ദീപാവലി തിരക്ക്; ട്രെയിൻ കയറുന്നതിനിടെ ഒന്പതു പേർക്ക് പരിക്ക്
Monday, October 28, 2024 1:50 AM IST
മുംബൈ: ട്രെയിനിൽ കയറാനുള്ള തിക്കിലും തിരക്കിലും ഒന്പതു പേർക്ക് പരിക്ക്. മുംബൈയിലെ ബാന്ദ്ര റെയിൽവേ സ്റ്റേഷനിൽ ഞായറാഴ്ചയായിരുന്നു സംഭവം.
ഗോരഖ്പുരിനുള്ള അന്ത്യോദയ എക്സ്പ്രസിൽ കയറുന്നതിനിടെയാണു യാത്രക്കാർക്ക് പരിക്കേറ്റത്. രണ്ടു പേരുടെ പരിക്ക് ഗുരുതരമാണ്. ദീപാവലി പ്രമാണിച്ച് നാട്ടിലേക്കു മടങ്ങാൻ എത്തുന്നവരുടെ വലിയ തിരക്കാണ് റെയിൽവേ സ്റ്റേഷനുകളിൽ.
ജനറൽ കംപാർട്ട്മെന്റിൽ കയറാനാണു തിരക്കേറെയും. ഞായറാഴ്ച പുലർച്ചെ 2.45ന് എത്തേണ്ട അന്ത്യോദയ എക്സ്പ്രസ് മണിക്കൂറുകൾ വൈകി അഞ്ചോടെയാണ് എത്തിയത്. ട്രെയിനിൽ കയറാൻ ആയിരത്തോളം പേരാണ് ഒന്നാം നമ്പർ പ്ലാറ്റ്ഫോമിൽ എത്തിയിരുന്നത്.
ട്രെയിൻ പ്ലാറ്റ്ഫോമിലേക്ക് എത്തുമ്പോൾത്തന്നെ യാത്രക്കാർ ചാടിക്കയറാൻ ശ്രമിച്ചതാണ് അപകടത്തിനു കാരണമായതെന്നു റെയിൽവേ പോലീസ് പറയുന്നു.