കര്‍ഷകരക്ഷാ നസ്രാണി മുന്നേറ്റ ലോംഗ് മാര്‍ച്ചും സംഗമവും ഇന്ന്
1514199
Saturday, February 15, 2025 12:08 AM IST
ചങ്ങനാശേരി: നീതി നിഷേധങ്ങള്‍ക്കും അവകാശ ലംഘനങ്ങള്‍ക്കുമെതിരേ കത്തോലിക്കാ കോണ്‍ഗ്രസ് ചങ്ങനാശേരി അതിരൂപതാ സമിതിയുടെ നേതൃത്വത്തില്‍ ഇന്ന് കര്‍ഷകരക്ഷാ നസ്രാണി മുന്നേറ്റ ലോംഗ് മാര്‍ച്ചും അവകാശ പ്രഖ്യാപന റാലിയും നടത്തും. രാവിലെ ഒമ്പതിന് മങ്കൊമ്പ് ഡോ. എം.എസ്. സ്വാമിനാഥന്‍ നഗറില്‍നിന്നു ലോംഗ് മാര്‍ച്ച് ആരംഭിക്കും. അതിരൂപത വികാരിജനറാള്‍ മോണ്‍. ആന്‍റണി എത്തയ്ക്കാട്ട് ഫ്‌ളാഗ് ഓഫ് ചെയ്യും.
പള്ളിക്കൂട്ടുമ്മ, രാമങ്കരി, മാമ്പുഴക്കരി, കിടങ്ങറ തുടങ്ങിയ കേന്ദ്രങ്ങളില്‍ സ്വീകരണം ഏറ്റുവാങ്ങുന്ന ലോംഗ് മാര്‍ച്ച് എസി റോഡിലൂടെ 16 കിലോമീറ്റര്‍ സഞ്ചരിച്ച് പെരുന്നയില്‍ എത്തിച്ചേരും. വിവിധ ഫൊറോനകളിലെ 1500 പ്രതിനിധികള്‍ മാര്‍ച്ചില്‍ അണിനിരക്കും.
3.15ന് പെരുന്നയിലെ സി.എഫ്. തോമസ് സ്‌ക്വയറില്‍നിന്ന് എസ്ബി കോളജ് മൈതാനത്തേക്ക് അവകാശ സംരക്ഷണറാലി നടക്കും. വികാരിജനറാള്‍ മോണ്‍. മാത്യു ചങ്ങങ്കരി ഉദ്ഘാടനം ചെയ്യും. കുടുംബകൂട്ടായ്മാ കണ്‍വീനര്‍ ഫാ. ജോര്‍ജ് മാന്തുരുത്തില്‍ ആമുഖപ്രസംഗം നടത്തും. 18 ഫൊറോനകളില്‍ നിന്നുള്ള 25,000 അംഗങ്ങള്‍ റാലിയില്‍ പങ്കെടുക്കും.
റാലി കോളജ് മൈതാനത്ത് എത്തിയശേഷം 4.15ന് മാര്‍ ജോസഫ് പവ്വത്തില്‍ നഗറില്‍ ആരംഭിക്കുന്ന അവകാശപ്രഖ്യാപന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും.
ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണം നടത്തും. അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല ആമുഖപ്രഭാഷണം നടത്തും. പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിക്കും.
അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, ഗ്ലോബല്‍ പ്രസിഡന്‍റ് രാജീവ് കൊച്ചുപറമ്പില്‍, ഗ്ലോബല്‍ ഡയറക്ടര്‍ ഫാ. ഫിലിപ്പ് കവിയില്‍, ജോബ് മൈക്കിള്‍ എംഎല്‍എ, അതിരൂപതാ പാസ്റ്ററല്‍കൗണ്‍സില്‍ സെക്രട്ടറി ഡോ. രേഖ മാത്യൂസ്, അതിരൂപതാ പിആര്‍ഒ അഡ്വ. ജോജി ചിറയില്‍, ജനറല്‍സെക്രട്ടറി ബിനു ഡൊമനിക്, രാജേഷ് ജോണ്‍, ജിനോ ജോസഫ് തുടങ്ങിയവര്‍ പ്രസംഗിക്കും.