ലഡാക്കിൽ പഴയ നില പുനഃസ്ഥാപിക്കണമെന്ന് കോൺഗ്രസ്
Thursday, October 24, 2024 2:09 AM IST
ന്യൂഡൽഹി: കിഴക്കൻ ലഡാക്കിലെ യഥാർഥ നിയന്ത്രണരേഖയിൽ (എൽഎസി) ഇന്ത്യയും ചൈനയും പട്രോളിംഗ് നടത്താൻ ധാരണയായെന്ന മോദി സർക്കാരിന്റെ പ്രഖ്യാപനം നിരവധി ചോദ്യങ്ങൾ ഉയർത്തുന്നതായി കോൺഗ്രസ്. എൽഎസിയിൽ 2020 മാർച്ചിലെ തൽസ്ഥിതി പുനഃസ്ഥാപിക്കുമെന്നു പ്രതീക്ഷിക്കുന്നതായി കോൺഗ്രസ് ജനറൽ സെക്രട്ടറി ജയറാം രമേശ് പറഞ്ഞു.
ഇന്ത്യയുടെ വിദേശനയത്തിലുണ്ടായ തിരിച്ചടി മാന്യമായി പരിഹരിക്കപ്പെടുമെന്നാണ് കോൺഗ്രസ് പ്രതീക്ഷിക്കുന്നത്. എന്നാൽ, നേരത്തേ പട്രോളിംഗ് നടത്തിയ ഡെപ്സാംഗിലെ പട്രോളിംഗ് പോയിന്റുകൾ വരെ പട്രോളിംഗ് നടത്താൻ നമ്മുടെ സൈനികർക്ക് കഴിയുമോ തുടങ്ങിയ സുപ്രധാന ചോദ്യങ്ങൾക്ക് ഉത്തരം നൽകണമെന്ന് കോൺഗ്രസ് നേതാവ് ആവശ്യപ്പെട്ടു.
ദെംചോക്കിലെ മൂന്ന് പട്രോളിംഗ് പോയിന്റ് വരെ ഇന്ത്യൻ സൈന്യത്തിനു കടന്നുചെല്ലാൻ കഴിയുമോ? ഗോഗ്ര-ഹോട്ട് സ്പ്രിംഗ്സ് ഏരിയയിലെ മൂന്ന് പട്രോളിംഗ് പോയിന്റുകളിലേക്ക് സൈനികർക്ക് അനുമതിയുണ്ടോ- ജയറാം രമേശ് ചോദിച്ചു.