കിംസ്‌ഹെല്‍ത്ത് കാന്‍സര്‍ പ്രതിരോധ കാമ്പയിന്‍: സര്വോദയ വിദ്യാലയ ഐസിഎസ്ഇ സ്‌കൂളിന് എവര്‍ റോളിംഗ് ട്രോഫി
1531880
Tuesday, March 11, 2025 6:11 AM IST
തിരുവനന്തപുരം: കാന്‍സര്‍ പ്രതിരോധത്തില് പുതിയ തലമുറയുടെ ആശയങ്ങള്‍ അടുത്തറിയുന്നതിനായി ഫൈറ്റ് എഗൈന്‍സ്റ്റ് കാന്‍സര്‍ ടുഗെതര്‍' (ഫാക്ട്) എന്ന പേരില്‍ കിംസ്‌ഹെല്‍ത്ത് കാന്‍സര്‍ സെന്‍റര്‍ സംഘടിപ്പിച്ച പ്രതിരോധ കാമ്പയിനില്‍ നവീന ആശയങ്ങളുമായി സ്‌കൂള്‍ വിദ്യാര്‍ഥികള്‍.
ഒരു മാസത്തോളം നീണ്ട കാമ്പയിനില്‍ കാൻസർ അവബോധം, പ്രതിരോധം നേരത്തെയുള്ള നിര്‍ണയം എന്നീ വിഷയങ്ങളില്‍ ജില്ലയിലെ 18 സ്‌കൂളുകളില്‍ നിന്നുള്ള വിദ്യാർഥികളാണ് പ്രൊജക്ടുകള് അവതരിപ്പിച്ചത്. എട്ട് മുതല്‍ പത്താം ക്ലാസ് വരെയുള്ള വിദ്യാര്‍ഥികള്‍ക്കായി സംഘടിപ്പിക്കപ്പെട്ട 'ഫാക്ടില്‍' നാലാഞ്ചിറ സര്വോദയ വിദ്യാലയ ഐസിഎസ്ഇ സ്‌കൂള്‍ ഒന്നാം സമ്മാനമായ ഒരു ലക്ഷം രൂപയും എവറോളിംഗ് ട്രോഫിയും കരസ്ഥമാക്കി.
രണ്ടാം സ്ഥാനം നേടിയ വഴുതക്കാട് ചിന്മയ വിദ്യാലയ 50,000 രൂപയും മൂന്നാം സ്ഥാനം നേടിയ നാലാഞ്ചിറ സെന്‍റ് ജോണ്സ് മോഡല് സ്‌കൂള്‍ 25,000 രൂപയും നേടി. കാമ്പയിനില്‍ മികച്ച ആശയങ്ങള്‍ അവതരിപ്പിച്ച മറ്റു 18 സ്‌കൂളുകളും 5000 രൂപ വീതമുള്ള കാഷ് അവാർഡിന് അര്‍ഹരായി.
തിരുവനന്തപുരം കിംസ്‌ഹെല്‍ത്തില്‍ നടന്ന ചടങ്ങില്‍ കിംസ്‌ഹെല്‍ത്ത് നാഗര്കോവില് ഡയറക്ടറും കിംസ്‌ഹെല്‍ത്ത് കാന്‍സര്‍ സെന്‍റര്‍ ആന്‍ഡ് സിഎസ്ആര്‍, സിഇഒയുമായ രശ്മി അയിഷ സമ്മാനദാനം നിര്‍വഹിച്ചു. ആർട്ടിഫിഷ്യൽ ഇന്‍റലിജൻസിന്‍റെ സഹായത്തോടെ പ്രവർത്തിക്കുന്ന റോബോട്ട്, ബോധവത്കരണത്തിനായി സാമൂഹിക മാധ്യമങ്ങളുപയോഗിച്ചുള്ള നൂതന കമ്മ്യൂണിക്കേഷൻ മോഡലുകൾ തുടങ്ങി സമൂഹത്തിന്‍റെ ഉന്നമനത്തിനായുള്ള വ്യത്യസ്ത ആശയങ്ങളാണ് കാമ്പയിനിൽ വിദ്യാർഥികൾ പങ്കുവച്ചത്.
കിംസ്ഹെൽത്ത് ക്ലിനിക്കൽ ഡയറക്ടർ ഡോ. ബി. രാജൻ, പ്ലാസ്റ്റിക് - റീകണ്‍സ്ട്രക്ടീവ് ആന്‍ഡ് മൈക്രോവാസ്കുലാര് സര്‍ജറി വിഭാഗം സീനിയര്‍ കണ്‍സള്‍ട്ടന്‍റ് ഡോ. പി.എം. സഫിയ, കിംസ് കോളജ് ഓഫ് നഴ്സിംഗ് പ്രിൻസിപ്പൽ ഡോ. സൂസൻ ജോസ് എന്നിവരും പങ്കെടുത്തു.