലിയ പ്രതിഷേധത്തിനു കാരണമായിട്ടുണ്ട്. വനംവകുപ്പ് ഉദ്യോഗസ്ഥരെ നിലയ്ക്കുനിർത്താൻ സർക്കാർ തയാറാകണമെന്ന് നാട്ടുകാർ ആവശ്യപ്പെട്ടു. കത്തോലിക്ക കോൺഗ്രസ് പന്തംകൊളുത്തി പ്രകടനം നടത്തി തൊമ്മൻകുത്ത്: സെന്‍റ് തോമസ് പള്ളിയുടെ കീഴിൽ ആനയാടിക്കുത്തിനു സമീപം നാരങ്ങാനം ഭാഗത്ത് സ്ഥാപിച്ച കുരിശ് വനംവകുപ്പ് നശിപ്പിച്ചതിൽ പ്രതിഷേധിച്ച് കത്തോലിക്ക കോണ്‍ഗ്രസ് തൊമ്മൻകുത്ത് യൂണിറ്റിന്‍റെ നേതൃത്വത്തിൽ ടൗണിൽ പന്തംകൊളുത്തി പ്രകടനം നടത്തി. ഇന്നലെ വൈകുന്നേരം 6.30-ഓടെപള്ളി പരിസരത്തുനിന്ന് ആരംഭിച്ച പ്രകടനം മണിയൻസിറ്റി ചുറ്റി തിരികെ പള്ളിയിൽ സമാപിച്ചു.

പ്രകടനത്തിലും പ്രതിഷേധ യോഗത്തിലും നിരവധിപ്പേർ പങ്കെടുത്തു. വികാരി ഫാ. ജയിംസ് ഐക്കരമറ്റം, കത്തോലിക്ക കോണ്‍ഗ്രസ് യൂണിറ്റ് പ്രസിഡന്‍റ് സോജൻ കുന്നുംപുറത്ത് തുടങ്ങിയവർ പ്രസംഗിച്ചു. കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ് സ്ഥലത്തെത്തിയിരുന്നു. അതേസമയം കുരിശ് സ്ഥാപിച്ച സ്ഥലം റിസർവ് വനമാണെന്നും ഇവിടെ കുരിശ് സ്ഥാപിച്ചസംഭവത്തിൽ കേസെടുത്തിട്ടുണ്ടെന്നും കാളിയാർ റേഞ്ച് ഓഫീസർ ടി.കെ. മനോജ് പറഞ്ഞു.

ബഫർസോണ്‍: ആശങ്ക പടർത്തിയത് മന്ത്രി-എംപി

തൊടുപുഴ: ഡാമുകൾക്ക് ചുറ്റും ബഫർ സോണ്‍ ഉത്തരവിറക്കി ജനങ്ങൾക്ക് ആശങ്കയുണ്ടാക്കിയത് മന്ത്രി റോഷി അഗസ്റ്റിനാണെന്ന് ഡീൻ കുര്യാക്കോസ് എംപി. ഈ ഉത്തരവ് കൂടാതെയാണ് ഡാമുകൾക്കും ജലവിഭവ വകുപ്പിന്‍റെ ചെറിയ കുളങ്ങൾക്കും ടാങ്കുകൾക്കും ചുറ്റും ഒരു കിലോമീറ്റർ മുതൽ 30 മീറ്റർ വരെ ബഫർ സോണ്‍ പ്രഖ്യാപിച്ച് ക്വാറിയിംഗും മൈനിംഗും നിരോധിച്ച് ഉത്തരവിറക്കിയത്. ഈ ഉത്തരവ് ഇതുവരെ പിൻവലിച്ചിട്ടില്ല. ജലവിഭവ വകുപ്പിന്‍റെ നിരവധി കുളങ്ങളും, ടാങ്കുകളും, ചെക്ക് ഡാമുകളും കൃഷി ഭൂമിയിലുണ്ട്. കൃഷി ഭൂമികൂടി ബഫർ സോണിന്‍റെ പരിധിയിലാക്കുന്ന ഈ ഉത്തരവ് അടിയന്തരമായി പിൻവലിക്കണം. ഡാമുകൾക്ക് സമീപം നിർമാണ പ്രവർത്തനങ്ങൾക്ക് നൽകുന്നതിനെക്കുറിച്ച് നിർദേശങ്ങൾ സമർപ്പിക്കാൻ 2023 ൽ സർക്കാർ വിദഗ്ധ സമിതിയെ നിയോഗിച്ചിരുന്നു. ഈ സമിതിയുടെ റിപ്പോർട്ടിന്‍റെ അടിസ്ഥാനത്തിലാണ് 2024 ഡിസംബർ 26 ന് ഡാമിന് ചുറ്റും രണ്ട് കാറ്റഗറികളായി തിരിച്ച് നിർമാണ പ്രവർത്തനങ്ങൾക്ക് നിയന്ത്രണമേർപ്പെടുത്തി ജലവിഭവ വകുപ്പ് ഉത്തരവ് ഇറക്കിയത്. ഈ ഉത്തരവാണ് വൈദ്യുതി ബോർഡിന്‍റെ ഡാമുകളിലേക്ക് വ്യാപിപ്പിക്കുന്ന കാര്യം പരിഗണനയിലാണെന്ന് വൈദ്യുതി മന്ത്രി അൻവർ സാദത്തിന്‍റെ നിയമസഭയിലെ ചോദ്യത്തിന് രേഖാമൂലം മറുപടി നൽകിയതും വിവാദമായപ്പോൾ നടപ്പാക്കില്ലന്ന് പത്രകുറിപ്പ് ഇറക്കിയതും. ജലവിഭവ വകുപ്പിന്‍റെ ബഫർ സോണ്‍ ഉത്തരവ് പിൻവലിച്ചതുകൊണ്ടോ വൈദ്യുതി ബോർഡ് പത്രക്കുറിപ്പ് ഇറക്കിയത് കൊണ്ടോ പ്രശ്നം പരിഹരിക്കപ്പെടില്ലെന്ന് എംപി പറഞ്ഞു. കോടതിയിൽ നിന്ന് അനുകൂല വിധിയുണ്ടായാൽ മാത്രമേ ബഫർ സോണിൽ നിന്ന് രക്ഷപെടാൻ കഴിയു. ഈ പ്രശ്നം പൂർണമായും പരിഹരിക്കാൻ വിദഗ്ധ സമിതിയുടെ റിപ്പോർട്ട് തള്ളിക്കളഞ്ഞ് ജണ്ടയ്ക്ക് പുറത്തുള്ള ഭൂമിയിൽ നിർമാണത്തിന് നിയന്ത്രണമില്ലെന്ന് സർക്കാർ കോടതിയെ ധരിപ്പിക്കണം. ഡിസംബർ 26 ലെ ബഫർ സോണ്‍ ഉത്തരവ് പിൻവലിച്ചതിലെ അവ്യക്തതയും പരിഹരിക്കണമെന്നും അല്ലെങ്കിൽ ഹൈക്കോടതിയിൽ തിരിച്ചടി നേരിടുമെന്നും അദ്ദേഹം പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]