എഡിഎമ്മിന്റെ മരണത്തിൽ ദുരൂഹതകളേറുന്നു: ഡിസിസി പ്രസിഡന്റ്
1464223
Sunday, October 27, 2024 3:51 AM IST
മലയാലപ്പുഴ: എഡിഎം നവീന് ബാബുവിന്റെ മരണത്തിലെ ദുരൂഹത ദിവസം തോറും വർധിച്ചുവരികയാണെന്നും പി.പി. ദിവ്യയുടെ അറസ്റ്റ് വൈകിപ്പിച്ച് വേട്ടക്കാരെ സംരക്ഷിക്കുന്ന സമീപനമാണ് സ്വീകരിച്ചിരിക്കുന്നതെന്നും ഡിസിസി പ്രസിഡന്റ് പ്രഫ. സതീഷ് കൊച്ചുപറമ്പില്.
മലയാലപ്പുഴ മണ്ഡലം കോണ്ഗ്രസ് കമ്മിറ്റി ഓഫീസിന്റെ ഉദ്ഘാടനം നിര്വഹിച്ചു പ്രസംഗിക്കുകയായിരുന്നു അദ്ദേഹം. നവീന് ബാബുവിന്റെ മരണവുമായി ബന്ധപ്പെട്ട വിഷയത്തില് സിപിഎം പത്തനംതിട്ട ജില്ലാ കമ്മിറ്റി നടത്തുന്ന പ്രസ്താവനകള് കുടുംബത്തിന്റെയും ജനങ്ങളുടെയും കണ്ണില് പൊടിയിടുവാനുള്ളതാണെന്നും കണ്ണൂര് ജില്ലാ കമ്മിറ്റിയും സംസ്ഥാന നേതൃത്വവും സര്ക്കാരും പ്രധാന പ്രതിയായ പി.പി. ദിവ്യയെ സംരക്ഷിക്കുന്ന സമീപനമാണ് സ്വീകരിച്ചിട്ടുള്ളതെന്നും ഡിസിസി പ്രസിഡന്റ് പറഞ്ഞു.
നവീന് ബാബുവിന്റെ ദുരൂഹ മരണത്തിലെ യഥാര്ഥ പ്രതികള് കാണാമറയത്തുണ്ടെന്നും ഇക്കാര്യങ്ങള് വെളിച്ചത്തുകൊണ്ടുവരുവാന് സിബിഐ അന്വേഷണം അനിവാര്യമാണെന്നും അദ്ദേഹം പറഞ്ഞു.
മണ്ഡലം പ്രസിഡന്റ് ദിലീപ് കുമാര് പൊതീപ്പാട് അധ്യക്ഷത വഹിച്ചു. ഡിസിസി വൈസ് പ്രസിഡന്റ് എ. സുരേഷ് കുമാര്, സംഘടനാകാര്യ ജനറല് സെക്രട്ടറി സാമുവല് കിഴക്കുപുറം, ഐഎന്ടിയുസി ജില്ലാ പ്രസിഡന്റ് ജ്യോതിഷ് കുമാര് മലയാലപ്പുഴ, ഡിസിസി ഭാരവാഹികൾ തുടങ്ങിയവർ പ്രസംഗിച്ചു.