പുല്ലാട് ഉപജില്ലയ്ക്ക് കായിക കിരീടം
1463790
Friday, October 25, 2024 4:29 AM IST
കൊടുമൺ: പത്തനംതിട്ട റവന്യു ജില്ലാ സ്കൂൾ കായികമേളയിൽ പുല്ലാട് ഉപജില്ലയ്ക്കു കിരീടം. മൂന്നുദിവസമായി കൊടുമൺ ഇഎംഎസ് സ്റ്റേഡിയത്തിൽ നടന്നുവന്ന കായികമേളയിൽ 231 പോയിന്റുമായി പുല്ലാട് മുന്നിലെത്തിയപ്പോൾ 158 പോയിന്റ് നേടിയ പത്തനംതിട്ട ഉപജില്ല രണ്ടാമതും 129 പോയിന്റുമായി റാന്നി മൂന്നാമതുമെത്തി.
28 സ്വർണം, 20 വെള്ളി, 11 വെങ്കലം എന്നിവ നേടിയാണ് പുല്ലാട് ചാമ്പ്യൻമാരായത്. രണ്ടാമതെത്തിയ പത്തനംതിട്ടയ്ക്ക് 14 സ്വർണ്ണം 17 വെള്ളി 10 വെങ്കലം എന്നിവ ലഭിച്ചു.
11 സ്വർണം, 14 വെള്ളി 11 വെങ്കലം നേടി റാന്നി മൂന്നാം സ്ഥാനത്തുമാണ്. കഴിഞ്ഞ തവണ നഷ്ടപ്പെട്ട കിരീടം പുല്ലാട് തിരികെ പിടിക്കുകയായിരുന്നു. പത്തനംതിട്ടയായിരുന്നു കഴിഞ്ഞ തവണത്തെ ചാമ്പ്യൻമാർ.
പുല്ലാട് ഉപജില്ലയിലെ ഇരവിപേരൂർ സെന്റ് ജോൺസ് ഹയർ സെക്കൻഡറി, കുറിയന്നൂർ എംടിഎച്ച്എസ്എസ്, പുല്ലാട് എസ് വി എച്ച്എസ്, ഓതറ എഎംഎം എച്ച്എസ്എസ്, വള്ളംകുളം നാഷണൽ എച്ച് എസ് എന്നീ സ്കൂളുകളുടെ കരുത്തിലാണ് പുല്ലാട് ഉപ ജില്ലയ്ക്ക് മികച്ച നേട്ടമുണ്ടാക്കാനായത്.
സമാപന സമ്മേളനം പറക്കോട് ബ്ലോക്ക് പഞ്ചായത്ത് പ്രസിഡൻറ് ആർ. തുളസീധരൻപിള്ള ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡൻറ് കെ.കെ. ശ്രീധരൻ അധ്യക്ഷത വഹിച്ചു.
സ്കൂൾ വിഭാഗത്തിൽ ഇരവിപേരൂരിന് ആധിപത്യം
സ്കൂൾ വിഭാഗത്തിൽ ഇരവിപേരൂർ സെന്റ് ജോൺസ് ഹയർ സെക്കൻഡറി സ്കൂൾ 16 സ്വർണം, 10 വെള്ളി, അഞ്ച് വെങ്കലം എന്നിവയോടെ 115 പോയിൻറ് നേടി ഓവറോൾ കരസ്ഥമാക്കി. ഇരവിപേരൂരിനു തുടർച്ചയായ വിജയമാണ്. സംസ്ഥാനതലത്തിൽ വരെ മെഡൽ നേടിയിട്ടുള്ള താരങ്ങളുമായാണ് ഇരവിപേരൂർ കളത്തിലിറങ്ങിയത്. ഇതു 15 ാം തവണയാണ് സ്കൂൾ ജില്ലാതലത്തിൽ തുടർച്ചയായ നേട്ടം കൊയ്യുന്നത്.
കായികാധ്യാപകൻ ഡോ. അനീഷ് തോമസിന്റെ ചുമതലയിലാണ് കുട്ടികളുടെ പരിശീലനം.
ഒ.ആർ. ഹരീഷ്, ഷേബാ ഡാനിയേൽ എന്നിവരും പരിശീലകരായുണ്ട്. പ്രിൻസിപ്പൽ സ്റ്റീഫൻ ജോർജിന്റെ നേതൃത്വത്തിൽ അധ്യാപകരുടെ പൂർണ പിന്തുണയും താരങ്ങൾക്കു നൽകിവരുന്നു. 37 അംഗ ടീമാണ് ഇത്തവണ കളത്തിലിറങ്ങിയത്.
ചിട്ടയായ പരിശീലനം കുട്ടികൾക്ക് നൽകുന്നുണ്ട്. രാവിലെയും വൈകുന്നേരവും സ്കൂൾ ഗ്രൗണ്ടിൽ പരിശീലനമുണ്ട്.
ഇത്തവണത്തെ സ്വർണ മെഡലുകൾ വിരമിക്കുന്ന അധ്യാപകർക്ക് സമ്മാനിക്കുമെന്ന് താരങ്ങൾ പറഞ്ഞു. സ്കൂൾപ്രിൻസിപ്പൽ സ്റ്റീഫൻ ജോർജ്, ഹെഡ്മിസ്ട്രസ് ശാന്തി ജോസ്, മിനി ആർ. പിള്ള, അനീഷ് തോമസ് എന്നിവർ ഇക്കൊല്ലം വിരമിക്കുകയാണ്.