ബിഷ്ണോയിയുടെ തലയ്ക്ക് ഒരു കോടി വിലയിട്ട് ക്ഷത്രിയ കർണി സേന
Wednesday, October 23, 2024 2:16 AM IST
ന്യൂഡൽഹി: കുപ്രസിദ്ധ ഗുണ്ടാനേതാവ് ലോറൻസ് ബിഷ്ണോയിയെ കൊല്ലുന്നവർക്ക് പാരിതോഷികം പ്രഖ്യാപിച്ച് ക്ഷത്രിയ കർണി സേന. ലോറൻസ് ബിഷ്ണോയിയെ വധിക്കുന്നവർക്ക് 1,11,11,111 രൂപ നൽകുമെന്നാണ് ക്ഷത്രിയ കർണി സേന നേതാവ് രാജ് ഷെഖാവത് പ്രഖ്യാപിച്ചത്.
ബിഷ്ണോയിയുടെ കൂട്ടാളികൾ കഴിഞ്ഞവർഷം പ്രമുഖ രജപുത് നേതാവ് സുഖ്ദേവ് സിംഗിനെ കൊലപ്പെടുത്തിയതിന്റെ പ്രതികാരമായാണു ക്ഷത്രിയ കർണി സേനയുടെ പ്രഖ്യാപനം.
ഗുജറാത്തിലെ സബർമതി ജയിലിൽ കഴിയുന്ന ബിഷ്ണോയിയെ വധിക്കുന്ന ഏതൊരു പോലീസുകാരനും പാരിതോഷികം നൽകുമെന്ന് രാജ് ശെഖാവത് വീഡിയോ സന്ദേശത്തിലൂടെ അറിയിച്ചു.
ക്ഷത്രിയ കർണി സേനയുടെ മുൻ അധ്യക്ഷനായ സുഖ്ദേവ് സിംഗ് കഴിഞ്ഞവർഷം ഡിസംബറിലാണ് ജയ്പുരിൽ വെടിയേറ്റു മരിച്ചത്. സംഭവത്തിന്റെ ഉത്തരവാദിത്വം ബിഷ്ണോയി സംഘം ഏറ്റെടുത്തിരുന്നു.