നവീൻ ബാബുവിന്റെ കുട്ടികൾക്ക് സർക്കാർ ജോലി ഉറപ്പാക്കണം: മുസ്ലിം കോ-ഓർഡിനേഷൻ കമ്മിറ്റി
1464036
Saturday, October 26, 2024 4:44 AM IST
പത്തനംതിട്ട: എഡിഎം നവീൻ ബാബുവിന്റെ മരണത്തിന് ഉത്തരവാദികളായവർക്കെതിരേ ഇന്ത്യൻ ശിക്ഷാനിയമം അനശാസിക്കുന്ന മാതൃകാപരമായ ശിക്ഷ ലഭ്യമാകത്തക്കവിധം നിയമത്തിനു മുന്നിൽ കൊണ്ടുവരണമെന്ന് പത്തനംതിട്ട ജില്ലാ മുസ്ലിം കോ-ഓർഡിനേഷൻ കമ്മിറ്റി ആവശ്യപ്പെട്ടു.
അദ്ദേഹത്തിന്റെ രണ്ടു മക്കൾക്കും സർക്കാർ തലത്തിൽ ജോലി ലഭ്യമാക്കണമെന്നും വീടു സന്ദർശിച്ച കോ-ഓർഡിനേഷൻ കമ്മിറ്റി രക്ഷാധികാരിയും പത്തനംതിട്ട ടൗൺ മസ്ജിദ് ചീഫ് ഇമാമും ആയ അബ്ദുൽ ഷുക്കൂർ മൗലവി അൽ ഖാസിമി ആവശ്യപ്പെട്ടു.
മുന്നോട്ടുള്ള നിയമ പോരാട്ടത്തിനുൾപ്പെടെ കുടുംബത്തോട് ഐക്യദാർഢ്യം പ്രഖ്യാപിക്കുന്നതായി നവീൻ ബാബുവിന്റെ വീട് സന്ദർശിച്ചശേഷം നേതാക്കളായ മുൻ ഡെപ്യൂട്ടി കളക്ടർ മുഹമ്മദ് മുസ്തഫ, റിട്ട. ജിഎസ്ടി ജോയിന്റ് കമ്മീഷണർ അബ്ദുൽ ഹാരിസ്, മജീദ് പന്തളം, റിയാസ് മുരുപ്പിൽ എന്നിവർ പറഞ്ഞു.