ADVERTISEMENT

ADVERTISEMENT

ടിസിസിഐ ബിസിനസ് എക്സലൻസ് അവാർഡുകൾ പ്രഖ്യാപിച്ചു

തിരുവനന്തപുരം: തിരുവനന്തപുരം ചേംബർ ഓഫ് കോമേഴ്സ് ആൻ‌ഡ് ഇൻഡസ്ട്രിയുടെ ടിസിസിഐ ബിസിനസ് എക്സലൻസ് അവാർഡുകൾ പ്രഖ്യാപിച്ചു. മുരള്യാ ബ്രാൻഡ് സ്ഥാപകനും എംഡിയുമായ കെ. മുരളീധരനാണ് ഐക്കോണിക് ബ്രാൻഡ് ബർ അവാർഡ്. ഇവിഎം ഗ്രൂപ്പ് എംഡി സാബു ജോണി - ഓട്ടോ മൊബൈൽസ്,

അരുൺ അയ്യപ്പൻ ഉണ്ണിത്താൻ - ബിൽഡേഴ്സ് ആൻഡ് റിയൽ എസ്റ്റേറ്റ്, എം.എസ്. ഫൈസൽ ഖാൻ - വിദ്യാഭ്യാസം, എസ്.ആർ. ജോയ്- എക്സ്പോർട്ട്, ഡോ. ഷീജ ജി. മനോജ് - ഹെൽത്ത് കെയർ, ബേബി മാത്യു- ഹോസ്പിറ്റാലിറ്റി,

കെ.പി. മോഹൻ - ഇൻഫ്രാസ്ട്രക്ചർ, സിജി നായർ - മീഡിയ, വി.കെ. വർഗീസ് - എംഎസ്എംഇ, കെ.എസ്. ബാലഗോപാൽ - ഫാർമ, എസ്. മഗേഷ് - റീട്ടെയിൽ, ജയ ചന്ദ്രഹാസൻ- ടൂറിസം, ആർ. സുഭയ്യ രാമൻ - ഹോൾസെയിൽ ഫുഡ് ഗ്രെയിൻസ് എന്നിവർക്കാണ് എക്സലൻസ് പുരസ്കാരങ്ങൾ.

ADVERTISEMENT

അംബേദ്കർ ജയന്തി സംഗമം

നെടുമങ്ങാട്: മൂഴി ടിപ്പു കൾച്ചറൽ സൊസൈറ്റിയുടെ ആഭിമുഖ്യത്തിൽ സംഘടിപ്പിച്ച ഡോ. ബി.ആർ. അംബേദ്ക്കറുടെ 134-ാമത് ജയന്തി ആഘോഷങ്ങൾ അഡ്വ. കായ്പാടി നൗഷാദ് ഉദ്ഘാടനം ചെയ്തു. സൊസൈറ്റി ചെയർമാൻ മൂഴിയിൽ മുഹമ്മദ് ഷിബു അധ്യക്ഷത വഹിച്ചു. നെടുമങ്ങാട് നഗരസഭ മുൻ ചെയർമാൻ കെ. സോമശേഖരൻ നായർ മുഖ്യപ്രഭാഷണം നടത്തി. നെടുമങ്ങാട് ശ്രീകുമാർ, വഞ്ചുവം ഷറഫ്, പത്താംകല്ല് ഇല്യാസ്, വെമ്പിൽ സജി, പറയൻകാവ് സലീം, അൽത്താഫ് എന്നിവർ സംസാരിച്ചു. ഇതോടനുബന്ധിച്ചു ഫലക്ഷത്തൈകളുടെ വിതരണവും നടത്തി.

അങ്കണവാടി കെട്ടിടം ഉദ്ഘാടനം

നെടുമങ്ങാട്: മുളമുക്ക് അങ്കണവാടി തുറന്നു നല്‍കി. രണ്ട് പതിറ്റാണ്ടായി വാടക കെട്ടിടങ്ങളില്‍ മാറി മാറി പ്രവര്‍ത്തിക്കുകയായിരുന്നു സ്ഥാപനം. രണ്ടുപേര്‍ സൗജന്യമായി വിട്ടുനല്‍കിയ സ്ഥലത്താണ് പഞ്ചായത്തിന്‍റെ തനതു ഫണ്ട് ഉപയോഗിച്ച് ഇപ്പോള്‍ കെട്ടിടം നിര്‍മിച്ചത്. 18ലക്ഷം രൂപയാണ് നിര്‍മാണച്ചെലവ്. മന്ത്രി ജി.ആര്‍. അനില്‍ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് യു. ലേഖാറാണി അധ്യക്ഷയായി. പഞ്ചായത്ത് സ്റ്റാൻഡിംഗ് കമ്മിറ്റി ചെയര്‍പേഴ്‌സന്‍ ഉഷാകുമാരി, വീണാ രാജീവ്, പഞ്ചായത്ത് അംഗങ്ങളായ ഹേമലതകുമാരി, ഹസീന, സുരേഷ് കുമാര്‍, ആശ, മുന്‍ പഞ്ചായത്ത് അംഗം രവീന്ദ്രന്‍, ഐസിഡിഎസ് സൂപ്പര്‍വൈസര്‍ നിഷ എന്നിവര്‍ പ്രസംഗിച്ചു. അങ്കണവാടിക്ക് സ്ഥലം സംഭാവനയായി നല്‍കിയ കുണ്ടറക്കോണം ഷിബു, അജി എന്നിവരെ ചടങ്ങില്‍ മന്ത്രി ആദരിച്ചു.

ചിത്രരചനാമത്സരം സംഘടിപ്പിച്ചു

വെള്ളറട: സിഎസ്ഐ ദക്ഷിണകേരള മഹായിടവക കാനക്കോട് ഇടവകയുടെ 120-ാമത് സഭാ വാര്‍ഷികത്തോടനുബന്ധിച്ചു ചിത്രരചനാ മത്സരം സംഘടിപ്പിച്ചു. ബാലജനസംഖ്യത്തിന്‍റെ ആഭിമുഖ്യത്തില്‍ കുട്ടികള്‍ക്കായ് സംഘടിപ്പിച്ച ചിത്രരചനാമത്സരത്തില്‍ 100 ല്‍ പരം കുട്ടികള്‍ പങ്കെടുത്തു. ഇടവക വൈദികന്‍ ഫാ. ജയരാജ് അധ്യക്ഷത വഹിച്ചു. പെരുങ്കടവിള പഞ്ചായത്ത് വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ കാനക്കോട് ബാലരാജ് ഉദ്ഘാടനം ചെയ്തു. നാടകപ്രവര്‍ത്തകന്‍ അജയന്‍ ആലത്തൂര്‍, ഇടവക സെക്രട്ടറി ആര്‍. പ്രിന്‍സ് ജയകുമാര്‍, ബാലാജന സംഘടന കണ്‍വീനേഴ്‌സ് ധന്യ, അനീന, യുവജനസംഖ്യം സെക്രട്ടറി ഷിജി വിനോദ്, കോ-ഓര്‍ഡിനേറ്റര്‍ സിജു എന്നിവര്‍ സംസാരിച്ചു. പങ്കെടുത്തവര്‍ക്ക് വരക്കാനുള്ള പേപ്പര്‍, ക്രയോണ്‍സ് എന്നിവയടങ്ങിയ കിറ്റ് സൗജന്യമായി വിതരണം ചെയ്തു. മേയ് മാസം നടക്കുന്ന സഭാ വാര്‍ഷിക സമ്മേളനത്തില്‍ വിജയികള്‍ക്കും പങ്കെടുത്തവര്‍ക്കും പുരസ്കാരവും സര്‍ട്ടിഫിക്കറുകളു വിതരണം ചെയ്യും.

പ്രതിഷേധ സദസ് സംഘടിപ്പിച്ചു

നെടുമങ്ങാട്: അരുവിക്കര വെള്ളനാട് റോഡിന്‍റെ ശോച്യാവസ്ഥയിൽ പ്രതിഷേധിച്ച് യൂത്ത് കോൺഗ്രസ് പ്രവർത്തകർ പ്രതിഷേധ സദസ് സംഘടിപ്പിച്ചു. യൂത്ത് കോൺഗ്രസ് അരുവിക്കര-വെള്ളനാട് മണ്ഡലം കമ്മിറ്റികളുടെ നേതൃത്വത്തിൽ വെമ്പന്നൂർ പള്ളിനട ജംഗ്ഷനിൽ സംഘടിപ്പിച്ച പ്രതിഷേധ സദസ് കെ.എസ്. ശബരീനാഥൻ ഉദ് ഘാടനം ചെയ്തു. യൂത്ത് കോൺഗ്രസ് അരുവിക്കര മണ്ഡലം പ്രസിഡന്‍റ് എസ്.എസ്. ആനന്ദ് അധ്യക്ഷനായി. എസ്.കെ. രാഹുൽ, ഫിറോസ് കുളപ്പട, ജ്യോതിഷ് കുരിശിങ്കൽ, ലാൽ റോഷി, ഇന്ദുലേഖ, വെള്ളനാട് ശ്രീകണ്ഠൻ, മറ്റു കോൺഗ്രസ് ജനപ്രതിനിധികൾ, മണ്ഡലം-ബ്ലോക്ക് ഭാരവാഹികൾ, മഹിളാ -കർഷക- യൂത്ത് കോൺഗ്രസ് ഭാരവാഹികൾ തുടങ്ങിയവർ പ്രസംഗിച്ചു.

ഭക്തിനിർഭരമായ അന്തരീക്ഷത്തിൽ കാട്ടാൽ തൂക്കം നടന്നു

കാട്ടാക്കട : ഭക്തി നിർഭരമായ അന്തരീക്ഷത്തിൽ കാട്ടാക്കട കാട്ടാൽ മുടിപ്പുര ഉത്സവത്തോടനുബന്ധിച്ചുള്ള കാട്ടാൽ തൂക്കം നടന്നു. ഇന്നലെ വൈകുന്നേരം കുത്തിയോട്ടക്കളമായ അഞ്ചുതെങ്ങിൻമൂട്ടിലേക്കു ദേവി എഴുന്നള്ളി. ചടങ്ങുകൾ പൂർത്തിയാക്കി വിവിധ നേർച്ചക്കാരുടെ അകമ്പടിയോടെ ഓട്ടക്കളത്തിലെ ചടങ്ങുകൾക്കുശേഷം നേർച്ചക്കാരുടെയും വാദ്യമേളങ്ങളുടെയും അകമ്പടിയോടെ തിരിച്ചെഴുന്നള്ളി. പൂക്കാവടി, തെയ്യം, മുത്തുക്കുടകൾ എന്നിവയും താലപ്പൊലിയേന്തിയ ബാലികമാരും അകമ്പടിയേകിയിരുന്നു. തുടർന്ന് കുത്തിയോട്ടം, തട്ടിയോട്ടം, ഉരുൾ, താലപ്പൊലി എന്നിവയുണ്ടായിരുന്നു. തുടർന്ന് ദേവി തൂക്കവില്ലിലേറി ക്ഷേത്ര പ്രദക്ഷിണം നടത്തി. പിന്നാലെ കുഞ്ഞുങ്ങളുടെ തൂക്കനേർച്ച നടന്നു. തൂക്കത്തിനു മുന്നോടിയായി കനത്ത വേനൽമഴ പെയ്തതോടെ ചൂടിന് ശമനമായി. സമാപന ദിവസമായ ഇന്നു ഗണപതിഹോമം, പ്രഭാതപൂജ എന്നിവയ്ക്കുശേഷം രാവിലെ പത്തിനു പൊങ്കാല നടക്കും.

അയൽവാസിയെ ആക്രമിച്ച കേസിൽ പ്രതി പിടിയിൽ

നെടുമങ്ങാട്: അയൽവാസിയെ കരിങ്കല്ലു കൊണ്ട് അടിച്ച് തലയ്ക്ക് ഗുരുതര പരിക്കേൽപ്പിച്ച കേസിലെ പ്രതിയായ ഉഴമലയ്ക്കൽ വാലു കോണം കുന്നുകത്ത് വീട്ടിൽ വേണു (59 ) നെ ആര്യനാട് പോലീസ് അറസ്റ്റ് ചെയ്തു. മദ്യലഹരിയിൽ ആയിരുന്ന പ്രതി അയൽവാസിയായ കുളപ്പട കുന്നുവിള വീട്ടിൽ മണിയൻ എന്നു വിളിക്കുന്ന കരുണാകരൻ (62) നെ കരിങ്കല്ല് ഉപയോഗിച്ച് തലയ്ക്കടിച്ച് പരിക്കേൽപ്പിക്കുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ദേശസേവിനി ഗ്രന്ഥശാല 80 വയസിന്‍റെ നിറവിൽ

നെടുമങ്ങാട്: ചെന്തുപ്പൂര് ദേശസേവിനി ഗ്രന്ഥശാല 80 വയസിന്‍റെ നിറവിൽ. വായനാ വസന്തം പരിപാടിയും ഹരിത ഗ്രന്ഥശാല പ്രഖ്യാപനവും എൺപതാം വാർഷിക ആലോചനാ യോഗവും നഗരസഭാ ചെയർപേഴ്സൺ സി.എസ്. ശ്രീജ ഉദ്ഘാടനം ചെയ്തു. പ്രസിഡന്‍റ് വേങ്കോട് മധു അധ്യക്ഷനായി. 100 വീടുകളിൽ ആറുദിവസം കൊണ്ട് പുസ്തകം എത്തിച്ച് വായനാഭിരുചി വളർത്തുന്ന ലൈബ്രറി കൗൺസിലിന്‍റെ പരിപാടിയാണ് വായനാവസന്തം. ദേശസേവിനി ഗ്രന്ഥശാല പ്രവർത്തന പരിധിയിലുള്ള 100 വീടുകളിലെ വീട്ടമ്മമാർക്കും വയോജനങ്ങൾക്കും മുൻഗണന നൽകിയാണ് വായനാവസന്തത്തിനു തുടക്കം കുറിച്ചത്. പൂർണമായും ഹരിതചട്ടം പാലിച്ചുകൊണ്ട് ഗ്രന്ഥശാല പ്രവർത്തനം നടത്തുന്നതിനും സെപ്തംബറിൽ ആരംഭിച്ച് ഒരു വർഷം നീണ്ടു നിൽക്കുന്ന വിവിധങ്ങളായ 80 പരിപാടികളോടെ വാർഷികം ആഘോഷിക്കുന്നതിനും തീരുമാനിച്ചു. കൗൺസിലർ ബി.എ. അഖിൽ, ഭരണസമിതി അംഗങ്ങളായ എസ്.എസ്. ബിജു, ശശി പൊയ്കയിൽ, വി. മോഹനൻ പിള്ള, എസ്. വസന്ത, വി.വി. ജയപ്രതാപ്, ബി. ശിവാനന്ദൻ, എസ്. ശശിധരൻ, ജി. അപ്പുക്കുട്ടൻ, ലൈബ്രേറിയൻ സി. ധന്യ എന്നിവർ സംസാരിച്ചു. സെക്രട്ടറി സുനിൽ കുമാർ സ്വാഗതവും, ജോയിന്‍റ് സെക്രട്ടറി ജി.എസ്. ജയചന്ദ്രൻ നന്ദിയും പറഞ്ഞു.

മാലിന്യം തള്ളിയതു ചോദ്യംചെയ്ത നഗരസഭാ ജീവനക്കാരനു മര്‍ദനം

പേരൂര്‍ക്കട: ഓട്ടോറിക്ഷയിലെത്തി മാലിന്യം റോഡിൽ തള്ളിയതു ചോദ്യം ചെയ്തതിന് ജീവനക്കാരനു മര്‍ദനം. തിരുവനന്തപുരം നഗരസഭയുടെ നൈറ്റ് സ്‌ക്വാഡില്‍ പ്രവര്‍ത്തിക്കുന്ന ഐരാണിമുട്ടം സ്വദേശി രാഹുലിനാണു മര്‍ദനമേറ്റത്. വ്യാഴാഴ്ച പുലര്‍ച്ചെ 3.30നായിരുന്നു കേസിനാസ്പദമായ സംഭവം. രണ്ടുദിവസം മുമ്പാണു കരിമഠം സ്വദേശികളായ രണ്ടുപേര്‍ ഓട്ടോറിക്ഷയില്‍ മാലിന്യംകൊണ്ടുവന്ന് ഈഞ്ചയ്ക്കല്‍ ഭാഗത്തു നിക്ഷേപിച്ചത്. അന്ന് അവരെ പിടികൂടാന്‍ രാഹുലിനു കഴിഞ്ഞിരുന്നില്ല. എന്നാല്‍ ഇന്നലെ പുലര്‍ച്ചെ ഇതേ സംഘത്തെ എസ്.പി ഫോര്‍ട്ട് ആശുപത്രിക്കു സമീപം കണ്ടതോടെയാണ് രാഹുല്‍ ഇവരെ ചോദ്യംചെയ്തത്. പെട്ടെന്നുണ്ടായ പ്രകോപനത്തെ തുടര്‍ന്ന് ഇവര്‍ രാഹുലിനെ അസഭ്യം പറയുകയും മുഖത്തടിക്കുകയുമായിരുന്നു. ഫോര്‍ട്ട് പോലീസ് കേസെടുത്തു.

കുടിവെള്ള പൈപ്പിന്‍റെ അറ്റകുറ്റപ്പണി പൂര്‍ത്തിയായി

കുടിവെള്ളം മുടങ്ങിയതു രണ്ടുദിവസം പേരൂര്‍ക്കട: കുടപ്പനക്കുന്ന് ജംഗ്ഷനെ എംഎല്‍എ റോഡുമായി ബന്ധിപ്പിക്കുന്ന ഭാഗത്ത് പൊട്ടിയ കുടിവെള്ള പൈപ്പിന്‍റെ അറ്റകുറ്റപ്പണി വാട്ടര്‍ അഥോറിറ്റി പൂര്‍ത്തീകരിച്ചു. ബുധനാഴ്ച വൈകിയാണ് പഴയ പൈപ്പ് മാറ്റി പുതിയതു സ്ഥാപിച്ചു പ്രശ്‌നം പരിഹരിച്ചത്. കുടപ്പനക്കുന്ന് ജംഗ്ഷനില്‍ മാര്‍ച്ച് അവസാന വാരവും ഏപ്രില്‍ ആദ്യവാരവുമായി രണ്ടുതവണ പൈപ്പ് പൊട്ടിയിരുന്നു. 400 എംഎം എസി പൈപ്പായിരുന്നു വില്ലന്‍. മൂന്നാംതവണയും എസി പൈപ്പുതന്നെയാണ് പൊട്ടിയതെന്നും എന്നാല്‍ കൂറ്റന്‍ മരത്തിന്‍റെ വേരിന്‍റെ മര്‍ദമാണ് ഇത്തവണ പൈപ്പ് പൊട്ടാന്‍ കാരണമെന്നും പേരൂര്‍ക്കട സെക്‌ഷന്‍ എഇ പറഞ്ഞു. കാലപ്പഴക്കംചെന്ന എസി പൈപ്പ് മാറ്റിസ്ഥാപിക്കാന്‍ തീരുമാനമായിട്ടുണ്ടെങ്കിലും ഇതുമായി ബന്ധപ്പെട്ടു കരാര്‍ ഏറ്റെടുക്കാന്‍ ആളില്ലാത്തതാണ് പ്രശ്‌നം പരിഹരിക്കപ്പെടാതെ കിടക്കാന്‍ കാരണം. 30 വര്‍ഷം കാലാവധി പറയുന്ന പൈപ്പ് ഇപ്പോള്‍ത്തന്നെ 38 വര്‍ഷം പൂര്‍ത്തിയാക്കിക്കഴിഞ്ഞു. പൈപ്പ് പൊട്ടിയതോടെ കുടപ്പനക്കുന്ന്, എംഎല്‍എ റോഡ്, പാതിരിപ്പള്ളി, ഇരപ്പുകുഴി, മുക്കോലയ്ക്കല്‍, കല്ലയം തുടങ്ങിയ നിരവധി സ്ഥലങ്ങളില്‍ കുടിവെള്ളം മുടങ്ങുകയുണ്ടായി. വ്യാഴാഴ്ച ഉച്ചയോടുകൂടിയാണ് ഉയര്‍ന്ന പ്രദേശങ്ങളില്‍ ഉള്‍പ്പെടെ ജലമെത്തിയത്.

ഗാനമേളക്കിടെയുണ്ടായ സംഘർഷം; മൂന്നു പോലീസുകാർക്കു പരിക്ക്

കിളിമാനൂർ: ഉത്സവപ്പറമ്പിൽ ഗാനമേളക്കിടെയുണ്ടായ സംഘർഷത്തിൽ എസ്ഐ ഉൾപ്പെടെ മൂന്നു പേർക്കു പരിക്ക്. പോലീസ് വാഹനവും അക്രമികൾ കേടുപാടുകൾ വരുത്തി. അക്രമികളായ നാലുപേരെ കിളിമാനൂർ പോലീസ് അറസ്റ്റ് ചെയ്തു. കാട്ടുമ്പുറം സ്വദേശികളായ അൽമുബീൻ (27), സുബീഷ് (34), സുബിൻ (27), ഗൗതം (18) എന്നിവരാണ് അറസ്റ്റിലായത്. ഞായർ രാത്രി പത്തോടെ കാട്ടുംപുറം, കരിക്കകം ശ്രീപഞ്ചമുഖമാടൻ തമ്പുരാൻ ക്ഷേത്രത്തിലായിരുന്നു സംഭവം. ക്ഷേത്രപറമ്പിൽ നടന്ന ഗാനമേളക്കിടെ യുവാക്കൾ ചേരിതിരിഞ്ഞു സംഘർഷത്തിലേർപ്പെട്ടു. സ്ഥലത്ത് ഡ്യൂട്ടിയിലുണ്ടായിരുന്ന കിളിമാനൂർ സബ് ഇൻസ്പെക്ടർ അരുണിന്‍റെ നേതൃത്വത്തിലുള്ള പോലീസ് സംഘം അക്രമം തടയാൻ ശ്രമിച്ചു. ഇതിനിടെ അക്രമി സംഘത്തിലെ പത്തോളം പേർ ചേർന്നു പോലീസ് സംഘത്തെ ആക്രമിക്കുകയായിരുന്നു. എസ്ഐ ഉൾപ്പടെ മൂന്നു പോലീസ് ഉദ്യോഗസ്ഥർക്ക് ആക്രമണത്തിൽ പരുക്കേറ്റു. അക്രമികൾ മരക്കഷണം ഉപയോഗിച്ച് പോലീസ് ജീപ്പ് കേടുപാടുകൾ വരുത്തുകയും ചെയ്തു. അക്രമി സംഘത്തിലെ കണ്ടാലറിയാവുന്ന പത്തോളം പേർക്കെതിരേ പോലീസ് കേസെടുക്കുകയും ഇതിൽ മുഖ്യ പ്രതികളായ നാല് പേരെ അറസ്റ്റ് ചെയ്യുകയുമായിരുന്നു. അറസ്റ്റ് ചെയ്ത പ്രതികളെ കോടതിയിൽ ഹാജരാക്കി റിമാൻഡ് ചെയ്തു.

ഈസ്റ്റര്‍ സന്ധ്യ 20ന്

നെയ്യാറ്റിന്‍കര : നെയ്യാറ്റിന്‍കര ദ് ക്രിസ്ത്യന്‍ ഫെല്ലോഷിപ്പിന്‍റെ ഈസ്റ്റര്‍ സന്ധ്യ 20ന് നെയ്യാറ്റിന്‍കര രൂപത ബിഷപ്പ് ഡോ. വിന്‍സെന്‍റ് സാമുവല്‍ ഉദ്ഘാടനം ചെയ്യും. തൊഴുക്കല്‍ സിഎസ്ഐ ചര്‍ച്ചില്‍ വൈകുന്നേരം അഞ്ചിന് ചേരുന്ന ചടങ്ങില്‍ ഫെല്ലോഷിപ്പ് പ്രസിഡന്‍റ് റവ. ഡോ. എല്‍. മോഹനദാസ് അധ്യക്ഷനാകും. മെഡിക്കല്‍ എഡ്യൂക്കേഷന്‍ ഡയറക്ടര്‍ ഡോ. തോമസ് മാത്യു ഈസ്റ്റര്‍ സന്ദേശം നല്‍കും. ഫെല്ലോഷിപ്പ് രക്ഷാധികാരികളായ മേജര്‍ ആര്‍. ക്രിസ്തുരാജ, റവ. ഡോ. എല്‍.ടി. പവിത്രസിംഗ്, മാര്‍ത്തോമാ ചര്‍ച്ചിലെ റവ. ബിജി മാത്യു, സെന്‍റ് ജോണ്‍സ് മലങ്കര ചര്‍ച്ചിലെ ഡോ. പ്രഭീഷ് ജോര്‍ജ്, വഴുതൂര്‍ ലൂഥറന്‍ ചര്‍ച്ചിലെ റവ. ജസ്റ്റിന്‍ ജോസ്, ചര്‍ച്ച് ഓഫ് ഗോഡിലെ റവ. സച്ചിദാനന്ദ ദാസ്, ഇസിഐ ചര്‍ച്ചിലെ റിന്‍റോ രാജ്, ബിലീവേഴ്സ് ഈസ്റ്റേണ്‍ ചര്‍ച്ചിലെ ഫാ. സതീഷ്, സോള്‍ വിന്നിംഗ്സ് ചര്‍ച്ച് ഓഫ് ഇന്‍ഡ്യയിലെ റവ. എം. സിജിന്‍, ഫെല്ലോഷിപ്പ് ജനറല്‍ കണ്‍വീനര്‍ ജെ. ജോസ് ഫ്രാങ്ക്ളിന്‍, സെക്രട്ടറി പി. ക്രിസ്തുദാസ് എന്നിവര്‍ സംബന്ധിക്കും.

മരപ്പാലത്ത് വാനും ഓട്ടോറിക്ഷയും കൂട്ടിയിടിച്ച് നാലുപേര്‍ക്കു പരിക്ക്

മെഡിക്കല്‍കോളജ്: മരപ്പാലം-മുട്ടട റോഡില്‍ വ്യാഴാഴ്ചയുണ്ടായ വാഹനാപകടത്തില്‍ നാലുപേര്‍ക്കു പരിക്കേറ്റു. ഇതില്‍ ഒരു കൈക്കുഞ്ഞും ഉള്‍പ്പെടുന്നു. പാല്‍ കയറ്റി വരികയായിരുന്ന വാനും സവാരി ഓട്ടോയുമാണ് കൂട്ടിയിടിച്ചത്. വാന്‍ മുട്ടടയില്‍ നിന്നു മരപ്പാലത്തേക്കും ഓട്ടോറിക്ഷ മരപ്പാലത്തുനിന്ന് മുട്ടടയിലേക്കും വരികയായിരുന്നു. രാവിലെ 11 മണിയോടുകൂടിയാണു സംഭവം. ഓട്ടോറിക്ഷയ്ക്കുള്ളില്‍ മണ്ണന്തല മുക്കോലയ്ക്കല്‍ അമ്പനാട് സ്വദേശികളായ ജയദേവി, രമണി എന്നിവരും ഒരു കൈക്കുഞ്ഞുമാണ് ഉണ്ടായിരുന്നത്. സ്ത്രീകള്‍ക്ക് രണ്ടുപേര്‍ക്കും ശരീരത്തിന് ഇടിയേല്‍ക്കുകയും മുഖത്തിനു പരിക്കേല്‍ക്കുകയും ചെയ്തു. ഇവരെ തിരുവനന്തപുരം മെഡിക്കല്‍കോളജ് ആശുപത്രിയില്‍ പ്രവേശിപ്പിച്ചു. കുഞ്ഞിനെ തിരുവനന്തപുരം എസ്എടി ആശുപത്രിയില്‍ പ്രവേശിപ്പിച്ചു. കുഞ്ഞിന്‍റെ നില ഗുരുതരമല്ല. ഓട്ടോ ഓടിച്ചിരുന്ന മെഡിക്കല്‍കോളജ് സ്വദേശി രാജീവ് ഗുരുതരമായി പരിക്കേറ്റ് മെഡിക്കല്‍കോളജില്‍ ചികിത്സയിലാണ്. അപകടത്തെ തുടര്‍ന്ന് ഇദ്ദേഹം ബോധരഹിതനാകുകയായിരുന്നു. ഇദ്ദേഹത്തിന്‍റെ തലയ്ക്കും ശരീരത്തിനും പരിക്കേറ്റു. രണ്ടുവാഹനങ്ങള്‍ക്കും വേഗത കൂടുതലായിരുന്നുവെന്നും മറ്റൊരു വാഹനത്തെ മറികടക്കുന്നതിനിടെയാണ് വാനും ഓട്ടോയും പരസ്പരം ഇടിച്ചതെന്നും പോലീസ് പറഞ്ഞു. ഇടിയുടെ ആഘാതത്തില്‍ ഓട്ടോറിക്ഷയുടെ മുന്‍ഭാഗം പൂര്‍ണമായും തകര്‍ന്നുപോയി. പാല്‍വണ്ടിക്കും കേടുപാടുകള്‍ ഉണ്ടായി. പേരൂര്‍ക്കട പോലീസ് മേല്‍നടപടികള്‍ സ്വീകരിച്ചു.

വയോജന പാർക്കിന്‍റെയും ഓപ്പൺ ഓഡിറ്റോറിയത്തിന്‍റെയും ശിലാസ്ഥാപനം നിര്‍വഹിച്ചു

നെയ്യാറ്റിൻകര: പെരുമ്പഴുതൂർ ജംഗ്ഷന്‍ വികസനത്തിന്‍റെ ആദ്യഘട്ടമായി ഓപ്പൺ എയർ ഓഡിറ്റോറിയത്തിന്‍റെയും ചന്തയ്ക്കു മുന്നിൽ വയോജന പാർക്കിന്‍റെയും നിർമാണത്തിനു തുടക്കമായി. നഗരസഭ ഏറ്റെടുത്ത സ്ഥലത്ത് കോൺക്രീറ്റ് തൂണുകൾ സ്ഥാപിക്കാനുള്ള നിർമാണ പ്രവൃത്തികളാണ് ആദ്യം നടക്കുന്നത്. ഈ പദ്ധതികളുടെ ശിലാസ്ഥാപനം ചെയർമാൻ പി.കെ. രാജമോഹനൻ നിർവഹിച്ചു. ഓപ്പൺ ഓഡിറ്റോറിയത്തിന് 29 ലക്ഷം രൂപയും വയോജന പാർക്കിന് 15 ലക്ഷം രൂപയുമാണു നീക്കിവെച്ചിട്ടുള്ളത്. ജംഗ്ഷന്‍ വികസനത്തിനായി നഗരസഭ നേരത്തേ 22.5 സെന്‍റ് സ്ഥലം കടകൾ ഒഴിപ്പിച്ച് ഏറ്റെടുത്തിരുന്നു. സ്ഥലം ഏറ്റെടുക്കാനായി 1.82 കോടി രൂപ നഗരസഭ നൽകി. ജംഗ്ഷനിലാണ് ഓപ്പണ്‍ എയര്‍ ഓഡിറ്റോറിയം നിര്‍മിക്കുന്നത്. പൊതുയോഗങ്ങൾ, സാംസ്കാരിക കൂട്ടായ്മകൾ എന്നിവയ്ക്ക് ഓഡിറ്റോറിയം ഉപയോഗപ്രദമാകും. പടിക്കെട്ടുകളായുള്ള ഇരിപ്പിടങ്ങൾ നിർമിക്കും. ജംഗ്ഷനു സമീപത്തെ ചന്തയുടെ മുന്നിലാണ് വയോജന പാർക്ക് നിർമിക്കുന്നത്. ഇവിടെ ഇരിപ്പിടങ്ങൾ നിർമിക്കുകയും തണൽമരങ്ങൾ വച്ചുപിടിപ്പിക്കുകയും ചെയ്യും. പാർക്കിൽ ദൃശ്യ, ശ്രവണ സംവിധാനങ്ങൾ ഒരുക്കും. പെരുമ്പഴുതൂർ ജംഗ്ഷനിൽ ചേർന്ന യോഗത്തിൽ നഗരസഭ വൈസ് ചെയർപേഴ്സൺ പ്രിയ സുരേഷ് അധ്യക്ഷയായി. നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്മാരായ കെ.കെ ഷിബു, എൻ.കെ. അനിതകുമാരി, ജെ. ജോസ് ഫ്രാങ്ക്ളിൻ, ആർ. അജിത, ഡോ. എം.എ. സാദത്ത്, കൗൺസിലർമാര്‍, സെക്രട്ടറി എന്നിവര്‍ സംബന്ധിച്ചു.

സ്ഥലം ലഭിച്ചെങ്കിലും സ്മാര്‍ട്ട് കൃഷിഭവന്‍ നിര്‍മാണം വൈകിയേക്കും

നെയ്യാറ്റിന്‍കര: നെയ്യാറ്റിന്‍കര നഗരസഭ കൃഷിഭവനു പുതിയ കെട്ടിടത്തിനു സ്ഥലം അനുവദിച്ചതില്‍ ജീവനക്കാര്‍ക്കും കര്‍ഷകര്‍ക്കും ആശ്വാസം. നിര്‍മാണ പ്രവര്‍ത്തനങ്ങള്‍ എത്രയും വേഗം പൂര്‍ത്തിയായിരുന്നെങ്കില്‍ എന്നാണ് നിലവില്‍ അവരുടെ ആഗ്രഹം. എന്നാല്‍ കെട്ടിട നിര്‍മാണവുമായി ബന്ധപ്പെട്ട പരിശോധനകളും മറ്റു നടപടിക്രമങ്ങളും വിവിധ ഘട്ടങ്ങളായേ നടക്കാന്‍ സാധ്യതയുള്ളൂവെന്നതിനാല്‍ പുതിയ കെട്ടിടം പൂര്‍ത്തിയാകാന്‍ സ്വാഭാവികമായ കാലതാമസം വന്നേക്കാമെന്നും ആശങ്ക. നെയ്യാറ്റിന്‍കര നഗരസഭ കൃഷിഭവന്‍ ഇപ്പോള്‍ പ്രവര്‍ത്തിക്കുന്നത് മൃഗസംരക്ഷണ വകുപ്പിന്‍റെ കെട്ടിടത്തിലാണ്. വര്‍ഷങ്ങളുടെ പഴക്കമുള്ള ഈ കെട്ടിടം ഏതു നിമിഷവും നിലംപൊത്തിയേക്കാമെന്ന സ്ഥിതിയിലാണുള്ളത്. പെരുമഴയത്ത് കെട്ടിടമാകെ ചോര്‍ന്നൊലിക്കുന്ന ദയനീയാവസ്ഥ ദീപിക നേരത്തെ റിപ്പോര്‍ട്ട് ചെയ്തിട്ടുമുണ്ട്. സുരക്ഷിതമായ പുതിയ കെട്ടിടം എന്ന ജീവനക്കാരുടെയും കര്‍ഷകരുടെയും നിരന്തര ആവശ്യത്തിനു പരിഹാരമായാണ് ഒന്നരക്കോടി രൂപ അനുവദിച്ചിരിക്കുന്നത്. തിരുവനന്തപുരം ജില്ലയില്‍ നെയ്യാറ്റിന്‍കര നഗരസഭയിലെ സ്മാര്‍ട്ട് കൃഷി ഭവന്‍ നിര്‍മാണത്തിനു മാത്രമായാണ് ഈ തുക. നെയ്യാറ്റിന്‍കര നഗരസഭയുടെ പരിധിയില്‍ പവിത്രാനന്ദപുരം പ്രീ- മെട്രിക് ഹോസ്റ്റലിനു സമീപത്തെ പത്തു സെന്‍റ് വസ്തു പുതിയ കൃഷിഭവന്‍ കെട്ടിടം നിര്‍മിക്കാന്‍ അനുമതി ലഭിച്ചു. കേരള ലാന്‍ഡ് ഡവലപ്പമെന്‍റ് ആന്‍ഡ് കണ്‍സ്ട്രക്ഷന്‍ ബോര്‍ഡിനാണ് നിര്‍മാണ ചുമതല. പ്രിൻസിപ്പൽ അഗ്രിക്കൾച്ചര്‍ ഓഫീസർ അനിൽകുമാറിന്‍റെ നേതൃത്വത്തില്‍ ഉദ്യോഗസ്ഥരും കെഎല്‍ഡിസി - ബി പ്രതിനിധികളും കഴിഞ്ഞ ദിവസം പവിത്രാനന്ദപുരത്തെ വസ്തുസന്ദര്‍ശിച്ചു. നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്മാരായ കെ.കെ. ഷിബു, ഡോ. എം.എ. സാദത്ത്, കൗണ്‍സിലര്‍ കൂട്ടപ്പന മഹേഷ് എന്നിവരും അവരോടൊപ്പമുണ്ടായിരുന്നു. നഗരസഭ പരിധിയില്‍ നെയ്യാറ്റിന്‍കരയ്ക്കു പുറമേ പെരുന്പഴുതൂരില്‍ മറ്റൊരു കൃഷി ഭവന്‍ പ്രവര്‍ത്തിക്കുന്നുണ്ട്. പെരുന്പഴുതൂര്‍ പഞ്ചായത്തിലെ കൃഷി ഭവനായിരുന്നു ഇത്. പഞ്ചായത്ത് നഗരസഭയോട് കൂട്ടിച്ചേര്‍ത്തെങ്കിലും കൃഷി ഭവന്‍ പെരുന്പഴുതൂരില്‍ തന്നെ പ്രവര്‍ത്തനം തുടരുന്നു. പഴയ പഞ്ചായത്ത് ഓഫീസ് കെട്ടിടത്തിലാണ് പെരുന്പഴുതൂര്‍ കൃഷി ഭവന്‍ സ്ഥിതി ചെയ്യുന്നത്. പവിത്രാനന്ദപുരത്ത് നഗരസഭയുടെ കൃഷി ഭവന്‍ ഓഫീസ് കെട്ടിടത്തിനു നിലവിലുള്ള നഗരസഭ ഭരണസമിതിയുടെ കാലാവധി സമിക്കുന്നതിനു മുന്പ് ശിലാസ്ഥാപനമെങ്കിലും നടത്തണമെന്നതാണ് ലക്ഷ്യം. ഇരുനിലയുള്ള കെട്ടിടമാണ് കൃഷിഭവനുവേണ്ടി നിര്‍മിക്കപ്പെടുക. അതേസമയം, വര്‍ഷങ്ങളായി കര്‍ഷകരും മറ്റും ആവശ്യപ്പെടുന്നത് കാര്‍ഷിക കോംപ്ലക്സാണ്. നഗരസഭ കൃഷി ഭവന്‍റെ പരിധിയില്‍ നെല്‍കൃഷി ചെയ്യുന്നവര്‍ കുറവാണെങ്കിലും പൊതുവേ കൃഷിയോട് ആഭിമുഖ്യമുള്ളവര്‍ ഏറെയുണ്ട്. 120 ഹെക്ടര്‍ നെല്‍കൃഷി ചെയ്തിരുന്ന പാടങ്ങളില്‍ മണലൂര്‍ ഏലായില്‍ മാത്രമാണ് നെല്‍കൃഷി അവശേഷിക്കുന്നത്. മറ്റു നെല്‍പ്പാടങ്ങളില്‍ വാഴയും പച്ചക്കറികളും മരച്ചീനിയും ധാരാളമായി കൃഷി ചെയ്തു വരുന്നു. ടിബി ജംഗ്ഷനു സമീപം പ്രവര്‍ത്തിക്കുന്ന ഇപ്പോഴത്തെ കെട്ടിടത്തില്‍ കര്‍ഷകര്‍ക്കു പരിശീലനം നല്‍കാനുള്ള സൗകര്യമോ അവര്‍ക്ക് വിതരണം ചെയ്യാനുള്ളതടക്കമുള്ള വിത്തുകളും വളവുമെല്ലാം മഴയത്തു നനയാതെ സൂക്ഷിക്കാനുള്ള സംവിധാനമോ ഇല്ല. പുതിയ കെട്ടിടം യാഥാര്‍ഥ്യമായാല്‍ ഇത്തരത്തില്‍ ഒട്ടേറെ പരാതികള്‍ക്കും പരിമിതികള്‍ക്കും കൂടിയുള്ള ശാശ്വതപരിഹാരമാകുമെന്ന പ്രതീക്ഷയിലാണ് കര്‍ഷകരും.

പൂജപ്പുരയില്‍ ബസില്‍ കാര്‍ ഇടിച്ചുകയറി നാലുപേര്‍ക്ക് പരിക്ക്

പേരൂര്‍ക്കട: പൂജപ്പുരയില്‍ ഓടിക്കൊണ്ടിരുന്ന ബസില്‍ മാരുതി സ്വിഫ്റ്റ് കാര്‍ ഇടിച്ചുകയറി നാലുപേര്‍ക്കു പരിക്കേറ്റു. ഇതില്‍ ഒരാള്‍ ബസിലെ യാത്രക്കാരിയും രണ്ടുപേര്‍ കാര്‍ യാത്രികരും ഒരാള്‍ കാറിടിച്ചു പരിക്കേറ്റ സ്‌കൂട്ടര്‍ യാത്രികനുമാണ്. വ്യാഴാഴ്ച ഉച്ചതിരിഞ്ഞ് 1.30 നായിരുന്നു സംഭവം. തിരുവനന്തപുരത്തുനിന്നു വെള്ളറടയിലേക്ക് സര്‍വീസ് നടത്തുകയായിരുന്ന കെഎസ്ആര്‍ടിസി ബസിനു മുന്നിലേക്കാണ് പൂജപ്പുരയില്‍നിന്ന് ജഗതി ഭാഗത്തേക്ക് പോകുകയായിരുന്ന കാര്‍ ഇടിച്ചുകയറിയത്. കാറില്‍ സുനില്‍, കുഞ്ചന്‍ എന്നീ രണ്ടുയുവാക്കളാണ് ഉണ്ടായിരുന്നത്. കാറിന് അമിതവേഗമുണ്ടായിരുന്നുവെന്നും കാര്‍ ഓടിച്ചിരുന്നയാള്‍ മദ്യപിച്ചിട്ടുണ്ടായിന്നുവോയെന്ന് സംശയമുണ്ടെന്നും പൂജപ്പുര പോലീസ് പറഞ്ഞു. കാര്‍ ആദ്യം ഒരു ഇലക്ട്രിസ്‌കൂട്ടര്‍ യാത്രികനെ ഇടിച്ചിട്ടശേഷമാണു നിയന്ത്രണംതെറ്റി ബസിന്‍റെ മുന്‍ഭാഗത്തേക്കു വന്നിടിച്ചതെന്നു ബസ്‌ ഡ്രൈവര്‍ വിജിന്‍ പറഞ്ഞു. തിരുമല സ്വദേശിയായ സ്‌കൂട്ടര്‍ യാത്രികനെ ബന്ധുക്കളെത്തി ആശുപത്രിയില്‍ പ്രവേശിപ്പിച്ചു. അപകടത്തെ തുടര്‍ന്ന് അബോധാവസ്ഥയിലായ കാര്‍ യാത്രികര്‍ തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലുണ്ട്. കൂടാതെ ബസിലെ യാത്രക്കാരി കാട്ടാക്കട തൂങ്ങാംപാറ സ്വദേശിനി നിമി (34) തലയ്ക്കു പരിക്കേറ്റ് തിരുവനന്തപുരം ജനറല്‍ ആശുപത്രിയില്‍ ചികിത്സയിലാണ്. അപകടത്തെ തുടര്‍ന്നു കാറിന്‍റെ മുന്‍ഭാഗം പൂര്‍ണമായും തകര്‍ന്നു. പരിക്കേറ്റവരെ തിരുവനന്തപുരം ഫയര്‍‌സ്റ്റേഷനില്‍നിന്നുള്ള ഗ്രേഡ് സ്റ്റേഷന്‍ ഓഫീസര്‍ ടി. സതീഷ്‌കുമാര്‍, സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ പി.പി പ്രശോഭ്, ഫയര്‍ആൻഡ് റസ്‌ക്യു ഓഫീസര്‍മാരായ എം.എസ്. ഷഹീര്‍, എം. മഹേഷ്, സുജിത്ത് എസ്. കുമാര്‍, എസ്.ആര്‍. മനു, വിഷ്ണുമോഹന്‍, ഫയര്‍ ആൻഡ്് റസ്‌ക്യു ഓഫീസര്‍ ഡ്രൈവര്‍മാരായ എസ്.എസ്. അഭിലാഷ്, എ. വിപിന്‍ചന്ദ്രന്‍ എന്നിവരും പൂജപ്പുര പോലീസും ചേര്‍ന്ന് വിവിധ ആശുപത്രികളില്‍ പ്രവേശിപ്പിച്ചു.

മാരിടൈം ബോർഡിനു കീഴിലുള്ള വിഴിഞ്ഞം തുറമുഖത്തിന് അധികൃതരുടെ കടുത്ത അവഗണന

എസ്. രാജേന്ദ്രകുമാർ വിഴിഞ്ഞം: മാരിടൈം ബോർഡിനു കീഴിലുള്ള വിഴിഞ്ഞം തുറമുഖത്തിന് അധികതരുടെ അവഗണന. തുറമുഖത്ത് കപ്പലുകളോ മറ്റു യാനങ്ങളോ അടുക്കാതെ വരുമാനം കുത്തനെ ഇടിഞ്ഞു.പോർട്ടിന്‍റെ മാസവരുമാനം ഒരു ലക്ഷമെങ്കിലും തികക്കാനുള്ള ഓട്ടത്തിൽ ഉദ്യോഗസ്ഥർ. മാറി മാറി വന്ന മന്ത്രിമാരും ഉദ്യോഗസ്ഥരും ഇടവിട്ട് പ്രഖ്യാപിച്ച വികസന പ്രവർത്തനങ്ങൾ ഇവിടെ കണികാണാനില്ലാത്തത് മാത്രമല്ല, ഉണ്ടായിരുന്ന വികസനവും മുരടിച്ച മട്ടായി. അദാനി പുതിയതായി നിർമിച്ച അന്താരാഷ്ട്ര തുറമുഖത്തിനും കഷ്ടിച്ച് അര കിലോമീറ്റർ മാറിയാണ് മാരിടൈം ബോർഡിന്‍റെ തുറമുഖം. ഒരു അന്താരാഷ്ട്ര തുറമുഖത്തിന് ആവശ്യം വേണ്ട ഐഎസ്പിഎസ് കോഡും, ഐസിപി കോഡും, മറ്റു സുരക്ഷാ സംവിധാനങ്ങളും പഴയതും പുതിയതുമായ രണ്ട് വാർഫുകളും കടൽ വഴി കൊണ്ടുവരുന്ന സാധനങ്ങൾ സൂക്ഷിക്കാനുള്ള ഗോഡൗണും സ്വന്തമായുണ്ട്. കടലിൽനിന്നു സാധനങ്ങളും ജീവനക്കാരെയും കരയിലെത്തിക്കാനുള്ള കൂറ്റൻ ടഗ്ഗും സജ്ജം. കോവിഡ് കാലത്തെ രണ്ടു വർഷത്തിനുള്ളിൽ700-ൽപ്പരം വൻകിട ചരക്കുകപ്പലുകളെ ക്രൂ ചേഞ്ചിംഗിനായി അടുപ്പിച്ച് ലോകത്തിനു മുന്നിൽ കേരളത്തിന്‍റെ കരുത്തറിയിച്ച തുറമുഖത്തിനാണ് ഇപ്പോൾ അ ധോഗതി സംഭവിച്ചത്. ലോകത്തെ ഏറ്റവും വലിയ ചരക്ക് കപ്പലുകളിൽ ഒന്നായ എവർഗ്ലോയെ അടുപ്പിച്ചാണു വിഴിഞ്ഞത്തിന്‍റെ ശക്തി ലോകത്തിനു മുന്നിൽ പരിചയപ്പെടുത്തിയത്. ദിവസം 10 കൂറ്റൻ ചരക്ക് കപ്പലുകളെവരെ ഒരേ സമയം മാരിടൈം ബോർഡിന് അധികാരപ്പെട്ട തീരത്ത് നങ്കൂരമിട്ടിയിച്ച് കൈകാര്യം ചെയ്ത ചരിത്രമുണ്ട്. വല്ലപ്പോഴും നടത്തിയിരുന്ന അടിയന്തര ക്രൂ ചേഞ്ചിംഗും ബോട്ടുകളുടെയും മറ്റും രജിസ് ട്രേഷൻ ഫീസും കൊണ്ടാണ് തുറമുഖം ഇപ്പോൾ ഒരുവിധം പിടിച്ചു നിന്നത്. ഏപ്രിലിന്‍റെ തുടക്കത്തിൽ ഉൾക്കടലിൽകൂടിപ്പോയ ഒരു കപ്പലിലെ ജീവനക്കാരന്‍റെ വിഴിഞ്ഞത്തേക്കുള്ള അടിയന്തിര ലാൻഡിംഗിനും ബന്ധപ്പെട്ട കേന്ദ്ര ഏജൻസികൾ തടസം നിന്നതായും ആരോപണമുയർന്നിരുന്നു. അടിയന്തിര ലാൻഡിംഗ് ആവശ്യപ്പെട്ട കപ്പൽ ഏജൻസിയോട് ഇതുവരെയും ഇല്ലാത്ത നിയമം പറഞ്ഞു വിഴിഞ്ഞത്തിൽ നിന്നകറ്റി. ഒടുവിൽ കപ്പൽ കൊച്ചിക്കുവിട്ട് ദൗത്യം പൂർത്തിയാക്കുകയായിരുന്നു. പുതിയ അന്താരാഷ്ട്ര തുറമുഖം യാഥാർഥ്യമായി കപ്പലുകൾ അടുത്തതോടെ ഫീഡിംഗ് പോർട്ടാക്കി മാറ്റി മാരിടൈം ബോർഡിന്‍റെ തുറമുഖങ്ങളായ വിഴിഞ്ഞത്തെയും കൊല്ലത്തേയും വമ്പൻ വികസനത്തിലെത്തിച്ച് സർക്കാരിന് വൻലാഭമുണ്ടാക്കാമെന്നാണ് പൊതുവെയുള്ള വിലയിരുത്തൽ. ഓഖി സമയത്തും പുതിയ തുറമുഖനിർമാണ സമയത്തും മൗത്തിൽ അടിഞ്ഞുകൂടിയ മണൽ മാറ്റി ഒരു വാർഫിന്‍റെ നീളം കൂട്ടിയാൽ വലിയ ചിലവില്ലാതെ ഏതുതരം അന്തർദേശീയ കപ്പലുകളെയും വാർഫിൽ അടുപ്പിക്കാനും സാധിക്കും.

പൊഴിമുറിക്കാനെത്തിയ ഉദ്യോഗസ്ഥരെ തടഞ്ഞു മത്സ്യത്തൊഴിലാളികൾ

തിരുവനന്തപുരം: മുതലപ്പൊഴിയിൽ പൊഴിമുറിക്കാനെത്തിയ ഉദോഗസ്ഥർ മത്സ്യത്തൊഴിലാളികളുടെ ശക്തമായ പ്രതിഷേധത്തെ തുടർന്നു തിരികെ പോയി. ഇന്നലെ രാവിലെ മുതൽ മത്സ്യത്തൊഴിലാളികൾ പ്രതിഷേധവുമായി എത്തുകയായിരുന്നു. കൂടുതൽ ഡ്രെഡ്ജറുകൾ വരുത്തി മണൽ നീക്കം ചെയ്യാതെ പൊഴി മുറിക്കാൻ അനുവദിക്കില്ലെന്നു മത്സ്യത്തൊഴിലാളികൾ അറിയിച്ചു. പൊഴി മുറിക്കാൻ എത്തിയ തുറമുഖ വകുപ്പ് ഉദോഗസ്ഥർ പലതവണ ചർച്ച നടത്തിയെങ്കിലും നിലപാടിൽനിന്നും പിന്മാറാൻ മത്സ്യത്തൊഴിലാളികൾ തയാ റായില്ല. ആയിരകണക്കിനു തൊഴിലാളികളാണ് സംഘടിച്ചെത്തിയത്. പൊഴി മുറിക്കുമ്പോൾ വള്ളങ്ങൾക്കു കടന്നു പോകാനുള്ള സൗകര്യം ഒരുക്കാമെന്ന് ഉദോഗസ്ഥർ ഉറപ്പ് നൽകി. എന്നാൽ കൂടുതൽ ഡ്രെഡ്ജറുകളെത്തിച്ചു മണൽ നീക്കം ചെയ്യാതെ പൊഴി മുറിക്കാൻ അനുവദിക്കില്ലെന്ന മത്സ്യ തൊഴിലാളികളുടെ ആവശ്യത്തിൽ അധികൃതർ മുട്ടുമടക്കി. സംഘർഷ സാധ്യത കണക്കിലെടുത്തു വൻ പോലീസ് സന്നാഹം നിലയുറപ്പിച്ചിരുന്നു. അടുത്ത ദിവസങ്ങളിലും പ്രതിഷേധം തുടരുമെന്നു മത്സ്യത്തൊഴിലാളികൾ പറഞ്ഞു. അതേ സമയം പൊഴി മുറിക്കാതിരുന്നാൽ സമീപത്തെ നാലു പഞ്ചായത്തു കളിലെ നിരവധി പ്രദേശങ്ങൾ വെള്ളത്തിലാകുമെന്ന ആശങ്കയുമുണ്ട്.

ആയിരങ്ങൾ അണിനിരക്കുന്ന തൂംബാവൽ യാത്ര ഇന്ന്

വിഴിഞ്ഞം: ആയിരങ്ങൾ അണിചേരുന്ന തുംബാവൽ വിലാപയാത്രയ്ക്ക് ഇന്നു വിഴിഞ്ഞം തീരദേശം സാക്ഷ്യം വഹിക്കും. ക്രൂശാരോഹണശേഷം മരണം പുൽകിയ ക്രിസ്തുവിന്‍റെ തിരുശരീരവും വഹിച്ചു, പള്ളിയുടെ വിവിധ സ്ഥലങ്ങൾ ചുറ്റിയുള്ള കബറടക്ക ശുശ്രൂഷയെ അനുസ്മരിക്കുന്നതാണ് തും ബാവൽ യാത്ര. യേശുക്രിസ്തുവിന്‍റെ പൂർണകായ രൂപം തോളിലേറ്റി തമിഴും മലയാളവും കലർന്നചിന്ത് പാട്ടുകളോടെ തൂംബാവൽ (മഞ്ചം) വിലാപയാത്ര ജില്ലയിലെഒരോ ഇടവക അതിർത്തിയിലും നടക്കും. മുൾക്കിരീടവും, ആണിയും ചാട്ടയുമെല്ലം ശവമഞ്ചത്തോടൊപ്പം ഉണ്ടാകും. നാടുചുറ്റിയശേഷം എത്തിക്കുന്ന പ്രതീകാത്മക തിരുശരീരത്തെ പള്ളിക്കുള്ളിൽ കൊണ്ടുവന്നു ശുശ്രൂഷകൾ നടത്തി കർമങ്ങൾ പൂർത്തിയാക്കും. ജില്ലയിലെ തീരദേശ പ്രദേശങ്ങളായ പൊഴിയൂർ മുതൽ മാമ്പള്ളി വരെയുള്ള പള്ളികളിലാണു പ്രധാനമായും തൂംബാവൽ(മഞ്ചം) വഹിച്ചുള്ള വിലാപ യാത്ര നടക്കുന്നത്.

ടാന്‍സാനിയയില്‍ മെത്രാനായി മാര്‍ ഈവാനിയോസ് കോളജിലെ പൂര്‍വ വിദ്യാര്‍ഥി

തിരുവനന്തപുരം: ടാന്‍സാനിയായില്‍ മെത്രാനായി മാര്‍ ഈവാനിയോസ് കോളജിലെ പൂര്‍വ വിദ്യാര്‍ഥി..! മാര്‍ ഈവാനിയോസ് ഓട്ടോണോമസ് കോളജിലെ പൂര്‍വ വിദ്യാര്‍ഥിയായിരുന്ന ഫാ. റൊമാന്‍സ് എലമു മിഹാലിയാണ് ആഫ്രിക്കയില്‍ ടാന്‍സാനിയയിലെ ഇറിങ്ങ രൂപതയുടെ മെത്രാനായി അഭിഷിക്തനാകുന്നത്. ഈ മാസം 27നാണ് മെത്രാഭിഷേകച്ചടങ്ങുകൾ. 2005 - 2011 കാലഘട്ടത്തില്‍ മാര്‍ ഈവാനിയോസ് കോളജില്‍നിന്നു ജന്തുശാസ്ത്രത്തില്‍ ബിരുദവും ബിരുദാനന്തര ബിരുദവും നേടിയ ഫാ. റൊമാന്‍സ് എലമു മിഹാലി പിന്നീട് മാര്‍ തെയോഫിലോസ് ടീച്ചേഴ്‌സ് ട്രെയിനിംഗ് കോളജില്‍ നിന്ന് ബിഎഡ് ബിരുദവും കരസ്ഥമാക്കിയിരുന്നു. ടാന്‍സാനിയയിലെ മുഫിന്‍ഡിയില്‍ 1969 ജൂണ്‍ 10ന് ജനിച്ച അദ്ദേഹം ഇറിങ്ങ രൂപതയില്‍ കത്തോലിക്കാ വിഭാഗത്തില്‍പ്പെട്ട അഞ്ചു ലക്ഷത്തോളം വിശ്വാസികളുടെ ആറാമത്തെ തദ്ദേശീയ ആത്മീയ പിതാവായാണ് അഭിഷേകം ചെയ്യപ്പെടുന്നത്. എല്ലാകാര്യങ്ങളിലും വ്യത്യസ്ഥതയും കൃത്യതയും കാത്തുസൂക്ഷിക്കുന്ന വ്യക്തിയായിരുന്നു ഫാ. റൊമാന്‍സ് എലമു മിഹാലിയെന്നു അദ്ദേഹത്തെ പഠിപ്പിച്ചിരുന്ന മാര്‍ ഈവാനിയോസ് കോളജിലെ അസോസിയേറ്റ് പ്രഫസര്‍ ഡോ. ജോസ് കുമാര്‍ പറഞ്ഞു. ടാന്‍സാനിയയില്‍ നടക്കുന്ന മെത്രാഭിഷേക ചടങ്ങില്‍ പങ്കെടുക്കുമെന്നും അദ്ദേഹം പറഞ്ഞു.

തെക്കന്‍ കുരിശുമല കാല്‍വരിയാക്കി ആയിരങ്ങൾ മലകയറി

വെള്ളറട: തെക്കന്‍ കുരിശുമല യിലെ 68-ാമത് തീര്‍ഥാാടനത്തിന്‍റെ രണ്ടാം ഘട്ടത്തിൽ പെസഹാദിനമായിരുന്ന ഇന്നലെ ആ യിരങ്ങൾ മലകയറി പ്രാര്‍ഥിച്ചു. രാവിലെ അഞ്ചിനു സംഗമ വേദിയില്‍നിന്നും നെറുകയിലേയ്ക്ക് ആരംഭിച്ച കുരിശിന്‍റെ വഴിക്കു പിന്നാലെ വിവിധ ഭാഗങ്ങളില്‍നിന്നും ഒഴുകിയെത്തിയ തീര്‍ഥാടകര്‍ മലകയറി തുടങ്ങി. വൈകുന്നേരമായതോടെ നെറുകയും ആരാധനാ ചാപ്പലും സംഗമവേദിയും തീര്‍ഥാടകരുടെ തിരക്കില്‍ നിറഞ്ഞു കവിഞ്ഞു. ഇടയ്ക്കിടെ പെയ്ത വേനല്‍മഴ യെ അവഗണിച്ചാണ് വിശ്വാസികള്‍ തീര്‍ഥാടനം നടത്തിയത്. തീര്‍ഥാടകരെ നിയന്ത്രിക്കാന്‍ പോലീസും വോളന്‍റിയർമാരും നന്നേ പാടുപ്പെട്ടു. തിരക്ക് രാത്രിയിലും തുടരുന്നു. സംഗമ വേദിയില്‍ വൈകുന്നേരം ആറിനു നടന്ന ആഘോഷമായ ദിവ്യബലിക്കും പാദ ക്ഷാളന ശുശ്രൂഷാകര്‍മത്തിനും സ്പിരിച്ച്വല്‍ ആനിമേറ്റര്‍ ഫാ. ഹെന്‍സിലിന്‍ ഒസിഡി മുഖ്യകാര്‍മികത്വം വഹിച്ചു. കുരിശുമല ഡിവൈന്‍ ബീറ്റ്‌സ് ഗാനശുശ്രൂഷ നടത്തി. തുടര്‍ന്നു തിരുമണിക്കൂര്‍ ആരാധനയ്ക്കു കുരിശുമല, കൂട്ടപ്പു, കൊല്ലകോണം ഇടവകകള്‍ നേതൃത്വം നല്‍കി. രണ്ടാം ഘട്ട തീര്‍ഥാടനം ഇന്നു സമാപിക്കും. ഇന്നു രാത്രി മുഴുവന്‍ സമയവും തീര്‍ഥാടകര്‍ക്കു മല കയറുന്നതിനു ലൈറ്റും മറ്റു സൗകര്യങ്ങളും ഒരുക്കിയിട്ടുള്ളതായി സംഘാടക സമിതി അറിയിച്ചു.

യേശുവിന്‍റെ സ്നേഹസന്ദേശം ജീവിതവ്രതമാക്കണം: ബിഷപ് ജോഷ്വാ മാർ ഇഗ്നാത്തിയോസ്

തിരുവനന്തപുരം: നിന്നെ പോലെ തന്നെ നിന്‍റെ അയൽക്കാരനെയും സ്നേഹിക്കുവാൻ യേശുക്രിസ്തു നൽകിയ സന്ദേശം ജീവിതവ്രതമാക്കുവാൻ ലോക ജനതയ്ക്കു കഴിഞ്ഞാൽ യുദ്ധവും പട്ടിണിയും ഇല്ലാതാകുമെന്നു മാവേലിക്കര രൂപതാധ്യക്ഷൻ ഡോ. ജോഷ്വാ മാർ ഇഗ്നാത്തിയോസ് പറഞ്ഞു. ക്രൈസ്തവ സഭകളുടെ കൂട്ടായ്മയായ ആക്ട്സ് വിശുദ്ധവാര ത്തോടനുബന്ധിച്ച് പൂജപ്പുര സെൻട്രൽ ജയിലിൽ നടത്തിയ ശുശ്രൂഷയിൽ വചനസന്ദേശം നൽകുകയായിരുന്നു അദ്ദേഹം നിരപരാധിയായ യേശുവിനെ ശിക്ഷിച്ച നിയമവ്യവസ്ഥയാണ് ഇന്നും പലയിടത്തും തുടരുന്നത്. കുറ്റവാളികൾ രക്ഷപ്പെടുകയും നിരപരാധികൾ ശിക്ഷിക്കപ്പെടുകയും ചെയ്യുന്ന വ്യവസ്ഥിതിക്ക് മാറ്റമുണ്ടാകണം - അദ്ദേഹം തുടർന്നു. ആക്ട്സ ജനറൽ സെകട്ടറി ജോർജ് സെബാസ്റ്റ്യൻ അധ്യക്ഷത വഹിച്ചു. ഇന്നു രാവിലെ 11 നു ചങ്ങനാശേരി ആർച്ച്ബിഷപ് മാർ തോമസ് തറയിൽ മുഖ്യസന്ദേശം നൽകും.

പീഢാനുഭവ സ്മരണയിൽ ഇന്ന് ദുഃഖവെള്ളി

തിരുവനന്തപുരം: ഈസ്റ്റര്‍ ആഘോഷങ്ങള്‍ക്കായി ദേവാലയങ്ങള്‍ ഒരുങ്ങി. വിവിധ ദേവാലയങ്ങളില്‍ ഈസ്റ്ററിനോടനുബന്ധിച്ചു നടക്കുന്ന ശുശ്രൂഷകളില്‍ വിശ്വാസികള്‍ പങ്കുചേരും. വിവിധ മതമേലധ്യക്ഷന്മാരും വൈദീകരും പ്രാര്‍ഥനാ ശുശ്രൂഷകള്‍ക്കു കാര്‍മികത്വം വഹിക്കും. പട്ടം സെന്‍റ് മേരീസ് മേജര്‍ ആര്‍ക്കി എപ്പാര്‍ക്കിയല്‍ കത്തീഡ്രല്‍ നാളെ രാത്രി ഏഴിന് ആരംഭിക്കുന്ന ഈസ്റ്റര്‍ തിരുക്കര്‍മങ്ങള്‍ക്ക് മലങ്കര കത്തോലിക്കാ സഭ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ മുഖ്യകാര്‍മികനാകും. ഈസ്റ്റര്‍ ദിനത്തില്‍ രാവിലെ 6.15നും വിശുദ്ധ കുര്‍ബാനയുണ്ടാകും. പാളയം സെന്‍റ് ജോസഫ്‌സ് കത്തീഡ്രലില്‍ നാളെ രാത്രി 10.30 ന് ഉയിര്‍പ്പിന്‍റെ തിരുക്കര്‍മങ്ങള്‍ ആരംഭിക്കും. ഈസ്റ്റര്‍ ദിനത്തില്‍ രാവിലെ ഏഴിനും 8.45 നും വൈകുന്നേരം അഞ്ചിനും വിശുദ്ധ കുര്‍ബാനയുണ്ടായിരിക്കും. പിഎംജി ലൂര്‍ദ് ഫൊറോന പള്ളിയില്‍ ഈസ്റ്റര്‍ ദിനത്തില്‍ രാവിലെ മൂന്നിന് ഇയിര്‍പ്പിന്‍റെ തിരുക്കര്‍മങ്ങള്‍ ആരംഭിക്കും. മുഖ്യകാര്‍മികന്‍ ആര്‍ച്ച് ബിഷപ്പ് എമിരറ്റസ് കര്‍ദിനാള്‍ മാര്‍ ജോര്‍ജ് ആലഞ്ചേരി. രാവിലെ 5.45നും 7.30നും വിശുദ്ധ കുര്‍ബാനയുണ്ടാകും. നിര്‍മലാഭവന്‍ സബ്‌സെന്‍ററിലും വെള്ളായണി ലിറ്റില്‍ ഫ്ളവര്‍ ദേവാലയത്തിലും ഈസ്റ്റര്‍ ദിനത്തില്‍ രാവിലെ മൂന്നിന് ഇയിര്‍പ്പിന്‍റെ തിരുക്കര്‍മങ്ങള്‍ ആരംഭിക്കും. വെട്ടുകാട് മാദ്രെ ദെ ദേവൂസ് ദേവാലയത്തില്‍ നാളെ രാത്രി 10.30ന് ഈസ്റ്റര്‍ തിരുക്കര്‍മങ്ങള്‍ ആരംഭിക്കും. ഈസ്റ്റര്‍ ദിനത്തില്‍ രാവിലെ 7.30നും 11നും വൈകുന്നേരം അഞ്ചിനും 6.45 നും ദിവ്യബലി. കോട്ടണ്‍ഹില്‍ കാര്‍മല്‍ഹില്‍ ആശ്രമ ദേവാലയത്തില്‍ നാളെ രാത്രി 11ന് ഈസ്റ്റര്‍ തിരുക്കര്‍മങ്ങള്‍ ആരംഭിക്കും. ഈസ്റ്റര്‍ ദിനത്തില്‍ 6.30നും രാവിലെ 8.30 നും 11നും വൈകുന്നേരം നാലിനും 5.30നും ദിവ്യബലി. കണ്ണമ്മൂല വിശുദ്ധ മദര്‍ തെരേസ പള്ളിയില്‍ ഈസ്റ്റര്‍ ദിനത്തില്‍ രാവിലെ മൂന്നിന് ഉയിര്‍പ്പിന്‍റെതിരുക്കര്‍മങ്ങള്‍ ആരംഭിക്കും. രാവിലെ ഏഴിനും വിശുദ്ധ കുര്‍ബാനയുണ്ടാകും. പാളയം സമാധാനരാജ്ഞി ബസിലിക്കയില്‍ നാളെ വൈകുന്നേരം ആറിന് ഉയിര്‍പ്പിന്‍റെ ശുശ്രൂഷകള്‍ ആരംഭിക്കും. സ്‌പെന്‍സര്‍ ജംഗ്ഷനിലുള്ള സെന്‍റ് ജോര്‍ജ് ഓര്‍ത്തഡോക്‌സ് സിറിയന്‍ കത്തീഡ്രല്‍ ദേവാലയത്തില്‍ ഞായര്‍ രാവിലെ അഞ്ചിന് രാത്രി നമസ്‌കാരം, പ്രഭാത നമസ്‌കാരം തുടര്‍ന്ന് ഉയിര്‍പ്പിന്‍റെ ശുശ്രൂഷകള്‍. പോങ്ങുംമൂട് വിശുദ്ധ അല്‍ഫോന്‍സാ പള്ളിയില്‍ നാളെ രാത്രി പത്തിന് ഈസ്റ്റര്‍ ശുശ്രൂഷകള്‍ ആരംഭിക്കും. ഞായര്‍ രാവിലെ 6.15നും വിശുദ്ധ കുര്‍ബാനയുണ്ടാകും. ശ്രീകാര്യം എമ്മാവൂസ് ദേവാലയത്തില്‍ ഈസ്റ്റര്‍ ദിനത്തില്‍ രാവിലെ നാലിന് ഉയിര്‍പ്പിന്‍റെ ശുശ്രൂഷകള്‍ ആരംഭിക്കും. രാവിലെ 6.30നും 9.30നും വിശുദ്ധ കുര്‍ബാനയുണ്ടാകും. സെന്‍റ് പീറ്റേഴ്‌സ് യാക്കോബായ സുറിയാനി ഓര്‍ത്തഡോക്‌സ് സിംഹാസന കത്തീഡ്രലില്‍ ഈസ്റ്റര്‍ ദിനത്തില്‍ രാവിലെ 5.30ന് ഉയിര്‍പ്പിന്‍റെ തിരുക്കര്‍മങ്ങള്‍ ആരംഭിക്കും. വട്ടിയൂര്‍ക്കാവ് എസ്എഫ്എസ് പള്ളിയില്‍ നാളെ രാത്രി പത്തിന് ഈസ്റ്റര്‍ ശുശ്രൂഷകള്‍ ആരംഭിക്കും. ഞായര്‍ രാവിലെ ഏഴിനും വിശുദ്ധ കുര്‍ബാനയുണ്ടാകും. മണ്ണന്തല സെന്‍റ് ജോണ്‍ പോള്‍ രണ്ടാമന്‍ മലങ്കര ദേവാലയത്തില്‍ നാളെ രാത്രി 9.30ന് ഉയിര്‍പ്പിന്‍റെ ശുശ്രൂഷകള്‍ ആരംഭിക്കും. ബാര്‍ട്ടന്‍ഹില്‍ വിശുദ്ധ പത്താം പിയൂസ് ക്‌നാനായ കത്തോലിക്ക പള്ളിയില്‍ നാളെ രാത്രി 9.30ന് ഈസ്റ്റര്‍ തിരുക്കര്‍മ്മങ്ങള്‍ ആരംഭിക്കും. ഞായര്‍ രാവിലെ ഏഴിനും വിശുദ്ധ കുര്‍ബാനയുണ്ടാകും. മുട്ടട ഹോളിക്രോസ് ദേവാലയത്തില്‍ നാളെ രാത്രി 10.30ന് ഈസ്റ്റര്‍ തിരുക്കര്‍മങ്ങള്‍ ആരംഭിക്കും. ഞായര്‍ രാവിലെ ഏഴിനും 9.30നും വിശുദ്ധ കുര്‍ബാനയുണ്ടാകും. നെടുമങ്ങാട് സെന്‍റ് ജെറോം മലങ്കര സുറിയാനി കത്തോലിക്കാ ദേവാലയത്തില്‍ നാളെ വൈകുന്നേരം ഏഴിന് ഈസ്റ്റര്‍ തിരുക്കര്‍മങ്ങള്‍ ആരംഭിക്കും. ഞായര്‍ രാവിലെ ഏഴിനും 9.30 നും വിശുദ്ധ കുര്‍ബാന. വലിയതുറ വിശുദ്ധ ഫ്രാന്‍സിസ് സേവ്യര്‍ ദേവാലയത്തില്‍ നാളെ രാത്രി 10.30ന് ഈസ്റ്റര്‍ തിരുക്കര്‍മങ്ങള്‍ ആരംഭിക്കും. ഞായര്‍ രാവിലെ ഏഴിനും വിശുദ്ധ കുര്‍ബാനയുണ്ടാകും. വെള്ളൂര്‍ക്കോണം ലാ സാലേത് മാതാ മലങ്കര സുറിയാനി കത്തോലിക്കാ ദേവാലയത്തില്‍ നാളെ രാത്രി എട്ടിന് ഈസ്റ്റര്‍ തിരുക്കര്‍മങ്ങള്‍ ആരംഭിക്കും. ഞായര്‍ രാവിലെ ഏഴിനും 9.30 നും വിശുദ്ധ കുര്‍ബാന. മാരായമുട്ടം സോവര്‍ഹില്‍ ലൂഥറന്‍ ചര്‍ച്ചില്‍ ഈസ്റ്റര്‍ ദിനത്തില്‍ രാവിലെ അഞ്ചിന് ഈസ്റ്റര്‍ ഘോഷയാത്ര, തുടര്‍ന്ന് ആരാധന.

പൂർവ വിദ്യാർഥി സംഗമം

തിരുവനന്തപുരം: കരിക്കകം ഗവ. ഹൈസ്കൂളിലെ 1998 ബാച്ചിലെ അംഗങ്ങൾ 27 വർഷങ്ങൾക്കുശേഷം അൽ സാജ് ഇന്‍റർനാഷണൽ കൺവൻഷൻ സെന്‍ററിൽ ഒത്തുചേർന്നു. 50-ലധികം വിദ്യാർഥികളും എട്ട് അധ്യാപകരും പങ്കെടുത്തു. പഴയ കൗമാരക്കാരായ കുട്ടികളായി ഓർമകൾ പങ്കിട്ടും ചിത്രങ്ങൾ പകർത്തിയും ഒരു ആവേശക്കൂട്ടായ്മയ്ക്കാണ് അൽ സാജ് ഓഡിറ്റോറിയം സാക്ഷ്യം വഹിച്ചത്. ഗ്രൂപ്പ് അഡ്മിൻ ഹസീന രാജേഷ്, എക്സിക്യൂട്ടീവ് അംഗങ്ങളായ ദിലീപ്, മനോജ്, സന്ധ്യ, ലെജു, ഋഷി, നിഷ രാജ്,അനുരാജ് എന്നിവർ മുഴുവൻ പരിപാടികളും ഏകോപിപ്പിച്ചു. ഗ്രൂപ്പ് അംഗമായ ജോയി ഗാനങ്ങൾ ആലപിച്ചു. കണ്ണികൾ അകന്ന ബന്ധങ്ങൾ വിളക്കിച്ചേർക്കാനുള്ള വേദിയായും സംഗമം മാറി.

മഹാത്മാഗാന്ധി കുടുംബ സംഗമം

നെടുമങ്ങാട്: മഹാത്മാഗാന്ധി കോൺഗ്രസിന്‍റെ ദേശീയ പ്രസിഡന്‍റായതിന്‍റെ നൂറാം വാർഷികത്തിന്‍റെ ഭാഗമായി കെപിസിസിയുടെ നിർദേപ്രകാരം വാർഡ് കോൺഗ്രസ് കമ്മിറ്റികളുടെ നേതൃത്വത്തിൽ നടക്കുന്ന മഹാത്മാഗാന്ധി കുടുംബ സംഗമം നെടുമങ്ങാട് മണ്ഡലത്തിലെ മാർക്കറ്റ് വാർഡിൽ ജില്ലാ കോൺഗ്രസ് കമ്മിറ്റി വൈസ് പ്രസിഡന്‍റ് സുധീർഷാ പാലോട് ഉദ്ഘാടനം ചെയ്തു. വാർഡ് കോൺഗ്രസ് കമ്മിറ്റി പ്രസിഡന്‍റ് താഹിർ നെടുമങ്ങാട് അധ്യക്ഷത വഹിച്ചു. ഗാന്ധിജിയുടെയും അംബേദ്കറുടെയും ഛായ ചിത്രങ്ങൾക്കു മുന്നിൽ പുഷ്പാർച്ചന നടത്തി. നെട്ടിറചിറ ജയൻ, വട്ടപ്പാറ ചന്ദ്രൻ, ബ്ലോക്ക് പ്രസിഡന്‍റ് ടി. അർജുനൻ, അഡ്വ. എസ് അരുൺകുമാർ, മണ്ഡലം പ്രസിഡന്‍റ് മഹേഷ് ചന്ദ്രൻ, പുങ്കുംമൂട് അജി, വാർഡ് കൗൺസിലറും മഹിളാ കോൺഗ്രസ് ജില്ലാ വൈസ് പ്രസിഡന്‍റുമായ അഡ്വ. ഫാത്തിമ, ഐഎൻടിയുസി നിയോജകമണ്ഡലം പ്രസിഡന്‍റ് നൗഷാദ് ഖാൻ, ബ്ലോക്ക് സെക്രട്ടറി പഴവിള ജലീൽ, അംജത് ഖാൻ, സലീം, ഷാഹിം എസ്, അബ്ദുൽ അസീസ്, അഫ്സൽ വാളിക്കോട്, നസീറ, സുമയ്യ തുടങ്ങിയവർ നേതൃത്വം നൽകി.

വേനൽതുമ്പി കലാജാഥ

നെടുമങ്ങാട്: ബാലസംഘം വേനൽതുമ്പി കലാജാഥയുടെ ഏരിയാതല പരിശീലന ക്യാമ്പ് നാടക -സിനിമാ സംവിധായകൻ ഡോ. പ്രമോദ് പയ്യന്നൂർ ഉദ്ഘാടനം ചെയ്തു. ബാലസംഘം ഏരിയാ പ്രസിഡന്‍റ് അബിയ എസ്. ഷിബു അധ്യക്ഷയായി. 20വരെ കലാജാഥാംഗങ്ങൾക്ക് പരിശീലനം നൽകും. 26 വരെ കലാജാഥ ഏരിയയിലെ മേഖലകളിൽ പര്യടനം നടത്തും. ഏരിയാ മുഖ്യരക്ഷാധികാരി കെ.പി. പ്രമോഷ്, രക്ഷാധികാരികളായ എസ്.എസ്. ബിജു, എസ്.ആർ. ഷൈൻലാൽ, കെ. റഹീം, നഗരസഭാ ചെയർപേഴ്സൺ സി.എസ്. ശ്രീജ, പരിശീലകൻ കൃഷ്ണൻ വേട്ടംമ്പള്ളി, ഏരിയാ കൺവീനർ അജിംഖാൻ, ആനാട് ഹരിപ്രകാശ്, ബാലസംഘം ജില്ലാ കമ്മിറ്റി അംഗം നികുഞ്ജൻ എന്നിവർ പങ്കെടുത്തു. ബാലസംഘം ഏരിയാ സെക്രട്ടറി ആർ.ജെ. ആമിന സ്വാഗതവും സംഘാടക സമിതി കൺവീനർ ബി. നജീബ് നന്ദിയും പറഞ്ഞു.

അംബേദ്കര്‍ ജയന്തി ആഘോഷം

പേരൂര്‍ക്കട: ഭരണഘടനാശില്‍പ്പി ബി.ആര്‍. അംബേദ്കറുടെ ജയന്തിയാഘോഷം ബിജെപി പട്ടം മണ്ഡലം കമ്മിറ്റിയുടെ ആഭിമുഖ്യത്തില്‍ നടത്തി. ബിജെപി പട്ടം മണ്ഡലം പ്രസിഡന്‍റ് മഹാദേവന്‍, കൗണ്‍സിലര്‍ രാജലക്ഷ്മി, നേതാക്കളായ ശ്രീനാഥ്, രാജേഷ് കുമാര്‍, രേണുക, ഷീജ, സുഭാഷ്, വിജയകുമാര്‍ തുടങ്ങിയവര്‍ പങ്കെടുത്തു.

കാട്ടുപന്നിക്കൂട്ടം പൈനാപ്പിൾകൃഷി നശിപ്പിച്ചു

നെടുമങ്ങാട്: പനവൂർ കൃഷിഭവനു കീഴിലെ കൊങ്ങണംകോട് ചിറപ്പതിയിൽ വിളവെടുപ്പിന് തയ്യാറായ ഏഴേക്കറോളം പ്രദേശത്തെ പൈനാപ്പിൾ തോട്ടം കാട്ടുപന്നിക്കൂട്ടം നശിപ്പിച്ചു. മൂന്നു ലക്ഷത്തോളം രൂപയുടെ നഷ്ടം കണക്കാക്കുന്നു. സജി എന്ന കർഷകന്‍റെ നേതൃത്വത്തിൽ നടത്തിവന്ന പാട്ടകൃഷിയാണ് നാമാവശേഷമായത്. കടുത്ത വേനലിൽ മൂന്നര ലക്ഷത്തോളം രൂപ ചെലവിട്ട് ഓലപ്പന്തലുകെട്ടിയും ടാങ്കറിൽ വെള്ളമെത്തിച്ചുമാണ് കർഷകൻ പൈനാപ്പിൾ തോട്ടം പരിപാലിച്ചിരുന്നത്. കഴിഞ്ഞദിവസം രാത്രിയിൽ കൂട്ടമായെത്തിയ കാട്ടുപന്നികൾ കൃഷിയിടം പൂർണമായി നശിപ്പിക്കുകയായിരുന്നു. കൃഷി-വനം ഉദ്യോഗസ്ഥരെ വിവരം അറിയിച്ചെങ്കിലും ബന്ധപ്പെട്ടവർ കൈമലർത്തുകയാണെന്നു പരാതിയുണ്ട്.

യുവാവിന് മർദനം: പ്രതി പിടിയിൽ

പൂന്തുറ: യുവാവിനെ മര്‍ദിച്ച കേസിലെ പ്രതിയെ പൂന്തുറ പോലീസ് അറസ്റ്റ് ചെയ്തു. മണക്കാട് വില്ലേജില്‍ അമ്പലത്തറ വാര്‍ഡില്‍ കല്ലടിമുഖം കടവത്ത് നാല്‍പ്പറയില്‍ വീട്ടില്‍ വിന്‍സന്‍റിന്‍റെ മകന്‍ ആദര്‍ശ് (25) ആണ് പിടിയിലായത്. ഇക്കഴിഞ്ഞ തിങ്കളാഴ്ച രാത്രി 10.30 ഓടുകൂടി പൂന്തുറ ആശുപത്രിയിക്ക് മുന്നില്‍ മുട്ടത്തറ മാണിക്കവിളാകത്തുനിന്നും മണക്കാട് അമ്പലത്തറ കല്ലടിമുഖത്തുള്ള ഫ്‌ളാറ്റിലേക്ക് താമസം മാറിയ നാസറിന്‍റെ മകന്‍ സയിദ് അലിയുമായി (34) പ്രതി വാക്കുതര്‍ക്കത്തില്‍ ഏര്‍പ്പെടുകയും തല അടിച്ചുപൊട്ടിക്കുകയുമായിരുന്നു. മുന്‍ വിരോധമായിരുന്നു ആക്രമണത്തിന് കാരണം. സയ്ദ് അലി നല്‍കിയ പരാതിയില്‍ കേസെടുത്ത പോലീസ് നടത്തിയ അന്വേഷണത്തിലാണ് ആദര്‍ശ് പിടിയിലായത്. പ്രതിയെ റിമാന്‍ഡ് ചെയ്തു.

എംഡിഎംഎ കേസ്; രണ്ടാം പ്രതിപിടിയില്‍

പേരൂര്‍ക്കട: മാരക ലഹരിമരുന്നായ എംഡിഎംഎ വില്‍പ്പന നടത്തിയതുമായി ബന്ധപ്പെട്ട കേസിലെ രണ്ടാം പ്രതിയെ എറണാകുളം കാക്കനാടുനിന്ന് കരമന പോലീസ് പിടികൂടി. കാസര്‍കോഡ് നെല്ലിക്കുന്ന് സ്വദേശി എ.കെ. സല്‍മാന്‍ ഫാരിസ് (32) ആണ് പിടിയിലായത്. കഴിഞ്ഞ മാര്‍ച്ച് 30ന് രാവിലെ 11 മണിയോടെ പോലീസ് കൈമനം സിഗ്നല്‍പോയിന്‍റിനു സമീപം നടത്തിയ പരിശോധനയില്‍ 2.08 ഗ്രാം എംഡിഎംഎയുമായി വിഴിഞ്ഞം പുള്ളൂര്‍ക്കോണം സ്വദേശി ജസീമിനെ (35) പിടികൂടിയിരുന്നു. ഇയാളില്‍നിന്നു ലഭിച്ച വിവരത്തിന്‍റെ അടിസ്ഥാനത്തിലാണ് സല്‍മാന്‍ ഫാരിസിനെ കസ്റ്റഡിയിലെടുത്തത്. കാസര്‍കോഡ് അതിര്‍ത്തിയില്‍നിന്ന് ബൈക്കില്‍ എത്തിക്കുന്ന കഞ്ചാവാണ് ഇവിടെ വില്‍പ്പന നടത്തിവന്നത്. മൊബൈല്‍ ടവര്‍ ലൊ ക്കേഷന്‍ കേന്ദ്രീകരിച്ചുള്ള അന്വേഷണങ്ങളും പ്രതിയെ പിടികൂടാന്‍ സഹായകമായി. പ്രതിയെ റിമാൻഡു ചെയ്തു.

ഹിന്ദുസ്ഥാന്‍ ലാറ്റക്‌സില്‍ മോക്ഡ്രില്‍ നടത്തി

പേരൂര്‍ക്കട: ഊളമ്പാറ ഹിന്ദുസ്ഥാന്‍ ലാറ്റക്‌സില്‍ തിരുവനന്തപുരം ഫയര്‍ഫോഴ്‌സ് മോക്ഡ്രില്‍ സംഘടിപ്പിച്ചു. എല്ലാവര്‍ഷവും എച്ച്എല്‍എല്ലിന്‍റെ ആവശ്യപ്രകാരം നടത്തിവരാറുള്ള മോക്ഡ്രില്ലായിരുന്നു ബുധനാഴ്ച വൈകുന്നേരം മൂന്നുമണിയോടുകൂടി നടത്തിയത്. അടിയന്തര സാഹചര്യം ഉണ്ടായാല്‍ ജീവനക്കാരെ രക്ഷിക്കുന്നത് എങ്ങനെയെന്നതിനെ സംബന്ധിച്ചായിരുന്നു ഒരുമണിക്കൂര്‍ നീണ്ട മോക്ഡ്രില്‍. സ്റ്റേഷന്‍ ഓഫീസര്‍ നിഥിന്‍ രാജിന്‍റെ നേതൃത്വത്തിലാണ് ഫയര്‍ഫോഴ്‌സ് ടീം മോക്ഡ്രില്‍ സംഘടിപ്പിച്ചത്.

കാരക്കോണം സിഎസ്ഐ മെഡിക്കല്‍ കോളജ് ആശുപത്രിയില്‍ ലാപ്രോസ്‌കോപ്പിക് ഉപകരണം

വെള്ളറട: കാരക്കോണം ഡോ. സോമര്‍വെല്‍ സിഎസ്ഐ മെഡിക്കല്‍ കോളജ് ആശുപത്രിയില്‍ അത്യാധുനിക സംവിധാനങ്ങളുള്ള ലാപ്രോസ്‌കോപ്പിക്കല്‍ കാമറ സ്ഥാപിച്ചു. ഓപ്പറേഷന്‍ തിയേറ്ററിന്‍റെ ലോഞ്ചില്‍ കൂടിയ ചടങ്ങില്‍ സര്‍ജറി പ്രൊഫസര്‍ ഡോ. സന്ദീപ് ഉപകരണത്തിന്‍റെ പ്രവര്‍ത്തനോദ്ഘാടനം നിര്‍വഹിച്ചു. അനുബന്ധമായി നടന്ന ഡിജിറ്റല്‍ ഓട്ടോ ക്‌ളെവ്, എമര്‍ജന്‍സി മിനി ഡിജിറ്റല്‍ ഓട്ടോക്‌ളെവ് എന്നിവയുടെ ഉദ്ഘാടനം അനസ്‌തേഷ്യ വിഭാഗം മേധാവി ഡോ. പോള്‍ വില്‍സണ്‍, ഓര്‍ത്തോ വിഭാഗം മേധാവി ഡോ. ജസ്റ്റിന്‍ എന്നിവര്‍ യഥാക്രമം നിര്‍വഹിച്ചു. ഡയറക്ടര്‍ ഡോ. ജെ. ബെനറ്റ് ഏബ്രഹാം, പ്രിന്‍സിപ്പൽ ഡോ. അനുഷ മെര്‍ലിന്‍, മെഡിക്കല്‍ സൂപ്രണ്ട് ഡോ എസ്. ബാബുരാജ്, ബയോ മെഡിക്കല്‍ എന്‍ജിനീയര്‍ വിജുലാല്‍ സുനില്‍, റവ. എ.ആര്‍. സുശീല്‍ എന്നിവര്‍ സംസാരിച്ചു. നാലു കെ. കാമറ സംവിധാനമുള്ള ഈ ഉപകരണത്തിന്, ശസ്ത്രക്രിയകള്‍ക്ക് നിലവിലുള്ള എച്ച് ഡി ക്യാമറയേക്കാള്‍ നാലിരട്ടി വലിപ്പത്തില്‍ ഇമേജുകള്‍ പ്രതിഫലിപ്പിക്കുവാന്‍ കഴിയും. കൂടാതെ ബ്ലീഡിംഗ് ഉണ്ടായാല്‍ ഉറവിടം പെട്ടെന്നു തിരിച്ചറിയാനുള്ള സംവിധാനം, ശസ്ത്രക്രിയ ചെയ്യേണ്ട ആന്തരിക ഭാഗവും അവയവവും പ്രത്യേക നിറത്തില്‍ വേര്‍തിരിച്ചറിയാനുമുള്ള സംവിധാനം എന്നിവയും 75 ലക്ഷത്തോളം വില വരുന്ന ഈ ഉപകരണത്തിനുണ്ട്.

അമ്പലമുക്ക്-പരുത്തിപ്പാറ റോഡ് നവീകരണത്തിനു തുടക്കം

പേരൂര്‍ക്കട: അമ്പലമുക്ക് മുതല്‍ മുട്ടട വഴി പരുത്തിപ്പാറ വരെയുള്ള 2.2 കിലോമീറ്റര്‍ റോഡും അമ്പലമുക്ക് മുതല്‍ എന്‍സിസി റോഡ് വഴി പൂമല്ലിയൂര്‍ക്കോണം വരെയുള്ള 1.55 കിലോമീറ്റര്‍ റോഡും നവീകരിക്കുന്ന പ്രവര്‍ത്തനങ്ങള്‍ക്കു തുടക്കമായി. വെള്ളക്കെട്ട് ഒഴിവാക്കുന്നതിനായി ഓടകളുടെ നവീകരണവും ഇതിനൊപ്പം നടത്തും. സംസ്ഥാന സര്‍ക്കാരിന്‍റെ പ്ലാന്‍ ഫണ്ടില്‍ നിന്നും 3.8 കോടി രൂപ ചെലവഴിച്ചാണ് നവീകരണം നടത്തുന്നത്. മേയ് പകുതിയോടെ നവീകരണം പൂര്‍ത്തീകരിക്കാനാകുമെന്നാണു പ്രതീക്ഷിക്കുന്നതെന്ന് വി.കെ. പ്രശാന്ത് എംഎല്‍എ പറഞ്ഞു. നിലവില്‍ നിര്‍മാണം പുരോഗമിക്കുന്ന നെട്ടയം-മൂന്നാംമൂട്-മണലയം റോഡ് പണികൂടി പൂര്‍ത്തീകരിക്കുന്നതോടെ വട്ടിയൂര്‍ക്കാവ് മണ്ഡലത്തിലെ 90 ശതമാനം റോഡുകളുടെയും നവീകരണം പൂര്‍ത്തിയാകുമെന്ന് എംഎല്‍എയുടെ ഓഫീസ് അറിയിച്ചു.

അപകടങ്ങൾ തുടർക്കഥയാകുന്നു : വണ്ടിത്തടം-പാലപ്പൂര് റോഡ് ശോച്യാവസ്ഥയിൽ

തിരുവല്ലം: തകര്‍ന്ന് അപകടാവസ്ഥയിലായ വണ്ടിത്തടം-പാലപ്പൂര് റോഡിന്‍റെ ശോച്യാവസ്ഥ എത്രയും വേഗം പരിഹരിക്കണമെന്ന നാട്ടുകാരുടെ ആവശ്യം ശക്തമാകുന്നു. റോഡിന്‍റെ പുനര്‍നിര്‍മാണത്തിനായി 1.64 കോടി രൂപ അനുവദിച്ചിട്ടും ബന്ധപ്പെട്ട അധികൃതരുടെ ഭാഗത്തുനിന്നും കടുത്ത അനാസ്ഥയാണുണ്ടാകുന്നതെന്നും നാട്ടുകാര്‍ ആരോപിക്കുന്നു. റോഡിന്‍റെ മൂന്ന് കിലോമീറ്ററോളം ദൂരം വരുന്ന ഭാഗമാണ് മാസങ്ങളായി തകർന്നു സഞ്ചാരയോഗ്യമല്ലാതായി മാറിയത്. അടിയന്തര സാഹചര്യങ്ങളില്‍ രോഗികളെ ആശുപത്രിയിലെത്തിക്കാന്‍ പോലും വാഹനങ്ങള്‍ക്ക് പ്രദേശത്ത് എത്തിച്ചേരാന്‍ കഴിയാത്ത സാഹചര്യമാണ് നിലവിലുള്ളത്. പൈപ്പ് ലൈനിൽ പൊട്ടലുണ്ടാ യതിനെ തുടര്‍ന്ന് കുടിവെള്ളം ഒഴുകി റോഡിന്‍റെ വശത്തായി വൻ കുഴികള്‍ രൂപപ്പെട്ടിട്ടുണ്ട്. വണ്ടിത്തടത്തിനും പാലപ്പൂരിനും ഇടയിലുളള തകര്‍ന്ന റോഡില്‍ ദിനംപ്രതി നിരവധി ഇരുചക്രവാഹനാപകടങ്ങള്‍ നടക്കാറുണ്ടെന്നും നാട്ടുകാര്‍ പറയുന്നു. തകര്‍ന്ന റോഡിന്‍റെ ശോച്യാവസ്ഥ പരിഹരിച്ച് എത്രയും വേഗം സഞ്ചാരയേഗ്യമാക്കണമെന്നാണ് പൊതുജനങ്ങളുടെ ആവശ്യം.

കോട്ടയ്ക്കല്‍ എന്‍എസ്എസ് ലഹരിവിരുദ്ധപ്രചാരണദിനം

വെള്ളറട: കോട്ടയ്ക്കല്‍ എന്‍എസ്എസ് കരയോഗത്തിന്‍റെ നേതൃത്വത്തില്‍ സംഘടിപ്പിച്ച ലഹരിവിരുദ്ധ പ്രചാരണദിനം മാരായമുട്ടം സര്‍ക്കിള്‍ ഇന്‍സ്പക്ടര്‍ ധനപാലന്‍ ഉദ്ഘാടനം ചെയ്തു. കരയോഗം പ്രസിഡന്‍റ് ജെ. പത്മകുമാര്‍ അധ്യക്ഷത വഹിച്ചു. കരയോഗംസെക്രട്ടറി ആര്‍. വിനോദ് സ്വാഗതവും ട്രഷറര്‍ എസ്.കെ. സതീഷ്‌കുമാര്‍ നന്ദിയും പറഞ്ഞു. ഭാരവാഹികളായ സുമാരന്‍ നായര്‍, വിജയകുമാരന്‍നായര്‍, രാജശേഖരന്‍നായര്‍, ആര്‍. രതീഷ്, മറ്റു കരയോഗ അംഗങ്ങൾ, വനിതാ സമാജം അംഗങ്ങൾ, ബാലസമാജം കുട്ടികൾ എന്നിവരും പങ്കെടുത്തു.

ലോഗോ ദുരുപയോഗം; തകരപ്പറമ്പിലെ കടകളില്‍ പരിശോധന

പേരൂര്‍ക്കട: ആപ്പിള്‍ കമ്പനിയുടെ ലോഗോ ദുരുപയോഗം ചെയ്തുവെന്ന പരാതിയെത്തുടര്‍ന്ന് തകരപ്പറമ്പിലെ കടകളില്‍ വഞ്ചിയൂര്‍ പോലീസ് പരിശോധന നടത്തി. 10 കടകളിലാണ് പരിശോധന നടത്തികോപ്പി റൈറ്റ് ആക്ട് പ്രകാരം കേസെടുത്തു. മൂന്നുകടകളില്‍ നിന്നു മൊബൈല്‍ഫോണ്‍ ആക്‌സസറികള്‍ പിടിച്ചെടുത്തു. പൗച്ചുകള്‍, ബ്ലൂടൂത്തുകള്‍, ഹെഡ്‌സെറ്റുകള്‍, സ്‌ക്രീന്‍ ഗാര്‍ഡുകള്‍ എന്നിവയാണ് പിടിച്ചെടുത്തത്. സിഐ എച്ച്.എസ് ഷാനിഫ്, എസ്ഐമാരായ അലക്‌സ്, ജോസ് എന്നിവരാണ് പരിശോധക സംഘത്തില്‍ ഉണ്ടായിരുന്നത്. വ്യാജ ആക്‌സസറികളില്‍ തങ്ങളുടെ ലോഗോ ഉപയോഗിച്ച് ദുരുപയോഗം നടത്തിയെന്ന കമ്പനിയുടെ പരാതിയുടെ അടിസ്ഥാനത്തിലായിരുന്നു പരിശോധന.

ഭാര്യയെ ആക്രമിച്ച യുവാവ് പിടിയിൽ

കാട്ടാക്കട: ആറുമാസത്തോളമായി പിണങ്ങിക്കഴിയുകയായിരുന്ന ഭാര്യയെ വീട്ടിലെത്തി ആക്രമിച്ചയാളെ മാറനല്ലൂർ പോലീസ് അറസ്റ്റ് ചെയ്തു. കൊല്ലം പരവൂർ പൂതംകുളം, ലക്ഷംവീട് കോളനിയിൽ രജിൻകുമാർ (26) ആണ് അറസ്റ്റിലായത്. ഒരാഴ്ച മുമ്പാണ് കേസിനാസ്പദമായ സംഭവം. ഇൻസ്റ്റഗ്രാം വഴി പരിചയപ്പെട്ട കണ്ടല സ്വദേശിനിയെ യുവതിയെ രണ്ടു വർഷം മുൻപാണ് ഇയാൾ വിവാഹം കഴിച്ചത്. സ്ഥിരമായി ലഹരി ഉപയോഗിക്കുന്നുവെന്നും മർദിക്കുന്നുവെന്നും ആരോപിച്ചു യുവതി കണ്ടലയിലെ വീട്ടിലേക്കു തിരിച്ചെത്തി. ഒരാഴ്ച മുൻപ്‌ സുഹൃത്തിനൊപ്പം കണ്ടലയിലെ വീട്ടിലെത്തിയ രജിൻകുമാർ കുഞ്ഞിനെ മുറിയിൽ പൂട്ടിയിട്ടശേഷം ഭാര്യയെ ആക്രമിച്ചു പരിക്കേൽപ്പിച്ചു. തുടർന്നാണ് യുവതി പരാതി നൽകിയത്. തിങ്കളാഴ്ച കൊല്ലത്തുനിന്നാണ്‌ രജിൻകുമാർ പിടിയിലായത്‌.

തകഴി സാഹിത്യ പുരസ്‌കാരം കവിതാ വിശ്വനാഥിന്

വെള്ളറട: തകഴി സാഹിത്യ പുരസ്‌കാരത്തിന് കവിതവിശ്വനാഥ് അര്‍ഹയായി. പ്രഭാത് ബുക്ക് ഹൗസ് പ്രസിദ്ധീകരിച്ച ജീവിതം നീയും ഞാനും എന്ന നോവലിനാണ് പുരസ്‌കാരം. 20,000 രൂപയും ഫലകവുമടങ്ങുന്ന പുരസ്‌കാരം 19നു വൈകുന്നേരം നാലിനു കോഴിക്കോട് ഇന്‍ഡോര്‍ സ്‌റ്റേഡിയം ഹാളില്‍ നടക്കുന്ന സാഹിത്യ സമ്മേളനത്തിൽ സമ്മാനിക്കും. ചടങ്ങില്‍ കലാ സാഹിത്യ മേഖലയിലെ പ്രമുഖര്‍ പങ്കെടുക്കും. കലാസാഹിത്യ സിനിമ സാമൂഹിക പ്രവര്‍ത്തകയായ കവിതാ വിശ്വനാഥ് തിരുവനന്തപുരം അയണിമൂട് സ്വദേശിയാണ്. കവിത, കഥ, നോവല്‍, ബാലസാഹിത്യം തുടങ്ങിയ മേഖലകളില്‍ പതിനഞ്ചോളം പുസ്തകങ്ങള്‍ കവിതാ വിശ്വനാഥ് പ്രസിദ്ധീകരിച്ചിട്ടുണ്ട്

കാല്‍നടയാത്രക്കാര്‍ ജാഗ്രതൈ; കാത്തിരിക്കുന്നതു ചതിക്കുഴികള്‍..!

പേരൂര്‍ക്കട: പടിഞ്ഞാറേക്കോട്ട സബ് ട്രഷറിക്കു സമീപം കാല്‍നടയാത്രികരെ കാത്തിരിക്കുന്നത് ചതിക്കുഴികള്‍. റോഡുവശത്തുകൂടി കടന്നുപോകുന്ന സ്ലാബുകള്‍ ഇളകിക്കിടക്കുന്ന ഓടയാണ് ഇവര്‍ക്കു ഭീഷണി സൃഷ്ടിക്കുന്നത്. ട്രഷറിക്കു സമീപത്തുനിന്ന് മുരുകന്‍സ്വാമി ക്ഷേത്രത്തിലേക്കു പോകുന്ന റോഡിന്‍റെ തുടക്കത്തിലാണ് ഒരു സ്ലാബ് ഇളകി ഓടയില്‍ വീണുകിടക്കുന്നത്. മറ്റൊന്ന് സബ്ട്രഷറി റോഡ് അവസാനിക്കുന്ന ഭാഗത്താണ്. ട്രഷറിക്ക് എതിര്‍വശത്തായി കടകള്‍ക്കു സമീപവും സ്ലാബ് പൊട്ടിക്കിടക്കുന്നുണ്ട്. ഇളകിയ സ്ലാബുകളില്‍ ചവിട്ടിയാല്‍ നേരേ പോകുന്നത് ഒന്നരയാള്‍ താഴ്ചയുള്ള ഓടയിലേക്കാണ്. ഇതിനകം നിരവധിപേരാണ് അത്യാഹിതത്തില്‍നിന്നു കഷ്ടിച്ച് രക്ഷപ്പെട്ടിട്ടുള്ളത്. സ്ലാബുകളുടെ പ്രശ്‌നം ഒരുവശത്ത് നില്‍ക്കുമ്പോള്‍ മറുവശത്തുള്ളത് കാല്‍നടയാത്രികര്‍ക്ക് തടസം സൃഷ്ടിച്ചുകൊണ്ട് നടപ്പാതയില്‍ വച്ചിട്ടുള്ള തടസങ്ങളാണ്. കേബിളുകള്‍ ചുരുട്ടി സൂക്ഷിക്കുന്ന വുഡ് വീലും സേഫ്റ്റികോണുകളും ഈ ഭാഗത്ത് കാണാന്‍ സാധിക്കും. വാഹനങ്ങള്‍ നിരനിരയായി പാര്‍ക്ക് ചെയ്യാറുള്ളതിനാല്‍ ട്രഷറിക്കു സമീപത്തുകൂടി പോകുന്നവര്‍ക്ക് നടപ്പാത മാത്രമേ ഉപയോഗിക്കാന്‍ സാധിക്കുകയുള്ളൂ. നിരന്തരം സ്വകാര്യ ബസുകളും കെഎസ്ആര്‍ടിസി ബസുകളും കടന്നുപോകുന്നതിനാല്‍ നടപ്പാത തീര്‍ച്ചയായും ഉപയോഗിക്കേണ്ടതായിവരും. എന്നാല്‍ വയോധികര്‍ ഉള്‍പ്പെടെയുള്ളവര്‍ക്ക് ഇത് അപകടഭീഷണി ഉണ്ടാക്കുകയും ചെയ്യുന്നുണ്ട്.

പാടശേഖരം മണ്ണിട്ടു നികത്തി; കൃഷിഭൂമി വെള്ളത്തിൽ

വെള്ളറട: അനധികൃതമായി പാടശേഖം മണ്ണിട്ട് നികത്തിയതിനാൽ സമീപത്തെ കൃഷിഭൂമി വെള്ളത്തിലായതായി ആക്ഷേപം.ഒറ്റശേഖരമംഗലം വില്ലേജ് പരിധിയിലാണ് അനധികൃതമായി പാടശേഖരം നികത്തല്‍ നടക്കുന്നത്. കരിക്കകം വീട്ടില്‍ സുരേന്ദ്രനാണ് അനധികൃതമായി പാടശേഖരം നികത്തിയതെന്നാണ് ആരോപണം ഉയരുന്നത്. സ്ഥലത്തുനിന്നു മണ്ണു നീക്കി മറ്റൊരു സ്ഥലം ചൂണ്ടിക്കാണിച്ചാണ് അനുമതി വാങ്ങുന്നത്. എന്നാല്‍ മണ്ണ് അനധികൃതമായി പാടശേഖരത്തില്‍ തിരികെ കൊണ്ട് നിക്ഷേപിച്ചതോടെ സമീപവാസികളുടെ പാടശേഖരങ്ങളില്‍ വെള്ളംകയറി കൃഷിക്ക് ഉപയോഗമില്ലാത്ത അവസ്ഥയിലായി. രാത്രിയിലാണ് അനധികൃതമായി പാടശേഖം നികത്തിയത്. പുലര്‍ച്ചെ സമീപ വസ്തുവിന്മന്‍റെ മോഹനകുമാര്‍ പാടശേഖരത്തെത്തിയപ്പോള്‍ പാടശേഖരം നികത്തിയതു ശ്രദ്ധയിൽപ്പെടുകയും ഉടന്‍തന്നെ പഞ്ചായത്തിലും വില്ലേജിലും പരാതിപ്പെടുകയുമായിരുന്നു. തുടര്‍ന്നും മണ്ണ് നിക്ഷേപിക്കാനുള്ള നീക്കം പഞ്ചായത്ത് അധികൃതരും വില്ലേജ് അധികൃതരും തടയുകയായിരുന്നു. ഉടന്‍ തന്നെ മുഖ്യമന്ത്രിക്കും കളക്ടര്‍ക്കും പരാതി നല്‍കി. ഒരു സ്ഥലത്തുനിന്നു മണ്ണു നീക്കം ചെയ്യാനുള്ള അനുമതി ലഭിച്ചാല്‍, അത്തരത്തിൽ മാറ്റുന്ന മണ്ണ് എവിടെയാണു നിക്ഷേപിക്കുന്നത് എന്നു നോക്കാനുള്ള സംവിധാനം ഇല്ലാത്തതാണ് ഇത്തരം സംഭവങ്ങള്‍ ആവര്‍ത്തിക്കാന്‍ കാരണം. വേനല്‍മഴ എത്തിയതോടെ തന്നെ മോഹനകുമാറിന്‍റെ കൃഷിഭൂമിയില്‍ വെള്ളം മുങ്ങി. ഇനി കാലവർഷംകൂടി ശക്തമായാൽ കൃഷി ഭൂമി പൂര്‍ണമായും വെള്ളത്തില്‍ മുങ്ങും. അനധികൃതമായി നിക്ഷേപിച്ച മണ്ണു നീക്കം ചെയ്തില്ലെങ്കിൽ മോഹനകുമാറിനും പ്രദേശത്ത് മറ്റു കർഷകർക്കും കൃഷി ചെയ്യാൻ സാധിക്കാത്ത അവസ്ഥയാണ്.

കാട്ടുപന്നി ഇടിച്ചു ദന്പതിമാർക്ക് പരിക്ക്

കാട്ടാക്കട : കാട്ടുപന്നി ഇടിച്ച് സ്‌കൂട്ടർ യാത്രികർക്കു പരിക്ക്. വിളപ്പിൽശാല കുന്നുപുറം വാഴവിളാകത്താണ് സ്‌കൂട്ടറിൽ യാത്ര ചെയ്യവെ ദമ്പതികളായ രമേഷ്- വിദ്യ എന്നിവർക്കു പരിക്കേറ്റത്. കഴിഞ്ഞദിവസം രാത്രി എട്ടോടെയായിരുന്നു അപകടം. ഇവർ യാത്രചെയ്തിരുന്ന സ്കൂട്ടറിൽ എതിരേ പാഞ്ഞുവന്ന കാട്ടുപന്നി ഇടിക്കുകയായിരുന്നു. പരുക്കേറ്റ ദന്പതിമാരെ ഉടൻ ആംബുലൻസിൽ മെഡിക്കൽകോളജിലെത്തിച്ചു. അതിനിടെ മറ്റൊരു ബൈക്ക് യാത്രികൻ അത്ഭുതകരമായി രക്ഷപ്പെടുകയും ചെയ്തു.

ഹോട്ടല്‍മുറിയിലെ അക്രമം; കുപ്രസിദ്ധ ഗുണ്ട പിടിയില്‍

പേരൂര്‍ക്കട: ഹോട്ടല്‍മുറിയില്‍ നടന്ന അതിക്രമവുമായി ബന്ധപ്പെട്ട് കുപ്രസിദ്ധ ഗുണ്ടയെ തമ്പാനൂര്‍ പോലീസ് പിടികൂടി. ശാസ്തമംഗലം സ്വദേശി മുഹമ്മദ് ആസിഫ് (38) ആണ് പിടിയിലായത്. മുട്ടട സ്വദേശി നിഥിനാണ് ആക്രമണത്തിനിരയായത്. തമ്പാനൂര്‍ അരിസ്റ്റോ ജംഗ്ഷനിലെ ഒരു ഹോട്ടലില്‍ തിങ്കളാഴ്ച രാത്രി യായിരുന്നു സംഭവം നടന്നത്.

ഡോ. എം.ഐ. സഹദുള്ളയ്ക്ക് റോയല്‍ കോളജ് ഓഫ് ഫിസിഷ്യന്‍സ് അന്താരാഷ്ട്ര ബഹുമതി

തിരുവനന്തപുരം: കിംസ്ഹെല്‍ത്ത് ചെയര്‍മാനും മാനേജിംഗ് ഡയറക്ടറുമായ ഡോ. എം.ഐ. സഹദുള്ളയെ ഫെഡറേഷന്‍ ഓഫ് ദി റോയല്‍ കോളജ് ഓഫ് ഫിസിഷ്യന്‍സ് ഓഫ് ദി യുകെ 2024-ലെ ഇന്‍റര്‍നാഷണല്‍ പേസസ് ചാമ്പ്യന്‍ പുരസ്‌കാരം നല്‍കി ആദരിച്ചു. റോയല്‍ കോളജ് ഓഫ് ഫിസിഷ്യന്‍സ് അന്താരാഷ്ട്ര തലത്തില്‍ നടത്തുന്ന പേസസ് (പ്രാക്ടിക്കൽ അസസ്‌മെന്‍റ് ഓഫ് ക്ലിനിക്കൽ എക്സാമിനേഷൻ സ്കിൽസ്) പരീക്ഷകള്‍ സംഘടിപ്പിക്കുന്നതില്‍ അദ്ദേഹം നല്‍കിയ സംഭാവനകള്‍ പരിഗണിച്ചാണ് ബഹുമതി. തിരുവനന്തപുരം ഹോട്ടല്‍ ഗോകുലം ഗ്രാന്‍ഡില്‍ നടന്ന ഔദ്യോഗിക ചടങ്ങില്‍ ഫെഡറേഷന്‍റെ ചെയര്‍ എക്‌സാമിനര്‍ ഡോ. ഗ്രഹാം ക്യൂറി ഡോ. സഹദുള്ള യ്ക്ക് അവാര്‍ഡ് സമ്മാനിച്ചു. ഡോ. സഹദുള്ളയുടെ നേതൃത്വപാടവത്തിനും ഒപ്പം മെഡിക്കല്‍ വിദ്യാഭ്യാസ രംഗത്തും ക്ലിനിക്കല്‍ പരീക്ഷാ നടത്തിപ്പിലും കിംസ്ഹെല്‍ത്ത് പുലര്‍ത്തുന്ന ഉന്നത നിലവാരത്തിനും ലഭിച്ച സാക്ഷ്യപത്രമാണ് ഈ അംഗീകാരം.

പാസുമായി ഇനി പോറ്റിസാർ വരില്ല

എസ്. മഞ്ജുളാദേവി ഇക്കഴിഞ്ഞ മാർച്ച് 15. തൈക്കാട് ഭാരത് ഭവന്‍റെ വേദി. സംഗീത ഇതിഹാസം ജി. ദേവരാജൻ മാസ്റ്ററെയും ഭാവഗായകൻ പി. ജയചന്ദ്രനെയും അനുസ്മരിക്കുന്ന ചടങ്ങ് നടക്കുകയാണ്. ചടങ്ങിന്‍റെ ഭാഗമായി തലസ്ഥാന നഗരത്തിലെ കലാ-സാംസ്കാരിക പരിപാടികളുടെ നിറസാന്നിധ്യമായ എൻ. രഘുരാമൻ പോറ്റിയെ ആദരിക്കുന്നുണ്ട്... ജി. ദേവരാജൻ മാസ്റ്റർ മെമ്മോറിയൽ ട്രസ്റ്റും ജി. ദേവരാജൻ മാസ്റ്റർ മ്യൂസിക്ക് അക്കാഡമി, ദേവരാഗപുരവും ഭാരത് ഭവനുമായി ചേർന്ന് സംഘടിപ്പിക്കുന്നതാണ് ചടങ്ങ്. രഘുരാമൻ പോറ്റി വേദിയിലേക്കു പതിയെ നടക്കുന്നു. ആദരവ് ഏറ്റുവാങ്ങുന്ന ചടങ്ങായതുകൊണ്ടു തന്നെ തോളിൽ പതിവുള്ള ബാഗില്ല. തോൾ സഞ്ചിയില്ലാത്ത പോറ്റിസാറിനെ കാണുക അപൂർവമാ ണ്. വേദിയിൽ മുഖ്യപ്രഭാഷകനായ പ്രശസ്ത സംഗീത സംവിധായകൻ എം. ജയചന്ദ്രനും ഭാരത് ഭവൻ മെന്പർ സെക്രട്ടറി ഡോ. പ്രമോദ് പയ്യന്നൂരും ചേർന്ന് രഘുരാമൻ പോറ്റിയെ പൊന്നാട അണിയിക്കുന്നു. ചിത്രത്തിൽ കാണുന്നതു പോലെ പുഞ്ചിരിയോടെ നിറഞ്ഞ അഭിമാനത്തോടെ പോറ്റിസാർ നിൽക്കുന്നു. തുടർന്നു രണ്ടുവാക്ക് പറയുവാനായി മൈക്ക് വാങ്ങുന്നു. ജി. ദേവരാജൻ മാസ്റ്ററുമായി എനിക്കു നല്ല അടുപ്പമുണ്ടായിരുന്നു എന്നു പറഞ്ഞുതുടങ്ങിയതും വേദിയിൽ തന്നെ അദ്ദേഹം കുഴഞ്ഞുവീഴുകയായിരുന്നു. സംഘാടകർ അദ്ദേഹത്തെ ഉടൻ തന്നെ ആശുപത്രിയിലെത്തിച്ചിരുന്നു. ചികിത്സയ്ക്കിടയിൽ ഇന്നലെ പുലർച്ചെയാണ് വിടവാങ്ങിയത്. തലസ്ഥാനത്തിന്‍റെ ഹംസം എന്നുപലരും വിശേഷിപ്പിച്ച എൻ. രഘുരാമൻ പോറ്റിക്ക് ഒരു ജന്മനിയോഗമുണ്ടായിരുന്നു. കലാ-സാംസ്കാരിക വേദികളിലേക്കു ആസ്വാദകരെ എത്തിക്കുക എന്നതായിരുന്നു അത്. വിഎസ്എസ്‌സിയിലെ മുൻ ഉദ്യോഗസ്ഥനായിരുന്ന അദ്ദേഹം വിഎസ്എസ്‌സിയുടെ കലാ-സാംസ്കാരിക സംഘടനയായ ബീമിന്‍റെ പ്രവർത്തനത്തിലൂടെയാണ് പാസ് വിതരണ ലോകത്തെത്തിയത്. നീണ്ടവർഷമായി തോൾ സഞ്ചിയുമായി കലാവേദികളിൽ നിന്നും കലാവേദികളിലേക്കു പോറ്റിസാർ നടക്കുകയായിരുന്നു. തോളിലെ ബാഗ് മുഴുവൻ തിരുവനന്തപുരത്തു നടക്കുവാൻ പോകുന്ന കലാ-സാംസ്കാരിക പരിപാടികളുടെ നോട്ടീസുകളായിരുന്നു. 81 വയസിന്‍റെ പ്രശ്നങ്ങൾ മറന്ന് ഓരോ വേദിയിലും സമയത്ത് കലാസ്വാദകർക്കെല്ലാം ഇവ വിതരണം ചെയ്യും. തലസ്ഥാനത്തെ വേദികളിലെ എല്ലാ പ്രധാന പരിപാടികളും ഹൃദിസ്ഥം. നഗരത്തിലെ വന്പൻ സംഘടനകളും ചെറിയ സംഘടനകളും ഒരുപോലെ രഘുരാമൻ പോറ്റിയെ പാസ് നല്കുവാൻ നിയോഗിച്ചിരുന്നു. പോറ്റിസാർ ഉണ്ടെങ്കിൽ ജനം എത്തും എന്ന ഒരു വിശ്വാസം എല്ലാ സംഘടനാ ഭാരവാഹികൾക്കും ഉണ്ടായിരുന്നു. പാസ് വിതരണം നടത്തുന്ന രഘുരാമൻ പോറ്റിയെ പലരും പാസ് സ്വാമി എന്നും സ്നേഹപൂർവം വിളിച്ചിരുന്നു. കലാകാരന്മാരെ വളരെയേറെ സ്നേഹിച്ചിരുന്ന രഘുരാമൻ പോറ്റി അവസാന വേദിയായ ഭാരത് ഭവനിലെത്തിയത് വളരെ സന്തോഷത്തോടെയായിരുന്നു. ജി. ദേവരാജൻ മെമ്മോറിയൽ ട്രസ്റ്റിന്‍റെയും ദേവരാഗപുരത്തിന്‍റെയും സെക്രട്ടറിയും സംഗീത സംവിധായകനുമായ സതീഷ് രാമചന്ദ്രനും ഡോ. കെ. ഓമനക്കുട്ടിയും അടങ്ങുന്ന ഇത്തരമൊരു പ്രമുഖ സദസിൽ ആദരിക്കപ്പെടുന്നത് ആദ്യമായിട്ടാണ് എന്നും അദ്ദേഹം പറഞ്ഞിരുന്നു.

ബിജെപി ഓഫീസ് മാർച്ചിൽ സംഘർഷം

തിരുവനന്തപുരം: പാലക്കാട് എംഎൽഎ രാഹുൽ മാങ്കൂട്ടത്തിലിന് നേരെ കൊലവിളി ഉയർത്തിയ ബിജെപി പ്രവർത്തകർക്കെതിരെ യൂത്ത് കോൺഗ്രസ് തിരുവനനന്തപുരം ജില്ലാ കമ്മിറ്റി ബിജെപി സംസ്ഥാന കമ്മിറ്റി ഓഫീസിനു മുന്നിലേക്ക് നടത്തിയ മാർച്ചിൽ സംഘർഷം. പ്രതിഷേധക്കാരെ നേരിടാൻ നാല് തവണ പൊലീസ് ജലപീരങ്കി പ്രയോഗിച്ചു. പൊലീസുമായി ഉന്തുതള്ളും രൂക്ഷമായതോടെ പോലീസ് ലാത്തി വീശി. സംഘർഷത്തിൽ പാളയം മണ്ഡലം പ്രസിഡന്‍റ് സജീവിന്‍റെ കൈവിരൽ ഒടിഞ്ഞു. മാർച്ച് ജില്ലാ പ്രസിഡന്റ് നേമം ഷജീർ ഉദ്ഘാടനം ചെയ്തു. സംസ്ഥാന സെക്രട്ടറിമാരായ ബി.എസ്. സുബിജ , അഫ്സൽ ബാലരാമപുരം, ആർ.എസ്. വിപിൻ തുടങ്ങിയവർ നേതൃത്വം നൽകി.

മുതലപ്പൊഴിയിലെ മണൽ യുദ്ധകാലാടിസ്ഥാനത്തിൽ നീക്കണം: ജോസ് കെ. മാണി

തിരുവനന്തരം: മുതലപ്പൊഴി മത്സ്യബന്ധന തുറമുഖത്തെ പൊഴിമുഖത്തടിഞ്ഞ മണൽ യുദ്ധകാലാടിസ്ഥാനത്തിൽ ഉടൻ പൂർണമായും നീക്കം ചെയ്യണമെന്ന് കേരള കോൺഗ്രസ് എം ചെയർമാൻ ജോസ് കെ. മാണി. പൊഴിമുഖം അടഞ്ഞതോടെ കടലിൽ പോകാൻ കഴിയാത്ത അവസ്ഥയിലാണ് മത്സ്യത്തൊഴിലാളികൾ. വർഷങ്ങൾക്കുശേഷമാണു മുതലപ്പൊഴിയിൽ ഇത്ര വലിയ തോതിൽ പൂർണമായും മണലടിഞ്ഞ് പൊഴിമുഖം അടയുന്നത്. മണൽ മൂടി പൊഴിമുഖം അടഞ്ഞതിനാൽ ബോട്ടുകളും വള്ളങ്ങളുമടക്കം കടലിലേക്ക് ഇറക്കാൻ സാധിക്കാത്ത അവസ്ഥയാണ്. ആയിരക്കണക്കിന് മത്സ്യത്തൊഴിലാളി കുടുംബങ്ങൾ ഉപജീവനമാർഗ്ഗമായ മത്സ്യബന്ധനം നടത്താനാവാതെ പട്ടിണിയിലാണ്. ആയിരത്തോളം ബോട്ടുകളും 800 ഓളം വള്ളങ്ങളുമാണു കടലിൽ ഇറക്കാൻ കഴിയാതെ കരയിലിരിക്കുന്നത്. മറ്റു മത്സ്യബന്ധന കേന്ദ്രങ്ങളിലേക്ക് മീൻ പിടുത്തത്തിനു പോകുവാൻ അവിടുത്തെ തദ്ദേശവാസികളായ മത്സ്യത്തൊഴിലാളികളുടെ എതിർപ്പുള്ളതിനാൽ അതിനും സാധിക്കുന്നില്ല. ഈ വർഷത്തെ മത്സ്യബന്ധന സീസൺ ഉടൻ ആരംഭിക്കുകയാണ്. കാര്യക്ഷമമല്ലാത്ത ഡ്രഡ്ജറാണ് കഴിഞ്ഞ ദിവസങ്ങളിൽ മണൽ നീക്കത്തിന് ഉപയോഗിച്ചതെന്ന ആക്ഷേപവും ശക്തമാണ്. ഈ പ്രതിസന്ധി ഉടൻ പരിഹരിക്കാൻ നൂതന സംവിധാനങ്ങൾ ഉപയോഗിച്ച് യുദ്ധകാലാടിസ്ഥാനത്തിൽ മണൽ നീക്കം ആരംഭിക്കണമെന്നും ജോസ് കെ. മാണി ആവശ്യപ്പെട്ടു.

ഹരിപ്പാട്ടെ ഗ്രന്ഥശാല എന്‍റെ വഴിയിലെ പ്രചോദനം: ശ്രീകുമാരൻ തന്പി

തിരുവനന്തപുരം : പത്താമത്തെ വയസിലാണ് ഞാൻ ആദ്യമായി ഹരിപ്പാട്ടെ കേരള വർമ മെമ്മോറിയൽ സെൻട്രൽ ലൈബ്രറിയിൽ പോകുന്നത്. എന്‍റെ അമ്മയ്ക്കുവേണ്ടി രണ്ട് പുസ്തകങ്ങൾ എടുക്കുവാനായിരുന്നു അത്. പതിനൊന്നാമത്തെ വയസിൽ ഞാൻ ആദ്യ കവിത എഴുതി. ഗ്രന്ഥശാലയിലെ പുസ്തകങ്ങൾ നല്കിയ പ്രചോദനം എന്‍റെ ആദ്യ കവിതയ്ക്ക് പിന്നിലുണ്ട്. മലയാളത്തിന്‍റെ പ്രിയ കവിയും ഗാനരചയിതാവും സംവിധായകനുമായ ശ്രീകുമാരൻ തന്പിയുടേതാണീ വാക്കുകൾ... വഞ്ചിയൂരിലെ ശ്രീചിത്തിര തിരുനാൾ ഗ്രന്ഥശാലയ്ക്ക് സ്വന്തം പുസ്തകശേഖരം സംഭാവന ചെയ്യുന്ന ചടങ്ങിൽ പ്രസംഗിക്കുകയായിരുന്നു അദ്ദേഹം. ഗ്രന്ഥശാല ഹാളിൽ നടന്ന ചടങ്ങിൽ മുൻ ചീഫ് സെക്രട്ടറിയും ഗ്രന്ഥശാലയുടെ പ്രസിഡന്‍റുമായ ആർ. രാമചന്ദ്രൻ നായർ പുസ്തകങ്ങൾ ഏറ്റുവാങ്ങി. ചടങ്ങിൽ ആർ. രാമചന്ദ്രൻ നായർ അധ്യക്ഷനായി. ഗ്രന്ഥശാല സെക്രട്ടറി കെ. പി. സതീഷ് പങ്കെടുത്തു. നാടക സംവിധായകൻ എസ്. രാധാകൃഷ് ണൻ സ്വാഗതം ആശംസിച്ചു. ഗ്രന്ഥശാല ഭാരവാഹി ശ്രീകുമാർ നന്ദി പറഞ്ഞു.

തെക്കന്‍ കുരിശുമല രണ്ടാംഘട്ട തീർഥാടനം: കുരിശിന്‍റെ വഴികള്‍ ഇന്നു രാവിലെ മുതൽ

വെള്ളറട: പ്രസിദ്ധ തീർഥാടന കേന്ദ്രമായ തെക്കന്‍ കുരിശുമല 68-ാമത് തീര്‍ഥാടനത്തിന്‍റെ രണ്ടാംഘട്ടം ഇന്നു തുടങ്ങും. രാവിലെ അഞ്ചുമുതല്‍ സംഗമവേദിയില്‍ നിന്നും നെറുകയിലേയ്ക്ക് കുരിശിന്‍റെ വഴി പ്രാർഥനകള്‍ ആരംഭിക്കും. വിവിധ സംഘടനകളും സഭാവിഭാഗങ്ങളും ഇടവകകളും കുരിശിന്‍റെ വഴി പ്രാര്‍ഥനകള്‍ക്കു നേതൃത്വം നല്‍കും. പെസഹാ വ്യാഴം, ദുഃഖ വെള്ളി ദിവസങ്ങളില്‍ രാത്രികാല തീർഥാടനത്തിന് ലൈറ്റും മറ്റ് സൗകര്യങ്ങും ഒരുക്കിയിട്ടുണ്ട്. വൈകുന്നേരം ഏഴിനു ദിവ്യബലിയും പാദ ക്ഷാളന ശുശ്രൂഷാകർമവും സംഗമ വേദിയില്‍ നടക്കും. തീർഥാടന കേന്ദ്രം സ്പിരിച്ച്വല്‍ ആനിമേറ്റര്‍ ഫാ. ഹെന്‍സിലിന്‍ ഒസിഡി മുഖ്യ കാര്‍മികത്വം വഹിക്കും. തീർഥാടന കമ്മിറ്റി നേതൃത്വം നല്‍കും. കുരിശുമല ഡിവൈന്‍ ബീറ്റ്‌സ് ഗാനങ്ങള്‍ ആലപിക്കും. തുടര്‍ന്ന് കുരിശുമല, കൂട്ടപ്പു, കൊല്ലകോണം ഇടവകകള്‍ നേതൃത്വം നല്‍കുന്ന തിരുമണിക്കൂര്‍ ആരാധന ആരംഭിക്കും.

മുതലപ്പൊഴിയിലെ മണൽനീക്കൽ : ഹാർബർ എൻജിനീയറുടെ ഓഫീസിലേക്ക് മാർച്ച് നടത്തി

തിരുവനന്തപുരം: ആയിരക്കണക്കിനു കുടുംബങ്ങളെയും മത്സ്യ തൊഴിലാളികളെയും ബാധിക്കുന്നവിഷയത്തിൽ സർക്കാരിന്‍റെ ഭാഗത്തുനിന്നുള്ള അനാസ്ഥക്കും, മത്സ്യത്തൊഴിലാളി സമൂഹത്തോടുള്ള അവഗണനയ്ക്കുമെതിരെ ഐഎൻടിയുസി മുതലപ്പൊഴി ഹാർബർ യൂണിറ്റിന്‍റെ ആഭിമുഖ്യത്തിൽ ഹാർബർ എൻജിനീയറുടെ കാര്യാലയത്തിലേക്കു മാർച്ചും ധർണയും നടത്തി. മൂന്നുമാസമായി മുതലപ്പൊഴിയിൽ അടിഞ്ഞു ൂടിയ മണൽ നീക്കം ചെയ്യുന്നതിനായി നിരവധി നിവേദനങ്ങളും റോഡ് ഉപരോധവും നടത്തിയിട്ടും ക്രിയാത്മകമായ ഒരു നടപടിയും സർക്കാരിന്‍റെ ഭാഗത്തുനിന്നും ഉണ്ടായിട്ടില്ല. നേവിയുടെ സഹായം അടിയന്തിരമായി തേടി ഡ്രെഡ്ജിംഗ് നടത്തുകയോ ഡ്രെഡ്ജിംഗ് കോർപറേഷൻ ഒഫ് ഇന്ത്യയുടെ ഉടമസ്ഥതയിലുള്ള ഡിസിഐ ഗോദാവരി എന്ന വെസ്സൽ എത്തിക്കുയോ ചെയ്യ ണമെന്നും സമരക്കാർ ആവശ്യപ്പെട്ടു. നൂറുകണക്കിനു മത്സ്യത്തൊഴിലാളികളും, പ്രവർത്തകരും അണിനിരന്ന സമരം ഡിസിസി ജനറൽ സെക്രട്ടറി അഡ്വ. എസ്. കൃഷ്ണകുമാർ ഉദ്ഘാടനം ചെയ്തു. ഐഎൻടിയുസി ജില്ലാ വൈസ് പ്രസിഡന്‍റ് വെട്ടുറോഡ് സലാം അധ്യക്ഷത വഹിച്ചു. ഡിസിസി ഭാരവാഹികളായ എം.ജെ. ആനന്ദ്, കെ.എസ്. അജിത്ത് കുമാർ, ബ്ലോക്ക് പ്രസിഡന്‍റ് നൗഷാദ്, കോൺഗ്രസ് മണ്ഡലം പ്രസിഡന്‍റുമാരായ അഡ്വ. എച്ച്.പി. ഹാരിസൻ, എ.ആർ. നിസാർ, കടയറ ജയചന്ദ്രൻ, കഠിനംകുളം ജോയി, മനോജ് മോഹൻ, കെ. ഓമന, വി. ലാലു, ഷഹീൻ ഷാ, മുനീർ, അജിത്ത്, മാടൻവിള നൗഷാദ്, നസിയാ സുധീർ തുടങ്ങിയവർ പ്രസംഗിച്ചു. ഓഫീസിലേക്ക് തള്ളിക്കയറാൻ ശ്രമിച്ച സമരക്കാരും, പോലീസുമായി ഉന്തും തള്ളും ഉണ്ടായതിനെത്തുടർന്ന് ഓഫീസിനു മുന്നിലെ റോഡിൽ കുത്തിയിരുന്ന പ്രവർത്തകരെ നേതാക്കൾ ഇടപെട്ട് ശാന്തരാക്കുകയായിരുന്നു.

തിരുവത്താഴ സ്മരണയിൽ ഇന്ന് പെസഹ

തിരുവനന്തപുരം: പെസഹായുടെയും ദുഃഖവെള്ളിയുടെയും തിരുക്കര്‍മങ്ങള്‍ക്കുമായി ദേവാലയങ്ങള്‍ ഒരുങ്ങി. വിവിധ ദേവാലയങ്ങളില്‍ ഇന്നു നടക്കുന്ന പെസഹായുടെ ശുശ്രൂഷകളില്‍ ആയിരക്കണക്കിനു വിശ്വാസികള്‍ പങ്കുചേരും. വിവിധ മതമേലധ്യക്ഷന്മാരും വൈദീകരും പ്രാര്‍ഥനാ ശുശ്രൂഷകള്‍ക്കു കാര്‍മികത്വം വഹിക്കും. പട്ടം സെന്‍റ് മേരീസ് മേജര്‍ ആര്‍ക്കി എപ്പാര്‍ക്കിയല്‍ കത്തീഡ്രല്‍ ഇന്നു രാവിലെ 7.30ന് പ്രഭാത നമസ്‌കാരം. എട്ടിന് വിശുദ്ധ കുര്‍ബാനയുടെ ആരാധന. ഉച്ചകഴിഞ്ഞ് രണ്ടിനു പൊതു ആരാധനയും വിശുദ്ധ കുര്‍ബാനയുടെ ആശിര്‍വാദവും. മൂന്നിന് ആരംഭിക്കുന്ന കാല്‍കഴുകല്‍ ശുശ്രൂഷയ്ക്ക് മലങ്കര കത്തോലിക്കാ സഭ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ മുഖ്യകാര്‍മികനാകും. തുടര്‍ന്ന് പെസഹാ കുര്‍ബാന. നാളെ രാവിലെ എട്ടിന് ദുഃഖവെള്ളിയുടെ ശുശ്രൂഷകള്‍ ആരംഭിക്കും. പാളയം സെന്‍റ് ജോസഫ്‌സ് കത്തീഡ്രലില്‍ ഇന്നു വൈകുന്നേരം 5.30ന് തിരുവത്താഴ ദിവ്യബലി, ആർച്ച് ബിഷപ് ഡോ. തോമസ് ജെ. നെറ്റോ കാർമികനാകും. കാല്‍കഴുകള്‍ ശുശ്രൂഷ, പൗരോഹിത്യ സ്ഥാപനം, പരിശുദ്ധ കുര്‍ബാന സ്ഥാപനം. രാത്രി എട്ടു മുതല്‍ 12 വരെ ദിവ്യകാരുണ്യ ആരാധന. നാളെ രാവിലെ ഏഴിന് സംയുക്ത കുരിശിന്‍റെ വഴി. രാവിലെ ഒന്‍പത് മുതല്‍ മൂന്നു വരെ പരിശുദ്ധ ദിവ്യകാരുണ്യ ആരാധന. ഉച്ചകഴിഞ്ഞ് മൂന്നിന് പീഡാസഹന അനുസ് മരണം, ദൈവവചന പ്രഘോഷണം, കുരിശാരാധന, ദിവ്യകാരുണ്യ സ്വീകരണം, കുരിശിന്‍റെ വഴി. പിഎംജി ലൂര്‍ദ് ഫൊറോന പള്ളിയില്‍ ഇന്നു വൈകുന്നേരം 5.30ന് പെസഹാ തിരുകര്‍മങ്ങള്‍ ആരംഭിക്കും. മുഖ്യകാര്‍മികന്‍ ഇടവക വികാരി ഫാ.ജോണ്‍ തെക്കേക്കര. കാല്‍ കഴുകള്‍ ശുശ്രൂഷ, പരിശുദ്ധ കുര്‍ബാന എന്നീ തിരുക്കര്‍മങ്ങള്‍. വചന സന്ദേശം റവ.ഡോ. സിറിയക് മഠത്തില്‍. രാത്രി 7.30 മുതല്‍ എട്ടുവരെ പൊതു ആരാധന. നാളെ രാവിലെ 6.30ന് സംയുക്ത കുരിശിന്‍റെ വഴി. രാവിലെ എട്ടു മുതല്‍ ഉച്ചകഴിഞ്ഞ് മൂന്നുവരെ ആരാധന. ഉച്ചയ്ക്ക് 12ന് നേര്‍ച്ചകഞ്ഞി. മൂന്നിന് പീഡാനുഭവ വെള്ളി തിരുക്കര്‍മങ്ങള്‍. മുഖ്യകാര്‍മികന്‍ ചങ്ങനാശേരി അതിരൂപത ആര്‍ച്ച് ബിഷപ് മാര്‍ തോമസ് തറയില്‍. നിര്‍മലാഭവന്‍ സബ്‌സെന്‍ററില്‍ ഇന്നു വൈകുന്നേരം അഞ്ചിന് പെസഹായുടെ തിരുക്കര്‍മങ്ങള്‍ ആരംഭിക്കും. നാളെ രാവിലെ 10 മുതല്‍ 12.30 വരെ ദിവ്യകാരുണ്യ ആരാധന. തുടര്‍ന്നു നേര്‍ച്ചക്കഞ്ഞി. വെട്ടുകാട് മാദ്രെ ദെ ദേവൂസ് ദേവാലയത്തില്‍ ഇന്നു വൈകുന്നേരം അഞ്ചിന് തിരുവത്താഴ ദിവ്യബലി. മുഖ്യകാര്‍മികന്‍ തിരുവനന്തപുരം ലത്തീന്‍ അതിരൂപത സഹായമെത്രാന്‍ ഡോ. ആര്‍. ക്രിസ്തുദാസ്. തുടര്‍ന്ന് ദിവ്യകാരുണ്യ പ്രദക്ഷിണം. നാളെ ഉച്ചകഴിഞ്ഞ് മൂന്നിന് ദുഃഖവെള്ളിയുടെ ശുശ്രൂഷകള്‍ ആരംഭിക്കും. തുടര്‍ന്നു കുരിശിന്‍റെ വഴി. കോട്ടണ്‍ഹില്‍ കാര്‍മല്‍ഹില്‍ ആശ്രമ ദേവാലയത്തില്‍ ഇന്നു രാവിലെ 6.30ന് പ്രാഭാത പ്രാര്‍ഥന. വൈകുന്നേരം ആറിന് ആഘോഷമായ ദിവ്യബലി, കാല്‍കഴുകല്‍ ശുശ്രൂഷ, ദിവ്യകാരുണ്യ പ്രദക്ഷിണം, ആരാധന. നാളെ രാവിലെ 6.30ന് പ്രഭാത പ്രാര്‍ഥന. വൈകുന്നേരം 4.30ന് ദൈവവചന പ്രഘോഷണം, ദിവ്യകാരുണ്യ സ്വീകരണം, കുരിശിന്‍റെ വഴി. കണ്ണമ്മൂല വിശുദ്ധ മദര്‍ തെരേസ പള്ളിയില്‍ ഇന്നു വൈകുന്നേരം അഞ്ചിന് ആഘോഷമായ വിശുദ്ധ കുര്‍ബാന. കാല്‍കഴുകള്‍ ശുശ്രൂഷ, തിരുമണിക്കൂര്‍ ആരാധന. നാളെ രാവിലെ ഏഴു മുതല്‍ ആരാധന. ഉച്ചയ്ക്ക് 12.30ന് പാന വായന, നേര്‍ച്ച കഞ്ഞി. 1.30ന് ആഘോഷമായ കുരിശിന്‍റെ വഴി. 2.30ന് പൊതുആരാധന. പാളയം സമാധാനരാജ്ഞി ബസിലിക്കയില്‍ ഇന്നു രാവിലെ 6.30ന് പ്രഭാത നമസ്‌കാരം, വിശുദ്ധ കുര്‍ബാന. രാവിലെ 9.30 മുതല്‍ ഉച്ചയ്ക്ക് ഒന്നുവരെ വിശുദ്ധ കുര്‍ബാനയുടെ ആരാധന. നാളെ രാവിലെ ഏഴിനു സുയുക്ത കുരശിന്‍റെ വഴി. 8.30 മുതല്‍ ദുഃഖവെള്ളിയുടെ ശുശ്രൂഷകള്‍. വൈകുന്നേരം ആറിന് സന്ധ്യാപ്രാര്‍ഥന. സ്‌പെന്‍സര്‍ ജംഗ്ഷന്‍ സെന്‍റ് ജോര്‍ജ് ഓര്‍ത്തഡോക്‌സ് സിറിയന്‍ കത്തീഡ്രല്‍ ദേവാലയത്തില്‍ ഇന്നു രാവിലെ അഞ്ചിന് പ്രഭാത നമസ്‌കാരം, വിശുദ്ധ കുര്‍ബാന. ഉച്ചയ്ക്ക് 12ന് ഉച്ചനമസ്‌കാരം. നാളെ രാവിലെ 7.30 ന് പ്രഭാത നമസ്‌കാരം, മൂന്നാം മണി, ഒന്നാം പ്രദക്ഷിണം, ആറാം മണി, ഒന്‍പതാം മണി, സ്ലീബാ വന്ദനവ്. വൈകുന്നേരം ആറിന് സന്ധ്യാ വന്ദനവ്. പോങ്ങുംമൂട് വിശുദ്ധ അല്‍ഫോന്‍സാ പള്ളിയില്‍ ഇന്നു വൈകുന്നേരം അഞ്ചിന് പെസഹായുടെ തിരുക്കര്‍മങ്ങള്‍ ആരംഭിക്കും. ആഘോഷമായ വിശുദ്ധ കുര്‍ബാന, കാല്‍കഴുകള്‍ ശുശ്രൂഷ, ദിവ്യകാരുണ്യ പ്രദക്ഷിണം, ദിവ്യകാരുണ്യ ആരാധന. നാളെ രാവിലെ ഏഴു മുതല്‍ ഉച്ചകഴിഞ്ഞ് മൂന്നു വരെ പരിശുദ്ധ കുര്‍ബാനയുടെ ആരാധന. ഉച്ചയ്ക്ക് 12.30ന് നേര്‍ച്ചക്കഞ്ഞി. നാലു മുതല്‍ വിശുദ്ധ കുരിശിന്‍റെ വഴി. നഗരി കാണിക്കല്‍, തിരുസ്വരൂപ ചുംബനം, കബറടക്കം. ശ്രീകാര്യം എമ്മാവൂസ് ദേവാലയത്തില്‍ ഇന്നു രാവിലെ 6.30ന് വിശുദ്ധ കുര്‍ബാന, കാല്‍കഴുകല്‍ ശുശ്രൂഷ, ദിവ്യകാരുണ്യ ആരാധന. നാളെ ദുഃഖവെള്ളിശുശ്രൂഷകള്‍ രാവിലെ 6.30ന് ആരംഭിക്കും. 6.30 മുതല്‍ ഉച്ചയ്ക്ക് രണ്ടുവരെ ദിവ്യകാരുണ്യ ആരാധന. ഉച്ചകഴിഞ്ഞ് മൂന്നിന് കുരിശിന്‍റെ വഴി, കുരിശു ചുംബനം, നേര്‍ച്ചക്കഞ്ഞി. സെന്‍റ് പീറ്റേഴ്‌സ് യാക്കോബായ സുറിയാനി ഓര്‍ത്തഡോക്‌സ് സിംഹാസന കത്തീഡ്രലില്‍ ഇന്നു രാവിലെ എട്ടിന് പെസഹായുടെ തിരുക്കര്‍മങ്ങള്‍ ആരംഭിക്കും. വട്ടിയൂര്‍ക്കാവ് എസ്എഫ്എസ് പള്ളിയില്‍ ഇന്നു വൈകുന്നേരം അഞ്ചിന് പെസഹായുടെ തിരുക്കര്‍മങ്ങള്‍ ആരംഭിക്കും. നാളെ രാവിലെ ആറിന് സംയുക്ത കുരിശിന്‍റെ വഴി. കാഞ്ഞിരംപാറ സെന്‍റ് ആന്‍റണീസ് മലങ്കര പള്ളിയില്‍ നിന്നും ആരംഭിക്കും. മണ്ണന്തല സെന്‍റ് ജോണ്‍ പോള്‍ രണ്ടാമന്‍ മലങ്കര സിറിയക് കാത്തലിക് ദേവാലയത്തില്‍ പെസഹായുടെ തിരുക്കര്‍മങ്ങള്‍ ഇന്നു രാവിലെ 6.30ന് പ്രഭാത നമസ്‌കാരത്തോടെ ആരംഭിക്കും. തുടര്‍ന്ന് വിശുദ്ധ കുര്‍ബാന. രാവിലെ ഒന്‍പതു മുതല്‍ ഉച്ചയ്ക്ക് ഒന്നു വരെ വിശുദ്ധ കുര്‍ബാനയുടെ ആരാധന. ദുഃഖ വെള്ളിയുടെ ശുശ്രൂഷകള്‍ നാളെ രാവിലെ ഏഴിന് ആരംഭിക്കും. ബാര്‍ട്ടന്‍ഹില്‍ വിശുദ്ധ പത്താം പിയൂസ് ക്‌നാനായ കത്തോലിക്ക പള്ളിയില്‍ ഇന്നു വൈകുന്നേരം 5.45ന് വിശുദ്ധ കുര്‍ബാന, കാല്‍കഴുകല്‍ ശുശ്രൂഷ, ദിവ്യകാരുണ്യ ആരാധന. നാളെ രാവിലെ 6.45ന് സംയുക്ത കുരിശിന്‍റെ വഴി. തുടര്‍ന്ന് 9.45ന് പീഡാനുഭവ തിരുക്കര്‍മങ്ങള്‍, നേര്‍ച്ചക്കഞ്ഞി. മുട്ടട ഹോളിക്രോസ് ദേവാലയത്തില്‍ ഇന്നു വൈകുന്നേരം അഞ്ചിന് തിരുവത്താഴ ദിവ്യബലി. രാവിലെ ഏഴു മുതല്‍ ഉച്ചയ്ക്ക് 12 വരെ ദിവ്യകാരുണ്യ ആരാധന. നാളെ രാവിലെ ഒന്‍പത് മുതല്‍ ദിവ്യകാരുണ്യ ആരാധന. ഉച്ചയ്ക്ക് 12ന് കുരിശിന്‍റെ വഴി. നേര്‍ച്ചക്കഞ്ഞി. ഉച്ചകഴിഞ്ഞ് നാലിന് പീഡാസഹനാനുസ്മരണ തിരുക്കര്‍മങ്ങള്‍. നെടുമങ്ങാട് സെന്‍റ് ജെറോം മലങ്കര സുറിയാനി കത്തോലിക്കാ ദേവാലയത്തില്‍ ഇന്നു രാവിലെ ഒമ്പതു മുതല്‍ വൈകുന്നേരം 5.30 വരെ വിശുദ്ധ കുര്‍ബാനയുടെ പൊതു ആരാധന. വൈകുന്നേരം ആറിന് പെസഹാ കുര്‍ബാന, അപ്പം മുറിക്കല്‍. നാളെ രാവിലെ എട്ടുമുതല്‍ പ്രഭാത പ്രാര്‍ഥന. തുടര്‍ന്ന് ദുഃഖവെള്ളിയുടെ ശുശ്രൂഷകള്‍. വലിയതുറ വിശുദ്ധ ഫ്രാന്‍സിസ് സേവ്യര്‍ ദേവാലയത്തില്‍ ഇന്നു വൈകുന്നേരം അഞ്ചിന് തിരുവത്താഴ ദിവ്യബലി, കാല്‍കഴുകല്‍ ശുശ്രൂഷ. തുടര്‍ന്ന് ദിവ്യകാരുണ്യ ആരാധന. നാളെ രാവിലെ ആറിന് കുരിശിന്റെ വഴി. ഉച്ചകഴിഞ്ഞ് മൂന്നിനു പീഡാസഹനാനുസ്മരണം, വചന പ്രഘോഷണം തുടങ്ങിയ ശുശ്രൂഷകള്‍. വെള്ളൂര്‍ക്കോണം ലാ സാലേത് മാതാ മലങ്കര സുറിയാനി കത്തോലിക്കാ ദേവാലയത്തില്‍ ഇന്നു രാവിലെ ഒന്‍പത് മുതല്‍ ദിവ്യകാരുണ്യ ആരാധന. വൈകുന്നേരം ആറിന് സന്ധ്യാ പ്രാര്‍ഥന, പെസഹാ കുര്‍ബാന. നാളെ രാവിലെ ഏഴിന് പ്രഭാത പ്രാര്‍ഥന. തുടര്‍ന്ന് ദുഃഖവെള്ളി ശുശ്രൂഷകള്‍. ആക്ട്സിന്‍റെ വിശുദ്ധവാര ശുശ്രൂഷകൾ തിരുവനന്തപുരം: ക്രൈസ്തവ സഭകളുടെ കൂട്ടായ്മയായ ആക്ട്സിന്‍റെ ആഭിമുഖ്യത്തിൽ വ്യാഴം, വെള്ളി, ഞായർ ദിവസങ്ങളിൽ പൂജപ്പുര സെൻട്രൽ ജയിലിൽ വിശുദ്ധവാര ശുശ്രൂഷകൾ നടത്തും. ഇന്ന് ബിഷപ് ഡോ. ജോഷ്വാ മാർ ഇഗ്നാ ത്തിയോസും നാളെ ചങ്ങനാശേരി ആർച്ച്ബിഷപ് മാർ തോമസ് തറയിലും വചനസന്ദേശം നൽകും. ഈസ്റ്റർ ദിനശുശ്രൂഷകൾക്ക് ആക്ട്സ് പ്രസിഡന്‍റ് ബിഷപ് ഡോ. ഉമ്മൻ ജോർജും ബിഷപ് മാത്യൂസ് മാർ സിൽവാനോസും നേതൃത്വം നല്കും.

സ്കൂട്ടറപകടത്തിൽ യുവാവ് മരിച്ചു

പൂവാർ: ഭക്ഷണം വാങ്ങാൻ സ്കൂട്ടറിൽ പോയ യുവാവ് അപകടത്തിൽപ്പെട്ട് മരിച്ചു. കരുംകുളം കൊച്ചുതുറ മുടിപ്പുര തട്ട് പൊറ്റയിൽ ബിനുഭവനിൽ പരേതനായ സേവ്യർ-അരുൾശീലി ദമ്പതികളുടെ മകൻ ജിമ്മി റോയ് (45) ആണ് മരിച്ചത്. പാലക്കാട് ചെറുകോൽ പ്രൈമറി ഹെൽത്ത് സെന്‍ററിലെ ഗ്രേഡ് വൺ ജൂണിയർ ഹെൽത്ത് ഇൻസ്പെക്ടറാണ്. കഴിഞ്ഞദിവസം രാത്രി 7.30 ഓടെ കൊച്ചുതുറയിൽ നിന്നും പൂവാറിലേക്ക് പോകുന്നതിനിടയിൽ എരിക്കലുവിളയ്ക്ക് സമീപമായിരുന്നു അപകടം. സ്കൂട്ടർ റോഡിൽ തെന്നി വീണ് അപകടമുണ്ടായതെന്നാണ് പ്രാഥമിക വിവരം. റോഡിൽ കിടന്ന ജിമ്മി റോയിയെ നാട്ടുക്കാർ പൂവാർ ഗവ. ആശുപത്രിയിലും അവിടെ നിന്നും മെഡിക്കൽ കോളജ് ആശുപത്രിയിലേക്ക് കൊണ്ടുപോയെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റുമോർട്ടത്തിന് ശേഷം ബന്ധുക്കൾക്ക് കൈമാറി. പണ്ടാരവിള വീട്ടിൽ പൊതുദർശനത്തിന് ശേഷം ഇന്നലെ വൈകുന്നേരം നാലിനുകൊച്ചുതുറ സെന്‍റ് ആന്‍റണീസ് ചർച്ച് സെമിത്തേരിയിൽ സംസ്കരിച്ചു. പ്രാർഥന: തിങ്കൾ രാവിലെ 11ന് കൊച്ചുതുറ പള്ളിയിൽ. ഭാര്യ: ശാലുജ. മകൾ : ഏഞ്ചലീന എസ്. റോയ്. പൂവാർ പോലീസ് കേസെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]