ഇന്‍റര്‍ കൊളീജിയറ്റ് ഫുട്ബോള് ടൂര്‍ണമെന്‍റ് ആരംഭിച്ചു
1532022
Tuesday, March 11, 2025 11:55 PM IST
എടത്വ: സെന്‍റ് അലോഷ്യസ് കോളജില്‍ 36-ാമത് ആര്‍ച്ച്ബിഷപ് മാര്‍ മാത്യു കാവുകാട്ട് ആന്‍ഡ് ഫാ. സക്കറിയ പുന്നപ്പാടം മെമ്മോറിയല്‍ ഇന്‍റര്‍ കൊളീജിയറ്റ് ഫുട്ബോള് ടൂര്‍ണമെന്‍റ് ആരംഭിച്ചു. ഇന്നലെ നടന്ന ഉദ്ഘാടനമത്സരത്തില്‍ ആതിഥേയരായ സെന്‍റ് അലോഷ്യസ് കോളജ് മാര്‍ ഗ്രിഗോറിയോസ് കോളജ് പുന്നപ്രയെ 1-0ന് പരാജയപ്പെടുത്തി. രണ്ടാം മത്സരത്തില്‍ റാന്നി സെന്‍റ് തോമസ് കോളജ് മാവേലിക്കര ബിഷപ് മൂര്‍ കോളജിനെ 3-0ന് പരാജയപ്പെടുത്തി.
അമ്പലപ്പുഴ ഡിവൈഎസ്പി കെ.എന്‍. രാജേഷ് ഉദ്ഘാടനം നിര്‍വഹിച്ചു. മാനേജര്‍ ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. കാനറാ ബാങ്ക് ഡിവിഷണല്‍ മാനേജര്‍ അയ്യങ്കാര്‍ ഗസ്റ്റ് ഓഫ് ഓണര്‍ ആയിരുന്നു. പ്രിന്‍സിപ്പല്‍ പ്രഫ. ഡോ. ജി. ഇന്ദുലാല്‍, ബര്‍സാര്‍ ഫാ. ടിജോമോന്‍ പി. ഐസക്, കോളജ് ഗവേണിംഗ് ബോഡി മെമ്പര്‍ ഫാ. ജോസഫ് ചൂളപ്പറമ്പില്‍ എന്നിവര്‍ പ്രസംഗിച്ചു. ഇന്ന് രണ്ടാംഘട്ട മത്സരങ്ങള്‍ നടക്കും. നാളെ രാവിലെ 9നും 10 നുമായി സെമിഫൈനല്‍ മത്സരങ്ങള്‍ നടക്കും. ഉച്ചകഴിഞ്ഞ് മൂന്നിന് ഫൈനല്‍ മത്സരം നടക്കും.
ടൂര്‍ണമെന്‍റില്‍ വിജയികളാകുന്ന ടീമിന് പതിനായിരം രൂപ കാഷ് അവാര്‍ഡും ആര്‍ച്ച് ബിഷപ് മാര്‍ മാത്യു കാവുകാട്ട് ആന്‍ഡ് ഫാ. സഖറിയാസ് പുന്നപ്പാടം മെമ്മോറിയല്‍ എവര്‍റോളിംഗ് ട്രോഫിയും സമ്മാനിക്കും. ടൂര്‍ണമെന്‍റിലെ റണ്ണേഴ്‌സ് അപ്പിന് അയ്യായിരം രൂപ കാഷ് അവാര്‍ഡും ആര്‍ച്ച് ബിഷപ് മാര്‍ മാത്യു കാവുകാട്ട് ആന്‍ഡ് ഫാ. സഖറിയാസ് പുന്നപ്പാടം മെമ്മോറിയല്‍ എവര്‍റോളിംഗ് ട്രോഫിയും സമ്മാനിക്കും.
13ന് നടക്കുന്ന സമാപന സമ്മേളനത്തില്‍ കോളജ് മാനേജര്‍ ഫാ. ഫിലിപ്പ് വൈക്കത്തുകാരന്‍ സമ്മാനങ്ങള്‍ വിതരണം ചെയ്യും. ഫിസിക്കല്‍ എഡ്യൂക്കേഷന്‍ ഡിപ്പാര്‍ട്ട്‌മെന്‍റ് മേധാവി ഫാ. ഡോ. അജോ ആന്‍റണിയാണ് ടൂര്‍ണമെന്‍റിനു നേതൃത്വം നല്‍കുന്നത്.