കര്‍ദിനാള്‍ മാര്‍ ജോര്‍ജ് കൂവക്കാട്ടും മാര്‍ തോമസ് തറയിലും രാഷ്‌ട്രപതിയെ സന്ദര്‍ശിച്ചു
Wednesday, December 25, 2024 4:39 AM IST
ന്യൂഡല്‍ഹി: കര്‍ദിനാള്‍ മാര്‍ ജോര്‍ജ് കൂവക്കാട്ടും ചങ്ങനാശേരി ആര്‍ച്ച്ബിഷപ് മാര്‍ തോമസ് തറയിലും കേന്ദ്ര ന്യൂനപക്ഷ ക്ഷേമ വകുപ്പു മന്ത്രി ജോര്‍ജ് കുര്യനൊപ്പം രാഷ്‌ട്രപതി ഭവനിലെത്തി രാഷ്‌ട്രപതിയെ സന്ദര്‍ശിച്ച് ക്രിസ്മസ് പുതുവത്‍സര ആശംസകള്‍ നേര്‍ന്നു. കര്‍ദിനാള്‍ മാര്‍ ജോര്‍ജ് കൂവക്കാട്ട് ഫ്രാന്‍സിസ് പാപ്പായുടെ ആശംസകള്‍ രാഷ്‌ട്രപതിയെ അറിയിച്ചു.
ഇരുവരെയും രാഷ്‌ട്രപതി അനുമോദിക്കുകയും ക്രിസ്മസ് ആശംസകള്‍ നേരുകയും ചെയ്തു.
മാര്‍ ജോര്‍ജ് കൂവക്കാട്ടിന്‍റെ കര്‍ദിനാള്‍ സ്ഥാനലബ്ധി അദ്ദേഹത്തിന്‍റെ കഴിവിനും സാധ്യതകള്‍ക്കുമുള്ള അംഗീകാരമാണെന്ന് രാഷ്‌ട്രപതി ദ്രൗപദി മുര്‍മു പറഞ്ഞു.
ആചാര്യന്മാരെ അംഗീകരിക്കുകയും ബഹുമാനിക്കുകയും ചെയ്യുന്ന സംസ്‌കാരമാണ് ഇന്ത്യയുടേതെന്നും മതേതരസ്വഭാവം പുലര്‍ത്തുന്ന ഇന്ത്യയില്‍ എല്ലാ പൗരന്മാര്‍ക്കും തുല്യ അവകാശവും സ്ഥാനവുമുണ്ടെന്നും രാഷ്‌ട്രപതി കൂട്ടിച്ചേര്‍ത്തു.