സിനിമാ പ്രചാരണം: അല്ലു അർജുൻ എത്തിയത് അനുമതിയില്ലാതെയെന്നു മുഖ്യമന്ത്രി രേവന്ത് റെഡ്ഢി
Sunday, December 22, 2024 2:07 AM IST
ഹൈദരാബാദ്: പുഷ്പ-2 സിനിമയുടെ പ്രചാരണത്തിനിടെ തിക്കിലും തിരക്കിലും സ്ത്രീ മരിച്ച സംഭവത്തിൽ തെലുങ്കു സൂപ്പർതാരം അല്ലു അർജുനെ കുറ്റപ്പെടുത്തി തെലങ്കാന മുഖ്യമന്ത്രി എ.രേവന്ത് റെഡ്ഢി. പോലീസിന്‍റെ അനുമതിയില്ലാതെയാണു അല്ലു അർജുൻ തീയറ്ററിലെത്തിയതെന്ന് രേവന്ത് റെഡ്ഢി.
തിക്കിലും തിരക്കിലുംപെട്ടു 35കാരിയായ സ്ത്രീ മരിച്ചതിനുശേഷവും നടൻ തിയേറ്ററിനുള്ളിൽ തുടർന്നതിനാൽ പോലീസിന് നടനെ നിർബന്ധിച്ചു പുറത്തിറക്കേണ്ടിവന്നുവെന്നും നിയമസഭയിൽ അക്ബറുദ്ദീൻ ഒവൈസിയുടെ ചോദ്യത്തിനു മറുപടിയായി മുഖ്യമന്ത്രി പറഞ്ഞു.
നിയന്ത്രണാതീതമായ തിരക്കുണ്ടായിട്ടും റോഡ് ഷോ നടത്തുകയും ആരാധകർക്ക് നേരേ കൈവീശുകയും ചെയ്ത നടന്‍റെ ഭാഗത്താണ് തെറ്റ്. നഗരത്തിലെ സന്ധ്യാ തിയേറ്ററിന്‍റെ മാനേജ്മെന്‍റ് പോലീസ് സുരക്ഷയാവശ്യപ്പട്ടു ഡിസംബർ രണ്ടിനു കത്ത് നൽകിയെങ്കിലും തിരക്ക് നിയന്ത്രിക്കുന്നത് ശ്രമകരമായതിനാൽ അനുമതി നിഷേധിക്കുകയായിരുന്നു.
അറസ്റ്റിന്ശേഷം നടനോട് ഐക്യദാർഢ്യം പ്രകടിപ്പിക്കാൻ അദ്ദേഹത്തിന്‍റെ വസതിയിലേക്ക് പോയ സിനിമാ പ്രവർത്തകർ പരിക്കേറ്റ് ആശുപത്രിയിൽ കഴിയുന്ന എട്ടു വയസുകാരനെ സന്ദർശിക്കാൻ കൂട്ടാക്കിയില്ല-മുഖ്യമന്ത്രി പറഞ്ഞു.
പുഷ്പയുടെ ആദ്യപ്രദർശനത്തിനിടെ തിക്കിലും തിരക്കിലും പെട്ട് മരണമടഞ്ഞ സ്ത്രീയുടെ മകനാണു ആശുപത്രിയിൽ കഴിയുന്ന എട്ടു വയസുകാരൻ.