സീനിയര്‍ സിറ്റിസണ്‍സ് ഓണാഘോഷം

ചങ്ങനാശേരി: സീനിയര്‍ സിറ്റിസണ്‍സ് ഫോറം ഓണാഘോഷം നടത്തി. ഫെഡറേഷന്‍ ഓഫ് സീനിയര്‍ സിറ്റിസണ്‍സ് ജില്ലാ പ്രസിഡന്‍റ് കെ.എന്‍. സോമദാസന്‍ ഉദ്ഘാടനം ചെയ്തു.

സെക്രട്ടറി പി.എം. അന്‍സാരി, സംസ്ഥാന കൗണ്‍സിലംഗങ്ങളായ പി.കെ. ബാലകൃഷ്ണകുറുപ്പ്, ടി. ഇന്ദിരാദേവി, ഡോ. ജയിംസ് മണിമല, ദേവസ്യ മുളവന, വി.എസ്. ശശികുമാര്‍, ജോസ് മാത്യു, ചാക്കോ പി.എ., സാലി എന്നിവര്‍ പ്രസംഗിച്ചു.

ഫോറം അംഗങ്ങളായ പി.എസ്. ബാബു, യമുനാ മാധവന്‍ പിള്ള, ശ്യാമളാ ദേവി എന്നിവര്‍ കലാപരിപാടികള്‍ അവതരിപ്പിച്ചു.

ADVERTISEMENT

ഫിസിയോതെറാപ്പി ദിനാചരണം

ചങ്ങനാശേരി: ടൗണ്‍ റോട്ടറി ക്ലബ്ബിന്‍റെ ആഭിമുഖ്യത്തില്‍ ഫിസിയോതെറാപ്പി ദിനാചരണം സംഘടിപ്പിച്ചു. അലൈന്‍ ഫിസിയോതെറാപ്പി സെന്‍ററുമായി സഹകരിച്ച് ഒരാഴ്ച നീണ്ടുനില്‍ക്കുന്ന സൗജന്യ ഫിസിയോതെറാപ്പി ചികിത്സയുടെ ഉദ്ഘാടനം ചങ്ങനാശേരി ഡിവൈഎസ്പി കെ.പി. ടോംസണ്‍ നിര്‍വഹിച്ചു. റോട്ടറി ക്ലബ്ബ് പ്രസിഡന്‍റ് അഡ്വ. ബോബന്‍ ടി. തെക്കേല്‍ അധ്യക്ഷത വഹിച്ചു. മനോജ് കുമാര്‍, രമേഷ്‌കുമാര്‍, ബേബിച്ചന്‍ പ്രാക്കുഴി, ഡോ. ജിജി ബോബന്‍ തെക്കേല്‍, വിധു രമേഷ്, മീന വിനോദ്, ജ്യോതി പൊട്ടുകുളം, ജിനി പ്രാക്കുഴി, സിമി തോമസ്, ബീന ബിജു, സാജിദ സീയാദ്, വിജയകുമാര്‍ മേനോന്‍, സിന്ധു ബിനൂപ് എന്നിവര്‍ പ്രസംഗിച്ചു.

സ്‌കൂട്ടറും കാറും കൂട്ടിയിടിച്ച് ദേവാലയശുശ്രൂഷി മരിച്ചു

ചങ്ങനാശേരി: സ്‌കൂട്ടറും കാറും ഇടിച്ചുണ്ടായ അപകടത്തില്‍ കുറിച്ചി നായ്ക്കമഠത്തില്‍ ജോസഫ് പുന്നൂസ് (65) മരിച്ചു. ചിങ്ങവനം സെന്‍റ് മേരീസ് ശാലേം പള്ളിയിലെ പ്രധാന ശുശ്രൂഷകനായിരുന്നു. ശനിയാഴ്ച രാത്രി ഏഴിനു കുറിച്ചി ഔട്ട്‌പോസ്റ്റ്-കൈനടി റോഡില്‍ ആനമുക്ക് ഭാഗത്തായിരുന്നു അപകടം. നിയന്ത്രണം നഷ്ടമായ കാര്‍ ജോസഫ് സഞ്ചരിച്ച സ്‌കൂട്ടറില്‍ ഇടിക്കുകയായിരുന്നുവെന്ന് പോലീസ് പറഞ്ഞു. മൃതദേഹം ഇന്നു വൈകുന്നേരം നാലിന് ചിങ്ങവനം സെന്‍റ് മേരീസ് ശാലേം പള്ളിയില്‍ പൊതുദര്‍ശനത്തിനുശേഷം കുറിച്ചിയിലെ വസതിയില്‍ എത്തിക്കും. സംസ്‌കാരം നാളെ (ചൊവ്വ) 11ന് വസതിയിലെ ശുശ്രൂഷയ്ക്കുശേഷം 12ന് കുറിച്ചി മാര്‍ ഇഗ്‌നാത്തിയോസ് ക്‌നാനായ പള്ളിയില്‍. ഭാര്യ കുറിച്ചി കൊല്ലംപറമ്പില്‍ ലീലാമ്മ ജോസഫ്, മക്കള്‍: ജോസിനി, ലിജോ, ലിന്‍റു. മരുമക്കള്‍: മജു (മാന്നാര്‍), രേണു (ഇല്ലിക്കൽ)‍, അനീഷ് (മഴുക്കീര്‍).

പെട്രോൾ പമ്പിൽ കഞ്ചാവ് മാഫിയാ അക്രമം

ചങ്ങനാശേരി: മാമ്മൂട് പെട്രോൾ പമ്പിൽ കഞ്ചാവ് മാഫിയായുടെ അക്രമം. പെട്രോൾ പമ്പ് അടിച്ചു തകർത്തു. പമ്പുടമ ദിലീപിനെ ഗുരുതര പരിക്കുകളോടെ ചങ്ങനാശേരി ജനറൽ ഹോസ്പിറ്റലിൽ പ്രവേശിപ്പിച്ചു. ഇന്നലെ രാത്രി 8.30യോടെയാണ് സംഭവം. മാമ്മൂട് സ്വദേശികളായ വിജയ് (25), അജിൽ കുമാർ (26), ബിബിൻ (25) എന്നിവരെ തൃക്കൊടിത്താനം പോലീസ് അറസ്റ്റ് ചെയ്തു. പമ്പിലെത്തി പ്രകോപനങ്ങളില്ലാതെ അക്രമം നടത്തുകയായിരുന്നുവെന്നു പോലീസ് പറഞ്ഞു.

കളർഫുൾ "ചിക്കൻസ്...'

ചങ്ങനാശേരി: നിറങ്ങളില്‍ ചാലിച്ചെടുത്ത കോഴിക്കുഞ്ഞുങ്ങളുമായി തേനി സ്വദേശി ശ്രീനിവാന്‍ ചങ്ങനാശേരിയില്‍ എത്തി. ചുവപ്പ്, മഞ്ഞ, റോസ്, പച്ച, നീല നിറങ്ങളുള്ള കോഴിക്കുഞ്ഞുങ്ങളെയാണ് വില്പനയ്ക്കെത്തിച്ചിരിക്കുന്നത്. നിറമുള്ളത് പൂവന്‍കുഞ്ഞുങ്ങളും വെള്ള നിറത്തിലുള്ളവ പിടയുമാണെന്ന് ശ്രീനിവാസന്‍ പറയുന്നു. അഞ്ചു പൂവന്‍ കുഞ്ഞുങ്ങള്‍ക്ക് നൂറ്, നാലു പിട കുഞ്ഞുങ്ങള്‍ക്ക് 100 എന്ന ക്രമത്തിലാണ് വില. തമിഴ്‌നാട്ടിലെ കോഴി, മുട്ട ഗ്രാമമായ പ്രശസ്തമായ നാമക്കലില്‍ നിന്നും സ്വന്തം സ്‌കൂട്ടറിലാണ് ശ്രീനിവാസന്‍ കോഴിക്കുഞ്ഞുങ്ങളെ ചങ്ങനാശേരിയില്‍ എത്തിക്കുന്നത്. നിറങ്ങളാല്‍ ആകര്‍ഷിക്കപ്പെട്ട് പലരും കോഴിക്കുഞ്ഞുങ്ങളെ വാങ്ങുന്നുണ്ട്.

ചങ്ങനാശേരി അതിരൂപതയിലെ ഇടവകകളില്‍ പ്രത്യാശ ജ്യോതി പ്രയാണത്തിനു തുടക്കമായി

ചങ്ങനാശേരി: ചങ്ങനാശേരി അതിരൂപതയിലെ 250 ഇടവകകളില്‍ പ്രത്യാശ ജ്യോതി പ്രയാണത്തിനു തുടക്കമായി. ഈശോയുടെ മനുഷ്യാവതാരത്തിന്‍റെ മഹാ ജൂബിലിയോടനുബന്ധിച്ച് ഫ്രാന്‍സിസ് പാപ്പാ പ്രഖ്യാപിച്ചിരിക്കുന്ന പ്രത്യാശയുടെ ജൂബിലി വര്‍ഷത്തിന്‍റെ സമാപനമായാണ് അതിരൂപതയില്‍ പ്രത്യാശ ജ്യോതി പ്രയാണം ആരംഭിച്ചത്. സെന്‍റ് മേരീസ് മെത്രാപ്പോലീത്തന്‍ പള്ളിയില്‍ വികാരി ഫാ. ജോസഫ് വാണിയപ്പുരയ്ക്കല്‍ പ്രത്യാശ ജ്യോതി പ്രയാണം ഉദ്ഘാടനം ചെയ്തു. ഫാ. നിഖില്‍ അറയ്ക്കത്തറ, ഫാ. ഷെറിന്‍ കുറശേരി, ഫാ. സിറിള്‍ കളരിക്കല്‍ എന്നിവര്‍ പ്രസംഗിച്ചു. ഡിസംബര്‍ 30 വരെ തീയതികളില്‍ പ്രത്യാശ ജ്യോതി പ്രയാണം ഇടവകയിലെ 2000ത്തോളം ഭവനങ്ങളിലൂടെ കടന്നുപോകും.ഭവനങ്ങളില്‍ പ്രത്യേക പ്രാര്‍ഥനകളും, വചനസന്ദേശവും നടക്കും. സമാപന ദിനമായ നവംബര്‍ 30 ഞായറാഴ്ച വൈകുന്നേരം ആറിന് വാര്‍ഡുതലതല ജ്യോതി പ്രയാണം റാലിയോടുകൂടി പള്ളി അങ്കണത്തില്‍ എത്തിച്ചേരുമ്പോള്‍ സമാപന കണ്‍വന്‍ഷനു തുടക്കംകുറിക്കും. പ്രയാണം പാസ്റ്ററല്‍ സെന്‍റര്‍ വാര്‍ഡില്‍ ആരംഭിച്ചു. 28ന് അസംപ്ഷന്‍, ഒക്‌ടോബര്‍ 12 വാഴപ്പള്ളി, 19 ഗെത്‌സെമനി, 26 സസ്യമാര്‍ക്കറ്റ്, നവംബര്‍ രണ്ട് ഫിഷ് മാര്‍ക്കറ്റ്, ഒമ്പത് അങ്ങാടി, പോത്തോട് വാര്‍ഡുകള്‍, 16 കത്തീഡ്രല്‍, 23 വണ്ടിപ്പേട്ട, കാക്കാംതോട്, മഞ്ചാടിക്കര വാര്‍ഡുകള്‍, 30ന് മറ്റം പൂവക്കാട്ടുചിറ വാര്‍ഡുകളിലാണ് പ്രത്യാശ ജ്യോതി പ്രയാണം എത്തിച്ചേരുന്നത്.

റെയില്‍വേ ജംഗ്ഷന്‍ ഫ്ളൈഓവര്‍: കരാര്‍ ഊരാളുങ്കല്‍ സൊസൈറ്റിക്ക്

ഒക്‌ടോബറില്‍ നിര്‍മാണമാരംഭിക്കും ചങ്ങനാശേരി: ചങ്ങനാശേരി ബൈപാസിലെ റെയില്‍വേ ജംഗ്ഷന്‍ ഫ്ളൈഓവര്‍ നിര്‍മാണത്തിനു പച്ചക്കൊടി. ഒക്‌ടോബര്‍ മധ്യത്തോടെ നിര്‍മാണ ജോലികള്‍ തുടങ്ങാന്‍ തീരുമാനം. 85.68 കോടി രൂപയാണ് പദ്ധതിക്കായി അനുവദിച്ചിരിക്കുന്നത്. പദ്ധതിയുടെ നിര്‍മാണ ജോലികള്‍ ഊരാളുങ്കല്‍ ലേബര്‍ കോണ്‍ട്രാക്ടേഴ്‌സ് സൊസൈറ്റി ഏറ്റെടുത്തു. നിര്‍മാണം നടക്കുന്ന പ്രദേശത്തെ 142 പാഴ്മരങ്ങള്‍ മുറിച്ചു നീക്കുന്നതിനുള്ള നടപടികള്‍ക്കായി ഈയാഴ്ച ട്രീ കമ്മിറ്റി യോഗം ചേരും. നേരത്തേ പുറപ്പെടുവിച്ച സര്‍ക്കാര്‍ ഉത്തരവ് പ്രകാരം 62.11 കോടി രൂപയായിരുന്നു പദ്ധതി ചെലവ്. ഡിഎസ്ആര്‍, ചരക്ക് സേവന നികുതി, യൂട്ടിലിറ്റി ഷിഫ്റ്റിംഗ്, സ്പാനുകളുടെ സാങ്കേതിക വ്യതിയാനം തുടങ്ങിയ കാരണങ്ങളാലാണ് പദ്ധതി ച്ചെലവ് 62.11 കോടി രൂപയില്‍നിന്ന് 85.68 കോടി രൂപയായി ഉയര്‍ത്തിയത്. ജോബ് മൈക്കിള്‍ എംഎല്‍എയുടെ ഇടപെടലിലാണ് അടങ്കല്‍ തുക പുതുക്കി ഉത്തരവായത്. കിഫ്ബിയില്‍ നിന്നാണ് പദ്ധതിക്കുള്ള തുക അനുവദിച്ചത്. നഗരത്തിലെ ഗതാഗതകുരുക്കിന് പരിഹാരമാകും ഫ്‌ളൈഓവര്‍ നിര്‍മാണത്തിലൂടെ ചങ്ങനാശേരി ബൈപാസും ചങ്ങനാശേരി-വാഴൂര്‍ റോഡും സംഗമിക്കുന്ന റെയിൽവേ ജംഗ്ഷനിലെ വാഹനത്തിരക്കും ഗതാഗത തടസങ്ങളും പരിഹരിക്കപ്പെടും. എന്‍എച്ച് 183 (എംസി റോഡില്‍) ളായിക്കാട് ജംഗ്ഷനിലാരംഭിച്ച് എസ്എച്ച് ജംഗ്ഷന്‍, റെയില്‍വേസ്റ്റേഷന്‍, മോര്‍ക്കുളങ്ങര വഴി എന്‍എച്ച് 183 (എംസി റോഡില്‍) പാലാത്രച്ചിറയില്‍ എത്തിച്ചേരുന്ന ബൈപാസില്‍ ഫ്‌ളൈഓവര്‍ വരുന്നതോടെ യാത്രയ്ക്ക് വേഗതകൂടും. ജോബ് മൈക്കിള്‍ എംഎല്‍എ 1060 മീറ്റര്‍ നീളം, 9 മീറ്റര്‍ വീതി, ഇരുവശങ്ങളിലും 8 മീറ്റര്‍ വീതിയില്‍ 1265 മീറ്റര്‍ സര്‍വീസ് റോഡ് റെയില്‍വേ സ്റ്റേഷനു സമീപത്താരംഭിച്ച് കാന്താരി റെസ്റ്ററന്‍റിനു സമീപം അവസാനിക്കുന്ന ഫ്ളൈഓവറിന്‍റെ ആകെ നീളം 1060 മീറ്ററും വീതി ഒമ്പതു മീറ്ററുമാണ്. കോട്ടയം സൈഡിലെ അപ്രോച്ച് റോഡിനു 290 മീറ്ററും, തിരുവല്ല സൈഡിന് 140 മീറ്ററുമാണ്. വ്യാപാരികള്‍ക്കും മറ്റുള്ളവര്‍ക്കും ബുദ്ധിമുട്ടുണ്ടാകാതിരിക്കാന്‍ എട്ടുമീറ്റര്‍ വീതിയിൽ 1265 മീറ്റര്‍ സര്‍വീസ് റോഡ് രണ്ടു വശങ്ങളിലും പദ്ധതിയില്‍ ഉള്‍പ്പെടുത്തിയിട്ടുണ്ട്. വെള്ളത്തിന്‍റെ സുഗമമായ ഒഴുക്കിന് മൂന്ന് ബോക്സ് കലുങ്കുകള്‍, 590 മീറ്റര്‍ സംരക്ഷണ ഭിത്തി, 267 സോഡിയം വേപ്പര്‍ ലൈറ്റുകള്‍, 184 സോളാര്‍ എല്‍ഇഡി ലൈറ്റുകള്‍, റോഡ് സേഫ്റ്റി നടപടികള്‍ തുടങ്ങിയവയും പദ്ധതിയില്‍ ഉറപ്പാക്കിയിട്ടുണ്ട്. സ്ഥലമേറ്റെടുപ്പു നടപടികള്‍ പൂര്‍ത്തിയാക്കി ഭൂവുടമകള്‍ക്ക് സ്ഥലത്തിന്‍റെ വില നല്‍കുകയും ചെയ്തിട്ടുണ്ട്. റോഡ്‌സ് ആൻഡ് ബ്രിഡ്ജസ് ഡെവലപ്‌മെന്‍റ് കോര്‍പറേഷന്‍റെ മേല്‍നോട്ടത്തിലാണ് ഫ്‌ളൈഓവര്‍ നിര്‍മാണം.

കർഷകരെ ആദരിച്ചു

തലയോലപ്പറമ്പ്: ബഷീർ സ്മാരക സമിതി, ബഷീർ അമ്മ മലയാളം, കോരിക്കൽ ഫ്രണ്ട്സ് ഓഫ് ട്രീസ് എന്നിവയുടെ സംയുക്താഭിമുഖ്യത്തിൽ മികച്ച കർഷകരെ ആദരിച്ചു. കോരിക്കലിൽ നടന്ന അനുമോദനയോഗം വൈക്കം മുഹമ്മദ് ബഷീറിന്‍റെ മകൻ അനീസ് ബഷീർ ഉദ്ഘാടനം ചെയ്തു. ബഷീർ സ്മാരക സമിതി ജോയിന്‍റ് സെക്രട്ടറി കെ.എം. ഷാജഹാൻ കോഴിപ്പള്ളി അധ്യക്ഷത വഹിച്ചു. യോഗത്തിൽ 16 കർഷകരെയും മുതിർന്ന സാമൂഹ്യപ്രവർത്തക പി.ജി. തങ്കമ്മ, ജീവകാരുണ്യപ്രവർത്തകരായ തലയോലപ്പറമ്പ് ശിവാസ് സിൽക്സ് ഉടമകളായ പി. ആനാന്ദാക്ഷൻ, ജിജി ആനാന്ദാക്ഷൻ, ഫിറോഷ് മാവുങ്കൽ, മുഖ്യമന്ത്രിയുടെ പോലിസ് മെഡൽ ലഭിച്ച സി.എസ്. മനോജ്കുമാർ എന്നിവരെ ആദരിച്ചു. ബഷീർ സ്മാരകസമിതി ജനറൽ സെക്രട്ടറി പി.ജി. ഷാജിമോൻ, ആര്യ കെ. കരുണാകരൻ, എം.ജെ. ജോർജ്, വി.കെ. ശശിധരൻ വാളവേലിൽ, കെ.കെ. ഷാജി, ബി. അനിൽകുമാർ, സി.ജി. ഗിരിജൻ ആചാരി, സി.ഡി. ദിനേശ്, ഡോ.എസ്. പ്രീതൻ, ബഷീർ കഥാപാത്രങ്ങളായ സെയ്തു മുഹമ്മദ്, ഖദീജ തുടങ്ങിയവർ സംബന്ധിച്ചു.

സ്വദേശ് മെഗാ ക്വിസ് സംഘടിപ്പിച്ചു

വൈക്കം: കേരള പ്രദേശ് സ്കൂൾ ടീച്ചേഴ്സ് അസോസിയേഷന്‍റെ ആഭിമുഖ്യത്തിൽ സ്വദേശ് മെഗാ ക്വിസ് സംഘടിപ്പിച്ചു. വൈക്കം സെന്‍റ് ലിറ്റിൽ തെരേസാസ് ഗേൾസ് എച്ച്എസ്എസിൽ നടന്ന മത്സരത്തിൽ വൈക്കം സബ് ജില്ലയിലെ വിവിധ സ്കൂളുകളിൽനിന്നായി എൽപി, യുപി, എച്ച്എസ്, എച്ച്എസ്എസ് വിഭാഗങ്ങളിൽനിന്നായി നൂറോളം വിദ്യാർഥികൾ പങ്കെടുത്തു. തലയാഴം പഞ്ചായത്ത് പ്രസിഡന്‍റ് രമേഷ് പി. ദാസ് വിജയികൾക്ക് സമ്മാനങ്ങളും സർട്ടിഫിക്കറ്റും വിതരണം ചെയ്തു. സംസ്ഥാന എക്സിക്യൂട്ടീവ് അംഗം പി. പ്രദീപ്, പി.ആർ. ശ്രീകുമാർ, ബൈജുമോൻ ജോസഫ്, വന്ദന കെ. പൗലോസ്, ബോബി ജോസ്, ജോസ് ജോസഫ്, സി.ജി. മിനി, അനു ഡി. രാജ് എന്നിവർ പ്രസംഗിച്ചു.

വീടിന്‍റെ താക്കോൽദാനം

വെച്ചൂർ: വെച്ചൂർ പഞ്ചായത്ത് ലൈഫ് മിഷൻ ഭവനപദ്ധതി പ്രകാരം നിർമിച്ച വീടിന്‍റെ താക്കോൽദാനം ആറാം വാർഡിലെ മറിയം ഐക്കരപ്പറമ്പിലിന് പ്രസിഡന്‍റ് കെ.ആർ. ഷൈലകുമാർ കൈമാറി. വീടു നിർമിക്കുന്നതിനായി കരാറിൽ ഏർപ്പെട്ട 118 പേർക്ക് ആദ്യഗഡു നൽകിയതായി കെ.ആർ. ഷൈലകുമാർപറഞ്ഞു. ഗുണഭോക്താക്കളുടെ ഭവനനിർമാണം പുരോഗമിക്കുകയാണ്. പഞ്ചായത്ത് വൈസ് പ്രസിഡന്‍റ് ബിൻസി ജോസഫ് അധ്യക്ഷത വഹിച്ചു.

ക്രൈസ്തവരക്ഷ കുരിശിലൂടെ: ഫാ. മാത്യു ചന്ദ്രന്‍കുന്നേല്‍

കത്തുരുത്തി: കുരിശിലൂടെ മാത്രമേ ക്രൈസ്തവന് രക്ഷ നേടാനാവൂയെന്ന് ഫാ. മാത്യു ചന്ദ്രന്‍കുന്നേല്‍. ക്രിസ്തുവിനെ സ്വീകരിക്കുന്ന ഏവനും രക്ഷനേടാന്‍ ദൈവം നല്‍കിയ ഏകമാര്‍ഗവും കുരിശാണെന്ന് അദ്ദേഹം പറഞ്ഞു. കടുത്തുരുത്തി സെന്‍റ് മേരീസ് ഫൊറോന താഴത്തുപള്ളിയില്‍ നടന്ന വിശുദ്ധ കുരിശിന്‍റെ പുകഴ്ചയുടെ തിരുനാളിനോടുനുബന്ധിച്ചു ടൗണിലെ കുരിശടിയിലെ തിരുക്കര്‍മങ്ങളുടെ സമാപനത്തില്‍ സന്ദേശം നല്‍കുകയായിരുന്നു അദ്ദേഹം. തിരുനാള്‍ കുര്‍ബാനയ്ക്ക് ഫാ. സ്റ്റാന്‍ലി മങ്ങാട്ട് സിഎംഎഫ് കാര്‍മികത്വം വഹിച്ചു. തുടര്‍ന്ന് പള്ളിയില്‍നിന്നു കടുത്തുരുത്തി ടൗണിലെ കുരിശടിയിലേക്ക് തിരുനാള്‍ പ്രദക്ഷിണം നടന്നു. കുരിശടിയില്‍ നടന്ന പ്രാര്‍ഥനകള്‍ക്ക് ഫാ. ഫ്രാന്‍സീസ് പുത്തന്‍പുര വിസി കാര്‍മികത്വം വഹിച്ചു. സഹവികാരി ഫാ.ജോണ്‍ നടുത്തടം, ഫാ. ബിജു ഇളംപ്ലാശേരില്‍ സിഎംഎഫ് തുടങ്ങിയവരും നൂറുകണക്കിന് വിശ്വാസികളും തിരുകര്‍മങ്ങളില്‍ പങ്കെടുത്തു.

ക്ഷേത്രനഗരിയെ അമ്പാടിയാക്കി മഹാശോഭായാത്ര

വൈക്കം: ഉണ്ണിക്കണ്ണന്മാരും ഗോപികമാരും രാജവീഥിയിൽ നിറഞ്ഞാടിയപ്പോൾ ക്ഷേത്രനഗരി അമ്പാടിയായി. താളമേളങ്ങളുടെയും ആരവങ്ങളുടെയും ഉത്സവലഹരിയിൽ ഉണ്ണിക്കണ്ണൻമാരും ഗോപികമാരും നൃത്തമാടിയത് ദർശിച്ച് ആനന്ദനിർവൃതി നേടാൻ നഗരവീഥികളിൽ നൂറുകണക്കിനു ഭക്തരുമെത്തിയിരുന്നു. വൈക്കത്ത് ബാലഗോകുലത്തിന്‍റെ നേതൃത്വത്തിൽ ശ്രീകൃഷ്ണ ജയന്തി മഹാശോഭായാത്രയോടെ ആഘോഷിച്ചു. ഗംഗ എന്ന നാമത്തിലുള്ള ശോഭായാത്ര ആറാട്ടുകുളങ്ങര ചീരംകുന്നുംപുറം പാർഥസാരഥീ ക്ഷേത്രത്തിൽനിന്ന് ആരംഭിച്ച് കിഴക്കേനട വഴി വൈക്കംവലിയ കവലയിലെത്തി. യമുനയെന്ന പേരിലുള്ള ശോഭായാത്ര തെക്കെനട ഇണ്ടംതുരുത്തിൽ കാർത്ത്യായനി ക്ഷേത്രത്തിൽനിന്ന് ആരംഭിച്ച് അയ്യർകുളങ്ങര, കാളിയമ്മനട എന്നിവിടങ്ങളിൽനിന്നു വന്ന ശോഭായാത്രയുമായി സംഗമിച്ച് വലിയ കവലയിൽ എത്തി. സരസ്വതി എന്ന പേരിലുള്ള ശോഭായാത്ര ഉദയനാപുരം ക്ഷേത്രത്തിൽനിന്ന് ആരംഭിച്ച് വലിയകവലയിൽ എത്തി. ഗോദാവരി എന്ന പേരിലുള്ള ശോഭായാത്ര പോളശേരി ഭഗവതി ക്ഷേത്രത്തിൽനിന്ന് ആരംഭിച്ച് പനമ്പുകാട് ശോഭായാത്രയുമായി സംഗമിച്ച് വലിയ കവലയിൽ എത്തി. നർമദ എന്ന പേരിലുള്ള ശോഭായാത്ര വടക്കേനടയിലെ വിശ്വഹിന്ദു പരിക്ഷത്തിന്‍റെ ശാസ്താ ക്ഷേത്രത്തിൽനിന്ന് ആരംഭിച്ചു. സിന്ധു എന്നറിയപ്പെടുന്ന ശോഭായാത്ര ചാലപ്പറമ്പിൽനിന്ന് ആരംഭിച്ച് പുളിഞ്ചുവട് ശോഭായാത്രയുമായി വലിയ കവലയിൽ എത്തി. ശോഭായാത്രകൾ വലിയ കവലയിൽ സംഗമിച്ചതോടെ മഹാശോഭായാത്ര ആരംഭിച്ചു. മുൻ ഡിജിപി ഡോ. ടി.പി. സെൻകുമാർ മഹാശോഭായാത്ര ഉദ്ഘാടനം ചെയ്തു. കെഎസ്ആർടിസി, ബോട്ട് ജട്ടി, കച്ചേരിക്കവല, പടിഞ്ഞാറെനട വഴി വൈക്കം ക്ഷേത്രത്തിൽ പ്രവേശിച്ചതോടെ മഹാശോഭായാത്ര സമാപിച്ചു. വൈക്കം താലൂക്ക് ആഘോഷ പ്രമുഖ് കെ.ഡി. സന്തോഷ്, സഹപ്രമുഖ് എം. മനോജ് പ്രസിഡന്‍റ് കെ. ശിവപ്രസാദ്, കാര്യദർശി പ്രിയ ഗിരിഷ് എന്നിവർ നേതൃത്വം നല്കി.

കടുത്തുരുത്തി-ആപ്പുഴ തീരദേശ റോഡില്‍ പൈപ്പ് പൊട്ടി ജലം പാഴാകുന്നു

കടുത്തുരുത്തി; കടുത്തുരുത്തി - ആപ്പൂഴ തീരദേശ റോഡില്‍ പൈപ്പ് പൊട്ടി വെള്ളം പാഴാകുന്നു. തകര്‍ന്നുകിടക്കുന്ന റോഡിനെ കൂടുതല്‍ തകര്‍ച്ചയിലാക്കിയാണ് വാട്ടര്‍ അഥോറിറ്റിയുടെ പൈപ്പ് പൊട്ടല്‍. റെയില്‍വേ മേല്‍പ്പാലത്തിനു സമീപത്താണ് ദിവസങ്ങളായി പൈപ്പ് പൊട്ടി ജലം ഒഴുകുന്നത്. ഈ ഭാഗത്ത് ഇതു മൂന്നാം തവണയാണ് പൈപ്പ് പൊട്ടുന്നത്. ഇതോടെ റോഡില്‍ വലിയ ഗര്‍ത്തം രൂപപ്പെട്ടു. ദിവസം ചെല്ലുന്തോറും പുറത്തേക്ക് ഒഴുകുന്ന വെള്ളത്തിന്‍റെ ശക്തി വര്‍ധിച്ചുവരികയാണ്. ഇത് ഇനിയും വര്‍ധിച്ചാല്‍ റോഡിന്‍റെ തകര്‍ച്ചയ്ക്കും കാരണമാകും. ഈ ഭാഗത്ത് രൂപപ്പെട്ടിരിക്കുന്ന കുഴികള്‍ ഇരുചക്രവാഹനങ്ങള്‍ക്ക് അപകടക്കെണിയാണ്. മീറ്ററുകളോളം ദൂരത്തില്‍ വെള്ളം കെട്ടിനില്‍ക്കുന്നതിനാല്‍ കാൽനടയാത്ര പറ്റാത്ത അവസ്ഥയാണ്. തീരദേശ റോഡിൽ സ്ഥാപിച്ച വാട്ടര്‍ അഥോറിറ്റിയുടെ പുതിയ പൈപ്പ് ലൈനില്‍ ഇതിനോടകം പല സ്ഥലത്തും പൊട്ടിയിട്ടുണ്ട്. വാട്ടര്‍ അഥോറിറ്റി പൈപ്പ് സ്ഥാപിക്കുന്നതിനായി കുഴിയെടുത്തതോടെയാണ് റോഡിന്‍റെ തകർച്ച തുടങ്ങിയത്.

കേബിളിൽ കുടങ്ങി അപകടം പതിവ്

കുമരകം: ഗവൺമെന്‍റ് ആശുപത്രി റോഡിൽ ബൈക്കിൽ സഞ്ചരിച്ച ഇതരസംസ്ഥാനക്കാരൻ പോസ്റ്റിൽ അലക്ഷ്യമായിക്കിടന്ന കേബിളിൽ കുരുങ്ങി അപകടത്തിൽപ്പെട്ടു. കേബിൾ ബൈക്കിന്‍റെ ഹാൻഡിലിൽ ഉടക്കിയുണ്ടായ അപകടത്തിൽ ഗോകുലം ഗ്രാൻഡ് റിസോർട്ട് ജീവനക്കാരൻ ലിയാക്യൂട്ട് യൂസഫ് മിറിന്‍റെ ഇടതുകൈയ്ക്ക് പ്ലാസ്റ്റർ ഇട്ടിരിക്കുകയാണ്. ഒരു മാസമെങ്കിലും വിശ്രമിക്കേണ്ടി വരുമെന്നാണ് ഡോക്ടർ ലിയാക്യൂട്ട് യൂസഫ് മിറിനോടു പറഞ്ഞത്. അലക്ഷ്യമായി വലിച്ചിരിക്കുന്ന കേബിളുകളിൽ കുരുങ്ങി ധാരാളം അപകടങ്ങൾ കുമരകത്തു നടന്നിട്ടുണ്ടെങ്കിലും ഉത്തരവാദിത്വപ്പെട്ടർ ഒരു നടപടിയും സ്വീകരിച്ചിട്ടില്ല.

അയ്യപ്പസംഗമം: സർക്കാരിന്‍റേത് കാപട്യമെന്ന് തിരുവഞ്ചൂർ

കോട്ടയം: വിശ്വാസികളോട് നീതി പുലർത്താതെ അയ്യപ്പന്മാരുടെ പേരിൽ സംഗമം നടത്തുന്നത് തികഞ്ഞ കാപട്യമാണെന്ന് തിരുവഞ്ചൂർ രാധാകൃഷ്ണൻ എംഎൽഎ. യുഡിഎഫ് ജില്ലാ നേതൃ യോഗം ഉദ്ഘാടനം ചെയ്യുകയായിരുന്നു അദ്ദേഹം. വിശ്വസികൾക്കെതിരേ എടുത്ത കേസുകൾ പിൻവലിക്കാതെ അയ്യപ്പ സംഗമം നടത്തുന്നത് ജനങ്ങളെ പറ്റിക്കാനാണെന്നും അദേഹം കൂട്ടിച്ചേർത്തു. ചെയർമാൻ ഇ.ജെ. ആഗസ്‌തി അധ്യക്ഷത വഹിച്ച യോഗത്തിൽ കുര്യൻ ജോയ്, നാട്ടകം സുരേഷ്, ഫിൽസൺ മാത്യൂസ്, പി. എം. സലിം, കുഞ്ഞ് ഇല്ലംപള്ളി, ജെയ്സൺ ജോസഫ്, തോമസ് കല്ലാടൻ, ഫാറൂഖ് പാലപ്പറമ്പിൽ, ടോമി വേദഗിരി, തമ്പി ചന്ദ്രൻ, സാജു എം ഫിലിപ്പ്, മദൻലാൽ, എം ടി സജിമോൻ, ബിനു എബ്രഹാം, കെ എഫ് വർഗീസ് തുടങ്ങിയവർ പ്രസംഗിച്ചു. അയ്യപ്പസംഗമത്തിന്‍റെ കാപട്യം തുരന്നു കാട്ടുന്നതിനായി 27ന് തിരുനക്കരയിൽ പ്രതിഷേധ സംഗമം സംഘടിപ്പിക്കും. പ്രതിപക്ഷ നേതാവ് വി. ഡി. സതീശൻ ഉദ്ഘാടനം ചെയ്യും. യുഡിഎഫ് സംസ്ഥാന നേതാക്കൾ പങ്കെടുക്കും.

കടലില്ലെങ്കിലും മലരിക്കലില്‍ വള്ളം റെഡി

കോട്ടയം: കോട്ടയം ജില്ലയില്‍ കടലില്ലെങ്കിലും കടല്‍ വള്ളങ്ങള്‍ 200ലധികം ഉണ്ട്. തിരുവാര്‍പ്പ് പഞ്ചായത്തിലെ മലരിക്കല്‍ ഇറമ്പം പാടശേഖരത്തുള്ള ആമ്പല്‍ വസന്തം കാണാനെത്തുന്നവരെ 800 ഏക്കറോളം വ്യാപിച്ച വിശാലമായ ആമ്പല്‍ പാടത്തിനടുത്തേക്ക് കൊണ്ടുപോകുന്നത് കന്യാകുമാരിയില്‍നിന്നും മറ്റു മത്സ്യബന്ധന തുറമുഖങ്ങളിൽനിന്നും എത്തിച്ച ഫൈബര്‍ വള്ളങ്ങളാണ്. 200 ലധികം ഫൈബര്‍ വള്ളങ്ങള്‍ ഇപ്പോള്‍ മലരിക്കലില്‍ സര്‍വീസ് നടത്തുന്നുണ്ട്. നാടന്‍ വള്ളങ്ങളെ അപേക്ഷിച്ച് കടല്‍വള്ളങ്ങള്‍ മറിയാനുള്ള സാധ്യത തീരെ കുറവാണ്. വീതിയേറിയ വള്ളത്തിലെ യാത്ര കൂടുതല്‍ സൗകര്യപ്രദമാണ്. പ്രത്യേകിച്ച് വള്ളത്തില്‍ യാത്ര ചെയ്യാത്തവര്‍ക്ക്. മാത്രമല്ല, ആഞ്ഞിലിത്തടിയില്‍ തീര്‍ത്ത നാടന്‍ വള്ളങ്ങളെക്കാള്‍ തുഴയാനും ഫൈബര്‍ വള്ളങ്ങളിൽ എളുപ്പമാണ്. മലരിക്കലിലെ ടൂറിസ്റ്റ് വള്ളങ്ങളുടെ ഉടമകള്‍ മിക്കവരും നെല്‍കര്‍ഷകര്‍ തന്നെയാണ് അവര്‍ക്ക് പാടത്തേക്കു വളവും, വിത്തു അടക്കം കാര്‍ഷിക ഉപകരണങ്ങളും തൊഴിലാളികളെയും കൊണ്ടുപോകാന്‍ വള്ളം കൂടിയേതീരൂ. ആ നിലയ്ക്ക് ഫൈബര്‍ വള്ളങ്ങള്‍ എല്ലാ അര്‍ഥത്തിലും ഉപകാരമാണ്. ഫൈബര്‍ വള്ളങ്ങള്‍ക്ക് തടിയില്‍ തീര്‍ത്ത നാടന്‍ വള്ളങ്ങളേക്കാള്‍ വിലയും കുറവാണ്. നാല്‍പതിനായിരം മുതലാണ് ഫൈബര്‍ വള്ളത്തിന്‍റെ വില.

ശ്വാസകോശ വിദഗ്ധരുടെ ‌ ദേശീയ സമ്മേളനം സമാപിച്ചു

കുമരകം: ശ്വാസകോശ വിദഗ്ധരുടെ സംഘടനയായ അക്കാദമി ഓഫ് പൾമണറി ആൻഡ് ക്രിട്ടിക്കൽ കെയർ മെഡിസിന്‍റെ ത്രിദിന ദേശീയ സമ്മേളനം ‘പൾമോകോൺ-2025’ സമാപിച്ചു. കോട്ടയം റെസ്പിറേറ്ററി സൊസൈറ്റിയുടെ ആഭിമുഖ്യത്തിൽ കുമരകം ബാക്ക് വാട്ടർ റിപ്പിൾസിൽ നടന്ന സമ്മേളനം ഇന്ത്യൻ മെഡിക്കൽ അസോസിയേഷൻ സംസ്ഥാന പ്രസിഡന്‍റ് ഡോ. കെ.എ. ശ്രീവിലാസൻ ഉദ്ഘാടനം ചെയ്തു. രാജ്യത്തെ ഏറ്റവും വലിയ വൈദ്യശാസ്ത്ര സമ്മേളനങ്ങളിലൊന്നായ പൾമോകോൺ ശ്വാസകോശ ചികിത്സാ രംഗത്തെ നൂതന പ്രവണതകളെക്കുറിച്ച് സമഗ്രമായി ചർച്ച ചെയ്തു. അണുബാധകൾ തടയാനുള്ള വാക്സിനുകൾ സൗജന്യമായി നൽകാൻ നടപടികളുണ്ടാകണമെന്ന് സമ്മേളനം ആവശ്യപ്പെട്ടു. അതികഠിന ആസ്ത്മ രോഗികൾക്ക് ജൈവകണികകൾ ഉപയോഗിച്ചുള്ള ചികിത്സയെക്കുറിച്ച് സമ്മേളനം ചർച്ച ചെയ്തു. വിലയേറിയ മരുന്നുകൾ ഇൻഷ്വറൻസ് പദ്ധതികളിലുൾപ്പെടുത്തി സാധാരണ രോഗികൾക്കും ലഭ്യമാക്കണമെന്ന് സമ്മേളനം ആവശ്യപ്പെട്ടു. ബിരുദാന്തര ബിരുദ വിദ്യാർഥികൾക്കായി പ്രശ്‍നോത്തരി, ഗവേഷണങ്ങൾ ആസ്പദമാക്കിയുള്ള പ്രബന്ധാവതരണം, പോസ്റ്റർ പ്രദർശന മത്സരം, അപൂർവ കേസ് റിപ്പോർട്ട് അവതരണങ്ങൾ എന്നിവ സമ്മേളനത്തിന്‍റെ പ്രത്യേകതയായിരുന്നു. പൾമോകോൺ-2025 ശ്വാസകോശ ചികിത്സാ ഗവേഷണ രംഗത്ത് പുതിയ ദിശാബോധം നൽകുമെന്ന് സംഘാടക സമിതി ഭാരവാഹികളായ ഡോ.പി. സുകുമാരൻ, ഡോ. കുര്യൻ ഉമ്മൻ , ഡോ.പി.എസ്. ഷാജഹാൻ എന്നിവർ പറഞ്ഞു. ചർച്ചകളിൽ ഉരുത്തിരിഞ്ഞുവന്ന നിർദ്ദേശങ്ങളും വിദഗ്ധർ ശുപാർശ ചെയ്യുന്ന പരിഹാര നടപടികളും ആരോഗ്യ വകുപ്പിനും ഉന്നത ഉദ്യോഗസ്ഥർക്കും സമർപ്പിക്കും. അക്കാദമി ഓഫ് പൾമണറി ആൻഡ് ക്രിട്ടിക്കൽ കെയർ മെഡിസിന്‍റെ പുതിയ ഭാരവാഹികളായി മൂകാംബിക ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലെ ശ്വാസകോശ വിഭാഗം പ്രഫസറും മേധാവിയുമായ ഡോ.ബി. ജയപ്രകാശ് -പ്രസിഡന്‍റ് ( കുലശേഖരം, തമിഴ്നാട്), ഡോ. ജൂഡോ വാച്ചാപറമ്പിൽ-സെക്രട്ടറി (തൃശൂർ ), ഡോ. വിപിൻ വർക്കി-ട്രഷറർ (പാലക്കാട് ) എന്നിവരെ തെരഞ്ഞെടുത്തു. ഡോ. കെ.പി. വേണുഗോപാൽ (കോട്ടയം), ഡോ. ദീപു എം. (കോട്ടയം), ഡോ.സി.എൻ. നഹാസ് (കൊല്ലം), ഡോ. റെജ്ന ദിൽനാഥ് (കണ്ണൂർ) എന്നിവരാണു പുതിയ ഗവേണിംഗ് കൗൺസിൽ അംഗങ്ങൾ. ചീഫ് കോ-ഓർഡിനേറ്ററായി ഡോ.പി. സുകുമാരൻ, സംഘാടക സമിതി ചെയർമാനായി ഡോ. കുര്യൻ ഉമ്മൻ, സംഘാടക സമിതി സെക്രട്ടറിയായി ഡോ.പി.എസ്. ഷാജഹാൻ എന്നിവരെയും തെരഞ്ഞെടുത്തു.

കച്ചേരിക്കടവ് പുനരുദ്ധാരണം: സിപിഎം ജനകീയപ്രതിഷേധം ഇന്ന്

കോട്ടയം: കച്ചേരിക്കടവ് പുനരുദ്ധാരണ പ്രവർത്തനങ്ങൾ നടത്തണമെന്നും പടിഞ്ഞാറുവശം ഭിത്തികെട്ടി ഉറപ്പിക്കണമെന്നും ഗതാഗതയോഗ്യമാക്കണമെന്നുമുള്ള ആവശ്യം ശക്തമായി. വാട്ടർഹബ്‌ പദ്ധതി എന്ന പേരിൽ കോട്ടയം എംഎൽഎ നടത്തിയ അഴിമതിയാണ് കച്ചേരിക്കടവിന്‍റെ ഇന്നത്തെ അവസ്ഥയ്ക്ക് കാരണമെന്ന് സിപിഎം ആരോപിച്ചു. എട്ടരക്കോടി രൂപ മുടക്കി പണിതെന്നു പറയുന്ന വാട്ടർ ഹബ് കാടുപിടിച്ച്‌, സാമൂഹ്യവിരുദ്ധരുടെ താവളമായിരിക്കുകയാണ്. കോടിമതയിലെ പുതിയ ബോട്ട്‌ ജെട്ടിയിൽനിന്ന്‌ കച്ചേരിക്കടവ് ബോട്ട്‌ ജെട്ടി വരെ ആകർഷകമായ ലൈറ്റുകളിട്ടും തോടിന്‍റെ ഇരുവശവും ഭിത്തികൾ കെട്ടി ഉറപ്പിച്ച് മഴവിൽപാലം പണിതും കച്ചേരിക്കടവ് സൗന്ദര്യവത്കരിക്കുമെന്നായിരുന്നു എംഎൽഎയുടെ വാഗ്‌ദാനം. എന്നാൽ എട്ടരക്കോടി മുടക്കി എന്നുപറയുന്ന കച്ചേരിക്കടവ് ബോട്ട്‌ ജെട്ടിയുടെ ഇന്നത്തെ അവസ്ഥ ദയനീയമാണ്. എംഎൽഎയുടെ ഇഷ്‌ടക്കാർക്കുവേണ്ടി തോടിന്‍റെ ഒരു വശം മാത്രം പണിതു റോഡ് ഉണ്ടാക്കിക്കൊടുക്കുക മാത്രമാണ് ചെയ്‌തതെന്നും മാലിന്യം കെട്ടിക്കിടക്കുന്നതിനാൽ പ്രദേശത്ത് അസുഖങ്ങൾ പടരുകയാണെന്നും സിപിഎം ആരോപിച്ചു. കച്ചേരിക്കടവിൽ പുനരുദ്ധാരണ പ്രവർത്തനങ്ങൾ നടത്തണമെന്നാവശ്യപ്പെട്ട് സിപിഎം നേതൃത്വത്തിൽ ഇന്നു വൈകുന്നേരം അഞ്ചിന് ബോട്ടുജെട്ടിക്കു സമീപം ജനകീയപ്രതിഷേധം സംഘടിപ്പിക്കും. സിപിഎം ട‍ൗൺ സ‍ൗത്ത്‌ ലോക്കൽ കമ്മിറ്റി നേതൃത്വത്തിലുള്ള ജനകീയ പ്രതിഷേധം കെ. അനിൽകുമാർ ഉദ്ഘാടനം ചെയ്യും.

സ്റ്റേഷന്‍ മാസ്റ്ററെ ചവിട്ടിവീഴ്ത്തിയ സംഭവം : മൂന്നു പേർക്കു സസ്‌പെന്‍ഷന്‍; ഒരാൾക്ക് സ്ഥലംമാറ്റം

ചങ്ങനാശേരി: ചങ്ങനാശേരി കെഎസ്ആര്‍ടിസി ഡിപ്പോയിലെ ഓണാഘോഷ പരിപാടികള്‍ അതിരുകടന്ന് മദ്യലഹരിയില്‍ ഒരുവിഭാഗം ജീവനക്കാര്‍ സ്റ്റേഷന്‍മാസ്റ്റര്‍ വി.ജെ. ബിനുവിനെ മര്‍ദിക്കുകയും ചവിട്ടിവീഴ്ത്തുകയും ചെയ്ത സംഭവത്തില്‍ മൂന്നു മെക്കാനിക്കല്‍ ജീവനക്കാര്‍ക്ക് സസ്‌പെന്‍ഷന്‍. ഇതേവിഭാഗത്തിലെ വകുപ്പു മേധാവിയായ വനിതാ ഉദ്യോഗസ്ഥയ്ക്ക് സ്ഥലംമാറ്റം. അരുണ്‍കുമാര്‍, നിധിന്‍, പി.പി. രാജേഷ് എന്നിവരെയാണ് കെഎസ്ആര്‍ടിസിയുടെ വിജിലന്‍സ് വിഭാഗത്തിന്‍റെ അന്വേഷണത്തെത്തുടര്‍ന്ന് സസ്‌പെന്‍ഡ് ചെയ്തത്. വകുപ്പു മേധാവിയും ഡിപ്പോ അസിസ്റ്റന്‍റ് എന്‍ജിനിയറുമായ വനിതാ ഉദ്യോഗസ്ഥയെ കണ്ണൂര്‍ ഡിപ്പോയിലേക്കു സ്ഥലം മാറ്റിയതായും സൂചനയുണ്ടെങ്കിലും ഇന്നോ നാളയോ മാത്രമേ ഇതുസംബന്ധിച്ച വിവിരം സ്ഥിരീകരിക്കപ്പെടുകയുള്ളൂ. താത്കാലിക ഡ്രൈവര്‍ ദുര്‍ഗാ പ്രസാദിനെ നേരത്തേതന്നെ ഡ്യൂട്ടിയില്‍നിന്നു മാറ്റി നിര്‍ത്തിയിരുന്നു. വിജലന്‍സ് ഓഫീസറുടെ ചുമതലയുള്ള എക്സിക്യൂട്ടീവ് ഡയറക്ടര്‍ എ. ഷാജി കഴിഞ്ഞദിവസം ചങ്ങനാശേരി ഡിപ്പോയിലെത്തി അന്വഷണം നടത്തിയതിന്‍റെ അടിസ്ഥാനത്തിലാണ് ജീവനക്കാര്‍ക്കെതിരേ നടപടിയുണ്ടായത്. ഓണാഘോഷ പരിപാടിയുടെ നിശ്ചയിക്കപ്പെട്ട സമയം കഴിഞ്ഞപ്പോള്‍ മൈക്ക് ഓഫ് ചെയ്ത് പരിപാടി അവസാനിപ്പിക്കണമെന്ന് സ്റ്റേഷന്‍ മാസ്റ്റര്‍ വി.ജെ. ബിനു നിര്‍ദേശിച്ചു. രണ്ടു പാട്ടുകള്‍ പാടാന്‍ അവസരം നല്‍കണമെന്ന് ജീവനക്കാര്‍ ആവശ്യപ്പെട്ടു. അതുകഴിഞ്ഞപ്പോള്‍ പരിപാടി നിര്‍ത്തണമെന്ന് ആവശ്യപ്പെട്ട് സ്റ്റേഷന്‍മാസ്റ്റര്‍ ബിനു മൈക്ക് ഓഫ് ചെയ്തു. എന്നാൽ, രാത്രി പത്തുവരെ ആഘോഷം വേണമെന്ന് മദ്യലഹരിയിലായിരുന്ന ഒരു വിഭാഗം ജീവനക്കാര്‍ ആവശ്യപ്പെട്ടു. ഇതു പാടില്ലെന്നു പറഞ്ഞ സ്റ്റേഷന്‍ മാസ്റ്ററെ ‌കൈയേറ്റം ചെയ്യുകയും ചവിട്ടിവീഴ്ത്തുകയുമായിരുന്നു. ഡിപ്പോയിലെ സിസി ടിവിയില്‍ പതിഞ്ഞ ദൃശ്യങ്ങള്‍ സിഎംഡിയുടെ കോട്ടയം വിജിലന്‍സ് വിഭാഗം പരിശോധിച്ചു ബോധ്യപ്പെട്ട് പ്രശ്നം സൃഷ്ടിച്ചവര്‍ക്കെതിരേ റിപ്പോര്‍ട്ടു നല്‍കിയിരുന്നു. ചവിട്ടേറ്റ് നിലത്തുവീണ സ്റ്റേഷന്‍ മാസ്റ്റര്‍ വി.ജെ. ബിനു മുഖത്തും നെറ്റിക്കും പരിക്കേറ്റ് ചങ്ങനാശേരി ജനറല്‍ ആശുപത്രിയില്‍ ചികിത്സ തേടിയിരുന്നു. സംഭവദിനം രാത്രി തന്നെ ചങ്ങനാശേരി പോലീസ് മൊഴിയെടുക്കുകയും പിറ്റേന്ന് ചങ്ങനാശേരി എസ്എച്ച്ഒയുടെ മേല്‍നോട്ടത്തില്‍ വീണ്ടും സ്റ്റേഷന്‍ മാസ്റ്ററിൽനിന്നു വിശദമായി കാര്യങ്ങള്‍ ചോദിച്ചറിയുകയും ചെയ്തിരുന്നു. മര്‍ദനമേറ്റ സ്റ്റേഷന്‍ മാസ്റ്റര്‍ ബിനു എടിഒ അഭിലാഷിനു നല്‍കിയ പരാതി, അദ്ദേഹം ഉന്നത ഉദ്യോഗസ്ഥര്‍ക്കു കൈമാറുകയായിരുന്നു. കഴിഞ്ഞ രണ്ടിന് ചങ്ങനാശേരി ഡിപ്പോയില്‍ നടന്ന ഓണാഘോഷ പരിപാടികളാണ് അതിരുവിട്ട് അലങ്കോലമായത്. നിശ്ചിത സമയത്തിലധികം ഓണാഘോഷം അനുവദിച്ചതാണ് കാര്യങ്ങള്‍ കൈവിട്ടുപോകാന്‍ കാരണമെന്നാണ് ചൂണ്ടിക്കാണിക്കപ്പെടുന്നത്.

ബെഡുകളില്ല; മെഡി. കോളജിൽ രോഗികൾക്കു ദുരിതം

കോട്ടയം: ബെഡുകളില്ല, മെഡിക്കൽ കോളജ് ആശുപത്രി വാർഡുകളിൽ രോഗികൾക്ക് ദുരിതം. കിടത്തി ചികിത്സയ്ക്കു വാർഡുകളിൽ ബെഡുകളില്ലാത്തത് ഗുരുതര രോഗികളെയടക്കം ദോഷകരമായി ബാധിച്ചിരിക്കുകയാണ്. ബെഡ് കിട്ടാത്ത രോഗികളെ മറ്റു രോഗികൾ കിടക്കുന്ന കട്ടിലിനടയിലും വരാന്തയിലുമാണ് കിടത്തുന്നത്. ഗുരുതര രോഗങ്ങൾ ബാധിച്ചു ചികിത്സ തേടുന്നവരാണ് മെഡിക്കൽ വാർഡുകളിലുള്ളത്. രോഗികളുടെ കൂട്ടിരിപ്പുകാർക്കും കിടക്കാനും ഇരിക്കാനും സ്ഥലമില്ലാത്ത സ്ഥിതിയാണ്. രോഗികൾ തറയിൽ കിടക്കുന്നത് ഇൻഫക്ഷന് വരെ കാരണമാകും. ഈ പ്രശ്നത്തിന് അടിയന്തര പരിഹാരം ഉണ്ടാകണമെന്ന് മെഡിക്കൽകോളജിൽ ചികിത്സയിലുള്ള രോഗികളുടെ കൂട്ടിരിപ്പുകാർ ചൂണ്ടിക്കാട്ടി.

യാത്രാക്ലേശം അതിരൂക്ഷം : ഗുരുവായൂർ-എറണാകുളം പാസഞ്ചർ കോട്ടയത്തേക്കു നീട്ടണം

ഏറ്റുമാനൂർ: എറണാകുളത്തുനിന്ന് വൈകുന്നേരം കോട്ടയത്തേക്കുള്ള യാത്രാക്ലേശം അതിരൂക്ഷമായി തുടരുന്ന സാഹചര്യത്തിൽ ഗുരുവായൂർ-എറണാകുളം പാസഞ്ചർ ട്രെയിൻ കോട്ടയത്തേക്ക് നീട്ടണമെന്ന ആവശ്യം ശക്തമാകുന്നു. വൈകുന്നേരം വേണാട്, മെമു ട്രെയിനുകളിൽ വലിയ തിരക്കാണ് അനുഭവപ്പെടുന്നത്. തൃപ്പൂണിത്തുറയിൽനിന്ന് മിക്ക ട്രെയിനുകളും തിങ്ങിനിറഞ്ഞാണ് വരുന്നത്. ചവിട്ടുപടിയിൽ വരെ യാത്രക്കാർ നിൽക്കുന്ന അപകടകരമായ സാഹചര്യമാണ് നിലവിലുള്ളത്. ഈ സാഹചര്യത്തിൽ വേണാടിനു മുമ്പ് കോട്ടയം ഭാഗത്തേക്ക് ഒരു ട്രെയിൻ വേണമെന്നാണ് യാത്രക്കാർ ആവശ്യപ്പെടുന്നത്. ആയിരക്കണക്കിന് പ്രതിദിന യാത്രക്കാരാണ് കോട്ടയം ജില്ലയിൽനിന്ന് എറണാകുളത്തെ വിവിധ ഓഫീസുകളിൽ ജോലി ആവശ്യങ്ങൾക്കായി എത്തിച്ചേരുന്നത്. എന്നാൽ, വൈകുന്നേരം ആവശ്യത്തിന് ട്രെയിനുകൾ ഇല്ല. വൈകുന്നേരം 03.50ന് എറണാകുളം ടൗണിൽ എത്തിച്ചേരുന്ന 56317 ഗുരുവായൂർ - എറണാകുളം പാസഞ്ചർ ട്രെയിൻ കോട്ടയത്തേക്ക് നീ‌ട്ടിയാൽ വൈകുന്നേരത്തെ തിരക്കിന് വലിയൊരളവുവരെ പരിഹാരമാകുമെന്ന് യാത്രക്കാർ ചൂണ്ടിക്കാട്ടുന്നു. കോട്ടയം വരെ ഒരു ട്രെയിൻ ലഭിച്ചാൽ അത്രയും തിരക്ക് കുറയുമെന്ന ആശ്വാസമാണ് വേണാടിലെ ദീർഘദൂര യാത്രക്കാർക്കും പങ്കുവയ്ക്കാനുള്ളത്. എറണാകുളം ജംഗ്ഷനിലെ പ്ലാറ്റ് ഫോം ദൗർലഭ്യത്തിനും പാസഞ്ചർ കോട്ടയത്തേക്ക് ദീർഘിപ്പിക്കുന്നതിലൂടെ പരിഹാരമാകും. കോട്ടയത്തുനിന്ന് വൈകുന്നേരം 06.15 പുറപ്പെട്ടാൽ 56318 എറണാകുളം-ഗുരുവായൂർ പാസഞ്ചറിന്‍റെ ഷെഡ്യൂൾഡ് സമയമായ 07.48ന് തന്നെ എറണാകുളം ടൗണിൽ എത്തിച്ചേരാനും സാധിക്കും. റേക്ക് ഷെയറിൽ ചെറിയ മാറ്റം വരുത്തിയാൽ വളരെ എളുപ്പത്തിൽ സാധ്യമാകുന്ന സർവീസിന് ജനപ്രതിനിധികളുടെ ശക്തമായ ഇടപെടൽ അനിവാര്യമാണ്. വൈകുന്നേരം 05.20നു ശേഷം രാത്രി 09.45ന് മാത്രമാണ് ഏറ്റുമാനൂർ, കുറുപ്പന്തറ, വൈക്കം, പിറവം, മുളന്തുരുത്തി സ്റ്റേഷനുകളിൽ സ്റ്റോപ്പുള്ള അടുത്ത സർവീസുള്ളത്. ജില്ലയിലെ വിവിധ ഓഫീസുകളിൽ ജോലി ആവശ്യങ്ങൾക്കായി എത്തുന്നവരും ഇതുമൂലം വളരെയധികം ബുദ്ധിമുട്ടുന്നുണ്ട്. 56317/18 ഗുരുവായൂർ- എറണാകുളം പാസഞ്ചർ കോട്ടയത്തേക്ക് എത്തുന്നതോടെ ജില്ലയിലെ യാത്രാക്ലേശത്തിന് വലിയ തോതിൽ ആശ്വാസമാകുമെന്നു മാത്രമല്ല, കോട്ടയത്തുനിന്ന് കൊല്ലത്തേക്കുള്ള 66315 മെമുവിന് കണക്‌ഷൻ ലഭിക്കുകയും ചെയ്യും. ഇതോടെ തെക്കൻ ജില്ലകളിലേക്കുള്ള യാത്രയും സുഗമമാകുമെന്ന് ഫ്രണ്ട്‌സ് ഓൺ റെയിൽസ്, ഓൾ കേരള റെയിൽവേ യൂസേഴ്സ്അസോസിയേഷൻ അടക്കം വിവിധ പാസഞ്ചർ അസോസിയേഷനുകൾ ചൂണ്ടിക്കാട്ടുന്നു.

മാര്‍ സ്ലീവാ കാന്‍സര്‍ കെയര്‍ സെന്‍റർ നാമകരണം മാര്‍ പള്ളിക്കാപറമ്പിലിനുള്ള ആദരവായി

‌പാലാ: മാര്‍ സ്ലീവാ മെഡിസിറ്റിയിലെ പുതിയ കാന്‍സര്‍ സെന്‍ററിന് മാര്‍ ജോസഫ് പള്ളിക്കാപറമ്പില്‍ എപ്പിസ്‌കോപ്പല്‍ ഗോള്‍ഡന്‍ ജൂബിലി മെമ്മോറിയല്‍ മാര്‍ സ്ലീവാ കാന്‍സര്‍ കെയര്‍ ആന്‍ഡ് റിസര്‍ച്ച് സെന്‍റർ എന്ന് മാര്‍ ജോസഫ് കല്ലറങ്ങാട്ട് നാമകരണം നടത്തി. പാലാ രൂപതയുടെ പ്രഥമ ബിഷപ്പായിരുന്ന മാര്‍ സെബാസ്റ്റ്യന്‍ വയലിലിന്‍റെ പിന്‍ഗാമിയും പാലായുടെ ദ്വിതീയ മെത്രാനും 99 ന്‍റെ നിറവിലെത്തിയ ആത്മീയ തേജസുമായ ബിഷപ് എമിരറ്റസ് മാര്‍ ജോസഫ് പള്ളിക്കാപറമ്പിൽ പുതിയ സെന്‍ററിന്‍റെ ഉദ്ഘാടനം നിര്‍വഹിച്ചത് സുവര്‍ണ നിമിഷങ്ങളായി മാറി. നാമകരണ പ്രഖ്യാപനം സദസ് ഹര്‍ഷാരവത്തോടെയാണ് സ്വീകരിച്ചത്. മാര്‍ സ്ലീവാ മെഡിസിറ്റിയുടെ ആറാം വാര്‍ഷികത്തിന്‍റെ ഭാഗമായി ആശുപത്രി സ്ഥാപകനും രക്ഷാധികാരിയുമായ ബിഷപ് മാര്‍ ജോസഫ് കല്ലറങ്ങാട്ടിന്‍റെ മുഖ്യകാര്‍മികത്വത്തില്‍ ആശുപത്രി ചാപ്പലില്‍ വിശുദ്ധ കുര്‍ബാനയോടെയായിരുന്നു ചടങ്ങുകള്‍ ആരംഭിച്ചത്. തുടര്‍ന്ന് പുതിയ സെന്‍ററിലേക്ക് ബാന്‍ഡ് മേളത്തിന്‍റെ അകമ്പടിയില്‍ വിശിഷ്ടാതിഥികളെ സ്വീകരിച്ചാനയിച്ചു. വെഞ്ചരിപ്പിന് സിബിസിഐ പ്രസിഡന്‍റും തൃശൂര്‍ അതിരൂപത അധ്യക്ഷനുമായ മാര്‍ ആന്‍ഡ്രൂസ് താഴത്ത് മുഖ്യകാര്‍മികത്വം വഹിച്ചു. ഷംഷാബാദ് രൂപത സഹായ മെത്രാന്‍ മാര്‍ ജോസഫ് കൊല്ലംപറമ്പില്‍, പാലാ രൂപതയില്‍നിന്നും മറ്റ് വിവിധ രൂപതകളില്‍നിന്നുമായി എത്തിയ നൂറുകണക്കിനു വൈദികശ്രേഷ്ഠര്‍, വിവിധ സന്യസ്ത സഭകളിലെ പ്രൊവിന്‍ഷ്യല്‍മാര്‍, അല്മായ പ്രമുഖര്‍, രാഷ്ടീയ സംഘടനാ ഭാരവാഹികള്‍, സാസ്‌കാരിക പ്രവര്‍ത്തകര്‍ എന്നിവരുടെ സാന്നിധ്യവും ഉദ്ഘാടന ചടങ്ങിന്‍റെ മാറ്റുകൂട്ടി. വിപുലമായ സൗകര്യങ്ങള്‍ പാലാ: ഒരുലക്ഷത്തില്‍പരം ചതുരശ്രഅടിയുള്ള പുതിയ സെന്‍ററില്‍ മെഡിക്കല്‍ ഓങ്കോളജി, ഹെമറ്റോ ഓങ്കോളജി, സര്‍ജിക്കല്‍ ഓങ്കോളജി, റേഡിയേഷന്‍ ഓങ്കോളജി, ന്യൂക്ലിയര്‍ മെഡിസിന്‍, സ്റ്റെം സെല്‍ ആന്‍ഡ് ബോണ്‍ മാരോ ട്രാന്‍സ്പ്ലാന്‍റ്, കാര്‍ - ടി സെല്‍ തെറാപ്പി യൂണിറ്റ്, പാലിയേറ്റീവ് ഓങ്കോളജി, ഓങ്കോ ന്യൂട്രീഷന്‍, സൈക്കോ ഓങ്കോളജി, റീ ഹാബിലിറ്റേറ്റീവ് ഓങ്കോളജി എന്നിവയ്ക്കു പുറമെ കാന്‍സര്‍രോഗ ഗവേഷണ പരിപാടികള്‍, 14 മള്‍ട്ടിഡിസിപ്ലിനറി കാന്‍സര്‍ ക്ലിനിക്കുകള്‍ എന്നിവ പ്രവര്‍ത്തനം തുടങ്ങും. റേഡിയേഷന്‍ ചികിത്സയ്ക്കുള്ള വിദേശനിര്‍മിത ലിനാക്, പെറ്റ് സിറ്റി - സ്‌കാന്‍, ഗാമാ കാമറ അഥവാ സ്പെക്ട് സ്‌കാന്‍ മജ്ജമാറ്റിവയ്ക്കല്‍ ശസ്ത്രക്രിയയ്ക്കുള്ള അഫെറേസീസ് മെഷീന്‍ ആന്‍ഡ് ക്രയോ പ്രിസര്‍വേഷന്‍ യൂണിറ്റ് എന്നിവയും ഉടന്‍ പ്രവര്‍ത്തനസജ്ജമാകും. ഒക്ടോബര്‍ ആദ്യം മുതല്‍ പെറ്റ് സിസിടി, സ്പെക്ട് മെഷീനുകള്‍ ഉപയോഗിച്ചുള്ള ചികിത്സകളും കീമോതെറാപ്പി ചികിത്സകളും പുതിയ സെന്‍ററില്‍ ആരംഭിക്കും. നവംബര്‍ ആദ്യവാരം മുതല്‍ ബോണ്‍മാരോ ട്രാന്‍സ്പ്ലാന്‍റ് യൂണിറ്റിന്‍റെ പ്രവര്‍ത്തനവും 2026 ജനുവരി ആദ്യം മുതല്‍ റേഡിയേഷന്‍ ഓങ്കോളജി ആരംഭിക്കും. ഇതോടെ കാന്‍സര്‍ രോഗത്തിനുള്ള സമ്പൂര്‍ണ ചികിത്സാകേന്ദ്രമായി മാര്‍ സ്ലീവാ കാന്‍സര്‍ കെയര്‍ ആന്‍ഡ് റിസര്‍ച്ച് സെന്‍റര്‍ മാറുമെന്ന് മാര്‍ സ്ലീവാ ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ പറഞ്ഞു.

അന്പാടിയായി നാടും നഗരവും

കോട്ടയം: വീഥികള്‍ നിറഞ്ഞ് ഉണ്ണിക്കണ്ണന്‍മാർ; രാധമാരും ഗോപികമാരും ഒപ്പം കൂടിയതോടെ നാടും നഗരവും അന്പാടിയായി മാറി. വിവിധ ബാലഗോകുലങ്ങളുടെ നേതൃത്വത്തില്‍ നടന്ന ശ്രീകൃഷ്ണ ജയന്തി ആഘോഷം ജില്ലയിലെന്പാടും പങ്കാളിത്തത്താല്‍ സമ്പന്നമായി. കൃഷ്ണ, രാധ വേഷധാരികളായി കുട്ടികള്‍ എത്തിയതോടെ ആഘോഷം സജീവമായി. ജില്ലയില്‍ 1,100 ആഘോഷങ്ങളിലായി 2000 ശോഭായാത്രകളാണ് ഇത്തവണ സംഘടിപ്പിച്ചത്. ഉച്ചകഴിഞ്ഞ് വിവിധയിടങ്ങളിലായി ആരംഭിച്ച്, പ്രധാന നഗരങ്ങളിലും ജംഗ്ഷനുകളിലും മഹാ ശോഭായാത്രയായി സംഗമിക്കുന്ന രീതിയിലായിരുന്നു ശ്രീകൃഷ്ണ ജയന്തി ആഘോഷം. ഉറിയടി, നിശ്ചല ദൃശ്യം, ഗോപികാനൃത്തം എന്നിവ ശോഭായാത്രകളുടെ മാറ്റ് വര്‍ധിപ്പിച്ചു. തിരുനക്കരയിലും സമീപ പ്രദേശങ്ങളില്‍ നിന്നുമുള്ള ശോഭായാത്രകള്‍ കോട്ടയം സെന്‍ട്രല്‍ ജംഗ്ഷനില്‍ സംഗമിച്ചപ്പോള്‍ നയനാനന്ദകരമായ കാഴ്ചകള്‍ക്കാണ് സാക്ഷ്യം വഹിച്ചത്. തുടര്‍ന്ന്, മഹാശോഭായാത്ര തിരുനക്കര മഹാദേവ ക്ഷേത്രാങ്കണത്തില്‍ സമാപിച്ചു. ബാലഗോകുലം സംസ്ഥാന ഉപാധ്യക്ഷന്‍ ഡോ. എന്‍. ഉണ്ണിക്കൃഷ്ണന്‍, അഞ്ജു സതീഷ്, പി.ആര്‍. സജീവ്, ജി. രതീഷ്, സി.എന്‍. പുരുഷോത്തമന്‍ തുടങ്ങിയവര്‍ വിവിധയിടങ്ങളില്‍ ശോഭായത്ര ഉദ്ഘാടനം ചെയ്തു.

മുദ്രപത്ര വില: കേസ് സെറ്റില്‍ ചെയ്യാന്‍ നോട്ടീസ് ലഭിക്കുന്നതായി പരാതി

കോട്ടയം: രണ്ടു വര്‍ഷം മുമ്പ് ആധാരം ചെയ്ത വസ്തുവിന്‍റെ മുദ്രപത്ര വില സംബന്ധിച്ചു കേസ് സെറ്റില്‍ ചെയ്യാന്‍ വ്യാപകമായി നോട്ടീസ് ലഭിക്കുന്നതായി പരാതി. വൈക്കം തലയാഴം സബ് രജിസ്ട്രാര്‍ ഓഫീസില്‍ 2023 ഡിസംബറില്‍ രജിസ്റ്റര്‍ ചെയ്ത ആധാരത്തിലാണു തര്‍ക്കം ഉന്നയിച്ച് പിഴ ഒടുക്കാനുള്ള നോട്ടീസ് ലഭിച്ചിരിക്കുന്നത്. ജില്ലയുടെ വിവിധ ഭാഗങ്ങളില്‍ ഇതേ രീതിയില്‍ പിഴ ഒടുക്കാനായി സ്ഥലം ഉടമകള്‍ക്ക് നോട്ടീസ് ലഭിക്കുന്നുണ്ട്. മുദ്രപത്രവില 79,400-രൂപ, രജിസ്‌ട്രേഷന്‍ ഫീസ് 19,850-രൂപ എന്നിങ്ങനെ മൊത്തം 99,250 രൂപ അടയ്ക്കാനാണ് തലയാഴത്തെ സ്ഥലമുടമയ്ക്ക് നോട്ടീസ് വന്നത്. തലയാഴം സബ് രജിസ്ട്രാര്‍ ഓഫീസിന് അടുത്തുതന്നെ ഓഫീസുള്ള ആളാണ് ആധാരം ചെയ്തത്. ആധാരം നടത്തുന്നതിന് മുമ്പ് സബ് രജിസ്ട്രാര്‍ ഓഫീസില്‍നിന്നും വാങ്ങാന്‍ പോകുന്ന വസ്തുവിന്‍റെ സര്‍ക്കാര്‍ നിര്‍ദേശിച്ച ഫെയര്‍ വാല്യു ഉറപ്പാക്കിയതിനുശേഷമാണ് ആധാരം നടത്തിയത്. വാങ്ങിയ വസ്തുവാകട്ടെ നികത്തുഭൂമിയാണ്. ഇനി സ്ഥലം തരം മാറ്റാനുള്ള നടപടിക്രമങ്ങള്‍ നടക്കുന്നതിനുള്ള മാപ്പ്, ലൊക്കേഷന്‍ സ്‌കെച്ച് എന്നിവയ്ക്കായും സ്ഥലമുടമ ഫീസ് അടച്ച ശേഷമാണ് വലിയ തുകയുടെ പിഴ അടയ്ക്കാനുള്ള പുതിയ ഉത്തരവ്. വീട് വയ്ക്കാന്‍ ലോണ്‍ എടുത്തും മറ്റും 5-10 സെന്‍റ് സ്ഥലം വാങ്ങിയവര്‍ക്കാണ് പിഴ അടയ്ക്കാനായി അധികൃതര്‍ നോട്ടീസ് അയച്ചിരിക്കുന്നത്. വസ്തു വാങ്ങുമ്പോള്‍തന്നെ വസ്തുവിന്‍റെ ഫെയര്‍ വാല്യു, മുദ്രപത്രത്തിന്‍റെ തുക എന്നിവ പറഞ്ഞിരുന്നുവെങ്കില്‍ കടം വാങ്ങിയെങ്കിലും പണം അടയ്ക്കാമായിരുന്നു. പലരും വസ്തു വാങ്ങിയതിന്‍റെ കടം വീട്ടാന്‍ കഴിയാതെ വിഷമിക്കുമ്പോഴാണ് അണ്ടര്‍ വാല്യു സംബന്ധിച്ച് നോട്ടീസ് വരുന്നത്. പലര്‍ക്കും താങ്ങാന്‍ പറ്റാത്ത വലിയ തുകയാണ് അടയ്ക്കേണ്ടി വരുന്നത്. അണ്ടര്‍ വാല്യു സംബന്ധിച്ച നോട്ടീസ് ലഭിച്ചവര്‍ക്ക് വസ്തു വില്‍ക്കാന്‍ സാധിക്കില്ലാത്തതിനാല്‍ വലിയ പ്രതിസന്ധിയാണ് ഇതുമൂലം ഉണ്ടാകുന്നതെന്ന് ഉപയോക്താക്കള്‍ പറയുന്നു. മുട്ടമ്പലത്തെ തര്‍ക്ക പരിഹാര കോടതിയില്‍ കഴിഞ്ഞ ദിവസം 26 അണ്ടര്‍ വാല്യു കേസുകളാണ് എത്തിയത്. ടാര്‍ ചെയ്യാത്ത പഞ്ചായത്ത് റോഡ് സമീപത്തുള്ളതിനാല്‍ 15 സെന്‍റ് നികത്തു ഭൂമിക്ക് 15,80,000 രൂപയാണ് സര്‍ക്കാര്‍ നിശ്ചയിച്ചിരിക്കുന്നത്, ഈ വസ്തു വീട് വയ്ക്കാന്‍ തരം മാറ്റുന്നതിനുള്ള നൂലാമാലകളും ഏറെയാണെന്ന് ഉപയോക്താവ് പറയുന്നു. സര്‍ക്കാര്‍ ഖജനാവ് നിറയ്ക്കാന്‍ സാധാരണക്കാരായ ഉപയോക്താക്കളെ പിഴിയുന്നു എന്നാണ് പൊതുവേയുള്ള ആക്ഷേപം.

കേരള കോണ്‍ഗ്രസിന്‍റെ പോരാട്ടം പ്രാദേശിക പാര്‍ട്ടികള്‍ക്കു മാതൃക: ജോസ് കെ. മാണി

കോട്ടയം : വന്യജീവി സംരക്ഷണം(കേരള ഭേദഗതി)നിയമനിര്‍മാണത്തിനുള്ള കേരള കോണ്‍ഗ്രസ് പാര്‍ട്ടിയുടെ പോരാട്ടം ഇന്ത്യയിലെ എല്ലാ പ്രാദേശിക പാര്‍ട്ടികള്‍ക്കും മാതൃകയാണെന്ന് പാര്‍ട്ടി ചെയര്‍മാന്‍ ജോസ് കെ. മാണി. ജനവാസ മേഖലകളില്‍ ഇറങ്ങുന്ന അക്രമകാരികളായ വന്യമൃഗങ്ങളെ വെടിവച്ചു കൊല്ലാനുള്ള നിയമ നിര്‍മാണത്തിനായി ഏറെ നാളുകളായി കേരള കോണ്‍ഗ്രസ്-എം ശക്തമായ പോരാട്ടത്തിലായിരുന്നു. എന്നാല്‍ കേന്ദ്ര വന്യജീവി സംരക്ഷണ നിയമം തടസമായി നില്‍ക്കുകയാണ്. പതിറ്റാണ്ടുകളായി കേരളത്തിലെ മലയോര കര്‍ഷകര്‍ ഉന്നയിക്കുന്ന ജീവിതാവശ്യമാണ് കേരള കോണ്‍ഗ്രസ്-എം യാഥാര്‍ഥ്യമാക്കിയെടുത്തതെന്നും ജോസ് കെ. മാണി പറഞ്ഞു. കേരള ലോയേഴ്‌സ് കോണ്‍ഗ്രസ്-എം സംസ്ഥാന പ്രതിനിധി സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സമ്മേളനത്തില്‍ ജോസഫ് ജോണ്‍ അധ്യക്ഷത വഹിച്ചു. കേരള കോണ്‍ഗ്രസ്-എം ജനറല്‍ സെക്രട്ടറി സ്റ്റീഫന്‍ ജോര്‍ജ് , വിജി എം. തോമസ് , അഡ്വ. ബോബി ജോണ്‍ എന്നിവര്‍ പ്രസംഗിച്ചു. സംസ്ഥാന ഭാരവാഹികളായി ജോസഫ് ജോണ്‍ (ആലപ്പുഴ , പ്രസിഡന്‍റ്) , ജസ്റ്റിന്‍ ജേക്കബ് ( സംഘടനാ ചുമതലയുള്ള ജനറല്‍ സെക്രട്ടറി) , കെ. ഇസഡ്. കുഞ്ചറിയ കുഴിവേലി (ട്രഷറര്‍), പി.കെ. ലാല്‍, എം.എം മാത്യു, ഗീത ജോബ്, സണ്ണി മാന്തറ ( വൈസ് പ്രസിഡന്‍റുമാര്‍), ഷിബു കട്ടക്കയം ( കോഴിക്കോട്), സണ്ണി ചാത്തുകുളം ( കോട്ടയം), സതീഷ് ബസന്ത് (തിരുവനന്തപുരം), സജൂഷ് മാത്യു (തൃശൂര്‍), ജിമ്മി ജോര്‍ജ്, മോന്‍സി കുര്യാക്കോസ്, ബിനു തോട്ടുങ്കല്‍(ജനറല്‍ സെക്രട്ടറിമാര്‍) എന്നിവരെ തെരഞ്ഞെടുത്തു.

ശബരി എയര്‍പോര്‍ട്ട്: മണിമല വില്ലേജ് സര്‍വേ ഭാഗികമായി പൂര്‍ത്തിയായി

കോട്ടയം: എരുമേലിയിലെ നിര്‍ദിഷ്ട ശബരി എയര്‍പോര്‍ട്ട് നിര്‍മാണത്തിനു മുന്നോടിയായി മണിമല വില്ലേജ് പരിധിയില്‍ ചെറുവള്ളി എസ്റ്റേറ്റ് വക ഒഴികെ മറ്റു വ്യക്തികളുടെ സ്ഥലം സര്‍വേ പൂര്‍ത്തിയായി. ബിലീവേഴ്‌സ് ചര്‍ച്ചിനു കീഴില്‍ അയന ചാരിറ്റബിള്‍ ട്രസ്റ്റിന്‍റെ കൈവശമുള്ള ചെറുവള്ളി എസ്റ്റേറ്റിന്‍റെ ഉടമസ്ഥത സംബന്ധിച്ച് സര്‍ക്കാരുമായുള്ള കേസിന് തീരുമാനമാകാതെ അവിടെ സര്‍വേ നടക്കില്ല. ഇതൊഴികെ മണിമല വില്ലേജില്‍ സ്വകാര്യ വ്യക്തികളുടെ 15 ഹെക്ടറിന്‍റെ സര്‍വേയാണ് പൂര്‍ത്തിയായത്. ഇതിന്‍റെ റിപ്പോര്‍ട്ട് റവന്യു വകുപ്പിന് കൈമാറിയിട്ടുണ്ട്. എരുമേലി തെക്ക് വില്ലേജില്‍ സ്വകാര്യ വ്യക്തികളുടെ 20 ഹെക്ടറിലെ സര്‍വേ കഴിഞ്ഞു. എരുമേലി തെക്ക് വില്ലേജ് പരിധിയിലുള്ള ചെറുവള്ളി എസ്റ്റേറ്റ് സര്‍വേയും കേസില്‍ തീരുമാനമുണ്ടാകാതെ നടക്കില്ല. കേസിനു തീരുമാനമുണ്ടായാലും ചെറുവള്ളി എസ്‌റ്റേറ്റിലെ മരങ്ങള്‍, കെട്ടിടങ്ങള്‍ തുടങ്ങിയവയുടെ എണ്ണം തിട്ടപ്പെടുത്തി വേണം നഷ്ടപരിഹാര തുക നിശ്ചയിക്കാന്‍. എരുമേലി തെക്ക്, മണിമല വില്ലേജുകളില്‍ നിന്ന് 1039.876 ഹെക്ടറാണ് (2570 ഏക്കര്‍) വിമാനത്താവളത്തിന് ഏറ്റെടുക്കുന്നത്. ജീവനക്കാരുടെ കുറവും പ്രതികൂല കാലാവസ്ഥയും മൂലം സര്‍വേ പ്രതീക്ഷിച്ച വേഗത്തില്‍ മുന്നോട്ടുപോകുന്നില്ല. സര്‍വേ പൂര്‍ത്തിയായശേഷം ഏറ്റെടുക്കുന്ന ഭൂമിയില്‍ മരങ്ങളുടെ മൂല്യം സോഷ്യല്‍ ഫോറസ്ട്രി വകുപ്പും കെട്ടിടങ്ങളുടേത് പൊതുമരാമത്തും ഭൂമിവില റവന്യൂ വകുപ്പും നിശ്ചയിക്കണം. ബിലീവേഴ്‌സ് ചര്‍ച്ചും സര്‍ക്കാരും തമ്മില്‍ എസ്റ്റേറ്റ് ഉടമസ്ഥതാവകാശം സംബന്ധിച്ച കേസ് ധാരണയിലാക്കുകയോ മൂല്യവില നിശ്ചയിച്ചശേഷം നഷ്ടപരിഹാരം കോടതിയില്‍ കെട്ടിവച്ച് സ്ഥലം ഏറ്റെടുക്കുകയോ ചെയ്താല്‍ മാത്രമേ പദ്ധതിക്ക് വേഗമുണ്ടാകു. ഇതിനൊപ്പം സ്ഥലം വിട്ടുകൊടുക്കുന്നവര്‍ക്ക് നഷ്ടപരിഹാരം, എസ്റ്റേറ്റ് തൊഴിലാളികളുടെയും പ്രദേശവാസികളുടെയും പുനരധിവാസം തുടങ്ങിയ നടപടികളും നടപ്പാകണം. വിമാനത്താവളം നിര്‍മാണത്തിന് കേന്ദ്ര പരിസ്ഥിതി, വനം, വ്യോമയാന വകുപ്പുകളുടെ പരിശോധനയും അനുമതിയും ബാക്കിയുണ്ട്.

തദ്ദേശ തെരഞ്ഞെടുപ്പ്: സ്ഥാനാര്‍ഥിനിര്‍ണയ ചര്‍ച്ചകളിലേക്ക് മുന്നണികളും പാര്‍ട്ടികളും

കോട്ടയം: തദ്ദേശ തെരഞ്ഞെടുപ്പിന് അന്തിമ വോട്ടര്‍ പട്ടിക പുറത്തിറങ്ങി സംവരണ വാര്‍ഡുകള്‍ നിശ്ചയിക്കുന്ന നടപടികളിലേക്ക് തെരഞ്ഞെടുപ്പ് കമ്മീഷന്‍ കടന്നതോടെ സീറ്റ്, സ്ഥാനാര്‍ഥി നിര്‍ണയ ചര്‍ച്ചകളിലേക്കുള്ള പ്രാരംഭ ചര്‍ച്ചകള്‍ മുന്നണികളും പാര്‍ട്ടികളും ആരംഭിച്ചു. 15ന് ജില്ലാ കളക്ടര്‍ തദ്ദേശ സ്വയംഭരണ സ്ഥാപനങ്ങളിലെ അധ്യക്ഷന്മാരുടെയും സെക്രട്ടറിമാരുടെയും യോഗം വിളിച്ചിട്ടുണ്ട്. 26ന് സെക്രട്ടറിമാര്‍ക്ക് സംവരണ വാര്‍ഡുകള്‍ നിശ്ചയിക്കുന്നതിനായി പരിശീലനവുമുണ്ട്. ഇതിനുശേഷം വാര്‍ഡുകളുടെ നറുക്കെടുപ്പ് നടക്കും. കഴിഞ്ഞ തവണത്തേക്കാള്‍ കൂടുതല്‍ സീറ്റുകള്‍ വാങ്ങുന്നതിനായിട്ടാണ് എല്‍ഡിഎഫിലെയും യുഡിഎഫിലെയും കക്ഷികളുടെ ശ്രമം. എന്‍ഡിഎ മുന്നണിയിലാകട്ടെ ബിഡിജെഎസ് ഉള്‍പ്പെടെയുള്ള കക്ഷികള്‍ കൂടുതല്‍ സീറ്റ് ആവശ്യപ്പെട്ടുകഴിഞ്ഞു. പരമാവധി പുതുമുഖങ്ങളെ രംഗത്തിറക്കാനാണ് സിപിഎമ്മിന്‍റെയും സിപിഐയുടെയും തീരുമാനം. സ്ഥിരം മത്സരിക്കുന്നവര്‍ക്ക് ഇത്തവണ സീറ്റുണ്ടാകില്ല. കേരള കോണ്‍ഗ്രസ് പുതുമുഖങ്ങള്‍ക്ക് പ്രാമുഖ്യം നല്‍കുന്നതിനൊപ്പം ജയസാധ്യതയ്ക്കാണ് മുഖ്യ പരിഗണന നല്‍കിയിരിക്കുന്നത്. പഞ്ചായത്തു തലത്തില്‍ ഇതിനായി കോര്‍ കമ്മിറ്റി രൂപീകരിച്ചിട്ടുണ്ട്. കോണ്‍ഗ്രസും പുതുമുഖങ്ങള്‍ക്ക് പ്രാമുഖ്യം നല്‍കാനാണ് തീരുമാനിച്ചിരിക്കുന്നതെങ്കിലും അവസാന നിമിഷം ഗ്രൂപ്പുകളും നേതാക്കളും ഇടപെടുന്നതോടെ പഴയ മുഖങ്ങളും മത്സര രംഗത്തുണ്ടാകും. ബിജെപിയും ജനസമ്മതിയുള്ള സ്ഥാനാര്‍ഥികളെ നിര്‍ത്തി ജയം ഉറപ്പിക്കാനാണു തീരുമാനിച്ചിരിക്കുന്നത്. സീറ്റുകൾ വച്ചുമാറ്റവും ആലോചനയിൽ ജില്ലാ പഞ്ചായത്തില്‍ പുതിയതായി രൂപീകരിക്കപ്പെട്ട തലനാട് ഡിവിഷനുവേണ്ടി എല്‍ഡിഎഫില്‍ കേരള കോണ്‍ഗ്രസ്-എമ്മും സിപിഐയും അവകാശവാദം ഉന്നയിക്കും. പൂഞ്ഞാര്‍ നിയോജക മണ്ഡലത്തിലെ തങ്ങളുടെ ശക്തികേന്ദ്രമെന്ന നിലയിലാണു കേരള കോണ്‍ഗ്രസ്-എം സീറ്റിന് ഇപ്പോഴേ അവകാശവാദം ഉന്നയിച്ചിരിക്കുന്നത്. നിലവിലെ പൂഞ്ഞാര്‍ മറ്റൊരു സീറ്റുമായി വച്ചു മാറാനും കേരള കോണ്‍ഗ്രസിന് ആലോചനയുണ്ട്. സിപിഐയ്ക്കും ചില സീറ്റുകള്‍ വച്ചുമാറാന്‍ ആലോചനയുണ്ട്. വാര്‍ഡുകളുടെ എണ്ണത്തില്‍ വര്‍ധനയുണ്ടായ സാഹചര്യത്തില്‍ ആനുപാതികമായി സീറ്റുകളുടെ എണ്ണത്തിലും വര്‍ധന വേണമെന്നും എല്‍ഡിഎഫില്‍ ഇക്കാര്യം ഉന്നയിക്കുമെന്നും സിപിഐയുടെ ജില്ലയിലെ പ്രമുഖ നേതാവ് പറഞ്ഞു. ജില്ലാ പഞ്ചായത്തില്‍ സീറ്റിനായി മുസ്‌ലിം ലീഗും യുഡിഎഫില്‍ തലനാട് സീറ്റിനായി കോണ്‍ഗ്രസ് അവകാശവാദമുന്നയിക്കാനാണ് സാധ്യത. കേരള കോണ്‍ഗ്രസിനും പുതിയ സീറ്റില്‍ നോട്ടമുണ്ട്. മുസ്‌ലിം ലീഗ് ഇത്തവണ ജില്ലാ പഞ്ചായത്തില്‍ സീറ്റിനായി അവകാശവാദം ഉന്നയിക്കും. കഴിഞ്ഞ തവണ സീറ്റു ചര്‍ച്ചയില്‍ ഇത്തവണ സീറ്റുനല്‍കാമെന്ന ധാരണയുണ്ടെന്നാണ് മുസ്‌ലിം ലീഗ് നേതാക്കള്‍ പറയുന്നത്. മുണ്ടക്കയം, എരുമേലി, കാഞ്ഞിരപ്പള്ളി സീറ്റുകളിലാണ് ലീഗിനു നോട്ടം. വാര്‍ഡുകളുടെ സംവരണം നറുക്കിട്ടില്ലെങ്കിലും കണക്കുകൂട്ടലുകള്‍ നിരത്തി മുന്നണികളിലെയും പാര്‍ട്ടികളിലെയും നേതാക്കള്‍ പലരും രംഗത്തെത്തിക്കഴിഞ്ഞു. കോണ്‍ഗ്രസില്‍നിന്ന് മുന്‍ ജില്ലാ പഞ്ചായത്ത് പ്രസിഡന്‍റ് ജോഷി ഫിലിപ്പ്, രാധാ വി. നായര്‍, സുധാ കുര്യന്‍, ബെറ്റി ടോജോ, ശോഭാ സലിമോന്‍, സിജു കെ. ഐസക്, കുഞ്ഞ് പുതുശേരി, ആര്‍. പ്രേംജി, മോളി പീറ്റര്‍ തുടങ്ങിയവര്‍ മത്സരരംഗത്ത് ഉണ്ടായേക്കും. കേരള കോണ്‍ഗ്രസില്‍നിന്നു ജോസ്‌മോന്‍ മുണ്ടയ്ക്കല്‍, ജയ്‌സണ്‍ ജോസഫ്, സാബു പ്ലാത്തോട്ടം, മറിയാമ്മ മുള്ളുകാലായില്‍ എന്നിവരാണ് സീറ്റിനായി രംഗത്തുള്ളത്. കഴിഞ്ഞ തവണത്തെപ്പോലെ എല്‍ഡിഎഫില്‍ സിപിഎമ്മിനും സിപിഐയ്ക്കും കേരള കോണ്‍ഗ്രസ്- എമ്മിനും മാത്രമേ ജില്ലാ പഞ്ചായത്തില്‍ സീറ്റുകള്‍ കാണുകയുള്ളൂ. ചെറുകക്ഷികളെ ഇത്തവണയും എല്‍ഡിഎഫ് അവഗണിച്ചേക്കും. സിപിഎമ്മില്‍നിന്നു മുന്‍ ജില്ലാ പഞ്ചായത്തംഗം കെ. രാജേഷ്, കെ.എം. രാധാകൃഷ്ണന്‍, തിരുവാര്‍പ്പ് പഞ്ചായത്ത് മുന്‍ പ്രസിഡന്‍റ് അജയന്‍ കെ. മേനോന്‍, കെ.കെ. രഞ്ജിത്ത് എന്നിവര്‍ മത്സരരംഗത്തുണ്ടാകും. കേരള കോണ്‍ഗ്രസ്-എമ്മില്‍നിന്നു നിലവിലെ ജില്ലാ പഞ്ചായത്തംഗങ്ങളായ ജോസ് പുത്തന്‍കാല, നിര്‍മല ജിമ്മി, പി.എം. മാത്യു എന്നിവരും ബെറ്റി റോയി, പെണ്ണമ്മ തോമസ്, പി.സി. കുര്യന്‍, ജോഷി മൂഴിയാങ്കല്‍ തുടങ്ങിയവരും ജില്ലാ പഞ്ചായത്ത് സീറ്റുകളില്‍ നോട്ടമിട്ടിട്ടുണ്ട്. സിപിഐയില്‍നിന്നും പി. പ്രദീപ്, ജോണ്‍ വി. ജോസഫ്, മോഹന്‍ ചേന്ദംകുളം തുടങ്ങിയവരാണ് വിവിധ സീറ്റുകളില്‍ പരിഗണനയില്‍.

ശബരി റെയില്‍ പദ്ധതി: സംസ്ഥാന ഫയലുകള്‍ ഇഴയുന്നു

കോട്ടയം: ശബരി റെയില്‍വേ പദ്ധതി നടപ്പാക്കുന്നതിലെ പ്രധാന തടസം സംസ്ഥാന സര്‍ക്കാരിന്‍റെ നിസംഗത. സ്ഥലം ഏറ്റെടുത്തു നല്‍കിയാലുടന്‍ 2020 ഡിസംബറില്‍ പദ്ധതി മരവിപ്പിച്ച നടപടി കേന്ദ്ര റെയില്‍മന്ത്രാലയം റദ്ദാക്കുമെന്ന് ഉറപ്പു നല്‍കിയിട്ടുണ്ട്. അടിയന്തരമായി നടപ്പാക്കേണ്ട നടപടികളുടെ റിപ്പോര്‍ട്ട് ആവശ്യപ്പെട്ട് കോട്ടയം, ഇടുക്കി, എറണാകുളം ജില്ലാ കളക്ടര്‍മാരെ സംസ്ഥാന സര്‍ക്കാര്‍ ചുമതലപ്പെടുത്തിയതല്ലാതെ മറ്റൊന്നും നടന്നിട്ടില്ല. അടുത്തമാസം തദ്ദേശ തെരഞ്ഞെടുപ്പ് വിജ്ഞാപനം വന്നാല്‍ തെരഞ്ഞെടുപ്പ് പൂര്‍ത്തിയായി നവംബറില്‍ പുതിയ സമിതി അധികാരത്തില്‍ വരുന്നതുവരെ ശബരി നടപടികള്‍ മുടങ്ങാനിടയുണ്ട്. സ്ഥലം വിട്ടുകൊടുക്കുന്നവര്‍ക്കുള്ള നഷ്ടപരിഹാരം അനുവദിക്കുക, നടപടിക്ക് സ്‌പെഷല്‍ ഓഫീസുകള്‍ തുടങ്ങുക തുടങ്ങി ഒട്ടേറെ നടപടികള്‍ പൂര്‍ത്തിയാകണം. പദ്ധതിയുടെ ഭാഗമായി കുന്നത്തുനാട് താലൂക്കില്‍ സാമൂഹികാഘാത പഠനവും പബ്ലിക് ഹിയറിംഗും പൂര്‍ത്തിയായിട്ടുണ്ട്. കോതമംഗലം, മൂവാറ്റുപുഴ താലൂക്കുകളില്‍ സാമൂഹികാഘാത പഠനം നടത്തിയെങ്കിലും പബ്ലിക് ഹിയറിംഗ് കഴിഞ്ഞിട്ടില്ല. കോട്ടയം, ഇടുക്കി ജില്ലകളില്‍ ആഘാതപഠനം നടത്താനുള്ള പൊതു ഏജന്‍സിയെ ഇനിയും നിശ്ചയിച്ചിട്ടില്ല. 111 കിലോമീറ്റര്‍ പാതയ്ക്ക് വേണ്ടതു 303 ഹെക്ടർ ഭൂമി അങ്കമാലി മുതല്‍ എരുമേലി വരെ 111 കിലോമീറ്റര്‍ പാതയ്ക്ക് മൂന്നു ജില്ലകളിലായി 303 ഹെക്ടറാണ് വേണ്ടത്. 2008ല്‍ സ്ഥലമേറ്റെടുപ്പ് നടപടികള്‍ തുടങ്ങിയെങ്കിലും നടപടിയുടെ പത്തു ശതമാനം പോലും പൂര്‍ത്തിയായിട്ടില്ല. ഭൂമി ഏറ്റെടുക്കാന്‍ മാത്രം 1200 കോടി രൂപയാണ് വേണ്ടത്. നിലവിലെ എസ്റ്റിമേറ്റ് അനുസരിച്ച് പദ്ധതിക്ക് 3800 കോടി രൂപ ചെലവുവരും. ഇതിന്‍റെ പകുതി 1900 കോടി സംസ്ഥാന സര്‍ക്കാര്‍ നല്‍കണം എന്നതാണ് ധാരണ. ഭൂമി ഏറ്റെടുത്തു നല്‍കിയാല്‍ നിര്‍മാണം ഉടന്‍ ആരംഭിക്കാമെന്നാണു റെയില്‍വേ മന്ത്രാലയത്തിന്‍റെ ഉറപ്പ്. പദ്ധതിയുടെ പകുതി പണം കേന്ദ്രവും പകുതി പണം സംസ്ഥാനവും വഹിക്കുമെന്നാണ് ഇതുവരെയുള്ള ധാരണ. കോട്ടയം ജില്ലയില്‍ പിഴക് വരെ മാത്രമാണ് റവന്യു, റെയില്‍വേ സംയുക്ത സര്‍വേ നടത്തി കല്ലിട്ടു തിരിച്ച് സ്ഥലമെടുപ്പ് വിജ്ഞാപനം പുറപ്പെടുവിച്ചിട്ടുള്ളത്. രാമപുരം, ഭരണങ്ങാനം, ചെമ്മലമറ്റം, കാഞ്ഞിരപ്പള്ളി റോഡ്, എരുമേലി എന്നിവിടങ്ങളിലാണ് ജില്ലയില്‍ റെയില്‍വേ സ്റ്റേഷനുകള്‍ നിര്‍മിക്കുക. രാമപുരം മുതല്‍ എരുമേലി സ്റ്റേഷന്‍വരെ ഏരിയല്‍ സര്‍വേ മാത്രമാണ് നടന്നിട്ടുള്ളത്. ശബരിമല, എരുമേലി തീര്‍ഥാടകര്‍ക്ക് പ്രയോജനപ്പെടുന്ന എരുമേലി സ്റ്റേഷന്‍ എവിടെ നിര്‍മിക്കണം എന്നതില്‍ വ്യക്തത വന്നിട്ടില്ല. എരുമേലിക്ക് മൂന്നു കിലോമീറ്റര്‍ മുന്‍പ് കൊരട്ടിയില്‍ എരുമേലി സ്‌റ്റേഷന്‍ പണിയുന്നതാണ് പരിഗണനയില്‍. ജൂലൈയില്‍ സ്ഥലം ഏറ്റെടുപ്പ് തുടങ്ങുമെന്നായിരുന്നു സംസ്ഥാന സര്‍ക്കാര്‍ പ്രഖ്യാപനം. സെപ്റ്റംബര്‍ മാസം എത്തിയശേഷവും യാതൊരു നടപടിയും ഉണ്ടായിട്ടില്ല. അങ്കമാലി-ശബരി പാത വരുമ്പോള്‍ നിലവിലെ അങ്കമാലി റെയില്‍വേ സ്റ്റേഷന്‍ ജംഗ്ഷന്‍ സ്റ്റേഷനായി മാറും. കാലടി-നെടുമ്പാശേരി എയര്‍പോര്‍ട്ട് റോഡിലാണ് കാലടി സ്റ്റേഷന്‍. പെരുമ്പാവൂര്‍, ഓടക്കാലി, കോതമംഗലം, മൂവാറ്റുപുഴ, വാഴക്കുളം, തൊടുപുഴ, കരിങ്കുന്നം, രാമപുരം, ഭരണങ്ങാനം, ചെമ്മലമറ്റം, കാഞ്ഞിരപ്പള്ളി റോഡ്, എരുമേലി എന്നിവയാണ് നിര്‍ദിഷ്ട സ്റ്റേഷനുകള്‍. എരുമേലിയില്‍നിന്ന് ശബരിമലയിലേക്ക് 43 കിലോമീറ്റര്‍ ദൂരമുണ്ട്.

വിശുദ്ധ കുരിശിന്‍റെ തിരുശേഷിപ്പ് വണങ്ങാൻ അണമുറിയാതെ വിശ്വാസികൾ

കുറവിലങ്ങാട്: ഈശോമിശിഹാ മരണംവരിച്ച വിശുദ്ധ കുരിശിന്‍റെ തിരുശേഷിപ്പ് പരസ്യവണക്കത്തിന് പ്രതിഷ്ഠിച്ച കുറവിലങ്ങാട് മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ദേവാലയത്തിലേക്ക് വിശ്വാസികൾ ഒഴുകിയെത്തി. വിശുദ്ധ കുരിശിന്‍റെ പുകഴ്ചയുടെ തിരുനാളിനോടനുബന്ധിച്ചാണ് വിശുദ്ധ കുരിശിന്‍റെ തിരുശേഷിപ്പ് പരസ്യവണക്കത്തിനായി പ്രതിഷ്ഠിച്ചത്. തിരുശേഷിപ്പ് പള്ളിയിലെ വടക്കേ സൈഡ് അൾത്താരയിലുള്ള മാർത്തോമ്മാ സ്ലീവാ പേടകത്തിൽനിന്ന് പുറത്തെടുക്കും മുമ്പേ വിശ്വാസികളാൽ പള്ളി നിറഞ്ഞിരുന്നു. ഒന്നര മണിക്കൂറോളമാണ് തിരുശേഷിപ്പ് പരസ്യവണക്കത്തിനായി പള്ളിയിൽ പ്രതിഷ്ഠിച്ചത്. പ്രത്യേക പ്രാർഥനകളോടെയാണ് തിരുശേഷിപ്പ് പുറത്തെടുത്ത് പ്രതിഷ്ഠിക്കുന്നതും തിരികെ പ്രതിഷ്ഠിക്കുന്നതും. മൂന്നുനോമ്പ് തിരുനാളിന്‍റെ ഒരു ദിനം മാത്രമാണ് വിശുദ്ധ കുരിശിന്‍റെ തിരുശേഷിപ്പ് പരസ്യവണക്കത്തിന് പ്രതിഷ്ഠിച്ചിരുന്നത്. കഴിഞ്ഞ രണ്ടു വർഷമായി വിശുദ്ധ കുരിശിന്‍റെ പുകഴ്ചയുടെ തിരുനാളിലും തിരുശേഷിപ്പ് പുറത്തെടുത്ത് പ്രതിഷ്ഠിക്കുന്നുണ്ട്. മൂന്നുനോമ്പ് തിരുനാളിലെ ചൊവ്വാഴ്ച, പത്താംതീയതി തിരുനാളിന്‍റെ രണ്ടാംദിനം, പരിശുദ്ധ ദൈവമാതാവിന്‍റെ സ്വർഗാരോപണ തിരുനാൾ എന്നീ പ്രദക്ഷിണങ്ങളിൽ വിശുദ്ധ കുരിശിന്‍റെ തിരുശേഷിപ്പ് സംവഹിക്കാറുണ്ട്. മറ്റു ദിവസങ്ങളിലെല്ലാം പ്രത്യേക പേടകത്തിൽ അതിപൂജ്യമായി സംരക്ഷിച്ചിരിക്കുകയാണ്. പ്രാർഥനാശുശ്രൂഷകൾക്ക് ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റ് ഫാ. ജോസ് കോട്ടയിൽ എന്നിവർ കാർമികത്വം വഹിച്ചു.

അൽഫോൻസ കോളജിൽ പൂര്‍വവിദ്യാര്‍ഥീ സംഗമം

പാലാ: അല്‍ഫോന്‍സ കോളജ് കെമിസ്ട്രി വിഭാഗം 1967 മുതല്‍ 2025 വരെയുള്ള ബാച്ചുകളിലെ വിദ്യാര്‍ഥിനികളുടെ സംഗമം കോളജ് ഓഡിറ്റോറിയത്തില്‍ നടത്തി. റിട്ട. ഡിജിപി ഡോ. ബി. സന്ധ്യ ഉദ്ഘാടനം നിര്‍വഹിച്ചു. ഥികള്‍ തങ്ങളുടെ ആത്മവിദ്യാലയത്തിന് പടര്‍ന്നുപന്തലിക്കാനുള്ള വളമായി മാറണമെന്ന് പൂര്‍വ വിദ്യാര്‍ഥിനി കൂടിയായ ഡോ. ബി. സന്ധ്യ ഓര്‍മിപ്പിച്ചു. കോളജ് പ്രിന്‍സിപ്പല്‍ സിസ്റ്റര്‍ ഡോ. മിനിമോള്‍ മാത്യു അധ്യക്ഷത വഹിച്ചു. പൂര്‍വ വിദ്യാര്‍കെമിസ്ട്രി വിഭാഗത്തില്‍ നിന്ന് വിരമിച്ച അധ്യാപകരെ ആദരിച്ച് 58 വര്‍ഷങ്ങളിലെ വിദ്യാര്‍ഥിനികള്‍ ചേര്‍ന്നു നടത്തിയ ഗുരുവന്ദനം ഹൃദ്യമായിരുന്നു. പൂര്‍വ വിദ്യാര്‍ഥിനികള്‍ ചേര്‍ന്നൊരുക്കിയ "ഫ്രം ഫയര്‍ അള്‍ട്ടേഴ്സ് ടു നാനോ പാര്‍ട്ടിക്കിള്‍സ് ദ കെമിക്കല്‍ വിസ്ഡം ഓഫ് ഇന്ത്യ' എന്ന ഗ്രന്ഥത്തിന്‍റെയും അധ്യാപകര്‍ ചേര്‍ന്നൊരുക്കിയ "ലാന്‍റേണ്‍സ് ഫ്‌ളെയിംസ് ദാറ്റ് നെവര്‍ ഫെയ്ഡ്' എന്ന ഗ്രന്ഥത്തിന്‍റെയും പ്രകാശനവും ഡോ. തങ്കമ്മ, ഡോ. ലൂസി മാത്യു എന്നിവരുടെ പേരില്‍ ആരംഭിക്കുന്ന എന്‍ഡോവ്‌മെന്‍റുകളുടെ ഉദ്ഘാടനവും വിവിധ കലാപരിപാടികളും നടന്നു. വകുപ്പ് മേധാവി ഡോ. സിസ്റ്റര്‍ ജില്ലി ജയിംസ് സ്വാഗതം പറഞ്ഞു.

ഉഴവൂർ കോളജിന്‍റെ വോളിബോൾ പെരുമയ്ക്ക് മൂന്നര പതിറ്റാണ്ടിന്‍റെ തികവ്

കുറവിലങ്ങാട്: കായികലോകത്തിന് ഒട്ടേറെ പ്രതിഭകളെ സമ്മാനിച്ച ഉഴവൂർ സെന്‍റ് സ്റ്റീഫൻസ് കോളജിന്‍റെ വോളിബോൾ പെരുമയ്ക്ക് മൂന്നര പതിറ്റാണ്ടിന്‍റെ തികവ്. ദ്രോണാചാര്യ പ്രഫ. സണ്ണി തോമസടക്കം രാജ്യത്തിനകത്തും പുറത്തുമായി കോളജിന്‍റെ കായികക്കരുത്ത് അറിയിച്ച അനേകം പ്രതിഭകളെ വാർത്തെടുക്കാൻ കഴിഞ്ഞ അഭിമാനത്തിലാണ് അറുപതാണ്ട് പിന്നിട്ട സെന്‍റ് സ്റ്റീഫൻസ് കോളജ്. കോളജിന്‍റെ സ്ഥാപക രക്ഷാധികാരിയും കോട്ടയം അതിരൂപത അധ്യക്ഷനുമായിരുന്ന മാർ തോമസ് തറയിലിന്‍റെ അനുസ്മരണാർഥം ആൺകുട്ടികൾക്കായി ആരംഭിച്ച വോളിബോൾ ടൂർണമെന്‍റാണ് ഇക്കുറി 35 വയസ് പിന്നിടുന്നത്. മാർ തോമസ് തറയിൽ ടൂർണമെന്‍റിന് തൊട്ടടുത്ത വർഷം കോളജ് പ്രിൻസിപ്പലായിരുന്ന സിസ്റ്റർ ഗൊരേത്തിയുടെ സ്മരണാർഥം ആരംഭിച്ച വനിതാ വോളി 34 വർഷത്തിലെത്തി. ബിഷപ് മാർ കുര്യാക്കോസ് കുന്നശേരി പൗരോഹിത്യ സുവർണ ജൂബിലിയിൽ ആരംഭിച്ച ഫുട്‌ബോളും കോളജിന്‍റെ ഗോൾഡൻ ജൂബിലി സ്മാരകമായി ആരംഭിച്ച ബാഡ്മിന്‍റൺ ടൂർണമെന്‍റുമൊക്കെ കോളജിന്‍റെ കായികരംഗത്തെ മുന്നേറ്റവും പോഷണവും വിളിച്ചറിയിക്കുന്നുണ്ട്.

വര്‍ഷങ്ങള്‍ക്കു ശേഷം തുറന്ന ലാറ്റക്സ് ഫാക്ടറി പൂട്ടിക്കാന്‍ ശ്രമം

പാലാ: കരൂരുള്ള മീനച്ചില്‍ ലാറ്റക്‌സ് ഫാക്ടറി സെക്യൂരിറ്റി ജീവനക്കാരനെ ഭീഷണിപ്പെടുത്തി ബന്ദിയാക്കി ഫാക്ടറി ഗേറ്റ് പുറത്തുനിന്ന് താഴിട്ടു പൂട്ടി ഒരു സംഘം ആളുകള്‍. അവധി ദിവസമായ ഇന്നലെ ഫാക്ടറി ഗേറ്റ് പുറത്തുനിന്ന് താഴിട്ട് പൂട്ടിയതോടെ സെക്യൂരിറ്റി ജീവനക്കാരൻ ഭക്ഷണവും വെള്ളവും കിട്ടാതെ വലഞ്ഞു. ഫാക്ടറിയില്‍നിന്ന് ദുർഗന്ധം ഉണ്ടാകുന്നുവെന്ന് ആരോപിച്ച് കുറച്ചുനാളായി ഒരു കൂട്ടര്‍ പരാതികള്‍ ഉന്നയിച്ചിരുന്നു. 1975 മുതല്‍ 2015 വരെ മൂന്ന് ഷിഫ്റ്റുകളിലായി നൂറിൽപരം ജീവനക്കാര്‍ ആറ് മെഷീനറികള്‍ തുടര്‍ച്ചയായി പ്രവര്‍ത്തിച്ചിരുന്നപ്പോള്‍ പോലും ഉണ്ടാകാത്ത പരാതിയാണ് ആഴ്ചയില്‍ ഒരു ദിവസം ആറ് ജീവനക്കാര്‍ മാത്രം ജോലി ചെയ്യുന്ന സ്ഥാപനത്തിനെതിരേ ഉന്നയിച്ചിരിക്കുന്നതെന്ന് മാനേജ്‌മെന്‍റ് അധികൃതര്‍ പറഞ്ഞു. വര്‍ഷങ്ങളായി അടഞ്ഞുകിടന്ന ഫാക്ടറി അടുത്ത കാലത്താണ് ഭാഗികമായി പ്രവര്‍ത്തിച്ചു തുടങ്ങിയത്. പ്രോസസസ് ചെയ്ത സെന്‍ട്രി ഫ്യൂജിഡ് ലാറ്റക്‌സ് റീപായ്ക്ക് ചെയ്യുന്ന ജോലികളാണ് ഇപ്പോള്‍ ഇവിടെ ചെയ്തു വരുന്നത്. ഫീല്‍ഡ് ലാറ്റക്‌സ് വല്ലപ്പോഴും മാത്രമാണ് ഇവിടെ വാങ്ങുന്നത്. ഒരുവിധ ദുർഗന്ധവും ഫാക്ടറിയില്‍നിന്ന് ഉണ്ടാവുന്നില്ലെന്നും ദുർഗന്ധത്തിനുള്ള ഒരു സാഹചര്യവും ഫാക്ടറി കോമ്പൗണ്ടില്‍ നിലവിലില്ലെന്നും ഫാക്ടറി സന്ദര്‍ശിച്ച് ജനപ്രതിനിധികളും സംഘടനാ നേതാക്കളും ബോധ്യപ്പെട്ടിട്ടുള്ളതാണെന്നും ഫാക്ടറി അധികൃതര്‍ പറഞ്ഞു. വീടുകള്‍ ഇല്ലാത്ത ഇവിടെ ഫാക്ടറിഗേറ്റിനു സമീപം നഗരസഭയുടെ മാലിന്യശേഖരണ ബിന്‍ സ്ഥാപിച്ചിട്ടുണ്ട്. അവിടേക്കു മത്സ്യ-മാംസ അവശിഷ്ടങ്ങളും കോഴിമാലിന്യങ്ങളും വലിച്ചെറിയുകയാണ്. ഫാക്ടറിയുടെ എതിര്‍വശത്തെ പുരയിടത്തില്‍ ലോഡുകണക്കിന് മാലിന്യമാണ് രാത്രിയുടെ മറവില്‍ ഇടുന്നതെന്ന് വാര്‍ഡ് കൗണ്‍സിലറെ ഫാക്ടറി അധികൃതര്‍ നേരിട്ട് കാണിച്ചുകൊടുത്തു.

സമുദായ ഐക്യം നിലനില്‍പ്പിന് അനിവാര്യം: പ്രഫ. രാജീവ് കൊച്ചുപറമ്പില്‍

പാലാ: കത്തോലിക്ക സമുദായം നേരിടുന്ന വെല്ലുവിളികളെ അതിജീവിക്കാന്‍ കത്തോലിക്ക കോണ്‍ഗ്രസ് അംഗങ്ങള്‍ ഒന്നിച്ചുനില്‍ക്കണമെന്നും അല്ലാത്തപക്ഷം സമുദായത്തിന് നിലനില്‍പ്പില്ലെന്നും കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍. കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ പാലാ രൂപതയിലെ യൂണിറ്റ്, ഫൊറോന, രൂപത ഭാരവാഹികള്‍ക്കായി "സമുദായ ശക്തീകരണം രാഷ്‌ട്രപുരോഗതിക്ക്' എന്ന വിഷയം ആസ്പദമാക്കി നടത്തിയ നേതൃത്വ പരിശീലന ശില്പശാല ഭരണങ്ങാനം മാതൃഭവനില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഭരണഘടനയും മതേതരത്വവും സംരക്ഷിക്കാന്‍ നാം പ്രതിജ്ഞാബദ്ധരാകണം. രാജ്യത്തിന്‍റെ വിവിധ ഭാഗങ്ങളില്‍ ന്യൂനപക്ഷങ്ങള്‍ക്കെതിരേയുള്ള അതിക്രമങ്ങള്‍ അതിരുകടക്കുന്നു. ന്യൂനപക്ഷ അവകാശങ്ങള്‍ ധ്വംസിക്കപ്പെടുന്നു. റബര്‍ ഉള്‍പ്പെടെയുള്ള കാര്‍ഷിക ഉത്പന്നങ്ങള്‍ വിലത്തകര്‍ച്ച നേരിടുന്നു. പ്രതിസന്ധികളില്‍ സമുദായം ഒന്നിച്ചു നില്‍ക്കണമെന്ന് കത്തോലിക്ക കോണ്‍ഗ്രസ് നേതൃയോഗം വിലയിരുത്തി. രൂപത പ്രസിഡന്‍റ് ഇമ്മാനുവല്‍ നിധീരിയുടെ അധ്യക്ഷതയില്‍ ചേര്‍ന്ന സമ്മേളനത്തില്‍ രൂപത ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍ ആമുഖ സന്ദേശം നല്‍കി. തുടര്‍ന്നു നടന്ന പരിശീലന ക്ലാസുകള്‍ക്ക് ഡോ. എം. പീറ്റര്‍, ഗ്ലോബല്‍ ജനറല്‍ സെക്രട്ടറി പ്രഫ. ജോസുകുട്ടി ഒഴുകയില്‍ എന്നിവര്‍ നേതൃത്വം നല്‍കി. ഗ്ലോബല്‍ ഭാരവാഹികളായ ടോണി പുഞ്ചക്കുന്നേല്‍, ആന്‍സമ്മ സാബു, അഡ്വ. ജോണ്‍സണ്‍ വീട്ടിയാങ്കല്‍, രൂപത ഭാരവാഹികളായ ജോസ് വട്ടുകുളം, ജോയി കെ. മാത്യു, സി. എം. ജോര്‍ജ്, പയസ് കവളംമാക്കല്‍, ജോണ്‍സണ്‍ ചെറുവള്ളി, ടോമി കണ്ണീറ്റുമ്യാലില്‍, ബെന്നി കിണറ്റുകര, രാജേഷ് പാറയില്‍, ജോബിന്‍ പുതിയിടത്തുചാലില്‍, എഡ്വിന്‍ പാമ്പാറ, ലിബി മണിമല, അരുണ്‍ പോള്‍, ക്ലിന്‍റ് അരീപ്ലാക്കല്‍ എന്നിവര്‍ പ്രസംഗിച്ചു.

ശ്രീകൃഷ്ണജയന്തി ദിനാഘോഷം

എരുമേലി: ശ്രീകൃഷ്ണജയന്തി ദിനത്തിൽ എരുമേലി ടൗണിലേക്ക് വിവിധയിടങ്ങളിൽനിന്ന് ശോഭായാത്രകൾ നടന്നു. കൃഷ്ണലീല നൃത്തങ്ങളും അവതരിപ്പിച്ചു. കനകപ്പലം, രാജീവ്‌ ഭവൻ, ശ്രീനിപുരം, നെടുങ്കാവുവയൽ, മറ്റന്നൂർക്കര, കരിങ്കല്ലുമ്മുഴി, പൊരിയന്മല, പാത്തിക്കക്കാവ്, ഒഴക്കനാട്, നേർച്ചപ്പാറ, വാഴക്കാല, വയലാപറമ്പ്, കൊടിത്തോട്ടം, ചെമ്പകപ്പാറ, മണിപ്പുഴ എന്നിവിടങ്ങളിൽ നിന്നെത്തിയ ശോഭായാത്രകൾ എരുമേലി ടൗണിൽ സംഗമിച്ച് പേട്ടക്കവലയിൽനിന്നു ധർമശാസ്താ ക്ഷേത്രത്തിലെത്തി സമാപിച്ചു. മുക്കൂട്ടുതറ തിരുവമ്പാടി ക്ഷേത്രത്തിലും ചേനപ്പാടി പൂതക്കുഴി ശ്രീ കൃഷ്ണ ക്ഷേത്രത്തിലും ഉറിയടി ഉൾപ്പെടെ വിപുലമായ ആഘോഷങ്ങൾ നടത്തി. ഇടകടത്തി, പനയ്ക്കവയാൽ, എരുത്വാപ്പുഴ, പാണപിലാവ്, മുട്ടപ്പള്ളി, എലിവാലിക്കര, പ്രപ്പോസ്, വെൺകുറിഞ്ഞി, ഓലക്കുളം എന്നിവിടങ്ങളിൽനിന്നു വൈകുന്നേരം അഞ്ചിന് മുക്കൂട്ടുതറ ടൗണിൽ വിവിധ ശോഭായാത്രകൾ എത്തി മഹാശോഭായാത്രയായി തിരുവമ്പാടി ക്ഷേത്രത്തിലെത്തി സമാപിച്ചു. തുടർന്ന് പ്രസാദ വിതരണവും ഭജനയും രാത്രി 11ന് അവതാര പൂജയും അവതാര ദർശനവും നടത്തി.

സാംസ്‌കാരിക സമ്മേളനവും ലൈബ്രറി പ്രവർത്തകസംഗമവും

പനമറ്റം: പ്ലാറ്റിനം ജൂബിലി ആഘോഷിക്കുന്ന വെളിയന്നൂർ ദേശാഭിമാനി വായനശാലയുടെ പുതിയ മന്ദിരത്തിന്‍റെ ഉദ്ഘാടനത്തോടനുബന്ധിച്ച് സാംസ്‌കാരിക സമ്മേളനവും ലൈബ്രറി പ്രവർത്തക സംഗമവും നടത്തി. സംസ്ഥാന ലൈബ്രറി കൗൺസിലംഗം കെ. രാജേഷ് ഉദ്ഘാടനം ചെയ്തു. ലൈബ്രറി പ്രസിഡന്‍റ് കെ.എൻ. രാധാകൃഷ്ണപിള്ള അധ്യക്ഷത വഹിച്ചു. കേരള സാഹിത്യ അക്കാദമി അംഗം മോബിൻ മോഹൻ മുഖ്യപ്രഭാഷണം നടത്തി. താലൂക്ക് ലൈബ്രറി കൗൺസിൽ പ്രസിഡന്‍റ് പി.കെ. ബാബുലാൽ, സെക്രട്ടറി ജോർജ് സെബാസ്റ്റ്യൻ, ജോയിന്‍റ് സെക്രട്ടറി കെ.ആർ. മന്മഥൻ, പൊൻകുന്നം സെയ്ദ്, ടി.പി. രാധാകൃഷ്ണൻനായർ, വായനശാലാ സെക്രട്ടറി പി.എസ്. രാജീവ്, കെ. ഷിബു, എസ്. ജയകൃഷ്ണൻ, പനമറ്റം രാജീവ്, ടി.എൻ. രവീന്ദ്രൻ എന്നിവർ പ്രസംഗിച്ചു.

വട്ടകപ്പാറ-മൗണ്ട് ലൈൻ റോഡ് തുറന്നുകൊടുത്തു

കാഞ്ഞിരപ്പള്ളി: കാഞ്ഞിരപ്പള്ളി പഞ്ചായത്ത് അഞ്ചുലക്ഷം രൂപ ചെലവഴിച്ചു നിർമാണം പൂർത്തീകരിച്ച വട്ടകപ്പാറ-മൗണ്ട് ലൈൻ റോഡ് പൊതുജനങ്ങൾക്കായി തുറന്നുകൊടുത്തു. വാർഡ് മെംബർ സുനിൽ തേനംമാക്കൽ റോഡ് ഉദ്ഘാടനം ചെയ്തു. മുതിർന്ന പൗരൻ ലത്തീഫ് ഹാജിയാർ അധ്യക്ഷത വഹിച്ചു. സിഡിഎസ് മെംബർ ഷിജ ഗോപിദാസ്, ടി.ഇ. നാസറുദീൻ, സെയ്ത് ചെറുകര, ഷാജഹാൻ ആന്ത്രാച്ചേരി, അൻവർഷ കോനാട്ടുപറമ്പിൽ, നായിഫ് ഫൈസി, ഒ.എം. ഷാജി, നെജിബ് പുളിമുട്ടിൽ തുടങ്ങിയവർ പ്രസംഗിച്ചു.

യുഡിഎഫ് പ്രതിഷേധസംഗമം 27ന് തിരുനക്കരയിൽ

കോട്ടയം: വിശ്വാസികളോട് നീതി പുലർത്താതെ അയ്യപ്പന്മാരുടെ പേരിൽ സംഗമം നടത്തുന്നത് തികഞ്ഞ കാപട്യമാണെന്ന് തിരുവഞ്ചൂർ രാധാകൃഷ്ണൻ എംഎൽഎ. യുഡിഎഫ് ജില്ലാ നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. വിശ്വസികൾക്കെതിരേ എടുത്ത കേസുകൾ പിൻവലിക്കാതെ അയ്യപ്പസംഗമം നടത്തുന്നത് ജനങ്ങളെ പറ്റിക്കാനാണെന്നും അദ്ദേഹം കൂട്ടിച്ചേർത്തു. യുഡിഎഫ് ചെയർമാൻ ഇ.ജെ. ആഗസ്‌തി അധ്യക്ഷത വഹിച്ചു. കുര്യൻ ജോയി, നാട്ടകം സുരേഷ്, ഫിൽസൺ മാത്യൂസ്, പി.എം. സലിം, കുഞ്ഞ് ഇല്ലംപള്ളി, ജെയ്സൺ ജോസഫ്, തോമസ് കല്ലാടൻ, ഫാറൂഖ് പാലപ്പറമ്പിൽ, ടോമി വേദഗിരി, തമ്പി ചന്ദ്രൻ, സാജു എം. ഫിലിപ്പ്, മദൻലാൽ, എം.ടി. സജിമോൻ, ബിനു ഏബ്രഹാം, കെ.എഫ്. വർഗീസ് തുടങ്ങിയവർ പ്രസംഗിച്ചു. അയ്യപ്പസംഗമത്തിന്‍റെ കാപട്യം തുറന്നുകാട്ടുന്നതിനായി 27ന് തിരുനക്കരയിൽ പ്രതിഷേധസംഗമം സംഘടിപ്പിക്കും. പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. യുഡിഎഫ് സംസ്ഥാന നേതാക്കൾ പങ്കെടുക്കും.

സദസിന്‍റെ കൈയടി ഏറ്റുവാങ്ങി മന്ത്രി വി.എൻ. വാസവന്‍റെ കവിതാലാപനം

മുണ്ടക്കയം: മന്ത്രി വി.എൻ. വാസവന്‍റെ കവിതാലാപനത്തിന് നിറഞ്ഞ കൈയടി. ചിറ്റടി പബ്ലിക് ലൈബ്രറിയുടെ വജ്രജൂബിലി ആഘോഷങ്ങളുടെ ഭാഗമായി നടന്ന പൊതുസമ്മേളനം ഉദ്ഘാടനം ചെയ്യാൻ എത്തിയതായിരുന്നു മന്ത്രി. ഒരു കവിത ആലപിച്ച് പരിപാടി ഉദ്ഘാടനം ചെയ്യണമെന്ന് സംഘാടകർ മന്ത്രിയോട് ആവശ്യപ്പെടുകയായിരുന്നു. എന്നാൽ ഒന്നല്ല ഒരു ഡസൻ കവിതകൾ താൻ പാടാമെന്നും അത് ആര് എഴുതിയതാണെന്ന് നിങ്ങൾ പറയണമെന്നുമായിരുന്നു മന്ത്രി സദസിൽ ഇരുന്നവരോട് തിരിച്ച് ആവശ്യപ്പെട്ടത്. മഹാകവി കുമാരനാശാനും ഉള്ളൂരും വള്ളത്തോളും ആധുനിക കവി മുരുകൻ കാട്ടാക്കട വരെയുള്ള പ്രമുഖരുടെ കവിതകൾ അതിന്‍റെ താളഭാവങ്ങൾ ഒന്നും ചോർന്നുപോകാതെ മന്ത്രി ആലപിച്ചപ്പോൾ സദസിൽനിന്ന് കരഘോഷം മുഴങ്ങി. പിന്നീട് ഈ കവിത ആര് എഴുതിയെന്നും എഴുതാനുണ്ടായ പശ്ചാത്തലവും അദ്ദേഹം വിശദീകരിച്ചു. സമ്മേളനത്തിൽ ജില്ലാ ലൈബ്രറി കൗൺസിൽ സെക്രട്ടറി ബി. ഹരികൃഷ്ണൻ അധ്യക്ഷത വഹിച്ചു. ആന്‍റോ ആന്‍റണി എംപി മുഖ്യപ്രഭാഷണം നടത്തി. വജ്രജൂബിലി കമ്മിറ്റി ചെയർമാൻ ജോർജ് സെബാസ്റ്റ്യൻ, പാറത്തോട് പഞ്ചായത്ത് പ്രസിഡന്‍റ് കെ.കെ. ശശികുമാർ, മുണ്ടക്കയം പഞ്ചായത്ത് പ്രസിഡന്‍റ് രേഖ ദാസ്, സംസ്ഥാന ലൈബ്രറി കൗൺസിൽ അംഗം കെ. രാജേഷ്, ജില്ലാ പഞ്ചായത്തംഗം പി.ആർ. അനുപമ, പാറത്തോട് സഹകരണബാങ്ക് പ്രസിഡന്‍റ് ജോർജുകുട്ടി ആഗസ്തി, ബ്ലോക്ക് പഞ്ചായത്തംഗം സാജൻ കുന്നത്ത്, ഷീലമ്മ ഡൊമിനിക്, വിജയമ്മ വിജയലാല്‍, അന്നമ്മ വർഗീസ്, ബോബി കെ. മാത്യു, ഫാ. തോമസ് നല്ലനാടിയിൽ, പി.എൻ. സോമൻ തുടങ്ങിയവർ പ്രസംഗിച്ചു. കഴിഞ്ഞ 25 വർഷമായി ജനപ്രതിനിധിയായി തുടരുന്ന ചിറ്റടി പബ്ലിക് ലൈബ്രറിയുടെ പ്രസിഡന്‍റുകൂടിയായ ഡയസ് മാത്യു കോക്കാടിനെ യോഗത്തിൽ ആദരിച്ചു. തുടർന്ന് ബാലവേദിയുടെ ആഭിമുഖ്യത്തിൽ നൃത്തസന്ധ്യയും ക്ലബ് യുവയുടെ ആഭിമുഖ്യത്തിൽ സംഗീതനിശയും നടത്തി.

വേമ്പനാട്ടുകായലിലെ ഓളങ്ങൾക്കൊപ്പം ചുവടുകൾവച്ച് ഭിന്നശേഷിക്കാർ

മുണ്ടക്കയം: വീടിന്‍റെ അകത്തളങ്ങളിൽ വീർപ്പുമുട്ടിയിരുന്ന ഭിന്നശേഷിക്കാർക്ക് ആവേശമായി മുണ്ടക്കയം പഞ്ചായത്ത് സംഘടിപ്പിച്ച ഭിന്നശേഷിക്കാർക്കുള്ള വിനോദയാത്ര. മുണ്ടക്കയം പഞ്ചായത്തിൽനിന്നു തെരഞ്ഞെടുക്കപ്പെട്ട 40ഓളം ഭിന്നശേഷിക്കാർക്കും അവരുടെ സഹായികൾക്കുമായിരുന്നു യാത്ര ഒരുക്കിയത്. കുമരകം ടൂറിസ്റ്റ് കേന്ദ്രത്തോടൊപ്പം വേമ്പനാട് കായലിലൂടെയുള്ള ബോട്ട് യാത്രയായിരുന്നു വിനോദ യാത്രയിൽ ഉൾപ്പെടുത്തിയത്. കായൽപരപ്പിലെ ഓളങ്ങൾക്കൊപ്പം ചുവടുകൾ വച്ച് ആഹ്ലാദ ത്തിമിർപ്പിലായിരുന്നു യാത്രികർ. അവരുടെ സ്വപ്നങ്ങൾ ചിറകിലേറ്റാൻ പഞ്ചായത്ത് പ്രസിഡന്‍റ് രേഖാ ദാസ്, ഭരണസമിതി അംഗങ്ങളായ ഷീല ഡൊമിനിക്, സി.വി. അനിൽ കുമാർ, ഷിജി ഷാജി, സുലോചന സുരേഷ്, ദിലീഷ് ദിവാകരൻ, പ്രസന്ന ഷിബു, കെ.ടി. റെയ്ച്ചൽ, പി.എ. രാജേഷ്, ഐസിഡിഎസ് സൂപ്പർവൈസർ നീതു ജോർജ്, മെഡിക്കൽ ടീം എന്നിവരുമുണ്ടായിരുന്നു. ‌നൂതന പ്രോജക്‌ടുകൾ നടപ്പിലാക്കുന്നതിൽ പ്രത്യേകം താത്പര്യം കാട്ടുന്ന മുണ്ടക്കയം പഞ്ചായത്ത് ഭിന്നശേഷിക്കാരെ കൂടാതെ വയോജനങ്ങളെയും പാവപ്പെട്ട കുട്ടികളെയും പങ്കെടുപ്പിച്ച് തുടർച്ചയായി പഠന-വിനോദ യാത്രകൾ സംഘടിപ്പിക്കാറുണ്ട്. ഡയാലിസിസ് രോഗികൾക്കുള്ള ചികിത്സാക്കിറ്റും ചികിത്സാച്ചെലവും നൽകിവരുന്നു. കൂടാതെ അങ്കണവാടി കുട്ടികൾക്ക് ഭക്ഷണമായി ബിരിയാണി നൽകുന്നതും പ്രൈമറി കുട്ടികൾക്ക് പ്രഭാതഭക്ഷണം ഏർപ്പെടുത്തിയതും ജനശ്രദ്ധ ആകർഷിച്ചു. ഭിന്നശേഷിക്കാർക്ക് തൊഴിൽസംരംഭങ്ങൾ തുടങ്ങാനുള്ള പദ്ധതികൾ ആവിഷ്കരിച്ചു വരികയാണ്.

ആരോഗ്യ പരിപാലനരംഗത്ത് മാതൃക സൃഷ്ടിച്ചു: മന്ത്രി വി.എൻ. വാസവൻ

കാഞ്ഞിരപ്പള്ളി: ശിശുമരണനിരക്കും മാതൃമരണനിരക്കും കുറച്ച് ആരോഗ്യ പരിപാലന രംഗത്ത് മാതൃക സൃഷ്ടിക്കാന്‍ കേരളത്തിന് സാധിച്ചെന്ന് സഹകരണ-തുറമുഖ-ദേവസ്വം മന്ത്രി വി.എൻ. വാസവൻ. നവീകരിച്ച ഇടക്കുന്നം ജനകീയാരോഗ്യ കേന്ദ്രത്തിന്‍റെ ഉദ്ഘാടനവും പാറത്തോട് മെയിൻ സെന്‍റര്‍ ജനകീയാരോഗ്യ കേന്ദ്രത്തിന്‍റെ കെട്ടിട നിര്‍മാണോദ്ഘാടനവും നിര്‍വഹിച്ച് പ്രസംഗിക്കുകയായിരുന്നു അദ്ദേഹം. പഞ്ചായത്ത് പ്രസിഡന്‍റ് കെ.കെ. ശശികുമാർ അധ്യക്ഷത വഹിച്ചു. ആന്‍റോ ആന്‍റണി എംപി മുഖ്യപ്രഭാഷണം നടത്തി. ജില്ലാ പഞ്ചായത്തംഗം പി.ആർ. അനുപമ, കാഞ്ഞിരപ്പള്ളി ബ്ലോക്ക്‌ പഞ്ചായത്ത് പ്രസിഡന്‍റ് അജിത രതീഷ്, പഞ്ചായത്ത് വൈസ് പ്രസിഡന്‍റ് സോഫി ജോസഫ്, ബ്ലോക്ക്‌ പഞ്ചായത്തംഗങ്ങളായ ടി.ജെ. മോഹനൻ, സാജൻ കുന്നത്ത്, പഞ്ചായത്ത് സെക്രട്ടറി എസ്. റാണി, പഞ്ചായത്ത് മെംബർമാർ, വിവിധ രാഷ്‌ട്രീയ പാർട്ടി പ്രതിനിധികൾ, മെഡിക്കൽ ഓഫീസർമാർ തുടങ്ങിയവർ പ്രസംഗിച്ചു. കായകൽപ്പ് അവാർഡ്, എൻക്യുഎഎസ് അംഗീകാരം എന്നിവ നേടിയ പാറത്തോട് കുടുംബാരോഗ്യകേന്ദ്രത്തെ ചടങ്ങില്‍ ആദരിച്ചു. പാറത്തോട് പഞ്ചായത്തിന്‍റെ ഫണ്ടിൽനിന്ന് 30 ലക്ഷം രൂപയും ദേശീയ ആരോഗ്യ മിഷൻ ഫണ്ടിൽനിന്ന് ഏഴു ലക്ഷം രൂപയും വിനിയോഗിച്ചാണ് ഇടക്കുന്നം ജനകീയ ആരോഗ്യകേന്ദ്രം നവീകരിച്ചത്. ഹെൽത്ത് ഗ്രാൻഡിൽനിന്ന് 55 ലക്ഷം രൂപ ചെലവിട്ടാണ് പാറത്തോട് മെയിൻ സെന്‍റർ ജനകീയാരോഗ്യ കേന്ദ്രത്തിന് കെട്ടിടം നിർമിക്കുന്നത്.

ഫൊറോന കലോത്സവം: തുരുത്തിക്ക് ഒന്നാംസ്ഥാനം

തുരുത്തി: തുരുത്തി ഫൊറോന ബൈബിള്‍ കലോത്സവത്തില്‍ തുരുത്തി മര്‍ത്ത് മറിയം സണ്‍ഡേ സ്‌കൂള്‍ ഓവറോള്‍ ഒന്നാം സ്ഥാനം കരസ്ഥമാക്കി. കൈനടി വ്യാകുലമാതാ പള്ളിയില്‍ നടന്ന കലോത്സവത്തില്‍ രണ്ടാം സ്ഥാനം ഇത്തിത്താനം സെന്‍റ് മേരീസ് സണ്‍ഡേ സ്‌കൂളും മൂന്നാം സ്ഥാനം കുറിച്ചി സെന്‍റ് ജോസഫ് സണ്‍ഡേ സ്‌കൂളും കരസ്ഥമാക്കി.

റെസിഡന്‍റ്സ് അസോസിയേഷൻ താലൂക്ക് മാനവമൈത്രി സംഗമം

ചങ്ങനാശേരി: റെസിഡന്‍റ്സ് അസോസിയേഷന്‍ ചങ്ങനാശേരി താലൂക്ക് കമ്മിറ്റി മാനവമൈത്രി കുടുംബ സംഗമം നടത്തി. മുനിസിപ്പല്‍ മിനി ഓഡിറ്റോറിയത്തില്‍ നടന്ന സംഗമം കൊടിക്കുന്നില്‍ സുരേഷ് എംപി ഉദ്ഘാടനം ചെയ്തു. പ്രസിഡന്‍റ് സാലി അനൂപ് അധ്യക്ഷത വഹിച്ചു. എസ്എന്‍ഡിപി താലൂക്ക് യൂണിയന്‍ പ്രസിഡന്‍റ് ഗിരീഷ് കോനാട്ട്, പ്രത്യാശ ഡയറക്ടര്‍ ഫാ. സെബാസ്റ്റ്യന്‍ പുന്നശേരി, പുതൂര്‍പള്ളി ഇമാം ഇ.പി. ഷിഫാര്‍ കൗസരി, വൈസ് പ്രസിഡന്‍റ് ശ്രീനിവാസന്‍ കക്കുഴി, ജനറൽസെക്രട്ടറി ജി. ലക്ഷ്മണന്‍, നിര്‍വാഹക സമിതിയംഗം സിബിച്ചന്‍ പ്ലാമൂട്ടില്‍ എന്നിവര്‍ പ്രസംഗിച്ചു. വിവിധ മേഖലകളില്‍ മികവു തെളിയിച്ച പ്രതിഭകളെയും വിദ്യാഭ്യാസരംഗത്ത് ഉന്നതവിജയം നേടിയവരെയും സംഗമത്തില്‍ ആദരിച്ചു. കലാഭവന്‍ താജും സംഘവും നയിച്ച കലാസന്ധ്യയും ഗാനമേളയും നടന്നു.

എംസിഎഫിന് തീയിട്ടു

നെടുംകുന്നം: ഹരിതകർമസേന ശേഖരിച്ച പ്ലാസ്റ്റിക് മാലിന്യങ്ങൾ സൂക്ഷിച്ചിരുന്ന എംസിഎഫ് കത്തിനശിച്ചു. ഇന്നലെ പുലർച്ചെ നാലിന് ദേവഗിരി-കോവേലി റോഡിൽ സ്വകാര്യാശുപത്രിക്ക് സമീപമായിരുന്നു സംഭവം. റോഡരികിൽ സ്ഥാപിച്ചിരുന്ന എംസിഎഫിൽനിന്നു തീയുയരുന്നത് ആശുപത്രിയിലെ സെക്യൂരിറ്റിയാണ് ആദ്യം കണ്ടത്. ഇദ്ദേഹമാണ് വിവരം നാട്ടുകാരെയും പഞ്ചായത്ത് അധികൃതരെയും അറിയിച്ചത്. എംസിഎഫിനുള്ളിലും പുറത്തും നിറയെ മാലിന്യ ചാക്കുകളുണ്ടായിരുന്നു. ആരോ തീയിട്ടതാണെന്നു സംശയിക്കുന്നു. മുക്കാൽ മണിക്കൂറോളം മാലിന്യങ്ങൾ കത്തിയെരിഞ്ഞു. വിവരമറിഞ്ഞ് പാമ്പാടിയിൽനിന്നും അഗ്നിരക്ഷാസേന എത്തിയാണ് തീയണച്ചത്. സംഭവത്തിൽ കറുകച്ചാൽ പോലീസിൽ പരാതി നൽകുമെന്നു പഞ്ചായത്ത് വൈസ് പ്രസിഡന്‍റ് വി.എം. ഗോപകുമാർ പറഞ്ഞു.

അതിരൂപതയിലെ മുഴുവന്‍ അംഗങ്ങള്‍ക്കും "സ്വന്തം ബൈബിള്‍' ചരിത്ര പദ്ധതിക്കു തുടക്കം

നൂറുമേനി വചനപഠന പദ്ധതി സീസണ്‍ നാലിലേക്ക് ചങ്ങനാശേരി: ലോകത്തിലെ ഏറ്റവും വലിയ വചന പഠന പദ്ധതിയെന്നു വിശേഷിപ്പിക്കപ്പെടുന്ന നൂറുമേനി വചനപഠന മത്സരം ചരിത്രംകുറിച്ച് സീസണ്‍- നാലിലേക്കു കടന്നു. വചനവും ബൈബിളും അതിരൂപതയിലെ മുഴുവന്‍ അംഗങ്ങൾക്കും എത്തിക്കുന്ന പദ്ധതിക്ക് ഈ വര്‍ഷം അതിരൂപത പ്രാധാന്യം നല്‍കും. ഇതിനായി പത്തുലക്ഷം രൂപ അതിരൂപത നീക്കിവയ്ക്കും. എസ്ബി കോളജിലെ മാര്‍ കാവുകാട്ട് ഹാളില്‍ ചേര്‍ന്ന മഹാസംഗമത്തില്‍ അതിരൂപതയിലെ എല്ലാ കുടുംബങ്ങളിലേയും മുഴുവന്‍ അംഗങ്ങള്‍ക്കും സ്വന്തമായി ബൈബിള്‍ ലഭ്യമാക്കുന്ന എന്‍റെ സ്വന്തം ബൈബിള്‍ പദ്ധതിക്ക് തുടക്കമായി. പുതിയ നിയമവും 150 സങ്കീര്‍ത്തനങ്ങളും ഉള്‍പ്പെടുത്തി ആകര്‍ഷകമായി തയാറാക്കിയ പ്രത്യേക എഡീഷന്‍ ബൈബിളാണ് വിതരണം ചെയ്യുന്നത്. 119-ാം സങ്കീര്‍ത്തനം മനഃപാഠമാക്കിയ രണ്ടാം ക്ലാസ് വിദ്യാര്‍ഥികളായ ലൂക്കാ രാകേഷ്, ഇവാന്‍ വി. ബിജോയ് എന്നിവര്‍ക്ക് പേഴ്‌സണല്‍ ബൈബിള്‍ നല്‍കി ചങ്ങനാശേരി അതിരൂപതാധ്യക്ഷന്‍ ആര്‍ച്ച്ബിഷപ് മാര്‍ തോമസ് തറയില്‍ പദ്ധതി ഉദ്ഘാടനം ചെയ്തു. സീസണ്‍-മൂന്ന് നൂറുമേനി മഹാസംഗമം തിരുവല്ല ആര്‍ച്ച്ബിഷപ് ഡോ. തോമസ് മാര്‍ കൂറിലോസ് ദീപം തെളിച്ച് ഉദ്ഘാടനം ചെയ്തു. സീസണ്‍-1ൽ കാല്‍ ലക്ഷത്തോളം പേരാണ് പങ്കെടുത്തത്. സീസണ്‍-2ല്‍ അമ്പതിനായിരംപേര്‍ പങ്കെടുത്തപ്പോള്‍ സീസണ്‍-3ല്‍ ഒരു ലക്ഷത്തോളം അതിരൂപതാംഗങ്ങളാണ് പങ്കാളികളായത്. ചലച്ചിത്ര നടന്‍ സിജോയ് വര്‍ഗീസ് നൂറുമേനി സീസണ്‍ -4 ന്‍റെ ഉദ്ഘാടനവും പഠനപുസ്തക പ്രകാശനവും നിര്‍വഹിച്ചു. കാന്‍റിക്കിള്‍സ് വര്‍ഷിപ്പ് ബാൻഡ് ഇമ്പകരമായ ഗാനങ്ങള്‍ ആലപിച്ചു. അതിരൂപത ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, വചനപഠന പദ്ധതി ചെയര്‍മാന്‍ സണ്ണി തോമസ് ഇടിമണ്ണിക്കല്‍ എന്നിവരുടെ നേതൃത്വത്തിലുള്ള ടീമാണ് നൂറുമേനിക്കു നേതൃത്വം നല്‍കുന്നത്. ആന്‍റണി മലയില്‍, ഡോ. സോണി കണ്ടങ്കേരില്‍, അഡ്വ. ഡെന്നീസ് ജോസഫ്, ജോസി കടന്തോട്, ജോബി തൂമ്പുങ്കല്‍, ഷിജി ജോണ്‍സണ്‍, ബിനു വെളിയനാട്, ലാലി ഇളപ്പുങ്കല്‍, ജോസുകുട്ടി കുട്ടംപേരൂര്‍, സൈബി അക്കര, ജോഷി കൊല്ലാപുരം, സീന തൂമ്പുങ്കല്‍, റോയി വേലിക്കാട്ട്, ജോണിക്കുട്ടി സ്‌കറിയ, ആന്‍റണി അമിക്കുളം, ജോസഫ് ഇളപ്പുങ്കല്‍, സിബി മുക്കാടന്‍, റെന്നി മാത്യു, ടോമിച്ചന്‍ പുല്ലങ്കാവുങ്കല്‍, ജോസ് സെബാസ്റ്റ്യന്‍, ലാലപ്പന്‍ എന്നിവര്‍ പരിപാടിക്ക് നേതൃത്വം നല്‍കി.

നായർ സമ്മേളനം സമാപിച്ചു

വൈക്കം: ഒരു വ്യാഴവട്ടത്തിനു ശേഷം വൈക്കത്ത് നടന്ന നായര്‍ മഹാസമ്മേളനം സമാപിച്ചു. ക്ഷേത്ര നഗരിക്ക് സിന്ദൂരം ചാര്‍ത്തി തങ്ക വര്‍ണ്ണ പതാകകള്‍ ഉയര്‍ന്നുപൊങ്ങിയ സാംസ്‌കാരിക ഘോഷയാത്ര എന്‍എസ്എസിന്‍റെ ശക്തി വിളിച്ചറിയിക്കുന്നതായിരുന്നു. വൈക്കം താലൂക്ക് എന്‍.എസ്.എസ് യൂണിയന്‍റെ നേതൃത്വത്തില്‍ ഒരു വര്‍ഷമായി നടത്തിവരുന്ന മന്നം നവോത്ഥാന സൂര്യന്‍ എന്ന പരിപാടിയുടെ സമാപനവും നവതി ആഘോഷങ്ങളുടെ ആരംഭവും കുറിച്ചുകൊണ്ടു നടന്ന മഹാ സമ്മേളനത്തില്‍ യൂണിയനിലെ 14 മേഖലകളിലെ 97 കരയോഗങ്ങളില്‍ നിന്ന് ഏകദേശം 25000 അംഗങ്ങള്‍ പങ്കെടുത്തു. മേഖലകളില്‍നിന്നു വന്ന അംഗങ്ങള്‍ വൈക്കം വലിയ കവലയില്‍ സംഗമിച്ചതോടെ സാംസ്‌കാരിക ഘോഷയാത്ര ആരംഭിച്ചു. വലിയ കവലയിലെ മന്നം പ്രതിമയില്‍ പുഷ്പാര്‍ച്ചനയ്ക്കു ശേഷം നടന്ന ഘോഷയാത്രയ്ക്ക് യൂണിയന്‍ പ്രസിഡന്‍റ് പി.ജി.എം. നായര്‍ കാരിക്കോട്, വൈസ് പ്രസിഡന്‍റ് പി. വേണുഗോപാല്‍, സെക്രട്ടറി അഖില്‍ ആര്‍. നായര്‍, ഇന്‍സ്പെക്ടര്‍ എസ്. മുരുകേശ്, ഭാരവാഹികൾ തുടങ്ങിയവർ നേതൃത്വം നൽകി. വൈക്കം, ഉദയനാപുരം, ചെമ്പ്, മറവന്‍തുരുത്ത്, ടി.വി. പുരം, തലയാഴം, വെച്ചൂര്‍, കല്ലറ, മാഞ്ഞൂര്‍, കടുത്തുരുത്തി, ഞീഴൂര്‍, മുളക്കുളം, വെള്ളൂര്‍, തലയോലപ്പറമ്പ് മേഖലകള്‍ ക്രമമനുസരിച്ച് ഘോഷയാത്രയില്‍ അണിചേര്‍ന്നു. എന്‍എസ്എസ് വൈസ് പ്രസിഡന്‍റ് എം. സംഗീത കുമാര്‍ ഉദ്ഘാടനം ചെയ്തു. യൂണിയന്‍ ചെയര്‍മാന്‍ പി.ജി.എം. നായര്‍ കാരിക്കോട് അധ്യക്ഷത വഹിച്ച ചടങ്ങില്‍ എൻ.എസ്.എസ്. സെക്രട്ടറി ഹരികുമാര്‍ കോയിക്കല്‍, ഡയറക്ടര്‍ ബോര്‍ഡ് അംഗം ഇലഞ്ഞിയില്‍ രാധാകൃഷ്ണന്‍, രജിസ്ട്രാര്‍ വി.വി. ശശിധരന്‍ നായര്‍, കോട്ടയം യൂണിയന്‍ പ്രസിഡന്‍റ് ബി. ഗോപകുമാര്‍ തുടങ്ങിയവർ പ്രസംഗിച്ചു. ചടങ്ങില്‍ യൂണിയന്‍റെ വെബ്‌സൈറ്റ് ഉദ്ഘാടനവും സോവിനീറിന്‍റെ പ്രകാശനവും നടന്നു. സുരക്ഷാ ക്രമീകരണങ്ങളും ഗ്രീന്‍ പ്രോട്ടോക്കോളും പാലിച്ചാണ് ഘോഷയാത്ര നടത്തിയത്. കുടിവെളളം, ലഘു ഭക്ഷണം, ആരോഗ്യ വകുപ്പ്, ആംബുലന്‍സ്, വോളന്‍റിയേഴ്‌സ് എന്നിവരുടെ സേവനവും ഉണ്ടായിരുന്നു. സമ്മേളനത്തില്‍ പങ്കെടുക്കുവാനെത്തിയവരുടെ വാഹനം പാര്‍ക്കു ചെയ്യുന്നതിനും സൗകര്യമൊരുക്കിയിരുന്നു. വൈക്കം പോലിസിന്‍റെ നേതൃത്വത്തില്‍ ഗതാഗത നിയന്ത്രണവും നടത്തി.

വേമ്പനാട്ടുകായൽ നീന്തിക്കടന്ന് 10 ഭിന്നശേഷി കുരുന്നുകൾ

വൈക്കം: കേരള സർക്കാർ നടപ്പിലാക്കുന്ന ഭിന്നശേഷി സൗഹൃദ പ്രവർത്തനങ്ങളുടെ ഭാഗമായി സ്വിമ്മിംഗ് തെറാപ്പി കോഴ്‌സ് വിജയകരമായി പൂർത്തിയാക്കിയ കുട്ടികൾക്കായി വേമ്പനാട്ട് കായലിൽ ലോക റിക്കാർഡിനായി നീന്തൽ മത്സരം സംഘടിപ്പിച്ചു. കേരളത്തിൽ ആദ്യമായാണ് ഭിന്നശേഷിയുള്ള 10 കുട്ടികൾ വേൾഡ് റിക്കാർഡ് സ്വിമ്മിംഗ് നടത്തിയത്. ജലദുരന്തങ്ങളുടെ ആഘാതം കുറച്ച് ഭിന്നശേഷിക്കാരെ സമൂഹത്തിന്‍റെ മുഖ്യ ധാരയിലെത്തിക്കുന്നതിനാണ് മത്സരം നടത്തിയതെന്ന് അക്കാഡമി അധികൃതർ പറഞ്ഞു. കേരളത്തിലെ ദുരന്തനിവാരണ പരിശീലന പ്രവർത്തനങ്ങളിൽ വിദഗ്‌ധ സേവനം ചെയ്യുന്നവരുടെ പാനലാണ് ജീവൻ രക്ഷാ സ്വിമ്മിംഗ് അക്കാഡമി. എമർജിങ് വൈക്കവും ജെ.ആർ.എസ് അക്കാഡമിയും സംയുക്തമായി സുരക്ഷാ മുൻകരുതലുകൾ പാലിച്ചു വേമ്പനാട്ട് കായലിൽ നടത്തിയ നീന്തൽ ഇന്നലെ രാവിലെ 7.30ന് അമ്പലക്കടവിൽനിന്ന് ആരംഭിച്ച് വൈക്കം ബീച്ചിൽ സമാപിച്ചു. മൂന്നര വയസുകാരി മുതൽ 10 വയസുകാരൻ വരെ മത്സരത്തിൽ പങ്കെടുത്തു. എ. മനാഫിന്‍റെ അധ്യക്ഷതയിൽ നടന്ന അനുമോദനയോഗം മോൻസ് ജോസഫ് എംഎൽഎ ഉദ്ഘാടനം ചെയ്തു. ചീഫ് കോ-ഓർഡിനേറ്റർ അബ്ദുൾ കലാം ആസാദ്, ചലച്ചിത്ര പിന്നണിഗായകൻ ദേവാനന്ദ് അബ്ദുൾ കലാം ആസാദ്, കെ.എം.എ സലിം, ഫാ. അലൻ തുടങ്ങിയവർ സംബന്ധിച്ചു.

‘കരുണയും കാവലും’ ചിത്രീകരണം പൂര്‍ത്തിയായി

വൈക്കം: ഭക്തിസാന്ദ്രമായ ‘കരുണയും കാവലും’ എന്ന നൊവേനയുടെ ചിത്രീകരണം വൈക്കം സെന്‍റ് ജോസഫ് ഫൊറോന പള്ളിയില്‍ പൂര്‍ത്തിയായി. ‘പിതൃഹൃദയത്തോടെ’ എന്ന അപ്പൊസ്‌തലിക ലേഖനത്തിൽ ഫ്രാന്‍സിസ് മാര്‍പാപ്പ യൗസേപ്പിതാവിന്‍റെ ചില പ്രത്യേക ഗുണങ്ങള്‍ രേഖപ്പെടുത്തിയതില്‍നിന്നുള്ള ചൈതന്യം ഉള്‍ക്കൊണ്ട് റവ.ഡോ. ബര്‍ക്കുമാന്‍സ് കൊടയ്ക്കല്‍ രചിച്ച നൊവേനയാണ് “കരുണയും കാവലും’’. ഓസ്‌ട്രേലിയന്‍ ചലച്ചിത്ര രംഗത്ത് പ്രവർത്തിക്കുന്ന നടനും എഴുത്തുകാരനും നിർമാതാവും സംവിധായകനും ലോക റെക്കോര്‍ഡ് ജേതാവുമായ ജോയ് കെ. മാത്യു സംവിധാനം നിര്‍വഹിച്ച “കരുണയും കാവലും’’ ജിഎംസിയുടെ ബാനറിൽ കെ.ജെ. മാത്യു കണിയാംപറമ്പിലാണ് നിർമിച്ചത്. സാലി മൊയ്ദീന്‍ (ഛായാഗ്രഹണം), ലിൻസൺ റാഫേൽ (എഡിറ്റിംഗ്), ജോസ് വരാപ്പുഴ (പ്രൊഡക്‌ഷൻ കൺട്രോളർ), ജേക്കബ് ആന്‍റണി (പ്രൊഡക്‌ഷൻ മാനേജർ), ജുബിൻ രാജ് (സൗണ്ട് ഡിസൈനർ), ഫ്രോളിന്‍ (അസോസിയേറ്റ് കാമറമാൻ)എന്നിവരാണ് മറ്റ് അണിയറ പ്രവർത്തകർ. പള്ളി കൈക്കാരന്മാരായ ജോര്‍ജ് പൗലോസ് ആവള്ളില്‍, ഡെന്നി ജോസഫ് മംഗലശേരി, കുടുംബ യൂണിറ്റുകളുടെ വൈസ് ചെയര്‍മാന്‍ മാത്യു ജോസഫ് കൂടല്ലി, ക്ലാര്‍ക്ക് ചാക്കപ്പന്‍ പുല്ലരുത്തില്‍, കപ്യാര്‍ ബേബി തെക്കേമുട്ടുമന, ഗായകന്‍ ജോണി ഉണ്ണിത്തുരുത്തില്‍, കീ ബോര്‍ഡിസ്റ്റ് സിബി അടാത്തറ എന്നിവര്‍ ചിത്രീകരണ നിര്‍വഹണത്തിനു നേതൃത്വം നല്‍കി. ഇടവകാംഗങ്ങളുടെ പൂര്‍ണ സഹകരണത്തോടെയായിരുന്നു ചിത്രീകരണം. ജനുവരി 23ന് വൈക്കം സെന്‍റ് ജോസഫ് ഫൊറോന പള്ളിയിലെ വിശുദ്ധ യൗസേപ്പിതാവിന്‍റെ തിരുനാളിനോടനുബന്ധിച്ച് റിലീസ് ചെയ്യുമെന്ന് കൈക്കാരന്മാരായ ജോര്‍ജ് പൗലോസ് ആവള്ളില്‍, ഡെന്നി ജോസഫ് മംഗലശേരി, കുടുംബയൂണിറ്റുകളുടെ വൈസ്ചെയര്‍മാൻ മാത്യു ജോസഫ് കൂടല്ലി എന്നിവര്‍ അറിയിച്ചു.

വാട്ടര്‍ അഥോറിറ്റിയുടെ പൈപ്പ് പൊട്ടി വെള്ളം പാഴാകുന്നു

കടുത്തുരുത്തി: വാട്ടര്‍ അഥോറിറ്റിയുടെ പൈപ്പ് പൊട്ടി വെള്ളം പാഴാകുന്നു. ശാന്തിപുരം ജംഗ്ഷനു സമീപമാണ് സംഭവം. വെള്ളം ചീറ്റിയൊഴുകി ഇതുവഴി നടന്നുപോകുന്നവരുടെ ദേഹത്തേക്ക് തെറിക്കുന്നതിനാല്‍ കാല്‍നടയാത്രക്കാരും ദുരിതത്തിലാണ്. വാട്ടര്‍ അഥോറിറ്റി ജീവനക്കാരെ അറിയിച്ചെങ്കിലും തുടര്‍ നടപടികളൊന്നുമുണ്ടായിട്ടില്ല. വേനല്‍ രൂക്ഷമായതോടെ പലയിടത്തും കുടിവെള്ളക്ഷാമം അനുഭവപ്പെട്ടുതുടങ്ങിയതോടെ പമ്പിംഗ് ശക്തമാക്കേണ്ടി വരുന്നതു കൂടുതല്‍ വെള്ളം നഷ്ടപ്പെടാനിടയാക്കും. ഉയരത്തില്‍ ചീറ്റിത്തെറിക്കുന്ന അവസ്ഥയിലാണ് വെള്ളം റോഡിലേക്കെത്തുന്നത്.

കടുത്തുരുത്തി ഫൊറോന കുടുംബസംഗമം

കടുത്തുരുത്തി: ക്‌നാനായ കത്തോലിക്കാ കോണ്‍ഗ്രസ് കടുത്തുരുത്തി ഫൊറോനയുടെ കുടുബ സംഗമവും ഓണാഘോഷവും ഇന്നു 2.30 ന് കടുത്തുരുത്തി വലിയപള്ളി പാരിഷ് ഹാളില്‍ നടക്കും. ആഘോഷ പരിപാടികള്‍ കോട്ടയം അതിരൂപത വികാരി ജനറാള്‍ ഫാ. തോമസ് ആനിമൂട്ടില്‍ ഉദ്ഘാടനം ചെയ്യും. ഫൊറോന പ്രസിഡന്‍റ് ഏബ്രഹാം കുരീക്കോട്ടില്‍ അധ്യക്ഷത വഹിക്കും. ഫൊറോന വികാരി ഫാ. ജോണ്‍സണ്‍ നീലനിരപ്പേല്‍, കെസിസി രൂപത ഭാരവാഹികളായ ബാബു പറന്പടത്തുമലയില്‍, ബേബി മുളവേലിപ്പുറം തുടങ്ങിയവര്‍ പ്രസംഗിക്കും. ഫൊറോനയിലെ 12 കെസിസി യൂണിറ്റുകളില്‍നിന്നുള്ള 500 ഓളം പേര്‍ കുടുബസംഗമത്തില്‍ പങ്കെടുക്കുമെന്ന് ഫൊറോന പ്രസിഡന്‍റ് ഏബ്രഹാം കുരീക്കോട്ടിലും പ്രോഗ്രാം കണ്‍വീനര്‍ ജോമോന്‍ പുന്നൂസും അറിയിച്ചു.

പെരുവയിലെ ഗതാഗത പ്രശ്‌നങ്ങള്‍ക്ക് പരിഹാരം കാണണമെന്ന്

പെരുവ: പെരുവയിലെ ഗതാഗത പ്രശ്‌നങ്ങള്‍ക്ക് പരിഹാരം കാണണമെന്ന ആവശ്യം ശക്തം. വാനഹത്തിരക്കേറിയ പെരുവ ടൗണില്‍ ഗതാഗത നിയന്ത്രണത്തിനായി യാതൊരു സംവിധാനങ്ങളുമില്ല. തോന്നുംപടിയുള്ള ഡ്രൈവിംഗും അനധികൃത വാഹന പാര്‍ക്കിംഗും പെരുവയില്‍ ഗതാഗത പ്രശ്നങ്ങള്‍ രൂക്ഷമാക്കുകയാണ്. പെരുവ ജംഗ്ഷനില്‍നിന്ന് കടുത്തുരുത്തി, പിറവം, കൂത്താട്ടുകുളം, തലയോലപ്പറമ്പ് എന്നീ ഭാഗങ്ങളിലേക്ക് പോകുന്ന റോഡരികുകളിലെല്ലാം വാഹനങ്ങളുടെ അനധികൃത പാര്‍ക്കിംഗ് ഗതാഗത പ്രതിസന്ധി രൂക്ഷമാക്കുന്നു. വാഹനത്തിരക്കേറിയ നാല്‍ക്കവലയാണ് പെരുവ ജംഗ്ഷനെന്നതും കുരുക്ക് വര്‍ധിപ്പിക്കുന്നു. മുമ്പ് പഞ്ചായത്ത് ഭരണസമിതിയുടെ നേതൃത്വത്തില്‍ ജംഗ്ഷനില്‍ നോ പാര്‍ക്കിംഗ് ബോര്‍ഡ് സ്ഥാപിക്കുകയും ജഗ്ഷനിലെ സ്റ്റാന്‍ഡിലെ ഓട്ടോറിക്ഷകള്‍ പുറകോട്ടിറക്കി പാര്‍ക്ക് ചെയ്യിക്കുകയും ബസ് സ്റ്റോപ്പുകള്‍ പുനഃക്രമീകരിക്കുകയും ചെയ്തിരുന്നു. പിന്നീട് ഇതെല്ലാം അവഗണിച്ചു ബസുകള്‍ പഴയപടിതന്നെ സ്റ്റോപ്പുകളാക്കി. ബസ് നിര്‍ത്താന്‍ മുളക്കുളം പഞ്ചായത്തും ആര്‍ടിഒയും നിര്‍ദേശിച്ച സ്ഥലങ്ങളില്‍ മറ്റു വാഹനങ്ങള്‍ പാര്‍ക്ക് ചെയ്യുന്നതാണ് ഗതാഗതക്കുരുക്കിന് കാരണമാകുന്നതെന്നും ആക്ഷേപമുണ്ട്. ഗതാഗതം പുനഃക്രമീകരണം പിറവം റോഡില്‍ നിലവില്‍ ബസുകള്‍ നിര്‍ത്തുന്നത് നാഗാര്‍ജുന ഫാര്‍മസിക്ക് മുന്നിലാണ്. ഇത് മുന്നോട്ട് മാറ്റി സെന്‍ട്രല്‍ ബാങ്കിന്‍റെ വാതിക്കലേക്ക് ബസ് സ്റ്റോപ്പ് ക്രമീകരിക്കണം. കൂത്താട്ടുകുളം റോഡില്‍ ആലിന്‍ചുവടിന് സമീപം കാത്തിരിപ്പ് കേന്ദ്രത്തിനു മുന്നിലാണ് ബസുകള്‍ നിര്‍ത്തുന്നത്. ഇവിടുത്തെ സ്റ്റോപ്പ് കേരളാ ബാങ്കിന് സമീപത്തേക്ക് മാറ്റണം. വൈക്കം റോഡില്‍ പ്രസന്ന ബേക്കറിയുടെ മുന്‍വശമുള്ള ബസ്‌സ്റ്റോപ്പ് സ്നേഹ ജൂവലറിയുടെ ഭാഗത്തേക്കും മാറ്റി പുനഃസ്ഥാപിക്കണം. നടപടിവേണം കെഎസ്ആര്‍ടിസി ഉള്‍പ്പെടെ 40തിലധികം ബസുകള്‍ ദിനംപ്രതി പെരുവ കവലയിലൂടെ സര്‍വീസ് നടത്തുന്നുണ്ട്. സ്റ്റോപ്പുകളെല്ലാം ജംഗ്ഷനിലായതിനാല്‍ ബസുകള്‍ നിര്‍ത്തുന്ന സമയത്ത് മറ്റ് വാഹനങ്ങള്‍ക്കു കടന്നുപോകാന്‍ കഴിയാതെവരുന്നതോടെ ഗതാഗതം കുരുങ്ങുന്നതായി യാത്രക്കാര്‍ പറയുന്നു. സ്‌കൂള്‍ ബസുകളടക്കം കുരുക്കില്‍ അകപ്പെടാറുണ്ട്. രാവിലെയും വൈകുന്നേരവുമാണ് പ്രധാനമായും ഗതാഗതം കുരുങ്ങുന്നത്. ജംഗ്ഷനിലെ അനധികൃത പാര്‍ക്കിംഗ് ഒഴിവാക്കാന്‍ നടപടി സ്വീകരിക്കണമെന്നും വാഹനഗതാഗതം മറ്റു യാത്രക്കാര്‍ക്കും വ്യാപാരികള്‍ക്കും തടസങ്ങള്‍ ഉണ്ടാക്കാത്തവിധം പുനഃക്രമീകരിക്കണമെന്നും യാത്രക്കാർ പറയുന്നു.

സിഎസ്‌ഐ സെന്‍റ് മോണിക്കാസ് ദിനാഘോഷം

കോട്ടയം: വിശ്വാസ ജീവിത ശക്തീകരണത്തിലൂടെ വനിതകള്‍ ക്രിസ്തുവിന്‍റെ ചാലകങ്ങളായി മാറേണ്ടത് കാലഘട്ടത്തിന്‍റെ ആവശ്യമെന്ന് ബിഷപ് മലയില്‍ സാബു കോശി ചെറിയാന്‍. സിഎസ്‌ഐ സെന്‍റ് മോണിക്കാസ് ദിനാഘോഷവും സ്ത്രീ ജനസഖ്യ വാര്‍ഷിക സമ്മേളനവും ഉദ്ഘാടനം ചെയ്യുകയായിരുന്നു ബിഷപ്. സ്ത്രീ ജനസഖ്യം പ്രസിഡന്‍റ് ഡോ. ജെസി സാറാ കോശി അധ്യക്ഷത വഹിച്ചു. ഡോ. മ്യൂസ് മേരി ജോര്‍ജ്, മഹായിടവക ട്രഷറര്‍ ഫാ. ജിജി ജോണ്‍ ജേക്കബ്, വൈദിക ജില്ലാ ചെയര്‍മാന്‍ ഫാ. ജേക്കബ് ജോണ്‍സണ്‍ തുടങ്ങിയവർ പ്രസംഗിച്ചു.

കോട്ടയം വൈഎംസിഎ

കോട്ടയം: കോട്ടയം വൈഎംസിഎ പബ്ലിക് ഹെല്‍ത്ത് ആന്‍ഡ് കമ്യൂണിറ്റി സര്‍വീസ് കമ്മിറ്റിയുടെ നേതൃത്വത്തില്‍ താഴത്തങ്ങാടി എംഡി എല്‍പി സ്‌കൂളില്‍ "അമീബിക് മസ്തിഷ്‌ക ജ്വരം: മുന്‍കരുതലുകള്‍ എന്തെല്ലാം'എന്ന വിഷയത്തില്‍ ബോധവത്കരണ പരിപാടി സംഘടിപ്പിച്ചു. കോട്ടയം ഭാരത് ഹോസ്പിറ്റലിലെ ശിശുരോഗ വിദഗ്ധന്‍ ഡോ. എ. അനൂപ് കുമാര്‍ ക്ലാസിനു നേതൃത്വം നല്‍കി. പബ്ലിക് ഹെല്‍ത്ത് ആന്‍ഡ് കമ്യൂണിറ്റി സര്‍വീസ് കമ്മിറ്റി ചെയര്‍മാന്‍ ടോം കോര അഞ്ചേരില്‍ അധ്യക്ഷത വഹിച്ചു. ഹെഡ്മിസ്ട്രസ് ഷീല ഉമ്മന്‍, വൈഎംസിഎ വൈസ് പ്രസിഡന്‍റ് എബി പുഞ്ചിരി, അനൂപ് സി. ജോണ്‍, ഷൈജു വര്‍ഗീസ്, നവീന്‍ സണ്ണി അലക്‌സ് എന്നിവര്‍ പ്രസംഗിച്ചു.

വികസന സദസ്: യുഡിഎഫ് വിയോജനം രേഖപ്പെടുത്തി

നീണ്ടൂർ: കേരള സർക്കാരിന്‍റെ വികസന നേട്ടങ്ങൾ ജനങ്ങൾക്കു മുന്നിൽ അവതരിപ്പിക്കാൻ തദ്ദേശ സ്വയംഭരണ സ്ഥാപനങ്ങൾ വികസന സദസ് നടത്തണമെന്ന നിർദേശത്തിന്‍റെ അടിസ്ഥാനത്തിൽ ഒക്‌ടോബർ 10ന് നവകേരള സദസ് നടത്താനുള്ള നീണ്ടൂർ പഞ്ചായത്ത് കമ്മിറ്റിയുടെ തീരുമാനത്തിൽ യുഡിഎഫ് വിയോജനം രേഖപ്പെടുത്തി. പ്രതിപക്ഷ നേതാവ് എം. മുരളി വിയോജനക്കുറിപ്പ് നൽകി. യുഡിഎഫ് അംഗങ്ങളായ ലൂക്കോസ് തോമസ് തോട്ടുങ്കൽ, സിനു ജോൺ, മരിയ ഗൊരേത്തി, സൗമ്യ വിനീഷ് എന്നിവർ വിയോജനക്കുറിപ്പിനെ പിന്തുണച്ചു.

ബസേലിയസ് ട്രോഫി ഫുട്‌ബോള്‍: ബസേലിയസും നിര്‍മലയും സെമിയില്‍

കോട്ടയം: 19-ാമത് ഉപ്പൂട്ടില്‍ കുര്യന്‍ ഏബ്രഹാം മെമ്മോറിയല്‍ ഇന്‍റര്‍കൊളീജിയറ്റ് ബസേലിയസ് ട്രോഫി ഫുട്‌ബോള്‍ സെമിഫൈനല്‍ മത്സരങ്ങള്‍ നാളെ കോളജ് മൈതാനത്ത് നടക്കും. ഇന്നലെ നടന്ന ആദ്യമത്സരത്തില്‍ പെനാല്‍റ്റി ഷൂട്ടൗട്ടില്‍ ചങ്ങനാശേരി എസ്ബി കോളജിനെ രണ്ടിനെതിരേ മൂന്നു ഗോളുകള്‍ക്ക് മൂവാറ്റുപുഴ നിര്‍മല കോളജ് പരാജയപ്പെടുത്തി (2-3). രണ്ടാം മത്സരത്തില്‍ കൊല്ലം എസ്എന്‍ കോളജിനെ പരാജയപ്പെടുത്തി തേവര എസ്.എച്ച്. വിജയിച്ചു (0-1). മൂന്നാം മത്സരത്തില്‍ മൂലമറ്റം സെന്‍റ് ജോസഫ് അക്കാഡമിയെ പരാജയപ്പെടുത്തി ബസേലിയസ് കോളജ് വിജയിച്ചു(0-1). നാലാം മത്സരത്തില്‍ മൂന്നാര്‍ ഗവണ്‍മെന്‍റ് കോളജിനെ പരാജയപ്പെടുത്തി പഴഞ്ഞി എംഡി കോളജ് വിജയിച്ചു(0-2). അഞ്ചാം മത്സരത്തില്‍ ഗുരുവായൂര്‍ ശ്രീകൃഷ്ണ കോളജിനെ പരാജയപ്പെടുത്തി നിര്‍മല കോളജ് മൂവാറ്റുപുഴ വിജയിച്ചു(0-1). നാളെ രാവിലെ എട്ടിന് നടക്കുന്ന ആദ്യസെമിയില്‍ എസ്എച്ച് തേവരയും ബസേലിയസ് കോളജും തമ്മില്‍ ഏറ്റുമുട്ടും. രണ്ടാം സെമിയില്‍ എംഡി കോളജ് പഴഞ്ഞിയും നിര്‍മല കോളജ് മൂവാറ്റുപുഴയും തമ്മില്‍ ഏറ്റുമുട്ടും. ഫൈനല്‍ മത്സരം 16ന് രാവിലെ 8.30ന് നടക്കും.

പനച്ചിക്കാട് ദക്ഷിണമൂകാംബിയിൽ നവരാത്രി മഹോത്സവം

കോട്ടയം: പനച്ചിക്കാട് ദക്ഷിണമുകാംബിയിലെ നവരാത്രി മഹോത്സവം 18 മുതല്‍ ഒക്‌ടോബര്‍ രണ്ടു വരെ ആഘോഷിക്കും. 18 രാവിലെ എട്ടിന് കലോപാസനയുടെയും 22നു രാത്രി 7ന് ദേശീയ സംഗീത നൃത്തോത്സവത്തിന്‍റെയും ദീപപ്രകാശനം നടക്കും. 29ന് 6.30ന് ഗ്രന്ഥം എഴുന്നള്ളത്ത്, പൂജവയ്പ്. 30ന് ദുര്‍ഗാഷ്ടമി, ഒക്‌ടോബര്‍ ഒന്നിന് മഹാനവമി ദര്‍ശനം, ദക്ഷിണമൂകാംബി സംഗീതോത്സവം, ഒക്‌ടോബര്‍ രണ്ടിന് വിജയദശമി, രാവിലെ 4ന് പൂജയെടുപ്പ് വിദ്യാരംഭം, ക്ഷേത്രാനുഷ്ഠാനങ്ങള്‍ക്കൊപ്പം വിശേഷാല്‍ പൂജകളായ മുറജപം, പുരുഷ സൂക്താര്‍ച്ചന, ചക്രാബ്ജ പൂജ, പുഷ്പാഭിഷേകം, നിറമാല, സാരസ്വത സൂക്താര്‍ച്ചന തുടങ്ങിയ പൂജകള്‍ തന്ത്രിമുഖ്യന്‍ പെരിഞ്ഞേരിമന വാസുദേവന്‍ നമ്പൂതിരിപ്പാടിന്‍റെ മുഖ്യകാര്‍മികത്വത്തില്‍ നടക്കും. പത്രസമ്മേളനത്തില്‍ കെ.എന്‍. നാരായണന്‍ നമ്പൂതിരി, കെ.എന്‍. വാസുദേവന്‍ നമ്പൂതിരി, കെ.എന്‍. നാരായണന്‍ നമ്പൂതിരി എന്നിവര്‍ പങ്കെടുത്തു.

പുഞ്ചകൃഷിക്ക് ഒരുക്കങ്ങളായി

കുമരകം: കുട്ടനാടൻ പാടശേഖരങ്ങളിൽ പുഞ്ചകൃഷിയിറക്കാനുള്ള നടപടികൾക്ക് തുടക്കമായി. ആദ്യ പടിയായി പാടങ്ങളിലെ വെള്ളം വറ്റിക്കാൻവേണ്ടിയുള്ള പുഞ്ച ലേലം പുഞ്ച സ്പെഷ്യൽ ഓഫീസിൽ ആരംഭിച്ചു. വൈദ്യുതി കണക്‌ഷൻ ലഭിച്ച പാടശേഖരങ്ങളിൽ മോട്ടോർ പ്രവർത്തിപ്പിച്ച് വെള്ളം വറ്റിച്ചുതുടങ്ങി. നീറ്റുകക്കായോ കുമ്മായമോ വിതറി നിലത്തെ പുളിരസം ഇല്ലാതാക്കാനുള്ള ശ്രമത്തിലാണ് കർഷകരിലേറയും. ട്രാക്ടറോ ട്രില്ലറോ ഉപയോഗിച്ചു നീലം ഉഴുതു നിരപ്പാക്കിയതിന് ശേഷമാണ് വിത. വിതയ്ക്കാനുള്ള വിത്ത് ലഭ്യമാക്കുന്നത് കൃഷിഭവനുകളും പഞ്ചായത്തുകളും ചേർന്നാണ്. കഴിഞ്ഞവർഷം തക്കസമയത്ത് വിത്ത് ലഭ്യമാക്കാൻ കഴിയാതെവന്നത് കൃഷി ഇറക്കുന്നതിൽ പ്രതിസന്ധി സൃഷ്ടിച്ചിരുന്നു. നാഷണൽ സ്വീഡ് കോർപറേഷനിൽനിന്നും കർണാടക സ്വീഡ് കോർപറേഷനിൽ നിന്നുമാണ് വിത്ത് വാങ്ങി കൃഷിഭവൻവഴി വിതരണം നടത്തുക. ഒരു കിലോ നെൽ വിത്തിന് (ഉമ ) 45 രൂപയാണ് ഇപ്പോൾ. അതിന്‍റെ 50 ശതമാനം പഞ്ചായത്തുകൾ സബ്സിഡിയായി നൽകും . ഒരേക്കറിന് 40 കിലോ വിത്താണ് സബ്സിഡി നിരക്കിൽ കർഷകന് ലഭിക്കുക. ജില്ലയിൽ കുമരകം, തിരുവാർപ്പ്, അയ്മനം, ആർപ്പൂക്കര, നാട്ടകം, നീണ്ടൂർ, ഏറ്റുമാനൂർ തുടങ്ങിയ പഞ്ചായത്തുകളിലെ പാടശേഖരങ്ങളാണ് പുഞ്ചകൃഷിയിറക്കുന്നത്. 1100 ടൺ നെൽവിത്ത് വേണ്ടിവരുമെന്നാണ് കൃഷിവകുപ്പിന്‍റെ കണക്കുകൂട്ടൽ. നവംബർ 30ന് മുമ്പ് വിത പൂർത്തിയാക്കണമെന്നാണ് കൃഷി വകുപ്പിന്‍റെ നിർദേശം. വിത വൈകിയാൽ തണ്ണീർമുക്കം ബണ്ട് തുറക്കുന്നതിനെ ബാധിക്കും. ഇത് കുട്ടനാടിന്‍റെ പാരിസ്ഥിതിക്ക് കൂടുതൽ ദോഷം ചെയ്യും.

ആർപ്പൂക്കര ജലോത്സവ വിജയികൾ

ആർപ്പൂക്കര: ആർപ്പൂക്കര ചുണ്ടൻവള്ള സമിതിയുടെ രണ്ടാമത് ജലോത്സവം നടന്നു. ഫ്രാൻസിസ് ജോർജ് എംപി ഉദ്ഘാടനവും കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി ഫ്ളാഗ് ഓഫും നടത്തി. ജലോത്സവ കമ്മിറ്റി ചെയർമാൻ എം.ബി. ജയപ്പൻ അധ്യക്ഷത വഹിച്ചു. നാലു പേരുടെ ഫൈബർ വള്ളംകളിയിൽ വാട്ടർ ജെറ്റ് ഒന്നാം സ്ഥാനവും പുന്നക്കാട്ടിൽ രണ്ടാം സ്ഥാനവും നേടി. അഞ്ചുപേരുടെ വനിതാ മത്സരത്തിൽ വടക്കൻ വള്ളം ഒന്നാം സ്ഥാനത്തും കാട്ടുകരി വള്ളം രണ്ടാം സ്ഥാനവും കരസ്ഥമാക്കി. അഞ്ചുപേരുടെ ഫൈബർ മത്സരത്തിൽ ദാവീദ് ഒന്നും സ്കൈലാൻഡ് രണ്ടും, ഏഴുപേരുടെ ഫൈബർ ദാവീദ് ഒന്നും തമ്പുരാൻ രണ്ടും, ഏഴുപേരുടെ തടിമത്സരത്തിൽ ആർപ്പൂക്കര ഒന്നും ശിവ രണ്ടും 11 ആളുകളുടെ തടി മത്സരത്തിൽ പടയാളി ഒന്നും ചീറ്റ രണ്ടും സ്ഥാനം കരസ്ഥമാക്കി. ഇരുട്ടുകുത്തി ബി ഗ്രേഡ് വള്ളങ്ങളുടെ മത്സരത്തിൽ താണിയൻ ഒന്നും ഗരുഡൻ രണ്ടും സ്ഥാനം നേടി.

താഴത്തങ്ങാടിയിലെ ഓണാഘോഷം കൗതുകമായി

താഴത്തങ്ങാടി: നാടിനെ തൊട്ടറിഞ്ഞ അനുഭവങ്ങളുമായി ജനകീയ കൂട്ടായ്മ വേറിട്ട ഓണാഘോഷ പരിപാടികൾ സംഘടിപ്പിച്ചു. താഴത്തങ്ങാടിയിലെ 50 വയസിനു മുകളിൽ പ്രായമുള്ളവരാണ് ഇങ്ങനെയൊരു വ്യത്യസ്ത ഓണാഘോഷം ഒരുക്കിയത്. പഴയകാല സ്മരണകൾ പുതുക്കിയും, ഓണപ്പാട്ടുകൾ പാടിയും, ഒരുമിച്ച് ഓണസദ്യ കഴിച്ചും അവർ ഓണത്തെ കൂടുതൽ കളറാക്കി. വാർധക്യ അവശത അനുഭവിക്കുന്ന മുറിയാനിക്കൽ ലീലാമ്മ അമ്മച്ചിയെ പൊന്നാടയണിയിച്ച് ആദരിച്ചു. പരിപാടികൾക്ക് ലിയോ മാത്യു, മാത്തൻ മാത്യു എന്നിവർ നേതൃത്വം നൽകി. സുനിൽ ഏബ്രഹാം, ഇ.ടി. തോമസ്, ഉനൈസ് പാലപ്പറമ്പിൽ, തോമസ് കെ. വട്ടുകളം, ഗണേശൻ തുടങ്ങിയവർ പ്രസംഗിച്ചു.

ഹൗസ് ബോട്ട് കത്തിനശിച്ചു

കുമരകം: വിനോദ സഞ്ചാരികളുമായി കായൽ സവാരി നടത്തവെ ഹൗസ് ബോട്ട് കത്തിനശിച്ചു. ചിത്തിര പള്ളിക്കു സമീപം വേമ്പനാട്ടുകായലിൽ ഇന്നലെ 3.30നായിരുന്നു സംഭവം. തീ പിടിത്തത്തിന്‍റെ കാരണം വ്യക്തമായിട്ടില്ല. ഹൗസ് ബോട്ടിൽ ഒരു കുടുംബത്തിലെ രണ്ടു പേരാണ് ഉണ്ടായിരുന്നത്. അവരെ ജീവനക്കാർ മറ്റൊരു ബോട്ടിലേക്കു കയറ്റി രക്ഷപ്പെടുത്തി. വൈക്കത്ത് നിന്ന് ഫയർഫോഴ്സ് എത്തിയെങ്കിലും ഹൗസ്ബോട്ട് പൂർണമായും കത്തിനശിച്ചു. കുമരകം പോലീസും പുളിങ്കുന്ന് പോലീസും സംഭവ സ്ഥലത്ത് എത്തിയിരുന്നു.

ഇന്ന് ശ്രീകൃഷ്ണ ജയന്തി, നാടും നഗരവും അമ്പാടിയാകും

കോട്ടയം: ഇന്ന് ശ്രീകൃഷ്ണ ജയന്തി, നാടും നഗരവും അമ്പാടിയാകും. ബാലഗോകുലത്തിന്‍റെ നേതൃത്വത്തില്‍ ജില്ലയില്‍ 1,100 ആഘോഷങ്ങളിലായി 2000 സ്ഥലങ്ങളില്‍ ശോഭാ യാത്രകള്‍ നടക്കും. ഉച്ചകഴിഞ്ഞ് മൂന്നു മുതല്‍ വൈകുന്നേരം അഞ്ചുവരെയാണ് ശോഭയാത്രകള്‍. നൂറുകണക്കിന് ഉണ്ണിക്കണ്ണന്‍മാരും ഗോപികമാരും നാടിനെ അമ്പാടിയാക്കുന്ന ശോഭായാത്ര നഗരങ്ങളെയും ഗ്രാമങ്ങളെയും വര്‍ണാഭമാക്കും. നിശ്ചല ദൃശ്യങ്ങള്‍, ഗോപിക നൃത്തം, ഉറിയടി, വെണ്ണ തീറ്റ തുടങ്ങിയവ ശോഭായാത്രകള്‍ക്ക് മിഴിവേകും. തിരുനക്കരയിലും സമീപ പ്രദേശങ്ങളില്‍നിന്നുമുള്ള ശോഭായാത്രകള്‍ കോട്ടയം സെന്‍ട്രല്‍ ജംഗ്ഷനില്‍ സംഗമിക്കും. തുടര്‍ന്നു മഹാശോഭായാത്ര തിരുനക്കര മഹാദേവ ക്ഷേത്രാങ്കണത്തില്‍ സമാപിക്കും. ശോഭാ യാത്രയില്‍ ബാലഗോകുലം സംസ്ഥാന ഉപാധ്യക്ഷന്‍ ഡോ.എന്‍. ഉണ്ണിക്കൃഷ്ണന്‍ മുഖ്യാതിഥിയായിരിക്കും. കഞ്ഞിക്കുഴി, ഇറഞ്ഞാല്‍, മണര്‍കാട്, പാമ്പാടി, കൂരോപ്പട, പള്ളിക്കത്തോട്, അയര്‍ക്കുന്നം, ഏറ്റുമാനൂര്‍, നീണ്ടൂര്‍, തിരുവാതുക്കല്‍, കുമ്മനം, കുമരകം എന്നിവിടങ്ങളിലും ശോഭയാത്രയുണ്ട്. ശ്രീകൃഷ്ണ ജയന്തിയോടനുബന്ധിച്ച് ക്ഷേത്രങ്ങളില്‍ അഷ്ടമി രോഹിണി പൂജയുമുണ്ട്.

എംഎല്‍എയ്ക്ക് ഓണ മത്സരത്തില്‍ ഒന്നാം സമ്മാനം

മണര്‍കാട്: നാലുമണിക്കാറ്റിലെ ഓണാഘോഷ പരിപാടികളുടെ ഭാഗമായി നടന്ന കലംതല്ലി പൊട്ടിക്കല്‍ മത്സരത്തില്‍ ചാണ്ടി ഉമ്മന്‍ എംഎല്‍എയ്ക്ക് ഒന്നാം സ്ഥാനം. 17 മത്സരാർഥികളെ പിന്തള്ളിയാണ് എംഎല്‍എ സമ്മാനം നേടിയത്. ഓണാഘോഷത്തിന്‍റെ ഭാഗമായി ട്രോപ്പിക്കല്‍ ഇന്‍സ്റ്റിറ്റ്യൂട്ട് ഓഫ് ഇക്കോളജിക്കല്‍ സയന്‍സസ് നാലുമണിക്കാറ്റില്‍ നടത്തിയ വന്യസസ്യ- പുഷ്പ-ഫല പ്രദര്‍ശനം ഉദ്ഘാടനം ചെയ്യാനെത്തിയപ്പോഴാണ് ചാണ്ടി ഉമ്മന്‍ നാട്ടുകാരോടൊപ്പം ഓണക്കളികളില്‍ പങ്കാളിയായത്. വന്യസസ്യ-പുഷ്പ-ഫല പ്രദര്‍ശനത്തില്‍ പങ്കെടുത്ത കുട്ടികള്‍ പഴമയും നാട്ടു പൈതൃകവും അനുഭവിച്ചറിയാന്‍ ഭാഗ്യം ലഭിച്ചവരാണെന്ന് എംഎൽഎ പറഞ്ഞു. കോട്ടയം സെന്‍റ് ജോസഫ് സ്‌കൂളിലെ വിദ്യാര്‍ഥികളാണ് പ്രദര്‍ശനമൊരുക്കിയത്. നാലുമണിക്കാറ്റിന്‍റെ ഗ്രാമ്യപശ്ചാത്തലത്തില്‍ നടന്ന കസേരകളി, റ്റാറ്റാപ്പഴം, സുന്ദരിക്കൊരു പൊട്ടുതൊടല്‍ തുടങ്ങിയ ഓണക്കളികളില്‍ ഒട്ടേറെപ്പേര്‍ പങ്കെടുത്തു. മണര്‍കാട് പഞ്ചായത്ത് പ്രസിഡന്‍റ് കെ.സി. ബിജു പൊതുസമ്മേളനം ഉദ്ഘാടനം ചെയ്തു. നാലുമണിക്കാറ്റ് പ്രസിഡന്‍റ് ഡോ. പുന്നന്‍ കുര്യന്‍ വേങ്കടത്ത് അധ്യക്ഷത വഹിച്ചു. മന്ത്രി വി.എന്‍. വാസവന്‍ മുഖ്യപ്രഭാഷണം നടത്തി. പഞ്ചായത്തംഗങ്ങളായ രാജീവ് രവീന്ദ്രന്‍, സന്ധു അനില്‍ കുമാര്‍, കെ.കെ. മാത്യു, എം.എ. മാത്യു എന്നിവര്‍ പ്രസംഗിച്ചു.

സിബിഎൽ മത്സരത്തിന് ജില്ലയിൽനിന്നു മൂന്നു ചുണ്ടനുകൾ

കുമരകം: വിനോദസഞ്ചാര വകുപ്പിന്‍റെ ഈ വർഷത്തെ ചാമ്പ്യൻസ് ബോട്ട് ലീഗിൽ മത്സരിക്കാൻ ജില്ലയിൽനിന്നും മൂന്നു ചുണ്ടനുകൾ യോഗ്യത നേടി. കുമരകം ടൗൺ ബോട്ട് ക്ലബ്ബിന്‍റെ പായിപ്പാടൻ, കുമരകം ഇമ്മാനുവേൽ ബോട്ട് ക്ലബ്ബിന്‍റെ നടുവിലേപ്പറമ്പൻ, ചങ്ങനാശേരി ബോട്ട് ക്ലബ്ബിന്‍റെ ചമ്പക്കുളം എന്നീ ചുണ്ടനുകളാണ് ജില്ലയിൽനിന്നു സിബിഎലിൽ മത്സരിക്കുക. നെഹ്റു ട്രോഫിയിൽ ആദ്യ ഒമ്പതു സ്ഥാനങ്ങളിലെത്തിയ ചുണ്ടൻ വള്ളങ്ങൾക്കാണ് സിബിഎൽ യോഗ്യത ലഭിച്ചത്. സിബിഎൽ യോഗ്യത ലഭിച്ച ചുണ്ടനുകളും ക്ലബ്ബുകളും വീയപുരം- വില്ലേജ് ബോട്ട് ക്ലബ് കൈനകരി, നടുഭാഗം- പുന്നമട ബോട്ട് ക്ലബ്, മേൽപാടം- പള്ളാത്തുരുത്തി ബോട്ട് ക്ലബ്, നിരണം- നിരണം ബോട്ട് ക്ലബ്, പായിപ്പാടൻ 1- കുമരകം ടൗൺ ബോട്ട് ക്ലബ്, നടുവിലേപ്പറമ്പൻ- ഇമ്മാനുവൽ ബോട്ട് ക്ലബ് കുമരകം, കാരിച്ചാൽ- കാരിച്ചാൽ ചുണ്ടൻ ബോട്ട് ക്ലബ്, ചെറുതന- തെക്കേക്കര ബോട്ട് ക്ലബ് മങ്കൊമ്പ്, ചമ്പക്കുളം- ചങ്ങനാശേരി ബോട്ട് ക്ലബ്.

കേജരിവാളിന്‍റെ ചികിത്സ ഒരാഴ്ചകൂടി നീട്ടിയേക്കും

കോട്ടയം: ഡല്‍ഹി മുന്‍ മുഖ്യമന്ത്രിയും ആം ആദ്മി പാര്‍ട്ടി നേതാവുമായ അരവിന്ദ് കേജരിവാളിന്‍റെ കാഞ്ഞിരപ്പള്ളിയിലെ ആയുര്‍വേദ ചികിത്സ ഒരാഴ്ചകൂടി നീട്ടിയേക്കും. പാറത്തോട് മടുക്കക്കുഴി ആയുര്‍വേദ ആശുപത്രിയില്‍ ഒരാഴ്ചത്തെ ചികിത്സയ്ക്കാണ് എത്തിയതെങ്കിലും 14 ദിവസത്തെ ചികിത്സ നടത്താനാണ് നിലവിലെ ആലോചന. ഭാര്യ സുനിതയോടൊപ്പമാണ് കേജരിവാള്‍ ബുധനാഴ്ച എത്തിയത്. ചികിത്സയ്‌ക്കൊപ്പം യോഗയും പരിശീലിക്കുന്നുണ്ട്. സുരക്ഷയ്ക്കായി ഒരു എസ്എച്ച്ഒയും രണ്ട് എസ്‌ഐമാരും ഉള്‍പ്പെടെ 20 പോലീസുകാര്‍ ചുമതലയിലുണ്ട്. കൂടാതെ സ്‌പെഷല്‍ ബ്രാഞ്ചിലെ അഞ്ചു പോലീസ് ഉദ്യോഗസ്ഥരും സ്ഥലത്തുണ്ട്. മെഡിക്കല്‍ ഡയറക്ടര്‍ ഡോ. റോബിന്‍ മടുക്കക്കുഴിയുടെ നേതൃത്വത്തിലാണ് ചികിത്സ. ഇപ്പോള്‍ ജര്‍മനിയിലുള്ള ഡോ. ജോബിന്‍ മടുക്കക്കുഴി അടുത്തയാഴ്ച കാഞ്ഞിരപ്പള്ളിയിലെത്തി കേജരിവാളിന്‍റെ ചികിത്സ പൂര്‍ത്തിയാക്കും. ഒരു മാസമായി മടുക്കക്കുഴി ആശുപത്രിയിലെ ചികിത്സ സംബന്ധിച്ച് കേജരിവാള്‍ ആശയവിനിമയം നടത്തുന്നുണ്ടായിരുന്നു. 2016ല്‍ പ്രകൃതി ചികിത്സയുടെ ഭാഗമായി ഇദ്ദേഹം ബംഗളൂരുവില്‍ എത്തിയിരുന്നു. പ്രമേഹത്തിനും വിട്ടുമാറാത്ത ചുമക്കും പരിഹാരം തേടിയാണ് അവിടെ ചികിത്സ തേടിയത്. ഉയര്‍ന്ന പ്രമേഹവും ചുമയും കേജരിവാളിനെ അലട്ടുന്നുണ്ട്.

വചനമഹോത്സവമായി നൂറുമേനി മഹാസംഗമം

ബെന്നി ചിറയില്‍ ചങ്ങനാശേരി: ചങ്ങനാശേരി അതിരൂപത ബൈബിള്‍ അപ്പൊസ്തലറ്റും കുടുംബ കൂട്ടായ്മയും മാക് ടിവിയും സംയുക്തമായി അതിരൂപതയിലെ 250 ഇടവകകളില്‍ സംഘടിപ്പിച്ച നൂറുമേനി വചന മനഃപാഠം പദ്ധതിയിലെ വിജയികളുടെ സംഗമവും ‘എന്‍റെ സ്വന്തം ബൈബിള്‍’ പദ്ധതിയുടെ ഉദ്ഘാടനവും വചനമഹോത്സവമായി. എസ്ബി കോളജിലെ മാര്‍ കാവുകാട്ട് ഹാളില്‍ സംഘടിപ്പിച്ച മഹാസംഗമം തിരുവല്ല ആര്‍ച്ച്ബിഷപ് ഡോ. തോമസ് മാര്‍ കൂറിലോസ് ഉദ്ഘാടനം ചെയ്തു. ജീവിക്കുന്ന ക്രിസ്തുവിന്‍റെ പ്രതീകമാണു വചനമെന്നും വിശുദ്ധ കുര്‍ബാനയിലെന്നപോലെ വചനത്തിലൂടെയും ഈശോ ഹൃദയത്തിലേക്കു കടന്നുവരുന്നതായും ആര്‍ച്ച്ബിഷപ് പറഞ്ഞു. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. സുവിശേഷം നന്മയുടെയും മാനവികതയുടെയും സ്‌നേഹസന്ദേശമായതിനാലാണ് സുവിശേഷം പ്രഘോഷിക്കുന്ന ക്രൈസ്തവര്‍ ഏറെ പീഡിപ്പിക്കപ്പെടുകയും വെല്ലുവിളികള്‍ നേരിടുകയും ചെയ്യുന്നതെന്ന് മാര്‍ തറയില്‍ പറഞ്ഞു. നൂറ്റിപ്പത്തൊന്‍പതാം സങ്കീര്‍ത്തനം മനഃപാഠമാക്കിയ രണ്ടാം ക്ലാസ് വിദ്യാര്‍ഥികളായ ലൂക്കാ രാകേഷ്, ഇവാന്‍ വി. ബിജോയ് എന്നിവര്‍ക്ക് പേഴ്സണല്‍ ബൈബിള്‍ നല്‍കി ‘എന്‍റെ സ്വന്തം ബൈബിള്‍’ പദ്ധതിയുടെ ഉദ്ഘാടനം മാര്‍ തോമസ് തറയില്‍ നിര്‍വഹിച്ചു. വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യപ്രഭാഷണം നടത്തി. ചലച്ചിത്രനടന്‍ സിജോയ് വര്‍ഗീസ് നൂറുമേനി സീസണ്‍ ഫോറിന്‍റെ ഉദ്ഘാടനവും പഠനപുസ്തക പ്രകാശനവും നിര്‍വഹിച്ചു. പ്രഫ. ജോസഫ് ടിറ്റോ, സിസ്റ്റര്‍ ചെറുപുഷ്പം, ജോസി കടന്തോട്, മറിയം ജോര്‍ജ്, സ്‌കറിയ വടക്കേല്‍ എന്നിവര്‍ പുസ്തകം ഏറ്റുവാങ്ങി. ചലച്ചിത്ര നിര്‍മാതാവും ഗാനരചയിതാവുമായ ലിസി ഫെര്‍ണാണ്ടസ്, അതിരൂപത ബൈബിള്‍ അപ്പൊസ്തലറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, മീഡിയ വില്ലേജ് മീഡിയ കോ-ഓര്‍ഡിനേറ്റര്‍ ഫാ. ജോജിന്‍ ഇലഞ്ഞിക്കല്‍, നൂറുമേനി വചനപഠന പദ്ധതി ചെയര്‍മാന്‍ സണ്ണി തോമസ് ഇടിമണ്ണിക്കല്‍, ബൈബിള്‍ അപ്പൊസ്തലറ്റ് അതിരൂപത പ്രസിഡന്‍റ് ഡോ. റൂബിള്‍ രാജ്, നൂറുമേനി ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം എന്നിവര്‍ പ്രസംഗിച്ചു. ഗ്രാന്‍ഡ് ഫിനാലെ വിജയികള്‍ക്കുള്ള സമ്മാനദാനവും നടന്നു.

സമഗ്ര മാലിന്യസംസ്‌കരണം; ഇക്കോ ബാങ്ക് റെഡിയാകുന്നു

കോട്ടയം: ജില്ലയില്‍ സമഗ്ര മാലിന്യ സംസ്‌കരണത്തിനായി തദ്ദേശസ്വയംഭരണ വകുപ്പിന്‍റെ നേതൃത്വത്തില്‍ ക്ലീന്‍ കേരള കമ്പനിയുടെ ഇക്കോ ബാങ്ക് പ്രവര്‍ത്തനമാരംഭിക്കുന്നു. സംസ്ഥാനത്ത് മാലിന്യ സംസ്‌കരണ പ്രവര്‍ത്തനങ്ങള്‍ കൂടുതല്‍ ശക്തിപ്പെടുത്തുന്നതിന്‍റെ ഭാഗമായി തദ്ദേശസ്വയംഭരണ വകുപ്പിന്‍റെ നേതൃത്വത്തില്‍ 14 ജില്ലകളിലും ക്ലീന്‍ കേരള കമ്പനി ഇക്കോ ബാങ്കുകള്‍ സ്ഥാപിച്ചു വരികയാണ്. ഇതിന്‍റെ ഭാഗമായിട്ടാണു ജില്ലയില്‍ കൂരോപ്പട മാക്കല്‍പടിയില്‍ ഇക്കോ ബാങ്കിന്‍റെ ഗോഡൗണ്‍ പ്രവര്‍ത്തനമാരംഭിക്കുന്നത്. ഇക്കോ ബാങ്കിന്‍റെ പ്രവര്‍ത്തനങ്ങളുടെ ഉദ്ഘാടനം ഉടന്‍ ഉണ്ടാകും. വീടുകളിലും സ്ഥാപനങ്ങളിലും വീട് മാറ്റം, കല്യാണം, നിര്‍മണങ്ങള്‍ തുടങ്ങി വിവിധ സന്ദര്‍ഭങ്ങളിലുണ്ടാകുന്ന അജൈവ മാലിന്യങ്ങളും പാഴ്‌വസ്തുക്കളും നേരിട്ട് കൈമാറുന്നതിനുള്ള കേന്ദ്രങ്ങളാണ് ഇക്കോ ബാങ്കുകള്‍. പുനഃചംക്രമണം ചെയ്യാന്‍ കഴിയുന്ന മാലിന്യങ്ങള്‍ മികച്ച വില നല്‍കിയും അജൈവ മാലിന്യങ്ങള്‍ക്ക് സംസ്‌കരണത്തിനുള്ള ചെറിയ ഫീസ് ഈടാക്കിയും പാഴ്‌വസ്തുക്കള്‍ ഇക്കോ ബാങ്കില്‍ ശേഖരിക്കും. അപകടകരമായ ഇ-മാലിന്യം, ചെരിപ്പ്, ബാഗ്, തെര്‍മോക്കോള്‍ തുടങ്ങിയവ, വീട് നവീകരണത്തിന്‍റെ ഭാഗമായി ഉണ്ടാകുന്ന ഇതര മാലിന്യം, സിമന്‍റ് ചാക്ക് തുടങ്ങിയുള്ള എല്ലാ അജൈവ പാഴ്‌വസ്തുക്കളും ഇക്കോ ബാങ്ക് ശേഖരിക്കും. പ്രതിമാസം 7,000 ടണ്ണില്‍ അധികം മാലിന്യം ശേഖരിക്കുകയും ശാസ്ത്രീയമായി സംസ്‌കരിക്കുകയും ചെയ്യുന്ന ക്ലീന്‍ കേരള കമ്പനിയുടെ മാലിന്യമുക്ത നവകേരളത്തിനുള്ള പുതിയ ചുവടുവയ്പാകുകയാണിത്. ബാങ്കുകളില്‍ വലിയ തോതില്‍ ശേഖരിക്കുന്ന മാലിന്യങ്ങള്‍ വേര്‍തിരിച്ചശേഷം കമ്പനിയുടെ ബന്ധപ്പെട്ട കേന്ദ്രങ്ങളില്‍ എത്തിച്ച് ശാസ്ത്രീയമായി നശിപ്പിക്കുകയാണു ചെയ്യുന്നത്. ഇക്കോ ബാങ്കുകളുടെ ആരംഭം സംസ്ഥാനത്തെ മാലിന്യസംസ്‌കരണ സംവിധാനത്തെ കൂടുതല്‍ ക്രമബദ്ധവും ജനകീയവുമായ രീതിയിലേക്ക് മാറ്റും. മാലിന്യശേഖരണത്തിനും സംസ്‌കരണത്തിനുമൊപ്പം പൊതുജനങ്ങളെ ഉത്തരവാദപ്പെട്ട ഇടപെടലിലേക്ക് പ്രേരിപ്പിക്കുന്നതിനും ഈ പദ്ധതി സഹായകരമാകും. 14 ജില്ലയിലും ഒരു ഇക്കോ ബാങ്ക് വീതമാണ് ആദ്യഘട്ടത്തില്‍ ആരംഭിച്ചിരിക്കുന്നത്. ആവശ്യകതക്ക് അനുസരിച്ച് കൂടുതല്‍ സ്ഥലങ്ങളിലേക്ക് വ്യാപിപ്പിക്കും.

സമുദായ ശക്തീകരണം രാഷ്‌ട്രപുരോഗതിക്ക്: മാര്‍ ജോസ് പുളിക്കല്‍

കാഞ്ഞിരപ്പള്ളി: രാജ്യത്തിന്‍റെ മതേതരത്വം സംരക്ഷിക്കാനും സാധാരണക്കാര്‍ക്ക് നീതി ലഭിക്കാനും കര്‍ഷകര്‍ക്കു ജീവിക്കാനുള്ള സാഹചര്യം ഒരുക്കാനും മൂല്യബോധമുള്ള തലമുറയെ ഭരണ, രാഷ്‌ട്രീയ രംഗത്തിറക്കാനുള്ള ഇടപെടലുകള്‍ ഉണ്ടാകണമെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. കാഞ്ഞിരപ്പള്ളി രൂപതയുടെ പന്ത്രണ്ടാമത് പാസ്റ്ററല്‍ കൗണ്‍സിലിന്‍റെ എട്ടാമത് സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. സഭ എന്ന കാഴ്ചപ്പാട് നമ്മുടെ നെഞ്ചിടിപ്പായി മാറുന്നുവെന്ന് ഉറപ്പുവരുത്താന്‍ നമ്മള്‍ ശ്രദ്ധിക്കണം. കരുത്തും കര്‍മശേഷിയുമുള്ള സമൂഹമായി സഭാമക്കള്‍ മാറണം. ശ്ലീഹന്മാരാകുന്ന അടിത്തറയില്‍ പണിയപ്പെട്ടിരിക്കുന്ന സഭയോടു ചേര്‍ന്നുനിന്നുകൊണ്ട് നമ്മുടെ ജീവിതം മുന്പോട്ടു കൊണ്ടുപോകണം. സീറോമലബാര്‍ സഭയുടെ സമുദായ സംഘടനയായ കത്തോലിക്ക കോണ്‍ഗ്രസ് കൂടുതല്‍ ശക്തിപ്പെടേണ്ടത് കാലഘട്ടത്തിന്‍റെ ആവശ്യമാണെന്നും മാര്‍ ജോസ് പുളിക്കല്‍ കൂട്ടിച്ചേർത്തു. ‘സമുദായ ശക്തീകരണം ആധുനിക കാലഘട്ടത്തിൽ’‍ എന്ന വിഷയത്തെ ആസ്പദമാക്കി ഫാ. ജസ്റ്റിന്‍ മതിയത്ത് ക്ലാസ് നയിച്ചു. പ്രോട്ടോ സിഞ്ചെല്ലൂസ് റവ.ഡോ. ജോസഫ് വെള്ളമറ്റം, വികാരി ജനറാള്‍മാരായ ഫാ. ബോബി അലക്‌സ് മണ്ണംപ്ലാക്കല്‍, റവ.ഡോ. സെബാസ്റ്റ്യന്‍ കൊല്ലംകുന്നേല്‍, ഷെവ.‍ അഡ്വ.വി.സി. സെബാസ്റ്റ്യന്‍ തുടങ്ങിയവര്‍ പ്രസംഗിച്ചു. ചാന്‍സലര്‍ റവ.ഡോ. മാത്യു ശൗര്യാംകുഴി, പ്രൊക്കുറേറ്റര്‍ ഫാ. ഫിലിപ്പ് തടത്തില്‍, പാസ്റ്ററല്‍ കൗണ്‍സില്‍ സെക്രട്ടറി ഡോ. ജൂബി മാത്യു എന്നിവര്‍ പരിപാടികള്‍ക്ക് നേതൃത്വം നല്‍കി.

എരുമേലി ഫയർസ്റ്റേഷന് സ്ഥലം കണ്ടെത്താനായില്ല

എരുമേലി: ശബരിമല സീസൺ അടുത്തിരിക്കേ ടൗണിൽ അഗ്നിരക്ഷാനിലയം ആരംഭിക്കുന്നതിന് സ്ഥലം കണ്ടെത്താനുള്ള സർവകക്ഷിയോഗ തീരുമാനം നടപ്പിലായില്ല. നിലവിൽ മണിമലയാറിന്‍റെ തീരത്ത് ഓരുങ്കൽകടവിൽ പഞ്ചായത്ത്‌ വക പുറമ്പോക്ക് ഭൂമിയിൽ അഗ്നിരക്ഷാനിലയം സ്ഥാപിക്കാൻ നീക്കമുണ്ടായിരുന്നു. എന്നാൽ, നദീതീരത്ത് നിർമാണം പാടില്ലെന്ന വിലക്കുമൂലം ഇത് ഒഴിവാക്കേണ്ടി വന്നതോടെയാണ് അനുയോജ്യമായ സ്ഥലം ഏറ്റെടുക്കാൻ സർവകക്ഷിയോഗത്തിൽ തീരുമാനമായത്. കഴിഞ്ഞ ഏപ്രിലിലാണ് സെബാസ്റ്റ്യൻ കുളത്തുങ്കൽ എംഎൽഎയുടെ സാന്നിധ്യത്തിൽ പഞ്ചായത്ത്‌ ഹാളിൽ സർവകക്ഷിയോഗം ചേർന്ന് ഇക്കാര്യം തീരുമാനിച്ചത്. അനുയോജ്യമായ സ്ഥലം കണ്ടെത്താൻ പഞ്ചായത്തിനെയാണ് ചുമതലപ്പെടുത്തിയിരുന്നത്. സ്ഥലം കണ്ടെത്തിയാൽ സ്ഥിരം കെട്ടിടം നിർമിക്കുന്നതിന് ആവശ്യമായ തുക എംഎൽഎ ഫണ്ടിൽനിന്ന് നൽകുമെന്ന് എംഎൽഎ അറിയിച്ചിരുന്നു. ഇതിന് മുന്പ് താത്കാലികമായി അഗ്നിരക്ഷാനിലയം തുടങ്ങുന്നതിന് ആവശ്യമായ സ്ഥലം വാടകയ്ക്കെടുക്കാൻ യോഗത്തിൽ തീരുമാനിച്ചിരുന്നെങ്കിലും ഇക്കാര്യത്തിലും നടപടികളായിട്ടില്ല. എരുമേലിക്കടുത്ത് കൊരട്ടിയിൽ ജില്ലാ ടൂറിസം പ്രമോഷൻ കൗൺസിലിന്‍റെ സ്ഥലത്ത് അഗ്നിരക്ഷാ നിലയം സ്ഥാപിക്കാൻ അനുയോജ്യമാണെന്ന് സർവകക്ഷിയോഗം വിലയിരുത്തിയിരുന്നു. എന്നാൽ, ഇക്കാര്യത്തിലും തുടർ നടപടികളുണ്ടായിട്ടില്ല. ടൗണിൽ നേർച്ചപ്പാറ വാർഡിൽ ഹൗസിംഗ് ബോർഡിന്‍റെ സ്ഥലവും അഗ്നിരക്ഷാ നിലയത്തിന് അനുയോജ്യമാണെന്നും നിർദേശമുയർന്നിരുന്നു. എന്നാൽ, ഇക്കാര്യത്തിലും നടപടികൾ ഉണ്ടായിട്ടില്ല. മാസങ്ങൾ പിന്നിട്ടിട്ടും യോഗത്തിലെ തീരുമാനങ്ങളിൽ നടപടികൾ ഒന്നുമില്ല. അഗ്നിരക്ഷാസേനയ്ക്കും എക്സൈസ് വകുപ്പിനും സ്ഥലം കണ്ടെത്തുന്നതിനു പഞ്ചായത്ത് ഭരണസമിതിയുടെ നേതൃത്വത്തിൽ രാഷ്‌ട്രീയകക്ഷി പ്രതിനിധികളെ ഉൾപ്പെടുത്തി ഉപസമിതി രൂപീകരിക്കണമെന്ന് സർവകക്ഷിയോഗം നിർദേശിച്ചിരുന്നതാണ്. ഇക്കാര്യത്തിലും മെല്ലപ്പോക്ക് തുടരുകയാണ്. സ്ഥലം ഏറ്റെടുക്കാൻ കഴിയുന്നില്ലെങ്കിൽ ആവശ്യമായ സ്ഥലം സ്വന്തമായി വാങ്ങാൻ പഞ്ചായത്ത് വാർഷിക പദ്ധതിയിൽ ഉൾപ്പെടുത്തി പണം കണ്ടെത്തണമെന്ന യോഗത്തിലെ നിർദേശവും ഫയലിൽ ഉറങ്ങുകയാണ്. നിർദിഷ്‌ട ശബരി ഗ്രീൻഫീൽഡ് വിമാനത്താവളത്തിന്‍റെ നിർമാണം കണക്കിലെടുത്ത് അഗ്നിരക്ഷാ സേനയുടെ സ്ഥിരം യൂണിറ്റിന്‍റെ ആവശ്യകത എരുമേലിയിൽ അനിവാര്യമാണെന്നിരിക്കെയാണ് അനാസ്ഥ. അത്യാഹിതം ഉണ്ടായാൽ 15 കിലോമീറ്റർ ദൂരമുള്ള കാഞ്ഞിരപ്പള്ളിയിൽനിന്നോ റാന്നിയിൽനിന്നോ വേണം എരുമേലിയിൽ അഗ്നിരക്ഷാ യൂണിറ്റുകൾ എത്താൻ. എല്ലാ തീർഥാടന കാലത്തും രണ്ടര മാസത്തോളം അഗ്നിരക്ഷാനിലയം താത്കാലികമായി എരുമേലിയിൽ പ്രവർത്തിക്കാറുണ്ട്. 2012ലാണ് എരുമേലിയിൽ സ്ഥിരം ഫയർ സ്റ്റേഷൻ അനുവദിച്ച് ഉത്തരവിറങ്ങിയത്.

വീടിന് തീപിടിച്ച് വൻ നാശനഷ്ടം

കാഞ്ഞിരപ്പള്ളി: വീടിന് തീപിടിച്ച് വൻ നാശനഷ്ടം. കുന്നുംഭാഗം പന്തിരുവേലിൽ പി.സി. മാത്യുവിന്‍റെ വീടിനാണ് ഇന്നലെ ഉച്ചയ്ക്ക് ഒന്നോടെ തീപിടിച്ചത്. വീടിന്‍റെ മേൽക്കൂര പൂർണമായി കത്തിനശിച്ചു. വയറിംഗ്, റബർ ഷീറ്റുകൾ, കുരുമുളക്, വീട്ടുപകരണങ്ങൾ എന്നിവ‍യും കത്തിനശിച്ചു. അഞ്ചു ലക്ഷം രൂപയുടെ നാശനഷ്ടമാണ് ഉണ്ടായിരിക്കുന്നത്. വീട്ടുകാർ അറിയച്ചതിനെത്തുടർന്ന് കാഞ്ഞിരപ്പള്ളി ഫയർഫോഴ്സ് ഉദ്യോഗസ്ഥർ എത്തി തീ നിയന്ത്രിക്കുകയായിരുന്നു. വീടിന്‍റെ ചിമ്മിനിയിൽ റബർഷീറ്റ് ഉണക്കാനായി ഇട്ടിട്ടുണ്ടായിരുന്നുവെന്നും ചൂട് കൂടി ഷീറ്റ് ഉരുകിവീണാണ് തീപിടിത്തമുണ്ടായതെന്നും ഫയർഫോഴ്സ് ഉദ്യോഗസ്ഥർ പറഞ്ഞു. തൊഴിലാളികൾക്ക് വാടകയ്ക്ക് കൊടുത്തിരുന്ന വീട്ടിൽ ആളുകളില്ലാത്തപ്പോഴാണ് തീപിടിത്തമുണ്ടായത്. സ്റ്റേഷൻ ഓഫീസർ കെ.എസ്. ഓമനക്കുട്ടൻ, സീനിയർ ഫയർ ഓഫീസർ കെ.എസ്. സുദർശനൻ എന്നിവരുടെ നേതൃത്വത്തിലാണ് തീയണച്ചത്.

കപ്പാട് ഗവ. സ്കൂളിൽ നവീകരിച്ച കെട്ടിടങ്ങളുടെ ഉദ്ഘാടനം

കാഞ്ഞിരപ്പള്ളി: കപ്പാട് ഗവൺമെന്‍റ് സ്കൂളിൽ ജില്ലാ പഞ്ചായത്തിൽനിന്ന് അനുവദിച്ച ഫണ്ട് ഉപയോഗിച്ച് നവീകരിച്ച കെട്ടിടങ്ങളുടെ ഉദ്ഘാടനം ജില്ലാ പഞ്ചായത്തംഗം ജെസി ഷാജൻ നിർവഹിച്ചു. പിടിഎ പ്രസിഡന്‍റ് എൻ.ജെ. സാബു അധ്യക്ഷത വഹിച്ചു. ഹെഡ്മിസ്ട്രസ് ടി.എച്ച്. ഷീജാമോൾ, എസ്എംഡിസി അംഗം ജോയി നെല്ലിയാനി എന്നിവർ പ്രസംഗിച്ചു. യോഗത്തിൽ 2025-26 അധ്യയന വർഷത്തെ പിടിഎ പൊതുയോഗവും തെരഞ്ഞെടുപ്പും ഇംഗ്ലീഷ് ലാംഗ്വേജ് എന്‍‌റിച്ച്മെന്‍റ് പ്രോഗ്രാമിന്‍റെ ഉദ്ഘാടനവും എസ്എസ്എൽസി പരീക്ഷയിൽ ഫുൾ എ പ്ലസ് നേടിയ വിദ്യാർഥികളുടെ അനുമോദനവും നടത്തി.

ചേനപ്പാടി കരക്കാർ ആറന്മുള ക്ഷേത്രത്തിൽ പാളത്തൈര് സമർപ്പിച്ചു

പൊൻകുന്നം: ചേനപ്പാടി പാർഥസാരഥി ഭക്തജനസമിതി ആറന്മുള പാർഥസാരഥി ക്ഷേത്രത്തിൽ ജന്മാഷ്ടമി സദ്യയ്ക്കുള്ള പാളത്തൈര് ഇന്നലെ സമർപ്പിച്ചു. ഇന്ന് അഷ്ടമിരോഹിണി നാളിൽ ഭഗവാന്‍റെ സന്നിധിയിൽ ഭക്തർക്ക് വിളമ്പുന്ന സദ്യയിലെ പ്രധാനവിഭവമാണ് പാളത്തൈര്. വാഴൂർ തീർഥപാദാശ്രമ കാര്യദർശി സ്വാമി ഗരുഡധ്വജാനന്ദ തീർഥപാദർ രക്ഷാധികാരിയായ പാർഥസാരഥി ഭക്തജനസമിതി ഘോഷയാത്രയായി ആറന്മുള ക്ഷേത്രത്തിൽ തൈര് എത്തിച്ചു. പുലർച്ചെ ചേനപ്പാടിയിലെ ഇളങ്കാവ് ഭഗവതി ക്ഷേത്രം, ധർമശാസ്താ ക്ഷേത്രം, ഇടയാറ്റുകാവ് ദേവീക്ഷേത്രം, പൂതക്കുഴി ശ്രീകൃഷ്ണസ്വാമി ക്ഷേത്രം, കണ്ണമ്പള്ളിൽ ഭഗവതിക്ഷേത്രം, കുറ്റിക്കാട്ടുകാവ് ദേവീക്ഷേത്രം, കിഴക്കേക്കര ഭഗവതിക്ഷേത്രം, അഞ്ചുകുഴി പരാശക്തി ദേവസ്ഥാനം, മഹാലക്ഷ്മി കാണിക്കമണ്ഡപം എന്നിവിടങ്ങളിൽ വഴിപാടുകൾ നടത്തി ചേനപ്പാടി എസ്എൻഡിപി യോഗം ശാഖ, പരുന്തന്മല ശ്രീദേവി വിലാസം ഭജനസമിതി, വിഴിക്കിത്തോട് ഭജന സമിതി എന്നിവയുടെ സഹകരണത്തോടെ കിഴക്കേക്കര ഭഗവതിക്ഷേത്രത്തിൽ നിന്നാണ് പുറപ്പെട്ടത്. എരുമേലി പോലീസ് എസ്എച്ച്ഒ ഇ.ഡി. ബിജു ഘോഷയാത്ര ഉദ്ഘാടനം ചെയ്തു. പൂർവികരുടെ രീതിയിൽ പാളപ്പാത്രങ്ങളിലും തൈര് എത്തിച്ചു. വാഴൂർ ആശ്രമത്തിൽ തയറാക്കിയതുൾപ്പെടെ 1500 ലിറ്റർ തൈര് ഭഗവാന്‍റെ ജന്മാഷ്ടമി നാളിൽ സദ്യയിൽ വിളമ്പുന്നതിന് എത്തിച്ചു.

മൂക്കൻപെട്ടി പാലത്തിലെ ഊരിമാറ്റിയ കൈവരികൾ പുനഃസ്ഥാപിച്ചില്ല

കണമല: മൂക്കൻപെട്ടി പാലത്തിൽനിന്ന് ഇക്കഴിഞ്ഞ മഴക്കാലത്ത് ഊരിമാറ്റിയ കൈവരികൾ പുനഃസ്ഥാപിച്ചില്ലെന്ന് ആക്ഷേപം. കൈവരികൾ ഇല്ലാതെ പാലത്തിലൂടെയുള്ള വാഹനയാത്ര സുരക്ഷിതമല്ലാത്തതിനാൽ അപകടഭീതി വർധിക്കുകയാണ്. മഴക്കാലത്ത് നദിയിൽ വെള്ളപ്പൊക്കമുണ്ടാകുന്പോൾ പാലത്തിന്‍റെ കൈവരികൾ ഒഴുകിപ്പോകാതിരിക്കാനാണ് പഞ്ചായത്ത്‌ അധികൃതരുടെ നിർദേശപ്രകാരം കൈവരികൾ ഊരിമാറ്റാറുള്ളത്. വെള്ളത്തിൽ ഒഴുകിയെത്തുന്ന തടികൾ ഇടിച്ച് കൈവരികൾ തകരാറുമുണ്ട്. ഇത് ഒഴിവാക്കാൻ വേണ്ടി കൈവരികൾ ഊരിമാറ്റിയ ശേഷം മഴക്കാലം കഴിയുമ്പോൾ പുനഃസ്ഥാപിക്കും. ഇങ്ങനെ പലപ്പോഴായി കൈവരികൾ ഊരിമാറ്റിയത് മൂലം കൈവരികളിൽ പലതിനും കേടുപാടുകൾ സംഭവിക്കുന്നുമുണ്ട്. കൈവരികൾ പുനഃസ്ഥാപിക്കാൻ പഞ്ചായത്ത്‌ അധികൃതർ നടപടി സ്വീകരിക്കണമെന്നു നാട്ടുകാർ ആവശ്യപ്പെട്ടു.

പുഞ്ചവയൽ 504 ഉന്നതിയിൽ അംബേദ്കർ ഗ്രാമം പദ്ധതിക്ക് ഒരു കോടിയുടെ ഭരണാനുമതി

മുണ്ടക്കയം: പൂഞ്ഞാർ നിയോജകമണ്ഡലത്തിലെ ഏറ്റവും വലിയ പട്ടികജാതി ഉന്നതിയായ കോരുത്തോട് പഞ്ചായത്തിലെ പുഞ്ചവയൽ 504ൽ അടിസ്ഥാന സൗകര്യ വികസനത്തിന് അംബേദ്കർ ഗ്രാമം പദ്ധതിയിൽ പട്ടികജാതി വികസനവകുപ്പിൽനിന്ന് ഒരു കോടി രൂപയുടെ ഭരണാനുമതി ലഭിച്ചതായി സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. മുന്നൂറിലധികം കുടുംബങ്ങൾ അധിവസിക്കുന്ന ഈ ഉന്നതിയിൽ പട്ടികജാതി വിഭാഗത്തിൽപ്പെട്ട ആളുകളുടെ സമഗ്ര പുരോഗതി ലക്ഷ്യംവച്ച് വിശദമായ പദ്ധതി റിപ്പോർട്ട് തയാറാക്കി ഗവൺമെന്‍റിൽ സമർപ്പിക്കുകയും തുടർന്ന് മന്ത്രി ഒ.ആർ. കേളുവുമായി ചർച്ച നടത്തി ഫണ്ട് അനുവദിപ്പിക്കുകയായിരുന്നുവെന്നും എംഎൽഎ പറഞ്ഞു. ഉന്നതിയിൽ ഭവന പുനരുദ്ധാരണം, വിവിധ സംരക്ഷണഭിത്തികളുടെ നിർമാണം, ഗതാഗത സൗകര്യം മെച്ചപ്പെടുത്തൽ, ജലവിതരണ പദ്ധതി, മറ്റ് അടിസ്ഥാന സൗകര്യ വികസനം തുടങ്ങി വിവിധ പ്രവൃത്തികളാണ് നടപ്പിലാക്കുന്നത്.

"കരുതല്‍' പരിശീലന പദ്ധതിക്കു തുടക്കം

പാലാ: എസ്എംവൈഎം പാലാ മാര്‍ സ്ലീവാ മെഡിസിറ്റിയുമായി സഹകരിച്ച് നടത്തുന്ന ബേസിക് ലൈഫ് സപ്പോര്‍ട്ട് പരിശീലന പദ്ധതി "കരുതലി'ന് തുടക്കമായി. ആദ്യ പരിശീലനം എസ്എംവൈഎം രാമപുരം ഫൊറോനയുടെയും ചക്കാമ്പുഴ യൂണിറ്റിന്‍റെയും ആഭിമുഖ്യത്തില്‍ ചക്കാമ്പുഴ ലൊരേത്ത് മാതാ പള്ളി ഹാളില്‍ നടത്തി. എസ്എംവൈഎം പാലാ രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ ഉദ്ഘാടനം ചെയ്തു. രാമപുരം ഫൊറോന പ്രസിഡന്‍റ് ജെഫിന്‍ റോയി അധ്യക്ഷത വഹിച്ചു. രൂപത ട്രഷറര്‍ എഡ്വിന്‍ ജെയ്‌സ്, സെക്രട്ടറി ബെനിസണ്‍ സണ്ണി, ചക്കാമ്പുഴ യൂണിറ്റ് പ്രസിഡന്‍റ് ജിബിന്‍ തോമസ്, നീതു ജോര്‍ജ്, ക്രിസ്റ്റി എന്നിവര്‍ പ്രസംഗിച്ചു.

നടപ്പാത തകര്‍ന്ന നിലയില്‍

പാലാ: നഗര ഹൃദയത്തിൽ സെന്‍റ് തോമസ് സ്‌കൂളിന് സമീപത്ത് നടപ്പാതയിലെ സ്ലാബ് തകര്‍ന്ന നിലയില്‍. സെന്‍റ് തോമസ് സ്‌കൂളിനു സമീപം ടിടിസി റോഡ് ആരംഭിക്കുന്ന ഭാഗത്താണ് സ്ലാബ് തകര്‍ന്നത്. സ്‌കൂള്‍ കുട്ടികളടക്കം നിരവധി ആളുകള്‍ ദിവസേന കാല്‍നടയായി യാത്ര ചെയ്യുന്ന നടപ്പാതയാണിത്. ആരെങ്കിലും തകര്‍ന്ന സ്ലാബിനിടയില്‍പ്പെട്ട് ദുരന്തമുണ്ടാകുംവരെ അധികൃതർ കാത്തിരിക്കുകയാണെന്നു സമീത്തെ വ്യാപാരികളും യാത്രക്കാരും പറയുന്നു.

വായനശാലകൾ നാട്ടിൻപുറങ്ങളിലെ അനൗദ്യോഗിക സർവകലാശാലകൾ: മന്ത്രി വി.എൻ. വാസവൻ

പനമറ്റം: എല്ലാ വിഭാഗത്തിലുമുള്ള അറിവുകൾ നൽകുന്ന ഗ്രന്ഥശാലകൾ നാട്ടിൻപുറങ്ങളിലെ അനൗദ്യോഗിക സർവകലാശാലകളാണെന്ന് മന്ത്രി വി.എൻ. വാസവൻ. പനമറ്റം വെളിയന്നൂർ ദേശാഭിമാനി വായനശാലയുടെ പ്ലാറ്റിനം ജൂബിലി ആഘോഷത്തോടൊപ്പം പുതിയ ഇരുനിലമന്ദിരം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. കുമാരനാശാൻ മുതൽ മുരുകൻ കാട്ടാക്കട വരെയുള്ളവരുടെ കവിതകൾ ചൊല്ലിയും സദസിനോട് അവാർഡ് നേടിയ വിവിധ പുസ്തകങ്ങളെക്കുറിച്ച് ചോദിച്ചും പുതിയ പുസ്തകങ്ങളെക്കുറിച്ച് പറഞ്ഞുമായിരുന്നു മന്ത്രിയുടെ പ്രസംഗം. മാണി സി. കാപ്പൻ എംഎൽഎ അധ്യക്ഷത വഹിച്ചു. ഫോട്ടോ അനാച്ഛാദനം പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയിയും ഓഡിറ്റോറിയം ഉദ്ഘാടനം ജില്ലാ പഞ്ചായത്തംഗം ജെസി ഷാജനും നടത്തി. ആദ്യകാല പ്രവർത്തകരെ എലിക്കുളം പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് ആദരിച്ചു.

കിടങ്ങൂര്‍ പഞ്ചായത്ത് മാലിന്യമുക്തമാക്കാൻ പാന്പാടി ബ്ലോക്ക് പഞ്ചായത്ത് പദ്ധതി

കിടങ്ങൂര്‍: പഞ്ചായത്ത് മാലിന്യമുക്തമാക്കി സംരക്ഷിക്കാന്‍ പാമ്പാടി ബ്ലോക്ക് പഞ്ചായത്ത് കിടങ്ങൂര്‍ പഞ്ചായത്തിന്‍റെ സഹകരണത്തോടെ പദ്ധതികള്‍ നടപ്പാക്കി. വാര്‍ഡുകളിലെ തെരഞ്ഞെടുത്ത കേന്ദ്രങ്ങള്‍ മാലിന്യമുക്തമാക്കിയതിനു ശേഷം സിസിടിവി സ്ഥാപിച്ചു. ചേര്‍പ്പുങ്കല്‍ ഹൈവേ ജംഗ്ഷനിലും പാലത്തിനു സമീപവും കക്കൂസ് മാലിന്യം സ്ഥിരമായി തള്ളുന്ന മുത്തോലത്ത് ഹാളിന്‍റെ സമീപവും കട്ടച്ചിറ ചെക്ക്ഡാമിന്‍റെ സമീപവുമാണ് കാമറകള്‍ സ്ഥാപിച്ചത്. ബ്ലോക്ക് മെംബർ ഡോ. മേഴ്സി ജോണിന്‍റെ 2024-25 വര്‍ഷത്തെ പദ്ധതി വിഹിതമായ 5.3 ലക്ഷം രൂപ വിനിയോഗിച്ച് പഞ്ചായത്തിലെ പുതിയ ടിവി സ്‌ക്രീന്‍ ഉപയോഗിച്ച് നിരീക്ഷണം നടത്താനുള്ള ക്രമീകരണവും പൂര്‍ത്തിയായി. പൂര്‍ത്തീകരിച്ച നൂതന പദ്ധതികളുടെ ഉദ്ഘാടനം മോന്‍സ് ജോസഫ് എംഎല്‍എ നിര്‍വഹിച്ചു. പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി, ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടയ്ക്കല്‍, കിടങ്ങൂര്‍ പഞ്ചായത്ത് പ്രസിഡന്‍റ് ഇ.എം. ബിനു, ബ്ലോക്ക് മെംബര്‍ അശോകന്‍ പൂതമന തുടങ്ങിയവര്‍ പ്രസംഗിച്ചു.

അല്ലാപ്പാറ-പയപ്പാര്‍ റോഡ് നിര്‍മാണം ആരംഭിച്ചു

പ്രവിത്താനം: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്തംഗം രാജേഷ് വാളിപ്ലാക്കല്‍ അനുവദിച്ച പത്തുലക്ഷം രൂപ ഉപയോഗിച്ച് കരൂര്‍ പഞ്ചായത്തിലെ അല്ലാപ്പാറ-പയപ്പാര്‍ റോഡിന്‍റെ നവീകരണ പ്രവര്‍ത്തനങ്ങള്‍ ആരംഭിച്ചു. ഭരണങ്ങാനം, കരൂര്‍ പഞ്ചായത്തുകളിലൂടെ കടന്നുപോകുന്ന പ്രധാനപ്പെട്ട റോഡുകളില്‍ ഒന്നാണ് അല്ലാപ്പാറ-പയപ്പാര്‍ റോഡ്. സൈഡ് കോണ്‍ക്രീറ്റിംഗും റീടാറിംഗുമാണ് പദ്ധതിയില്‍ ഉള്‍പ്പെടുത്തിയിരിക്കുന്നത്. പഞ്ചായത്ത് മെംബര്‍ ലിന്‍റണ്‍ ജോസഫിന്‍റെ അധ്യക്ഷതയില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ ഉദ്ഘാടനം നിര്‍വഹിച്ചു. ബ്ലോക്ക് പഞ്ചായത്ത് മെംബര്‍ ലിസമ്മ ബോസ്, ബാബു കാവുകാട്ട്, ഷാജി വട്ടക്കുന്നേല്‍, സിബി പ്ലാത്തോട്ടം, ജോഷി കുടിലുമറ്റം,ജോസ് മഞ്ഞകുന്നേല്‍ തുടങ്ങിയവര്‍ പ്രസംഗിച്ചു.

യൂണിറ്റി വാൾ ശ്രദ്ധേയമായി

പൂഞ്ഞാർ: സർദാർ വല്ലഭായി പട്ടേലിന്‍റെ 150-ാമത് ജന്മദിനാഘോഷങ്ങളുടെ ഭാഗമായി ജില്ലാ പോലീസ് നേതൃത്വം നൽകി പാലാ സബ്ഡിവിഷൻ സംഘടിപ്പിച്ച പ്രത്യേക പ്രോഗ്രാം യൂണിറ്റി വാൾ പൂഞ്ഞാറിൽ നടത്തി. കുട്ടികളിലും പൊതുജനങ്ങളിലും ദേശീയ ഐക്യം വളർത്തുക എന്ന ലക്ഷ്യത്തോടെയാണ് ഈരാറ്റുപേട്ട ജനമൈത്രി പോലീസിന്‍റെയും പൂഞ്ഞാർ സെന്‍റ് ആന്‍റണീസ് ഹയർ സെക്കൻഡറി സ്കൂളിലെ എസ്പിസി യൂണിറ്റിന്‍റെയും സംയുക്താഭിമുഖ്യത്തിൽ യൂണിറ്റി വാൾ നടത്തിയത്. പാലാ ഡിവൈഎസ്പി കെ. സദൻ ഉദ്ഘാനം ചെയ്തു. പൂഞ്ഞാർ തെക്കേക്കര പഞ്ചായത്ത് വൈസ് പ്രസിഡന്‍റ് രാജമ്മ ഗോപിനാഥ് അധ്യക്ഷത വഹിച്ചു. ഈരാറ്റുപേട്ട ജനമൈത്രി പോലീസ് എസ്ഐ ബിനോയി തോമസ്, സ്കൂൾ പ്രിൻസിപ്പൽ വിൽസൺ ജോസഫ്, ഹെഡ്മിസ്ട്രസ് സിസ്റ്റർ സൂസി മൈക്കിൾ, ജനസമിതി അംഗം എബി പൂണ്ടിക്കുളം എന്നിവർ പ്രസംഗിച്ചു.

കടയിലെ ആക്രമണത്തിനു പിന്നില്‍ ഗൂഢാലോചനയെന്ന് ഉടമ

പാലാ: തിരുവോണനാളില്‍ കടയിലുണ്ടായ ആക്രമണത്തിനു പിന്നില്‍ ചിലരുടെ ഗൂഢാലോചനയാണെന്ന് കടഉടമ ടോമി കുറ്റിയാങ്കല്‍ ആരോപിച്ചു. തനിക്കെതിരായി നിരന്തരം കള്ളപ്പരാതികള്‍ നല്‍കിയും തന്‍റെ സ്ഥാപനത്തില്‍ വാടക ഗുണ്ടകളെ അയച്ചു നിരന്തരം പ്രശ്‌നമുണ്ടാക്കിയും ജീവനും സ്വത്തിനും ഇവര്‍ ഭീഷണി സൃഷ്ടിക്കുകയാണെന്നും പാലാ പോലീസ് ഇവര്‍ക്ക് കൂട്ടുനില്‍ക്കുകയാണെന്നും ഐശ്വര്യ ബേക്കറി ഉടമ ടോമി കുറ്റിയാങ്കല്‍ പത്രസമ്മേളനത്തില്‍ പറഞ്ഞു. തിരുവോണനാളില്‍ കടയിലെത്തി പ്രശ്‌നങ്ങള്‍ സൃഷ്ടിച്ച നേപ്പാള്‍ സ്വദേശികളെ നാട്ടുകാരാണ് തടഞ്ഞത്. പിന്നീട് ഇവരെ പിന്തുണച്ചുകൊണ്ട് എത്തിയ ആളെ സംഭവസ്ഥലത്തുണ്ടായിരുന്ന വഴിയാത്രക്കാരാണ് ചോദ്യം ചെയ്തത്. ഇയാളെ കടയില്‍ എത്തിച്ചതിനു പിന്നിലും ഗൂഢാലോചനയുണ്ട്. തനിക്കെതിരായ ഗൂഢാലോചനയില്‍ അന്വേഷണം ആവശ്യപ്പെട്ട് ടോമി കേസ് രജിസ്റ്റര്‍ ചെയ്തിട്ടുണ്ട്. കഴിഞ്ഞ ദിവസം കടയിലെത്തിയ വഴിയാത്രക്കാരനെ മര്‍ദിച്ചു എന്ന ആരോപണത്തില്‍ ടോമി കുറ്റിയാങ്കലിനെതിരേയും പാലാ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

അരുണാപുരം മുഖംമിനുക്കുന്നു

‌പാലാ: അരുണാപുരത്തിന്‍റെ മുഖംമിനുക്കാന്‍ വിവിധ പദ്ധതികളുമായി നഗരസഭ. നഗരസഭയിലെ 22-ാം വാര്‍ഡായ അരുണാപുരത്ത് ഹെല്‍ത്ത് ആൻഡ് വെല്‍നസ് സെന്‍റര്‍ ബൈപാസിൽ പൂര്‍ണശ്രീ ബില്‍ഡിംഗില്‍ 16ന് പ്രവര്‍ത്തനം ആരംഭിക്കും. രാവിലെ 11 മുതല്‍ വൈകുന്നേരം ആറുവരെയാണ് പ്രവര്‍ത്തനസമയം. ഡോക്ടര്‍, നഴ്‌സ്, ഫാര്‍മസി സേവനങ്ങള്‍ സൗജന്യമാണ്. നാഷണല്‍ ഹെല്‍ത്ത് മിഷന്‍ പദ്ധതിപ്രകാരമാണ് പദ്ധതി തുടങ്ങുന്നത്. 16ന് ഉച്ചകഴിഞ്ഞ് മൂന്നിന് ജോസ് കെ. മാണി എംപി ഉദ്ഘാടനം ചെയ്യും. അരുണാപുരം, മുത്തോലി, വെള്ളാപ്പാട് മേഖലയിലെ ജനങ്ങള്‍ക്ക് ആരോഗ്യപരിപാലനരംഗത്ത് ഇതു വലിയ നേട്ടമാണെന്ന് വാര്‍ഡ് കൗണ്‍സിലറും നഗരസഭാ വികസനകാര്യ സ്റ്റാൻഡിംഗ് കമ്മിറ്റി ചെയര്‍മാനുമായ സാവിയോ കാവുകാട്ട് പറഞ്ഞു. പുതിയ കിണറും പമ്പ്ഹൗസും കുടിവെള്ളക്ഷാമം പരിഹരിക്കുന്നതിന് മീനച്ചിലാറ്റില്‍ നഗരസഭയുടെ 75 ലക്ഷം രൂപ ഘട്ടംഘട്ടമായി മുടക്കി പുതിയ കിണറും പമ്പ്ഹൗസും ഫില്‍റ്റര്‍ സിസ്റ്റവും സ്ഥാപിച്ചു. ഉദ്ഘാടനം 16ന് ഉച്ചകഴിഞ്ഞ് 2.30ന് ജോസ് കെ. മാണി എംപി നിര്‍വഹിക്കും. വാട്ടര്‍ അഥോറിട്ടിയുടെ മേല്‍നോട്ടത്തിലാണ് കിണറും പമ്പ്ഹൗസും തീര്‍ത്തിട്ടുള്ളത്. ആധുനിക രീതിയില്‍ വെള്ളം ഫില്‍റ്റര്‍ ചെയ്യുന്നതിനുള്ള സംവിധാനവും ചെയ്തിട്ടുണ്ട്. സ്മാര്‍ട്ട് അങ്കണവാടി അരുണാപുരം കരേപ്പാറ അങ്കണവാടി പൂര്‍ണമായും നവീകരിച്ച് സ്മാര്‍ട്ട് അങ്കണവാടിയാക്കുന്ന ജോലികള്‍ പൂര്‍ത്തീകരിച്ചുവരികയാണ്. നഗരസഭയുടെ ജനകീയാസൂത്രണ പദ്ധതി പ്രകാരമാണ് നിര്‍മാണം.

എകെസിസി നേതൃത്വ പരിശീലന ശില്പശാല

പാലാ: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ പാലാ രൂപതയിലെ യൂണിറ്റ്, ഫൊറോന, രൂപത ഭാരവാഹികള്‍ക്കായി സമുദായ ശക്തീകരണം രാഷ്‌ട്രപുരോഗതിക്ക് എന്ന വിഷയം ആസ്പദമാക്കി നേതൃത്വ പരിശീലന ശില്പശാല നടത്തും. ഇന്ന് ഉച്ചകഴിഞ്ഞു രണ്ടിന് ഭരണങ്ങാനം മാതൃഭവനില്‍ നടക്കുന്ന സമ്മേളനം ഗ്ലോബല്‍ പ്രസിഡന്‍റ് രാജീവ് കൊച്ചുപറമ്പില്‍ ഉദ്ഘാടനം ചെയ്യും. രൂപത പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിക്കും. രൂപത ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍ ആമുഖ സന്ദേശം നല്‍കും. തുടര്‍ന്ന് ക്ലാസുകളും ചര്‍ച്ചകളും നടക്കും. ഗ്ലോബല്‍ ഭാരവാഹികളായ ജോസുകുട്ടി ഒഴുകയില്‍, ടോണി പുഞ്ചക്കുന്നേല്‍, ആന്‍സമ്മ സാബു, ജോണ്‍സണ്‍ വീട്ടിയാങ്കല്‍, രൂപത ഭാരവാഹികളായ ജോസ് വട്ടുകുളം, ജോയി കെ. മാത്യു എന്നിവര്‍ പ്രസംഗിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]