മിന്നും പ്രകടനവുമായി കുറിയന്നൂർ എംടിഎച്ച്എസ്
1463791
Friday, October 25, 2024 4:29 AM IST
കൊടുമൺ: കായിക അധ്യാപകൻ ഇല്ലാതിരുന്നിട്ടും ജില്ലാ കായിക മേളയിൽ കുറിയന്നൂർ മാർത്തോമ്മ ഹൈസ്കൂൾ മികച്ച പ്രകടനം നടത്തി. സോഷ്യൽ സയൻസ് അധ്യാപകൻ അമൽ സന്തോഷ് ജോസഫിന്റെ നേതൃത്വത്തിലാണ് കുട്ടികളെ പരിശീലിപ്പിച്ച് ഗ്രൗണ്ടിലെത്തിച്ചത്. നാലു വർഷം മുമ്പ് അമൽ അധ്യാപകനായി സ്കൂളിൽ എത്തിയതിനു ശേഷം നടക്കുന്ന മൂന്നാമത് ജില്ലാ മേളയാണ് ഈ കഴിഞ്ഞത്.
ആദ്യ വർഷം സ്കൂൾ വിഭാഗത്തിൽ നാലാം സ്ഥാനത്തായിരുന്ന സ്കൂൾ അടുത്ത വർഷം എട്ടാം സ്ഥാനത്തേയ്ക്ക് പിന്തള്ളപ്പെട്ടു. ഇക്കുറി രണ്ടാംസ്ഥാനത്തെത്തി. കേവലം 28 പേരുമായി പോരിന് ഇറങ്ങിയ സ്കൂളിന് 63 പോയിന്റുകളാണു ലഭിച്ചത്.
മാർത്തോമ്മ സ്പോർട്സ അക്കാഡമി രൂപീകരിച്ച് വേനൽ അവധി മുതൽ ആരംഭിക്കുന്ന പരിശീലനത്തിലൂടെയാണ് സ്കൂളിലെ കുട്ടികൾ ഈ നേട്ടം കൈവരിച്ചത്. എല്ലാറ്റിനും ചുക്കാൻ പിടിച്ചതാകട്ടെ അമലാണ്. സഹായിയായി എൻ. ജി. ശിവശങ്കറും ഉണ്ടായിരുന്നു.
ഹർഡിൽസ്, ടെന്നികൊയ്യ് എന്നിവയിൽ ദേശീയ താരവും അഞ്ച് തവണ ടെന്നികൊയ്യ് കേരള ക്യാപ്റ്റനുമായിരുന്നു അമൽ. മാവേിക്കര മറ്റം സെന്റ് ജോൺസ് സ്കൂളിലെ റിട്ടയർഡ് കായിക അധ്യാപകൻ സന്തോഷ് കൊച്ചുപറമ്പിലിന്റെ മകനാണ്.